រដូវបុណ្យចម្លង សប្តាហ៍ទី៦ ថ្ងៃអាទិត្យ

Posted on 19 ខែឧសភា 202519 ខែឧសភា 2025 by Siya Khim

រដូវបុណ្យចម្លង

(សន្តប៊ែត៍ ជាទីគោរព ជាបូជាចារ្យ និងជាគ្រូបាធ្យាយព្រះសហគមន៍)

(ឬ សន្តហ្រ្គេក័រទី៧ ជាសម្តេចប៉ាប)

(ឬ សន្តីម៉ារី ម៉ាដាឡា នៃគ្រួសារប៉ាស៊ី ជាព្រហ្មចារិនី)

ថ្ងៃអាទិត្យ អាទិត្យទី៦
_{(ពេលល្ងាច)}

ឱព្រះអម្ចាស់អើយ! សូមយាងមកជួយទូលបង្គំ
សូមព្រះអម្ចាស់យាងមកជួយសង្គ្រោះយើងខ្ញុំផង!
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក
ហើយជាដរាបតរៀងទៅ។ អាម៉ែន! (អាលេលូយ៉ា!)

ចម្រៀងចូល (សូមជ្រើសរើសបទចម្រៀងមួយ)

ទំនុកតម្កើងលេខ ១១០,១-៥.៧

ព្រះមេស្ស៊ី គឺជាព្រះមហាក្សត្រ និងជាបូជាចារ្យ

ព្រះគ្រីស្តត្រូវតែគ្រងរាជ្យ ទម្រាំដល់ព្រះជាម្ចាស់បង្ក្រាបខ្មាំងសត្រូវទាំងប៉ុន្មាន មកដាក់ក្រោមព្រះបាទារបស់ព្រះអង្គ (១ករ ១៥,២៥)។

បន្ទរទី១ ៖ ព្រះអង្គបានប្រោសព្រះ‌គ្រីស្តឱ្យមានព្រះជន្មរស់ឡើងវិញ និងឱ្យគង់នៅខាងស្ដាំព្រះ‌អង្គនៅស្ថានបរម‌សុខ អាលេលូយ៉ា!

^១	ព្រះជាអម្ចាស់មានព្រះបន្ទូលមកកាន់ព្រះរាជា ជាព្រះអម្ចាស់របស់ខ្ញុំថា ៖ “សូមគង់នៅខាងស្តាំយើង ទម្រាំដល់យើងបង្ក្រាបខ្មាំងសត្រូវរបស់ព្រះអង្គ មកដាក់ក្រោមព្រះបាទារបស់ព្រះអង្គ! ”។
^២	សូមព្រះជាអម្ចាស់ប្រោសប្រទាន ឱ្យព្រះរាជ្យរបស់ព្រះករុណា លាតសន្ធឹងចាប់តាំងពីក្រុងស៊ីយ៉ូនទៅ! សូមព្រះករុណាបង្ក្រាបខ្មាំងសត្រូវដែលនៅជុំវិញ!
^៣	នៅថ្ងៃព្រះករុណាកេណ្ឌទ័ពទៅច្បាំង ប្រជារាស្ត្រចូលរួមដោយស្ម័គ្រចិត្ត ពួកយុវជននាំគ្នាចូលគាល់ព្រះករុណានៅលើភ្នំដ៏វិសុទ្ធ ប្រៀបដូចជាទឹកសន្សើមនៅពេលព្រឹកព្រលឹម។
^៤	ព្រះអម្ចាស់មានព្រះបន្ទូលសន្យា ដោយឥតប្រែប្រួលថា ៖ “ព្រះអង្គជាបូជាចារ្យអស់កល្បតរៀងទៅ តាមរបៀបស្តេចមែលគីសេដែក”។
^៥	`ព្រះអម្ចាស់គង់នៅខាងស្តាំព្រះករុណា នៅថ្ងៃដែលព្រះអង្គទ្រង់ព្រះពិរោធ ព្រះអង្គកម្ទេចស្តេចនានា។`
^៧	នៅតាមផ្លូវ ព្រះរាជាសោយទឹកជ្រោះ រួចហើយ ព្រះអង្គងើបព្រះភក្រ្តប្រកបដោយជោគជ័យ។

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ ៖ ព្រះអង្គបានប្រោសព្រះ‌គ្រីស្តឱ្យមានព្រះជន្មរស់ឡើងវិញ និងឱ្យគង់នៅខាងស្ដាំព្រះ‌អង្គនៅស្ថានបរម‌សុខ អាលេលូយ៉ា!

