ថ្ងៃព្រហស្បតិ៍ ទី០៣ ឆ្នូ ២០២៦

សន្តហ្រ្វង់ស្វ័រសាវីយេជាបូជាចារ្យ

លោកហ្វ្រង់ស្វ័រ កើតនៅគ.ស ១៥០៦ ក្នុងភូមិសាវីយេ នៅប្រទេសអេស្ប៉ាញ។ លោកទៅរៀនសូត្រនៅមហាវិទ្យាល័យក្រុងប៉ារីស។ នៅទីនោះ លោកជួបនិស្សិតម្នាក់ដូចគាត់ឈ្មោះ អ៊ីញ៉ាស ជាអ្នកភូមិឡូយ៉ូឡា។ នៅឆ្នាំ១៥៣៤ លោកអ៊ីញ៉ាស លោកហ្វ្រង់ស្វ័រ ព្រមទាំងមិត្តសម្លាញ់ខ្លះទៀតនាំគ្នាធ្វើសច្ចាប្រណិធានបម្រើព្រះយេស៊ូអស់មួយជីវិត។ លោកទាំងនោះបង្កើតក្រុមគ្រួសារបព្វជិតមួយដែលមានឈ្មោះថា “សហជីវិនព្រះយេស៊ូ”។ លោកហ្វ្រង់ស្វ័រទទួលអគ្គសញ្ញាតែងតាំងជាបូជាចារ្យនៅឆ្នាំ១៥៣៧ រួចចេញដំណើរទៅប្រកាសដំណឹងល្អនៅទ្វីបអាស៊ី។ លោកប្រកាសដំណឹងល្អនៅប្រទេសឥណ្ឌា ម៉ាឡាយូ ឥណ្ធូណេស៊ី និងជប៉ុន។ លោកទទួលមរណភាពក្នុងជន្មាយុ៤៦ឆ្នាំ នៅពេលលោកមានបំណងចង់ចូលប្រទេសចិន។ លោកប្រកាសដំណឹងល្អនៅកោះម៉ូលូក (ឥណ្ឌូនេស៊ីសព្វថ្ងៃ) ជាកន្លែង ដែលគ្រីស្តបរិស័ទចេញមកនៅកម្ពុជានាឆ្នាំ១៦៦០។ សន្តហ្វ្រង់ស្វ័រ ជាឧបការីសាសនទូត ដែលចេញប្រកាសដំណឹងល្អនៅប្រទេសមិនទាន់មានព្រះសហគមន៍។

ពាក្យអធិដ្ឋានពេលចូល

បពិត្រព្រះអម្ចាស់ប្រកបដោយតេជានុភាពសព្វប្រការ! យើងខ្ញុំសូមលើកតម្កើងព្រះអង្គ ដែលជាទីពឹងដ៏មាំមួនការពារយើងខ្ញុំជានិច្ច។ សូមព្រះអង្គបង្ហាញឫទ្ធានុភាពរបស់ព្រះអង្គ និងគាំទ្រយើងខ្ញុំផង។ សូមទ្រង់ព្រះមេត្តាសង្គ្រោះយើងខ្ញុំនៅពេលឆាប់ៗខាងមុខនេះ សូមកុំឱ្យអំពើបាបរបស់យើងខ្ញុំ រារាំងផ្លូវព្រះអង្គឡើយ។

អត្ថបទទី១៖ សូមថ្លែងព្រះគម្ពីរព្យាការីអេសាយ ២៦,១-៦

នៅថ្ងៃនោះ អ្នកស្រុកយូដានឹងច្រៀងបទដូចតទៅ៖«យើងមានក្រុងមួយដ៏មាំមួន ព្រះអម្ចាស់បានដាក់កំពែង និងលើកដីទួលជុំវិញក្រុងនេះសម្រាប់ការពារយើង។ ចូរបើកទ្វារឡើង ឱ្យប្រជាជនដ៏សុចរិតដែលកាន់វិន័យដោយចិត្តស្មោះចូលផង។ បពិត្រព្រះអម្ចាស់ ! ព្រះអង្គប្រទានសេចក្តីសុខសាន្តត្រាណជានិច្ចនិរន្តរ៍ ព្រោះគេជឿសង្ឃឹមលើព្រះអង្គ។ ចូរជឿសង្ឃឹមលើព្រះអម្ចាស់ជានិច្ចចុះ ដ្បិតព្រះអម្ចាស់ប្រៀបបាននឹងថ្មដែលនៅស្ថិតស្ថេរអស់កល្បជាអង្វែងតរៀងទៅ។ ព្រះអង្គបានបន្ទាបមនុស្សមានចិត្តឆ្មើងឆ្មៃ ទ្រង់ក៏រំលំបន្ទាយនៅទីខ្ពស់ឱ្យធ្លាក់ដល់ដី ហើយកប់ក្នុងធូលីដីទៀតផង។ អ្នកតូចតាច និងអ្នកទន់ខ្សោយនឹងដើរជាន់លើក្រុងនេះ។

