សេផានី - Catholic Faith Cambodia

សម្ពន្ធមេត្រីចាស់ | Old Testament 46

១. គម្ពីរធម្មវិន័យ | Pentateuch 5

២. គម្ពីរប្រវត្តិសាស្រ្ត | History 16

៣. គម្ពីរប្រាជ្ញាញាណ | Wisdom 7

៤. គម្ពីរព្យាការី | Prophet 18

សម្ពន្ធមេត្រីថ្មី | New Testament 27

១. គម្ពីរដំណឹងល្អ | Gospels 4

២. គម្ពីរប្រវត្តិសាស្រ្ត | History 1

កិច្ចការគ្រីស្តទូត (កក)
Acts of the Apostles (Ac)

៣. លិខិតសន្តប៉ូល | Paul Letter 13

៤. សំណេរសកល | Catholic Letter 5

៥. សំណេរសន្តយ៉ូហាន | John Writing 4

^{កណ្ឌគម្ពីរ}
ព្យាការីសេផានី

ពាក្យលំនាំ

សេផា‌នី

(ព្យាការីសេផា‌នី)

ពាក្យលំនាំ

ពេលព្យាការីសេផា‌នីនាំព្រះ‌បន្ទូលរបស់ព្រះ‌អម្ចាស់ ទៅថ្លែងប្រាប់ប្រជាជនយូដានោះ ប្រហែលជានៅចុងសតវត្សទី៧ មុនគ្រីស្ត‌សករាជ។ ពេលលោកថ្លែងព្រះ‌បន្ទូលនេះ ព្រះ‌បាទយ៉ូស្យាសពុំទាន់បានធ្វើការកែទម្រង់ជំនឿសាសនានៅឡើយទេ (សូមអាន ២ពង្ស.២៣:១-២៨) ហើយស្រុកយូដាកំពុងតែឆ្លងកាត់ស្ថាន‌ភាពមួយដ៏សែនលំបាក។ ដូច្នេះ ប្រហែលជាលោកបម្រើព្រះ‌ជាម្ចាស់មុនព្យាការីហាបា‌គូក។ នៅគ្រានោះ អ្នកដែលមានចិត្តសង្ស័យហើយចោទសួរថា តើព្រះ‌ជាម្ចាស់រវី‌រវល់នឹងមនុស្សលោកឬយ៉ាងណា? តើព្រះ‌អង្គពិតជាគ្រប់‌គ្រងលើប្រវត្តិ‌សាស្ត្រមែនឬទេ? ព្យាការីសេផា‌នីឆ្លើយតបទៅពួកគេវិញ ដោយប្រកាសថា ព្រះ‌ជាម្ចាស់នឹងធ្វើអន្តរា‌គមន៍មកលើប្រជា‌រាស្ដ្ររបស់ព្រះ‌អង្គ តាមរបៀបពីរយ៉ាង: មុនដំបូងព្រះ‌អង្គនឹងយាងមកវិនិច្ឆ័យទោសអ្នកស្រុកយូដា ព្រមទាំងអ្នកក្រុងយេរូ‌សាឡឹម (១:១-២:៣) ព្រះ‌អង្គរំលាយជាតិសាសន៍ដែលនៅជុំ‌វិញជនជាតិយូដា (២:៤-១៥)។ បន្ទាប់មក ព្រះ‌អង្គនឹងស្តារក្រុងយេរូ‌សាឡឹមឡើងវិញ ក្រោយពីបានជម្រះអំពើបាបចេញអស់ពីទីក្រុង ហើយទុកឲ្យមានប្រជាជនមួយចំនួន ដែលក្រីក្រទុរគត និងមានចិត្តទន់‌ទាប ឲ្យនៅសេស‌សល់ ក្នុងគោលបំណងបំផ្លាស់បំប្រែមនុស្សជាតិទាំងមូល (៣:១-២០)។

លោកសេផា‌នីប្រកាសថា ដរាបណាប្រជាជនមិនព្រមកម្ចាត់មនុស្សដែលស្វែងរកប្រយោជន៍ផ្ទាល់ខ្លួន ជាជាងធ្វើតាមបង្គាប់របស់ព្រះ‌ជាម្ចាស់ ឲ្យអស់ពីក្នុងចំណោមពួកគេទេ នោះពួកគេពុំអាចមានទំនាក់‌ទំនងដ៏ពិតប្រាកដជាមួយព្រះ‌អង្គបានឡើយ។ ប៉ុន្តែ លោកសម្ដែងភាពទន់‌ភ្លន់ចំពោះមនុស្សទន់‌ទាបនៅក្នុងស្រុក (២.៣, ៣.១២)។

