រដូវធម្មតា សប្តាហ៍ទី១ (អ.ទី១៧)ថ្ងៃអាទិត្យ

Posted on 11 ខែមិថុនា 202511 ខែមិថុនា 2025 by Siya Khim

រដូវធម្មតា

ថ្ងៃអាទិត្យ អាទិត្យទី១៧
_{(ពេលល្ងាច)}

ឱព្រះអម្ចាស់អើយ! សូមយាងមកជួយទូលបង្គំ
សូមព្រះអម្ចាស់យាងមកជួយសង្គ្រោះយើងខ្ញុំផង!
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក
ហើយជាដរាបតរៀងទៅ។ អាម៉ែន! (អាលេលូយ៉ា!)

ចម្រៀងចូល (សូមជ្រើសរើសបទចម្រៀងមួយ)

ទំនុកតម្កើងលេខ ១១០,១-៥.៧

ព្រះមេស្ស៊ី គឺជាព្រះមហាក្សត្រ និងជាបូជាចារ្យ

ព្រះគ្រីស្តត្រូវតែគ្រងរាជ្យ ទម្រាំដល់ព្រះជាម្ចាស់បង្ក្រាបខ្មាំងសត្រូវទាំងប៉ុន្មាន មកដាក់ក្រោមព្រះបាទារបស់ព្រះអង្គ (១ករ ១៥,២៥)។

បន្ទរទី១ ៖ សូមព្រះអម្ចាស់ប្រោសប្រទានឱ្យរាជ្យរបស់ព្រះករុណា លាតសន្ធឹងចាប់តាំងពីក្រុងស៊ីយ៉ូនទៅ !

^១	ព្រះជាអម្ចាស់មានព្រះបន្ទូលមកកាន់ព្រះរាជា ជាព្រះអម្ចាស់របស់ខ្ញុំថា ៖ “សូមគង់នៅខាងស្តាំយើង ទម្រាំដល់យើងបង្ក្រាបខ្មាំងសត្រូវរបស់ព្រះអង្គ មកដាក់ក្រោមព្រះបាទារបស់ព្រះអង្គ! ”។
^២	សូមព្រះជាអម្ចាស់ប្រោសប្រទាន ឱ្យព្រះរាជ្យរបស់ព្រះករុណា លាតសន្ធឹងចាប់តាំងពីក្រុងស៊ីយ៉ូនទៅ! សូមព្រះករុណាបង្ក្រាបខ្មាំងសត្រូវដែលនៅជុំវិញ!
^៣	នៅថ្ងៃព្រះករុណាកេណ្ឌទ័ពទៅច្បាំង ប្រជារាស្ត្រចូលរួមដោយស្ម័គ្រចិត្ត ពួកយុវជននាំគ្នាចូលគាល់ព្រះករុណានៅលើភ្នំដ៏វិសុទ្ធ ប្រៀបដូចជាទឹកសន្សើមនៅពេលព្រឹកព្រលឹម។
^៤	ព្រះអម្ចាស់មានព្រះបន្ទូលសន្យា ដោយឥតប្រែប្រួលថា ៖ “ព្រះអង្គជាបូជាចារ្យអស់កល្បតរៀងទៅ តាមរបៀបស្តេចមែលគីសេដែក”។
^៥	`ព្រះអម្ចាស់គង់នៅខាងស្តាំព្រះករុណា នៅថ្ងៃដែលព្រះអង្គទ្រង់ព្រះពិរោធ ព្រះអង្គកម្ទេចស្តេចនានា។`
^៧	នៅតាមផ្លូវ ព្រះរាជាសោយទឹកជ្រោះ រួចហើយ ព្រះអង្គងើបព្រះភក្រ្តប្រកបដោយជោគជ័យ។

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ ៖ សូមព្រះអម្ចាស់ប្រោសប្រទានឱ្យរាជ្យរបស់ព្រះករុណា លាតសន្ធឹងចាប់តាំងពីក្រុងស៊ីយ៉ូនទៅ !

