សម្ពន្ធមេត្រីចាស់ | Old Testament 46
១. គម្ពីរធម្មវិន័យ | Pentateuch 5
- កំណើតពិភពលោក (កណ)
Genesis (Gn) - សេរីភាព (សរ)
Exodus (Ex) - លេវីវិន័យ (លវ)
Leviticus (Lv)
- ជំរឿនប្រជាជន (ជរ)
Numbers (Nm)
- ទុតិយកថា (ទក)
Deuteronomy (Dt)
២. គម្ពីរប្រវត្តិសាស្រ្ត | History 16
- យ៉ូស៊ូអា (យអ)
Joshua (Jos)
- វិរបុរស (វរ)
Judges (Jdg)
- នាងរូថ (នរ)
Ruth (Ru)
- ១សាម៉ូអែល (១សម)
1 Samuel (1Sm)
- ២សាម៉ូអែល (២សម)
2 Samuel (2Sm)
- ១ពង្សាវតារក្សត្រ (១ពង្ស)
1 Kings (1Kg)
- ២ពង្សាវតារក្សត្រ (២ពង្ស)
2 Kings (2Kg)
- ១របាក្សត្រ (១របា)
1 Chronicles (1Ch)
- ២របាក្សត្រ (២របា)
2 Chronicles (2Ch)
- អែសរ៉ា (អរ)
Ezra (Ezr)
- នេហេមី (នហ)
Nehemiah (Ne)
- យ៉ូឌីត (យឌ)
Judith (Jth)
- តូប៊ីត (តប)
Tobit (Tb)
- អែសធែរ (អធ)
Esther (Est)
- ១ម៉ាកាបាយ (១មបា)
1 Maccabees (1 Ma)
- ២ម៉ាកាបាយ (២មបា)
2 Maccabees (2 Ma)
៣. គម្ពីរប្រាជ្ញាញាណ | Wisdom 7
- ទំនុកតម្កើង (ទន)
Psalms (Ps)
- យ៉ូប (យប)
Job (Jb)
- សុភាសិត (សភ)
Proverbs (Pr)
- បទចម្រៀង (បច)
Song of Songs (Song)
- សាស្តា (សស)
Ecclesiastes (Eccl)
- ព្រះប្រាជ្ញាញាណ (ប្រាញ)
Wisdom (Wis)
- បេនស៊ីរ៉ាក់ (បសរ)
Sirach (Sir)
៤. គម្ពីរព្យាការី | Prophet 18
- អេសាយ (អស)
Isaiah (Is)
- យេរេមី (យរ)
Jeremiah (Je)
- អេសេគីអែល (អគ)
Ezekiel (Ez)
- ហូសេ (ហស)
Hosea (Ho)
- យ៉ូអែល (យអ)
Joel (Joe)
- អម៉ូស (អម)
Amos (Am)
- អូបាឌី (អឌ)
Obadiah (Ob)
- យ៉ូណាស (យណ)
Jonah (Jon)
- មីកា (មីក)
Micah (Mi)
- ណាហ៊ូម (ណហ)
Nahum (Na)
- ហាបាគូក (ហគ)
Habakkuk (Hb)
- សេផានី (សផ)
Zephaniah (Zep)
- ហាកាយ (ហក)
Haggai (Hg)
- សាការី (សក)
Zechariah (Zec)
- ម៉ាឡាគី (មគ)
Malachi (Mal)
- សំណោក (សណ)
Lamentations (Lam)
- ដានីអែល (ដន)
Daniel (Dn)
- បារូក (បារ)
Baruch (Ba)
សម្ពន្ធមេត្រីថ្មី | New Testament 27
១. គម្ពីរដំណឹងល្អ | Gospels 4
២. គម្ពីរប្រវត្តិសាស្រ្ត | History 1
៣. លិខិតសន្តប៉ូល | Paul Letter 13
- រ៉ូម (រម)
Romans (Rm) - ១កូរិនថូស (១ករ)
1 Corinthians (1Co)
- ២កូរិនថូស (២ករ)
2 Corinthians (2Co)
- កាឡាទី (កាឡ)
Galatians (Ga)
- អេភេសូ (អភ)
Ephesians (Ep)
- ភីលីព (ភីល)
Philippians (Phil)
- កូឡូស (កូឡ)
Colossians (Col)
- ១ថេស្សាឡូនិក (១ថស)
1 Thessalonians (1Th)
- ២ថេស្សាឡូនិក (២ថស)
Thessalonians (2Th)
- ១ធីម៉ូថេ (១ធម)
1 Timothy (1T)
- ២ធីម៉ូថេ (២ធម)
2 Timothy (2T)
- ទីតុស (ទត)
Titus (Ti)
- ភីលេម៉ូន (ភល)
Philemon (Phim)
៤. សំណេរសកល | Catholic Letter 5
- ហេប្រឺ (ហប)
Hebrews (He)
- យ៉ាកុប (យក)
James (Ja)
- ១សិលា (១សល)
1 Peter (1P)
- ២សិលា (២សល)
2 Peter (2P)
- យូដាស (យដ)
Jude (Ju)
៥. សំណេរសន្តយ៉ូហាន | John Writing 4
កណ្ឌគម្ពីរ
ទំនុកតម្កើង
ពាក្យលំនាំ
ទំនុកតម្កើង
ពាក្យលំនាំ
តាំងពីដើមរៀងមក ប្រជាជនអ៊ីស្រាអែលតែងតែនិពន្ធបទចម្រៀង និងកំណាព្យជាច្រើន ដើម្បីសរសើរតម្កើងព្រះជាម្ចាស់ អរព្រះគុណព្រះអង្គ និងទូលព្រះអង្គនូវអំណរសប្បាយ ឬទុក្ខលំបាករបស់ពួកគេ។ ក្រោយមក គេប្រមូលបទចម្រៀង និងកំណាព្យទាំងនោះមកចងក្រងជាកណ្ឌគម្ពីរមួយ ដែលមានចំណងជើងថា «ទំនុកតម្កើង»។
តាមរយៈទំនុកតម្កើង ប្រជាជនសម្ដែងនូវការទុកចិត្ត និងផ្ញើជីវិតរបស់ខ្លួនលើព្រះជាម្ចាស់ ជាព្រះដែលមានព្រះជន្មគង់នៅ ព្រោះគេជឿថា ព្រះអង្គជ្រាបច្បាស់ពីទុក្ខលំបាក និងការព្រួយបារម្ភរបស់គេ ហើយនៅពេលគេតូចចិត្ត ភ័យខ្លាច ឬមានកំហឹង បះបោរ ក៏ព្រះអង្គជ្រាបដែរ។ ពិសេសទៅទៀត ព្រះជាម្ចាស់តែងតែឆ្លើយតបនៅពេលណាគេស្រែកអង្វររកព្រះអង្គ។
ក្នុងគម្ពីរទំនុកតម្កើងនេះ យើងឃើញថា ជនជាតិអ៊ីស្រាអែលតែងតែបន្លឺសំឡេងទៅកាន់ព្រះជាម្ចាស់ជានិច្ច។ ឧទាហរណ៍ ពេលណាសត្រូវមកយាយី ជនជាតិអ៊ីស្រាអែលភ័យខ្លាច ហើយនាំគ្នាទទូចអង្វរព្រះជាម្ចាស់ ព្រោះគេជឿថា ព្រះជាម្ចាស់តែងតែមានព្រះហឫទ័យស្មោះត្រង់នឹងព្រះបន្ទូលសន្យារបស់ព្រះអង្គជានិច្ច។ ព្រះអង្គតែងតែយកព្រះហឫទ័យទុកដាក់នឹងមនុស្សលោក ជាពិសេស ជួយមនុស្សកំសត់ទុរគត ដោយព្រះហឫទ័យស្រឡាញ់។
នៅពេលមានកិត្តិយស នៅពេលសប្បាយ នៅពេលរងទុក្ខលំបាក ឬនៅពេលមានអាសន្ន ទោះបីកវីទំនុកតម្កើងមានអារម្មណ៍យ៉ាងណាក្តី ក៏ពួកគេនៅតែនាំគ្នាចូលមករកព្រះជាម្ចាស់ជានិច្ច ដើម្បីទូលព្រះអង្គអំពីអ្វីៗដែលមានដក់ជាប់ក្នុងចិត្តរបស់ខ្លួន។
គម្ពីរទំនុកតម្កើងនេះបានតែងឡើងជាច្រើនសតវត្សមកហើយ ប៉ុន្តែ ពាក្យទូលអង្វរ ពាក្យអធិស្ឋាន និងពាក្យសរសើរតម្កើង នៅតែមានខ្លឹមសារ សម្រាប់អ្នកជឿនាបច្ចុប្បន្នកាលនេះជានិច្ច។ អ្នកជឿគ្រប់ៗរូបអាចយកសេចក្ដីដែលមានចែងក្នុងទំនុកតម្កើងមកអនុវត្តក្នុងជីវិតរបស់ខ្លួនផ្ទាល់ ស្របតាមស្ថានភាពដែលខ្លួនកំពុងឆ្លងកាត់ ឬក៏ប្រើទំនុកតម្កើងទាំងនេះជាគំរូក្នុងការអធិស្ឋានក៏បាន។
អ្នកអានប្រហែលជានឹកឆ្ងល់ចំពោះឃ្លាខ្លះ ដែលកវីអធិស្ឋានសូមព្រះជាម្ចាស់ដាក់បណ្ដាសាខ្មាំងសត្រូវរបស់ខ្លួន។ មូលហេតុនាំឲ្យគេធ្វើដូច្នេះ មកពីប្រជាជនអ៊ីស្រាអែលនៅសម័យនោះ ពុំទាន់បានយល់ច្បាស់នូវព្រះហឫទ័យមេត្តាករុណារបស់ព្រះជាម្ចាស់ ចំពោះប្រជាជាតិទាំងអស់ក្នុងសកលលោកនេះ។
ព្រះគ្រីស្ដ ព្រមទាំងសាវ័ករបស់ព្រះអង្គនៅជំនាន់ដើម និងគ្រីស្តបរិស័ទគ្រប់ជំនាន់ទាំងអស់តែងតែប្រើទំនុកតម្កើងជាពាក្យអធិស្ឋាន ជាពាក្យសរសើរតម្កើង ដ្បិតព្រះជាម្ចាស់ផ្ទាល់បានដាក់ពាក្យទាំងនេះក្នុងដួងចិត្តប្រជារាស្ដ្ររបស់ព្រះអង្គ ដើម្បីឲ្យទំនុកតម្កើងមានលក្ខណៈមិនត្រឹមតែជាពាក្យអធិស្ឋានរបស់មនុស្សប៉ុណ្ណោះទេ តែជាព្រះបន្ទូលរបស់ព្រះដ៏មានព្រះជន្មគង់នៅផងដែរ។
យើងអាចបែងចែកគម្ពីរទំនុកតម្កើងទាំងមួយរយហាសិបចំពូកជាប្រាំភាគ:
• ភាគទីមួយ (១‑៤១)
• ភាគទីពីរ (៤២‑៧២)
• ភាគទីបី (៧៣‑៨៩)
• ភាគទីបួន (៩០-១០៦)
• ភាគទីប្រាំ (១០៧‑១៥០)
«ខ្ញុំនឹងសរសើរតម្កើងព្រះអម្ចាស់អស់មួយជីវិត
ខ្ញុំនឹងស្មូត្រទំនុកតម្កើងថ្វាយព្រះកិត្តិនាមព្រះរបស់ខ្ញុំ ក្នុងពេលដែលខ្ញុំនៅរស់នៅឡើយ»។ (ទំនុកតម្កើង ១៤៦.២)
១
ភាគទីមួយ
(ទំនុកតម្កើង ១-៤១)
សុភមង្គលដ៏ពិតប្រាកដ
១ មានសុភមង្គលហើយ
អ្នកដែលមិនដើរតាម
ដំបូន្មានរបស់មនុស្សពាល
មិនឈរក្នុងមាគ៌ារបស់មនុស្សបាប
ហើយក៏មិនអង្គុយរួមជាមួយពួកអ្នកចំអកឡកឡឺយ
២ ផ្ទុយទៅវិញ គេចូលចិត្តនឹងវិន័យរបស់
ព្រះអម្ចាស់ ព្រមទាំងសញ្ជឹងគិតអំពីវិន័យ*
របស់ព្រះអង្គទាំងយប់ទាំងថ្ងៃ។
៣ អ្នកនោះប្រៀបបាននឹងដើមឈើ
ដុះនៅក្បែរផ្លូវទឹក
ដែលផ្តល់ផលផ្លែតាមរដូវកាល
ហើយមានស្លឹកមិនចេះស្លោកស្រពោន
អ្វីៗដែលគាត់ធ្វើសុទ្ធតែបានចម្រុងចម្រើនទាំងអស់។
៤ រីឯមនុស្សពាលវិញ មិនដូច្នោះទេ
គឺពួកគេប្រៀបបាននឹងអង្កាម
ដែលត្រូវខ្យល់ផាត់បាត់ទៅ។
៥ នៅថ្ងៃព្រះជាម្ចាស់វិនិច្ឆ័យទោស
មនុស្សពាលពុំអាចក្រោកឈរឡើយ
ហើយមនុស្សបាបក៏ពុំអាចស្ថិតនៅក្នុងចំណោម
មនុស្សសុចរិត*ដែរ។
៦ ដ្បិតព្រះអម្ចាស់ស្គាល់មាគ៌ារបស់មនុស្សសុចរិត
រីឯមាគ៌ារបស់មនុស្សពាលវិញ
នាំឲ្យខ្លួនវិនាសអន្តរាយ។
២
ព្រះមហាក្សត្រដែលព្រះជាម្ចាស់ចាក់ប្រេងអភិសេក
១ ហេតុអ្វីបានជាប្រជាជាតិទាំងឡាយ
នាំគ្នាបង្កើតកោលាហល
ហើយប្រជារាស្ដ្រនានារអ៊ូរទាំ
ដោយឥតខ្លឹមសារយ៉ាងនេះ?
២ ពួកស្តេចនៅលើផែនដីបានពួតដៃគ្នាបះបោរ
ហើយពួកអ្នកដឹកនាំឃុបឃិតគ្នា
ប្រឆាំងនឹងព្រះអម្ចាស់
ព្រមទាំងប្រឆាំងនឹងព្រះមេស្ស៊ីរបស់ព្រះអង្គ
ដោយពោលថា៖
៣ «ចូរយើងនាំគ្នាបំបាក់នឹមរបស់ព្រះអង្គ
ហើយគ្រវែងច្រវាក់របស់ព្រះអង្គចេញទៅ!»។
៤ ប៉ុន្តែ ព្រះអម្ចាស់ដែលគ្រងរាជ្យនៅស្ថានបរមសុខ
ព្រះអង្គអស់សំណើច ព្រះអង្គចំអកឲ្យពួកគេ។
៥ ព្រះអង្គមានព្រះបន្ទូលទៅកាន់ពួកគេ
ដោយព្រះពិរោធ
ហើយធ្វើឲ្យពួកគេភ័យតក់ស្លុត
ដោយសារព្រះពិរោធដ៏ខ្លាំងរបស់ព្រះអង្គ
ព្រះអង្គមានព្រះបន្ទូលថា៖
៦ «គឺយើងនេះហើយ
ដែលបានអភិសេកស្តេចរបស់យើង
ឲ្យឡើងគ្រងរាជ្យនៅលើភ្នំស៊ីយ៉ូន
ជាភ្នំដ៏វិសុទ្ធរបស់យើង!»។
៧ ខ្ញុំនឹងប្រកាសក្រឹត្យរបស់ព្រះអម្ចាស់
ព្រះអង្គមានព្រះបន្ទូលមកកាន់ខ្ញុំថា៖
«ព្រះអង្គជាបុត្ររបស់យើង!
គឺយើងដែលបានបង្កើតព្រះអង្គនៅថ្ងៃនេះ។
៨ បើព្រះអង្គសុំយើងនឹងប្រគល់ប្រជាជាតិនានា
ឲ្យព្រះអង្គទុកជាមត៌ក
យើងក៏នឹងប្រគល់ផែនដីទាំងមូល
ឲ្យព្រះអង្គទុកជាកម្មសិទ្ធិដែរ។
៩ ព្រះអង្គនឹងបង្ក្រាបពួកគេដោយដំបងដែក
ហើយព្រះអង្គកម្ទេចគេ
ដូចជាងស្មូនកម្ទេចភាជន៍»។
១០ ឥឡូវនេះ ស្តេចទាំងឡាយអើយ
ចូររិះគិតពិចារណាឡើង!
អ្នកគ្រប់គ្រងទាំងឡាយនៅលើផែនដីអើយ
ចូរទទួលយកសេចក្ដីអប់រំទៅ!
១១ ចូរបម្រើព្រះអម្ចាស់ដោយគោរពកោតខ្លាច
ចូរត្រេកអរសប្បាយ ទាំងញាប់ញ័រ
១២ ចូរក្រាបថ្វាយបង្គំព្រះរាជបុត្រ
ក្រែងព្រះអម្ចាស់ព្រះអង្គព្រះពិរោធ
ហើយអ្នករាល់គ្នាត្រូវវិនាសអន្តរាយ
ក្នុងមាគ៌ារបស់អ្នករាល់គ្នា
ដ្បិតព្រះពិរោធរបស់ព្រះអង្គ
នឹងឆេះឆួលឡើងយ៉ាងឆាប់ៗ។
អ្នកណាជ្រកកោនក្រោមម្លប់បារមីព្រះអង្គ
អ្នកនោះមានសុភមង្គលហើយ!
៣
ពាក្យអធិស្ឋាននៅពេលមានសត្រូវព័ទ្ធជុំវិញ
១ ទំនុកតម្កើងរបស់ស្តេចដាវីឌ
ក្នុងគ្រាដែលព្រះអង្គរត់ភៀសចេញ
ពីសម្តេចអាប់សាឡុម ជាព្រះរាជបុត្រ។
២ ព្រះអម្ចាស់អើយ ខ្មាំងសត្រូវរបស់ទូលបង្គំ
មានគ្នាច្រើនណាស់!
រីឯអ្នកដែលលើកគ្នាប្រឆាំងនឹងទូលបង្គំ
ក៏មានគ្នាច្រើនដែរ!
៣ មានមនុស្សជាច្រើនពោលពីទូលបង្គំថា
«ព្រះជាម្ចាស់មិនសង្គ្រោះលោកឡើយ!»។ - សម្រាក
៤ ប៉ុន្តែ ព្រះអម្ចាស់អើយ
ព្រះអង្គជាខែលការពារទូលបង្គំ
ព្រះអង្គផ្តល់សិរីរុងរឿងឲ្យទូលបង្គំ
និងប្រោសឲ្យទូលបង្គំងើបមុខឡើងវិញបាន។
៥ ខ្ញុំស្រែកដង្ហោយហៅរកព្រះអម្ចាស់
យ៉ាងអស់ពីដួងចិត្ត
ហើយព្រះអង្គឆ្លើយតបមកខ្ញុំវិញ
ពីភ្នំដ៏វិសុទ្ធរបស់ព្រះអង្គ។ - សម្រាក
៦ ខ្ញុំទម្រេត ខ្ញុំទទួលទានដំណេកយ៉ាងស្កប់ស្កល់
ហើយខ្ញុំភ្ញាក់ឡើងវិញ
ដ្បិតព្រះអម្ចាស់ជួយគាំទ្រខ្ញុំ។
៧ ទោះបីមានមនុស្សម្នាដ៏ច្រើនអនេកអនន្ត
លើកគ្នាពីគ្រប់ទីកន្លែង មកប្រឆាំងនឹងខ្ញុំ
យ៉ាងណាក្តី ក៏ខ្ញុំមិនភ័យខ្លាចដែរ។
៨ ឱព្រះអម្ចាស់អើយ សូមកុំនៅព្រងើយ!
ព្រះនៃទូលបង្គំអើយ សូមសង្គ្រោះទូលបង្គំផង!
ដ្បិតព្រះអង្គតែងតែទះកំផ្លៀងខ្មាំងសត្រូវ
ទាំងប៉ុន្មានរបស់ទូលបង្គំ
ព្រះអង្គបំបាក់ធ្មេញរបស់មនុស្សពាល។
៩ បពិត្រព្រះអម្ចាស់ មានតែព្រះអង្គទេ
ដែលអាចសង្គ្រោះ!
សូមប្រទានពរដល់ប្រជារាស្ដ្ររបស់ព្រះអង្គផង! - សម្រាក
៤
ព្រះជាម្ចាស់ការពារ នៅពេលគេមួលបង្កាច់
១ ទំនុកពីសៀវភៅរបស់គ្រូចម្រៀង។
កំដរដោយក្រុមតន្ដ្រីមានខ្សែ។
ទំនុករបស់ស្តេចដាវីឌ។
២ ឱព្រះជាម្ចាស់ដែលរកយុត្តិធម៌
ឲ្យទូលបង្គំអើយ
ពេលទូលបង្គំដង្ហោយហៅរកព្រះអង្គ
សូមឆ្លើយតបមកទូលបង្គំផង!
ពេលទូលបង្គំមានទុក្ខធុរៈ
ព្រះអង្គបានធ្វើឲ្យទូលបង្គំធូរស្បើយ។
សូមអាណិតមេត្តាទូលបង្គំ
សូមព្រះសណ្ដាប់ពាក្យអង្វររបស់ទូលបង្គំផង។
៣ មនុស្សម្នាទាំងឡាយអើយ
តើអ្នករាល់គ្នាជាន់ឈ្លីកិត្តិយសខ្ញុំ
ដល់កាលណាទៀត?
តើអ្នករាល់គ្នាចូលចិត្តចោទប្រកាន់
ដោយឥតបានការ
និងនិយាយកុហកមួលបង្កាច់ដល់កាលណាទៀត? - សម្រាក
៤ ត្រូវដឹងថា ព្រះអម្ចាស់តែងតែប្រោសប្រណី
មនុស្សស្មោះត្រង់
ពេលណាខ្ញុំស្រែកអង្វររកព្រះអម្ចាស់
ព្រះអង្គព្រះសណ្ដាប់ខ្ញុំជានិច្ច។
៥ បើអ្នករាល់គ្នាច្រឡោតខឹង
មិនត្រូវប្រព្រឹត្តអំពើបាបសោះឡើយ
តែត្រូវដេកគិតពិចារណា ហើយរំងាប់ចិត្តទៅ។ - សម្រាក
៦ ចូរថ្វាយយញ្ញបូជាដ៏សុចរិត
ហើយពឹងផ្អែកលើព្រះអម្ចាស់ចុះ។
៧ មនុស្សជាច្រើនពោលថា:
តើនរណានាំសុភមង្គលមកឲ្យយើងខ្ញុំ?
ព្រះអម្ចាស់អើយ សូមទតមកយើងខ្ញុំ
ដោយព្រះហឫទ័យសប្បុរសផង!
៨ ព្រះអង្គបានដាក់អំណរនៅក្នុងចិត្តទូលបង្គំ
ច្រើនជាងអំណរដែលគេមាននៅពេលច្រូតស្រូវ
និងបេះផ្លែទំពាំងបាយជូរដ៏បរិបូណ៌ទៅទៀត។
៩ ពេលទូលបង្គំចូលដំណេក
នោះទូលបង្គំនឹងដេកលក់ដោយសុខសាន្តភ្លាម
ឱព្រះអម្ចាស់អើយ មានតែព្រះអង្គទេ
ដែលធ្វើឲ្យទូលបង្គំរស់នៅ
ដោយសុខដុមរមនា។
៥
ពាក្យអធិស្ឋានសូមព្រះជាម្ចាស់ការពារ
១ ទំនុកពីសៀវភៅរបស់គ្រូចម្រៀង។
កំដរដោយខ្លុយ។
ទំនុករបស់ស្តេចដាវីឌ។
២ ឱព្រះអម្ចាស់អើយ
សូមផ្ទៀងព្រះកាណ៌ស្ដាប់ពាក្យរបស់ទូលបង្គំ!
សូមព្រះអង្គព្រះសណ្ដាប់សម្រែកឈឺចាប់
របស់ទូលបង្គំផង។
៣ ឱព្រះជាម្ចាស់ ជាព្រះមហាក្សត្រនៃទូលបង្គំអើយ
សូមយកព្រះហឫទ័យទុកដាក់នឹងសូរសម្រែក
របស់ទូលបង្គំផង
ដ្បិតទូលបង្គំអធិស្ឋានរកព្រះអង្គ។
៤ ឱព្រះអម្ចាស់អើយ! នៅពេលព្រឹក
ព្រះអង្គព្រះសណ្ដាប់សំឡេងរបស់ទូលបង្គំ
ទូលបង្គំចូលមកគាល់
ហើយនៅរង់ចាំព្រះអង្គតាំងពីព្រលឹម។
៥ ព្រះអង្គមិនមែនជាព្រះដែលសព្វព្រះហឫទ័យ
នឹងអំពើទុច្ចរិតនោះទេ
អំពើអាក្រក់ពុំអាចនៅក្បែរព្រះអង្គបានឡើយ។
៦ ព្រះអង្គមិនចង់ឃើញមនុស្សព្រហើន
ចូលមកជិតព្រះអង្គទេ
ព្រះអង្គក៏មិនសព្វព្រះហឫទ័យនឹងមនុស្ស
ដែលប្រព្រឹត្តអំពើទុច្ចរិតដែរ។
៧ ព្រះអង្គនឹងធ្វើឲ្យពួកកុហកវិនាសសាបសូន្យ។
ព្រះអម្ចាស់ស្អប់ខ្ពើមអ្នកបង្ហូរឈាម
និងអ្នកមានល្បិចកល។
៨ រីឯទូលបង្គំវិញ
ទូលបង្គំចូលមកក្នុងព្រះដំណាក់របស់ព្រះអង្គបាន
ដោយសារតែព្រះអង្គមានព្រះហឫទ័យសប្បុរស
យ៉ាងខ្លាំងចំពោះទូលបង្គំ
ទូលបង្គំសូមក្រាបថ្វាយបង្គំព្រះអង្គ
ដោយបែរមុខតម្រង់ទៅរកព្រះវិហារដ៏វិសុទ្ធ
របស់ព្រះអង្គទាំងគោរពកោតខ្លាច។
៩ ឱព្រះអម្ចាស់អើយ
មានមនុស្សជាច្រើនប្រឆាំងនឹងទូលបង្គំ!
សូមដឹកនាំទូលបង្គំឲ្យធ្វើតាមព្រះហឫទ័យ
របស់ព្រះអង្គ
សូមពង្រាបផ្លូវរបស់ព្រះអង្គនៅមុខទូលបង្គំផង។
១០ អ្នកទាំងនោះមានពាក្យសម្ដីមិនទៀងទេ
គេគិតតែចង់បំផ្លិចបំផ្លាញ
អណ្ដាតរបស់គេគ្រលាស់ចេញនូវពាក្យបញ្ចើចបញ្ចើ
តែមានបង្កប់ទៅដោយពិសពុល
សម្រាប់ប្រហារជីវិត។
១១ ឱព្រះជាម្ចាស់អើយ សូមដាក់ទោសគេទៅ!
សូមឲ្យគេវិនាសអន្តរាយ
ដោយសារគម្រោងការរបស់ខ្លួន
គេបានប្រព្រឹត្តអំពើអាក្រក់ច្រើនរាប់មិនអស់
ព្រោះគេបះបោរប្រឆាំងនឹងព្រះអង្គ
ដូច្នេះ សូមកាត់កាល់គេចោលទៅ។
១២ រីឯអស់អ្នកដែលជ្រកកោនក្រោមម្លប់បារមីព្រះអង្គ
គេនឹងមានអំណរ
គេនឹងសប្បាយរីករាយរហូតតទៅ
ហើយព្រះអង្គនឹងរក្សាការពារគេ
អស់អ្នកដែលស្រឡាញ់ព្រះនាមរបស់ព្រះអង្គ
នឹងសប្បាយរីករាយរួមជាមួយព្រះអង្គ។
១៣ ព្រះអម្ចាស់អើយ
ព្រះអង្គប្រទានពរឲ្យមនុស្សសុចរិត
ព្រះហឫទ័យមេត្តាករុណារបស់ព្រះអង្គ
ប្រៀបបាននឹងខែលការពារគេ។
៦
ព្រះអង្គព្រះអង្គព្រះពិរោធនឹងទូលបង្គំ តែសូមកុំដាក់ទោសទូលបង្គំឡើយ
១ ទំនុកពីសៀវភៅរបស់គ្រូចម្រៀង។
កំដរដោយក្រុមតន្ដ្រីមានខ្សែ
និងពិណប្រាំបីខ្សែ។ ទំនុករបស់ស្តេចដាវីឌ។
២ ឱព្រះអម្ចាស់អើយ ទោះបីព្រះអង្គ
ព្រះអង្គព្រះពិរោធនឹងទូលបង្គំក្តី
សូមកុំដាក់ទោសទូលបង្គំឡើយ
ទោះបីព្រះអង្គខ្ញាល់នឹងទូលបង្គំក្តី
ក៏សូមកុំធ្វើទោសទូលបង្គំដែរ!
៣ ព្រះអម្ចាស់អើយ សូមប្រណីសន្ដោសទូលបង្គំផង
ដ្បិតទូលបង្គំកាន់តែខ្សោយណាស់ហើយ
ព្រះអម្ចាស់អើយ សូមប្រោសទូលបង្គំឲ្យជាផង
ដ្បិតរូបកាយទូលបង្គំទាំងមូលញ័រញាក់។
៤ ចិត្តគំនិតទូលបង្គំតប់ប្រមល់ជាខ្លាំង
ព្រះអម្ចាស់អើយ តើទុកឲ្យទូលបង្គំនៅដូច្នេះ
ដល់កាលណាទៀត?
៥ ព្រះអម្ចាស់អើយ សូមព្រះអង្គយាងមកវិញ
ហើយសង្គ្រោះទូលបង្គំផង សូមរំដោះទូលបង្គំ
ដោយព្រះហឫទ័យសប្បុរស
៦ ដ្បិតពេលស្លាប់ផុតទៅហើយ
គ្មាននរណាអាចនឹកដល់ព្រះអង្គបានទៀតទេ
ពុំដែលមាននរណាសរសើរតម្កើងព្រះអង្គ
នៅក្នុងស្ថានមនុស្សស្លាប់ឡើយ។
៧ ទូលបង្គំស្រែកថ្ងូរ ហើយកាន់តែល្វើយទៅៗ។
រៀងរាល់យប់ ទូលបង្គំយំសោកនៅលើគ្រែ
ហើយបង្ហូរទឹកភ្នែកជោកខ្នើយ។
៨ ទុក្ខកង្វល់បានធ្វើឲ្យទូលបង្គំស្លក់មុខ
ភ្នែកទូលបង្គំក៏ប្រែទៅជាស្រវាំង
ព្រោះតែបច្ចាមិត្តរបស់ទូលបង្គំ។
៩ អស់អ្នកដែលប្រព្រឹត្តអំពើទុច្ចរិតអើយ
ចូរចៀសចេញឲ្យឆ្ងាយពីខ្ញុំទៅ
ដ្បិតព្រះអម្ចាស់ព្រះអង្គព្រះសណ្ដាប់ឮសំឡេង
យំសោករបស់ខ្ញុំហើយ។
១០ ព្រះអម្ចាស់ព្រះអង្គព្រះសណ្ដាប់ឮពាក្យ
ទទូចអង្វររបស់ខ្ញុំ
ព្រះអម្ចាស់ទទួលពាក្យអធិស្ឋានរបស់ខ្ញុំហើយ។
១១ សូមឲ្យខ្មាំងសត្រូវទាំងប៉ុន្មានរបស់ខ្ញុំ
ត្រូវអាម៉ាស់ និងញ័ររន្ធត់
ហើយឲ្យគេដកខ្លួនថយទៅវិញ
ទាំងអៀនខ្មាសយ៉ាងខ្លាំង។
៧
ព្រះអម្ចាស់អើយ សូមរកយុត្តិធម៌ឲ្យទូលបង្គំផង!
១ ទំនួញរបស់ស្តេចដាវីឌ ព្រះអង្គសូត្រថ្វាយ
ព្រះជាម្ចាស់ នៅពេលមានរឿងជាមួយ
មនុស្សម្នាក់ឈ្មោះគូស
ក្នុងកុលសម្ព័ន្ធបេនយ៉ាមីន។
២ ព្រះអម្ចាស់ជាព្រះនៃទូលបង្គំអើយ!
ទូលបង្គំសូមយកព្រះអង្គធ្វើជាទីពឹងជ្រក
សូមសង្គ្រោះទូលបង្គំ សូមរំដោះទូលបង្គំ
ឲ្យរួចផុតពីអស់អ្នក
ដែលបៀតបៀនទូលបង្គំផង
៣ ក្រែងលោគេហែកទូលបង្គំ
ដូចសត្វសិង្ហខាំរំពានាំយកទៅ
ហើយគ្មាននរណារំដោះបានឡើយ។
៤ ព្រះអម្ចាស់ជាព្រះនៃទូលបង្គំអើយ!
ប្រសិនបើទូលបង្គំបានប្រព្រឹត្តដូចពាក្យគេថា
ប្រសិនបើដៃទូលបង្គំប្រឡាក់ទៅដោយអំពើទុច្ចរិត
៥ ប្រសិនបើទូលបង្គំបានប្រព្រឹត្តអំពើអាក្រក់
តបស្នងនឹងមិត្តភក្ដិទូលបង្គំ ឬប្រសិនបើទូលបង្គំ
រឹបអូសយកទ្រព្យដោយឥតហេតុផល
ពីអ្នកដែលជំទាស់នឹងទូលបង្គំមែននោះ
៦ សូមឲ្យខ្មាំងសត្រូវដេញទាន់
និងប្រហារទូលបង្គំទៅចុះ
ឲ្យគេជាន់ឈ្លីជីវិតទូលបង្គំនៅនឹងដី
និងឲ្យគេយកកិត្តិយសរបស់ទូលបង្គំ
ទៅទំលាក់ក្នុងភក់ជ្រាំចុះ!។ - សម្រាក
៧ ព្រះអម្ចាស់អើយ សូមតើនឡើង
សូមព្រះអង្គព្រះពិរោធតបនឹងអំពើឃោរឃៅ
របស់បច្ចាមិត្តទូលបង្គំ
សូមជួយការពារទូលបង្គំផង ដ្បិតព្រះអង្គ
ហ្នឹងហើយដែលបានតែងតាំងច្បាប់ឡើង។
៨ សូមឲ្យប្រជាជាតិនានា
នាំគ្នាមកចោមរោមជុំវិញព្រះអង្គ!
សូមព្រះអង្គគ្រប់គ្រងលើពួកគេទាំងអស់គ្នា
៩ ព្រះអម្ចាស់ជាចៅក្រមវិនិច្ឆ័យប្រជារាស្ដ្រទាំងអស់
ព្រះអម្ចាស់អើយ
សូមរកយុត្តិធម៌ឲ្យទូលបង្គំផង
ដ្បិតទូលបង្គំសុចរិត ហើយក៏ទៀងត្រង់ដែរ!
១០ សូមបញ្ឈប់អំពើអាក្រក់របស់មនុស្សទុច្ចរិត
ហើយជួយមនុស្សសុចរិត
ឲ្យមានចិត្តរឹងប៉ឹងឡើង!
ព្រះដ៏សុចរិតអើយ
ព្រះអង្គឈ្វេងយល់ចិត្តថ្លើមរបស់មនុស្ស!
១១ ព្រះជាម្ចាស់ជាខែលការពារខ្ញុំ
ព្រះអង្គសង្គ្រោះអស់អ្នក
ដែលមានចិត្តទៀងត្រង់។
១២ ព្រះជាម្ចាស់ជាចៅក្រមដ៏សុចរិត
ព្រះអង្គតែងតែប្រឆាំងនឹងអំពើអាក្រក់
ជារៀងរាល់ថ្ងៃ។
១៣ មនុស្សអាក្រក់មិនដូរគំនិតទេ
គេនឹងសំលៀងមុខដាវ
ហើយយឹតធ្នូប្រុងប្រៀបបាញ់។
១៤ គេនឹងរៀបចំអាវុធដើម្បីប្រហារអ្នកដទៃ
ព្រមទាំងត្រៀមព្រួញភ្លើងចាំជាស្រេចផង។
១៥ អ្នកណាគិតតែពីប្រព្រឹត្តអំពើទុច្ចរិត
ហើយរិះគិតពីអំពើឧក្រិដ្ឋ
អ្នកនោះនឹងបង្កើតបានការបោកបញ្ឆោត។
១៦ អ្នកណាជីករណ្ដៅកាន់តែជ្រៅទៅៗ
អ្នកនោះនឹងធ្លាក់ទៅក្នុងរណ្ដៅ
ដែលខ្លួនជីកនោះជាមិនខាន។
១៧ អំពើទុច្ចរិតដែលគេប្រព្រឹត្ត
នឹងធ្លាក់មកលើក្បាលគេវិញ
អំពើឃោរឃៅរបស់គេ
ក៏នឹងធ្លាក់មកលើលលាដ៍ក្បាលគេវិញដែរ។
១៨ ខ្ញុំនឹងសរសើរតម្កើងព្រះអម្ចាស់
ព្រោះព្រះអង្គសុចរិត
ខ្ញុំនឹងច្រៀងលើកតម្កើងព្រះនាមព្រះអម្ចាស់
ជាព្រះដ៏ខ្ពង់ខ្ពស់បំផុត។
៨
សិរីរុងរឿងរបស់ព្រះជាម្ចាស់ និងកិត្តិយសរបស់មនុស្ស
១ ទំនុកពីសៀវភៅរបស់គ្រូចម្រៀង។
សម្រាប់ពិណពីក្រុងកាថ។
ទំនុករបស់ស្តេចដាវីឌ។
២ បពិត្រព្រះអម្ចាស់ ជាម្ចាស់របស់យើងខ្ញុំអើយ!
ព្រះនាមរបស់ព្រះអង្គថ្កុំថ្កើងរុងរឿង
ពាសពេញលើផែនដីទាំងមូល!
ព្រះអង្គថ្កុំថ្កើងរុងរឿងលើសផ្ទៃមេឃទៅទៀត។
៣ ព្រះអង្គបានប្រើពាក្យសរសើរតម្កើងរបស់ក្មេងៗ
និងទារកដែលនៅបៅ
ធ្វើជាកម្លាំងប្រយុទ្ធនឹងបច្ចាមិត្តរបស់ព្រះអង្គ
ដើម្បីបង្ក្រាបខ្មាំងសត្រូវដ៏កាចសាហាវ
ឲ្យវិនាសសាបសូន្យទៅ។
៤ ពេលទូលបង្គំសម្លឹងមើលផ្ទៃមេឃ
ដែលជាស្នាព្រះហស្ដរបស់ព្រះអង្គ
ហើយសម្លឹងមើលព្រះច័ន្ទ
និងហ្វូងតារាដែលព្រះអង្គដាក់នៅលើមេឃនោះ
៥ ទូលបង្គំសួរខ្លួនឯងថា តើមនុស្សមានឋានៈអ្វី
បានជាព្រះអង្គនឹកគិតដល់គេដូច្នេះ
តើបុត្រមនុស្សជាអ្វីបានជាព្រះអង្គយក
ព្រះហឫទ័យទុកដាក់នឹងគេយ៉ាងនេះ?
៦ ព្រះអង្គបានធ្វើឲ្យគេមានឋានៈទាបជាង
ទេវទូតតែបន្តិចប៉ុណ្ណោះ
ព្រះអង្គប្រទានសិរីរុងរឿង និងកិត្តិយសដល់គេ
ទុកជាមកុដរាជ្យ។
៧ ព្រះអង្គប្រទានឲ្យគេគ្រប់គ្រងលើអ្វីៗទាំងអស់
ដែលព្រះអង្គបានបង្កើតមក
ព្រះអង្គបានបង្ក្រាបអ្វីៗទាំងអស់
ឲ្យនៅក្រោមជើងរបស់គេ
៨ គឺទាំងចៀម ទាំងគោ និងសត្វព្រៃទាំងប៉ុន្មាន
៩ ព្រមទាំងបក្សាបក្សីនៅលើមេឃ
ត្រីនៅក្នុងសមុទ្រ
និងសត្វទាំងអស់ដែលរស់នៅបាតសមុទ្រ។
១០ បពិត្រព្រះអម្ចាស់ ជាម្ចាស់របស់យើងខ្ញុំអើយ
ព្រះនាមរបស់ព្រះអង្គថ្កុំថ្កើងរុងរឿង
ពាសពេញលើផែនដីទាំងមូល!
៩
ព្រះអម្ចាស់ជាព្រះសង្គ្រោះរបស់ជនក្រីក្រ និងអ្នកដែលត្រូវគេជិះជាន់
១ ទំនុកពីសៀវភៅរបស់គ្រូចម្រៀង។
តាមលំនាំបទកូនប្រុសស្លាប់។
ទំនុករបស់ស្តេចដាវីឌ។
២ ទូលបង្គំនឹងច្រៀងសរសើរតម្កើង
ព្រះអម្ចាស់យ៉ាងអស់ពីចិត្ត
ទូលបង្គំនឹងនិទានពីគ្រប់ការអស្ចារ្យ
ដែលព្រះអង្គបានធ្វើ
៣ ទូលបង្គំនឹងរីករាយដោយសារព្រះអង្គ
ទូលបង្គំនឹងត្រេកអរយ៉ាងខ្លាំង
បពិត្រព្រះដ៏ខ្ពង់ខ្ពស់បំផុត
ទូលបង្គំច្រៀងលើកតម្កើងព្រះនាមព្រះអង្គ!។
៤ ខ្មាំងសត្រូវរបស់ទូលបង្គំដកខ្លួនថយ
ហើយជំពប់ជើងដួលវិនាស
នៅចំពោះព្រះភ័ក្ត្រព្រះអង្គ
៥ ដ្បិតព្រះអង្គបានរកយុត្តិធម៌ឲ្យទូលបង្គំ
គឺឲ្យគេឃើញថាទូលបង្គំសុចរិត
ព្រះអង្គគង់នៅលើបល្ល័ង្ក
ក្នុងឋានៈជាចៅក្រមដ៏សុចរិត។
៦ ព្រះអង្គគំរាមកំហែងជាតិសាសន៍នានា
ព្រះអង្គបានធ្វើឲ្យមនុស្សពាលវិនាសសូន្យ
ព្រះអង្គលុបបំបាត់ឈ្មោះពួកគេជានិច្ច
រហូតតទៅ។
៧ ខ្មាំងសត្រូវវិនាសអន្តរាយអស់កល្បជានិច្ច!
រីឯក្រុងនានារបស់គេ
ព្រះអង្គបានរំលាយអស់ហើយ
គ្មាននរណានឹកឃើញទៀតទេ។
៨ ព្រះអម្ចាស់គ្រងរាជ្យរហូតតរៀងទៅ
ព្រះអង្គឡើងគង់នៅលើបល្ល័ង្ក
ដើម្បីវិនិច្ឆ័យទោស។
៩ ព្រះអង្គគ្រប់គ្រងលើផែនដីដោយសេចក្ដីសុចរិត
ព្រះអង្គវិនិច្ឆ័យទោសប្រជាជនទាំងឡាយ
ដោយយុត្តិធម៌។
១០ សូមព្រះអម្ចាស់ធ្វើជាបន្ទាយដ៏រឹងមាំការពារ
អស់អ្នកដែលត្រូវគេជិះជាន់
គឺជាបន្ទាយការពារនៅពេលមានអាសន្ន។
១១ ព្រះអម្ចាស់អើយ
អស់អ្នកដែលស្គាល់ព្រះនាមព្រះអង្គ
នឹងទុកចិត្តលើព្រះអង្គជាមិនខាន
ដ្បិតព្រះអង្គមិនបោះបង់ចោល
អស់អ្នកដែលស្វែងរកព្រះអង្គឡើយ!។
១២ ចូរនាំគ្នាច្រៀងលើកតម្កើងព្រះអម្ចាស់
ដែលគង់នៅក្រុងស៊ីយ៉ូន
ចូរប្រកាសប្រាប់ប្រជាជនទាំងឡាយ
អំពីស្នាព្រះហស្ដដ៏អស្ចារ្យរបស់ព្រះអង្គ!
១៣ ដ្បិតព្រះអង្គដាក់ទោសអ្នកដែលសម្លាប់គេ
ព្រះអង្គចងចាំជានិច្ច
ព្រះអង្គមិនភ្លេចសម្រែករបស់ជនរងគ្រោះឡើយ។
១៤ ឱព្រះអម្ចាស់អើយ សូមអាណិតអាសូរទូលបង្គំផង
សូមទតមើលទូលបង្គំដែលរងទុក្ខលំបាក
ព្រោះតែពួកខ្មាំងសត្រូវ
មានតែព្រះអង្គទេ ដែលអាចនាំទូលបង្គំ
ឲ្យរួចពីសេចក្ដីស្លាប់
១៥ ដើម្បីឲ្យទូលបង្គំថ្លែងគ្រប់ពាក្យ
សរសើរតម្កើងព្រះអង្គនៅមាត់ទ្វារក្រុងស៊ីយ៉ូន
និងឲ្យទូលបង្គំត្រេកអរសប្បាយបំផុត
ព្រោះព្រះអង្គបានសង្គ្រោះទូលបង្គំ។
១៦ ប្រជាជាតិនានានឹងធ្លាក់ទៅក្នុងរណ្ដៅ
ដែលគេបានជីក
ជើងរបស់គេក៏ជាប់អន្ទាក់ដែលគេបាន
បង្កប់ទុកនោះដែរ។
១៧ ព្រះអម្ចាស់បានសម្ដែងឲ្យគេស្គាល់ព្រះអង្គ
ព្រះអង្គកាត់ទោសគេ
មនុស្សអាក្រក់បានជាប់អន្ទាក់
ដែលជាស្នាដៃរបស់ខ្លួន។
ប្រគំភ្លេង សម្រាក
១៨ សូមឲ្យមនុស្សអាក្រក់
គឺប្រជាជាតិទាំងប៉ុន្មានដែលបំភ្លេចព្រះជាម្ចាស់
វិលទៅរកស្ថានមនុស្សស្លាប់វិញទៅ។
១៩ រីឯមនុស្សក្រីក្រ ព្រះអង្គមិនភ្លេចគេសោះឡើយ
ហើយសេចក្ដីសង្ឃឹមរបស់មនុស្សវេទនា
ក៏មិនដែលសាបសូន្យដែរ។
២០ ព្រះអម្ចាស់អើយ សូមតើនឡើង!
សូមកុំឲ្យមនុស្សលោកមានជ័យជម្នះឡើយ!
សូមវិនិច្ឆ័យទោសប្រជាជាតិនានា
នៅចំពោះព្រះភ័ក្ត្រព្រះអង្គ។
២១ ឱព្រះអម្ចាស់អើយ
សូមធ្វើឲ្យពួកគេភ័យតក់ស្លុត!
សូមធ្វើឲ្យប្រជាជនទាំងឡាយដឹងថា
ពួកគេគ្រាន់តែជាមនុស្សប៉ុណ្ណោះ!។
- សម្រាក
១០
ពាក្យអធិស្ឋានសូមព្រះអម្ចាស់រកយុត្តិធម៌
១ ព្រះអម្ចាស់អើយ
ហេតុអ្វីបានជាព្រះអង្គគង់នៅឆ្ងាយម៉្លេះ?
នៅពេលទូលបង្គំមានអាសន្ន
ហេតុអ្វីបានជាព្រះអង្គសំងំស្ងៀមដូច្នេះ?
២ មនុស្សពាលនាំគ្នាតាមធ្វើបាបមនុស្សទុរគត
ទាំងឥតអៀនខ្មាស
ពួកគេប្រើកលល្បិចធ្វើឲ្យ
មនុស្សទុរគតវិនាស។
៣ មនុស្សពាលតែងតែនិយាយអួត
អំពីការលោភលន់របស់ខ្លួន
ហើយមនុស្សកេងប្រវ័ញ្ចនាំគ្នានិយាយចំអក
និងប្រមាថព្រះអម្ចាស់។
៤ មនុស្សពាលនិយាយទាំងវាយឫកខ្ពស់
ហើយមិនរវីរវល់នឹងអ្វីសោះ
ព្រោះគេគិតថា គ្មានព្រះជាម្ចាស់ទេ!
៥ អ្វីៗដែលគេធ្វើតែងតែចម្រុងចម្រើនជានិច្ច
គេគិតមិនដល់សោះថា
ព្រះអង្គនឹងវិនិច្ឆ័យទោសគេដូច្នេះ
គេក៏បន្ទាបបន្ថោកបច្ចាមិត្តរបស់ខ្លួន។
៦ គេគិតក្នុងចិត្តថា «អញនឹងមិនត្រូវរង្គោះរង្គើ
ហើយអញក៏នឹងមិនជួបប្រទះ
ទុក្ខលំបាកសោះឡើយ»។
៧ មាត់របស់គេពោលតែពាក្យបណ្ដាសា
ពាក្យបោកបញ្ឆោត និងពាក្យមួលបង្កាច់
ហើយពាក្យអពមង្គល
និងទុច្ចរិតស្ថិតនៅលើចុងអណ្ដាតគេជានិច្ច។
៨ គេតែងពួនស្ទាក់នៅក្បែរភូមិ
ហើយប្រហារជីវិតជនស្លូតត្រង់ដោយសម្ងាត់
គេចេះតែឃ្លាំមើលមនុស្សទន់ខ្សោយ។
៩ គេពួនដូចសត្វសិង្ហសំងំនៅតាមគុម្ពោត
គេពួនស្ទាក់ចាំចាប់ជនទុរគត
គេចាប់ជនទុរគត ដោយទាក់ទាញ
ឲ្យធ្លាក់ទៅក្នុងអន្ទាក់របស់ខ្លួន។
១០ ជនទុរគតក៏ដួល ក្រាបនៅដី
ហើយធ្លាក់ទៅក្នុងកណ្ដាប់ដៃរបស់
មនុស្សពាល។
១១ មនុស្សពាលគិតក្នុងចិត្តថា
«ព្រះជាម្ចាស់មិនចាប់អារម្មណ៍ទេ!
