ព្រះអម្ចាស់សម្តែងរូបកាយដ៏អស្ចារ្យ

Posted on 13 ខែមិថុនា 202513 ខែមិថុនា 2025 by Siya Khim

រដូវធម្មតា

ព្រះអម្ចាស់សម្តែងរូបកាយដ៏អស្ចារ្យ

(បុណ្យគោរព)

_{(ពេលល្ងាច)}

ឱព្រះអម្ចាស់អើយ! សូមយាងមកជួយទូលបង្គំ
សូមព្រះអម្ចាស់យាងមកជួយសង្គ្រោះយើងខ្ញុំផង!
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក
ហើយជាដរាបតរៀងទៅ។ អាម៉ែន! (អាលេលូយ៉ា!)

ចម្រៀងចូល (សូមជ្រើសរើសបទចម្រៀងមួយ)

ទំនុកតម្កើងលេខ ១១០,១-៥.៧

បន្ទរទី១៖ ព្រះយេស៊ូនាំលោកសិលា លោកយ៉ាកុប និងលោកយ៉ូហានជាប្អូន ឡើងទៅលើភ្នំដ៏ខ្ពស់ គឺព្រះអង្គនាំតែលោកទាំងបីទៅដាច់ឡែកពីគេ។ ពេលនោះ ព្រះអង្គប្រែជាមានទ្រង់ទ្រាយប្លែកពីមុននៅមុខសាវ័កទាំងបីនាក់។

^១	ព្រះជាអម្ចាស់មានព្រះ‌បន្ទូលមកកាន់ព្រះរាជា ជាព្រះ‌អម្ចាស់របស់ខ្ញុំ ដូចតទៅនេះ ៖ «សូមគង់នៅខាងស្តាំយើង ទម្រាំដល់យើងបង្ក្រាបខ្មាំងសត្រូវរបស់ព្រះ‌អង្គ មកដាក់ក្រោមព្រះ‌បាទារបស់ព្រះ‌អង្គ!»។
^២	សូមព្រះ‌ជា‌អម្ចាស់ប្រោសប្រទានឱ្យរាជ្យរបស់ព្រះ‌ករុណា លាតសន្ធឹងចាប់តាំងពីក្រុងស៊ីយ៉ូនទៅ! សូមព្រះ‌ករុណាបង្ក្រាបខ្មាំងសត្រូវដែលនៅជុំ‌វិញ!
^៣	នៅថ្ងៃព្រះ‌ករុណាកេណ្ឌទ័ពទៅច្បាំង ប្រជា‌រាស្ដ្រចូលរួមដោយស្ម័គ្រចិត្ត ពួកយុវជននាំគ្នាចូលមកគាល់ព្រះ‌ករុណានៅលើភ្នំដ៏‌វិសុទ្ធ ប្រៀបដូចជាទឹកសន្សើមនៅពេលព្រឹកព្រលឹម។
^៤	ព្រះ‌អម្ចាស់មានព្រះ‌បន្ទូលសន្យាដោយឥតប្រែ‌ប្រួលថា : «ព្រះ‌អង្គជាបូជា‌ចារ្យអស់‌កល្បតរៀងទៅ តាមរបៀបស្តេចមែលគី‌សេដែក»។
^៥	ព្រះ‌អម្ចាស់គង់នៅខាងស្តាំព្រះ‌ករុណា នៅថ្ងៃដែលព្រះ‌អង្គព្រះ‌ពិរោធ ព្រះ‌អង្គកម្ទេចស្តេចនានា។
^៧	នៅតាមផ្លូវ ព្រះ‌រាជាសោយទឹកជ្រោះរួចហើយ ព្រះ‌អង្គងើបព្រះ‌ភក្ត្រប្រកបដោយជោគ‌ជ័យ។

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ៖ ព្រះយេស៊ូនាំលោកសិលា លោកយ៉ាកុប និងលោកយ៉ូហានជាប្អូន ឡើងទៅលើភ្នំដ៏ខ្ពស់ គឺព្រះអង្គនាំតែលោកទាំងបីទៅដាច់ឡែកពីគេ។ ពេលនោះ ព្រះអង្គប្រែជាមានទ្រង់ទ្រាយប្លែកពីមុននៅមុខសាវ័កទាំងបីនាក់។

