រដូវធម្មតា

ថ្ងៃសៅរ៍ អាទិត្យទី១០
_{(ពេលព្រឹក)}

ការអញ្ជើញមុនអធិដ្ឋាននៅពេលព្រឹក

• ឱព្រះអម្ចាស់អើយ! សូមបើកបបូរមាត់របស់ទូលបង្គំ
  សូមឱ្យមាត់របស់ទូលបង្គំថ្លែងពាក្យសរសើរតម្កើងព្រះអង្គ។

បន្ទរ ៖ ចូរយើងនាំគ្នាស្តាប់ព្រះសូរសៀងរបស់ព្រះជាម្ចាស់ ! ចូរយើងនាំគ្នាចូលមកសម្រាកនៅក្រោមម្លប់បារមីរបស់ព្រះអង្គ! ។

ទំនុកតម្កើងតាមការជ្រើសរើស

***

ឱព្រះអម្ចាស់អើយ! សូមយាងមកជួយទូលបង្គំ
សូមព្រះអម្ចាស់យាងមកជួយសង្គ្រោះយើងខ្ញុំផង!
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក
ហើយជាដរាបតរៀងទៅ។ អាម៉ែន! (អាលេលូយ៉ា!)

ចម្រៀងចូល (សូមជ្រើសរើសបទចម្រៀងមួយ)

ទំនុកតម្កើងលេខ ៩២

កោតសរសើរព្រះជាម្ចាស់នៃពិភពទាំងមូល

ចូរច្រៀងកោតសរសើរកិច្ចប្រោសលោះរបស់ព្រះគ្រីស្ត (សន្តអាថាណាស)។

បន្ទរទី១ ៖ ទូលបង្គំប្រកាស​អំពី​ព្រះហឫទ័យមេត្តា​ករុណា​របស់​ព្រះអង្គ តាំង​ពី​ព្រលឹម​មក ហើយ​ប្រកាស​អំពី​ព្រះហឫទ័យស្មោះស្ម័គ្ររបស់​ព្រះអង្គ​នៅ​ពេល​យប់។