ព្រះអង្គបិទព្រះនេត្រ
ព្រះអង្គមិនទតមើលទាល់តែសោះ!»។
១២ ព្រះអម្ចាស់អើយ សូមតើនឡើង
បង្ហាញព្រះបារមីរបស់ព្រះអង្គ
សូមកុំភ្លេចមនុស្សទន់ទាបឡើយ!
១៣ ហេតុអ្វីបានជាមនុស្សពាលចំអក
មើលងាយព្រះជាម្ចាស់?
ហេតុអ្វីបានជាគេគិតក្នុងចិត្តថា
«ព្រះអង្គនឹងមិនរករឿងអញឡើយ» ដូច្នេះ?។
១៤ ព្រះអម្ចាស់អើយ
ព្រះអង្គពិតជាទតឃើញទុក្ខលំបាក
និងការឈឺចាប់របស់មនុស្សទន់ទាប
ព្រះអង្គប្រុងនឹងជួយគេជានិច្ច
មនុស្សទុរគតផ្ញើជីវិតលើព្រះអង្គទាំងស្រុង
ហើយមានតែព្រះអង្គទេ
ដែលយាងមកជួយសង្គ្រោះជនកំព្រា។
១៥ សូមព្រះអង្គកាច់បំបាក់ដៃរបស់មនុស្សពាល
សូមដាក់ទោសពួកគេ
ដើម្បីកុំឲ្យគេប្រព្រឹត្ត
អំពើពាលតទៅទៀត!។
១៦ ព្រះអម្ចាស់ជាព្រះមហាក្សត្រដ៏គង់នៅ
អស់កល្បជាអង្វែងតរៀងទៅ
សាសន៍ដទៃនឹងត្រូវលុបបំបាត់ចេញ
អស់ពីស្រុករបស់ព្រះអង្គ។
១៧ បពិត្រព្រះអម្ចាស់ ព្រះអង្គព្រះអង្គឈ្វេងយល់
បំណងចិត្តរបស់មនុស្សទន់ទាប
ព្រះអង្គលើកទឹកចិត្តគេ
១៨ ព្រះអង្គតែងតែផ្ទៀងព្រះកាណ៌ស្ដាប់ជនកំព្រា
និងមនុស្សដែលត្រូវគេជិះជាន់
ហើយព្រះអង្គរកយុត្តិធម៌ឲ្យគេ
ដើម្បីកុំឲ្យមនុស្សនៅលើផែនដី
អាចសង្កត់សង្កិនគេតទៅមុខទៀត។
១១
ទូលបង្គំទុកចិត្តលើព្រះអម្ចាស់
១ ទំនុកពីសៀវភៅរបស់គ្រូចម្រៀង។
ទំនុករបស់ស្តេចដាវីឌ។
-ខ្ញុំមកជ្រកកោនជាមួយព្រះអម្ចាស់ហើយ
ហេតុអ្វីបានជាអ្នករាល់គ្នាប្រាប់ខ្ញុំ
ឲ្យរត់ទៅជ្រកនៅតាមភ្នំ
ដូចសត្វស្លាបទៅវិញដូច្នេះ?
២ -ពួកជនពាលបានយឹតធ្នូ ភ្ជាប់ព្រួញទៅនឹងខ្សែ
បម្រុងនឹងបាញ់ចេញពីទីងងឹត
សំដៅទៅលើអស់អ្នកដែលមានចិត្តទៀងត្រង់។
៣ ប្រសិនបើអ្វីៗដែលជាមូលដ្ឋាននៃសង្គម
ត្រូវរលំអស់
តើមនុស្សសុចរិតនឹងធ្វើអ្វីកើត?។
៤ -ព្រះអម្ចាស់គង់នៅក្នុងព្រះវិហារដ៏វិសុទ្ធ*
របស់ព្រះអង្គ
បល្ល័ង្ករបស់ព្រះអង្គស្ថិតនៅក្នុងស្ថានបរមសុខ
ព្រះអង្គទតមើល ហើយឈ្វេងយល់អ្វីៗទាំងអស់
ដែលមនុស្សលោកធ្វើ។
៥ ព្រះអម្ចាស់ឈ្វេងយល់ចិត្តមនុស្សសុចរិត
តែព្រះអង្គមិនសព្វព្រះហឫទ័យនឹងមនុស្សពាល
ព្រមទាំងអ្នកដែលប្រព្រឹត្តអំពើឃោរឃៅទេ។
៦ សូមព្រះអង្គដាក់ទោសមនុស្សពាល
ដោយធ្វើឲ្យមានរងើកភ្លើង ភ្លើង និងស្ពាន់ធ័រ
បង្អុរចុះមកលើពួកគេដូចជាភ្លៀង
ហើយសូមឲ្យខ្យល់ក្ដៅ
បក់បោកមកលើពួកគេដែរ។
៧ ដ្បិតព្រះអម្ចាស់ព្រះអង្គសុចរិត
ព្រះអង្គសព្វព្រះហឫទ័យនឹងកិច្ចការណា
ដែលសុចរិត។
មនុស្សមានចិត្តទៀងត្រង់
មុខជាបានឃើញព្រះភ័ក្ត្ររបស់ព្រះអង្គ។
១២
ព្រះអម្ចាស់អើយ សូមជួយផង!
១ ទំនុកពីសៀវភៅរបស់គ្រូចម្រៀង
កំដរដោយពិណប្រាំបីខ្សែ។
ទំនុករបស់ស្តេចដាវីឌ។
២ ឱព្រះអម្ចាស់អើយ
សូមជួយសង្គ្រោះផង!
ដ្បិតលែងមានមនុស្សទៀងត្រង់ទៀតហើយ
រីឯមនុស្សមានចិត្តស្មោះត្រង់ក្នុងចំណោម
មនុស្សលោក ក៏បាត់បង់អស់ដែរ។
៣ ម្នាក់ៗគិតតែនិយាយមួលបង្កាច់គ្នា
ទៅវិញទៅមក
គេនិយាយសុទ្ធតែពាក្យបញ្ចើចបញ្ចើដាក់គ្នា
តែមានចិត្តមិនទៀង។
៤ សូមព្រះអម្ចាស់បំបិទមាត់ដែលចេះតែពោល
ពាក្យបញ្ចើចបញ្ចើ និងកាត់អណ្ដាត
ដែលចេះតែនិយាយយ៉ាងព្រហើននោះទៅ។
៥ ពួកគេពោលថា «ដោយសារអណ្ដាតរបស់យើង
យើងធ្វើអ្វី ក៏បានជោគជ័យដែរ!
យើងនិយាយយ៉ាងណាក៏បានដែរ
គ្មាននរណាត្រួតត្រាលើយើងទេ»។
៦ ដោយព្រះអង្គទតឃើញមនុស្សទុរគត
ត្រូវគេជិះជាន់
និងឮសម្រែករបស់ជនក្រីក្រដែលរងទុក្ខលំបាក
ព្រះអម្ចាស់មានព្រះបន្ទូលថា៖
«ឥឡូវនេះ យើងត្រូវតែក្រោកឡើង
យើងមកសង្គ្រោះអស់អ្នកដែលត្រូវគេ
មើលងាយបន្ទាបបន្ថោក»។
៧ ព្រះបន្ទូលរបស់ព្រះអម្ចាស់ជាព្រះបន្ទូលដ៏បរិសុទ្ធ*
គឺបរិសុទ្ធជាងប្រាក់ដែលគេយកទៅដុត
ក្នុងឡប្រាំពីរដងទៅទៀត។
៨ ព្រះអម្ចាស់អើយ
ព្រះអង្គធ្វើតាមព្រះបន្ទូលរបស់ព្រះអង្គជានិច្ច
ព្រះអង្គនឹងការពារយើងខ្ញុំឲ្យរួច
ពីកណ្ដាប់ដៃរបស់អ្នកទាំងនោះរហូតតទៅ
៩ ទោះបីមានជនពាលដើរក្រឡឹងជុំវិញយើងខ្ញុំ
ឬទោះបីមនុស្សលោកចេះតែប្រព្រឹត្តអំពើទុយ៌ស
កាន់តែច្រើនឡើងៗក៏ដោយ។
១៣
ពាក្យអង្វរសូមព្រះអម្ចាស់ជួយសង្គ្រោះ
១ ទំនុកពីសៀវភៅរបស់គ្រូចម្រៀង។
ទំនុករបស់ស្តេចដាវីឌ។
២ ឱព្រះអម្ចាស់អើយ
តើព្រះអង្គនៅតែភ្លេចទូលបង្គំ
ដល់ពេលណា?
តើព្រះអង្គនៅតែមិនព្រមទតមើល
មកទូលបង្គំដល់កាលណាទៀត?
៣ តើទូលបង្គំត្រូវមានកង្វល់ក្នុងចិត្ត
ដល់ពេលណាទៅ?
តើចិត្តទូលបង្គំត្រូវរងទុក្ខព្រួយ
ទាំងយប់ ទាំងថ្ងៃដល់អង្កាល់?
តើខ្មាំងសត្រូវមានជ័យជម្នះលើទូលបង្គំ
ដល់កាលណាទៀត?
៤ ឱព្រះអម្ចាស់ជាព្រះនៃទូលបង្គំអើយ
សូមទតមកទូលបង្គំ
ហើយឆ្លើយតបនឹងទូលបង្គំផង!
សូមប្រទានកម្លាំងដល់ទូលបង្គំ
កុំទុកឲ្យទូលបង្គំស្លាប់ឡើយ
៥ ក្រែងលោខ្មាំងសត្រូវរបស់ទូលបង្គំពោលថា
«អញបានឈ្នះវាហើយ!»
ហើយបច្ចាមិត្តរបស់ទូលបង្គំនាំគ្នាត្រេកអរសប្បាយ
ព្រោះតែទូលបង្គំបរាជ័យ។
៦ ចំពោះទូលបង្គំវិញ ទូលបង្គំទុកចិត្ត
លើព្រះហឫទ័យស្មោះត្រង់របស់ព្រះអង្គ
ចិត្តទូលបង្គំត្រេកអរសប្បាយ
ព្រោះព្រះអង្គសង្គ្រោះទូលបង្គំ។
ទូលបង្គំនឹងច្រៀងសរសើរព្រះអម្ចាស់
ដោយព្រះអង្គបានប្រោសប្រណីដល់ទូលបង្គំ។
១៤
អ្នកជឿនៅក្នុងចំណោមមនុស្សពាល
១ ទំនុកពីសៀវភៅរបស់គ្រូចម្រៀង។
ទំនុករបស់ស្តេចដាវីឌ។
មនុស្សល្ងីល្ងើគិតក្នុងចិត្តថា
«គ្មានព្រះជាម្ចាស់ទាល់តែសោះ!»
គេនាំគ្នាប្រព្រឹត្តអំពើថោកទាប
និងកិច្ចការផ្សេងៗគួរឲ្យស្អប់ខ្ពើម
គឺគ្មាននរណាម្នាក់ប្រព្រឹត្តអំពើល្អឡើយ។
២ ព្រះអម្ចាស់ទតពីស្ថានបរមសុខមក
ពិនិត្យមើលមនុស្សលោក
ព្រះអង្គរកមើល ក្រែងលោមាននរណាម្នាក់
ដឹងខុសត្រូវ ហើយស្វែងរកព្រះជាម្ចាស់។
៣ ប៉ុន្តែ មនុស្សគ្រប់ៗរូបបានវង្វេងចេញឆ្ងាយ
ពីព្រះជាម្ចាស់
ហើយនាំគ្នាប្រព្រឹត្តអំពើខិលខូច
គ្មាននរណាម្នាក់ប្រព្រឹត្តអំពើល្អឡើយ
សូម្បីតែម្នាក់ក៏គ្មានផង។
៤ តើអស់អ្នកដែលប្រព្រឹត្តអំពើទុច្ចរិត
សុទ្ធតែជាមនុស្សល្ងង់ឬ?
អ្នកទាំងនោះចិញ្ចឹមជីវិត
ដោយជិះជាន់ប្រជារាស្ដ្ររបស់យើង
គេមិនអង្វររកព្រះអម្ចាស់ទាល់តែសោះ។
៥ អ្នកទាំងនោះភ័យញ័រជាខ្លាំង
ដោយព្រះជាម្ចាស់ជួយគាំទ្រក្រុមមនុស្សសុចរិត។
៦ «អ្នករាល់គ្នាបានធ្វើឲ្យមនុស្សទុរគត
បាត់បង់សេចក្ដីសង្ឃឹមរបស់ខ្លួន
ប៉ុន្តែ ព្រះអម្ចាស់ធ្វើជាជម្រករបស់គេ។
៧ សូមឲ្យអ៊ីស្រាអែលបានទទួល
ការសង្គ្រោះពីក្រុងស៊ីយ៉ូន។
នៅពេលដែលព្រះអម្ចាស់នាំប្រជាជនរបស់ព្រះអង្គ
ឲ្យងើបមុខឡើងវិញ
ពូជរបស់លោកយ៉ាកុបនឹងត្រេកអរសប្បាយ
ពូជរបស់លោកអ៊ីស្រាអែលនឹងមានអំណរ
លើសលប់»។
១៥
មនុស្សដែលព្រះអម្ចាស់សព្វព្រះហឫទ័យ
១ ទំនុករបស់ស្តេចដាវីឌ។
ឱព្រះអម្ចាស់អើយ
តើនរណាអាចស្នាក់នៅក្នុងព្រះពន្លា
របស់ព្រះអង្គបាន?
តើនរណាអាចស្ថិតនៅលើភ្នំដ៏វិសុទ្ធ*
របស់ព្រះអង្គបាន?
២ គឺមានតែមនុស្សឥតសៅហ្មង
ដែលប្រព្រឹត្តអំពើសុចរិត
ហើយនិយាយតែសេចក្ដីពិតដែលមាននៅ
ក្នុងដួងចិត្តរបស់ខ្លួនប៉ុណ្ណោះ ទើបអាចនៅបាន។
៣ គេមិននិយាយមួលបង្កាច់
មិនធ្វើបាបអ្នកដ៏ទៃ
ហើយក៏មិនបង្អាប់បង្អោនកិត្តិយស
បងប្អូនរួមជាតិរបស់ខ្លួនដែរ។
៤ គេមិនរាប់រកអស់អ្នកដែលព្រះជាម្ចាស់
មិនគាប់ព្រះហឫទ័យនោះឡើយ
តែគេលើកកិត្តិយសអស់អ្នកដែលគោរព
កោតខ្លាចព្រះអម្ចាស់។
បើគេសន្យាអ្វីមួយ
ទោះបីត្រូវខាតបង់យ៉ាងណាក៏ដោយ
ក៏គេនៅតែគោរពតាមពាក្យសម្ដីរបស់ខ្លួនជានិច្ច។
៥ គេឲ្យប្រាក់អ្នកដទៃខ្ចី ដោយមិនយកការ
ហើយគេក៏មិនព្រមទទួលសំណូក
ដើម្បីដាក់ទោសជនស្លូតត្រង់ដែរ។
អ្នកណាប្រព្រឹត្តដូច្នេះ
អ្នកនោះនឹងបានសុខជានិច្ច។
១៦
ពាក្យអធិស្ឋានដោយទុកចិត្ត
១ កំណាព្យរបស់ស្ដេចដាវីឌ។
ឱព្រះជាម្ចាស់អើយ
សូមការពារទូលបង្គំផង
ដ្បិតទូលបង្គំមកជ្រកកោនជាមួយព្រះអង្គហើយ!
២ ខ្ញុំទូលព្រះអម្ចាស់ថា ព្រះអង្គជាព្រះអម្ចាស់
នៃទូលបង្គំ ក្រៅពីព្រះអង្គ
គ្មានអ្វីប្រសើរសម្រាប់ទូលបង្គំឡើយ!។
៣ ប្រជាជនដ៏វិសុទ្ធ*នៅលើទឹកដីនេះ
សុទ្ធតែជាមនុស្សល្អ
ទូលបង្គំពេញចិត្តនឹងនៅជាមួយពួកគេណាស់។
៤ រីឯអស់អ្នកដែលងាកទៅថ្វាយបង្គំព្រះដទៃ
កាន់តែធ្វើឲ្យខ្លួនរងទុក្ខថែមទៀត
ទូលបង្គំនឹងមិនចូលរួមសម្លាប់សត្វធ្វើយញ្ញ
ជាមួយពួកគេឡើយ
ហើយទូលបង្គំក៏នឹងមិនថ្វាយបង្គំព្រះទាំងនោះ
រួមជាមួយពួកគេដែរ។
៥ ក្រៅពីព្រះអម្ចាស់ ទូលបង្គំគ្មានចំណែកមត៌កអ្វីទេ
ព្រះអង្គប្រទានអ្វីៗទាំងអស់
ដែលទូលបង្គំត្រូវការ
អនាគតរបស់ទូលបង្គំស្ថិតនៅលើព្រះអង្គ។
៦ ព្រះអង្គប្រទានចំណែកដ៏ល្អវិសេសក្រៃលែង
មកទូលបង្គំ
គឺជាកេរមត៌កល្អប្រសើរបំផុតសម្រាប់ទូលបង្គំ។
៧ ទូលបង្គំសរសើរតម្កើងព្រះអម្ចាស់
ព្រោះព្រះអង្គផ្តល់យោបល់ដល់ទូលបង្គំ
សូម្បីតែនៅពេលយប់
ក៏មនសិការរបស់ទូលបង្គំដាស់តឿនទូលបង្គំដែរ។
៨ ទូលបង្គំនឹកដល់ព្រះអម្ចាស់
ដែលស្ថិតនៅខាងមុខទូលបង្គំជានិច្ច
ដោយព្រះអង្គគង់នៅខាងស្តាំទូលបង្គំ
ទូលបង្គំនឹងមិនភ័យខ្លាចសោះឡើយ។
៩ ហេតុនេះហើយបានចិត្តទូលបង្គំរីករាយ
វិញ្ញាណទូលបង្គំត្រេកអរដ៏លើសលប់
ហើយសូម្បីតែរូបកាយរបស់ទូលបង្គំ
ក៏បានសម្រាកដោយសេចក្ដីសង្ឃឹមដែរ។
១០ ដ្បិតព្រះអង្គនឹងមិនបោះបង់ព្រលឹង
ទូលបង្គំចោលនៅក្នុងស្ថានមនុស្សស្លាប់ឡើយ
ហើយព្រះអង្គក៏មិនបណ្តោយឲ្យសព
អ្នកបម្រើរបស់ព្រះអង្គត្រូវរលួយដែរ។
១១ ព្រះអង្គបង្ហាញទូលបង្គំឲ្យស្គាល់ផ្លូវ
ឆ្ពោះទៅកាន់ជីវិត។
ដោយព្រះអង្គនៅជាមួយ
ទូលបង្គំមានអំណរដ៏បរិបូណ៌
ហើយនៅខាងស្តាំព្រះអង្គ
ទូលបង្គំក៏រីករាយអស់កល្បជានិច្ចដែរ។
១៧
ពាក្យអធិស្ឋានរបស់ជនស្លូតត្រង់
១ ពាក្យអធិស្ឋានរបស់ស្តេចដាវីឌ។
ឱព្រះអម្ចាស់អើយ!
សូមព្រះអង្គព្រះសណ្ដាប់សំណូមពរ
ដ៏ត្រឹមត្រូវរបស់ទូលបង្គំ
សូមយកព្រះហឫទ័យទុកដាក់នឹង
សម្រែករបស់ទូលបង្គំ
សូមផ្ទៀងព្រះកាណ៌ស្ដាប់ពាក្យទូលអង្វររបស់
ទូលបង្គំដែលហូរចេញពីដួងចិត្តដ៏ស្មោះត្រង់។
២ សូមរកយុត្តិធម៌ឲ្យទូលបង្គំផង
ដ្បិតព្រះអង្គទតឃើញយ៉ាងច្បាស់នូវអ្វីៗ
ដែលត្រឹមត្រូវ។
៣ ព្រះអង្គស្គាល់ចិត្តទូលបង្គំច្បាស់ហើយ
ព្រះអង្គបានពិនិត្យមើលចិត្តទូលបង្គំនៅពេលយប់
ព្រះអង្គបានល្បងចិត្តទូលបង្គំ
តែពុំឃើញមានបំណងអាក្រក់អ្វីទេ
ទូលបង្គំមិនបានពោលពាក្យអ្វីខុសឡើយ។
៤ ទូលបង្គំយកចិត្តទុកដាក់នឹងព្រះបន្ទូល
របស់ព្រះអង្គ
ហើយប្រយ័ត្នខ្លួនមិនប្រព្រឹត្តអំពើឃោរឃៅ
ដូចមនុស្សឯទៀតៗនោះឡើយ។
៥ ទូលបង្គំដើរតាមមាគ៌ារបស់ព្រះអង្គយ៉ាងខ្ជាប់ខ្ជួន
ទូលបង្គំបោះជំហានតាមឥតលំអៀងទេ។
៦ ឱព្រះជាម្ចាស់អើយ ទូលបង្គំអង្វររកព្រះអង្គ
ដ្បិតព្រះអង្គតែងតែឆ្លើយតបនឹងទូលបង្គំ!
សូមផ្ទៀងព្រះកាណ៌ស្ដាប់ទូលបង្គំ
សូមព្រះអង្គព្រះសណ្ដាប់ពាក្យរបស់ទូលបង្គំផង!។
៧ ព្រះអង្គតែងតែសង្គ្រោះអស់អ្នក
ដែលមកជ្រកកោនក្រោមម្លប់បារមីរបស់ព្រះអង្គ
ឲ្យរួចពីពួកអ្នកសង្កត់សង្កិនគេ
ដូច្នេះ សូមសម្ដែងព្រះហឫទ័យសប្បុរសដ៏អស្ចារ្យរបស់ព្រះអង្គផង។
៨ សូមរក្សាទូលបង្គំដូចរក្សាប្រស្រីភ្នែក
សូមការពារទូលបង្គំដូចសត្វស្លាបក្រុងកូនរបស់វា
៩ សូមកុំឲ្យមនុស្សពាលធ្វើទុក្ខបៀតបៀនទូលបង្គំ
កុំឲ្យខ្មាំងសត្រូវមកឡោមព័ទ្ធប្រល័យ
ជីវិតទូលបង្គំបានឡើយ។
១០ អ្នកទាំងនោះគ្មានចិត្តត្រាប្រណីទេ
មាត់គេពោលចេញមកនូវពាក្យអួតបំប៉ោង
១១ ពួកគេដេញតាមទូលបង្គំទាន់
ហើយឡោមព័ទ្ធទូលបង្គំទៀតផង
គេសម្លក់សម្លឹងមកទូលបង្គំ
បម្រុងនឹងប្រហារជីវិតទូលបង្គំ
១២ ពួកគេប្រៀបបីដូចជាសត្វសិង្ហ
ដែលរង់ចាំតែហែកស៊ី
និងដូចជាសត្វសាហាវ ដែលពួនចាំចាប់រំពា។
១៣ ឱព្រះអម្ចាស់អើយ សូមតើនឡើង
សូមយាងទៅប្រឈមមុខនឹងពួកគេ
ឲ្យពួកគេបរាជ័យ!
សូមយកព្រះខ័នរបស់ព្រះអង្គមករំដោះ
ទូលបង្គំឲ្យរួចពីកណ្ដាប់ដៃរបស់ជនពាល។
១៤ ឱព្រះអម្ចាស់អើយ សូមដេញពួកគេចេញពីចំណោមមនុស្សលោក
ដោយឫទ្ធិបារមីរបស់ព្រះអង្គ
សូមដាក់ទោសពួកគេ ឲ្យជីវិតពួកគេ
រងទុក្ខវេទនាយ៉ាងខ្លាំង តាំងពីកូនរហូតដល់ចៅ។
១៥ ចំពោះទូលបង្គំវិញ
ដោយទូលបង្គំប្រព្រឹត្តតាមសេចក្ដីសុចរិត
ទូលបង្គំនឹងបានឃើញព្រះភ័ក្ត្រព្រះអង្គ
ពេលទូលបង្គំក្រោកពីដំណេក
ទូលបង្គំបានស្កប់ចិត្ត ដោយព្រះអង្គគង់ជាមួយ។
១៨
ពាក្យអរព្រះគុណរបស់ស្តេចដាវីឌនៅពេលមានជ័យជម្នះ
១ ទំនុកពីសៀវភៅរបស់គ្រូចម្រៀង
ទំនុករបស់ស្តេចដាវីឌជាអ្នកបម្រើរបស់ព្រះអម្ចាស់
ជាពាក្យដែលស្តេចច្រៀងថ្វាយព្រះអម្ចាស់
នៅថ្ងៃដែលព្រះអង្គបានរំដោះស្តេច
ឲ្យរួចពីកណ្ដាប់ដៃរបស់ខ្មាំងសត្រូវទាំងប៉ុន្មាន
និងរួចពីកណ្ដាប់ដៃរបស់ស្តេចសាអ៊ូល។
២ ព្រះអង្គមានរាជឱង្ការថា៖
ឱព្រះអម្ចាស់អើយ
ទូលបង្គំស្រឡាញ់ព្រះអង្គ
ព្រោះព្រះអង្គជាកម្លាំងរបស់ទូលបង្គំ!
៣ ព្រះអម្ចាស់ជាថ្មដាការពារទូលបង្គំ
ជាបន្ទាយដ៏រឹងមាំរបស់ទូលបង្គំ
ជាព្រះដែលជួយរំដោះទូលបង្គំ
ព្រះអង្គជាព្រះនៃទូលបង្គំ
ជាថ្មដាសម្រាប់ទូលបង្គំពឹងជ្រក
ព្រះអង្គជាខែល
ជាកម្លាំងដែលសង្គ្រោះទូលបង្គំ
និងជាជម្រកដ៏មាំមួនរបស់ទូលបង្គំ។
៤ ពេលខ្ញុំស្រែករកព្រះអង្គ
ព្រះអង្គសង្គ្រោះខ្ញុំឲ្យរួចពីខ្មាំងសត្រូវរបស់ខ្ញុំ
សូមលើកតម្កើងព្រះអម្ចាស់!។
៥ សេចក្ដីស្លាប់រួបរឹតខ្ញុំ
រីឯសេចក្ដីវិនាសអន្តរាយធ្លាក់មកលើខ្ញុំ
ដូចទឹកហូរមកយ៉ាងខ្លាំង។
៦ សេចក្ដីស្លាប់នៅព័ទ្ធជុំវិញខ្ញុំ
ដូចជាសំណាញ់ដែលគេបោះមកលើខ្ញុំ។
៧ នៅពេលមានទុក្ខវេទនា ខ្ញុំអង្វររកព្រះអម្ចាស់
ខ្ញុំស្រែកហៅរកព្រះរបស់ខ្ញុំ
ពីក្នុងព្រះវិហាររបស់ព្រះអង្គ
ព្រះអង្គព្រះសណ្ដាប់ឮសំឡេងខ្ញុំ
ហើយស្នូរសម្រែករបស់ខ្ញុំបានឮទៅដល់
ព្រះកាណ៌របស់ព្រះអង្គ។
៨ ពេលនោះ ផែនដីក៏កក្រើកញាប់ញ័រ
ភ្នំទាំងឡាយត្រូវរង្គើរហូតដល់គ្រឹះរបស់វា
ហើយកក្រើក
ដោយសារព្រះអង្គព្រះអង្គព្រះពិរោធ។
៩ មានផ្សែងហុយចេញមកពីព្រះនាសារបស់ព្រះអង្គ
ព្រះអង្គផ្លុំភ្លើងដែលឆាបឆេះចេញមក
ហើយក៏មានរងើកភ្លើងខ្ទាតចេញមក
ពីព្រះឱស្ឋរបស់ព្រះអង្គដែរ។
១០ ព្រះអង្គបានផ្អៀងផ្ទៃមេឃ ព្រះអង្គយាងចុះមក
ដោយមានពពកយ៉ាងក្រាស់
នៅពីក្រោមព្រះបាទាផង។
១១ ព្រះអង្គយាងគង់លើខេរូប៊ីម* ហើយហោះមក
ព្រះអង្គគង់នៅលើវាយោ
ដូចគង់នៅលើស្លាបបក្សី។
១២ ព្រះអង្គយកភាពងងឹតធ្វើជាកន្លែងពួន
ហើយយកពពកខ្មៅក្រាស់ពេញទៅដោយទឹក
ធ្វើជាព្រះពន្លា។
១៣ មានផ្លេកបន្ទោរចេញមកពីពពកភ្លឺ
នៅខាងមុខព្រះអង្គ
ហើយមានព្រឹល និងរងើកភ្លើងធ្លាក់ចុះមក។
១៤ ព្រះអម្ចាស់ធ្វើឲ្យមានស្នូរផ្គរលាន់នៅលើមេឃ
ព្រះដ៏ខ្ពង់ខ្ពស់បំផុតបន្លឺព្រះសូរសៀង។
១៥ ព្រះអង្គបាញ់ព្រួញរបស់ព្រះអង្គទៅលើខ្មាំងសត្រូវ
ដើម្បីកម្ចាត់កម្ចាយពួកគេ។
ព្រះអង្គបាញ់ផ្លេកបន្ទោរ
ធ្វើឲ្យពួកគេបាក់ទ័ព។
១៦ ឱព្រះអម្ចាស់អើយ
ព្រះបន្ទូលគំរាមរបស់ព្រះអង្គ និងខ្យល់ព្យុះ
ដែលបក់ចេញមកពីព្រះនាសារបស់ព្រះអង្គ
បានធ្វើឲ្យបាតសមុទ្រលេចចេញមក
ហើយគ្រឹះរបស់ផែនដីក៏លេចមកដែរ។
១៧ ព្រះអង្គបានលាតព្រះហស្ដពីស្ថានលើមករកខ្ញុំ
ព្រះអង្គស្រង់ខ្ញុំចេញឲ្យផុតពីទឹកសមុទ្រ
១៨ ព្រះអង្គបានរំដោះខ្ញុំឲ្យរួចផុតពី
ខ្មាំងសត្រូវដ៏ខ្លាំងពូកែ
ហើយឲ្យខ្ញុំរួចផុតពីអស់អ្នកដែលស្អប់ខ្ញុំ
ព្រមទាំងអស់អ្នកដែលមានកម្លាំង
ខ្លាំងជាងខ្ញុំផង។
១៩ នៅពេលខ្ញុំមានទុក្ខវេទនា
អ្នកទាំងនោះនាំគ្នាមកវាយប្រហារខ្ញុំ
ប៉ុន្តែ ព្រះអម្ចាស់ធ្វើជាបង្អែករបស់ខ្ញុំ។
២០ ព្រះអង្គបាននាំខ្ញុំចេញឲ្យផុតពីគ្រោះថ្នាក់
ព្រះអង្គរំដោះខ្ញុំ មកពីព្រះអង្គស្រឡាញ់ខ្ញុំ។
២១ ព្រះអម្ចាស់បានប្រព្រឹត្តចំពោះខ្ញុំ
ស្របតាមសេចក្ដីសុចរិតរបស់ខ្ញុំ
ព្រះអង្គតបស្នងមកខ្ញុំវិញ
ស្របតាមអំពើបរិសុទ្ធដែលខ្ញុំបានប្រព្រឹត្តដែរ
២២ ដ្បិតខ្ញុំបានប្រតិបត្តិតាមមាគ៌ារបស់ព្រះអម្ចាស់
ហើយខ្ញុំមិនបានឃ្លាតចេញពីព្រះរបស់ខ្ញុំ
ដោយប្រព្រឹត្តអំពើអាក្រក់នោះឡើយ។
២៣ ខ្ញុំបានប្រព្រឹត្តតាមវិន័យទាំងប៉ុន្មាន
របស់ព្រះអង្គ ខ្ញុំមិនបានបំពានលើបញ្ញត្តិ
របស់ព្រះអង្គទេ។
២៤ ព្រះអង្គជ្រាបថាខ្ញុំគ្មានសៅហ្មង
ហើយខ្ញុំបានប្រយ័ត្នខ្លួន
មិនឲ្យមានកំហុសឡើយ។
២៥ ព្រះអម្ចាស់ប្រោសប្រណីដល់ខ្ញុំ
ស្របតាមអំពើសុចរិតដែលខ្ញុំបានប្រព្រឹត្ត
ព្រោះព្រះអង្គឈ្វេងយល់ថាខ្ញុំប្រព្រឹត្ត
អំពើបរិសុទ្ធ។
២៦ ព្រះអម្ចាស់អើយ
ព្រះអង្គសម្ដែងព្រះហឫទ័យស្មោះត្រង់ចំពោះអ្នក
ដែលមានចិត្តស្មោះត្រង់
ព្រះអង្គសម្ដែងព្រះហឫទ័យស្មោះសរ
ចំពោះអ្នកដែលមានចិត្តស្មោះសរ។
២៧ ចំពោះអ្នកដែលមានចិត្តបរិសុទ្ធ
ព្រះអង្គក៏សម្ដែងថា ព្រះអង្គបរិសុទ្ធដែរ
ចំពោះអ្នកដែលមានចិត្តវៀចវេរវិញ
ព្រះអង្គសម្ដែងថាព្រះអង្គឈ្លាសវៃ
២៨ ដ្បិតព្រះអង្គហើយដែលសង្គ្រោះមនុស្សទន់ទាប
និងបន្ទាបអស់អ្នកដែលមានចិត្តឆ្មើងឆ្មៃ។
២៩ ឱព្រះអម្ចាស់ជាព្រះនៃទូលបង្គំអើយ
ព្រះអង្គជាពន្លឺរបស់ទូលបង្គំ
ហើយព្រះអង្គក៏បំភ្លឺសេចក្ដីងងឹត
របស់ទូលបង្គំដែរ។
៣០ ព្រះអង្គប្រទានកម្លាំងឲ្យទូលបង្គំ
វាយលុកខ្មាំងសត្រូវ
និងឲ្យទូលបង្គំអាចលោតរំលងកំពែង
ក្រុងរបស់ពួកគេ។
៣១ មាគ៌ារបស់ព្រះជាម្ចាស់សុទ្ធតែល្អឥតខ្ចោះ
ព្រះបន្ទូលសន្យារបស់ព្រះអម្ចាស់ពិតទាំងស្រុង
ព្រះអង្គជាខែលការពារអស់អ្នក
ដែលមកជ្រកកោនជាមួយព្រះអង្គ។
៣២ មានតែព្រះអម្ចាស់មួយគត់
ដែលពិតជាព្រះជាម្ចាស់
មានតែព្រះរបស់យើងមួយព្រះអង្គប៉ុណ្ណោះ
ដែលពិតជាថ្មដាសម្រាប់ឲ្យយើងជ្រកកោន។
៣៣ ព្រះជាម្ចាស់ប្រទានឲ្យខ្ញុំមានកម្លាំង
និងប្រទានឲ្យមាគ៌ារបស់ខ្ញុំបានល្អឥតខ្ចោះ។
៣៤ ព្រះអង្គប្រោសប្រទានឲ្យខ្ញុំ
រត់លឿនដូចសត្វក្តាន់
ហើយឲ្យខ្ញុំអាចឈរនៅទីខ្ពស់។
៣៥ ព្រះអង្គបង្ហាត់ខ្ញុំឲ្យស្ទាត់ជំនាញខាងធ្វើសឹក
និងឲ្យខ្ញុំមានកម្លាំងយឹតធ្នូលង្ហិនបាន។
៣៦ ឱព្រះអម្ចាស់អើយ
ព្រះអង្គការពារ និងសង្គ្រោះទូលបង្គំ
ព្រះអង្គគាំទ្រទូលបង្គំ ដោយឫទ្ធិបារមីរបស់ព្រះអង្គ
ហើយព្រះអង្គលើកទូលបង្គំឡើង
ដោយព្រះហឫទ័យមេត្តា។
៣៧ ព្រះអង្គការពារទូលបង្គំ
មិនឲ្យខ្មាំងសត្រូវដេញទាន់
មិនឲ្យទូលបង្គំភ្លាត់ជើងដួលឡើយ។
៣៨ ទូលបង្គំដេញតាមពួកខ្មាំងសត្រូវ
និងចាប់ពួកគេបាន
ហើយទូលបង្គំមិនត្រឡប់មកវិញទេ
ដរាបទាល់តែបានកម្ទេចពួកគេអស់។
៣៩ ទូលបង្គំកាប់សម្លាប់ពួកគេ
មិនឲ្យពួកគេក្រោកឡើងវិញឡើយ
ពួកគេដួលស្លាប់នៅនឹងជើងរបស់ទូលបង្គំ។
៤០ ព្រះអង្គប្រទានឲ្យទូលបង្គំមានកម្លាំង
នឹងធ្វើសឹក និងមានជ័យជម្នះលើខ្មាំងសត្រូវ។
៤១ ព្រះអង្គបានធ្វើឲ្យពួកគេបាក់ទ័ព
រត់នៅមុខទូលបង្គំ
ហើយទូលបង្គំបានធ្វើឲ្យអស់អ្នក
ដែលស្អប់ទូលបង្គំវិនាសសូន្យអស់ទៅ។
៤២ គេនាំគ្នាស្រែករកជំនួយ
តែគ្មាននរណាជួយពួកគេសោះ
គេស្រែកហៅព្រះអម្ចាស់
តែព្រះអង្គមិនឆ្លើយតបនឹងពួកគេឡើយ។
៤៣ ទូលបង្គំបានកម្ទេចពួកគេឲ្យហ្មត់
ដូចធូលីដីដែលត្រូវខ្យល់ផាត់
ទូលបង្គំបានបោសពួកគេ
ដូចភក់ជ្រាំនៅតាមផ្លូវ។
៤៤ ព្រះអង្គបានរំដោះទូលបង្គំឲ្យរួច
ពីការបះបោររបស់ប្រជាជន
ហើយតែងតាំងទូលបង្គំ
ឲ្យធ្វើជាអ្នកដឹកនាំប្រជាជាតិនានា
ប្រជាជនមួយដែលទូលបង្គំមិនស្គាល់
បានមកចុះចូលនឹងទូលបង្គំ។
៤៥ ជនបរទេសនាំគ្នាស្ដាប់បង្គាប់ទូលបង្គំ
ហើយពេលទូលបង្គំនិយាយតែមួយម៉ាត់
គេក៏ធ្វើតាមភ្លាម។
៤៦ ជនបរទេសបាក់ទឹកចិត្ត
ហើយចេញពីទីជម្រករបស់គេមក
ទាំងភ័យញាប់ញ័រ។
៤៧ ជយោព្រះអម្ចាស់! សូមសរសើរតម្កើងព្រះអង្គ
ដែលជាថ្មដារបស់ទូលបង្គំ!
សូមលើកតម្កើងព្រះជាម្ចាស់
ដែលបានសង្គ្រោះទូលបង្គំ!
៤៨ ដ្បិតព្រះអង្គបានឲ្យទូលបង្គំ
មានជ័យជម្នះលើខ្មាំងសត្រូវ
ព្រះអង្គបានបង្ក្រាបប្រជាជននានា
ឲ្យមកចុះចូលនឹងទូលបង្គំ
៤៩ ហើយព្រះអង្គបានប្រោសទូលបង្គំ
ឲ្យរួចផុតពីកណ្ដាប់ដៃរបស់ខ្មាំងសត្រូវ!។
ព្រះអង្គបានលើកទូលបង្គំឡើងខ្ពស់
ជាងបច្ចាមិត្តរបស់ទូលបង្គំ
និងរំដោះទូលបង្គំឲ្យរួចផុតពី
មនុស្សឃោរឃៅ។
៥០ ហេតុនេះហើយបានជាទូលបង្គំសរសើរ
តម្កើងព្រះអង្គក្នុងចំណោមប្រជាជាតិនានា
ឱព្រះអម្ចាស់អើយ! ទូលបង្គំនឹងច្រៀង
លើកតម្កើងព្រះនាមរបស់ព្រះអង្គ។
៥១ ព្រះអង្គបានធ្វើការអស្ចារ្យ
ដើម្បីសង្គ្រោះស្តេចដែលព្រះអង្គបានតែងតាំង
ព្រះអង្គបានសម្ដែងព្រះហឫទ័យស្មោះត្រង់
ចំពោះស្តេចដែលព្រះអង្គបានចាក់ប្រេងអភិសេក
គឺចំពោះស្តេចដាវីឌ
និងពូជពង្សរៀងរហូតតទៅ។
១៩
លោកទាំងមូលថ្លែងពីសិរីរុងរឿងរបស់ព្រះអម្ចាស់
១ ទំនុកពីសៀវភៅរបស់គ្រូចម្រៀង។
ទំនុករបស់ស្តេចដាវីឌ។
២ ផ្ទៃមេឃថ្លែងអំពីសិរីរុងរឿង
របស់ព្រះជាម្ចាស់
អាកាសវេហាស៍ប្រកាសអំពីស្នាព្រះហស្ដ
របស់ព្រះអង្គ។
៣ ថ្ងៃមួយតំណាលប្រាប់ថ្ងៃមួយទៀត
យប់មួយប្រាប់យប់មួយទៀតឲ្យបានដឹង
៤ តែមិនមែនដោយប្រើភាសា ឬពាក្យសម្ដីទេ
ហើយក៏មិនឮសូរស័ព្ទអ្វីដែរ។
៥ ប៉ុន្តែ សេចក្ដីថ្លាថ្លែងរបស់វា
ត្រាច់ចរលើផែនដីទាំងមូល
ហើយសំឡេងរបស់វាលាន់ឮរហូតដល់ជើងមេឃ
ជាកន្លែងដែលព្រះជាម្ចាស់បានដំឡើងពន្លា
សម្រាប់ព្រះអាទិត្យ។
៦ រីឯព្រះអាទិត្យក៏រះឡើង
ប្រៀបបីដូចជាកូនកំលោះចេញមកសំពះផ្ទឹម
និងប្រៀបបីដូចជាវីរបុរសដ៏ខ្លាំងពូកែមួយរូប
ចេញមករត់ប្រណាំងដោយអរសប្បាយ។
៧ ព្រះអាទិត្យចរយាត្រាពីជើងមេឃម្ខាង
ឆ្ពោះទៅជើងមេឃម្ខាងទៀត គ្មាននរណា
អាចបំបាំងកម្ដៅរបស់ព្រះអាទិត្យបានឡើយ។
វិន័យរបស់ព្រះជាម្ចាស់
៨ វិន័យ*របស់ព្រះអម្ចាស់ល្អឥតខ្ចោះ
ធ្វើឲ្យមានកម្លាំងចិត្តឡើងវិញ
ព្រះបណ្ដាំរបស់ព្រះអម្ចាស់គួរជាទីទុកចិត្ត
ធ្វើឲ្យមនុស្សល្ងិតល្ងង់បែរទៅជាមានប្រាជ្ញា
៩ បទបញ្ជារបស់ព្រះអម្ចាស់សុទ្ធតែត្រឹមត្រូវ
ធ្វើឲ្យចិត្តមានអំណរសប្បាយ
បទបញ្ញត្តិរបស់ព្រះអម្ចាស់ល្អត្រចះត្រចង់
បំភ្លឺចិត្តគំនិតឲ្យបានយល់។
១០ ការគោរពកោតខ្លាចព្រះអម្ចាស់ជាអំពើមួយ
ល្អបរិសុទ្ធណាស់ ហើយស្ថិតស្ថេររហូតតទៅ។
ការវិនិច្ឆ័យរបស់ព្រះអម្ចាស់សុទ្ធតែត្រឹមត្រូវ
និងសុចរិតទាំងអស់
១១ គួរឲ្យប្រាថ្នាជាងមាសសុទ្ធដ៏ច្រើន
ព្រមទាំងផ្អែមជាងទឹកឃ្មុំដែលហូរ
ចេញពីសំបុកទៅទៀត។
១២ សេចក្ដីទាំងនេះបានបំភ្លឺទូលបង្គំ
ជាអ្នកបម្រើរបស់ព្រះអង្គ
ហើយដោយការប្រព្រឹត្តតាម
ទូលបង្គំបានទទួលផលយ៉ាងបរិបូណ៌។
១៣ គ្មាននរណាម្នាក់អាចមើលឃើញកំហុស
ដែលខ្លួនប្រព្រឹត្ត
ដោយអចេតនានោះបានឡើយ
សូមលើកលែងទោសឲ្យទូលបង្គំ
នូវកំហុសណាដែលទូលបង្គំ
មើលមិនឃើញនោះផង។
១៤ សូមការពារទូលបង្គំឲ្យរួចពីចិត្តអួតបំប៉ោង
សូមកុំឲ្យចិត្តអួតបំប៉ោងនេះ
ធ្វើជាម្ចាស់លើទូលបង្គំឡើយ
ធ្វើដូច្នេះ ទូលបង្គំនឹងបានឥតសៅហ្មង
ឥតជាប់ជំពាក់នឹងអំពើបាបដ៏ធ្ងន់នេះទេ។
១៥ ព្រះអម្ចាស់អើយ សូមប្រោសប្រណី
ទទួលពាក្យដែលទូលបង្គំទូលថ្វាយ
ព្រមទាំងទទួលគំនិតដែលទូលបង្គំរិះគិត
នៅចំពោះព្រះភ័ក្ត្រព្រះអង្គនេះផង
ដ្បិតព្រះអង្គជាថ្មដា
និងជាព្រះដែលការពារទូលបង្គំ!។
២០
ពាក្យទូលអង្វរសុំជ័យជម្នះ
១ ទំនុកពីសៀវភៅរបស់គ្រូចម្រៀង។
ទំនុករបស់ស្តេចដាវីឌ។
២ សូមព្រះអម្ចាស់ឆ្លើយតបនឹងព្រះរាជា
នៅថ្ងៃដែលស្តេចមានអាសន្ន
សូមព្រះនាមព្រះរបស់លោកយ៉ាកុប
ការពារព្រះរាជា!។
៣ សូមព្រះអង្គជួយព្រះរាជា
ពីព្រះវិហាររបស់ព្រះអង្គ
សូមព្រះអង្គគាំទ្រព្រះរាជាពីភ្នំស៊ីយ៉ូន!។
៤ សូមឲ្យព្រះអង្គនឹកឃើញតង្វាយ
ទាំងប៉ុន្មានរបស់ព្រះរាជា
ហើយសូមឲ្យព្រះអង្គគាប់ព្រះហឫទ័យ
នឹងយញ្ញបូជាដែលស្តេចយកមកថ្វាយ!។ - សម្រាក
៥ សូមព្រះអង្គប្រទាននូវអ្វីៗមកព្រះរាជា
តាមតែព្រះអង្គប្រាថ្នា និងធ្វើឲ្យគម្រោងការ
របស់ព្រះរាជាបានសម្រេចទាំងអស់!។
៦ យើងនឹងស្រែកហ៊ោដោយអំណរ
ព្រោះតែស្តេចមានជ័យជម្នះ
យើងនឹងលើកទង់ជ័យឡើង
ក្នុងព្រះនាមព្រះជាម្ចាស់របស់យើង។
សូមព្រះអម្ចាស់សម្រេចតាមសេចក្ដីទាំងប៉ុន្មាន
ដែលព្រះរាជាទូលសូម។
៧ ឥឡូវនេះ ខ្ញុំដឹងច្បាស់ថា ព្រះអម្ចាស់សង្គ្រោះ
ព្រះរាជាដែលព្រះអង្គបានចាក់ប្រេងអភិសេក
ព្រះអង្គឆ្លើយតបនឹងព្រះរាជា
ពីទីសក្ការៈរបស់ព្រះអង្គនៅស្ថានបរមសុខ
គឺព្រះអង្គប្រទានឲ្យព្រះរាជាមានជ័យជម្នះ
ដោយសារឫទ្ធិបារមីដ៏ខ្លាំងពូកែរបស់ព្រះអង្គ។
៨ អ្នកខ្លះពឹងផ្អែកលើរទេះចម្បាំងរបស់ខ្លួន
អ្នកខ្លះទៀតពឹងផ្អែកលើទ័ពសេះរបស់ខ្លួន
រីឯយើងវិញ យើងទុកចិត្តលើព្រះនាមព្រះអម្ចាស់
ជាព្រះរបស់យើង។
៩ អ្នកទាំងនោះនឹងត្រូវបាក់ទ័ពបរាជ័យ
រីឯយើងវិញ
យើងនៅមានជំហរយ៉ាងរឹងប៉ឹងមាំមួន។
១០ ព្រះអម្ចាស់អើយ សូមសង្គ្រោះព្រះរាជាផង!