ទំនុកតម្កើងលេខ ១២១

បន្ទរទី២៖ ពេលនោះ ស្រាប់តែមានពពកមកគ្របបាំងគេទាំងអស់គ្នា មានព្រះសូរសៀងបន្លឺពីក្នុងពពកមកថា៖ «អ្នកនេះជាបុត្រដ៏ជាទីស្រឡាញ់របស់យើង! ចូរស្តាប់ព្រះអង្គចុះ!» ។

(បទពាក្យ ៧)

^១-	ខ្ញុំងើបមុខឡើងភ្នែកសម្លឹង	ឯនាយល្វើយល្វឹងទៅដល់ភ្នំ
	ថាតើនរណានឹងជួយខ្ញុំ	ឱ្យផុតទុក្ខធំគ្រប់ៗគ្រា	។
^២-	គឺមានតែអង្គព្រះអម្ចាស់	ដែលប្រណីប្រោសរាល់វេលា
	ទ្រង់បង្កើតដីផ្ទៃមេឃា	ព្រះអង្គគឺជាព្រះសង្គ្រោះ	។
^៣-	សូមទ្រង់មេត្តាកុំបណ្តោយ	ឱ្យជើងអ្នកធ្លោយរងរបួស
	ករុណាអាសូរជួយសង្គ្រោះ	កុំឱ្យមានគ្រោះឬត្រូវដួល	។
^៤-	ព្រះអង្គដែលថែទាំការពារ	អ៊ីស្រាអែលគ្រប់គ្នាបានសុខស្រួល
	ព្រះអង្គមិនងុយងោកប្រែប្រួល	ទ្រង់ក៏មិនដែលផ្ទំលក់ឡើយ	។
^៥-	ព្រះអម្ចាស់តែងរក្សាថែ	ការពារឥតល្ហែមិនកន្តើយ
	ទ្រង់គង់នៅខាងស្តាំអ្នកហើយ	កុំខ្វល់ខ្វាយឡើយទ្រង់ជាម្លប់	។
^៦-	ក្នុងពេលថ្ងៃមានព្រះអាទិត្យ	នឹងមិនរោមរិតធ្វើទោសទុក្ខ
	ឯព្រះចន្ទចរនៅពេលយប់	ក៏មិនមានទុក្ខដល់អ្នកដែរ	។
^៧-	ព្រះអម្ចាស់នឹងថែរក្សា	រារាំងបាំងការពារថ្នមថែ
	ហេតុការណ៍អាក្រក់ទ្រង់បង្វែរ	មិនឱ្យកើតក្បែររូបអ្នកឡើយ	។
^៨-	ព្រះអម្ចាស់ថែទាំអ្នកគ្រប់	អ្វីៗទាំងសព្វមិនកន្តើយ
	កិច្ចការអ្នកធ្វើនឹងធូរស្បើយ	ពីពេលនេះហើយតរៀងទៅ	។
	សូមកោតសរសើរព្រះបិតា	ព្រះបុត្រានិងព្រះវិញ្ញាណ
	ដែលគង់ស្ថិតស្ថេរឥតសៅហ្មង	យូរលង់កន្លងតរៀងទៅ	។

បន្ទរ៖ ពេលនោះ ស្រាប់តែមានពពកមកគ្របបាំងគេទាំងអស់គ្នា មានព្រះសូរសៀងបន្លឺពីក្នុងពពកមកថា៖ «អ្នកនេះជាបុត្រដ៏ជាទីស្រឡាញ់របស់យើង! ចូរស្តាប់ព្រះអង្គចុះ!» ។

បទលើកតម្កើងតាមលិខិតលោកធីម៉ូថេ (១ធម ៣,១៦)

បន្ទរទី៣៖ ពេលព្រះយេស៊ូយាងចុះពីលើភ្នំជាមួយសាវ័កទាំងបី ទ្រង់ហាមប្រាមគេមិនឱ្យនិយាយអំពីហេតុការណ៍ ដែលខ្លួនបានឃើញប្រាប់នរណាឡើយ រហូតដល់បុត្រមនុស្សរស់ឡើងវិញ។