២	បពិត្រព្រះអម្ចាស់ ! ទូលបង្គំលើកតម្កើងព្រះអង្គ ពិតជាការប្រពៃណាស់ ស្មូតបទតម្កើង សរសើរព្រះនាមរបស់ព្រះដ៏ខ្ពង់ខ្ពស់បំផុត ក៏ជាការល្អប្រពៃដែរ !
៣	ទូលបង្គំប្រកាសអំពីព្រះហឫទ័យមេត្តាករុណារបស់ព្រះអង្គ តាំងពីពេលព្រលឹមមក ហើយក៏ប្រកាសអំពីព្រះហឫទ័យស្មោះស្ម័គ្ររបស់ព្រះអង្គនៅពេលយប់
៤	ដោយលេងឃឹម ដេញចាប៉ី និងដេញពិណដែរ។
៥	បពិត្រព្រះអម្ចាស់ ! កិច្ចការដែលព្រះអង្គធ្វើ នាំឱ្យទូលបង្គំមានអំណរដ៏លើសលប់ ទូលបង្គំសប្បាយចិត្តនឹងស្នាព្រះហស្តរបស់ព្រះអង្គ។
៦	បពិត្រព្រះអម្ចាស់ ! ស្នាព្រះហស្តរបស់ព្រះអង្គប្រសើរឧត្តុង្គឧត្តមណាស់ ព្រះតំរិះរបស់ព្រះអង្គជ្រៅពន់ប្រមាណ !
៧	មនុស្សល្ងីល្ងើមិនយល់អ្វីទាំងអស់ មនុស្សឆោតល្ងង់ក៏មិនដឹងអ្វីដែរ។
៨	មនុស្សអាក្រក់ចម្រុងចម្រើនឡើងដូចស្មៅ មនុស្សទាំងប៉ុន្មានដែលប្រព្រឹត្តអំពើទុច្ចរិត ក៏រីកដុះដាលឡើងដែរ ប៉ុន្តែ គេនឹងត្រូវវិនាសអន្តរាយរហូតតរៀងទៅ។
៩	រីឯព្រះអង្គវិញ នៅស្ថានលើ ព្រះអង្គនៅជាព្រះអម្ចាស់ជានិច្ច !
១០	បពិត្រព្រះអម្ចាស់ ! ខ្មាំងសត្រូវរបស់ព្រះអង្គកំពុងតែវិនាស អស់អ្នកដែលប្រព្រឹត្តអំពើទុច្ចរិត នឹងត្រូវខ្ចាត់ខ្ចាយអស់ទៅ។
១១	ព្រះអង្គប្រទានឱ្យទូលបង្គំមានកម្លាំងដូចដំរី ព្រះអង្គបានចាក់ប្រេងថ្មីមកលើទូលបង្គំ។
១២	ទូលបង្គំឃើញខ្មាំងសត្រូវឃ្លាំមើល ព្រមទាំងឮសម្រែករបស់អស់អ្នកដែលស្អប់ទូលបង្គំ
១៣	មនុស្សសុចរិតនឹងរីកដុះដាលឡើងដូចដើមត្នោត ហើយចម្រើនធំឡើងដូចដើមតាត្រៅនៅ​ស្រុក​លីបង់។
១៤	ពួកគេប្រៀបបាននឹងដើមឈើដុះ នៅក្នុងព្រះដំណាក់របស់ព្រះអម្ចាស់ ហើយ​លូត​លាស់​នៅ​ក្នុង​ព្រះ‌វិហាររបស់​ព្រះ‌ជាម្ចាស់
១៥	ទោះបីគេមានវ័យចាស់ជរាក្តី ក៏គេនៅតែបង្កើតផលផ្លែដដែល គេមានពន្លកថ្មី និងមានស្លឹកលាស់ខៀវខ្ចីជានិច្ច។
១៦	ការទាំងនេះសម្តែងឱ្យឃើញថា ព្រះអម្ចាស់ជាថ្មដារបស់ខ្ញុំ ព្រះអង្គមានព្រះហឫទ័យទៀងត្រង់ជានិច្ច ឥតប្រែប្រួលសោះឡើយ។

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ ៖ ទូលបង្គំប្រកាស​អំពី​ព្រះហឫទ័យមេត្តា​ករុណា​របស់​ព្រះអង្គ តាំង​ពី​ព្រលឹម​មក ហើយ​ប្រកាស​អំពី​ព្រះហឫទ័យស្មោះស្ម័គ្ររបស់​ព្រះអង្គ​នៅ​ពេល​យប់។

បទលើកតម្កើងតាមគម្ពីរទុតិយកថា (ទក ៣២,១-១២)

ព្រះហឫទ័យសប្បុរសរបស់ព្រះជាម្ចាស់ចំពោះប្រជារាស្រ្តរបស់ព្រះអង្គ

ច្រើន​លើក​ច្រើន​សា​មក​ហើយ​ដែល​ខ្ញុំ​ចង់​ប្រមូល​ផ្ដុំ​អ្នក​រាល់​គ្នា ដូច​មេ​មាន់​ក្រុង​កូន​វា​នៅ​ក្រោម​ស្លាប (មថ ២៣,៣៧)។

បន្ទរទី២ ៖ ខ្ញុំ​នឹង​ប្រកាស​អំពី​ព្រះ‌នាម​ព្រះ‌អម្ចាស់ ! ចូរ​លើក​តម្កើងភាព​ថ្កុំ‌ថ្កើង​របស់​ព្រះ​នៃ​យើង !

