ព្រះនាងម៉ារី ជាព្រះមហាក្សត្រីយានី

ដោយព្រះនាងម៉ារីមានបុត្រដែលជា “ព្រះគ្រីស្ត និងជាព្រះអម្ចាស់” គឺដូចជាព្រះមហាក្សត្រនៃពិភពលោកដែរ។ គ្រីស្តបរិស័ទយល់ឃើញថា ព្រះនាងក៏ជាព្រះមហាក្សត្រីយានីដូចក្សត្រីដទៃដែរ។ នៅថ្ងៃនេះ ព្រះសហគមន៍នាំគ្នាសរសើរតម្កើងព្រះជាម្ចាស់ ដែលសង្គ្រោះមនុស្សលោក ដែលមានព្រះនាងម៉ារីជាតំណាង។

ពាក្យអធិដ្ឋានពេលចូល

បពិត្រព្រះអម្ចាស់ជាព្រះបិតា! ព្រះអង្គដែលសព្វព្រះហឫទ័យឱ្យព្រះមាតានៃព្រះបុត្រាព្រះអង្គទៅមាតា និងព្រះមហាក្សត្រីយ៍របស់យើងខ្ញុំដែរ។ សូមទ្រង់ព្រះមេត្ដាពង្រឹងជំនឿយើងខ្ញុំ សូមប្រោសយើងខ្ញុំឱ្យទទួលសិរីរុងរឿរួមជាមួយព្រះនាងផង។

សូមថ្លែងព្រះគម្ពីរព្យាការីអេសាយ

ប្រជាជនដែលដើរក្នុងភាពងងឹត បានឃើញពន្លឺមួយដ៏ចិញ្ចែងចិញ្ចាច ហើយមានពន្លឺមួយលេចឡើងបំភ្លឺអស់អ្នកដែលរស់នៅក្រោមអំណាចនៃសេចក្តីស្លាប់។ បពិត្រព្រះអម្ចាស់! ព្រះអង្គប្រោសប្រទានឱ្យប្រជាជាតិនេះបានចម្រើនឡើង ព្រមទាំងឲ្យគេមានអំណរដ៏លើស លប់។ គេនឹងសប្បាយរីករាយនៅចំពោះព្រះភក្រ្តព្រះអង្គ ដូចជាសប្បាយនៅរដូវចម្រូត ឬនៅពេលចែកជ័យភ័ណ្ឌដែរ។ ព្រះអង្គបំបាក់នឹមដែលខ្មាំងសត្រូវដាក់លើគេ ព្រះអង្គរំដោះគេឱ្យរួចពីការជិះជាន់សង្កត់សង្កិនរបស់ខ្មាំងសត្រូវ ដូចកាលពីសម័យដែលព្រះអង្គរំដោះបុព្វបុរសរបស់គេឱ្យរួចពីកណ្តាប់ដៃនៃជនជាតិម៉ាឌីយ៉ានដែរ។ ស្បែកជើងរបស់ទាហានដែលតែងតែរុកទន្ទ្រាន និងសម្លៀកបំពាក់របស់គេដែលប្រឡាក់ទៅដោយឈាមនឹងត្រូវដុតបំផ្លាញចោលអស់គ្មានសល់ ដ្បិតមានព្រះរាជបុត្រមួយអង្គប្រសូត្រមកសម្រាប់យើង ព្រះអម្ចាស់បានប្រទានព្រះបុត្រាមួយព្រះអង្គមកយើងហើយ។ បុត្រនោះបានទទួលអំណាចគ្រប់គ្រងគេនឹងថ្វាយព្រះនាមព្រះអង្គថា “ព្រះដ៏គួរស្ងើចសរសើរព្រះដ៏ប្រកបដោយប្រាជ្ញាញាណ ព្រះដ៏មានតេជានុភាពអង់អាចព្រះបិតាដ៏មានព្រះជន្មគង់នៅអស់កល្បជានិច្ច ព្រះអម្ចាស់នៃសន្តិភាព”។ ព្រះរាជបុត្រនោះនឹងលាតសន្ធឹងអំណាចព្រះអង្គនឹងធ្វើឱ្យរាជបល្ល័ង្ករបស់ព្រះបាទដាវីឌ និងនគររបស់ព្រះអង្គ មានសេចក្តីសុខសាន្តរហូតពីពេលនេះរហូតអស់កល្បជាអង្វែងតរៀងទៅ ដ្បិតព្រះអម្ចាស់នៃពិភពទាំងមូលសម្រេចដូច្នេះមកពីព្រះអង្គមានព្រះហឫទ័យស្រឡាញ់យ៉ាងខ្លាំងចំពោះយើង។

