ទីតុស - Catholic Faith Cambodia

សម្ពន្ធមេត្រីចាស់ | Old Testament 46

១. គម្ពីរធម្មវិន័យ | Pentateuch 5

២. គម្ពីរប្រវត្តិសាស្រ្ត | History 16

៣. គម្ពីរប្រាជ្ញាញាណ | Wisdom 7

៤. គម្ពីរព្យាការី | Prophet 18

សម្ពន្ធមេត្រីថ្មី | New Testament 27

១. គម្ពីរដំណឹងល្អ | Gospels 4

២. គម្ពីរប្រវត្តិសាស្រ្ត | History 1

កិច្ចការគ្រីស្តទូត (កក)
Acts of the Apostles (Ac)

៣. លិខិតសន្តប៉ូល | Paul Letter 13

៤. សំណេរសកល | Catholic Letter 5

៥. សំណេរសន្តយ៉ូហាន | John Writing 4

^{លិខិតរបស់គ្រីស្តទូតប៉ូលផ្ញើជូន}
លោកទីតុស

ពាក្យលំនាំ

លិខិតរបស់លោកប៉ូលផ្ញើជូន

លោកទីតុស

ពាក្យលំនាំ

លោកទីតុសៈ ជាជនជាតិក្រិកម្នាក់(កាឡា‌ទី ២.៣) ហើយជាសហ‌ការីរបស់លោកប៉ូលដែរ។ គាត់បានជួយគ្រីស្ត‌បរិស័ទ ដែលទាស់‌ទែងខ្វែងគំនិតគ្នានៅក្រុងកូរិន‌ថូស ឲ្យបានស្រុះ‌ស្រួលជានានឹងគ្នាវិញ (២កូរិន‌ថូស ៧.៧-១៥)។ ពេលលោកប៉ូលសរសេរលិខិតនេះផ្ញើមកគាត់ គាត់ស្ថិតនៅកោះក្រែត ព្រោះលោកប៉ូលបានប្រគល់ភារ‌កិច្ចឲ្យគាត់រៀបចំចាត់ចែងព្រះ‌សហគមន៍ នៅលើកោះនោះ។

គោលសំខាន់ៗ:

ក្នុងលិខិតនេះ លោកប៉ូលទូន្មានអំពីរបៀបចាត់ចែងក្នុងព្រះ‌សហគមន៍ អំពីមុខ‌ងាររបស់អ្នកដឹកនាំ និងអំពីឥរិយា‌បថរបស់ព្រឹទ្ធា‌ចារ្យ យុវជន ស្ត្រីមេ‌ម៉ាយជាដើម។ ល។

គ្រីស្ត‌បរិស័ទត្រូវកាន់តាមជំនឿឲ្យបានខ្ជាប់‌ខ្ជួន ហើយគោលនៃជំនឿនេះ គឺព្រះ‌ជាម្ចាស់ស្រឡាញ់ និងសង្គ្រោះយើងតាម‌រយៈព្រះ‌យេស៊ូ‌គ្រីស្ត។

