រដូវធម្មតា សប្តាហ៍ទី១០ ថ្ងៃសុក្រ

Posted on 26 ខែឧសភា 202526 ខែឧសភា 2025 by Siya Khim

រដូវធម្មតា

សន្តអន់តន នៅប៉ាឌូ ជាបូជាចារ្យ និងគ្រូបាធ្យាយព្រះសហគមន៍

(រំឭកចាំបាច់)

ថ្ងៃសុក្រ អាទិត្យទី១០
_{(ពេលល្ងាច)}

ឱព្រះអម្ចាស់អើយ! សូមយាងមកជួយទូលបង្គំ
សូមព្រះអម្ចាស់យាងមកជួយសង្គ្រោះយើងខ្ញុំផង!
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក
ហើយជាដរាបតរៀងទៅ។ អាម៉ែន! (អាលេលូយ៉ា!)

ចម្រៀងចូល (សូមជ្រើសរើសបទចម្រៀងមួយ)

ទំនុកតម្កើងលេខ ១១៦,១-៩

ពាក្យអរព្រះគុណ

“យើងត្រូវឆ្លងកាត់ទុក្ខវេទនាជាច្រើន ដើម្បីឱ្យបានចូលក្នុងព្រះរាជ្យរបស់ព្រះជាម្ចាស់” (កក ១៤,២២^ខ)។

បន្ទរទី១ ៖ ព្រះអង្គបានរំដោះខ្ញុំឱ្យរួចពីស្លាប់ ហើយការពារខ្ញុំមិនឱ្យជំពប់ដួលឡើយ។

^១	ខ្ញុំស្រឡាញ់ព្រះអម្ចាស់ ដ្បិតព្រះអង្គទ្រង់ព្រះសណ្តាប់សំឡេងខ្ញុំដែលទទូចអង្វរ
^២	ព្រះអង្គផ្ទៀងព្រះការណ៌ស្តាប់ខ្ញុំ ខ្ញុំនឹងអង្វរព្រះអង្គអស់មួយជីវិត។
^៣	មច្ចុរាជបានរួបរឹតខ្ញុំ ធ្វើឱ្យខ្ញុំអន្ទះអន្ទែងភ័យខ្លាចស្លាប់ ខ្ញុំរងទុក្ខលំបាក ហើយឈឺចុកចាប់ពន់ប្រមាណ។
^៤	ពេលនោះ ខ្ញុំអង្វររកព្រះនាមព្រះអម្ចាស់ថា ៖ “ឱព្រះអម្ចាស់អើយ! សូមអាណិតមេត្តាទូលបង្គំផង!”
^៥	ព្រះអម្ចាស់តែងតែប្រណីសន្តោស ព្រះអង្គសុចរិត ព្រះរបស់យើងប្រកបដោយព្រះហឫទ័យមេត្តាករុណា។
^៦	ព្រះអម្ចាស់ជួយការពារមនុស្សទន់ទាប ពេលខ្ញុំធ្លាក់ខ្លួនខ្សោយ ព្រះអង្គបានសង្គ្រោះខ្ញុំ។
^៧	ខ្ញុំនឹងលែងខ្វល់ខ្វាយអ្វីទៀតហើយ ដ្បិតព្រះអម្ចាស់ប្រោសប្រទានឱ្យខ្ញុំបានសុខសាន្ត។
^៨	ព្រះអង្គបានរំដោះខ្ញុំឱ្យរួចពីស្លាប់ ព្រះអង្គជូតទឹកភ្នែកខ្ញុំ ហើយការពារខ្ញុំមិនឱ្យជំពប់ដួលឡើយ។
^៩	ខ្ញុំនឹងដើរនៅចំពោះព្រះភក្ត្រព្រះអម្ចាស់ ក្នុងពិភពមនុស្សលោកនេះ។

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ ៖ ព្រះអង្គបានរំដោះខ្ញុំឱ្យរួចពីស្លាប់ ហើយការពារខ្ញុំមិនឱ្យជំពប់ដួលឡើយ។

