• ឱព្រះអម្ចាស់អើយ! សូមបើកបបូរមាត់របស់ទូលបង្គំ
  សូមឱ្យមាត់របស់ទូលបង្គំថ្លែងពាក្យសរសើរតម្កើងព្រះអង្គ។
  -ចាប់ពីអាទិត្យទី១ នៃរដូវរង់ចាំ រហូតដល់ថ្ងៃទី ១៦ ខែធ្នូ៖
  * ចូរ​នាំ​គ្នា​មក យើង​នឹង​ឱន​កាយ​ថ្វាយ‌បង្គំ​ព្រះអម្ចាស់ ព្រះអង្គជាព្រះ‌មហាក្សត្រដែលត្រូវយាងមក។
  -ចាប់ពីថ្ងៃទី ១៧ ខែធ្នូ ដល់ថ្ងៃទី ២៣ ខែធ្នូ៖
  * ព្រះអម្ចាស់មកជិតបង្កើយហើយ ចូរនាំគ្នាមកក្រាបថ្វាយបង្គំព្រះអង្គ។
  -ថ្ងៃទី ២៤ ខែធ្នូ៖
  * នៅថ្ងៃនេះ អ្នកនឹងដឹងថា​ ព្រះអម្ចាស់យាងមក ហើយនៅពេលព្រឹក អ្នកនឹងឃើញសិរីរុងរឿងរបស់ព្រះអង្គ។
  -សម្រាប់ថ្ងៃអាទិត្យ និងអធិដ្ឋានតាមពេលកំណត់ ក្នុងរដូវបុណ្យព្រះយេស៊ូប្រសូត រហូតដល់បុណ្យព្រះយេស៊ូសម្តែងព្រះអង្គ៖
  * ព្រះគ្រីស្តបានប្រសូតមកសម្រាប់យើង ចូរនាំគ្នាមកក្រាបថ្វាយបង្គំព្រះអង្គ។
  -ចាប់ពីបុណ្យព្រះយេស៊ូសម្តែងព្រះអង្គ រហូតដល់បុណ្យព្រះអម្ចាស់ព្រះយេស៊ូទទួលពិធីជ្រមុជទឹក៖
  * ព្រះគ្រីស្តបានបង្ហាញខ្លួនឱ្យយើងឃើញ ចូរនាំគ្នាមកក្រាបថ្វាយបង្គំព្រះអង្គ។
  -សម្រាប់ថ្ងៃអាទិត្យ និងអធិដ្ឋានតាមពេលកំណត់ប្រចាំថ្ងៃ ក្នុងរដូវសែសិបថ្ងៃ គឺចាប់ពីថ្ងៃពុធ បុណ្យរោយផេះ រហូតដល់ថ្ងៃសៅរ៍ នៃអាទិត្យទី៥ ក្នុងរដូវសែសិបថ្ងៃ ដោយមានពាក្យបន្ទរសម្រាប់ការអញ្ជើញគឺ៖
  បន្ទរ៖ ចូរ​នាំ​គ្នា​មក យើង​នឹង​ឱន​កាយ​ថ្វាយ‌បង្គំ​ព្រះ‌អង្គ ដែលបានស៊ូទ្រាំនឹងការល្បួង និងរងទុក្ខលំបាកសម្រាប់យើង។
  ឬ៖ ថ្ងៃ​នេះ ប្រសិន​បើ​អ្នក​រាល់​គ្នា​ឮ​ព្រះ‌សូរសៀងរបស់​ព្រះ‌អង្គ មិន​ត្រូវ​មាន​ចិត្ត​រឹង‌រូស​នោះ​ឡើយ។
