ថ្ងៃពុធ
Wednesday

ឱ! ព្រះអម្ចាស់អើយ! សូមយាងមកជួយទូលបង្គំ
សូមព្រះអម្ចាស់យាងមកជួយសង្គ្រោះយើងខ្ញុំផង!
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក
ហើយជាដរាបតរៀងទៅ។ អាម៉ែន!
អាលេលូយ៉ា!

យើងខ្ញុំទាំងអស់គ្នាអររីករាយ

១	យើងខ្ញុំទាំងអស់គ្នាអររីករាយ	ដោយបានជួបជុំគ្នានៅទីនេះ
	ដើម្បីបន្លឺសូរស័ព្ទចម្រៀង	ច្រៀងថ្វាយព្រះម្ចាស់អស់ពីឱរា	។
២	យើងខ្ញុំសូមជឿជាក់ប្រាកដមែន	ព្រះអង្គគង់សណ្ឋិតនៅទីនេះ
	យើងខ្ញុំសូមលើកហត្ថឡើងវន្ទា	ក្រាបថ្វាយបង្គំព្រះមហាក្សត្រ	។
៣	យើងខ្ញុំសូមស្រឡាញ់ព្រះអម្ចាស់	ដែលបានផ្តល់ជីវ៉ាឱ្យយើងខ្ញុំ
	ហេតុនេះយើងខ្ញុំសូមធ្វើសច្ចា	ស្រឡាញ់ព្រះម្ចាស់ស្រឡាញ់បងប្អូន	។
៤	យើងខ្ញុំសូមសង្ឃឹមលើព្រះអង្គ	សង្ឃឹមថាព្រះអង្គរំដោះទុក្ខ
	សង្ឃឹមបានចូលស្ថានបរមសុខ	សប្បាយរីករាយអស់កល្បជានិច្ច	។

ទំនុកតម្កើងលេខ ៣១ ឱ!ព្រះអម្ចាស់អើយ! ខ្ញុំសូមប្រគល់ចិត្ដខ្ញុំទៅក្នុងព្រះហស្ដព្រះអង្គ

«ព្រះបិតា! ទូលបង្គំសូមប្រគល់វិញ្ញាណរបស់ទូលបង្គំទៅក្នុងព្រះហស្ដព្រះអង្គវិញ»។ (លក ២៣,៦)

រដូវធម្មតា	ព្រះអម្ចាស់ជាសិលា និងជាកំពែងការពារទូលបង្គំ។
រដូវរង់ចាំ	អាយុជីវិតរបស់ទូលបង្គំស្ថិតនៅក្នុងព្រះហស្ដរបស់ព្រះអង្គហើយ សូមសង្គ្រោះទូលបង្គំ។
រដូវបុណ្យណូអែល	ខ្ញុំរង់ចាំព្រះអង្គជាងអ្នកយាមរង់ចាំពេលព្រឹកទៅទៀត។
រដូវត្រណម	ឱ!ព្រះដ៏សុចរិតអើយ! សូមមករំដោះទូលបង្គំជាប្រញាប់។
រដូវបុណ្យចម្លង	អាលេលូយ៉ា! អាលេលូយ៉ា! អាលេលូយ៉ា!

២	បពិត្រព្រះអម្ចាស់ ទូលបង្គំសូមជ្រកក្រោមម្លប់ព្រះបារមីព្រះអង្គ សូមកុំឱ្យទូលបង្គំខកចិត្តឡើយ
៣	ឱ!ព្រះដ៏សុចរិតអើយ! សូមរំដោះទូលបង្គំផង។ សូមផ្ទៀងព្រះកាណ៌ស្តាប់ទូលបង្គំ សូមមករំដោះទូលបង្គំជាប្រញាប់!
៤	សូមធ្វើជាថ្មដា និងជាកំពែងការពារទូលបង្គំ ហើយសង្គ្រោះទូលបង្គំផង!។ ដ្បិតព្រះអង្គជាសិលា និងជាកំពែងការពារទូលបង្គំ
៥	សូមដឹកដៃនាំផ្លូវទូលបង្គំ ដោយយល់ដល់ព្រះនាមព្រះអង្គ។ សូមប្រោសឱ្យទូលបង្គំបានរួចពីអន្ទាក់ដែលពួកគេដាក់ចាំចាប់ទូលបង្គំ។
	ដ្បិតព្រះអង្គជាកំពែងការពារទូលបង្គំហើយ។ ទូលបង្គំសូមប្រគល់វិញ្ញាណរបស់ទូលបង្គំ ទៅក្នុងព្រះហស្ដព្រះអង្គវិញ។
៧	បពិត្រព្រះអម្ចាស់ ជាព្រះដែលអាចទុកចិត្តបាន ព្រះអង្គបានដោះលែងទូលបង្គំ។ ទូលបង្គំសូមផ្ញើជីវិតលើព្រះអង្គហើយ ទូលបង្គំស្អប់អស់អ្នកដែលបម្រើព្រះក្លែងក្លាយ។
៨	ទូលបង្គំមានចិត្តត្រេកអរសប្បាយជាខ្លាំង ដោយព្រះអង្គមានព្រះហឫទ័យមេត្តាករុណាចំពោះទូលបង្គំ ព្រះអង្គទតឃើញទុក្ខវេទនារបស់ទូលបង្គំ ព្រះអង្គជ្រាបថា ទូលបង្គំមានទុក្ខលំបាក។
៩	ព្រះអង្គមិនបណ្តោយឱ្យទូលបង្គំធ្លាក់ទៅក្នុងកណ្តាយរបស់ខ្មាំងសត្រូវឡើយ។ ព្រះអង្គប្រទានឱ្យទូលបង្គំមានសេរីភាព និងងើបឡើងវិញ។ សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន។

