ថ្ងៃចន្ទ ទី១៦ ខែមិថុនា ឆ្នាំ២០២៥

អត្ថបទទី១៖ សូមថ្លែងលិខិតទី២ របស់គ្រីស្តទូតប៉ូលផ្ញើជូនគ្រីស្តបរិស័ទក្រុងកូរិនថូស ២ ករ ៦,១-១០

បងប្អូនជាទីស្រឡាញ់!
ដោយយើងធ្វើការរួមជាមួយព្រះជាម្ចាស់ យើងសូមទូន្មានបង​ប្អូនថា កុំទទួលការប្រណីសន្តោសរបស់ព្រះជាម្ចាស់យកមកទុកចោលជាអសារឥតការ​ឡើយ ដ្បិតព្រះជាម្ចាស់មានព្រះបន្ទូលថា៖ «យើងបានឆ្លើយតបមកអ្នកនៅគ្រាណាដែលយើងគាប់ចិត្ត យើងបានជួយអ្នកនៅថ្ងៃណាដែលយើងសង្គ្រោះ»។ គ្រាដែលព្រះជាម្ចាស់​គាប់ព្រះហឫទ័យ គឺឥឡូវនេះហើយ! ថ្ងៃដែលព្រះជាម្ចាស់សង្គ្រោះ គឺឥឡូវនេះហើយ!។ យើងមិនចង់ឱ្យកើតមានរឿងអ្វីមួយដែលបណ្តាលឱ្យនរណាម្នាក់ជំពប់ចិត្តបាត់​ជំនឿឡើយ ដើម្បីកុំឱ្យគេបន្ទោសមុខងាររបស់យើង។ ផ្ទុយទៅវិញ យើងតាំងខ្លួនជា​អ្នកបម្រើរបស់ព្រះជាម្ចាស់ក្នុងគ្រប់កាលៈទេសៈទាំងអស់ ដោយស៊ូទ្រាំយ៉ាងខ្លាំងដោយ​ប្រឆាំងនឹងយើង។ យើងធ្វើការធ្ងន់ អត់ងងុយ អត់អាហារ។ យើងតាំងខ្លួនជាអ្នកបម្រើ​របស់ព្រះជាម្ចាស់ដោយមានចិត្តបរិសុទ្ធ ដោយស្គាល់ព្រះជាម្ចាស់ ដោយមានចិត្តអត់ធ្មត់ ចិត្តសប្បុរស ដោយព្រះវិញ្ញាណដ៏វិសុទ្ធ ដោយមានចិត្តស្រឡាញ់ឥតពុតត្បុត ដោយ​ប្រកាសសេចក្តីពិត ដោយឫទ្ធានុភាពរបស់ព្រះជាម្ចាស់។ យើងយកសេចក្តីសុចរិតធ្វើជា​​អាវុធវាយប្រយុទ្ធ និងការពារ ទាំងទ្រាំទ្រនៅ​ពេលគេគោរពយើងក្តី បន្ទាបបន្ថោកយើង​ក្តី នៅពេលគេនិយាយអាក្រក់ ឬនិយាយល្អពីយើងក្តី។ គេចាត់ទុកយើងថាជាជនបោក​ប្រាស់ តែយើងជាមនុស្សទៀងត្រង់។ គេចាត់ទុកយើងដូចជាមនុស្សដែលគ្មាននរណាស្គាល់ តែគេស្គាល់យើងយ៉ាងច្បាស់។ គេចាត់ទុកយើងដូចជា​មនុស្សហៀបនឹងស្លាប់ តែ​យើងពិតជានៅមានជីវិត។ គេធ្វើទារុណកម្មយើង តែយើងគ្មានទោសដល់ស្លាប់ទេ។ គេធ្វើឱ្យយើងមានទុក្ខព្រួយ តែយើងសប្បាយចិត្តជានិច្ច។ យើងដូចជាអ្នកក្រ តែយើងបានធ្វើឱ្យមនុស្សជាច្រើនទៅជាអ្នកមាន យើងដូចជាគ្មានអ្វីសោះ តែយើង​មានសព្វគ្រប់ទាំងអស់វិញ។

ទំនុកតម្កើងលេខ ៩៨ (៩៧),១-៤ បទកាកគតិ

ពិធីអបអរសាទរព្រះគម្ពីរដំណឹងល្អតាម ទន ១១៩,១០៥

អាលេលូយ៉ា! អាលេលូយ៉ា!
ព្រះបន្ទូលជាចង្កៀងមាលា ឱ្យខ្ញុំដើរត្រង់ ពិតជាពន្លឺ បំភ្លឺត្រចង់ ជីវិតផូរផង់ ឱ្យខ្ញុំសុខសាន្ត។ អាលេលូយ៉ា!

សូមថ្លែងព្រះគម្ពីរដំណឹងល្អតាមសន្តម៉ាថាយ មថ ៥,៣៨-៤២

ក្រុមសាវ័កជួបជុំជាមួយព្រះយេស៊ូនៅលើភ្នំ។ ព្រះអង្គមានព្រះបន្ទូលទៅកាន់ពួក​គេថា៖ «អ្នករាល់គ្នាធ្លាប់បានឮសេចក្តីថ្លែងទុកមកថា “ភ្នែកមួយ សងភ្នែកតែមួយ ធ្មេញមួយសងធ្មេញតែមួយ”។ រីឯខ្ញុំវិញ ខ្ញុំសុំបញ្ជាក់ប្រាប់អ្នករាល់គ្នាថា កុំតបតនឹង​មនុស្សកំណាច​ឱ្យសោះ! បើមានគេទះកំផ្លៀងស្តាំរបស់អ្នក ចូរបែរឱ្យគេទះម្ខាង​ទៀតទៅ! បើមានគេប្តឹងចង់បានអាវក្នុងរបស់អ្នក ចូរឱ្យគេយកអាវធំថែម​ទៀត​​ទៅ! បើមានគេបង្ខំអ្នកឱ្យធ្វើដំណើរមួយយោជន៍ ចូរទៅពីរយោជន៍ជាមួយ​គេចុះ! អ្នកណាសុំអ្វីពីអ្នក ចូរឱ្យគេទៅ កុំគេចមុខចេញពីអ្នកដែលសុំខ្ចីអ្វីៗពីអ្នកដែរ»។