(បទពាក្យ ៧)

១-	ឱផ្ទៃមេឃអើយចូរត្រងត្រាប់	ពាក្យខ្ញុំថ្លែងប្រាប់ជាដំណឹង
	ផែនដីអើយចូរអ្នកខំប្រឹង	ស្តាប់ឱ្យបានដឹងខ្ញុំបរិយាយ	។
២-	សូមឱ្យពាក្យខ្ញុំទាំងប៉ុន្មាន	ដែលបានទូន្មានរៀងរាល់ថ្ងៃ
	ឱ្យដូចសន្សើមភ្លៀងធ្លាក់ថ្មី	រុក្ខជាតិខៀវខ្ចីស្រស់បំព្រង	។
៣-	ខ្ញុំនឹងប្រកាសពីព្រះនាម	មិនព្រមនៅស្ងៀមមិនភ្លេចម្តង
	លើកតម្កើងភាពខ្ពស់កន្លង	រុងរឿងគ្មានហ្មងព្រះនៃយើង	។
៤-	ព្រះអម្ចាស់ប្រៀបដូចថ្មដា	ជាផ្ទាំងសិលាដ៏សែនរឹង
	មាគ៌ាព្រះអង្គសុចរិតត្រង់	បរិសុទ្ធឥតហ្មងឥតមានខ្ចោះ	។
៥-	ប៉ុន្តែព្រះអង្គទ្រង់ជ្រាបថា	អ្នកទាំងអស់គ្នាក្បត់ទាំងអស់
	ដោយអ្នកមានចិត្តមិនត្រង់ស្មោះ	ព្រះអង្គផាត់អស់មិនទុកនៅ	។
	លែងរាប់លែងរកលែងទុកថា	ជាបុត្រធីតាជាកូនចៅ
	អ្នករាល់គ្នាមានចិត្តអាស្រូវ	វៀចវេរមិនត្រូវក្បត់ព្រះអង្គ	។
៦-	ឱជនល្ងីល្ងើឥតប្រាជ្ញា	ចុះម្តេចឡើយណាមិនបោះបង់
	ព្រះគុណព្រះអង្គច្រើនកន្លង	តោងគិតផ្គូរផ្គងគិតនឹកនា	។
	ទ្រង់ជាបិតាដែលបង្កើត	ឱ្យមានកំណើតកើតជន្មា
	ឱ្យអ្នកបានក្លាយជាប្រជា	ជាតិមាំអស្ចារ្យខ្លាំងទៀតផង	។
៧-	ចូរអ្នករាល់គ្នានឹកនាចាំ	គិតអំពីឆ្នាំដែលកន្លង
	ឪពុកដូនតាកុំមានហ្មង	រ៉ាយរ៉ាប់ប្រាប់ផងហេតុការណ៍គ្រប់	។
៨-	ពេលព្រះខ្ពង់ខ្ពស់ប្រទានដី	ជាកេរថ្លាថ្លៃទ្រព្យសំណព្វ
	ពេលទ្រង់បំបែកមនុស្សលោកសព្វ	ថែមទាំងកំណត់ព្រំដែនឱ្យ	។
	ព្រះអង្គប្រទានតាមចំនួន	ឱ្យបានសមសួនមិនបណ្តោយ
	គ្នាតិចបានតិចមិនឱ្យធ្លោយ	គ្នាច្រើនទ្រង់ឱ្យធំល្វើយល្វឹង	។
៩-	ព្រះម្ចាស់ជ្រើសយកអ៊ីស្រាអែល	ទុកជារាស្ត្រផ្ទាល់នៃព្រះអង្គ
	ទាំងពូជយ៉ាកុបថែមទៀតផង	ទុកជាកេរទ្រង់ដ៏ថ្កើងថ្កាន	។
១០-	ព្រះម្ចាស់រកឃើញអ៊ីស្រាអែល	នៅតាមទីវាលរហោស្ថាន
	ក្នុងដីហួតហែងព្រៃស្មសាន	សុទ្ធតែតិរច្ឆានស្នាក់នៅជុំ	។
	តែព្រះអង្គបានបីបាច់ថែ	ថ្នាក់ថ្នមរូបគេហើយអប់រំ
	ការពារក្រសោបឱ្យនៅជុំ	គេរស់សុខដុមផុតវេទនា	។
១១-	ព្រះអង្គការពារនិងណែនាំ	ឱ្យដើរត្រង់ចំផ្លូវសាស្តា
	ដូចសត្វឥន្ទ្រីយ៍ជាបក្សា	ត្រដាងស្លាបវាបាំងកូនបាន	។
១២-	មានតែព្រះម្ចាស់មួយព្រះអង្គ	ដឹកនាំរាស្ត្រទ្រង់យ៉ាងចំណាន
	ឱ្យគេរស់នៅយ៉ាងសុខសាន្ត	ព្រះផ្សេងមិនបានដូចទ្រង់ឡើយ	។
	សូមកោតសរសើរព្រះបិតា	ព្រះបុត្រានិងព្រះវិញ្ញាណ
	ដែលគង់ស្ថិតស្ថេរឥតសៅហ្មង	យូរលង់កន្លងតរៀងទៅ	។

