ថ្ងៃអង្គារពិសិដ្ឋ ទី៣១ ខែមីនា ឆ្នាំ២០២៦

ពាក្យអធិដ្ឋានពេលចូល

បពិត្រព្រះអម្ចាស់ប្រកបដោយតេជានុភាពសព្វប្រការ ហើយដែលមានព្រះជន្មគង់នៅអស់កល្បជានិច្ច! សូមទ្រង់ព្រះមេត្តាបំភ្លឺចិត្តគំនិតយើងខ្ញុំ ឱ្យយល់អត្ថន័យដ៏ជ្រៅបំផុតនៃទុក្ខលំបាករបស់ព្រះយេស៊ូជាអម្ចាស់។ សូមព្រះអង្គប្រោសយើងខ្ញុំឱ្យសុខចិត្តរួមស្លាប់ រួមរស់ជាមួយព្រះគ្រីស្តផង។

សូមថ្លែងព្រះគម្ពីរព្យាការីអេសាយ អស ៤៩,១-៦

អ្នកកោះទាំងឡាយ សូមនាំគ្នាចាំស្តាប់ខ្ញុំ! ប្រជាជននៅស្រុកឆ្ងាយៗ សូមត្រង់ត្រាប់ស្តាប់ខ្ញុំនិយាយ! ព្រះអម្ចាស់បានត្រាស់ហៅខ្ញុំ តាំងពីខ្ញុំនៅក្នុងផ្ទៃម្តាយ ព្រះអង្គក៏បានពោលឈ្មោះខ្ញុំតាំងពីមុនខ្ញុំកើតមកម៉េ្លះ។ ព្រះអង្គបានប្រទានឱ្យមាត់ខ្ញុំមុតដូចដាវ ព្រះអង្គលាតព្រះហស្ថការពារខ្ញុំ។ ព្រះអង្គបានធ្វើឱ្យខ្ញុំទៅជាព្រួញស្រួច ហើយលាក់ទុកក្នុងបំពង់ព្រួញរបស់ព្រះអង្គ។ ព្រះអង្គមានព្រះបន្ទូលមកខ្ញុំថា៖ «ជនជាតិអ៊ីស្រាអែលអើយ! អ្នកជាបម្រើរបស់យើង យើងនឹងបង្ហាញសិរីរុងរឿងដោយសារអ្នក»។ រីឯខ្ញុំវិញ ខ្ញុំនឹកគិតថា ”ខ្ញុំខំប្រឹងធ្វើការ តែបែរជាឥតអំពើ ខ្ញុំខាតកម្លាំងជាអសារបង់ ហើយគ្មានបានការអ្វីឡើយ”។ ក៏ប៉ុន្តែ តាមពិតព្រះអម្ចាស់នៅតែរកយុត្តិធម៌ឱ្យខ្ញុំ ព្រះរបស់ខ្ញុំនឹងប្រទានរង្វាន់មកខ្ញុំ។ ឥឡូវនេះ ព្រះអម្ចាស់មានព្រះបន្ទូលមកខ្ញុំ គឺព្រះអង្គដែលបានសូនខ្ញុំតាំងពីក្នុងផ្ទៃម្តាយឱ្យធ្វើជាអ្នកបម្រើព្រះអង្គ ដើម្បីណែនាំកូនចៅលោកយ៉ាកុបឱ្យ​វិលត្រឡប់មករកព្រះអង្គវិញ និងដើម្បីប្រមូលប្រជាជនអ៊ីស្រាអែលមកជុំវិញព្រះអង្គ។ មែនហើយ! ព្រះអម្ចាស់ចាត់ទុកខ្ញុំជាមនុស្សថ្លៃថ្នូរ ហើយព្រះរបស់ខ្ញុំក៏ពិតជាកម្លាំងខ្ញុំដែរ។ ព្រះអង្គមានព្រះបន្ទូលមកខ្ញុំថា៖ «អ្នកមិនគ្រាន់តែជាបម្រើដែលនាំឱ្យកុលសម្ព័ន្ធនៃកូនចៅលោកយ៉ាកុបងើបឡើង និងនាំកូនចៅអ៊ីស្រាអែលដែលនៅសេសសល់ពីស្លាប់វិលមកវិញប៉ុណ្ណោះទេ គឺយើងតែងតាំងអ្នកឱ្យធ្វើជាពន្លឺបំភ្លឺប្រជាជាតិទាំងឡាយ និងនាំការសង្គ្រោះរបស់យើងរហូតដល់ស្រុកដាច់ស្រយាលនៃផែនដីទៀតផង»។