ទំនុកតម្កើងលេខ ១១៨,១.៨.១៩-២១.២៥-២៦ បទពាក្យ ៧

ពិធីអបអរសាទរព្រះគម្ពីរដំណឹងល្អតាម អស ៥៥,៦

អាលេលូយ៉ា! អាលេលូយ៉ា!
យើងនាំគ្នាស្វែងរកព្រះម្ចាស់នៅពេលព្រះអង្បណ្តោយឱ្យរកឃើញបាន យើងនាំគ្នាអង្វរព្រះអង្គ នៅពេលព្រះអង្គគង់នៅជិតយើង!។ អាលេលូយ៉ា!

សូមថ្លែងព្រះគម្ពីរដំណឹងល្អតាមសន្ដម៉ាថាយ មថ ៧,២១.២៤-២៧

នៅគ្រានោះ ក្រុមសាវ័កជួបជុំជាមួយព្រះយេស៊ូនៅលើភ្នំ ជុំវិញព្រះយេស៊ូ។ ព្រះអង្គមានព្រះបន្ទូលទៅកាន់ពួកគេថា៖ «អ្នកដែលចូលទៅក្នុងព្រះរាជ្យនៃស្ថានបរមសុខ មិនមែនអ្នកដែលគ្រាន់តែហៅខ្ញុំថា “ព្រះអម្ចាស់! ព្រះអម្ចាស់!”ប៉ុណ្ណោះទេ គឺអ្នកដែលធ្វើតាមព្រះហឫទ័យរបស់ព្រះបិតាខ្ញុំដែលគង់នៅស្ថានបរមសុខនោះវិញ។
អ្នកណាស្តាប់ពាក្យខ្ញុំនេះ ហើយប្រព្រឹត្តតាម អ្នកនោះប្រៀបបានទៅនឹងមនុស្សមានប្រាជ្ញាម្នាក់ដែលបានសង់ផ្ទះរបស់ខ្លួននៅលើផ្ទាំងថ្ម។ ទោះបីភ្លៀងបង្អុរចុះមក ហើយមានទឹកជន់ មានខ្យល់បក់បោកប៉ះនឹងផ្ទះនោះយ៉ាងណាក៏ដោយ ក៏ផ្ទះនោះមិនរលំដែរ ព្រោះមានគ្រឹះនៅលើផ្ទាំងថ្ម។ រីឯអ្នកដែលស្តាប់ពាក្យខ្ញុំនេះ តែមិនប្រព្រឹត្តតាម ប្រៀបបានទៅនឹងមនុស្សឥតប្រាជ្ញាម្នាក់ ដែលបានសង់ផ្ទះរបស់ខ្លួននៅលើដីខ្សាច់។ ពេលភ្លៀងបង្អុរចុះមក ហើយមានទឹកជន់ មានខ្យល់បក់បោកប៉ះនឹងថ្មនោះ ផ្ទះនោះរលំបាក់បែកខ្ទេចអស់គ្មានសល់»។

ពាក្យថ្វាយតង្វាយ

បពិត្រព្រះអម្ចាស់ជាព្រះបិតា! ព្រះអង្គសព្វព្រះហឫទ័យប្រទានព្រះបន្ទូលព្រះអង្គឱ្យយើងខ្ញុំ។ យើងខ្ញុំសូមថ្វាយកាយ វាចា ចិត្តទៅព្រះអង្គ ។ សូមទ្រង់ព្រះមេត្តាពង្រឹងជំនឿរបស់យើងខ្ញុំឱ្យមាំមួនផង។

ពាក្យអរព្រះគុណ

បពិត្រព្រះអម្ចាស់ជាព្រះបិតា! យើងខ្ញុំសូមអរព្រះគុណព្រះអង្គដែលបានប្រោសយើងខ្ញុំឱ្យរួបរួមជាមួយព្រះគ្រីស្ត និងឱ្យទៅជាព្រះកាយព្រះគ្រីស្តក្នុងពិភពលោកនេះ។ សូមទ្រង់ព្រះមេត្តាប្រោសយើងខ្ញុំឱ្យគោរពបម្រើព្រះអង្គ ដោយមិនគ្រាន់តែពោលពាក្យសម្តីប៉ុណ្ណោះទេ គឺដោយប្រព្រឹត្តកិច្ចការទាំងអស់ ស្របតាមព្រះហឫទ័យព្រះអង្គជានិច្ចវិញផង។