ពិធីគោរពព្រះយេស៊ូលីឈើឆ្កាង
Stations of the Cross
នៅថ្ងៃសុក្រពិសិដ្ឋ ឆ្នាំ១៩៩១ សម្តេចប៉ាបយ៉ូហានប៉ូលទី២ បានប្រារព្ធដំណើរផ្លូវព្រះឈើឆ្កាងមាន១៤ដំណាក់កាល ដែលឆ្លុះបញ្ចាំងយ៉ាងស៊ីជម្រៅអំពីព្រឹត្តិការណ៍ក្នុងអត្ថបទគម្ពីរស្តីអំពីទុក្ខលំបាករបស់ព្រះគ្រីស្ត។
ពិធីប្រារព្ធ៖
បពិត្រព្រះជាម្ចាស់ដ៏មានឫទ្ធានុភាព និងប្រកបដោយព្រះហឫទ័យមេត្តាករុណា
ព្រះអង្គបានចាត់ព្រះបុត្រាដ៏ជាទីស្រឡាញ់របស់ព្រះអង្គឱ្យយាងមក
ដើម្បីឱ្យយើងខ្ញុំបានរួចពីបាបដោយព្រះបុត្រា និងមានជីវិតរស់នៅអស់កល្បជានិច្ច។
សូមព្រះអង្គប្រទានពរដល់យើងខ្ញុំ នៅពេលដែលយើងប្រមូលផ្ដុំគ្នា
ដើម្បីរិះគិតអំពីការរងទុក្ខលំបាក និងការសោយទិវង្គតរបស់ព្រះគ្រីស្ត
ដើម្បីឱ្យយើងខ្ញុំរៀនតាមគំរូរបស់ព្រះអង្គអំពីផ្លូវដែលយើងត្រូវធ្វើដំណើរ។
យើងសូមទូលអង្វរព្រះអង្គ ដោយរួមជាមួយព្រះយេស៊ូគ្រីស្តជាអម្ចាស់យើងខ្ញុំ។
ឆ្លើយរួមគ្នា៖ អាម៉ែន។
ដំណាក់ទី ១
ព្រះយេស៊ូនៅសួនកេសេម៉ានី
| អ្នកណែនាំ៖ | យើងខ្ញុំសូមក្រាបថ្វាយបង្គំព្រះគ្រីស្ត។ |
| ឆ្លើយរួមគ្នា៖ | ព្រះអង្គបានបូជាព្រះជន្មដើម្បីសង្គ្រោះយើងខ្ញុំ។ |
ព្រះគម្ពីរដំណឹងល្អ (មថ ២៦,៣៦-៤១)
ពេលនោះ ព្រះយេស៊ូយាងទៅជាមួយពួកសាវ័កដល់កន្លែងមួយឈ្មោះកេតសេម៉ានី ព្រះអង្គមានព្រះបន្ទូលទៅគេថា៖ «អ្នករាល់គ្នាអង្គុយនៅទីនេះសិន ចាំខ្ញុំទៅអធិស្ឋាននៅត្រង់កន្លែងនោះ»។ព្រះអង្គនាំលោកសិលា និងកូនរបស់លោកសេបេដេទាំងពីរនាក់ទៅជាមួយ។ ពេលនោះ ព្រះអង្គចាប់ផ្ដើមព្រួយព្រះហឫទ័យ ហើយចុកចាប់អន្ទះសាពន់ប្រមាណ ព្រះអង្គមានព្រះបន្ទូលទៅកាន់អ្នកទាំងបីថា៖ «ខ្ញុំព្រួយចិត្តយ៉ាងខ្លាំងស្ទើរតែស្លាប់ អ្នករាល់គ្នានៅទីនេះសិនហើយ ចូរប្រុងស្មារតីជាមួយខ្ញុំ»។ ព្រះអង្គយាងទៅមុខបន្ដិច ក្រាបព្រះភក្ត្រដល់ដីទូលអង្វរថា៖ «ឱព្រះបិតាអើយ! ប្រសិនបើបាន សូមឱ្យពែងនៃទុក្ខលំបាកនេះចេញឆ្ងាយពីទូលបង្គំទៅ ប៉ុន្តែ សូមកុំធ្វើតាមបំណងទូលបង្គំឡើយ គឺសូមឱ្យបានសម្រេចតាមព្រះហឫទ័យរបស់ព្រះអង្គវិញ»។ ព្រះអង្គយាងមករកពួកសាវ័ក ឃើញគេកំពុងតែដេកលក់ ព្រះអង្គមានព្រះបន្ទូលទៅលោកសិលាថា៖ «អ្នករាល់គ្នាមិនស៊ូទ្រាំប្រុងស្មារតីជាមួយខ្ញុំ សូម្បីតែមួយម៉ោងក៏មិនបានដែរឬ!។ ចូរប្រុងស្មារតី ហើយអធិស្ឋាន កុំឱ្យចាញ់ការល្បួងឡើយ។ វិញ្ញាណរបស់មនុស្សប្រុងប្រៀបជាស្រេចមែន តែខ្លួនគេនៅទន់ខ្សោយទេ»។
អធិដ្ឋាន៖
បពិត្រព្រះអម្ចាស់! សូមប្រោសប្រទានកម្លាំង និងប្រាជ្ញាដល់យើងខ្ញុំ ដើម្បីឱ្យយើងខ្ញុំអាចប្រព្រឹត្តតាមព្រះហឫទ័យព្រះអង្គក្នុងគ្រប់កិច្ចការទាំងអស់។
បន្ទរ៖
បពិត្រព្រះយេស៊ូជាអម្ចាស់ សូមជួយយើងខ្ញុំឱ្យដើរតាមជំហានរបស់ព្រះអង្គផង។
ចម្រៀង៖ យើងខ្ញុំសូមក្រាបបង្គំ
| បន្ទរៈ | យើងខ្ញុំសូមក្រាបបង្គំ | គោរពដល់ព្រះឧត្តម | |
| ដែលបានប្រោសលោះលោកា | ដោយបានបូជាព្រះជន្ម | ។ | |
| ១ | គ្រាប់ស្រូវធ្លាក់នៅលើដី | ឧបមេយ្យបើមិនងាប់ទៅ | |
| គ្រាប់នៅតែមួយដដែល | មិនអាចបង្កើតផលឡើយ | ។ | |
| ២ | អ្នកណាស្រឡាញ់ជីវិត | អ្នកនោះពិតជាបាត់វា | |
| អ្នកដែលស្ម័គ្រចិត្តលះបង់ | នឹងរក្សាជីវិតគង់ | ។ | |
| ៣ | អ្នកណាចង់បម្រើខ្ញុំ | អ្នកនោះនឹងខំមកតាម | |
| រីអ្នកដែលបានបម្រើ | ព្រះបិតាតម្កើងគេ | ។ |