១

១ នេះជាព្រះ‌បន្ទូលដែលព្រះ‌អម្ចាស់ថ្លែងមកកាន់លោកសេផា‌នី ជាកូនរបស់លោកគូស៊ី ជាចៅរបស់លោកកេដេ‌លីយ៉ា ជាចៅ‌ទួតរបស់លោកអម៉ា‌រីយ៉ា និងជាចៅ‌លួតរបស់លោកអេសេខ្យាស នៅរជ្ជកាលព្រះ‌បាទយ៉ូស្យាស ជាបុត្ររបស់ព្រះ‌បាទអម៉ូន ស្តេចស្រុកយូដា។

ព្រះ‌បន្ទូលព្រមានស្រុកយូដា និងក្រុងយេរូ‌សាឡឹម

២ ព្រះ‌អម្ចាស់មានព្រះ‌បន្ទូលថា៖

«យើងនឹងលុបបំបាត់អ្វីៗឲ្យអស់ពីផែន‌ដី

៣ យើងនឹងលុបបំបាត់ទាំងមនុស្ស ទាំងសត្វ

យើងនឹងលុបបំបាត់សត្វដែលហើរនៅលើមេឃ

ព្រមទាំងត្រីដែលស្ថិតនៅក្នុងសមុទ្រ។

យើងនឹងកម្ទេចអ្វីៗដែលនាំឲ្យ

មនុស្សអាក្រក់ជំពប់ដួល

ព្រមទាំងលុបបំបាត់មនុស្សឲ្យអស់ពីផែន‌ដី

- នេះជាព្រះ‌បន្ទូលរបស់ព្រះ‌អម្ចាស់។

៤ យើងនឹងលើកដៃប្រហារស្រុកយូដា

និងប្រជាជនទាំងអស់នៅក្រុងយេរូ‌សាឡឹម

យើងនឹងកម្ទេចអ្វីៗដែលគេនៅតែប្រើ‌ប្រាស់

សម្រាប់គោរពព្រះបាល

ព្រមទាំងលែងឲ្យមាននរណានឹកនាដល់

ពួកអាចារ្យ និងពួកបូជា‌ចារ្យរបស់

ព្រះនោះទៀត។

៥ យើងក៏កម្ទេចអស់អ្នកដែលឡើងលើផ្ទះ

ដើម្បីថ្វាយ‌បង្គំផ្កាយ

ព្រមទាំងអស់អ្នកដែលក្រាបថ្វាយ‌បង្គំយើង

ហើយស្បថក្នុងនាមយើងជាព្រះ‌អម្ចាស់ផង

ស្បថក្នុងនាមព្រះមីលកុមរបស់គេផង។

៦ យើងនឹងកម្ទេចអស់អ្នកដែលងាកចេញពីយើង

ជាព្រះ‌អម្ចាស់ អស់អ្នកដែលមិនស្វែងរកយើង

ហើយក៏មិនស្វែងរកយោបល់ពីយើងដែរ»។

ថ្ងៃរបស់ព្រះ‌អម្ចាស់

៧ ចូរស្ងៀមស្ងាត់នៅចំពោះព្រះ‌ភ័ក្ត្រព្រះ‌ជា‌អម្ចាស់

ដ្បិតថ្ងៃរបស់ព្រះ‌អម្ចាស់នៅជិតបង្កើយហើយ។

ព្រះ‌អម្ចាស់បានរៀបចំយញ្ញ‌បូជា

ព្រះ‌អង្គជម្រះភ្ញៀវដែលត្រូវចូលរួមជប់‌លៀង

ឲ្យបានបរិសុទ្ធហើយ។

៨ «នៅថ្ងៃធ្វើយញ្ញ‌បូជា យើងនឹងដាក់ទោស

ពួកមេដឹកនាំ និងកូនៗរបស់ស្តេច

ព្រមទាំងអស់អ្នកដែលស្លៀកពាក់តាម

សាសន៍ដទៃ។

៩ នៅថ្ងៃនោះ យើងនឹងដាក់ទោសអស់អ្នកដែល

លោតពីលើក្របទ្វារព្រះ‌វិហារ តាមរបៀប

សាសន៍ដទៃ។

យើងក៏នឹងដាក់ទោសអស់អ្នកដែលប្រព្រឹត្ត

អំពើឃោរ‌ឃៅ និងកល‌ល្បិច

ពាស‌ពេញវិហារនៃព្រះរបស់ខ្លួនដែរ។

១០ នៅថ្ងៃនោះនឹងមានឮសម្រែកលេចចេញ

ពីទ្វារមច្ឆាសម្រែកយំសោកលេចឮពីជាយក្រុងម្ខាង

ហើយសំឡេងមហន្ត‌រាយលេចឮយ៉ាងខ្លាំង

នៅតាមភ្នំ។

១១ ប្រជាជននៅផ្សារក្រោមអើយ

ចូរនាំគ្នាស្រែកយំទៅ!

