រដូវបុណ្យចម្លង សប្តាហ៍ទី៥ ថ្ងៃសុក្រ

Posted on 19 ខែឧសភា 202519 ខែឧសភា 2025 by Siya Khim

រដូវបុណ្យចម្លង

ថ្ងៃសុក្រ អាទិត្យទី៥
_{(ពេលល្ងាច)}

ឱព្រះអម្ចាស់អើយ! សូមយាងមកជួយទូលបង្គំ
សូមព្រះអម្ចាស់យាងមកជួយសង្គ្រោះយើងខ្ញុំផង!
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក
ហើយជាដរាបតរៀងទៅ។ អាម៉ែន! (អាលេលូយ៉ា!)

ចម្រៀងចូល (សូមជ្រើសរើសបទចម្រៀងមួយ)

ទំនុកតម្កើងលេខ ៤១

ពាក្យអធិដ្ឋានរបស់អ្នកមានជំងឺ

”ក្នុងចំណោមអ្នករាល់គ្នាដែលបរិភោគជាមួយខ្ញុំ មានម្នាក់នឹងនាំគេមកចាប់ខ្ញុំ” (មក ១៤,១៨)។

បន្ទរទី១ ៖ ព្រះ‌គ្រីស្តមានសម្បត្តិដ៏ច្រើន ព្រះ‌អង្គបានដាក់ខ្លួនមកជាអ្នកក្រ ដើម្បីឱ្យបង‌ប្អូនបានទៅជាអ្នកមាន ដោយភាពក្រីក្ររបស់ព្រះ‌អង្គ។ អាលេលូយ៉ា!

^២	អ្នកដែលយកចិត្តទុកដាក់ នឹងមនុស្សកំសត់ទុគ៌ត មានសុភមង្គលហើយ នៅថ្ងៃមានអាសន្ន ព្រះអម្ចាស់នឹងរំដោះអ្នកនោះជាមិនខាន។
^៣	ព្រះអម្ចាស់នឹងថែរក្សាអាយុជីវិតរបស់គេ ហើយអ្នកនោះ មានសុភមង្គលនៅលើផែនដី ព្រះអង្គមិនបណ្តោយឱ្យគេធ្លាក់ទៅក្នុងកណ្តាប់ដៃរបស់ខ្មាំងសត្រូវឡើយ។
^៤	ព្រះអម្ចាស់បីបាច់ថែរក្សាគេ នៅពេលគេដេកឈឺចុកចាប់ ទោះបីឈឺយ៉ាងណាក្តី ក៏ព្រះអង្គប្រោសគេឱ្យជាសះស្បើយឡើងវិញ។
^៥	ខ្ញុំនឹកគិតថា ឱព្រះអម្ចាស់អើយ! សូមអាណិតមេត្តាប្រោសទូលបង្គំឱ្យបានជាផង ដ្បិតទូលបង្គំបានប្រព្រឹត្តអំពើបាបទាស់នឹងព្រះហឫទ័យព្រះអង្គហើយ។
^៦	សត្រូវរបស់ទូលបង្គំ នាំគ្នានិយាយអាក្រក់ពីទូលបង្គំ គេបន់ឱ្យតែទូលបង្គំស្លាប់ គេបន់ឱ្យតែឈ្មោះទូលបង្គំសាបសូន្យទៅ។
^៧	អ្នកដែលមកសួរសុខទុក្ខទូលបង្គំ ក៏មានគំនិតមិនល្អ គេមកប្រមូលដំណឹងអាក្រក់ លុះចេញទៅវិញ គេនិយាយបរិហារពីទូលបង្គំ។
^៨	អស់អ្នកដែលស្អប់ទូលបង្គំ និយាយខ្សឹបខ្សៀវដាក់គ្នាអំពីទូលបង្គំថា ទូលបង្គំគេចមិនផុតពីស្លាប់។
^៩	គេពោលថា “ជំងឺគាត់មើលមិនជាទេ! គាត់ពុំអាចក្រោកឡើងវិញបានឡើយ”។
^១០	សូម្បីតែមិត្តសម្លាញ់ដ៏ជិតស្និទ្ធរបស់ទូលបង្គំ គឺអ្នកដែលទូលបង្គំទុកចិត្ត ជាអ្នកដែលបរិភោគអាហាររួមជាមួយទូលបង្គំ ក៏ប្រឆាំងនឹងទូលបង្គំដែរ។
^១១	ឱព្រះអម្ចាស់អើយ! សូមអាណិតមេត្តាទូលបង្គំ សូមប្រោសទូលបង្គំ ឱ្យបានជាឡើងវិញផង នោះទូលបង្គំនឹងតបស្នងទៅខ្មាំងសត្រូវ ឱ្យសមនឹងអំពើរបស់គេ។
^១២	បើខ្មាំងសត្រូវរបស់ទូលបង្គំ លែងមានជ័យជម្នះលើទូលបង្គំ នោះទូលបង្គំដឹងច្បាស់ថា ព្រះអង្គពិតជាស្រឡាញ់ទូលបង្គំមែន។
^១៣	ព្រះអង្គបានជួយទូលបង្គំ ហើយប្រោសទូលបង្គំឱ្យជាទាំងស្រុង ព្រះអង្គប្រទានឱ្យទូលបង្គំ នៅជាមួយព្រះអង្គរហូតតរៀងទៅ។
^១៤	សូមលើកតម្កើងព្រះអម្ចាស់ ជាព្រះរបស់ជនជាតិអ៊ីស្រាអែល តាំងពីដើមរៀងមក ហើយជាដរាបតរៀងទៅ។ អាម៉ែន! អាម៉ែន!។

