ថ្ងៃសៅរ៍ ទី១០ ខែមិថុនា ឆ្នាំ២០២៣

អត្ថបទទី១៖ សូមថ្លែងព្រះគម្ពីរលោកតូប៊ីត តប ១២,១.៥-១៥.២

​លោកតូប៊ីតហៅកូនគាត់មក ហើយមានប្រសាសន៍ថា៖ «តើយើងត្រូវយកអ្វីធ្វើជា​ថ្លៃឈ្នួលឱ្យអ្នកដែលជូនដំណើរកូន?»។ អ្នកទាំងពីរហៅទេវទូតរ៉ាផាអែល ហើយ​សូមឱ្យគាត់សុខចិត្តទទួលទ្រព្យសម្បតិ្តដែលគេបាននាំយកមកចំនួនពាក់កណ្តាល។ តែទេវទូត​រ៉ាផាអែលនិយាយការពិតប្រាប់អ្នកទាំងពីរដោយស្ងាត់ៗថា៖ «ចូរអរព្រះគុណព្រះជាម្ចាស់នៃស្ថានបរមសុខ! ចូរលើកតម្កើងព្រះនាមព្រះអង្គនៅមុខសត្វលោកទាំងអស់ដែលមានជីវិត! ព្រោះព្រះអង្គមានធម៌មេត្តាករុណាចំពោះអ្នកទាំងពីរយ៉ាងខ្លាំង។ យើងត្រូវលាក់សេចក្តីអាថ៌កំបាំងរបស់សេ្តច តែត្រូវប្រកាសស្នាព្រះហស្តរបស់ព្រះ​អម្ចាស់ និងលើកតម្កើងព្រះអង្គ ធ្វើដូច្នេះពិតជាការប្រពៃណាស់។ ការអធិដ្ឋាន ការ​តមអាហារ និងការចែកទាន ប្រសើរជាងមាសប្រាក់ទៅទៀត ដ្បិតការចែកទានធ្វើ​ឱ្យរួចពីក្តីស្លាប់ ជម្រះមនុស្សឱ្យរួចពីអំពើបាប និងធ្វើឱ្យព្រះអម្ចាស់អាណិតមេត្តាផ្តល់ជីវិតអស់កល្បជានិច្ចផង។ អ្នកប្រព្រឹត្តអំពើបាប មិនគោរពធម្មវិន័យ នឹងត្រឡប់ទៅ​ជាខ្មាំងសត្រូវរបស់ខ្លួន។ ខ្ញុំសូមប្រាប់សេចក្តីពិតដោយមិនលាក់លៀមអ្វីឡើយ។ ពេលណាលោកអង្វរព្រះអម្ចាស់ទាំងទឹកភ្នែក ពេល​ណាលោកបោះបង់អាហារចោលទៅកប់សាកសព ពេលណាលោកលាក់សាកសពនៅក្នុងផ្ទះវេលាថ្ងៃ ដើម្បីយកទៅ​កប់នៅវេលាយប់ កាលនោះខ្ញុំបានយកពាក្យអង្វររបស់លោកទៅថ្វាយព្រះអម្ចាស់។ ដោយលោកបានគាប់ព្រះហឫទ័យព្រះអម្ចាស់ ដូច្នេះ លោកត្រូវឆ្លងកាត់ទុក្ខលំបាក ដើម្បី​ឱ្យព្រះអង្គល្បងមើលចិត្តលោក។ តែឥឡូវនេះ ព្រះអម្ចាស់ចាត់ខ្ញុំឱ្យមកព្យាបាល​លោកឱ្យបានជា និងរំដោះនាងសារ៉ាជាភរិយារបស់កូនលោក ឱ្យរួចពីអំណាចរបស់បិសាចដែរ។ ខ្ញុំឈ្មោះរ៉ាផាអែល ជាទេវទូតមួយរូប ក្នុងចំណោមទេវទូតទាំងប្រាំពីរ ដែលឈរនៅមុខព្រះភក្ត្រព្រះអម្ចាស់។ ឥឡូវដល់ពេលខ្ញុំត្រឡប់ទៅព្រះអម្ចាស់ដែលចាត់ខ្ញុំឱ្យមកហើយ! អំណើះតទៅ អ្នករាល់គ្នាត្រូវបន្តការអរព្រះគុណព្រះជាម្ចាស់ និងតំណាលពីការអស្ចារ្យទាំងអស់ដែលព្រះអង្គបានប្រព្រឹត្តផង»។