ទំនុកតម្កើងលេខ ៧១ (៧០),១-៣.៥-៦.១៥-១៧ បទពាក្យ ៧

ពិធីអបអរសាទរព្រះគម្ពីរដំ​ណឹងល្អ

សូមថ្លែងព្រះគម្ពីរដំណឹងល្អតាមសន្តយ៉ូហាន យហ ១៣,២១-៣៣.៣៦-៣៨

នៅពេលដែលព្រះយេស៊ូត្រូវឆ្លងពីលោកនេះឆ្ពោះទៅព្រះបិតា គឺនៅពេលជប់លៀងជាមួយក្រុមសាវ័ក ព្រះអង្គរន្ធត់ព្រះហប្ញទ័យក្រៃលែង ហើយមានព្រះបន្ទូលបញ្ជាក់​ថា៖ «ខ្ញុំសុំប្រាប់ឱ្យអ្នករាល់គ្នាដឹងច្បាស់ថា ក្នុងចំណោមអ្នករាល់គ្នា មានម្នាក់នឹងនាំគេមកចាប់ខ្ញុំ»។ ក្រុមសាវ័កងាកមើលមុខគ្នាទៅវិញទៅមក មិនដឹងថាព្រះអង្គមានព្រះបន្ទូលពីនរណាឡើយ។ សាវ័កម្នាក់ដែលព្រះយេស៊ូស្រឡាញ់អង្គុយក្បែរព្រះអង្គ។ លោកស៊ីម៉ូនសិលាធ្វើសញ្ញាឱ្យគាត់សួរព្រះយេស៊ូថា ព្រះអង្គមានព្រះបន្ទូលពីនរណា​។ សាវ័កនោះ ក៏ឱនទៅជិតព្រះឱរាព្រះយេស៊ូទូលសួរថា៖ «បពិត្រព្រះអម្ចាស់ តើនរណាមួយ?»។ ព្រះយេស៊ូមានព្រះបន្ទូលតបទៅគាត់ថា៖ «ខ្ញុំជ្រលក់នំប័ុងមួយដុំហុចទៅ​ឱ្យអ្នកណា គឺអ្នកនោះហើយ!»។ ព្រះអង្គក៏ជ្រលក់នំប័ុងមួយដុំហុចទៅឱ្យយូដាស ជាកូនរបស់លោកស៊ីម៉ូនអ៊ីស្ការីយ៉ុត។ ពេលយូដាសទទួលនំប័ុងនោះ មារសាតាំងក៏ចូលក្នុងចិត្តគាត់។ ព្រះយេស៊ូមានព្រះបន្ទូលទៅគាត់ថា៖ «កិច្ចការដែលអ្នកត្រូវធ្វើ ចូរធ្វើឱ្យឆាប់ៗទៅ!»។ ក្នុងបណ្តាអស់អ្នកដែលនៅរួមតុ គ្មាននរណាម្នាក់យល់ថា ហេតុអ្វីបានជាព្រះអង្គមានព្រះបន្ទូលដូច្នេះឡើយ។ ដោយយូដាសកាន់ថង់ប្រាក់ អ្នកខ្លះនឹកស្មានថា ព្រះយេស៊ូប្រើគាត់ឱ្យទៅទិញរបស់របរសម្រាប់ធ្វើពិធីបុណ្យ ឬឱ្យយកប្រាក់ទៅចែកដល់ជនក្រីក្រ។ យូដាសទទួលយកនំប័ុង រួចចេញទៅភ្លាម។ ពេលនោះ យប់ងងឹតហើយ។
លុះយូដាសចេញផុតទៅ ព្រះយេស៊ូមានព្រះបន្ទូលថា៖ «ឥឡូវនេះបុត្រមនុស្សបានសម្តែងសិរីរុងរឿងហើយ ហើយព្រះជាម្ចាស់ក៏បានសម្តែងសិរីរុងរឿងក្នុងបុត្រមនុស្សដែរ។ បើព្រះជាម្ចាស់បានសម្តែងសិរីរុងរឿងក្នុងបុត្រមនុស្ស ព្រះអង្គក៏នឹងសម្តែងសិរីរុងរឿងរបស់បុត្រមនុស្សក្នុងព្រះអង្គផ្ទាល់ដែរ ហើយព្រះអង្គនឹងសម្តែងសិរីរុងរឿងរបស់បុត្រមនុស្សនៅពេលឆាប់ៗខាងមុខនេះ។ ម្នាលកូនចៅ​អើយ! ខ្ញុំនៅជាមួយអ្នករាល់គ្នាតែមួយរយៈពេលដ៏ខ្លីទៀត។ អ្នករាល់គ្នានឹងតាមរកខ្ញុំ ប៉ុន្តែឥឡូវនេះ ខ្ញុំសុំប្រាប់អ្នករាល់គ្នា ដូចខ្ញុំបានប្រាប់ជនជាតិយូដាមកហើយដែរថា អ្នករាល់គ្នាពុំអាចទៅកន្លែងដែលខ្ញុំទៅនោះបានឡើយ។ លោកស៊ីម៉ូនសិលាទូលសួរព្រះអង្គថា៖ «បពិត្រព្រះអម្ចាស់! តើព្រះអង្គយាងទៅណា?»។ ព្រះយេស៊ូមានព្រះបន្ទូលឆ្លើយថា៖ «កន្លែងដែលខ្ញុំទៅ អ្នកមិនអាចទៅតាមខ្ញុំនៅ​ពេលនេះបានទេ។ ថ្ងៃក្រោយ ទើបអ្នកទៅបាន»។ លោកសិលាទូលព្រះអង្គទៀតថា៖ «បពិត្រព្រះអម្ចាស់! ហេតុដូចម្តេចបានជាទូលបង្គំមិនអាចទៅតាមព្រះអង្គឥឡូវនេះបាន? ទូលបង្គំសុខចិត្តស៊ូប្តូរជីវិតសម្រាប់ព្រះអង្គ»។ ព្រះយេស៊ូមានព្រះបន្ទូលតបថា៖ «អ្នកសុខចិត្តស៊ូប្តូរជីវិតសម្រាប់ខ្ញុំមែន! តែខ្ញុំសុំប្រាប់ឱ្យអ្នកដឹងច្បាស់ថា មុនមាន់រងាវអ្នកនឹងបដិសេធបីដងថាមិនស្គាល់ខ្ញុំ»។

