- បេសកកម្មសាសនទូត
Ad Gentes - ក្រុមលោកគង្វាល
Presbyterorum Ordinis - បេសកកម្មគ្រីស្តបរិស័ទធម្មតា
Apostolicam Actuositatem - ការប្រែប្រួលរបស់ព្រះសហគមន៍
Optatam Totius Ecclesiae - សេចក្តីស្រឡាញ់ដ៏ពេញលក្ខណៈ
Perfectae Caritatis - ព្រះគ្រីស្តជាអម្ចាស់
Christus Dominus - គ្រីស្តបរិស័ទត្រូវរួបរួមគ្នាជាធ្លុងតែមួយ
Unitatis Redintegratio - ព្រះសហគមន៍នៅបូព៌ាប្រទេស
Orientalium Ecclesiarum - ក្នុងចំណាមការអស្ចារ្យ
Inter Mirifica
គ្រីស្តបរិស័ទត្រូវរួបរួមគ្នាជាធ្លុងតែមួយ
UNITATIS REDINTEGRATIO
ខ្ញុំប៉ូល ជាអភិបាល ជាអ្នកបម្រើនៃអ្នកបម្រើរបស់ព្រះជាម្ចាស់ រួមជាមួយអស់លោកអភិបាលជួបជុំក្នុងមហាសន្និបាតដ៏វិសុទ្ធនេះ សូមប្រកាសក្រឹត្យក្រមនេះ ដើម្បីឱ្យគេនឹកចងចាំរហូតតរៀងទៅ។
ក្រឹត្យក្រម
អំពីការបង្រួបបង្រួមគ្រីស្តបរិស័ទ
គ្រប់និកាយឱ្យរួបរួមគ្នាជាធ្លុងតែមួយ
១- ក្នុងចំណោមគោលដៅនៃមហាសនិ្នបាតសកលវ៉ាទីកង់ទី២ដ៏វិសុទ្ធ ការលើកស្ទួយគ្រីស្តបរិស័ទគ្រប់និកាយឱ្យរួបរួមគ្នាជាធ្លុងតែមួយពិតជាគោលដៅមួយដ៏សំខាន់។ ព្រះគ្រីស្តជាព្រះអម្ចាស់តែងតាំងព្រះសហគមន៍តែមួយគត់។ ក៏ប៉ុន្តែ មានសហគមន៍គ្រីស្តបរិស័ទជាច្រើនអះអាងនៅចំពោះមនុស្សលោកថា មានតែគ្នាគេទេដែលទទួលមត៌កដ៏ពិតប្រាកដរបស់ព្រះយេស៊ូគ្រីស្ត។ ទោះបីគ្រីស្តបរិស័ទទាំងអស់ប្រកាសជំនឿថា គេជាសាវ័ករបស់ព្រះអម្ចាស់ក្តី ក៏គេកាន់ឥរិយាបថផ្សេងៗពីគ្នា និងដើរតាមមាគ៌ាប្លែកៗពីគ្នាដែរ ហាក់ដូចជាព្រះគ្រីស្តបែងចែកជាច្រើនភាគ (១ករ ១,១៣)។ ការបែងចែកគ្នាដូច្នេះ ច្បាស់ជាទាស់នឹងព្រះហឫទ័យរបស់ព្រះគ្រីស្តមែន ហើយក៏បណ្តាលឱ្យមនុស្សលោកឃ្លាតឆ្ងាយពីជំនឿ ព្រមទាំងជាឧបសគ្គរារាំងការប្រកាសដំណឹងល្អឱ្យមនុស្សគ្រប់ៗគ្នាដែលជាកិច្ចដ៏វិសុទ្ធបំផុត។
ប៉ុន្តែ ព្រះអម្ចាស់នៃពេលវេលានៅតែសម្រេចគម្រោងការរបស់ព្រះអង្គតាមព្រះហឫទ័យប្រោសប្រណីចំពោះយើងជាអ្នកបាបដោយព្រះប្រាជ្ញាញាណ និងដោយព្រះហឫទ័យអត់ធ្មត់ខន្តីដែរ។ នៅសម័យថ្មីៗនេះ ព្រះអង្គចាប់ផ្តើមបំភ្លឺចិត្តគំនិតគ្រីស្តបរិស័ទ ដែលបែងចែកគ្នានោះឱ្យមានចំនួនកាន់តែច្រើនឡើងៗនឹកស្តាយដោយបែងចែកគ្នាដូច្នេះ និងក៏មានបំណងប្រាថ្នាចង់រួបរួមគ្នាជាធ្លុងតែមួយដែរ។ នៅគ្រប់ទីកន្លែង ព្រះជាម្ចាស់ប្រណីសន្តោសមនុស្សជាច្រើន ហើយមានចលនាមួយកាន់តែខ្លាំងឡើងជារៀងរាល់ថ្ងៃកើតឡើងក្រោមការណែនាំរបស់ព្រះវិញ្ញាណដ៏វិសុទ្ធ សូម្បីតែក្នុងចំណោមបងប្អូនដែលបែកចេញពីយើងក្តីក៏កើតចលនានោះដែរ ក្នុងគោលបំណងបង្រួបបង្រួមគ្រីស្តបរិស័ទទាំងអស់ឱ្យរួបរួមគ្នាជាធ្លុងតែមួយ។
គេតែងហៅចលនានោះថា «ចលនាបង្រួបបង្រួមគ្រីស្តបរិស័ទគ្រប់និកាយឱ្យរួបរួមគ្នាជាធ្លុងតែមួយ»។ អស់អ្នកដែលតែងតែអង្វរព្រះជាម្ចាស់ជាព្រះត្រៃឯក និងដែលប្រកាសថា ព្រះយេស៊ូពិតជាព្រះអម្ចាស់ និងពិតជាព្រះសង្គ្រោះក៏ចូលរួមក្នុងចលនានោះដែរ។ មិនគ្រាន់តែគ្រីស្តបរិស័ទក្នុងឋានៈជាបុគ្គលម្នាក់ៗប៉ុណ្ណោះទេចូលចលនានោះ តែគ្រីស្តបរិស័ទដែលរួមគ្នាក្នុងឋានៈជាសហគមន៍ក៏ចូលដែរ គេបានស្តាប់ដំណឹងល្អក្នុងសហគមន៍ទាំងនោះដែលគេហៅថា «ព្រះសហគមន៍របស់គេ» (ឬ “ក្រុមជំនុំរបស់គេ”) និង «ព្រះសហគមន៍ (ឬ “ក្រុមជំនុំ”) របស់ព្រះជាម្ចាស់»។ ក៏ប៉ុន្តែ គ្រីស្តបរិស័ទស្ទើរតែទាំងអស់នោះមានបំណងសង្វាតចង់ឱ្យមានព្រះសហគមន៍ (ឬ “ក្រុមជំនុំ”) របស់ព្រះជាម្ចាស់តែមួយគត់ដែលមនុស្សអាចមើលឃើញបាន ជាព្រះសហគមន៍ (ឬ “ក្រុមជំនុំ”) សកលយ៉ាងពិតប្រាកដដែលព្រះជាម្ចាស់ចាត់មកក្នុងពិភពលោកទាំងមូល ដើម្បីឱ្យមនុស្សលោកប្រែចិត្តគំនិតទទួលដំណឹងល្អ និងទទួលការសង្រោ្គះ ហើយលើកតម្កើងសិរីរុងរឿងរបស់ព្រះជាម្ចាស់។
ហេតុនេះហើយ បានជាមហាសន្និបាតដ៏វិសុទ្ធមានអំណរសប្បាយដោយឃើញការទាំងនោះ។ ក្រោយពីបានប្រកាសបញ្ជាក់លទ្ធិអំពីព្រះសហគមន៍រួចហើយ និងដោយមានបំណងចង់បង្រួបបង្រួមសាវ័កទាំងប៉ុន្មានរបស់ព្រះគ្រីស្តឱ្យរួបរួមគ្នាឡើងវិញ មហាសន្និបាតក៏សូមផ្តល់ឱ្យគ្រីស្តបរិស័ទកាតូលិកទាំងអស់នូវជំនួយ និងគោលការណ៍ ព្រមទាំងមធ្យោបាយដែលអាចជួយគេឱ្យតបឆ្លើយនឹងព្រះជាម្ចាស់ដែលត្រាស់ហៅគេឱ្យរួបរួមគ្នា និងតបឆ្លើយនឹងព្រះហឫទ័យប្រណីសន្តោសរបស់ព្រះអង្គផង។
ជំពូក១
គោលការណ៍កាតូលិកអំពីការបង្រួបបង្រួម
គ្រីស្តបរិស័ទទាំងអស់ឱ្យរួបរួមជាធ្លុងតែមួយ
២- ព្រះជាម្ចាស់បានសម្តែងព្រះហឫទ័យសប្បុរសចំពោះមនុស្សយើងដូចតទៅ៖ គឺព្រះបិតាចាត់ព្រះបុត្រាតែមួយរបស់ព្រះអង្គឱ្យយាងមកក្នុងពិភពលោក។ ដោយព្រះបុត្រាប្រសូតជាមនុស្ស ព្រះអង្គបានប្រោសមនុស្សជាតិទាំងមូលឱ្យមានជីវិតថ្មីទាំងរម្ដោះគេ និងបង្រួបបង្រួមគេជាអង្គតែមួយដែរ (១យហ ៤,៩; កូឡ ១,១៨-២០; យហ ១១,៥២)។ មុនពេលព្រះបុត្រាបូជាព្រះជន្មនៅលើឈើឆ្កាងទុកជាតង្វាយដ៏និមល ព្រះអង្គអង្វរព្រះបិតា សូមព្រះអង្គប្រណីសន្តោសអស់អ្នកដែលនឹងផ្ញើជីវិតលើព្រះអង្គនៅពេលក្រោយៗទៀតថា៖ «បពិត្រព្រះបិតា! សូមឱ្យគេទាំងអស់គ្នារួមជាអង្គតែមួយនៅក្នុងយើង ដូចព្រះអង្គស្ថិតនៅជាប់នឹងខ្ញុំ ហើយខ្ញុំស្ថិតនៅជាប់នឹងព្រះអង្គដូច្នោះដែរ ដើម្បីឱ្យមនុស្សលោកជឿថា ព្រះអង្គពិតជាបានចាត់ខ្ញុំមកមែន» (យហ ១៧,២១)។ ព្រះអង្គក៏តែងតាំងអគ្គសញ្ញាដ៏ប្រសើរឧត្តមមួយក្នុងព្រះសហគមន៍ និងក្នុងក្រុមជំនុំ គឺអគ្គសញ្ញាអរព្រះគុណដែលបង្ហាញបញ្ជាក់ថា ព្រះសហគមន៍រួបរួមជាធ្លុងតែមួយហើយ និងធ្វើឱ្យព្រះសហគមន៍រួបរួមគ្នាជាធ្លុងតែមួយទៀតដែរ។ ព្រះអង្គក៏ប្រទានវិន័យថ្មីឱ្យក្រុមសាវ័ករបស់ព្រះអង្គ គឺឱ្យគេស្រឡាញ់គ្នាទៅវិញទៅមក (យហ ១៣,៣៤)។ ព្រះអង្គក៏សន្យាថា នឹងចាត់ព្រះវិញ្ញាណ ជាវិញ្ញាណដែលជួយការពារ (យហ ១៦,៧) ជាព្រះអម្ចាស់ដែលផ្តល់ជីវិតឱ្យគង់នៅជាមួយគេជាដរាបតរៀងមក។
ក្រោយពីពេលគេលើកព្រះអង្គនៅលើឈើឆ្កាង និងក្រោយពីពេលព្រះអង្គយាងចូលក្នុងសិរីរុងរឿង ព្រះអម្ចាស់យេស៊ូចាក់បង្ហូរព្រះវិញ្ញាណតាមព្រះបន្ទូលសន្យា។ ដោយព្រះវិញ្ញាណនេះ ព្រះអង្គក៏ត្រាស់ហៅ និងប្រមែប្រមូលព្រះសហគមន៍ (ក្រុមជំនុំ) ដែលជាប្រជារាស្ត្រនៃសម្ពន្ធមេត្រីថ្មីឱ្យមានជំនឿតែមួយ មានសេចក្តីសង្ឃឹមតែមួយ និងមានចិត្តស្រឡាញ់តែមួយដែរ តាមសេចក្តីដែលគ្រីស្តទូតប៉ូលបង្រៀនថា៖ «ព្រះកាយមានតែមួយ ព្រះវិញ្ញាណមានតែមួយ សេចក្តីសង្ឃឹមមានតែមួយតាមព្រះជាម្ចាស់ត្រាស់ហៅបងប្អូន។ ព្រះអម្ចាស់មានតែមួយ ជំនឿមានតែមួយ ពិធីជ្រមុជទឹកមានតែមួយ» (អភ ៤,៤-៥)។ «បងប្អូនទាំងអស់ដែលបានទទួលពិធីជ្រមុជទឹកក្នុងអង្គព្រះគ្រីស្ត រួចបងប្អូនរួបរួមយ៉ាងជិតស្និទ្ធនឹងព្រះគ្រីស្ត ដូចជាយកព្រះអង្គមកបំពាក់លើខ្លួន… គឺបងប្អូនរួបរួមគ្នាជាអង្គតែមួយក្នុងព្រះគ្រីស្តយេស៊ូ» (កាឡ ៣,២៧-២៨)។ ព្រះវិញ្ញាណដ៏វិសុទ្ធគង់សណ្ឋិតក្នុងអ្នកជឿ ព្រះអង្គបំពេញព្រះសហគមន៍ទាំងមូល ហើយត្រួតត្រាព្រះសហគមន៍ទៀតផង។ ព្រះវិញ្ញាណធ្វើឱ្យអ្នកជឿទាំងប៉ុន្មានរួបរួមចិត្តគំនិតគ្នាយ៉ាងអស្ចារ្យ គឺប្រោសឱ្យគេរួបរួមគ្នាយ៉ាងជិតស្និទ្ធបំផុតក្នុងអង្គព្រះគ្រីស្ត ព្រោះព្រះវិញ្ញាណជាដើមកំណើតប្រោសឱ្យព្រះសហគមន៍រួបរួមគ្នាជាធ្លុងតែមួយនោះ។ ព្រះវិញ្ញាណនេះហើយដែលចែកប្រទានព្រះអំណោយទានប្លែកៗពីគ្នា និងមុខងារបម្រើផ្សេងៗ (១ករ ១២,៤-១១) ព្រះអង្គក៏ចែកប្រទានតួនាទីផ្សេងៗក្នុងព្រះសហគមន៍របស់ព្រះយេស៊ូគ្រីស្តទៀតផង ព្រះអង្គ “ចាត់ចែងប្រជារាស្រ្តដ៏វិសុទ្ធដូច្នេះ ឱ្យបំពេញមុខងារបម្រើ ដើម្បីសាងសង់ព្រះកាយព្រះគ្រីស្ត” (អភ ៤,១២)។