បន្ទរ ៖ ខ្ញុំ​នឹង​ប្រកាស​អំពី​ព្រះ‌នាម​ព្រះ‌អម្ចាស់ ! ចូរ​លើក​តម្កើងភាព​ថ្កុំ‌ថ្កើង​របស់​ព្រះ​នៃ​យើង !

ទំនុកតម្កើងលេខ ៨

សិរី‌រុង​រឿង​របស់​ព្រះ‌ជាម្ចាស់ និង​កិត្តិយស​របស់​មនុស្ស

ព្រះជាម្ចាស់បានបង្ក្រាបអ្វីៗទាំងអស់ ឱ្យនៅក្រោមព្រះបាទារបស់ព្រះគ្រីស្ត
ព្រមទាំងប្រទានឱ្យព្រះអង្គគង់នៅលើអ្វីៗទាំងអស់ ធ្វើជាសិរសាលើព្រះសហគមន៍ (អភ ១,២២)។

បន្ទរទី៣ ៖ បពិត្រព្រះអម្ចាស់ជាម្ចាស់របស់យើងខ្ញុំអើយ ! ព្រះនាមរបស់ព្រះអង្គថ្កុំថ្កើងរុងរឿង ពាសពេញលើផែនដីទាំងមូល !

២	បពិត្រព្រះអម្ចាស់ ជាម្ចាស់របស់យើងខ្ញុំ ! ព្រះនាមរបស់ព្រះអង្គថ្កុំថ្កើងរុងរឿង លើសផ្ទៃមេឃទៅទៀត! ។
៣	ព្រះអង្គបានប្រើពាក្យសរសើរតម្កើងរបស់ក្មេងៗ និងទារកដែលនៅបៅ ធ្វើជាកម្លាំងប្រយុទ្ធនឹងបច្ចាមិត្តរបស់ព្រះអង្គ ដើម្បីបង្ក្រាបខ្មាំងសត្រូវដ៏កាចសាហាវឱ្យវិនាសសូន្យ។
៤	ពេលទូលបង្គំសម្លឹងមើលផ្ទៃមេឃ ដែលជាស្នាព្រះហស្តរបស់ព្រះអង្គ ហើយសម្លឹងមើលព្រះចន្ទ និងហ្វូងតារា ដែលព្រះអង្គដាក់នៅលើមេឃនោះ
៥	ទូលបង្គំសួរខ្លួនឯងថា តើមនុស្សមានឋានៈអ្វី បានជាព្រះអង្គនឹកគិតដល់គេដូច្នេះ? តើបុត្រមនុស្សជាអ្វី បានជាព្រះអង្គយកព្រះហឫទ័យទុកដាក់នឹងគេយ៉ាងនេះ?
៦	ព្រះអង្គបានធ្វើឱ្យមនុស្សមានឋានៈទាបជាងទេវតាតែបន្តិចប៉ុណ្ណោះ។ ព្រះអង្គប្រទានសិរីរុងរឿង និងកិត្តិយសដល់គេទុកជាមកុដរាជ្យ។
៧	ព្រះអង្គប្រទានឱ្យគេគ្រប់គ្រងលើអ្វីៗទាំងអស់ ដែលព្រះអង្គបានបង្កើតមក ព្រះអង្គបានបង្ក្រាបអ្វីៗទាំងអស់ ឱ្យនៅក្រោមជើងរបស់គេ
៨	គឺទាំងចៀម ទាំងគោ និងសត្វព្រៃទាំងប៉ុន្មាន
៩	ព្រមទាំងបក្សាបក្សីនៅលើមេឃ ត្រីនៅក្នុងសមុទ្រ និងសត្វទាំងអស់ដែលរស់នៅបាតសមុទ្រ។
១០	បពិត្រព្រះអម្ចាស់ជាម្ចាស់របស់យើងខ្ញុំអើយ ! ព្រះនាមរបស់ព្រះអង្គថ្កុំថ្កើងរុងរឿងពាសពេញលើផែនដីទាំងមូល! ។

