ថ្ងៃអង្គារ
Tuesday

ឱ! ព្រះអម្ចាស់អើយ! សូមយាងមកជួយទូលបង្គំ
សូមព្រះអម្ចាស់យាងមកជួយសង្គ្រោះយើងខ្ញុំផង!
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក
ហើយជាដរាបតរៀងទៅ។ អាម៉ែន!
អាលេលូយ៉ា!

ឱ! ព្រះជាម្ចាស់សូមការពារខ្ញុំ

បន្ទរ	ឱ! ព្រះជាម្ចាស់	ខ្ញុំសូមព្រះអង្គការពារខ្ញុំ
	ខ្ញុំសូមជ្រកកោន	ក្រោមម្លប់បារមីព្រះអង្គ	។
១	ខ្ញុំសូមទូលថា	ព្រះអង្គជាព្រះអម្ចាស់នៃខ្ញុំ
	មានតែព្រះអង្គទេ	ដែលជាសុភមង្គលរបស់ខ្ញុំ
	គ្រប់ពេលវេលា	ព្រះអង្គគង់នៅជាមួយយើងខ្ញុំ
	ខ្ញុំមិនភ្លេចស្មារតី	ខ្ញុំមិនឃ្លាតឆ្ងាយពីព្រះអង្គឡើយ	។
២	ឱ ! ព្រះអង្គអើយ	ទ្រង់ជាសម្បត្តិមរតកខ្ញុំ
	ខ្ញុំយល់ប្រត្យក្ស	ព្រះអង្គស្រឡាញ់ខ្ញុំពិតមែន
	ព្រះអង្គទ្រង់សម្តែង	ឱ្យខ្ញុំបានស្គាល់ផ្លូវជីវិត
	ព្រះអង្គប្រោសប្រទាន	ឱ្យខ្ញុំបានឃើញព្រះភក្ត្រព្រះអង្គ	។
៣	ខ្ញុំសែនសប្បាយ	ដ្បិតទ្រង់ស្រឡាញ់ខ្ញុំជានិច្ច
	ព្រះអង្គត្រាស់ហៅខ្ញុំ	ឱ្យរស់នៅជាមួយព្រះអង្គ
	សូមលំទោនកាយ	សូមថ្វាយសិរីយសជោគជ័យ
	ឆ្ពោះព្រះជាអម្ចាស់	ដែលទ្រង់គង់នៅជាដរាប	។

ទំនុកតម្កើងលេខ ១៤៣ សូមព្រះវិញ្ញាណដឹកនាំខ្ញុំ

យើងដឹងថា ព្រះជាម្ចាស់ពុំប្រោសមនុស្សឱ្យ​បានសុចរិត ដោយការប្រព្រឹត្ដតាមវិន័យទេ គឺបានសុចរិតដោយសារជឿលើព្រះយេស៊ូគ្រីស្ដវិញ។ (២ ករ ១,៣)

រដូវធម្មតា	ឱ្យព្រះអម្ចាស់អើយ! សូមយល់ដល់ព្រះនាមព្រះអង្គ សូមប្រទានឱ្យទូលបង្គំមានជីវិត។
រដូវរង់ចាំ	ទូលបង្គំផ្ចង់ចិត្ដទៅរកព្រះអង្គ សូមកំលាក់ព្រះភក្រ្ដនឹងទូលបង្គំឡើយ!។
រដូវបុណ្យណូអែល	ទូលបង្គំនឹករំពឹងអំពីស្នាព្រះហស្ដរបស់ព្រះអង្គ។ ទូលបង្គំលើកដៃអង្វរព្រះអង្គ។
រដូវត្រណម	សូមកុំលាក់ព្រះភក្រ្ដនឹងទូលបង្គំឡើយ ដ្បិតទូលបង្គំផ្ញើជីវិតលើព្រះអង្គហើយ។
រដូវបុណ្យចម្លង	អាលេលូយ៉ា! អាលេលូយ៉ា! អាលេលូយ៉ា!