គម្រោងគម្ពីរទីតុសៈ

• សេចក្ដីផ្ដើម ១.១-៤

• អ្នកដឹកនាំព្រះ‌សហគមន៍ ១.៥-១៦

• ភារ‌កិច្ចផ្សេងៗរបស់គ្រីស្ត‌បរិស័ទ ២.១-១៥

• ការទូន្មានផ្សេងៗ ៣.១-១១

• អវសានកថា ៣.១២-១៥

១

សេចក្ដីផ្ដើម

១ ខ្ញុំ ប៉ូល ជាអ្នកបម្រើរបស់ព្រះ‌ជាម្ចាស់ និងជាគ្រីស្តទូតរបស់ព្រះ‌យេស៊ូ‌គ្រីស្ត*។ ព្រះ‌ជាម្ចាស់ចាត់ខ្ញុំឲ្យនាំអស់អ្នកដែលព្រះ‌អង្គបានជ្រើស‌រើសឲ្យមានជំនឿ និងស្គាល់ច្បាស់នូវសេចក្ដីពិត ដែលជាគ្រឹះនៃការគោរពប្រណិ‌ប័តន៍ព្រះ‌អង្គ។ ២ អ្នកទាំងនោះសង្ឃឹមថានឹងទទួលជីវិតអស់កល្ប‌ជានិច្ច ដែលព្រះ‌ជាម្ចាស់បានសន្យាតាំងពីមុនកាលសម័យទាំងអស់ ព្រះ‌អង្គមិនកុហកទេ។ ៣ នៅពេលកំណត់ ព្រះ‌អង្គបានសម្ដែងព្រះ‌បន្ទូលរបស់ព្រះ‌អង្គ ហើយប្រគល់ព្រះ‌បន្ទូលនេះមកឲ្យខ្ញុំប្រកាស តាមបញ្ជារបស់ព្រះ‌ជាម្ចាស់ ជាព្រះ‌សង្គ្រោះរបស់យើង។

៤ មកដល់ទីតុសជាកូនដ៏ពិតប្រាកដខាងជំនឿ ដែលយើងមានរួមគ្នា។

សូមព្រះ‌ជាម្ចាស់ជាព្រះ‌បិតា និងព្រះ‌គ្រីស្ត‌យេស៊ូជាព្រះ‌សង្គ្រោះនៃយើង ប្រណី‌សន្ដោស និងប្រទានសេចក្ដីសុខ‌សាន្តដល់អ្នក។

កិច្ច‌ការដែលលោកទីតុសត្រូវបំពេញនៅកោះក្រែត

៥ ខ្ញុំបានទុកអ្នកឲ្យនៅកោះក្រែត ដើម្បីចាត់ចែងកិច្ច‌ការដែលនៅសល់ឲ្យមានរបៀបរៀប‌រយ និងតែង‌តាំងព្រឹទ្ធា‌ចារ្យ* នៅតាមក្រុងនីមួយៗ ដូចខ្ញុំបានផ្ដាំរួចហើយ ៦ គឺត្រូវយកអ្នកណាដែលឥតមានកំហុស មានភរិយាតែមួយ មានកូនចៅជាអ្នកជឿ ហើយគ្មាននរណាចោទប្រកាន់ថាជាកូនខិល‌ខូច មិនចេះស្ដាប់បង្គាប់។ ៧ ក្នុងឋានៈជាអ្នកមើលខុសត្រូវលើកិច្ច‌ការរបស់ព្រះ‌ជាម្ចាស់ អ្នកអភិបាលត្រូវតែឥតកំហុស មិនក្រអឺត‌ក្រទម មិនឆាប់ខឹង មិនចំណូលស្រា មិនចេះឈ្លោះប្រកែក ឬរកប្រាក់តាមរបៀបថោកទាបនោះឡើយ។ ៨ ផ្ទុយទៅវិញ គាត់ត្រូវចេះទទួលភ្ញៀវ ស្រឡាញ់អំពើល្អ មានចិត្តធ្ងន់ សុចរិត ចិត្តបរិសុទ្ធ* ចេះទប់ចិត្ត ៩ ជាប់ចិត្តនឹងព្រះ‌បន្ទូលជាគ្រឹះនៃជំនឿ ស្របតាមសេចក្ដីដែលគេបានរៀន ដើម្បីឲ្យមានសមត្ថ‌ភាពដាស់‌តឿនអ្នកដទៃ តាមសេចក្ដីបង្រៀនដ៏ត្រឹមត្រូវ ព្រមទាំងចេះរកខុសត្រូវតបតនឹងពួកអ្នកប្រឆាំងផង។

