ថ្ងៃចន្ទ ទី០៨ ខែមិថុនា ឆ្នាំ២០២៦

សូមថ្លែងព្រះគម្ពីរពង្សាវតាក្សត្រភាគទី ១ ១ពង្ស ១៧,១-៦

ព្យាការីអេលីជាអ្នកភូមិទីសបេ ក្នុងស្រុកកាឡាដ ទូលព្រះបាទអខាប់ថា៖ «ក្នុងព្រះនាមព្រះអម្ចាស់ដ៏មានព្រះជន្មគង់នៅ ជាព្រះរបស់ជនជាតិអ៊ីស្រាអែល ដែលទូល​បង្គំគោរពបម្រើ ទូលបង្គំសូមទូលព្រះករុណាថា ប៉ុន្មានឆ្នាំតទៅមុខទៀត នឹងគ្មាន​សន្សើម គ្មានភ្លៀងទេ លើកលែងតែទូលបង្គំបង្គាប់ឱ្យធ្លាក់មក»។ ព្រះអម្ចាស់មានព្រះបន្ទូលមកកាន់ព្យាការីអេលីថា៖ «ចូរចាកចេញពីទីនេះ ធ្វើ​ដំណើរទៅទិសខាងកើត ហើយពួនសម្ងំនៅក្បែរជ្រោះ កេរីត ដែលស្ថិតនៅខាងកើត​ទន្លេយ័រដាន់។ អ្នកអាចផឹកទឹកជ្រោះ ហើយយើងបានបង្គាប់ក្អែកឱ្យពាំអាហារ​យកទៅទីនោះ»។ លោកក៏ចាកចេញទៅ ហើយធ្វើតាមព្រះបន្ទូលព្រះអម្ចាស់ គឺលោកទៅស្នាក់អាស្រ័យនៅក្បែរស្ទឹងកេរីត ដែលស្ថិតនៅខាងកើតទន្លេយ័រដាន់។ ក្អែកតែងតែពាំនំប័ុង និងសាច់យកមកឱ្យលោកទាំងព្រឹក ទាំងល្ងាច ហើយលោកក៏​បរិភោគទឹកជ្រោះនោះ។

ទំនុកតម្កើងលេខ ១២១ (១២០),១-៨ បទពាក្យ ៧

ពិធីអបអរសាទរព្រះគម្ពីរដំណឹងល្អតាម មថ ៥,១២

សូមថ្លែងព្រះគម្ពីរដំណឹងល្អតាមសន្តម៉ាថាយ មថ ៥,១-១២

ព្រះយេស៊ូទតឃើញមហាជនដែលដើរតាមព្រះអង្គ។ ព្រះអង្គយាងឡើងទៅលើភ្នំ រួចគង់នៅទីនោះ។ សាវ័កនាំគ្នាចូលមកគាល់ព្រះអង្គ។ ព្រះអង្គក៏មានព្រះបន្ទូល​បង្រៀនគេថា៖ «អ្នកណាដាក់ចិត្តជាអ្នកក្រីក្រ អ្នកនោះមានសុភមង្គល ដ្បិតពួកគេបានទទួលព្រះរាជ្យនៃស្ថានបរមសុខហើយ។ អ្នកណាមានចិត្តស្លូតបូត អ្នកនោះមាន​សុភមង្គលហើយ ដ្បិតពួកគេនឹងទទួលទឹកដីទុកជាមត៌ក!។ អ្នកណាសោកសៅ អ្នក​នោះមានសុភមង្គលហើយ ដ្បិតព្រះជាម្ចាស់នឹងសម្រាលទុក្ខពួកគេ។ អ្នកណាស្រេក​ឃ្លានសេចក្តីសុចរិត អ្នកនោះមានសុភមង្គលហើយ ដ្បិតព្រះជាម្ចាស់នឹងប្រទានឱ្យ​ពួកគេឆ្អែត។ អ្នកណាមានចិត្តមេត្តាករុណា អ្នកនោះមានសុភមង្គលហើយ ដ្បិតព្រះ​ជាម្ចាស់នឹងសម្តែងព្រះហឫទ័យមេត្តាករុណាដល់ពួកគេវិញ។ អ្នកណាមានចិត្តបរិសុទ្ធ អ្នកនោះមានសុភមង្គលហើយ ដ្បិតពួកគេនឹងឃើញព្រះជាម្ចាស់។ អ្នកណាកសាង​សន្តិភាព អ្នកនោះមានសុភមង្គលហើយ ដ្បិតពួកគេនឹងមានឈ្មោះជាបុត្ររបស់ព្រះ​ជាម្ចាស់។ អ្នកណាត្រូវគេបៀតបៀនព្រោះតែបានធ្វើតាមសេចក្តីសុចរិត អ្នកនោះមាន​សុភមង្គល ដ្បិតគេបានទទួលព្រះរាជ្យនៃស្ថានបរមសុខហើយ!»។ ប្រសិនបើមានគេត្មះតិះដៀល បៀតបៀន និងមានគេនិយាយអាក្រក់គ្រប់យ៉ាងបង្ខូចឈ្មោះអ្នករាល់គ្នាព្រោះតែខ្ញុំ នោះអ្នករាល់គ្នាមានសុភមង្គលហើយ។ ចូរអរ​សប្បាយរីករាយឡើង ព្រោះអ្នករាល់គ្នានឹងទទួលរង្វាន់យ៉ាងធំនៅស្ថានបរមសុខ ​ដ្បិតពួកព្យាការីដែលរស់នៅមុនអ្នករាល់គ្នា ក៏ត្រូវគេបៀតបៀនដូច្នោះដែរ»។