ទំនុកតម្កើងលេខ ១១៤,១-៨

ប្រជាជនអ៊ីស្រាអែលបានសេរីភាពពីប្រទេសអេស៊ីប

អ្នកដែលបានលះបង់ពិភពលោកនេះ ក៏ត្រូវបានដឹកនាំចេញពីប្រទេសអេស៊ីបផងដែរ (សន្តអូគូស្ទីន)។

បន្ទរទី២៖ ផែនដីទាំងមូលបានញាប់ញ័រ នៅចំពោះព្រះភក្រ្តព្រះអម្ចាស់។ អាលេលូយ៉ា!

(បទពាក្យ ៧)

^១-	ពេលអ៊ីស្រាអែលបានចាកចេញ	ពីអេស៊ីបវិញហើយពេលនោះ
	ពូជពង្សយ៉ាកុបចេញទាំងអស់	ពីដីបរទេសមិនសល់នៅ	។
^២-	ឯប្រជាជនជាតិយូដា	បានក្លាយទៅជាឥតហ្មងសៅ
	ជាប្រជាជាតិមិនអាស្រូវ	វិសុទ្ធពេកកូវផ្ទាល់ព្រះអង្គ	។
^៣-	ពេលទឹកសមុទ្រឃើញពួកគេ	តក់ស្លុតម៉្លេះទេមិនបង្អង់
	គេចខ្លួនថយទៅមិនរេរង់	ទាំងយ័រដាន់ផងក៏ថយដែរ	។
^៤-	ភ្នំតូចភ្នំធំភ្នំទាំងអស់	នៅមិនស្ងៀមសោះដូចពពែ
	លោតទៅលោតមកមិនឈប់ទេ	ភ្នំតូចលោតដែរដូចកូនចៀម	។
^៥-	ឱសមុទ្រអើយម្តេចក៏អ្នក	រត់គេចជាជាក់ទៅនៅស្ងៀម
	អ្នកធ្លាប់រលកលោតរវាម	ម្តេចសំងំស្ងៀមធ្មឹងដូច្នេះ	។
	ឱទឹកទន្លេយ័រដាន់អើយ	ពេលនេះម្តេចឡើយរត់លឿនម៉្លេះ
	ម្តេចអ្នកដកខ្លួនឆាប់ដូច្នេះ	តើរឿងទាំងនេះមកពីអ្វី	។
^៦-	ភ្នំអើយម្តេចអ្នកមិនឈប់លោត	ផ្លាស់ប្តូររហូតដូចសត្វព្រៃ
	ភ្នំតូចអើយអ្នកលោតព្រោះអ្វី	មិនស្គាល់យប់ថ្ងៃមិនសម្រាក	។
^៧-	ឱផែនដីអើយចូររីករាយ	អំណរសប្បាយចំពោះភក្រ្ត
	ព្រះជាអម្ចាស់របស់អ្នក	និងចំពោះភក្រ្តព្រះយ៉ាកុប	។
^៨-	គឺទ្រង់បានធ្វើឱ្យសិលា	ប្រែក្លាយទៅជាបឹងសាយសព្វ
	ឱ្យថ្មប្រែក្លាយជាប្រភព	ទឹកហូរឥតឈប់ឥតស្រាកស្រាន្ត	។
	សូមកោតសរសើរព្រះបិតា	ព្រះបុត្រានិងព្រះវិញ្ញាណ
	ដែលគង់ស្ថិតស្ថេរឥតសៅហ្មង	យូរលង់កន្លងតរៀងទៅ	។

បន្ទរ៖ ផែនដីទាំងមូលបានញាប់ញ័រ នៅចំពោះព្រះភក្រ្តព្រះអម្ចាស់។ អាលេលូយ៉ា!

