Liturgy of Hours - Catholic Faith Cambodia

អធិដ្ឋានពេលយប់ថ្ងៃអាទិត្យ | Prayer Sunday night

Posted on 29 ខែកក្កដា 202231 ខែកក្កដា 2024 by Catholic Faith Cambodia

ថ្ងៃអាទិត្យ
Sunday

ឱ! ព្រះអម្ចាស់អើយ! សូមយាងមកជួយទូលបង្គំ
សូមព្រះអម្ចាស់យាងមកជួយសង្គ្រោះយើងខ្ញុំផង!
សូមកោតសរសើរព្រះបិតា ព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក
ហើយជាដរាបតរៀងទៅ។ អាម៉ែន!
អាលេលូយ៉ា!

ឱ! ព្រះបិតាដ៏ឧត្តមអេីយ

១	ឱ! ព្រះបិតាដ៏ឧត្តមអើយ	ថ្ងៃជិតលិចហើយសូមទ្រង់មេត្តា
	ណែនាំយើងខ្ញុំឱ្យខំធ្វើការ	ដល់យប់កាលណានឹងបានធូរស្បើយ	។
២	សូមជួយយើងខ្ញុំឱ្យចេះកែខ្លួន	កាន់ចិត្តមាំមួនកុំរលាយឡើយ
	កុំឱ្យត្អូញត្អែរក្នុងការហត់នឿយ	តែខំបង្ហើយដោយក្តីឧស្សាហ៍	។
៣	សូមជួយយើងខ្ញុំឱ្យមានចិត្តត្រង់	ជឿតែព្រះអង្គគ្រប់ពេលវេលា
	បើយើងខ្ញុំភ្លេចមួយដងមួយគ្រា	សូមទ្រង់មេត្តាកុំចាប់ទោសពៃរ៍	។
៤	សូមព្រះបិតាទ្រង់ប្រោសប្រទាន	ឱ្យអ្នកស្រេកឃ្លានបានភោជន៍ចំណី
	បានឆ្អែតគ្រប់គ្នាជាប្រក្រតី	បានសុខសួស្តីសិរីមង្គល	។

ទំនុកតម្កើងលេខ ៩១ នៅក្រោមម្លប់បារមីព្រះដ៏ខ្ពង់ខ្ពស់បំផុត

ខ្ញុំទុកសេចក្ដីសុខ‌សាន្តឱ្យអ្នករាល់គ្នា ខ្ញុំផ្ដល់សេចក្ដីសុខ‌សាន្តរបស់ខ្ញុំឱ្យអ្នករាល់គ្នា។ សេចក្ដីសុខ‌សាន្តដែលខ្ញុំផ្ដល់ឱ្យនេះ មិនដូចសេចក្ដីសុខ‌សាន្តដែលមនុស្សលោកឱ្យទេ។ ចូរកុំរន្ធត់ចិត្ត កុំភ័យ‌ខ្លាចឱ្យសោះ (យហ ១៤,២៧)។

រដូវធម្មតា និងរដូវត្រណម	ព្រះអម្ចាស់នឹងការពារអ្នក ហេីយនៅពេលយប់ អ្នកនឹងមិនភ័យខ្លាចភាពអាសន្នឡេីយ។
រដូវរង់ចាំ និងបុណ្យឱឡារិក	ព្រះអង្គជាជំរក និងជាកំពែងការពារទូលបង្គំ។
រដូវបុណ្យណូអែល	ចូរពិនិត្យមេីល អ្នកនឹងឃេីញថា អ្នកនឹងទទួលការសង្រេ្គាះ។
រដូវបុណ្យចម្លង	អាលេលូយ៉ា! អាលេលូយ៉ា! អាលេលូយ៉ា!

