Liturgy of Hours - Catholic Faith Cambodia

អធិដ្ឋានពេលយប់ថ្ងៃសៅរ៍ | Prayer Saturday Night

Posted on 20 ខែកក្កដា 202231 ខែកក្កដា 2024 by Catholic Faith Cambodia

ថ្ងៃសៅរ៍
Saturday

ឱ! ព្រះអម្ចាស់អើយ! សូមយាងមកជួយទូលបង្គំ
សូមព្រះអម្ចាស់យាងមកជួយសង្គ្រោះយើងខ្ញុំផង!
សូមកោតសរសើរព្រះបិតា ព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក
ហើយជាដរាបតរៀងទៅ។ អាម៉ែន!
អាលេលូយ៉ា!

ពេលសូរិយាលន់លិច

១	នៅវេលាដែលសូរិយាលន់លិច	យើងខ្ញុំទាំងឡាយរួមគ្នានៅទីនេះ
	ដើម្បីសូមព្រះជាម្ចាស់យាងមក	រក្សាដោយព្រះហឫទ័យប្រណីមេត្តា	។
២	យើងខ្ញុំសូមថ្វាយឆ្ពោះព្រះជាម្ចាស់	នូវការងារដែលយើងខ្ញុំធ្វើថ្ងៃនេះ
	បើយើងខ្ញុំប្រព្រឹត្តខុសនឹងព្រះអង្គ	សូមទ្រង់មេត្តាលើកលែងទោសឱ្យយើងខ្ញុំ	។
៣	យើងខ្ញុំសូមអរព្រះគុណព្រះជាម្ចាស់	ដែលបានរក្សាយើងខ្ញុំក្នុងថ្ងៃនេះ
	សូមការពារយើងខ្ញុំក្នុងរាត្រីនេះ	សូមឱ្យយើងខ្ញុំបានឈ្នះកិច្ចកលអារក្ស	។

ទំនុកតម្កើងលេខ ៤ ព្រះជាម្ចាស់ធ្វើឱ្យខ្ញុំរស់នៅដោយសុខដុមរមនា

«កុំខ្លាចអី ក្រុមដ៏តូចរបស់ខ្ញុំអើយ! ព្រះ‌បិតារបស់អ្នករាល់គ្នាសព្វព្រះ‌ហឫ‌ទ័យប្រទានព្រះ‌រាជ្យមកឱ្យអ្នករាល់គ្នាហើយ» (លក ១២,៣២)។

រដូវធម្មតា និងរដូវរង់ចាំ	ឱព្រះអម្ចាស់អើយ! សូមទតមកយើងខ្ញុំដោយព្រះហឫទ័យសប្បុរសផង!
រដូវបុណ្យណូអែល	សូមប្រោសឱ្យយើងខ្ញុំឃើញពន្លឺថ្ងៃតទៅទៀត។ តើនរណានាំសុភមង្គលមកឱ្យយើងខ្ញុំ?
រដូវត្រណម	ឱព្រះអម្ចាស់អើយ! សូមអាណិតមេត្តាទូលបង្គំ សូមព្រះសណ្តាប់ពាក្យអង្វររបស់ទូលបង្គំផង។
រដូវបុណ្យចម្លង	អាលេលូយ៉ា! អាលេលូយ៉ា! អាលេលូយ៉ា!
បុណ្យឱឡារិក	ពេលទូលបង្គំចូលដំណេក ទូលបង្គំដេកលក់ដោយសុខសាន្ត។