^១៦

យើងត្រូវទទួលស្គាល់ថា
គម្រោង‌ការដ៏លាក់កំបាំងនៃការគោរពប្រណិប័តន៍ព្រះជាម្ចាស់នោះធំណាស់
គឺថាៈ ព្រះគ្រីស្តយាងមកមានឋានៈជាមនុស្ស
ព្រះអង្គសុចរិត ដោយសារព្រះវិញ្ញាណ ព្រះអង្គបានបង្ហាញខ្លួនឱ្យពួកទេវទូតឃើញ
គេបានប្រកាសអំពីព្រះអង្គនៅក្នុងចំណោមជាតិសាសន៍នានា
គេបានជឿលើព្រះអង្គក្នុងពិភពលោក
ព្រះជាម្ចាស់បានលើកព្រះអង្គឡើងឱ្យមានសិរី‌រុងរឿង។

បន្ទរ៖ ពេលព្រះយេស៊ូយាងចុះពីលើភ្នំជាមួយសាវ័កទាំងបី ទ្រង់ហាមប្រាមគេមិនឱ្យនិយាយអំពីហេតុការណ៍ ដែលខ្លួនបានឃើញប្រាប់នរណាឡើយ រហូតដល់បុត្រមនុស្សរស់ឡើងវិញ។

ព្រះបន្ទូលរបស់ព្រះជាម្ចាស់ (រ៉ូម ៨,១៦-១៧)

គឺព្រះវិញ្ញាណផ្ទាល់ដែលផ្ដល់សក្ខីភាពឱ្យវិញ្ញាណរបស់យើងដឹងថា យើងពិតជាបុត្រធីតារបស់ព្រះជាម្ចាស់មែន។ ប្រសិនបើយើងពិតជាបុត្រ‌ធីតាមែន នោះយើងមុខជាទទួលមត៌កពុំខាន។ យើងនឹងទទួលមត៌កពីព្រះ‌ជាម្ចាស់ គឺទទួលមត៌ករួមជាមួយព្រះគ្រីស្ដ។ ដោយយើងរងទុក្ខលំបាករួមជាមួយព្រះអង្គដូច្នេះ យើងក៏នឹងទទួលសិរី‌រុងរឿងរួមជាមួយព្រះអង្គដែរ។

បន្ទរ៖ មានពន្លឺរស្មីចិញ្ចែងចិញ្ចាចចាំងចេញពីព្រះភក្ត្ររបស់ព្រះអង្គ *អាលេលូយ៉ា! អាលេលូយ៉ា!។ បន្ទរឡើងវិញ៖…
– ព្រះដំណាក់របស់ព្រះអង្គពោរពេញទៅដោយឫទ្ធិបារមីដ៏ថ្កុំថ្កើងរុងរឿង។ បន្ទរ៖ *…
-សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ។ បន្ទរ៖…

ទំនុកតម្កើងរបស់ព្រះនាងម៉ារី

បន្ទរ ៖ ពួកសាវ័កឮដូច្នោះ ក៏នាំគ្នាក្រាបចុះដាក់មុខដល់ដី ព្រោះគេភ័យខ្លាចជាខ្លាំង។ ព្រះយេស៊ូយាងចូលទៅជិត ដាក់ព្រះហស្តលើគេ ទាំងមានព្រះបន្ទូលថា៖ «ចូរនាំគ្នាក្រោកឡើង កុំខ្លាចអី!» ។

