ថ្ងៃចន្ទ ទី០៨ ខែកញ្ញា ឆ្នាំ២០២៥

អត្ថបទទី១៖ សូមថ្លែងលិខិតរបស់គ្រីស្ដទូតប៉ូលផ្ញើជូនគ្រីស្ដបរិស័ទក្រុងកូឡូស កូឡ ១,២៤-២,៣

បងប្អូនជាទីស្រឡាញ់!
ខ្ញុំមានអំណរដោយរងទុក្ខវេទនាសម្រាប់បងប្អូន ព្រោះខ្ញុំរងទុក្ខ​​លំបាកក្នុងរូបកាយដូច្នេះ ដើម្បីបំពេញទុក្ខវេទនារបស់ព្រះគ្រីស្ដសម្រាប់ព្រះកាយរបស់​ព្រះ​អង្គ គឺព្រះសហគមន៍។ ខ្ញុំបានទទួលមុខងារបម្រើព្រះសហគមន៍នេះតាមការចាត់​ចែងរបស់​ព្រះជាម្ចាស់ ដែលផ្ទុកផ្ដាក់ឱ្យខ្ញុំធើ្វ គឺណែនាំបងប្អូនឱ្យស្គាល់ព្រះបន្ទូលរបស់​ព្រះអង្គបានសព្វ​គ្រប់។ នេះហើយជាគម្រោងការដ៏អស្ចារ្យដែលព្រះជាម្ចាស់បានលាក់ទុកតាំងពីយូអង្វែង​​តរៀងមក មិនឱ្យមនុស្សជំនាន់មុនៗស្គាល់ឡើយ។ តែឥឡូវ ព្រះអង្គ​​​បានបង្ហាញឱ្យជនដ៏វិសុទ្ធរបស់​ព្រះអង្គស្គាល់។ ព្រះជាម្ចាស់សព្វព្រះហប្ញទ័យឱ្យប្រជា​រាស្រ្ដដ៏វិសុទ្ធនេះស្គាល់សិរីរុងរឿង​ដ៏​ប្រសើរបំផុតនៃគម្រោងការនេះ នៅក្នុងចំណោម​សាសន៍ដ៏ទៃ ពោលគឺ ព្រះគ្រីស្ដគង់នៅក្នុង​បងប្អូនដែលព្រះអង្គប្រទានឱ្យបងប្អូនមាន​សង្ឃឹមថា នឹងបានទទួលសិរីរុងរឿងរបស់​ព្រះអង្គ។ ដូច្នេះ យើងនាំដំណឹងអំពីព្រះគ្រីស្ដ​នេះ ហើយយើងដាស់តឿន និងប្រៀនប្រដៅមនុស្សគ្រប់​ៗ​រូបដោយប្រើប្រាជ្ញាគ្រប់យ៉ាង​ធើ្វឱ្យគេទាំងអស់គ្នាបានគ្រប់លក្ខណៈក្នុងអង្គព្រះគ្រីស្ដ។ ខ្ញុំធើ្វ​ការនឿយហត់ ដើម្បី​សម្រេចគោលដៅនេះឯង គឺខំប្រឹងតយុទ្ធ ដោយប្រើមហិទ្ធិប្ញទ្ធិរបស់ព្រះអង្គដែល​កំពុងតែមានសកម្មភាពក្នុងរូបខ្ញុំយ៉ាងខ្លាំង។ ដ្បិតព្រះតម្រិះនិងព្រះប្រាជ្ញាញ្ញាណដ៏ខ្ពង់ខ្ពស់របស់ព្រះជាម្ចាស់ សុទ្ធតែលាក់ទុកក្នុងអង្គព្រះគ្រីស្ដហ្នឹងហើយ។ ខ្ញុំធ្វើការហឿយហត់ ដើម្បី​សម្រេចគោលដៅនេះឯង គឺខំប្រឹងតយុទ្ធ ដោយប្រើមហិទ្ធិឫទ្ធិ​របស់ព្រះអង្គដែលកំពុងតែមានសកម្មភាពក្នុងរូបខ្ញុំយ៉ាងខ្លាំង។ ខ្ញុំចង់ឱ្យបងប្អូនជ្រាបថា ខ្ញុំតយុទ្ធខ្លាំងក្លាយ៉ាងណាសម្រាប់បងប្អូន សម្រាប់អស់អ្នក​នៅស្រុកឡៅឌីសេ និងសម្រាប់អស់អ្នកដែលមិនធ្លាប់ឃើញមុខខ្ញុំផ្ទាល់ គឺខ្ញុំចង់លើទឹកចិត្ត​បងប្អូនទាំងនោះ ឱ្យរួបរួមគ្នាក្នុងសេចក្ដីស្រឡាញ់ ដើម្បីឱ្យគេមានប្រាជ្ញា​វាងវៃបំផុតយល់​សព្វគ្រប់ទាំងអស់ និងស្គាល់ច្បាស់នូវគម្រោងការដ៏លាក់កំបាំងរបស់ព្រះជាម្ចាស់ ពោល​គឺ​ព្រះគ្រីស្ដផ្ទាល់ ដ្បិតព្រះតម្រិះ និងប្រាជ្ញាញាណដ៏ខ្ពង់ខ្ពស់របស់ព្រះជាម្ចាស់សុទ្ធតែលាក់ទុក​ក្នុងអង្គព្រះគ្រីស្ដហ្នឹងហើយ។