បទលើកតម្កើងតាមគម្ពីរវិវរណៈ (វវ ១៩,១-២.៥-៧)

វិវាហមង្គលការកូនចៀម

បន្ទរទី៣ ៖ ព្រះ‌អម្ចាស់អើយ ព្រះអង្គប្រកបដោយព្រះចេស្តា ព្រះ‌អង្គជាព្រះ‌មហាក្សត្រគ្រងរាជ្យលើអ្វីៗទាំងអស់ អាលេលូយ៉ា!។

^១	អាលេលូយ៉ា! សូមលើកតម្កើងព្រះជាម្ចាស់នៃយើង ព្រះអង្គសង្គ្រោះយើង ព្រះអង្គប្រកបដោយសិរីរុងរឿង និងឫទ្ធានុភាព
^២	ដ្បិតទ្រង់វិនិច្ឆ័យទោសយ៉ាងត្រឹមត្រូវ តាមយុត្តិធម៌ អាលេលូយ៉ា! អាលេលូយ៉ា!
^៥	អ្នករាល់គ្នាជាអ្នកបម្រើព្រះជាម្ចាស់ អ្នករាល់គ្នាជាអ្នកគោរពកោតខ្លាចព្រះអង្គ ទាំងតូចទាំងធំអើយ! ចូរសរសើរតម្កើងព្រះជាម្ចាស់នៃយើង!។ អាលេលូយ៉ា!
^៦	អាលេលូយ៉ា! ដ្បិតព្រះជាអម្ចាស់ ជាព្រះដ៏មានព្រះចេស្តាលើអ្វីៗទាំងអស់ ព្រះអង្គបានតាំងព្រះរាជ្យរបស់ព្រះអង្គហើយ
^៧	យើងនាំគ្នាអរសប្បាយឡើង ត្រូវមានអំណររីករាយឱ្យខ្លាំង ហើយនាំគ្នាលើកតម្កើងសិរីរុងរឿងព្រះអង្គ អាលេលូយ៉ា! អាលេលូយ៉ា! ដ្បិតដល់ពេលរៀបវិវាហមង្គលការកូនចៀមហើយ ភរិយាថ្មោងថ្មីរបស់កូនចៀម ក៏បានរៀបចំខ្លួនរួចជាស្រេចហើយដែរ។ អាលេលូយ៉ា!

បន្ទរ ៖ ព្រះ‌អម្ចាស់អើយ ព្រះអង្គប្រកបដោយព្រះចេស្តា ព្រះ‌អង្គជាព្រះ‌មហាក្សត្រគ្រងរាជ្យលើអ្វីៗទាំងអស់ អាលេលូយ៉ា!។

ព្រះបន្ទូលរបស់ព្រះជាម្ចាស់ (២ករ ១,៣-៤)

សូមលើកតម្កើងព្រះជាម្ចាស់ ជាព្រះបិតារបស់ព្រះយេស៊ូ ជាអម្ចាស់នៃយើង។ ព្រះអង្គជាព្រះបិតាប្រកបដោយព្រះហឫទ័យមេត្តាករុណា និងជាព្រះដែលជួយសម្រាលទុក្ខគ្រប់បែបយ៉ាងទាំងអស់។ ព្រះអង្គសម្រាលទុក្ខយើង នៅពេលយើងមានទុក្ខវេទនាសព្វបែបយ៉ាង ដើម្បីឱ្យយើងអាចសម្រាលទុក្ខអស់អ្នកដែលមានទុក្ខវេទនា ព្រោះព្រះជាម្ចាស់ប្រទានឱ្យយើងផ្ទាល់បានធូរស្បើយរួចហើយដែរ។

បន្ទរ៖ លោកទាំងមូល *ថ្លែងអំពីសិរី‌រុងរឿងរបស់ព្រះ‌ជាម្ចាស់។ បន្ទរឡើងវិញ៖…
-សូមសរសើរតម្កើងព្រះអង្គអស់កល្បជាអង្វែងតរៀងទៅ។ បន្ទរ៖ *…
-សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ។ បន្ទរ៖…