ពេលយើងខ្ញុំអង្វររកព្រះអង្គ
សូមឆ្លើយតបមកយើងខ្ញុំវិញផង!។
២១
ពាក្យអរព្រះគុណចំពោះជ័យជម្នះ
១ ទំនុកពីសៀវភៅរបស់គ្រូចម្រៀង។
ទំនុករបស់ស្តេចដាវីឌ។
២ ព្រះអម្ចាស់អើយ
ព្រះរាជាមានអំណរណាស់
ព្រោះព្រះអង្គប្រទានកម្លាំង
ព្រះរាជាមានអំណររីករាយជាខ្លាំង
ព្រោះព្រះអង្គប្រទានឲ្យមានជ័យជម្នះ។
៣ ព្រះអង្គប្រទានឲ្យព្រះរាជា
បានទទួលអ្វីៗដែលព្រះអង្គប្រាថ្នាចង់បាន
គឺព្រះអង្គពុំបានបដិសេធពាក្យទូលអង្វរ
របស់ព្រះរាជាឡើយ។ - សម្រាក
៤ ព្រះអង្គបានយាងមកជួបព្រះរាជា
ទាំងនាំយកព្រះពរដ៏ប្រសើរមកជាមួយផង
ព្រះអង្គបានយកមកុដមាសសុទ្ធ
មកបំពាក់ព្រះសិរសារបស់ព្រះរាជា។
៥ ពេលព្រះរាជាទូលសូមជីវិត
ព្រះអង្គប្រទានឲ្យស្តេចមានជីវិត
និងមានជន្មាយុយឺនយូរជាអង្វែងតរៀងទៅ។
៦ ដោយព្រះអង្គសង្គ្រោះ
ព្រះរាជាបានទទួលសិរីរុងរឿងយ៉ាងខ្លាំង
ព្រះអង្គប្រទានឲ្យព្រះអង្គបានថ្កុំថ្កើង
ឧត្តុង្គឧត្ដម។
៧ ព្រះអង្គប្រទានឲ្យព្រះរាជា
បានប្រកបដោយព្រះពរជានិច្ច
ដោយព្រះអង្គគង់នៅជាមួយ
នោះព្រះរាជាមានអំណរយ៉ាងបរិបូណ៌។
៨ ព្រះរាជាពឹងផ្អែកលើព្រះអម្ចាស់
ហើយដោយសារព្រះហឫទ័យសប្បុរស
ស្មោះត្រង់របស់ព្រះដ៏ខ្ពង់ខ្ពស់បំផុត
រាជ្យរបស់ព្រះរាជានឹងមិនត្រូវរលំសោះឡើយ។
៩ ព្រះករុណានឹងចាប់ខ្មាំងសត្រូវទាំងប៉ុន្មាន
របស់ព្រះអង្គ
ព្រះករុណានឹងប្រើអំណាចចាប់អស់អ្នក
ដែលស្អប់ព្រះអង្គ។
១០ នៅថ្ងៃព្រះករុណាយាងមកដល់
ព្រះករុណានឹងកម្ទេចពួកគេដូចភ្លើងឆេះសុស
សូមព្រះអម្ចាស់រំលាយពួកគេចោល
ដោយសារព្រះពិរោធរបស់ព្រះអង្គ
ហើយភ្លើងនឹងឆេះបំផ្លាញពួកគេ។
១១ ព្រះករុណានឹងលុបបំបាត់ពូជពង្ស
របស់ពួកគេឲ្យបាត់អស់ពីផែនដី
ព្រះអង្គនឹងប្រហារពួកគេឲ្យផុតពូជ។
១២ ពួកគេឃុបឃិតគ្នាធ្វើបាបព្រះករុណា
តែពួកគេគ្មានកម្លាំងអាចសម្រេច
តាមគម្រោងការរបស់ខ្លួនឡើយ
១៣ ដ្បិតព្រះករុណាបានធ្វើឲ្យពួកគេបរាជ័យ
ហើយព្រះអង្គយឹតធ្នូបាញ់ពួកគេចំពីមុខ។
១៤ ឱព្រះអម្ចាស់អើយ សូមតើនឡើង សម្ដែងឫទ្ធិបារមី!
យើងខ្ញុំសូមច្រៀង និងស្មូត្រលើកទំនុកតម្កើង
ឫទ្ធានុភាពរបស់ព្រះអង្គ!
២២
សម្រែកទូលអង្វរ និងពាក្យអរព្រះគុណ
១ ទំនុកពីសៀវភៅរបស់គ្រូចម្រៀង។
បទ «ក្តាន់ញីនៅពេលថ្ងៃរះ»។
ទំនុករបស់ស្តេចដាវីឌ។
២ ឱព្រះនៃទូលបង្គំ
ឱព្រះនៃទូលបង្គំអើយ!
ហេតុអ្វីបានជាព្រះអង្គបោះបង់ចោល
ទូលបង្គំដូច្នេះ?
ទូលបង្គំបានស្រែកអង្វរ
តែពុំឃើញព្រះអង្គសង្គ្រោះទូលបង្គំសោះ។
៣ ឱព្រះនៃទូលបង្គំអើយ!
ទូលបង្គំស្រែកហៅរកព្រះអង្គនៅពេលថ្ងៃ
តែព្រះអង្គមិនឆ្លើយតបទេ
នៅពេលយប់ក៏ទូលបង្គំស្រែកដែរ
តែមិនបានធូរស្បើយឡើយ។
៤ ប៉ុន្តែ ព្រះអង្គជាព្រះដ៏វិសុទ្ធដែលគង់នៅលើបល្ល័ង្ក
ហើយជនជាតិអ៊ីស្រាអែលតែងនាំគ្នា
សរសើរតម្កើងព្រះអង្គ។
៥ បុព្វបុរសរបស់យើងខ្ញុំតែងតែផ្ញើជីវិតលើព្រះអង្គ
ពួកលោកផ្ញើជីវិតលើព្រះអង្គជានិច្ច
ហើយព្រះអង្គក៏បានរំដោះពួកលោក។
៦ ពួកលោកបានស្រែកអង្វររកព្រះអង្គ
ពួកលោកក៏បានរួចពីខ្មាំងសត្រូវ
ដោយផ្ញើជីវិតលើព្រះអង្គ
ពួកលោកនឹងមិនខកចិត្តសោះឡើយ។
៧ រីឯទូលបង្គំវិញ
គេលែងចាត់ទុកទូលបង្គំថាជាមនុស្សទៀតហើយ
គឺគេចាត់ទុកជាជន្លេន
មនុស្សម្នានាំគ្នាជេរប្រមាថ
ហើយមាក់ងាយទូលបង្គំ។
៨ អស់អ្នកដែលឃើញទូលបង្គំ
គេចំអកឲ្យទូលបង្គំគ្រប់ៗគ្នា
គេពេបជ្រាយដាក់ទូលបង្គំ
ព្រមទាំងគ្រវីក្បាលដាក់ទូលបង្គំផង។
៩ គេពោលថា “គាត់ផ្ញើវាសនាលើព្រះអម្ចាស់ហើយ
ឲ្យព្រះអង្គរំដោះគាត់ទៅ
បើព្រះអង្គស្រឡាញ់គាត់
ឲ្យព្រះអង្គសង្គ្រោះគាត់ទៅ!”។
១០ ព្រះអម្ចាស់អើយ
ព្រះអង្គបានយកទូលបង្គំចេញពីផ្ទៃម្ដាយមក
ហើយព្រះអង្គបានផ្ញើទូលបង្គំ
ទៅឲ្យអ្នកម្ដាយបំបៅ។
១១ កាលពីទូលបង្គំកើតមក
ព្រះអង្គបានទទួលទូលបង្គំធ្វើជាកូន
ព្រះអង្គជាព្រះរបស់ទូលបង្គំ
តាំងតែពីមុនពេល
ដែលទូលបង្គំស្គាល់ពន្លឺថ្ងៃទៅទៀត។
១២ ពេលនេះ ទូលបង្គំមានភ័យអាសន្ន
គ្មាននរណាជួយទូលបង្គំទេ
សូមកុំគង់នៅឆ្ងាយពីទូលបង្គំឡើយ។
១៣ សត្រូវរបស់ទូលបង្គំជាច្រើននាក់ឡោមព័ទ្ធ
ទូលបង្គំ អ្នកទាំងនោះប្រៀបបានទៅនឹងគោបា
ពួកគេនៅជុំវិញទូលបង្គំ
ដូចគោបាមកពីស្រុកបាសាន។
១៤ ពួកគេបើកមាត់ប្រឆាំងនឹងទូលបង្គំ
ដូចសត្វសិង្ហគ្រហឹមបម្រុងនឹងហែកស៊ី។
១៥ កម្លាំងរបស់ទូលបង្គំកាន់តែខ្សោយទៅៗ
ប្រៀបដូចជាទឹកហូរមិនត្រឡប់វិញឡើយ
ឆ្អឹងទូលបង្គំទាំងប៉ុន្មានដាច់ចេញពីគ្នា
ហើយទឹកចិត្តក្លាហានរបស់ទូលបង្គំ
រលាយបាត់អស់ទៅដូចក្រមួនត្រូវថ្ងៃ។
១៦ បំពង់ករបស់ទូលបង្គំស្ងួតដូចដីបែកក្រហែង
អណ្ដាតទូលបង្គំស្អិតជាប់នឹងកន្លើត
ព្រះអង្គបានទុកឲ្យទូលបង្គំស្លាប់ក្នុងធូលីដី។
១៧ មានពួកឆ្កែឡោមព័ទ្ធទូលបង្គំ
ជនទុយ៌សមួយហ្វូងនាំគ្នាក្រវែលជុំវិញទូលបង្គំ
ពួកគេចាក់ទម្លុះដៃជើងទូលបង្គំ។
១៨ ទូលបង្គំអាចរាប់ឆ្អឹងជំនីរទាំងប៉ុន្មាន
របស់ទូលបង្គំបាន
ហើយសត្រូវរបស់ទូលបង្គំនាំគ្នា
សម្លក់សម្លឹងមើលទូលបង្គំ។
១៩ គេយកសម្លៀកបំពាក់ទូលបង្គំទៅចែកគ្នា
និងនាំគ្នាចាប់ឆ្នោតយកអាវវែងរបស់ទូលបង្គំ។
២០ រីឯព្រះអង្គវិញ ឱព្រះអម្ចាស់អើយ
សូមកុំនៅឆ្ងាយពីទូលបង្គំឡើយ!
ព្រះអង្គជាកម្លាំងនៃទូលបង្គំ
សូមយាងមកសង្គ្រោះទូលបង្គំជាប្រញាប់ផង!។
២១ សូមដោះលែងទូលបង្គំឲ្យរួចផុតពីមុខដាវ
សូមដោះលែងទូលបង្គំឲ្យរួចផុត
ពីចង្កូមរបស់ឆ្កែទាំងនេះ!
២២ សូមសង្គ្រោះទូលបង្គំឲ្យរួចផុតពីមាត់សិង្ហ
និងរួចផុតពីស្នែងក្របី!
ព្រះអង្គឆ្លើយតបមកទូលបង្គំហើយ!។
២៣ ទូលបង្គំនឹងផ្សព្វផ្សាយអំពីព្រះនាម
របស់ព្រះអង្គឲ្យបងប្អូនទូលបង្គំស្គាល់
ទូលបង្គំនឹងច្រៀងលើកតម្កើងព្រះអង្គ
នៅក្នុងអង្គប្រជុំ។
២៤ អ្នករាល់គ្នាដែលគោរពកោតខ្លាចព្រះអម្ចាស់អើយ
ចូរសរសើរតម្កើងព្រះអង្គ!
អ្នកទាំងអស់គ្នាដែលជាពូជពង្ស
លោកយ៉ាកុបអើយ
ចូរលើកតម្កើងសិរីរុងរឿងរបស់ព្រះអង្គ!
អ្នកទាំងអស់គ្នាដែលជាពូជពង្ស
លោកអ៊ីស្រាអែលអើយ
ចូរញាប់ញ័រនៅចំពោះព្រះភ័ក្ត្រព្រះអង្គ!។
២៥ ពេលមនុស្សទុរគតមានទុក្ខវេទនា
ព្រះអង្គមិនមាក់ងាយ ឬព្រងើយកន្តើយ
ព្រះអង្គមិនលាក់ព្រះភ័ក្ត្រចំពោះគេឡើយ
ពេលមនុស្សទុរគតស្រែកអង្វររកព្រះអង្គ
ព្រះអង្គព្រះសណ្ដាប់គេ។
២៦ ដោយព្រះអង្គបានប្រោសប្រណីដល់ទូលបង្គំ
ទូលបង្គំអាចលើកតម្កើងព្រះអង្គ
នៅក្នុងអង្គប្រជុំដ៏ធំ
ទូលបង្គំនឹងលាបំណន់
នៅមុខអស់អ្នកគោរពកោតខ្លាចព្រះអង្គ។
២៧ មនុស្សទន់ទាបនឹងបានបរិភោគឆ្អែតស្កប់ស្កល់
អស់អ្នកដែលស្វែងរកព្រះអម្ចាស់
នឹងនាំគ្នាសរសើរតម្កើងព្រះអង្គ។
ចូរឲ្យអ្នករាល់គ្នាមានអាយុយឺនយូរ!
២៨ មនុស្សទាំងប៉ុន្មានដែលស្ថិតនៅតាមស្រុក
ដាច់ស្រយាលនៃផែនដី នឹងនឹកឃើញព្រះអម្ចាស់
ហើយនាំគ្នាបែរចិត្តមករកព្រះអង្គ
ប្រជាជាតិទាំងមូលនឹងនាំគ្នាក្រាប
ថ្វាយបង្គំព្រះអង្គ
២៩ ដ្បិតព្រះអម្ចាស់ជាព្រះមហាក្សត្រ
ព្រះអង្គគ្រប់គ្រងលើប្រជាជាតិនានា។
៣០ ពួកអ្នកធំទាំងប៉ុន្មាននៅលើផែនដី
នាំគ្នាបរិភោគ ហើយក្រាបថ្វាយបង្គំព្រះអង្គ
អស់អ្នកដែលកើតពីធូលីដី
គឺមនុស្សលោកដែលតែងតែស្លាប់
ក៏នឹងក្រាបថ្វាយបង្គំព្រះអង្គដែរ។
៣១ មនុស្សនៅជំនាន់ក្រោយនឹងគោរពបម្រើព្រះអង្គ
ហើយគេនឹងថ្លែងអំពីព្រះអម្ចាស់ប្រាប់កូនចៅ។
៣២ គេនឹងប្រកាសប្រាប់ប្រជាជនដែលនឹងកើតមក
តាមក្រោយ អំពីសេចក្ដីសុចរិតរបស់ព្រះអង្គ
គឺព្រះអម្ចាស់បានជួយរំដោះប្រជារាស្ដ្រ
របស់ព្រះអង្គ។
២៣
ព្រះអម្ចាស់ជាគង្វាលខ្ញុំ
១ ទំនុកតម្កើងរបស់ស្តេចដាវីឌ។
ព្រះអម្ចាស់ជាគង្វាលខ្ញុំ
ខ្ញុំនឹងមិនខ្វះអ្វីសោះឡើយ។
២ ព្រះអង្គឲ្យខ្ញុំសម្រាកនៅតាមវាលស្មៅខៀវខ្ចី
ព្រះអង្គនាំខ្ញុំឆ្ពោះទៅកន្លែងស្ងាត់
នៅក្បែរមាត់ទឹក។
៣ ព្រះអង្គប្រទានឲ្យខ្ញុំមានកម្លាំងឡើងវិញ
ព្រះអង្គនាំខ្ញុំដើរក្នុងផ្លូវដ៏សុចរិត
ដោយយល់ដល់ព្រះកិត្តិនាមរបស់ព្រះអង្គ។
៤ ទោះបីទូលបង្គំដើរកាត់ជ្រលងភ្នំ
នៃសេចក្ដីស្លាប់ក៏ដោយ
ក៏ទូលបង្គំមិនខ្លាចអ្វីសោះឡើយ
ដ្បិតព្រះអង្គគង់នៅជាមួយទូលបង្គំ
ព្រះអង្គការពារ និងរក្សាទូលបង្គំជានិច្ច។
៥ ព្រះអង្គរៀបចំពិធីជប់លៀងឲ្យទូលបង្គំ
នៅមុខបច្ចាមិត្តរបស់ទូលបង្គំ
ព្រះអង្គបានចាក់ប្រេងលើទូលបង្គំ
ដើម្បីលើកកិត្តិយសទូលបង្គំ
ហើយព្រះអង្គបានបំពេញពែង
ទូលបង្គំយ៉ាងហូរហៀរ។
៦ ខ្ញុំដឹងជាក់ច្បាស់ណាស់ថា
ព្រះអង្គនឹងប្រទានសុភមង្គលឲ្យទូលបង្គំ
ហើយព្រះអង្គប្រណីសន្ដោសទូលបង្គំ
យ៉ាងស្មោះស្ម័គ្រជារៀងរាល់ថ្ងៃ អស់មួយជីវិត។
ដរាបណាខ្ញុំនៅមានជីវិត ខ្ញុំនឹងវិលត្រឡប់
មកក្នុងព្រះដំណាក់របស់ព្រះអម្ចាស់ជានិច្ច។
២៤
ព្រះមហាក្សត្រដ៏ឧត្ដម
១ ទំនុកតម្កើងរបស់ស្តេចដាវីឌ។
ផែនដី និងអ្វីៗសព្វសារពើនៅលើផែនដី
សុទ្ធតែជាកម្មសិទ្ធិរបស់ព្រះអម្ចាស់
ពិភពលោក និងអ្វីៗទាំងអស់ដែលរស់នៅក្នុង
ពិភពលោក ក៏ជាកម្មសិទ្ធិរបស់ព្រះអង្គដែរ!
២ គឺព្រះអង្គហើយដែលបានចាក់គ្រឹះផែនដី
ពីលើសមុទ្រ
ហើយធ្វើឲ្យវាស្ថិតនៅយ៉ាងរឹងប៉ឹង
ពីលើទន្លេនានា។
៣ តើនរណាអាចឡើងទៅលើភ្នំ
របស់ព្រះអម្ចាស់បាន?
តើនរណាអាចឈរនៅក្នុងព្រះវិហារ
ដ៏វិសុទ្ធរបស់ព្រះអង្គបាន?
៤ មានតែអ្នកប្រព្រឹត្តអំពើត្រឹមត្រូវ
និងមានចិត្តបរិសុទ្ធប៉ុណ្ណោះ ទើបឡើងទៅបាន
គឺអ្នកដែលមិនបណ្តោយខ្លួនទៅថ្វាយបង្គំ
ព្រះក្លែងក្លាយ និងនិយាយស្បថស្បែបំពាន។
៥ ព្រះអម្ចាស់នឹងប្រទានពរដល់គេ
ហើយព្រះជាម្ចាស់ជាព្រះសង្គ្រោះ
នឹងប្រោសគេឲ្យសុចរិតដែរ។
៦ គឺអ្នកទាំងនេះហើយដែលស្វែងរកព្រះអង្គ
ជាអ្នកស្វែងរកព្រះរបស់លោកយ៉ាកុប។ - សម្រាក
៧ ឱទ្វារទាំងឡាយអើយ ចូរបើកចំហ!
ខ្លោងទ្វារដ៏នៅស្ថិតស្ថេរអស់កល្បជានិច្ចអើយ
ចូរចំហឲ្យធំដើម្បីឲ្យព្រះមហាក្សត្រ
ប្រកបដោយសិរីរុងរឿងយាងចូលមក!
៨ តើព្រះមហាក្សត្រប្រកបដោយ
សិរីរុងរឿងនេះជានរណា?
-ព្រះអម្ចាស់ប្រកបដោយព្រះចេស្ដាដ៏ខ្លាំងពូកែ
ព្រះអម្ចាស់ជាអ្នកចម្បាំងដ៏ជំនាញ។
៩ ឱទ្វារទាំងឡាយអើយ ចូរបើកចំហ!
ខ្លោងទ្វារដ៏នៅស្ថិតស្ថេរអស់កល្បជានិច្ចអើយ
ចូរចំហឲ្យធំ ដើម្បីឲ្យព្រះមហាក្សត្រ
ប្រកបដោយសិរីរុងរឿងយាងចូលមក!
១០ តើព្រះមហាក្សត្រប្រកបដោយ
សិរីរុងរឿងនេះជានរណា?
-ព្រះអម្ចាស់នៃពិភពទាំងមូល*
គឺព្រះអង្គហើយដែលជាព្រះមហាក្សត្រ
ប្រកបដោយសិរីរុងរឿង!។ - សម្រាក
២៥
សូមណែនាំទូលបង្គំឲ្យស្គាល់មាគ៌ារបស់ព្រះអង្គ
១ ទំនុករបស់ស្តេចដាវីឌ។
ឱព្រះអម្ចាស់អើយ ទូលបង្គំផ្ចង់ចិត្ត
គំនិតទៅរកព្រះអង្គ។
២ ឱព្រះនៃទូលបង្គំអើយ
ទូលបង្គំផ្ញើជីវិតលើព្រះអង្គហើយ
ដូច្នេះ សូមកុំឲ្យទូលបង្គំត្រូវអាម៉ាស់មុខ!
សូមកុំឲ្យខ្មាំងសត្រូវអាចមានជ័យជម្នះ
លើទូលបង្គំឡើយ!។
៣ អស់អ្នកដែលសង្ឃឹមលើព្រះអង្គ
នឹងមិនត្រូវខកចិត្តទេ
គឺមានតែពួកអ្នកឆាប់ក្បត់ព្រះអង្គប៉ុណ្ណោះ
ដែលត្រូវខកចិត្ត។
៤ ឱព្រះអម្ចាស់អើយ! សូមណែនាំទូលបង្គំ
ឲ្យស្គាល់មាគ៌ារបស់ព្រះអង្គ
សូមបង្រៀនទូលបង្គំអំពីផ្លូវរបស់ព្រះអង្គផង
៥ សូមអប់រំទូលបង្គំឲ្យរស់នៅ
ស្របតាមសេចក្ដីពិតរបស់ព្រះអង្គ
ដ្បិតព្រះអង្គជាព្រះសង្គ្រោះទូលបង្គំ
ទូលបង្គំសង្ឃឹមលើព្រះអង្គជារៀងរាល់ថ្ងៃ។
៦ ឱព្រះអម្ចាស់អើយ! សូមកុំភ្លេចថា
តាំងពីដើមរៀងមក ព្រះអង្គតែងតែសម្ដែង
ព្រះហឫទ័យអាណិតអាសូរ និងព្រះហឫទ័យ
មេត្តាករុណាចំពោះទូលបង្គំជានិច្ច។
៧ សូមបំភ្លេចអំពើបាប និងកំហុស
ដែលទូលបង្គំធ្លាប់ប្រព្រឹត្ត
កាលនៅពីក្មេងនោះទៅ!។
ឱព្រះអម្ចាស់អើយ ព្រះអង្គតែងមានព្រះហឫទ័យ
មេត្តាករុណា និងព្រះហឫទ័យសប្បុរសជានិច្ច
សូមកុំបំភ្លេចទូលបង្គំឡើយ!។
៨ ព្រះអម្ចាស់មានព្រះហឫទ័យសប្បុរស និងទៀងត្រង់
ហេតុនេះហើយបានជាព្រះអង្គបង្ហាញ
ឲ្យមនុស្សបាបស្គាល់មាគ៌ាដែលគេត្រូវដើរ។
៩ ព្រះអង្គនាំមនុស្សមានចិត្តសុភាព
ឲ្យដើរតាមមាគ៌ាដ៏សុចរិត
ព្រះអង្គបង្រៀនគេឲ្យស្គាល់ព្រះហឫទ័យរបស់ព្រះអង្គ។
១០ ព្រះអម្ចាស់មានព្រះហឫទ័យមេត្តាករុណា
និងស្មោះត្រង់ទាំងស្រុង
ចំពោះអស់អ្នកដែលគោរពសម្ពន្ធមេត្រី*
និងគោរពព្រះបណ្ដាំរបស់ព្រះអង្គ។
១១ ឱព្រះអម្ចាស់អើយ!
ទូលបង្គំមានកំហុសធ្ងន់ណាស់
ដោយយល់ដល់ព្រះនាមព្រះអង្គ
សូមលើកលែងទោសឲ្យទូលបង្គំផង។
១២ អ្នកណាគោរពកោតខ្លាចព្រះអម្ចាស់
ព្រះអង្គនឹងបង្ហាញឲ្យអ្នកនោះ
ស្គាល់មាគ៌ាដែលគាត់ត្រូវជ្រើសរើស។
១៣ គាត់នឹងមានសុភមង្គលជានិច្ច
ហើយពូជពង្សរបស់គាត់
នឹងបានគ្រប់គ្រងស្រុកនេះទុកជាមត៌ក។
១៤ ព្រះអម្ចាស់តែងតែសម្ដែងភក្តីភាព
ចំពោះអស់អ្នកដែលគោរពកោតខ្លាចព្រះអង្គ
ហើយបង្រៀនគេឲ្យគោរពសម្ពន្ធមេត្រី
របស់ព្រះអង្គ។
១៥ ទូលបង្គំសម្លឹងឆ្ពោះទៅរកព្រះអម្ចាស់ជានិច្ច
ព្រោះមានតែព្រះអង្គប៉ុណ្ណោះ
ដែលអាចរំដោះទូលបង្គំឲ្យរួចពីអន្ទាក់។
១៦ សូមទតមកទូលបង្គំ
ហើយប្រណីសន្ដោសទូលបង្គំផង!
ដ្បិតទូលបង្គំនៅឯកោ និងវេទនាជាខ្លាំង។
១៧ ទូលបង្គំលំបាកចិត្តពន់ពេកណាស់
សូមដកការតប់ប្រមល់នេះចេញពីចិត្តទូលបង្គំទៅ។
១៨ សូមទតមកទុក្ខវេទនា
និងការនឿយព្រួយរបស់ទូលបង្គំ
សូមអត់ទោសឲ្យទូលបង្គំ
បានរួចពីអំពើបាបទាំងប៉ុន្មានផង។
១៩ សូមទតមើលចុះ ខ្មាំងសត្រូវរបស់ទូលបង្គំ
មានគ្នាច្រើនប៉ុនណា
ហើយគេស្អប់ទូលបង្គំខ្លាំងយ៉ាងណា។
២០ សូមការពារ និងរំដោះទូលបង្គំផង!
សូមកុំឲ្យទូលបង្គំត្រូវអាម៉ាស់មុខឲ្យសោះ
ដ្បិតទូលបង្គំមកពឹងផ្អែកលើព្រះអង្គហើយ!។
២១ ទូលបង្គំសង្ឃឹមទុកចិត្តលើព្រះអង្គជានិច្ច
សូមរក្សាជីវិតទូលបង្គំ
ដោយសេចក្ដីសប្បុរស និងទៀងត្រង់ផង!។
២២ ឱព្រះជាម្ចាស់អើយ!
សូមរំដោះអ៊ីស្រាអែលឲ្យរួចពីទុក្ខវេទនា
ទាំងប៉ុន្មានផង!។
២៦
ពាក្យទូលអង្វររបស់មនុស្សសុចរិត
១ ទំនុករបស់ស្តេចដាវីឌ។
ឱព្រះអម្ចាស់អើយ
សូមរកយុត្តិធម៌ឲ្យទូលបង្គំផង
ដ្បិតទូលបង្គំបានប្រព្រឹត្តយ៉ាងត្រឹមត្រូវ!
ទូលបង្គំទុកចិត្តលើព្រះអម្ចាស់
ដោយឥតសង្ស័យឡើយ។
២ ឱព្រះអម្ចាស់អើយ
សូមស្ទង់ និងល្បងមើលចិត្តទូលបង្គំ
សូមពិនិត្យមើលជម្រៅចិត្តគំនិតទូលបង្គំចុះ។
៣ ទូលបង្គំនឹកគិតពីព្រះហឫទ័យមេត្តា
ករុណារបស់ព្រះអង្គជានិច្ច
ហើយទូលបង្គំប្រព្រឹត្តតាមសេចក្ដីពិតរបស់ព្រះអង្គ។
៤ ទូលបង្គំមិនអង្គុយរួមជាមួយមនុស្សខិលខូចឡើយ
ទូលបង្គំក៏មិនសេពគប់ជាមួយ
មនុស្សមានពុតត្បុតដែរ។
៥ ទូលបង្គំមិនចូលចិត្តនៅរួមជាមួយ
ពួកអ្នកដែលប្រព្រឹត្តអំពើអាក្រក់
ហើយទូលបង្គំមិនអង្គុយរួមជាមួយ
មនុស្សពាលទេ។
៦ ឱព្រះអម្ចាស់អើយ ទូលបង្គំលាងដៃទុកជា
សញ្ញាបញ្ជាក់ថា ទូលបង្គំជាមនុស្សឥតសៅហ្មង
ហើយទូលបង្គំដើរជុំវិញអាសនៈរបស់ព្រះអង្គ
៧ ទាំងបន្លឺសំឡេងច្រៀងអរព្រះគុណព្រះអង្គ
និងរៀបរាប់អំពីការអស្ចារ្យ
ទាំងប៉ុន្មានរបស់ព្រះអង្គ។
៨ ឱព្រះអម្ចាស់អើយ!
ទូលបង្គំចូលចិត្តស្នាក់នៅ
ក្នុងព្រះដំណាក់របស់ព្រះអង្គណាស់
គឺនៅក្នុងកន្លែងដែលមានសិរីរុងរឿង
របស់ព្រះអង្គស្ថិតនៅ។
៩ សូមកុំទុកឲ្យទូលបង្គំស្លាប់ជាមួយ
មនុស្សបាបឡើយ
ហើយក៏កុំដកជីវិតទូលបង្គំ
រួមជាមួយមនុស្សដែលបង្ហូរឈាមគេដែរ។
១០ អ្នកទាំងនោះតែងប្រព្រឹត្តអំពើទុច្ចរិត
គ្រប់ពេលវេលា
ហើយពួកគេក៏ចូលចិត្តស៊ីសំណូកដែរ!
១១ រីឯទូលបង្គំវិញ
ទូលបង្គំប្រព្រឹត្តតែអំពើទៀងត្រង់។
សូមរំដោះទូលបង្គំ
សូមប្រណីសន្ដោសទូលបង្គំផង!។
១២ ទូលបង្គំឈរនៅកន្លែងដ៏សុចរិត
ទូលបង្គំនឹងលើកតម្កើងព្រះអម្ចាស់
នៅក្នុងអង្គប្រជុំ!។
២៧
ព្រះអម្ចាស់ជាពន្លឺ និងជាព្រះសង្គ្រោះរបស់ខ្ញុំ
១ ទំនុករបស់ស្តេចដាវីឌ។
ព្រះអម្ចាស់ជាពន្លឺ និងជាព្រះ
សង្គ្រោះខ្ញុំ ខ្ញុំមិនភ័យខ្លាចនរណាឡើយ!
ព្រះអម្ចាស់ជាទីជម្រករបស់ជីវិតខ្ញុំ
ខ្ញុំក៏មិនតក់ស្លុតចំពោះនរណាដែរ។
២ ពេលពួកអ្នកប្រព្រឹត្តអាក្រក់
គឺបច្ចាមិត្ត និងខ្មាំងសត្រូវរបស់ខ្ញុំ
នាំគ្នាចូលមកជិត ដើម្បីរកប្រហារជីវិតខ្ញុំ
អ្នកទាំងនោះបែរជាត្រូវជំពប់ដួលទៅវិញ។
៣ ប្រសិនបើមានកងទ័ពមកឡោមព័ទ្ធខ្ញុំ
ក៏ចិត្តខ្ញុំមិនភ័យខ្លាចអ្វីដែរ
ប្រសិនបើមានគេលើកគ្នាមកច្បាំងនឹងខ្ញុំ
ក៏ខ្ញុំនៅតែសង្ឃឹមទុកចិត្តលើព្រះជាម្ចាស់ជានិច្ច។
៤ ខ្ញុំទូលសូមព្រះអម្ចាស់នូវសេចក្ដីតែមួយគត់
ហើយខ្ញុំប្រាថ្នាចង់បានតែសេចក្ដីនេះឯង
គឺឲ្យបានស្នាក់នៅក្នុងព្រះដំណាក់
របស់ព្រះអម្ចាស់អស់មួយជីវិត
ដើម្បីកោតស្ញប់ស្ញែងភាពថ្កុំថ្កើងរុងរឿង
របស់ព្រះអម្ចាស់
និងថ្វាយបង្គំព្រះអង្គនៅក្នុងព្រះវិហារ
៥ ដ្បិតនៅពេលខ្ញុំមានអាសន្ន
ព្រះអង្គតែងឲ្យខ្ញុំជ្រកក្នុងជម្រករបស់ព្រះអង្គ
ព្រះអង្គតែងលាក់បំពួនខ្ញុំនៅក្នុងព្រះពន្លា
ព្រះអង្គលើកខ្ញុំដាក់នៅលើថ្មដា។
៦ ព្រះអង្គលើកមុខខ្ញុំឡើងឲ្យខ្ពស់ជាងខ្មាំងសត្រូវ
ដែលនៅជុំវិញខ្ញុំ
ខ្ញុំនឹងថ្វាយយញ្ញបូជានៅក្នុងព្រះពន្លា
របស់ព្រះអង្គ ទាំងស្រែកដោយអំណរ
ខ្ញុំនឹងច្រៀង ខ្ញុំនឹងស្មូត្រទំនុកតម្កើង
ថ្វាយព្រះអម្ចាស់។
៧ ឱព្រះអម្ចាស់អើយ!
សូមព្រះអង្គព្រះសណ្ដាប់ស្នូរសម្រែករបស់ទូលបង្គំ
សូមមេត្តាប្រណីសន្ដោសទូលបង្គំ
និងឆ្លើយតបមកទូលបង្គំវិញផង!។
៨ ចិត្តទូលបង្គំនឹកដល់ព្រះបន្ទូល
ដែលព្រះអង្គថ្លែងថា «ចូរស្វែងរកយើង»
នោះទូលបង្គំឆ្លើយថា ឱព្រះអម្ចាស់អើយ!
ទូលបង្គំស្វែងរកព្រះភ័ក្ត្រព្រះអង្គហើយ!
៩ សូមកុំលាក់ព្រះភ័ក្ត្រនឹងទូលបង្គំ
សូមកុំព្រះពិរោធ
ហើយបណ្តេញអ្នកបម្រើរបស់ព្រះអង្គ!
ព្រះអង្គបានសង្គ្រោះទូលបង្គំ
សូមកុំលះបង់ទូលបង្គំ!
ឱព្រះសង្គ្រោះទូលបង្គំអើយ
សូមកុំបោះបង់ចោលទូលបង្គំឡើយ!។
១០ ទោះបីឪពុកម្ដាយរបស់ទូលបង្គំ
បានបោះបង់ទូលបង្គំចោលក៏ដោយ
ក៏ព្រះអម្ចាស់នៅតែទទួលទូលបង្គំជានិច្ច!។
១១ ឱព្រះអម្ចាស់អើយ! សូមបង្រៀនទូលបង្គំ
ឲ្យស្គាល់មាគ៌ារបស់ព្រះអង្គ
សូមណែនាំទូលបង្គំឲ្យដើរតាមផ្លូវត្រង់
ព្រោះទូលបង្គំមានសត្រូវជាច្រើន។
១២ សូមកុំបណ្តោយឲ្យទូលបង្គំធ្លាក់
ទៅក្នុងកណ្ដាប់ដៃបច្ចាមិត្តរបស់ទូលបង្គំឡើយ
ដ្បិតមានសាក្សីក្លែងក្លាយ
មកនិយាយមួលបង្កាច់ទូលបង្គំ
អ្នកទាំងនោះពោលសុទ្ធតែពាក្យឃោរឃៅ។
១៣ ខ្ញុំជឿជាក់ថានៅក្នុងលោកនេះ
ខ្ញុំនឹងឃើញសុភមង្គលមកពីព្រះអម្ចាស់
ជាមិនខាន!។
១៤ ចូរសង្ឃឹមទុកចិត្តលើព្រះអម្ចាស់!
ចូរមានកម្លាំង និងមានចិត្តរឹងប៉ឹងឡើង!
ចូរសង្ឃឹមទុកចិត្តលើព្រះអម្ចាស់ចុះ!។
២៨
ពាក្យអធិស្ឋាននៅពេលមានជំងឺ
១ ទំនុករបស់ស្តេចដាវីឌ។
ឱព្រះអម្ចាស់អើយ!
ទូលបង្គំស្រែកអង្វររកព្រះអង្គ
ឱព្រះជាថ្មដានៃទូលបង្គំអើយ
សូមព្រះសណ្ដាប់សម្រែករបស់ទូលបង្គំផង!
ប្រសិនបើព្រះអង្គនៅស្ងៀម
មិនឆ្លើយនឹងទូលបង្គំទេនោះ
ទូលបង្គំមុខជាធ្លាក់ទៅក្នុងរណ្ដៅមិនខាន!
២ ពេលទូលបង្គំស្រែករកព្រះអង្គ
ពេលទូលបង្គំលើកដៃឆ្ពោះទៅកាន់ទីសក្ការៈ
របស់ព្រះអង្គ
សូមព្រះអង្គព្រះសណ្ដាប់ពាក្យទូលអង្វរ
របស់ទូលបង្គំផង។
៣ សូមកុំឲ្យទូលបង្គំត្រូវវិនាសបាត់ទៅ
ដូចមនុស្សពាល និងមនុស្សប្រព្រឹត្តអំពើទុច្ចរិត
ដែលនិយាយរាក់ទាក់ជាមួយអ្នកដទៃ
តែមានកលល្បិចនៅក្នុងខ្លួននោះឡើយ។
៤ សូមដាក់ទោសអ្នកទាំងនោះ
ឲ្យសមតាមអំពើដែលគេប្រព្រឹត្ត
និងល្បិចកិច្ចកលរបស់គេ
សូមដាក់ទោសគេសមនឹងស្នាដៃរបស់ខ្លួន
សូមឲ្យគេទទួលផលសមនឹងទោសរបស់ខ្លួន
៥ ដ្បិតអ្នកទាំងនោះមិនយល់អំពីកិច្ចការ
របស់ព្រះអម្ចាស់
ជាស្នាព្រះហស្ដដែលព្រះអង្គបានធ្វើនោះទេ។
សូមព្រះអង្គរំលំពួកគេ
កុំឲ្យងើបឡើងវិញឡើយ!។
៦ សូមលើកតម្កើងព្រះអម្ចាស់!
ដ្បិតព្រះអង្គព្រះសណ្ដាប់ពាក្យដែលខ្ញុំស្រែកអង្វរ។
៧ ព្រះអម្ចាស់ជាកម្លាំង និងជាខែលការពារខ្ញុំ
ខ្ញុំទុកចិត្តលើព្រះអង្គ ហើយព្រះអង្គជួយសង្គ្រោះខ្ញុំ
ខ្ញុំសប្បាយចិត្តយ៉ាងខ្លាំង
ខ្ញុំនឹងសរសើរតម្កើងព្រះអង្គដោយបទចម្រៀង!។
៨ ព្រះអម្ចាស់ការពារប្រជារាស្ដ្ររបស់ព្រះអង្គ
ព្រះអង្គជាកំពែងសម្រាប់សង្គ្រោះស្តេច
ដែលព្រះអង្គបានចាក់ប្រេងអភិសេក។
៩ សូមសង្គ្រោះប្រជារាស្ដ្ររបស់ព្រះអង្គ
សូមប្រទានពរដល់កូនចៅរបស់ព្រះអង្គ
សូមព្រះអង្គធ្វើជាគង្វាលថែរក្សាពួកគេ
រហូតតរៀងទៅ!។
២៩
ព្រះសូរសៀងរបស់ព្រះអម្ចាស់
១ ទំនុកតម្កើងរបស់ស្តេចដាវីឌ។
ពពួកទេវទូតរបស់ព្រះជាម្ចាស់អើយ
ចូរនាំគ្នាតម្កើងព្រះអម្ចាស់
ចូរលើកតម្កើងសិរីរុងរឿង
និងតេជានុភាពរបស់ព្រះអម្ចាស់។
២ ចូរលើកតម្កើងព្រះនាមដ៏រុងរឿងរបស់ព្រះអម្ចាស់
ចូរនាំគ្នាក្រាបថ្វាយបង្គំព្រះអម្ចាស់
នៅពេលព្រះអង្គសម្ដែងភាពវិសុទ្ធរបស់ព្រះអង្គ!។
៣ ព្រះសូរសៀងរបស់ព្រះអម្ចាស់
លាន់ឮឡើងនៅពីលើផ្ទៃទឹក
ព្រះជាម្ចាស់ប្រកបដោយសិរីរុងរឿង
ធ្វើឲ្យផ្គរលាន់ឮឡើង
ព្រះអម្ចាស់គង់នៅពីលើមហាសាគរ។
៤ ព្រះសូរសៀងរបស់ព្រះអម្ចាស់
លាន់ឮឡើងប្រកបដោយឫទ្ធានុភាព
ព្រះសូរសៀងរបស់ព្រះអម្ចាស់
លាន់ឮឡើងប្រកបដោយភាពថ្កុំថ្កើង
៥ ព្រះសូរសៀងរបស់ព្រះអម្ចាស់
ធ្វើឲ្យបាក់ដើមឈើដ៏ធំៗ
ព្រះអម្ចាស់បំបាក់ដើមឈើដ៏ធំៗនៅភ្នំលីបង់។
៦ ព្រះអង្គធ្វើឲ្យដើមឈើទាំងនោះលោត
ដូចកូនគោលោត
ព្រះអង្គធ្វើឲ្យភ្នំលីបង់ និងភ្នំស៊ីរីយ៉ូន
លោត ដូចកូនក្របីលោត។
៧ ព្រះសូរសៀងរបស់ព្រះអម្ចាស់
បានធ្វើឲ្យមានរន្ទះលេចចេញមក។
៨ ព្រះសូរសៀងរបស់ព្រះអម្ចាស់
បានធ្វើឲ្យកក្រើកវាលរហោស្ថាន
ព្រះអម្ចាស់ធ្វើឲ្យរញ្ជួយវាលរហោស្ថានកាដែស។
៩ ព្រះសូរសៀងរបស់ព្រះអម្ចាស់
អង្រួនសត្វក្តាន់ញីឲ្យកើតកូន
និងធ្វើឲ្យព្រៃឈើជ្រុះស្លឹកអស់។
ពេលនោះ អ្វីៗសព្វសារពើនឹងស្រែកឡើង
ក្នុងព្រះវិហារថា
«សូមលើកតម្កើងសិរីរុងរឿងព្រះអម្ចាស់!»។
១០ ព្រះអម្ចាស់គ្រប់គ្រងលើទឹកជំនន់ធំ
ព្រះអម្ចាស់គ្រងរាជ្យរហូតតទៅ
១១ ព្រះអម្ចាស់ប្រទានឫទ្ធានុភាព
ឲ្យប្រជារាស្ដ្ររបស់ព្រះអង្គ
ព្រះអម្ចាស់ប្រទានពរឲ្យប្រជារាស្ដ្រ
របស់ព្រះអង្គមានសន្តិភាព។
៣០
ព្រះអង្គប្រោសទូលបង្គំឲ្យជា
១ ទំនុកតម្កើង។ បទសម្រាប់ច្រៀងនៅពេលសម្ពោធព្រះវិហារ។
ទំនុករបស់ស្តេចដាវីឌ។
២ ឱព្រះអម្ចាស់អើយ!
ទូលបង្គំសូមលើកតម្កើងព្រះអង្គ
ព្រោះព្រះអង្គបានជួយស្រោចស្រង់ទូលបង្គំ
ព្រះអង្គពុំបានទុកឲ្យខ្មាំងសត្រូវ
យករឿងទូលបង្គំទៅលេងសើចឡើយ។
៣ ឱព្រះអម្ចាស់ជាព្រះនៃទូលបង្គំអើយ!
ទូលបង្គំបានស្រែកអង្វរព្រះអង្គ
ហើយព្រះអង្គប្រោសទូលបង្គំឲ្យបានជា។
៤ ឱព្រះអម្ចាស់អើយ
ព្រះអង្គបានស្រង់ព្រលឹងទូលបង្គំ
ចេញពីចំណោមមនុស្សស្លាប់
ទូលបង្គំបានធ្លាក់ទៅក្នុងរណ្ដៅមច្ចុរាជ
តែព្រះអង្គប្រោសទូលបង្គំឲ្យរស់ឡើងវិញ។
៥ អ្នករាល់គ្នាដែលជាប្រជារាស្ដ្រ
របស់ព្រះអង្គអើយ
ចូរស្មូត្រទំនុកតម្កើងព្រះអម្ចាស់!
ចូរលើកតម្កើងព្រះនាមដ៏វិសុទ្ធ*របស់ព្រះអង្គ!
៦ ដ្បិតព្រះអង្គព្រះអង្គព្រះពិរោធតែមួយស្របក់
តែព្រះអង្គប្រណីសន្ដោសយើងអស់មួយជីវិត។
ពេលយប់ យើងបង្ហូរទឹកភ្នែក តែព្រលឹមឡើង
យើងនឹងអរសប្បាយវិញ។
៧ នៅពេលទូលបង្គំបានសុខសាន្ត ទូលបង្គំពោលថា
ទូលបង្គំនឹងមិនត្រូវរលំឡើយ!។
៨ ឱព្រះអម្ចាស់អើយ!
ព្រះអង្គបានប្រោសឲ្យទូលបង្គំរឹងប៉ឹងដូចភ្នំ
តែប្រសិនបើព្រះអង្គមិនគង់ជាមួយទូលបង្គំទេនោះ
ទូលបង្គំនឹងភ័យខ្លាចក្រៃលែង។
៩ ឱព្រះអម្ចាស់អើយ! ទូលបង្គំស្រែកអង្វរព្រះអង្គ
ទូលបង្គំទទូចអង្វរព្រះអម្ចាស់។
១០ បើព្រះអង្គទុកឲ្យទូលបង្គំស្លាប់
តើបានប្រយោជន៍អ្វី?
បើព្រះអង្គឲ្យទូលបង្គំធ្លាក់ទៅ
ក្នុងរណ្ដៅមច្ចុរាជ តើបានប្រយោជន៍អ្វី?
តើមនុស្សស្លាប់អាចសរសើរព្រះអង្គកើតឬ?
តើគេអាចថ្លែងពីព្រះហឫទ័យស្មោះត្រង់
របស់ព្រះអង្គកើតឬ?
១១ ឱព្រះអម្ចាស់អើយ
សូមប្រោសមេត្តាស្ដាប់ពាក្យទូលបង្គំ!
ឱព្រះអម្ចាស់អើយ
សូមយាងមកសង្គ្រោះទូលបង្គំផង!។
១២ ព្រះអង្គបានធ្វើឲ្យការសោកសង្រេង
របស់ទូលបង្គំប្រែទៅជាអំណរសប្បាយ
ព្រះអង្គបានយកសម្លៀកបំពាក់កាន់ទុក្ខចេញ
ហើយប្រទានសម្លៀកបំពាក់
សម្រាប់ពិធីបុណ្យឲ្យទូលបង្គំវិញ។
១៣ ដូច្នេះ ទូលបង្គំនៅស្ងៀមមិនបានឡើយ
ទូលបង្គំស្មូត្រទំនុកតម្កើង
ឱព្រះអម្ចាស់ជាព្រះនៃទូលបង្គំអើយ
ទូលបង្គំសរសើរតម្កើងព្រះអង្គរហូតតទៅ។
៣១
ព្រះអម្ចាស់អើយសូមធ្វើជាថ្មដា និងជាកំពែងការពារទូលបង្គំ
១ ទំនុកពីសៀវភៅរបស់គ្រូចម្រៀង។
ទំនុកតម្កើងរបស់ស្តេចដាវីឌ។
២ ឱព្រះអម្ចាស់អើយ
ទូលបង្គំសូមជ្រកកោនជាមួយព្រះអង្គ
សូមកុំឲ្យទូលបង្គំត្រូវខកចិត្តឡើយ!
ឱព្រះដ៏សុចរិតអើយ សូមរំដោះទូលបង្គំ!។
៣ សូមផ្ទៀងព្រះកាណ៌ស្ដាប់ទូលបង្គំ
សូមមករំដោះទូលបង្គំជាប្រញាប់!
សូមធ្វើជាថ្មដា និងជាកំពែងការពារទូលបង្គំ
ហើយសង្គ្រោះទូលបង្គំផង!។
៤ ដ្បិតព្រះអង្គជាសិលា
និងជាកំពែងការពារទូលបង្គំ
សូមដឹកដៃនាំផ្លូវទូលបង្គំ
ដោយយល់ដល់ព្រះនាមព្រះអង្គ។
៥ សូមប្រោសឲ្យទូលបង្គំបានរួចពីអន្ទាក់
ដែលពួកគេដាក់ចាំចាប់ទូលបង្គំ
ដ្បិតព្រះអង្គការពារទូលបង្គំ។
៦ ទូលបង្គំសូមប្រគល់វិញ្ញាណរបស់ទូលបង្គំ
ទៅក្នុងព្រះហស្ដព្រះអង្គ។
ឱព្រះអម្ចាស់ ជាព្រះដ៏ស្មោះត្រង់អើយ!
ព្រះអង្គបានជួយដោះលែងទូលបង្គំ។
៧ ទូលបង្គំសូមផ្ញើជីវិតលើព្រះអម្ចាស់ហើយ
ទូលបង្គំមិនពេញចិត្តនឹងអស់អ្នក
ដែលគោរពបម្រើព្រះក្លែងក្លាយទេ។
៨ ទូលបង្គំត្រេកអរសប្បាយជាខ្លាំង
ដោយព្រះអង្គមានព្រះហឫទ័យសប្បុរស
ចំពោះទូលបង្គំ
ព្រះអង្គទតឃើញទុក្ខវេទនារបស់ទូលបង្គំ
ព្រះអង្គជ្រាបថាទូលបង្គំមានកង្វល់។
៩ ព្រះអង្គមិនបណ្តោយឲ្យទូលបង្គំ
ធ្លាក់ទៅក្នុងកណ្ដាប់ដៃរបស់ខ្មាំងសត្រូវឡើយ
តែព្រះអង្គប្រទានឲ្យទូលបង្គំ
មានសេរីភាពងើបឡើងវិញបាន។
១០ ឱព្រះអម្ចាស់អើយ
សូមប្រណីសន្ដោសទូលបង្គំផង
ដ្បិតទូលបង្គំកំពុងតែមានអាសន្ន!
ទូលបង្គំយំខ្សោះទឹកភ្នែក ព្រលឹង
និងរូបកាយទូលបង្គំកាន់តែសោកសង្រេង។
១១ ជីវិតទូលបង្គំកាន់តែអន់ថយទៅ ដោយកើតទុក្ខ
ទូលបង្គំស្រែកថ្ងូរអស់មួយជីវិត
កម្លាំងទូលបង្គំកាន់តែទ្រុឌទ្រោម
ព្រោះតែកំហុសរបស់ទូលបង្គំ
ហើយសូម្បីតែឆ្អឹងរបស់ទូលបង្គំ
ក៏កាន់តែពុកទៅៗដែរ។
១២ ខ្មាំងសត្រូវទាំងប៉ុន្មានរបស់ទូលបង្គំ
ជាពិសេសអ្នកជិតខាង
នាំគ្នាត្មះតិះដៀលទូលបង្គំ
ហើយសូម្បីតែអស់អ្នកដែលជិតស្និទ្ធនឹងទូលបង្គំ
ក៏មិនហ៊ានចូលជិតទូលបង្គំដែរ
បើគេឃើញទូលបង្គំនៅតាមផ្លូវ គេនាំគ្នារត់គេច។
១៣ គ្មាននរណានឹកនាពីទូលបង្គំទៀតទេ
ទូលបង្គំប្រៀបបីដូចមនុស្សស្លាប់
និងដូចជាឆ្នាំងកំបែកដែលគេបោះចោល។
១៤ ទូលបង្គំបានឮមនុស្សជាច្រើន
ពោលពាក្យមួលបង្កាច់
មនុស្សម្នានៅជុំវិញទូលបង្គំ
បានធ្វើឲ្យទូលបង្គំភ័យតក់ស្លុត។
គេលើកគ្នាប្រឆាំងនឹងទូលបង្គំ
ព្រមទាំងឃុបឃិតគ្នា បម្រុងនឹងដកជីវិត
ទូលបង្គំផង។
១៥ ឱព្រះអម្ចាស់អើយ
ទូលបង្គំសូមផ្ញើជីវិតលើព្រះអង្គ!
