ថ្ងៃចន្ទ ទី១៧ ខែកុម្ភៈ ឆ្នាំ២០២៥

អត្ថបទទី១៖ សូមថ្លែងព្រះគម្ពីរកំណើត កណ ៤,១-១៥.២៥

លោកអដាំរួមរស់ជាមួយនាងអេវ៉ាជាភរិយា នាងក៏មានផ្ទៃពោះ ហើយសម្រាលបាន​កូនប្រុសមួយឈ្មោះ “កាអ៊ីន” (ឈ្មោះនេះមានន័យថា “បង្កើត”)។ នាងពោលថា៖ «ព្រះអម្ចាស់បានប្រោសប្រទានឱ្យខ្ញុំបង្កើតមនុស្សប្រុកម្នាក់»។ នាងក៏បង្កើតអបិលជាប្អូនរបស់កាអ៊ីដែរ។ ក្រោយមក លោកអបិលប្រកបរបរជាគង្វាលចៀម រីឯលោក​កាអ៊ីនធ្វើស្រែចំការ។ នៅរដូវច្រូតកាត់ លោកកាអ៊ីនយកភោគផលពីស្រែចំការរបស់គាត់មកថ្វាយព្រះអម្ចាស់។ ឯលោកអបិល ក៏យកកូនសត្វដែលកើតមុនគេពីហ្វូងសត្វរបស់គាត់មកបូជាជាមួយខ្លាញ់វាថ្វាយព្រះអង្គដែរ។ ព្រះអម្ចាស់បែរព្រះភក្រ្តទៅទតមើលលោកអបិល ព្រមទាំងតង្វាយរបស់គាត់ តែទ្រង់មិនទតមើលោក​កាអ៊ីន​ព្រមទាំងតង្វាយរបស់គាត់ទេ។ លោកកាអ៊ីនក្តៅក្រហាយយ៉ាងខ្លាំង ទាំងក្រពុលមុខ​ទៀតផង។ ព្រះអម្ចាស់មានព្រះបន្ទូលមកលោកកាអ៊ីនថា៖ «ហេតុអ្វីបានជាអ្នកក្តៅ​ក្រហាយ? ហេតុអ្វីបានជាអ្នកក្រពុលមុខដូច្នេះ? ប្រសិនបើអ្នកប្រព្រឹត្តល្អ ម្តេចក៏អ្នក​មិនងើបមុខរីករាយឡើង? ផ្ទុយទៅវិញ បើអ្នកមិនប្រព្រឹត្តល្អទេ បាបដែលប្រៀប​បាននឹងសត្វសាហាវ ក្រាបនៅមតា់ទ្វាររង់ចាំចាប់អ្នក តែអ្នកត្រូវបង្រ្កាបវាវិញ»។ លោកកាអ៊ីបបបួលប្អូនអបិលទៅចំការ។ លុះដល់ហើយ គាត់ក៏ស្ទុះទៅប្រហារជីវិតប្អូន​ចោល។ ព្រះអម្ចាស់សួរលោកកាអ៊ីនថា៖ «អបិលប្អូនអ្នកនៅឯណា?»។ គាត់ឆ្លើយ​ថា៖ «ខ្ញុំមិនដឹងទេ! តើខ្ញុំជាអ្នកឃ្វាលប្អូនឬ?»។ ព្រះអម្ចាស់សួរទៀតថា៖ «ម្តេចក៏​អ្នកប្រព្រឹត្តដូច្នេះ? សម្រែកឈាមប្អូនអ្នកលាន់ឮពីដីដល់យើង។ ឥឡូវនេះ អ្នកត្រូវ​បណ្តាសាហើយ! អ្នកត្រូវឃ្លាតឆ្ងាយពីទឹកដី ដែលបានស្រូបយកឈាមប្អូនអ្នក គឺឈាម​ដែលអ្នកបានបង្ហូរដោយផ្ទាល់ដៃ។ ទោះបីអ្នកខំភ្ជួររាស់យ៉ាងណា ក៏ដីមិនបង្កើត​ភោគផល​ឱ្យអ្នកទៀតដែរ! អ្នកទៅជាមនុស្សអនាថា ខ្ចាត់ព្រាត់នៅលើផែនដី»។ លោកកាអ៊ីនទូលព្រះអម្ចាស់ថា៖ «កំហុសខ្ញុំធ្ងន់ពេកណាស់ ខ្ញុំទ្រាំមិនបានទេ។ ថ្ងៃនេះព្រះអង្គបណ្តេញខ្ញុំចេញពីទឹកដី ខ្ញុំនឹងត្រូវឃ្លាតឆ្ងាយពីព្រះភ័ក្រ្តព្រះអង្គ ខ្ញុំនឹងទៅជាជន​អនាថា អណ្តែត ត្រសែតនៅលើផែនដី ហើយនរណាជួប មុខជានឹងសម្លាប់ខ្ញុំចោលពុំ​ខាន»។ ព្រះអម្ចាស់មានព្រះបន្ទូលមកកាន់គាត់ថា៖ «ទេ! បើអ្នកណាសម្លាប់កាអ៊ីន គេនឹង​​​​សងសឹកអ្នកនោះវិញ មួយជាប្រាំពីរ»។ ព្រះអម្ចាស់ក៏ដៅសញ្ញាសម្គាល់មួយលើលោក​កាអ៊ីន ដើម្បីពេលមាននរណាជួបគាត់ គេមិនប្រហារជីវិតគាត់ឡើយ។ លោកអដាំរួម​រស់ជាមួយភរិយាម្តងទៀត នាងក៏សម្រាលបានកូនប្រុសមួយ ហើយនាងដាក់ឈ្មោះកូន​នោះថា “សេថ” (ឈ្មោះនេះមានន័យថា “ព្រះជាម្ចាស់ប្រោសប្រទាន”)។ នាងពោល​ថា៖ «ព្រះជាម្ចាស់បានប្រោសប្រទានកូនមួយទៀតមកឱ្យខ្ញុំ ដើម្បីបន្តពូជជំនួសអបិល​ដែលកាអ៊ីនបានសម្លាប់ទៅហើយនោះ»។