ក៏ប៉ុន្តែ ព្រះគ្រីស្តបានផ្ញើមុខងារបង្រៀន មុខងារត្រួតត្រា និងមុខងារនាំមនុស្សឱ្យបានវិសុទ្ធទៅនឹងក្រុមគ្រីស្តទូតទាំងដប់ពីរនាក់ (មថ ២៨,១៨-២០ ភ្ជាប់នឹង យហ ២០,២១-២៣) ដើម្បីតែងតាំងព្រះសហគមន៍ដ៏វិសុទ្ធរបស់ព្រះអង្គនៅគ្រប់ទីកន្លែង រហូតដល់អវសានកាលនៃពិភពលោក។ ក្នុងចំណោមគ្រីស្តទូតទាំងដប់ពីរនាក់នោះ ព្រះអង្គជ្រើសរើសលោកសិលា។ ក្រោយពីលោកសិលានោះបានប្រកាសជំនឿ ព្រះអង្គសម្រេចព្រះហឫទ័យសាងព្រះសហគមន៍របស់ព្រះអង្គលើលោកសិលានេះទុកជាគ្រឹះ។ ព្រះអង្គមានព្រះបន្ទូលសន្យាថា នឹងប្រគល់ “កូនសោរនៃព្រះរាជ្យ” ទុកមកលោក (មថ ១៦,១៩ ភ្ជាប់នឹង ១៨,១៨)។ ក្រោយពីលោកប្រកាសបញ្ជាក់ថា លោកស្រឡាញ់ព្រះអង្គពិតមែនហើយ ព្រះអង្គក៏ផ្ញើហ្វូងចៀមព្រះអង្គឱ្យលោកពង្រឹងជំនឿរបស់គេ (លក ២២,៣២) និងឃ្វាលណែនាំគេឱ្យរួបរួមគ្នាជាធ្លុងតែមួយយ៉ាងពេញលក្ខណៈ (យហ ២១,១៥-១៧)។ ក៏ប៉ុន្តែ ព្រះយេស៊ូគ្រីស្តនៅតែជាគ្រឹះដ៏សំខាន់បំផុតដែលនៅស្ថិតស្ថេរអស់កល្បជានិច្ច (អភ ២,២០) និងជា “គង្វាលនៃជីវិតរបស់យើង” (១សល ២,២៥)។
ព្រះយេស៊ូគ្រីស្តសព្វព្រះហឫទ័យឱ្យប្រជារាស្រ្តរបស់ព្រះអង្គចម្រើនចំនួនឡើង ដោយគ្រីស្តទូត និងអស់លោកដែលបន្តមុខងារពីក្រុមគ្រីស្តទូត ប្រកាសដំណឹងល្អយ៉ាងស្មោះត្រឹមត្រូវ។ អស់លោកអភិបាលបន្តមុខងារពីក្រុមគ្រីស្តទូតរួមជាមួយអភិបាលព្រះសហគមន៍ក្រុងរ៉ូម ដែលបន្តមុខងារពីគ្រីស្តទូតសិលាមកក្នុងឋានៈជាមេដឹកនាំ។ ព្រះយេស៊ូគ្រីស្តក៏សព្វព្រះហឫទ័យឱ្យប្រជារាស្រ្តរបស់ព្រះអង្គចម្រើនឡើង ដោយអស់លោកធ្វើអគ្គសញ្ញាជូនគ្រីស្តបរិស័ទ និងគ្រប់គ្រងគេដោយសេចក្តីស្រឡាញ់ ក្រោមការណែនាំនៃព្រះវិញ្ញាណដ៏វិសុទ្ធដែរ។ ព្រះអង្គក៏បង្រួបបង្រួមប្រជារាស្រ្តព្រះអង្គឱ្យរួបរួមគ្នាជាធ្លុងតែមួយ ដោយគេប្រកាសជំនឿតែមួយ ដោយរួបរួមគ្នាគោរពបម្រើព្រះជាម្ចាស់ និងដោយគេរួបរួមគ្នា ទុកគ្នាជាបងប្អូនយ៉ាងសុខសាន្តក្នុងមហាគ្រួសាររបស់ព្រះជាម្ចាស់។
ដូច្នេះ ព្រះសហគមន៍ដែលជាហ្វូងចៀមតែមួយគត់របស់ព្រះជាម្ចាស់ ប្រៀបដូចទង់មួយជាសញ្ញាលើកឡើងឱ្យមនុស្សគ្រប់ជាតិសាសន៍ឃើញ (អស ១១,១០-១២) ព្រះសហគមន៍យកដំណឹងល្អស្តីអំពីសេចក្តីសុខសាន្តមកបម្រើមនុស្សលោកទាំងមូល (អភ ២,១៧-១៨ ភ្ជាប់នឹង មក ១៦-១៥)។ ព្រះសហគមន៍នៅតែធ្វើបូជនីយចរណ៍ទាំងមានសេចក្តីសង្ឃឹម ឆ្ពោះទៅកាន់មាតុភូមិនៃលោកខាងមុខជាទិសដៅរបស់ខ្លួន (១សល ១,៣-៩)។
នេះជាគម្រោងការដ៏សក្ការៈរបស់ព្រះសហគមន៍ដែលរួបរួមគ្នាជាធ្លុងតែមួយក្នុងអង្គព្រះគ្រីស្ត ដោយសារព្រះគ្រីស្ត និងក្រោមការណែនាំនៃព្រះវិញ្ញាណដ៏វិសុទ្ធ ដែលចែកប្រទានមុខងារបម្រើប្លែកៗពីគ្នាក្នុងព្រះសហគមន៍នោះ។ ព្រះត្រៃឯក គឺព្រះបិតា ព្រះបុត្រា និងព្រះវិញ្ញាណដែលរួបរួមគ្នាជាអង្គតែមួយ ពិតជាគំរូដ៏ខ្ពង់ខ្ពស់បំផុត និងជាដើមកំណើតនៃគម្រោងការរបស់ព្រះសហគមន៍ ដែលរួបរួមជាធ្លុងតែមួយ។
៣- ទំនាក់ទំនងជាមួយបងប្អូនដែលបែកចេញពីព្រះសហគមន៍កាតូលិក
តាំងពីដើមរៀងមក ក្នុងព្រះសហគមន៍តែមួយគត់របស់ព្រះជាម្ចាស់ កើតការបែកបាក់គ្នាខ្លះ (១ករ ១១,១៨-១៩; កាឡ ១,៦-៩; ១យហ ២,១៨-១៩)។ គ្រីស្តទូតប៉ូលស្តីបន្ទោសយ៉ាងខ្លាំងចំពោះអស់អ្នកដែលធ្វើឱ្យព្រះសហគមន៍បែកបាក់ (១ករ ១,១១; ១១,២២)។ នៅសតវត្សរ៍ក្រោយៗមកទៀត គ្រីស្តបរិស័ទក៏ខ្វែងគំនិតគ្នារឹតតែធ្ងន់ធ្ងរឡើងទៀត មានសហគមន៍ធំៗជាច្រើនបែកចេញពីការរួបរួមគ្នាយ៉ាងពេញលេញនៃព្រះសហគមន៍កាតូលិក។ ជួនកាល កំហុសមកពីមនុស្សក្នុងភាគីទាំងសងខាង។ បងប្អូនដែលកើតសព្វថ្ងៃក្នុងសហគមន៍ដែលបែកចេញទាំងនោះ ហើយដែលផ្ញើជីវិតលើព្រះគ្រីស្តមិនត្រូវចោទថា គេមានកំហុសដោយបាក់បែកនោះទេ។ ព្រះសហគមន៍កាតូលិកគោរព និងស្រឡាញ់គេក្នុងឋានៈជាបងប្អូន ដ្បិតអស់អ្នកដែលផ្ញើជីវិតលើព្រះគ្រីស្ត ហើយបានទទួលអគ្គសញ្ញាជ្រមុជទឹកយ៉ាងត្រឹមត្រូវ ទោះបីគេមិនរួបរួមយ៉ាងពេញលក្ខណៈជាមួយព្រះសហគមន៍កាតូលិកក្ដី ក៏គេរួបរួមម៉្យាងជាមួយគ្នាដែរ។ តាមពិតក្រុមគេ និងព្រះសហគមន៍កាតូលិកខ្វែងគំនិតគ្នាអំពីប្រការផ្សេងៗត្រង់លទ្ធិនៃជំនឿ ជួនកាលគេខ្វែងគំនិតគ្នាអំពីវិន័យ ជួនកាលគេខ្វែងគំនិតគ្នាអំពីរចនាសម្ពន្ធនៃព្រះសហគមន៍។ ការខ្វែងគំនិតទាំងនោះបង្កើតឧបសគ្គជាច្រើន ជួនកាលក្លាយជាឧបសគ្គធ្ងន់ធ្ងរ រារាំងមិនឱ្យគ្រីស្តបរិស័ទរួបរួមគ្នាយ៉ាងពេញលេញបាន។ ចលនាបង្រួបបង្រួមគ្រីស្តបរិស័ទឱ្យរួបរួមគ្នាជាធ្លុងតែមួយ មានគោលដៅពុះពារឧបសគ្គទាំងនោះ។ ទោះជាយ៉ាងណាក៏ដោយ ក៏បងប្អូនទាំងនោះពិតជាមនុស្សសុចរិតដោយគេផ្ញើជីវិតលើព្រះគ្រីស្ត និងទទួលអគ្គសញ្ញាជ្រមុជទឹក គេចូលរួមក្នុងព្រះកាយព្រះគ្រីស្ត គេក៏ពិតជាមានឈ្មោះថា ជាគ្រីស្តបរិស័ទដែរ។ សមាជិកនៃព្រះសហគមន៍កាតូលិកទទួលស្គាល់គេយ៉ាងត្រឹមត្រូវទុកជាបងប្អូនក្នុងព្រះអម្ចាស់។
មិនតែប៉ុណ្ណោះសោត ព្រះសហគមន៍ (ក្រុមជំនុំ) សាងឡើង និងមានជីវិតរស់រវើកដោយកត្តា និងគុណធម៌ផ្សេងៗភ្ជាប់គ្នា។ មានកត្តា និងគុណសម្បត្តិដ៏សំខាន់ៗបំផុតជាច្រើនស្ថិតនៅខាងក្រៅព្រះសហគមន៍កាតូលិកដែលមនុស្សមើលឃើញ គឺមានព្រះបន្ទូលរបស់ព្រះជាម្ចាស់ចែងជាលាយលក្ខណ៍អក្សរ មានជីវិតតាមព្រះហឫទ័យប្រណីសន្តោសរបស់ព្រះជាម្ចាស់ មានជំនឿ មានសេចក្តីសង្ឃឹម មានសេចក្តីស្រឡាញ់ មានព្រះអំណោយទានផ្សេងៗរបស់ព្រះវិញ្ញាណនៅក្នុងចិត្តគេ ព្រមទាំងមានកត្តាជាច្រើនផ្សេងៗទៀតដែលមនុស្សមើលឃើញបានផង។ គុណសម្បត្តិទាំងនេះសុទ្ធតែមកពីព្រះគ្រីស្ត និងណែនាំឱ្យទៅកាន់ព្រះអង្គ ហើយក៏ពិតជាគុណសម្បត្តិនៃព្រះសហគមន៍តែមួយគត់របស់ព្រះគ្រីស្តត្រឹមត្រូវតាមច្បាប់។
ក្នុងចំណោមបងប្អូនដែលបែកចេញពីយើង គេក៏តែងតែធ្វើពិធីជាច្រើនតាមគ្រីស្តសាសនា។ គេនាំគ្នាធ្វើពិធីទាំងនោះតាមរបៀបផ្សេងៗស្របតាមសភាពការណ៍ប្លែកៗរបស់ព្រះសហគមន៍ ឬសហគមន៍ (ក្រុមជំនុំ) នីមួយៗ។ ពិធីទាំងនោះពិតជាអាចផ្តល់ជីវិតតាមព្រះហឫទ័យប្រណីសន្តោសរបស់ព្រះជាម្ចាស់ដែរ។ យើងត្រូវទទួលស្គាល់ថា ពិធីទាំងនោះអាចនាំឱ្យគេចូលរួបរួមក្នុងការសង្គ្រោះផងដែរ។
ហេតុនេះហើយ ទោះបីយើងជឿថា ព្រះសហគមន៍ និងក្រុមជំនុំទាំងនោះដែលបាក់បែកចេញពីយើង ខ្វះសេចក្តីខ្លះក៏ដោយ ក៏យើងចាត់ទុកថា ព្រះសហគមន៍ និងក្រុមជំនុំទាំងនោះមានអត្ថន័យ និងមានប្រយោជន៍តាមគម្រោងការដ៏អស្ចារ្យនៃការសង្គ្រោះដែរ។ ព្រះវិញ្ញាណរបស់ព្រះគ្រីស្តសព្វព្រះហឫទ័យប្រើព្រះសហគមន៍ និងក្រុមជំនុំទាំងនោះទុកជាមធ្យោបាយនាំការសង្គ្រោះដល់មនុស្សលោក។ អានុភាពនៃការសង្គ្រោះនេះហូរចេញមកពីព្រះហឫទ័យប្រណីសន្តោសរបស់ព្រះជាម្ចាស់ និងសេចក្តីពិតដ៏ពេញលេញដែលព្រះគ្រីស្តបានផ្ញើទុកឱ្យព្រះសហគមន៍កាតូលិក។
ក៏ប៉ុន្តែ បងប្អូនដែលបែកចេញពីយើងទាំងនេះ ទោះម្នាក់ៗក្ដី ទោះជាក្រុមជំនុំ ឬព្រះសហគមន៍របស់គេក្តី ក៏គេមិនប្រកបដោយការរួបរួមដែលព្រះគ្រីស្តសព្វព្រះហឫទ័យចែកប្រទានឱ្យអស់អ្នកដែលព្រះអង្គបានបង្កើតជាថ្មីដែរ។ ព្រះអង្គបានផ្តល់ជីវិតឱ្យគេ ដើម្បីឱ្យគេទៅជាព្រះកាយតែមួយ ហើយបម្រុងនឹងបានជីវិតថ្មីតាមព្រះគម្ពីរ និងការបញ្ជូនបន្តនៃព្រះសហគមន៍បញ្ជាក់ស្រាប់។ មនុស្សលោកមានគ្រប់មធ្យោបាយ ដើម្បីទទួលការសង្គ្រោះដោយសារតែព្រះសហគមន៍កាតូលិករបស់ព្រះគ្រីស្តមួយគត់ គឺព្រះសហគមន៍ដែលជា “មធ្យោបាយសកលនៃការសង្គ្រោះ”។ យើងជឿថា ព្រះអម្ចាស់បានផ្ញើទុកគុណសម្បត្តិដ៏បរិបូរណ៍លើសលប់នៃសម្ពន្ធមេត្រីថ្មីទៅក្រុមគ្រីស្តទូតតែមួយគត់ ដែលមានគ្រីស្តទូតសិលាជាប្រធាន ដើម្បីតែងតាំងព្រះកាយតែមួយគត់របស់ព្រះគ្រីស្តនៅលើផែនដីនេះ។ អស់អ្នកដែលភ្ជាប់នឹងប្រជារាស្ត្ររបស់ព្រះជាម្ចាស់តាមរបៀបម្យ៉ាងរួចហើយ ក៏ត្រូវរួបរួមក្នុងព្រះកាយនេះយ៉ាងពេញលេញដែរ។ ពេលប្រជារាស្រ្តនេះកំពុងតែធ្វើបូជនីយេសចរនៅលើផេនដីនេះ ទោះបីសមាជិកតែងតែប្រព្រឹត្តអំពើបាបក៏ដោយ ក៏ប្រជារាស្រ្តនៅតែចម្រើនឡើងក្នុងអង្គព្រះគ្រីស្តដែរ ដោយមានព្រះជាម្ចាស់ណែនាំយ៉ាងទន់ភ្លន់ តាមព្រះអង្គគ្រោងទុកយ៉ាងអាថ៌កំបាំង រហូតដល់ពេលគេទទួលសិរីរុងរឿងយ៉ាងពេញលេញអស់កល្បជានិច្ចនៅក្នុងក្រុងយេរូសាឡឹមនៃលោកខាងមុខ។
៤- អំពីចលនាបង្រួបបង្រួមគ្រីស្តបរិស័ទឱ្យរួបរួមគ្នាជាធ្លុងតែមួយ
សព្វថ្ងៃ នៅច្រើនកន្លែងក្នុងពិភពលោក ដោយមានព្រះវិញ្ញាណដ៏វិសុទ្ធប្រណីសន្តោស គ្រីស្តបរិស័ទមួយចំនួនធំខិតខំអធិដ្ឋាន និយាយសន្ទនាគ្នា និងធ្វើការរួមជាមួយគ្នា ដើម្បីឱ្យរួបរួមគ្នាយ៉ាងពេញលក្ខណៈតាមព្រះហឫទ័យព្រះយេស៊ូគ្រីស្ត។ ហេតុនេះហើយ បានជាមហាសន្និបាតដាស់តឿនគ្រីស្តបរិស័ទកាតូលិកទាំងអស់ឱ្យទទួលស្គាល់សញ្ញាសម្គាល់នៃកាលៈទេសៈ និងឱ្យចូលរួមយ៉ាងសកម្មក្នុងការខិតខំបង្រួបបង្រួមគ្រីស្តបរិស័ទជាធ្លុងតែមួយនេះ។