ទូលបង្គំពោលថាព្រះអង្គពិតជាព្រះ
របស់ទូលបង្គំ។
១៦ អាយុជីវិតរបស់ទូលបង្គំ
ស្ថិតនៅក្នុងព្រះហស្ដរបស់ព្រះអង្គ
សូមរំដោះទូលបង្គំចេញពីកណ្ដាប់ដៃរបស់ខ្មាំង
សត្រូវ និងអស់អ្នកដែលបៀតបៀនទូលបង្គំ!
១៧ សូមបែរព្រះភ័ក្ត្រទតមកអ្នកបម្រើរបស់ព្រះអង្គ
សូមសង្គ្រោះទូលបង្គំ
ដោយព្រះហឫទ័យដ៏ស្មោះត្រង់របស់ព្រះអង្គ!
១៨ ឱព្រះអម្ចាស់អើយ
ទូលបង្គំអង្វររកព្រះអង្គ!
សូមកុំឲ្យទូលបង្គំត្រូវអាម៉ាស់ឡើយ
តែឲ្យពួកមនុស្សពាលត្រូវអាម៉ាស់មុខវិញ
គឺឲ្យពួកគេបិទមាត់
ធ្លាក់ទៅស្ថានមនុស្សស្លាប់ទៅ!។
១៩ សូមឲ្យមនុស្សដែលតែងតែនិយាយកុហក
ក្លាយទៅជាគ
គឺពួកដែលនិយាយយ៉ាងព្រហើន
ប្រឆាំងនឹងមនុស្សសុចរិត
ដោយអួតបំប៉ោង និងប្រមាថមាក់ងាយ!។
២០ ឱព្រះអម្ចាស់អើយ!
ព្រះហឫទ័យសប្បុរសរបស់ព្រះអង្គ
ល្អវិសេសវិសាលណាស់!
ព្រះអង្គបម្រុងទុក
សម្រាប់អស់អ្នកដែលគោរពកោតខ្លាចព្រះអង្គ
មនុស្សគ្រប់ៗគ្នាដឹងថា ព្រះអង្គប្រោសប្រណីអស់
អ្នកដែលមកជ្រកកោនជាមួយព្រះអង្គ។
២១ ព្រះអង្គលាក់គេនៅក្បែរព្រះអង្គ
ឲ្យរួចផុតពីឧបាយកលរបស់មនុស្ស
គឺឲ្យគេជ្រកនៅក្នុងព្រះពន្លា
ឆ្ងាយពីពាក្យមួលបង្កាច់របស់សត្រូវ។
២២ សូមលើកតម្កើងព្រះអម្ចាស់!
ដ្បិតពេលមានសត្រូវឡោមព័ទ្ធទូលបង្គំ
ព្រះអង្គបានសម្ដែងព្រះហឫទ័យស្មោះត្រង់
យ៉ាងអស្ចារ្យចំពោះទូលបង្គំ។
២៣ ពេលទូលបង្គំខ្វល់ខ្វាយ ទូលបង្គំស្មានថា
ព្រះអង្គបានបណ្តេញទូលបង្គំ
ចេញឆ្ងាយពីព្រះភ័ក្ត្ររបស់ព្រះអង្គហើយ
ប៉ុន្តែ ពេលទូលបង្គំស្រែករកព្រះអង្គ
ព្រះអង្គព្រះសណ្ដាប់ពាក្យអង្វររបស់ទូលបង្គំ។
២៤ អ្នករាល់គ្នាដែលគោរពបម្រើព្រះអម្ចាស់អើយ
ចូរស្រឡាញ់ព្រះអង្គ!
ព្រះអម្ចាស់ថែរក្សាអ្នកជឿ
តែព្រះអង្គធ្វើទោសយ៉ាងតឹងរ៉ឹង
ដល់មនុស្សព្រហើន។
២៥ អស់អ្នកដែលសង្ឃឹមទុកចិត្តលើព្រះអម្ចាស់អើយ
ចូរមានកម្លាំង និងចិត្តក្លាហានឡើង!។
៣២
សុភមង្គលរបស់អ្នកដែលព្រះអម្ចាស់អត់ទោសឲ្យ
១ ទំនុករបស់ស្តេចដាវីឌ។ ពាក្យកាព្យ។
មានសុភមង្គលហើយ
អស់អ្នកដែលព្រះជាម្ចាស់
លើកលែងទោសឲ្យ
ព្រមទាំងប្រោសប្រណីឲ្យរួចពីបាប!
២ មានសុភមង្គលហើយ
អស់អ្នកដែលព្រះអម្ចាស់មិនប្រកាន់ទោស
ហើយជាមនុស្សដែលគ្មានចិត្តវៀចវេរ!
៣ ដរាបណាទូលបង្គំមិនសារភាពកំហុសទេនោះ
ទូលបង្គំកាន់តែរីងរៃទៅៗ
ទូលបង្គំថ្ងូរជារៀងរាល់ថ្ងៃ
៤ ដ្បិតព្រះអង្គធ្វើទោសទូលបង្គំទាំងថ្ងៃទាំងយប់
កម្លាំងទូលបង្គំខ្សោះល្វើយ
ដូចទឹករីងស្ងួតនៅរដូវប្រាំង។ - សម្រាក
៥ ទូលបង្គំបានសារភាពអំពើបាបចំពោះព្រះអង្គ
ទូលបង្គំមិនបានលាក់លៀមកំហុស
របស់ទូលបង្គំឡើយ ទូលបង្គំពោលថា
«ខ្ញុំនឹងទទួលសារភាពអំពើបាប
របស់ខ្ញុំចំពោះព្រះអម្ចាស់!»
ព្រះអង្គក៏លើកលែងទោសទូលបង្គំ
ឲ្យរួចពីបាប។ - សម្រាក
៦ ហេតុនេះហើយបានជាអ្នកគោរព
ប្រណិប័តន៍ព្រះអង្គ
តែងទូលអង្វរព្រះអង្គនៅពេលដែលគេត្រូវការ!
ទោះបីមានទុក្ខកង្វល់ប្រៀបដូច
ទឹកជំនន់ខ្លាំងយ៉ាងណាក្តី ក៏គេមិនលិចលង់ដែរ។
៧ ព្រះអង្គជាជម្រកសម្រាប់ទូលបង្គំ
ព្រះអង្គការពារទូលបង្គំឲ្យរួចពីអាសន្ន
ព្រះអង្គឲ្យទូលបង្គំអាចបន្លឺសំឡេង
ច្រៀងឡើង ព្រោះព្រះអង្គរំដោះទូលបង្គំ។
- សម្រាក
៨ ព្រះអម្ចាស់មានព្រះបន្ទូលថា
«យើងនឹងប្រៀនប្រដៅណែនាំអ្នក
ឲ្យស្គាល់ផ្លូវដែលអ្នកត្រូវដើរ
យើងនឹងជួយឲ្យយោបល់អ្នក
ព្រមទាំងមើលថែទាំអ្នកផង។
៩ មិនត្រូវឆោតល្ងង់ដូចសេះ ឬលានោះឡើយ
គេដាក់ដែកបង្ខាំ និងចងបង្ហៀរ
ដើម្បីញាក់វាឲ្យចុះចូល»។
១០ មនុស្សពាលនឹងត្រូវរងទុក្ខវេទនាសព្វបែបយ៉ាង
ប៉ុន្តែ ព្រះអម្ចាស់តែងសម្ដែងព្រះហឫទ័យមេត្តាករុណា
ចំពោះអស់អ្នកដែលផ្ញើជីវិតលើព្រះអង្គ។
១១ មនុស្សសុចរិតអើយ ចូរនាំគ្នាសប្បាយរីករាយ
ចំពោះស្នាព្រះហស្ដរបស់ព្រះអម្ចាស់!
អ្នកទាំងអស់គ្នាដែលជាមនុស្សទៀងត្រង់អើយ
ចូរស្រែកហ៊ោដោយអំណរចុះ!។
៣៣
ចូរបន្លឺសំឡេងតម្កើងព្រះអម្ចាស់ដោយអំណរ!
១ មនុស្សសុចរិតអើយ
ចូរនាំគ្នាអបអរលើកតម្កើងព្រះអម្ចាស់!
មានតែមនុស្សទៀងត្រង់ប៉ុណ្ណោះ
ដែលអាចកោតសរសើរព្រះអង្គ។
២ ចូរលើកតម្កើងព្រះអម្ចាស់ ដោយសំឡេងពិណ
ចូរស្មូត្រទំនុកតម្កើងព្រះអង្គ
ទាំងលេងចាប៉ីខ្សែដប់កំដរផង។
៣ ចូរច្រៀងបទថ្មីថ្វាយព្រះអង្គ!
ចូរប្រគំតន្ដ្រីយ៉ាងពីរោះ
ក្នុងពេលស្រែកអបអរសាទរព្រះអង្គ
៤ ដ្បិតព្រះអម្ចាស់មានព្រះបន្ទូលយ៉ាងទៀងត្រង់
ហើយព្រះអង្គតែងប្រព្រឹត្តតាម
ព្រះបន្ទូលសន្យាជានិច្ច។
៥ ព្រះអង្គសព្វព្រះហឫទ័យនឹងសេចក្ដីសុចរិត
ព្រមទាំងសេចក្ដីទៀងត្រង់
ផែនដីទាំងមូលសម្ដែងអំពីព្រះហឫទ័យ
មេត្តាករុណារបស់ព្រះអម្ចាស់។
៦ ផ្ទៃមេឃកើតឡើងដោយសារព្រះបន្ទូល
របស់ព្រះអម្ចាស់
ហើយអ្វីៗទាំងអស់នៅលើមេឃ ក៏កើតឡើង
ដោយសារព្រះបញ្ជារបស់ព្រះអង្គដែរ។
៧ ព្រះអង្គបានធ្វើឲ្យទឹកសមុទ្រមកផ្តុំគ្នា
នៅកន្លែងតែមួយ
ព្រះអង្គបានបង្ឃាំងមហាសមុទ្រ
ឲ្យនៅមួយកន្លែង។
៨ ចូរឲ្យផែនដីទាំងមូលកោតខ្លាចព្រះអម្ចាស់!
ចូរឲ្យមនុស្សទាំងអស់នៅលើផែនដី
ញាប់ញ័រនៅចំពោះព្រះភ័ក្ត្រព្រះអង្គ!
៩ ដ្បិតអ្វីៗទាំងអស់កើតមាន
ដោយសារព្រះបន្ទូលរបស់ព្រះអង្គ
ព្រះអង្គបង្គាប់យ៉ាងណា
ក៏កើតមានយ៉ាងនោះមែន។
១០ ព្រះអម្ចាស់រំលំផែនការរបស់ប្រជាជាតិនានា!
ព្រះអង្គរំលាយគម្រោងការ
របស់ប្រជាជនទាំងឡាយ។
១១ រីឯផែនការរបស់ព្រះអង្គវិញ
នៅស្ថិតស្ថេររហូតតទៅ
ហើយគម្រោងការរបស់ព្រះអង្គ
នៅស្ថិតស្ថេរអស់កល្បជានិច្ច។
១២ មានសុភមង្គលហើយ ប្រជាជាតិណា
ដែលគោរពបម្រើព្រះអម្ចាស់ ទុកជាព្រះរបស់ខ្លួន!
មានសុភមង្គលហើយ
ប្រជាជនណាដែលព្រះអង្គបានជ្រើសរើស
ទុកជាប្រជារាស្ដ្ររបស់ព្រះអង្គផ្ទាល់!។
១៣ ព្រះអម្ចាស់ទតមើលពីស្ថានបរមសុខ
ព្រះអង្គឃើញមនុស្សលោកទាំងអស់
១៤ ហើយពីព្រះដំណាក់របស់ព្រះអង្គ
ព្រះអង្គរំពៃមើលមនុស្សទាំងអស់
ដែលរស់នៅលើផែនដី
១៥ គឺព្រះអង្គហើយដែលបានបង្កើត
ចិត្តគំនិតរបស់គេទាំងអស់គ្នា
ហើយព្រះអង្គយកព្រះហឫទ័យ
ទុកដាក់នឹងអំពើទាំងអស់ដែលគេប្រព្រឹត្ត។
១៦ ពុំដែលមានស្តេចណាយកជ័យជម្នះបាន
ដោយសារកងទ័ពដ៏ខ្លាំងពូកែនោះឡើយ
ហើយក៏ពុំដែលមានវីរបុរសណាវាយឈ្នះ
ដោយសារកម្លាំងខ្លាំងក្លានោះដែរ។
១៧ សេះចម្បាំងពុំអាចធ្វើឲ្យមានជ័យជម្នះឡើយ
ហើយទោះបីវាខ្លាំងយ៉ាងណាក៏ដោយ
ក៏ពុំអាចជួយរំដោះបានដែរ។
១៨ ព្រះអម្ចាស់តាមថែរក្សាអស់អ្នក
ដែលគោរពកោតខ្លាចព្រះអង្គ
គឺអស់អ្នកដែលពឹងផ្អែកលើព្រះហឫទ័យ
មេត្តាករុណារបស់ព្រះអង្គ។
១៩ ព្រះអង្គសង្គ្រោះគេឲ្យរួចពីសេចក្ដីស្លាប់
ហើយឲ្យគេបានរួចជីវិតនៅគ្រាមានទុរ្ភិក្ស។
២០ យើងផ្ញើជីវិតលើព្រះអម្ចាស់
ព្រះអង្គជួយសង្គ្រោះ និងការពារយើង
២១ យើងមានអំណរសប្បាយ ដោយរួមជាមួយព្រះអង្គ
យើងទុកចិត្តលើព្រះនាមដ៏វិសុទ្ធ*របស់ព្រះអង្គ។
២២ ឱព្រះអម្ចាស់អើយ!
សូមសម្ដែងព្រះហឫទ័យមេត្តាករុណា
មកលើយើងខ្ញុំផង
ព្រោះយើងខ្ញុំផ្ញើជីវិតលើព្រះអង្គហើយ។
៣៤
ព្រះហឫទ័យសប្បុរសរបស់ព្រះអម្ចាស់
១ ទំនុករបស់ស្តេចដាវីឌ នៅគ្រាដែល ព្រះអង្គធ្វើពុតជាវិកលចរិតនៅចំពោះ ព្រះភ័ក្ត្រស្តេចអប៊ីមេឡេក ធ្វើឲ្យ ស្តេចអប៊ីមេឡេកដេញព្រះអង្គចេញទៅ។
២ ខ្ញុំនឹងអរព្រះគុណព្រះអម្ចាស់គ្រប់ពេលវេលា
ខ្ញុំនឹងសរសើរតម្កើងព្រះអង្គឥតឈប់សោះឡើយ។
៣ ខ្ញុំនឹងបានខ្ពស់មុខដោយសារព្រះអង្គ!
ចូរឲ្យមនុស្សទន់ទាបត្រងត្រាប់ស្ដាប់
ហើយមានអំណរសប្បាយឡើង!។
៤ សូមប្រកាសជាមួយខ្ញុំថា
ព្រះអម្ចាស់ថ្កុំថ្កើងរុងរឿងក្រៃលែង!
យើងលើកតម្កើងព្រះនាមព្រះអង្គជាមួយគ្នា!។
៥ ខ្ញុំបានអង្វរព្រះអម្ចាស់
ព្រះអង្គក៏ឆ្លើយតបមកខ្ញុំវិញ
ព្រះអង្គបានរំដោះខ្ញុំឲ្យរួចពីការភ័យខ្លាច
ទាំងអម្បាលម៉ាន។
៦ អ្នកណាសម្លឹងឆ្ពោះទៅព្រះអង្គ
អ្នកនោះនឹងបានពោរពេញទៅដោយអំណរ
ហើយនឹងមិនខកចិត្តសោះឡើយ។
៧ មនុស្សទុរគតស្រែកអង្វរព្រះអម្ចាស់
ព្រះអង្គព្រះអង្គព្រះសណ្ដាប់ពាក្យគេ
ហើយសង្គ្រោះគេឲ្យរួចផុត
ពីគ្រោះកាចទាំងប៉ុន្មានផង។
៨ ទេវទូតរបស់ព្រះអម្ចាស់ថែរក្សាការពារ
អស់អ្នកដែលគោរពកោតខ្លាចព្រះអង្គ
ហើយរំដោះពួកគេឲ្យរួចពីគ្រោះថ្នាក់។
៩ ចូរពិសោធមើលដោយខ្លួនឯងចុះ
ដើម្បីឲ្យដឹងថាព្រះអម្ចាស់
មានព្រះហឫទ័យសប្បុរសដ៏លើសលប់!
អ្នកណាពឹងផ្អែកលើព្រះអង្គ
អ្នកនោះមានសុភមង្គលហើយ!។
១០ អ្នករាល់គ្នាដែលជាប្រជារាស្ដ្រព្រះអង្គអើយ
ចូរគោរពកោតខ្លាចព្រះអម្ចាស់
ដ្បិតអ្នកដែលគោរពកោតខ្លាចព្រះអង្គ
នឹងមិនខ្វះអ្វីឡើយ។
១១ អ្នកមានអាចជួបប្រទះនឹងការអត់ឃ្លាន
ខ្វះខាតចំណីបរិភោគ
តែអស់អ្នកដែលស្វែងរកព្រះអម្ចាស់
នឹងមិនខ្វះអ្វីសោះឡើយ។
១២ កូនចៅអើយ ចូរនាំគ្នាមក
ហើយស្ដាប់ពាក្យខ្ញុំ ខ្ញុំនឹងបង្រៀនអ្នក
ឲ្យស្គាល់អំពីការគោរពកោតខ្លាចព្រះអម្ចាស់។
១៣ តើមាននរណាចង់បានអាយុវែង
និងរស់នៅប្រកបដោយសុភមង្គលឬទេ?
១៤ បើចង់បាន ត្រូវតែចេះទប់អណ្ដាត
កុំពោលពាក្យអាក្រក់
និងចៀសវាងនិយាយបោកបញ្ឆោត!។
១៥ ចូរងាកចេញពីអំពើអាក្រក់
ហើយប្រព្រឹត្តអំពើល្អវិញ
ចូរខិតខំស្វែងរកសេចក្ដីសុខសាន្ត
យ៉ាងអស់ពីចិត្ត។
១៦ ព្រះអម្ចាស់តែងរំពៃមើលមនុស្សសុចរិត
ហើយព្រះអង្គយកព្រះហឫទ័យ
ទុកដាក់នឹងសម្រែករបស់ពួកគេជានិច្ច។
១៧ ព្រះអម្ចាស់តែងតែប្រឆាំង
នឹងអស់អ្នកដែលប្រព្រឹត្តអំពើអាក្រក់
ពេលពួកគេស្លាប់ទៅ
គ្មាននរណានឹកដល់ពួកគេទៀតទេ។
១៨ ពេលមនុស្សសុចរិតស្រែករកព្រះអង្គ
ព្រះអម្ចាស់ព្រះអង្គព្រះសណ្ដាប់ពាក្យគេ
ហើយព្រះអង្គរំដោះគេ
ឲ្យរួចពីទុក្ខលំបាកទាំងប៉ុន្មាន។
១៩ ព្រះអម្ចាស់គង់នៅជិតអស់អ្នកដែលក្រំចិត្ត
ហើយព្រះអង្គសង្គ្រោះអស់អ្នក
ដែលមានចិត្តសោកសង្រេង។
២០ មនុស្សសុចរិតរមែងជួបនឹងទុក្ខលំបាកជាច្រើន
ប៉ុន្តែ ព្រះអម្ចាស់តែងតែរំដោះគេ
ឲ្យរួចផុតពីទុក្ខលំបាកទាំងនោះជានិច្ច។
២១ ព្រះអង្គថែរក្សាគេឲ្យបានសុខសាន្ត
គឺគ្មានឆ្អឹងណាមួយត្រូវបាក់បែកឡើយ។
២២ អំពើអាក្រក់តែងប្រហារជីវិតមនុស្សពាល
ហើយអ្នកដែលស្អប់មនុស្សសុចរិត
តែងតែទទួលទោសជានិច្ច។
២៣ ព្រះអម្ចាស់សង្គ្រោះជីវិតអ្នកបម្រើរបស់ព្រះអង្គ
ហើយអស់អ្នកដែលមកពឹងផ្អែកលើព្រះអង្គ
តែងតែរួចផុតពីទុក្ខទោស។
៣៥
សូមជួយសង្គ្រោះទូលបង្គំជាប្រញាប់!
១ ទំនុករបស់ស្តេចដាវីឌ។
ឱព្រះអម្ចាស់អើយ! សូមប្រឆាំង
អស់អ្នកដែលប្រឆាំងនឹងទូលបង្គំ
សូមតយុទ្ធអស់អ្នកដែលតយុទ្ធនឹងទូលបង្គំផង!។
២ សូមយកខែលទាំងតូចទាំងធំ
យាងមកជួយទូលបង្គំជាប្រញាប់!
៣ សូមគប់លំពែង និងពូថៅ
ប្រហារអស់អ្នកដែលដេញតាមទូលបង្គំ
សូមបញ្ជាក់ឲ្យទូលបង្គំដឹងថា
ព្រះអង្គជាព្រះសង្គ្រោះទូលបង្គំ។
៤ សូមឲ្យពួកអ្នកដែលចង់ប្រហារជីវិតទូលបង្គំ
ត្រូវអាម៉ាស់ និងបាក់មុខ
សូមឲ្យពួកអ្នកដែលប៉ុនប៉ងធ្វើបាបទូលបង្គំ
ដកខ្លួនថយទៅវិញ ទាំងអៀនខ្មាស!
៥ នៅពេលទេវទូត*របស់ព្រះអម្ចាស់ បណ្តេញពួកគេ
សូមឲ្យពួកគេប្រៀបដូចជាអង្កាម
ដែលត្រូវខ្យល់ផាត់បាត់ទៅ!។
៦ នៅពេលទេវទូតរបស់ព្រះអម្ចាស់ដេញតាមពួកគេ
សូមឲ្យផ្លូវរបស់ពួកគេងងឹតសូន្យសុង
និងរអិលទៀតផង!។
៧ អ្នកទាំងនោះបានដាក់អន្ទាក់
ដើម្បីទាក់ទូលបង្គំ
ហើយជីករណ្ដៅ ដើម្បីចាប់ទូលបង្គំ
ដោយគ្មានមូលហេតុអ្វីឡើយ។
៨ សូមឲ្យពួកគេត្រូវអន្តរាយ
ដោយមិនបានដឹងជាមុន
សូមឲ្យពួកគេជាប់អន្ទាក់
ដែលខ្លួនបានបង្កប់ទុក
សូមឲ្យពួកគេធ្លាក់ទៅក្នុងរណ្ដៅនោះ
ហើយវិនាសអន្តរាយទៅ!។
៩ ពេលនោះ ទូលបង្គំនឹងបានត្រេកអររីករាយជាខ្លាំង
ចំពោះកិច្ចការដែលព្រះអម្ចាស់បានធ្វើ
ទូលបង្គំមានអំណរសប្បាយ
មកពីព្រះអង្គសង្គ្រោះទូលបង្គំ។
១០ ទូលបង្គំនឹងទូលព្រះអង្គយ៉ាងស្មោះ
អស់ពីដួងចិត្តថា:
ព្រះអម្ចាស់អើយ
គ្មាននរណាដូចព្រះអង្គឡើយ
ព្រះអង្គបានរំដោះអ្នកទន់ខ្សោយ
ឲ្យរួចផុតពីកណ្ដាប់ដៃរបស់អ្នកខ្លាំងពូកែ
ព្រះអង្គរំដោះជនកំសត់ទុរគតឲ្យរួចផុត
ពីកណ្ដាប់ដៃរបស់ពួកអ្នកសង្កត់សង្កិន។
១១ មានសាក្សីក្លែងក្លាយជាច្រើន
នាំគ្នាប្រឆាំងនឹងទូលបង្គំ
គេបានចោទសួរទូលបង្គំអំពីកិច្ចការ
ដែលទូលបង្គំពុំបានដឹងទាល់តែសោះ។
១២ គេបានធ្វើអំពើអាក្រក់តបស្នង
នឹងអំពើល្អដែលទូលបង្គំបានប្រព្រឹត្តចំពោះពួកគេ
ទូលបង្គំនៅឯកោម្នាក់ឯង។
១៣ ពេលពួកគេឈឺ ទូលបង្គំបានជួយរំលែកទុក្ខ
ទូលបង្គំបន្ទាបខ្លួន ទាំងតមអាហារ
ហើយទូលបង្គំទូលអង្វរឲ្យគេឥតឈប់ឈរ។
១៤ ទូលបង្គំប្រព្រឹត្តចំពោះពួកគេ
ដូចប្រព្រឹត្តចំពោះមិត្តភក្ដិ និងបងប្អូន
ទូលបង្គំព្រួយចិត្តសោកសង្រេង
ដូចកាន់ទុក្ខនៅពេលម្ដាយស្លាប់។
១៥ ផ្ទុយទៅវិញ ពេលទូលបង្គំមានទុក្ខលំបាក
គេបែរជានាំគ្នាសើចសប្បាយ
គេឃុបឃិតគ្នាប្រឆាំងនឹងទូលបង្គំ
ហើយអ្នកដទៃដែលទូលបង្គំពុំស្គាល់
បានវាយទូលបង្គំ និងហែកហួរទូលបង្គំ
ឥតឈប់ឡើយ។
១៦ ពួកគេចូលដៃជាមួយមនុស្សពាល
ដែលនៅជុំវិញទូលបង្គំ
ហើយសង្កៀតធ្មេញដាក់ទូលបង្គំ។
១៧ ព្រះអម្ចាស់អើយ!
តើព្រះអង្គធ្វើព្រងើយដល់កាលណាទៀត?
សូមរំដោះទូលបង្គំឲ្យរួចពីក្រញាំរបស់ពួកគេ
សូមការពារជីវិតទូលបង្គំ
ឲ្យរួចពីពួកសិង្ហទាំងនោះផង។
១៨ ទូលបង្គំនឹងអរព្រះគុណព្រះអង្គនៅក្នុងអង្គប្រជុំធំ
ទូលបង្គំនឹងសរសើរតម្កើងព្រះអង្គ
ក្នុងចំណោមប្រជាជនដ៏ច្រើន។
១៩ សូមកុំបណ្តោយឲ្យអស់អ្នកដែលតាំងខ្លួន
ជាសត្រូវនឹងទូលបង្គំ បានអរសប្បាយ
ព្រោះតែទូលបង្គំចាញ់
សូមកុំបណ្តោយឲ្យអស់អ្នក
ដែលស្អប់ទូលបង្គំដោយឥតហេតុផល
ពេបជ្រាយដាក់ទូលបង្គំឡើយ។
២០ ពួកគេមិនចេះនិយាយដោយសម្រួលទេ
ផ្ទុយទៅវិញ គេតែងតែប្រឌិតរឿងផ្សេងៗ
មួលបង្កាច់មនុស្សសន្សំសុខនៅក្នុងស្រុក។
២១ ពួកគេពោលពាក្យចោទប្រកាន់ទូលបង្គំ
គេស្រែកចំអកឲ្យទូលបង្គំថា «ហា៎ ហ៎ា!
យើងឃើញអ្នកឯងធ្វើអាក្រក់ហើយ!»។
២២ ឱព្រះអម្ចាស់អើយ
ព្រះអង្គទតឃើញស្រាប់ហើយ
សូមកុំនៅស្ងៀមព្រះអម្ចាស់អើយ
សូមកុំបោះបង់ចោលទូលបង្គំឡើយ!
២៣ ឱព្រះនៃទូលបង្គំ
ឱព្រះអម្ចាស់នៃទូលបង្គំអើយ
សូមក្រោកឡើង!
សូមព្រះអង្គតើនឡើង
រកយុត្តិធម៌ឲ្យទូលបង្គំ
សូមកាន់ក្តីខាងទូលបង្គំផង!។
២៤ ឱព្រះអម្ចាស់ជាព្រះនៃទូលបង្គំអើយ
ព្រះអង្គសុចរិត
សូមរកយុត្តិធម៌ឲ្យទូលបង្គំផង
កុំបណ្តោយឲ្យពួកគេបានសប្បាយ
ព្រោះទូលបង្គំចាញ់នោះឡើយ។
២៥ សូមកុំឲ្យគេពោលក្នុងចិត្តថា
«យើងមានប្រៀបលើវាហើយ!»
សូមកុំឲ្យគេពោលថា
«យើងបានបំផ្លាញវាទាំងស្រុងហើយ!»។
២៦ សូមឲ្យពួកអ្នកដែលអរសប្បាយ
នៅពេលឃើញទូលបង្គំវេទនា ត្រូវអាម៉ាស់
ហើយបាក់មុខទាំងអស់គ្នា!
សូមឲ្យពួកអ្នកដែលព្រហើនដាក់ទូលបង្គំ
ត្រូវអាម៉ាស់មុខបាត់បង់កិត្តិយស។
២៧ រីឯអស់អ្នកដែលចង់ឃើញទូលបង្គំ
ជាមនុស្សគ្មានទោស
សូមប្រទានឲ្យគេអាចស្រែកហ៊ោ
ដោយអំណរសប្បាយ
ហើយសូមឲ្យគេពោលហើយពោលទៀតថា
«សូមលើកតម្កើងព្រះអម្ចាស់!
ព្រះអង្គសព្វព្រះហឫទ័យ
ឲ្យអ្នកបម្រើរបស់ព្រះអង្គបានជោគជ័យ!»។
២៨ ពេលនោះ ទូលបង្គំនឹងថ្លែងអំពីសេចក្ដីសុចរិត
របស់ព្រះអង្គជានិច្ច
ហើយទូលបង្គំសរសើរតម្កើងព្រះអង្គ
ជារៀងរាល់ថ្ងៃ!។
៣៦
យើងខ្ញុំមកជ្រកកោនក្រោមម្លប់ព្រះបារមីរបស់ព្រះអង្គ
១ ទំនុកពីសៀវភៅរបស់គ្រូចម្រៀង។
ទំនុករបស់ស្តេចដាវីឌ ជាអ្នកបម្រើព្រះអម្ចាស់។
២ ខ្ញុំនឹកឃើញពាក្យរបស់ជនពាល
ដែលនិយាយក្នុងពេលបះបោរថា
មិនបាច់គោរពកោតខ្លាចព្រះជាម្ចាស់ទេ។
៣ គេបញ្ចើចបញ្ចើលើកតម្កើងខ្លួនឯងខ្លាំងពេក
រហូតមិនអាចទទួលស្គាល់ថា
ខ្លួនមានកំហុសគួរឲ្យស្អប់នោះឡើយ។
៤ គេពោលសុទ្ធតែពាក្យកុហកបោកប្រាស់
គឺគេលែងស្គាល់ខុសស្គាល់ត្រូវទៀតហើយ។
៥ សូម្បីតែនៅពេលដេក
ក៏គេគិតពីគម្រោងការធ្វើអំពើអាក្រក់ដែរ
គេមានះដើរនៅក្នុងផ្លូវមិនល្អ
គឺគេមិនព្រមបោះបង់អំពើអាក្រក់សោះឡើយ។
៦ ឱព្រះអម្ចាស់អើយ!
ព្រះហឫទ័យមេត្តាករុណារបស់ព្រះអង្គ
ខ្ពស់រហូតដល់ផ្ទៃមេឃ
ព្រះហឫទ័យស្មោះស្ម័គ្ររបស់ព្រះអង្គ
ខ្ពស់ដល់អាកាសវេហាស៍។
៧ ព្រះហឫទ័យសុចរិតរបស់ព្រះអង្គ
មានកម្ពស់ដូចភ្នំដ៏ខ្ពស់បំផុត
ព្រះតម្រិះរបស់ព្រះអង្គជ្រៅដូចមហាសាគរ។
ឱព្រះអម្ចាស់អើយ
ព្រះអង្គសង្គ្រោះទាំងមនុស្សលោក
ទាំងសត្វតិរច្ឆាន!។
៨ ឱព្រះជាម្ចាស់អើយ ព្រះហឫទ័យមេត្តាករុណា
របស់ព្រះអង្គ មានតម្លៃដ៏លើសលប់បំផុត!
មនុស្សលោកមកជ្រកកោនក្រោមម្លប់ព្រះបារមី
របស់ព្រះអង្គ
ដូចកូនសត្វជ្រកកោនក្រោមស្លាបមេវា។
៩ ព្រះអង្គប្រទានអាហារយ៉ាងបរិបូណ៌
ឲ្យមនុស្សលោកនៅក្នុង
ព្រះដំណាក់របស់ព្រះអង្គ
ហើយព្រះអង្គប្រទានឲ្យគេមាន
អំណរសប្បាយដ៏ហូរហៀរដូចទឹកទន្លេ។
១០ ដ្បិតព្រះអង្គជាប្រភពនៃជីវិត
ហើយយើងខ្ញុំមើលឃើញពន្លឺ
ដោយសារពន្លឺរបស់ព្រះអង្គ។
១១ សូមសម្ដែងព្រះហឫទ័យមេត្តាករុណា
ចំពោះអស់អ្នកដែលស្គាល់ព្រះអង្គតទៅទៀត
ហើយសម្ដែងព្រះហឫទ័យសុចរិត
ចំពោះអស់អ្នកដែលមានចិត្តទៀងត្រង់។
១២ សូមកុំឲ្យមនុស្សព្រហើនកោងកាច
មកវាយប្រហារទូលបង្គំបានឡើយ
ហើយក៏កុំឲ្យមនុស្សពាល
មកបណ្តេញទូលបង្គំដែរ!
១៣ មនុស្សប្រព្រឹត្តអំពើទុច្ចរិត
នឹងត្រូវបរាជ័យនៅទីនេះ ពួកគេត្រូវដួល
ហើយងើបឡើងវិញពុំរួចឡើយ។
៣៧
ចុងបញ្ចប់របស់មនុស្សអាក្រក់ និងមនុស្សល្អ
១ ទំនុករបស់ស្តេចដាវីឌ។
មិនត្រូវចងកំហឹងនឹងអស់អ្នក
ដែលប្រព្រឹត្តអំពើអាក្រក់ឡើយ
ហើយក៏កុំច្រណែននឹងអស់អ្នក
ដែលប្រព្រឹត្តអំពើទុច្ចរិតដែរ
២ ដ្បិតពួកគេនឹងត្រូវវិនាសសូន្យទៅយ៉ាងរហ័ស
ដូចស្មៅដែលតែងតែក្រៀមស្វិត
និងដូចផ្កាដែលតែងតែស្រពោននោះដែរ។
៣ ចូរផ្ញើជីវិតលើព្រះអម្ចាស់ ចូរប្រព្រឹត្តអំពើល្អ
នោះអ្នកនឹងរស់នៅក្នុងស្រុកនេះ
យ៉ាងសុខក្សេមក្សាន្ត។
៤ ចូរស្វែងរកសុភមង្គលពីព្រះអម្ចាស់
នោះព្រះអង្គនឹងប្រោសប្រទាននូវអ្វីៗ
ដែលអ្នកប្រាថ្នាចង់បាន។
៥ ចូរផ្ញើវាសនារបស់អ្នកទៅក្នុងព្រះហស្ដរបស់ព្រះអង្គ
ចូរផ្ញើជីវិតលើព្រះអង្គ នោះព្រះអង្គនឹងជួយអ្នក។
៦ ព្រះអង្គនឹងបង្ហាញឲ្យគេឃើញថា
អ្នកជាមនុស្សសុចរិត ដូចឃើញពន្លឺថ្ងៃ
ហើយព្រះអង្គនឹងបង្ហាញឲ្យគេឃើញថា
អ្នកជាមនុស្សទៀងត្រង់
ដូចពន្លឺនៅពេលថ្ងៃត្រង់។
៧ ចូរស្ងប់ស្ងៀមនៅចំពោះព្រះភ័ក្ត្រព្រះអម្ចាស់
ហើយទុកចិត្តលើព្រះអង្គទៅ
មិនត្រូវចងកំហឹងនឹងអ្នក
ដែលបានចម្រុងចម្រើននោះឡើយ
ហើយក៏មិនត្រូវចងកំហឹងនឹងមនុស្ស
ដែលប្រព្រឹត្តអំពើអាក្រក់ដែរ។
៨ ចូររំងាប់កំហឹង និងលះបង់ចិត្ត
ក្ដៅក្រហាយនោះចោលទៅ
កុំចងកំហឹងឡើយ
ព្រោះកំហឹងតែងតែបង្កឲ្យមានការអាក្រក់។
៩ ព្រះអម្ចាស់នឹងកាត់កាល់អស់អ្នក
ដែលប្រព្រឹត្តអំពើអាក្រក់
តែអស់អ្នកដែលសង្ឃឹមលើព្រះអង្គ
នឹងទទួលទឹកដីជាមត៌ក។
១០ នៅតែបន្តិចទៀត
នឹងលែងមានមនុស្សអាក្រក់ទៀតហើយ!
ទោះបីអ្នកខំរកមើលកន្លែងដែលគេធ្លាប់នៅ
ក៏មិនឃើញមានអ្វីដែរ។
១១ រីឯមនុស្សទន់ទាបវិញ
គេនឹងទទួលទឹកដីជាមត៌ក
ហើយនឹងបានសប្បាយសុខក្សេមក្សាន្ត។
១២ មនុស្សអាក្រក់តែងតែឃុបឃិត
ប្រឆាំងនឹងមនុស្សសុចរិត
ទាំងសង្កៀតធ្មេញដាក់មនុស្សសុចរិតទៀតផង
១៣ ប៉ុន្តែ ព្រះអម្ចាស់សើចចំអកដាក់មនុស្សអាក្រក់
ព្រោះព្រះអង្គជ្រាបថា
ពេលដែលគេត្រូវវិនាសជិតមកដល់ហើយ។
១៤ មនុស្សអាក្រក់នាំគ្នាហូតដាវ យឹតធ្នូ
ដើម្បីប្រហារជីវិតមនុស្សក្រីក្រទុរគត
និងអារកមនុស្សដែលមានចិត្តទៀងត្រង់។
១៥ ប៉ុន្តែ ដាវរបស់គេនឹងចាក់ទម្លុះ
បេះដូងរបស់ខ្លួនឯង
ហើយធ្នូរបស់គេនឹងត្រូវបាក់បែកអស់។
១៦ ទ្រព្យតែបន្តិចបន្តួចរបស់មនុស្សសុចរិត
ប្រសើរជាងទ្រព្យសម្បត្តិស្តុកស្តម្ភ
របស់មនុស្សអាក្រក់
១៧ ដ្បិតព្រះអម្ចាស់នឹងជួយគាំទ្រមនុស្សសុចរិត
តែព្រះអង្គនឹងបំបាក់កម្លាំង
របស់មនុស្សអាក្រក់វិញ។
១៨ ព្រះអម្ចាស់យកព្រះហឫទ័យទុកដាក់
នឹងជីវិតរបស់មនុស្សឥតសៅហ្មង
ព្រះអង្គនឹងថែរក្សាទឹកដីរបស់គេ
ឲ្យបានគង់វង្សរហូតតទៅ។
១៩ នៅគ្រាមានអាសន្ន គេនឹងមិនត្រូវអាម៉ាស់ឡើយ
ហើយនៅគ្រាមានទុរ្ភិក្ស គេនឹងបានបរិភោគឆ្អែត។
២០ រីឯមនុស្សអាក្រក់ គេនឹងត្រូវវិនាសសូន្យ
ហើយខ្មាំងសត្រូវរបស់ព្រះអម្ចាស់
ក៏នឹងរលាយសូន្យទៅ ដូចវាលស្មៅខៀវខ្ចី
ដែលឆេះរលាយសូន្យទៅជាផ្សែងដែរ។
២១ មនុស្សអាក្រក់ខ្ចីអ្វីៗពីគេ
ហើយមិនដែលសងវិញឡើយ
រីឯមនុស្សសុចរិតវិញ តែងតែមានចិត្តទូលាយ
និងចេះឲ្យរបស់របរទៅអ្នកដទៃ។
២២ អស់អ្នកដែលព្រះអម្ចាស់ប្រទានពរ
នឹងទទួលទឹកដីជាមត៌ក
រីឯអ្នកដែលព្រះអង្គដាក់បណ្ដាសាវិញ
នឹងត្រូវកាត់កាល់ចោល។
២៣ ព្រះអម្ចាស់ពង្រឹងជំហានរបស់មនុស្ស
ឲ្យបានមាំមួន
ហើយព្រះអង្គគាប់ព្រះហឫទ័យ
នឹងមាគ៌ារបស់គេ។
២៤ ប្រសិនបើអ្នកនោះភ្លាត់ជើង
គេនឹងមិនដួលដល់ដីឡើយ
ព្រោះព្រះអម្ចាស់កាន់ដៃគេជាប់។
២៥ តាំងពីខ្ញុំនៅក្មេង រហូតមកទល់ពេលខ្ញុំចាស់នេះ
ខ្ញុំមិនដែលឃើញព្រះអម្ចាស់បោះបង់ចោល
មនុស្សសុចរិតឡើយ
ហើយក៏មិនដែលឃើញកូនចៅ
របស់គេសុំទានដែរ។
២៦ មនុស្សសុចរិតតែងតែមានចិត្តអាណិតមេត្តា
និងចេះឲ្យរបស់របរទៅអ្នកដទៃខ្ចី
គេបានទទួលកូនចៅទុកជាព្រះពរ។
២៧ ចូរចៀសវាងអំពើអាក្រក់
ហើយប្រព្រឹត្តតែអំពើល្អ
ធ្វើដូច្នេះ អ្នកនឹងរស់នៅលើទឹកដីនេះរហូតតទៅ
២៨ ដ្បិតព្រះអម្ចាស់សព្វព្រះហឫទ័យ
នឹងការអ្វីដែលត្រឹមត្រូវ ព្រះអង្គថែរក្សា
អស់អ្នកដែលជឿលើព្រះអង្គជានិច្ច
ព្រះអង្គមិនបោះបង់ពួកគេឡើយ
តែព្រះអង្គកាត់កាល់ពូជពង្សរបស់មនុស្ស
អាក្រក់ឲ្យវិនាសសាបសូន្យ។
២៩ មនុស្សសុចរិតនឹងទទួលទឹកដីជាមត៌ក
ហើយគេនឹងរស់នៅលើទឹកដីនោះរហូតតទៅ។
៣០ មនុស្សសុចរិតតែងតែស្រដីចេញមក
នូវពាក្យពេចន៍ប្រកបដោយប្រាជ្ញា។
ហើយអណ្ដាតរបស់គេគ្រលាស់
ចេញមកនូវអ្វីដែលត្រឹមត្រូវ
៣១ វិន័យរបស់ព្រះអម្ចាស់ដក់នៅក្នុងដួងចិត្ត
របស់គេ ហើយគេនឹងមិនឃ្លាតចាក
ពីមាគ៌ារបស់ព្រះអង្គឡើយ។
៣២ មនុស្សអាក្រក់ឃ្លាំមើលមនុស្សសុចរិត
ហើយរកមធ្យោបាយចាំសម្លាប់គេផង។
៣៣ ប៉ុន្តែ ព្រះអម្ចាស់មិនបោះបង់មនុស្សសុចរិត
ឲ្យធ្លាក់ក្នុងកណ្ដាប់ដៃរបស់មនុស្សអាក្រក់ឡើយ
ហើយប្រសិនបើគេកាត់ក្តីមនុស្សសុចរិត
ព្រះអង្គក៏មិនបណ្តោយឲ្យគេដាក់ទោសបានដែរ។
៣៤ ចូរសង្ឃឹមទុកចិត្តលើព្រះអម្ចាស់
ហើយកាន់តាមមាគ៌ារបស់ព្រះអង្គទៅ
នោះព្រះអង្គនឹងលើកកិត្តិយសអ្នកឡើង
ឲ្យគ្រប់គ្រងទឹកដីជាមត៌ក
ហើយអ្នកនឹងឃើញមនុស្សអាក្រក់
ត្រូវកាត់កាល់ចោល។
៣៥ ខ្ញុំធ្លាប់ឃើញមនុស្សអាក្រក់ប្រើអំណាចផ្ដាច់ការ
គេរីកចម្រើនឡើង
ដូចដើមឈើមានស្លឹកខៀវខ្ចីបែកមែកសាខា។
៣៦ ក្រោយមក គេរលាយបាត់សូន្យទៅ
ខ្ញុំខំរកមើលគេ តែរកមិនឃើញសោះ។
៣៧ ចូរសង្កេតមើលមនុស្សទៀងត្រង់ដែលគ្មានចិត្តវៀចវេរ
មនុស្សសន្សំសុខ តែងតែមានអនាគតរុងរឿងជានិច្ច។
៣៨ រីឯមនុស្សបាបវិញ នឹងត្រូវវិនាសសូន្យអស់ទៅ
ហើយមនុស្សទមិឡ នឹងគ្មាន
អនាគតភ្លឺស្វាងសោះឡើយ។
៣៩ ព្រះអម្ចាស់តែងតែសង្គ្រោះមនុស្សសុចរិត
ហើយព្រះអង្គជាកំពែងការពារគេ
នៅគ្រាមានអាសន្ន។
៤០ ព្រះអម្ចាស់សង្គ្រោះ និងរំដោះពួកគេ
ឲ្យរួចពីកណ្ដាប់ដៃរបស់មនុស្សអាក្រក់
ព្រះអង្គសង្គ្រោះពួកគេ ពីព្រោះពួកគេ
មកជ្រកកោនក្រោមម្លប់ព្រះបារមីព្រះអង្គ។
៣៨
ពាក្យអធិស្ឋានរបស់មនុស្សឈឺចុកចាប់
១ ទំនុករបស់ស្តេចដាវីឌ។ សម្រាប់ពិធីរំឭក។
២ ឱព្រះអម្ចាស់អើយ
ទោះបីព្រះអង្គមិនសព្វព្រះហឫទ័យ
នឹងទូលបង្គំក៏ដោយ
សូមកុំដាក់ទោសទូលបង្គំឡើយ
ហើយទោះបីព្រះអង្គព្រះពិរោធនឹងទូលបង្គំក្តី
ក៏សូមកុំធ្វើទារុណកម្មទូលបង្គំដែរ
៣ ដ្បិតព្រួញរបស់ព្រះអង្គ
បានធ្វើឲ្យទូលបង្គំឈឺចុកចាប់
ព្រះហស្ដរបស់ព្រះអង្គបានសង្កត់មកលើទូលបង្គំ។
៤ ព្រះពិរោធរបស់ព្រះអង្គ
បានធ្វើឲ្យទូលបង្គំឈឺសព្វសព៌ាង្គកាយ
ហើយអំពើបាបរបស់ទូលបង្គំ
បានធ្វើឲ្យឆ្អឹងឆ្អែងរបស់ទូលបង្គំពុកអស់
៥ ដ្បិតកំហុសរបស់ទូលបង្គំបានជន់ជោរ
ឡើងលិចក្បាលទូលបង្គំ
ហើយជាបន្ទុកមួយដ៏ធ្ងន់សង្កត់មកលើទូលបង្គំ។
៦ របួសទូលបង្គំក្លាយទៅជាដំបៅរលួយ
ហើយធុំក្លិនអសោច
ព្រោះតែគំនិតលេលារបស់ទូលបង្គំ។
៧ ទូលបង្គំឈឺចុកចាប់ជាខ្លាំង រហូតដល់ចំកោងខ្លួន
ហើយទូលបង្គំកើតទុក្ខមួយថ្ងៃវាល់ល្ងាច។
៨ ទូលបង្គំគ្រុនក្ដៅយ៉ាងខ្លាំង ពេញសព្វសព៌ាង្គកាយ។
៩ ទូលបង្គំអស់កម្លាំង ខ្សោះល្វើយ
ហើយទូលបង្គំស្រែកថ្ងូរ
ព្រោះឈឺចុកចាប់ហួសប្រមាណ។
១០ ព្រះអម្ចាស់អើយ ព្រះអង្គឈ្វេងយល់ចិត្តប៉ងប្រាថ្នា
របស់ទូលបង្គំស្រាប់ហើយ
ព្រះអង្គព្រះសណ្ដាប់ឮសំឡេងដែលទូលបង្គំថ្ងូរ។
១១ បេះដូងទូលបង្គំញាប់ញ័រ
កម្លាំងទូលបង្គំក៏ខ្សោយបាត់ទៅ
ហើយភ្នែកទូលបង្គំ
ក៏ស្រវាំងលែងមើលអ្វីឃើញទៀត។
១២ មិត្តភក្ដិ ព្រមទាំងអ្នកជិតស្និទ្ធនឹងទូលបង្គំ
មិនហ៊ានចូលជិតទូលបង្គំទេ
ព្រោះខ្លាចដំបៅរបស់ទូលបង្គំ
សូម្បីតែក្រុមគ្រួសាររបស់ទូលបង្គំ
ក៏ឈរនៅឆ្ងាយពីទូលបង្គំដែរ។
១៣ អស់អ្នកដែលចង់ប្រហារជីវិតទូលបង្គំ
នាំគ្នារាយអន្ទាក់ចាំចាប់ទូលបង្គំ
ពួកគេមួលបង្កាច់ទូលបង្គំ
ចង់ឲ្យទូលបង្គំវិនាស
គេចេះតែរកកលល្បិច
ប្រឆាំងនឹងទូលបង្គំមួយថ្ងៃវាល់ល្ងាច។
១៤ ប៉ុន្តែ ទូលបង្គំធ្វើជាស្ដាប់មិនឮ ដូចមនុស្សថ្លង់
ទូលបង្គំធ្វើជានិយាយមិនរួច ដូចមនុស្សគ។
១៥ ទូលបង្គំប្រៀបបីដូចជាមនុស្សដែលស្ដាប់មិនឮ
ហើយជាមនុស្សដែលមិនអាច
ពោលពាក្យឆ្លើយទៅគេវិញបានឡើយ។
១៦ ឱព្រះអម្ចាស់អើយ
ទូលបង្គំសូមផ្ញើជីវិតលើព្រះអង្គទាំងស្រុង
ឱព្រះអម្ចាស់ជាព្រះនៃទូលបង្គំអើយ
មានតែព្រះអង្គហើយដែលឆ្លើយជំនួសទូលបង្គំ!