២	ឱព្រះ‌ជាម្ចាស់ដែលរកយុត្តិធម៌ឱ្យទូល‌បង្គំអើយ! ពេលទូល‌បង្គំដង្ហោយហៅរកព្រះ‌អង្គ សូមឆ្លើយតបមកទូល‌បង្គំផង! ពេលទូល‌បង្គំមានទុក្ខ‌ធុរៈ ព្រះ‌អង្គបានធ្វើឱ្យទូល‌បង្គំធូរស្បើយ។ សូមអាណិតមេត្តាទូល‌បង្គំ សូមព្រះ‌សណ្ដាប់ពាក្យអង្វររបស់ទូល‌បង្គំផង។
៣	មនុស្ស‌ម្នាទាំង‌ឡាយអើយ តើអ្នករាល់គ្នាជាន់ឈ្លីកិត្តិយសខ្ញុំដល់កាលណាទៀត? តើអ្នករាល់គ្នាចូលចិត្តចោទប្រកាន់ដោយឥតបានការ និងនិយាយកុហកមួលបង្កាច់ដល់កាលណាទៀត?
៤	ត្រូវដឹងថា ព្រះ‌អម្ចាស់តែង‌តែប្រោស‌ប្រណីមនុស្សស្មោះ‌ត្រង់ ពេលណាខ្ញុំស្រែកអង្វររកព្រះ‌អម្ចាស់ ព្រះ‌អង្គព្រះ‌សណ្ដាប់ខ្ញុំជា‌និច្ច។
៥	បើអ្នករាល់គ្នាច្រឡោតខឹង មិនត្រូវប្រព្រឹត្តអំពើបាបសោះឡើយ តែត្រូវដេកគិតពិចារណា ហើយរំងាប់ចិត្តទៅ។
៦	ចូរថ្វាយយញ្ញ‌បូជាដ៏សុចរិត ហើយពឹងផ្អែកលើព្រះ‌អម្ចាស់ចុះ។
៧	មនុស្សជាច្រើនពោលថា: តើនរណានាំសុភមង្គលមកឱ្យយើងខ្ញុំ? ព្រះ‌អម្ចាស់អើយ សូមទតមកយើងខ្ញុំ ដោយព្រះ‌ហឫទ័យសប្បុរសផង!
៨	ព្រះ‌អង្គបានដាក់អំណរនៅក្នុងចិត្តទូល‌បង្គំ ច្រើនជាងអំណរដែលគេមាននៅពេលច្រូតស្រូវ និងបេះផ្លែទំពាំង‌បាយ‌ជូរដ៏បរិបូណ៌ទៅទៀត។
៩	ពេលទូល‌បង្គំចូលដំណេក នោះទូល‌បង្គំនឹងដេកលក់ដោយសុខ‌សាន្តភ្លាម ឱព្រះ‌អម្ចាស់អើយ មានតែព្រះ‌អង្គទេ ដែលធ្វើឱ្យទូល‌បង្គំរស់នៅដោយសុខ‌ដុម‌រមនា។

ទំនុកតម្កើងលេខ ៤ (បទពាក្យ ៧)

២	ឱព្រះអម្ចាស់ថ្លៃបវរ	ដែលរកយុត្តិធម៌ឱ្យយើងខ្ញុំ
	ពេលទូលបង្គំអង្វរសុំ	សូមតបមកខ្ញុំកុំបង្អង់	។
	ពេលយើងខ្ញុំមានទុក្ខធុរៈ	ព្រះអង្គថ្នមថ្នាក់មិនឱ្យឆ្គង
	យើងបានធូរស្បើយផុតសៅហ្មង	សូមសណ្តាប់ផងដោយមេត្តា	។
៣	តើពួកមនុស្សទាំងអស់នោះ	ជាន់ឈ្លីកិត្តិយសខ្ញុំដល់ណា
	ហើយចូលចិត្តអ្វីមិនបានការ	និយាយមុសាដល់ណាទៀត	?
៤	ត្រូវដឹងថាព្រះជាអម្ចាស់	តែងប្រណីប្រោសមិនរវាត
	ពេលខ្ញុំស្រែករកព្រះអង្គឆ្លៀត	ស្តាប់ខ្ញុំមិនឃ្លាតជាប់ជានិច្	។
៥	ចូរស្អប់អំពើណាអាក្រក់	ស្មោកគ្រោកកខ្វក់មានកលល្បិច
	កុំប្រព្រឹត្តបាបទោះច្រើនតិច	ពេលដេកកុំភ្លេចពិចារណា	។
៦	ថ្វាយយញ្ញបូជាតាមវិន័យ	ពឹងផ្អែកក្សត្រថ្លៃគ្រងលោកា
	លះបង់ឱ្យអស់ក្តីមុសា	ថ្វាយ កាយ វាចា ចិត្ត ស្មោះត្រង់	។
៧	មានមនុស្សជាច្រើនតែងពោលថា	តើមាននរណានាំតម្រង់
	សុភមង្គលដ៏ត្រចង់	ឱ្យយើងខ្ញុំផងសូមទតចុះ	។
៨	ព្រះអង្គបានដាក់ក្តីអំណរ	សប្បាយអបអរចិត្តស្រស់បស់
	ជាងពេលប្រមូលផលទាំងអស់	និងពេលច្រូតបេះផលផ្លែផ្	។
៩	ពេលទូលបង្គំចូលដំណេក	ទូលបង្គំដេកស្កប់កាយា
	ព្រះអង្គឱ្យមនុស្សក្នុងលោកា	បានសុខរមនាតទៅអើយ	។
	សូមកោតសរសើរព្រះបិតា	ព្រះរាជបុត្រា ព្រះវិញ្ញាណ
	ដែលគង់ស្ថិតស្ថេរឥតសៅហ្មង	យូរលង់កន្លងតរៀងទៅ	។