១	អ្នកណារស់នៅក្រោមការគ្រប់‌គ្រងរបស់ព្រះដ៏ខ្ពង់‌ខ្ពស់បំផុត អ្នកនោះនឹងជ្រកនៅក្រោមម្លប់បារមីរបស់ព្រះដ៏មានឫទ្ធា‌នុភាពលើអ្វីៗទាំងអស់។
២	ខ្ញុំទូលព្រះ‌អម្ចាស់ថា: ព្រះ‌អង្គជាជម្រក និងជាកំពែងការ‌ពារទូល‌បង្គំ ព្រះ‌អង្គជាព្រះនៃទូល‌បង្គំ ទូល‌បង្គំផ្ញើជីវិតលើព្រះ‌អង្គ!
៣	ព្រះ‌អម្ចាស់រំដោះអ្នកឱ្យរួចផុតពីអន្ទាក់ ឱ្យរួចផុតពីជំងឺរាត‌ត្បាតផ្សេងៗ។
៤	ព្រះ‌អង្គនឹងការ‌ពារអ្នក អ្នកអាចជ្រកកោនក្រោមម្លប់បារមីរបស់ព្រះ‌អង្គ ព្រះ‌ហឫទ័យស្មោះ‌ស្ម័គ្ររបស់ព្រះ‌អង្គ ប្រៀបបីដូចជាខែល និងអាវ‌ក្រោះការ‌ពារអ្នក។
៥	នៅពេលយប់ អ្នកនឹងមិនភ័យខ្លាចគ្រោះថ្នាក់ដែលគួរឱ្យតក់‌ស្លុតនោះឡើយ នៅពេលថ្ងៃ អ្នកក៏នឹងមិនភ័យខ្លាចព្រួញដែលគេបាញ់មកដែរ។
៦	អ្នកនឹងមិនភ័យខ្លាចគ្រោះកាចនៅយប់ងងឹត ហើយក៏មិនភ័យខ្លាចមហន្ត‌រាយនៅពេលថ្ងៃត្រង់ដែរ។
៧	ទោះបីមានមនុស្សមួយពាន់នាក់ដួលស្លាប់នៅជិតអ្នក ហើយមានមនុស្សមួយ‌ម៉ឺននាក់ស្លាប់នៅខាងស្តាំអ្នកក្តី ក៏គ្មានអ្វីអាចប៉ះ‌ពាល់អ្នកឡើយ។
៨	ចូរសម្លឹងមើល អ្នកនឹងឃើញថា តើមនុស្សអាក្រក់ទទួលទោសយ៉ាងណា។
៩	ព្រះ‌អម្ចាស់ជាជម្រករបស់អ្នក អ្នកបានមកជ្រកកោនក្រោមម្លប់របស់ព្រះដ៏ខ្ពង់‌ខ្ពស់បំផុត។
១០	គ្មានទុក្ខវេទនាណាមួយកើតមានដល់អ្នកឡើយ ហើយក៏គ្មានគ្រោះកាចណាមួយចូលទៅជិតទីលំ‌នៅរបស់អ្នកដែរ
១១	ដ្បិតព្រះ‌អម្ចាស់នឹងបញ្ជាឱ្យពួកទេវទូតជួយអ្នក ពួកទេវទូតនឹងការ‌ពារអ្នកនៅគ្រប់ទីកន្លែងដែលអ្នកទៅ។
១២	ទេវទូតទាំងនោះនឹងចាំទ្រអ្នក មិនឱ្យជើងអ្នកប៉ះទង្គិចនឹងថ្មឡើយ។
១៣	អ្នកនឹងដើរជាន់សត្វសិង្ហ និងពស់‌វែក អ្នកនឹងជាន់ឈ្លីកូនសិង្ហ និងនាគ។
១៤	ព្រះ‌អម្ចាស់មានព្រះ‌បន្ទូលថា: «ដោយគេស្ថិតនៅជាប់នឹងយើង យើងនឹងជួយរំដោះគេ យើងនឹងការ‌ពារគេ ព្រោះគេទទួលស្គាល់ថាយើងជាព្រះ‌អម្ចាស់!
១៥	គេនឹងអង្វររកយើង ហើយយើងនឹងឆ្លើយតបមកគេវិញនៅពេលគេមានអាសន្ន យើងនឹងស្ថិតនៅជាមួយគេ យើងនឹងរំដោះគេ ព្រមទាំងលើកតម្កើងគេផង។
១៦	យើងនឹងឱ្យគេមានអាយុយឺន‌យូរ ហើយយើងនឹងឱ្យគេឃើញថា យើងពិតជាព្រះ‌សង្គ្រោះមែន»។
	សូមកេាតសរសេីរព្រះបិតា ព្រះបុត្រា និងព្រះវិញ្ញាណដ៏វិសុទ្ធ ដែលព្រះអង្គគង់នៅតាំងពីដេីមរៀងមក ហេីយជាដរាបតរៀងទៅ។ អាម៉ែន។