១៧ សូមកុំបណ្តោយឲ្យខ្មាំងសត្រូវ
ត្រេកអរសប្បាយ ព្រោះតែឃើញទូលបង្គំវេទនា
សូមកុំឲ្យពួកគេអួតបំប៉ោង
ក្នុងពេលដែលទូលបង្គំទន់ជង្គង់នេះឡើយ
១៨ ដ្បិតទូលបង្គំកំពុងតែចង់ដួល
ហើយទូលបង្គំកំពុងតែឈឺចុកចាប់ជានិច្ចដែរ។
១៩ ទូលបង្គំសូមសារភាពកំហុស
ទូលបង្គំសោកស្តាយណាស់
ដោយបានប្រព្រឹត្តអំពើបាបដូច្នេះ។
២០ រីឯខ្មាំងសត្រូវរបស់ទូលបង្គំវិញ
ពួកគេនៅមានសុខភាព មានកម្លាំង
អស់អ្នកដែលស្អប់ទូលបង្គំ
ដោយឥតហេតុផលនោះមានគ្នាច្រើនណាស់។
២១ ពួកអ្នកប្រព្រឹត្តអំពើអាក្រក់តបស្នងនឹងអំពើល្អ
ដែលទូលបង្គំបានធ្វើចំពោះពួកគេ
នាំគ្នាចោទប្រកាន់ទូលបង្គំ
ព្រោះតែទូលបង្គំខិតខំធ្វើអំពើល្អ។
២២ ឱព្រះអម្ចាស់អើយ
សូមកុំបោះបង់ចោលទូលបង្គំឡើយ!
ឱព្រះនៃទូលបង្គំអើយ
សូមកុំយាងចេញឆ្ងាយពីទូលបង្គំដូច្នេះ!
២៣ ព្រះអម្ចាស់ជាព្រះសង្គ្រោះទូលបង្គំអើយ
សូមមេត្តាប្រញាប់យាងមកសង្គ្រោះទូលបង្គំផង!។
៣៩
ពាក្យសារភាពរបស់មនុស្សឈឺចុកចាប់
១ ទំនុកពីសៀវភៅរបស់គ្រូចម្រៀង។
សម្រាប់លោកយេឌូថិន។ ទំនុករបស់ស្តេចដាវីឌ។
២ ខ្ញុំគិតថា ខ្ញុំនឹងប្រយ័ត្នប្រយែង
ចំពោះអំពើដែលខ្ញុំប្រព្រឹត្ត
ក្រែងលោខ្ញុំមានបាប ព្រោះតែពាក្យសម្ដី។
ដរាបណាមានមនុស្សអាក្រក់នៅក្បែរខ្ញុំ
ខ្ញុំនឹងមិននិយាយស្តីអ្វីសោះឡើយ។
៣ ខ្ញុំបិទមាត់នៅស្ងៀម
គឺទោះបីការល្អក៏ខ្ញុំមិននិយាយដែរ!
ដូច្នេះ ខ្ញុំកាន់តែឈឺចុកចាប់ឥតឧបមា!។
៤ ខ្ញុំក្ដៅជាខ្លាំង ហាក់ដូចជាមានភ្លើងឆេះ
នៅក្នុងខ្លួន រហូតដល់ទ្រាំលែងបានទៀត
ខ្ញុំក៏ពោលឡើងថា:
៥ ឱព្រះអម្ចាស់អើយ
សូមប្រាប់ឲ្យទូលបង្គំដឹងថ្ងៃចុងក្រោយ
នៃជីវិតរបស់ទូលបង្គំផង
តើទូលបង្គំអាចរស់បានប៉ុន្មានថ្ងៃទៀត
តើជីវិតទូលបង្គំផុយដល់កម្រិតណា?។
៦ ព្រះអង្គបានបង្កើតជីវិតទូលបង្គំមក
ដូចទឹកដក់លើស្លឹកឈូក
គឺជីវិតទូលបង្គំខ្លីបំផុតនៅចំពោះព្រះភ័ក្ត្រព្រះអង្គ
ពិតមែនហើយ ជីវិតរបស់មនុស្សលោក
ប្រៀបបាននឹងមួយដង្ហើមប៉ុណ្ណោះ។ - សម្រាក
៧ ជីវិតមនុស្សរសាត់បាត់ទៅប្រៀបបីដូចជាស្រមោល
អ្វីៗដែលគេខិតខំធ្វើ
សុទ្ធតែឥតបានការ
គេប្រមូលទ្រព្យសម្បត្តិទុក
តែគេពុំដឹងថាទ្រព្យសម្បត្តិនោះ
នឹងបានទៅលើនរណាឡើយ។
៨ ឱព្រះអម្ចាស់អើយ
បើដូច្នេះ តើឲ្យទូលបង្គំទន្ទឹងរង់ចាំអ្វី?
មានតែព្រះអង្គទេ
ដែលជាទីសង្ឃឹមរបស់ទូលបង្គំ។
៩ សូមរំដោះទូលបង្គំឲ្យរួចពីអំពើបាប
ទាំងប៉ុន្មានដែលទូលបង្គំបានប្រព្រឹត្ត!
សូមកុំទុកឱកាសឲ្យមនុស្សល្ងីល្ងើ
មាក់ងាយទូលបង្គំបានឡើយ។
១០ ទូលបង្គំនៅស្ងៀម មិននិយាយស្តីអ្វីទេ
ដ្បិតព្រះអង្គទេតើដែលបានធ្វើទោសទូលបង្គំ។
១១ សូមកុំធ្វើទារុណកម្មទូលបង្គំទៀតឡើយ!
ដ្បិតទូលបង្គំស្ទើរតែស្លាប់
ដោយព្រះអង្គវាយទូលបង្គំ។
១២ ពេលព្រះអង្គវាយប្រដៅមនុស្សណាម្នាក់
ដែលបានធ្វើខុស
ព្រះអង្គធ្វើឲ្យអ្វីៗដែលអ្នកនោះចូលចិត្ត
ត្រូវវិនាសហិនហោចដូចកណ្ដៀរស៊ីដែរ។
ពិតមែនហើយ ជីវិតមនុស្សលោក
ប្រៀបបាននឹងមួយដង្ហើមប៉ុណ្ណោះ។
- សម្រាក
១៣ ឱព្រះអម្ចាស់អើយ
សូមព្រះសណ្ដាប់ពាក្យទូលអង្វររបស់ទូលបង្គំ
សូមផ្ទៀងព្រះកាណ៌ស្ដាប់សម្រែករបស់ទូលបង្គំផង
សូមកុំព្រងើយកន្តើយនឹងទំនួញ
យំសោករបស់ទូលបង្គំឡើយ
ដ្បិតទូលបង្គំគ្រាន់តែស្នាក់នៅ
ជាបណ្តោះអាសន្នជាមួយព្រះអង្គ
ដូចបុព្វបុរសរបស់ទូលបង្គំប៉ុណ្ណោះ។
១៤ សូមបែរព្រះភ័ក្ត្រចេញពីទូលបង្គំ
ដើម្បីឲ្យទូលបង្គំស្រឡះមុខបន្តិច
មុននឹងទូលបង្គំលាចាកលោកនេះ
រលាយសូន្យបាត់ទៅ។
៤០
ខ្ញុំទន្ទឹងរង់ចាំព្រះអម្ចាស់
១ ទំនុករបស់គ្រូចម្រៀង។ ទំនុកតម្កើងរបស់ស្តេចដាវីឌ។
២ ខ្ញុំបានទន្ទឹងរង់ចាំព្រះអម្ចាស់
ព្រះអង្គក៏ផ្ទៀងព្រះកាណ៌
ស្ដាប់សម្រែកទូលអង្វររបស់ខ្ញុំ។
៣ ព្រះអង្គបានយកខ្ញុំចេញពីរណ្ដៅ ចេញពីភក់ជ្រាំ
មកដាក់នៅលើថ្មដាឲ្យមានជំហរយ៉ាងរឹងប៉ឹង។
៤ ព្រះអង្គបានប្រទានឲ្យខ្ញុំច្រៀងបទចម្រៀងថ្មី
ដើម្បីសរសើរតម្កើងព្រះរបស់យើង
មនុស្សជាច្រើននឹងឃើញ
ហើយកោតខ្លាចទៀតផង
គេនឹងនាំគ្នាផ្ញើជីវិតលើព្រះអម្ចាស់។
៥ មានសុភមង្គលហើយ
មនុស្សណាផ្ញើជីវិតលើព្រះអម្ចាស់
គឺជាអ្នកមិនបែរទៅរកថ្វាយបង្គំព្រះក្លែងក្លាយ
ដែលជាព្រះបោកបញ្ឆោត!។
៦ ឱព្រះអម្ចាស់ជាព្រះនៃទូលបង្គំអើយ
ព្រះអង្គបានសម្ដែងការអស្ចារ្យ
ជាច្រើនចំពោះយើងខ្ញុំ
ព្រះអង្គក៏មានគម្រោងការជាច្រើន
សម្រាប់យើងខ្ញុំដែរ។
គ្មាននរណាអាចផ្ទឹមស្មើនឹងព្រះអង្គបានទេ
ការអស្ចារ្យទាំងនោះមានចំនួនច្រើនឥតគណនា
ទូលបង្គំមិនអាចពណ៌នាអស់ឡើយ។
៧ ព្រះអង្គមិនចង់បានយញ្ញបូជា ឬតង្វាយអ្វីទេ
តែព្រះអង្គបានបើកត្រចៀកទូលបង្គំ
ឲ្យចេះស្ដាប់ព្រះអង្គ
ព្រះអង្គមិនទាមទារតង្វាយដុត
ឬយញ្ញបូជាសុំឲ្យរួចពីបាបឡើយ។
៨ ដូច្នេះ ទូលបង្គំពោលថា បពិត្រព្រះអម្ចាស់
ទូលបង្គំមករកព្រះអង្គ
ទាំងកាន់គម្ពីរដែលមានចែងទុកអំពីទូលបង្គំ។
៩ ទូលបង្គំពេញចិត្តនឹងធ្វើតាម
ព្រះហឫទ័យរបស់ព្រះអង្គ
ហើយវិន័យរបស់ព្រះអង្គដក់
នៅក្នុងដួងចិត្តទូលបង្គំជានិច្ច។
១០ ទូលបង្គំបានប្រកាសឲ្យអង្គប្រជុំដ៏ធំ
ដឹងអំពីសេចក្ដីសុចរិតរបស់ព្រះអង្គ
ឱព្រះអម្ចាស់អើយ ព្រះអង្គជ្រាបហើយថា
ទូលបង្គំនឹងថ្លែងឥតឈប់ឈរឡើយ។
១១ ទូលបង្គំមិនលាក់សេចក្ដីសុចរិតរបស់ព្រះអង្គ
ទុកក្នុងចិត្តទូលបង្គំទាល់តែសោះ
ទូលបង្គំតែងតែប្រកាសពីព្រះហឫទ័យ
ស្មោះត្រង់របស់ព្រះអង្គដែលបានសង្គ្រោះទូលបង្គំ
ទូលបង្គំពុំអាចនៅស្ងៀមមិនប្រកាស
អំពីព្រះហឫទ័យមេត្តាករុណាដ៏ស្មោះត្រង់
របស់ព្រះអង្គនៅកណ្ដាលអង្គប្រជុំធំបានឡើយ។
១២ ឱព្រះអម្ចាស់អើយ ទូលបង្គំដឹងថាព្រះអង្គតែងតែ
អាណិតមេត្តាទូលបង្គំឥតឈប់សោះឡើយ
ព្រះហឫទ័យមេត្តាករុណាដ៏ស្មោះត្រង់
របស់ព្រះអង្គតែងតែតាមការពារទូលបង្គំជានិច្ច។
១៣ មានទុក្ខលំបាកច្រើនឥតគណនារួបរឹតទូលបង្គំ
កំហុសរបស់ទូលបង្គំផ្ទាល់បានតាមយាយីទូលបង្គំ
ធ្វើឲ្យទូលបង្គំស្រវាំងភ្នែកមើលអ្វីលែងឃើញ
កំហុសទូលបង្គំមានចំនួនច្រើនជាង
សរសៃសក់របស់ទូលបង្គំទៅទៀត
ទូលបង្គំលែងមានកម្លាំង
ប្រឈមមុខទៀតហើយ។
១៤ ឱព្រះអម្ចាស់អើយ សូមមេត្តារំដោះទូលបង្គំផង!
ព្រះអម្ចាស់អើយ
សូមយាងមកសង្គ្រោះទូលបង្គំជាប្រញាប់!
១៥ សូមឲ្យអស់អ្នកដែលចង់ដកជីវិតទូលបង្គំ
ត្រូវអាប់ឱន និងបាក់មុខទាំងអស់គ្នា!
សូមឲ្យអស់អ្នកដែលសប្បាយចិត្ត
នឹងទុក្ខវេទនារបស់ទូលបង្គំ
ត្រូវដកខ្លួនថយ និងអាម៉ាស់មុខ!
១៦ សូមឲ្យអស់អ្នកដែលសើចចំអកដាក់ទូលបង្គំ
ត្រូវបរាជ័យ ទាំងអាប់កិត្តិយស
១៧ រីឯអស់អ្នកដែលស្វែងរកព្រះអង្គវិញ
សូមឲ្យគេបានសប្បាយរីករាយ
រួមជាមួយព្រះអង្គ!
សូមឲ្យអស់អ្នកដែលស្រឡាញ់ការសង្គ្រោះ
របស់ព្រះអង្គ ថ្លែងឥតឈប់ឈរថា
«សូមលើកតម្កើងព្រះអម្ចាស់!»។
១៨ ទូលបង្គំជាមនុស្សកំសត់ទុរគត
តែព្រះអម្ចាស់បានគិតគូរដល់ទូលបង្គំ។
ព្រះអង្គតែងតែសង្គ្រោះ និងរំដោះទូលបង្គំ
ឱព្រះនៃទូលបង្គំអើយ សូមយាងមកកុំបង្អង់ឡើយ!
៤១
សូមប្រោសទូលបង្គំឲ្យជាឡើងវិញផង
១ ទំនុកពីសៀវភៅរបស់គ្រូចម្រៀង។
ទំនុកតម្កើងរបស់ស្តេចដាវីឌ។
២ មានសុភមង្គលហើយ
អ្នកដែលយកចិត្តទុកដាក់
នឹងមនុស្សកំសត់ទុរគត!
ដ្បិតនៅថ្ងៃមានអាសន្ន
ព្រះអម្ចាស់នឹងជួយអ្នកនោះជាមិនខាន។
៣ ព្រះអម្ចាស់នឹងថែរក្សាអាយុជីវិតរបស់គេ
ហើយអ្នកនោះមានសុភមង្គលនៅលើផែនដី
ព្រះអង្គនឹងមិនបណ្តោយឲ្យគេធ្លាក់
ទៅក្នុងកណ្ដាប់ដៃរបស់ខ្មាំងសត្រូវឡើយ។
៤ ព្រះអម្ចាស់បីបាច់ថែរក្សាគេ
នៅពេលគេឈឺធ្ងន់ក្រោកពុំរួច
ហើយព្រះអង្គប្រោសគេ
ឲ្យមានសុខភាពល្អឡើងវិញ។
៥ ខ្ញុំទូលព្រះអម្ចាស់ថា ព្រះអង្គអើយ
សូមប្រណីមេត្តាទូលបង្គំ
សូមប្រោសទូលបង្គំឲ្យជាឡើងវិញផង
ដ្បិតទូលបង្គំបានប្រព្រឹត្តអំពើបាប
ទាស់នឹងព្រះហឫទ័យព្រះអង្គហើយ។
៦ សត្រូវរបស់ទូលបង្គំនាំគ្នា
និយាយអាក្រក់ពីទូលបង្គំ
គេបន់ឲ្យតែទូលបង្គំស្លាប់
គេបន់ឲ្យតែឈ្មោះទូលបង្គំសាបសូន្យទៅ។
៧ អស់អ្នកដែលមកសួរសុខទុក្ខទូលបង្គំ
គេមានគំនិតមិនល្អទេ
គេមកប្រមូលដំណឹងអាក្រក់ រួចចេញទៅវិញ
ទាំងនិយាយបរិហារពីទូលបង្គំ។
៨ អស់អ្នកដែលស្អប់ទូលបង្គំ
និយាយខ្សឹបខ្សៀវដាក់គ្នាទៅវិញទៅមក
ប្រឆាំងនឹងទូលបង្គំ
ថាទូលបង្គំគេចមិនផុតពីស្លាប់។
៩ គេពោលថា«ជំងឺអ្នកនេះមើលមិនជាទេ!
គាត់ពុំអាចក្រោកពីគ្រែឡើងវិញបានឡើយ»។
១០ សូម្បីតែមិត្តសម្លាញ់ដ៏ជិតស្និទ្ធរបស់ទូលបង្គំ
គឺអ្នកដែលទូលបង្គំទុកចិត្ត
ហើយជាអ្នកដែលបរិភោគអាហារ
រួមជាមួយទូលបង្គំ ក៏ប្រឆាំងនឹងទូលបង្គំដែរ។
១១ ចំពោះព្រះអង្គវិញ ឱព្រះអម្ចាស់អើយ
សូមប្រណីមេត្តាទូលបង្គំ
សូមប្រោសទូលបង្គំឲ្យបានជាឡើងវិញផង
នោះទូលបង្គំនឹងតបស្នងទៅខ្មាំងសត្រូវ
ឲ្យសមនឹងអំពើរបស់គេ។
១២ បើខ្មាំងសត្រូវរបស់ទូលបង្គំ
គ្មានជ័យជម្នះលើទូលបង្គំទេនោះ
ទូលបង្គំនឹងដឹងជាក់ថា
ព្រះអង្គពិតជាគាប់ព្រះហឫទ័យនឹងទូលបង្គំមែន។
១៣ ព្រះអង្គបានជួយទូលបង្គំ
ដោយប្រោសទូលបង្គំឲ្យជាទាំងស្រុង
ហើយព្រះអង្គប្រទានឲ្យទូលបង្គំ
នៅជាមួយព្រះអង្គរហូតតទៅ។
១៤ សូមលើកតម្កើងព្រះអម្ចាស់
ជាព្រះរបស់ជនជាតិអ៊ីស្រាអែល
អស់កល្បជាអង្វែងតរៀងទៅ។ អាម៉ែន! អាម៉ែន!។
៤២
ភាគទីពីរ
(ទំនុកតម្កើង ៤២-៧២)
ពាក្យអធិស្ឋានរបស់មនុស្សជាប់ជាឈ្លើយសឹក
១ ទំនុកពីសៀវភៅរបស់គ្រូចម្រៀង។
កំណាព្យរបស់កូនចៅលោកកូរេ។
២ ឱព្រះជាម្ចាស់អើយ
ទូលបង្គំប្រាថ្នាចង់នៅជាមួយ
ព្រះអង្គខ្លាំងណាស់
ដូចសត្វក្តាន់ប្រាថ្នារកទឹកហូរ។
៣ ខ្ញុំស្រេកឃ្លានព្រះជាម្ចាស់
គឺព្រះជាម្ចាស់ដ៏មានព្រះជន្មគង់នៅ
តើដល់កាលណាទើបខ្ញុំអាចទៅជិត
ដើម្បីថ្វាយបង្គំព្រះអង្គបាន?
៤ ខ្ញុំសម្រក់ទឹកភ្នែកទាំងថ្ងៃទាំងយប់ ឥតមានល្ហែ។
គេចេះតែពោលមកខ្ញុំគ្រប់ពេលគ្រប់វេលាថា
«តើព្រះរបស់ឯងនៅឯណា?»។
៥ ខ្ញុំស្រណោះស្រណោកក្រៃលែង
នៅពេលនឹកឃើញពីគ្រាដែលខ្ញុំនាំមុខប្រជាជន
មួយចំនួនធំ ឆ្ពោះទៅកាន់ព្រះដំណាក់របស់ព្រះអង្គ
ពួកគេមានអំណរសប្បាយ ស្រែកហ៊ោ
និងអរព្រះគុណព្រះអង្គ។
៦ ខ្ញុំនិយាយមកខ្លួនឯងថា:
«ឯងស្រយុតចិត្តធ្វើអ្វី ឯងថ្ងូរធ្វើអ្វី
ចូរផ្ញើជីវិតលើព្រះជាម្ចាស់ទៅ!»
ខ្ញុំមុខជាសរសើរតម្កើងព្រះអង្គតទៅមុខទៀត
ព្រះអង្គសង្គ្រោះខ្ញុំ។
៧ ព្រះនៃទូលបង្គំអើយ
ទូលបង្គំស្រយុតចិត្តជាខ្លាំង
ហេតុនេះហើយបានជាទូលបង្គំនឹកឃើញ
ព្រះអង្គពីកន្លែងដែលទូលបង្គំនៅនេះ
គឺភូមិភាគទន្លេយ័រដាន់ ភ្នំហ៊ែរម៉ូន
និងភ្នំមីតសារ។
៨ ព្រះអង្គបានធ្វើឲ្យទុក្ខកង្វល់
ធ្លាក់មកលើទូលបង្គំ
ដូចទឹកជ្រោះហូរធ្លាក់ពីលើភ្នំ
លាន់ឮគគ្រឹកគគ្រេង។
៩ នៅពេលថ្ងៃ ព្រះអម្ចាស់សម្ដែង
ព្រះហឫទ័យមេត្តាករុណាចំពោះខ្ញុំ
នៅពេលយប់ ខ្ញុំច្រៀងបទតម្កើងព្រះអង្គ
បទចម្រៀងនេះជាពាក្យអធិស្ឋានចំពោះ
ព្រះជាម្ចាស់នៃជីវិតខ្ញុំ។
១០ ខ្ញុំទូលព្រះជាម្ចាស់ដែលជាថ្មដារបស់ខ្ញុំថា
ហេតុអ្វីបានជាព្រះអង្គបំភ្លេចទូលបង្គំ?
ហេតុអ្វីបានជាទូលបង្គំត្រូវរងទុក្ខលំបាក
ហើយត្រូវខ្មាំងសត្រូវសង្កត់សង្កិនដូច្នេះ?។
១១ ខ្មាំងសត្រូវនាំគ្នាជេរប្រមាថទូលបង្គំ
ធ្វើឲ្យទូលបង្គំឈឺចុកចាប់សព្វសព៌ាង្គកាយ
គេចេះតែពោលមកទូលបង្គំគ្រប់ពេល
គ្រប់វេលាថា «តើព្រះរបស់ឯងនៅឯណា?»។
១២ ខ្ញុំនិយាយមកខ្លួនឯងថា
«ឯងស្រយុតចិត្តធ្វើអ្វី ឯងថ្ងូរធ្វើអ្វី
ចូរផ្ញើជីវិតលើព្រះជាម្ចាស់ទៅ!»
ខ្ញុំមុខជាសរសើរតម្កើងព្រះអង្គតទៅមុខទៀត
ព្រះអង្គសង្គ្រោះខ្ញុំ ហើយព្រះអង្គជាព្រះនៃខ្ញុំ។
៤៣
១ ឱព្រះជាម្ចាស់អើយ
សូមរកយុត្តិធម៌ឲ្យទូលបង្គំផង
សូមកាន់ក្តីទូលបង្គំតទល់នឹងមនុស្សទមិឡ!
សូមរំដោះទូលបង្គំឲ្យរួចផុត
ពីមនុស្សមានល្បិច និងមនុស្សទុច្ចរិត។
២ ព្រះជាម្ចាស់នៃទូលបង្គំអើយ
ព្រះអង្គជាព្រះការពារទូលបង្គំ
ហេតុអ្វីបានជាព្រះអង្គបោះបង់ចោលទូលបង្គំ?
ហេតុអ្វីបានជាទូលបង្គំត្រូវរងទុក្ខលំបាក
ហើយត្រូវខ្មាំងសត្រូវសង្កត់សង្កិនដូច្នេះ?
៣ សូមប្រទានពន្លឺ និងសេចក្ដីពិតរបស់ព្រះអង្គ
មកដឹកនាំទូលបង្គំឆ្ពោះទៅកាន់ភ្នំដ៏វិសុទ្ធ*
របស់ព្រះអង្គ ទៅកាន់ព្រះដំណាក់របស់ព្រះអង្គ!
៤ ពេលនោះ ឱព្រះជាម្ចាស់អើយ
ទូលបង្គំនឹងទៅជិតអាសនៈរបស់ព្រះអង្គ
ទូលបង្គំនឹងទៅជិតព្រះជាម្ចាស់ដែលជាប្រភព
នៃអំណរដ៏លើសលប់របស់ទូលបង្គំ។
ឱព្រះជាម្ចាស់ជាព្រះនៃទូលបង្គំអើយ
ទូលបង្គំនឹងលើកតម្កើងព្រះអង្គ
ដោយសំឡេងពិណ!
៥ ខ្ញុំនិយាយមកខ្លួនឯងថា
«ឯងស្រយុតចិត្តធ្វើអ្វី ឯងថ្ងូរធ្វើអ្វី
ចូរផ្ញើជីវិតលើព្រះជាម្ចាស់ទៅ!»
ខ្ញុំមុខជាសរសើរតម្កើងព្រះអង្គតទៅមុខទៀត
ព្រះអង្គសង្គ្រោះខ្ញុំ ហើយព្រះអង្គជាព្រះនៃខ្ញុំ។
៤៤
ព្រះអម្ចាស់អើយ សូមតើនឡើង!
១ ទំនុកពីសៀវភៅរបស់គ្រូចម្រៀង។
កំណាព្យរបស់កូនចៅលោកកូរេ។
២ ឱព្រះជាម្ចាស់អើយ
ដូនតាយើងខ្ញុំធ្លាប់រៀបរាប់ឲ្យ
យើងខ្ញុំបានឮផ្ទាល់នឹងត្រចៀក
នូវស្នាព្រះហស្ដទាំងប៉ុន្មាន
ដែលព្រះអង្គបានធ្វើនៅជំនាន់របស់លោក
គឺតាំងពីយូរអង្វែងណាស់មកហើយ។
៣ ដោយសារព្រះបារមីរបស់ព្រះអង្គ
ព្រះអង្គបានបណ្តេញប្រជាជាតិនានា
ចេញពីស្រុករបស់ខ្លួន
ហើយយកប្រជារាស្ដ្ររបស់ព្រះអង្គ
ឲ្យមកនៅជំនួស។
ព្រះអង្គបានធ្វើទោសសាសន៍ទាំងនោះ
ដើម្បីឲ្យប្រជារាស្ដ្ររបស់ព្រះអង្គពង្រីកទឹកដី។
៤ ប្រជារាស្ដ្ររបស់ព្រះអង្គពុំបានចាប់យកទឹកដីនេះ
ដោយសារអាវុធរបស់ខ្លួនឡើយ
ហើយគេក៏ពុំបានយកជ័យជម្នះ
ដោយសារកម្លាំងរបស់ខ្លួនដែរ
គឺគេទទួលជ័យជម្នះដោយសារឫទ្ធានុភាព
និងព្រះចេស្ដារបស់ព្រះអង្គ
ព្រោះព្រះអង្គស្រឡាញ់
ហើយគាប់ព្រះហឫទ័យនឹងពួកគេ។
៥ ឱព្រះជាម្ចាស់អើយ
ព្រះអង្គជាព្រះមហាក្សត្ររបស់ទូលបង្គំ!
មានតែព្រះអង្គទេដែលប្រទានជ័យជម្នះ
ដល់ប្រជារាស្ដ្ររបស់ព្រះអង្គ។
៦ ដោយសារព្រះអង្គ
យើងខ្ញុំបានយកជ័យជម្នះលើបច្ចាមិត្ត
ដោយសារព្រះនាមរបស់ព្រះអង្គ
យើងខ្ញុំបានបង្ក្រាបអស់អ្នក
ដែលប្រឆាំងនឹងយើងខ្ញុំ
៧ ដ្បិតទូលបង្គំមិនពឹងផ្អែកលើធ្នូរបស់ទូលបង្គំឡើយ
ហើយដាវរបស់ទូលបង្គំ
ក៏មិនអាចសង្គ្រោះទូលបង្គំបានដែរ។
៨ មានតែព្រះអង្គទេដែលសង្គ្រោះយើងខ្ញុំឲ្យរួច
ពីកណ្ដាប់ដៃរបស់បច្ចាមិត្ត ហើយធ្វើឲ្យ
អស់អ្នកដែលស្អប់យើងខ្ញុំត្រូវអាម៉ាស់។
៩ ឱព្រះជាម្ចាស់អើយ យើងខ្ញុំលើកតម្កើង
សិរីរុងរឿងរបស់ព្រះអង្គជារៀងរាល់ថ្ងៃ
ហើយយើងខ្ញុំនឹងសរសើរតម្កើង
ព្រះនាមរបស់ព្រះអង្គអស់កល្បជានិច្ច។ - សម្រាក
១០ ប៉ុន្តែ ឥឡូវនេះ ព្រះអង្គបានបោះបង់ចោល
យើងខ្ញុំ ព្រះអង្គបានធ្វើឲ្យយើងខ្ញុំបាក់មុខ
ព្រះអង្គមិនយាងទៅជាមួយកងទ័ព
របស់យើងខ្ញុំទៀតទេ។
១១ ព្រះអង្គបានធ្វើឲ្យយើងដកទ័ពថយ
នៅមុខបច្ចាមិត្ត
ហើយខ្មាំងសត្រូវនាំគ្នាប្រមូលទ្រព្យសម្បត្តិ
របស់យើងខ្ញុំយកទៅធ្វើជាជ័យភ័ណ្ឌ។
១២ ព្រះអង្គប្រគល់យើងខ្ញុំទៅឲ្យ
ខ្មាំងសត្រូវត្របាក់លេបដូចហ្វូងសត្វ
ព្រះអង្គធ្វើឲ្យយើងខ្ញុំខ្ចាត់ខ្ចាយ
ទៅតាមប្រទេសនានា
១៣ ព្រះអង្គបានលក់ប្រជារាស្ដ្ររបស់ព្រះអង្គ
យ៉ាងថោកបំផុត គឺព្រះអង្គពុំបានចំណេញអ្វីឡើយ។
១៤ ព្រះអង្គបានបណ្តោយឲ្យប្រទេស
ជិតខាងមើលងាយយើងខ្ញុំ
ប្រជាជាតិដែលនៅជុំវិញ
នាំគ្នាសើចចំអកឡកឡឺយដាក់យើងខ្ញុំ។
១៥ ព្រះអង្គបានធ្វើឲ្យប្រជាជាតិនានា
យករឿងយើងខ្ញុំទុកជាការលេងសើច
ពួកគេនាំគ្នាងក់ក្បាលចំអកដាក់យើងខ្ញុំ
១៦ ទូលបង្គំតែងតែបាក់មុខជារៀងរាល់ថ្ងៃ
ហើយទូលបង្គំអាម៉ាស់មុខណាស់
១៧ នៅពេលឮសូរខ្មាំងសត្រូវដែលចងគំនុំនឹងយើងខ្ញុំ
នាំគ្នានិយាយបន្តុះបង្អាប់បន្ទាបបន្ថោកយើងខ្ញុំ។
១៨ ឱព្រះអម្ចាស់អើយ
ហេតុការណ៍ទាំងនេះកើតមានចំពោះយើងខ្ញុំ
ទោះបីយើងខ្ញុំពុំបានបំភ្លេចព្រះអង្គ
ហើយទោះបីយើងខ្ញុំពុំបានផ្ដាច់ចំណង
សម្ពន្ធមេត្រីជាមួយព្រះអង្គក៏ដោយ។
១៩ យើងខ្ញុំពុំបានបែរចិត្តចេញពីព្រះអង្គទេ
ហើយយើងខ្ញុំក៏ពុំបានឃ្លាតចាក
ពីមាគ៌ារបស់ព្រះអង្គដែរ
២០ មិនគួរណាព្រះអង្គបំបរបង់ចោលយើងខ្ញុំ
នៅកន្លែងដែលមានសត្វសាហាវ
ព្រមទាំងឲ្យយើងខ្ញុំធ្លាក់ទៅ
ក្នុងកណ្ដាប់ដៃរបស់មច្ចុរាជឡើយ។
២១ ប្រសិនបើយើងខ្ញុំបំភ្លេចព្រះនាមព្រះនៃយើងខ្ញុំ
ប្រសិនបើយើងខ្ញុំបែរទៅទូលអង្វរ
ព្រះណាមួយផ្សេងទៀតនោះ
២២ ព្រះជាម្ចាស់មុខតែជ្រាបជាមិនខាន
ដ្បិតព្រះអង្គឈ្វេងយល់អ្វីៗ
ដែលលាក់ទុកនៅក្នុងចិត្តមនុស្ស!។
២៣ ព្រោះតែព្រះអង្គ
គេប្រហារជីវិតយើងខ្ញុំគ្រប់ពេលវេលា
ហើយគេចាត់ទុកយើងខ្ញុំ
ដូចជាចៀមដែលត្រូវយកទៅសម្លាប់។
២៤ ព្រះអម្ចាស់អើយ
ហេតុអ្វីបានជាព្រះអង្គនៅផ្ទំលក់ដូច្នេះ?
សូមក្រោកឡើង! សូមតើនឡើង
កុំបោះបង់ចោលយើងខ្ញុំរហូតតទៅឡើយ។
២៥ ហេតុអ្វីបានជាព្រះអង្គពួន
មិនទតមើលមកយើងខ្ញុំដូច្នេះ?
ហេតុអ្វីបានជាព្រះអង្គបំភ្លេចយើងខ្ញុំ
ដែលកំពុងតែវេទនា និងត្រូវគេជិះជាន់ដូច្នេះ?
២៦ ដ្បិតគេជាន់ឈ្លីយើងខ្ញុំក្នុងធូលីដី
យើងខ្ញុំបរាជ័យផ្កាប់មុខនៅនឹងដី។
២៧ សូមក្រោកឡើង សូមជួយសង្គ្រោះយើងខ្ញុំផង!
ដោយព្រះហឫទ័យមេត្តាករុណាចំពោះយើងខ្ញុំ
សូមរំដោះយើងខ្ញុំផង។
៤៥
ចម្រៀងនៅពេលព្រះរាជារៀបអភិសេក
១ ទំនុកពីសៀវភៅរបស់គ្រូចម្រៀង។ បទផ្កាម្លិះ។
កំណាព្យរបស់កូនចៅលោកកូរេ។ ចម្រៀងស្នេហា។
២ ចិត្តរបស់ខ្ញុំពោរពេញ
ទៅដោយពាក្យពេចន៍ដ៏សែនពីរោះ
ខ្ញុំតែងបទចម្រៀងនេះថ្វាយព្រះមហាក្សត្រ។
សូមឲ្យសម្ដីខ្ញុំចាប់ចុងជួន
ដូចបទកំណាព្យរបស់កវីនិពន្ធមួយរូបដ៏ចំណាន។
៣ ក្នុងចំណោមបុរសទាំងអស់
មានតែព្រះអង្គទេដែលរូបសម្បត្តិល្អជាងគេ
ព្រះអង្គមានសំនួនវោហារដ៏ពូកែ
ហេតុនេះហើយបានជាព្រះជាម្ចាស់
ប្រទានពរដល់ព្រះអង្គរហូតតទៅ។
៤ ឱវីរបុរសដ៏មានឫទ្ធិអើយ
សូមពាក់ព្រះខ័នរាជ្យដ៏រុងរឿង
និងភ្លឺចិញ្ចែងចិញ្ចាចរបស់ព្រះអង្គទៅ។
៥ សូមព្រះអង្គយាងគង់លើព្រះរាជរថ
ប្រកបដោយសិរីរុងរឿង
ដើម្បីច្បាំងការពារសេចក្ដីពិត
និងសេចក្ដីសុចរិតទៀងត្រង់
សូមព្រះអង្គទទួលមហាជោគជ័យ
ដោយព្រះបារមីរបស់ព្រះអង្គ។
៦ សូមឲ្យព្រួញដ៏មុតរបស់ព្រះអង្គ
បានបាញ់ទម្លុះដើមទ្រូងរបស់ពួកសត្រូវ
សូមឲ្យប្រជាជាតិទាំងឡាយ
នៅក្រោមព្រះបាទារបស់ព្រះរាជា។
៧ បពិត្រព្រះជាម្ចាស់ បល្ល័ង្ករបស់ព្រះអង្គ
នៅស្ថិតស្ថេរអស់កល្បជាអង្វែងតរៀងទៅ
ហើយព្រះអង្គគ្រងរាជ្យដោយយុត្តិធម៌
៨ ព្រះអង្គតែងតែសព្វព្រះហឫទ័យនឹងសេចក្ដីសុចរិត
ព្រះអង្គមិនសព្វព្រះហឫទ័យនឹងអំពើទុច្ចរិតទេ
ហេតុនេះហើយបានជាព្រះជាម្ចាស់
ជាព្រះរបស់ព្រះអង្គជ្រើសរើសព្រះអង្គ
ពីក្នុងចំណោមមិត្តភក្ដិរបស់ព្រះអង្គ
ហើយប្រទានឲ្យព្រះអង្គ
មានអំណរសប្បាយដ៏លើសលប់
ដោយចាក់ប្រេងអភិសេកព្រះអង្គ។
៩ ព្រះភូសារបស់ព្រះអង្គក្រអូបទៅដោយ
ក្លិនប្រេងទេព្វិរូ និងខ្លឹមចន្ទន៍ក្រឹស្នា
មានក្រុមតន្ដ្រីប្រគំភ្លេងថ្វាយព្រះអង្គ
នៅក្នុងប្រាសាទដែលរចនាអំពីភ្លុកដំរី។
១០ ស្រីស្នំរបស់ព្រះអង្គសុទ្ធតែជាបុត្រី
របស់ស្តេចនគរនានា
ហើយព្រះមហាក្សត្រិយានីទ្រង់គ្រឿងអលង្ការ
ធ្វើពីមាសដ៏ល្អប្រណីត
គង់នៅខាងស្តាំព្រះអង្គ។
១១ ព្រះអង្គម្ចាស់ក្សត្រិយ៍អើយ
សុំត្រងត្រាប់ស្ដាប់ពាក្យខ្ញុំ
ចូរកុំនឹកនាប្រជារាស្ដ្រ
និងព្រះរាជវង្សរបស់ព្រះនាងទៀតអី!
១២ ដ្បិតព្រះមហាក្សត្រគាប់ព្រះហឫទ័យ
នឹងសម្ផស្សរបស់ព្រះនាងខ្លាំងណាស់
ចូរក្រាបថ្វាយបង្គំព្រះអង្គទៅ
ព្រះអង្គជាម្ចាស់របស់ព្រះនាងហើយ។
១៣ ប្រជារាស្ដ្រនៅក្រុងទីរ៉ុសនឹងនាំតង្វាយ
មកថ្វាយព្រះនាង អ្នកមានទាំងឡាយនឹងនាំគ្នា
មកផ្គាប់ផ្គុនព្រះនាង។
១៤ ព្រះអង្គម្ចាស់ក្សត្រិយ៍គង់នៅក្នុងព្រះបរមរាជវាំង
ព្រះនាងមានរូបឆោមលោមពណ៌ស្អាតល្អណាស់
ព្រះភូសារបស់ព្រះនាងលំអទៅដោយមាស។
១៥ គេដង្ហែព្រះនាងចូលទៅគាល់ព្រះមហាក្សត្រ
ទាំងគ្រងព្រះភូសាចម្រុះពណ៌
និងមានពួកភីលៀងហែហមពីក្រោយ
ចូលទៅគាល់ព្រះរាជាផង។
១៦ ពួកនាងចូលទៅកាន់ព្រះដំណាក់របស់ព្រះរាជា
ដោយមានបណ្តាជនបន្លឺសំឡេងអបអរសាទរ
យ៉ាងសប្បាយ។
១៧ បពិត្រព្រះរាជា សូមឲ្យព្រះរាជបុត្រ
ព្រះអង្គបានឡើងគ្រងរាជ្យ
តពីព្រះអយ្យកោរបស់ព្រះអង្គ។
ព្រះអង្គនឹងតែងតាំងព្រះបុត្រា
របស់ព្រះអង្គឲ្យគ្រប់គ្រងទួទាំងនគរ។
១៨ ទូលបង្គំនឹងថ្លាថ្លែងរំឭកពីព្រះនាម
របស់ព្រះអង្គរហូតតទៅ
ហើយប្រជារាស្ដ្រនានាក៏នឹងនាំគ្នាលើកតម្កើង
ព្រះអង្គអស់កល្បជាអង្វែងតរៀងទៅដែរ។
៤៦
ព្រះជាម្ចាស់គង់ជាមួយយើង
១ ទំនុកពីសៀវភៅរបស់គ្រូចម្រៀង។
បទចម្រៀងរបស់កូនចៅលោកកូរេ។
បទសម្រាប់នារី។
២ ព្រះជាម្ចាស់ព្រះអង្គជាជម្រក
និងជាបង្អែកដ៏រឹងមាំរបស់យើង
នៅពេលមានអាសន្ន
ព្រះអង្គតែងតែប្រុងប្រៀបចាំជួយយើងជានិច្ច។
៣ ហេតុនេះហើយបានជាយើង
មិនភ័យខ្លាចអ្វីឡើយ
គឺទោះបីមានរញ្ជួយផែនដី
ទោះបីភ្នំនានារលំធ្លាក់ទៅក្នុងមហាសាគរ
៤ ឬទោះបីឮសូរសន្ធឹកសមុទ្របក់បោកបែកពពុះ
ទឹកធ្វើឲ្យកក្រើកភ្នំនានាយ៉ាងណាក្តី
ក៏យើងមិនភ័យខ្លាចអ្វីដែរ។ - សម្រាក
៥ មានទន្លេមួយហូរនាំយកអំណរមកស្រោចស្រព
បុរីរបស់ព្រះជាម្ចាស់ ដែលជាព្រះដំណាក់
ដ៏សក្ការៈនៃព្រះដ៏ខ្ពង់ខ្ពស់បំផុត។
៦ ព្រះជាម្ចាស់គង់នៅក្នុងបុរី
ហើយបុរីនោះនឹងមិនរង្គើសោះឡើយ។
ព្រះអង្គនឹងសង្គ្រោះបុរីនោះ តាំងពីពេលថ្ងៃរះ។
៧ ប្រជាជាតិនានាត្រូវញ័ររន្ធត់ នគរនានាត្រូវរង្គើ
ព្រះជាម្ចាស់បន្លឺព្រះសូរសៀងដូចផ្គរលាន់
ផែនដីក៏រលាយអស់ទៅ
៨ ព្រះអម្ចាស់នៃពិភពទាំងមូល*
ព្រះអង្គគង់នៅជាមួយយើង
ព្រះរបស់លោកយ៉ាកុបជាជម្រក
ដ៏រឹងមាំសម្រាប់យើង។ - សម្រាក
៩ ចូរនាំគ្នាមកមើលស្នាព្រះហស្ដរបស់ព្រះអម្ចាស់
ព្រះអង្គបានធ្វើការដ៏អស្ចារ្យក្រៃលែង
នៅលើផែនដីនេះ!
១០ គឺព្រះអង្គបញ្ឈប់សង្គ្រាមនៅលើ
សកលលោកទាំងមូល
ព្រះអង្គកាច់បំបាក់ធ្នូ និងលំពែង
ហើយដុតរទេះចម្បាំងចោលអស់។
១១ ព្រះអម្ចាស់មានព្រះបន្ទូលថា
«ចូរឈប់ច្បាំង ចូរដឹងថា
យើងនេះហើយជាព្រះជាម្ចាស់
យើងគ្រប់គ្រងលើប្រជាជាតិនានា
ហើយគ្រប់គ្រងលើផែនដីទាំងមូល»។
១២ ព្រះអម្ចាស់នៃពិភពទាំងមូល*
ព្រះអង្គគង់នៅជាមួយយើង
ព្រះរបស់លោកយ៉ាកុបជាជម្រក
ដ៏រឹងមាំសម្រាប់យើង។
- សម្រាក
៤៧
ព្រះអម្ចាស់ជាព្រះមហាក្សត្រដ៏ខ្ពង់ខ្ពស់បំផុត
១ ទំនុកពីសៀវភៅគ្រូចម្រៀង។ ទំនុករបស់កូនចៅលោកកូរេ។
២ ប្រជាជនទាំងឡាយអើយ
ចូរទះដៃអបអរសាទរ!
ចូរច្រៀងតម្កើងព្រះជាម្ចាស់
ដោយសប្បាយរីករាយ!
៣ ដ្បិតព្រះអម្ចាស់ជាព្រះដ៏ខ្ពង់ខ្ពស់បំផុត
ព្រះអង្គជាទីកោតស្ញប់ស្ញែងក្រៃលែង
ព្រះអង្គជាព្រះមហាក្សត្រដ៏ឧត្ដម
ដែលគ្រងរាជ្យលើផែនដីទាំងមូល។
៤ ព្រះអង្គបានបង្ក្រាបជាតិសាសន៍នានា
ឲ្យធ្វើជាចំណុះយើង
ហើយដាក់ប្រជាជាតិនានា
ឲ្យស្ថិតនៅក្រោមអំណាចយើង។
៥ ព្រះអង្គបានជ្រើសរើសទឹកដី
ឲ្យយើងទុកជាមត៌ក
ធ្វើឲ្យយើងខ្ពស់មុខក្រៃលែង
គឺយើងជាពូជពង្សលោកយ៉ាកុប
ដែលព្រះអង្គស្រឡាញ់។ - សម្រាក
៦ ព្រះជាម្ចាស់ព្រះអង្គយាងឡើងទៅភ្នំស៊ីយ៉ូន
ក្រោមសំឡេងអបអរសាទរយ៉ាងខ្ញៀវខ្ញារ
ព្រះអម្ចាស់យាងទៅមុខ អមដោយសំឡេងត្រែ។
៧ ចូរនាំគ្នាស្មូត្រទំនុកតម្កើងថ្វាយព្រះជាម្ចាស់!
ចូរនាំគ្នាស្មូត្រទំនុកតម្កើង
ថ្វាយព្រះមហាក្សត្រនៃយើង!
៨ ដ្បិតព្រះជាម្ចាស់ជាព្រះមហាក្សត្រ
នៃផែនដីទាំងមូល
ចូរនាំគ្នាស្មូត្រកំណាព្យថ្វាយព្រះអង្គទៅ!។
៩ ព្រះជាម្ចាស់គ្រងរាជ្យលើប្រជាជាតិនានា
ព្រះអង្គគង់នៅលើបល្ល័ង្កដ៏វិសុទ្ធ*។
១០ អ្នកដឹកនាំរបស់ប្រជាជាតិនានា មកជួបជុំគ្នា
ជាមួយប្រជាជននៃព្រះរបស់លោកអប្រាហាំ
ដ្បិតអ្នកដឹកនាំផែនដីទាំងមូល
ស្ថិតនៅក្រោមអំណាចរបស់ព្រះអង្គ
ព្រះអង្គជាម្ចាស់គ្រប់គ្រងលើអ្វីៗទាំងអស់!។
៤៨
ក្រុងស៊ីយ៉ូន ជាបុរីរបស់ព្រះជាម្ចាស់
១ បទចម្រៀង។ ទំនុករបស់កូនចៅលោកកូរេ។
២ ព្រះអម្ចាស់ជាព្រះដ៏ប្រសើរឧត្ដម
ដែលត្រូវតែលើកតម្កើង
ឲ្យខ្ពង់ខ្ពស់បំផុត
នៅក្នុងបុរីព្រះជាម្ចាស់របស់យើង
គឺនៅលើភ្នំដ៏វិសុទ្ធរបស់ព្រះអង្គ។
៣ ភ្នំរបស់ព្រះជាម្ចាស់ជាភ្នំមួយដ៏ល្អប្រណីត
គឺភ្នំស៊ីយ៉ូនដែលជាកំពូលនៃពិភព
ជាបុរីរបស់ព្រះមហាក្សត្រ
ដែលនាំឲ្យផែនដីទាំងមូលមានអំណរ។
៤ នៅក្នុងបុរីនេះ គេទទួលស្គាល់ថា
ព្រះជាម្ចាស់ជាកំពែងដ៏រឹងមាំ។
៥ ស្តេចនានាបានលើកគ្នាមកវាយប្រហារភ្នំស៊ីយ៉ូន
៦ ពេលគេឃើញក្រុងស៊ីយ៉ូន គេស្ញែងខ្លាចជាខ្លាំង
ហើយគេនាំគ្នារត់ចេញទៅវិញ ទាំងភ័យតក់ស្លុត
៧ ដ្បិតគេភ័យញាប់ញ័រ
ហើយឈឺចុកចាប់ដូចជាស្ត្រីសម្រាលកូន
៨ និងដូចជាខ្យល់ព្យុះបក់មកពីទិសបូព៌ា
បំបែកនាវាដ៏ធំៗ។
៩ យើងបានឮគេថ្លែងអំពីស្នាព្រះហស្ដ
ដ៏អស្ចារ្យរបស់ព្រះអង្គ
ឥឡូវនេះ យើងក៏បានឃើញផ្ទាល់នៅក្នុងទីក្រុង
របស់ព្រះអម្ចាស់នៃពិភពទាំងមូល
ដែលជាព្រះរបស់យើង ព្រះអង្គនឹងការពារ
ក្រុងនេះ ឲ្យបានរឹងមាំរហូតតទៅ។ - សម្រាក
១០ ឱព្រះជាម្ចាស់អើយ
ពេលយើងខ្ញុំនៅក្នុងព្រះវិហាររបស់ព្រះអង្គ
យើងខ្ញុំរិះគិតអំពីព្រះហឫទ័យ
មេត្តាករុណារបស់ព្រះអង្គ។
១១ ព្រះជាម្ចាស់អើយ ដូចព្រះនាមរបស់ព្រះអង្គ
ល្បីរន្ទឺ ក្នុងលោកទាំងមូលយ៉ាងណា
មនុស្សម្នាក៏នឹងលើកតម្កើងព្រះអង្គ
រហូតដល់ស្រុកដាច់ស្រយាល
ផែនដីយ៉ាងនោះដែរ។
ព្រះអង្គគ្រប់គ្រងដោយសុចរិត។
១២ សូមឲ្យអ្នកក្រុងស៊ីយ៉ូនបានរីករាយឡើង
សូមឲ្យអ្នកស្រុកយូដាបានរីករាយជាខ្លាំង
ដ្បិតព្រះអង្គវិនិច្ឆ័យប្រកបដោយយុត្តិធម៌។
១៣ ប្រជាជនរបស់ព្រះជាម្ចាស់អើយ
ចូរនាំគ្នាហែក្បួនព័ទ្ធជុំវិញក្រុងស៊ីយ៉ូន!