ដំណាក់ទី ២
លោកយូដាសក្បត់ព្រះយេស៊ូ គេចាប់ព្រះអង្គ
| អ្នកណែនាំ៖ | យើងខ្ញុំសូមក្រាបថ្វាយបង្គំព្រះគ្រីស្ត។ |
| ឆ្លើយរួមគ្នា៖ | ព្រះអង្គបានបូជាព្រះជន្មដើម្បីសង្គ្រោះយើងខ្ញុំ។ |
ព្រះគម្ពីរដំណឹងល្អ (មក ១៤,៤៣-៤៦)
ព្រះអង្គកំពុងតែមានព្រះបន្ទូលនៅឡើយ ស្រាប់តែយូដាសជាសាវ័កម្នាក់ ក្នុងចំណោមសាវ័កទាំងដប់ពីររូបមកដល់ ដោយមានបណ្ដាជនមួយក្រុម កាន់ដាវ កាន់ដំបងមកជាមួយផង។ ពួកនាយកបូជាចារ្យ ពួកបណ្ឌិតខាងវិន័យ និងពួកព្រឹទ្ធាចារ្យបានចាត់អ្នកទាំងនោះឱ្យមក។ យូដាសដែលនាំគេមកចាប់ព្រះយេស៊ូ បានសន្មតជាមួយអ្នកទាំងនោះនូវសញ្ញាមួយថា៖ «ខ្ញុំថើបអ្នកណា គឺអ្នកនោះហើយ សុំចាប់គាត់នាំយកទៅ ដោយប្រយ័ត្នប្រយែងឱ្យមែនទែន»។ កាលមកដល់ភ្លាម យូដាសដើរតម្រង់មករកព្រះយេស៊ូពោលថា៖ «លោកគ្រូ!» រួចគាត់ថើបព្រះអង្គ។ ពួកគេនាំគ្នាចាប់ព្រះយេស៊ូ។
អធិដ្ឋាន៖
បពិត្រព្រះអម្ចាស់! សូមប្រោសប្រទានកម្លាំងឱ្យយើងខ្ញុំមានឆន្ទៈប្រកបដោយជំនឿយ៉ាងមុតមាំ ចេះរស់នៅឆ្លុះបញ្ចាំងអំពីដំណឹងល្អដែលព្រះអង្គបានប្រទានដល់យើងខ្ញុំ
បន្ទរ៖
បពិត្រព្រះយេស៊ូជាអម្ចាស់ សូមជួយយើងខ្ញុំឱ្យដើរតាមជំហានរបស់ព្រះអង្គផង។
ចម្រៀង៖ បុត្រព្រះអម្ចាស់
| ១ | បុត្រព្រះអម្ចាស់ | បានឆ្កាងព្រះហស្ត | ជាយញ្ញបូជា |
| ដោយទ្រង់ជ្រៀបច្បាស់ | កិច្ចការនានា | រងទុក្ខវេទនា | |
| នៃមនុស្សលោកីយ៍ ។ | |||
| ២ | ក្តីស្រឡាញ់ត្រង់ | របស់ព្រះអង្គ | ទាញយកផែនដី |
| ទាំងមូលចូលមក | ហើយទ្រង់ឃ្មាតខ្មី | នាំមនុស្សប្រុសស្រី | |
| ឆ្ពោះព្រះបិតា ។ | |||
| ៣ | ដោយអង្គព្រះគ្រីស្ត | ទ្រង់ព្រះតម្រិះ | កែប្រែលោកកា |
| ទ្រង់ជាដើមចុង | សារពើនានា | ក៏ក្លាយទៅជា | |
| អំណោយព្រះអង្គ ។ |
ដំណាក់ទី ៣
ក្រុមប្រឹក្សាជាន់ខ្ពស់កាត់ទោសព្រះយេស៊ូ
| អ្នកណែនាំ៖ | យើងខ្ញុំសូមក្រាបថ្វាយបង្គំព្រះគ្រីស្ត។ |
| ឆ្លើយរួមគ្នា៖ | ព្រះអង្គបានបូជាព្រះជន្មដើម្បីសង្គ្រោះយើងខ្ញុំ។ |
ព្រះគម្ពីរដំណឹងល្អ (លក ២២,៦៦-៧១)
លុះព្រឹកឡើង ពួកព្រឹទ្ធាចារ្យរបស់ប្រជាជន ពួកនាយកបូជាចារ្យ និងពួកបណ្ឌិតខាងវិន័យ ជួបជុំគ្នាបង្គាប់ឱ្យគេនាំព្រះយេស៊ូចូលមកឈរនៅខាងមុខក្រុមប្រឹក្សាជាន់ខ្ពស់របស់គេ។ ពួកគេសួរព្រះអង្គថា៖ «ប្រាប់យើងមកមើល៍ តើអ្នកជាព្រះគ្រីស្ដឬ?»។ ព្រះយេស៊ូមានព្រះបន្ទូលឆ្លើយថា៖ «បើខ្ញុំប្រាប់អស់លោក ក៏អស់លោកពុំជឿខ្ញុំ ហើយបើខ្ញុំសួរអស់លោកវិញ ក៏អស់លោកមិនឆ្លើយនឹងខ្ញុំដែរ។ ប៉ុន្តែ អំណើះតទៅ បុត្រមនុស្សនឹងអង្គុយនៅខាងស្ដាំព្រះជាម្ចាស់ដ៏មានឫទ្ធានុភាព»។ ពេលនោះ គេសួរព្រមគ្នាឡើងថា៖ «បើដូច្នេះ អ្នកជាព្រះបុត្រារបស់ព្រះជាម្ចាស់ឬ?»។ ព្រះអង្គមានព្រះបន្ទូលតបថា៖ «អស់លោកមានប្រសាសន៍ត្រូវមែន គឺខ្ញុំនេះហើយ»។ គេក៏និយាយឡើងថា៖ «យើងមិនបាច់រកសាក្សីឯណាទៀតទេ ដ្បិតយើងបានឮពាក្យរបស់អ្នកនេះផ្ទាល់តែម្ដង!»។
អធិដ្ឋាន៖
បពិត្រព្រះអម្ចាស់! សូមសម្តែងឱ្យយើងខ្ញុំស្គាល់សេចក្តីសុចរិតរបស់ព្រះអង្គ ដើម្បីញ៉ាំងឱ្យយើងខ្ញុំខិតខំកសាងយុត្តិធម៌អំពីព្រះរាជដែលព្រះអង្គបានសន្យា។
បន្ទរ៖
បពិត្រព្រះយេស៊ូជាអម្ចាស់ សូមជួយយើងខ្ញុំឱ្យដើរតាមជំហានរបស់ព្រះអង្គផង។
ចម្រៀង៖ តើព្រះជាម្ចាស់ជានរណា?
