បុណ្យលើកតម្កើងព្រះត្រៃឯក (ពេលល្ងាចទី១)

Posted on 26 ខែឧសភា 202526 ខែឧសភា 2025 by Siya Khim

អាទិត្យទី១១ ក្នុងរដូវធម្មតា

បុណ្យលើកតម្កើងព្រះត្រៃឯក

(បុណ្យឱឡារិក)

_{(ពេលល្ងាចទី១)}

ឱព្រះអម្ចាស់អើយ! សូមយាងមកជួយទូលបង្គំ
សូមព្រះអម្ចាស់យាងមកជួយសង្គ្រោះយើងខ្ញុំផង!
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក
ហើយជាដរាបតរៀងទៅ។ អាម៉ែន! (អាលេលូយ៉ា!)

ចម្រៀងចូល

ទំនុកតម្កើងលេខ ១១៣

បន្ទរទី១៖ សូមលើកតម្កើងសិរីរុងរឿងរបស់ព្រះត្រៃឯក ! ជាព្រះជាម្ចាស់តែមួយក្នុងអង្គទាំងបីស្មើគ្នា។ ព្រះអង្គមានព្រះជន្មគង់នៅតាំងតែពីដើម និងជាដរាបតរៀងទៅ។

^១	ចូរសរសើរតម្កើងព្រះអម្ចាស់! អ្នកបម្រើរបស់ព្រះ‌អម្ចាស់អើយ ចូរនាំគ្នាសរសើរតម្កើងព្រះអង្គ! ចូរនាំគ្នាសរសើរតម្កើងព្រះ‌នាមព្រះ‌អម្ចាស់!
^២	ចូរលើកតម្កើងព្រះ‌នាមព្រះ‌អម្ចាស់តាំងពីពេលនេះរហូតតទៅ!
^៣	តាំងពីពេលថ្ងៃរះ រហូតទល់ថ្ងៃលិច ចូរសរសើរតម្កើងព្រះ‌នាមរបស់ព្រះ‌អម្ចាស់!
^៤	ព្រះ‌អម្ចាស់គង់នៅពីលើប្រជា‌ជាតិទាំង‌ឡាយ សិរី‌រុងរឿងរបស់ព្រះ‌អង្គខ្ពស់ជាងផ្ទៃមេឃទៅទៀត។
^៥	តើមាននរណាអាចផ្ទឹមស្មើនឹងព្រះអម្ចាស់ជាព្រះរបស់យើងបាន? ព្រះ‌អង្គគង់នៅលើស្ថានដ៏ខ្ពស់បំផុត
^៦	ព្រះ‌អង្គទតមើលមកផ្ទៃមេឃ និងផែន‌ដី ដែលនៅខាងក្រោមព្រះ‌អង្គ។
^៧	ព្រះ‌អង្គលើកមនុស្សទន់ខ្សោយឡើងពីធូលីដី ព្រះ‌អង្គលើកមនុស្សទុរគតឡើងពីភក់ជ្រាំ
^៨	ដើម្បីឱ្យគេកាន់កាប់អំណាចរួមជាមួយពួកអ្នកធំ គឺរួមជាមួយពួកអ្នកធំនៅក្នុងចំណោមប្រជា‌រាស្ដ្ររបស់ព្រះ‌អង្គ។
^៩	ព្រះ‌អង្គប្រទានឱ្យស្ត្រីអារមានកូន ឱ្យនាងរស់នៅក្នុងផ្ទះយ៉ាងសប្បាយជាមួយកូនៗរបស់នាង។ អាលេលូយ៉ា!