^៤៦	«ព្រលឹងខ្ញុំសូមលើកតម្កើងព្រះ‌អម្ចាស់*
^៤៧	ខ្ញុំមានចិត្តអំណរយ៉ាងខ្លាំង ព្រោះព្រះជាម្ចាស់ជាព្រះសង្គ្រោះរបស់ខ្ញុំ
^៤៨	ព្រះអង្គទតមើលមកខ្ញុំ ដែលជាអ្នកបម្រើដ៏ទន់ទាបរបស់ព្រះអង្គ អំណើះតទៅ មនុស្សគ្រប់ជំនាន់នឹងពោលថា ខ្ញុំជាអ្នកមានសុភមង្គលពិតមែន
^៤៩	ព្រះដ៏មានតេជានុភាព បានសម្ដែងការប្រសើរអស្ចារ្យចំពោះរូបខ្ញុំ។ ព្រះនាមរបស់ព្រះអង្គពិតជាវិសុទ្ធមែន!
^៥០	ទ្រង់មានព្រះហឫទ័យមេត្តាករុណា ដល់អស់អ្នកដែលកោតខ្លាចព្រះអង្គនៅគ្រប់ជំនាន់តរៀងទៅ
^៥១	ទ្រង់បានសម្ដែងឫទ្ធិបារមី កម្ចាត់មនុស្សដែលមានចិត្តឆ្មើងឆ្មៃ
^៥២	ទ្រង់បានទម្លាក់អ្នកកាន់អំណាចចុះពីតំណែង ហើយទ្រង់លើកតម្កើងមនុស្សទន់ទាបឡើង។
^៥៣	ទ្រង់បានប្រទានសម្បត្តិយ៉ាងបរិបូណ៌ ដល់អស់អ្នកដែលស្រេកឃ្លាន ហើយបណ្តេញពួកអ្នកមានឱ្យត្រឡប់ទៅវិញដោយដៃទទេ។
^៥៤	ព្រះអង្គបានជួយប្រជារាស្ត្រអ៊ីស្រាអែល ជាអ្នកបម្រើរបស់ព្រះអង្គ ហើយតែងតែសម្ដែងព្រះហឫទ័យមេត្តាករុណា
^៥៥	ដល់លោកអប្រាហាំ និងពូជពង្សរបស់លោកជានិច្ចតរៀងទៅ ដូចទ្រង់បានសន្យាជាមួយបុព្វបុរសយើង ឥតភ្លេចសោះឡើយ។

ឬ ទំនុកតម្កើងរបស់ព្រះនាងម៉ារី (តាមបែបស្មូត) បទព្រហ្មគីតិ

^៤៧	ខ្ញុំមានចិត្តអំណរ	សប្បាយអរពន់ពេកណាស់
	ព្រោះខ្ញុំបានដឹងច្បាស់	ថាព្រះម្ចាស់ទ្រង់សង្គ្រោះ	។
^៤៨	ព្រះអង្គទតមកខ្ញុំ	ជាអ្នកបម្រើស្ម័គ្រស្មោះ
	តទៅមនុស្សទាំងអស់	ថាខ្ញុំនេះសែនសុខក្រៃ	។
^៤៩	ព្រះដ៏មានឫទ្ធា	ខ្លាំងអស្ចារ្យលើលោកីយ៍
	សម្ដែងឫទ្ធិបារមី	ព្រះនាមថ្លៃថ្លាវិសុទ្ធ	។
^៥០	ទ្រង់មានព្រះហឫទ័យ	ត្រាប្រណីខ្ពស់បំផុត
	ដល់អ្នកគោរពកោត	ខ្លាចព្រះអង្គរៀងរហូត	។
^៥១	ព្រះអង្គសម្ដែងឫទ្ធិ	អស្ចារ្យពិតមិនរលត់
	កម្ចាត់មនុស្សមានពុត	ឆ្មើងបំផុតឫកខែងរែង	។
^៥២	ទ្រង់បានច្រានទម្លាក់	អ្នកធំធ្លាក់ពីតំណែង
	ឥតមានខ្លាចរអែង	ហើយទ្រង់តែងលើកអ្នកទាប	។
^៥៣	ព្រះអង្គប្រោសប្រទាន	ឱ្យអ្នកឃ្លានឆ្អែតដរាប
	អ្នកមានធនធានស្រាប់	ដេញត្រឡប់ដៃទទេ	។
^៥៤	ព្រះអង្គបានជួយរាស្ត្រ	ទ្រង់ទាំងអស់ឥតប្រួលប្រែ
	អ៊ីស្រាអែលនៅក្បែរ	ជាបម្រើដ៏ស្មោះស្ម័គ្រ	។
^៥៥	ទ្រង់តែងមានព្រះទ័យ	ករុណាក្រៃមិនថ្នាំងថ្នាក់
	លោកអប្រាហាំជាក់	និងពូជពង្សលោកជានិច្ច	។
	ដូចទ្រង់បានសន្យា	នឹងដូនតាឥតមានភ្លេច
	ព្រះអង្គចាំជានិច្ច	គ្មានកលកិច្ចប្រែប្រួលឡើយ	។
	សិរីរុងរឿងដល់	ព្រះបិតាព្រះបុត្រា
	និងព្រះវិញ្ញាណផង	ដែលទ្រង់គង់នៅជានិច្ច	។