ទំនុកតម្កើងលោកតូប៊ីត ១៣,២.៧-៨ បទកាកគតិ

ពិធីអបអរសាទរព្រះគម្ពីរដំណឹងល្អតាម មថ ៥,៣

អាលេលូយ៉ា! អាលេលូយ៉ា!
អ្នកណាដាក់ចិត្តជាអ្នកក្រខ្សត់ អ្នកនោះមានសុភមង្គល ដ្បិតពួកគេបានទទួលព្រះរាជ្យនៃស្ថានបរមសុខហើយ។ អាលេលូយ៉ា!

សូមថ្លែងព្រះគម្ពីរដំណឹងល្អតាមសន្តម៉ាកុស មក ១២,៣៨-៤៤

នៅគ្រានោះ ព្រះយេស៊ូមានព្រះបន្ទូលបង្រៀនមនុស្សម្នាថា៖ «ចូរប្រយ័ត្ននឹងពួកធម្មាចារ្យឱ្យមែនទែន។ អ្នកទាំងនោះចូលចិត្តពាក់អាវវែង ដើរចុះដើរឡើង ហើយចូលចិត្តឱ្យគេឱនកាយគោរពនៅតាមផ្សារ ព្រមទាំងរើសកន្លែងអង្គុយមុខគេក្នងធម្មសាលា និងចូលចិត្តកន្លែងកិត្តិយសនៅពេលជប់លៀង។ គេតែងនាំគ្នាឆបោកយកទ្រព្យសម្បត្តិរបស់ស្ត្រីមេម៉ាយ ដោយធ្វើឫកជាសូត្រធម៌យ៉ាងយូរ។ អ្នកទាំងនេះនឹងត្រូវទទួលទោសយ៉ាងធ្ងន់បំផុតជាមិនខាន»។ ព្រះយេស៊ូគង់នៅមុខហិបតង្វាយ ព្រះអង្គទតមើលរបៀបដែលបណ្តាជន​យកប្រាក់មកដាក់ក្នុងហិបនោះ។ អ្នកមានច្រើននាក់ ដាក់ប្រាក់ជាច្រើន។ មានស្ត្រីមេម៉ាយក្រីក្រម្នាក់មកដល់ នាងយកប្រាក់ពីរសេន ជាចំនួនដ៏តិចតួចបំផុត ដាក់ក្នុងហិបតង្វាយនោះដែរ។ ព្រះយេស៊ូត្រាស់ហៅក្រុមសាវ័កមក ហើយមានព្រះបន្ទូលទៅគេថា៖ «ខ្ញុំសុំប្រាប់ឱ្យអ្នករាល់គ្នាដឹងច្បាស់ថា ស្ត្រីមេម៉ាយក្រីក្រនេះបានដាក់ប្រាក់ក្នុងហិបច្រើនជាងគេទាំងអស់ ដ្បិតអ្នកទាំងនោះយកប្រាក់សំណល់របស់ខ្លួនមកដាក់។ រីឯស្ត្រីមេម៉ាយនេះវិញ ទោះបីនាងក្រីក្រយ៉ាងណាក៏ដោយ ក៏នាងបានយកប្រាក់ដែលនាងត្រូវការជាចាំបាច់មកដាក់ដែរ គឺប្រាក់ទាំងប៉ុន្មានដែលនាងមានសម្រាប់ចិញ្ចឹមជីវិត»។