ទំនុកតម្កើងលេខ ៩១ (៩០) បទកាកគតិ

១	អ្នកដែលរស់ក្រោម	ការថែគ្រប់គ្រង	របស់ព្រះម្ចាស់
	ជាព្រះខ្ពង់ខ្ពស់	វិសុទ្ធពេកណាស់	មានឫទ្ធិតេជះ
		បារមីខ្លាំងក្រៃ ។
២	ខ្ញុំសូមទូលថាៈ	«ព្រះអម្ចាស់ជា	ជម្រកយប់ថ្ងៃ
	និងជាកំពែង	ជ្រកកោនផុតភ័យ	មិនបង្អង់អី
		ផ្ញើកាយជីវិត» ។
៣	ព្រះម្ចាស់តែងតែ	ជួយមិនគេចកែ	ឱ្យអ្នករួចផុត
	ចេញពីអន្ទាក់	ពួកជនទុច្ចរិត	ជំងឺរាតត្បាត
		ចង្រៃឧបទ្រព ។
៤	ទ្រង់នឹងការពារ	រូបអ្នកគ្រប់គ្នា	នៅជ្រកក្រោមម្លប់
	បារមីព្រះអង្គ	ទាំងថ្ងៃទាំងយប់	ឥតមានឈរឈប់
		ម្លប់ដ៏ត្រជាក់ ។
	ព្រះហឫទ័យ	មេត្តាប្រណី	មិនដែលថ្នាំងថ្នាក់
	របស់ព្រះអង្គ	ជួយការពារអ្នក	ជាអាវក្រោះពាក់
		របស់អ្នកហើយ ។
៥	នៅពេលរាត្រី	អ្នកនឹងមិនភ័យ	អំពីអ្វីឡើយ
	អាសន្នគ្រប់យ៉ាង	ចៀសផុតធូរស្បើយ	ពេលថ្ងៃក៏ដោយ
		ក៏អាចរួចផុត ។
៦	អ្នកនឹងមិនអាច	ជួបគ្រោះកំណាច	ក្នុងយប់ងងឹត
	ទាំងមហន្តរាយ	ទោះនៅឆ្ងាយជិត	ថ្ងៃត្រង់ក៏ផុត
		មិនអាចជួបសោះ ។
៧	ទោះបីជាមាន	មនុស្សម៉ឺនពាន់	ដេកស្លាប់ទាំងអស់
	ក៏មិនមានអ្វី	មកប៉ះអ្នកសោះ	ផុតអស់ទុក្ខគ្រោះ
		គ្មានព្រួយភិតភ័យ ។
៨	បើអ្នកពិនិត្យ	មើលឱ្យបានជិត	ឃើញច្បាស់ដូចថ្ងៃ
	ពីពួកមនុស្ស	អបលក្ខណ៍អប្រីយ៍	រងទោសរាល់ថ្ងៃ
		មិនមានអាក់ខាន ។
៩	ព្រះអម្ចាស់ជា	ជម្រកពន្លា	គ្មានអ្វីស្មើបាន
	អ្នកជ្រកក្រោមម្លប់	ព្រះខ្ពស់ហួសស្មាន	វិសុទ្ធថ្កើងថ្កាន
		នៅលើលោកីយ៍ ។
១០	គ្មានទុក្ខវេទនា	ណាមកពាធា	ធ្វើឱ្យអ្នកភ័យ
	ទោះជាគ្រោះកាច	ឧបសគ្គចង្រៃ	ចូលមិនបានអី
		ដល់លំនៅអ្នក ។
១១	ដ្បិតព្រះអម្ចាស់	នឹងបញ្ជាច្បាស់	ទេវទូតគ្រប់ថ្នាក់
	តាមជួយរក្សា	ការពាររូបអ្នក	គ្រប់ទីសំណាក់
		ដែលអ្នកនឹងនៅ ។
១២	ទេវទូតយកដៃ	ចាំទ្រថ្នមបី	មិនឱ្យហ្មងសៅ
	លើកអ្នកឱ្យឈរ	រឹងប៉ឹងពេកកូវ	មិនឱ្យជើងត្រូវ
		ទង្គិចថ្មឡើយ ។
១៣	អ្នកនឹងដើរជាន់	សត្វមានរាប់ពាន់	នៅជិតបង្កើយ
	សត្វគោកសត្វទឹក	សត្វព្រៃក៏ដោយ	ជាន់សិង្ហពស់ហើយ
		ទាំងសត្វនាគខ្លា ។
១៤	ព្រះអម្ចាស់មាន	ព្រះបន្ទូលថ្កាន	យ៉ាងច្បាស់មកថា
	យើងនឹងចេញមុខ	រំដោះរងការ	ដ្បិតគេស្គាល់ថា
		យើងជាព្រះគេ ។
១៥	បើគេស្រែករក	ហៅយើងឱ្យមក	យើងតបមិនរេ
	ពេលមានអាសន្ន	យើងនៅនឹងគេ	ឥតមានបែកបែរ
		ទាំងថ្កើងគេផង ។
១៦	យើងឱ្យគេបាន	រស់នៅសុខសាន្ត	យូរឆ្នាំកន្លង
	អាយុយឺនយូរ	មិនឱ្យមានហ្មង	ឱ្យគេដឹងផង
		ថាយើងសង្គ្រោះ ។
	សូមកោតសរសើរ	ដល់ព្រះបិតា	ព្រះរាជ្យបុត្រា
	និងព្រះវិញ្ញាណ	ជាព្រះត្រៃអង្គ	ថ្កើងថ្កានឥតហ្មង
		ដែលគង់ជានិច្ច ។

