ថ្ងៃព្រហស្បតិ៍
Thursday

ឱ! ព្រះអម្ចាស់អើយ! សូមយាងមកជួយទូលបង្គំ
សូមព្រះអម្ចាស់យាងមកជួយសង្គ្រោះយើងខ្ញុំផង!
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក
ហើយជាដរាបតរៀងទៅ។ អាម៉ែន!
អាលេលូយ៉ា!

អស់មួយជីវិត

បន្ទរ	អស់មួយជីវិត	ខ្ញុំច្រៀងសរសើរ	ព្រះយេស៊ូគ្រីស្ត
	ឱ ! ព្រះម្ចាស់អើយ	មួយជីវិតខ្ញុំ	ខ្ញុំលើកត​ម្កេីងតែព្រះនាមនេះ	។
១	ព្រះម្ចាស់ផ្តល់ឱ្យ	នូវអំណោយទាន	ជារៀងរាល់ថ្ងៃ
	ហើយព្រះអង្គបាន	អត់ទោសឱ្យខ្ញុំ	ដោយហប្ញទ័យស្មោះ	។
២	សូមរាជ្យព្រះអង្គ	មកលើផែនដី	ដូចនៅលើមេឃ
	សូមឱ្យមនុស្សលោក	ចេះស្រឡាញ់គ្នា	ដូចជាបងប្អូន	។
៣	សូមឱ្យយើងខ្ញុំ	ចាកក្តីស្រេកឃ្លាន	និងភ្លើងសង្គ្រាម
	សូមឱ្យផែនដី	ចាកផុតពីក្តី	អាក្រក់ទាំងឡាយ	។

ទំនុកតម្កើងលេខ ១៦ បពិត្រព្រះអម្ចាស់! ព្រះអង្គជាចំណែកមត៌ករបស់ខ្ញុំ

ពេលខ្ញុំទៅរៀបចំកន្លែងទុកឱ្យអ្នករាល់គ្នាហើយ ខ្ញុំនឹងត្រលប់មកវិញយកអ្នករាល់គ្នាទៅជាមួយ ដើម្បីឱ្យអ្នករាល់គ្នាបាននៅកន្លែងដែលខ្ញុំនៅ។ (យហ ១៤,៣)

រដូវធម្មតា	រូបកាយរបស់ទូលបង្គំសំរាកដោយសុខសាន្ត ។
រដូវរង់ចាំ	សូមព្រះអង្គយាងមកបង្ហាញទូលបង្គំឱ្យស្គាល់ផ្លូវទៅកាន់ជីវិត។
រដូវបុណ្យណូអែល	ខ្ញុំទូលព្រះអម្ចាស់ថា ព្រះអង្គជាព្រះជាម្ចាស់នៃទូលបង្គំ។
រដូវត្រណម	ឱ! ព្រះជាម្ចាស់នៃទូលបង្គំអើយ! ព្រះអង្គមិនអាចបោះបង់ទូលបង្គំចោលឱ្យស្លាប់ឡើយ។
រដូវបុណ្យចម្លង	អាលេលូយ៉ា! អាលេលូយ៉ា! អាលេលូយ៉ា!