ទំនុកតម្កើងលេខ ១១៥

សូមលើកតម្កើងព្រះជាម្ចាស់ដ៏ពិតប្រាកដ

មនុស្សម្នារៀបរាប់អំពីរបៀបដែលបងប្អូនទទួលយើង នៅពេលយើងមករកបងប្អូន និងអំពីរបៀបដែលបងប្អូនលះបង់ព្រះក្លែងក្លាយ បែរមករកព្រះជាម្ចាស់
ដើម្បីគោរពបម្រើព្រះអង្គដែលមានព្រះជន្មរស់ និងជាព្រះដ៏ពិតប្រាកដ (១ថស ១,៩)។

បន្ទរទី២៖ បងប្អូនបានលះបង់ព្រះក្លែងក្លាយ បែរមករកព្រះជាម្ចាស់ដែលមានព្រះជន្មគង់នៅ អាលេលូយ៉ា!

(បទកាកគតិ)

^១-	បពិត្រព្រះម្ចាស់	ខ្ញុំមិនគួរសោះ	ឱ្យគេតម្កើង
	មានតែព្រះអង្គ	ទើបត្រូវលើកឡើង	ឱ្យខ្ពស់ថ្កុំថ្កើង
		ព្រោះទ្រង់សប្បុរស	។
^២-	ម្តេចក៏ប្រជា	គ្រប់ជាតិនានា	នាំគ្នាសួរស្រុះ
	មកយើងខ្ញុំថា	`"ពួកឯងទាំងអស់`	តើព្រះឯងនោះ
		ស្ថិតនៅឯណា? “	។
^៣-	ព្រះរបស់ខ្ញុំ	នៅទីបរម	សុខឥតឧបមា
	ទ្រង់សព្វព្រះទ័យ	ធ្វើកិច្ចអស្ចារ្យ	អ្វីសព្វប្រការ
		បានឥតមានទាស់	។
^៤-	ឯព្រះពួកអ្នក	ប្រាកដជាជាក់	ព្រះក្លែងក្លាយស្មោះ
	ខ្លះធ្វើពីឈើ	គគីរកកោះ	ពីប្រាក់ពីមាស
		ជាព្រះមនុស្សច្នៃ	។
^៥-	ព្រះនោះមានមាត់	និយាយមិនកើត	មិនដែលចេញស្តី
	តាមតែជាងឆ្លាក់	ដាក់មកធ្វើអ្វី	ភ្នែកឥតប្រស្រី
		មើលអ្វីមិនបាន	។
^៦-	រីឯត្រចៀក	មានប្រាកដជាក់	តែមិនចំណាន
	ព្រោះស្តាប់មិនកើត	មិនដឹងដើមដាន	ច្រមុះដែលមាន
		តែមិនដឹងក្លិន	។
^៧-	មានសព្វទាំងដៃ	តែមិនអាចលៃ	ប៉ះពាល់ឬកាន់
	មានជើងនៅស្ងៀម	ព្រោះដើរមិនបាន	បំពង់កមាន
		តែគ្មានសំឡេង	។
^៨-	សូមឱ្យអស់អ្នក	ដែលបានដាប់ឆ្លាក់	រូបព្រះនោះឯង
	ហើយផ្ញើជីវិត	គ្មានគិតកោតក្រែង	ឱ្យគេចំបែង
		ដូចព្រះទាំងនោះ	។
^៩-	អ៊ីស្រាអែលអើយ	ចូរកុំកន្តើយ	ជីវិតផ្ញើព្រះ
	នោះទ្រង់នឹងជួយ	អ្នកបានទាំងអស់	ជាខែលគ្រឿងក្រោះ
		ពាំងអ្នករាល់គ្នា	។