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ ៖ បពិត្រព្រះអម្ចាស់ជាម្ចាស់របស់យើងខ្ញុំអើយ ! ព្រះនាមរបស់ព្រះអង្គថ្កុំថ្កើងរុងរឿង ពាសពេញលើផែនដីទាំងមូល !

ព្រះបន្ទូលរបស់ព្រះជាម្ចាស់ (រ៉ូម ១២,១៤-១៦^ក)

ត្រូវជូនពរអស់អ្នកដែលបៀតបៀនបងប្អូន ត្រូវជូនពរគេ កុំដាក់បណ្តាសារគេឡើយ។ ចូរអរសប្បាយជាមួយអស់អ្នកដែលអរសប្បាយ ចូរយំសោកជាមួយអស់អ្នកដែលយំសោក។ ត្រូវមានចិត្តចុះសម្រុងគ្នាទៅវិញទៅមក។ មិនត្រូវមានគំនិតលើកខ្លួនឡើយ តែត្រូវចាប់ចិត្តនឹងអ្វីៗដែលទន់ទាបវិញ។

បន្ទរ ៖ ចូរ​ច្រៀង​តម្កើង​ព្រះ‌អង្គដោយអំណរ *ចូរ​ស្មូត​ទំនុក‌តម្កើង​ថ្វាយព្រះអង្គ!។ បន្ទរឡើងវិញ៖…
-ចូរ​រៀប​រាប់​អំពី​ការ​អស្ចារ្យ​ទាំង​ប៉ុន្មានដែល​ព្រះ‌អង្គ​បាន​ធ្វើ!។ បន្ទរ៖ *…
-សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ។ បន្ទរ៖…