១	ឱព្រះអម្ចាស់អើយ! សូមព្រះអង្គព្រះសណ្តាប់ពាក្យអង្វររបស់ទូលបង្គំផង។ សូមផ្ទៀងព្រះកាណ៌ស្តាប់ពាក្យទទូចរបស់ទូលបង្គំ! សូមឆ្លើយតបមកទូលបង្គំ ដោយព្រះហឫទ័យសុចរិតដ៏ស្មោះស្ម័គ្ររបស់ព្រះអង្គ។
២	សូមកុំយកទូលបង្គំដែលជាអ្នកបម្រើរបស់ព្រះអង្គ ទៅកាត់ក្តីឡើយ។ ដ្បិតគ្មានមនុស្សណាម្នាក់សុចរិតនៅចំពោះព្រះភក្ត្ររបស់ព្រះអង្គ។
៣	ខ្មាំងសត្រូវតាមយាយីទូលបង្គំ គេជាន់ឈ្លីជីវិតទូលបង្គំ គេយកទូលបង្គំទៅឃុំក្នុងទីងងឹត ដូចមនុស្សស្លាប់តាំងពីយូរមកហើយ។
៤	ទូលបង្គំបាក់ទឹកចិត្តជាខ្លាំង ទូលបង្គំទ័លគំនិត។
៥	ទូលបង្គំនឹកទៅដល់ជំនាន់ដើម ទូលបង្គំសញ្ជឹងគិតកិច្ចការទាំងប៉ុន្មានដែលព្រះអង្គបានប្រព្រឹត្ត ទូលបង្គំនឹករំពឹងអំពីស្នាព្រះហស្ថរបស់ព្រះអង្គ។
៦	ទូលបង្គំលើកដៃអង្វរព្រះអង្គ ទូលនៅចំពោះព្រះភក្ត្ររបស់ព្រះអង្គ ដូចជាដីហួតហែង។
៧	ឱ!ព្រះអម្ចាស់អើយ! សូមឆ្លើយតបមកទូលបង្គំជាប្រញាប់ ទូលបង្គំបាក់ទឹកចិត្តហើយ! សូមកុំលាក់ព្រះភក្ត្រនឹងទូលបង្គំឡើយ! ដ្បិតទូលបង្គំដូចជាមនុស្សធ្លាក់ក្នុងរណ្ដៅ។
៨	សូមសម្ដែងព្រះហឫទ័យមេត្តាករុណារបស់ព្រះអង្គ ឱ្យទូលបង្គំស្គាល់តាំងពីព្រលឹម ដ្បិតទូលបង្គំផ្ញើជីវិតលើព្រះអង្គហើយ។ សូមប្រោសប្រទានឱ្យទូលបង្គំស្គាល់ផ្លូវដែលទូលបង្គំត្រូវដើរ ដ្បិតទូលបង្គំផ្ចង់ចិត្តទៅរកព្រះអង្គ។
៩	ឱព្រះអម្ចាស់អើយ! សូមរំដោះទូលបង្គំឱ្យរួចពីខ្មាំងសត្រូវ ទូលបង្គំមកជ្រកកោននឹងព្រះអង្គ។
១០	សូមបង្រៀនទូលបង្គំឱ្យធ្វើតាមព្រះហឫទ័យព្រះអង្គ ដ្បិតព្រះអង្គជាព្រះនៃទូលបង្គំ សូមព្រះវិញ្ញាណដ៏សប្បុរសរបស់ព្រះអង្គ ដឹកនាំទូលបង្គំឱ្យដើរក្នុងមាគ៌ាដែលគ្មានឧបសគ្គ។
១១	ឱ!ព្រះអម្ចាស់អើយ! សូមយល់ដល់ព្រះនាមព្រះអង្គ សូមប្រទានឱ្យទូលបង្គំមានជីវិត សូមនាំទូលបង្គំចេញពីភាពអាសន្ន ដោយព្រះហឫទ័យដ៏សុចរិតរបស់ព្រះអង្គ! សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ។ អាម៉ែន។