ទំនុកតម្កើងលេខ ១៣៤ លើកដៃប្រណម្យទៅរកទីសក្ការៈ

នៅគ្រានោះ ព្រះ‌យេស៊ូយាងឡើងទៅលើភ្នំ ដើម្បីអធិ‌ស្ឋាន។ ព្រះ‌អង្គអធិ‌ស្ឋានពេញមួយយប់ (លក ៦,១២)។

រដូវធម្មតា និងបុណ្យឱឡារិក	អ្នកបម្រើរបស់ព្រះអម្ចាស់អើយ! ចូរនាំគ្នាសរសើរតម្កើងព្រះអង្គ។
រដូវរង់ចាំ	ទោះបីងងឹតយ៉ាងណាក្តី ចំពោះព្រះអង្គក៏នៅតែភ្លឺដដែល។
រដូវបុណ្យណូអែល	ក្នុងទីងងឹតមានពន្លឺលេចឡើងបំភ្លឺមនុស្សទៀងត្រង់។
រដូវត្រណម	ព្រះអម្ចាស់ជាពន្លឺ និងជាព្រះសង្រ្គោះខ្ញុំ ខ្ញុំមិនភ័យខ្លាចនរណាឡើយ។
រដូវបុណ្យចម្លង	អាលេលូយ៉ា! អាលេលូយ៉ា! អាលេលូយ៉ា!

១	អស់អ្នកដែលបម្រើព្រះ‌អម្ចាស់ ហើយស្ថិតនៅក្នុងព្រះ‌ដំណាក់របស់ព្រះ‌អង្គនាពេលយប់អើយ ចូរនាំគ្នាមកសរសើរតម្កើងព្រះ‌អម្ចាស់!
២	ចូរលើកដៃប្រណម្យទៅរកទី‌សក្ការៈ ចូរសរសើរតម្កើងព្រះ‌អម្ចាស់!
៣	សូមព្រះ‌អម្ចាស់ដែលបានបង្កើតផ្ទៃមេឃ និងផែន‌ដី ប្រទានពរដល់អ្នកពីក្រុងស៊ីយ៉ូន!។

ទំនុកតម្កើងលេខ ១៣៤ (បទពាក្យ ៧)

១	អស់អ្នកបម្រើព្រះអម្ចាស់	នៅក្នុងដំណាក់ពេលរាត្រី
	នាំគ្នាតម្កើងព្រះម្ចាស់ថ្ងៃ	ដ៏ខ្ពង់ខ្ពស់ក្រៃពេកអស្ចារ្យ	។
២	ចូរលើកដៃឡើងហើយប្រណម្យ	បែរទៅឱ្យចំទីសក្ការ
	ចូរច្រៀងសរសើរដោយជ្រះថ្លា	ថ្កើងព្រះចេស្តានៃព្រះអង្គ	។
៣	សូមព្រះអម្ចាស់ដែលបង្កើត	មេឃដីល្អឆើតកុំរេរង់
	សូមប្រទានពរដល់អ្នកផង	ពីក្រុងស៊ីយ៉ូនមកកុំខាន	។
	សូមកោតសរសើរព្រះបិតា	ព្រះរាជបុត្រា ព្រះវិញ្ញាណ
	ដែលគង់ស្ថិតស្ថេរឥតសៅហ្មង	យូរលង់កន្លងតរៀងទៅ	។