| ១ | តើព្រះជាម្ចាស់ជានរណា? | ទុកឱ្យមនុស្សាបានយកឈ្នះ | |
| ចាប់យកធ្វើបាបយ៉ាងដូច្នេះ | ដោយទ្រង់មិនចេះចាប់កំហុសឡើយ | ។ | |
| បន្ទរៈ | តើព្រះជាម្ចាស់ជានរណា? | ដែលស្រឡាញ់មនុស្សលោកយ៉ាងនេះ? | (២ដង) |
| ២ | តើព្រះជាម្ចាស់ជានរណា? | ដែលបានសោយព្រះទិវង្គត | |
| ប្រទានជីវិតមិនរលត់ | ឱ្យមនុស្សរួមរស់ជាមួយព្រះអង្គ | ។ | |
| ៣ | តើព្រះជាម្ចាស់ជានរណា? | ដែលយំសោកាលើទុក្ខា | |
| នៃមនុស្សលោកាដូចមាតា | សោកសៅសោកាទុក្ខកូនភ្ងាណា | ។ |
ដំណាក់ទី ៤
លោកសិលាបដិសេធមិនស្គាល់ព្រះយេស៊ូ
| អ្នកណែនាំ៖ | យើងខ្ញុំសូមក្រាបថ្វាយបង្គំព្រះគ្រីស្ត។ |
| ឆ្លើយរួមគ្នា៖ | ព្រះអង្គបានបូជាព្រះជន្មដើម្បីសង្គ្រោះយើងខ្ញុំ។ |
ព្រះគម្ពីរដំណឹងល្អ (មថ ២៦,៦៩-៧៥)
ពេលនោះ លោកសិលាអង្គុយនៅខាងក្រៅក្នុងទីធ្លា។ មានស្ត្រីបម្រើរបស់មហាបូជាចារ្យម្នាក់ចូលមកជិតគាត់ ពោលថា៖ «អ្នកឯងជាបក្សពួករបស់យេស៊ូជាអ្នកស្រុកកាលីឡេដែរ!»។ ប៉ុន្តែ គាត់ប្រកែកថា៖ «ខ្ញុំមិនដឹងថា នាងចង់និយាយអំពីរឿងអ្វីឡើយ!» ពេលលោកសិលាដើរចេញពីទីនោះឆ្ពោះទៅរកខ្លោងទ្វារ មានស្ត្រីបម្រើម្នាក់ទៀតឃើញគាត់ ហើយពោលថា៖ «អ្នកនេះជាបក្សពួករបស់យេស៊ូជាអ្នកភូមិណាសារ៉ែតដែរ!»។ លោកសិលាក៏ប្រកែកសាជាថ្មី ទាំងស្បថថា៖ «ខ្ញុំមិនស្គាល់អ្នកនោះទេ!»។ បន្ដិចក្រោយមក អស់អ្នកដែលនៅទីនោះនាំគ្នាចូលទៅជិតលោកសិលា ហើយពោលថា៖ «អ្នកឯងពិតជាបក្សពួករបស់អ្នកទាំងនោះ ព្រោះសម្ដីអ្នកឯងបញ្ជាក់ច្បាស់ថា អ្នកឯងមកពីស្រុកកាលីឡេមែន!»។ លោកសិលាក៏ពោលឡើងថា៖ «បើខ្ញុំកុហក សូមព្រះជាម្ចាស់ដាក់ទោសខ្ញុំចុះ!។ ខ្ញុំសុំស្បថថា ខ្ញុំមិនដែលស្គាល់អ្នកនោះទាល់តែសោះ!»។ រំពេចនោះ ស្រាប់តែមាន់រងាវឡើង លោកសិលាក៏នឹកឃើញព្រះបន្ទូលរបស់ព្រះយេស៊ូដែលថា៖ «មុនមាន់រងាវ អ្នកនឹងបដិសេធបីដងថា មិនស្គាល់ខ្ញុំ»។ លោកសិលាចាកចេញពីទីនោះ ហើយយំសោកយ៉ាងខ្លោចផ្សា។
អធិដ្ឋាន៖
បពិត្រព្រះអម្ចាស់! សូមប្រោសប្រទានឱ្យយើងខ្ញុំមានចិត្តស្មោះត្រង់ ហ៊ាននិយាយសេចក្តីពិតនៅពេលមានការលំបាក។
បន្ទរ៖
បពិត្រព្រះយេស៊ូជាអម្ចាស់ សូមជួយយើងខ្ញុំឱ្យដើរតាមជំហានរបស់ព្រះអង្គផង។
ចម្រៀង៖ ព្រះគ្រីស្តព្រះសង្គ្រោះ
យើងជឿពិត ព្រះគ្រីស្ត គង់ជាមួយយើង យើងសូមកោតសរសើរ
លើឈើឆ្កាង ព្រះអង្គ ទ្រង់បានសង្គ្រោះយើង យើងសូមកោតសរសើរ។
ឱ! ព្រះគ្រីស្ត ជីវិតបូជាលើឈើឆ្កាង យើងសូមកោតសរសើរ
ទ្រង់រំដោះ បាបយើងមនុស្សលោកីយ៍ យើងសូមកោតសរសើរ។
ដំណាក់ទី ៥
ព្រះយេស៊ូនៅមុខលោកពីឡាត
| អ្នកណែនាំ៖ | យើងខ្ញុំសូមក្រាបថ្វាយបង្គំព្រះគ្រីស្ត។ |
| ឆ្លើយរួមគ្នា៖ | ព្រះអង្គបានបូជាព្រះជន្មដើម្បីសង្គ្រោះយើងខ្ញុំ។ |
ព្រះគម្ពីរដំណឹងល្អ (មក ១៥,១-៥.១៥)