ដ្បិតអ្នកជំនួញទាំងប៉ុន្មានវិនាសអស់ហើយ

ពួកអស់អ្នកដូរប្រាក់ក៏ត្រូវអន្តរាយអស់ដែរ។

១២ នៅគ្រានោះ យើងនឹងកាន់ចន្លុះ

រុក‌រកអស់អ្នកដែលយើងត្រូវដាក់ទោស

នៅក្រុងយេរូ‌សាឡឹម។

អ្នកទាំងនោះសម្ងំ ហើយគិតថា “ព្រះ‌អម្ចាស់

មិនអាចធ្វើអាក្រក់ ឬល្អចំពោះខ្ញុំបានទេ”។

១៣ ទ្រព្យ‌សម្បត្តិរបស់ពួកគេនឹងត្រូវខ្មាំងរឹបអូសយក

ផ្ទះរបស់ពួកគេនឹងក្លាយទៅជាទីស្ងាត់ជ្រងំ។

ពួកគេសង់ផ្ទះ តែមិនអាចរស់នៅក្នុងផ្ទះនោះទេ

ពួកគេដាំទំពាំង‌បាយជូរ

តែពុំអាចផឹកស្រាទំពាំង‌បាយជូរដែរ»។

១៤ ថ្ងៃដ៏ឧត្តុង្គ‌ឧត្ដមរបស់ព្រះ‌អម្ចាស់

នៅជិតបង្កើយហើយ

ថ្ងៃនោះនឹងមកដល់ក្នុងពេលឆាប់ៗ។

ថ្ងៃដែលព្រះ‌អម្ចាស់យាងមក

គេនឹងស្រែកយំយ៉ាងជូរ‌ចត់

សូម្បីតែទាហានដ៏អង់‌អាច

ក៏ស្រែកហៅគេជួយដែរ។

១៥ ថ្ងៃនោះជាថ្ងៃព្រះ‌អង្គខ្ញាល់យ៉ាងខ្លាំង

ជាថ្ងៃវេទនា និងថ្ងៃតប់‌ប្រមល់

ជាថ្ងៃមហន្ត‌រាយ និងហិនវិនាស

ជាថ្ងៃដ៏ងងឹត ជាថ្ងៃអន្ធការ

ជាថ្ងៃដែលមានពពក ងងឹតអាប់‌អួ

១៦ ជាថ្ងៃដែលឮសំឡេងស្នែង

និងសម្រែកសឹកសង្គ្រាមវាយយកក្រុង

ដ៏មានកំពែងរឹង‌មាំ និងមានប៉មយ៉ាងខ្ពស់។

១៧ ព្រះ‌អង្គនឹងធ្វើឲ្យមនុស្សលោកវេទនា

ពួកគេនឹងដើរដូចមនុស្សខ្វាក់

ដ្បិតពួកគេប្រព្រឹត្តអំពើបាប

ទាស់នឹងព្រះ‌ហឫទ័យរបស់ព្រះ‌អម្ចាស់

ឈាមរបស់ពួកគេនឹងខ្ចាយ

ទៅគ្រប់ទីកន្លែងដូចធូលីដី

សាក‌សពរបស់ពួកគេប្រៀបបាននឹងសំរាម។

១៨ នៅថ្ងៃព្រះ‌អម្ចាស់ខ្ញាល់យ៉ាងខ្លាំង

ប្រាក់ ឬមាសពុំអាចរំដោះពួកគេបានទេ។

ផែន‌ដីទាំងមូលនឹងត្រូវរលាយ

ដោយ‌សារភ្លើងនៃព្រះ‌ពិរោធ។

ពេលព្រះ‌អង្គលុបបំបាត់មនុស្សទាំងអស់

ពីផែន‌ដីជាពេលមួយដ៏គួរឲ្យព្រឺខ្លាចបំផុត។

២

ចូរកែប្រែចិត្តគំនិត

១ ប្រជា‌ជាតិដែលមិនចេះខ្មាសអើយ

ចូរប្រមូលផ្តុំគ្នារិះ‌គិតពិចារណា

២ មុនពេលព្រះ‌អម្ចាស់ប្រកាសដាក់ទោស