១	ឱ! ព្រះអម្ចាស់អើយ! សូមការពារទូលបង្គំផង ដ្បិតទូលបង្គំមកជ្រកកោនក្រោមម្លប់បារមីព្រះអង្គហើយ!
២	ខ្ញុំទូលព្រះអម្ចាស់ថា ព្រះអង្គជាព្រះអម្ចាស់នៃទូលបង្គំ ក្រៅពីព្រះអង្គ គ្មានអ្វីផ្ដល់សុភមង្គលឱ្យទូលបង្គំឡើយ។
៣	អារក្សអ្នកតា ម្ចាស់ទឹកម្ចាស់ដីដែលទូលបង្គំពេញចិត្តយ៉ាងខ្លាំងកាលពីមុន
៤	កាន់តែធ្វើឱ្យអស់អ្នកដែលតែងតែគោរពថ្វាយបង្គំ រងទុក្ខវេទនា ទូលបង្គំនឹងមិនចូលរួមធ្វើយញ្ញព្រះក្លែងក្លាយទាំងនោះទៀតឡើយ ទូលបង្គំនឹងមិនពោលនាមព្រះទាំងនោះទៀតដែរ។
៥	បពិត្រព្រះអម្ចាស់ ព្រះអង្គជាចំណែកមត៌កនៃទូលបង្គំហើយ! ព្រះអង្គប្រទានអ្វីទាំងអស់ដែលទូលបង្គំប្រាថ្នាចង់បាន ជីវិតរបស់ទូលបង្គំស្ថិតនៅលើព្រះអង្គ។
៦	ព្រះអង្គប្រទានកេរមត៌កដ៏ល្អវិសេសក្រៃលែងមកទូលបង្គំ គឺជាចំណែកមត៌កដ៏ល្អប្រសើរបំផុត។
៧	ទូលបង្គំសរសើរតម្កើងព្រះអម្ចាស់ ព្រោះព្រះអង្គផ្តល់យោបល់ដល់ទូលបង្គំ សូម្បីតែនៅពេលយប់ ព្រះអង្គក៏ដាស់តឿនចិត្តគំនិតទូលបង្គំដែរ។
៨	ទូលបង្គំនឹកគិតដល់ព្រះអម្ចាស់ជាប់ជានិច្ច ដោយព្រះអង្គគង់នៅខាងស្តាំទូលបង្គំ ទូលបង្គំមិនភ័យញ័រសោះឡើយ។
៩	ហេតុនេះហើយបានជាចិត្តទូលបង្គំរីករាយ ទូលបង្គំត្រេកអរយ៉ាងលើសលប់ រូបកាយរបស់ទូលបង្គំក៏សម្រាកដោយសុខសាន្តដែរ។
១០	ដ្បិតព្រះអង្គមិនបោះបង់ចោលទូលបង្គំឱ្យស្លាប់ឡើយ ព្រះអង្គក៏មិនបណ្តោយឱ្យសពអ្នកបម្រើរបស់ព្រះអង្គត្រូវរលួយដែរ។
១១	ព្រះអង្គបង្ហាញទូលបង្គំឱ្យស្គាល់ផ្លូវទៅកាន់ជីវិត។ ដោយព្រះអង្គគង់នៅជាមួយ ទូលបង្គំមានអំណរដ៏បរិបូណ៌ នៅខាងស្តាំព្រះអង្គ ទូលបង្គំរីករាយអស់កល្បជានិច្ចដែរ។
	សូមកោតសរសេរីព្រះបិតា និងព្រះបុត្រា និងព្រះវិញ្ញាណដ៏វិសុទ្ធ ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ។ អាម៉ែន។