ចូររាប់ចំនួនប៉មរបស់ក្រុងនេះមើល!
១៤ ចូរស្ងើចសរសើរកំពែងក្រុង
ចូរពិនិត្យមើលជញ្ជាំងក្រុងនេះទៅ
ដើម្បីឲ្យអ្នករាល់គ្នាអាចយកទៅថ្លែង
ប្រាប់មនុស្សនៅជំនាន់ក្រោយថា៖
១៥ «ព្រះជាម្ចាស់ពិតជាព្រះរបស់យើង
អស់កល្បជានិច្ច
ហើយព្រះអង្គជាអ្នកដឹកនាំយើង
ជាអង្វែងតរៀងទៅដែរ»។
៤៩
កុំទុកចិត្តលើទ្រព្យសម្បត្តិ!
១ ទំនុកពីសៀវភៅគ្រូចម្រៀង។
ទំនុករបស់កូនចៅលោកកូរេ។
២ ប្រជាជនទាំងឡាយអើយ
ចូរនាំគ្នាត្រងត្រាប់ស្ដាប់!
មនុស្សម្នាដែលរស់នៅផែនដីទាំងមូលអើយ
ចូរនាំគ្នាយកចិត្តទុកដាក់ស្ដាប់
៣ គឺទាំងអ្នកតូច ទាំងអ្នកធំ
ទាំងអ្នកមាន ទាំងអ្នកក្រ!
៤ ខ្ញុំនឹងបរិយាយអំពីគតិបណ្ឌិត ខ្ញុំនឹងសម្ដែង
ចេញនូវគោលគំនិតប្រកបដោយប្រាជ្ញា។
៥ ខ្ញុំនឹងផ្ចង់ចិត្តស្ដាប់ពាក្យប្រៀនប្រដៅ
របស់អ្នកប្រាជ្ញ
ហើយខ្ញុំនឹងដោះស្រាយប្រស្នា
ទាំងលេងពិណកំដរផង។
៦ នៅគ្រាមានអាសន្ន
ឬពេលមានខ្មាំងសត្រូវមកឡោមព័ទ្ធ
ខ្ញុំនឹងមិនភ័យខ្លាចអ្វីសោះឡើយ។
៧ មនុស្សអាក្រក់តែងតែទុកចិត្តលើទ្រព្យរបស់ខ្លួន
គេអួតអាង ព្រោះមានសម្បត្តិស្តុកស្តម្ភ។
៨ ពុំមាននរណាម្នាក់អាចលោះអ្នកដទៃឡើយ
ហើយក៏ពុំអាចបង់ថ្លៃថ្វាយព្រះជាម្ចាស់
ដើម្បីលោះជីវិតរបស់ខ្លួនបានដែរ
៩ ដ្បិតតម្លៃលោះជីវិតរបស់មនុស្សថ្លៃណាស់
គឺទោះបីជាគេខំបង់ថ្លៃយ៉ាងណាក៏ដោយ
ក៏មិនគ្រប់ដែរ។
១០ តើមនុស្សអាចរស់រហូត
ហើយគេចផុតពីរណ្ដៅមច្ចុរាជបានឬ?។
១១ យើងនឹងឃើញច្បាស់ថា អ្នកប្រាជ្ញ
ក៏ដូចជាមនុស្សឆោតល្ងង់អាប់ឥតប្រាជ្ញាដែរ
គេត្រូវតែស្លាប់ទាំងអស់គ្នា
ហើយទុកទ្រព្យសម្បត្តិខ្លួនឲ្យអ្នកដទៃ។
១២ គេនឹកក្នុងចិត្តថាគេហដ្ឋានរបស់គេ
នឹងនៅស្ថិតស្ថេររហូតតទៅ
លំនៅដ្ឋានរបស់គេនៅគង់វង្ស
ពីជំនាន់មួយទៅជំនាន់មួយ
ហើយគេដាក់ឈ្មោះដីធ្លីគេ
តាមឈ្មោះរបស់ខ្លួនថែមទៀត។
១៣ ក៏ប៉ុន្តែ មនុស្សដែលមានកិត្តិយសរុងរឿង
ពុំអាចគេចផុតពីស្លាប់បានទេ
គេមិនយល់ថាគេនឹងត្រូវបាត់បង់ជីវិតទៅ
ដូចសត្វតិរច្ឆាននោះឡើយ។
១៤ រីឯអស់អ្នកដែលទុកចិត្តលើខ្លួនឯង
ហើយស្កប់ចិត្តនឹងពាក្យសម្ដីរបស់ខ្លួន
អនាគតរបស់គេនឹងបានដូចតទៅនេះ - សម្រាក
១៥ អ្នកទាំងនោះប្រៀបដូចជាកូនចៀម
ដែលយកទៅសម្លាប់។
គង្វាលឃ្វាលហ្វូងចៀមយ៉ាងណា
មច្ចុរាជក៏នឹងឃ្វាលពួកគេយ៉ាងនោះដែរ។
មនុស្សសុចរិតនឹងជាន់ឈ្លីពួកគេ
រូបកាយរបស់ពួកគេនឹងរលាយសូន្យ
ហើយទៅរស់នៅក្នុងស្ថានមនុស្សស្លាប់។
១៦ ក៏ប៉ុន្តែ ព្រះជាម្ចាស់នឹងរំដោះជីវិតខ្ញុំ
ឲ្យរួចពីអំណាចនៃសេចក្ដីស្លាប់
ព្រះអង្គនឹងយកខ្ញុំទៅ។ - សម្រាក
១៧ ពេលឃើញនរណាម្នាក់ទៅជាអ្នកមាន
ហើយឃើញទ្រព្យសម្បត្តិចេះតែរីកចម្រើន
កុំភ័យខ្លាចអី
១៨ ដ្បិតពេលស្លាប់ទៅ
គេពុំអាចយកអ្វីទៅជាមួយបានទេ
គឺគេមិនអាចយកទ្រព្យសម្បត្តិ
ចុះទៅក្នុងរណ្ដៅជាមួយឡើយ។
១៩ ទោះបីគេយល់ថា ខ្លួនមានសុភមង្គលក្នុងជីវិតនេះ
ហើយទោះបីមានអ្នកដទៃកោតសរសើរ
ដោយឃើញគេបានចម្រុងចម្រើនក៏ដោយ
២០ ក៏គង់តែគេត្រូវចុះទៅជួបជុំ
នឹងដូនតារបស់ខ្លួន ចៀសមិនផុត
នៅក្នុងកន្លែងដែលគេពុំអាចមើល
ឃើញពន្លឺទៀតឡើយ។
២១ មនុស្សដែលមានកិត្តិយសរុងរឿង
តែមិនយល់អ្វីសោះនោះ
គេនឹងបាត់បង់ទៅដូចសត្វតិរច្ឆានដែរ។
៥០
ការថ្វាយបង្គំដ៏ពិតប្រាកដ
១ ទំនុករបស់លោកអសាភ។
ព្រះអម្ចាស់ជាព្រះលើអ្វីៗទាំងអស់
ព្រះអង្គមានព្រះបន្ទូលកោះហៅ
ផែនដីទាំងមូល ចាប់តាំងពីទិសខាងកើត
រហូតដល់ទិសខាងលិច
២ ព្រះជាម្ចាស់ភ្លឺចាំងចែងពីក្រុងស៊ីយ៉ូន
ដែលជាក្រុងដ៏ល្អត្រចះត្រចង់។
៣ ព្រះនៃយើងព្រះអង្គយាងមកហើយ
ព្រះអង្គមិនសំងំនៅស្ងៀមឡើយ
មានភ្លើងសន្ធោសន្ធៅនៅពីមុខព្រះអង្គ
ហើយជុំវិញព្រះអង្គ
មានខ្យល់បក់បោកយ៉ាងខ្លាំង។
៤ ព្រះអង្គកោះហៅផ្ទៃមេឃ
និងផែនដី ឲ្យធ្វើជាសាក្សី
នៅពេលព្រះអង្គវិនិច្ឆ័យទោស
ប្រជារាស្ដ្ររបស់ព្រះអង្គ
៥ ព្រះអង្គមានព្រះបន្ទូលថា៖
«ចូរប្រមូលពួកអ្នកជឿឲ្យមកជួបយើង
គឺអស់អ្នកដែលបានថ្វាយយញ្ញបូជា
ដើម្បីចងសម្ពន្ធមេត្រីជាមួយយើង!»។
៦ ផ្ទៃមេឃប្រកាសសេចក្ដីសុចរិតរបស់ព្រះអង្គ
ដ្បិតព្រះជាម្ចាស់ផ្ទាល់ព្រះអង្គជាចៅក្រម។ - សម្រាក
៧ «អ្នករាល់គ្នាដែលជាប្រជារាស្ដ្ររបស់យើងអើយ
ចូរនាំគ្នាស្ដាប់ពាក្យយើងនិយាយ!
អ៊ីស្រាអែលអើយ យើងនឹងព្រមានអ្នករាល់គ្នា។
យើងជាព្រះជាម្ចាស់ ជាព្រះរបស់អ្នករាល់គ្នា។
៨ យើងមិនបន្ទោសអ្នករាល់គ្នាអំពីយញ្ញបូជា
និងតង្វាយដុត ដែលអ្នករាល់គ្នាតែងតែ
យកមកថ្វាយយើងជាប្រក្រតីនោះទេ។
៩ យើងមិនត្រូវការគោបាពីផ្ទះរបស់អ្នករាល់គ្នា
ឬក៏ពពែឈ្មោលពីក្រោលរបស់អ្នករាល់គ្នាឡើយ
១០ ដ្បិតសត្វទាំងប៉ុន្មានដែលនៅក្នុងព្រៃ
សុទ្ធតែជារបស់យើង
ហើយសត្វរាប់ម៉ឺនរាប់សែនក្បាល
ដែលរស់នៅតាមភ្នំ ក៏ជារបស់យើង។
១១ យើងស្គាល់បក្សាបក្សីទាំងប៉ុន្មាន
ដែលរស់នៅតាមភ្នំ
ហើយសត្វទាំងឡាយដែលរស់នៅតាមស្រែចម្ការ
ក៏ជារបស់យើងដែរ។
១២ ប្រសិនបើយើងឃ្លាន
យើងនឹងមិននិយាយប្រាប់អ្នករាល់គ្នាឡើយ
ដ្បិតពិភពលោក និងអ្វីៗទាំងអស់នៅក្នុង
ពិភពនេះ សុទ្ធតែជាកម្មសិទ្ធិរបស់យើង។
១៣ តើយើងដែលបរិភោគសាច់គោបាឬ?
តើយើងដែលផឹកឈាមពពែឈ្មោលឬ?
១៤ តង្វាយដែលអ្នករាល់គ្នាត្រូវថ្វាយព្រះជាម្ចាស់
គឺពាក្យអរព្រះគុណ
ហើយត្រូវធ្វើតាមពាក្យដែលអ្នកបានសន្យា
ចំពោះព្រះដ៏ខ្ពង់ខ្ពស់បំផុត។
១៥ នៅគ្រាមានអាសន្ន ចូរអង្វររកយើងចុះ
យើងនឹងរំដោះអ្នក ហើយអ្នកនឹងលើកតម្កើង
សិរីរុងរឿងរបស់យើង។
១៦ ព្រះជាម្ចាស់មានព្រះបន្ទូល
ទៅកាន់មនុស្សអាក្រក់ថា៖
ហេតុដូចម្ដេចបានជាអ្នកចេះតែសូត្រ
ក្រឹត្យវិន័យរបស់យើង ហើយចេះតែទន្ទេញថា
បានចងសម្ពន្ធមេត្រីជាមួយយើងដូច្នេះ?
១៧ ក៏ប៉ុន្តែ អ្នកពុំព្រមឲ្យយើងប្រដែប្រដៅសោះ
ហើយក៏មិនព្រមទទួលយកពាក្យយើងដែរ។
១៨ ពេលណាអ្នកជួបចោរ អ្នកសេពគប់ជាមួយគេភ្លាម
ហើយអ្នកតែងតែចូលដៃ
ជាមួយជនផិតក្បត់ទៀតផង។
១៩ មាត់របស់អ្នកតែងស្រដីចេញ
នូវពាក្យអាក្រក់អាក្រី
ហើយអណ្ដាតអ្នកតែងគ្រលាស់
ចេញនូវពាក្យបោកប្រាស់។
២០ អ្នកត្រៀមខ្លួនចោទប្រកាន់បងប្អូនជានិច្ច
ហើយអ្នកបរិហារកេរ្តិ៍បងប្អូនបង្កើតទៀតផង។
២១ អ្នកបានប្រព្រឹត្តអំពើទាំងនេះ
តើឲ្យយើងនៅស្ងៀមម្ដេចកើត?
អ្នកស្មានថាយើងដូចអ្នកដែរឬ?
ប៉ុន្តែ យើងថ្កោលទោស ហើយបង្ហាញ
ឲ្យអ្នកឃើញកំហុសទាំងនេះផ្ទាល់នឹងភ្នែក។
២២ អស់អ្នកដែលបំភ្លេចយើងអើយ
ចូររិះគិតឲ្យយល់សេចក្ដីនេះទៅ
ក្រែងលោយើងបំផ្លាញអ្នករាល់គ្នា
ហើយគ្មាននរណាអាចរំដោះ
អ្នករាល់គ្នាឡើយ។
២៣ *អ្នកលើកតម្កើងយើង គឺអ្នកដែលថ្វាយពាក្យ
អរព្រះគុណទុកជាតង្វាយ
ហើយយើងនឹងសង្គ្រោះអស់អ្នក
ដែលដើរតាមមាគ៌ារបស់យើង»។
៥១
ពាក្យអធិស្ឋានសូមព្រះអម្ចាស់លើកលែងទោស
១ ទំនុកពីសៀវភៅរបស់គ្រូចម្រៀង
ទំនុករបស់ស្តេចដាវីឌ។
២ នៅពេលព្យាការីណាថានមកគាល់ស្តេចដាវីឌ
បន្ទាប់ពីស្តេចបានប្រព្រឹត្តអំពើផិតក្បត់
ជាមួយនាងបាតសេបា។
៣ ឱព្រះជាម្ចាស់អើយ!
សូមប្រណីសន្ដោសទូលបង្គំផង
ដ្បិតព្រះអង្គមានព្រះហឫទ័យ
មេត្តាករុណាដ៏លើសលប់
សូមលើកលែងទោសឲ្យទូលបង្គំផង
ដ្បិតព្រះអង្គមានព្រះហឫទ័យ
អាណិតមេត្តាដ៏ទូលំទូលាយ។
៤ សូមលុបលាងកំហុសទូលបង្គំ
ឲ្យបានស្អាតទាំងស្រុង
សូមជម្រះទូលបង្គំឲ្យបានបរិសុទ្ធ រួចពីបាប!
៥ ទូលបង្គំទទួលសារភាពថា
ទូលបង្គំបានធ្វើខុសហើយ
អំពើបាបរបស់ទូលបង្គំដិតជាប់
នៅក្នុងអារម្មណ៍ទូលបង្គំជានិច្ច។
៦ ទូលបង្គំបានប្រព្រឹត្តអំពើបាបទាស់នឹងព្រះហឫទ័យ
ព្រះអង្គ គឺទាស់នឹងព្រះអង្គតែមួយគត់
ដ្បិតទូលបង្គំបានប្រព្រឹត្តអំពើមួយ
ដែលព្រះអង្គចាត់ទុកថាជាអំពើអាក្រក់។
ទោះបីព្រះអង្គកាត់ទោសទូលបង្គំយ៉ាងណាក្តី
ក៏ព្រះអង្គនៅតែសុចរិត
ហើយទោះបីព្រះអង្គធ្វើទោសទូលបង្គំយ៉ាងណាក្តី
ក៏ព្រះអង្គនៅតែឥតកំហុសដដែល។
៧ ទូលបង្គំមានកំហុសតាំងពីកំណើតមក
ហើយទូលបង្គំមានបាបតាំងពី
នៅក្នុងផ្ទៃម្ដាយមកម៉្លេះ!
៨ ក៏ប៉ុន្តែ ព្រះអង្គសព្វព្រះហឫទ័យ
នឹងសេចក្ដីពិតនៅក្នុងជម្រៅចិត្តមនុស្ស។
សូមប្រោសប្រទានឲ្យទូលបង្គំ
មានប្រាជ្ញានៅក្នុងជម្រៅដួងចិត្តផង!
៩ សូមជម្រះទូលបង្គំ ដោយស្លឹកហ៊ីសុប*
នោះទូលបង្គំនឹងបានបរិសុទ្ធ
សូមលាងសំអាតទូលបង្គំ
នោះទូលបង្គំនឹងបានសជាងសំឡីទៅទៀត។
១០ សូមប្រាប់ឲ្យទូលបង្គំដឹងថា
ព្រះអង្គអត់ទោសទូលបង្គំហើយ
នោះទូលបង្គំមានអំណរសប្បាយ
ហើយចិត្តសោកសង្រេងរបស់ទូលបង្គំ
នឹងបានរីករាយឡើងវិញ។
១១ ព្រះអង្គអើយ សូមកុំទតមើល
អំពើបាបរបស់ទូលបង្គំឡើយ
តែសូមលុបបំបាត់កំហុសទាំងប៉ុន្មាន
របស់ទូលបង្គំទៅ។
១២ ឱព្រះជាម្ចាស់អើយ!
សូមប្រោសប្រទានឲ្យទូលបង្គំមានចិត្តបរិសុទ្ធ
សូមប្រទានចិត្តគំនិតថ្មីដ៏រឹងប៉ឹងមកទូលបង្គំផង។
១៣ សូមកុំបោះបង់ទូលបង្គំឲ្យនៅឆ្ងាយពីព្រះអង្គ
សូមកុំដកព្រះវិញ្ញាណដ៏វិសុទ្ធ
របស់ព្រះអង្គចេញពីទូលបង្គំឡើយ។
១៤ សូមប្រោសប្រទានឲ្យទូលបង្គំមានអំណរ
ព្រោះតែព្រះអង្គសង្គ្រោះទូលបង្គំ
សូមគាំទ្រទូលបង្គំ
ដោយប្រទានឲ្យទូលបង្គំ
មានចិត្តទូលាយមកពីព្រះវិញ្ញាណ។
១៥ ទូលបង្គំនឹងប្រៀនប្រដៅមនុស្សពាលទាំងឡាយ
ឲ្យស្គាល់មាគ៌ារបស់ព្រះអង្គ
នោះពួកគេនឹងបែរចិត្តវិលមករកព្រះអង្គវិញ។
១៦ ឱព្រះជាម្ចាស់ជាព្រះសង្គ្រោះនៃទូលបង្គំ
សូមរំដោះទូលបង្គំឲ្យរួចពីស្លាប់
នោះទូលបង្គំនឹងប្រកាសអំពីសេចក្ដីសុចរិត
របស់ព្រះអង្គដោយអំណរ។
១៧ ព្រះអម្ចាស់អើយ
សូមជួយទូលបង្គំឲ្យបន្លឺសំឡេង
ពោលពាក្យសរសើរតម្កើងព្រះអង្គផង។
១៨ ព្រះអង្គមិនសព្វព្រះហឫទ័យ
ឲ្យទូលបង្គំថ្វាយយញ្ញបូជាទេ
ទោះបីតង្វាយដុតទាំងមូល
ក៏មិនគាប់ព្រះហឫទ័យព្រះអង្គដែរ។
១៩ យញ្ញបូជាដែលព្រះអង្គសព្វព្រះហឫទ័យ
ឲ្យទូលបង្គំថ្វាយ គឺចិត្តសោកស្តាយ
ព្រះអង្គតែងតែទទួលចិត្តសោកស្តាយ
និងចិត្តលែងមានអំនួត។
២០ ព្រះអម្ចាស់អើយ សូមប្រោសប្រណីក្រុងស៊ីយ៉ូន
ហើយសូមមេត្តាប្រទានឲ្យ
ក្រុងយេរូសាឡឹមបានរឹងមាំឡើងវិញផង។
២១ ពេលនោះ ព្រះអង្គមុខជាគាប់ព្រះហឫទ័យ
នឹងតង្វាយដែលស្របតាមវិន័យ*របស់ព្រះអង្គ
គឺតង្វាយដុតទាំងមូល
ហើយគេនឹងយកគោឈ្មោលមកថ្វាយ
នៅលើអាសនៈរបស់ព្រះអង្គដែរ។
៥២
អ្នកទុកចិត្តលើព្រះជាម្ចាស់ និងអ្នកទុកចិត្តលើទ្រព្យសម្បត្តិ
១ ទំនុកពីសៀវភៅរបស់គ្រូចម្រៀង។
ទំនុករបស់ស្តេចដាវីឌ។
២ នៅគ្រាដែលលោកដូអេក ជាជនជាតិអេដុម
ទៅទូលស្តេចសាអ៊ូលថា ស្តេចដាវីឌបាន
រត់ទៅជ្រកកោននឹងស្តេចអហ៊ីម៉ាឡេក។
៣ អ្នកខ្លាំងពូកែអើយ
ហេតុអ្វីបានជាអ្នកចេះតែអួត
ពីអំពើអាក្រក់របស់ខ្លួនដូច្នេះ?
ព្រះជាម្ចាស់មានព្រះហឫទ័យស្មោះស្ម័គ្រជានិច្ច!។
៤ រៀងរាល់ថ្ងៃ អ្នកតែងតែគិតគូរ
ចង់ប្រព្រឹត្តអំពើទុច្ចរិត
ពាក្យសម្ដីរបស់អ្នកមុតជាងកាំបិតកោរទៅទៀត
គឺប៉ិនប្រសប់ខាងបោកបញ្ឆោតណាស់។
៥ អ្នកចូលចិត្តការអាក្រក់ជាងការល្អ
ហើយចូលចិត្តកុហកជាងនិយាយការពិត។
៦ អ្នកចូលចិត្តប្រើពាក្យសម្ដីវាយប្រហារគេ
អ្វីៗដែលអ្នកពោលចេញមក
សុទ្ធតែអាស្រូវទាំងអស់។
៧ ហេតុនេះ ព្រះជាម្ចាស់នឹងបំផ្លាញ
អ្នករហូតតទៅជាមិនខាន
ព្រះអង្គនឹងដកហូតអ្នកចេញពីផ្ទះសំបែងរបស់ខ្លួន
ហើយព្រះអង្គនឹងយកអ្នកចេញ
ពីពិភពលោកដែលយើងរស់នៅនេះ។ - សម្រាក
៨ មនុស្សសុចរិតនឹងឃើញ
ហើយកោតខ្លាចទៀតផង
គេនាំគ្នាសើច ទាំងពោលថា:
៩ «មើលអ្នកនុ៎ះ!
គាត់ពុំបានយកព្រះជាម្ចាស់ជាទីពឹងទេ
គាត់ទុកចិត្តលើទ្រព្យសម្បត្តិស្តុកស្តម្ភរបស់ខ្លួន
ហើយស្មានថាខ្លួនខ្លាំងពូកែ មកពីមានល្បិច»។
១០ រីឯខ្ញុំវិញ ខ្ញុំស្ថិតនៅក្នុងព្រះដំណាក់
របស់ព្រះជាម្ចាស់
ប្រៀបដូចជាដើមអូលីវដែលមានស្លឹកខៀវខ្ចី
ខ្ញុំពឹងផ្អែកលើព្រះហឫទ័យមេត្តាករុណា
របស់ព្រះជាម្ចាស់រហូតតទៅ។
១១ ទូលបង្គំនឹងសរសើរតម្កើងព្រះអង្គជានិច្ច
ចំពោះកិច្ចការដែលព្រះអង្គបានធ្វើ
ទូលបង្គំសង្ឃឹមទុកចិត្តលើព្រះនាមព្រះអង្គ
នៅចំពោះមុខអស់អ្នកគោរពប្រណិប័តន៍ព្រះអង្គ
ព្រោះព្រះអង្គមានព្រះហឫទ័យល្អសប្បុរស។
៥៣
អ្នកជឿព្រះជាម្ចាស់ និងពិភពលោកដ៏អាក្រក់
១ ទំនុកពីសៀវភៅរបស់គ្រូចម្រៀង។
កំដរដោយខ្លុយ។ កំណាព្យរបស់ស្តេចដាវីឌ។
២ មនុស្សឥតគំនិតតែងតែរិះគិតថា
«គ្មានព្រះជាម្ចាស់ទេ»។
ពួកគេជាមនុស្សពាល
ហើយនាំគ្នាប្រព្រឹត្តអំពើព្រៃផ្សៃ
គឺគ្មាននរណាប្រព្រឹត្តអំពើល្អទាល់តែសោះ។
៣ ពីស្ថានបរមសុខ
ព្រះជាម្ចាស់ទតមើលមកមនុស្សលោក
ក្រែងលោមាននរណាម្នាក់មានប្រាជ្ញា
ស្វែងរកព្រះអង្គ។
៤ ក៏ប៉ុន្តែ ពួកគេសុទ្ធតែវង្វេងទាំងអស់គ្នា
ពួកគេរួមគ្នាប្រព្រឹត្តអំពើពុករលួយ
គ្មាននរណាប្រព្រឹត្តអំពើល្អទាល់តែសោះ
សូម្បីតែម្នាក់ក៏គ្មានផង។
៥ ព្រះជាម្ចាស់មានព្រះបន្ទូលថា
«តើអស់អ្នកដែលប្រព្រឹត្តអំពើទុច្ចរិត
ពិតជាមិនយល់អ្វីទាំងអស់ឬ?។
ពួកគេចិញ្ចឹមជីវិត
ដោយកេងប្រវ័ញ្ចប្រជារាស្ដ្ររបស់យើង
ហើយមិនដែលគោរពបម្រើយើងទាល់តែសោះ»។
៦ ទោះបីគ្មានមូលហេតុអ្វីគួរឲ្យភ័យខ្លាចក៏ដោយ
ក៏គេនាំគ្នាភ័យញាប់ញ័រដែរ
ដ្បិតព្រះជាម្ចាស់ធ្វើឲ្យខ្មាំងសត្រូវ
របស់ប្រជារាស្ដ្រព្រះអង្គស្លាប់ចោលឆ្អឹង
ពួកគេនឹងត្រូវអាម៉ាស់មុខ
ព្រោះព្រះជាម្ចាស់បានកម្ចាត់កម្ចាយពួកគេ។
៧ សូមឲ្យព្រះអង្គដែលគង់នៅក្រុងស៊ីយ៉ូន
សង្គ្រោះជនជាតិអ៊ីស្រាអែល!
ពេលព្រះជាម្ចាស់នាំប្រជារាស្ដ្ររបស់ព្រះអង្គ
ដែលជាឈ្លើយមកស្រុកវិញ
កូនចៅរបស់លោកយ៉ាកុប
នឹងបានត្រេកអរយ៉ាងខ្លាំង
ប្រជារាស្ដ្រអ៊ីស្រាអែលនឹងមានអំណរ
សប្បាយដ៏លើសលប់។
៥៤
សូមរកយុត្តិធម៌ឲ្យទូលបង្គំផង
១ ទំនុកពីសៀវភៅរបស់គ្រូចម្រៀង។
ប្រគំជាមួយតន្ដ្រីដែលមានខ្សែ។
កំណាព្យរបស់ស្តេចដាវីឌ
២ នៅពេលដែលជនជាតិស៊ីភមកទូលស្តេចសាអ៊ូលថា
ស្តេចដាវីឌនៅលាក់ខ្លួនជាមួយពួកគេ។
៣ ឱព្រះជាម្ចាស់អើយ
សូមសង្គ្រោះទូលបង្គំ
ដោយយល់ដល់ព្រះនាមរបស់ព្រះអង្គ
សូមរកយុត្តិធម៌ឲ្យទូលបង្គំ
ដោយយល់ដល់ឫទ្ធានុភាពរបស់ព្រះអង្គ។
៤ ឱព្រះជាម្ចាស់អើយ
សូមស្ដាប់ពាក្យទូលអង្វររបស់ទូលបង្គំ
សូមផ្ទៀងព្រះកាណ៌ស្ដាប់ពាក្យរបស់ទូលបង្គំផង
៥ ដ្បិតជនបរទេសលើកគ្នាប្រឆាំងនឹងទូលបង្គំ
មនុស្សឃោរឃៅចង់ដកជីវិតទូលបង្គំ
ចិត្តអ្នកទាំងនោះ
មិនរវីរវល់នឹងព្រះជាម្ចាស់ទេ។ - សម្រាក
៦ ក៏ប៉ុន្តែ ព្រះជាម្ចាស់នឹងសង្គ្រោះខ្ញុំ
ព្រះអម្ចាស់នឹងការពារជីវិតខ្ញុំ។
៧ ព្រះអង្គនឹងតបស្នងទៅខ្មាំងសត្រូវរបស់ខ្ញុំ
តាមអំពើដែលគេប្រព្រឹត្ត។
សូមកម្ទេចពួកគេឲ្យវិនាសសូន្យឈឹងទៅ
ដោយយល់ដល់ព្រះហឫទ័យស្មោះ
ត្រង់របស់ព្រះអង្គ!
៨ ទូលបង្គំនឹងថ្វាយយញ្ញបូជាចំពោះព្រះអង្គ
ដោយស្មោះអស់ពីចិត្ត
ឱព្រះអម្ចាស់អើយ
ទូលបង្គំនឹងលើកតម្កើងព្រះនាមព្រះអង្គ
ព្រោះព្រះអង្គមានព្រះហឫទ័យសប្បុរស។
៩ ព្រះអង្គបានរំដោះទូលបង្គំ
ឲ្យរួចផុតពីអាសន្នគ្រប់បែបយ៉ាង
ហើយទូលបង្គំនឹងឃើញខ្មាំងសត្រូវ
របស់ទូលបង្គំបរាជ័យ។
៥៥
ពាក្យអធិស្ឋានរបស់មនុស្សដែលត្រូវគេក្បត់ចិត្ត
១ ទំនុកពីសៀវភៅរបស់គ្រូចម្រៀង។
ប្រគំជាមួយតន្ដ្រីដែលមានខ្សែ។
កំណាព្យរបស់ស្តេចដាវីឌ។
២ ព្រះជាម្ចាស់អើយ!
សូមផ្ទៀងព្រះកាណ៌ស្ដាប់ពាក្យ
ទូលអង្វររបស់ទូលបង្គំ
សូមកុំលាក់ព្រះភ័ក្ត្រ
នៅពេលទូលបង្គំទទូចអង្វរព្រះអង្គ។
៣ សូមព្រះអង្គមេត្តាព្រះសណ្ដាប់ទូលបង្គំ
ហើយឆ្លើយតបមកទូលបង្គំវិញផង
ទូលបង្គំខ្វល់ខ្វាយ ទាំងតប់ប្រមល់
និងថប់បារម្ភជាខ្លាំង
៤ នៅពេលឮពាក្យសម្ដីរបស់ខ្មាំងសត្រូវ
និងមនុស្សពាលនាំគ្នាបៀតបៀនទូលបង្គំ។
ពួកគេធ្វើឲ្យទូលបង្គំរងទុក្ខវេទនា
គេនាំគ្នាប្រឆាំងនឹងទូលបង្គំដោយកំហឹង។
៥ ទូលបង្គំភ័យតក់ស្លុតជាខ្លាំង
ទូលបង្គំភ័យញាប់ញ័រ ខ្លាចស្លាប់
៦ ទូលបង្គំភ័យខ្លាច និងរន្ធត់ចិត្តជាខ្លាំង
ហើយទូលបង្គំព្រឺព្រួចក្នុងចិត្តពន់ប្រមាណ។
៧ ទូលបង្គំគិតថា «ប្រសិនបើខ្ញុំមានស្លាបដូចព្រាប
នោះខ្ញុំនឹងហើរទៅរកកន្លែងមួយសម្រាប់ជ្រកកោន។
៨ ខ្ញុំនឹងហើរទៅយ៉ាងឆ្ងាយ
ខ្ញុំនឹងទៅពួននៅវាលរហោស្ថាន។ - សម្រាក
៩ ខ្ញុំនឹងភៀសខ្លួនទៅយ៉ាងឆាប់រហ័ស
គឺលឿនជាងខ្យល់ព្យុះសង្ឃរាទៅទៀត»។
១០ ព្រះអម្ចាស់អើយ! សូមកុំឲ្យខ្មាំងសត្រូវ
របស់ទូលបង្គំនិយាយស្ដាប់គ្នាបានឡើយ
ដ្បិតនៅក្នុងទីក្រុង ទូលបង្គំឃើញមានតែ
អំពើឃោរឃៅ និងការឈ្លោះប្រកែកគ្នា។
១១ ទាំងថ្ងៃទាំងយប់ នៅជុំវិញកំពែងក្រុង
ហើយនៅក្នុងទីក្រុង មានសុទ្ធតែអំពើទុច្ចរិត
និងអំពើពាល។
១២ នៅក្នុងទីក្រុង មានសុទ្ធតែឧក្រិដ្ឋកម្ម
ហើយនៅតាមទីផ្សារ មានសុទ្ធតែការជិះជាន់
និងការបោកប្រាស់។
១៣ អ្នកដែលបំបាក់មុខខ្ញុំ
មិនមែនជាខ្មាំងសត្រូវរបស់ខ្ញុំទេ
ប្រសិនបើជាខ្មាំងសត្រូវមែន
ខ្ញុំមុខជាទ្រាំទ្របានមិនខាន
ហើយអ្នកដែលវាយប្រហារខ្ញុំ
ក៏មិនមែនជាអ្នកស្អប់ខ្ញុំដែរ
ប្រសិនបើជាអ្នកដែលស្អប់ខ្ញុំមែន
ខ្ញុំមុខជាគេចខ្លួនមិនខាន
១៤ គឺអ្នកឯងទេតើ អ្នកធ្លាប់នៅជាមួយខ្ញុំ
ជាអ្នកជិតស្និទ្ធ និងជាមិត្តសម្លាញ់របស់ខ្ញុំ។
១៥ យើងធ្លាប់ស្និទ្ធស្នាលជាមួយគ្នា
យើងធ្លាប់ទៅថ្វាយបង្គំព្រះជាម្ចាស់ជាមួយគ្នា
ក្នុងព្រះដំណាក់របស់ព្រះអង្គ។
១៦ សូមឲ្យបច្ចាមិត្តរបស់ខ្ញុំត្រូវស្លាប់យ៉ាងទាន់ហន់
សូមឲ្យពួកគេធ្លាក់នរកទាំងរស់
ចិត្តគំនិតរបស់គេពោរពេញ
ទៅដោយអំពើអាក្រក់គ្រប់បែបយ៉ាង។
១៧ រីឯខ្ញុំវិញ ខ្ញុំស្រែកអង្វរព្រះជាម្ចាស់
ហើយព្រះអម្ចាស់នឹងសង្គ្រោះខ្ញុំ។
១៨ ខ្ញុំស្រែកថ្ងូរ និងទទូចអង្វរព្រះអង្គ
ទាំងព្រឹក ទាំងថ្ងៃត្រង់ ទាំងល្ងាច
ហើយព្រះអង្គព្រះអង្គព្រះសណ្ដាប់ពាក្យខ្ញុំ។
១៩ ទោះបីមានខ្មាំងសត្រូវលើកគ្នា
សន្ធឹកសន្ធាប់មកវាយប្រហារខ្ញុំក្តី
ក៏ព្រះអង្គរំដោះខ្ញុំឲ្យបានសុខសាន្តដែរ។
២០ ព្រះជាម្ចាស់គ្រងរាជ្យតាំងពីអស់កល្បរៀងមក
សូមព្រះអង្គស្ដាប់ពាក្យខ្ញុំ
ហើយបំបាក់មុខពួកគេទៅ - សម្រាក
អ្នកទាំងនោះមិនដូរគំនិតឡើយ គឺពួកគេមិន
គោរពកោតខ្លាចព្រះជាម្ចាស់ទាល់តែសោះ។
២១ អ្នកនោះតែងតែក្បត់នឹងមិត្តសម្លាញ់
ហើយរំលោភលើពាក្យសន្យារបស់ខ្លួនទៀតផង។
២២ ពាក្យសម្ដីរបស់គេផ្អែមជាងទឹកឃ្មុំទៅទៀត
តែចិត្តរបស់គេឃោរឃៅ
គិតតែពីធ្វើសឹកសង្គ្រាមប៉ុណ្ណោះ
ពាក្យសម្ដីរបស់គេទន់ភ្លន់ដូចសំពត់សូត្រ
តែមុតដូចមុខដាវ។
២៣ ចូរផ្ញើជីវិតលើព្រះអម្ចាស់
នោះព្រះអង្គនឹងជួយគាំទ្រអ្នកជាមិនខាន
ដ្បិតព្រះអង្គមិនដែលទុកឲ្យមនុស្សសុចរិត
ត្រូវបរាជ័យរហូតនោះទេ។
២៤ ឱព្រះជាម្ចាស់អើយ
សូមធ្វើឲ្យពួកគេធ្លាក់រណ្ដៅទៅ
ពួកនោះសុទ្ធតែជាឃាតក និងជនបោកប្រាស់
សូមកុំឲ្យពួកនោះអាចរស់
បានពាក់កណ្ដាលអាយុរបស់ខ្លួនឡើយ
ចំណែកឯទូលបង្គំវិញ
ទូលបង្គំទុកចិត្តលើព្រះអង្គហើយ។
៥៦
ខ្ញុំទុកចិត្តលើព្រះជាម្ចាស់ តើមនុស្សអាចធ្វើអ្វីខ្ញុំកើត?
១ ទំនុកពីសៀវភៅរបស់គ្រូចម្រៀង។
បទ «ព្រាបស្ងៀមស្ងាត់នៅស្រុកឆ្ងាយ»។
បទចម្រៀងរបស់ស្តេចដាវីឌ នៅគ្រាដែលជនជាតិ
ភីលីស្ទីនចាប់ព្រះអង្គនៅក្រុងកាដ។
២ ឱព្រះជាម្ចាស់អើយ
សូមអាណិតមេត្តាទូលបង្គំផង
ដ្បិតមានមនុស្សលើកគ្នាវាយប្រហារទូលបង្គំ
គេលើកគ្នាមកប្រយុទ្ធ
និងបៀតបៀនទូលបង្គំជារៀងរាល់ថ្ងៃ។
៣ ជារៀងរាល់ថ្ងៃ បច្ចាមិត្តរបស់ទូលបង្គំ
នាំគ្នាដេញវាយប្រហារទូលបង្គំ
ពួកគេវាយឫកខ្ពស់ ហើយគេមានគ្នាច្រើន
មកប្រយុទ្ធនឹងទូលបង្គំ។
៤ ឱព្រះជាម្ចាស់អើយ នៅថ្ងៃទូលបង្គំភ័យខ្លាច
ទូលបង្គំផ្ញើជីវិតលើព្រះអង្គ។
៥ ខ្ញុំសរសើរតម្កើងព្រះបន្ទូលសន្យារបស់ព្រះជាម្ចាស់
ខ្ញុំទុកចិត្តលើព្រះជាម្ចាស់
ហើយខ្ញុំនឹងមិនភ័យខ្លាចអ្វីឡើយ
តើមនុស្សដែលតែងតែស្លាប់
អាចធ្វើអ្វីខ្ញុំកើត?។
៦ ជារៀងរាល់ថ្ងៃ ពួកគេជេរប្រមាថ
ធ្វើឲ្យខ្ញុំឈឺចុកចាប់
គេតែងប៉ុនប៉ងធ្វើបាបខ្ញុំជានិច្ច។
៧ គេឃុបឃិតគ្នាចាំឃ្លាំមើល
និងតាមដានខ្ញុំ ដើម្បីរកឱកាសសម្លាប់ខ្ញុំ។
៨ ឱព្រះជាម្ចាស់អើយ!
សូមដាក់ទោសពួកគេ តាមអំពើអាក្រក់
ដែលពួកគេប្រព្រឹត្ត
សូមព្រះអង្គសម្ដែងព្រះពិរោធ
បង្ក្រាបប្រជាជនទាំងនោះ។
៩ ព្រះអង្គជ្រាបច្បាស់ថា ទូលបង្គំរងទុក្ខយ៉ាងណា
សូមត្រងទឹកភ្នែកទូលបង្គំទុក
ព្រះអង្គបានរាប់តំណក់ទឹកភ្នែកទាំងនោះ
ក្នុងបញ្ជីស្រាប់ហើយ។
១០ នៅថ្ងៃដែលខ្ញុំស្រែករកព្រះអង្គ
ខ្មាំងសត្រូវរបស់ខ្ញុំមុខជាដកខ្លួនថយ
ខ្ញុំដឹងច្បាស់ថាព្រះជាម្ចាស់ព្រះអង្គគង់នៅខាងខ្ញុំ។
១១ ខ្ញុំសរសើរតម្កើងព្រះបន្ទូលសន្យារបស់ព្រះជាម្ចាស់
ខ្ញុំសរសើរតម្កើងព្រះបន្ទូលរបស់ព្រះអម្ចាស់។
១២ ខ្ញុំទុកចិត្តលើព្រះជាម្ចាស់
ហើយខ្ញុំនឹងមិនភ័យខ្លាចអ្វីឡើយ
តើមនុស្សដែលតែងតែស្លាប់
អាចធ្វើអ្វីខ្ញុំបាន?។
១៣ ឱព្រះជាម្ចាស់អើយ! ទូលបង្គំត្រូវតែថ្វាយតង្វាយ
តាមពាក្យដែលទូលបង្គំបានបន់ស្រន់ព្រះអង្គ
ទូលបង្គំនឹងថ្វាយយញ្ញបូជាអរព្រះគុណព្រះអង្គ។
១៤ ដ្បិតព្រះអង្គបានរំដោះទូលបង្គំឲ្យរួចពីស្លាប់
ជើងទូលបង្គំនឹងមិនត្រូវជំពប់ដួលឡើយ
ហើយខ្ញុំនឹងដើរនៅចំពោះព្រះភ័ក្ត្រព្រះជាម្ចាស់
ក្រោមពន្លឺដែលបំភ្លឺមនុស្សលោក។
៥៧
ទូលបង្គំមកជ្រកកោនក្រោមម្លប់ព្រះបារមីរបស់ព្រះអង្គ
១ ទំនុកពីសៀវភៅរបស់គ្រូចម្រៀង។
បទ «សូមកុំបំផ្លាញ»។ ទំនុករបស់ស្តេចដាវីឌ
នៅគ្រាដែលស្ដេចភៀសព្រះអង្គចេញពីស្តេចសាអ៊ូល
ទៅពួននៅរូងភ្នំ។
២ សូមអាណិតមេត្តាទូលបង្គំ
ឱព្រះជាម្ចាស់អើយ
សូមអាណិតមេត្តាទូលបង្គំផង
ដ្បិតទូលបង្គំមកពឹងផ្អែកលើព្រះអង្គ ទូលបង្គំមក
ជ្រកកោនក្រោមម្លប់ព្រះបារមីរបស់ព្រះអង្គ
រហូតទាល់តែទុក្ខលំបាកនេះកន្លងផុតទៅ។
៣ ខ្ញុំបានស្រែករកព្រះដ៏ខ្ពង់ខ្ពស់បំផុត
គឺព្រះជាម្ចាស់ដែលប្រោសប្រទានមកខ្ញុំ
នូវអ្វីៗដែលខ្ញុំត្រូវការ។
៤ ពីស្ថានបរមសុខ
សូមព្រះអង្គប្រទានការសង្គ្រោះមកខ្ញុំ
សូមព្រះអង្គវាយប្រហារអស់អ្នក
ដែលបៀតបៀនខ្ញុំ - សម្រាក
សូមព្រះជាម្ចាស់សម្ដែងព្រះហឫទ័យមេត្តាករុណា
និងព្រះហឫទ័យស្មោះស្ម័គ្ររបស់ព្រះអង្គ។
៥ ខ្មាំងសត្រូវនាំគ្នាឡោមព័ទ្ធជុំវិញខ្ញុំ
អ្នកទាំងនោះប្រៀបបាននឹងសត្វសិង្ហ
ដែលប្រុងស៊ីសាច់មនុស្ស
ធ្មេញរបស់គេប្រៀបដូចជាលំពែង និងព្រួញ
អណ្ដាតរបស់គេជាដាវដ៏មុត។
៦ ឱព្រះជាម្ចាស់អើយ
សូមសម្ដែងភាពថ្កុំថ្កើងឧត្តុង្គឧត្ដម
របស់ព្រះអង្គនៅលើផ្ទៃមេឃ
ហើយសូមឲ្យសិរីរុងរឿង
របស់ព្រះអង្គភ្លឺចែងចាំងនៅលើផែនដីទាំងមូល។
៧ សត្រូវរបស់ទូលបង្គំនាំគ្នាដាក់អន្ទាក់ចាំចាប់
ទូលបង្គំ ធ្វើឲ្យទូលបង្គំព្រួយចិត្តជាខ្លាំង។
ពួកគេបានជីករណ្ដៅនៅពីមុខទូលបង្គំ
តែខ្លួនគេផ្ទាល់បានធ្លាក់ទៅក្នុងរណ្ដៅនោះ។ - សម្រាក
៨ ទូលបង្គំទុកចិត្តលើព្រះអង្គ ឱព្រះជាម្ចាស់អើយ
ទូលបង្គំទុកចិត្តលើព្រះអង្គទាំងស្រុង
ទូលបង្គំនឹងច្រៀង
ទូលបង្គំនឹងស្មូត្រទំនុកតម្កើង។
៩ ឱព្រលឹងខ្ញុំអើយ ចូរភ្ញាក់ឡើង!
ឱឃឹម និងពិណរបស់ខ្ញុំអើយ
ចូរបន្លឺសំឡេងឡើង
ខ្ញុំនឹងដាស់ព្រះអាទិត្យឲ្យរះ។
១០ ព្រះអម្ចាស់អើយ ទូលបង្គំនឹងលើកតម្កើង
ព្រះអង្គក្នុងចំណោមប្រជាជនទាំងឡាយ
ទូលបង្គំនឹងស្មូត្រទំនុកតម្កើងថ្វាយព្រះអង្គ
ក្នុងចំណោមប្រជាជាតិនានា
១១ ដ្បិតព្រះហឫទ័យមេត្តាករុណារបស់ព្រះអង្គ
ខ្ពស់រហូតដល់ផ្ទៃមេឃ
ហើយព្រះហឫទ័យស្មោះស្ម័គ្ររបស់ព្រះអង្គ
ខ្ពស់ដល់អាកាសវេហាស៍។
១២ ឱព្រះជាម្ចាស់អើយ សូមបង្ហាញភាពថ្កុំថ្កើង
ឧត្តុង្គឧត្ដមរបស់ព្រះអង្គនៅលើផ្ទៃមេឃ
ហើយសូមឲ្យសិរីរុងរឿងរបស់ព្រះអង្គ
ភ្លឺចែងចាំងនៅលើផែនដីទាំងមូល។
៥៨
ព្រះជាម្ចាស់ជាចៅក្រមនៅលើផែនដី
១ ទំនុកពីសៀវភៅរបស់គ្រូចម្រៀង។
បទ «សូមកុំបំផ្លាញ»។ ទំនុករបស់ស្តេចដាវីឌ។
២ ចៅក្រមទាំងឡាយអើយ ពេលកាត់ក្តី
តើអ្នករាល់គ្នានិយាយសេចក្ដីពិតឬ?
តើអ្នករាល់គ្នាកាត់ក្តីឲ្យមនុស្សលោក
ដោយយុត្តិធម៌ឬ?
៣ ទេ! ផ្ទុយទៅវិញ អ្នករាល់គ្នា
ប្រព្រឹត្តអំពើទុច្ចរិត ដោយចេតនា
អ្នករាល់គ្នាបានប្រព្រឹត្តអំពើឃោរឃៅ
រាលដាលនៅលើផែនដីនេះ។
៤ មនុស្សអាក្រក់មានចិត្តវៀចវេរ តាំងពីក្នុងផ្ទៃម្ដាយ
ហើយចេះកុហក និងវង្វេង
តាំងពីទើបកើតមកម៉្លេះ។
៥ គេមានពិសដូចពស់វែក
គេធ្វើថ្លង់ធ្វើមិនដឹងមិនឮដូចសត្វពស់
៦ ដែលមិនឮសំឡេងរបស់គ្រូអាលម្ពាយ
គឺទោះបីគ្រូនោះពូកែយ៉ាងណាក្តី។
៧ ឱព្រះជាម្ចាស់អើយ
សូមកាច់បំបាក់ធ្មេញរបស់ពួកគេ!
ព្រះអម្ចាស់អើយ
សូមបំបាក់ចង្កូមពួកសិង្ហទាំងនោះទៅ!