លុះព្រលឹមឡើង ពួកនាយកបូជាចារ្យប្រជុំគ្នាជាមួយពួកព្រឹទ្ធាចារ្យ ពួកបណ្ឌិតខាងវិន័យ និងក្រុមប្រឹក្សាជាន់ខ្ពស់ទាំងមូល។ គេបានចងព្រះយេស៊ូ ហើយបញ្ជូនព្រះអង្គទៅលោកពីឡាត។ លោកពីឡាតសួរព្រះអង្គថា៖ «តើអ្នកជាស្ដេចយូដាមែនឬ?»។ ព្រះយេស៊ូមានព្រះបន្ទូលតបថា៖ «លោកទេតើ ដែលមានប្រសាសន៍ដូច្នេះ!»។ ពួកនាយកបូជាចារ្យបានយករឿងជាច្រើនមកចោទប្រកាន់ព្រះយេស៊ូ។ លោកពីឡាតសួរព្រះអង្គម្ដងទៀតថា៖ «ហេតុដូចម្ដេចបានជាអ្នកមិនឆ្លើយអ្វីសោះដូច្នេះ? អ្នកមិនឮពាក្យទាំងប៉ុន្មានដែលគេចោទប្រកាន់អ្នកទេឬ?»។ ព្រះយេស៊ូពុំបានឆ្លើយតបទៀតឡើយ ជាហេតុនាំឱ្យលោកពីឡាតងឿងឆ្ងល់ជាខ្លាំង។ លោកពីឡាតចង់បំពេញចិត្តបណ្ដាជនក៏ដោះលែងបារ៉ាបាស។ បន្ទាប់ពីបញ្ជាឱ្យគេវាយព្រះយេស៊ូនឹងរំពាត់រួចហើយ លោកប្រគល់ទៅឱ្យគេឆ្កាង។
អធិដ្ឋាន៖
បពិត្រព្រះអម្ចាស់! សូមប្រោសប្រទានឱ្យយើងខ្ញុំចេះថ្លឹងថ្លែង ចេះសម្លឹងមើលតាមរបៀបព្រះអង្គទត ខុសពីរបៀបដែលលោកកីយ៍សម្លឹងមើលផង។
បន្ទរ៖
បពិត្រព្រះយេស៊ូជាអម្ចាស់ សូមជួយយើងខ្ញុំឱ្យដើរតាមជំហានរបស់ព្រះអង្គផង។
ចម្រៀង៖ រួមជាមួយព្រះគ្រីស្ត
| ១ | សូមជួយយើងខ្ញុំឱ្យចេះគិតគូរ | ខំតស៊ូដើរតាមព្រះអង្គ | |
| ទោះបីយ៉ាប់យ៉ឺនលំបាកប្រាណ | លុះដល់ឈើឆ្កាងបានរុងរឿង | ។ | |
| ២ | ពេលថ្ងៃខ្ញុំធ្វើការហត់នឿយ | យប់មកដល់ហើយចិត្តខ្ញុំប៉ង | |
| ចង់រួមជាមួយព្រះអង្គផង | នេះជាបំណងដ៏ថ្លៃថ្លា | ។ | |
| បន្ទរៈ | រួមជាមួយព្រះយេស៊ូ | ជាគំរូឱ្យយើងដើរតាម | |
| រួមថ្វាយទៅកាន់ព្រះបិតា | សូមទ្រង់មេត្តា មេត្តាយើងខ្ញុំ | ។ | |
| ៣ | សូមជួយយើងខ្ញុំឱ្យមានចិត្តត្រង់ | ជឿតែព្រះអង្គគ្រប់ពេលវេលា | |
| សូមឱ្យយើងខ្ញុំចេះស្រឡាញ់គ្នា | ដូចជាព្រះបិតាស្រឡាញ់យើង | ។ |
ដំណាក់ទី ៦
គេវាយព្រះយេស៊ូ និងបំពាក់មកុដបន្លាលើព្រះសិរសាព្រះអង្គ
| អ្នកណែនាំ៖ | យើងខ្ញុំសូមក្រាបថ្វាយបង្គំព្រះគ្រីស្ត។ |
| ឆ្លើយរួមគ្នា៖ | ព្រះអង្គបានបូជាព្រះជន្មដើម្បីសង្គ្រោះយើងខ្ញុំ។ |
ព្រះគម្ពីរដំណឹងល្អ (យហ ១៩,១-៣)
ពេលនោះ លោកពីឡាតបង្គាប់ឱ្យទាហានយកព្រះយេស៊ូទៅវាយនឹងរំពាត់។ ពួកទាហានយកបន្លាមកក្រងធ្វើជាមកុដបំពាក់ព្រះសិរសាព្រះអង្គ ហើយយកអាវពណ៌ក្រហមទុំមកពាក់ឱ្យព្រះអង្គដែរ។ បន្ទាប់មក គេនាំគ្នាចូលទៅជិតព្រះអង្គ ទាំងពោលថា៖ «ស្ដេចយូដាអើយ! សូមថ្វាយបង្គំ» ហើយក៏ទះកំផ្លៀងព្រះអង្គ។
អធិដ្ឋាន៖
បពិត្រព្រះអម្ចាស់! សូមប្រោសប្រទានឱ្យយើងខ្ញុំចេះស៊ូទ្រាំក្នុងគ្រាមានទុក្ខលំបាក ដើម្បីយើងខ្ញុំថ្វាយជីវិតជាសក្ការបូជាទុកជាការលើកតម្កើងព្រះអង្គ។
បន្ទរ៖
បពិត្រព្រះយេស៊ូជាអម្ចាស់ សូមជួយយើងខ្ញុំឱ្យដើរតាមជំហានរបស់ព្រះអង្គផង។
ទំនុកតម្កើង៖ លេខ ៣៨,១៨.២២-២៣ (បទពាក្យ៧)
| ខ្ញុំធ្លាក់ខ្លួនស្គមស្គាំងរីងរៃ | ទុក្ខព្រួយរាល់ថ្ងៃទ្រូងឆាបឆួល | |
| ឈឺចាប់ជានិច្ចឥតប្រែប្រួល | ខ្លួនខ្ញុំចង់ដួលកាយទោរទន់ | ។ |
| ឱព្រះម្ចាស់អើយកុំបោះបង់ | ចោលខ្ញុំឱ្យរស់ទាំងត្រដរ | |
| មេត្តាខ្ញុំផងសូមអង្វរ | កុំយាងចេញចរខ្ញុំខ្លោចផ្សា | ។ |
| ឱព្រះអម្ចាស់ព្រះសង្គ្រោះ | សូមជួយឱ្យរស់ផុតមរណា | |
| យាងមកឆាប់ៗស្រង់សង្ខារ | នោះទើបជីវ៉ាផុតក្សិណក្ស័យ | ។ |
ដំណាក់ទី ៧
ព្រះយេស៊ូលីឈើឆ្កាង
| អ្នកណែនាំ៖ | យើងខ្ញុំសូមក្រាបថ្វាយបង្គំព្រះគ្រីស្ត។ |