ពេលយើងនិយាយថា “ចលនាបង្រួបបង្រួម” នេះ យើងយល់ដល់កិច្ចការទាំងប៉ុន្មានដែលគ្រីស្តបរិស័ទចាប់ផ្តើមធ្វើដោយមានគំនិតផ្ទាល់ ឬការដែលព្រះសហគមន៍ ឬក្រុមជំនុំនានាចាត់ចែងដើម្បីជួយឱ្យគ្រីស្តបរិស័ទរួបរួមគ្នាជាធ្លុងតែមួយ ស្របតាមសេចក្តីត្រូវការប្លែកៗនៃព្រះសហគមន៍ និងតាមសភាពការណ៍នៃកាលៈទេសៈផងដែរ។ ដូច្នេះ មុនដំបូងត្រូវខិតខំបំបាត់ចោលនូវពាក្យសម្តី នូវការវិនិច្ឆ័យ និងយោបល់ ព្រមទាំងនូវកិច្ចការដែលមិនត្រឹមត្រូវតាមសភាពការណ៍របស់បងប្អូនដែលបែកបាក់ទាំងនោះ គឺមិនស្របតាមសេចក្តីពិត និងមិនស្របតាមយុត្តិធម៌ដែរ។ ពាក្យសម្តី ការវិនិច្ឆ័យ និងយោបល់ កិច្ចការទាំងនោះបណ្តាលឱ្យការទាក់ទងជាមួយបងប្អូនរឹតតែពិបាក។ បន្ទាប់មក នៅពេលគ្រីស្តបរិស័ទរបស់ព្រះសហគមន៍ និងក្រុមជំនុំនានាចាត់ចែងការប្រជុំតាមគោលគំនិតចង់គោរពព្រះជាម្ចាស់ត្រូវមាន “អ្នកជំនាញការ” ដែលស្គាល់សេចក្តីទាំងនេះយ៉ាងល្អិតល្អន់ ណែនាំការសន្ទនាគ្នា គឺម្នាក់ៗរៀបរាប់យ៉ាងក្បោះក្បាយនូវលទ្ធិសហគមន៍ ឬក្រុមជំនុំរបស់ខ្លួន ព្រមទាំងបញ្ជាក់លក្ខណៈផ្ទាល់របស់សហគមន៍ ឬក្រុមជំនុំរបស់ខ្លួននោះទៀតផង។ ដោយមានការសន្ទនាបែបនេះ គ្រីស្តបរិស័ទទាំងអស់មុខជានឹងស្គាល់សេចក្តីដែលនិកាយនីមួយៗបង្រៀន និងរបៀបរស់នៅរបស់គេឱ្យបានច្បាស់ ព្រមទាំងវាយតម្លៃឱ្យបានត្រឹមត្រូវជាងមុនទៅទៀត។ និកាយនីមួយៗក៏នាំគ្នារួមសហការកាន់តែច្រើនឡើងៗក្នុងគ្រប់វិស័យ តាមមនសិការគ្រីស្តបរិស័ទទាមទារដើម្បីជាប្រយោជន៍រួម។ ជួនកាលគ្រីស្តបរិស័ទក៏អាចរួមគ្នាអធិដ្ឋានដោយមានចិត្តថ្លើមតែមួយដែរ។ មិនតែប៉ុណ្ណោះសោត គ្រីស្តបរិស័ទទាំងអស់ត្រូវពិនិត្យពិច័យខ្លួនឯងអំពីសេចក្តីស្មោះត្រង់របស់ខ្លួនចំពោះព្រះហឫទ័យរបស់ព្រះគ្រីស្ត និងចំពោះព្រះសហគមន៍។ គេក៏ត្រូវខិតខំកែតម្រង់និកាយរបស់ខ្លួនឱ្យកាន់តែប្រសើរឡើងៗដោយឥតឈប់ឈរតាមសេចក្តីត្រូវការ។
ប្រសិនបើគ្រីស្តបរិស័ទកាតូលិកប្រព្រឹត្តការទាំងនោះដោយប្រុងប្រយ័ត្ន និងដោយចិត្តអត់ធ្មត់ក្រោមការណែនាំរបស់គង្វាលរបស់ខ្លួន គេមុខជានឹងជួយឱ្យយុត្តិធម៌ និងសេចក្តីពិតចម្រើនឡើង ជួយឱ្យគ្រីស្តបរិស័ទស្រុះស្រួលគ្នា និងសហការគ្នា ព្រមទាំងជួយឱ្យគេស្រឡាញ់គ្នាទុកជាបងប្អូន និងរួបរួមគ្នាទៀតផង។ បន្តិចម្តងៗដោយប្រព្រឹត្តតាមវិធីនេះ គ្រីស្តបរិស័ទនឹងអាចពុះពារឈ្នះឧបសគ្គនានា ដែលរារាំងមិនឱ្យរួបរួមគ្នាយ៉ាងពេញលេក្ខណៈជាសហគមន៍បាន។ ក្រោយមក គ្រីស្តបរិស័ទទាំងអស់មុខជានឹងរួបរួមគ្នាធ្វើពិធីអរព្រះគុណតែមួយគត់ ដោយរួមគ្នាជាព្រះសហគមន៍តែមួយគត់ពុំខាន។ ព្រះគ្រីស្តបានប្រទានការរួបរួមគ្នាបែបនេះឱ្យព្រះសហគមន៍របស់ព្រះអង្គតាំងពីដើមរៀងមក។ យើងជឿថា ការរួបរួមគ្នានេះស្ថិតនៅក្នុងព្រះសហគមន៍កាតូលិកមិនអាចបាត់បង់បានឡើយ។ យើងក៏សង្ឃឹមថា ការរួបរួមគ្នានេះមុខជាចម្រើនឡើងជារៀងរាល់ថ្ងៃជាលំដាប់រហូតដល់អវសានកាលនៃពិភពលោក។
ការរៀបចំ និងការសម្រុះសម្រួលបុគ្គលម្នាក់ៗដែលចង់រួបរួមយ៉ាងពេញលេញជាមួយព្រះសហគមន៍កាតូលិក ជាក់ច្បាស់មានលក្ខណៈប្លែកពីចលនាបង្រួបបង្រួមនិកាយនានាឱ្យរួបរួមគ្នាជាធ្លុងតែមួយ។ ប៉ុន្តែ កិច្ចការទាំងពីរនោះមិនទាស់គ្នាទេ ព្រោះកិច្ចការទាំងពីរមកពីព្រះជាម្ចាស់ចាត់ចែងតាមរបៀបគួរឱ្យសរសើរ។
ក្នុងកិច្ចការបង្រួបបង្រួមគ្រីស្តបរិស័ទឱ្យរួបរួមគ្នាជាធ្លុងតែមួយនោះ គ្រីស្តបរិស័ទនៃព្រះសហគមន៍កាតូលិកត្រូវតែស្រឡាញ់បងប្អូនដែលបែកបាក់ទាំងនោះដោយមិនរួញរាឡើយ។ ត្រូវតែអង្វរព្រះជាម្ចាស់ឱ្យគេ និយាយជាមួយគេអំពីសេចក្តីផ្សេងៗដែលពាក់ព័ន្ធនឹងព្រះសហគមន៍។ ត្រូវសុខចិត្តទៅរកគេ មុនពួកគេមករកយើង។ ជាពិសេស ត្រូវយកចិត្តទុកដាក់ចាប់អារម្មណ៍ដោយចិត្តស្មោះអំពីអ្វីៗទាំងអស់ដែលត្រូវកែតម្រង់ឱ្យបានថ្មី ក្នុងមហាគ្រួសារកាតូលិកផ្ទាល់ ដើម្បីឱ្យរបៀបរស់នៅរបស់ព្រះសហគមន៍ផ្តល់សក្ខីភាពកាន់តែត្រឹមត្រូវ និងកាន់តែច្បាស់អំពីលទ្ធិ និងអំពីរចនាសម្ព័ន្ធដែលព្រះគ្រីស្តបានបញ្ជូនបន្តមកតាមរយៈក្រុមគ្រីស្តទូត។
ទោះបីព្រះសហគមន៍កាតូលិកបានទទួលសេចក្តីពិតដែលព្រះជាម្ចាស់បានសម្តែងឱ្យមនុស្សលោកស្គាល់ក្ដី ហើយទោះបីព្រះសហគមន៍កាតូលិកបានទទួលគ្រប់មធ្យោបាយនៃព្រះហឫទ័យប្រណីសន្តោសរបស់ព្រះជាម្ចាស់ក្ដី ក៏សមាជិកនៃព្រះសហគមន៍មិនរស់នៅដោយមានចិត្តស្រឡាញ់ព្រះជាម្ចាស់យ៉ាងខ្លាំងទាំងអស់គ្នា ដូចគេត្រូវស្រឡាញ់នោះទេ។ ហេតុនេះហើយ បានជាមុខនៃព្រះសហគមន៍មិនចាំងពន្លឺឱ្យបានច្បាស់នៅលើបងប្អូនដែលបែកបាក់នោះ និងនៅលើមនុស្សលោកទាំងមូលទេ។ គេក៏រារាំងព្រះរាជ្យព្រះជាម្ចាស់មិនឱ្យចម្រើនឡើងដែរ។ ហេតុនេះ គ្រីស្តបរិស័ទកាតូលិកទាំងអស់ត្រូវខិតខំតម្រង់ខ្លួនឱ្យទៅជាគ្រីស្តបរិស័ទពេញលក្ខណៈ (យក ១,៤; រម ១២,១-២)។ ក្នុងរូបកាយរបស់ខ្លួន ព្រះសហគមន៍រួមជាមួយព្រះគ្រីស្តជាមនុស្សសុភាពរាបសាដែលតែងតែស្លាប់ (២ករ ៤,១០; ភីល ២,៥-៨)។ ហេតុនេះ ម្នាក់ៗតាមកន្លែងរបស់ខ្លួនត្រូវខិតខំនាំឱ្យព្រះសហគមន៍ជម្រះខ្លួន និងប្រែឱ្យបានជាថ្មី ជារៀងរាល់ថ្ងៃ ទម្រាំដល់ពេលព្រះគ្រីស្តលើកព្រះសហគមន៍នេះប្រកបដោយសិរីរុងរឿង ឥតសៅហ្មង ឥតជ្រៀវជ្រួញមកថ្វាយព្រះអង្គ (អភ ៥,២៧)។
គ្រីស្តបរិស័ទទាំងអស់ក្នុងព្រះសហគមន៍ត្រូវរក្សាទុកការរួបរួមគ្នាត្រង់សេចក្តីទាំងប៉ុន្មានដ៏ចំាបាច់ គឺម្នាក់ៗតាមមុខងាររៀងៗខ្លួន។ ប៉ុន្តែ គ្រីស្តបរិស័ទទាំងអស់ក៏ត្រូវរក្សាទុកសិទ្ធិសេរីភាពដ៏ត្រឹមត្រូវចំពោះរបៀបរស់នៅប្លែកៗពីគ្នាតាមព្រះវិញ្ញាណ និងតាមក្បួនវិន័យរបស់គេចំពោះរបៀបធ្វើពិធីបុណ្យប្លែកៗពីគ្នា សូម្បីតែចំពោះការកសាងទេវវិទ្យាដោយរិះគិតអំពីសេចក្តីពិតដែលព្រះជាម្ចាស់បានសម្តែងមក ក៏ត្រូវទុកសេរីភាពឱ្យគេដែរ។ ប៉ុន្តែ ត្រូវមានចិត្តស្រឡាញ់ក្នុងគ្រប់កិច្ចការទាំងអស់។ ធ្វើដូច្នេះ គ្រីស្តបរិស័ទទាំងអស់នឹងបង្ហាញឱ្យកាន់តែច្បាស់ឡើងៗនូវលក្ខណៈ “កាតូលិក” (គឺ “សកល”) និងស្របតាមជំនឿរបស់ក្រុមគ្រីស្តទូតរបស់ព្រះសហគមន៍។
ម្យ៉ាងវិញទៀត គ្រីស្តបរិស័ទកាតូលិកត្រូវតែអរសប្បាយជាចាំបាច់ដោយទទួលស្គាល់ និងរាប់រកសេចក្តីដ៏ល្អត្រឹមត្រូវដែលមានលក្ខណៈគ្រីស្តសាសនាហូរមកពីបេតិកភ័ណ្ឌរួម ហើយដែលបងប្អូនបែកចេញពីយើងធ្លាប់កាន់តាមនោះ។ ត្រូវតែទទួលស្គាល់គុណសម្បត្តិរបស់ព្រះគ្រីស្ត និងឫទ្ធានុភាពរបស់ព្រះអង្គកំពុងមានសកម្មភាពក្នុងការរស់នៅរបស់អស់អ្នកដែលផ្តល់សក្ខីភាពថ្វាយព្រះគ្រីស្ត ជួនកាលរហូតដល់បូជាជីវិតទៀតផង។ ការទទួលស្គាល់សេចក្តីទាំងនោះពិតជាត្រឹមត្រូវ ហើយនាំការសង្គ្រោះទៀតផង ដ្បិតមនុស្សត្រូវតែស្ញប់ស្ញែងចំពោះព្រះជាម្ចាស់ជានិច្ច គឺត្រូវស្ញប់ស្ញែងព្រះអង្គដោយឃើញស្នាព្រះហស្តរបស់ព្រះអង្គដែរ។
យើងក៏មិនត្រូវបំភ្លេចថា អ្វីៗដែលព្រះវិញ្ញាណដ៏វិសុទ្ធប្រណីសន្តោសសម្រេចក្នុងបងប្អូនដែលបែកចេញពីយើង ក៏អាចជួយអប់រំកសាងយើងដែរ។ អ្វីៗដែលពិតជាមានលក្ខណៈតាមគ្រីស្តសាសនាមិនដែលជំទាស់នឹងតម្លៃដ៏ថ្លៃថ្នូរ និងដ៏ពិតប្រាកដនៃជំនឿទេ ដ្បិតអ្វីៗទាំងនោះអាចជួយឱ្យយើងទៅដល់គម្រោងការដ៏អស្ចារ្យរបស់ព្រះគ្រីស្ត និងរបស់ព្រះសហគមន៍ឱ្យបានកាន់តែពេញលេញឡើង។
ក៏ប៉ុន្តែ ដោយគ្រីស្តបរិស័ទបែកបាក់គ្នាដូច្នេះ គេរារាំងព្រះសហគមន៍មិនឱ្យមានលក្ខណៈកាតូលិក ជាលក្ខណៈរបស់ខ្លួនផ្ទាល់ឱ្យបានពេញលេញក្នុងអស់អ្នកដែលជាកូនចៅរបស់ខ្លួនដោយសារអគ្គសញ្ញាជ្រមុជទឹក តែដែលបែកចេញពីការរួបរួមដ៏ពេញលេញទៅហើយ។ មិនតែប៉ុណ្ណោះសោត ព្រះសហគមន៍ផ្ទាល់ក៏ពិបាកបង្ហាញគ្រប់វិស័យនៃលក្ខណៈកាតូលិករបស់ខ្លួនយ៉ាងពេញលេញបាន ក្នុងការរស់នៅរបស់មនុស្សលោកដែរ។
មហាសន្និបាតមានអំណរសប្បាយដោយកត់សម្គាល់ថា មានគ្រីស្តបរិស័ទកាតូលិកកាន់តែច្រើនឡើងៗចូលរួមក្នុងចលនាបង្រួបបង្រួមគ្រីស្តបរិស័ទឱ្យរួបរួមគ្នាជាធ្លុងតែមួយ។ មហាសន្និបាតក៏សូមផ្ញើចលនានោះឱ្យអស់លោកអភិបាលនៅលើផែនដីទាំងមូល សូមអស់លោកយកចិត្តទុកដាក់លើកស្ទួយចលនានេះ ព្រមទាំងណែនាំចលនានោះដោយត្រិះរិះពិចារណាផង។