ទំនុកតម្កើងលេខ ៦២ (៦១) ,៦-៧.៩ បទពាក្យ ៧

ពិធីអបអរសាទរព្រះគម្ពីរដំណឹងល្អតាម ទន (១៤៥),២.៨-៩

អាលេលូយ៉ា! អាលេលូយ៉ា!
ខ្ញុំនឹងសរសើរតម្កើងព្រះអម្ចាស់អស់មួយជីវិត។ ព្រះអង្គ​ប្រោសឱ្យអ្នកដែលសោកសង្រេងងើបឡើងវិញ! ព្រះអង្គធើ្វឱ្យមនុស្សអាក្រក់វិនាសអន្ដ​រាយ។ អាលេលូយ៉ា!

សូមថ្លែងព្រះគម្ពីរដំណឹងល្អតាមសន្តលូកា លក ៦,៦-១១

នៅថ្ងៃមួយជាថ្ងៃសប្ប័ទ ព្រះយេស៊ូយាងចូលក្នុងធម្មសាលា ហើយព្រះអង្គបង្រៀន​គេ។​ នៅទីនោះ មានបុរសម្នាក់ស្វិតដៃស្ដាំ។ ពួកធម្មាចារ្យ និងពួកខាងគណៈផារីស៊ីតាមមើលព្រះយេស៊ូ ក្រែងលោព្រះអង្គប្រាសអ្នកជំងឺនៅថ្ងៃសប្ប័ទ ព្រោះគេចង់រកលេសចោទប្រកាន់ព្រះអង្គ។ ព្រះយេស៊ូឈ្វេងយល់ចិត្តគំនិតរបស់ពួកគេ ព្រះអង្គ​មានព្រះបន្ទូលទៅកាន់បុរសស្វិតដៃនោះថា៖ «ចូរក្រោកឡើង​មក ឈរនៅកណ្ដាលគេ​ឯណេះ!»។ បុរសនោះក៏ក្រោកឈរឡើង។ ព្រះយេស៊ូមានព្រះបន្ទូលទៅគេថា៖ «ខ្ញុំសុំសួរអ្នករាល់គ្នាថា នៅថ្ងៃសប្ប័ទ តើមនុស្សមានសិទ្ធិធើ្វអំពើល្អ ឬធើ្វអំពើអាក្រក់? ​មានសិទ្ធិសង្គ្រោះជីវិតមនុស្ស ឬធើ្វឱ្យមនុស្សវិនាសអន្ដរាយ?»។ ព្រះអង្គ​បែរព្រះភក្រ្ដ​ទតមើលមនុស្សទាំងអស់ដែលនៅជុំវិញ រួចមានព្រះបន្ទូលទៅបុរសស្វិតដៃនោះថា៖​ «ចូរលាតដៃមើល៍!»។ គាត់ក៏លាតដៃ ហើយដៃគាត់បានជាដូចដើមវិញ។ ពួកគេក្ដៅ​ក្រហាយយ៉ាងខ្លាំង ហើយពិគ្រោះគ្នាគិតធើ្វយ៉ាងណាដើម្បីប្រឆាំងនឹងព្រះយេស៊ូ។