| ឆ្លើយរួមគ្នា៖ | ព្រះអង្គបានបូជាព្រះជន្មដើម្បីសង្គ្រោះយើងខ្ញុំ។ |
ព្រះគម្ពីរដំណឹងល្អ (យហ ១៩,៦.១៥-១៧)
កាលពួកនាយកបូជាចារ្យ និងកងរក្សាព្រះវិហារឃើញព្រះអង្គ គេនាំគ្នាស្រែកឡើងថា៖ «ឆ្កាងទៅ! ឆ្កាងទៅ!»។ លោកពីឡាមានប្រសាសន៍ថា៖ «ចូរអ្នករាល់គ្នាយកគាត់ទៅឆ្កាងខ្លួនឯងទៅ ដ្បិតខ្ញុំពុំឃើញអ្នកនេះមានទោសអ្វីសោះ»។ ប៉ុន្តែ ជនជាតិយូដាស្រែកឡើងថា៖ «សម្លាប់ចោលទៅ! ឆ្កាងទៅ!»។ លោកពីឡាតសួរពួកគេថា៖ «ឱ្យខ្ញុំឆ្កាងស្ដេចរបស់អ្នករាល់គ្នាឬ?»។ ពួកនាយកបូជាចារ្យឆ្លើយឡើងថា៖ «ក្រៅពីព្រះចៅអធិរាជ យើងខ្ញុំគ្មានស្ដេចឯណាទៀតឡើយ»។ ពេលនោះ លោកពីឡាតប្រគល់ព្រះយេស៊ូទៅឱ្យគេឆ្កាង។ គេនាំគ្នាចាប់ព្រះយេស៊ូយកទៅ។ ព្រះយេស៊ូលីឈើឆ្កាងដោយផ្ទាល់ព្រះអង្គ ចេញពីទីក្រុងឆ្ពោះទៅកន្លែងមួយឈ្មោះ “ទួលលលាដ៍ក្បាល” ដែលគេហៅជាភាសាហេប្រឺថា “កុលកូថា” ។
អធិដ្ឋាន៖
បពិត្រព្រះអម្ចាស់! សូមប្រោសប្រទានឱ្យយើងខ្ញុំមានចិត្តក្លាហានលីឈើឆ្កាងរបស់យើងខ្ញុំជារៀងរាល់ថ្ងៃ។
បន្ទរ៖
បពិត្រព្រះយេស៊ូជាអម្ចាស់ សូមជួយយើងខ្ញុំឱ្យដើរតាមជំហានរបស់ព្រះអង្គផង។
ចម្រៀង៖ ព្រះយេស៊ូជួយសង្គ្រោះ
| ១ | ព្រះគ្រីស្តជាព្រះពិតប្រាកដ | ទ្រង់បានសោយទិវង្គតទាំងវេទនា | |
| ព្រោះតែធ្វើតាមព្រះបញ្ជា | នៃព្រះបិតាដែលថ្វាយនាម | ។ | |
| ២ | ព្រះកេសពោរពេញដោយលោហិត | ព្រះកាយជុំជិតសុទ្ធតែស្នាម | |
| គេទុកព្រះអង្គដូចសំរាម | ព្រះកាយនិងឈាមសែនវេទនា | ។ | |
| ៣ | ដោយស្នាមរបួសនៃព្រះអង្គ | អាចជួយស្រោចស្រង់យើងគ្រប់គ្នា | |
| ឱ្យផុតបាបទុក្ខផងនានា | ស្គាល់ក្តីសុខជាបានសះស្បើយ | ។ |
ដំណាក់ទី ៨
លោកស៊ីម៉ូនជាអ្នកស្រុកគីរ៉េនលីឈើឆ្កាងជំនួសព្រះយេស៊ូ
| អ្នកណែនាំ៖ | យើងខ្ញុំសូមក្រាបថ្វាយបង្គំព្រះគ្រីស្ត។ |
| ឆ្លើយរួមគ្នា៖ | ព្រះអង្គបានបូជាព្រះជន្មដើម្បីសង្គ្រោះយើងខ្ញុំ។ |
ព្រះគម្ពីរដំណឹងល្អ (មក ១៥,២១)
ពេលនោះ មានបុរសម្នាក់ជាអ្នកស្រុកគីរ៉េនត្រឡប់មកពីចម្ការ គេចាប់បង្ខំគាត់ឱ្យលីឈើឆ្កាងរបស់ព្រះយេស៊ូ។ អ្នកនោះឈ្មោះស៊ីម៉ូន ជាឪពុករបស់អឡិចសង់ និងរូភូស។
អធិដ្ឋាន៖
បពិត្រព្រះអម្ចាស់! សូមប្រោសប្រទានឱ្យយើងខ្ញុំចេះត្រៀមខ្លួនដើម្បីក្លាយជាឧបករណ៍របស់ព្រះអង្គនៅលើផែនដី។
បន្ទរ៖
បពិត្រព្រះយេស៊ូជាអម្ចាស់ សូមជួយយើងខ្ញុំឱ្យដើរតាមជំហានរបស់ព្រះអង្គផង។
ចម្រៀង៖ អ្វីៗដែលអ្នករាល់គ្នាបានប្រព្រឹត្ត
| បន្ទរៈ | គ្រប់ពេលដែលអ្នករាល់គ្នា | បានប្រព្រឹត្តអំពើអ្វី | |
| ចំពោះអ្នកតូចតាចនោះ | គឺអ្នករាល់គ្នាបានប្រព្រឹត្តចំពោះខ្ញុំដែរ | ។ | |
| ប | កាលខ្ញុំឃ្លាន | អ្នករាល់គ្នាឱ្យអាហារខ្ញុំបរិភោគ | |
| កាលខ្ញុំស្រេក | អ្នករាល់គ្នាយកទឹកមកឱ្យខ្ញុំពិសា | ។ | |
| ស | បពិត្រព្រះអម្ចាស់តើ | យើងខ្ញុំដែលបានឃើញព្រះអង្គឃ្លាន | |
| ប | ឃើញព្រះអង្គស្រេក | ||
| រួម | ហើយបានយកអាហារ និងទឹក | មកថ្វាយព្រះអង្គកាលពីពេលណា | ? |
ដំណាក់ទី ៩
ព្រះយេស៊ូ និងស្ត្រីនៅក្រុងយេរូសាឡឹម
