ថ្ងៃសៅរ៍ ទី១៨ ខែកក្កដា ឆ្នាំ២០២៦

សូមថ្លែងព្រះគម្ពីរព្យាការីមីកា មីក ២,១-៥

អស់អ្នកដែលគិតគូរគម្រោងការទុច្ចរិត ព្រមទាំងដេកសញ្ជឹងគិតរកឧបាយកល លុះព្រឹកឡើង ប្រើអំណាចរបស់ខ្លួនសម្រេចតាមគម្រោងការនេះ មុខជាត្រូវវេទនា​ពុំខាន! បើគេប៉ុនប៉ងចង់បានស្រែចម្ការណា គេដណ្តើមយកស្រែចម្ការនោះ។ បើគេប៉ុនប៉ងចង់បានផ្ទះណា គេ​រឹបអូសយកផ្ទះនោះ ព្រមទាំងធ្វើបាបម្ចាស់ផ្ទះ និង​គ្រួសារ ហើយដណ្តើមយកកេរមត៌ករបស់គាត់ផង។ ហេតុនេះ ព្រះអម្ចាស់មានព្រះបន្ទូលថា៖«យើងកំពុងតែរៀបចំផែនការដាក់ទោស​មនុស្សប្រភេទនេះ។ ខ្មាំងនឹងជាន់កអ្នករាល់គ្នា អ្នករាល់គ្នានឹងដើរឱនមុខ ដ្បិតពេល​នោះ ជាពេលវេទនាយ៉ាងខ្លាំង។ នៅថ្ងៃនោះ មនុស្សម្នានឹងយករឿងអ្នកទៅសើច​លេង ហើយចងក្រងជាទំនួញសម្រាប់ស្មូត្រថា ពួកយើងបានបាត់បង់អ្វីៗទាំងអស់! ខ្មាំងលេបទឹកដីដែលជាមត៌ករបស់ពួកយើង! បច្ចាមិត្តដេញពួកយើងចេញពីស្រុក រួចយកទឹកដីចែកគ្នា!។ ហេតុនេះ ពេលប្រជាជនរបស់ព្រះអម្ចាស់បែងចែកដីគ្នា គ្មាន​នរណាម្នាក់វាស់ដីចែកឱ្យអ្នកឡើយ»។

ទំនុកតម្កើងលេខ ១០ (៩),១-៤.៧-៨.១៤ បទព្រហ្មគីតិ

ពិធីអបអរសាទរព្រះគម្ពីរដំណឹងល្អតាម ទន ១៤៧ ១.៣

សូមថ្លែងព្រះគម្ពីរដំណឹងល្អតាមសន្តម៉ាថាយ មថ ១២,១៤-២១

ពួកខាងគណៈផារីស៊ីពិគ្រោះគ្នារកមធ្យោបាយធ្វើគុតព្រះយេស៊ូ។ កាលព្រះយេស៊ូជ្រាបដូច្នោះ ព្រះអង្គយាងចាកចេញពីទីនោះ ទាំងមានមហាជនជាច្រើនដើរតាមព្រះអង្គទៅដែរ។ ព្រះអង្គបានប្រោសពួកគេឱ្យជាពីជំងឺទាំងអស់គ្នា តែព្រះអង្គគំរាមគេយ៉ាងម៉ឺងម៉ាត់ មិនឱ្យនិយាយប្រាប់អ្នកដទៃថា ព្រះអង្គជានរណាឡើយ ដើម្បីឱ្យស្របទៅនឹងសេចក្តីដែលមានចែងទុកដោយសារព្យាការីអេសាយ​ថា៖ «លោកនេះហើយជាអ្នកបម្រើដែលយើងបានជ្រើសរើស ជាអ្នកដែលយើងស្រឡាញ់ ហើយធ្វើឱ្យចិត្តយើងរីករាយ យើងនឹងដាក់វិញ្ញាណរបស់យើងឱ្យសណ្ឋិតលើលោក ហើយលោកនឹងប្រាប់ឱ្យជាតិសាសន៍ទាំងអស់ស្គាល់សេចក្តីសុចរិត។ លោកនឹងមិនឈ្លោះប្រកែកជាមួយនរណាឡើយ ហើយក៏មិនស្រែកដាក់នរណាផង។ គ្មាននរណាឮសំឡេងរបស់លោកនៅតាមទីផ្សារទេ។ លោកនឹងមិនកាច់ដើមត្រែងណា ដែលទក់​ហើយនោះឡើយ ហើយក៏មិនផ្លុំពន្លត់ភ្លើងណាដែលហៀបនឹងរលត់នោះដែរ។ គឺលោកធ្វើដូច្នេះ រហូតដល់លោកនាំសេចក្តីសុច​រិតឱ្យមានជ័យជម្នះ។ ជាតិសាសន៍​ទាំងអស់នឹងនាំគ្នាសង្ឃឹមលើលោក»។