ទំនុកតម្កើងរបស់ព្រះនាងម៉ារី

បន្ទរ ៖ «ចូរសុំ នោះព្រះ‌ជាម្ចាស់នឹងប្រទានឱ្យអ្នករាល់គ្នា ចូរស្វែងរក នោះអ្នករាល់គ្នានឹងបានឃើញ ចូរគោះទ្វារ នោះព្រះ‌អង្គនឹងបើកឱ្យអ្នករាល់គ្នាជាពុំ‌ខាន»។

^៤៦	«ព្រលឹងខ្ញុំសូមលើកតម្កើងព្រះ‌អម្ចាស់*
^៤៧	ខ្ញុំមានចិត្តអំណរយ៉ាងខ្លាំង ព្រោះព្រះជាម្ចាស់ជាព្រះសង្គ្រោះរបស់ខ្ញុំ
^៤៨	ព្រះអង្គទតមើលមកខ្ញុំ ដែលជាអ្នកបម្រើដ៏ទន់ទាបរបស់ព្រះអង្គ អំណើះតទៅ មនុស្សគ្រប់ជំនាន់នឹងពោលថា ខ្ញុំជាអ្នកមានសុភមង្គលពិតមែន
^៤៩	ព្រះដ៏មានតេជានុភាព បានសម្ដែងការប្រសើរអស្ចារ្យចំពោះរូបខ្ញុំ។ ព្រះនាមរបស់ព្រះអង្គពិតជាវិសុទ្ធមែន!
^៥០	ទ្រង់មានព្រះហឫទ័យមេត្តាករុណា ដល់អស់អ្នកដែលកោតខ្លាចព្រះអង្គនៅគ្រប់ជំនាន់តរៀងទៅ
^៥១	ទ្រង់បានសម្ដែងឫទ្ធិបារមី កម្ចាត់មនុស្សដែលមានចិត្តឆ្មើងឆ្មៃ
^៥២	ទ្រង់បានទម្លាក់អ្នកកាន់អំណាចចុះពីតំណែង ហើយទ្រង់លើកតម្កើងមនុស្សទន់ទាបឡើង។
^៥៣	ទ្រង់បានប្រទានសម្បត្តិយ៉ាងបរិបូណ៌ ដល់អស់អ្នកដែលស្រេកឃ្លាន ហើយបណ្តេញពួកអ្នកមានឱ្យត្រឡប់ទៅវិញដោយដៃទទេ។
^៥៤	ព្រះអង្គបានជួយប្រជារាស្ត្រអ៊ីស្រាអែល ជាអ្នកបម្រើរបស់ព្រះអង្គ ហើយតែងតែសម្ដែងព្រះហឫទ័យមេត្តាករុណា
^៥៥	ដល់លោកអប្រាហាំ និងពូជពង្សរបស់លោកជានិច្ចតរៀងទៅ ដូចទ្រង់បានសន្យាជាមួយបុព្វបុរសយើង ឥតភ្លេចសោះឡើយ។