^១០-	ពូជពង្សរបស់	អរ៉ុនទាំងអស់	ចូរអ្នកម្នីម្នា
	ផ្ញើជន្មជីវ៉ា	លើព្រះនាមា	ទ្រង់នឹងការពារ
		ឱ្យអ្នកបានសុខ	។
^១១-	អ្នកដែលកោតខ្លាច	ព្រះមានអំណាច	នឹងមិនជួបទុក្ខ
	បើផ្ញើជីវិត	អ្នកនឹងបានសុខ	ពីនេះទៅមុខ
		ផុតទុក្ខល្ហើយល្ហែ	។
^១២-	ព្រះមិនបំភ្លេច	សូម្បីតួចតិច	ដល់ពួកយើងទេ
	ព្រះអង្គឱ្យពរ	យើងកើនឡើងទ្វេ	អ៊ីស្រាអែលដែរ
		និងលោកអរ៉ុន	។
^១៣-	ព្រះអង្គប្រទាន	ពរទាំងអ្នកមាន	អ្នកតូចអ្នកធំ
	ដែលចេះកោតខ្លាច	ក្រាបថ្វាយបង្គំ	យកព្រះជាធំ
		ជាម្លប់ថ្លៃថ្លា	។
^១៤-	សូមព្រះប្រទាន	ពរនោះឱ្យមាន	ដល់អ្នករាល់គ្នា
	បានចម្រើនឡើង	គ្រប់ពេលវេលា	បានសុខរមនា
		កូនចៅប្រុសស្រី	។
^១៥-	សូមអ្នកទទួល	កុំបីអំពល់	ពីម្ចាស់មេឃដី
	ទ្រង់ប្រទានពរ	បវរសួស្តី	ព្រះអម្ចាស់ថ្លៃ
		ជាព្រះយើងពិត	។
^១៦-	ផ្ទៃមេឃផែនដី	សន្លឹមអន្លាយ	គឺជាកម្មសិទ្ធ
	របស់ព្រះម្ចាស់	តែមួយអង្គគត់	ព្រះអង្គអាណិត
		ឱ្យដីមកមនុស្ស	។
^១៧-	មនុស្សស្លាប់ជាខ្មោច	មានក្លិនអសោច៍	ពុំអាចថ្កើងយស
	អស់អ្នកដែលចុះ	ទៅស្ថានក្រោមនោះ	ក៏ពុំមានឈ្មោះ
		តម្កើងសិរី	។
^១៨-	គឺយើងនេះហើយ	គ្មានអ្នកផ្សេងឡើយ	ដែលរស់លើដី
	បានលើកតម្កើង	ព្រះអង្គរាល់ថ្ងៃ	ឥតមានសំចៃ
		ជារៀងរហូត	។
	សូមកោតសរសើរ	ដល់ព្រះបិតា	ព្រះរាជ្យបុត្រា
	និងព្រះវិញ្ញាណ	ជាព្រះត្រៃអង្គ	ថ្កើងថ្កើនឥតហ្មង
		ដែលគង់ជានិច្ច	។

បន្ទរ៖ បងប្អូនបានលះបង់ព្រះក្លែងក្លាយ បែរមករកព្រះជាម្ចាស់ដែលមានព្រះជន្មគង់នៅ អាលេលូយ៉ា!

បទលើកតម្កើងតាមគម្ពីរវិវរណៈ (វវ ១៩,១-២.៥-៧)

វិវាហមង្គលការកូនចៀម

បន្ទរទី៣៖ អាលេលូយ៉ា! សូមលើកតម្កើងព្រះជាម្ចាស់នៃយើង ព្រះអង្គសង្គ្រោះយើង ព្រះអង្គប្រកបដោយសិរីរុងរឿង និងឫទ្ធានុភាព អាលេលូយ៉ា!