ទំនុកតម្កើងលេខ ១៤៣(១៤២) បទពាក្យ៧

១	ឱ! ព្រះម្ចាស់អើយសូមសណ្តាប់	ពាក្យខ្ញុំរ៉ាយរ៉ាប់ទូលអង្វរ
	ផ្ទៀងព្រះកាណ៌ស្តាប់កុំឈប់ឈរ	សូមឆ្លើយតបតដោយប្រណី	។
២	សូមកុំចាប់ទោសយកកំហុស	អ្នកបម្រើស្មោះទៅកាត់ក្តី
	ដ្បិតគ្មានជនសុចរិតប្រពៃ	ចំពោះភក្ត្រព្រះអង្គឡើយ	។
៣	ពួកខ្មាំងសត្រូវតាមយាយី	ពីគ្រប់ទិសទីមិនកន្តើយ
	ឃុំខ្ញុំក្នុងទីងងឹតហើយ	ដូចអ្នកក្សិណក្ស័យយូរណាស់ណា	?
៤	ខ្ញុំបាក់ធ្លុះធ្លាក់អស់ទឹកចិត្ត	ទាល់ទាំងគំនិតក្នុងកាយា
	ថយទាំងកម្លាំងខ្វះប្រាជ្ញា	មិនដឹងគិតថាត្រូវធ្វើម៉េច ?	។
៥	ខ្ញុំនឹកទៅដល់ជំនាន់មុន	សញ្ជឹងគូរគន់គ្រប់ភារកិច្ច
	ជាស្នាព្រះហស្តល្អបណ្តាច់	ឥតមានកលល្បិចគ្មានទើសទាល់	។
៦	ដៃខ្ញុំអង្វរខ្លួនបែរក្រាប	ដាក់កាយឱ្យទាបមុខព្រះម្ចាស់
	ដូចដីហួតហែងបែកប្រេះអស់	ស្ងួតរីងរាំងខ្សោះព្រោះគ្មានទឹក	។
៧	ឱ! ព្រះជាអម្ចាស់ខ្ញុំអើយ	សូមជួយតបឆ្លើយឱ្យញយញឹក
	ខ្ញុំបាត់បង់អស់ធ្លាក់ទឹកចិត្ត	កុំលាក់បាំងបិទភក្ត្រនឹងខ្ញុំ	។
	ព្រោះតែខ្ញុំដូចជាមនុស្ស	ដែលធ្លាក់ក្នុងជ្រោះជ្រៅសន្លឹម
	គ្មាននរណាជួយអស់សង្ឃឹម	ដូចមេឃរលឹមគ្មានរស្មី	។
៨	សូមទ្រង់បង្ហាញធម៌មេត្តា	សន្តោសករុណាត្រាប្រណី
	ខ្ញុំផ្ញើរូបកាយជីវិតក្តី	លើព្រះម្ចាស់ថ្លៃរួចទៅហើយ	។
	សូមប្រោសប្រទានឱ្យខ្ញុំស្គាល់	មាគ៌ានិមលកុំកន្តើយ
	ដ្បិតទូលបង្គំផ្ចង់ចិត្តហើយ	ព្រះជាម្ចាស់អើយមិនបោះបង់	។
៩	ឱ! ព្រះអម្ចាស់សូមរំដោះ	ខ្ញុំឱ្យផុតគ្រោះផុតពីខ្មាំង
	សត្រូវយាយីតាមប្រឆាំង	ខ្ញុំសូមព្រះអង្គពួនជ្រកផង	។
១០	សូមជួយបង្ហាត់ពត់បង្រៀន	ខ្ញុំព្រមតាមបានព្រះបំណង
	ដ្បិតទ្រង់ជាព្រះល្អម៉ត់ម៉ង	ដឹកនាំខ្ញុំផងដាក់ផ្លូវល្អ	។
១១	ឱ! ព្រះម្ចាស់អើយសូមគាំពារ	យល់ដល់នាមាព្រះបវរ
	ប្រទានជីវិតខ្ញុំកំដរ	ឱ្យបានរស់តទៅទៀតផង	។
	សូមជួយនាំខ្ញុំឱ្យចេញផុត	ពីភាពងងឹតអាប់មួរហ្មង
	គ្រោះថ្នាក់តូចធំអាសន្នផង	ដោយហឫទ័យទ្រង់សុចរិត	។
១២	ដោយព្រះអង្គមានធម៌មេត្តា	ហឫទ័យករុណាស្មោះអាណិត
	សូមកម្ទេចពួកបច្ចាមិត្ត	ឱ្យវិនាសផុតសាបសូន្យទៅ	។
	សូមកោតសរសើរព្រះបិតា	ព្រះបុត្រានិងព្រះវិញ្ញាណ
	ដែលគង់ស្ថិតស្ថេរឥតសៅហ្មង	យូរលង់កន្លងតរៀងទៅ	។

ព្រះបន្ទូលរបស់ព្រះជាម្ចាស់ (១សល ៥,៨-៩^ក )

ត្រូវភ្ញាក់ខ្លួន ហើយប្រុងស្មារតីជានិច្ច! ដ្បិតមារជាសត្រូវនឹងបងប្អូន កំពុងតែក្រវែលជុំវិញបងប្អូន ដូចសិង្ហក្រវែលទាំងគ្រហឹមរកត្របាក់ស៊ីអ្នកណាម្នាក់។​ ចូរប្រឆាំនឹងវា ហើយមានជំនឿមាំមួនឡើង។

បន្ទរៈ ទូលបង្គំសូមប្រគល់វិញ្ញាណរបស់ទូលបង្គំទៅក្នុងព្រះហស្តព្រះអង្គវិញ។

• សូមព្រះអង្គព្រះសណ្ដាប់ពាក្យអង្វររបស់ទូលបង្គំ ហើយយាងមកសង្គ្រោះទូលបង្គំផង។
• សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ។

ទំនុកតម្កើងរបស់លោកតាស៊ីម៉ូន (លក ២,២៩-៣២)

រដូវធម្មតា

បពិត្រព្រះបិតាជាអម្ចាស់! សូមសង្គ្រោះយើងខ្ញុំ នៅពេលយើងរង់ចាំព្រះអង្គ សូមរក្សាការពារយើងខ្ញុំនៅពេលកំពុងដេកលង់លក់ ដូច្នេះយើងខ្ញុំនឹងទន្ទឹងរង់ចាំព្រះអង្គជាមួយព្រះគ្រឹស្ត ហើយយើងខ្ញុំនឹងសម្រាកយ៉ាងសុខសាន្ត។