មុនពេលអ្នករាល់គ្នាត្រូវខ្ចាត់‌ខ្ចាយដូចចំបើង

ប៉ើងតាមខ្យល់

និងមុនពេលព្រះ‌អម្ចាស់ធ្វើទោសអ្នករាល់គ្នា

នៅថ្ងៃព្រះ‌អង្គព្រះ‌អង្គព្រះ‌ពិរោធយ៉ាងខ្លាំង!

៣ អ្នកទាំងអស់គ្នាជាមនុស្សទន់‌ទាប

នៅក្នុងស្រុកអើយ

អ្នករាល់គ្នាតែង‌តែធ្វើតាមបង្គាប់របស់ព្រះ‌អង្គ

ដូច្នេះ ចូរស្វែងរកព្រះ‌អម្ចាស់ទៅ។

ចូរស្វែងរកសេចក្ដីសុចរិត ហើយបន្ទាបខ្លួន

នោះប្រហែលជាអ្នករាល់គ្នាបានរួចជីវិត

នៅថ្ងៃព្រះ‌អម្ចាស់ព្រះ‌អង្គព្រះ‌ពិរោធ។

ព្រះ‌បន្ទូលប្រឆាំងនឹងជាតិសាសន៍នានា ដែលនៅជុំ‌វិញស្រុកអ៊ីស្រា‌អែល

៤ ក្រុងកាសានឹងត្រូវប្រជាជនបោះបង់ចោល

ក្រុងអាស្កា‌ឡូននឹងក្លាយទៅជាទីស្មសាន

ក្រុងអាស្ដូដនឹងត្រូវគេកៀរប្រជាជនចេញ

ទាំងកណ្ដាលថ្ងៃត្រង់

ក្រុងអេក្រូននឹងត្រូវគេដកទាំងឫស។

៥ ប្រជា‌ជាតិកេរី‌ទីដែលរស់នៅតាមឆ្នេរសមុទ្រ

មុខជាត្រូវវេទនាពុំ‌ខាន

ព្រះ‌អម្ចាស់មានព្រះ‌បន្ទូលប្រឆាំងនឹង

អ្នករាល់គ្នាថា៖ «ទឹកដីកាណាន

ស្រុកភីលី‌ស្ទីនអើយ យើងនឹងបំផ្លាញអ្នក

លែងឲ្យមានប្រជាជនរស់នៅទៀតហើយ។

៦ ស្រុកដែលនៅតាមឆ្នេរសមុទ្រនឹងក្លាយទៅជា

វាលស្មៅសម្រាប់សត្វ ជាកន្លែងឃ្វាលហ្វូងសត្វ

និងជាកន្លែងដែលគេទុកឲ្យហ្វូងសត្វនៅ»។

៧ កូនចៅយូដាដែលនៅសេស‌សល់នឹង

ប្រើទឹកដីនេះសម្រាប់ឃ្វាលហ្វូងសត្វរបស់ខ្លួន។

ពួកគេនឹងយកផ្ទះនានានៅក្នុងក្រុងអាស្កា‌ឡូន

ធ្វើជាជម្រកស្នាក់អាស្រ័យនៅពេលយប់។

ព្រះ‌អម្ចាស់ជាព្រះរបស់ពួកគេធ្វើដូច្នេះ

ដើម្បីជាប្រយោជន៍ដល់ពួកគេ នៅពេល

ព្រះ‌អង្គស្តារស្រុករបស់ពួកគេឡើងវិញ។

៨ «យើងបានឮពាក្យដែលអ្នកស្រុកម៉ូអាប់

និងអ្នកស្រុកអាំម៉ូនជេរប្រមាថ

ត្មះ‌តិះ‌ដៀលប្រជា‌រាស្ដ្ររបស់យើង

ព្រមទាំងឈ្លាន‌ពានទឹកដីរបស់គេផង។

៩ ហេតុនេះ យើងជាព្រះដែលមានជីវិតគង់នៅ

យើងប្រកាសយ៉ាងម៉ឺង‌ម៉ាត់ថា:

ស្រុកម៉ូអាប់នឹងបានដូចជាក្រុងសូដុម

ស្រុកអាំម៉ូននឹងបានដូចជាក្រុងកូម៉ូរ៉ាដែរ

គឺជាកន្លែងដែលមានបន្លាដុះពាស‌ពេញ

ជាស្រែអំបិល និងជាទីស្មសានរហូតតទៅ។

ប្រជា‌រាស្ដ្ររបស់យើងដែលនៅសេស‌សល់

នឹងរឹបអូសយកទ្រព្យរបស់ពួកគេ

ហើយចាប់យកទឹកដីរបស់ពួកគេទៀតផង»

- នេះជាព្រះ‌បន្ទូលរបស់ព្រះ‌អម្ចាស់នៃពិភព

ទាំងមូល ជាព្រះនៃជនជាតិអ៊ីស្រា‌អែល។

១០ ហេតុ‌ការណ៍កើតមានដូច្នេះ បណ្តាលមកពី

ពួកគេមានអំនួត ពួកគេត្មះ‌តិះ‌ដៀល

ប្រជា‌រាស្ដ្ររបស់ព្រះ‌អម្ចាស់នៃពិភពទាំងមូល

ព្រមទាំងឈ្លាន‌ពានទឹកដីរបស់គេទៀតផង។

១១ ព្រះ‌អម្ចាស់នឹងធ្វើឲ្យពួកគេស្ញែងខ្លាច

ដ្បិតព្រះ‌អង្គនឹងលុបបំបាត់ព្រះទាំងប៉ុន្មាន

ឲ្យអស់ពីផែន‌ដី

ប្រជា‌ជាតិដែលរស់នៅតាមកោះទាំង‌ឡាយ

នឹងនាំគ្នាក្រាបថ្វាយ‌បង្គំព្រះ‌អង្គ

នៅតាមកន្លែងរបស់គេរៀងៗខ្លួន។

១២ «ជនជាតិអេត្យូ‌ពីអើយ

អ្នករាល់គ្នាក៏ដូច្នោះដែរ

យើងនឹងចាក់ទម្លុះអ្នករាល់គ្នា

ដោយដាវរបស់យើង»។

១៣ ព្រះ‌អម្ចាស់នឹងលើកព្រះ‌ហស្ដវាយប្រហារ

ស្រុកខាងជើង

ព្រះ‌អង្គនឹងកម្ទេចស្រុកអាស្ស៊ីរី

ព្រះ‌អង្គនឹងធ្វើឲ្យក្រុងនីនីវេ

ក្លាយទៅជាទីស្មសាន

ជាកន្លែងហួត‌ហែងដូចវាលរហោ‌ស្ថាន។

១៤ ហ្វូងសត្វនឹងមកធ្វើជម្រកនៅកណ្ដាលក្រុងនោះ

ហើយសត្វគ្រប់ប្រភេទ គឺមានសត្វទុង កាំ‌ប្រមា

ក៏មកជ្រកនៅតាមសសរអាគាររបស់ក្រុងនោះដែរ។

សំឡេងសត្វព្រៃនឹងលាន់ឮនៅតាមបង្អួច។

ក្របទ្វារផ្ទះបាក់បែកអស់

ហើយឈើដ៏មានតម្លៃក៏បាក់ជ្រុះអស់ដែរ។

១៥ មើល៍! ទីក្រុងដែលធ្លាប់តែសប្បាយ

ស្គាល់តែសេចក្ដីសុខ‌សាន្ត ហើយតែងគិតថា

គ្មាននរណាផ្ទឹមស្មើនឹងខ្លួន

បានក្លាយទៅជាទីស្មសាន ជាជម្រកសត្វព្រៃ។