ទំនុកតម្កើងលេខ ១២១

ព្រះជាម្ចាស់ថែរក្សាការពារប្រជារាស្ត្រព្រះអង្គ

ពួកគេនឹងលែងឃ្លាន លែងស្រេកទៀតហើយ ព្រះអាទិត្យ និងកម្តៅគ្រប់យ៉ាង ក៏នឹងលែងធ្វើទុក្ខគេទៀតដែរ (វវ ៧,១៦)។

បន្ទរទី២ ៖ មានតែព្រះអម្ចាស់ដែលបានបង្កើតផ្ទៃមេឃ និងផែនដីប៉ុណ្ណោះ ដែលនឹងយាងមកជួយខ្ញុំ។

(បទពាក្យ ៧)

^១-	ខ្ញុំងើបមុខឡើងភ្នែកសម្លឹង	ឯនាយល្វើយល្វឹងទៅដល់ភ្នំ
	ថាតើនរណានឹងជួយខ្ញុំ	ឱ្យផុតទុក្ខធំគ្រប់ៗគ្រា	។
^២-	គឺមានតែអង្គព្រះអម្ចាស់	ដែលប្រណីប្រោសរាល់វេលា
	ទ្រង់បង្កើតដីផ្ទៃមេឃា	ព្រះអង្គគឺជាព្រះសង្គ្រោះ	។
^៣-	សូមទ្រង់មេត្តាកុំបណ្តោយ	ឱ្យជើងអ្នកធ្លោយរងរបួស
	ករុណាអាសូរជួយសង្គ្រោះ	កុំឱ្យមានគ្រោះឬត្រូវដួល	។
^៤-	ព្រះអង្គដែលថែទាំការពារ	អ៊ីស្រាអែលគ្រប់គ្នាបានសុខស្រួល
	ព្រះអង្គមិនងុយងោកប្រែប្រួល	ទ្រង់ក៏មិនដែលផ្ទំលក់ឡើយ	។
^៥-	ព្រះអម្ចាស់តែងរក្សាថែ	ការពារឥតល្ហែមិនកន្តើយ
	ទ្រង់គង់នៅខាងស្តាំអ្នកហើយ	កុំខ្វល់ខ្វាយឡើយទ្រង់ជាម្លប់	។
^៦-	ក្នុងពេលថ្ងៃមានព្រះអាទិត្យ	នឹងមិនរោមរិតធ្វើទោសទុក្ខ
	ឯព្រះចន្ទចរនៅពេលយប់	ក៏មិនមានទុក្ខដល់អ្នកដែរ	។
^៧-	ព្រះអម្ចាស់នឹងថែរក្សា	រារាំងបាំងការពារថ្នមថែ
	ហេតុការណ៍អាក្រក់ទ្រង់បង្វែរ	មិនឱ្យកើតក្បែររូបអ្នកឡើយ	។
^៨-	ព្រះអម្ចាស់ថែទាំអ្នកគ្រប់	អ្វីៗទាំងសព្វមិនកន្តើយ
	កិច្ចការអ្នកធ្វើនឹងធូរស្បើយ	ពីពេលនេះហើយតរៀងទៅ	។
	សូមកោតសរសើរព្រះបិតា	ព្រះបុត្រានិងព្រះវិញ្ញាណ
	ដែលគង់ស្ថិតស្ថេរឥតសៅហ្មង	យូរលង់កន្លងតរៀងទៅ	។

បន្ទរ ៖ មានតែព្រះអម្ចាស់ដែលបានបង្កើតផ្ទៃមេឃ និងផែនដីប៉ុណ្ណោះ ដែលនឹងយាងមកជួយខ្ញុំ។

បទលើកតម្កើងតាមគម្ពីរវិវរណៈ (វវ ១៥,៣-៤)