ពាក្យថ្វាយតង្វាយ

បពិត្រព្រះអម្ចាស់ជាព្រះបិតា! ព្រះអង្គសព្វព្រះហប្ញទ័យឱ្យមហាគ្រួសារព្រះអង្គរួមគ្នាថ្វាយសក្ការបូជានេះ សូមទ្រង់ព្រះមេត្តាទទួលដោយអនុគ្រោះ។ ក្នុងអភិបូជា យើងខ្ញុំធ្វើអគ្គសញ្ញាបញ្ជាក់ថា សូមចូលរួមនឹងព្រះគ្រីស្តដែលបូជាព្រះជន្មយ៉ាងណា សូមប្រោសយើងខ្ញុំឱ្យរួមរស់ជាមួយព្រះគ្រីស្តនៅស្ថានបរមសុខយ៉ាងពេញលេញនោះដែរ។

ពាក្យអរព្រះគុណ

បពិត្រព្រះអម្ចាស់ជាព្រះបិតា! ព្រះអង្គបានប្រទានព្រះកាយ និងព្រះលោហិតព្រះគ្រីស្តឱ្យយើងខ្ញុំធ្វើជាអាហារដែលផ្តល់ជីវិត។ សូមទ្រង់ព្រះមេត្តាប្រោសយើងខ្ញុំឱ្យមានកម្លាំង ប្រព្រឹត្តតាមព្រះហប្ញទ័យព្រះអង្គជានិច្ច។