ព្រះបន្ទូលរបស់ព្រះជាម្ចាស់ (ទក ៦,៤-៧)

អ៊ីស្រា‌អែលអើយ ចូរស្ដាប់! មានតែព្រះ‌អម្ចាស់ ជាព្រះរបស់យើង មួយព្រះ‌អង្គគត់ ដែលពិតជាព្រះ‌អម្ចាស់។ អ្នកត្រូវស្រឡាញ់ព្រះ‌អម្ចាស់ ជាព្រះរបស់អ្នកឱ្យអស់ពីចិត្តគំនិត អស់ពីស្មារតី និងអស់ពីកម្លាំងកាយ។ ត្រូវទុកឱ្យព្រះ‌បន្ទូលដែលខ្ញុំប្រគល់ដល់អ្នកនៅថ្ងៃនេះ ដក់ជាប់នៅក្នុងចិត្តរបស់អ្នកជា‌និច្ច។ ចូរបង្រៀនកូនចៅរបស់អ្នកអំពីព្រះ‌បន្ទូលនេះ គឺត្រូវនិយាយឱ្យវាស្ដាប់ ពេលអ្នកនៅផ្ទះ ពេលធ្វើដំណើរ ពេលចូលដំណេក និងពេលក្រោកពីដំណេក។

បន្ទរៈ ទូលបង្គំសូមប្រគល់វិញ្ញាណរបស់ទូលបង្គំទៅក្នុងព្រះហស្តព្រះអង្គវិញ។

ព្រះជាម្ចាស់នឹងរក្សាសម្ពន្ធមេត្រីដែលព្រះអង្គចងជាមួយទូលបង្គំ ដោយមិនប្រែប្រួលឡើយ។
សូមកោតសរសើរព្រះបិតា ព្រះបុត្រា និងព្រះវិញ្ញាណដ៏វិសុទ្ធ។

ទំនុកតម្កើងរបស់លោកតាស៊ីម៉ូន (លក ២,២៩-៣២)

រដូវធម្មតា	បពិត្រព្រះបិតាជាអម្ចាស់! សូមសង្គ្រោះយើងខ្ញុំ នៅពេលយើងរង់ចាំព្រះអង្គ សូមរក្សាការពារយើងខ្ញុំនៅពេលកំពុងដេកលង់លក់ ដូច្នេះយើងខ្ញុំនឹងទន្ទឹងរង់ចាំព្រះអង្គជាមួយព្រះគ្រឹស្ត ហើយយើងខ្ញុំនឹងសម្រាកយ៉ាងសុខសាន្ត។
រដូវរង់ចាំ	អ្នកនឹងឃើញព្រះគ្រីស្តជាព្រះសង្គ្រោះ របស់អ្នក មុនពេលអ្នកត្រូវស្លាប់។
រដូវបុណ្យណូអែល	ខ្ញុំបានឃើញព្រះសង្គ្រោះដោយផ្ទាល់នឹងភ្នែក ព្រះអង្គជាពន្លឺបំភ្លឺមនុស្សលោក។
រដូវត្រណម	បពិត្រព្រះជាម្ចាស់ប្រកបដោយឫទ្ធានុភាពសព្វប្រការ ព្រះអង្គជាព្រះដ៏វិសុទ្ធ និងមានព្រះជន្មគង់នៅអស់កល្បជានិច្ច! សូមឱ្យធម៌មេត្តាករុណារបស់ព្រះអង្គស្ថិតនៅជាមួយយើងខ្ញុំ។
រដូវបុណ្យចម្លង	ព្រះអម្ចាស់មានព្រះជន្មរស់ឡើងវិញ អាលេលូយ៉ា! ព្រះអង្គប្រទានឱ្យយើងខ្ញុំបានពោរពេញដោយព្រះពន្លឺរបស់ព្រះអង្គ អាលេលូយ៉ា!។

