ថ្ងៃសុក្រ ទី២៨ ខែកុម្ភៈ ឆ្នាំ២០២៥

អត្ថបទទី១៖ សូមថ្លែងព្រះគម្ពីរលោកបេនស៊ីរ៉ាក់ បសរ ៦,៥-១៧

សម្តីផ្អែមល្ហែម នាំឱ្យមានមិត្តសម្លាញ់ច្រើន ពាក្យសម្តីរួសរាយ បង្កើនទំនាក់ទំនង​ល្អ។ សូមឱ្យមានមនុស្សជាច្រើនគោរពរាប់អានកូន ប៉ុន្តែ ក្នុងចំណោមមនុស្សមួយពាន់​នាក់ ចូរជ្រើរើសយកតែម្នាក់ធ្វើជាទីប្រឹក្សា! បើកូនចង់យកនរណាម្នាក់ធ្វើជាមិត្តសម្លាញ់ ចូរសង្កេតមើលចិត្តគេជាមុនសិន កុំអាលទុកចិត្តលើគេពេក ព្រោះអ្នកខ្លះធ្វើជាមិត្តសម្លាញ់នៅពេលណាចង់បានផលពីកូន តែក្នុងគ្រាមានអាសន្ន គេរត់ចោលកូន។ មានមិត្តសម្លាញ់ខ្លះ ប្រែក្លាយទៅជាសត្រូវ ដោយនិយាយបរិហារកេរ្តិ៍កូន បណ្តាលឱ្យ​កូនអាប់កិត្តិយស។ មានមិត្តសម្លាញ់ខ្លះ បរិភោគបាយរបស់កូន ប៉ុន្តែនៅគ្រាកូនមាន​អាសន្ន គេរត់ចោលកូន។ ក្នុងពេលកូនសម្បូណ៍សប្បាយ គេសុខចិត្តស្លាប់រស់ជាមួយកូន ទាំងហ៊ានត្រួតត្រាលើអ្នកបម្រើរបស់កូនទៀតផង! លុះពេលកូនធ្លាក់ខ្លួនលំបាក គេ​ប្រឆាំងនឹងកូន ហើយគេចមុខចេញពីកូន។ ចូរនៅឱ្យឆ្ងាយពីខ្មាំងសត្រូវ ចូរប្រយ័ត្ននឹង​មិត្តសម្លាញ់។ មិត្តសម្លាញ់ស្មោះត្រង់ ប្រៀបដូចជាជំរកដ៏រឹងមាំ។ អ្នករកបានមិត្ត​សម្លាញ់ដ៏ស្មោះត្រង់ ក៏ដូចជារកបានកំណប់មាសដែរ។ មិត្តសម្លាញ់ស្មោះត្រង់ មានតម្លៃ​រកអ្វីមកប្រៀបស្មើពុំបាន។ មិត្តសម្លាញ់ស្មោះត្រង់ ប្រៀបបាននឹងឱសថដ៏ស័ក្តិសិទ្ធិ ដែល​ជួយឱ្យរស់បានយូរ។ អ្នកគោរពកោតខ្លាចព្រះអម្ចាស់ មុខជារកមិត្ត​សម្លាញ់នោះបាន។ អ្នកគោរពកោតខ្លាចព្រះអម្ចាស់ ចេះជ្រើសរើសមិត្តសម្លាញ់របស់ខ្លួន ដ្បិតគេមានចិត្ត​យ៉ាងណា មិត្តសម្លាញ់របស់គេក៏មានចិត្តយ៉ាងនោះដែរ។​​​​​

ទំនុកតម្កើងលេខ ១១៩ (១១៨),១២.១៦.១៨.២៧.៣៤-៣៥ បទពាក្យ ៧

ពិធីអបអរសាទរព្រះគម្ពីរដំណឹងល្អតាម យហ ៤,១៦

អាលេលូយ៉ា! អាលេលូយ៉ា!
ប្រសិនបើយើងស្ថិតនៅក្នុងសេចក្តីស្រឡាញ់ យើងស្ថិតនៅជាប់នឹងព្រះជាម្ចាស់។ ព្រះជាម្ចាស់ជាសេចក្តីស្រឡាញ់។ អាលេលូយ៉ា!

សូមថ្លែងព្រះគម្ពីរដំណឹងល្អតាមសន្តម៉ាកុស មក ១០,១-១២

ព្រះយេស៊ូយាងមកដល់ស្រុកយូដា និងដល់ត្រើយខាងនាយទន្លេយ័រដាន់។ មហា​ជននាំគ្នាទៅរកព្រះអង្គសាជាថ្មី ព្រះអង្គក៏ចាប់ផ្តើមបង្រៀនគេតាមទម្លាប់របស់ព្រះអង្គ។ មានពួគខាងគណៈផារីស៊ីចូលមកជិត ក្នុងគោលបំណងល្បងលព្រះអង្គ។ គេទូលសួរព្រះអង្គ​ថា៖ «តើស្វាមីមានសិទ្ធិលែងភរិយាបានឬទេ?»។ ព្រះអង្គមានព្រះ​បន្ទូលថា៖ «តើលោកម៉ូសេបង្គាប់អ្នករាល់គ្នាឱ្យធ្វើអ្វី?»។ គេទូលតបថា៖ «លោក​ម៉ូសេអនុញ្ញាតឱ្យស្វាមីធ្វើលិខិតលែងលះប្រពន្ធបាន»។ ព្រះយេស៊ូមានព្រះបន្ទូល​ទៅគេថា៖ «លោកម៉ូសេចែងវិន័យនេះឱ្យអ្នករាល់គ្នា ព្រោះតែអ្នករាល់គ្នាមានចិត្តរឹងរូស។ ប៉ុន្តែ កាលដើមដំបូង នៅពេលដែលព្រះជាម្ចាស់បានបង្កើតពិភពលោក​ព្រះអង្គបង្កើតមនុស្សមក ជាបុរស ជាស្ត្រី។ ហេតុនេះហើយ បានជាបុរសត្រូវចាកចេញ​ពីឪពុកម្តាយ ទៅរួមរស់ជាមួយភរិយារបស់ខ្លួន ហើយអ្នកទាំងពីរត្រឡប់ទៅជារូបកាយតែមួយ។ គេមិនមែនជាបុគ្គលពីរនាក់ទៀតទេ គឺជារូបកាយតែមួយវិញ។ ដូច្នេះ មនុស្សមិនត្រូវបំបាក់បំបែកគូស្រករដែលព្រះជាម្ចាស់បានផ្សំផ្គុំនោះឡើយ»។ ពេលទៅដល់ផ្ទះ ក្រុមសាវ័កទូលសួរព្រះយេស៊ូអំពីរឿងនេះម្តងទៀត។ ព្រះអង្គមាន​ព្រះបន្ទូលទៅគេថា៖ «ប្រសិនបើស្វាមីណាលែងភរិយា ហើយទៅរៀបការនឹងស្ត្រីម្នាក់​ទៀត ស្វាមីនោះបានផិតក្បត់ភរិយារបស់ខ្លួន។ រីឯភរិយាណាដែលលែងស្វាមី ហើយទៅរៀបការនឹងបុរសម្នាក់ទៀត ស្រ្តីនោះក៏បានប្រព្រឹត្តអំពើផិតក្បត់ដែរ»។