| អ្នកណែនាំ៖ | យើងខ្ញុំសូមក្រាបថ្វាយបង្គំព្រះគ្រីស្ត។ |
| ឆ្លើយរួមគ្នា៖ | ព្រះអង្គបានបូជាព្រះជន្មដើម្បីសង្គ្រោះយើងខ្ញុំ។ |
ព្រះគម្ពីរដំណឹងល្អ (លក ២៣,២៧-៣១)
ប្រជាជនច្រើនកុះករដើរតាមព្រះអង្គទៅ ព្រមទាំងមានពួកស្ត្រីគក់ទ្រូងយំសោកអាណិតព្រះអង្គផង។ ព្រះយេស៊ូងាកមកមានព្រះបន្ទូលនឹងស្ត្រីទាំងនោះថា៖ «ស្ត្រីក្រុងយេរូសាឡឹមអើយ! កុំយំសោកអាណិតខ្ញុំធ្វើអ្វី ចូរយំសោកអាណិតខ្លួននាង និងកូននាងវិញ ដ្បិតនៅថ្ងៃក្រោយនឹងមានគេពោលថា៖ “ស្ត្រីណាឥតកូន ស្ត្រីណាមិនបង្កើតកូន និងស្ត្រីណាមិនដែលបំបៅកូន ស្ត្រីនោះពិតជាមានសុភមង្គលមែន”។ នៅពេលនោះ គេនឹងនិយាយទៅភ្នំថា៖ “ចូររលំសង្កត់ពីលើយើងខ្ញុំមក! ចូរជួយលាក់ខ្លួនយើងខ្ញុំផង!”។ បើគេធ្វើបាបឈើស្រស់យ៉ាងហ្នឹងទៅហើយ ចុះទម្រាំបើឈើងាប់វិញ តើគេនឹងធ្វើបាបដល់កម្រិតណាទៅ!»។
អធិដ្ឋាន៖
បពិត្រព្រះអម្ចាស់! សូមប្រោសប្រទានឱ្យយើងខ្ញុំមានចិត្តសប្បុរស ចេះលើកទឹកចិត្តអស់អ្នកដែលកាន់ទុក្ខសោកសង្រេង។
បន្ទរ៖
បពិត្រព្រះយេស៊ូជាអម្ចាស់ សូមជួយយើងខ្ញុំឱ្យដើរតាមជំហានរបស់ព្រះអង្គផង។
ចម្រៀង៖ កុំឱ្យរន្ធត់ចិត្ត
កុំឱ្យរន្ធត់ចិត្ត កុំឱ្យយើងភ័យខ្លាច ព្រោះយើងមានព្រះអម្ចាស់គង់នៅជាមួយយើង
កុំឱ្យរន្ធត់ចិត្ត កុំឱ្យយើងភ័យខ្លាច មានព្រះម្ចាស់បានហើយ។
ដំណាក់ទី ១០
គេឆ្កាងព្រះយេស៊ូ
| អ្នកណែនាំ៖ | យើងខ្ញុំសូមក្រាបថ្វាយបង្គំព្រះគ្រីស្ត។ |
| ឆ្លើយរួមគ្នា៖ | ព្រះអង្គបានបូជាព្រះជន្មដើម្បីសង្គ្រោះយើងខ្ញុំ។ |
ព្រះគម្ពីរដំណឹងល្អ (លក ២៣,៣៣-៣៤)
លុះមកដល់កន្លែងមួយដែលគេហៅថា “ភ្នំលលាដ៍ក្បាល” គេឆ្កាងព្រះយេស៊ូនៅទីនោះ ហើយគេក៏ឆ្កាងអ្នកទោសទាំងពីរនាក់នោះដែរ ម្នាក់នៅខាងស្ដាំព្រះអង្គ ម្នាក់ទៀតនៅខាងឆ្វេងព្រះអង្គ។ ព្រះយេស៊ូមានព្រះបន្ទូលថា៖ «ឱព្រះបិតាអើយ! សូមព្រះអង្គអត់ទោសឱ្យអ្នកទាំងនេះផង ដ្បិតគេមិនដឹងថាគេកំពុងធ្វើអ្វីឡើយ»។ គេយកសម្លៀកបំពាក់របស់ព្រះអង្គមកចាប់ឆ្នោតចែកគ្នា។
អធិដ្ឋាន៖
បពិត្រព្រះអម្ចាស់! សូមប្រោសប្រទានឱ្យយើងខ្ញុំមានចិត្តមេត្តាករុណា ដើម្បីយើងខ្ញុំចេះបង្ហាញការសម្រុះសម្រួល និងលើកលែងទោសរបស់ព្រះអង្គចំពោះមនុស្សទាំងអស់។
បន្ទរ៖
បពិត្រព្រះយេស៊ូជាអម្ចាស់ សូមជួយយើងខ្ញុំឱ្យដើរតាមជំហានរបស់ព្រះអង្គផង។
ចម្រៀង៖ ឱ! ជនកម្សត់
| ១ | ឱ! ជនកម្សត់ | ម្តេចក៏ប្រាសព្រាត់ | ពីព្រះយេស៊ូ | ចូរមកយ៉ាងឆាប់ |
| មកយ៉ាងប្រញាប់ | សូមទ្រង់លើកលែងទោស | ។ | ||
| បន្ទរៈ | ឱ! ព្រះយេស៊ូសូមមេត្តា | លើកលែងទោស | ឱ្យយើងខ្ញុំទាំងឡាយ | ។ |
| ២ | ខ្ញុំបាត់ស្មារតី | បាត់ទាំងសិរី | ធ្លាក់ខ្លួនក្សិណក្ស័យ | ព្រោះតែបាបកម្ម |
| ខុសព្រះបណ្តាំ | នៃព្រះអម្ចាស់ | ។ | ||
| ៣ | រាល់ទិនទិវា | ខ្មាំងមកយាយី | គ្រប់ទាំងទិសទី | ពីទីជម្រៅ |
| យើងខ្ញុំស្រែកហៅ | សូមឱ្យព្រះអង្គជួយ | ។ |
ដំណាក់ទី ១១
ព្រះយេស៊ូសន្យាជាមួយអ្នកទោស
| អ្នកណែនាំ៖ | យើងខ្ញុំសូមក្រាបថ្វាយបង្គំព្រះគ្រីស្ត។ |