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ ៖ ព្រះ‌គ្រីស្តមានសម្បត្តិដ៏ច្រើន ព្រះ‌អង្គបានដាក់ខ្លួនមកជាអ្នកក្រ ដើម្បីឱ្យបង‌ប្អូនបានទៅជាអ្នកមាន ដោយភាពក្រីក្ររបស់ព្រះ‌អង្គ។ អាលេលូយ៉ា!

ទំនុកតម្កើងលេខ ៤៦

ព្រះជាម្ចាស់ជាជម្រក និងជាបង្អែកដ៏រឹង‌មាំរបស់យើង

”នាងនឹងសម្រាលបានបុត្រមួយ ដែលគេនឹងថ្វាយព្រះនាមថា អេម៉ានូអែល” ប្រែថា «ព្រះ‌ជាម្ចាស់គង់ជាមួយយើង» (មថ ១,២៣)។

បន្ទរទី២ ៖ មានទន្លេមួយហូរនាំយកអំណរមកស្រោចស្រពបុរីរបស់ព្រះ‌ជាម្ចាស់ អាលេលូយ៉ា!

(បទពាក្យ ៧)

^២-	ព្រះអម្ចាស់ជាទីជម្រក	ឱ្យយើងចូលជ្រករាល់ខែឆ្នាំ
	ព្រះអង្គតែងតែប្រុងប្រៀបចាំ	មិនមើលបំណាំពេលអាសន្ន	។
^៣-	ទោះបីផែនដីប្រេះរញ្ជួយ	ភ្នំប្រែរលួយដោយទាន់ហន់
	ទោះធ្លាក់សមុទ្រជ្រៅរាប់ពាន់	ជាច្រើនរយជាន់ខ្ញុំមិនភ័យ	។
^៤-	ទោះបីសមុទ្របោកបាចសាច	ជួនជោរជួននាចយ៉ាងណាក្តី
	ទោះភ្នំកក្រើកខ្ទ័រផែនដី	ក៏យើងមិនភ័យមិនខ្ចីខ្លាច	។
^៥-	មានទន្លេមួយនាំអំណរ	សិរីបវរស្រោចបាចសាច
	បុរីព្រះម្ចាស់មានអំណាច	វិសុទ្ធក្រៃពេកព្រះដំណាក់	។
^៦-	ព្រះម្ចាស់គង់ក្នុងបុរីណា	បានក្តីសុខាមិនអន់អាក់
	ព្រោះទ្រង់សង្គ្រោះមិនថ្នាំងថ្នាក់	តាំងពីថ្ងៃរះព្រឹកព្រលឹម	។
^៧-	ជនជាតិនានាតែងគំរាម	នគរកើតសង្គ្រាមភ័យជ្រួលជ្រើម
	ព្រះម្ចាស់បន្លឺសូរសៀងឡើង	ផែនដីត្រូវប៉ើងបែកខ្ចាត់ខ្ចាយ	។
^៨-	ព្រះជាអម្ចាស់នៃពិភព	ទ្រង់គង់ប្រសព្វមិនឃ្លាតឆ្ងាយ
	ព្រះលោកយ៉ាកុបមិនទន់ជ្រាយ	កំពែងមាំក្រៃនៃយើងខ្ញុំ	។
^៩-	ចូរនាំគ្នាមើលស្នាព្រះហស្ត	របស់ព្រះម្ចាស់ដ៏ឧត្តម