^១	អាលេលូយ៉ា! សូមលើកតម្កើងព្រះជាម្ចាស់នៃយើង ព្រះអង្គសង្គ្រោះយើង ព្រះអង្គប្រកបដោយសិរីរុងរឿង និងឫទ្ធានុភាព
^២	ដ្បិតទ្រង់វិនិច្ឆ័យទោសយ៉ាងត្រឹមត្រូវ តាមយុត្តិធម៌ អាលេលូយ៉ា!
^៥	អាលេលូយ៉ា! អ្នករាល់គ្នាជាអ្នកបម្រើព្រះជាម្ចាស់ អ្នករាល់គ្នាជាអ្នកគោរពកោតខ្លាចព្រះអង្គ ទាំងតូចទាំងធំអើយ! ចូរសរសើរតម្កើងព្រះជាម្ចាស់នៃយើង!។ អាលេលូយ៉ា!
^៦	អាលេលូយ៉ា! ដ្បិតព្រះជាអម្ចាស់ ជាព្រះដ៏មានព្រះចេស្តាលើអ្វីៗទាំងអស់ ព្រះអង្គបានតាំងព្រះរាជ្យរបស់ព្រះអង្គហើយ
^៧	យើងនាំគ្នាអរសប្បាយឡើង ត្រូវមានអំណររីករាយឱ្យខ្លាំង ហើយនាំគ្នាលើកតម្កើងសិរីរុងរឿងព្រះអង្គ អាលេលូយ៉ា! អាលេលូយ៉ា! ដ្បិតដល់ពេលរៀបវិវាហមង្គលការកូនចៀមហើយ ភរិយាថ្មោងថ្មីរបស់កូនចៀម ក៏បានរៀបចំខ្លួនរួចជាស្រេចហើយដែរ។ អាលេលូយ៉ា!

បន្ទរ៖ អាលេលូយ៉ា! សូមលើកតម្កើងព្រះជាម្ចាស់នៃយើង ព្រះអង្គសង្គ្រោះយើង ព្រះអង្គប្រកបដោយសិរីរុងរឿង និងឫទ្ធានុភាព អាលេលូយ៉ា!

ព្រះបន្ទូលរបស់ព្រះជាម្ចាស់ (ហប ១០,១២-១៤)

រីឯព្រះ‌គ្រីស្តវិញ បន្ទាប់ពីព្រះ‌អង្គបានថ្វាយយញ្ញ‌បូជាតែមួយ ដើម្បីរំដោះបាបរួចហើយ ព្រះ‌អង្គគង់នៅខាងស្ដាំព្រះ‌ជាម្ចាស់រហូតតទៅ។ ឥឡូវនេះ ព្រះ‌អង្គរង់‌ចាំព្រះ‌ជាម្ចាស់បង្ក្រាបខ្មាំងសត្រូវរបស់ព្រះ‌អង្គ ឱ្យចុះចូលក្រោមព្រះ‌បាទាព្រះ‌អង្គ។ ដោយ‌សារតង្វាយតែមួយគត់ ព្រះ‌គ្រីស្តធ្វើឱ្យអស់អ្នកដែលព្រះ‌អង្គបានប្រោសឱ្យវិសុទ្ធហើយនោះ បានគ្រប់លក្ខណៈរហូតតទៅ។

បន្ទរ៖ ព្រះអម្ចាស់មានព្រះជន្មរស់ឡើងវិញហើយ *អាលេលូយ៉ា! អាលេលូយ៉ា!។ បន្ទរឡើងវិញ៖…
-ព្រះអង្គបានបង្ហាញខ្លួនឱ្យលោកស៊ីម៉ូនឃើញ។ បន្ទរ៖ *…
-សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ។ បន្ទរ៖…

ទំនុកតម្កើងរបស់ព្រះនាងម៉ារី

បន្ទរ៖ «អ្នកណាស្រឡាញ់ខ្ញុំ អ្នកនោះនឹងប្រតិ‌បត្តិតាមពាក្យខ្ញុំ។ ព្រះ‌បិតាខ្ញុំនឹងស្រឡាញ់អ្នកនោះ ហើយព្រះ‌បិតា និងខ្ញុំ ក៏នឹងមកតាំងលំ‌នៅ នៅក្នុងអ្នកនោះដែរ អាលេលូយ៉ា!