៨ សូមឲ្យអ្នកទាំងនោះរសាត់បាត់ទៅ
ដូចទឹកហូរឥតត្រឡប់
សូមឲ្យពួកគេបានរាបដូចជាស្មៅ
ដែលមនុស្សដើរជាន់។
៩ សូមឲ្យពួកគេប្រៀបដូចជាជន្លេន
ដែលវារទៅមុខ ហើយស្ងួតក្រៀមអស់ទៅ
សូមឲ្យពួកគេប្រៀបដូចជាកូនរលូត
ស្លាប់ទៅ ទាំងពុំឃើញពន្លឺ
១០ ព្រះជាម្ចាស់នឹងធ្វើឲ្យមនុស្ស
អាក្រក់វិនាសសូន្យទៅ
ដូចបន្លាដែលពុំទាន់ដុះចេញមកស្រួលបួលផង
ក៏ត្រូវខ្យល់កួចផាត់បាត់ទៅ គឺទោះបីនៅ
ខៀវស្រស់ក្តី ឬក្រៀមទៅហើយក្តី។
១១ រីឯមនុស្សសុចរិតវិញ គេនឹងរីករាយ
ដោយបានឃើញព្រះជាម្ចាស់
សងសឹកជំនួសពួកគេ
ហើយគេលាងជើងនៅក្នុងឈាម
របស់មនុស្សអាក្រក់។
១២ ពេលនោះ ប្រជាជនទាំងឡាយនាំគ្នាពោលថា:
ពិតមែនហើយ មនុស្សសុចរិតនឹងទទួលរង្វាន់
ពិតមែនហើយ មានព្រះជាម្ចាស់មួយព្រះអង្គ
ជំនុំជម្រះមនុស្សលោក។
៥៩
សូមរំដោះទូលបង្គំឲ្យរួចពីកណ្ដាប់ដៃរបស់ខ្មាំងសត្រូវ!
១ ទំនុកពីសៀវភៅរបស់គ្រូចម្រៀង។
បទ «សូមកុំបំផ្លាញ»។ ទំនុករបស់ស្តេចដាវីឌ។
នៅពេលដែលស្តេចសាអ៊ូលចាត់គេឲ្យទៅព័ទ្ធ
ដំណាក់ស្តេចដាវីឌ ដើម្បីធ្វើគុតព្រះអង្គ។
២ ព្រះនៃទូលបង្គំអើយ!
សូមរំដោះទូលបង្គំឲ្យរួចពីខ្មាំងសត្រូវ
របស់ទូលបង្គំផង
សូមការពារទូលបង្គំឲ្យរួចពីកណ្ដាប់ដៃ
របស់អស់អ្នកដែលប៉ុនប៉ងធ្វើបាបទូលបង្គំ។
៣ សូមរំដោះទូលបង្គំឲ្យរួចពីកណ្ដាប់ដៃ
របស់អស់អ្នកដែលប្រព្រឹត្តទុច្ចរិត
សូមសង្គ្រោះទូលបង្គំឲ្យរួចផុត
ពីមនុស្សស្រេកឈាម។
៤ ព្រះអម្ចាស់អើយ!
ទោះបីទូលបង្គំពុំបានប្រព្រឹត្តអ្វីខុស
ឬប្រព្រឹត្តអំពើបាបណាមួយក៏ដោយ
ក៏ពួកគេនាំគ្នាពួនស្ទាក់ចាំប្រហារជីវិតទូលបង្គំ
មនុស្សមានអំណាចឃុបឃិតគ្នា
ប្រឆាំងនឹងទូលបង្គំដែរ។
៥ ទោះបីទូលបង្គំគ្មានកំហុសអ្វីក៏ដោយ
ពួកគេខំរូតរះរៀបចំខ្លួនប្រឆាំងនឹងទូលបង្គំ
ឱព្រះអង្គអើយ សូមតើនឡើង
យាងមករកទូលបង្គំ
សូមទតមកទូលបង្គំផង។
៦ ឱព្រះជាអម្ចាស់អើយ
ព្រះអង្គជាព្រះនៃពិភពទាំងមូល
ព្រះអង្គជាព្រះនៃជនជាតិអ៊ីស្រាអែល
សូមតើនឡើង
ដាក់ទោសប្រជាជាតិទាំងអស់នោះ
សូមកុំប្រណីសន្ដោសពួកក្បត់ដ៏ទុច្ចរិត
ទាំងនោះឡើយ!។
- សម្រាក
៧ ពួកគេនាំគ្នាវិលមកវិញនៅពេលល្ងាច
ហើយនាំគ្នាលូដូចឆ្កែ
គេដើរក្រវែលជុំវិញទីក្រុង។
៨ មាត់របស់គេពោរពេញទៅដោយ
ពាក្យសម្ដីអាក្រក់
ពាក្យសម្ដីរបស់គេប្រៀបបាននឹងដាវ
គេគិតថា គ្មាននរណាស្ដាប់ឮទេ?
៩ ចំណែកឯព្រះអង្គវិញ ឱព្រះអម្ចាស់អើយ
ព្រះអង្គសើចចំអកឲ្យពួកគេ
ព្រះអង្គចំអកឲ្យប្រជាជាតិទាំងនោះ។
១០ ទូលបង្គំសម្លឹងមើលទៅព្រះអង្គ
ព្រោះព្រះអង្គជាកម្លាំងនៃទូលបង្គំ
ព្រះជាម្ចាស់ជាកំពែងការពារទូលបង្គំ។
១១ ព្រះរបស់ខ្ញុំដែលប្រកបដោយព្រះហឫទ័យ
មេត្តាករុណា ព្រះអង្គយាងមករកខ្ញុំ
ព្រះអង្គឲ្យខ្ញុំបានសប្បាយ
ដោយឃើញខ្មាំងសត្រូវបរាជ័យ។
១២ ឱព្រះអម្ចាស់ជាខែលការពារយើងខ្ញុំអើយ
សូមកុំប្រហារពួកគេឡើយ
ក្រែងលោប្រជាជនទូលបង្គំ
ភ្លេចអំពីជ័យជម្នះរបស់ព្រះអង្គ
តែសូមអង្រួន និងច្រានទំលាក់ពួកគេ
ដោយសារឫទ្ធានុភាពរបស់ព្រះអង្គ!។
១៣ ពេលហារមាត់និយាយ គេពោលចេញមក
សុទ្ធតែពាក្យសម្ដី
ពោរពេញទៅដោយអំពើបាប
ដូច្នេះ សូមឲ្យពួកគេជាប់អន្ទាក់
ដោយសារតែចិត្តអួតអាងរបស់ខ្លួន!
ដ្បិតពួកគេគិតតែពីជេរប្រទេចផ្តាសា
និងនិយាយកុហក។
១៤ សូមបំផ្លាញពួកគេ
ឲ្យវិនាសអន្តរាយយ៉ាងទាន់ហន់ទៅ
សូមបំផ្លាញពួកគេឲ្យវិនាសសូន្យទៅ!
ពេលនោះ មនុស្សគ្រប់ៗគ្នានឹងដឹងថា
ព្រះជាម្ចាស់គ្រប់គ្រងនៅស្រុកអ៊ីស្រាអែល
ហើយព្រះអង្គក៏គ្រប់គ្រង
រហូតដល់ស្រុកដាច់ស្រយាលនៃផែនដីដែរ។ - សម្រាក
១៥ ពួកគេនាំគ្នាវិលមកវិញនៅពេលល្ងាច
ហើយនាំគ្នាលូដូចឆ្កែ
គេដើរក្រវែលជុំវិញទីក្រុង។
១៦ ពួកគេដើរចុះដើរឡើង ស្វែងរកអាហារ
ក៏ប៉ុន្តែ គេនាំគ្នាគ្រហឹម ព្រោះស៊ីមិនឆ្អែត។
១៧ រីឯទូលបង្គំវិញ ទូលបង្គំច្រៀងសរសើរ
ព្រះចេស្ដារបស់ព្រះអង្គ
នៅពេលព្រឹក ទូលបង្គំថ្លែងពីព្រះហឫទ័យ
មេត្តាករុណារបស់ព្រះអង្គ
ដ្បិតព្រះអង្គជាកំពែងការពារទូលបង្គំ
និងជាជម្រកនៅពេលទូលបង្គំមានអាសន្ន។
១៨ ឱព្រះដ៏ជាកម្លាំងនៃទូលបង្គំអើយ
ទូលបង្គំនឹងស្មូត្រទំនុកតម្កើងថ្វាយព្រះអង្គ
ដ្បិតព្រះអង្គជាកំពែងការពារទូលបង្គំ
ជាព្រះដែលមានព្រះហឫទ័យ
មេត្តាករុណាទូលបង្គំ។
៦០
ពាក្យទូលអង្វររបស់ប្រជាជាតិក្រោយពេលបរាជ័យ
១ ទំនុកពីសៀវភៅរបស់គ្រូចម្រៀង។
បទ «ផ្កាម្លិះបន្ទាល់»។
បទចម្រៀងរបស់ស្តេចដាវីឌ សម្រាប់ប្រៀនប្រដៅ។
២ រំឭកពីគ្រាដែលស្ដេចធ្វើសឹកជាមួយ
ជនជាតិស៊ីរីនៅស្រុកមេសូប៉ូតាមី
និងជនជាតិស៊ីរីនៅស្រុកសូបា
ហើយនៅពេលដែលលោកយ៉ូអាប់
វិលមកពីច្បាំងឈ្នះទ័ពអេដុម
មួយម៉ឺនពីរពាន់នាក់ នៅវាលទំនាបអំបិល។
៣ ឱព្រះជាម្ចាស់អើយ
ព្រះអង្គបានបោះបង់ចោលយើងខ្ញុំ
ព្រះអង្គបានធ្វើឲ្យយើងខ្ញុំបាក់ទ័ព
ទោះបីព្រះអង្គព្រះអង្គព្រះពិរោធនឹងយើងខ្ញុំក៏ដោយ
ព្រះអង្គអើយ
សូមស្រោចស្រង់យើងខ្ញុំឡើងវិញផង។
៤ ព្រះអង្គបានធ្វើឲ្យផែនដីរញ្ជួយ
និងប្រេះចេញពីគ្នា
ឥឡូវនេះ សូមព្រះអង្គផ្សារភ្ជាប់ឡើងវិញផង
ព្រោះផែនដីកំពុងរង្គើ។
៥ ព្រះអង្គបានធ្វើឲ្យប្រជារាស្ដ្ររបស់ព្រះអង្គ
ជួបនឹងទុក្ខវេទនាដ៏សែនពិបាក
ព្រះអង្គបានដាក់ទោសយើងខ្ញុំ
ស្ទើរតែវង្វេងស្មារតី។
៦ ព្រះអង្គប្រទានទង់ជ័យជាសញ្ញាឲ្យអស់អ្នក
ដែលគោរពកោតខ្លាចព្រះអង្គ
អាចគេចផុតពីបរាជ័យ។ - សម្រាក
៧ សូមយាងមកសង្គ្រោះយើងខ្ញុំ
ដោយឫទ្ធិបារមីរបស់ព្រះអង្គ
សូមឆ្លើយតបនឹងយើងខ្ញុំផង
ដើម្បីឲ្យប្រជាជនជាទីស្រឡាញ់
របស់ព្រះអង្គបានរួចជីវិត។
៨ ព្រះជាម្ចាស់មានព្រះបន្ទូល
ពីទីសក្ការៈរបស់ព្រះអង្គមកថា:
«យើងនឹងយកជ័យជម្នះ
យើងនឹងបែងចែកស្រុកស៊ីគែម
យើងនឹងវាស់ជ្រលងភ្នំស៊ូកូត
ចែកប្រជារាស្ដ្ររបស់យើង។
៩ កាឡាតជាទឹកដីរបស់យើង
ហើយម៉ាណាសេក៏ជាទឹកដីរបស់យើងដែរ
អេប្រាអ៊ីមប្រៀបដូចជាមួកដែករបស់យើង
ហើយយូដាជាដំបងរាជ្យរបស់យើង។
១០ ទឹកដីម៉ូអាប់ជាកន្លែងដែលយើងលាងជើង
យើងបោះស្បែកជើងយើងលើទឹកដីអេដុម
ដើម្បីបញ្ជាក់ថាយើងជាម្ចាស់លើទឹកដីនេះ។
យើងនឹងស្រែកប្រកាសសង្គ្រាមប្រឆាំងនឹងស្រុកភីលីស្ទីន!»។
១១ តើនរណាអាចនាំខ្ញុំចូលទៅ
ក្នុងទីក្រុងដ៏មាំមួនបាន?
តើនរណាអាចនាំខ្ញុំចូលទៅស្រុកអេដុម?
១២ ឱព្រះជាម្ចាស់អើយ!
មានតែព្រះអង្គទេដែលអាចនាំយើងខ្ញុំ
ប៉ុន្តែ ព្រះអង្គបានបោះបង់ចោលយើងខ្ញុំ
ព្រះអង្គឈប់យាងទៅជាមួយ
កងទ័ពយើងខ្ញុំទៀតហើយ។
១៣ សូមជួយយើងខ្ញុំឲ្យប្រឆាំងតទល់
នឹងពួកសត្រូវផង
ដ្បិតការសង្គ្រោះមកពីមនុស្សលោក ឥតប្រយោជន៍អ្វីសោះ។
១៤ បើព្រះជាម្ចាស់គង់នៅជាមួយយើង
នោះយើងនឹងមានជ័យជម្នះ
ដ្បិតព្រះអង្គនឹងបង្ក្រាបបច្ចាមិត្ត
របស់យើងឲ្យរាប។
៦១
ទូលបង្គំចូលចិត្តរស់នៅក្នុងដំណាក់របស់ព្រះអង្គ
១ ទំនុកពីសៀវភៅរបស់គ្រូចម្រៀង។
ប្រគំជាមួយតន្ដ្រីដែលមានខ្សែ។ ទំនុករបស់ស្តេចដាវីឌ។
២ ព្រះជាម្ចាស់អើយ!
សូមព្រះអង្គព្រះសណ្ដាប់សម្រែក
ទូលអង្វររបស់ទូលបង្គំ
សូមយកព្រះហឫទ័យទុកដាក់
នឹងពាក្យអធិស្ឋានរបស់ទូលបង្គំផង!។
៣ ពេលទូលបង្គំនៅទីដាច់ស្រយាល
ហើយអស់សង្ឃឹម
ទូលបង្គំស្រែករកព្រះអង្គ
សូមដឹកនាំទូលបង្គំទៅកាន់ថ្មដា
ដែលទូលបង្គំមិនអាចទៅដល់ដោយខ្លួនឯង!។
៤ ព្រះអង្គជាទីជម្រករបស់ទូលបង្គំ
និងជាប៉មមួយដ៏រឹងមាំតទល់នឹងខ្មាំងសត្រូវ។
៥ ទូលបង្គំចង់រស់នៅក្នុងព្រះពន្លា
របស់ព្រះអង្គរហូតតទៅ
ទូលបង្គំនឹងជ្រកកោនក្រោមម្លប់
ព្រះបារមីរបស់ព្រះអង្គ។ - សម្រាក
៦ ឱព្រះជាម្ចាស់អើយ
ព្រះអង្គតែងតែព្រះសណ្ដាប់
ពាក្យអង្វររបស់ទូលបង្គំជានិច្ច
ព្រះអង្គប្រទានមកទូលបង្គំនូវមត៌ក
ដែលព្រះអង្គបម្រុងទុកសម្រាប់អស់អ្នក
ដែលគោរពកោតខ្លាចព្រះនាមព្រះអង្គ។
៧ សូមប្រទានឲ្យព្រះរាជា
មានព្រះជន្មាយុយឺនយូរ
សូមឲ្យព្រះជន្មាយុរបស់ព្រះរាជា
ស្ថិតនៅជាច្រើនតំណតរៀងទៅ!
៨ សូមឲ្យព្រះរាជាបានគ្រងរាជ្យ
នៅចំពោះព្រះភ័ក្ត្រព្រះជាម្ចាស់រហូតតទៅ!
ព្រះអម្ចាស់អើយ សូមថែរក្សាព្រះរាជា
ដោយព្រះហឫទ័យមេត្តាករុណា
ដ៏ស្មោះស្ម័គ្ររបស់ព្រះអង្គ!
៩ ទូលបង្គំនឹងស្មូត្រទំនុកតម្កើងសរសើរ
ព្រះនាមព្រះអង្គជារៀងរាល់ថ្ងៃ ឥតឈប់ឈរ
ស្របតាមពាក្យដែលទូលបង្គំ
បានសន្យាចំពោះព្រះអង្គ!។
៦២
នៅជិតព្រះអង្គ ខ្ញុំមានសេចក្ដីសុខសាន្ត
១ បទពីសៀវភៅរបស់គ្រូចម្រៀង។
សម្រាប់លោកយេឌូទូន។
ទំនុករបស់ស្តេចដាវីឌ។
២ មានតែនៅក្បែរព្រះជាម្ចាស់ទេ
ដែលចិត្តខ្ញុំបានស្ងប់
ព្រោះព្រះអង្គសង្គ្រោះខ្ញុំ។
៣ ព្រះអង្គតែមួយគត់ជាថ្មដា
ជាព្រះសង្គ្រោះខ្ញុំ
ព្រះអង្គជាកំពែងដ៏រឹងមាំ
ដូច្នេះ ខ្ញុំនឹងមិនត្រូវបរាជ័យឡើយ។
៤ តើអ្នករាល់គ្នាចោមរោមវាយប្រហារ
មនុស្សតែម្នាក់ដូច្នេះដល់កាលណា?
អ្នករាល់គ្នារកប្រហារជីវិតមនុស្ស
ដូចគេចង់រំលំកំពែងទ្រុឌទ្រោម
និងផ្តួលរបងដែលជិតរលំឬ?
៥ អ្នករាល់គ្នាចង់ឲ្យតែអ្នកនោះ
បាត់បង់យសស័ក្តិ អ្នករាល់គ្នាចូលចិត្តកុហក
មាត់អ្នករាល់គ្នាឲ្យពរ
តែចិត្តអ្នករាល់គ្នាបែរជាដាក់បណ្ដាសាវិញ។ - សម្រាក
៦ ពិតមែនហើយ មានតែនៅក្បែរព្រះជាម្ចាស់ទេ
ដែលចិត្តខ្ញុំបានស្ងប់
ដ្បិតព្រះអង្គជាទីសង្ឃឹមរបស់ខ្ញុំ។
៧ ព្រះអង្គតែមួយគត់ជាថ្មដា ជាព្រះសង្គ្រោះខ្ញុំ
ព្រះអង្គជាកំពែងដ៏រឹងមាំ
ដូច្នេះ ខ្ញុំនឹងមិនត្រូវបរាជ័យឡើយ។
៨ ការសង្គ្រោះ និងសិរីរុងរឿងរបស់ខ្ញុំ
ស្ថិតនៅលើព្រះជាម្ចាស់ទាំងស្រុង
ព្រះជាម្ចាស់ជាថ្មដាដ៏រឹងមាំ និងជាទីជម្រករបស់ខ្ញុំ។
៩ ប្រជាជនអើយ ចូរនាំគ្នាផ្ញើជីវិតលើព្រះអង្គ
គ្រប់ពេលវេលាទៅ
ចូរទូលថ្វាយព្រះអង្គ
ពីទុក្ខកង្វល់របស់អ្នករាល់គ្នា
ដ្បិតព្រះជាម្ចាស់ជាជម្រករបស់យើង។
១០ មនុស្សលោកប្រៀបបាននឹងមួយដង្ហើមប៉ុណ្ណោះ
មនុស្សលោកគ្មានតម្លៃអ្វីសោះ
ប្រសិនបើយើងថ្លឹងមនុស្សទាំងអស់លើជញ្ជីងមួយ
នោះស្រាលជាងមួយដង្ហើមទៅទៀត។
១១ មិនត្រូវទុកចិត្តលើអំពើហិង្សាឡើយ
ហើយកុំសង្ឃឹមលើការលួចប្លន់ដែរ។
ប្រសិនបើទ្រព្យសម្បត្តិអ្នករាល់គ្នា
កើនចំនួនច្រើនឡើង មិនត្រូវជំពាក់ចិត្តឡើយ។
១២ ខ្ញុំឮព្រះជាម្ចាស់មានព្រះបន្ទូល
មួយលើកជាពីរលើកថា
ឫទ្ធិអំណាចស្ថិតនៅលើព្រះអង្គទាំងអស់
១៣ ប៉ុន្តែ ព្រះអម្ចាស់អើយ
ព្រះអង្គប្រកបដោយព្រះហឫទ័យមេត្តាករុណា
ព្រះអង្គនឹងតបស្នងឲ្យមនុស្សម្នាក់ៗ
តាមអំពើដែលខ្លួនបានប្រព្រឹត្ត។
៦៣
ព្រះហឫទ័យមេត្តាករុណារបស់ព្រះអង្គ ប្រសើរលើសជីវិតទៅទៀត
១ ទំនុករបស់ស្តេចដាវីឌ
នៅគ្រាដែលព្រះអង្គគង់នៅវាលរហោស្ថានស្រុកយូដា។
២ ឱព្រះជាម្ចាស់អើយ!
ព្រះអង្គពិតជាព្រះនៃទូលបង្គំមែន
ទូលបង្គំស្វែងរកព្រះអង្គ
ទូលបង្គំចង់នៅក្បែរព្រះអង្គណាស់
ទូលបង្គំចង់នៅជាប់ជាមួយព្រះអង្គ
ដូចដីដ៏ស្ងួតបែកក្រហែងត្រូវការទឹក។
៣ ទូលបង្គំបានឃើញព្រះអង្គនៅក្នុងទីសក្ការៈ
ទូលបង្គំបានឃើញឫទ្ធានុភាព
និងសិរីរុងរឿងរបស់ព្រះអង្គ
៤ ដ្បិតព្រះហឫទ័យមេត្តាករុណារបស់ព្រះអង្គ
ប្រសើរលើសជីវិតទៅទៀត
ទូលបង្គំនឹងពោលពាក្យសរសើរតម្កើង
សិរីរុងរឿងព្រះអង្គ។
៥ ទូលបង្គំនឹងអរព្រះគុណព្រះអង្គ
អស់មួយជីវិតទូលបង្គំ
ហើយទូលបង្គំនឹងលើកដៃឡើង
ថ្វាយបង្គំព្រះនាមព្រះអង្គ។
៦ ទូលបង្គំនឹងបានសប្បាយ មានសុខដុមរមនា
ហើយទូលបង្គំនឹងបន្លឺសំឡេងឡើង
ច្រៀងសរសើរតម្កើងព្រះអង្គ។
៧ ពេលទូលបង្គំចូលដំណេក
ទូលបង្គំនឹកដល់ព្រះអង្គ
ហើយពេញមួយយប់ ទូលបង្គំរិះគិតអំពីព្រះអង្គ
៨ ដ្បិតព្រះអង្គជួយទូលបង្គំ
ទូលបង្គំច្រៀងយ៉ាងសប្បាយ
ក្រោមម្លប់បារមីព្រះអង្គ។
៩ ចិត្តគំនិតទូលបង្គំ នៅជាប់ជំពាក់នឹងព្រះអង្គជានិច្ច
ព្រះអង្គគាំទ្រទូលបង្គំ
ដោយព្រះចេស្ដារបស់ព្រះអង្គ។
១០ រីឯអស់អ្នកដែលស្វែងរកបំផ្លាញជីវិតទូលបង្គំ
សូមឲ្យគេធ្លាក់ទៅក្នុងរណ្ដៅដ៏ជ្រៅ។
១១ សូមឲ្យគេត្រូវស្លាប់ដោយមុខដាវ
សូមឲ្យគេបានទៅជាចំណីរបស់ចចក។
១២ ពេលនោះ ព្រះរាជានឹងមានអំណរ
ដោយព្រះនាមព្រះជាម្ចាស់
អ្នកណាស្បថក្នុងព្រះនាមព្រះជាម្ចាស់
អ្នកនោះនឹងលើកតម្កើងព្រះអង្គ
រីឯអ្នកដែលចូលចិត្តនិយាយកុហក
នឹងត្រូវបាត់មាត់សូន្យឈឹងទៅ។
៦៤
ព្រះអម្ចាស់ដាក់ទោសមនុស្សពោលពាក្យទុច្ចរិត
១ បទពីសៀវភៅរបស់គ្រូចម្រៀង។
ទំនុករបស់ស្តេចដាវីឌ។
២ ឱព្រះជាម្ចាស់អើយ
សូមព្រះអង្គព្រះសណ្ដាប់ទំនួញ
របស់ទូលបង្គំ!
ទូលបង្គំភ័យខ្លាចខ្មាំងសត្រូវណាស់
សូមការពារជីវិតទូលបង្គំផង!។
៣ សូមការពារទូលបង្គំឲ្យរួចផុត
ពីការឃុបឃិតរបស់មនុស្សអាក្រក់
និងឲ្យទូលបង្គំបានរួចផុត
ពីកណ្ដាប់ដៃរបស់ពួកមនុស្សពាល។
៤ គេប្រើពាក្យសម្ដី ដូចដាវដ៏មុត
ពួកគេចោលពាក្យសម្ដី ដូចគេចោលលំពែង។
៥ ពួកគេលួចប្រហារមនុស្សទៀងត្រង់
គឺគេប្រហារមិនឲ្យដឹងខ្លួន
ហើយពួកគេមិនខ្លាចក្រែងអ្វីឡើយ។
៦ ពួកគេនិយាយលើកទឹកចិត្តគ្នា
ឲ្យប្រព្រឹត្តអំពើអាក្រក់
ពួកគេគិតគ្នាពីការលបដាក់អន្ទាក់
ចាំចាប់អ្នកដទៃ ទាំងពោលថា
«គ្មាននរណាឃើញទេ!»។
៧ គេនាំគ្នាបង្កអំពើទុច្ចរិត ទាំងពោលថា៖
«ឥឡូវនេះ យើងរៀបចំផែនការ
របស់យើងយ៉ាងល្អរួចរាល់ហើយ!»។
គ្មាននរណាអាចយល់គំនិតអប្រិយ
នៅក្នុងជម្រៅចិត្តរបស់មនុស្សបានទេ!
៨ ប៉ុន្តែ ព្រះជាម្ចាស់នឹងប្រហារពួកគេ
ដោយមិនឲ្យដឹងខ្លួនជាមុន
ពួកគេក៏របួសដួល។
៩ ពាក្យសម្ដីរបស់ពួកគេបានធ្វើឲ្យខ្លួនវិនាស
អស់អ្នកដែលឃើញពួកគេ នឹងនាំគ្នាគ្រវីក្បាល។
១០ មនុស្សលោកទាំងអស់នឹងនាំគ្នាកោតស្ញប់ស្ញែង
គេប្រកាសពីស្នាព្រះហស្ដរបស់ព្រះអង្គ
គេយល់អំពីកិច្ចការដែលព្រះអង្គបានធ្វើ។
១១ សូមឲ្យមនុស្សសុចរិតមានអំណរសប្បាយ
ដោយសារព្រះអម្ចាស់
ហើយនាំគ្នាមកជ្រកកោនជាមួយព្រះអង្គ
សូមឲ្យអស់អ្នកដែលមានចិត្តទៀងត្រង់
លើកតម្កើងព្រះអង្គ។
៦៥
ព្រះជាម្ចាស់អើយ យើងខ្ញុំត្រូវតែសរសើរតម្កើងព្រះអង្គ
១ បទពីសៀវភៅរបស់គ្រូចម្រៀង។
ទំនុករបស់ស្តេចដាវីឌ។ ចម្រៀងតម្កើងព្រះជាម្ចាស់។
២ ឱព្រះជាម្ចាស់អើយ
យើងខ្ញុំត្រូវតែសរសើរតម្កើងព្រះអង្គ
នៅក្រុងស៊ីយ៉ូន
ហើយថ្វាយតង្វាយ តាមពាក្យដែលយើងខ្ញុំ
បានសន្យាចំពោះព្រះអង្គ។
៣ ព្រះអង្គតែងតែស្ដាប់ពាក្យទូលអង្វរ
របស់មនុស្សលោកជានិច្ច
ពួកគេនឹងមករកព្រះអង្គទាំងអស់គ្នា។
៤ កំហុសរបស់ទូលបង្គំធ្ងន់ធ្ងរណាស់
មានតែព្រះអង្គទេ
ដែលលើកលែងទោសឲ្យយើងខ្ញុំបាន។
៥ មានសុភមង្គលហើយអស់អ្នក
ដែលព្រះអង្គជ្រើសរើស
ហើយនាំចូលមករស់នៅក្នុងទីសក្ការៈរបស់ព្រះអង្គ។
យើងខ្ញុំនឹងស្កប់ចិត្តដោយបានទទួលព្រះពរ
នៅក្នុងព្រះដំណាក់របស់ព្រះអង្គ
គឺនៅក្នុងព្រះវិហារដ៏វិសុទ្ធរបស់ព្រះអង្គ។
៦ ឱព្រះជាម្ចាស់ជាព្រះសង្គ្រោះយើងខ្ញុំអើយ
ព្រះអង្គប្រកបដោយសេចក្ដីសុចរិត
ព្រះអង្គបានឆ្លើយតបមកយើងខ្ញុំ
ដោយសម្ដែងឫទ្ធិបារមីគួរឲ្យស្ញែងខ្លាច
ប្រជាជននានាដែលរស់នៅទីឆ្ងាយដាច់ស្រយាល
នៃផែនដី និងនៅខាងនាយសមុទ្រ
នឹងនាំគ្នាផ្ញើជីវិតលើព្រះអង្គ!
៧ ព្រះអង្គបានពង្រឹងភ្នំទាំងឡាយឲ្យរឹងមាំ
ដោយសារព្រះចេស្ដារបស់ព្រះអង្គ
ព្រះអង្គប្រកបទៅដោយឫទ្ធានុភាព។
៨ ព្រះអង្គបានធ្វើឲ្យសន្ធឹករលកសមុទ្រ
ដ៏គគ្រឹកគគ្រេងបានស្ងប់ឈឹង
ព្រះអង្គក៏បានធ្វើឲ្យសំឡេង
ដ៏អឺងកងរបស់ប្រជាជន
ទាំងឡាយបានស្ងប់ស្ងៀមដែរ។
៩ អស់អ្នកដែលរស់នៅទីដាច់ស្រយាល
នៃផែនដីនឹងនាំគ្នាស្ញែងខ្លាច
ដោយឃើញទីសម្គាល់ដ៏អស្ចារ្យរបស់ព្រះអង្គ
ព្រះអង្គបានធ្វើឲ្យប្រជាជន
ដែលរស់នៅទិសខាងកើត និងទិសខាងលិច
មានអំណរសប្បាយដ៏លើសលប់។
១០ ព្រះអង្គថែទាំផែនដី
ដោយប្រទានឲ្យផែនដីមានទឹកដ៏បរិបូណ៌
ព្រះអង្គប្រទានឲ្យផែនដីមានភោគផល
ដ៏សម្បូណ៌ហូរហៀរ
ជ្រលងដងអូរបស់ព្រះអង្គ
មានពោរពេញទៅដោយទឹក
ព្រះអង្គប្រទានស្រូវឲ្យមនុស្សលោក
ដោយរៀបចំដូចតទៅនេះ
១១ គឺព្រះអង្គស្រោចស្រពស្រែចម្ការ
ព្រះអង្គធ្វើឲ្យដីដាំដំណាំបានរាបស្មើ
ព្រះអង្គបានធ្វើឲ្យទឹកភ្លៀង
ដក់នៅតាមវាលស្រែ
ហើយព្រះអង្គប្រទានពរឲ្យគ្រាប់ពូជ
ទាំងឡាយដុះឡើង។
១២ នៅរដូវចម្រូត ព្រះអង្គប្រទានស្រូវ
ដែលជាព្រះអំណោយទានដ៏សប្បុរសបំផុត។
ទីណាដែលព្រះអង្គយាងទៅ
ទីនោះមានភោគផលដ៏ហូរហៀរ។
១៣ រីឯនៅវាលរហោស្ថាន ក៏មានស្មៅដ៏បរិបូណ៌
ហើយនៅតាមភ្នំនានា
ក៏មានពោរពេញទៅដោយអំណរដែរ។
១៤ វាលស្មៅពោរពេញទៅដោយហ្វូងចៀម
ជ្រលងភ្នំពោរពេញទៅដោយស្រូវ
អ្វីៗសព្វសារពើបន្លឺសំឡេងច្រៀងឡើង
ដោយអំណរដ៏លើសលប់!។
៦៦
ព្រះជាម្ចាស់បានរំដោះយើង
១ បទពីសៀវភៅរបស់គ្រូចម្រៀង។
ចម្រៀងតម្កើងព្រះជាម្ចាស់។ ទំនុកតម្កើង។
ប្រជាជននៅផែនដីទាំងមូលអើយ
ចូរនាំគ្នាស្រែកជយឃោស
ថ្វាយព្រះជាម្ចាស់!
២ ចូរស្មូត្រទំនុកតម្កើង
ថ្វាយសិរីរុងរឿងព្រះនាមព្រះអង្គ
ចូរនាំគ្នាសរសើរ លើកតម្កើងសិរីរុងរឿង
របស់ព្រះអង្គ!
៣ ចូរទូលព្រះអង្គថា: ព្រះជាម្ចាស់អើយ
ស្នាព្រះហស្ដរបស់ព្រះអង្គ
គួរឲ្យស្ញែងខ្លាចណាស់!
ពួកខ្មាំងសត្រូវរបស់ព្រះអង្គនាំគ្នាលុតក្រាប
ដោយឃើញព្រះចេស្ដាដ៏ធំធេងរបស់ព្រះអង្គ។
៤ មនុស្សម្នានៅផែនដីទាំងមូល
ក្រាបថ្វាយបង្គំព្រះអង្គ
ហើយនាំគ្នាស្មូត្រទំនុកតម្កើងព្រះអង្គ
គេស្មូត្រទំនុកតម្កើងថ្វាយព្រះនាមព្រះអង្គ។ - សម្រាក
៥ ចូរនាំគ្នាមករំពៃមើលស្នាព្រះហស្ដ
របស់ព្រះជាម្ចាស់!
កិច្ចការដែលព្រះអង្គធ្វើចំពោះមនុស្សលោក
គួរឲ្យស្ញែងខ្លាចណាស់។
៦ ព្រះអង្គបានធ្វើឲ្យទឹកសមុទ្ររីង
ទៅជាដីគោក ដើម្បីឲ្យប្រជាជនដើរឆ្លង។
ដោយព្រះអង្គធ្វើការដ៏អស្ចារ្យនោះ
យើងមានអំណរសប្បាយយ៉ាងខ្លាំង។
៧ ព្រះអង្គគ្រងរាជ្យអស់កល្បជានិច្ច
ដោយសារឫទ្ធានុភាពរបស់ព្រះអង្គ
ព្រះអង្គពិនិត្យមើលប្រជាជាតិទាំងឡាយ
ដើម្បីកុំឲ្យពួកបះបោរ
អាចក្រោកឡើងបានឡើយ! - សម្រាក
៨ ប្រជាជនទាំងឡាយអើយ
ចូរនាំគ្នាសរសើរតម្កើងព្រះនៃយើង
ចូរបន្លឺសំឡេងសរសើរតម្កើងព្រះអង្គ!
៩ ព្រះអង្គប្រទានឲ្យយើងមានជីវិត
ហើយព្រះអង្គមិនបណ្តោយ
ឲ្យយើងភ្លាត់ដួលឡើយ។
១០ ឱព្រះជាម្ចាស់អើយ!
ព្រះអង្គបានល្បងលមើលចិត្តយើងខ្ញុំ
ព្រះអង្គបានលត់ដំយើងខ្ញុំ ដូចគេបន្សុទ្ធប្រាក់។
១១ ព្រះអង្គបាននាំយើងខ្ញុំឲ្យជួបនឹងទុក្ខលំបាក
ព្រះអង្គបានធ្វើឲ្យយើងខ្ញុំវេទនាជាច្រើនដែរ។
១២ ព្រះអង្គបណ្តោយឲ្យសត្រូវ
បំបោលសេះពីលើក្បាលយើងខ្ញុំ
យើងខ្ញុំបានឆ្លងកាត់ភ្លើង ឆ្លងកាត់ទឹក
ប៉ុន្តែ ព្រះអង្គបាននាំយើងខ្ញុំឲ្យចេញរួច
ហើយប្រទានឲ្យយើងខ្ញុំ
បានសម្បូណ៌ហូរហៀរ។
១៣ ទូលបង្គំចូលមកក្នុងព្រះដំណាក់របស់ព្រះអង្គ
ទាំងនាំតង្វាយដុតយកមកថ្វាយព្រះអង្គ
ដូចទូលបង្គំបានសន្យា
១៤ គឺស្របតាមពាក្យដែលទូលបង្គំ
បានទូលព្រះអង្គ នៅពេលមានអាសន្ន។
១៥ ទូលបង្គំយកសត្វដ៏ធាត់ៗ គឺពពែឈ្មោល
គោឈ្មោល និងចៀមឈ្មោល
មកថ្វាយជាតង្វាយ
ហើយក្លិននៃយញ្ញបូជានេះសាយភាយ
ឡើងទៅកាន់ព្រះអង្គ។
- សម្រាក
១៦ អ្នកទាំងអស់គ្នាដែលគោរពកោតខ្លាច
ព្រះជាម្ចាស់អើយ សូមអញ្ជើញមកស្ដាប់
ខ្ញុំនឹងរៀបរាប់អំពីកិច្ចការ
ដែលព្រះអង្គបានធ្វើចំពោះខ្ញុំ។
១៧ ខ្ញុំបានស្រែកអង្វររកព្រះអង្គ
ទាំងពោលពាក្យលើកតម្កើងព្រះអង្គទៀតផង
១៨ ប្រសិនបើខ្ញុំមានគំនិតទុច្ចរិត
ព្រះអម្ចាស់មុខជាមិនស្ដាប់ខ្ញុំឡើយ
១៩ ប៉ុន្តែ ព្រះជាម្ចាស់ស្ដាប់ពាក្យខ្ញុំ
ព្រះអង្គយកព្រះហឫទ័យទុកដាក់
នឹងសម្រែកទូលអង្វររបស់ខ្ញុំ
២០ សូមលើកតម្កើងព្រះអង្គ ព្រោះព្រះអង្គពុំបាន
បដិសេធពាក្យទូលអង្វររបស់ខ្ញុំទេ
ហើយព្រះអង្គមានព្រះហឫទ័យ
មេត្តាករុណាចំពោះខ្ញុំជានិច្ច!។
៦៧
សូមឲ្យប្រជាជនទាំងឡាយនាំគ្នាលើកតម្កើងព្រះជាម្ចាស់
១ បទពីសៀវភៅរបស់គ្រូចម្រៀង។
ប្រគំជាមួយតូរ្យតន្ដ្រីដែលមានខ្សែ។
ទំនុកតម្កើង។ ចម្រៀងតម្កើងព្រះជាម្ចាស់។
២ ឱព្រះជាម្ចាស់អើយ
សូមប្រណីសន្ដោសយើងខ្ញុំ
សូមប្រទានពរដល់យើងខ្ញុំ
សូមទតមកយើងខ្ញុំ
ដោយព្រះហឫទ័យសប្បុរសផង!- សម្រាក
៣ ដូច្នេះ មនុស្សនៅលើផែនដី
នឹងស្គាល់មាគ៌ារបស់ព្រះអង្គ
ហើយក្នុងចំណោមប្រជាជាតិទាំងឡាយ
គេនឹងស្គាល់ការសង្គ្រោះរបស់ព្រះអង្គ!
៤ ឱព្រះជាម្ចាស់អើយ សូមឲ្យប្រជាជន
ទាំងឡាយនាំគ្នាលើកតម្កើងព្រះអង្គ
សូមឲ្យប្រជាជនទាំងអស់រួមគ្នា
លើកតម្កើងព្រះអង្គ!
៥ មហាជននាំគ្នាសប្បាយរីករាយ
នាំគ្នាស្រែកជយឃោស
ដ្បិតព្រះអង្គគ្រប់គ្រងប្រជារាស្ដ្រនានា
ដោយយុត្តិធម៌
ហើយព្រះអង្គដឹកនាំមហាជនទាំងឡាយ
នៅលើផែនដី។ - សម្រាក
៦ ឱព្រះជាម្ចាស់អើយ
សូមឲ្យប្រជាជនទាំងឡាយ
នាំគ្នាលើកតម្កើងព្រះអង្គ
សូមឲ្យប្រជាជនទាំងអស់រួមគ្នា
លើកតម្កើងព្រះអង្គ!
៧ ផែនដីបានបង្កើតភោគផល
ព្រោះព្រះជាម្ចាស់ជាព្រះនៃយើង
បានប្រទានពរឲ្យយើង។
៨ សូមព្រះជាម្ចាស់ប្រទានពរឲ្យយើង
សូមឲ្យប្រជាជនទាំងប៉ុន្មាន
ដែលរស់នៅទីដាច់ស្រយាលនៃផែនដី
គោរពកោតខ្លាចព្រះអង្គ!
៦៨
បទតម្កើងព្រះជាម្ចាស់ដ៏មានជ័យជម្នះ
១ បទពីសៀវភៅរបស់គ្រូចម្រៀង។
ទំនុករបស់ស្តេចដាវីឌ។
ចម្រៀងតម្កើងព្រះជាម្ចាស់។
២ ពេលព្រះជាម្ចាស់ក្រោកឡើង
ខ្មាំងសត្រូវរបស់ព្រះអង្គបាក់ទ័ព
ហើយអស់អ្នកដែលស្អប់ព្រះអង្គ
នឹងនាំគ្នារត់ចេញពីព្រះភ័ក្ត្ររបស់ព្រះអង្គ។
៣ ព្រះអង្គនឹងធ្វើឲ្យពួកគេ
រលាយសូន្យទៅដូចជាផ្សែង
ហើយមនុស្សអាក្រក់នឹងរលាយសូន្យ
បាត់ពីព្រះភ័ក្ត្រព្រះអង្គ ដូចក្រមួនត្រូវថ្ងៃ។
៤ រីឯមនុស្សសុចរិតវិញនឹងបានរីករាយ
គេនឹងអរសប្បាយឥតឧបមា
នៅចំពោះព្រះភ័ក្ត្រព្រះជាម្ចាស់
គេមានអំណរសប្បាយយ៉ាងខ្លាំង។
៥ ចូរច្រៀងតម្កើងព្រះជាម្ចាស់
ចូរស្មូត្រទំនុកតម្កើងព្រះនាមព្រះអង្គ!
ចូរត្រួសត្រាយផ្លូវថ្វាយព្រះអង្គ
ដែលជិះសេះកាត់អាកាសវេហាស៍!
ព្រះអង្គមានព្រះនាមថា ព្រះអម្ចាស់។
ចូរនាំគ្នាអរសប្បាយឥតឧបមា
នៅចំពោះព្រះភ័ក្ត្រព្រះអង្គ!
៦ ព្រះជាម្ចាស់ដែលគង់នៅក្នុងព្រះដំណាក់ដ៏វិសុទ្ធ*
ព្រះអង្គជាឪពុករបស់ក្មេងកំព្រា
ព្រះអង្គរកយុត្តិធម៌ឲ្យស្ត្រីមេម៉ាយ។
៧ ព្រះជាម្ចាស់ប្រទានគ្រួសារឲ្យមនុស្សឯកោ
ព្រះអង្គនាំអ្នកជាប់ឃុំឃាំង
ឲ្យមានសេរីភាពពេញទី
រីឯជនបះបោរវិញ
គេនឹងទៅរស់នៅក្នុងទីហួតហែង។
៨ បពិត្រព្រះជាម្ចាស់
ពេលព្រះអង្គនាំមុខប្រជារាស្ដ្ររបស់ព្រះអង្គ
ពេលព្រះអង្គយាងនៅវាលរហោស្ថាន - សម្រាក
៩ ផែនដីរញ្ជួយ ផ្ទៃមេឃក៏បង្អុរភ្លៀងចុះមកយ៉ាងខ្លាំង
នៅចំពោះព្រះភ័ក្ត្រព្រះជាម្ចាស់
ជាព្រះរបស់អ៊ីស្រាអែល
ដូចគ្រានៅភ្នំស៊ីណៃដែរ។
១០ ឱព្រះជាម្ចាស់អើយ!
ព្រះអង្គបានប្រោសប្រទានភ្លៀងដ៏ត្រជាក់ត្រជុំ
មកលើទឹកដីដ៏ហួតហែងរបស់ព្រះអង្គ
ដើម្បីឲ្យប្រជារាស្ដ្ររបស់ព្រះអង្គ
បានរស់រានឡើងវិញ។
១១ ប្រជារាស្ដ្ររបស់ព្រះអង្គបានតាំងទីលំនៅ
លើទឹកដីនោះ
ដោយព្រះអង្គសម្ដែងព្រះហឫទ័យសប្បុរស
ចំពោះពួកគេដែលជាជនកំសត់ទុរគត។
១២ ពេលព្រះអម្ចាស់ចេញបញ្ជា
ពួកស្ត្រីដែលប្រៀបបាននឹងកងទ័ពមួយយ៉ាងធំ
នាំគ្នាចេញទៅប្រកាសដំណឹងថា:
១៣ ស្តេចនានាបាក់ទ័ពរត់
ទៅជាមួយពលទាហានរបស់ខ្លួន។
ស្ត្រីៗដែលនៅក្នុងផ្ទះនាំគ្នាចែកជ័យភ័ណ្ឌ។
១៤ រីឯអ្នករាល់គ្នា ហេតុអ្វីបានជាអ្នករាល់គ្នា
នៅសម្រាកក្នុងជំរំដូច្នេះទៅវិញ?
មើល៍! សូម្បីតែសត្វព្រាបក៏មានប្រាក់
ជាប់ពេញស្លាបវាដែរ
ហើយរោមវាចាំងចែងទៅដោយមាស។
១៥ នៅពេលព្រះដ៏មានឫទ្ធានុភាពខ្ពង់ខ្ពស់បំផុត
ធ្វើឲ្យស្តេចនានាបាក់ទ័ព
នោះក៏មានព្រឹលធ្លាក់មកលើភ្នំសាលម៉ូនដែរ។
១៦ ភ្នំបាសានជាភ្នំដ៏សក្ការៈមួយ
ភ្នំបាសានជាភ្នំដែលមានកំពូលយ៉ាងច្រើន។
១៧ ហេតុអ្វីបានជាភ្នំដែលមានកំពូលច្រើន
ច្រណែននឹងភ្នំដែលព្រះជាម្ចាស់ជ្រើសរើស
សម្រាប់គង់នៅ?
ពិតមែនហើយ
ព្រះអម្ចាស់នឹងគង់នៅលើភ្នំនេះរហូតតទៅ។
១៨ ទ័ពសេះរបស់ព្រះជាម្ចាស់
មានចំនួនរាប់លានរាប់កោដិ
ព្រះអង្គគង់ជាមួយពួកគេនៅភ្នំស៊ីណៃ
ជាទីសក្ការៈរបស់ព្រះអង្គ។
១៩ ព្រះអង្គយាងឡើងទៅស្ថានខ្ពស់
ទាំងនាំអ្នកទោសទៅជាមួយ
ព្រះអង្គបានទទួលតង្វាយផ្សេងៗពីមនុស្សលោក
សូម្បីតែមនុស្សប្រឆាំងនឹងព្រះអង្គ
ក៏ព្រះអង្គទទួលពីគេដែរ
ហើយព្រះជាអម្ចាស់គង់នៅទីនោះ!។
២០ សូមសរសើរតម្កើងព្រះអម្ចាស់ជារៀងរាល់ថ្ងៃ
ដ្បិតព្រះអង្គតែងតែជួយគាំទ្រ
និងសង្គ្រោះយើង។ - សម្រាក
២១ ព្រះជាម្ចាស់ជាព្រះសង្គ្រោះរបស់យើង
ព្រះជាអម្ចាស់អាចជួយយើង
ឲ្យរួចផុតពីសេចក្ដីស្លាប់។
២២ ខ្មាំងសត្រូវទុកសក់វែង ដើម្បីធ្វើចម្បាំងសាសនា
ប៉ុន្តែ ព្រះជាម្ចាស់នឹងកម្ទេចក្បាល
របស់ជនទុច្ចរិតទាំងនោះ។
២៣ ព្រះអម្ចាស់មានព្រះបន្ទូលថា
«យើងនឹងនាំពួកគេពីភ្នំបាសាន
យើងនឹងនាំពួកគេឡើងពីបាតសមុទ្រមក
២៤ ដើម្បីឲ្យអ្នករាល់គ្នាដើរលុយក្នុងឈាម
របស់ពួកគេ ហើយឆ្កែនឹងនាំគ្នាលិទ្ធឈាម
របស់ខ្មាំងសត្រូវទាំងនោះដែរ»។
២៥ ឱព្រះជាម្ចាស់អើយ
មនុស្សម្នាបានឃើញក្បួនជ័យជម្នះរបស់ព្រះអង្គ
ក្បួនជ័យជម្នះរបស់ព្រះជាម្ចាស់
ជាព្រះមហាក្សត្ររបស់ខ្ញុំ ចូលទៅក្នុងទីសក្ការៈ
២៦ មានអ្នកចម្រៀងដើរនៅខាងមុខ
និងអ្នកភ្លេងដើរនៅខាងក្រោយ
ហើយនៅកណ្ដាលមានពួកយុវនារី
នាំគ្នាវាយក្រាប់។
២៧ ចូរសរសើរតម្កើងព្រះជាម្ចាស់នៅក្នុងអង្គប្រជុំ
សូមឲ្យអស់អ្នកដែលជាពូជពង្ស
របស់អ៊ីស្រាអែលនាំគ្នាសរសើរតម្កើងព្រះអង្គ!
