ថ្ងៃសៅរ៍ ទី២៤ ខែកុម្ភៈ ឆ្នាំ២០២៤

ពាក្យអធិដ្ឋានពេលចូល

បពិត្រព្រះជាម្ចាស់ដែលគង់នៅអស់កល្បជានិច្ច និងជាព្រះបិតាយើងខ្ញុំ! សូមបង្វែរចិត្តគំនិតយើងខ្ញុំឱ្យវិលទៅរកព្រះអង្គវិញ សូមប្រោសយើងខ្ញុំឱ្យថ្វាយជីវិតទាំងស្រុង ព្រមទាំងបម្រើព្រះអង្គដោយស្វែងរកតែសម្បត្តិសួគ៌ និងប្រព្រឹត្តកិច្ចការទាំងអស់ដោយសេចក្តី ស្រឡាញ់ផង។

សូមថ្លែងព្រះគម្ពីរទុតិយកថា ទក ២៦,១៦-១៩

លោកម៉ូសេមានប្រសាសន៍មកកាន់ប្រជាជនអ៊ីស្រាអែលថា៖ «ថ្ងៃនេះព្រះអម្ចាស់ជាព្រះរបស់អ្នក បង្គាប់ឱ្យអ្នកប្រតិបត្តិតាមក្រឹត្យវិន័យ និងច្បាប់ទាំងនេះ។ ចូរកាន់ និងប្រតិបត្តិតាមឱ្យអស់ពីចិត្ត អស់ពីគំនិត។ ថ្ងៃនេះ អ្នកសុខចិត្តទទួលស្គាល់ថាព្រះអម្ចាស់ជាព្រះរបស់អ្នក ហើយអ្នកយល់ព្រមដើរតាមមាគ៌ារបស់ព្រះអង្គគោរពក្រឹត្យវិន័យ បទបញ្ជា និងច្បាប់ទាំងឡាយរបស់ព្រះអង្គព្រមទាំងស្តាប់បង្គាប់ព្រះអង្គទៀតផង។ ថ្ងៃនេះ ព្រះអម្ចាស់យល់ព្រមទទួលអ្នកជាប្រជារាស្ត្ររបស់ព្រះអង្គផ្ទាល់ ដូចព្រះអង្គមានព្រះបន្ទូលប្រាប់អ្នក ហើយ អ្នកត្រូវប្រតិបត្តិតាមបញ្ជាទាំងប៉ុន្មានរបស់ព្រះអង្គ។ ព្រះអង្គនឹងធ្វើឱ្យអ្នកទៅជាប្រជាជាតិមួយមានកិត្តិយសរុងរឿង មានកេរ្តិ៍ឈ្មោះល្បី ហើយថ្កុំថ្កើងជាងគេក្នុងចំណោមប្រជាជាតិទាំងអស់ដែលព្រះអង្គបានបង្កើតមក។ អ្នកនឹងទៅជាប្រជារាស្ត្រដ៏វិសុទ្ធសម្រាប់ព្រះអម្ចាស់ជាព្រះរបស់អ្នក ដូចព្រះអង្គមានព្រះបន្ទូលទុក»។

ទំនុកតម្កើងលេខ ១១៩ (១១៨), ១-២.៤-៥.៧-៨ បទកាកគតិ

ពិធីអបអរសាទរព្រះគម្ពីរដំណឹងល្អតាម ២ករ ៦,២

សូមថ្លែងព្រះគម្ពីរដំណឹងល្អតាមសន្តម៉ាថាយ មថ ៥,៤៣-៤៨

នៅគ្រានោះក្រុមសាវ័កជួបជុំជាមួយព្រះយេស៊ូនៅលើភ្នំ ព្រះអង្គមានព្រះបន្ទូលទៅគេថា៖ «អ្នករាល់គ្នាធ្លាប់ឮសេចក្តីថ្លែងទុកមកថា ចូរស្រឡាញ់បងប្អូនឯទៀតៗ ហើយស្អប់ខ្មាំងសត្រូវរបស់អ្នក។ រីឯខ្ញុំវិញ ខ្ញុំសុំបញ្ជាក់ប្រាប់អ្នករាល់គ្នាថា ចូរស្រឡាញ់ខ្មាំងសត្រូវរបស់អ្នករាល់គ្នាព្រមទាំងទូលអង្វរព្រះជាម្ចាស់ សូមព្រះអង្គប្រទានពរឱ្យអស់អ្នកដែលបៀតបៀនអ្នករាល់គ្នាផង។ ធ្វើដូច្នេះ អ្នករាល់គ្នានឹងបានទៅជាបុត្រធីតារបស់ព្រះបិតាដែលគង់នៅស្ថានបរមសុខ ដ្បិតព្រះអង្គប្រទានព្រះអាទិត្យរបស់ព្រះអង្គរះបំភ្លឺទាំងមនុស្សអាក្រក់ ទាំងមនុស្សល្អ ហើយទ្រង់ប្រទានទឹកភ្លៀងឱ្យទាំងមនុស្សសុចរិតទាំងមនុស្សទុច្ចរិតផងដែរ។ ប្រសិនបើអ្នករាល់គ្នាស្រឡាញ់តែអស់អ្នកដែលស្រឡាញ់អ្នករាល់គ្នា តើនឹងទទួលរង្វាន់អ្វី? សូម្បីតែអ្នកទារពន្ធក៏ចេះស្រឡាញ់គ្នាគេដែរ។ បើអ្នករាល់គ្នារាប់រកតែបងប្អូនរបស់ខ្លួនប៉ុណ្ណោះ តើមានអ្វីអស្ចារ្យ? សូម្បីតែសាសន៍ដទៃក៏ប្រព្រឹត្តដូច្នោះដែរ។ ព្រះបិតារបស់អ្នករាល់គ្នាដែលគង់នៅស្ថានបរមសុខទ្រង់គ្រប់លក្ខណ៍យ៉ាងណា សុំឱ្យអ្នករាល់គ្នាបានគ្រប់លក្ខណ៍យ៉ាងនោះដែរ»។

ពាក្យថ្វាយតង្វាយ

បពិត្រព្រះអម្ចាស់ជាព្រះបិតា! យើងខ្ញុំសូមថ្វាយសក្ការបូជាដែលធ្វើឱ្យយើងខ្ញុំបានជាសះស្បើយ សូមទ្រង់ព្រះមេត្តាប្រោសយើងខ្ញុំឱ្យរួមរស់ជាមួយព្រះយេស៊ូ ដូចយើងខ្ញុំរួមជាមួយព្រះអង្គ ក្នុងអគ្គសញ្ញានៃអភិបូជានេះ។

ពាក្យអរព្រះគុណ

បពិត្រព្រះអម្ចាស់ជាព្រះបិតា! ព្រះអង្គប្រទានកម្លាំងឱ្យយើងខ្ញុំដែលបានទទួលព្រះកាយ និងព្រះលោហិតព្រះគ្រីស្ត។ ព្រះអង្គបានប្រោសយើងខ្ញុំឱ្យទៅជាប្រជារាស្ត្រដ៏វិសុទ្ធរបស់ព្រះអង្គ សូមទ្រង់ព្រះមេត្តាជួយការពារ និងថែរក្សាយើងខ្ញុំជានិច្ចផង។