ទំនុកនៃការគោរពប្រណិប័តន៍

បន្ទរទី៣ ៖ ឱព្រះមហាក្សត្រនៃប្រជាជាតិទាំងឡាយអើយ ! មាគ៌ារបស់ព្រះអង្គសុទ្ធតែសុចរិត និងត្រឹមត្រូវទាំងអស់។

^៣

“ឱព្រះជាម្ចាស់ដែលមានព្រះចេស្តាលើអ្វីៗទាំងអស់អើយ!
ស្នាព្រះហស្តរបស់ព្រះអង្គប្រសើរឧត្តម គួរឱ្យកោតស្ញប់ស្ញែងពន់ពេកណាស់!
ឱព្រះមហាក្សត្រនៃប្រជាជាតិទាំងឡាយអើយ !
មាគ៌ារបស់ព្រះអង្គសុទ្ធតែសុចរិត និងត្រឹមត្រូវទាំងអស់!

^៤

បពិត្រព្រះអម្ចាស់! តើមាននរណាមិនគោរពកោតខ្លាចព្រះនាមព្រះអង្គ!
តើនរណាមិនលើកតម្កើងសិរីរុងរឿងនៃព្រះនាមព្រះអង្គ!
ដ្បិតមានតែព្រះអង្គប៉ុណ្ណោះ ជាព្រះដ៏វិសុទ្ធ។
មនុស្សគ្រប់ជាតិសាសន៍នឹងនាំគ្នាមកក្រាបថ្វាយបង្គំព្រះអង្គ
ដ្បិតគេបានឃើញច្បាស់ថា ព្រះអង្គវិនិច្ឆ័យដោយយុត្តិធម៌”។

បន្ទរ ៖ ឱព្រះមហាក្សត្រនៃប្រជាជាតិទាំងឡាយអើយ ! មាគ៌ារបស់ព្រះអង្គសុទ្ធតែសុចរិត និងត្រឹមត្រូវទាំងអស់។

ព្រះបន្ទូលរបស់ព្រះជាម្ចាស់ (១ករ ២,៧-១០^ក)

យើងប្រៀន‌ប្រដៅអំពីប្រាជ្ញារបស់ព្រះ‌ជាម្ចាស់ ដែលព្រះ‌អង្គបង្កប់ន័យទុកតាមគម្រោង‌ការដ៏លាក់កំបាំងរបស់ព្រះ‌អង្គ តាំងពីមុនកំណើតពិភព‌លោកមកម៉្លេះ គឺព្រះ‌អង្គបានគ្រោងទុកថានឹងប្រទានសិរី‌រុងរឿងមកយើង។ គ្មាននរណាម្នាក់ក្នុងចំណោមអ្នកគ្រប់‌គ្រងមនុស្សលោកនេះ បានស្គាល់ប្រាជ្ញារបស់ព្រះ‌អង្គទេ។ ប្រសិនបើគេពិតជាបានស្គាល់មែន គេមិនឆ្កាងព្រះ‌អម្ចាស់ប្រកបដោយសិរី‌រុងរឿងនោះឡើយ។ ប៉ុន្តែ ដូចមានចែងទុកមកថា៖ «អ្វីៗដែលភ្នែកមើលមិនឃើញអ្វីៗដែលត្រចៀកស្ដាប់មិនឮ និងអ្វីៗដែលចិត្តមនុស្សនឹកមិនដល់នោះព្រះ‌ជាម្ចាស់បានរៀបចំទុកសម្រាប់អស់អ្នកដែលស្រឡាញ់ព្រះអង្គ» ។ ព្រះ‌ជាម្ចាស់បានសម្ដែងឱ្យយើងដឹងអំពីគម្រោង‌ការដ៏លាក់កំបាំងនោះ តាម‌រយៈព្រះ‌វិញ្ញាណ។