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ៖ សូមលើកតម្កើងសិរីរុងរឿងរបស់ព្រះត្រៃឯក ! ជាព្រះជាម្ចាស់តែមួយក្នុងអង្គទាំងបីស្មើគ្នា។ ព្រះអង្គមានព្រះជន្មគង់នៅតាំងតែពីដើម និងជាដរាបតរៀងទៅ។

ទំនុកតម្កើងលេខ ១៤៧,១២-២០

បន្ទរទី២៖ សូមលើកតម្កើងព្រះត្រៃឯក ដែលមិនអាចបំបែកចេញពីគ្នាបាន។ ចូរយើងលើកតម្កើងព្រះជាម្ចាស់ ដែលបានបង្ហាញឱ្យយើងស្គាល់ធម៌មេត្តាករុណារបស់ព្រះអង្គ។

(បទព្រហ្មគីតិ)

^១២-	ក្រុងយេរូសាឡឹម	កុំស្ងាត់ស្ងៀមនៅរេរង់
	ព្រមទាំងក្រុងស៊ីយ៉ូន	ចូរត្រៀមខ្លួនថ្កើងព្រះម្ចាស់	។
^១៣-	ដ្បិតព្រះអង្គការពារ	អ្នករាល់គ្នាបានសុខណាស់
	ទ្រង់ឱ្យពរដល់រាស្រ្ត	ដែលរស់ពាសពេញទីក្រុង	។
^១៤-	ទ្រង់ប្រទានទឹកដី	មានសេរីសុខត្រចង់
	សន្តិភាពគ្រប់ជ្រុង	ស្រូវបម្រុងច្រើនមហិមា	។
^១៥-	នៅលើផ្ទៃផែនដី	ស្រស់ប្រិមប្រីយ៍ទ្រង់បញ្ជា
	ផ្សព្វផ្សាយគ្រប់ទិសា	ពីបញ្ជាព្រះអម្ចាស់	។
^១៦-	ព្រះអង្គឱ្យទឹកកក	ធ្លាក់ចុះមកច្រើនដេរដាស
	សន្សើមត្រជាក់ណាស់	ក៏ធ្លាក់ចុះតាមបញ្ជា	។
^១៧-	ព្រះអង្គធ្វើឱ្យព្រឹល	ធ្លាក់មិនខ្ជិលច្រើនមហិមា
	ឱ្យមានធាតុរងា	តើនរណាអាចទ្រាំបាន?	។
^១៨-	ពេលទ្រង់មានបន្ទូល	ធ្វើឱ្យព្រឹលទាំងប៉ុន្មាន
	ទឹកកកគ្រប់ទីស្ថាន	រលាយបានជាទឹកអស់	។
	ធ្វើឱ្យមានទាំងខ្យល់	បោកវិលវល់មិនឈប់សោះ
	បក់យកទឹកទាំងនោះ	ហូរតាមជ្រោះទៅមិនសល់	។
^១៩-	ទ្រង់សម្តែងឱ្យពូជ	លោកយ៉ាកុបស្តាប់បន្ទូល
	ក្រឹត្យវិន័យនិមល	ឱ្យអ៊ីស្រាអែលបានដឹង	។
^២០-	ព្រះអង្គពុំបញ្ជា	សព្វកិច្ចការអស់ទាំងហ្នឹង
	ឱ្យជាតិសាសន៍ផ្សេងដឹង	វិន័យទ្រង់នោះសោះឡើយ	។
	សិរីរុងរឿងដល់	ព្រះបិតាព្រះបុត្រា
	និងព្រះវិញ្ញាណផង	ដែលទ្រង់គង់នៅជានិច្ច	។

បន្ទរ៖ សូមលើកតម្កើងព្រះត្រៃឯក ដែលមិនអាចបំបែកចេញពីគ្នាបាន។ ចូរយើងលើកតម្កើងព្រះជាម្ចាស់ ដែលបានបង្ហាញឱ្យយើងស្គាល់ធម៌មេត្តាករុណារបស់ព្រះអង្គ។

បទលើកតម្កើងតាមលិខិតអេភេសូ (អភ ១,៣-១០)

បន្ទរទី៣៖ សូមលើកតម្កើងសិរីរុងរឿង និងព្រះកិត្តិនាមរបស់ព្រះជាម្ចាស់ ក្នុងអង្គទាំងបី គឺព្រះបិតា ព្រះបុត្រា និងព្រះវិញ្ញាណដ៏វិសុទ្ធ ! សូមសរសើរតម្កើងសិរីរុងរឿងរបស់ព្រះអង្គអស់កល្បជាអង្វែងតរៀងទៅ !