ជំពូក២
ការប្រតិបត្តិតាមចលនាបង្រួបបង្រួម
គ្រីស្តបរិស័ទឱ្យរួបរួមគ្នាជាធ្លុងតែមួយ
៥- ព្រះសហគមន៍ទាំងមូល ទាំងគង្វាល ទាំងគ្រីស្តបរិស័ទធម្មតាត្រូវតែយកចិត្តទុកដាក់នាំឱ្យគ្រីស្តបរិស័ទទាំងអស់រួបរួមគ្នាជាធ្លុងតែមួយ ដោយការរស់នៅជារៀងរាល់ថ្ងៃ ឬដោយស្រាវជ្រាវទេវវិទ្យា និងប្រវត្តិសាស្រ្ត គឺម្នាក់ៗតាមសមត្ថភាពរៀងៗខ្លួន។ ការយកចិត្តទុកដាក់បែបនេះបង្ហាញចំណងម៉្យាងរបស់គ្រីស្តបរិស័ទជាបងប្អូន ហើយអាចបណ្តោយឱ្យគេរួបរួមគ្នាយ៉ាងពេញលេញ និងពេញលេក្ខណៈតាមព្រះជាម្ចាស់អាណិតមេត្តា។
៦- ការកែសម្រួលព្រះសហគមន៍ឱ្យបានជាថ្មី
ព្រះសហគមន៍កែសម្រួលជាថ្មីមានអត្ថន័យជាអាទិ៍ថា ព្រះសហគមន៍ត្រូវតែស្មោះនឹងព្រះជាម្ចាស់ដែលត្រាស់ហៅគេ។ កម្លាំងនៃចលនាបង្រួបបង្រួមគ្រីស្តបរិស័ទឱ្យរួបរួមគ្នាជាធ្លុងតែមួយ អាស្រ័យតែលើការកែសម្រួលបែបនោះ។ នៅពេលសហគមន៍ធ្វើបូជនីយេសចររបស់ខ្លួននៅលើផែនដីនេះ ព្រះគ្រីស្តត្រាស់ហៅព្រះសហគមន៍ឱ្យកែសម្រួលជាថ្មីជាអចិន្រៃ្តយ៍ ពីព្រោះព្រះសហគមន៍ជាស្ថាប័នដែលមានលក្ខណៈជាមនុស្សលោកីយ៍។ ហេតុនេះហើយ បានជាតាមកាលៈទេសៈ ប្រហែលព្រះសហគមន៍មិនសូវបានប្រយ័ត្នប្រយែងត្រង់ប្រការខ្លះៗអំពីសីលធម៌ អំពីក្បួនវិន័យក្រុមបូជាចារ្យ សូម្បីតែអំពីរបៀបចែងលទ្ធិនៃគ្រីស្តសាសនា (ដែលប្លែកពីបញ្ញើនៃជំនឿដែលព្រះគ្រីស្តផ្ញើទុកនោះ) ត្រូវកែសម្រួលឱ្យបានល្អក្នុងរយៈពេល និងតាមរបៀបដ៏សមរម្យដែរ។
ហេតុនេះ ការកែព្រះសហគមន៍ជាថ្មីនោះពិតជាមានប្រយោជន៍ដ៏ខ្ពង់ខ្ពស់បំផុតក្នុងចលនាបង្រួបបង្រួមគ្រីស្តបរិស័ទឱ្យរួបរួមគ្នាជាធ្លុងតែមួយ។ ព្រះសហគមន៍កំពុងតែកែសម្រួលជាថ្មីបែបនេះតាមវិស័យផ្សេងៗនៃការរស់នៅរបស់ខ្លួន គឺតាមចលនាសិក្សាព្រះគម្ពីរ និងពិធីគោរពប្រណិប័តន៍តាមរបៀបធ្វើពិធីអត្ថាធិប្បាយគម្ពីរ តាមរបៀបអប់រំជំនឿ តាមរបៀបគ្រីស្តបរិស័ទបំពេញកិច្ចការជាគ្រីស្តទូត តាមរបៀបបព្វជិតបព្វជិតារស់នៅជាថ្មីជាច្រើនយ៉ាង តាមរបៀបគូស្វាមីភរិយារស់នៅស្របតាមព្រះវិញ្ញាណ តាមលទ្ធិ និងសកម្មភាពរបស់ព្រះសហគមន៍អំពីសង្គមកិច្ច។ល។ ត្រូវរាប់ការកែសម្រួលទាំងនោះទុកជាសក្ខីភាព និងទុកជាសញ្ញាសម្គាល់ផ្តល់ដំណឹងថា ចលនាបង្រួបបង្រួមគ្រីស្តបរិស័ទមុខជានឹងចម្រើនឡើងជាលំដាប់លំដោយនៅពេលអនាគតពុំខាន។
៧- ត្រូវប្រែចិត្តគំនិត
មានចលនាបង្រួបបង្រួមគ្រីស្តបរិស័ទឱ្យរួបរួមគ្នាជាធ្លុងតែមួយយ៉ាងពិតប្រាកដ លុះត្រាគ្រីស្តបរិស័ទប្រែចិត្តគំនិត។ បំណងប្រាថ្នាចង់ឱ្យគ្រីស្តបរិស័ទរួបរួមគ្នាជាធ្លុងតែមួយហូរមក និងចម្រើនឡើងពីគ្រីស្តបរិស័ទប្រែចិត្តគំនិត សុខចិត្តលះបង់ប្រយោជន៍ផ្ទាល់ខ្លួន បង្ហាញសេចក្តីស្រឡាញ់ដោយសេរី។ ហេតុនេះ ត្រូវតែអង្វរព្រះវិញ្ញាណដ៏វិសុទ្ធ សូមព្រះអង្គប្រណីសន្តោសឱ្យយើងលះបង់ខ្លួនឯងយ៉ាងស្មោះ មានចិត្តសុភាពរាបសា បម្រើអ្នកដទៃដោយចិត្តស្លូតបូត មានចិត្តទូលំទូលាយចំពោះអ្នកដទៃដូចជាចំពោះបងប្អូន។ គ្រីស្តទូតប៉ូលជាសាសនទូតដែលបានប្រកាសដំណឹងល្អដល់មនុស្សគ្រប់ជាតិសាសន៍ចែងថា៖ “ខ្ញុំដែលជាប់ឃុំឃាំង សូមដាស់តឿនបងប្អូនក្នុងព្រះនាមព្រះអម្ចាស់ថា ដោយព្រះជាម្ចាស់បានត្រាស់ហៅបងប្អូន ចូររស់នៅឱ្យបានសមរម្យនឹងការត្រាស់ហៅនោះទៅ។ ចូរបន្ទាបខ្លួន ចូរមានចិត្តស្លូតបូត និងចេះអត់ធ្មត់ ព្រមទាំងទ្រាំទ្រគ្នាទៅវិញទៅមកដោយសេចក្តីស្រឡាញ់។ ចូរយកចិត្តទុកដាក់រក្សាការរួបរួមគ្នាដែលមកពីព្រះវិញ្ញាណ ដោយយកសេចក្តីសុខសាន្តធ្វើជាចំណងប្រាស្រ័យទាក់ទងគ្នា” (អភ ៤,១-៣)។ ពាក្យដាស់តឿននេះសំដៅយ៉ាងពិសេសចំពោះអស់អ្នកដែលទទួលអគ្គសញ្ញាតែងតាំងជាអ្នកបម្រើព្រះសហគមន៍ ដោយមានគោលបំណងបន្តបេសកកម្មរបស់ព្រះគ្រីស្ត គឺរបស់ព្រះអង្គដែលយាងមកក្នុងលោកនេះ “មិនមែនដើម្បីឱ្យគេបម្រើលោកទេ គឺលោកមកបម្រើគេវិញ” (មថ ២០,២៨)។
ពេលយើងគិតពីអំពើបាបនៃការបាក់បែកគ្នា យើងអាចនឹកដល់សក្ខីភាពរបស់គ្រីសទូតយ៉ូហានដែលមានប្រសាសន៍ថា៖ “ប្រសិនបើយើងពោលថា យើងគ្មានបាបសោះនោះ ដូចជាយើងចោទថា ព្រះជាម្ចាស់កុហកទៅវិញ ហើយព្រះបន្ទូលរបស់ព្រះអង្គមិនស្ថិតនៅក្នុងខ្លួនយើងទេ” (១យហ ១,១០)។ ហេតុនេះ យើងត្រូវទូលអង្វរដោយចិត្តសុភាពរាបសា សូមព្រះជាម្ចាស់ និងបងប្អូនដែលបែកចេញពីយើងអត់ទោសឱ្យយើង ដូចយើងអត់ទោសឱ្យអស់អ្នកដែលប្រព្រឹត្តខុសនឹងយើងដូច្នោះដែរ។
សូមគ្រីស្តបរិស័ទទាំងអស់នឹកចាំថា ប្រសិនបើគេយកចិត្តទុកដាក់ខិតខំរស់នៅតាមដំណឹងល្អកាន់តែបរិសុទ្ធឡើងៗ គេមុខជានឹងជួយ ហើយក៏ធ្វើឱ្យគ្រីស្តបរិស័ទរួបរួមគ្នាជាធ្លុងតែមួយ។ គេរួបរួមគ្នាជាមួយព្រះបិតា ជាមួយព្រះបន្ទូល និងជាមួយព្រះវិញ្ញាណដ៏វិសុទ្ធយ៉ាងជិតស្និទ្ធឡើងយ៉ាងណា គេក៏មុខជានឹងអាចនាំឱ្យគ្រីស្តបរិស័ទរស់នៅដូចបងប្អូនយ៉ាងជិតស្និទ្ធ និងស្រួលយ៉ាងនោះដែរ។
៨- ត្រូវរួមគ្នាអធិដ្ឋាន
ត្រូវចាត់ទុកថា ការប្រែចិត្តគំនិត និងការរស់នៅបែបវិសុទ្ធយ៉ាងនេះរួមជាមួយពិធីអធិដ្ឋានជាសាធារណៈ និងពាក្យអធិដ្ឋានម្នាក់ៗ ពិតជាដួងព្រលឹងនៃចលនាបង្រួបបង្រួមគ្រីស្តបរិស័ទឱ្យរួបរួមគ្នាជាធ្លុងតែមួយមែន។ យើងក៏អាចហៅការទាំងនោះយ៉ាងត្រឹមត្រូវថា ជាចលនាបង្រួបបង្រួមគ្រីស្តបរិស័ទខាងព្រះវិញ្ញាណ។
គ្រីស្តបរិស័ទកាតូលិកចូលចិត្តជួបជុំគ្នាជាញឹកអង្វរព្រះជាម្ចាស់ សូមព្រះអង្គប្រោសឱ្យព្រះសហគមន៍រួបរួមគ្នាជាធ្លុងតែមួយ គឺអង្វរព្រះអង្គសាជាថ្មីតាមរបៀបព្រះអម្ចាស់ទទូចអង្វរព្រះបិតានៅថ្ងៃមុនចូលទិវង្គតថា “សូមឱ្យគេទាំងអស់គ្នារួមជាអង្គតែមួយ” (យហ ១៧,២១)។
ក្នុងសភាពការណ៍ពិសេសខ្លះ ឧប.ក្នុងឱកាសពិធីអធិដ្ឋានចាត់ចែង “សម្រាប់ឱ្យគ្រីស្តបរិស័ទរួបរួមគ្នា” និងក្នុងឱកាសអង្គប្រជុំចលនាបង្រួបបង្រួមគ្រីស្តបរិស័ទ គ្រីស្តបរិស័ទកាតូលិកមានសិទិ្ធ ហើយក៏ត្រូវអង្វរព្រះជាម្ចាស់រួមជាមួយបងប្អូនដែលបែកចេញទៅ។ ពិធីទទូចអង្វររួមបែបនេះពិតជាមធ្យោបាយដ៏ស័ក្ដិសិទ្ធ សូមព្រះជាម្ចាស់ប្រណីសន្តោសឱ្យគ្រីស្តបបរិស័ទរួបរួមគ្នាជាធ្លុងតែមួយមែន។ ម៉្យាងវិញទៀត ពិធីអង្វររួមទាំងនោះបង្ហាញយ៉ាងជាក់ច្បាស់នូវចំណងនានារបស់គ្រីស្តបរិស័ទកាតូលិក ដែលនៅតែរួមជាមួយបងប្អូនដែលបែកចេញទៅ “ដ្បិតនៅទីណាមានពីរ ឬបីនាក់ជួបជុំគ្នាក្នុងនាមខ្ញុំ ខ្ញុំក៏ស្ថិតនៅទីនោះជាមួយគេដែរ” (មថ ១៨,២០)។
ប៉ុន្តែ គ្រីស្តបរិស័ទកាតូលិកគ្មានសិទ្ធិចាត់ “ការរួបរួមធ្វើពិធីដ៏សក្ការៈជាមួយគ្នា” ទុកជាមធ្យោបាយអាចប្រើបានដោយគ្មានរិះគិតពិចារណា ដើម្បីឱ្យគ្រីស្តបរិស័ទរួបរួមគ្នាជាធ្លុងតែមួយឡើងវិញបានទេ។ មានគោលការណ៍ពីរយ៉ាងណែនាំ “ការរួបរួមធ្វើពិធីដ៏សក្ការៈជាមួយគ្នា” នោះ គឺការរួបរួមធ្វើពិធីនោះត្រូវសម្តែងថា ព្រះសហគមន៍រួបរួមជាធ្លុងតែមួយមែន។ គោលការណ៍ទីពីរ គឺណែនាំអ្នកចូលរួមឱ្យទទួលចំណែកនៃមធ្យោបាយព្រះជាម្ចាស់ប្រណីសន្តោសមនុស្សលោក។ តាមធម្មតា “ការរួបរួមធ្វើពិធីដ៏សក្ការៈជាមួយគ្នា” មិនអាចធ្វើបាន ព្រោះពិធីនោះមិនបង្ហាញការរួបរួមជាធ្លុងតែមួយទេ។ តែជួនកាល បើគិតពីព្រះហឫទ័យប្រណីសន្តោសរបស់ព្រះជាម្ចាស់ ត្រូវរួបរួមធ្វើពិធីដ៏សក្ការៈវិញ។ ចំពោះរបៀបប្រតិបត្តិយ៉ាងជាក់ច្បាស់ ត្រូវនឹកគិតដល់សភាពការណ៍របស់ទីកន្លែងនៃកាលៈទេសៈ និងរបស់បុគ្គលនានា។ លោកអភិបាលភូមិភាគត្រូវផ្តល់សេចក្តីណែនាំដោយប្រុងប្រយ័ត្នសម្រាប់ចាត់ចែងពិធីនោះ លើកលែងតែក្រុមអភិបាលក្នុងប្រទេសចាត់ចែងតាមរបៀបផ្សេង ស្របតាមលក្ខន្តិកៈក្រុមនោះផ្ទាល់ ឬតាមសន្តៈអាសនៈចាត់ចែងដែរ។
៩- គ្រីស្តបរិស័ទគ្រប់និកាយត្រូវស្គាល់គ្នាទៅវិញទៅមក