  -សម្រាប់សប្តាហ៍ពិសិដ្ឋ ចាប់ពីថ្ងៃអាទិត្យបុណ្យលើកតម្កើងព្រះអម្ចាស់រងទុក្ខលំបាក ដល់ថ្ងៃព្រហស្បតិ៍ ពិសិដ្ឋ ពាក្យបន្ទរសម្រាប់ការអញ្ជើញគឺ៖
  បន្ទរ៖ ចូរ​នាំ​គ្នា​មក យើង​នឹង​ឱន​កាយ​ថ្វាយ‌បង្គំ​ព្រះ‌អង្គ ដែលបានស៊ូទ្រាំនឹងការល្បួង និងរងទុក្ខលំបាកសម្រាប់យើង។
  -ចាប់ពីថ្ងៃចន្ទ ក្នុងសប្តាហ៍បុណ្យចម្លង រហូតដល់ថ្ងៃពុធ មុនបុណ្យព្រះអម្ចាស់យេស៊ូយាងឡើងស្ថានបរមសុខ ពាក្យបន្ទរសម្រាប់ការអញ្ជើញគឺ៖
  បន្ទរ៖ ព្រះអម្ចាស់មានព្រះជន្មរស់ឡើងវិញ។ អាលេលូយ៉ា! ។
  -នៅចន្លោះថ្ងៃបុណ្យព្រះអម្ចាស់យេស៊ូយាងឡើងស្ថានបរមសុខ និងបុណ្យព្រះវិញ្ញាណយាងមក ពាក្យបន្ទរសម្រាប់ការអញ្ជើញគឺ៖
  បន្ទរ៖ ចូរនាំគ្នាមកក្រាបថ្វាយបង្គំព្រះគ្រីស្តជាអម្ចាស់ ដែលបានប្រទានព្រះវិញ្ញាណដ៏វិសុទ្ធ ឱ្យដល់ប្រជាជនរបស់ព្រះអង្គ អាលេលូយ៉ា!។
  -សម្រាប់ថ្ងៃអាទិត្យ និងអធិដ្ឋានប្រចាំថ្ងៃ ពាក្យបន្ទរសម្រាប់ការអញ្ជើញ ត្រូវរកនៅក្នុងក្បួនទំនុកតម្កើង។
  -សម្រាប់ត្រៃទិវានៃបុណ្យចម្លង បុណ្យឱឡារិក និងបុណ្យគោរព ពាក្យបន្ទរសម្រាប់ការអញ្ជើញ មានតាមរដូវនីមួយៗក្នុងពិធីបុណ្យ ឬតាមក្បួនពិធីគោរពសន្តបុគ្គល។
  -សម្រាប់បុណ្យរំឭកសន្តបុគ្គល យើងប្រើពាក្យបន្ទរ លុះត្រាណាតាមរដូវ ដែលអាចយកមកពីក្បួន ឬពាក្យអធិដ្ឋានប្រចាំថ្ងៃ។

ទំនុកតម្កើងលេខ ៩៥
ចូរ​យើង​នាំ​គ្នា​លើក​តម្កើង​ព្រះ‌អម្ចាស់!

អំណានតាមពេលកំណត់
(Office of Readings)
ឱព្រះជាម្ចាស់អើយ! សូមយាងមកជួយទូលបង្គំ
សូមព្រះអម្ចាស់យាងមកជួយសង្គ្រោះយើងខ្ញុំផង!
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក
ហើយជាដរាបតរៀងទៅ ។ អាម៉ែន! (អាលេលូយ៉ា!)