ទំនុកតម្កើងលេខ ៥០(៤៩),១.៥.៧-៧.១៦-១៧.២០-២១ បទព្រហ្មគីតិ

ពិធីអបអរសាទរព្រះគម្ពីរដំណឹងល្អតាម យហ ១៤,៦.៩

អាលេលូយ៉ា! អាលេលូយ៉ា!
បពិត្រព្រះយេស៊ូជាព្រះបុត្រារបស់ព្រះជាម្ចាស់! ព្រះអង្គពិតជាផ្លូវ ជាសេចក្តីពិត និងជាជីវិត! អ្នកណាជឿលើព្រះអង្គ អ្នកនោះទទួលស្គាល់ព្រះបិតា។ អាលេលូយ៉ា!

សូមថ្លែងព្រះគម្ពីរដំណឹងល្អតាមសន្តម៉ាកុស មក ៨,១១-១៣

ពួកខាងគណៈផារីស៊ីមកដល់ ហើយនាំគ្នាជជែកជាមួយព្រះយេស៊ូ ដើម្បីល្បងល​មើលព្រះអង្គ គេសូមឱ្យព្រះអង្គសម្តែងទីសម្គាល់ដ៏អស្ចារ្យមួយបញ្ជាក់ថា ព្រះអង្គបានទទួលអំណាចពីព្រះជាម្ចាស់។ ព្រះយេស៊ូដកដង្ហើមធំ រួចមានព្រះបន្ទូលថា៖ «ហេតុអ្វី​បានជាមនុស្សជំនាន់នេះចង់ឃើញទីសម្គាល់ដូច្នេះ? ខ្ញុំសុំប្រាប់ឱ្យអ្នករាលគ្នាដឹងច្បាស់ថា ព្រះជាម្ចាស់មិនឱ្យគេឃើញទីសម្គាល់ណាឡើយ»។ បន្ទាប់មក ព្រះអង្គយាងចាក​ចេញពីគេ ចុះទូកឆ្លងទៅត្រើយម្ខាងវិញ។​