ទំនុកតម្កើងលេខ ៣១(៣០) បទកាកគតិ

២	ឱព្រះអម្ចាស់	ខ្ញុំសូមប្រកាស	សូមជ្រកក្រោមម្លប់
	ជារៀងរហូត	ឥតមានឈរឈប់	ទាំងថ្ងៃទាំងយប់
		សូមរំដោះផង	។
៣	សូមទ្រង់ផ្ទៀងស្តាប់	ពាក្យខ្ញុំរៀបរាប់	មិនឱ្យមានឆ្គង
	សូមរំដោះខ្ញុំ	ឱ្យឆាប់តែម្តង	ជាកំពែងផង
		សង្គ្រោះរូបខ្ញុំ	។
៤	ទ្រង់ជាសិលា	កំពែងថ្មដា	ពាំងទូលបង្គំ
	សូមជួយដឹកនាំ	ឆ្លងផ្លូវតូចធំ	តម្រង់ទិសខ្ញុំ
		ដោយយល់ព្រះនាម	។
៥	សូមប្រោសឱ្យរួច	ពីពួកមនុស្សខូច	ពួនឃ្លាំចាំយាម
	សូមជួយរំដោះ	ពីអន្ទាក់ភ្លាម	ដ្បិតតែព្រះនាម
		ទ្រង់ជួយការពារ	។
៦	ខ្ញុំសូមប្រគល់	វិញ្ញាណនិមល	ថ្វាយអង្គក្សត្រា
	ទៅក្នុងព្រះហស្ត	ព្រះម្ចាស់ហើយណា	ព្រោះព្រះអង្គជា
		ព្រះទុកចិត្តបាន	។
៧	ទូលបង្គំសូមផ្ញើ	ជីវិតទៅលើ	ព្រះម្ចាស់ថ្កើងថ្កាន
	ហើយខ្ញុំក៏ស្អប់	មនុស្សចិត្តសាមាន្យ	ស្មោះស្ម័គ្រផ្ញើប្រាណ
		លើព្រះក្លែងក្លាយ	។
៨	ចិត្តខ្ញុំស្រស់ថ្លា	អរឥតឧបមា	រីករាយសប្បាយ
	ដោយសារព្រះអង្គ	ទ្រង់មានព្រះទ័យ	ករុណាប្រណី
		ពេលខ្ញុំវេទនា	។
៩	ទ្រង់មិនបណ្តោយ	ឱ្យរូបខ្ញុំធ្លោយ	ខ្លោចផ្សាគ្រាំគ្រា
	ធ្លាក់ទៅក្នុងដៃ	របស់បច្ចា	សូមទ្រង់ករុណា
		មេត្តាប្រណី	។
	សូមកោតសរសើរ	ដល់ព្រះបិតា	ព្រះរាជ្យបុត្រា
	និងព្រះវិញ្ញាណ	ជាព្រះត្រៃឯក	ថ្កើងថ្កានឥតហ្មង
		ដែលគង់ជានិច្ច	។

