ថ្ងៃចន្ទ ទី០២ ខែធ្នូ ឆ្នាំ២០២៤

ពាក្យអធិដ្ឋានពេលចូល

បពិត្រព្រះអម្ចាស់ជាព្រះបិតា! តាំងពីដើមមក ព្រះអង្គសព្វព្រះហឫទ័យសង្គ្រោះមនុស្សលោក។ សូមទ្រង់ព្រះមេត្តាដាស់តឿនចិត្តគំនិតយើងខ្ញុំ ឱ្យយកចិត្តទុកដាក់ទទួលព្រះបុត្រា ព្រះអង្គដែលកំពុងយាងមក។ សូមទ្រង់ប្រោសយើងខ្ញុំឱ្យនៅតែព្យាយាមអធិដ្ឋាន ព្រមទាំងប្រុងស្មារតីនៅថ្ងៃដែលព្រះគ្រីស្តគោះទ្វារផង។ យើងខ្ញុំសូមអង្វរព្រះអង្គ ដោយរួមជាមួយព្រះយេស៊ូគ្រីស្ត ជាព្រះបុត្រាព្រះអង្គ និងជាអម្ចាស់យើងខ្ញុំដែលមានព្រះជន្មគង់នៅ ហើយសោយរាជ្យរួមជាមួយព្រះបិតា និងព្រះវិញ្ញាណដ៏វិសុទ្ធ អស់កល្បជាអង្វែងតរៀង​ទៅ។

សូមថ្លែងព្រះគម្ពីរព្យាការីអេសាយ អស ៤,២-៦

នៅគ្រានោះ ព្រះអម្ចាស់នឹងធ្វើឱ្យពន្លកមួយលូតចេញមក ពន្លកនេះនាំឱ្យជនជាតិអ៊ីស្រាអែលដែលសល់ពីស្លាប់បានទទួលកិត្តិយស និងសិរីរុងរឿង។ ដីនឹងបង្កើតភោគផលដែលនាំឱ្យពួកគេបានខ្ពស់មុខ និងមានកេរ្តិ៍ឈ្មោះល្បីល្បាញ។ នៅគ្រានោះ អ្នកក្រុងស៊ីយ៉ូនដែលសល់ពីស្លាប់ គឺអ្នកក្រុងយេរូសាឡឹមដែលបានរួចជីវិតនឹងមានឈ្មោះថា អ្នកដ៏វិសុទ្ធ។ ព្រះអម្ចាស់នឹងកត់ឈ្មោះអ្នកទាំងនោះ ដើម្បីឱ្យគេរស់នៅក្នុងក្រុងយេរូសាឡឹម។ ព្រះអម្ចាស់នឹងផ្លុំខ្យល់របស់ព្រះអង្គមក ដូចភ្លើងឆេះបន្សុទ្ធដែក ដើម្បីវិនិច្ឆ័យទោស និងជម្រះអ្នកក្រុងស៊ីយ៉ូនឱ្យបានរួចផុតពីសៅហ្មង។ ព្រះអង្គក៏លាងឈាមដែលខ្មាំងបានបង្ហូរនៅក្រុងយេរូសាឡឹមដែរ។ នៅពេលនោះ ព្រះអម្ចាស់នឹងបង្កើតដុំ ពពកនៅពេលថ្ងៃ ហើយផ្សែង និងដុំភ្លើងដ៏សន្ធោសន្ធៅនៅពេលយប់ឱ្យមកស្ថិតនៅលើភ្នំស៊ីយ៉ូនទាំងមូល និងនៅលើអង្គប្រជុំនានាក្នុងពេលធ្វើបុណ្យ។ សិរីរុងរឿងរបស់ព្រះអម្ចាស់នឹងគ្របបាំងការពារអ្វីៗទាំងអស់ ប្រៀបបីដូចជាស្វេតច្ឆត្រដែលផ្តល់ម្លប់ដ៏ត្រជាក់ត្រជុំនៅពេលថ្ងៃក្តៅ ហើយក៏ជាជម្រកនៅពេលព្យុះសង្ឃរា និងពេលភ្លៀងផង។