ទំនុកតម្កើងលេខ ១៦(១៥) បទពាក្យ៧

១	ឱ! ព្រះជាម្ចាស់ដ៏ឧត្តម	សូមការពារខ្ញុំឱ្យសុខសាន្ត
	ដ្បិតទូលបង្គំសុំផ្ញើប្រាណ	ជ្រកក្រោមទីស្ថានម្លប់បារមី	។
២	ខ្ញុំសូមទូលថ្វាយព្រះម្ចាស់ថា	ព្រះអង្គពិតជាអម្ចាស់ថ្លៃ
	ក្រៅពីព្រះអង្គឥតមានអ្វី	ផ្តល់មង្គលជ័យគ្រាអាសន្ន	។
៣	អារុក្ខអារក្សអ្នកតាព្រៃ	ម្ចាស់ទឹកម្ចាស់ដីកាលពីមុន
	ដែលខ្ញុំពេញចិត្តខ្លាំងពេកពន់	ផ្តល់តែទារុណរាល់វេលា	។
៤	ទូលបង្គំនឹងមិនចូលរួម	មិនទទួលព្រមរួមជាគ្នា
	គោរពនិងថ្វាយយញ្ញបូជា	មិនពោលនាមាព្រះក្លែងក្លាយ	។
៥	បពិត្រព្រះអ​​​​​​ម្ចាស់ឧត្តម	ព្រះអង្គជាចំណែកស្រស់ស្រាយ
	មរតកនៃខ្ញុំឥតក្លែងក្លាយ	ផ្តល់អ្វីទាំងឡាយតាមប្រាថ្នា	។
៦	ព្រះអង្គប្រទានកេរមតក	វិសេសឥតអាក់ដ៏ថ្លៃថ្លា
	មកទូលបង្គំខ្ញុំនេះណា	ជាកេរអស្ចារ្យប្រសើរផុត	។
៧	ខ្ញុំសូមតម្កើងព្រះអម្ចាស់	ព្រោះព្រះអង្គនេះសែនមោះមុត
	ទ្រង់ផ្តល់យោបល់ខ្ញុំម្នាក់គត់	ទោះយប់ងងឹតក៏តឿនដែរ	។
៨	ខ្ញុំនឹកដល់ព្រះអម្ចាស់ជាប់	ដែលជាទម្លាប់ទ្រង់គង់ក្បែរ
	ខាងស្តាំរូបខ្ញុំឥតប្រួលប្រែ	ខ្ញុំមិនបែកបែរញាប់ញ័រឡើយ	។
៩	ហេតុនេះបានជាខ្ញុំរីករាយ	ត្រេកអរសប្បាយបានល្ហែល្ហើយ
	ខ្ញុំបានសម្រាកកាយធូរស្បើយ	ដោយសុខសាន្តហើយផុតកង្វល់	។
១០	ដ្បិតព្រះអង្គមិនបោះបង់ខ្ញុំ​​	ឱ្យរងទុក្ខធំស្លាប់សោតសល់
	ព្រះអង្គក៏មិនបណ្តោយដល់	សពបម្រើផ្ទាល់ស្អុយរលួយ	។
១១	ព្រះអង្គបង្ហាញផ្លូវជីវិត	ឱ្យខ្ញុំឃើញពិតគ្មានភ័យព្រួយ
	ដោយព្រះអង្គគង់នៅជាមួយ	ទូលបង្គំគ្មានព្រួយអរសប្បាយ	។
	ដោយព្រះអង្គគង់នៅខាងស្តាំ	ជាប់ជាប្រចាំមិនជិនណាយ
	ទូលបង្គំសែនរីករាយសប្បាយ	អស់កល្បវែងឆ្ងាយតរៀងទៅ	។
	សូមកោតសរសើរព្រះបិតា	ព្រះបុត្រានិងព្រះវិញ្ញាណ
	ដែលគង់ស្ថិតស្ថេរឥតសៅហ្មង	យូរលង់កន្លងតរៀងទៅ	។

ព្រះបន្ទូលរបស់ព្រះជាម្ចាស់ ១ថស ៥,២៣

សូមព្រះជាម្ចាស់ជាប្រភពនៃសេចក្ដីសុខសាន្ដ ប្រោសបងប្អូនឱ្យបានវិសុទ្ធទាំងស្រុង។ សូមព្រះអង្គថែរក្សាខ្លួនបងប្អូនទាំងមូល ទាំងវិញ្ញាណ ទាំងព្រលឹង ទាំងរូបកាយឱ្យបានស្អាតឥតសៅហ្មង នៅថ្ងៃព្រះយេស៊ូគ្រីស្ដជាអម្ចាស់នៃយើងយាងមក។

បន្ទរៈ ទូលបង្គំសូមប្រគលវិញ្ញាណរបស់ទូលបង្គំទៅក្នុងព្រះហស្ដព្រះអង្គវិញ។

• ឱព្រះនៃទូលបង្គំអើយ! សូមសង្គ្រោះអ្នកបម្រើរបស់ព្រះអង្គ ដែលផ្ញើជីវិតលើព្រះអង្គនេះផង។
• សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ

ទំនុកតម្កើងរបស់លោកតាស៊ីម៉ូន លក ២,២៩-៣២

រដូវធម្មតា

បពិត្រព្រះបិតាជាអម្ចាស់! សូមសង្រ្គោះយើងខ្ញុំនៅពេលយើងខ្ញុំរង់ចាំព្រះអង្គ សូមរក្សាការពារយើងខ្ញុំនៅពេលកំពុង ដេកលង់លក់ ដូច្នេះ យើងខ្ញុំនឹងទន្ទឹងរង់ចាំព្រះអង្គជាមួយព្រះគ្រីស្ត ហើយយើងខ្ញុំនឹងសម្រាកយ៉ាងសុខសាន្ត។