១០ មានមនុស្សជាច្រើន ជាពិសេស ក្នុងចំណោមសាសន៍យូដា ដែលជាអ្នកជឿ មានចិត្តរឹង‌រូស ព្រោក‌ប្រាជ្ញឥតបានការ និងបោកប្រាស់គេទៀតផង។ ១១ ត្រូវបំបិទមាត់អ្នកទាំងនោះ ដ្បិតពួកគេបានធ្វើឲ្យកើតវឹក‌វរ ក្នុងក្រុមគ្រួសារជាច្រើន ដោយបង្រៀនអំពីសេចក្ដីដែលមិនត្រូវបង្រៀន ដើម្បីបោកយកប្រាក់យ៉ាងថោកទាប។ ១២ មានម្នាក់ក្នុងចំណោមពួកគេ ដែលជាព្យាការី*របស់គេផ្ទាល់ ពោលថាៈ «អ្នកស្រុកក្រែតសុទ្ធតែជាមេកុហក ជាសត្វតិរច្ឆានដ៏សាហាវ និងជាមេកម្ជិល ដែលគិតតែពីស៊ីផឹក!»។ ១៣ ពាក្យនេះពិតណាស់! ដូច្នេះ ត្រូវស្ដីបន្ទោសគេយ៉ាងតឹង‌រ៉ឹង ដើម្បីឲ្យគេមានជំនឿត្រឹមត្រូវ ១៤ កុំឲ្យជាប់ចិត្តនឹងរឿងព្រេងរបស់សាសន៍យូដា និងជាប់ចិត្តទៅលើបទបញ្ញត្តិ ដែលពួកអ្នកងាកចេញពីសេចក្ដីពិតបានតែងនោះឡើយ។ ១៥ ចំពោះអ្នកដែលមានចិត្តបរិសុទ្ធ អ្វីៗទាំងអស់សុទ្ធតែបរិសុទ្ធ រីឯអ្នកដែលមានចិត្តសៅ‌ហ្មង និងមិនជឿ អ្វីៗទាំងអស់សុទ្ធតែមិនបរិសុទ្ធ ព្រោះប្រាជ្ញា និងមន‌សិការរបស់គេសុទ្ធតែសៅ‌ហ្មង។ ១៦ គេប្រកាសថាខ្លួនស្គាល់ព្រះ‌ជាម្ចាស់ហើយ ប៉ុន្តែ តាមអំពើដែលគេប្រព្រឹត្ត គេបែរជាបដិសេធមិនទទួលស្គាល់ព្រះ‌អង្គទៅវិញ។ អ្នកទាំងនោះសុទ្ធតែជាមនុស្សគួរឲ្យស្អប់ខ្ពើម ជាមនុស្សរឹងទទឹង ហើយពុំអាចប្រព្រឹត្តអំពើល្អឡើយ។

២

សេចក្ដីបង្រៀនដ៏ត្រឹមត្រូវ

១ ចំពោះអ្នកវិញ ត្រូវនិយាយតែសេចក្ដីណា ដែលស្របតាមសេចក្ដីបង្រៀនដ៏ត្រឹមត្រូវ។ ២ ចូរជម្រាបលោកតាចាស់ៗ កុំឲ្យស្រវឹងស្រា ត្រូវមានកិរិយាថ្លៃ‌ថ្នូរ មានចិត្តធ្ងន់ មានជំនឿស្អាត‌ស្អំ មានចិត្តស្រឡាញ់ និងចេះស៊ូ‌ទ្រាំ។

៣ រីឯលោកយាយចាស់ៗវិញ ក៏ដូច្នោះដែរ ចូរជម្រាបគាត់ឲ្យកាន់កិរិយាមារយាទ សមជាអ្នកដែលមានជីវិតដ៏‌វិសុទ្ធ* កុំឲ្យនិយាយមួលបង្កាច់គេ ឬចំណូលស្រាឡើយ។ គាត់ត្រូវចេះផ្ដល់យោបល់ល្អៗ ៤ ដើម្បីជួយអប់រំស្ត្រីៗដែលនៅក្មេងឲ្យចេះស្រឡាញ់ស្វាមី និងស្រឡាញ់កូនរបស់ខ្លួន ៥ ឲ្យមានចិត្តធ្ងន់ មានចរិយាបរិសុទ្ធ យកចិត្តទុកដាក់នឹងកិច្ច‌ការក្នុងផ្ទះសំបែង មានចិត្តល្អ គោរពចុះចូលនឹងស្វាមីរៀងៗខ្លួន។ ធ្វើដូច្នេះ គ្មាននរណាអាចមួលបង្កាច់ព្រះ‌បន្ទូលរបស់ព្រះ‌ជាម្ចាស់ឡើយ។