អស់អ្នកដែលដើរកាត់តាមនោះ

នាំគ្នាស្រឡាំង‌កាំង ហើយព្រឺសម្បុរ។

៣

អ្នកក្រុងយេរូ‌សាឡឹមមិនព្រមស្ដាប់ព្រះ‌អម្ចាស់

១ យេរូ‌សាឡឹមត្រូវវេទនាជាពុំ‌ខាន

ព្រោះអ្នកក្រុងនេះជាជនបះ‌បោរ

ប្រព្រឹត្តអំពើពុករលួយ ជិះ‌ជាន់សង្កត់‌សង្កិនគ្នា។

២ ពួកគេមិនស្ដាប់ព្រះសូរ‌សៀងរបស់ព្រះ‌អម្ចាស់

ហើយក៏មិនទទួលការប្រដៅពីព្រះ‌អង្គដែរ។

ពួកគេមិនផ្ញើជីវិតលើព្រះ‌អម្ចាស់

ពួកគេមិនចូលមកជិតព្រះរបស់ខ្លួនទេ។

៣ មេដឹកនាំរបស់ពួកគេប្រៀបបាននឹងសត្វសិង្ហ

ដែលគិតតែពីគ្រហឹម។

ចៅ‌ក្រមរបស់ពួកគេប្រៀបបាននឹងចចក

ដែលរកស៊ីនៅពេលល្ងាច

ហើយឥតទុកអ្វីឲ្យនៅសល់សម្រាប់កកេរ

នៅពេលព្រឹកឡើយ។

៤ ព្យាការីរបស់ពួកគេជាមនុស្សក្អេង‌ក្អាង

ហើយក្បត់មុខ‌ងាររបស់ខ្លួន។

បូជា‌ចារ្យរបស់ពួកគេនាំគ្នាបន្ថោកអ្វីៗ

ដែលជាទី‌សក្ការៈ ព្រមទាំងបំពានលើវិន័យ។

៥ ប៉ុន្តែ ព្រះ‌អម្ចាស់គង់នៅក្នុងចំណោមពួកគេ

ព្រះ‌អង្គសុចរិត ឥតធ្វើអ្វីខុសសោះ

រៀងរាល់ព្រឹក ព្រះ‌អង្គបង្ហាញយុត្តិធម៌

ឲ្យពួកគេឃើញច្បាស់

មិនដែលអាក់‌ខានទេ។

ប៉ុន្តែ មនុស្សប្រព្រឹត្តល្មើសមិនចេះខ្មាសឡើយ។

៦ ព្រះ‌អង្គមានព្រះ‌បន្ទូលថា៖

«យើងបានកម្ទេចប្រជា‌ជាតិនានា

យើងបំផ្លាញប៉មការ‌ពារក្រុងរបស់ពួកគេ

យើងធ្វើឲ្យផ្លូវរបស់គេនៅស្ងាត់ជ្រងំ

គ្មានមនុស្សដើរ!

ក្រុងរបស់គេនឹងត្រូវអន្តរាយ

លែងមានប្រជាជនរស់នៅទៀត។

៧ យើងគិតថា “អ្នករាល់គ្នាគង់តែកោតខ្លាច

និងព្រមទទួលការស្តីប្រដៅពីយើង

ដូច្នេះ ទីលំ‌នៅអ្នករាល់គ្នាមុខជាមិនត្រូវ

វិនាសអន្តរាយទេ”។

ប៉ុន្តែ ពេលណាយើងដាក់ទោសពួកគេ

ពួកគេគិតតែពីរូត‌រះប្រព្រឹត្តអំពើថោកទាប

គ្រប់បែបយ៉ាង។

៨ ហេតុនេះ ចូរចាំយើងសិន!