^៤៦	«ព្រលឹងខ្ញុំសូមលើកតម្កើងព្រះ‌អម្ចាស់*
^៤៧	ខ្ញុំមានចិត្តអំណរយ៉ាងខ្លាំង ព្រោះព្រះជាម្ចាស់ជាព្រះសង្គ្រោះរបស់ខ្ញុំ
^៤៨	ព្រះអង្គទតមើលមកខ្ញុំ ដែលជាអ្នកបម្រើដ៏ទន់ទាបរបស់ព្រះអង្គ អំណើះតទៅ មនុស្សគ្រប់ជំនាន់នឹងពោលថា ខ្ញុំជាអ្នកមានសុភមង្គលពិតមែន
^៤៩	ព្រះដ៏មានតេជានុភាព បានសម្ដែងការប្រសើរអស្ចារ្យចំពោះរូបខ្ញុំ។ ព្រះនាមរបស់ព្រះអង្គពិតជាវិសុទ្ធមែន!
^៥០	ទ្រង់មានព្រះហឫទ័យមេត្តាករុណា ដល់អស់អ្នកដែលកោតខ្លាចព្រះអង្គនៅគ្រប់ជំនាន់តរៀងទៅ
^៥១	ទ្រង់បានសម្ដែងឫទ្ធិបារមី កម្ចាត់មនុស្សដែលមានចិត្តឆ្មើងឆ្មៃ
^៥២	ទ្រង់បានទម្លាក់អ្នកកាន់អំណាចចុះពីតំណែង ហើយទ្រង់លើកតម្កើងមនុស្សទន់ទាបឡើង។
^៥៣	ទ្រង់បានប្រទានសម្បត្តិយ៉ាងបរិបូណ៌ ដល់អស់អ្នកដែលស្រេកឃ្លាន ហើយបណ្តេញពួកអ្នកមានឱ្យត្រឡប់ទៅវិញដោយដៃទទេ។
^៥៤	ព្រះអង្គបានជួយប្រជារាស្ត្រអ៊ីស្រាអែល ជាអ្នកបម្រើរបស់ព្រះអង្គ ហើយតែងតែសម្ដែងព្រះហឫទ័យមេត្តាករុណា
^៥៥	ដល់លោកអប្រាហាំ និងពូជពង្សរបស់លោកជានិច្ចតរៀងទៅ ដូចទ្រង់បានសន្យាជាមួយបុព្វបុរសយើង ឥតភ្លេចសោះឡើយ។

ឬ ទំនុកតម្កើងរបស់ព្រះនាងម៉ារី (តាមបែបស្មូត) បទព្រហ្មគីតិ

^៤៧	ខ្ញុំមានចិត្តអំណរ	សប្បាយអរពន់ពេកណាស់
	ព្រោះខ្ញុំបានដឹងច្បាស់	ថាព្រះម្ចាស់ទ្រង់សង្គ្រោះ	។
^៤៨	ព្រះអង្គទតមកខ្ញុំ	ជាអ្នកបម្រើស្ម័គ្រស្មោះ
	តទៅមនុស្សទាំងអស់	ថាខ្ញុំនេះសែនសុខក្រៃ	។
^៤៩	ព្រះដ៏មានឫទ្ធា	ខ្លាំងអស្ចារ្យលើលោកីយ៍
	សម្ដែងឫទ្ធិបារមី	ព្រះនាមថ្លៃថ្លាវិសុទ្ធ	។
^៥០	ទ្រង់មានព្រះហឫទ័យ	ត្រាប្រណីខ្ពស់បំផុត
	ដល់អ្នកគោរពកោត	ខ្លាចព្រះអង្គរៀងរហូត	។
^៥១	ព្រះអង្គសម្ដែងឫទ្ធិ	អស្ចារ្យពិតមិនរលត់
	កម្ចាត់មនុស្សមានពុត	ឆ្មើងបំផុតឫកខែងរែង	។
^៥២	ទ្រង់បានច្រានទម្លាក់	អ្នកធំធ្លាក់ពីតំណែង
	ឥតមានខ្លាចរអែង	ហើយទ្រង់តែងលើកអ្នកទាប	។
^៥៣	ព្រះអង្គប្រោសប្រទាន	ឱ្យអ្នកឃ្លានឆ្អែតដរាប
	អ្នកមានធនធានស្រាប់	ដេញត្រឡប់ដៃទទេ	។
^៥៤	ព្រះអង្គបានជួយរាស្ត្រ	ទ្រង់ទាំងអស់ឥតប្រួលប្រែ
	អ៊ីស្រាអែលនៅក្បែរ	ជាបម្រើដ៏ស្មោះស្ម័គ្រ	។
^៥៥	ទ្រង់តែងមានព្រះទ័យ	ករុណាក្រៃមិនថ្នាំងថ្នាក់
	លោកអប្រាហាំជាក់	និងពូជពង្សលោកជានិច្ច	។
	ដូចទ្រង់បានសន្យា	នឹងដូនតាឥតមានភ្លេច
	ព្រះអង្គចាំជានិច្ច	គ្មានកលកិច្ចប្រែប្រួលឡើយ	។
	សិរីរុងរឿងដល់	ព្រះបិតាព្រះបុត្រា
	និងព្រះវិញ្ញាណផង	ដែលទ្រង់គង់នៅជានិច្ច	។