ប្រសិនបើការអធិដ្ឋានតាមពេលកំណត់ចាប់ផ្តើមជាមួយការអញ្ជើញ ពាក្យអធិដ្ឋានខាងលើនេះ ត្រូវលុបចោល។
បន្ទាប់មកមាន បទចម្រៀងចូល ក្រោយមានទំនុកតម្កើង ៣ ភ្ជាប់ជាមួយពាក្យបន្ទរ ក្រោយមកទៀត មានឃ្លាខគម្ពីរ ដែលអានមុនព្រះបន្ទូល។ ក្នុងអត្ថបទគម្ពីរ មានអត្ថបទទី១ ដែលយកចេញពីព្រះគម្ពីរ និងអត្ថបទទី២ យកចេញពីគ្រូបាធ្យាយនៃព្រះសហគមន៍ ឬលិខិតរបស់ព្រះសហគមន៍ដទៃទៀត។
HYMN TE DEUM ៖ ច្រៀងរៀងរាល់ថ្ងៃអាទិត្យ ពេលបុណ្យឱឡារិក និងបុណ្យគោរព ដោយ​យោងតាមអត្ថបទទី២។
ឱព្រះជាម្ចាស់អើយ យើងខ្ញុំសូមសរសើរតម្កើងព្រះអង្គ!
យើងខ្ញុំសូមបន្លឺសំឡេងលើកតម្កើងព្រះអង្គ ជាព្រះអម្ចាស់!
ឱព្រះបិតាដ៏មានព្រះជន្មគង់នៅអស់កល្បជានិច្ចអើយ
សកលលោកទាំងមូលនឹងនាំគ្នា មកក្រាបថ្វាយបង្គំព្រះអង្គ។
គឺព្រះអង្គហើយដែលទេវទូត អគ្គទេវទូត
និងអស់អ្នកដែលរស់នៅក្នុងស្ថានបរមសុខ
ក្រាបថ្វាយបង្គំ និងកោតសរសើរព្រះអង្គ។
ផ្ទៃមេឃ និងឬទ្ធានុភាពនៃស្ថានបរមសុខ រួមជាមួយពពួកខេរូប៊ីន និងសេរ៉ាភីម
បន្លឺសម្លេងកោតសរសើរព្រះអង្គឥតឈប់ឈរ ដោយពោលថា ៖
«ព្រះដ៏វិសុទ្ធ ព្រះដ៏វិសុទ្ធ ព្រះដ៏វិសុទ្ធ! ព្រះអង្គជាព្រះអម្ចាស់នៃពិភពទាំងមូល!
ផែនដីទាំងមូលពោរពេញទៅដោយសិរីរុងរឿងរបស់ព្រះអង្គ!»។
គឺព្រះអង្គហើយ ដែលក្រុមគ្រីស្តទូតលើកតម្កើង!
គឺព្រះអង្គហើយ ដែលពួកព្យាការីច្រៀងកោតសរសើរ!
គឺព្រះអង្គហើយ ដែលមរណសាក្សីទាំងឡាយផ្តល់សក្ខីភាព
ដោយបានបូជាជីវិតថ្វាយព្រះអង្គ!
គឺព្រះអង្គហើយ ដែលព្រះសហគមន៍ទូទាំងសកលលោក យកជាទីពឹង
ដោយប្រកាសថា ៖
ព្រះបិតា មានព្រះបារមីឧត្តុង្គឧត្តមអស់កល្បជានិច្ច
ព្រះបុត្រា ជាបុត្រដ៏ពិតប្រាកដតែមួយនៃព្រះបិតា ដែលគួរឲ្យស្ងើចសរសើរណាស់
ព្រះវិញ្ញាណដ៏វិសុទ្ធ ជាព្រះដ៏ជួយការពារ
ដែលព្រះជាម្ចាស់បានចាត់ពីស្ថានបរមសុខមក។
ឱព្រះគ្រីស្តអើយ! ព្រះអង្គជាព្រះមហាក្សត្រប្រកបដោយសិរីរុងរឿង !
ជាព្រះបុត្រារបស់ព្រះបិតាអស់កល្បជានិច្ច។
ដោយព្រះអង្គសព្វព្រះហឫទ័យសង្គ្រោះសត្វលោកទាំងមូល
ព្រះអង្គបានបន្ទាបខ្លួនរហូតដល់កើតមកជាមនុស្ស ក្នុងផ្ទៃរបស់នាងព្រហ្មចារិនី។
ព្រះអង្គបានបំបាត់អំណាចនៃសេចក្តីស្លាប់
ហេតុនេះហើយបានជាព្រះអង្គបើកទ្វារនៃព្រះរាជ្យរបស់ព្រះបិតា
ដល់អស់អ្នកជឿសង្ឃឹមលើព្រះអង្គ។
ព្រះអង្គដែលគង់នៅខាងស្តាំព្រះបិតានៅស្ថានបរមសុខ ប្រកបដោយសិរីរុងរឿង!