ត្រូវស្គាល់ចិត្តគំនិតរបស់បងប្អូនដែលបែកចេញពីយើង។ ហេតុនេះ ត្រូវសិក្សាដើម្បីស្គាល់ចិត្តគំនិតគេ ប៉ុន្តែ ត្រូវសិក្សាដោយចិត្តស្មោះ និងដោយចិត្តមេត្តាករុណា។ គ្រីស្តបរិស័ទកាតូលិកខ្លះត្រូវរៀបចំខ្លួនយ៉ាងសមរម្យជាមុនសិន ទើបសិក្សាឱ្យមានចំណេះចេះដឹងកាន់តែច្បាស់អំពីលទ្ធិ និងអំពីប្រវត្តិសាស្រ្តនិកាយនីមួយៗ អំពីការរស់នៅតាមព្រះវិញ្ញាណ និងអំពីវប្បធម៌របស់គេ អំពីមតិខាងសាសនា និងអំពីវប្បធម៌ផ្ទាល់របស់បងប្អូនទាំងនោះ។ គ្រីស្តបរិស័ទក៏អាចជួយឱ្យមានចំណេះចេះដឹងបែបនេះដោយចាត់ចែងប្រជុំចម្រុះគ្នាបានដែរ។ អ្នកចូលរួមត្រូវមានសមត្ថភាពយ៉ាងពិតប្រាកដ ហើយត្រូវរិះគិតជាពិសេសអំពីបញ្ហាទេវវិទ្យា ដោយភាគីទាំងអស់មានសិទ្ធិស្មើគ្នាក្រោមការប្រុងប្រយ័ត្នរបស់អភិបាលទាំងឡាយ។ ការសន្ទនាបែបនោះមុខជាបណ្ដោយឱ្យគោលជំហរដ៏ពិតប្រាកដរបស់ព្រះសហគមន៍កាតូលិកលេចធ្លោភ្លឺកាន់តែច្បាស់ឡើងៗ។ តាមរបៀបនេះ យើងក៏ស្គាល់គោលគំនិតបងប្អូនដែលបែកចេញកាន់តែច្បាស់ ហើយយើងក៏អាចបង្ហាញលទ្ធិជំនឿរបស់យើងកាន់តែសមរម្យដែរ។
១០- ការអប់រំអំពីចលនាបង្រួបបង្រួមគ្រីស្តបរិស័ទ
ត្រូវបង្រៀនទេវវិទ្យា និងវិទ្យាឯទៀតៗ ជាពិសេស ប្រវត្តិសាស្រ្តស្របតាមតាមគំនិតនៃចលនាបង្រួបបង្រួមគ្រីស្តបរិស័ទ ដើម្បីឱ្យតបឆ្លើយយ៉ាងត្រឹមត្រូវស្របតាមសេចក្តីពិត។
អស់លោកដែលត្រៀមខ្លួនទៅជាអភិបាល និងជាបូជាចារ្យ ត្រូវយល់ច្បាស់អំពីទេវវិទ្យាដែលបានរិះគិតតាមបែបនោះជាចាំបាច់បំផុត ជាពិសេស ត្រូវសិក្សាអំពីបញ្ហាដែលមានពាក់ព័ន្ធនឹងទំនាក់ទំនងរវាងបងប្អូនដែលបែកចេញជាមួយព្រះសហគមន៍កាតូលិក។ ប៉ុន្តែត្រូវសិក្សា មិនមែនតាមបែបជជែកដេញដោលគ្នាសោះឡើយ។
គ្រីស្តបរិស័ទធម្មតា និងបព្វជិតបព្វជិតាទទួលការបង្រៀន និងការអប់រំឱ្យរស់នៅតាមព្រះវិញ្ញាណ ពិតជាការដ៏ចាំបាច់។ តែការបង្រៀន និងអប់រំនោះអាស្រ័យយ៉ាងពិសេសទៅលើការអប់រំរបស់អស់បូជាចារ្យ។
គ្រីស្តបរិស័ទជាសាសនាទូតធ្វើការនៅប្រទេសដែលមានគ្រីស្តបរិស័ទនិកាយផ្សេងៗធ្វើការដែរ ក៏ត្រូវស្គាល់បញ្ហាចោទឡើងដោយចលនាបង្រួបបង្រួមក្នុងកិច្ចការរបស់ខ្លួនជាគ្រីស្តទូត ជាពិសេស សព្វថ្ងៃ និងអំពីលទ្ធផលរបស់ចលនានោះទៀតផងដែរ។
១១- របៀបសម្តែង និងការបរិយាយលទ្ធិនៃជំនឿ
វិធី និងរបៀបរៀបរាប់លទ្ធិកាតូលិក មិនត្រូវរារាំងការសន្ទនាជាមួយបងប្អូនទាំងនោះទេ។ ត្រូវរៀបរាប់លទ្ធិទាំងស្រុងយ៉ាងច្បាស់ដោយមិនលាក់លៀមអ្វីជាដាច់ខាត។ អ្នកលាក់លៀមបញ្ហាដែលចោទឡើងដើម្បីបានសេចក្តីសុខសាន្តក្លែងក្លាយ ពិតជាខុសទាំងស្រុងនឹងចលនាបង្រួបបង្រួមគ្រីស្តបរិស័ទ ព្រោះរបៀបនោះបង្ខូចលទ្ធិកាតូលិក និងបណ្តាលឱ្យគេមិនអាចយល់អត្ថន័យដ៏ពិតប្រាកដដែលប្រកែកមិនបាននៃលទ្ធិនោះ។
នៅពេលជាមួយគ្នានេះត្រូវពន្យល់លទ្ធិកាតូលិកឱ្យកាន់តែជ្រៅទៅៗ និងកាន់តែទៀងត្រង់ ដោយយករបៀបនិយាយ និងពាក្យពេចន៍ដែលមនុស្សទូទៅធា្លប់ប្រើ សូម្បីតែបងប្អូនដែលបែកចេញនោះ អាចស្តាប់បានដែរ។
លើសពីនេះទៅទៀត ទេវវិទូកាតូលិកដែលកាន់តាមលទ្ធិកាតូលិកយ៉ាងស្មោះ នៅពេលអស់លោកសន្ទនាជាមួយបងប្អូនដែលបែកចេញ ក៏ត្រូវស្រាវជ្រាវអំពីគម្រោងការដ៏អស្ចារ្យរបស់ព្រះជាម្ចាស់រួមជាមួយបងប្អូនទាំងនោះដែរ។ ប៉ុន្តែ អស់លោកត្រូវរិះគិតដោយចិត្តចង់រកសេចក្តីពិត ទាំងមានចិត្តស្រឡាញ់ និងចិត្តសុភាព។ ពេលរៀបរាប់លទ្ធិកាតូលិក អស់លោកត្រូវនឹកចាំថា ប្រការនីមួយៗក្នុងលទ្ធិកាតូលិកទាំងមូលមិនស្មើទាំងអស់ទេ តែមានសារៈសំខាន់ប្លែកៗគ្នាតាមលំដាប់លំដោយវិញ គឺស្រេចតាមទំនាក់ទំនងនឹងគ្រឹះនៃលទ្ធិ។ ហេតុនេះហើយ បានជាមានមាគ៌ាមួយដាស់តឿនទេវវិទូទាំងអស់ឱ្យប្រណាំងប្រជែងរកចំណេះចេះដឹងកាន់តែជ្រៅទៅៗ និងឱ្យសម្តែងអំពី “ព្រះជន្មដ៏បរិបូណ៌បំផុតរបស់ព្រះគ្រីស្ត ដែលមនុស្សលោកគិតមិនដល់នោះ” (អភ ៣,៨) ឱ្យកាន់តែច្បាស់ឡើងៗដែរ។
១២- អំពីការរួមសហការជាមួយបងប្អូនដែលបែកចេញទៅហើយ
សូមឱ្យគ្រីស្តបរិស័ទទាំងអស់នាំគ្នាប្រកាសជំនឿរបស់ខ្លួនទៅលើព្រះជាម្ចាស់តែមួយព្រះអង្គជាព្រះត្រៃឯក ទៅលើព្រះបុត្រារបស់ព្រះជាម្ចាស់ដែលប្រសូតជាមនុស្ស ជាព្រះសង្រោ្គះដែលបានរំដោះយើង និងជាព្រះអម្ចាស់នៅចំពោះមុខមនុស្សគ្រប់ជាតិសាសន៍ផង។ សូមឱ្យគ្រីស្តបរិស័ទទាំងអស់ខិតខំរួមគ្នា គោរពរាប់អានគ្នាទៅវិញទៅមក នាំគ្នាផ្តល់សក្ខីភាពអំពីសេចក្តីសង្ឃឹមរបស់យើង ជាសេចក្តីសង្ឃឹមដែលមិននាំឱ្យខកចិត្តឡើយ។ សព្វថ្ងៃ មនុស្សនាំគ្នាតែងតែសហការគ្នាជាទូទៅផ្នែកសង្គម។ ដូច្នេះ មនុស្សទាំងអស់ត្រូវតែបម្រើកិច្ចរួមនេះដោយគ្មាននរណាម្នាក់អាក់ខានបានឡើយ ជាពិសេស អ្នកដែលផ្ញើជីវិតលើព្រះជាម្ចាស់ មានគ្រីស្តបរិស័ទទាំងអស់មុនគេបង្អស់ ព្រោះគេពាក់ឈ្មោះរបស់ព្រះគ្រីស្តជាកិត្តិយសរបស់គេ។ គ្រីស្តបរិស័ទទាំងអស់ដែលសហការគ្នា បង្ហាញបញ្ជាក់យ៉ាងច្បាស់ថា ព្រះសហគមន៍រួបរួមគ្នាជាធ្លុងតែមួយខ្លះៗរួចហើយ។ គេក៏សម្តែងព្រះភ័ក្រ្តព្រះគ្រីស្តក្នុងឋានៈព្រះអង្គជាអ្នកបម្រើឱ្យភ្លឺកាន់តែច្បាស់ឡើងៗដែរ។ គ្រីស្តបរិស័ទសហការបែបនេះក្នុងប្រទេសជាច្រើនរួចហើយ តែត្រូវសហការគ្នាឱ្យកាន់តែខ្លាំងឡើងៗទៀតផង ជាពិសេស នៅប្រទេសមានសង្គមកំពុងលូតលាស់ ឬមានបច្ចេកទេសកំពុងចម្រើនឡើង។ ក្នុងប្រទេសទាំងនោះ គ្រីស្តបរិស័ទត្រូវសហការគ្នាដោយនាំឱ្យគេគោរពតម្លៃដ៏ថ្លៃថ្នូររបស់បុគ្គលម្នាក់ៗ ត្រូវសហការគ្នាជួយកសាងសន្តិភាព ត្រូវសហការគ្នាក្នុងកិច្ចបន្តការអនុវត្តន៍តាមដំណឹងល្អផ្នែកសង្គម។ ត្រូវសហការគ្នាឱ្យវិទ្យាសាស្រ្ត និងសិល្បៈលូតលាស់ឡើងក្នុងបរិយាកាសស្របតាមគ្រីស្តសាសនា។ ម្យ៉ាងវិញទៀត ត្រូវសហការគ្នាជួយព្យាបាលទុក្ខគ្រប់យ៉ាងរបស់មនុស្សលោកនាសម័យបច្ចុប្បន្ន មានទុរ្ភិក្ស មហន្តរាយ ភាពល្ងង់ខ្លៅ ភាពក្រីក្រ គ្មានផ្ទះនៅ ការចែកធនធានមិនស្មើគ្នាជាដើម។ បើអស់អ្នកដែលផ្ញើជីវិតលើព្រះគ្រីស្តរួមសហការបែបនេះ គេមុខជានឹងអាចរៀនយ៉ាងស្រួលអំពីរបៀបមនុស្សអាចស្គាល់គ្នាទៅវិញទៅមកបាន គោរពរាប់អានគ្នា និងរៀបចំផ្លូវឱ្យគ្រីស្តបរិស័ទទាំងអស់រួបរួមគ្នាជាធ្លុងតែមួយផង។
ជំពូក៣
ព្រះសហគមន៍ និងក្រុមជំនុំ
ដែលបែកចេញពីអាសនៈគ្រីស្តទូតនៅក្រុងរ៉ូម
១៣- ឥឡូវ យើងសូមពិនិត្យមើលការបែកបាក់ដ៏ធំជាងគេដែលបណ្តាលឱ្យអាវវែងឥតថ្នេររបស់ព្រះគ្រីស្តត្រូវរហែក។ ព្រះសហគមន៍បែកបាក់មុនគេនៅបូព៌ាប្រទេស គឺមានគ្រីស្តបរិស័ទខ្លះប្រកែកតវ៉ាមិនព្រមទទួលស្គាល់សេចក្តីបញ្ជាក់លទ្ធិនៃជំនឿនៃមហាសន្និបាតអេភេសូ និងកាលសេដូន។ នៅពេលក្រោយ អភិបាលដ៏ប្រសើរឧត្តមនៅបូព៌ាប្រទេស និងអាសនៈក្រុងរ៉ូម ក៏ផ្តាច់ការរួបរួមគ្នាក្នុងព្រះសហគមន៍ដែរ។
ជាងបួនសតវត្សរ៍ក្រោយមកទៀត ព្រះសហគមន៍បែកបាក់ជាច្រើននិកាយនៅបស្ចិមប្រទេស បណ្តាលមកពីព្រឹត្តិការណ៍ដែលគេតែងហៅថា “ការកែទម្រង់”។ មានក្រុមជំនុំជាច្រើនកើតឡើង តាមជាតិ ឬតាមជំនឿរបស់គេ ហើយបែកចេញពីអាសនៈក្រុងរ៉ូម។ ក្នុងចំណោមក្រុមសហគមន៍ ឬក្រុមជំនុំដែលនៅតែរក្សាប្រពៃណី និងរចនាសម្ព័ន្ធកាតូលិកខ្លះ មានសហគមន៍អង់គ្លីកង់ដោយឡែកពីគេ។
ប៉ុន្តែ ការបែកបាក់គ្នាទាំងនោះប្លែកៗពីគ្នាយ៉ាងខ្លាំង គឺមិនគ្រាន់តែប្លែកពីគ្នាដោយកំណើត ឬដោយសភាពការណ៍តាមកាលៈទេសៈ និងតាមទីកន្លែងរបស់គេប៉ុណ្ណោះទេ តែប្លែកពីគ្នា ជាពិសេស ដោយលក្ខណៈបញ្ហាដ៏ធ្ងន់ធ្ងរអំពីលទ្ធិនៃជំនឿ និងអំពីរចនាសម្ព័ន្ធរបស់ព្រះសហគមន៍។
ហេតុនេះហើយ បានជាមហាសន្និបាតយល់ឃើញថា គួរផ្តល់យោបល់ដូចខាងក្រោមនេះ ដើម្បីជួយបង្រួបបង្រួមគ្រីស្តបរិស័ទដោយរិះគិតពិចារណា។ ប៉ុន្តែ ត្រូវវាយតម្លៃសភាពការណ៍ប្លែកៗនៃសង្គមគ្រីស្តបរិស័ទផ្សេងៗឱ្យបានត្រឹមត្រូវ ហើយទោះបីគេបែកបាក់គ្នាឯងក្តី ក៏ត្រូវបង្ហាញចំណងដែលនៅស្ថិតស្ថេររវាងក្រុមគ្រីស្តបរិស័ទទាំងនោះដែរ។
១- យោបល់អំពីព្រះសហគមន៍នៅបូព៌ាប្រទេស
១៤- មតិ និងប្រវត្តិផ្ទាល់របស់បងប្អូនគ្រីស្តបរិស័ទនៅបូព៌ាប្រទេស
អស់រយៈប៉ុន្មានសតវត្សរ៍ខាងដើមដំបូង ព្រះសហគមន៍នៅបូព៌ាប្រទេស និងព្រះសហគមន៍នៅបស្ចិមប្រទេសតែងតែដើរតាមមាគ៌ារៀងៗខ្លួន តែរួបរួមគ្នាទុកជាបងប្អូនត្រង់លទ្ធិនៃជំនឿ និងត្រង់របៀបធ្វើអគ្គសញ្ញា។ នៅពេលគេខ្វែងគំនិតគ្នាអំពីលទ្ធិនៃជំនឿ ឬអំពីក្បួនវិន័យ ព្រះសហគមន៍ទាំងសងខាងយល់ព្រមជាមួយគ្នាឱ្យអាសនៈក្រុងរ៉ូមធ្វើអន្តរាគមន៍។ ក្នុងចំណោមសេចក្តីដ៏សំខាន់ៗ មហាសន្និបាតចូលចិត្តរំឭកបងប្អូនទាំងអស់ថា នៅបូព៌ាប្រទេសមានព្រះសហគមន៍ជាច្រើនដោយឡែក ឬតាមភូមិភាគមានព្រះសហគមន៍ដែលអភិបាលដ៏ប្រសើរឧត្តមណែនាំជាដើម តែងអះអាងថា ក្រុមគ្រីស្តទូតបានតែងតាំង។ ហេតុនេះហើយ បានជាក្នុងចំណោមគ្រីស្តបរិស័ទនៅបូព៌ាប្រទេសពីដើមគេមានអាទិភាព (ហើយសព្វថ្ងៃគេក៏នៅតែមានអាទិភាពដដែលដែរ) គឺគេយកចិត្តទុកដាក់យ៉ាងពិសេស រក្សាទំនាក់ទំនងដែលត្រូវតែមានរវាងព្រះសហគមន៍ភូមិភាគនីមួយៗទុកជាប្អូនស្រី ដោយរួបរួមគ្នាតាមលទ្ធិនៃជំនឿ និងសេចក្តីស្រឡាញ់។