ទំនុកតម្កើងរបស់លោកសាការី

បន្ទរ ៖ សូមព្រះអង្គតម្រង់​ផ្លូវ​យើងឆ្ពោះ​ទៅ​រក​សេចក្ដីសុខសាន្ត។

៦៨	”សូមលើកតម្កើងព្រះអម្ចាស់ ជាព្រះរបស់ជនជាតិអ៊ីស្រាអែល ដ្បិតទ្រង់សព្វព្រះហឫទ័យយាងមករំដោះប្រជារាស្ត្ររបស់ព្រះអង្គ។
៦៩	ទ្រង់បានប្រទានព្រះសង្គ្រោះដ៏មានឫទ្ធិមួយព្រះអង្គ ពីក្នុងចំណោមព្រះញាតិវង្សរបស់ព្រះបាទដាវីឌ ជាអ្នកបម្រើព្រះអង្គឱ្យមកយើង។
៧០	ព្រះជាម្ចាស់ប្រទានព្រះសង្គ្រោះនេះមកយើង ស្របនឹងព្រះបន្ទូលសន្យា ថ្លែងតាមរយៈព្យាការីរបស់ព្រះអង្គនៅជំនាន់ដើម
៧១	គឺព្រះអង្គសង្គ្រោះយើងឱ្យរួចពីកណ្តាប់ដៃរបស់ខ្មាំងសត្រូវ និងរួចពីអំណាចរបស់អ្នកដែលស្អប់យើង
៧២	ព្រះអង្គសម្ដែងព្រះហឫទ័យមេត្តាករុណាដល់បុព្វបុរសយើង ហើយគោរពតាមសម្ពន្ធមេត្រីរបស់ព្រះអង្គយ៉ាងស្មោះស្ម័គ្រ
៧៣	គឺព្រះអង្គបានសន្យាយ៉ាងម៉ឺងម៉ាត់ដល់លោកអប្រាហាំ ជាបុព្វបុរសរបស់យើងថា
៧៤	ទ្រង់នឹងរំដោះយើងឱ្យរួចពីកណ្តាប់ដៃរបស់ខ្មាំងសត្រូវ ដើម្បីយើងអាចគោរពបម្រើព្រះអង្គបានដោយឥតភ័យខ្លាច
៧៥	ព្រមទាំងឱ្យយើងរស់នៅបានបរិសុទ្ធ និងសុចរិតជាទីគាប់ព្រះហឫទ័យព្រះជាម្ចាស់ ជារៀងរាល់ថ្ងៃ រហូតអស់មួយជីវិត។
៧៦	ចំណែកឯកូនវិញ កូននឹងទៅជាព្យាការីរបស់ព្រះដ៏ខ្ពង់ខ្ពស់បំផុត ព្រោះកូននឹងដើរមុខព្រះអម្ចាស់ ដើម្បីរៀបចំផ្លូវថ្វាយព្រះអង្គ។
៧៧	កូននឹងឱ្យប្រជារាស្ត្ររបស់ព្រះអង្គដឹងថា ព្រះអង្គសង្គ្រោះគេ ដោយលើកលែងគេឱ្យរួចពីបាប។
៧៨	ព្រះរបស់យើងមានព្រះទ័យមេត្តាករុណាដ៏លើសលប់ ព្រះអង្គប្រទានថ្ងៃរះពីស្ថានលើមក ដើម្បីរំដោះយើង
៧៩	និងដើម្បីបំភ្លឺអស់អ្នកដែលស្ថិតនៅក្នុងទីងងឹត ក្រោមអំណាចនៃសេចក្តីស្លាប់ ព្រមទាំងតម្រង់ផ្លូវយើងឆ្ពោះទៅរកសេចក្តីសុខសាន្ត។