^៣	សូមលើកតម្កើងព្រះ‌ជាម្ចាស់ ជាព្រះ‌បិតារបស់ព្រះ‌យេស៊ូ‌គ្រីស្ត ជាព្រះ‌អម្ចាស់នៃយើង ដែលបានប្រោសប្រទានព្រះ‌ពរគ្រប់យ៉ាងផ្នែកខាងវិញ្ញាណពីស្ថានបរម‌សុខមកយើង ក្នុងអង្គព្រះ‌គ្រីស្ត។
^៤	ព្រះ‌អង្គបានជ្រើស‌រើសយើងក្នុងអង្គព្រះ‌គ្រីស្ត តាំងពីមុនកំណើតពិភព‌លោកមកម៉្លេះ ដើម្បីឱ្យយើងវិសុទ្ធ និងឥតសៅ‌ហ្មងនៅចំពោះព្រះ‌ភក្ត្រព្រះ‌អង្គ ព្រោះព្រះ‌អង្គមានព្រះ‌ហឫទ័យស្រឡាញ់យើង។
^៥	ព្រះ‌អង្គបានតម្រូវយើងទុកជាមុន ឱ្យធ្វើជាបុត្រធីតារបស់ព្រះ‌អង្គ ដោយ‌សារព្រះ‌យេស៊ូ‌គ្រីស្ត ស្របនឹងបំណងដ៏សប្បុរសរបស់ព្រះ‌អង្គ
^៦	ដើម្បីឱ្យយើងលើកតម្កើងសិរី‌រុងរឿងនៃព្រះ‌ហឫទ័យប្រណី‌សន្ដោស ដែលព្រះ‌អង្គបានប្រោសប្រទានមកយើង ក្នុងអង្គព្រះ‌បុត្រាដ៏ជាទីស្រឡាញ់របស់ព្រះ‌អង្គ។
^៧	ដោយយើងរួមក្នុងអង្គព្រះ‌គ្រីស្តនេះ ព្រះ‌ជាម្ចាស់បានលោះយើង ដោយព្រះ‌លោហិតរបស់ព្រះ‌អង្គ និងលើក‌លែងទោសឱ្យយើងបានរួចពីបាប តាមព្រះ‌ហឫទ័យប្រណី‌សន្ដោសដ៏លើស‌លប់របស់ព្រះ‌អង្គ។
^៨	ព្រះ‌ជាម្ចាស់ប្រណី‌សន្ដោសយើងយ៉ាងខ្លាំងបំផុត គឺព្រះ‌អង្គប្រទានឱ្យយើងមានតម្រិះ និងប្រាជ្ញាដ៏វាង‌វៃគ្រប់យ៉ាង។
^៩	ព្រះអង្គបានប្រោសឱ្យយើងស្គាល់គម្រោងការដ៏លាក់កំបាំងនៃព្រះ‌ហឫទ័យរបស់ព្រះ‌អង្គ តាមបំណងដ៏សប្បុរស ដែលព្រះ‌អង្គបានសម្រេចទុកជាមុន ដោយព្រះ‌អង្គផ្ទាល់។
^១០	ព្រះអង្គចាត់ចែងគម្រោងការនេះឱ្យបានសម្រេច នៅគ្រាចុងក្រោយបំផុត គឺប្រមូលអ្វីៗទាំងអស់ដែលនៅស្ថានបរម‌សុខ និងនៅលើផែន‌ដី ឱ្យរួមគ្នានៅក្នុងអង្គព្រះ‌គ្រីស្ត ជាម្ចាស់តែមួយ។

បន្ទរ៖ សូមលើកតម្កើងសិរីរុងរឿង និងព្រះកិត្តិនាមរបស់ព្រះជាម្ចាស់ ក្នុងអង្គទាំងបី គឺព្រះបិតា ព្រះបុត្រា និងព្រះវិញ្ញាណដ៏វិសុទ្ធ ! សូមសរសើរតម្កើងសិរីរុងរឿងរបស់ព្រះអង្គអស់កល្បជាអង្វែងតរៀងទៅ !