	កិច្ចការអស្ចារ្យទាំងតូចធំ	ដែលទ្រង់ខិតខំលើផែនដី	។
^១០-	ទ្រង់បានប្រមូលធ្នូលំពែង	ខែលខ្លីដាវវែងគ្មានសល់អី
	រទេះគ្រឿងក្រោះបោះទៅដី	ដុតខ្ទេចគ្មានស្តាយមិនស្រណោះ	។
^១១-	ចូរឈប់ច្បាំងទៅត្រូវដឹងថា	គឺយើងនេះណាជាព្រះម្ចាស់
	យើងគ្រប់គ្រងលើជាតិទាំងអស់	មិនសល់ចន្លោះលើលោកា	។
^១២-	ព្រះអម្ចាស់នៃភពផែនដី	ស្ម័គ្រស្មោះមេត្រីគ្រប់ៗគ្នា
	គង់នៅជាមួយរាល់វេលា	កំពែងការពារដ៏មាំមួន	។
	សូមកោតសរសើរព្រះបិតា	ព្រះបុត្រានិងព្រះវិញ្ញាណ
	ដែលគង់ស្ថិតស្ថេរឥតសៅហ្មង	យូរលង់កន្លងតរៀងទៅ	។

បន្ទរ ៖ មានទន្លេមួយហូរនាំយកអំណរមកស្រោចស្រពបុរីរបស់ព្រះ‌ជាម្ចាស់ អាលេលូយ៉ា!

បទលើកតម្កើងតាមគម្ពីរវិវរណៈ (វវ ១៥,៣-៤)

ទំនុកតម្កើងនៃការគោរពប្រណិប័តន៍

បន្ទរទី៣ ៖ «ចូរច្រៀងថ្វាយព្រះអម្ចាស់ ព្រះអង្គមានជ័យជម្នះដ៏ត្រចះ‌ត្រចង់ អាលេលូយ៉ា!

^៣

“ឱព្រះជាម្ចាស់ ដែលមានព្រះចេស្តាលើអ្វីៗទាំងអស់អើយ
ស្នាព្រះហស្តរបស់ព្រះអង្គប្រសើរឧត្តម
គួរឱ្យកោតស្ញប់ស្ញែងពន់ពេកណាស់!
ឱព្រះមហាក្សត្រនៃប្រជាជាតិទាំងឡាយអើយ
មាគ៌ារបស់ព្រះអង្គសុទ្ធតែសុចរិត និងត្រឹមត្រូវទាំងអស់!

^៤

បពិត្រព្រះអម្ចាស់! តើមាននរណាមិនគោរពកោតខ្លាចព្រះនាមព្រះអង្គ!
តើនរណាមិនលើកតម្កើងសិរីរុងរឿងនៃព្រះនាមព្រះអង្គ!
ដ្បិតមានតែព្រះអង្គប៉ុណ្ណោះជាព្រះដ៏វិសុទ្ធ។
មនុស្សគ្រប់ជាតិសាសន៍ នឹងនាំគ្នាមកក្រាបថ្វាយបង្គំព្រះអង្គ
ដ្បិតគេបានឃើញច្បាស់ថា ព្រះអង្គវិនិច្ឆ័យដោយយុត្តិធម៌”។

បន្ទរ ៖ «ចូរច្រៀងថ្វាយព្រះអម្ចាស់ ព្រះអង្គមានជ័យជម្នះដ៏ត្រចះ‌ត្រចង់ អាលេលូយ៉ា!