ទំនុកតម្កើងលេខ ១២២ (១២១),១-៤.៦-៩ បទកាកគតិ

ពិធីអបអរសាទរព្រះគម្ពីរដំណឹងល្អតាម ទន ៨០,៤

សូមថ្លែងព្រះគម្ពីរដំណឹងល្អតាមសន្តម៉ាថាយ មថ ៨,៥-១១

នៅគ្រានោះ ព្រះយេស៊ូយាងចូលក្រុងកាផានុម។ មាននាយទាហានរ៉ូមុាំងម្នាក់ចូលមកគាល់ព្រះអង្គ ហើយទូលអង្វរថា៖«លោកម្ចាស់! អ្នកបម្រើរបស់ខ្ញុំប្របាទដេកស្តូកស្តឹងនៅឯផ្ទះ ទាំងឈឺចុកចាប់យ៉ាងខ្លាំង»។ ព្រះអង្គមានព្រះបន្ទូលទៅលោកថា៖«ខ្ញុំនឹងទៅមើល គាត់ឱ្យបានជា»។ នាយទាហានទូលព្រះអង្គថា៖«លោកម្ចាស់ ខ្ញុំប្របាទមានឋានៈទន់ទាបណាស់ មិនសមនឹងលោកអញ្ជើញចូលក្នុងផ្ទះខ្ញុំប្របាទឡើយ សូមលោកមានប្រសាសន៍តែមួយម៉ាត់ប៉ុណ្ណោះ អ្នកបម្រើរបស់ខ្ញុំប្របាទនឹងជាសះស្បើយមិនខាន។ ខ្ញុំប្របាទជាអ្នកនៅក្រោមបញ្ជាគេ ហើយក៏មានកូនទាហាននៅក្រោមបញ្ជាខ្ញុំប្របាទដែរ បើខ្ញុំប្របាទបញ្ជាអ្នកណាម្នាក់ឱ្យទៅ គេនឹងទៅ បើប្រាប់ម្នាក់ទៀតឱ្យមកគេនឹងមក។ ពេលខ្ញុំប្របាទបញ្ជាអ្នកណាម្នាក់ឱ្យទៅ គេនឹងទៅ បើប្រាប់ម្នាក់ទៀតឱ្យមកគេនឹងមក។ ពេលខ្ញុំប្របាទប្រាប់អ្នកបម្រើឱ្យធ្វើការអ្វីមួយ គេនឹងធ្វើតាម»។ កាលព្រះយេស៊ូទ្រង់ព្រះសណ្តាប់ដូច្នេះ ព្រះអង្គស្ងើចសរសើរណាស់ ហើយមានព្រះបន្ទូលទៅកាន់អស់អ្នកដែលដើរតាមព្រះអង្គថា៖«ខ្ញុំសុំប្រាប់ឱ្យអ្នករាល់គ្នាដឹងច្បាស់ថា ខ្ញុំមិនដែលឃើញមនុស្សណាមានជំនឿបែបនេះនៅស្រុកអ៊ីស្រាអែលឡើយ។ ខ្ញុំសុំប្រាប់អ្នករាល់គ្នាថា នឹងមានមនុស្សជាច្រើនពីទិសខាងកើត និងពីទិសខាងលិចមកចូលរួមពិធីជប់លៀងក្នុងព្រះរាជ្យនៃស្ថានបរមសុខជាមួយលោកអប្រាហាំ លោកអ៊ីសាក និងលោកយ៉ាកុប»។

ពាក្យថ្វាយតង្វាយ

បពិត្រព្រះអម្ចាស់ជាព្រះបិតា! ព្រះអង្គបានប្រោសប្រទានអ្វីៗទាំងអស់ឱ្យយើងខ្ញុំ។ ក្រៅពីព្រះអំណោយទានរបស់ព្រះអង្គ យើងខ្ញុំគ្មានអ្វីនឹងយកមកលើកថ្វាយព្រះអង្គឡើយ។ សូមទ្រង់ព្រះមេត្តាទទួលតង្វាយទាំងនេះដោយអនុគ្រោះ។ សូមទ្រង់ព្រះមេត្តាប្រោសយើងខ្ញុំដែលរួមជាមួយព្រះគ្រីស្តក្នុងអភិបូជានេះ បានរួមជាមួយព្រះអង្គអស់កល្បជានិច្ចផង។ ព្រះអង្គមានព្រះជន្មគង់នៅ និងសោយរាជ្យអស់កល្បជាអង្វែងតរៀងទៅ។

ពាក្យអរព្រះគុណ

បពិត្រព្រះអម្ចាស់ជាព្រះបិតា! ព្រះអង្គសព្វព្រះហឫទ័យត្រាស់ហៅយើងខ្ញុំឱ្យមក ជួបជុំគ្នាថ្វាយអភិបូជានៅពេលនេះ។ សូមទ្រង់ព្រះមេត្តាប្រោសយើងខ្ញុំ ឱ្យចេះស្រឡាញ់ព្រះអង្គក្នុងគ្រប់កិច្ចការដែលយើងខ្ញុំប្រព្រឹត្តនៅពេលបច្ចុប្បន្ននេះ។ សូមឱ្យយើងខ្ញុំអាចស្រឡាញ់ព្រះអង្គអស់កល្បជានិច្ចនៅលោកខាងមុខផង។ យើងខ្ញុំសូមអង្វរព្រះអង្គ ដោយរួមជាមួយព្រះយេស៊ូជាព្រះគ្រីស្ត និងជាអម្ចាស់យើងខ្ញុំ។