ព្រះបន្ទូលរបស់ព្រះជាម្ចាស់ (រ៉ូម ១១,៣៣-៣៦)

ព្រះ‌ហឫទ័យទូលាយរបស់ព្រះ‌ជាម្ចាស់ជ្រៅពន់ពេកណាស់ ហើយព្រះ‌ប្រាជ្ញា‌ញាណ និងព្រះ‌តម្រិះរបស់ព្រះ‌អង្គក៏ខ្ពង់‌ខ្ពស់ដែរ! គ្មាននរណាអាចយល់ការសម្រេចរបស់ព្រះ‌អង្គឡើយ ហើយក៏គ្មាននរណាអាចយល់មាគ៌ារបស់ព្រះ‌អង្គបានដែរ ! តើនរណាស្គាល់គំនិតរបស់ព្រះ‌អម្ចាស់ ? តើនរណាបានថ្វាយយោបល់ទៅព្រះ‌អង្គ ? តើនរណាបានថ្វាយអ្វីមួយទៅព្រះ‌អង្គ ដើម្បីឱ្យព្រះ‌អង្គតបស្នងសងគុណវិញ? ។ អ្វីៗទាំងអស់សុទ្ធតែមកពីព្រះ‌អង្គ ដោយ‌សារព្រះ‌អង្គ និងសម្រាប់ព្រះ‌អង្គ! ។ សូមលើកតម្កើងសិរី‌រុងរឿងរបស់ព្រះ‌អង្គអស់កល្ប‌ជានិច្ច! អាម៉ែន! ។

បន្ទរ៖ ចូរយើងក្រាបថ្វាយបង្គំព្រះបិតា ព្រះបុត្រា និងព្រះវិញ្ញាណដ៏វិសុទ្ធ។ *ចូរយើងកោតសរសើរព្រះជាម្ចាស់អស់កល្បជានិច្ច។ បន្ទរឡើងវិញ៖…
-មានតែព្រះជាម្ចាស់តែមួយព្រះអង្គគត់ ដែលប្រកបដោយព្រះ កិត្តិនាម និងសិរីរុងរឿង។ បន្ទរ៖ *…
-សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ។ បន្ទរ៖…

ទំនុកតម្កើងរបស់ព្រះនាងម៉ារី

បន្ទរ៖ យើងខ្ញុំសូមអរព្រះគុណព្រះជាម្ចាស់ ! យើងខ្ញុំសូមអរព្រះគុណព្រះត្រៃឯកដ៏ពិតប្រាកដតែមួយ ! ព្រះអង្គមានសភាពជាព្រះជាម្ចាស់តែមួយ ជាអង្គតែមួយដ៏វិសុទ្ធ ដែលគង់នៅស្ថានដ៏ខ្ពង់ខ្ពស់បំផុត។