បន្ទរ៖ «អ្នកណាស្រឡាញ់ខ្ញុំ អ្នកនោះនឹងប្រតិ‌បត្តិតាមពាក្យខ្ញុំ។ ព្រះ‌បិតាខ្ញុំនឹងស្រឡាញ់អ្នកនោះ ហើយព្រះ‌បិតា និងខ្ញុំ ក៏នឹងមកតាំងលំ‌នៅ នៅក្នុងអ្នកនោះដែរ អាលេលូយ៉ា!

ពាក្យអង្វរសកល

ព្រះជាម្ចាស់ជាព្រះបិតាបានលើកព្រះយេស៊ូឡើងពីចំណោមមនុស្សស្លាប់ ហើយលើកតម្កើងព្រះអង្គឱ្យអង្គុយនៅខាងស្តាំព្រះបិតា។ ចូរយើងទូលអង្វរព្រះបិតាថា ៖

បន្ទរ៖ បពិត្រព្រះអម្ចាស់ ! សូមព្រះអង្គទតមកប្រជារាស្រ្តព្រះអង្គ តាមរយៈព្រះគ្រីស្តក្នុងសិរីរុងរឿង !

ឱព្រះបិតាដ៏សុចរិត! ព្រះអង្គបានលើកព្រះយេស៊ូឡើងទៅលើផែនដី តាមរយៈជ័យជម្នះនៃឈើឆ្កាង
—សូមឱ្យអ្វីៗគ្រប់យ៉ាងត្រូវលើកឡើងក្នុងព្រះអង្គដែរ។ (បន្ទរ)

សូមព្រះអង្គចាត់ព្រះវិញ្ញាណដ៏វិសុទ្ធ មកសណ្ឋិតលើព្រះសហគមន៍ តាមរយៈព្រះបុត្រាក្នុងសិរីរុងរឿង
—ដើម្បីឱ្យព្រះសហគមន៍ធ្វើជាអគ្គសញ្ញានៃការរួបរួមគ្នា សម្រាប់មនុស្សជាតិទាំងមូល។ (បន្ទរ)

ព្រះអង្គបាននាំក្រុមគ្រួសារថ្មីមួយឆ្លងកាត់នៅក្នុងទឹក និងព្រះវិញ្ញាណដ៏វិសុទ្ធ
—សូមព្រះអង្គថែរក្សាពួកគេឱ្យមានចិត្តស្មោះត្រង់ចំពោះអគ្គសញ្ញាជ្រមុជទឹក និងនាំពួកគេឱ្យមានជីវិតអស់កល្បជានិច្ច។ (បន្ទរ)

តាមរយៈព្រះបុត្រាដ៏ខ្ពង់ខ្ពស់ សូមព្រះអង្គជួយដល់អស់អ្នកដែលមានទុក្ខព្រួយ អ្នកជាប់ជាឈ្លើយឱ្យមានសេរីភាព ហើយព្យាបាលអ្នកជំងឺឱ្យបានជា
—និងពិភពលោកបានទទួលនូវអំណរសប្បាយ ដោយការប្រទានពររបស់ព្រះអង្គ។ (បន្ទរ)