ព្រះបន្ទូលរបស់ព្រះជាម្ចាស់ (ហប ៥,៨-១០)

ថ្វី‌ដ្បិតតែព្រះ‌អង្គជាព្រះ‌បុត្រាក៏ដោយ ព្រះ‌អង្គក៏បានរៀនស្ដាប់បង្គាប់ ដោយរង‌ទុក្ខលំបាក។ បន្ទាប់ពីព្រះ‌អង្គបានគ្រប់លក្ខណៈហើយ ព្រះ‌អង្គក៏បានទៅជាប្រភពនៃការសង្គ្រោះដ៏នៅស្ថិត‌ស្ថេរអស់កល្ប‌ជានិច្ច សម្រាប់អស់អ្នកដែលស្ដាប់បង្គាប់ព្រះ‌អង្គ ហើយព្រះ‌ជាម្ចាស់ក៏ប្រកាសតែង‌តាំងព្រះ‌អង្គជាមហាបូជា‌ចារ្យ តាមរបៀបព្រះ‌បាទមែល‌គីសេ‌ដែកដែរ។

បន្ទរ៖ ពួកសាវ័កសប្បាយចិត្តជាខ្លាំង *អាលេលូយ៉ា! អាលេលូយ៉ា!។ បន្ទរឡើងវិញ៖…
-ដោយបានឃើញព្រះអម្ចាស់មានព្រះជន្មរស់ឡើងវិញ។ បន្ទរ៖ *…
-សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ។ បន្ទរ៖…

ទំនុកតម្កើងរបស់ព្រះនាងម៉ារី

បន្ទរ៖ គ្មាននរណាមានសេចក្ដីស្រឡាញ់ខ្លាំងជាងអ្នកដែលស៊ូប្ដូរជីវិត ដើម្បីមិត្តសម្លាញ់របស់ខ្លួននោះឡើយ អាលេលូយ៉ា!

^៤៦	«ព្រលឹងខ្ញុំសូមលើកតម្កើងព្រះ‌អម្ចាស់*
^៤៧	ខ្ញុំមានចិត្តអំណរយ៉ាងខ្លាំង ព្រោះព្រះជាម្ចាស់ជាព្រះសង្គ្រោះរបស់ខ្ញុំ
^៤៨	ព្រះអង្គទតមើលមកខ្ញុំ ដែលជាអ្នកបម្រើដ៏ទន់ទាបរបស់ព្រះអង្គ អំណើះតទៅ មនុស្សគ្រប់ជំនាន់នឹងពោលថា ខ្ញុំជាអ្នកមានសុភមង្គលពិតមែន
^៤៩	ព្រះដ៏មានតេជានុភាព បានសម្ដែងការប្រសើរអស្ចារ្យចំពោះរូបខ្ញុំ។ ព្រះនាមរបស់ព្រះអង្គពិតជាវិសុទ្ធមែន!
^៥០	ទ្រង់មានព្រះហឫទ័យមេត្តាករុណា ដល់អស់អ្នកដែលកោតខ្លាចព្រះអង្គនៅគ្រប់ជំនាន់តរៀងទៅ
^៥១	ទ្រង់បានសម្ដែងឫទ្ធិបារមី កម្ចាត់មនុស្សដែលមានចិត្តឆ្មើងឆ្មៃ
^៥២	ទ្រង់បានទម្លាក់អ្នកកាន់អំណាចចុះពីតំណែង ហើយទ្រង់លើកតម្កើងមនុស្សទន់ទាបឡើង។
^៥៣	ទ្រង់បានប្រទានសម្បត្តិយ៉ាងបរិបូណ៌ ដល់អស់អ្នកដែលស្រេកឃ្លាន ហើយបណ្តេញពួកអ្នកមានឱ្យត្រឡប់ទៅវិញដោយដៃទទេ។
^៥៤	ព្រះអង្គបានជួយប្រជារាស្ត្រអ៊ីស្រាអែល ជាអ្នកបម្រើរបស់ព្រះអង្គ ហើយតែងតែសម្ដែងព្រះហឫទ័យមេត្តាករុណា
^៥៥	ដល់លោកអប្រាហាំ និងពូជពង្សរបស់លោកជានិច្ចតរៀងទៅ ដូចទ្រង់បានសន្យាជាមួយបុព្វបុរសយើង ឥតភ្លេចសោះឡើយ។