ចូររង់‌ចាំថ្ងៃយើងចោទប្រកាន់អ្នករាល់គ្នា។

យើងនឹងប្រមូលប្រជា‌ជាតិ និងនគរទាំង‌ឡាយ

យើងនឹងជះកំហឹងដ៏ខ្លាំងរបស់យើង

ទៅលើពួកគេ ដូចភ្លើងឆាប‌ឆេះ

ដ្បិតភ្លើងនៃកំហឹងរបស់យើងនឹងឆាប‌ឆេះ

ផែន‌ដីទាំងមូល

-នេះជាព្រះ‌បន្ទូលរបស់ព្រះ‌អម្ចាស់។

ព្រះ‌បន្ទូលសន្យា

៩ ពេលនោះ យើងនឹងជម្រះបបូរមាត់

ជាតិសាសន៍នានាឲ្យបរិសុទ្ធ

ដើម្បីឲ្យពួកគេទាំងអស់គ្នាអង្វររក

នាមយើងជាព្រះ‌អម្ចាស់

ហើយព្រមព្រៀងគ្នាគោរពបម្រើយើង។

១០ អ្នកថ្វាយ‌បង្គំយើង ដែលយើងកម្ចាត់‌កម្ចាយ

ឲ្យទៅនៅខាងនាយទន្លេស្រុកអេត្យូ‌ពី

នឹងនាំគ្នាយកតង្វាយមកឲ្យយើង។

១១ នៅថ្ងៃនោះ អ្នកនឹងលែងអាម៉ាស់

ព្រោះតែអំពើអាក្រក់ទាំងប៉ុន្មាន

ដែលអ្នកបានប្រព្រឹត្ត

គឺអំពើបាបប្រឆាំងនឹងយើង

ដ្បិតយើងដកមនុស្សក្អេង‌ក្អាង

ចេញពីចំណោមអ្នក

ហើយអ្នកក៏លែងវាយ‌ឫកខ្ពស់នៅលើ

ភ្នំដ៏‌វិសុទ្ធរបស់យើងទៀតដែរ។

១២ យើងនឹងទុកប្រជាជនមួយចំនួន

ដែលទន់‌ទាប ហើយក្រ‌ខ្សត់

ឲ្យនៅសេស‌សល់ក្នុងអ្នក

ប្រជាជននេះនឹងផ្ញើជីវិតលើនាមយើង

ដែលជាព្រះ‌អម្ចាស់។

១៣ ជនជាតិអ៊ីស្រា‌អែលដែលនៅសេស‌សល់

លែងប្រព្រឹត្តបទល្មើស លែងនិយាយកុហក

និងលែងនិយាយបោកបញ្ឆោតទៀតហើយ

ពួកគេរស់នៅយ៉ាងសុខ‌សាន្ត

គ្មាននរណាមកបំភ័យពួកគេទៀតឡើយ»។

១៤ ក្រុងស៊ីយ៉ូនអើយ ចូរបន្លឺសំឡេងដោយអំណរ!

ជនជាតិអ៊ីស្រា‌អែលអើយ

ចូរនាំគ្នាស្រែកជយ‌ឃោស!

ក្រុងយេរូ‌សាឡឹមអើយ

ចូរមានអំណរសប្បាយ! ចូររីក‌រាយយ៉ាងខ្លាំង!

១៥ ព្រះ‌អម្ចាស់បានលើក‌លែងទោសឲ្យអ្នក

ព្រះ‌អង្គបានពង្វាងខ្មាំងសត្រូវចេញពីអ្នក។

ព្រះ‌អម្ចាស់ ជាព្រះ‌មហាក្សត្រនៃ

ជនជាតិអ៊ីស្រា‌អែល គង់នៅជាមួយអ្នក

អ្នកនឹងមិនខ្លាចទុក្ខវេទនាទៀតឡើយ។

១៦ នៅថ្ងៃនោះ គេនឹងពោលមកកាន់

ក្រុងយេរូ‌សាឡឹមថា កុំខ្លាចអ្វីឡើយ!

ក្រុងស៊ីយ៉ូនអើយ កុំបាក់ទឹកចិត្តឲ្យសោះ!