ឬ ទំនុកតម្កើងរបស់ព្រះនាងម៉ារី (តាមបែបស្មូត) បទព្រហ្មគីតិ

^៤៧	ខ្ញុំមានចិត្តអំណរ	សប្បាយអរពន់ពេកណាស់
	ព្រោះខ្ញុំបានដឹងច្បាស់	ថាព្រះម្ចាស់ទ្រង់សង្គ្រោះ	។
^៤៨	ព្រះអង្គទតមកខ្ញុំ	ជាអ្នកបម្រើស្ម័គ្រស្មោះ
	តទៅមនុស្សទាំងអស់	ថាខ្ញុំនេះសែនសុខក្រៃ	។
^៤៩	ព្រះដ៏មានឫទ្ធា	ខ្លាំងអស្ចារ្យលើលោកីយ៍
	សម្ដែងឫទ្ធិបារមី	ព្រះនាមថ្លៃថ្លាវិសុទ្ធ	។
^៥០	ទ្រង់មានព្រះហឫទ័យ	ត្រាប្រណីខ្ពស់បំផុត
	ដល់អ្នកគោរពកោត	ខ្លាចព្រះអង្គរៀងរហូត	។
^៥១	ព្រះអង្គសម្ដែងឫទ្ធិ	អស្ចារ្យពិតមិនរលត់
	កម្ចាត់មនុស្សមានពុត	ឆ្មើងបំផុតឫកខែងរែង	។
^៥២	ទ្រង់បានច្រានទម្លាក់	អ្នកធំធ្លាក់ពីតំណែង
	ឥតមានខ្លាចរអែង	ហើយទ្រង់តែងលើកអ្នកទាប	។
^៥៣	ព្រះអង្គប្រោសប្រទាន	ឱ្យអ្នកឃ្លានឆ្អែតដរាប
	អ្នកមានធនធានស្រាប់	ដេញត្រឡប់ដៃទទេ	។
^៥៤	ព្រះអង្គបានជួយរាស្ត្រ	ទ្រង់ទាំងអស់ឥតប្រួលប្រែ
	អ៊ីស្រាអែលនៅក្បែរ	ជាបម្រើដ៏ស្មោះស្ម័គ្រ	។
^៥៥	ទ្រង់តែងមានព្រះទ័យ	ករុណាក្រៃមិនថ្នាំងថ្នាក់
	លោកអប្រាហាំជាក់	និងពូជពង្សលោកជានិច្ច	។
	ដូចទ្រង់បានសន្យា	នឹងដូនតាឥតមានភ្លេច
	ព្រះអង្គចាំជានិច្ច	គ្មានកលកិច្ចប្រែប្រួលឡើយ	។
	សិរីរុងរឿងដល់	ព្រះបិតាព្រះបុត្រា
	និងព្រះវិញ្ញាណផង	ដែលទ្រង់គង់នៅជានិច្ច	។

បន្ទរ ៖ «ចូរសុំ នោះព្រះ‌ជាម្ចាស់នឹងប្រទានឱ្យអ្នករាល់គ្នា ចូរស្វែងរក នោះអ្នករាល់គ្នានឹងបានឃើញ ចូរគោះទ្វារ នោះព្រះ‌អង្គនឹងបើកឱ្យអ្នករាល់គ្នាជាពុំ‌ខាន»។

ពាក្យអង្វរសកល

ព្រះគ្រីស្តជាព្រះសិរសារបស់ព្រះសហគមន៍ យើងខ្ញុំជាសរីរាង្គនៃព្រះកាយព្រះអង្គ។ យើងខ្ញុំសូមទូលអង្វរព្រះអង្គ ដោយសេចក្តីអំណរសប្បាយថា៖

បន្ទរ៖ ឱព្រះអម្ចាស់អើយ ! សូមឱ្យព្រះរាជ្យរបស់ព្រះអង្គបានមកដល់។

សូមព្រះគ្រីស្តជាព្រះសង្គ្រោះរបស់យើងខ្ញុំ ប្រោសប្រទានឱ្យព្រះសហគមន៍ ធ្វើជារូបតំណាងនៃការស្រុះស្រួលគ្នារបស់មនុស្សជាតិទាំងអស់
—ហើយសូមឱ្យព្រះសហគមន៍ប្រារព្ធអគ្គសញ្ញានៃការសង្គ្រោះមនុស្សលោក កាន់តែមានប្រសិទ្ធិភាព។ (បន្ទរ)

តាមរយៈវត្តមានរបស់ព្រះអង្គ សូមព្រះអង្គជួយណែនាំក្រុមលោកអភិបាល ឱ្យចេះរួបរួមគ្នាជាធ្លុងតែមួយនឹងសម្តេចប៉ាប
—ហើយសូមព្រះអង្គប្រទានព្រះអំណោយទាននៃការឯកភាពគ្នា សេចក្តីស្រឡាញ់ និងសេចក្តីសុខសាន្តដល់ពួកគាត់ផង។ (បន្ទរ)