យើងមិនត្រូវបំភ្លេចទៀតថា ព្រះសហគមន៍នៅបូព៌ាប្រទេសមានគុណសម្បត្តិដ៏ថ្លៃថ្នូរតាំងពីដើមរៀងមក។ ព្រះសហគមន៍នៅបស្ចិមប្រទេសបានយោងកត្តាជាច្រើនពីគុណសម្បត្តិដ៏ថ្លៃថ្នូរនេះ គឺកត្តាខាងពិធីគោរពប្រណិប័តន៍ខាងរបៀបរស់នៅតាមព្រះវិញ្ញាណ ជាប្រពៃណីបញ្ជូនបន្តមក និងខាងច្បាប់វិន័យ។ យើងក៏ត្រូវដឹងថា មហាសន្និបាតសកលជាច្រើនដែលជួបជុំគ្នានៅបូព៌ាប្រទេស បានប្រកាសបញ្ជាក់គោលលទ្ធិសំខាន់ៗជាគ្រឹះនៃលទ្ធិនៃជំនឿគ្រីស្តសាសនា គឺគោលលទ្ធិអំពីព្រះត្រៃឯក អំពីព្រះបន្ទូលរបស់ព្រះជាម្ចាស់ដែលប្រសូតជាមនុស្ស ដោយសារព្រះនាងព្រហ្មចារីនីម៉ារី។ យើងត្រូវចាត់ទុកថា ព្រឹត្តិការណ៍ទាំងនេះមានតម្លៃដ៏ថ្លៃប្រសើរ។ ព្រះសហគមន៍ទាំងនោះក៏បានរងទុក្ខវេទនាជាទម្ងន់ ដើម្បីរក្សាទុកជំនឿរបស់ខ្លួន ហើយសព្វថ្ងៃ គេក៏នៅតែរងទុក្ខវេទនានៅឡើយដែរ។
តាំងពីដើមដំបូងនៃព្រះសហគមន៍ គ្រីស្តបរិស័ទទទួលសេចក្តីដែលបញ្ចូនបន្តពីក្រុមគ្រីស្តទូតមក តាមរបៀបប្លែកៗពីគ្នា គេក៏ពន្យល់បេតិកភ័ណ្ឌនោះតាមរបៀបប្លែកៗពីគ្នាដែរ ស្របតាមទេពកោសល្យ និងតាមសភាពការណ៍ជីវភាពប្លែកៗពីគ្នា។ មូលហេតុទាំងនោះ និងមូលហេតុផ្សេងៗទៀតខាងក្រៅព្រះសហគមន៍ ជាឱកាសបណ្តាលឱ្យព្រះសហគមន៍បាក់បែកគ្នា។ គ្រីស្តបរិស័ទទាំងសងខាងស្តាប់គ្នាមិនបាន មិនយល់ចិត្តគំនិតគ្នា ហើយក៏ខ្វះសេចក្តីស្រឡាញ់ ពិតជាមូលហេតុបណ្តាលឱ្យបែកបាក់គ្នាថែមទៀត។
ហេតុនេះហើយ បានជាមហាសន្និបាតដាស់តឿនគ្រីស្តបរិស័ទទាំងអស់ ជាពិសេស អស់អ្នកដែលមានបំណងជួយធ្វើឱ្យព្រះសហគមន៍នៅបូព៌ាប្រទេស និងព្រះសហគមន៍នៅបស្ចិមប្រទេសរួបរួមគ្នាយ៉ាងពេញលេញ តាមបំណងប្រាថ្នាព្រះសហគមន៍ទាំងពីរ សូមរិះគិតពិចារណាយ៉ាងច្បាស់អំពីសភាពការណ៍ពិសេសរបស់ព្រះសហគមន៍នៅបូព៌ាប្រទេស អំពីសម័យព្រះសហគមន៍ទាំងនោះកើតនិងចម្រើនឡើង អំពីលក្ខណៈនៃទំនាក់ទំនងព្រះសហគមន៍ទាំងនោះជាមួយគ្នាផង និងជាមួយអាសនៈក្រុងរ៉ូមផង មុនពេលព្រះសហគមន៍ទាំងពីរបាក់បែកគ្នា។ សូមឱ្យគ្រីស្តបរិស័ទវាយតម្លៃយ៉ាងត្រឹមត្រូវតាមយុត្តិធម៌អំពីសេចក្តីទាំងនោះ។ បើអស់អ្នកកាន់តាមគោលការណ៍ទាំងនេះឱ្យបានល្អ គោលការណ៍ទាំងនេះមុខជាអាចជួយយ៉ាងខ្លាំងក្នុងការសន្ទនាជាមួយគ្នាតាមគោលបំណងរបស់ខ្លួន។
១៥- ប្រពៃណីខាងពិធីគោរពប្រណិប័តន៍ និងខាងការរស់នៅតាមព្រះវិញ្ញាណ
យើងម្នាក់ៗដឹងច្បាស់ថា គ្រីស្តបរិស័ទនៅបូព៌ាប្រទេសតែងតែធ្វើពិធីគោរពប្រណិប័តន៍ដោយចិត្តស្រឡាញ់យ៉ាងខ្លាំង ជាពិសេស របៀបគេថ្វាយពិធីអរព្រះគុណ។ ពិធីគោរពប្រណិប័តន៍ទាំងនោះ ពិតជាប្រភពនៃជីវិតសម្រាប់ព្រះសហគមន៍ និងជាប្រផ្នូលបញ្ចាំចិត្តថា គេនឹងទទួលសិរីរុងរឿងនៃលោកខាងមុខទៀតផង។ ដោយពិធីគោរពប្រណិប័តន៍ទាំងនោះ គ្រីស្តបរិស័ទរួមជាមួយអភិបាល មានផ្លូវទៅកាន់ព្រះជាម្ចាស់ជាព្រះបិតា ដោយសារព្រះបុត្រាជាព្រះបន្ទូលប្រសូតជាមនុស្ស ដែលសោយទិវង្គត និងមានព្រះជន្មថ្មីដ៏រុងរឿងក្នុងព្រះវិញ្ញាណ ដែលព្រះអង្គចាក់បង្ហូរនោះ។ គេចូលរួបរួមជាមួយព្រះត្រៃឯកដ៏វិសុទ្ធបំផុត និង “មានលក្ខណៈជាព្រះជាម្ចាស់” (២សល ១,៤)។ ដូច្នេះ ព្រះសហគមន៍របស់ព្រះជាម្ចាស់សាងសង់ និងចម្រើនឡើងដោយគេថ្វាយពិធីអរព្រះគុណព្រះអម្ចាស់ តាមព្រះសហគមន៍ដោយឡែកពីគ្នា។ ដោយអស់បូជាចារ្យថ្វាយពិធីអរព្រះគុណរួមគ្នា អស់លោកក៏សម្តែងឱ្យឃើញថា ព្រះសហគមន៍ទាំងនោះរួបរួមគ្នាទៀតដែរ។
ក្នុងពិធីគោរពប្រណិប័តន៍ទាំងនោះ គ្រីស្តបរិស័ទនៅបូព៌ាប្រទេសតែងតែលើកតម្កើងព្រះនាងម៉ារី ព្រហ្មចារិនីជាដរាប ដោយសូត្របទជាច្រើនដ៏សែនពិរោះ។ មហាសន្និបាតសកលក្រុងអេភេសូបានប្រកាសយ៉ាងឱឡារិកថា ព្រះនាងម៉ារីជាព្រះមាតាដ៏វិសុទ្ធបំផុតរបស់ព្រះជាម្ចាស់ ដើម្បីឱ្យគ្រីស្តបរិស័ទទទួលស្គាល់ថា ព្រះគ្រីស្តពិតជាព្រះបុត្រារបស់ព្រះជាម្ចាស់ ហើយក៏ពិតជាបុត្រមនុស្សផង ស្របតាមព្រះគម្ពីរ។
សន្តបុគ្គលជាច្រើនក៏ទទួលគារវៈកិច្ចយ៉ាងខ្លាំងដូច្នេះដែរ។ ក្នុងចំណោមសន្តបុគ្គលទាំងនោះ មានគ្រូបាធ្យាយនៃព្រះសហគមន៍សកលមួយចំនួនធំ។
ទោះបីព្រះសហគមន៍ទាំងនោះបែកចេញពីយើងក្ដី ក៏យើងអាចរួបរួមធ្វើពិធីដ៏សក្ការៈខ្លះជាមួយគ្នាបាន តាមសភាពការណ៍អនុគ្រោះ និងដោយអភិបាលព្រះសហគមន៍អនុញ្ញាតឱ្យដែរ។ គ្រីស្តបរិស័ទកាតូលិកមិនគ្រាន់តែអាចចូលរួមបានប៉ុណ្ណោះទេ តែត្រូវទូន្មានឱ្យគេចូលរួមថែមទៀតផង ព្រោះថា ព្រះសហគមន៍ទាំងនោះមានអគ្គសញ្ញាដ៏ពិតប្រាកដ ហើយជាពិសេស ដោយមានអភិបាលតៗគ្នាតាំងពីក្រុមគ្រីស្តទូតរៀងមក នៅព្រះសហគមន៍ទាំងនោះមានមុខងារជាបូជាចារ្យ និងពិធីអរព្រះគុណទៀតផង។ ការណ៍ទាំងនោះធ្វើឱ្យព្រះសហគមន៍ទាំងនោះរួបរួមយ៉ាងជិតស្និទ្ធជាមួយយើង។
នៅបូព៌ាប្រទេសក៏មានប្រពៃណីដ៏ថ្លៃថ្នូរអំពីការរស់នៅតាមព្រះវិញ្ញាណ ដែលចេញមុខជាពិសេសដោយមានក្រុមលោកសង្ឃជាច្រើន។ នៅតំបន់ទាំងនោះ តាំងពីសម័យដ៏រុងរឿងនៃគ្រូបាធ្យាយដ៏វិសុទ្ធមក គោលគំនិតរស់នៅតាមព្រះវិញ្ញាណរីកដុះឡើង និងផ្សព្វផ្សាយនៅបស្ចិមប្រទេសតាមក្រោយ ហើយត្រឡប់ដូចជាប្រភពនៃការចាត់ចែងការរស់នៅរបស់បព្វជិតបព្វជិតាឡាតំាង។ របៀបរស់នៅរបស់គេ ក៏ផ្តល់ឱ្យការរស់នៅជាបព្វជិតបព្វជិតាឡាតាំងទាំងនោះទទួលកម្លាំងថ្មីទៀតដែរ។ ហេតុនេះហើយ បានជាយើងសូមផ្តែផ្តាំគ្រីស្តបរិស័ទកាតូលិកយ៉ាងខ្លាំង ឱ្យក្រេបជញ្ជក់នូវគុណសម្បត្តិដ៏ថ្លៃថ្នូរនៃជីវិតតាមព្រះវិញ្ញាណរបស់គ្រូបាធ្យាយបូព៌ាប្រទេស។ គុណសម្បត្តិដ៏ថ្លៃថ្នូរនៃជីវិតតាមព្រះវិញ្ញាណនោះ លើកមនុស្សទាំងស្រុងឱ្យបែរខ្លួនទៅស្មឹងស្មាធិ៍អំពីការអាថ៌កំបាំងដ៏អស្ចារ្យរបស់ព្រះជាមា្ចស់។
មនុស្សទាំងអស់ត្រូវដឹងថា ត្រូវស្គាល់ គោរព ថែរក្សា និងពង្រីកបេតិកភ័ណ្ឌដ៏ប្រសើរខាងពិធីបុណ្យ និងខាងជីវិតតាមព្រះវិញ្ញាណរបស់ព្រះសហគមន៍នៅបូព៌ាប្រទេស។ ភារកិច្ចនេះពិតជាការដ៏ចាំបាច់បំផុត ដើម្បីរក្សាប្រពៃណីទាំងស្រុងនៃគ្រីស្តសាសនាយ៉ាងស្មោះ។ ការគោរព ថែរក្សា និងការពង្រីកបេតិកភ័ណ្ឌនេះ មុខជានឹងសម្រុះសម្រួលគ្រីស្តបរិស័ទបូព៌ាប្រទេស និងគ្រីស្តបរិស័ទបស្ចិមប្រទេសជាពុំខាន។
១៦- ក្បួនវិន័យរបស់គ្រីស្តបរិស័ទនៅបូព៌ាប្រទេស
លើសពីនេះទៅទៀត តាំងពីដើមរៀងមក ព្រះសហគមន៍នៅបូព៌ាប្រទេសតែងតែអនុវត្តតាមក្បួនវិន័យផ្ទាល់ តាមការយល់ស្របរបស់អស់គ្រូបាធ្យាយ និងមហាសន្និបាតនានា។ ជួនកាលមហាសន្និបាតសកលយល់ស្របដែរ។ របៀបគោរព និងប្រពៃណីប្លែកៗពីគ្នាមិនទាស់នឹងព្រះសហគមន៍រួបរួមជាធ្លុងតែមួយទាល់តែសោះ ដូចមានចែងខាងលើ។ ដោយមានប្រពៃណី និងរបៀបរស់នៅបែ្លកពីគ្នាដូច្នេះ ព្រះសហគមន៍មុខជាមានសោភ័ណភាពឆើតឆាយថែមទៀត ហើយក៏យកមកធ្វើជាជំនួយដ៏មានតម្លៃសម្រាប់បំពេញបេសកកម្មរបស់ខ្លួនដែរ។ ហេតុនេះហើយ បានជាមហាសន្និបាតសូមប្រកាសថា ព្រះសហគមន៍នៅបូព៌ាប្រទេសដឹងខ្លួនថា ទោះបីព្រះសហគមន៍ទាំងមូលត្រូវរួបរួមគ្នាជាធ្លុងតែមួយជាចាំបាច់ក្តី ក៏ព្រះសហគមន៍ទាំងនោះមានសិទ្ធិសេរីភាពត្រួតត្រាខ្លួនឯង តាមក្បួនវិន័យរបស់គេដែរ ព្រោះក្បួនវិន័យទាំងនោះសមស្របតាមបុគ្គលិកលក្ខណៈគ្រីស្តបរិស័ទរបស់គេ និងអាចជួយលើកស្ទួយប្រយោជន៍របស់គេខាងវិញ្ញាណទៀតផង។ សូមកុំឱ្យមាននរណាមានមន្ទិលសង្ស័យអំពីសេចក្តីនេះឱ្យសោះ។ ត្រូវអនុវត្តតាមគោលការណ៍នេះយ៉ាងពេញលេញ ព្រោះជាគោលការណ៍តាមប្រពៃណីព្រះសហគមន៍។ តាមពិត តាមប្រវត្តិសាស្រ្តគេមិនបានគោរពតាមគោលការណ៍នេះរហូតទេ តែគោលការណ៍នេះជាលក្ខ័ណ្ឌដ៏ចាំបាច់បំផុតមុនគេ ដើម្បីឱ្យគ្រីស្តបរិស័ទអាចរួបរួមគ្នាវិញបាន។
១៧- លក្ខណៈពិសេសរបស់គ្រីស្តបរិស័ទនៅបូព៌ាប្រទេសអំពីបញ្ហាលទ្ធិនៃជំនឿ