ព្រះបន្ទូលរបស់ព្រះជាម្ចាស់ (វវ ២២,៤-៥)

គេនឹងឃើញព្រះ‌ភក្ត្រព្រះ‌អង្គ ហើយនៅលើថ្ងាសគេក៏មានដៅព្រះ‌នាមព្រះ‌អង្គដែរ។ នៅក្រុងនោះ គ្មានយប់ទៀតទេ គេក៏លែងត្រូវការពន្លឺចង្កៀង ឬពន្លឺព្រះ‌អាទិត្យទៀតដែរ ដ្បិតព្រះ‌ជា‌អម្ចាស់ព្រះ‌អង្គជាពន្លឺបំភ្លឺគេ ហើយគេនឹងគ្រងរាជ្យអស់‌កល្បជាអង្វែងតរៀងទៅ។

បន្ទរៈ ទូលបង្គំសូមប្រគល់វិញ្ញាណរបស់ទូលបង្គំទៅក្នុងព្រះហស្តព្រះអង្គវិញ។

សូមបែរព្រះភក្រមកទតអ្នកបម្រើរបស់ព្រះអង្គ។
សូមកោតសរសើរព្រះបិតា ព្រះបុត្រា និងព្រះវិញ្ញាណដ៏វិសុទ្ធ។

ទំនុកតម្កើងរបស់លោកតាស៊ីម៉ូន (លក ២,២៩-៣២)

រដូវធម្មតា	បពិត្រព្រះបិតាជាអម្ចាស់! សូមសង្គ្រោះយើងខ្ញុំ នៅពេលយើងរង់ចាំព្រះអង្គ សូមរក្សាការពារយើងខ្ញុំនៅពេលកំពុងដេកលង់លក់ ដូច្នេះយើងខ្ញុំនឹងទន្ទឹងរង់ចាំព្រះអង្គជាមួយព្រះគ្រឹស្ត ហើយយើងខ្ញុំនឹងសម្រាកយ៉ាងសុខសាន្ត។
រដូវរង់ចាំ	អ្នកនឹងឃើញព្រះគ្រីស្តជាព្រះសង្គ្រោះរបស់អ្នក មុនពេលអ្នកត្រូវស្លាប់។
រដូវបុណ្យណូអែល	ខ្ញុំបានឃើញព្រះសង្គ្រោះដោយផ្ទាល់នឹងភ្នែក ព្រះអង្គជាពន្លឺបំភ្លឺមនុស្សលោក។
រដូវត្រណម	បពិត្រព្រះជាម្ចាស់ប្រកបដោយឫទ្ធានុភាពសព្វប្រការ ព្រះអង្គជាព្រះដ៏វិសុទ្ធ និងមានព្រះជន្មគង់នៅអស់កល្បជានិច្ច! សូមឱ្យធម៌មេត្តាករុណារបស់ព្រះអង្គស្ថិតនៅជាមួយយើងខ្ញុំ។
រដូវបុណ្យចម្លង	ព្រះអម្ចាស់មានព្រះជន្មរស់ឡើងវិញ អាលេលូយ៉ា! ព្រះអង្គប្រទានឱ្យយើងខ្ញុំបានពោរពេញដោយព្រះពន្លឺរបស់ព្រះអង្គ អាលេលូយ៉ា!។