២៩	«បពិត្រព្រះដ៏ជាចៅហ្វាយ! ឥឡូវនេះព្រះអង្គបានសំរេចតាមព្រះបន្ទូលសន្យាហើយ។ ដូច្នេះ សូមឱ្យទូលបង្គំជាអ្នកបម្រើរបស់ព្រះអង្គ លាចាកលោកនេះទៅដោយសុខសាន្តផងចុះ
៣០	ដ្បិតភ្នែកទូលបង្គំបានឃើញការសង្គ្រោះ
៣១	ដែលព្រះអង្គបានប្រទានមកឱ្យប្រជាជាតិទាំងអស់
៣២	គឺ​ជា​ពន្លឺ​ដែល​នាំ​ឱ្យ​មនុស្សគ្រប់​ជាតិ​សាសន៍​ស្គាល់​ព្រះ‌អង្គ និងជាសិរីរុងរឿងរបស់អ៊ីស្រាអែលជាប្រជារាស្ត្រព្រះអង្គ» ។
	សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ។ អាម៉ែន។

២៩	បពិត្រព្រះម្ចាស់ជាចៅហ្វាយ	ពេលនេះឯងហើយទ្រង់សម្រេច
	តាមព្រះបន្ទូលគ្មានកលកិច្ច	សន្យាឥតភ្លេចលុះឥឡូវ	។
	ដូច្នេះសូមអោយរូបខ្ញុំជា	បម្រើគ្រប់គ្រាផុតហ្មងសៅ
	សូមឱ្យខ្ញុំចាកលោកនេះទៅ	ខ្ញុំបានជួបនូវក្តីសុខសាន្ត	។
៣០	ព្រោះដ្បិតភ្នែកខ្ញុំបានឃើញច្បាស់	ពីការសង្គ្រោះមិនដែលខាន
៣១	ដែលព្រះអង្គទ្រង់ប្រោសប្រទាន	ដល់ប្រជាជនគ្រប់ជាតិសាសន៍	។
៣២	គឺជាពន្លឺដែលនាំឱ្យ	គ្រប់ជាតិជិតឆ្ងាយស្គាល់ព្រះម្ចាស់
	និងជាសិរីរុងរឿងច្បាស់	អ៊ីស្រាអែលជារាស្ត្រនៃព្រះអង្គ	។
	សូមកោតសរសើរព្រះបិតា	ព្រះបុត្រានិងព្រះវិញ្ញាណ
	ដែលគង់ស្ថិតស្ថេរឥតសៅហ្មង	យូរលង់កន្លងតរៀងទៅ	។

ពាក្យអធិដ្ឋាន

បពិត្រព្រះបិតាជាអម្ចាស់ និងជាចំណែកមត៌ករបស់យើងខ្ញុំ! សូមព្រះអង្គធ្វើឱ្យយើងខ្ញុំខិតខំស្វែងរកសុភមង្គលដែលមកតែពីព្រះអង្គប៉ុណ្ណោះ ដូច្នេះ យើងខ្ញុំនឹងរង់ចាំអំណរសប្បាយ ដោយសេចក្តីសង្ឃឹមរួមជាមួយព្រះអង្គ ទោះបីយើងខ្ញុំត្រូវរងទុក្ខលំបាក រហូតដល់បាត់បង់ជីវិតក៏ដោយ។ យើងខ្ញុំសូមទូលអង្វរព្រះអង្គ ដោយរួមជាមួយព្រះយេស៊ូជាព្រះគ្រឹស្ត និងជាអម្ចាស់យើងខ្ញុំ។ អាម៉ែន។

សូមព្រះជាម្ចាស់ធ្វើឱ្យសេចក្តីសុខសាន្តដែលមកពីព្រះអង្គ រក្សាចិត្តគំនិត និងដួងចិត្តរបស់យើងខ្ញុំ ក្នុងអង្គព្រះគ្រីស្តជាអម្ចាស់យើងខ្ញុំផង។ អាម៉ែន។

---