បន្ទរ ៖ ព្រះ‌គ្រីស្តបានសោយទិវង្គត ព្រោះតែបាបរបស់យើង *ដើម្បីនាំបងប្អូនទៅថ្វាយព្រះ‌ជាម្ចាស់។ បន្ទរឡើងវិញ៖…
-កាលព្រះ‌អង្គមានឋានៈជាមនុស្ស ព្រះ‌អង្គត្រូវគេធ្វើគុត តែព្រះ‌ជាម្ចាស់បានប្រោសព្រះ‌អង្គឱ្យមានព្រះ‌ជន្មរស់ ដោយ‌សារព្រះ‌វិញ្ញាណវិញ។ បន្ទរ៖ *…
-សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ។ បន្ទរ៖…

ទំនុកតម្កើងរបស់ព្រះនាងម៉ារី

បន្ទរ៖ សូមព្រះអង្គសម្តែងព្រះហឫទ័យមេត្តាករុណា ដូចទ្រង់បានសន្យាជាមួយបុព្វបុរសរបស់យើង។

^៤៦	«ព្រលឹងខ្ញុំសូមលើកតម្កើងព្រះ‌អម្ចាស់*
^៤៧	ខ្ញុំមានចិត្តអំណរយ៉ាងខ្លាំង ព្រោះព្រះជាម្ចាស់ជាព្រះសង្គ្រោះរបស់ខ្ញុំ
^៤៨	ព្រះអង្គទតមើលមកខ្ញុំ ដែលជាអ្នកបម្រើដ៏ទន់ទាបរបស់ព្រះអង្គ អំណើះតទៅ មនុស្សគ្រប់ជំនាន់នឹងពោលថា ខ្ញុំជាអ្នកមានសុភមង្គលពិតមែន
^៤៩	ព្រះដ៏មានតេជានុភាព បានសម្ដែងការប្រសើរអស្ចារ្យចំពោះរូបខ្ញុំ។ ព្រះនាមរបស់ព្រះអង្គពិតជាវិសុទ្ធមែន!
^៥០	ទ្រង់មានព្រះហឫទ័យមេត្តាករុណា ដល់អស់អ្នកដែលកោតខ្លាចព្រះអង្គនៅគ្រប់ជំនាន់តរៀងទៅ
^៥១	ទ្រង់បានសម្ដែងឫទ្ធិបារមី កម្ចាត់មនុស្សដែលមានចិត្តឆ្មើងឆ្មៃ
^៥២	ទ្រង់បានទម្លាក់អ្នកកាន់អំណាចចុះពីតំណែង ហើយទ្រង់លើកតម្កើងមនុស្សទន់ទាបឡើង។
^៥៣	ទ្រង់បានប្រទានសម្បត្តិយ៉ាងបរិបូណ៌ ដល់អស់អ្នកដែលស្រេកឃ្លាន ហើយបណ្តេញពួកអ្នកមានឱ្យត្រឡប់ទៅវិញដោយដៃទទេ។
^៥៤	ព្រះអង្គបានជួយប្រជារាស្ត្រអ៊ីស្រាអែល ជាអ្នកបម្រើរបស់ព្រះអង្គ ហើយតែងតែសម្ដែងព្រះហឫទ័យមេត្តាករុណា
^៥៥	ដល់លោកអប្រាហាំ និងពូជពង្សរបស់លោកជានិច្ចតរៀងទៅ ដូចទ្រង់បានសន្យាជាមួយបុព្វបុរសយើង ឥតភ្លេចសោះឡើយ។