| ឆ្លើយរួមគ្នា៖ | ព្រះអង្គបានបូជាព្រះជន្មដើម្បីសង្គ្រោះយើងខ្ញុំ។ |
ព្រះគម្ពីរដំណឹងល្អ (លក ២៣,៣៩-៤៣)
អ្នកទោសម្នាក់ដែលជាប់ឆ្កាងពោលប្រមាថព្រះយេស៊ូថា៖ «បើអ្នកជាព្រះគ្រីស្ដមែន ចូរសង្គ្រោះខ្លួនអ្នកទៅ ហើយសង្គ្រោះយើងផង!»។ ប៉ុន្តែ អ្នកទោសម្នាក់ទៀតស្ដីឱ្យអ្នកនោះថា៖ «ឯងមិនកោតខ្លាចព្រះជាម្ចាស់ទេឬ? ឯងត្រូវគេកាត់ទោសដូចលោកដែរ។ គេធ្វើទោសយើងនេះត្រូវហើយ យើងទទួលទោសតាមអំពើដែលយើងបានប្រព្រឹត្ត។ រីឯលោកវិញ លោកមិនបានធ្វើអំពើអាក្រក់អ្វីសោះ»។ បន្ទាប់មក គាត់ទូលព្រះអង្គថា៖ «ឱព្រះយេស៊ូអើយ! ពេលព្រះអង្គយាងមកគ្រងរាជ្យ សូមកុំភ្លេចទូលបង្គំ»។ ព្រះយេស៊ូមានព្រះបន្ទូលថា៖ «ខ្ញុំសុំប្រាប់ឱ្យអ្នកដឹងច្បាស់ថា ថ្ងៃនេះ អ្នកបានទៅនៅស្ថានបរមសុខជាមួយខ្ញុំ»។
អធិដ្ឋាន៖
បពិត្រព្រះអម្ចាស់! សូមប្រោសប្រទានឱ្យយើងខ្ញុំចេះតស៊ូព្យាយាម ដើម្បីយើងស្វែងរកព្រះអង្គឥតឈប់ឈរ។
បន្ទរ៖
បពិត្រព្រះយេស៊ូជាអម្ចាស់ សូមជួយយើងខ្ញុំឱ្យដើរតាមជំហានរបស់ព្រះអង្គផង។
ចម្រៀង៖ ព្រះយេស៊ូសូមកុំភ្លេចខ្ញុំ
ព្រះយេស៊ូ! សូមកុំភ្លេចខ្ញុំ! ពេលព្រះអង្គយាងមកគ្រងរាជ្យ (២ដង)។
ដំណាក់ទី ១២
ព្រះយេស៊ូមានព្រះបន្ទូលជាមួយមាតា និងសាវ័កព្រះអង្គ
| អ្នកណែនាំ៖ | យើងខ្ញុំសូមក្រាបថ្វាយបង្គំព្រះគ្រីស្ត។ |
| ឆ្លើយរួមគ្នា៖ | ព្រះអង្គបានបូជាព្រះជន្មដើម្បីសង្គ្រោះយើងខ្ញុំ។ |
ព្រះគម្ពីរដំណឹងល្អ (យហ ១៩,២៥-២៧)
មាតាព្រះយេស៊ូ ប្អូនស្រីមាតាព្រះអង្គ នាងម៉ារីជាភរិយាលោកក្លូប៉ាស និងនាងម៉ារីជាអ្នកស្រុកម៉ាដាឡាឈរក្បែរឈើឆ្កាងរបស់ព្រះអង្គ។ ព្រះយេស៊ូឃើញមាតា ព្រមទាំងសាវ័កដែលព្រះអង្គស្រឡាញ់នោះឈរនៅជិត ព្រះអង្គមានព្រះបន្ទូលទៅមាតាថា៖ «អ្នកអើយ! នេះហើយកូនរបស់អ្នក»។ បន្ទាប់មក ព្រះអង្គមានព្រះបន្ទូលទៅសាវ័កថា៖ «នេះហើយម្ដាយរបស់អ្នក»។ តាំងពីពេលនោះមក សាវ័កនោះយកគាត់មកនៅជាមួយ។
អធិដ្ឋាន៖
បពិត្រព្រះអម្ចាស់! សូមប្រោសប្រទានឱ្យយើងខ្ញុំមានចិត្តនឹងន ចេះយកអាសាអស់បងប្អូនដែលត្រូវការជំនួយ។
បន្ទរ៖
បពិត្រព្រះយេស៊ូជាអម្ចាស់ សូមជួយយើងខ្ញុំឱ្យដើរតាមជំហានរបស់ព្រះអង្គផង។
ចម្រៀង៖ ទីណាមានមេត្តា
ទីណាមានមេត្តា និងក្តីស្រឡាញ់! ទីណាមានមេត្តា ព្រះអម្ចាស់គង់ជាមួយ។
ដំណាក់ទី ១៣
ព្រះយេស៊ូសោយទិវង្គតនៅលើឈើឆ្កាង
| អ្នកណែនាំ៖ | យើងខ្ញុំសូមក្រាបថ្វាយបង្គំព្រះគ្រីស្ត។ |
| ឆ្លើយរួមគ្នា៖ | ព្រះអង្គបានបូជាព្រះជន្មដើម្បីសង្គ្រោះយើងខ្ញុំ។ |
ព្រះគម្ពីរដំណឹងល្អ (លក ២៣,៤៤-៤៦)
ពេលនោះ ប្រហែលជាថ្ងៃត្រង់ ផែនដីទាំងមូលងងឹតសូន្យរហូតដល់ម៉ោងបីរសៀល ព្រះអាទិត្យបាត់រស្មី វាំងនននៅក្នុងព្រះវិហាររហែកជាពីរចំពាក់កណ្ដាល។ ព្រះយេស៊ូបន្លឺព្រះសូរសៀងខ្លាំងៗថា៖ «ព្រះបិតា! ទូលបង្គំសូមប្រគល់វិញ្ញាណរបស់ទូលបង្គំទៅក្នុងព្រះហស្ដព្រះអង្គវិញ»។ ព្រះអង្គមានព្រះបន្ទូលដូច្នោះរួចហើយក៏រលត់វិញ្ញាណទៅ។
អធិដ្ឋាន៖
បពិត្រព្រះអម្ចាស់! សូមប្រោសប្រទានឱ្យយើងខ្ញុំទុកចិត្តលើព្រះអង្គ ដើម្បីយើងខ្ញុំប្រគល់វិញ្ញាណរបស់យើងខ្ញុំនៅលើផែនដីនេះក្នុងព្រះហស្តរបស់ព្រះអង្គនៅពេលស្លាប់ផង។