ទំនុកតម្កើងលេខ ១១៣(១១២),១-៨ បទព្រហ្មគិតិ

ពិធីអបអរសាទរព្រះគម្ពីរដំណឹងល្អ

សូមថ្លែងព្រះគម្ពីរដំណឹងល្អតាមសន្តម៉ាថាយ មថ ១,២៦-៣៨

ប្រាំ​មួយ​ខែ​ក្រោយ​មក ព្រះ‌ជាម្ចាស់​បាន​ចាត់​ទេវទូត​កាព្រី‌អែល​ឱ្យទៅ​ភូមិ​ណាសា‌រ៉ែតក្នុង​ស្រុក​កាលី‌ឡេ ដើម្បី​ជួប​នឹង​ស្ត្រី​ក្រមុំ​ព្រហ្មចារី​ម្នាក់ ជា​គូ​ដណ្ដឹង​របស់​កំលោះ​ម្នាក់ ឈ្មោះ​យ៉ូសែប ដែល​ត្រូវ​ជា​ញាតិ​វង្ស​ព្រះ‌បាទ​ដាវីឌ ស្ត្រី​ក្រមុំ​នោះ​ឈ្មោះនាង​ម៉ារី។ ទេវទូត​ចូល​ទៅ​ក្នុង​ផ្ទះ​នាង​ម៉ារី ហើយ​ពោល​ទៅ​កាន់​នាង​ថា៖«ចូរ​មាន​អំណរ​សប្បាយ​ឡើង!​ ព្រះ‌អម្ចាស់​គាប់​ព្រះ‌ហឫ‌ទ័យ​នឹង​នាង​ហើយ ព្រះ‌អង្គ​គង់​ជា​មួយ​នាង»។ ពេល​ឮ​ពាក្យ​នេះ នាង​ម៉ារី​រន្ធត់​យ៉ាង​ខ្លាំង នាង​រិះ‌គិត​ក្នុង​ចិត្ត​ថា តើ​ពាក្យ​ជម្រាប​សួរ​នេះ​មាន​ន័យ​ដូច​ម្ដេច? ទេវទូត​ពោល​ទៅ​កាន់​នាង​ថា៖«កុំ​ខ្លាច​អី ម៉ារី​អើយ! ដ្បិត​ព្រះ‌ជាម្ចាស់​គាប់​ព្រះ‌ហឫ‌ទ័យ​នឹង​នាង​ហើយ។ នាង​នឹង​មាន​គភ៌ សម្រាល​បាន​បុត្រ​មួយ ដែល​នាង​ត្រូវ​ថ្វាយ​ព្រះ‌នាម​ថា “យេស៊ូ”។ បុត្រ​នោះ​នឹង​មាន​ឋានៈ​ដ៏​ប្រសើរ​ឧត្ដម ហើយ​គេ​នឹង​ថ្វាយ​ព្រះ‌នាម​ថា “ព្រះ‌បុត្រា​នៃ​ព្រះ​ដ៏​ខ្ពង់‌ខ្ពស់​បំផុត”។ ព្រះ‌ជាម្ចាស់​នឹង​តាំង​បុត្រ​នោះឱ្យគ្រង​រាជ្យ​លើ​បល្ល័ង្ក​របស់​ព្រះ‌បាទ​ដាវីឌជា​ព្រះ‌អយ្យ‌កោ​របស់​ព្រះ‌អង្គ ព្រះ‌អង្គ​នឹង​គ្រង​រាជ្យ​លើ​ប្រជា‌រាស្ដ្រ​អ៊ីស្រា‌អែលអស់​កល្ប‌ជានិច្ច ហើយ​រាជ្យ​របស់​ព្រះ‌អង្គ​នឹង​នៅ​ស្ថិត‌ស្ថេរឥត​មាន​ទី​បញ្ចប់​ឡើយ»។ នាង​ម៉ារី​សួរ​ទៅ​ទេវទូត​ថា៖ «តើ​ធ្វើ​ដូច​ម្ដេច​នឹងឱ្យ​ការ​នេះ​កើត​ឡើង​បាន បើ​នាង​ខ្ញុំ​មិន​រួម​រស់​ជា​មួយ​បុរស​ណា​ផង​ដូច្នេះ?»។ ទេវទូត*​ឆ្លើយ​ទៅ​នាង​វិញ​ថា៖ «ព្រះ‌វិញ្ញាណ​ដ៏‌វិសុទ្ធ*​នឹង​យាង​មក​សណ្ឋិត​លើ​នាង គឺ​ឫទ្ធា‌នុភាព​របស់​ព្រះ​ដ៏​ខ្ពង់‌ខ្ពស់​បំផុតនឹង​គ្រប​បាំង​នាង។ ហេតុ​នេះ គេ​នឹង​ថ្វាយ​ព្រះ‌នាម​ដល់​បុត្រ​ដ៏‌វិសុទ្ធដែល​ត្រូវ​ប្រសូត​មក​នោះ​ថា “ព្រះ‌បុត្រា​របស់​ព្រះ‌ជាម្ចាស់”។ ម្យ៉ាង​ទៀត នាង​អេលី‌សា‌បិតជា​ញាតិ​របស់​នាង មាន​ផ្ទៃ​ពោះ​ប្រាំ​មួយ​ខែ​ហើយ ថ្វី‌ដ្បិត​តែ​គាត់​មាន​វ័យ​ចាស់ ថែម​ទាំង​ជា​ស្ត្រី​អារ​ទៀត​ផង​ក៏​ដោយ ព្រោះ​គ្មាន​ការ​អ្វី​ដែល​ព្រះ‌ជាម្ចាស់​ធ្វើ​មិន​កើត​នោះ​ឡើយ»។ នាង​ម៉ារី​ពោល​ទៅ​ទេវទូត​ថា៖«នាង​ខ្ញុំ​ជា​អ្នក​បម្រើ​របស់​ព្រះ‌អម្ចាស់ សូម​ឱ្យ​បាន​សម្រេច​តាម​ពាក្យ​របស់​លោក​ចុះ!»។ បន្ទាប់​មក ទេវទូត​ចាក‌ចេញ​ពី​នាង​ទៅ។