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

ឬ ទំនុកតម្កើងរបស់លោកសាការី (តាមបែបស្មូត) បទពាក្យ ៧

៦៨-	សូមលើកតម្កើងព្រះអម្ចាស់	ប្រសើរពេកណាស់ព្រះរបស់
	ជាតិអ៊ីស្រាអែលធ្លាប់ស្ម័គ្រស្មោះ	យាងមករំដោះរាស្ត្រព្រះអង្គ	។
៦៩-	ទ្រង់បានប្រទានព្រះសង្គ្រោះ	ដែលមានឫទ្ធិខ្ពស់ដ៏ត្រចង់
	ពីក្នុងចំណោមព្រះញាតិវង្ស	នៃអង្គដាវីឌបម្រើជាក់	។
៧០-	ព្រះម្ចាស់ប្រទានព្រះសង្គ្រោះ	យើងមិនដែលលោះមិនដែលអាក់
	ដូចបានសន្យាតាមរយៈ	ព្យាការីធ្លាប់ស្ម័គ្រកាលគ្រាមុន	។
៧១-	ព្រះអង្គសង្គ្រោះយើងឱ្យរួច	ចេញពីអំណាចខ្មាំងលើសលន់
	និងផុតពីដៃពួកទុរជន	ដែលធ្លាប់ជិះជាន់ស្អប់ខ្ពើមយើង	។
៧២-	ព្រះអង្គសម្ដែងព្រះហឫទ័យ	ករុណាប្រណីមិនឆ្មៃឆ្មើង
	ដល់បុព្វបុរសដែលតម្កើង	សម្ពន្ធព្រះអង្គមិនភ្លេចសោះ	។
៧៣-	គឺព្រះអង្គហើយបានសន្យា	ពាក្យពិតសត្យាមិនចន្លោះ
	នឹងអប្រាហាំបុព្វបុរស	ដូនតាយើងនោះដូច្នេះថា	។
៧៤-	ទ្រង់នឹងរំដោះយើងឱ្យរួច	ផុតពីអំណាចខ្មាំងឫស្យា
	ដើម្បីយើងអាចក្រាបវន្ទា	ព្រះអង្គគ្រប់គ្រាគ្មានភ័យភិត	។
៧៥-	ព្រមទាំងឱ្យយើងបានរស់នៅ	ឥតមានអាស្រូវដោយសុចរិត
	ជារៀងរាល់ថ្ងៃមួយជីវិត	គាប់ព្រះទ័យពិតព្រះម្ចាស់ថ្លៃ	។
៧៦-	ចំណែកឯរូបរបស់កូន	នឹងក្លាយខ្លួនជាព្យាការី
	ព្រោះកូនដើរមុខព្រះម្ចាស់ថ្លៃ	រៀបផ្លូវល្អក្រៃថ្វាយព្រះអង្គ	។
៧៧-	កូននឹងធ្វើឱ្យអស់ប្រជា	រាស្ត្រទាំងអស់គ្នាគេបានដឹង
	ថាព្រះសង្គ្រោះគឺព្រះអង្គ	ទាំងលើកទោសផងរួចពីបាប	។
៧៨-	ព្រះរបស់យើងមានព្រះទ័យ	ករុណាប្រណីជាដរាប
	ទ្រង់ប្រទានថ្ងៃរះរៀងរាប	រំដោះរួចបាបយើងពិតៗ	។
៧៩-	សម្រាប់បំភ្លឺដល់អស់អ្នក	ដែលបាននៅស្នាក់ទីងងឹត
	ព្រមទាំងតម្រង់ផ្លូវជីវិត	យើងឆ្ពោះទៅរកក្តីសុខសាន្ត	។
	សូមកោតសរសើរព្រះបិតា	ព្រះបុត្រានិងព្រះវិញ្ញាណ
	ដែលគង់ស្ថិតស្ថេរឥតសៅហ្មង	យូរលង់កន្លងតរៀងទៅ	។

បន្ទរ ៖ សូមព្រះអង្គតម្រង់​ផ្លូវ​យើងឆ្ពោះ​ទៅ​រក​សេចក្ដីសុខសាន្ត។

ពាក្យអង្វរសកល

ចូរយើងលើកតម្កើងព្រះហឫទ័យសប្បុរស និងព្រះប្រាជ្ញាញាណរបស់ព្រះគ្រីស្ត ព្រះអង្គបានប្រទានសេចក្តីស្រឡាញ់របស់ព្រះអង្គ និងការយល់ដឹងដល់មនុស្សទាំងអស់ ជាពិសេស ដល់អ្នកដែលកំពុងរងទុក្ខវេទនា។ យើងខ្ញុំសូមទូលអង្វរព្រះអង្គដោយពោលថា ៖

បន្ទរ ៖ ឱព្រះអម្ចាស់អើយ ! សូមឱ្យព្រះហឫទ័យស្រឡាញ់របស់ព្រះអង្គ បានគ្រប់លក្ខណៈនៅក្នុងយើងដែរ។