ឬ ទំនុកតម្កើងរបស់ព្រះនាងម៉ារី (តាមបែបស្មូត) បទព្រហ្មគីតិ

^៤៧	ខ្ញុំមានចិត្តអំណរ	សប្បាយអរពន់ពេកណាស់
	ព្រោះខ្ញុំបានដឹងច្បាស់	ថាព្រះម្ចាស់ទ្រង់សង្គ្រោះ	។
^៤៨	ព្រះអង្គទតមកខ្ញុំ	ជាអ្នកបម្រើស្ម័គ្រស្មោះ
	តទៅមនុស្សទាំងអស់	ថាខ្ញុំនេះសែនសុខក្រៃ	។
^៤៩	ព្រះដ៏មានឫទ្ធា	ខ្លាំងអស្ចារ្យលើលោកីយ៍
	សម្ដែងឫទ្ធិបារមី	ព្រះនាមថ្លៃថ្លាវិសុទ្ធ	។
^៥០	ទ្រង់មានព្រះហឫទ័យ	ត្រាប្រណីខ្ពស់បំផុត
	ដល់អ្នកគោរពកោត	ខ្លាចព្រះអង្គរៀងរហូត	។
^៥១	ព្រះអង្គសម្ដែងឫទ្ធិ	អស្ចារ្យពិតមិនរលត់
	កម្ចាត់មនុស្សមានពុត	ឆ្មើងបំផុតឫកខែងរែង	។
^៥២	ទ្រង់បានច្រានទម្លាក់	អ្នកធំធ្លាក់ពីតំណែង
	ឥតមានខ្លាចរអែង	ហើយទ្រង់តែងលើកអ្នកទាប	។
^៥៣	ព្រះអង្គប្រោសប្រទាន	ឱ្យអ្នកឃ្លានឆ្អែតដរាប
	អ្នកមានធនធានស្រាប់	ដេញត្រឡប់ដៃទទេ	។
^៥៤	ព្រះអង្គបានជួយរាស្ត្រ	ទ្រង់ទាំងអស់ឥតប្រួលប្រែ
	អ៊ីស្រាអែលនៅក្បែរ	ជាបម្រើដ៏ស្មោះស្ម័គ្រ	។
^៥៥	ទ្រង់តែងមានព្រះទ័យ	ករុណាក្រៃមិនថ្នាំងថ្នាក់
	លោកអប្រាហាំជាក់	និងពូជពង្សលោកជានិច្ច	។
	ដូចទ្រង់បានសន្យា	នឹងដូនតាឥតមានភ្លេច
	ព្រះអង្គចាំជានិច្ច	គ្មានកលកិច្ចប្រែប្រួលឡើយ	។
	សិរីរុងរឿងដល់	ព្រះបិតាព្រះបុត្រា
	និងព្រះវិញ្ញាណផង	ដែលទ្រង់គង់នៅជានិច្ច	។

បន្ទរ៖ សូមព្រះអង្គសម្តែងព្រះហឫទ័យមេត្តាករុណា ដូចទ្រង់បានសន្យាជាមួយបុព្វបុរសរបស់យើង។

ពាក្យអង្វរសកល

ចូរយើងកោតសរសើរព្រះគ្រីស្ត ព្រះអង្គជាព្រះដែលមានព្រះហឫទ័យមេត្តាករុណា និងអាណិតអាសូរ។ ព្រះអង្គជូតទឹកភ្នែកចេញពីភ្នែកអស់អ្នកដែលយំសោក។ ចូរយើងស្រែកហៅព្រះអង្គក្នុងសេចក្តីស្រឡាញ់ និងសូមទូលអង្វរព្រះអង្គដោយពោលថា ៖

បន្ទរ ៖ ឱព្រះអម្ចាស់អើយ ! សូមព្រះអង្គមេត្តាអាណិតដល់ប្រជារាស្រ្តរបស់ព្រះអង្គផង !

ឱព្រះយេស៊ូជាអម្ចាស់អើយ! ព្រះអង្គលួងលោមអស់អ្នកដែលទន់ទាប
—សូមព្រះអង្គយកចិត្តទុកដាក់ចំពោះទឹកភ្នែករបស់ជនក្រីក្រផង។ (បន្ទរ)

ឱព្រះជាម្ចាស់ដ៏មានព្រះហឫទ័យមេត្តាករុណាអើយ ! សូមព្រះអង្គសណ្តាប់ឮសូរសម្រែករបស់អ្នកកំពុងជិតស្លាប់
—សូមព្រះអង្គជួយសម្រាលទុក្ខពួកគេ ដោយព្រះអង្គគង់នៅជាមួយផង។ (បន្ទរ)