ឬ ទំនុកតម្កើងរបស់ព្រះនាងម៉ារី (តាមបែបស្មូត) បទព្រហ្មគីតិ

^៤៧	ខ្ញុំមានចិត្តអំណរ	សប្បាយអរពន់ពេកណាស់
	ព្រោះខ្ញុំបានដឹងច្បាស់	ថាព្រះម្ចាស់ទ្រង់សង្គ្រោះ	។
^៤៨	ព្រះអង្គទតមកខ្ញុំ	ជាអ្នកបម្រើស្ម័គ្រស្មោះ
	តទៅមនុស្សទាំងអស់	ថាខ្ញុំនេះសែនសុខក្រៃ	។
^៤៩	ព្រះដ៏មានឫទ្ធា	ខ្លាំងអស្ចារ្យលើលោកីយ៍
	សម្ដែងឫទ្ធិបារមី	ព្រះនាមថ្លៃថ្លាវិសុទ្ធ	។
^៥០	ទ្រង់មានព្រះហឫទ័យ	ត្រាប្រណីខ្ពស់បំផុត
	ដល់អ្នកគោរពកោត	ខ្លាចព្រះអង្គរៀងរហូត	។
^៥១	ព្រះអង្គសម្ដែងឫទ្ធិ	អស្ចារ្យពិតមិនរលត់
	កម្ចាត់មនុស្សមានពុត	ឆ្មើងបំផុតឫកខែងរែង	។
^៥២	ទ្រង់បានច្រានទម្លាក់	អ្នកធំធ្លាក់ពីតំណែង
	ឥតមានខ្លាចរអែង	ហើយទ្រង់តែងលើកអ្នកទាប	។
^៥៣	ព្រះអង្គប្រោសប្រទាន	ឱ្យអ្នកឃ្លានឆ្អែតដរាប
	អ្នកមានធនធានស្រាប់	ដេញត្រឡប់ដៃទទេ	។
^៥៤	ព្រះអង្គបានជួយរាស្ត្រ	ទ្រង់ទាំងអស់ឥតប្រួលប្រែ
	អ៊ីស្រាអែលនៅក្បែរ	ជាបម្រើដ៏ស្មោះស្ម័គ្រ	។
^៥៥	ទ្រង់តែងមានព្រះទ័យ	ករុណាក្រៃមិនថ្នាំងថ្នាក់
	លោកអប្រាហាំជាក់	និងពូជពង្សលោកជានិច្ច	។
	ដូចទ្រង់បានសន្យា	នឹងដូនតាឥតមានភ្លេច
	ព្រះអង្គចាំជានិច្ច	គ្មានកលកិច្ចប្រែប្រួលឡើយ	។
	សិរីរុងរឿងដល់	ព្រះបិតាព្រះបុត្រា
	និងព្រះវិញ្ញាណផង	ដែលទ្រង់គង់នៅជានិច្ច	។

បន្ទរ៖ គ្មាននរណាមានសេចក្ដីស្រឡាញ់ខ្លាំងជាងអ្នកដែលស៊ូប្ដូរជីវិត ដើម្បីមិត្តសម្លាញ់របស់ខ្លួននោះឡើយ អាលេលូយ៉ា!

ពាក្យអង្វរសកល

ព្រះគ្រីស្តជាផ្លូវ ជាសេចក្តីពិត និងជាជីវិត។ ចូរយើងកោតសរសើរព្រះអង្គ ហើយទូលថា ៖

បន្ទរ៖ ឱព្រះបុត្រារបស់ព្រះជាម្ចាស់ដែលមានព្រះជន្មគង់នៅ ! សូមប្រទានព្រះពរដល់ប្រជារាស្រ្តព្រះអង្គ !

យើងខ្ញុំសូមទូលអង្វរព្រះយេស៊ូជាអម្ចាស់ សម្រាប់អ្នកបម្រើពិធីបុណ្យទាំងអស់របស់ព្រះសហគមន៍
—ដូចអស់លោកបានធ្វើពិធីកាច់នំប៉័ងនៃជីវិតសម្រាប់យើងខ្ញុំយ៉ាងណា សូមឱ្យអស់លោកផ្ទាល់បានទទួលនូវការចិញ្ចឹម និងកម្លាំងយ៉ាងនោះដែរ។ (បន្ទរ)