យើងខ្ញុំជឿជាក់ថា ព្រះអង្គនឹងយាងមកវិនិច្ឆ័យមនុស្ស ទាំងរស់ ទាំងស្លាប់
តាមព្រះបន្ទូលសន្យារបស់ព្រះអង្គ។
ឱព្រះអម្ចាស់អើយ! សូមមេត្តាយាងមកជួយសង្គ្រោះ
អស់អ្នកដែលព្រះអង្គបានប្រោសលោះ
ដោយព្រះលោហិតដ៏ថ្លៃវិសេសរបស់ព្រះអង្គ។
សូមព្រះអង្គនាំយើងខ្ញុំឲ្យទទួលចំណែកមត៌ក រួមជាមួយសន្តបុគ្គលទាំងឡាយ
ក្នុងសិរីរុងរឿងដែលនៅស្ថិតស្ថេរអស់កល្បជានិច្ច។
-ឱព្រះអម្ចាស់អើយ! សូមសង្គ្រោះប្រជារាស្ត្ររបស់ព្រះអង្គ
សូមប្រទានពរដល់កូនចៅរបស់ព្រះអង្គ។
បន្ទរ៖ សូមព្រះអង្គធ្វើជាគង្វាលថែរក្សាពួកគេរហូតតរៀងទៅ!
-យើងខ្ញុំសូមសរសើរតម្កើងព្រះអម្ចាស់ជារៀងរាល់ថ្ងៃ ៖
បន្ទរ៖ យើងខ្ញុំសូមលើកតម្កើងព្រះអម្ចាស់ ចាប់តាំងពីពេលនេះរហូតតរៀងទៅ។
-ដោយព្រះហឫទ័យមេត្តាករុណារបស់ព្រះអង្គ
សូមឲ្យយើងខ្ញុំអាចរួចផុតពីអំពើបាបនៅថ្ងៃនេះផង។
បន្ទរ៖ ឱព្រះអម្ចាស់អើយ! សូមប្រណីសន្តោសយើងខ្ញុំ!
សូមមេត្តាប្រណីសន្តោសយើងខ្ញុំផង!។
-សូមសម្តែងព្រះហឫទ័យមេត្តាករុណាមកលើយើងខ្ញុំ
បន្ទរ៖ ព្រោះយើងខ្ញុំផ្ញើជីវិតទាំងស្រុងលើព្រះអង្គហើយ។
-ព្រះអម្ចាស់ពិតជាទីសង្ឃឹមរបស់យើងខ្ញុំ៖
បន្ទរ៖ ដូច្នេះ យើងខ្ញុំនឹងលែងបាត់បង់កិត្តិយសទៀតហើយ។

ពាក្យអធិដ្ឋាន
ប្រសិនបើគ្មានការច្រៀង Te Deum ក្រោយអត្ថបទទី២ ទេនោះ យើងអាចសូត្រពាក្យអធិដ្ឋានសរុប។ ការអធិដ្ឋាននាំមុខដោយមានការអញ្ជើញគឺ៖ សូមបងប្អូនតាំងចិត្តអធិដ្ឋាន។
ប្រសិនបើការអធិដ្ឋានឆ្ពោះទៅកាន់ព្រះបិតា យើងត្រូវសូត្រថា៖ យើងខ្ញុំសូមអង្វរព្រះអង្គដោយរួមជាមួយព្រះយេស៊ូគ្រីស្ត ជាព្រះបុត្រាព្រះអង្គ ដែលមានព្រះជន្មគង់នៅ និងសោយរាជ្យរួមជាមួយព្រះបិតា និងព្រះវិញ្ញាណដ៏វិសុទ្ធអស់កល្បជាអង្វែងតរៀងទៅ។
ប្រសិនបើការអធិដ្ឋានឆ្ពោះទៅកាន់ព្រះបុត្រា យើងត្រូវសូត្រថា៖ ដែលមានព្រះជន្មគង់នៅ និងសោយរាជ្យរួមជាមួយព្រះបិតា និងព្រះវិញ្ញាណដ៏វិសុទ្ធអស់កល្បជាអង្វែងតរៀងទៅ។
ពាក្យឆ្លើយតបនៅពេលបញ្ចប់ពាក្យអធិដ្ឋាន ៖ អាម៉ែន។
ឃ្លាប្រកាសបន្ថែមចុងក្រោយ ពេលបញ្ចប់ពាក្យអធិដ្ឋាន ៖
សូមកោតសរសើរព្រះអម្ចាស់!