២៩	«បពិត្រព្រះដ៏ជាចៅហ្វាយ! ឥឡូវនេះ ព្រះ‌អង្គបានសម្រេចតាមព្រះ‌បន្ទូលសន្យាហើយ។ ដូច្នេះ សូមឱ្យទូល‌បង្គំជាអ្នកបម្រើរបស់ព្រះ‌អង្គ លាចាកលោកនេះទៅ ដោយសុខ‌សាន្តផងចុះ
៣០	ដ្បិតភ្នែកទូល‌បង្គំបានឃើញការសង្គ្រោះ
៣១	ដែលព្រះ‌អង្គបានប្រទានមកឱ្យប្រជា‌ជាតិទាំងអស់
៣២	គឺជាពន្លឺដែលនាំឱ្យមនុស្សគ្រប់ជាតិសាសន៍ស្គាល់ព្រះ‌អង្គ និងជាសិរី‌រុងរឿងរបស់អ៊ីស្រា‌អែលជាប្រជា‌រាស្ដ្រព្រះ‌អង្គ»។
	សូមកោតសរសើរព្រះបិតា ព្រះបុត្រា និងព្រះវិញ្ញាណដ៏វិសុទ្ធ ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ។ អាម៉ែន។

ទំនុកតម្កើងរបស់លោកតាស៊ីម៉ូន លក ២,២៩-៣២ (បទពាក្យ ៧)

២៩	“បពិត្រព្រះម្ចាស់ជាចៅហ្វាយ	ពេលនេះឯងហើយទ្រង់សម្រេច
	តាមព្រះបន្ទូលគ្មានកលកិច្ច	សន្យាឥតភ្លេចលុះឥឡូវ	។
	ដូច្នេះសូមឱ្យរូបខ្ញុំជា	បំរើគ្រប់គ្រាផុតហ្មងសៅ
	សូមឱ្យខ្ញុំចាកលោកនេះទៅ	ខ្ញុំបានជួបនូវក្តីសុខសាន្ត	។
៣០	ព្រោះដ្បិតភ្នែកខ្ញុំបានឃើញច្បាស់	ពីការសង្គ្រោះមិនដែលខាន
៣១	ដែលព្រះអង្គទ្រង់ប្រោសប្រទាន	ដល់ប្រជាជនគ្រប់ជាតិសាសន៍	។
៣២	គឺជាពន្លឺដែលនាំឱ្យ	គ្រប់ជាតិជិតឆ្ងាយស្គាល់ព្រះម្ចាស់
	និងជាសិរីរុងរឿងច្បាស់	អ៊ីស្រាអែលជារាស្ត្រនៃព្រះអង្គ	។
	សូមកោតសរសើរព្រះបិតា	ព្រះរាជបុត្រា ព្រះវិញ្ញាណ
	ដែលគង់ស្ថិតស្ថេរឥតសៅហ្មង	យូរលង់កន្លងតរៀងទៅ	។

ពាក្យអធិដ្ឋាន

បពិត្រព្រះជាម្ចាស់ដែលមានព្រះជន្មគង់នៅអស់កល្បជានិច្ច! ព្រះអង្គទ្រង់ព្រះសណ្តាប់ពាក្យអង្វររបស់ព្រះគ្រី និងបានរំដោះព្រះអង្គឱ្យរួចពីសេចក្តីស្លាប់។ សូមព្រះអង្គកុំបណ្តោយឱ្យដួងចិត្តរបស់យើងខ្ញុំខ្វល់ខ្វាយឡើយ សូមឱ្យយើងខ្ញុំមានសេចក្តីសង្ឃឹមលើព្រះអង្គ នៅពេលយើងខ្ញុំស្ថិតនៅក្នុងទីងងឹត។ សូមបំពេញបំណងយើងខ្ញុំដោយព្រះហឫទ័យសប្បុរស ហើយសូមឱ្យយើងខ្ញុំរង់ចាំពន្លឺនៃការរស់ឡើងវិញ ដោយភាពស្ងៀមស្ងាត់ និងសេចក្តីសុខសាន្ត។ យើងខ្ញុំសូមទូលអង្វរព្រះអង្គ ដោយរួមជាមួយព្រះយេស៊ូជាព្រះគ្រីស្ត និងជាអម្ចាស់យើងខ្ញុំ។ អាម៉ែន។

សូមព្រះអម្ចាស់ប្រទានព្រះពរឱ្យយើងខ្ញុំ ហើយសូមឱ្យយើងខ្ញុំបានប្រកបដោយសេចក្តីសុខសាន្តជានិច្ចពីព្រះអង្គផង។ អាម៉ែន។