យើងខ្ញុំសូមទូលអង្វរព្រះអង្គសម្រាប់គ្រីស្តបរិស័ទគ្រប់និកាយ ដើម្បីឱ្យមនុស្សទាំងអស់សាកសមនឹងការត្រាស់ហៅរបស់ខ្លួន
—ហើយសូមព្រះអង្គការពារពួកគេក្នុងការរួបរួមនៃព្រះវិញ្ញាណដ៏វិសុទ្ធ ដោយសារចំណងនៃសេចក្តីសុខសាន្ត។ (បន្ទរ)

យើងខ្ញុំសូមទូលអង្វរព្រះអង្គសម្រាប់ថ្នាក់ដឹកនាំយើងខ្ញុំ សូមឱ្យពួកគេដឹកនាំដោយយុត្តិធម៌ និងមេត្តា
—ហើយផ្សព្វផ្សាយភាពសុខដុម និងសេចក្តីសុខសាន្ត ទៅដល់ពិភពលោក។ (បន្ទរ)

យើងខ្ញុំសូមទូលអង្វរព្រះអង្គសម្រាប់ខ្លួនយើងខ្ញុំផ្ទាល់ ដើម្បីឱ្យដួងចិត្តរបស់យើងខ្ញុំបានជ្រះស្អាតបរិសុទ្ធ និងច្រៀងសរសើរតម្កើងព្រះអង្គ ក្នុងសហភាពរវាងជនដ៏វិសុទ្ធទាំងឡាយ
—សូមឱ្យយើងខ្ញុំរួមគ្នាសាជាថ្មីជាមួយនឹងបងប្អូនយើងខ្ញុំ ដែលបានលាចាកលោកនេះ យើងខ្ញុំសូមសរសើរចំពោះសេចក្តីសប្បុរសរបស់ព្រះអង្គ។ (បន្ទរ)

ធម៌ “ឱព្រះបិតា”

ពាក្យអធិដ្ឋាន

បពិត្រព្រះអម្ចាស់ជាព្រះបិតា ! ព្រះអង្គលើកព្រះយេស៊ូឱ្យទទួលសិរីរុងរឿង ហើយទ្រង់បានប្រោសឱ្យមនុស្សគ្រប់ជាតិសាសន៍ទៅជាបុត្រធីតារបស់ព្រះអង្គ។ សូមព្រះអង្គមេត្តាប្រោសឱ្យយើងខ្ញុំ ទៅជាសញ្ញាសម្គាល់នៃគម្រោងការដ៏អស្ចារ្យរបស់ព្រះអង្គនៅលើផែនដី។ យើងខ្ញុំសូមអង្វរព្រះអង្គ ដោយរួមជាមួយព្រះយេស៊ូគ្រីស្តជាព្រះបុត្រាព្រះអង្គ និងជាអម្ចាស់យើងខ្ញុំ ដែលសោយរាជ្យរួមជាមួយព្រះអង្គ និងព្រះវិញ្ញាណដ៏វិសុទ្ធអស់កល្បជាអង្វែងតរៀងទៅ។ អាម៉ែន!

ពិធីបញ្ចប់៖ ប្រសិនបើលោកបូជាចារ្យ ឬលោកឧបដ្ឋាកធ្វើជាអធិបតី លោកចាត់បងប្អូនឱ្យទៅ ដោយពោលថា ៖
សូមព្រះអម្ចាស់គង់ជាមួយបងប្អូន
ហើយគង់នៅជាមួយវិញ្ញាណរបស់លោកផង
សូមព្រះជាម្ចាស់ដ៏មានឫទ្ធានុភាពសព្វប្រការ ប្រទានព្រះពរដល់អស់បងប្អូន
គឺព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
អាម៉ែន។
សូមអញ្ជើញឱ្យបានសុខសាន្ត
សូមអរព្រះគុណព្រះជាម្ចាស់។
ពេលមានវត្តមានលោកបូជាចារ្យ ឬលោកឧបដ្ឋាក និងបុគ្គលម្នាក់សូត្រ ពាក្យអធិដ្ឋានពេលល្ងាច ៖
សូមព្រះអម្ចាស់ប្រទានព្រះពរ និងការពារយើងខ្ញុំឱ្យរួចផុតពីមារកំណាច ព្រមទាំងប្រទានជីវិតអស់កល្បជានិច្ចឱ្យយើងខ្ញុំ។
អាម៉ែន។

2 Views

Post Views: 2