ទំនុកតម្កើងលេខ ១៣០ ព្រះអង្គតែងតែអត់ទោសជានិច្ច

ព្រះយេស៊ូនឹងសង្គ្រោះប្រជារាស្រ្ដព្រះអង្គឱ្យរួចពីបាបរបស់គេ (​មថ ១,២១)។

បន្ទរៈ ព្រះអង្គតែងតែអត់ទោសឱ្យយើងខ្ញុំជានិច្ច។ ខ្ញុំផ្ញើជីវិតលើព្រះអង្គទាំងស្រុង។

១	បពិត្រព្រះអម្ចាស់! ទូលបង្គំស្រែកអង្វរព្រះអង្គពីក្នុងរណ្ដៅដ៏ជ្រៅ
២	ឱ!ព្រះអម្ចាស់អើយ! សូមទ្រង់ព្រះសណ្តាប់ទូលបង្គំផង! សូមផ្ទៀងព្រះកាណ៌ស្តាប់ពាក្យទទូចអង្វររបស់ទូលបង្គំផង!
៣	បពិត្រព្រះអម្ចាស់! ប្រសិនបើព្រះអង្គចងចាំកំហុសរបស់យើងខ្ញុំទុកនោះ គ្មាននរណាម្នាក់អាចរួចខ្លួនបានឡើយ។
៤	ប៉ុន្តែ ព្រះអង្គតែងតែអត់ទោសឱ្យយើងខ្ញុំជានិច្ច ដូច្នេះ យើងខ្ញុំគោរពកោតខ្លាចព្រះអង្គ។
៥	ខ្ញុំទុកចិត្តលើព្រះអម្ចាស់ ខ្ញុំផ្ញើជីវិតលើព្រះអង្គទាំងស្រុង។ ខ្ញុំសង្ឃឹមលើព្រះបន្ទូលរបស់ព្រះអង្គ។
៦	ខ្ញុំទន្ទឹងរង់ចាំព្រះអម្ចាស់ជាងអ្នកយាមរង់ចាំពេលព្រឹកទៅទៀត។
៧	អ៊ីស្រាអែលអើយ! ចូរទុកចិត្តលើព្រះអម្ចាស់ ដ្បិតព្រះអង្គប្រកបដោយព្រះហឫទ័យមេត្តាករុណា ព្រះអង្គសព្វព្រះហឫទ័យរំដោះអ្នកជានិច្ច!
៨	ព្រះអង្គនឹងរំដោះអ៊ីស្រាអែលឱ្យរួចពីកំហុសទាំងប៉ុន្មានដែលគេបានប្រព្រឹត្ត។
	សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ។ អាម៉ែន។

១	បពិត្រព្រះជាអម្ចាស់អើយ	ខ្ញុំស្រែកដង្ហើយរកព្រះអង្គ
	ពីក្នុងរណ្តៅជ្រៅកន្លង	មេត្តាជួយផងផុតពីស្លាប់	។
២	សំឡេងខ្ញុំឮដូចចំរៀង	សូមព្រះអង្គផ្ទៀងព្រះកាណ៌ស្តាប់
	ពាក្យខ្ញុំអង្វរទទូចប្រាប់	រៀបរាប់រ៉ាយរ៉ាប់សូមសន្តោស	។
៣	បពិត្រព្រះម្ចាស់ដ៏ឧត្តម	បើព្រះអង្គចាំពីកំហុស
	អំពើបាបកម្មជនស្រីប្រុស	គ្មានម្នាក់ណាសោះរួចខ្លួនឡើយ	។
៤	ប៉ុន្តែព្រះអង្គតែងអត់ទោស	ប្រណីសន្តោសខ្ញុំធូរស្បើយ
	រួចផុតទុក្ខទោសបានល្ហែល្ហើយ	គឺព្រះអង្គហើយខ្ញុំគោរព	។
៥	ខ្ញុំទុកចិត្តលើព្រះអម្ចាស់	ជីវិតខ្ញុំនេះផ្ញើសព្វគ្រប់
	សង្ឃឹមលើព្រះបន្ទូលគាប់	មិនឈរមិនឈប់ទេព្រះអង្គ	។
៦	ខ្ញុំទន្ទឹងចាំព្រះអម្ចាស់	ជាងអ្នកយាមផ្ទះទៅទៀតផង
	ពេលឃើញថ្ងៃរះស្រស់បំព្រង	រួចផុតទុក្ខផងមួយរាត្រី	។
៧	ឱ! អ៊ីស្រាអែលសូមទុកចិត្ត	ព្រះល្អវិសុទ្ធដោយព្រះទ័យ
	មេត្តាករុណាត្រាប្រណី	ទ្រង់សព្វព្រះទ័យជួយជានិច្ច	។
៨	ព្រះអង្គរំដោះអ៊ីស្រាអែល	ពីកំហុសដែលមានច្រើនតិច
	គេបានប្រព្រឹត្តជាប់ជានិច្ច	ព្រះអង្គសម្រេចបានសុខសាន្ត	។
	សូមកោតសរសើរព្រះបិតា	ព្រះបុត្រានិងព្រះវិញ្ញាណ
	ដែលគង់ស្ថិតស្ថេរឥតសៅហ្មង	យូរលង់កន្លងតរៀងទៅ	។

