ថ្ងៃចន្ទ អាទិត្យទី៣២
រដូវធម្មតា «ឆ្នាំសេស»
ពណ៌បៃង
ថ្ងៃចន្ទ ទី១០ ខែវិច្ឆិការ ឆ្នាំ២០២៥
សន្តឡេអូ ជាជនដ៏ប្រសើរឧត្តមជាសម្តេចប៉ាប
និងជាគ្រូបាធ្យាយនៃព្រះសហគមន៍
លោកឡេអូ (ប្រ. ៣៩៥-៤៦១) ទទួលមុខងារធ្វើជាអភិបាលក្រុងរ៉ូមនៅ គ.ស ៤៤០។ លោកពូកែពន្យល់គម្ពីរយ៉ាងច្បាស់ ជាពិសេសលោកបញ្ជាក់លទ្ធិគ្រីស្តសាសនាអំពីឋានៈរបស់ព្រះយេស៊ូដែលពិតជាមនុស្សផង និងពិតជាព្រះជាម្ចាស់ផង។ អស់លោកអភិបាលដែលជួបជុំគ្នាជាមហាសន្និបាទក្រុងកាលសេដូននៅឆ្នាំ ៤៥១ ទទួលស្គាល់សេចក្តីដែលលោកតែងបង្រៀននោះ ទុកជំនឿរបស់ព្រះសហគមន៍។ លោកចាត់ចែងក្បួនពិធីជាច្រើនសម្រាប់ព្រះសហគមន៍អនុវត្ត។ លោកក៏មានចិត្ដក្លាហានធ្វើអន្តរាគមន៍ការពារក្រុងរ៉ូម ឱ្យរួចពីខ្មាំងដែលបម្រុងវាយសម្រុកក្រុងនោះ។ ឈ្មោះ “ឡេអូ” ប្រែថា “តោ”។
អត្ថបទទី១៖ សូមថ្លែងព្រះគម្ពីរព្រះប្រាជ្ញាញាណ ប្រាញ ១,១-៧
អស់អ្នកគ្រប់គ្រងផែនដីអើយ! ចូរស្រឡាញ់សេចក្តីសុចរិត! ចូរមានគំនិតត្រឹមត្រូវចំពោះព្រះអម្ចាស់! ចូរស្វែងរកព្រះអង្គដោយចិត្តស្មោះសរ ដ្បិតអស់អ្នកដែលមិនល្បងលព្រះអង្គ ព្រះអង្គប្រទានឱ្យគេរកព្រះអង្គឃើញ អស់អ្នកដែលជឿសង្ឃឹមលើព្រះអង្គ ក៏ព្រះអង្គសម្ដែងឱ្យគេស្គាល់ដែរ។ គំនិតវៀចវេររមែងនាំឱ្យមនុស្សឃ្លាតឆ្ងាយពីព្រះជាម្ចាស់ រីឯមនុស្សឆោតល្ងង់ដែលចង់ល្បងលឫទ្ធានុភាពរបស់ព្រះអង្គនឹងធ្វើឱ្យគេបិទមាត់។ ព្រះប្រាជ្ញាញាណមិនយាងទៅសណ្ឋិតនៅក្នុងចិត្តរបស់មនុស្សដែលប្រព្រឹត្តអំពើអាក្រក់ទេ ហើយក៏មិនគង់នៅក្នុងខ្លួនរបស់អ្នកដែលជាប់បាបដែរ។ ព្រះប្រាជ្ញាញាណជាព្រះវិញ្ញាណដ៏វិសុទ្ធដែលអប់រំមនុស្ស។ ព្រះអង្គមិនគង់នៅជាមួយមនុស្សដែលមានចិត្តពីរ ព្រះអង្គឃ្លាតឆ្ងាយពីមនុស្សដែលមានគំនិតលេលា ហើយមិនសព្វព្រះហឫទ័យនឹងអំពើទុច្ចរិតឡើយ។ព្រះប្រាជ្ញាញាណតែងតែស្រឡាញ់រាប់អានមនុស្ស ប៉ុន្តែ ព្រះអង្គបានដាក់ទោសអ្នកដែលនិយាយប្រមាថព្រះជាម្ចាស់។ ព្រះជាម្ចាស់ឈ្វេងយល់ជម្រៅចិត្តរបស់មនុស្ស ព្រះអង្គជ្រាបគំនិតរបស់គេយ៉ាងច្បាស់ ហើយព្រះអង្គព្រះសណ្តាប់ឮពាក្យទាំងប៉ុន្មានដែលគេនិយាយ។ ព្រះវិញ្ញាណរបស់ព្រះអម្ចាស់គង់នៅពាសពេញលើផែនដីទាំងមូល ព្រះអង្គធ្វើឱ្យអ្វីៗទាំងអស់ភ្ជាប់ជាមួយគ្នាយ៉ាងស្អិតល្មួត ហេតុនេះហើយបានជាព្រះអង្គជ្រាបពាក្យសម្ដីទាំងអស់ដែលមនុស្សនិយាយ។
ទំនុកតម្កើងលេខ ១៣៩(១៣៨),១-៥.៧-១០ បទកាកគតិ
| ១ | ព្រះជាម្ចាស់អើយ | សូមកុំព្រងើយ | សូមទ្រង់ពិនិត្យ |
| មើលហើយស្គាល់ខ្ញុំ | ឱ្យបានច្បាស់ពិត | សូមទ្រង់អាណិត | |
| ប្រណីអាសូរ | ។ | ||
| ២ | ទោះបីអង្គុយ | ខ្ញុំឈរមុខស្អុយ | ក៏ទ្រង់មិនដូរ |
| ទ្រង់ជ្រាបគំនិត | ចិត្តថ្លើមខ្ញុំល្អ | ព្រះម្ចាស់បវរ | |