^៤៦	«ព្រលឹងខ្ញុំសូមលើកតម្កើងព្រះ‌អម្ចាស់*
^៤៧	ខ្ញុំមានចិត្តអំណរយ៉ាងខ្លាំង ព្រោះព្រះជាម្ចាស់ជាព្រះសង្គ្រោះរបស់ខ្ញុំ
^៤៨	ព្រះអង្គទតមើលមកខ្ញុំ ដែលជាអ្នកបម្រើដ៏ទន់ទាបរបស់ព្រះអង្គ អំណើះតទៅ មនុស្សគ្រប់ជំនាន់នឹងពោលថា ខ្ញុំជាអ្នកមានសុភមង្គលពិតមែន
^៤៩	ព្រះដ៏មានតេជានុភាព បានសម្ដែងការប្រសើរអស្ចារ្យចំពោះរូបខ្ញុំ។ ព្រះនាមរបស់ព្រះអង្គពិតជាវិសុទ្ធមែន!
^៥០	ទ្រង់មានព្រះហឫទ័យមេត្តាករុណា ដល់អស់អ្នកដែលកោតខ្លាចព្រះអង្គនៅគ្រប់ជំនាន់តរៀងទៅ
^៥១	ទ្រង់បានសម្ដែងឫទ្ធិបារមី កម្ចាត់មនុស្សដែលមានចិត្តឆ្មើងឆ្មៃ
^៥២	ទ្រង់បានទម្លាក់អ្នកកាន់អំណាចចុះពីតំណែង ហើយទ្រង់លើកតម្កើងមនុស្សទន់ទាបឡើង។
^៥៣	ទ្រង់បានប្រទានសម្បត្តិយ៉ាងបរិបូណ៌ ដល់អស់អ្នកដែលស្រេកឃ្លាន ហើយបណ្តេញពួកអ្នកមានឱ្យត្រឡប់ទៅវិញដោយដៃទទេ។
^៥៤	ព្រះអង្គបានជួយប្រជារាស្ត្រអ៊ីស្រាអែល ជាអ្នកបម្រើរបស់ព្រះអង្គ ហើយតែងតែសម្ដែងព្រះហឫទ័យមេត្តាករុណា
^៥៥	ដល់លោកអប្រាហាំ និងពូជពង្សរបស់លោកជានិច្ចតរៀងទៅ ដូចទ្រង់បានសន្យាជាមួយបុព្វបុរសយើង ឥតភ្លេចសោះឡើយ។

ឬ ទំនុកតម្កើងរបស់ព្រះនាងម៉ារី (តាមបែបស្មូត) បទព្រហ្មគីតិ

^៤៧	ខ្ញុំមានចិត្តអំណរ	សប្បាយអរពន់ពេកណាស់
	ព្រោះខ្ញុំបានដឹងច្បាស់	ថាព្រះម្ចាស់ទ្រង់សង្គ្រោះ	។
^៤៨	ព្រះអង្គទតមកខ្ញុំ	ជាអ្នកបម្រើស្ម័គ្រស្មោះ
	តទៅមនុស្សទាំងអស់	ថាខ្ញុំនេះសែនសុខក្រៃ	។
^៤៩	ព្រះដ៏មានឫទ្ធា	ខ្លាំងអស្ចារ្យលើលោកីយ៍
	សម្ដែងឫទ្ធិបារមី	ព្រះនាមថ្លៃថ្លាវិសុទ្ធ	។
^៥០	ទ្រង់មានព្រះហឫទ័យ	ត្រាប្រណីខ្ពស់បំផុត
	ដល់អ្នកគោរពកោត	ខ្លាចព្រះអង្គរៀងរហូត	។
^៥១	ព្រះអង្គសម្ដែងឫទ្ធិ	អស្ចារ្យពិតមិនរលត់
	កម្ចាត់មនុស្សមានពុត	ឆ្មើងបំផុតឫកខែងរែង	។
^៥២	ទ្រង់បានច្រានទម្លាក់	អ្នកធំធ្លាក់ពីតំណែង
	ឥតមានខ្លាចរអែង	ហើយទ្រង់តែងលើកអ្នកទាប	។
^៥៣	ព្រះអង្គប្រោសប្រទាន	ឱ្យអ្នកឃ្លានឆ្អែតដរាប
	អ្នកមានធនធានស្រាប់	ដេញត្រឡប់ដៃទទេ	។
^៥៤	ព្រះអង្គបានជួយរាស្ត្រ	ទ្រង់ទាំងអស់ឥតប្រួលប្រែ
	អ៊ីស្រាអែលនៅក្បែរ	ជាបម្រើដ៏ស្មោះស្ម័គ្រ	។
^៥៥	ទ្រង់តែងមានព្រះទ័យ	ករុណាក្រៃមិនថ្នាំងថ្នាក់
	លោកអប្រាហាំជាក់	និងពូជពង្សលោកជានិច្ច	។
	ដូចទ្រង់បានសន្យា	នឹងដូនតាឥតមានភ្លេច
	ព្រះអង្គចាំជានិច្ច	គ្មានកលកិច្ចប្រែប្រួលឡើយ	។
	សិរីរុងរឿងដល់	ព្រះបិតាព្រះបុត្រា
	និងព្រះវិញ្ញាណផង	ដែលទ្រង់គង់នៅជានិច្ច	។