សេចក្តីចែងនៅខាងលើអំពីពិធីគោរពប្រណិប័តន៍ និងអំពីក្បួនវិន័យដែលប្លែកៗពីគ្នាយ៉ាងត្រឹមត្រូវ ក៏ត្រូវអនុវត្តតាមអំពីរបៀបពន្យល់បញ្ជាក់ទេវវិទ្យានៃលទ្ធិនៃជំនឿដែរ។ តាមពិត ពេលគ្រីស្តបរិស័ទខិតខំរិះគិតដើម្បីឱ្យយល់កាន់តែជ្រៅទៅៗអំពីសេចក្តីពិត ដែលព្រះជាម្ចាស់បានសម្តែងមក គ្រីស្តបរិស័ទនៅបូព៌ាប្រទេស និងនៅបស្ចិមប្រទេសបានប្រើវិធី និងមធ្យោបាយប្លែកៗពីគ្នាដើម្បីរក និងពន្យល់បញ្ជាក់សេចក្តីអំពីព្រះជាម្ចាស់។ ហេតុនេះហើយកុំឆ្ងល់ថា គ្រីស្តបរិស័ទភាគីមួយយល់ និងពន្យល់បញ្ជាចាក់ទិដ្ឋភាពខ្លះអំពីគម្រោងការដ៏អស្ចារ្យដែលព្រះជាម្ចាស់បានសម្តែងមកនោះយ៉ាងច្បាស់ជាងគ្រីស្តបរិស័ទភាគីមួយទៀត។ ដូច្នេះ ត្រូវរាប់ជាញឹកថា សេចក្តីពន្យល់បញ្ជាក់ទេវវិទ្យាប្លែកៗពីគ្នាទាំងនោះហាក់ដូចជាបន្ថែមអត្ថន័យឱ្យគ្នា ជាជាងទាស់ទែងគ្នាវិញ។ រីឯប្រពៃណីដ៏ពិតប្រាកដរបស់គ្រីស្តបរិស័ទនៅបូព៌ាប្រទេស យើងត្រូវទទួលស្គាល់ថា បានចាក់ឫសយ៉ាងល្អបំផុតក្នុងព្រះគម្ពីរ។ ពីធីគោរពប្រណិប័តន៍តែងតែបកស្រាយ និងពន្យល់រៀបរាប់ប្រពៃណីទាំងនោះ ក៏ទទួលជីវិតពីការបញ្ជូនបន្តដ៏រស់រវើកពីក្រុមគ្រីស្តទូតមក និងពីសំណេររបស់គ្រូបាធ្យាយនៅបូព៌ាប្រទេស ព្រមទាំងពីអ្នកនិពន្ធអំពីជីវិតខាងព្រះវិញ្ញាណទៀតផង។ ប្រពៃណីទាំងនោះក៏ណែនាំឱ្យគ្រីស្តបរិស័ទរស់នៅយ៉ាងត្រឹមត្រូវរហូតដល់ណែនាំគេឱ្យសញ្ជឹងគិតយ៉ាងពេញលក្ខណៈអំពីសេចក្តីពិតនៃគ្រីស្តសាសនា ។
មហាសន្និបាតដ៏វិសុទ្ធសូមអរព្រះគុណព្រះជាម្ចាស់ដោយដឹងថា គ្រីស្តបរិស័ទនៅបូព៌ាប្រទេសជាច្រើនដែលជាកូនចៅរបស់ព្រះសហគមន៍កាតូលិក នៅតែថែរក្សាបេតិកភ័ណ្ឌនេះ ហើយមានបំណងចង់រស់នៅតាមបេតិកភ័ណ្ឌនេះឱ្យកាន់តែបរិសុទ្ធ និងកាន់តែពេញលេញ។ គេរស់នៅរួបរួមយ៉ាងពេញលក្ខណៈជាមួយបងប្អូនរបស់គេ ដែលកាន់តាមប្រពៃណីបស្ចិមប្រទេស។ មហាសន្និបាតប្រកាសថា បេតិកភ័ណ្ឌទាំងមូលនេះ ទាំងខាងជីវិតតាមព្រះវិញ្ញាណ ទាំងខាងពិធីគោរពប្រណិប័តន៍ ទាំងខាងក្បួនវិន័យ និងខាងទេវវិទ្យា តាមប្រពៃណីផ្សេងៗតាមការបញ្ចូនបន្តមក ក៏ពិតជាចំណែកនៃលក្ខណៈកាតូលិកយ៉ាងពេញលេញមែន ហើយក៏ពិតជាមានលក្ខណៈបន្តពីក្រុមគ្រីស្តទូតរបស់ព្រះសហគមន៍ដែរ។
១៨- ពាក្យបញ្ចប់
ក្រោយពីបានពិនិត្យមើលសេចក្តីទាំងនេះយ៉ាងច្បាស់រួចហើយ មហាសន្និបាតសូមប្រកាសសាជាថ្មីនូវសេចក្តីដែលមហាសន្និបាតពីសម័យមុនៗ និងដែលអភិបាលព្រះសហគមន៍ក្រុងរ៉ូមនានាបានប្រកាសថា “មិនគួរយកវិន័យណាផ្សេងទៀតដែលមិនចាំបាច់ មកបង្ខំបងប្អូនឱ្យប្រតិបត្តិតាមឡើយ” (កក ១៥,២៨) ដើម្បីបង្រួបបង្រួមគ្រីស្តបរិស័ទវិញ ឬដើម្បីរក្សាគេឱ្យរួបរួមជាមួយគ្នាជាធ្លុងតែមួយដែរ។ មហាសន្និបាតប្រាថ្នាចង់យ៉ាងខ្លាំងឱ្យគ្រីស្តបរិស័ទទាំងអស់ តាំងពីពេលនេះតទៅ ខិតខំធ្វើឱ្យព្រះសហគមន៍រួបរួមគ្នាបន្តិចម្តងៗតាមកម្រិតផ្សេងៗ និងតាមរបៀបរស់នៅផ្សេងៗរបស់ព្រះសហគមន៍ ជាពិសេស ដោយអធិដ្ឋាន និងសន្ទនាជាមួយគ្នាដូចបងប្អូនអំពីលទ្ធិជំនឿ និងអំពីតម្រូវការដ៏សំខាន់ៗជាបន្ទាន់ក្នុងមុខងារណែនាំនាសម័យយើងនេះ។ តាមរបៀបដដែលនេះ មហាសន្និបាតក៏ផ្តែផ្តាំអស់លោកគង្វាល និងគ្រីស្តបរិស័ទនៃព្រះសហគមន៍កាតូលិកឱ្យមានទំនាក់ទំនងជាមួយនឹងគ្រីស្តបរិស័ទបូព៌ាប្រទេស ដែលមិនរស់នៅបូព៌ាទៀតទេ តែទៅរស់នៅឆ្ងាយពីមាតុភូមិរបស់គេ។ ដូច្នេះ គេពិតជាសហការជាមួយគ្នាដូចបងប្អូនកាន់តែខ្លាំងឡើងៗ គឺគំនិតវិញ្ញាណនៃសេចក្តីស្រឡាញ់មុខជានឹងបំបាត់ការប្រកួតប្រជែងគ្រប់យ៉ាង។ ប្រសិនបើគ្រីស្តបរិស័ទខិតខំបំពេញកិច្ចនេះដោយអស់ពីក្នុងចិត្ត មហាសន្និបាតមានសង្ឃឹមថា របងដែលញែកព្រះសហគមន៍នៅបូព៌ាប្រទេស ពីព្រះសហគមន៍នៅបស្ចិមប្រទេសមុខជាត្រូវរលំ ដើម្បីឱ្យមានព្រះដំណាក់តែមួយ សាងសង់យ៉ាងមាំលើថ្មគ្រឹះដ៏សំខាន់ គឺព្រះគ្រីស្តយេស៊ូដែលនឹងបង្រួបបង្រួមព្រះសហគមន៍ទាំងពីរឱ្យរួបរួមគ្នាជាធ្លុងតែមួយផង។
២- ព្រះសហគមន៍ និងក្រុមជំនុំនៅបស្ចិមប្រទេសដែលបែកចេញទៅហើយ
១៩- សភាពការណ៍ពិសេសរបស់សហគមន៍ទាំងនោះ
នៅសម័យកើតវិបតិ្តដ៏ធំធេងដែលចាប់ផ្តើមនៅបស្ចិមប្រទេសនាចុងយុគកណ្តាល ហើយនៅពេលក្រោយៗទៀត មានព្រះសហគមន៍ និងក្រុមជំនុំបែកចេញពីអាសនៈរបស់គ្រីស្តទូតនៅក្រុងរ៉ូម។ សព្វថ្ងៃ ព្រះសហគមន៍ និងក្រុមជំនុំទាំងនោះក៏នៅតែរួមជាមួយព្រះសហគមន៍កាតូលិក ដោយត្រូវរ៉ូវគ្នាយ៉ាងពិសេសម៉្យាង និងដោយសារទំនាក់ទំនងដ៍យូរអង្វែង មកពីប្រជាជនគ្រីស្តបរិស័ទបានរស់នៅរួបរួមគ្នាជាសហគមន៍តែមួយ តាមដំណើរដ៏យូរលង់នៃសតវត្សរ៍ពីមុនៗមក។ ព្រះសហគមន៍ និងក្រុមជំនុំទាំងនោះមានលក្ខណៈប្លែកៗពីគ្នា ដោយមានកំណើតប្លែកពីគ្នា មានលទ្ធិជំនឿប្លែកពីគ្នា និងមានការរស់នៅតាមព្រះវិញ្ញាណប្លែកពីគ្នាដែរ។ ហេតុនេះហើយ បានជាព្រះសហគមន៍ និងក្រុមជំនុំទាំងនោះមិនគ្រាន់តែប្លែកពីព្រះសហគមន៍កាតូលិកយើងយ៉ាងក្រៃលែងប៉ុណ្ណោះទេ តែប្លែកពីគ្នាឯងថែមទៀតផង។ ហេតុនេះ ពិបាករៀបរាប់បញ្ជាក់អំពីពួកគេយ៉ាងច្បាស់លាស់។ យើងក៏គ្មានបំណងរៀបរាប់បញ្ជាក់អំពីពួកគេដូច្នោះដែរ។
ទោះបីចលនាបង្រួបបង្រួមគ្រីស្តបរិស័ទមិនទាន់កើតនៅគ្រប់កន្លែងនៅឡើយក្តី ទោះបីមានព្រះសហគមន៍ និងក្រុមជំនុំខ្លះមិនទាន់មានបំណងចង់រស់នៅជាមួយព្រះសហគមន៍កាតូលិកដោយសន្តិភាពគ្រប់គ្នាក្តី ក៏យើងនៅតែមានសង្ឃឹមថា គង់តែថ្ងៃណាមួយគេនឹងមានគំនិតតាមចលនាបង្រួបបង្រួមគ្នានេះ ហើយយើងមុខជានឹងគោរពរាប់អានគ្នាទៅវិញទៅមកកាន់តែខ្លាំងឡើងៗទៀតផង។
ក៏ប៉ុន្តែ ត្រូវទទួលស្គាល់ថា ព្រះសហគមន៍ និងក្រុមជំនុំទាំងនោះប្លែកពីព្រះសហគមន៍កាតូលិកយើង ជាសន្ធឹក មិនគ្រាន់តែប្លែកពីគ្នាត្រង់ប្រវត្តិសាស្រ្ត សង្គមសាស្រ្ត ចិត្តសាស្រ្ត ឬត្រង់វប្បធម៌ប៉ុណ្ណោះទេ តែជាពិសេស ប្លែកពីគ្នាត្រង់របៀបបកស្រាយគម្ពីរដែលជាសេចក្តីពិតដែលព្រះជាម្ចាស់បានសម្តែងឱ្យមនុស្សលោកស្គាល់។ ទោះបីព្រះសហគមន៍ និងក្រុមជំនុំទាំងនោះប្លែកពីព្រះសហគមន៍កាតូលិកក្តី ក៏យើងចង់គូសសង្កត់សេចក្តីខ្លះដែលអាចទៅជា និងត្រូវជាមូលដ្ឋាន និងដើមកំណើត ដើម្បីបង្កើតការសន្ទនាគ្នា និងនាំឱ្យការសន្ទនានេះកាន់តែស្រួលឡើងៗទៀតដែរ។
២០- អំពីជំនឿផ្ញើជីវិតលើព្រះគ្រីស្ត
យើងនឹកគិតជាពិសេសដល់គ្រីស្តបរិស័ទដែលប្រកាសយ៉ាងជាក់ច្បាស់ថា ព្រះយេស៊ូគ្រីស្តពិតជាព្រះជាម្ចាស់ និងជាព្រះអម្ចាស់របស់ខ្លួន ជាស្ពានមេត្រីតែមួយគត់រវាងព្រះជាម្ចាស់ និងមនុស្សលោក ដើម្បីលើកតម្កើងសិរីរុងរឿងរបស់ព្រះជាម្ចាស់តែមួយព្រះអង្គជាព្រះបិតា ព្រះបុត្រា និងព្រះវិញ្ញាណដ៏វិសុទ្ធ។ យើងដឹងច្បាស់ថា ព្រះសហគមន៍ និងក្រុមជំនុំទាំងនោះកាន់ជំនឿប្លែកពីលទ្ធិកាតូលិកយ៉ាងក្រែល សូម្បីតែអំពីលទ្ធិព្រះគ្រីស្តជាព្រះបន្ទូលប្រសូតជាមនុស្ស និងអំពីការសង្គ្រោះ គេក៏ប្លែកពីព្រះសហគមន៍កាតូលិកដែរ ជាហេតុបណ្តាលឱ្យមានជំនឿប្លែកពីគ្នាត្រង់គម្រោងការដ៏អស្ចារ្យរបស់ព្រះសហគមន៍ និងអំពីមុខងារបម្រើរបស់ព្រះសហគមន៍ ព្រមទាំងអំពីតួនាទីរបស់នាងម៉ារីក្នុងការសង្រ្គោះ។ ក៏ប៉ុន្តែ យើងមានអំណរដោយឃើញបងប្អូនដែលបែកចេញទៅហើយនោះ បែរទៅរកព្រះគ្រីស្តទុកជាប្រភព និងបំពេញតួនាទីដ៏សំខាន់ជាងគេក្នុងការរួបរួមគ្នាជាសហគមន៍តែមួយ។ គេមានបំណងរួបរួមជាមួយព្រះគ្រីស្ត និងស្វែងរកការរួបរួមគ្នា ហើយផ្តល់សក្ខីភាពនៃជំនឿរបស់គេនៅគ្រប់កន្លែងក្នុងចំណោមជាតិសាសន៍ទាំងឡាយ។
២១- ការសិក្សាព្រះគម្ពីរ
បងប្អូនទាំងនោះតែងស្រឡាញ់ និងគោរព (ហាក់ដូចជានមស្ការថ្វាយបង្គំព្រះគម្ពីរម៉្យាង) ជាមូលហេតុជំរុញគេឱ្យសិក្សាគម្ពីរដោយឥតឈប់ឈរ និងពិនិត្យពិច័យអក្សរដោយយកចិត្តទុកដាក់ “ព្រោះដំណឹងល្អជាឫទ្ធានុភាពរបស់ព្រះជាម្ចាស់សម្រាប់សង្គ្រោះអស់អ្នកដែលជឿ គឺមុនដំបូងសាសន៍យូដា បន្ទាប់មកសាសន៍ក្រិក” (រម ១,១៦)។
គេតែងអង្វរព្រះវិញ្ញាណដ៏វិសុទ្ធ ហើយស្វែងរកព្រះជាម្ចាស់ក្នុងព្រះគម្ពីរដោយយល់ថា ព្រះអង្គដែលមានព្រះបន្ទូលមកគេដោយសារព្រះគ្រីស្ត តាមអស់លោកព្យាការីបានថ្លែងទុកជាមុន។ ព្រះអង្គជាព្រះបន្ទូលរបស់ព្រះជាម្ចាស់ប្រសូតជាមនុស្ស ដើម្បីជាប្រយោជន៍ដល់មនុស្សលោក។ គេនឹកសញ្ជឹងគិតអំពីជីវប្រវត្តិព្រះគ្រីស្ត អំពីការប្រៀនប្រដៅ និងអំពីព្រះរាជកិច្ចរបស់ព្រះបរមគ្រូ ដើម្បីសង្គ្រោះមនុស្សលោក ជាពិសេស អំពីគម្រោងការដ៏អស្ចារ្យរបស់ព្រះអង្គដែលសោយទិវង្គត និងមានព្រះជន្មថ្មីដ៏រុងរឿង។