| មើលពីចម្ងាយ | ។ | ||
| ៣ | ទោះបីខ្ញុំដេក | ខ្ញុំដើរឈរផ្អែក | ក៏ទ្រង់មិនណាយ |
| ទ្រង់ស្គាល់ផ្លូវពី | ជីវិតទៅឆ្ងាយ | ទៅដល់ត្រើយនាយ | |
| ទ្រង់ជ្រាបគ្មានលស់ | ។ | ||
| ៤ | ទោះពាក្យសម្ដី | ពុំទាន់មានថ្វី | ស្ដីពុំចេញសោះ |
| តែព្រះជាម្ចាស់ | ទ្រង់ជ្រាបទាំងអស់ | គ្រប់គៀនគ្រប់កោះ | |
| ជ្រាបអស់គ្មានសល់ | ។ | ||
| ៥ | ទ្រង់គង់ជុំជិត | ទាំងមុខក្រោយពិត | ខ្ញុំឥតមានខ្វល់ |
| ព្រះអង្គលោកដាក់ | ព្រះហស្ដលើកកល់ | រូបខ្ញុំកំណល់ | |
| កល់ទ្រព្រះហស្ដ | |||
| ៧ | តើទូលបង្គំ | ទៅខេត្តខ័ណ្ឌឃុំ | ទីណានឹងស្បើយ |
| ឆ្ងាយពីវិញ្ញាណ | ទីលានកោះត្រើយ | ឱ្យផុតរហើយ | |
| ពីភ័ក្រ្ដព្រះអង្គ? | ។ | ||
| ៨ | បើទៅស្ថានសួគ៌ | ទ្រង់គង់ជាជួរ | សឹងជារបង |
| បើដេកជាមួយ | អ្នកស្លាប់ចង្គ្រាង | ទីនោះក៏ទ្រង់ | |
| គង់នៅនោះដែរ | ។ | ||
| ៩ | បើនឹងហោះហើរ | លាក់ខ្លួនបណ្ដើរ | រហូតជើងមេឃ |
| ហួសទៅសមុទ្រ | ផុតអស់ពីភ្នែក | ទៅនៅដោយឡែក | |
| ដាច់ពីគេឯង | ។ | ||
| ១០ | គង់តែព្រះហស្ដ | ព្រះអង្គនាំឆ្ពោះ | ត្រង់ទីកន្លែង |
| ព្រះហស្ដខាងស្ដាំ | ចាំចាប់មិនលែង | ខ្ញុំមិនកណ្ដែង | |
| កណ្ដោចឥតអាង | ។ |
ពិធីអបអរសាទរព្រះគម្ពីរដំណឹងល្អតាម ភល ២,១៥-១៦
អាលេលូយ៉ា! អាលេលូយ៉ា!
ចូរបងប្អូនកាន់តាមព្រះបន្ទូលដែលផ្ដល់ជីវិត ដូច្នេះ បងប្អូននឹងភ្លឺក្នុងចំណោមមនុស្សលោក ដូចពន្លឺដែលបំភ្លឺដែរ។ អាលេលូយ៉ា!
សូមថ្លែងព្រះគម្ពីរដំណឹងល្អតាមសន្តលូកា លក ១៧,១-៦
ព្រះយេស៊ូមានព្រះបន្ទូលទៅកាន់ពួកសាវ័កថា៖ «មានមូលហេតុជាច្រើនដែលតែងតែបណ្ដាលឱ្យមនុស្សប្រព្រឹត្តអំពើបាប។ ប៉ុន្តែ អ្នកណានាំគេឱ្យប្រព្រឹត្តអំពើបាប អ្នកនោះត្រូវវេទនាហើយ។ ចំពោះអ្នកនោះ ប្រសិនបើគេយកត្បាល់ថ្មយ៉ាងធំមកចងកទម្លាក់ទៅក្នុងសមុទ្រ ប្រសើរជាងទុកឱ្យគាត់នៅរស់ ហើយនាំមនុស្សតូចតាចណាម្នាក់ប្រព្រឹត្តអំពើបាប។ ដូច្នេះ អ្នករាល់គ្នាត្រូវប្រយ័ត្នខ្លួន! ប្រសិនបើបងប្អូនណាធ្វើអ្វីខុសចំពោះអ្នក ចូរស្ដីប្រដៅគាត់ផង តែបើគាត់កែប្រែចិត្តគំនិត ចូរអត់ទោសឱ្យគាត់ទៅ។ ប្រសិនបើគាត់ធ្វើអ្វីខុសចំពោះអ្នកប្រាំពីរដងក្នុងមួយថ្ងៃ ហើយបើគាត់ត្រឡប់មករកអ្នកទាំងប្រាំពីរដង ដោយពោលថា “ខ្ញុំស្ដាយដោយបានធ្វើខុស” ចូរអត់ទោសឱ្យគាត់ទៅ»។ ពួកគ្រីស្តទូតទូលព្រះអម្ចាស់ថា៖ «សូមព្រះអង្គប្រទានជំនឿមកយើងខ្ញុំថែមទៀត»។ ព្រះអម្ចាស់មានព្រះបន្ទូលឆ្លើយថា៖ «ប្រសិនបើអ្នករាល់គ្នាមានជំនឿប៉ុនគ្រាប់ពូជមួយដ៏ល្អិត ហើយបើអ្នករាល់គ្នានិយាយទៅកាន់ដើមឈើនេះថា “ចូររំលើងឫសឯង ទៅដុះក្នុងសមុទ្រទៅ!” វាមុខជាស្ដាប់បង្គាប់អ្នករាល់គ្នាមិនខាន»។