បន្ទរ៖ យើងខ្ញុំសូមអរព្រះគុណព្រះជាម្ចាស់ ! យើងខ្ញុំសូមអរព្រះគុណព្រះត្រៃឯកដ៏ពិតប្រាកដតែមួយ ! ព្រះអង្គមានសភាពជាព្រះជាម្ចាស់តែមួយ ជាអង្គតែមួយដ៏វិសុទ្ធ ដែលគង់នៅស្ថានដ៏ខ្ពង់ខ្ពស់បំផុត។

ពាក្យអង្វរសកល

បពិត្រព្រះបិតាព្រះអង្គបានប្រទានជីវិតឱ្យព្រះគ្រីស្ត ជាព្រះបុត្រាព្រះអង្គ តាមរយៈព្រះវិញ្ញាណដ៏វិសុទ្ធ ហើយព្រះអង្គបានធ្វើឱ្យព្រះបុត្រាទៅជាប្រភពនៃជីវិតសម្រាប់យើងខ្ញុំ។ ចូរយើងបន្លឺសម្លេងសរសើរតម្កើងព្រះត្រៃឯកថា ៖

បន្ទរ៖ សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ !

បពិត្រព្រះបិតាដ៏មានឫទ្ធានុភាព និងមានព្រះជន្មគង់នៅអស់កល្បជានិច្ច ! សូមព្រះអង្គចាត់ព្រះវិញ្ញាណដ៏វិសុទ្ធ ឱ្យយាងមកសណ្ឋិតលើព្រះសហគមន៍ ក្នុងព្រះនាមព្រះបុត្រាព្រះអង្គ
—សូមថែរក្សាព្រះសហគមន៍របស់ព្រះអង្គនៅក្នុងការរួបរួមគ្នានៃសប្បុរសធម៌ និងសេចក្តីពិតដ៏ពេញលក្ខណៈ។ (បន្ទរ)

បពិត្រព្រះអម្ចាស់ ! សូមព្រះអង្គចាត់ពួកកម្មករមកក្នុងស្រែរបស់ព្រះអង្គ ដើម្បីបង្រៀនសេចក្តីពិតដល់ប្រជាជាតិទាំងឡាយ ហើយធ្វើពិធីជ្រមុជទឹកឱ្យគេ ក្នុងព្រះនាមព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
—ព្រមទាំងបញ្ជាក់ជំនឿរបស់ពួកគេផង។ (បន្ទរ)

បពិត្រព្រះបិតា ! សូមព្រះអង្គចាត់ព្រះដ៏ជួយការពារដល់អស់អ្នកដែលរងទុក្ខដោយការបៀតបៀន ព្រោះតែព្រះនាមព្រះបុត្រារបស់ព្រះអង្គ
—ដ្បិតទ្រង់មានព្រះបន្ទូលសន្យាថា នឹងចាត់ព្រះវិញ្ញាណនៃសេចក្តីពិតមកឆ្លើយជំនួសពួកគេ។ (បន្ទរ)