៦ រីឯពួកយុវជនវិញ ចូរដាស់‌តឿនគេឲ្យមានចិត្តធ្ងន់គ្រប់វិស័យទាំងអស់។ ៧ ចូរប្រព្រឹត្តអំពើល្អ ធ្វើជាគំរូដល់គេ គឺបង្រៀនគេយ៉ាងស្អាត‌ស្អំ និងថ្លៃ‌ថ្នូរ ៨ និយាយពាក្យសម្ដីត្រឹមត្រូវ ដែលរករិះគន់មិនកើត។ ធ្វើដូច្នេះ ពួកអ្នកប្រឆាំងនឹងបាក់មុខ ព្រោះគេរកអ្វីនិយាយអាក្រក់ពីយើងមិនបាន។

៩ ចូរប្រាប់បង‌ប្អូន ដែលជាខ្ញុំបម្រើ ឲ្យស្ដាប់បង្គាប់ម្ចាស់រៀងៗខ្លួន ក្នុងគ្រប់កិច្ច‌ការទាំងអស់ ត្រូវធ្វើឲ្យម្ចាស់ពេញចិត្ត មិនត្រូវជំទាស់នឹងគាត់ ១០ មិនត្រូវគៃ‌បន្លំយកអ្វីពីម្ចាស់ឡើយ ផ្ទុយទៅវិញ ត្រូវសម្ដែងចិត្តល្អស្មោះ‌ត្រង់ទាំងស្រុងជា‌និច្ច ដើម្បីលើកកិត្តិយសសេចក្ដីបង្រៀនអំពីព្រះ‌ជាម្ចាស់ ជាព្រះ‌សង្គ្រោះរបស់យើង ក្នុងគ្រប់កិច្ច‌ការទាំងអស់។

១១ ព្រះ‌ជាម្ចាស់បានសម្ដែងព្រះ‌ហឫទ័យប្រណី‌សន្ដោសមក ដើម្បីសង្គ្រោះមនុស្សទាំងអស់ ១២ ព្រះ‌ហឫទ័យប្រណី‌សន្ដោសនេះ អប់រំយើងឲ្យលះ‌បង់ចិត្ត ដែលមិនចេះគោរពប្រណិ‌ប័តន៍ព្រះ‌ជាម្ចាស់ចោល ឲ្យលះ‌បង់សេចក្ដីប៉ង‌ប្រាថ្នាខាងលោកីយ៍ ដើម្បីឲ្យយើងរស់នៅក្នុងលោកនេះដោយមានចិត្តធ្ងន់ សុចរិត* និងគោរពប្រណិ‌ប័តន៍ព្រះ‌ជាម្ចាស់ ១៣ ទាំងទន្ទឹងរង់‌ចាំសុភមង្គល តាមសេចក្ដីសង្ឃឹមរបស់យើង ហើយរង់‌ចាំព្រះ‌យេស៊ូ‌គ្រីស្ត ជាព្រះ‌ជាម្ចាស់ដ៏ឧត្ដមបំផុត និងជាព្រះ‌សង្គ្រោះនៃយើង យាងមកប្រកបដោយសិរី‌រុងរឿង។ ១៤ ព្រះ‌អង្គបានបូជាព្រះ‌ជន្មរបស់ព្រះ‌អង្គផ្ទាល់សម្រាប់យើង ដើម្បីលោះយើងឲ្យរួចផុតពីអំពើទុច្ចរិតគ្រប់យ៉ាង និងជម្រះប្រជា‌រាស្ដ្រមួយទុកសម្រាប់ព្រះ‌អង្គផ្ទាល់ ជាប្រជា‌រាស្ដ្រដែលខ្នះ‌ខ្នែងប្រព្រឹត្តអំពើល្អ។

១៥ អ្នកត្រូវបង្រៀនសេចក្ដីនេះ ទាំងដាស់‌តឿន និងស្ដីបន្ទោស ដោយប្រើអំណាចពេញទី។ កុំឲ្យនរណាមើល‌ងាយអ្នកបានឡើយ។