បន្ទរ ៖ ពួកសាវ័កឮដូច្នោះ ក៏នាំគ្នាក្រាបចុះដាក់មុខដល់ដី ព្រោះគេភ័យខ្លាចជាខ្លាំង។ ព្រះយេស៊ូយាងចូលទៅជិត ដាក់ព្រះហស្តលើគេ ទាំងមានព្រះបន្ទូលថា៖ «ចូរនាំគ្នាក្រោកឡើង កុំខ្លាចអី!» ។

ពាក្យអង្វរសកល

នៅចំពោះវត្តមានរបស់ក្រុមសាវ័ក ព្រះសង្រ្គោះនៃយើងបានសម្តែងរូបកាយដ៏អស្ចារ្យ នៅលើភ្នំតាប៊រ។ ចូរយើងទូលអង្វរព្រះអង្គដោយមានជំនឿចិត្តថា ៖

បន្ទរ៖ បពិត្រព្រះអម្ចាស់ ! សូមឱ្យយើងខ្ញុំមើលឃើញពន្លឺ ដោយសារពន្លឺរបស់ព្រះអង្គ !

បពិត្រព្រះគ្រីស្ត ! មុនគ្រាដែលព្រះអង្គត្រូវគេបញ្ជូនឱ្យសោយទុក្ខលំបាក និងសោយទិវង្គត ព្រះអង្គសព្វព្រះហឫទ័យឱ្យក្រុមសាវ័កឃើញសិរីរុងរឿងនៃការរស់ឡើងវិញរបស់ព្រះអង្គទុកជាមុន នៅលើភ្នំតាប៊រ។ យើងខ្ញុំសូមទូលអង្វរព្រះអង្គសម្រាប់ព្រះសហគមន៍ ដែលកំពុងជួយសម្រាល ទុក្ខ និងក្តីកង្វល់របស់មនុស្សលោកនាពេលបច្ចុប្បន្ននេះ
—មានអំណរសប្បាយរកថ្លែងពុំបាន ដោយសារព្រះអង្គប្រោសប្រទានឱ្យព្រះសហគមន៍ មានជ័យជម្នះរួមជាមួយព្រះអង្គជានិច្ចផង។ (បន្ទរ)

បពិត្រព្រះគ្រីស្ត ! ព្រះអង្គបាននាំលោកសិលា លោកយ៉ាកុប និងលោកយ៉ូហាន ឡើងទៅលើកំពូលភ្នំ យើងខ្ញុំសូមទូលអង្វរព្រះអង្គសម្រាប់សម្តេចប៉ាប និងលោកអភិបាល
—ដើម្បីឱ្យអស់លោកអាចបំផុសគំនិតដល់ប្រជារាស្រ្ត នូវសេចក្តីសង្ឃឹមនៃការផ្លាស់ប្រែ នៅថ្ងៃចុងក្រោយបំផុត។ (បន្ទរ)

បពិត្រព្រះគ្រីស្ត ! នៅលើកំពូលភ្នំ ព្រះអង្គបានអនុញ្ញាតឱ្យពន្លឺនៃព្រះភក្រ្តព្រះអង្គ រះបំភ្លឺលើលោកម៉ូសេ និងលោកអេលី
—យើងខ្ញុំសូមអង្វរព្រះអង្គ ប្រទានព្រះពរដល់ប្រជាជនជាតិយូដា ដែលព្រះអង្គបានត្រាស់ហៅឱ្យធ្វើជាប្រជាជាតិមួយដែលព្រះអង្គបានជ្រើសរើស។ (បន្ទរ)