២៩	«បពិត្រព្រះដ៏ជាចៅហ្វាយ! ឥឡូវនេះ ព្រះ‌អង្គបានសម្រេចតាមព្រះ‌បន្ទូលសន្យាហើយ។ ដូច្នេះ សូមឱ្យទូល‌បង្គំជាអ្នកបម្រើរបស់ព្រះ‌អង្គ លាចាកលោកនេះទៅ ដោយសុខ‌សាន្តផងចុះ
៣០	ដ្បិតភ្នែកទូល‌បង្គំបានឃើញការសង្គ្រោះ
៣១	ដែលព្រះ‌អង្គបានប្រទានមកឱ្យ ប្រជា‌ជាតិទាំងអស់
៣២	គឺជាពន្លឺដែលនាំឱ្យមនុស្សគ្រប់ជាតិសាសន៍ស្គាល់ព្រះ‌អង្គ និងជាសិរី‌រុងរឿងរបស់អ៊ីស្រា‌អែលជាប្រជា‌រាស្ដ្រព្រះ‌អង្គ»។
	សូមកោតសរសើរព្រះបិតា ព្រះបុត្រា និងព្រះវិញ្ញាណដ៏វិសុទ្ធ ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ។ អាម៉ែន។

ទំនុកតម្កើងរបស់លោកតាស៊ីម៉ូន លក ២,២៩-៣២ (បទពាក្យ ៧)

២៩	“បពិត្រព្រះម្ចាស់ជាចៅហ្វាយ	ពេលនេះឯងហើយទ្រង់សម្រេច
	តាមព្រះបន្ទូលគ្មានកលកិច្ច	សន្យាឥតភ្លេចលុះឥឡូវ	។
	ដូច្នេះសូមឱ្យរូបខ្ញុំជា	បំរើគ្រប់គ្រាផុតហ្មងសៅ
	សូមឱ្យខ្ញុំចាកលោកនេះទៅ	ខ្ញុំបានជួបនូវក្តីសុខសាន្ត	។
៣០	ព្រោះដ្បិតភ្នែកខ្ញុំបានឃើញច្បាស់	ពីការសង្គ្រោះមិនដែលខាន
៣១	ដែលព្រះអង្គទ្រង់ប្រោសប្រទាន	ដល់ប្រជាជនគ្រប់ជាតិសាសន៍	។
៣២	គឺជាពន្លឺដែលនាំឱ្យ	គ្រប់ជាតិជិតឆ្ងាយស្គាល់ព្រះម្ចាស់
	និងជាសិរីរុងរឿងច្បាស់	អ៊ីស្រាអែលជារាស្ត្រនៃព្រះអង្គ	។
	សូមកោតសរសើរព្រះបិតា	ព្រះរាជបុត្រា ព្រះវិញ្ញាណ
	ដែលគង់ស្ថិតស្ថេរឥតសៅហ្មង	យូរលង់កន្លងតរៀងទៅ	។

ពាក្យអធិដ្ឋាន

បពិត្រព្រះបិតាជាអម្ចាស់ដ៏ខ្ពង់ខ្ពស់បំផុត! ព្រះបន្ទូលដែលជាពន្លឺអស់កល្បជានិច្ចបានបំភ្លឺភ្នែករបស់យើងខ្ញុំ។ យប់នេះ សូមព្រះអង្គរក្សាការពារវិញ្ញាណរបស់យើងខ្ញុំដោយសុខសាន្តផង ហើយនៅពេលដែលជីវិតរបស់ខ្ញុំផុតរលត់ទៅ សូមឱ្យយើងខ្ញុំបានចូលទៅក្នុងស្ថានបរមសុខ ដោយរួមជាមួយព្រះយេស៊ូជាព្រះគ្រីស្ត និងជាព្រះអម្ចាស់យើងខ្ញុំ។ អាម៉ែន។

សូមព្រះអម្ចាស់ គឺព្រះបិតា ព្រះបុត្រា និងព្រះវិញ្ញាណដ៏វិសុទ្ធរក្សាការពារ និងប្រទានព្រះពរឱ្យយើងខ្ញុំផង។ អាម៉ែន។