សូមឱ្យជនភៀសខ្លួនទាំងឡាយដឹងថា ព្រះអង្គថែទាំពួកគេ
—ហើយសូមឱ្យថ្ងៃណាមួយ ពួកគេអាចវិលត្រឡប់ទៅលំនៅដ្ឋានរបស់ខ្លួនវិញ នៅលើផែនដីនេះ និងជាចុងក្រោយ សូមឱ្យពួកគេចូលទៅក្នុងលំនៅដ្ឋាននៅស្ថានបរមសុខផង។ (បន្ទរ)

សូមព្រះអង្គសម្តែងធម៌មេត្តាករុណាចំពោះអស់អ្នកបាប ដែលបានឃ្លាតឆ្ងាយពីសេចក្តីស្រឡាញ់របស់ព្រះអង្គ
—សូមព្រះអង្គសម្រុះសម្រួលពួកគេជាមួយព្រះអង្គ និងព្រះសហគមន៍របស់ព្រះអង្គផង។ (បន្ទរ)

សូមព្រះអង្គសង្គ្រោះបងប្អូនយើងខ្ញុំដែលបានទទួលមរណភាពផុតទៅហើយ
—សូមឱ្យពួកគេទទួលការសង្រ្គោះយ៉ាងពេញលេញផង។ (បន្ទរ)

ធម៌ “ឱព្រះបិតា”

ពាក្យអធិដ្ឋាន

បពិត្រព្រះបិតាដ៏មានឫទ្ធានុភាពសព្វប្រការ និងមានព្រះជន្មគង់នៅជានិច្ច ! ព្រះអង្គប្រោសឱ្យសន្តអន់តន នៅប៉ាឌូ ពូកែទាំងបកស្រាយព្រះគម្ពីរ ទាំងទូលអង្វរព្រះអង្គសម្រាប់អ្នកតូចតាច។ នៅថ្ងៃយើងខ្ញុំគោរពសន្តអន់តន សូមព្រះអង្គប្រោសយើងខ្ញុំឱ្យយកចិត្តទុកដាក់នឹងការណែនាំរបស់ព្រះសហគមន៍ និងសូមជួយការពារយើងខ្ញុំឱ្យរួចពីឧបទ្រពនានា។
យើងខ្ញុំសូមអង្វរព្រះអង្គ ដោយរួមជាមួយព្រះយេស៊ូគ្រីស្ត ជាព្រះបុត្រាព្រះអង្គ និងជាព្រះអម្ចាស់ ដែលសោយរាជ្យរួមជាមួយព្រះអង្គ និងព្រះវិញ្ញាណដ៏វិសុទ្ធ អស់កល្បជាអង្វែងតរៀងទៅ។ អាម៉ែន!

ពិធីបញ្ចប់៖ ប្រសិនបើលោកបូជាចារ្យ ឬលោកឧបដ្ឋាកធ្វើជាអធិបតី លោកចាត់បងប្អូនឱ្យទៅដោយពោលថា ៖
សូមព្រះអម្ចាស់គង់ជាមួយបងប្អូន
ហើយគង់នៅជាមួយវិញ្ញាណរបស់លោកផង
សូមព្រះជាម្ចាស់ដ៏មានឫទ្ធានុភាពសព្វប្រការ ប្រទានព្រះពរដល់អស់បងប្អូន
គឺព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
អាម៉ែន។
សូមអញ្ជើញឱ្យបានសុខសាន្ត
សូមអរព្រះគុណព្រះជាម្ចាស់។
ពេលមានវត្តមានលោកបូជាចារ្យ ឬលោកឧបដ្ឋាក និងបុគ្គលម្នាក់សូត្រ ពាក្យអធិដ្ឋានពេលល្ងាច ៖
សូមព្រះអម្ចាស់ប្រទានព្រះពរ និងការពារយើងខ្ញុំឱ្យរួចផុតពីមារកំណាច ព្រមទាំងប្រទានជីវិតអស់កល្បជានិច្ចឱ្យយើងខ្ញុំ។
អាម៉ែន។

16 Views

Post Views: 16