-សូមអរព្រះគុណព្រះជាម្ចាស់!

ពាក្យអធិដ្ឋានពេលថ្ងៃ
ឱព្រះជាម្ចាស់អើយ! សូមយាងមកជួយទូលបង្គំ
សូមព្រះអម្ចាស់យាងមកជួយសង្គ្រោះយើងខ្ញុំផង!
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក
ហើយជាដរាបតរៀងទៅ ។ អាម៉ែន! (អាលេលូយ៉ា!)

បទចម្រៀងចូល៖ បន្ទាប់មក ច្រៀងបទចម្រៀងចូល និងមិនមានការប្រារព្ធពិធីបុណ្យរំឭកសន្តបុគ្គលនៅម៉ោងនេះទេ។
ទំនុកតម្កើង៖ ទំនុកតម្កើង និងពាក្យបន្ទរ ត្រូវសូត្រក្រោយបទចម្រៀងចូល។
អត្ថបទ៖ អត្ថបទយកតាមទំនុកតម្កើង ក្រោយអានអត្ថបទរួច ត្រូវទុកពេលស្ងៀមស្ងាត់មួយរយៈ។
ពាក្យអធិដ្ឋាន៖ ជាមួយនឹងពាក្យអញ្ជើញ សូមបងប្អូនតាំងចិត្តអធិដ្ឋាន។ ប្រសិនបើការអធិដ្ឋានឆ្ពោះទៅកាន់ព្រះបិតា យើងត្រូវពោលថា៖
យើងខ្ញុំសូមអង្វរព្រះអង្គ តាមរយៈព្រះគ្រីស្តជាអម្ចាស់យើងខ្ញុំ ឬយើងខ្ញុំសូមអង្វរព្រះអង្គ​ក្នុងព្រះនាមព្រះអម្ចាស់យេស៊ូ។
ប្រសិនបើការអធិដ្ឋានឆ្ពោះទៅកាន់ព្រះបិតា បន្ទាប់ពីមានការលើកឡើងអំពីព្រះបុត្រា យើងពោលថា៖ ដែលមានព្រះជន្មគង់នៅ និងសោយរាជ្យ រួមជាមួយព្រះអង្គអស់កល្បជាអង្វែងតរៀងទៅ។
ប្រសិនបើការអធិដ្ឋានឆ្ពោះទៅកាន់ព្រះបុត្រា៖
ព្រះអង្គគង់នៅ និងសោយរាជ្យអស់កល្បជាអង្វែងតរៀងទៅ។
ឆ្លើយ៖ អាម៉ែន។
នៅក្នុងការប្រារព្ធពិធីរួម ត្រូវបន្ថែមឃ្លាសម្រែកសាទរចុងក្រោយគឺ៖
សូមកោតសរសើរព្រះអម្ចាស់!
-សូមអរព្រះគុណព្រះជាម្ចាស់!