ទោះបីគ្រីស្តបរិស័ទដែលបែកចេញពីយើងតែងប្រកាសថា គម្ពីរពិតជាមានអំណាចរបស់ព្រះជាម្ចាស់ ផ្ទាល់ក្ដី ក៏គេមានយោបល់ផ្សេងពីយើង (គេក៏មានយោបល់ប្លែកពីគ្នាឯងដែរ) អំពីទំនាក់ទំនងរវាងព្រះគម្ពីរ និងព្រះសហគមន៍។ តាមលទ្ធិនៃជំនឿកាតូលិក ក្រុមអភិបាលមានមុខងារបង្រៀនព្រះសហគមន៍យ៉ាងពិតប្រាកដ មានមុខងារពិសេសក្នុងការបកស្រាយ និងក្នុងការអត្ថាធិប្បាយព្រះបន្ទូលរបស់ព្រះជាម្ចាស់ចែងជាលាយល័ក្ខអក្សរ។
ប៉ុន្តែ ជាពិសេស នៅពេលសន្ទនាគ្នា ព្រះបន្ទូលពិតជាឧបករណ៍ដ៏ប្រសើរបំផុតក្នុងព្រះហស្តរបស់ព្រះជាម្ចាស់ ដើម្បីឱ្យមនុស្សទាំងអស់រួបរួមគ្នាជាធ្លុងតែមួយ តាមតែព្រះសង្គ្រោះប្រទានឱ្យមនុស្សលោក។
២២- អំពីអគ្គសញ្ញា
គ្រប់ពេលមនុស្សទទួលអគ្គសញ្ញាជ្រមុជទឹកយ៉ាងត្រឹមត្រូវតាមព្រះអម្ចាស់ចាត់ចែងទុកនោះ និងទទួលដោយចិត្តគំនិតយ៉ាងសមរម្យតាមតម្រូវការ មនុស្សរួបរួមក្នុងព្រះកាយព្រះគ្រីស្ត ដែលសោយទិវង្គត និងមានព្រះជន្មថ្មីដ៏រុងរឿង គេកើតជាថ្មីដើម្បីទទួលចំណែកនៃព្រះជន្មផ្ទាល់របស់ព្រះជាម្ចាស់ តាមគ្រីស្តទូតប៉ូលចែងថា៖ “ដោយបងប្អូនទទួលពិធីជ្រមុជទឹក បងប្អូនត្រូវកប់ក្នុងផ្នូររួមជាមួយព្រះគ្រីស្ត ហើយបងប្អូនក៏ទទួលជីវិតថ្មីរួមជាមួយព្រះអង្គដែរ ព្រោះបងប្អូនបានជឿលើឫទ្ធានុភាពរបស់ព្រះជាម្ចាស់ ដែលបានប្រោសព្រះគ្រីស្តឱ្យមានព្រះជន្មថ្មីដ៏រុងរឿង” (កូឡ ២,១២)។
ហេតុនេះហើយ បានជាពិធីជ្រមុជទឹកពិតជាចំណងតាមអគ្គសញ្ញា ចងអស់អ្នកដែលកើតជាថ្មីដោយសាពិធីនោះ។ ប៉ុន្តែ អគ្គសញ្ញាជ្រមុជទឹកគ្រាន់តែជាដើម និងជាពេលចាប់ផ្តើមដំណើរប៉ុណ្ណោះ ដ្បិតអគ្គសញ្ញាជ្រមុជទឹកនេះតម្រង់មនុស្សទៅទទួលព្រះជន្មរបស់ព្រះគ្រីស្តយ៉ាងពេញបរិបូរណ៍។ ហេតុនេះ អគ្គសញ្ញាជ្រមុជទឹកតម្រង់ទៅប្រកាសជំនឿយ៉ាងពេញលេញ និងតម្រង់ឱ្យគេចូលរួមទាំងស្រុងក្នុងការចាត់ចែងនៃការសង្គ្រោះ តាមព្រះគ្រីស្តសព្វព្រះហឫទ័យចាត់ចែងនោះ។ នៅទីបញ្ចប់ អគ្គសញ្ញាជ្រមុជទឹកក៏តម្រង់ឱ្យចូលរួមយ៉ាងពេញលេញក្នុងសហគមន៍ដែលអរព្រះគុណ។
ទោះបីព្រះសហគមន៍ និងក្រុមជំនុំទាំងនោះមិនរួបរួមជាមួយយើងយ៉ាងពេញលក្ខណៈក្តី (អគ្គសញ្ញាជ្រមុជទឹក ជាប្រភពនៃការរួបរួមនោះ) ទោះបីយើងជឿថា គេមិនរក្សាទុកសភាពទាំងស្រុងដ៏ពិតប្រាកដនៃគម្រាងការដ៏អស្ចារ្យរបស់ពិធីអរព្រះគុណក្ដី ជាពិសេស ព្រោះគេគ្មានអគ្គសញ្ញាតែងតាំង ក៏ប៉ុន្តែ ពេលព្រះសហគមន៍ និងក្រុមជំនុំដែលបែកចេញពីយើងទាំងនោះ ធ្វើពិធីជប់លៀងព្រះអម្ចាស់ ជាពិធីរំឭកគេអំពីព្រះអម្ចាស់សោយទិវង្គត និងមានព្រះជន្មថ្មីដ៏រុងរឿង គេក៏ប្រកាសថា ជីវិតដ៏ពិតប្រាកដមានន័យថា រួមរស់ជាមួយព្រះគ្រីស្ត ហើយគេរង់ចាំព្រះអង្គយាងមកយ៉ាងរុងរឿងដែរ។ ហេតុនេះ ត្រូវសន្ទនាគ្នាអំពីលទ្ធិស្តីពីពិធីជប់លៀងព្រះអម្ចាស់ និងអំពីអគ្គសញ្ញាឯទៀតៗ អំពីពិធីបុណ្យនានា និងអំពីមុខងារបម្រើព្រះសហគមន៍។
២៣- ការរស់នៅក្នុងអង្គព្រះគ្រីស្ត
បងប្អូនទាំងនោះរស់នៅតាមឋានៈជាគ្រីស្តបរិស័ទ មកពីគេផ្ញើជីវិតលើព្រះគ្រីស្ត។ ព្រះជាម្ចាស់ក៏ប្រណីសន្តោសគេ ដោយគេទទួលពិធីជ្រមុជទឹក និងដោយគេស្តាប់ព្រះបន្ទូលរបស់ព្រះអង្គផង។ គេបង្ហាញថា គេរស់នៅក្នុងឋានៈជាគ្រីស្តបរិស័ទ ដោយម្នាក់ៗអធិដ្ឋាន ដោយនឹកសញ្ជឹងគិតអំពីព្រះគម្ពីរ ដោយរស់នៅក្នុងគ្រួសារបែបជាគ្រីស្តបរិស័ទ ដោយសហគមន៍គេតែងតែជួបជុំគ្នាលើកតម្កើងព្រះជាម្ចាស់។ ម៉្យាងវិញទៀត ក្នុងពិធីគោរពប្រណិប័តន៍របស់គេ ជួនកាល គេរក្សាទុកកត្តារួមជាច្រើនគួរឱ្យសរសើរនៃពិធីគោរពបម្រើព្រះជាម្ចាស់ពីបុរាណមករួមជាមួយយើងដែរ។
ជំនឿលើព្រះគ្រីស្តបង្កើតផល គឺគេលើកតម្កើង និងអរព្រះគុណព្រះជាម្ចាស់ ដែលប្រទានព្រះអំណោយទានដល់គេ។ គេក៏យកចិត្តទុកដាក់យ៉ាងខ្លាំងនឹងយុត្តិធម៌ថែមទៀត និងស្រឡាញ់អ្នកដទៃដោយចិត្តស្មោះ។ ដោយសារជំនឿជំរុញគេឱ្យប្រព្រឹត្តអំពើល្អបែបនេះ គេបង្កើតកិច្ចការ និងស្ថាប័នជាច្រើន ដើម្បីជួយសម្រាលទុក្ខមនុស្សលោកទាំងខាងវិញ្ញាណ ទាំងខាងរូបកាយ ដើម្បីអប់រំយុវជនយុវនារី ដើម្បីជួយស្តាជីវភាពក្នុងសង្គម និងដើម្បីតែងតាំងសន្តិភាពឱ្យនៅស្ថិតស្ថេរនៅគ្រប់ទីកន្លែង។
ទោះបីក្នុងចំណោមគ្រីស្តបរិស័ទទាំងនោះមានគ្នាជាច្រើនមិនយល់អត្ថន័យនៃដំណឹងល្អតាមបែបកាតូលិកក្នុងវិស័យសីលធម៌ក្ដី ហើយក៏មិនយល់ស្របនឹងដំណោះស្រាយក្នុងបញ្ហាដ៏សែនពិបាកនាសង្គមនៅបច្ចុប្បន្នកាលនេះក្ដី ក៏ប៉ុន្តែ គេចង់ភ្ជាប់ចិត្តនឹងព្រះបន្ទូលរបស់ព្រះគ្រីស្តដូចយើងដែរ ទុកជាប្រភពនៃកម្លាំងរបស់គ្រីស្តបរិស័ទ។ គេក៏ចង់ធ្វើតាមបញ្ជារបស់គ្រីស្តទូតប៉ូលថា “ការអ្វីក៏ដោយដែលបងប្អូនធ្វើ ទោះជាពាក្យសម្ដី ឬកាយវិការក្ដី ត្រូវធ្វើក្នុងព្រះនាមព្រះអម្ចាស់យេស៊ូទាំងអស់ ទាំងអរព្រះគុណព្រះជាម្ចាស់ជាព្រះបិតា តាមរយៈព្រះគ្រីស្តផង” (កូឡ ៣,១៧)។ ការសន្ទនាតាមចលនាបង្រួបបង្រួមគ្នា អំពីការប្រព្រឹត្តតាមសីលធម៌ស្របតាមដំណឹងល្អអាចចាប់ផ្តើមបាន ដោយនឹកអំពីព្រះបន្ទូលនោះ។
២៤- ពាក្យបញ្ចប់
ក្រោយពីបានរៀបរាប់យ៉ាងខ្លីអំពីលក្ខខ័ណ្ឌនៃកិច្ចការបង្រួបបង្រួមគ្រីស្តបរិស័ទ ឱ្យរួបរួមគ្នាជាធ្លុងតែមួយរួចហើយ ក្រោយពីបានបង្ហាញបញ្ជាក់គោលការណ៍ណែនាំកិច្ចការបង្រួបបង្រួមនេះ យើងបែរមុខទៅរកអនាគតទាំងទុកចិត្តលើព្រះជាម្ចាស់។ មហាសន្និបាតដាស់តឿនគ្រីស្តបរិស័ទឱ្យជៀសវាងប្រព្រឹត្តអំពើដោយមិនគិតជាមុន កុំខ្នះខ្នែងដោយមិនប្រុងប្រយ័ត្ន ដែលសុទ្ធតែជាអំពើអាចបង្ខូចចលនាររួបរួមគ្នាមិនឱ្យចម្រើនបាន។ កិច្ចការបង្រួបបង្រួមរបស់គេសុទ្ធតែមានន័យថា “កាតូលិក” យ៉ាងពេញលេញ និងដោយចិត្តស្មោះ គឺស្មោះត្រង់នឹងសេចក្តីដ៏ពិតដែលយើងទទួលពីក្រុមគ្រីស្តទូតនិងពីគ្រូបាធ្យាយមក ហើយក៏ស្របតាមលទ្ធិជំនឿព្រះសហគមន៍បានប្រកាសជានិច្ចតាំងពីដើមរៀងមក។ កិច្ចការបង្រួបបង្រួមនេះតម្រង់ទៅកាន់សេចក្តីបរិបូរណ៍ដ៏ពេញលក្ខណៈ គឺព្រះអម្ចាស់សព្វព្រះហឫទ័យឱ្យព្រះកាយព្រះអង្គចម្រើនឡើងក្នុងសេចក្តីពេញបរិបូរណ៍ដ៏ពេញលក្ខណៈនេះ តាមដំណើរនៃសតវត្សរ៍កន្លងទៅ។
មហាសន្និបាតប្រាថ្នាយ៉ាងខ្លាំង សូមឱ្យកិច្ចការដែលបុត្រធីតាព្រះសហគមន៍កាតូលិកចាប់ផ្តើមធ្វើបានចម្រើនឡើង រួមនឹងកិច្ចការរបស់បងប្អូនដែលបែកចេញពីយើង។ សូមកុំយកអ្វីមករារាំងមាគ៌ារបស់ព្រះអង្គដែលណែនាំ និងថែរក្សាមនុស្សលោកដោយព្រះហឫទ័យស្រឡាញ់។ កុំស្រមៃឃើញអំពីព្រះវិញ្ញាណនឹងជំរុញគ្រីស្តបរិស័ទយ៉ាងណានៅពេលខាងមុខឡើយ។ លើសពីនេះទៅទៀត មហាសន្និបាតដឹងខ្លួន ហើយប្រកាសថា ការសម្រុះសម្រួលគ្រីស្តបរិស័ទទាំងអស់ឱ្យរួបរួមគ្នាក្នុងព្រះសហគមន៍តែមួយគត់របស់ព្រះគ្រីស្ត ពិតជាគម្រោងការរបស់ព្រះជាម្ចាស់មែន គឺហួសពីកម្លាំង និងពីសមត្ថភាពរបស់មនុស្ស។ ហេតុនេះហើយ បានជាមហាសន្និបាតសង្ឃឹមទាំងស្រុងទៅលើពាក្យអង្វររបស់ព្រះគ្រីស្តសម្រាប់ព្រះសហគមន៍ និងសង្ឃឹមទៅលើព្រះហឫទ័យមេត្តាករុណារបស់ព្រះបិតាចំពោះយើង ព្រមទាំងសង្ឃឹមទៅលើឫទ្ធានុភាពនៃព្រះវិញ្ញាណដ៏វិសុទ្ធ។ “សេចក្តីសង្ឃឹមមិនធ្វើឱ្យយើងខកចិត្តឡើយ ព្រោះព្រះជាម្ចាស់បានចាក់បង្ហូរព្រះហឫទ័យស្រឡាញ់របស់ព្រះអង្គមកក្នុងចិត្តយើង ដោយប្រទានព្រះវិញ្ញាណដ៏វិសុទ្ធមកយើង” (រម ៥,៥)។
អស់លោកអភិបាលដែលរួមក្នុងមហាសន្និបាតពេញចិត្តនឹងក្រឹត្យក្រមទាំងមូលនេះ នឹងគោលការណ៍នីមួយៗផងដែរ។ រីឯយើងវិញ ស្របតាមអំណាចដែលព្រះគ្រីស្តបានប្រគល់ឱ្យយើងក្នុងឋានៈជាគ្រីស្តទូតរួមជាមួយអស់លោកអភិបាលដោយមានព្រះវិញ្ញាណរួមជាមួយផងក៏យល់ព្រម ហើយសម្រេចចេញជាក្រឹត្យក្រមដែរ។ យើងបង្គាប់ឱ្យសេចក្តីដែលមហាសន្និបាតបានចាត់ចែងនេះ ត្រូវផ្សព្វផ្សាយដើម្បីលើកតម្កើងសិរីរុងរឿងរបស់ព្រះជាម្ចាស់ជានិច្ចនិរន្តរ៍តរៀងទៅ។
ធ្វើនៅក្រុងរ៉ូម នៅព្រះវិហារសន្តសិលា ថ្ងៃទី២១ ខែវិច្ឆិកា ឆ្នាំ១៩៦៤
ខ្ញុំប៉ូល អភិបាលនៃព្រះសហគមន៍កាតូលិក
(ហត្ថលេខារបស់លោកអភិបាល)