សូមព្រះអង្គបង្រួបបង្រួមគ្រីស្តបរិស័ទទាំងអស់ ឱ្យចូលមកជិតព្រះអង្គ ដែលជាព្រះសិរសា កាន់តែជិតសិ្នទ្ធជាងមុន
—ហើយសូមជួយណែនាំយើងខ្ញុំទាំងអស់គ្នាឱ្យចេះប្រកាសអំពីព្រះរាជ្យ ដោយធ្វើជាសាក្សីក្នុងជីវិតរស់នៅប្រចាំថ្ងៃផង។ (បន្ទរ)

សូមព្រះអង្គប្រោសប្រទានឱ្យពិភពលោក ដែលប្រកបដោយភាពដ៏វឹកវរនេះ បានពោរពេញដោយសន្តិភាព
—សូមព្រះអង្គប្រទាននូវយុត្តិធម៌ និងសេចក្តីសុខសាន្ត កើតមាននៅគ្រប់ទីកន្លែងផង។ (បន្ទរ)

សូមព្រះអង្គប្រោសប្រទានឱ្យអស់បងប្អូនដែលបានទទួលមរណភាព បានទទួលសិរីរុងរឿងនៃការរស់ឡើងវិញរបស់ព្រះអង្គ
—ហើយសូមព្រះអង្គប្រោសប្រទានឱ្យយើងខ្ញុំ បានចូលរួមសេចក្តីសុខសាន្តជាមួយពួកគេ នៅពេលខាងមុខផង។ (បន្ទរ)

ធម៌ “ឱព្រះបិតា”

ពាក្យអធិដ្ឋាន

ឱព្រះបិតាដ៏មានឫទ្ធានុភាពសព្វប្រការ ! មានតែព្រះអង្គទេដែលជាគ្រឹះដ៏រឹងមាំនៃពិភពទាំងមូល ហើយផ្តល់ឱ្យអ្វីៗទាំងអស់បានវិសុទ្ធ។ ប្រសិនបើព្រះអង្គមិនជួយណែនាំទេ យើងខ្ញុំពុំអាចប្រព្រឹត្តកិច្ចការដ៏ល្អណាមួយបានឡើយ។ សូមព្រះអង្គប្រោសឱ្យយើងខ្ញុំចេះប្រើសម្បត្តិក្នុងលោកនេះ ដោយភ្ជាប់ចិត្តនឹងសម្បត្តិឯស្ថានបរមសុខជានិច្ច!។ យើងខ្ញុំសូមអង្វរព្រះអង្គដោយរួមជាមួយព្រះយេស៊ូគ្រីស្ត ជាព្រះបុត្រាព្រះអង្គ ដែលមានព្រះជន្មគង់នៅ និងសោយរាជ្យរួមជាមួយព្រះបិតា និងព្រះវិញ្ញាណដ៏វិសុទ្ធអស់កល្បជាអង្វែងតរៀងទៅ។ អាម៉ែន!

ពិធីបញ្ចប់៖ ប្រសិនបើលោកបូជាចារ្យ ឬលោកឧបដ្ឋាកធ្វើជាអធិបតី លោកចាត់បងប្អូនឱ្យទៅដោយពោលថា ៖
សូមព្រះអម្ចាស់គង់ជាមួយបងប្អូន
ហើយគង់នៅជាមួយវិញ្ញាណរបស់លោកផង
សូមព្រះជាម្ចាស់ដ៏មានឫទ្ធានុភាពសព្វប្រការ ប្រទានព្រះពរដល់អស់បងប្អូន
គឺព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
អាម៉ែន។
សូមអញ្ជើញឱ្យបានសុខសាន្ត
សូមអរព្រះគុណព្រះជាម្ចាស់។
ពេលមានវត្តមានលោកបូជាចារ្យ ឬលោកឧបដ្ឋាក និងបុគ្គលម្នាក់សូត្រ ពាក្យអធិដ្ឋានពេលល្ងាច ៖
សូមព្រះអម្ចាស់ប្រទានព្រះពរ និងការពារយើងខ្ញុំឱ្យរួចផុតពីមារកំណាច ព្រមទាំងប្រទានជីវិតអស់កល្បជានិច្ចឱ្យយើងខ្ញុំ។
អាម៉ែន។

84 Views

Post Views: 86