រដូវធម្មតា

បពិត្រព្រះបិតាជាអម្ចាស់! សូមសង្គ្រោះយើងខ្ញុំ នៅពេលយើងរង់ចាំព្រះអង្គ សូមរក្សាការពារយើងខ្ញុំនៅពេលកំពុង​ ដេកលង់លក់។ ដូច្នេះ យើងខ្ញុំនឹងទន្ទឹងរង់ចាំព្រះអង្គជាមួយព្រះគ្រីស្ត ហើយយើងខ្ញុំនឹងសម្រាកយ៉ាងសុខសាន្ត។

២៩	«បពិត្រ​ព្រះ​ដ៏​ជា​ចៅហ្វាយ! ឥឡូវ​នេះ ព្រះ‌អង្គ​បាន​សម្រេច​តាមព្រះ‌បន្ទូល​សន្យា​ហើយ។ ដូច្នេះ សូម​ឱ្យទូល‌បង្គំជា​អ្នក​បម្រើ​របស់​ព្រះ‌អង្គ លា​ចាក​លោក​នេះ​ទៅដោយ​សុខ‌សាន្ត​ផង​ចុះ
៣០	ដ្បិត​ភ្នែក​ទូល‌បង្គំ​បាន​ឃើញ​ការ​សង្គ្រោះ
៣១	ដែល​ព្រះ‌អង្គ​បាន​ប្រទាន​មក​ឱ្យប្រជា‌ជាតិ​ទាំង​អស់
៣២	គឺ​ជា​ពន្លឺ​ដែល​នាំ​ឱ្យ​មនុស្សគ្រប់​ជាតិ​សាសន៍​ស្គាល់​ព្រះ‌អង្គ និង​ជា​សិរី‌រុង​រឿង​របស់​អ៊ីស្រា‌អែលជា​ប្រជា‌រាស្ដ្រ​ព្រះ‌អង្គ»។
	សូមកោតសរសើរព្រះបិតា ព្រះបុត្រា និងព្រះវិញ្ញាណដ៏វិសុទ្ធ ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ។ អាម៉ែន។

ទំនុកតម្កើងរបស់លោកតាស៊ីម៉ូន លក ២,២៩-៣២ (បទពាក្យ ៧)

២៩	“បពិត្រព្រះម្ចាស់ជាចៅហ្វាយ	ពេលនេះឯងហើយទ្រង់សម្រេច
	តាមព្រះបន្ទូលគ្មានកលកិច្ច	សន្យាឥតភ្លេចលុះឥឡូវ	។
	ដូច្នេះសូមឱ្យរូបខ្ញុំជា	បំរើគ្រប់គ្រាផុតហ្មងសៅ
	សូមឱ្យខ្ញុំចាកលោកនេះទៅ	ខ្ញុំបានជួបនូវក្តីសុខសាន្ត	។
៣០	ព្រោះដ្បិតភ្នែកខ្ញុំបានឃើញច្បាស់	ពីការសង្គ្រោះមិនដែលខាន
៣១	ដែលព្រះអង្គទ្រង់ប្រោសប្រទាន	ដល់ប្រជាជនគ្រប់ជាតិសាសន៍	។
៣២	គឺជាពន្លឺដែលនាំឱ្យ	គ្រប់ជាតិជិតឆ្ងាយស្គាល់ព្រះម្ចាស់
	និងជាសិរីរុងរឿងច្បាស់	អ៊ីស្រាអែលជារាស្ត្រនៃព្រះអង្គ	។
	សូមកោតសរសើរព្រះបិតា	ព្រះរាជបុត្រា ព្រះវិញ្ញាណ
	ដែលគង់ស្ថិតស្ថេរឥតសៅហ្មង	យូរលង់កន្លងតរៀងទៅ	។

ពាក្យអធិដ្ឋាន

បពិត្រព្រះយេស៊ូជាអម្ចាស់! នឹមរបស់ព្រះអង្គស្រួល ហើយបន្ទុកដែលព្រះអង្គដាក់លើយើងខ្ញុំក៏ស្រាលដែរ។ ដូច្នេះ យើងខ្ញុំសូមប្រគល់បន្ទុកដែលយើងខ្ញុំមាននៅថ្ងៃនេះ ទៅក្នុងព្រះហស្ដព្រះអង្គវិញ សូមឱ្យយើងខ្ញុំបានសម្រាកនៅក្បែរព្រះអង្គ ដោយព្រះអង្គសោយរាជ្យរួមជាមួយព្រះបិតា និងព្រះវិញ្ញាណដ៏វិសុទ្ធ អស់កល្បជាអង្វែងតរៀងទៅ។

សូមព្រះដ៏មានតេជានុភាពសព្វប្រការ បណ្តេញសេចក្ដីអាក្រក់ទាំងប៉ុន្មានឱ្យឃ្លាតឆ្ងាយពីយើងខ្ញុំ ហើយសូមឱ្យយើងខ្ញុំបានទទួលព្រះពរពីព្រះអង្គវិញ។

---