ពាក្យថ្វាយតង្វាយ

បពិត្រព្រះជាម្ចាស់ជាព្រះបិតា! សូមទ្រង់មេត្តាទទួលសក្ការបូជាដែលយើងខ្ញុំសូមថ្វាយព្រះអង្គនៅថ្ងៃគោរពព្រះនាងព្រហ្មចារីនីម៉ារីក្នុងឋានៈជាព្រះមហាក្សត្រីយានីផង។ សូមទ្រង់ព្រះមេត្តាប្រោសសង្គ្រោះយើងខ្ញុំ ដោយសារព្រះយេស៊ូដែលបានបូជាព្រះជន្មនៅលើឈើឆ្កាង ទុកជាយញ្ញបូជាដ៏វិសុទ្ធ។

ធម៌លើកតម្កើង

បពិត្រព្រះជាម្ចាស់ជាព្រះបិតាដ៏វិសុទ្ធ! ជាព្រះដែលគង់នៅអស់កល្បជានិច្ច និងដែលមានតេជានុភាពសព្វប្រការ យើងខ្ញុំសូមលើកតម្កើងសិរីរុងរឿងរបស់ព្រះអង្គ ដោយរួមជាមួយព្រះគ្រីស្តជាអម្ចាស់យើងខ្ញុំ។ នៅថ្ងៃនេះ ព្រះអង្គបានលើកព្រះនាងម៉ារី ជាព្រះមាតារបស់ព្រះជាម្ចាស់ឡើងស្ថានបរមសុខ និងប្រទានសិរីរុងរឿងឱ្យព្រះនាងដែរ។ ព្រះនាងម៉ារីពិតជាតំណាងនៃព្រះសហគមន៍ ព្រះនាងបានទទួលសិរីរុងរឿងមុនគ្រីស្តបរិស័ទឯទៀតៗ។ ដោយព្រះអង្គប្រោសព្រះនាង ដូច្នេះពង្រឹងសេចក្តីសង្ឈឹមនៃប្រជារាស្ត្រព្រះអង្គ ដែលនៅតែបន្តដំណើរក្នុងលោកនេះ។ ព្រះអង្គបានប្រោសរូបកាយព្រះមាតានៃព្រះបុត្រាព្រះអង្គដែលប្រទានជិវិតថ្មីឱ្យមនុស្សលោកមិនឱ្យរលួយ។ អាស្រ័យហេតុនេះហើយ បានជាយើងខ្ញុំសូមចូលរួមជាមួយអស់ទេវទូត និងសន្តបុគ្គលទាំងឡាយនៅស្ថានបរមសុខ ដើម្បីប្រកាសថា “ព្រះដ៏វិសុទ្ធ! ព្រះដ៏វិសុទ្ធ! ព្រះដ៏វិសុទ្ធ!”។

ពាក្យអរព្រះគុណ

បពិត្រព្រះជាម្ចាស់ជាព្រះបិតា! យើងខ្ញុំសូមអរព្រះគុណព្រះអង្គដែលបានប្រទានព្រះកាយព្រះគ្រីស្តឱ្យយើងខ្ញុំ នៅថ្ងៃគោរពព្រះនាងព្រហ្មចារីនីម៉ារីជាព្រះមហាក្សត្រីយានី។ សូមទ្រង់ព្រះមេត្តាប្រោសយើងខ្ញុំឱ្យចូលរួមក្នុងពិធីជប់លៀងរបស់ព្រះអង្គនៅស្ថានបរមសុខ នៅថ្ងៃណាមួយផង។