៣

របៀបរស់នៅរបស់គ្រីស្ត‌បរិស័ទ

១ ចូររំឭកដាស់‌តឿនបង‌ប្អូន ឲ្យគោរពចុះចូលនឹងអាជ្ញា‌ធរ ចុះចូលនឹងរដ្ឋអំណាច ឲ្យគេចេះស្ដាប់បង្គាប់ និងប្រុងប្រៀបប្រព្រឹត្តអំពើល្អគ្រប់យ៉ាង។ ២ កុំឲ្យគេនិយាយអាក្រក់ពីនរណា កុំឲ្យគេបង្ករឿង តែឲ្យគេមានចិត្តសប្បុរស និងបង្ហាញចិត្តស្លូតបូត គ្រប់យ៉ាង ចំពោះមនុស្សទាំងអស់វិញ។ ៣ ពីដើម យើងក៏ជាមនុស្សឥតដឹងខុសត្រូវ រឹងទទឹង វង្វេងមាគ៌ា វក់នឹងសេចក្ដីប៉ង‌ប្រាថ្នា និងការស្រើប‌ស្រាលគ្រប់បែបយ៉ាង មានចិត្តកំណាច និងច្រណែន‌ឈ្នានីស ជាមនុស្សគួរឲ្យស្អប់ខ្ពើម ព្រមទាំងស្អប់គ្នាទៅវិញទៅមកទៀតផង។ ៤ ប៉ុន្តែ នៅពេលដែលព្រះ‌ជាម្ចាស់ ជាព្រះ‌សង្គ្រោះនៃយើងសម្ដែងព្រះ‌ហឫទ័យសប្បុរស និងព្រះ‌ហឫទ័យស្រឡាញ់ចំពោះមនុស្សលោក ៥ ព្រះ‌អង្គក៏បានសង្គ្រោះយើង តាមព្រះ‌ហឫទ័យមេត្តា‌ករុណារបស់ព្រះ‌អង្គ គឺមិនមែនមកពីយើងបានប្រព្រឹត្តអំពើសុចរិតនោះទេ។ ព្រះ‌អង្គសង្គ្រោះយើង ដោយលាងជម្រះយើងឲ្យបានកើតជាថ្មី និងប្រទានឲ្យយើងមានជីវិតថ្មី ដោយ‌សារព្រះ‌វិញ្ញាណដ៏‌វិសុទ្ធ។ ៦ ព្រះ‌អង្គចាក់បង្ហូរព្រះ‌វិញ្ញាណនេះមកលើយើងយ៉ាងបរិបូណ៌ តាម‌រយៈព្រះ‌យេស៊ូ‌គ្រីស្ត ជាព្រះ‌សង្គ្រោះរបស់យើង ៧ ដើម្បីឲ្យយើងបានសុចរិត*ដោយ‌សារព្រះ‌ហឫទ័យប្រណី‌សន្ដោសរបស់ព្រះ‌អង្គ និងឲ្យយើងបានទទួលជីវិតអស់កល្ប‌ជានិច្ចជាមត៌ក តាមសេចក្ដីសង្ឃឹមរបស់យើង។ ៨ ពាក្យនេះគួរឲ្យជឿ ខ្ញុំចង់ឲ្យអ្នកនិយាយហើយនិយាយទៀត បញ្ជាក់អំពីសេចក្ដីទាំងនេះ ដើម្បីឲ្យអស់អ្នកដែលជឿលើព្រះ‌ជាម្ចាស់ ខិត‌ខំយកចិត្តទុកដាក់ប្រព្រឹត្តអំពើល្អ។ ការនេះហើយដែលល្អប្រសើរ និងមានប្រយោជន៍ដល់មនុស្សលោក! ៩ ចូរចៀស‌វាងការជជែកវែក‌ញែកដ៏លេលា ជជែកអំពីបញ្ជីវង្សត្រកូល ចៀសវាងទាស់‌ទែងគ្នា និងឈ្លោះប្រកែកគ្នាអំពីគម្ពីរ‌វិន័យ* ដ្បិតការទាំងនេះឥតមានផលប្រយោជន៍ ឥតបានការអ្វីទាំងអស់។ ១០ ចំពោះអ្នកដែលបង្កឲ្យមានការបាក់បែកគ្នា ត្រូវព្រមានគេមួយលើកជាពីរលើក ហើយបណ្ដេញគេឲ្យចេញទៅ ១១ ដោយដឹងថា ជនប្រភេទនេះជាមនុស្សខូច គេប្រព្រឹត្តអំពើបាប និងដាក់ទោសខ្លួនឯង។