បន្ទរ៖
បពិត្រព្រះយេស៊ូជាអម្ចាស់ សូមជួយយើងខ្ញុំឱ្យដើរតាមជំហានរបស់ព្រះអង្គផង។
ចម្រៀង៖ ព្រះយេស៊ូបានសុគត
| ១ | ព្រះយេស៊ូបានសុគត | ទ្រង់បានបូជាព្រះជន្មឰដ៏ឈើឆ្កាង |
| អំពើអាក្រក់មនុស្សច្រើនពន់ប្រមាណ | ធ្វើឱ្យព្រះអង្គសោយក្តីលំបាក | |
| ដោយស៊ូទ្រាំរងទុក្ខក្នុងអង្គប្រាណ | ។ | |
| ២ | មាតារបស់ព្រះអង្គ | រងទុក្ខឈឺចាប់ខ្លោចផ្សានៅក្បែឈើឆ្កាង |
| ពេញទាំងឱរ៉ាមេត្តាអាណិតបុត្រថ្លៃ | ដែលរងទណ្ឌកម្មដោយមិនចេញស្តី | |
| ដើម្បីសង្គ្រោះមនុស្សលោកីយ៍ | ។ | |
| ៣ | យើងខ្ញុំថ្លែងអំណរគុណ | ចំពោះហឫទ័យមេត្តាសន្តោសយើងខ្ញុំ |
| យើងខ្ញុំសូមសន្យាថាវៀរចាកអាក្រក់ | សូមជួយយើងខ្ញុំកាន់ផ្លូវទៀងត្រង់ | |
| និងបានជ្រកកោនក្រោមម្លប់ព្រះអង្គ | ។ |
ដំណាក់ទី ១៤
គេដាក់ព្រះសពព្រះយេស៊ូនៅក្នុងផ្នូរថ្មី
| អ្នកណែនាំ៖ | យើងខ្ញុំសូមក្រាបថ្វាយបង្គំព្រះគ្រីស្ត។ |
| ឆ្លើយរួមគ្នា៖ | ព្រះអង្គបានបូជាព្រះជន្មដើម្បីសង្គ្រោះយើងខ្ញុំ។ |
ព្រះគម្ពីរដំណឹងល្អ (មថ ២៧,៥៧-៦០)
លុះដល់ល្ងាច មានសេដ្ឋីម្នាក់ឈ្មោះយ៉ូសែប ជាអ្នកក្រុងអារីម៉ាថេមកដល់ គាត់ក៏ជាសាវ័ករបស់ព្រះយេស៊ូដែរ។ គាត់បានអញ្ជើញទៅជួបលោកពីឡាត សុំយកព្រះសពព្រះយេស៊ូ។ លោកពីឡាតក៏បញ្ជាឱ្យគេប្រគល់ព្រះសពមកគាត់។ លោកយ៉ូសែបយកព្រះសពមករុំនឹងក្រណាត់ផាឌិបថ្មី រួចដាក់ក្នុងផ្នូរថ្មីរបស់គាត់ ជារូងថ្មដែលគេដាប់ធ្វើផ្នូរ។ បន្ទាប់មក គាត់ប្រមៀលថ្មមួយដុំធំបិទមាត់ផ្នូរ ហើយចាកចេញទៅ។
អធិដ្ឋាន៖
បពិត្រព្រះអម្ចាស់! សូមប្រោសប្រទានឱ្យយើងខ្ញុំមានចិត្តមេត្តាករុណាចេះយកអាសាអស់បងប្អូនដែលត្រូវការជំនួយ។
បន្ទរ៖
បពិត្រព្រះយេស៊ូជាអម្ចាស់ សូមជួយយើងខ្ញុំឱ្យដើរតាមជំហានរបស់ព្រះអង្គផង។
ចម្រៀង៖ អំពើអាក្រក់របស់ខ្ញុំ
| បន្ទរៈ | ព្រះអម្ចាស់ខ្ញុំដឹងច្បាស់ហើយថា | ព្រោះយើងខ្ញុំទើបព្រះអង្គក្ស័យ | |
| ដោយរងទុក្ខលំបាកឥតចេញស្តី | ខ្ញុំសូមទោសសូមទ្រង់មេត្តា | ។ | |
| ១ | អំពើអាក្រក់ខ្ញុំច្រើនឥតគណនា | ធ្វើឱ្យព្រះម្ចាស់ព្រួយហឫទ័យ | |
| ម្តេចឡើយក៏ខ្ញុំនៅរឹងទទឹង | មិនចាប់ភ្លឹកលន់តួព្រះអង្គ | ។ | |
| ២ | នៅសួនច្បារកេតសេម៉ានីនោះ | ព្រះអង្គដួលព្រោះទតបាបច្រើន | |
| សូមបិតាវៀរពែងទុក្ខនេះចេញ | តែសូមតាមព្រះហឫទ័យចុះ | ។ |
អធិដ្ឋានបញ្ចប់៖
បពិត្រព្រះអម្ចាស់យេស៊ូគ្រីស្ត
ព្រះអង្គបានរងទុក្ខលំបាក និងសោយទិវង្គត
ដើម្បីជាសក្ការបូជាបង្រួបបង្រួមផែនដី និងស្ថានបរមសុខ
និងដើម្បីសម្រុះសម្រួលមនុស្សទាំងអស់ជាមួយព្រះអង្គ។
សូមប្រោសឱ្យយើងខ្ញុំចេះទុកចិត្តលើគម្រោងការដ៏អាថ៌កំបាំងនេះ
ដើម្បីយើងខ្ញុំរួមដំណើរ និងចែករំលែកសិរីរុងរឿងឯស្ថានបរមសុខ
ដែលព្រះអង្គគង់នៅ និងសោយរាជ្យរួមជាមួយព្រះបិតា និងព្រះវិញ្ញាណដ៏វិសុទ្ធ
ជាព្រះជាម្ចាស់តែមួយ អស់កល្បជាអង្វែងតរៀងទៅ។
ឆ្លើយរួមគ្នា ៖ អាម៉ែន។
ទំព័រពាក់ព័ន្ធ | Related pages