បពិត្រព្រះបិតាដែលមានគ្រប់ទាំងអំណាច ! សូមឱ្យមនុស្សលោកទទួលស្គាល់ព្រះអង្គទាំងអស់គ្នា រួមជាមួយព្រះបន្ទូល និងព្រះវិញ្ញាណដ៏វិសុទ្ធ ជាព្រះជាម្ចាស់ដ៏ពិតប្រាកដតែមួយ
—សូមឱ្យពួកគេជឿលើព្រះអង្គ សង្ឃឹមលើព្រះអង្គ និងស្រឡាញ់ព្រះអង្គ។ (បន្ទរ)

បពិត្រព្រះបិតានៃជីវិតគ្រប់យ៉ាង ! សូមព្រះអង្គនាំមរណបុគ្គលឱ្យចូលរួមក្នុងសិរីរុងរឿងរបស់ព្រះអង្គ
—គឺសិរីរុងរឿងដែលព្រះអង្គសោយរាជ្យ រួមជាមួយព្រះបុត្រា និងព្រះវិញ្ញាណដ៏វិសុទ្ធអស់កល្បជាអង្វែងតរៀងទៅ។ (បន្ទរ)

ធម៌ “ឱព្រះបិតា”

ពាក្យអធិដ្ឋាន

បពិត្រព្រះជាម្ចាស់ជាព្រះបិតាយើងខ្ញុំ ! ព្រះអង្គចាត់ព្រះបន្ទូលនៃសេចក្តីពិត និងព្រះវិញ្ញាណដ៏វិសុទ្ធយាងមកក្នុងពិភពលោកនេះ ដើម្បីឱ្យមនុស្សជាតិយល់ពីគម្រោងការដ៏អស្ចារ្យរបស់ព្រះអង្គ។ នៅពេលយើងខ្ញុំបង្ហាញជំនឿរបស់ខ្លួន សូមព្រះអង្គប្រោសឱ្យយើងខ្ញុំលើកតម្កើងសិរីរុងរឿងនៃព្រះត្រៃឯក និងក្រាបថ្វាយបង្គំព្រះដ៏មានឫទ្ធានុភាពសព្វប្រការដែលគង់នៅក្នុងអង្គតែមួយ។ យើងខ្ញុំសូមអង្វរព្រះអង្គ ដោយរួមជាមួយព្រះយេស៊ូគ្រីស្តជាព្រះបុត្រាព្រះអង្គ និងជាអម្ចាស់យើងខ្ញុំ ដែលសោយរាជ្យរួមជាមួយព្រះអង្គ និងព្រះវិញ្ញាណដ៏វិសុទ្ធអស់កល្បជាអង្វែងតរៀងទៅ។ អាម៉ែន!

ពិធីបញ្ចប់៖ ប្រសិនបើលោកបូជាចារ្យ ឬលោកឧបដ្ឋាកធ្វើជាអធិបតី លោកចាត់បងប្អូនឱ្យទៅដោយពោលថា ៖
សូមព្រះអម្ចាស់គង់ជាមួយបងប្អូន
ហើយគង់នៅជាមួយវិញ្ញាណរបស់លោកផង
សូមព្រះជាម្ចាស់ដ៏មានឫទ្ធានុភាពសព្វប្រការ ប្រទានព្រះពរដល់អស់បងប្អូន
គឺព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
អាម៉ែន។
សូមអញ្ជើញឱ្យបានសុខសាន្ត
សូមអរព្រះគុណព្រះជាម្ចាស់។
ពេលមានវត្តមានលោកបូជាចារ្យ ឬលោកឧបដ្ឋាក និងបុគ្គលម្នាក់សូត្រ ពាក្យអធិដ្ឋានពេលល្ងាច ៖
សូមព្រះអម្ចាស់ប្រទានព្រះពរ និងការពារយើងខ្ញុំឱ្យរួចផុតពីមារកំណាច ព្រមទាំងប្រទានជីវិតអស់កល្បជានិច្ចឱ្យយើងខ្ញុំ។
អាម៉ែន។

31 Views

Post Views: 32