ពាក្យដាស់‌តឿនចុងក្រោយ

១២ ខ្ញុំចាត់លោកអ័រតេម៉ាស ឬលោកទីឃី‌គូសឲ្យមករកអ្នក។ កាលណាគាត់មកដល់ ចូរលៃ‌លកទៅរកខ្ញុំនៅក្រុងនីកូ‌ប៉ូលីសកុំបីខាន ដ្បិតខ្ញុំបានសម្រេចចិត្តថា នឹងស្នាក់នៅទីនោះក្នុងរដូវត្រជាក់។ ១៣ ចូរលៃ‌លក ផ្គត់‌ផ្គង់លោកមេធាវីសេណាស និងលោកអប៉ូ‌ឡូស ឲ្យបន្ដដំណើរទៅផង កុំឲ្យលោកទាំងពីរខ្វះខាតអ្វីឡើយ។ ១៤ ត្រូវឲ្យបង‌ប្អូនយើងរៀនធ្វើអំពើល្អ ឲ្យបានប្រសើរលើសគេ ដើម្បីជួយផ្គត់‌ផ្គង់សេចក្ដីត្រូវការដ៏ចាំ‌បាច់ផ្សេងៗ កុំឲ្យគេទៅជាមនុស្សមិនបង្កើតផល។

១៥ ពួកបង‌ប្អូនទាំងអស់ដែលនៅជាមួយខ្ញុំ សូមជម្រាបសួរមកអ្នក។ សូមជម្រាបសួរបង‌ប្អូនរួមជំនឿដ៏ជាទីស្រឡាញ់របស់យើងផង។

សូមព្រះ‌ជាម្ចាស់ប្រណី‌សន្ដោសបង‌ប្អូនទាំងអស់គ្នា។

695 Views

Post Views: 568

១. គម្ពីរធម្មវិន័យ | Pentateuch 5

២. គម្ពីរប្រវត្តិសាស្រ្ត | History 16

៣. គម្ពីរប្រាជ្ញាញាណ | Wisdom 7

៤. គម្ពីរព្យាការី | Prophet 18

១. គម្ពីរដំណឹងល្អ | Gospels 4

២. គម្ពីរប្រវត្តិសាស្រ្ត | History 1

៣. លិខិតសន្តប៉ូល | Paul Letter 13

៤. សំណេរសកល | Catholic Letter 5

៥. សំណេរសន្តយ៉ូហាន | John Writing 4

លិខិតរបស់គ្រីស្តទូតប៉ូលផ្ញើជូនលោកទីតុស

លិខិត​របស់​លោក​ប៉ូល​ផ្ញើ​ជូន

លោក​ទីតុស

ពាក្យ​លំនាំ

គោល​សំខាន់ៗ:

គម្រោង​គម្ពីរ​ទីតុសៈ

សេចក្ដី​ផ្ដើម

កិច្ច‌ការ​ដែល​លោក​ទីតុស​ត្រូវ​បំពេញ​នៅ​កោះ​ក្រែត

សេចក្ដី​បង្រៀន​ដ៏​ត្រឹម​ត្រូវ

របៀប​រស់​នៅ​របស់​គ្រីស្ត‌បរិស័ទ

ពាក្យ​ដាស់‌តឿន​ចុង​ក្រោយ

^{លិខិតរបស់គ្រីស្តទូតប៉ូលផ្ញើជូន}
លោកទីតុស

លិខិតរបស់លោកប៉ូលផ្ញើជូន

លោកទីតុស

ពាក្យលំនាំ

គោលសំខាន់ៗ:

គម្រោងគម្ពីរទីតុសៈ

សេចក្ដីផ្ដើម

កិច្ច‌ការដែលលោកទីតុសត្រូវបំពេញនៅកោះក្រែត

សេចក្ដីបង្រៀនដ៏ត្រឹមត្រូវ

របៀបរស់នៅរបស់គ្រីស្ត‌បរិស័ទ

ពាក្យដាស់‌តឿនចុងក្រោយ