២៩	«បពិត្រ​ព្រះ​ដ៏​ជា​ចៅហ្វាយ! ឥឡូវ​នេះ ព្រះ‌អង្គ​បាន​សម្រេច​តាមព្រះ‌បន្ទូល​សន្យា​ហើយ។ ដូច្នេះ សូម​ឱ្យទូល‌បង្គំជា​អ្នក​បម្រើ​របស់​ព្រះ‌អង្គ លា​ចាក​លោក​នេះ​ទៅ ដោយ​សុខ‌សាន្ត​ផង​ចុះ
៣០	ដ្បិត​ភ្នែក​ទូល‌បង្គំ​បាន​ឃើញ​ការ​សង្គ្រោះ
៣១	ដែល​ព្រះ‌អង្គ​បាន​ប្រទាន​មក​ឱ្យប្រជា‌ជាតិ​ទាំង​អស់
៣២	គឺ​ជា​ពន្លឺ​ដែល​នាំ​ឱ្យ​មនុស្សគ្រប់​ជាតិ​សាសន៍​ស្គាល់​ព្រះ‌អង្គ និង​ជា​សិរី‌រុង​រឿង​របស់​អ៊ីស្រា‌អែលជា​ប្រជា‌រាស្ដ្រ​ព្រះ‌អង្គ»។
	សូមកោតសរសើរព្រះបិតា ព្រះបុត្រា និងព្រះវិញ្ញាណដ៏វិសុទ្ធ ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ។ អាម៉ែន។

ទំនុកតម្កើងរបស់លោកតាស៊ីម៉ូន លក ២,២៩-៣២ (បទពាក្យ ៧)

២៩	“បពិត្រព្រះម្ចាស់ជាចៅហ្វាយ	ពេលនេះឯងហើយទ្រង់សម្រេច
	តាមព្រះបន្ទូលគ្មានកលកិច្ច	សន្យាឥតភ្លេចលុះឥឡូវ	។
	ដូច្នេះសូមឱ្យរូបខ្ញុំជា	បំរើគ្រប់គ្រាផុតហ្មងសៅ
	សូមឱ្យខ្ញុំចាកលោកនេះទៅ	ខ្ញុំបានជួបនូវក្តីសុខសាន្ត	។
៣០	ព្រោះដ្បិតភ្នែកខ្ញុំបានឃើញច្បាស់	ពីការសង្គ្រោះមិនដែលខាន
៣១	ដែលព្រះអង្គទ្រង់ប្រោសប្រទាន	ដល់ប្រជាជនគ្រប់ជាតិសាសន៍	។
៣២	គឺជាពន្លឺដែលនាំឱ្យ	គ្រប់ជាតិជិតឆ្ងាយស្គាល់ព្រះម្ចាស់
	និងជាសិរីរុងរឿងច្បាស់	អ៊ីស្រាអែលជារាស្ត្រនៃព្រះអង្គ	។
	សូមកោតសរសើរព្រះបិតា	ព្រះរាជបុត្រា ព្រះវិញ្ញាណ
	ដែលគង់ស្ថិតស្ថេរឥតសៅហ្មង	យូរលង់កន្លងតរៀងទៅ	។

ពាក្យអធិដ្ឋាន

បពិត្រព្រះជាម្ចាស់ដ៏សុចរិត និងមានព្រះហឫទ័យស្មោះស្ម័គ្រ ! សូមព្រះអង្គទ្រង់ព្រះសណ្តាប់ពាក្យអង្វររបស់ព្រះសហគមន៍ ដូចព្រះអង្គបានស្ដាប់ពាក្យអង្វររបស់ព្រះយេស៊ូ។ នៅពេលដែលព្រះសហគមន៍ជួបនឹងឧបសគ្គ សូមព្រះអង្គប្រទានព្រះវិញ្ញាណដ៏វិសុទ្ធរបស់ព្រះអង្គឱ្យព្រះសហគមន៍ទទួលស្គាល់នូវស្នាព្រះហស្ថរបស់ព្រះអង្គ ដើម្បីបន្តដំណើរទៅមុខដោយសេរី និងប្រកបដោយសេចក្តីសង្ឃឹមផង។ យើងខ្ញុំសូមទូលអង្វរព្រះអង្គ ដោយរួមជាមួយព្រះយេស៊ូជាព្រះគ្រីស្ត និងជាអម្ចាស់យើងខ្ញុំ។ អាម៉ែន។

សូមព្រះអង្គបែរព្រះភក្ត្រទតមកយើងខ្ញុំ ហើយប្រទានឱ្យយើងខ្ញុំបានប្រកបដោយសេចក្ដីសុខសាន្តផង។ អាម៉ែន។

---