បពិត្រព្រះគ្រីស្ត ! ព្រះអង្គបានប្រទានពន្លឺមកពិភពលោក នៅពេលសិរីរុងរឿងនៃព្រះអាទិកររះឡើងមកលើព្រះអង្គ
—យើងខ្ញុំសូមទូលអង្វរព្រះអង្គសម្រាប់មនុស្សដែលមានឆន្ទៈល្អៗ សូមឱ្យពួកគេដើរនៅក្នុងពន្លឺរបស់ព្រះអង្គ។ (បន្ទរ)

បពិត្រព្រះគ្រីស្ត ! ព្រះអង្គបានធ្វើរូបកាយដ៏ទន់ទាបរបស់យើងខ្ញុំឡើងវិញ ឱ្យដូចជារូបកាយនៃសិរីរុងរឿងរបស់ព្រះអង្គ យើងខ្ញុំសូមទូលអង្វរព្រះអង្គសម្រាប់បងប្អូនយើងខ្ញុំដែលបានចែកឋានទៅហើយ —សូមឱ្យអ្នកទាំងនោះចូលរួមចំណែកក្នុងសិរីរុងរឿងរបស់ព្រះអង្គ អស់កល្បជានិច្ចផង។ (បន្ទរ)

ធម៌ “ឱព្រះបិតា”

ពាក្យអធិដ្ឋាន

ឱព្រះជាម្ចាស់អើយ ! ព្រះអង្គចាត់ព្រះបុត្រាតែមួយឱ្យយាងមកសម្តែងរូបកាយដ៏អស្ចារ្យពោរពេញដោយសិរីរុងរឿង និងបានអះអាងពីគម្រោងការដ៏អស្ចារ្យនៃជំនឿ ហើយបញ្ជាក់ជាមុនថា យើងខ្ញុំជាបុត្រធីតារបស់ព្រះអង្គ តាមរយៈសក្ខីភាពរបស់គ្រូបាធ្យាយនៃព្រះសហគមន៍។ សូមព្រះអង្គប្រោសយើងខ្ញុំដែលជាអ្នកបម្រើរបស់ព្រះអង្គឱ្យយកចិត្តទុកដាក់ស្តាប់ព្រះសូរសៀងនៃព្រះបុត្រាដ៏ជាទីស្រឡាញ់របស់ព្រះអង្គ និងទទួលជីវិតអស់កល្បជានិច្ចជាមរតក រួមជាមួយព្រះអង្គ។ យើងខ្ញុំសូមអង្វរព្រះអង្គ ដោយរួមជាមួយព្រះយេស៊ូគ្រីស្ត ជាព្រះបុត្រាព្រះអង្គ និងជាព្រះអម្ចាស់ ដែលសោយរាជ្យរួមជាមួយព្រះអង្គ និងព្រះវិញ្ញាណដ៏វិសុទ្ធ អស់កល្បជាអង្វែងតរៀងទៅ។ អាម៉ែន!

ពិធីបញ្ចប់៖ ប្រសិនបើលោកបូជាចារ្យ ឬលោកឧបដ្ឋាកធ្វើជាអធិបតី លោកចាត់បងប្អូនឱ្យទៅដោយពោលថា ៖
សូមព្រះអម្ចាស់គង់ជាមួយបងប្អូន
ហើយគង់នៅជាមួយវិញ្ញាណរបស់លោកផង
សូមព្រះជាម្ចាស់ដ៏មានឫទ្ធានុភាពសព្វប្រការ ប្រទានព្រះពរដល់អស់បងប្អូន
គឺព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
អាម៉ែន។
សូមអញ្ជើញឱ្យបានសុខសាន្ត
សូមអរព្រះគុណព្រះជាម្ចាស់។
ពេលមានវត្តមានលោកបូជាចារ្យ ឬលោកឧបដ្ឋាក និងបុគ្គលម្នាក់សូត្រ ពាក្យអធិដ្ឋានពេលល្ងាច ៖
សូមព្រះអម្ចាស់ប្រទានព្រះពរ និងការពារយើងខ្ញុំឱ្យរួចផុតពីមារកំណាច ព្រមទាំងប្រទានជីវិតអស់កល្បជានិច្ចឱ្យយើងខ្ញុំ។
អាម៉ែន។

114 Views

Post Views: 116