ព្រះអង្គបានចិញ្ចឹមបងប្អូនយើងខ្ញុំដែលបានទទួលមរណភាពទៅហើយ ដោយព្រះកាយ និងព្រះលោហិតរបស់ព្រះគ្រីស្ត ដែលមានព្រះជន្មរស់ឡើងវិញ
—សូមព្រះអង្គប្រោសពួកគេឱ្យមានជីវិតរស់ឡើងវិញ នៅថ្ងៃចុងក្រោយបំផុតផង។ (បន្ទរ)

ធម៌ “ឱព្រះបិតា”

ឱព្រះបិតាយើងខ្ញុំ ដែលគង់នៅស្ថានបរមសុខអើយ!
សូមសម្តែងព្រះបារមី ឱ្យមនុស្សលោកស្គាល់ព្រះនាមព្រះអង្គ
សូមឱ្យព្រះរាជ្យព្រះអង្គបានមកដល់
សូមឱ្យព្រះហឫទ័យរបស់ព្រះអង្គបានសម្រេចនៅលើផែនដី
ដូចនៅស្ថានបរមសុខដែរ។
សូមប្រទានអាហារ ដែលយើងខ្ញុំត្រូវការនៅថ្ងៃនេះ។
សូមអត់ទោសឱ្យយើងខ្ញុំ ដូចយើងខ្ញុំអត់ទោសឱ្យ
អស់អ្នកដែលបានប្រព្រឹត្តខុសនឹងយើងខ្ញុំ។
សូមកុំបណ្តោយឱ្យយើងខ្ញុំ ចាញ់ការល្បួងឡើយ
តែសូមរំដោះយើងខ្ញុំ ឱ្យរួចពីមារកំណាច។

ពាក្យអធិដ្ឋាន

បពិត្រព្រះបិតាប្រកបដោយធម៌មេត្តាករុណាយ៉ាងក្រៃលែង ! ព្រះអង្គសព្វព្រះហឫទ័យបង្រួបបង្រួមមនុស្សលោក ដែលបាក់បែកគ្នាឱ្យចូលរួមជាមហាគ្រួសារតែមួយ។ សូមព្រះអង្គមេត្តាប្រទានព្រះវិញ្ញាណដ៏វិសុទ្ធមកណែនាំយើងខ្ញុំ ឱ្យរស់នៅសមនឹងឋានៈរបស់ខ្លួនជាបុត្រធីតារបស់ព្រះអង្គ។ យើងខ្ញុំសូមអង្វរព្រះអង្គដោយរួមជាមួយព្រះយេស៊ូគ្រីស្ត ជាព្រះបុត្រាព្រះអង្គ ដែលមានព្រះជន្មគង់នៅ និងសោយរាជ្យរួមជាមួយព្រះបិតា និងព្រះវិញ្ញាណដ៏វិសុទ្ធអស់កល្បជាអង្វែងតរៀងទៅ។ អាម៉ែន!

ពិធីបញ្ចប់៖ ប្រសិនបើលោកបូជាចារ្យ ឬលោកឧបដ្ឋាកធ្វើជាអធិបតី លោកចាត់បងប្អូនឱ្យទៅដោយពោលថា ៖
សូមព្រះអម្ចាស់គង់ជាមួយបងប្អូន
ហើយគង់នៅជាមួយវិញ្ញាណរបស់លោកផង
សូមព្រះជាម្ចាស់ដ៏មានឫទ្ធានុភាពសព្វប្រការ ប្រទានព្រះពរដល់អស់បងប្អូន
គឺព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
អាម៉ែន។
សូមអញ្ជើញឱ្យបានសុខសាន្ត
សូមអរព្រះគុណព្រះជាម្ចាស់។
ពេលមានវត្តមានលោកបូជាចារ្យ ឬលោកឧបដ្ឋាក និងបុគ្គលម្នាក់សូត្រ ពាក្យអធិដ្ឋានពេលល្ងាច ៖
សូមព្រះអម្ចាស់ប្រទានព្រះពរ និងការពារយើងខ្ញុំឱ្យរួចផុតពីមារកំណាច ព្រមទាំងប្រទានជីវិតអស់កល្បជានិច្ចឱ្យយើងខ្ញុំ។
អាម៉ែន។

3 Views

Post Views: 3