នៅពេលព្រឹកនេះ យើងខ្ញុំសូមរំឭកនូវការរស់ឡើងវិញរបស់ព្រះអង្គ
—ហើយសូមឱ្យយើងខ្ញុំបានទទួលផលពីការប្រោសលោះនេះផង។ (បន្ទរ)

ឱព្រះអម្ចាស់អើយ ! សូមព្រះអង្គជួយឱ្យយើងខ្ញុំក្លាយទៅជាសាក្សីរបស់ព្រះអង្គនៅថ្ងៃនេះ
—ហើយថ្វាយដង្វាយទៅព្រះបិតាតាមរយៈព្រះអង្គផង។ (បន្ទរ)

សូមព្រះអង្គបើកភ្នែកយើងខ្ញុំឱ្យមើលឃើញព្រះអង្គនៅក្នុងមនុស្សទាំងអស់
—ដើម្បីឱ្យយើងខ្ញុំបម្រើព្រះអង្គនៅក្នុងចំណោមពួកគេផង។ (បន្ទរ)

ឱព្រះអម្ចាស់យេស៊ូអើយ ! ព្រះអង្គជាដើមទំពាំងបាយជូរ យើងខ្ញុំជាមែក
—សូមប្រទានឱ្យយើងខ្ញុំស្ថិតនៅជាប់នឹងព្រះអង្គ ដើម្បីបង្កើតផលផ្លែបានច្រើន និងលើកតម្កើងសិរីរុងរឿងដល់ព្រះបិតាផង។ (បន្ទរ)

ធម៌ “ឱព្រះបិតា”

ពាក្យអធិដ្ឋាន

បពិត្រព្រះអម្ចាស់ ! យើងខ្ញុំសូមសរសើរតម្កើងព្រះអង្គឥតឈប់ឈរ ដោយអស់ពីដួងចិត្ត និងជាមួយការរស់នៅរបស់យើងខ្ញុំ។ រាល់ជីវិតរបស់យើងខ្ញុំ គឺជាព្រះអំណោយទានមកពីព្រះអង្គ យើងខ្ញុំសូមថ្វាយអ្វីៗទាំងអស់ដែលយើងខ្ញុំមានទៅព្រះអង្គវិញ។ យើងខ្ញុំសូមអង្វរព្រះអង្គ ដោយរួមជាមួយព្រះយេស៊ូគ្រីស្ត ជាព្រះបុត្រាព្រះអង្គ និងជាព្រះអម្ចាស់ ដែលសោយរាជ្យរួមជាមួយព្រះអង្គ និងព្រះវិញ្ញាណដ៏វិសុទ្ធ អស់កល្បជាអង្វែងតរៀងទៅ។ អាម៉ែន!

ពិធីបញ្ចប់៖ ប្រសិនបើលោកបូជាចារ្យ ឬលោកឧបដ្ឋាកធ្វើជាអធិបតី លោកចាត់បងប្អូនឱ្យទៅដោយពោលថា៖
សូមព្រះអម្ចាស់គង់ជាមួយបងប្អូន
ហើយគង់នៅជាមួយវិញ្ញាណរបស់លោកផង
សូមព្រះជាម្ចាស់ដ៏មានឫទ្ធានុភាពសព្វប្រការ ប្រទានព្រះពរដល់អស់បងប្អូន
គឺព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
អាម៉ែន។
សូមអញ្ជើញឱ្យបានសុខសាន្ត
សូមអរព្រះគុណព្រះជាម្ចាស់។
ពេលមានវត្តមានលោកបូជាចារ្យ ឬលោកឧបដ្ឋាក និងបុគ្គលម្នាក់សូត្រ ពាក្យអធិដ្ឋានពេលព្រឹក៖
សូមព្រះអម្ចាស់ប្រទានព្រះពរ និងការពារយើងខ្ញុំឱ្យរួចផុតពីមារកំណាច ព្រមទាំងប្រទានជីវិតអស់កល្បជានិច្ចឱ្យយើងខ្ញុំ។
អាម៉ែន។