១៧ ព្រះ‌អម្ចាស់ជាព្រះរបស់អ្នក ព្រះ‌អង្គគង់ជាមួយអ្នក

ព្រះ‌អង្គជាវីរ‌បុរសដែលមានជ័យ‌ជម្នះ។

ព្រោះតែអ្នក ព្រះ‌អង្គមានអំណរសប្បាយជាខ្លាំង។

ព្រះ‌ហឫទ័យស្រឡាញ់របស់ព្រះ‌អង្គ

ធ្វើឲ្យអ្នកមានជីវិតថ្មី។

ព្រោះតែអ្នក ព្រះ‌អង្គច្រៀងយ៉ាងរីក‌រាយបំផុត។

១៨ «យើងនឹងប្រមូលអស់អ្នកដែលកើតទុក្ខព្រួយ

ដោយមិនអាចចូលរួមក្នុងពិធីបុណ្យដ៏សំខាន់ៗ

គឺអស់អ្នកដែលនៅឆ្ងាយពីអ្នក

ហើយត្រូវអាម៉ាស់មុខយ៉ាងខ្លាំង។

១៩ នៅថ្ងៃនោះ យើងនឹងដាក់ទោស

ជាតិសាសន៍ទាំង‌ឡាយដែលសង្កត់‌សង្កិនអ្នក។

យើងនឹងសង្គ្រោះចៀមដែលដើរពុំរួច

ហើយប្រមូលចៀមដែលវង្វេង។

យើងនឹងធ្វើឲ្យពួកគេមានកិត្តិយស

និងមានកេរ្តិ៍ឈ្មោះល្បី នៅគ្រប់ទីកន្លែង

ក្នុងស្រុកដែលពួកគេត្រូវអាម៉ាស់។

២០ នៅថ្ងៃនោះ យើងនឹងនាំអ្នករាល់គ្នាវិលមកវិញ

ព្រោះជាពេលដែលយើងប្រមូលផ្តុំអ្នករាល់គ្នា

ពេលយើងស្តារស្រុកអ្នករាល់គ្នាឡើងវិញ

នៅចំពោះមុខរបស់អ្នករាល់គ្នា

យើងនឹងធ្វើឲ្យអ្នករាល់គ្នាមាន

កេរ្តិ៍ឈ្មោះល្បី និងមានកិត្តិយសក្នុងចំណោម

ជាតិសាសន៍ទាំងប៉ុន្មាននៅលើផែន‌ដី»

នេះជាព្រះ‌បន្ទូលរបស់ព្រះ‌អម្ចាស់។

605 Views

Post Views: 584

១. គម្ពីរធម្មវិន័យ | Pentateuch 5

២. គម្ពីរប្រវត្តិសាស្រ្ត | History 16

៣. គម្ពីរប្រាជ្ញាញាណ | Wisdom 7

៤. គម្ពីរព្យាការី | Prophet 18

១. គម្ពីរដំណឹងល្អ | Gospels 4

២. គម្ពីរប្រវត្តិសាស្រ្ត | History 1

៣. លិខិតសន្តប៉ូល | Paul Letter 13

៤. សំណេរសកល | Catholic Letter 5

៥. សំណេរសន្តយ៉ូហាន | John Writing 4

កណ្ឌគម្ពីរព្យាការីសេផានី

សេផា‌នី

(ព្យាការី​សេផា‌នី)

ពាក្យ​លំនាំ

ព្រះ‌បន្ទូល​ព្រមាន​ស្រុក​យូដា និង​ក្រុង​យេរូ‌សាឡឹម

ថ្ងៃ​របស់​ព្រះ‌អម្ចាស់

ចូរ​កែ​ប្រែ​ចិត្ត​គំនិត

ព្រះ‌បន្ទូល​ប្រឆាំង​នឹង​ជាតិ​សាសន៍​នានា ដែល​នៅ​ជុំ‌វិញ​ស្រុក​អ៊ីស្រា‌អែល

អ្នក​ក្រុង​យេរូ‌សាឡឹម​មិន​ព្រម​ស្ដាប់​ព្រះ‌អម្ចាស់

ព្រះ‌បន្ទូល​សន្យា

^{កណ្ឌគម្ពីរ}
ព្យាការីសេផានី

(ព្យាការីសេផា‌នី)

ពាក្យលំនាំ

ព្រះ‌បន្ទូលព្រមានស្រុកយូដា និងក្រុងយេរូ‌សាឡឹម

ថ្ងៃរបស់ព្រះ‌អម្ចាស់

ចូរកែប្រែចិត្តគំនិត

ព្រះ‌បន្ទូលប្រឆាំងនឹងជាតិសាសន៍នានា ដែលនៅជុំ‌វិញស្រុកអ៊ីស្រា‌អែល

អ្នកក្រុងយេរូ‌សាឡឹមមិនព្រមស្ដាប់ព្រះ‌អម្ចាស់

ព្រះ‌បន្ទូលសន្យា