ថ្ងៃសៅរ៍ ទី១២ ខែតុលា ឆ្នាំ២០២៤

សូមថ្លែងលិខិតរបស់គ្រីស្ដទូតប៉ូលផ្ញើជូនគ្រីស្ដបរិស័ទស្រុកកាឡាទី កាឡ ៣,២២-២៩

បងប្អូនជាទីស្រលាញ់!
ក្នុងគម្ពីរមានចែងថា អ្វីៗទាំងអស់សុទ្ធតែនៅក្រោមអំណាច​បាប ដើម្បីឱ្យអស់អ្នកជឿបានទទួលផលស្របតាមព្រះបន្ទូលសន្យា ព្រោះគេមានជំនឿ​លើព្រះយេស៊ូគ្រីស្ដ។ មុនពេលជំនឿមកដល់ យើងជាប់ឃុំឃាំងក្រោមអំណាចរបស់​ធម្មវិន័យទាំងរងចាំជំនឿដែលនឹងត្រូវ​លេច​ចេញមក។ ដូច្នេះ ធម្មវិន័យមាននាទីណែនាំយើងទៅកាន់ព្រះគ្រីស្ដ ដើម្បីឱ្យយើងបានសុចរិតដោយសារជំនឿ។ កាលណា​ជំនឿមកដល់ហើយ យើងមិនស្ថិតនៅក្រោមធម្មវិន័យដែលបានណែនាំយើងនោះ​ទៀតទេ​ ដ្បិតដោយសារជំនឿលើព្រះគ្រីស្ដយេស៊ូ បងប្អូនសុទ្ធតែជាបុត្រធីតារបស់ព្រះ​​ជាម្ចាស់។ បងប្អូនទាំងអស់គ្នាដែលបានទទួលពិធីជ្រមុជទឹក ដើម្បីឱ្យបានរួមជាមួយ​ព្រះគ្រីស្ដ បងប្អូនក៏មានព្រះគ្រីស្ដនៅជាប់ជាមួយដែរ។ ដូច្នេះ គ្មានសាសន៍យូដា គ្មានសាសន៍ក្រិកទៀតទេ ហើយក៏គ្មានអ្នកងារ គ្មានអ្នកជា គ្មានបុរស គ្មានស្រ្តីទៀតដែរ គឺបងប្អូនទាំងអស់បានរួមគ្នាមកជាអង្គតែមួយ ក្នុងព្រះ​គ្រីស្ដយេស៊ូ។ ប្រសិនបើបងប្អូនចូលរួមជាមួយព្រះគ្រីស្ដ បងប្អូនពូជពង្សរបស់លោក​អប្រាហាំ ហើយក៏ត្រូវទទួលមត៌កតាមព្រះបន្ទូលសន្យាដែរ។

ទំនុកតម្កើងលេខ ១០៥ (១០៤) ,២-៧ បទកាកគតិ

ពិធីអបអរសាទរព្រះគម្ពីរដំណឹងល្អតាម លក​ ១១,២៨

សូមថ្លែងព្រះគម្ពីរដំណឹងល្អតាមសន្តលូកា លក ១១,២៧-២៨

ព្រះយេស៊ូកំពុងតែមានព្រះបន្ទូល ស្រាប់តែមានស្រ្ដីម្នាក់បន្លឺសំឡេងចេញពីចំណោម​បណ្ដាជនទូលព្រះអង្គថា៖«ស្រ្តីដែលបានបង្កើតលោក ព្រមទាំងបានបំបៅលោក ពិតជា​​មានសុភមង្គលមែន‌! »។ ប៉ុន្តែ ព្រះយេស៊ូមានព្រះបន្ទូលតបថា៖«អ្នកណាស្ដាប់ព្រះបន្ទូល​របស់ព្រះជាម្ចាស់ ហើយអនុវត្តន៍តាម គឺអ្នកនោះហើយដែលមានសុភមង្គលពិតមែន»។