២៨ គឺចាប់ពីកុលសម្ព័ន្ធបេនយ៉ាមីនដែលតូចជាងគេ
បន្ទាប់មក អ្នកដឹកនាំនៃកុលសម្ព័ន្ធយូដា
ដែលមានសម្លៀកបំពាក់យ៉ាងល្អប្រណីត
រួចហើយអ្នកដឹកនាំនៃកុលសម្ព័ន្ធសាប៊ូឡូន
និងកុលសម្ព័ន្ធណែបថាលី។
២៩ ព្រះជាម្ចាស់សព្វព្រះហឫទ័យ
ឲ្យអ្នកមានកម្លាំងខ្លាំងពូកែ។
ឱព្រះជាម្ចាស់អើយ
សូមបង្ហាញឫទ្ធានុភាពរបស់ព្រះអង្គ
ដូចព្រះអង្គតែងតែជួយយើងខ្ញុំ
៣០ ពីព្រះដំណាក់របស់ព្រះអង្គ
ដែលស្ថិតនៅលើក្រុងយេរូសាឡឹម
ជាកន្លែងដែលស្តេចនានា
នាំគ្នាយកតង្វាយមកថ្វាយព្រះអង្គ។
៣១ សូមព្រះអង្គគំរាមកំហែងស្រុកអេស៊ីប
ពួកគេជាសត្វធាតុរស់នៅតាមដើមត្រែង
ពួកគេជាមេដឹកនាំលើស្រុកនានា
ដូចហ្វូងគោឡើងក និងកូនរបស់វា។
ពួកគេនឹងមកចុះចូលព្រះអង្គ
ដោយយកប្រាក់មកជាតង្វាយ។
សូមធ្វើឲ្យជនជាតិទាំងនោះ
ដែលចូលចិត្តច្បាំងវិនាសខ្ចាត់ខ្ចាយទៅ។
៣២ ជនជាតិអេស៊ីបនឹងចាត់ទូតមក ជនជាតិអេត្យូពី
នឹងលើកដៃស្វែងរកព្រះជាម្ចាស់។
៣៣ នគរនានានៅលើផែនដីអើយ
ចូរច្រៀងតម្កើងព្រះជាម្ចាស់
ចូរប្រគំភ្លេងថ្វាយព្រះអង្គ។ - សម្រាក
៣៤ ព្រះអង្គគង់លើព្រះរាជរថឡើងខ្ពស់ជាងផ្ទៃមេឃ
ដ៏ស្ថិតស្ថេរអស់កល្បជានិច្ចទៅទៀត
ព្រះអង្គបន្លឺព្រះសូរសៀងយ៉ាងរន្ទឺខ្ទរខ្ទារ។
៣៥ ចូរប្រកាសថាព្រះជាម្ចាស់ប្រកបដោយឫទ្ធានុភាព
ព្រះអង្គគ្រងរាជ្យលើអ៊ីស្រាអែល
យ៉ាងថ្កុំថ្កើងរុងរឿង
អាកាសវេហាស៍សម្ដែង
អំពីឫទ្ធានុភាពរបស់ព្រះអង្គ។
៣៦ នៅក្នុងទីសក្ការៈរបស់ព្រះអង្គ
ឱព្រះជាម្ចាស់អើយ
ព្រះអង្គគួរឲ្យស្ញែងខ្លាចណាស់
ព្រះអង្គជាព្រះរបស់ជនជាតិអ៊ីស្រាអែល
ព្រះអង្គប្រទានឲ្យប្រជារាស្ដ្រ
របស់ព្រះអង្គមានកម្លាំង និងអំណាច
សូមសរសើរតម្កើងព្រះអង្គ!
៦៩
ទូលបង្គំស្រឡាញ់ព្រះដំណាក់របស់ព្រះអង្គណាស់
១ បទពីសៀវភៅរបស់គ្រូចម្រៀង។
បទ «ផ្កាម្លិះ»។ ទំនុករបស់ស្តេចដាវីឌ។
២ ឱព្រះជាម្ចាស់អើយ
សូមសង្គ្រោះទូលបង្គំផង
ទឹកឡើងដល់ច្រមុះទូលបង្គំហើយ!។
៣ ទូលបង្គំកាន់តែផុងខ្លួនទៅៗ
ពុំមានអ្វីដែលទូលបង្គំអាចតោងបានឡើយ
ទូលបង្គំលិចចុះទៅក្នុងទឹក
ហើយទឹកក៏ហូរនាំយកទូលបង្គំទៅ។
៤ ទូលបង្គំលែងមានកម្លាំងស្រែកហៅ
ឲ្យគេជួយទៀតហើយ
ព្រោះទូលបង្គំស្រែករហូតដល់ស្ងួតបំពង់ក
ឱព្រះនៃទូលបង្គំអើយ
ទូលបង្គំទន្ទឹងរង់ចាំព្រះអង្គរហូតដល់ផ្សាភ្នែក។
៥ អ្នកដែលស្អប់ទូលបង្គំដោយឥតមូលហេតុ។
មានគ្នាច្រើនជាងសក់ក្បាល
របស់ទូលបង្គំទៅទៀត
ពួកមេបំផ្លាញទាំងនោះមានកម្លាំងខ្លាំងណាស់
ពួកគេរកព្យាបាទទូលបង្គំទាំងយល់ច្រឡំ
តើឲ្យទូលបង្គំសងទៅគេវិញដូចម្ដេចកើត
បើទូលបង្គំមិនបានយករបស់នោះសោះ!
៦ ឱព្រះជាម្ចាស់អើយ ព្រះអង្គជ្រាបនូវអំពើលេលា
របស់ទូលបង្គំស្រាប់ហើយ
ទោសពៃរ៍របស់ទូលបង្គំ
ពុំអាចលាក់កំបាំងនឹងព្រះអង្គទេ។
៧ ឱព្រះអម្ចាស់ ឱព្រះអម្ចាស់នៃពិភពទាំងមូលអើយ
សូមកុំឲ្យអស់អ្នកដែលផ្ញើជីវិត
លើព្រះអង្គត្រូវអាម៉ាស់ ព្រោះតែទូលបង្គំ
ឱព្រះនៃជនជាតិអ៊ីស្រាអែលអើយ
សូមកុំឲ្យអស់អ្នកដែលស្វែងរកព្រះអង្គ
ត្រូវបាក់មុខ ព្រោះតែទូលបង្គំ!
៨ ដ្បិតទូលបង្គំទ្រាំទ្រឲ្យគេជេរប្រមាថ
ទូលបង្គំសុខចិត្តអាម៉ាស់មុខ ព្រោះតែព្រះអង្គ។
៩ ញាតិសន្ដានរបស់ទូលបង្គំចាត់ទុកទូលបង្គំ
ដូចជនដទៃ
បងប្អូនបង្កើតរបស់ទូលបង្គំចាត់ទុកទូលបង្គំ
ដូចជនបរទេស។
១០ មកពីទូលបង្គំស្រឡាញ់ព្រះដំណាក់របស់ព្រះអង្គ
បានជាគេប្រហារជីវិតទូលបង្គំ
ពាក្យត្មះតិះដៀលរបស់អស់អ្នក
ដែលតិះដៀលព្រះអង្គបានធ្លាក់មកលើទូលបង្គំ។
១១ ទូលបង្គំយំសោកទាំងតមអាហារ
ដែលធ្វើឲ្យមនុស្សម្នារឹតតែ
ជេរប្រមាថទូលបង្គំថែមទៀត។
១២ ទូលបង្គំស្លៀកសម្លៀកបំពាក់កាន់ទុក្ខ
ហើយពួកគេនាំគ្នាយករឿងទូលបង្គំ
ទៅលេងសើច។
១៣ គេនាំគ្នានិយាយដើមទូលបង្គំ
នៅតាមទីសាធារណៈ
ហើយមនុស្សប្រមឹកនាំគ្នាយករឿង
ទូលបង្គំទៅច្រៀងឡកឡឺយ។
១៤ ឱព្រះអម្ចាស់អើយ ទូលបង្គំអង្វររកព្រះអង្គ
ឥឡូវនេះ ជាពេលដែលគាប់ព្រះហឫទ័យ ព្រះអង្គហើយ
ឱព្រះជាម្ចាស់អើយ
ដោយព្រះអង្គមានព្រះហឫទ័យមេត្តាករុណាដ៏ធំធេង
ព្រះអង្គពិតជាសង្គ្រោះទូលបង្គំមិនខាន
សូមឆ្លើយតបមកទូលបង្គំផង!។
១៥ សូមរំដោះទូលបង្គំឲ្យរួចពីភក់ជ្រាំនេះ
កុំឲ្យទូលបង្គំផុងខ្លួនទៀតឡើយ!
សូមឲ្យទូលបង្គំបានរួចផុតពីកណ្ដាប់ដៃ
របស់អស់អ្នកដែលស្អប់ទូលបង្គំ
សូមយកទូលបង្គំចេញពីទឹកដ៏ជ្រៅនេះផង!
១៦ សូមកុំឲ្យចរន្តទឹកនេះ
អាចហូរនាំយកទូលបង្គំទៅបានឡើយ
សូមកុំឲ្យទឹកដ៏ជ្រៅនេះ
កួចយកទូលបង្គំឲ្យលិចលង់
ហើយក៏សូមកុំឲ្យអណ្ដូងនេះ
ឃុំទូលបង្គំទុកបានដែរ!
១៧ ព្រះអម្ចាស់អើយ ដោយព្រះអង្គមាន
ព្រះហឫទ័យសប្បុរស និងមេត្តាករុណា
សូមឆ្លើយតបមកទូលបង្គំ
ដោយព្រះហឫទ័យអាណិតមេត្តាដ៏ធំធេង
សូមងាកមកទតមើលទូលបង្គំផង!
១៨ សូមកុំលាក់ព្រះភ័ក្ត្រនឹងទូលបង្គំ
ដែលជាអ្នកបម្រើរបស់ព្រះអង្គឡើយ
សូមមេត្តាឆ្លើយតបមកទូលបង្គំជាប្រញាប់
ដ្បិតទូលបង្គំកំពុងតែមានអាសន្ន!
១៩ សូមយាងមកជិតទូលបង្គំ
ហើយលោះជីវិតទូលបង្គំ
សូមរំដោះទូលបង្គំឲ្យរួចពីកណ្ដាប់ដៃ
របស់ខ្មាំងសត្រូវផង!
២០ ដ្បិតព្រះអង្គជ្រាបហើយថា
ទូលបង្គំត្រូវគេជេរប្រមាថ
ត្រូវអាម៉ាស់ និងបាត់បង់កិត្តិយស
ព្រះអង្គទតឃើញបច្ចាមិត្តទាំងប៉ុន្មាន
របស់ទូលបង្គំស្រាប់ហើយ។
២១ ពាក្យជេរប្រមាថរបស់ពួកគេបានធ្វើឲ្យ
ទូលបង្គំមានចិត្តខ្លោចផ្សា និងគ្រាំគ្រា
ទូលបង្គំសង្ឃឹមថានឹងមានគេអាណិតទូលបង្គំ
តែគ្មាននរណាម្នាក់អាណិតសោះ!
ទូលបង្គំសង្ឃឹមថានឹងមានគេរំលែកទុក្ខទូលបង្គំ
តែរកមិនបានឡើយ!
២២ ពួកគេដាក់ថ្នាំបំពុលនៅក្នុងម្ហូបអាហាររបស់ទូលបង្គំ
ហើយនៅពេលទូលបង្គំស្រេកទឹក
គេបែរជាយកទឹកខ្មេះ
មកឲ្យទូលបង្គំទៅវិញ។
២៣ សូមឲ្យតុ និងពិធីជប់លៀង
ដ៏សក្ការៈរបស់ពួកគេ
ក្លាយទៅជាអន្ទាក់នាំពួកគេឲ្យវិនាស!
២៤ សូមឲ្យភ្នែករបស់គេត្រឡប់
ទៅជាងងឹតមើលអ្វីលែងឃើញ
ហើយសូមឲ្យគេកោងខ្នងរហូតតទៅ!
២៥ សូមព្រះអង្គធ្វើទោសពួកគេយ៉ាងធ្ងន់
ហើយសូមធ្វើទារុណកម្មពួកគេ
ឥតត្រាប្រណីឡើយ។
២៦ សូមឲ្យលំនៅរបស់គេក្លាយទៅជាទីស្ងាត់ជ្រងំ
ហើយសូមកុំឲ្យមាននរណារស់នៅ
ក្នុងផ្ទះរបស់ពួកគេទៀតឡើយ!
២៧ ដ្បិតពួកគេតាមព្យាបាទអស់អ្នក
ដែលព្រះអង្គបានដាក់ទោសរួចហើយ
ពួកគេធ្វើឲ្យអស់អ្នកដែលព្រះអង្គបានវាយ
ឲ្យរបួសនោះ រឹងរឹតតែឈឺចាប់ថែមទៀត។
២៨ សូមព្រះអង្គកត់ត្រាទុកនូវកំហុសរបស់ពួកគេ
សូមកុំអត់ទោសឲ្យពួកគេឡើយ!
២៩ សូមលុបឈ្មោះពួកគេចេញពីបញ្ជីជីវិត
សូមកុំរាប់ពួកគេចូលទៅ
ក្នុងចំណោមមនុស្សឲ្យសោះ។
៣០ ចំពោះទូលបង្គំ ទូលបង្គំជាមនុស្សកំសត់ទុរគត
និងឈឺចុកចាប់ ឱព្រះជាម្ចាស់អើយ!
សូមសង្គ្រោះទូលបង្គំ
សូមលើកទូលបង្គំឡើងវិញផង។
៣១ ខ្ញុំនឹងច្រៀងសរសើរតម្កើង
ព្រះនាមព្រះជាម្ចាស់
ខ្ញុំនឹងប្រកាសអំពីភាពថ្កុំថ្កើង
រុងរឿងរបស់ព្រះអង្គ ទាំងកោតសរសើរ។
៣២ ការលើកតម្កើងបែបនេះ
គាប់ព្រះហឫទ័យព្រះអម្ចាស់
ជាងការថ្វាយគោឈ្មោល
ឬថ្វាយគោឡើងកទៅទៀត។
៣៣ ពេលមនុស្សទុរគតឃើញព្រះអង្គរំដោះខ្ញុំដូច្នេះ
គេនឹងមានអំណរសប្បាយ។
អស់អ្នកដែលស្វែងរកព្រះជាម្ចាស់អើយ
សូមឲ្យអ្នករាល់គ្នាមានអាយុវែង!
៣៤ ដ្បិតព្រះអម្ចាស់ព្រះអង្គព្រះសណ្ដាប់
ពាក្យរបស់មនុស្សកំសត់ទុរគត
ហើយនៅពេលប្រជារាស្ដ្ររបស់ព្រះអង្គ
ជាប់ឃុំឃាំងព្រះអង្គមិនបំភ្លេចគេឡើយ។
៣៥ សូមឲ្យផ្ទៃមេឃ និងផែនដី
សរសើរតម្កើងព្រះអង្គ
ហើយសូមឲ្យសមុទ្រទាំងឡាយ
និងអ្វីៗដែលរស់នៅក្នុងសមុទ្រ
សរសើរតម្កើងព្រះអង្គដែរ
៣៦ ដ្បិតព្រះជាម្ចាស់នឹងសង្គ្រោះក្រុងស៊ីយ៉ូន
ព្រះអង្គនឹងសង់ក្រុងទាំងឡាយ
នៅស្រុកយូដាឡើងវិញ
ប្រជាជននឹងរស់នៅក្នុងស្រុក
ហើយនឹងកាន់កាប់ទឹកដីជាកម្មសិទ្ធិសាជាថ្មី។
៣៧ ពូជពង្សអ្នកបម្រើរបស់ព្រះអង្គ
នឹងទទួលទឹកដីជាមត៌ក
ហើយអស់អ្នកដែលស្រឡាញ់ព្រះនាមព្រះអង្គ
នឹងតាំងទីលំនៅលើទឹកដីនោះ!
៧០
ព្រះអម្ចាស់អើយ សូមយាងមកសង្គ្រោះទូលបង្គំ
១ បទពីសៀវភៅរបស់គ្រូចម្រៀង។
ទំនុករបស់ស្តេចដាវីឌ។ សម្រាប់ពិធីរំឭក។
២ ឱព្រះជាម្ចាស់អើយ
សូមយាងមករំដោះទូលបង្គំផង!
ព្រះអម្ចាស់អើយ
សូមយាងមកសង្គ្រោះទូលបង្គំជាប្រញាប់!
៣ សូមឲ្យអស់អ្នកដែលប៉ុនប៉ង
ព្យាបាទជីវិតទូលបង្គំ
ត្រូវអាប់ឱន និងអាម៉ាស់មុខ!
សូមឲ្យអស់អ្នកដែលចង់ធ្វើឲ្យទូលបង្គំ
វេទនា ត្រូវដកខ្លួនថយ និងបាក់មុខ!
៤ សូមឲ្យអស់អ្នកដែលសើចចំអកដាក់ទូលបង្គំ
ត្រូវបរាជ័យ ទាំងបាត់បង់កិត្តិយស!
៥ រីឯអស់អ្នកដែលស្វែងរកព្រះអង្គវិញ
សូមឲ្យគេបានសប្បាយរីករាយ
រួមជាមួយព្រះអង្គ
សូមឲ្យអស់អ្នកដែលស្រឡាញ់
ការសង្គ្រោះរបស់ព្រះអង្គ
អាចថ្លែងឥតឈប់ឈរថា
«សូមលើកតម្កើងព្រះជាម្ចាស់!»
៦ ឱព្រះជាម្ចាស់អើយ
ទូលបង្គំជាមនុស្សកំសត់ទុរគត
សូមប្រោសប្រណីដល់ទូលបង្គំផង!
ព្រះអង្គតែងតែសង្គ្រោះ និងរំដោះទូលបង្គំ
ឱព្រះអម្ចាស់អើយ សូមយាងមកកុំបង្អង់ឡើយ!
៧១
ពាក្យអធិស្ឋានរបស់មនុស្សចាស់ជរា
១ ព្រះអម្ចាស់អើយ
ទូលបង្គំសូមផ្ញើជីវិតលើព្រះអង្គហើយ
សូមកុំឲ្យទូលបង្គំត្រូវអាម៉ាស់ឡើយ!
២ ដោយព្រះអង្គមានព្រះហឫទ័យសុចរិត
សូមរំដោះទូលបង្គំឲ្យមានសេរីភាព
សូមផ្ទៀងព្រះកាណ៌ស្ដាប់ពាក្យរបស់ទូលបង្គំ
សូមសង្គ្រោះទូលបង្គំផង!
៣ សូមព្រះអង្គធ្វើជាថ្មដា សម្រាប់ទូលបង្គំជ្រកកោន
ព្រះអង្គបង្គាប់ឲ្យទូលបង្គំ
មករកថ្មដានេះជានិច្ច ដើម្បីឲ្យបានរួចជីវិត
ដ្បិតព្រះអង្គពិតជាថ្មដា
និងជាកំពែងការពារទូលបង្គំមែន!
៤ ឱព្រះនៃទូលបង្គំអើយ
សូមជួយទូលបង្គំឲ្យគេចផុត
ពីកណ្ដាប់ដៃរបស់មនុស្សអាក្រក់
ព្រមទាំងគេចផុតពីកណ្ដាប់ដៃ
របស់មនុស្សទុច្ចរិត និងមនុស្សកំណាច!
៥ ឱព្រះជាអម្ចាស់អើយ
ព្រះអង្គជាទីសង្ឃឹមរបស់ទូលបង្គំ
ទូលបង្គំបានផ្ញើជីវិតលើព្រះអង្គតាំងពីក្មេងមក!
៦ ទូលបង្គំពឹងផ្អែកលើព្រះអង្គតាំងពីនៅក្នុងផ្ទៃម្ដាយ
គឺព្រះអង្គហើយដែលបានយក
ទូលបង្គំចេញពីផ្ទៃម្ដាយ
ទូលបង្គំសរសើរតម្កើងព្រះអង្គឥតឈប់ឈរ!
៧ មនុស្សជាច្រើនយល់ថាព្រះអង្គ
បានដាក់បណ្ដាសាទូលបង្គំ
ប៉ុន្តែ តាមពិត ព្រះអង្គជាជម្រក
ដ៏រឹងមាំរបស់ទូលបង្គំ។
៨ សូមឲ្យទូលបង្គំពោលពាក្យ
សរសើរតម្កើងព្រះអង្គជានិច្ច
ទូលបង្គំចង់លើកតម្កើងសិរីរុងរឿង
របស់ព្រះអង្គជារៀងរាល់ថ្ងៃ!
៩ សូមកុំលះបង់ទូលបង្គំ
នៅគ្រាដែលទូលបង្គំមានវ័យចាស់ជរា
សូមកុំបោះបង់ចោលទូលបង្គំ
នៅគ្រាដែលកម្លាំងទូលបង្គំចុះឱនថយនេះឡើយ!
១០ ដ្បិតសត្រូវរបស់ទូលបង្គំកំពុង
តែគិតគ្នាប្រឆាំងនឹងទូលបង្គំ
អស់អ្នកដែលប៉ុនប៉ងប្រហារជីវិតទូលបង្គំ
កំពុងតែពិភាក្សាគ្នា
១១ គេពោលថា: ព្រះជាម្ចាស់
បានបោះបង់ចោលគាត់ហើយ!
ចូរដេញតាមគាត់ចាប់យកមក!
គ្មាននរណាជួយរំដោះគាត់បានទេ!
១២ ឱព្រះជាម្ចាស់អើយ
សូមកុំទៅណាឆ្ងាយពីទូលបង្គំឡើយ!
ឱព្រះនៃទូលបង្គំអើយ
សូមយាងមកជួយទូលបង្គំជាប្រញាប់!
១៣ សូមឲ្យអស់អ្នកដែលចោទប្រកាន់ទូលបង្គំ
ត្រូវអាម៉ាស់ ហើយវិនាសសូន្យទៅ!
សូមឲ្យអស់អ្នកដែលប្រាថ្នាឲ្យទូលបង្គំ
វេទនា ត្រូវបាត់បង់កិត្តិយស និងបាក់មុខ!
១៤ រីឯទូលបង្គំវិញ ទូលបង្គំនៅតែមានសង្ឃឹមជានិច្ច
ទូលបង្គំនឹងសរសើរតម្កើងព្រះអង្គ
ហើយសរសើរតម្កើងទៀត!
១៥ ជារៀងរាល់ថ្ងៃ
ទូលបង្គំនឹងថ្លែងរៀបរាប់អំពីសេចក្ដីសុចរិត
និងការសង្គ្រោះរបស់ព្រះអង្គ ដែលមានចំនួន
ដ៏ច្រើនឥតគណនា។
១៦ ព្រះជាអម្ចាស់អើយ ដោយសារព្រះអង្គជួយ
ទូលបង្គំនឹងចូលមកក្នុងព្រះដំណាក់
ទូលបង្គំនឹងរំឭកពីសេចក្ដីសុចរិត
របស់ព្រះអង្គតែមួយប៉ុណ្ណោះ។
១៧ ព្រះជាម្ចាស់អើយ
ព្រះអង្គបានប្រៀនប្រដៅទូលបង្គំ
តាំងពីទូលបង្គំនៅក្មេង
រហូតមកទល់ពេលនេះ ទូលបង្គំនៅតែប្រកាស
អំពីស្នាព្រះហស្ដដ៏អស្ចារ្យរបស់ព្រះអង្គដដែល។
១៨ ឱព្រះជាម្ចាស់អើយ
ឥឡូវនេះ ទូលបង្គំចាស់សក់ស្កូវហើយ
សូមកុំបោះបង់ចោលទូលបង្គំឡើយ
ដើម្បីឲ្យទូលបង្គំអាចប្រកាសអំពីព្រះចេស្ដា
របស់ព្រះអង្គប្រាប់មនុស្សនៅជំនាន់នេះ
និងប្រកាសអំពីឫទ្ធានុភាពរបស់ព្រះអង្គ
ប្រាប់មនុស្សទាំងអស់នៅជំនាន់ក្រោយដែរ។
១៩ ព្រះជាម្ចាស់អើយ ព្រះហឫទ័យសុចរិត
របស់ព្រះអង្គខ្ពស់ពន់ពេកណាស់
ដ្បិតព្រះអង្គបានធ្វើការដ៏ធំអស្ចារ្យជាច្រើន
ព្រះជាម្ចាស់អើយ
គ្មាននរណាអាចផ្ទឹមស្មើនឹងព្រះអង្គឡើយ!
២០ ព្រះអង្គបានធ្វើឲ្យយើងខ្ញុំ
ជួបអាសន្នអន់ក្រ និងទុក្ខលំបាកជាច្រើន
ប៉ុន្តែ ព្រះអង្គប្រទានឲ្យយើងខ្ញុំ
មានជីវិតសាជាថ្មី
ព្រះអង្គបាននាំទូលបង្គំឡើងពីរណ្ដៅមកវិញ។
២១ ព្រះអង្គនឹងប្រទានឲ្យទូលបង្គំ
មានកិត្តិយសកាន់តែខ្ពស់
ព្រះអង្គនឹងសម្រាលទុក្ខទូលបង្គំសាជាថ្មី។
២២ ព្រះនៃទូលបង្គំអើយ
ទូលបង្គំនឹងសរសើរតម្កើងព្រះអង្គ
ដោយសំឡេងចាប៉ី
ព្រោះព្រះអង្គមានព្រះហឫទ័យស្មោះស្ម័គ្រ
ឱព្រះដ៏វិសុទ្ធរបស់ជនជាតិអ៊ីស្រាអែលអើយ
ទូលបង្គំនឹងស្មូត្រទំនុកតម្កើងថ្វាយព្រះអង្គ
ដោយដេញពិណកំដរផង!
២៣ ទូលបង្គំនឹងច្រៀងតម្កើងព្រះអង្គ
ទូលបង្គំនឹងបន្លឺសំឡេងឡើងដោយអំណរ
ទូលបង្គំនឹងច្រៀងអស់ពីចិត្ត
ព្រោះព្រះអង្គបានរំដោះជីវិតទូលបង្គំ។
២៤ ទូលបង្គំនឹងថ្លែងអំពីសេចក្ដីសុចរិត
របស់ព្រះអង្គជារៀងរាល់ថ្ងៃ
ដ្បិតអស់អ្នកដែលប្រាថ្នាឲ្យទូលបង្គំវេទនា
ត្រូវអាប់ឱន និងអាម៉ាស់មុខ!
៧២
សូមព្រះជាម្ចាស់ប្រទានពរដល់ព្រះមហាក្សត្រ
១ ទំនុករបស់ស្តេចសាឡូម៉ូន។
ឱព្រះជាម្ចាស់អើយ
សូមប្រទានឲ្យព្រះរាជាចេះវិនិច្ឆ័យដូចព្រះអង្គ
ហើយសូមឲ្យព្រះរាជបុត្ររបស់ព្រះរាជា
បានប្រកបដោយសេចក្ដីសុចរិត ដូចព្រះអង្គដែរ!
២ ដើម្បីឲ្យព្រះរាជាអាចគ្រប់គ្រង
ប្រជារាស្ដ្ររបស់ព្រះអង្គ ដោយសុចរិត
ហើយគ្រប់គ្រងជនក្រីក្រដោយយុត្តិធម៌។
៣ សូមឲ្យភ្នំទាំងឡាយផ្តល់នូវភោគផល
ដ៏សម្បូណ៌សប្បាយដល់ប្រជារាស្ដ្រ
ព្រមទាំងនាំឲ្យពួកគេស្គាល់
សេចក្ដីសុចរិតដែរ។
៤ សូមព្រះរាជារកយុត្តិធម៌ឲ្យជនក្រីក្រ
ក្នុងចំណោមប្រជារាស្ដ្រ
សូមព្រះរាជាជួយសង្គ្រោះមនុស្សកំសត់ទុរគត
ហើយកម្ទេចអស់អ្នកដែលជិះជាន់សង្កត់សង្កិនគេ
៥ ដរាបណានៅមានព្រះអាទិត្យរះ
មានព្រះច័ន្ទបញ្ចេញរស្មី
សូមឲ្យព្រះរាជាមានព្រះជន្មាយុយឺនយូរ
អស់កល្បជាអង្វែងតរៀងទៅ។
៦ សូមព្រះអង្គផ្តល់ព្រះពរដល់ប្រជារាស្ដ្រ
ដូចទឹកភ្លៀងធ្លាក់មកលើស្រែចម្ការ
និងដូចជាភ្លៀងបង្អុរចុះមកស្រោចស្រពផែនដី។
៧ សូមឲ្យសេចក្ដីសុចរិតរីកចម្រើនឡើង
ក្នុងរជ្ជកាលរបស់ព្រះករុណា
ហើយដរាបណានៅមានព្រះច័ន្ទ
សូមឲ្យសេចក្ដីសុខសាន្តមានយ៉ាងបរិបូណ៌។
៨ សូមឲ្យរាជ្យរបស់ព្រះករុណាលាតសន្ធឹង
ពីសមុទ្រមួយទៅសមុទ្រមួយ
និងលាតសន្ធឹងពីទន្លេអឺប្រាតនេះ
រហូតទៅដល់ស្រុកដាច់ស្រយាលនៃផែនដី។
៩ ប្រជាជនដែលរស់នៅតាមវាលរហោស្ថាន
នឹងនាំគ្នាក្រាបថ្វាយបង្គំព្រះករុណា
ហើយខ្មាំងសត្រូវរបស់ព្រះករុណា
ត្រូវបរាជ័យ ងើបមុខមិនរួច។
១០ ស្តេចទាំងឡាយនៅស្រុកតារស៊ីស
និងនៅកោះនានា នឹងយកតង្វាយ
មកថ្វាយព្រះករុណា ស្តេចទាំងឡាយ
នៅស្រុកសេបា និងស្រុកសេបា
ក៏នាំគ្នាយកសួយសារអាករមកថ្វាយដែរ។
១១ ស្តេចទាំងប៉ុន្មាននឹងនាំគ្នា
ក្រាបថ្វាយបង្គំព្រះករុណា
ហើយប្រជាជាតិទាំងអស់
នឹងនាំគ្នាបម្រើព្រះករុណា។
១២ ព្រះករុណារំដោះជនក្រីក្រ
នៅពេលគេស្រែកអង្វរព្រះករុណា
ហើយព្រះករុណារំដោះជនទុរគតដែលគ្មានទីពឹង។
១៣ ព្រះករុណាអាណិតអាសូរមនុស្សទន់ខ្សោយ
និងមនុស្សកំសត់ទុរគត
ព្រះករុណាសង្គ្រោះជីវិតមនុស្សក្រីក្រ។
១៤ ព្រះករុណារំដោះពួកគេឲ្យរួចផុត
ពីការសង្កត់សង្កិនរបស់មនុស្សឃោរឃៅ
ចំពោះព្រះករុណា
ជីវិតរបស់ពួកគេមានតម្លៃណាស់។
១៥ សូមឲ្យព្រះរាជាមានព្រះជន្មាយុយឺនយូរ!
គេនឹងយកមាសពីស្រុកសេបាមកថ្វាយព្រះករុណា
គេនឹងទូលអង្វរព្រះជាម្ចាស់ឲ្យព្រះរាជា
ឥតឈប់ឈរ ហើយរៀងរាល់ថ្ងៃ
គេនឹងថ្វាយព្រះពរដល់ព្រះរាជា។
១៦ នៅក្នុងស្រុក សូមឲ្យមានស្រូវយ៉ាងបរិបូណ៌
នៅតាមកំពូលភ្នំ សូមឲ្យមានភោគផលច្រើន
ដូចនៅស្រុកលីបង់ ហើយនៅក្នុងទីក្រុង
សូមឲ្យប្រជាជនកើនចំនួនឡើង
ដូចស្មៅនៅតាមទីវាល។
១៧ សូមឲ្យព្រះរាជាមានព្រះនាម
ល្បីល្បាញរហូតតទៅ
គឺសូមឲ្យព្រះនាមព្រះករុណា
នៅស្ថិតស្ថេរគង់វង្សដូចព្រះអាទិត្យ។
សូមឲ្យមនុស្សម្នាយកព្រះនាមព្រះករុណា
ទៅជូនពរគ្នាទៅវិញទៅមក
ហើយប្រជាជាតិទាំងអស់នឹងពោលថា
ព្រះរាជាប្រកបដោយព្រះពរ!
១៨ សូមលើកតម្កើងព្រះជាអម្ចាស់
ជាព្រះរបស់ជនជាតិអ៊ីស្រាអែល
ដ្បិតមានតែព្រះអង្គទេ
ដែលសម្ដែងការអស្ចារ្យទាំងនេះ!
១៩ សូមលើកតម្កើងព្រះនាមដ៏រុងរឿង
របស់ព្រះអង្គរហូតតទៅ!
សូមឲ្យផែនដីទាំងមូលបានពោរពេញ
ទៅដោយសិរីរុងរឿងរបស់ព្រះអង្គ!
អាម៉ែន! អាម៉ែន!
២០ ពាក្យអធិស្ឋានរបស់ស្តេចដាវីឌ
ជាបុត្ររបស់លោកយេសាយ ចប់តែត្រឹមណេះ។
៧៣
ភាគទីបី
(ទំនុកតម្កើង ៧៣-៨៩)
សេចក្ដីសុចរិតតែងតែមានជ័យជម្នះ
១ ទំនុកតម្កើងរបស់លោកអសាភ។
ពិតមែនហើយ ព្រះជាម្ចាស់មាន
ព្រះហឫទ័យសប្បុរស
ចំពោះជនជាតិអ៊ីស្រាអែល
និងអស់អ្នកដែលមានចិត្តបរិសុទ្ធ។
២ ចំពោះខ្ញុំផ្ទាល់ ខ្ញុំហៀបតែនឹងភ្លាត់ជើង
គឺនៅសល់តែបន្តិចប៉ុណ្ណោះ ខ្ញុំមុខជាដួលមិនខាន
៣ ព្រោះខ្ញុំមានចិត្តច្រណែននឹងមនុស្សព្រហើន
ដោយឃើញជនពាលទាំងនោះបានចម្រុងចម្រើន។
៤ ក្នុងមួយជីវិតរបស់ពួកគេ
ពួកគេហាក់ដូចជាគ្មានកង្វល់អ្វីសោះ
គេមានសាច់មានឈាម។
៥ គេពុំដែលស្គាល់ទុក្ខលំបាកដូចមនុស្សដទៃ
ហើយពុំដែលវេទនាដូចមនុស្សឯទៀតៗឡើយ។
៦ ពួកគេយកអំនួតមកបង្ហាញដូចជាបុណ្យស័ក្តិ
ហើយពាក់ចិត្តឃោរឃៅ
ដូចជាសម្លៀកបំពាក់។
៧ គំនិតអាក្រក់ចាំងនៅលើផ្ទៃមុខរបស់ពួកគេ
គំនិតអប្រិយរបស់ពួកគេ
ក៏លេចចេញមកយ៉ាងច្បាស់ដែរ។
៨ គេនាំគ្នាសើចចំអក និងពោលពាក្យអាក្រក់
ព្រមទាំងនិយាយក្តែងៗ
ពីការសង្កត់សង្កិនអ្នកដទៃ។
៩ មាត់របស់គេពោលពាក្យប្រមាថព្រះជាម្ចាស់
ហើយអណ្ដាតរបស់គេឥតសំចៃនរណាម្នាក់
នៅលើផែនដីឡើយ។
១០ ហេតុនេះ សូម្បីតែប្រជារាស្ដ្រ
របស់ព្រះជាម្ចាស់ក៏វង្វេងទៅតាមពួកគេ
ព្រមទាំងចូលចិត្តស្ដាប់ពាក្យសម្ដី
របស់ពួកគេ ដូចផឹកទឹក។
១១ គេពោលថា ព្រះជាម្ចាស់ពុំជ្រាបអ្វីទាំងអស់
ព្រះដ៏ខ្ពង់ខ្ពស់បំផុតមិនដឹងអ្វីសោះឡើយ!
១២ នេះហើយមនុស្សពាល!
ពួកគេបានសុខជានិច្ច ពួកគេបានចម្រុងចម្រើនរហូត!
១៣ រីឯទូលបង្គំវិញ ទូលបង្គំខំប្រឹងកាន់ចិត្តបរិសុទ្ធ
ហើយចៀសវាងប្រព្រឹត្តអំពើបាប
តែឥតបានផលអ្វីសោះ!
១៤ ដ្បិតទូលបង្គំកើតទុក្ខលំបាកជារៀងរាល់ថ្ងៃ
ទូលបង្គំទទួលទារុណកម្មរាល់ព្រឹក។
១៥ ប្រសិនបើទូលបង្គំសម្រេចចិត្តធ្វើដូចពួកគេដែរនោះ
ទូលបង្គំមុខជាក្បត់បងប្អូនរបស់ទូលបង្គំ
ដែលជាបុត្ររបស់ព្រះអង្គមិនខាន។
១៦ ទូលបង្គំខិតខំរិះគិតចង់យល់អំពីបញ្ហានេះ
ប៉ុន្តែ ពិបាកយល់ណាស់
១៧ រហូតទាល់តែទូលបង្គំចូលមកដល់
ទីសក្ការៈរបស់ព្រះជាម្ចាស់
ទើបទូលបង្គំយល់ថា ចុងបញ្ចប់របស់មនុស្ស
អាក្រក់ នឹងក្លាយទៅជាយ៉ាងណា។
១៨ តាមពិតព្រះអង្គបានដាក់ពួកគេ
នៅជម្រាលមួយដ៏រអិល
ព្រះអង្គធ្វើឲ្យគេធ្លាក់ទៅក្នុងមហន្តរាយ
១៩ ក្នុងពេលតែមួយប៉ប្រិចភ្នែកប៉ុណ្ណោះ
ពួកគេនឹងវិនាសបាត់បង់
ពួកគេនឹងត្រូវអន្តរាយ រលាយសូន្យទៅ
យ៉ាងរន្ធត់បំផុត។
២០ ព្រះអម្ចាស់អើយ ពេលព្រះអង្គតើនឡើង
ព្រះអង្គនឹងរំលាយពួកគេឲ្យវិនាសបាត់ទៅ
ដូចការយល់សប្ដិ។
២១ ពេលទូលបង្គំឆ្អែតចិត្ត
ហើយពេលទូលបង្គំឈឺចាប់ក្នុងឱរា
២២ នោះទូលបង្គំបែរទៅជាល្ងីល្ងើ
មិនយល់អ្វីទាំងអស់
ហើយទូលបង្គំក៏ដូចជាសត្វតិរច្ឆាន
នៅចំពោះព្រះភ័ក្ត្រព្រះអង្គដែរ។
២៣ ប៉ុន្តែ ទូលបង្គំនៅជាមួយព្រះអង្គជានិច្ច
ព្រះអង្គកាន់ដៃស្តាំរបស់ទូលបង្គំ
២៤ ព្រះអង្គដឹកនាំទូលបង្គំឲ្យដើរ
តាមព្រះហឫទ័យរបស់ព្រះអង្គ
ហើយនៅទីបញ្ចប់ ព្រះអង្គនឹងទទួលទូលបង្គំ
នៅក្នុងសិរីរុងរឿងរបស់ព្រះអង្គ។
២៥ នៅស្ថានបរមសុខ ទូលបង្គំគ្មានទីពឹងណា
ផ្សេងទៀត ក្រៅពីព្រះអង្គឡើយ
នៅលើផែនដី បើព្រះអង្គគង់នៅជាមួយទូលបង្គំ
ទូលបង្គំក៏មិនចង់បានអ្វីផ្សេងទៀតដែរ។
២៦ រូបកាយ និងចិត្តគំនិត
របស់ទូលបង្គំទន់ខ្សោយទៅៗ
ប៉ុន្តែ ព្រះអង្គនៅតែជាបង្អែក
និងជាម្ចាស់ជីវិតទូលបង្គំ រហូតតទៅ។
២៧ អស់អ្នកដែលងាកចេញឆ្ងាយ
ពីព្រះអង្គនឹងត្រូវអន្តរាយ
ហើយព្រះអង្គនឹងធ្វើឲ្យអស់អ្នក
ដែលក្បត់ព្រះអង្គត្រូវវិនាសសូន្យទៅ។
២៨ រីឯទូលបង្គំវិញ ទូលបង្គំមានសុភមង្គល
តែនៅពេលណាទូលបង្គំ
នៅជាមួយព្រះអង្គប៉ុណ្ណោះ
ឱព្រះជាអម្ចាស់អើយ
ទូលបង្គំផ្ញើជីវិតលើព្រះអង្គហើយ
ទូលបង្គំនឹងប្រកាសអំពីស្នាព្រះហស្ដ
ទាំងប៉ុន្មានរបស់ព្រះអង្គ។
៧៤
ព្រះអម្ចាស់អើយ សូមកុំទុកឲ្យសត្រូវប្រមាថព្រះអង្គឡើយ!
១ កំណាព្យរបស់លោកអសាភ។
ព្រះជាម្ចាស់អើយ ហេតុអ្វីបានជា
ព្រះអង្គបោះបង់ចោលយើងខ្ញុំរហូតដូច្នេះ?
ហេតុអ្វីបានជាព្រះអង្គព្រះពិរោធនឹងយើងខ្ញុំ
ដែលជាប្រជារាស្ដ្រផ្ទាល់របស់ព្រះអង្គ?
២ សូមកុំបំភ្លេចប្រជារាស្ដ្រ
ដែលព្រះអង្គបានយកមកធ្វើ
ជាកម្មសិទ្ធិរបស់ព្រះអង្គ តាំងពីដើមរៀងមក
គឺប្រជារាស្ដ្រដែលព្រះអង្គបានលោះ
យកមកធ្វើជាកុលសម្ព័ន្ធរបស់ព្រះអង្គផ្ទាល់
សូមកុំបំភ្លេចភ្នំស៊ីយ៉ូន
ជាកន្លែងដែលព្រះអង្គគង់នៅនោះឡើយ។
៣ សូមព្រះអង្គយាងមកកាន់កន្លែង
ដែលវិនាសខូចខាតអស់
ខ្មាំងសត្រូវបានកម្ទេចបំផ្លាញអ្វីៗ
ទាំងអស់នៅក្នុងទីសក្ការៈ
៤ បច្ចាមិត្តរបស់ព្រះអង្គបាននាំគ្នា
ស្រែកហ៊ោនៅក្នុងកន្លែងដ៏វិសុទ្ធរបស់ព្រះអង្គ
ហើយពួកគេបានបង្ហូតទង់ជ័យ
របស់ពួកគេនៅទីនោះ។
៥ ពួកគេប្រៀបបានទៅនឹងអ្នកកាប់ព្រៃ
ដែលលើកពូថៅរបស់ខ្លួនឡើងកាប់ដើមឈើ
៦ គឺពួកគេបានយកពូថៅ និងញញួរ
មកវាយកម្ទេចក្បាច់រចនាទាំងប៉ុន្មាន។
៧ គេបានដុតទីសក្ការៈរបស់ព្រះអង្គ គេបានរំលំ
និងបន្ទាបបន្ថោកព្រះដំណាក់របស់ព្រះអង្គ។
៨ ពួកគេគិតគ្នាថា «យើងនឹងបង្ក្រាបសាសន៍នេះឲ្យរាប
ហើយដុតបំផ្លាញកន្លែងសក្ការបូជា
ទាំងប៉ុន្មាននៅក្នុងស្រុកនេះ!»។
៩ យើងខ្ញុំលែងឃើញអ្វីដែលជាទីសម្គាល់
របស់ប្រជាជាតិយើងខ្ញុំទៀតហើយ
រីឯព្យាការីក៏លែងមានទៀតដែរ។
ក្នុងចំណោមយើងខ្ញុំ គ្មាននរណាដឹងថា
យើងខ្ញុំត្រូវតែនៅដូច្នេះដល់ពេលណាឡើយ។
១០ ឱព្រះជាម្ចាស់អើយ តើឲ្យបច្ចាមិត្ត
ត្មះតិះដៀលព្រះអង្គដល់ពេលណា?
តើឲ្យខ្មាំងសត្រូវប្រមាថ
ព្រះនាមព្រះអង្គដល់កាលណាទៀត?
១១ ហេតុអ្វីបានជាព្រះអង្គ
មិនព្រមយាងមកជួយយើងខ្ញុំ
ហេតុអ្វីបានជាព្រះអង្គឱបដៃសំងំស្ងៀមដូច្នេះ?
១២ ព្រះជាម្ចាស់អើយ ព្រះអង្គជាព្រះមហាក្សត្រ
របស់ទូលបង្គំ តាំងពីដើមរៀងមក
ព្រះអង្គតែងតែសង្គ្រោះយើងខ្ញុំ
ជាច្រើនលើកច្រើនសានៅក្នុងស្រុកនេះ។
១៣ ព្រះអង្គបានបង្ក្រាបសមុទ្រ
ដោយសារឫទ្ធានុភាពរបស់ព្រះអង្គ
ព្រះអង្គបានវាយកម្ទេចក្បាលនាគនៅក្នុងសមុទ្រ
១៤ ព្រះអង្គបានវាយកម្ទេចក្បាលស្តេចក្រពើ
ហើយបោះវាទៅឲ្យសត្វនានា
នៅវាលរហោស្ថានស៊ីជាអាហារ។
១៥ ព្រះអង្គបានធ្វើឲ្យមានទឹកផុស
ចេញពីប្រភពទឹកនានា
ហើយព្រះអង្គបានធ្វើឲ្យទន្លេដែលមិនចេះរីង
ប្រែជារីងស្ងួតទៅវិញ។
១៦ ព្រះអង្គជាម្ចាស់លើថ្ងៃ ជាម្ចាស់លើយប់
ព្រះអង្គបានបង្កើតព្រះច័ន្ទ និងព្រះអាទិត្យ។
១៧ ព្រះអង្គបានកំណត់ព្រំដែនរវាងទឹក និងដី
ព្រះអង្គក៏បានបង្កើតរដូវប្រាំង និងរដូវវស្សាដែរ។
១៨ ឱព្រះអម្ចាស់អើយ
សូមកុំភ្លេចឲ្យសោះថា
បច្ចាមិត្តបានត្មះតិះដៀលព្រះអង្គ
សាសន៍ល្ងីល្ងើនោះបានជេរ
ប្រមាថព្រះនាមព្រះអង្គ!។
១៩ សូមកុំប្រគល់ជីវិតប្រជារាស្ដ្ររបស់ព្រះអង្គ
ដែលកំពុងតែអស់សង្ឃឹមនេះ
ទៅក្នុងកណ្ដាប់ដៃរបស់ខ្មាំងដ៏សាហាវ
សូមកុំបំភ្លេចប្រជារាស្ដ្រដ៏កំសត់ទុរគត
របស់ព្រះអង្គជារៀងរហូតឡើយ។
២០ សូមនឹកដល់សម្ពន្ធមេត្រីដែលព្រះអង្គ
បានចងជាមួយយើងខ្ញុំ!
ដ្បិតជនរងគ្រោះដោយសារអំពើឃោរឃៅ
នាំគ្នារត់ពួនសព្វទីកន្លែងក្នុងទឹកដីនេះ។
២១ សូមកុំឲ្យអស់អ្នកដែលគេជិះជាន់
ត្រូវអាម៉ាស់មុខទៀតឡើយ
តែសូមឲ្យជនក្រីក្រ និងជនទុរគត
អាចសរសើរតម្កើងព្រះនាមព្រះអង្គ។
២២ ព្រះជាម្ចាស់អើយ សូមក្រោកឡើង
ការពារព្រះកិត្តិនាមរបស់ព្រះអង្គ
សូមកុំបំភ្លេចពាក្យដែលជនល្ងីល្ងើទាំងនេះ
បានត្មះតិះដៀលព្រះអង្គជារៀងរាល់ថ្ងៃ។
២៣ សូមកុំបំភ្លេចសម្រែកនៃខ្មាំងសត្រូវរបស់ព្រះអង្គ
គឺគេបានស្រែកយ៉ាងអឺងកងទាស់នឹងព្រះអង្គ
ឥតឈប់ឈរឡើយ។
៧៥
ព្រះជាម្ចាស់ជាចៅក្រម
១ ទំនុកពីសៀវភៅរបស់គ្រូចម្រៀង។
បទ «សូមកុំបំផ្លាញ»។ ទំនុករបស់លោកអសាភ។
ចម្រៀងតម្កើងព្រះជាម្ចាស់។
២ ឱព្រះជាម្ចាស់អើយ
យើងខ្ញុំសរសើរតម្កើងព្រះអង្គ!
យើងខ្ញុំសរសើរតម្កើងព្រះនាមព្រះអង្គ
ដែលគង់នៅជិតយើងខ្ញុំ
ហើយយើងខ្ញុំរៀបរាប់អំពីស្នាព្រះហស្ដ
ដ៏ស្ញប់ស្ញែងរបស់ព្រះអង្គ!
៣ ព្រះអង្គមានព្រះបន្ទូលថា
«ដល់គ្រាដែលយើងបានកំណត់ទុក
យើងនឹងវិនិច្ឆ័យទោស ដោយយុត្តិធម៌!
៤ ផែនដី និងអ្វីៗទាំងអស់
ដែលរស់នៅលើផែនដីនឹងត្រូវរលាយ
ប៉ុន្តែ យើងនឹងធ្វើឲ្យផែនដីនៅតែរឹងមាំ!»។ - សម្រាក
៥ ខ្ញុំនិយាយប្រាប់មនុស្សអួតបំប៉ោងថា
កុំអួតបំប៉ោងឲ្យសោះ!
ហើយប្រាប់មនុស្សអាក្រក់ថាកុំវាយឫកខ្ពស់!
៦ កុំប្រកាន់ឫកខ្ពស់ពេក ឈប់និយាយព្រហើនទៅ
៧ ដ្បិតអ្នកដែលវិនិច្ឆ័យទោសមិនមែន
មកពីខាងកើត ឬខាងលិច
ហើយក៏មិនមែនមកពីខាងត្បូង ឬខាងជើងដែរ
៨ គឺព្រះជាម្ចាស់ទេតើ ដែលជាចៅក្រមវិនិច្ឆ័យទោស
ព្រះអង្គដាក់ទោសអ្នកនេះ
ហើយលើកលែងទោសអ្នកនោះ។
៩ ព្រះអម្ចាស់កាន់ពែងមួយនៅក្នុងព្រះហស្ដ
គឺពែងដែលមានពេញទៅដោយព្រះពិរោធ
ពេលព្រះអង្គចាក់ពែងនោះទៅលើផែនដី
មនុស្សអាក្រក់ទាំងប៉ុន្មានត្រូវតែទទួលទោស
ចៀសមិនផុតឡើយ។
១០ រីឯខ្ញុំវិញ ខ្ញុំនឹងប្រកាសអំពីព្រះ
របស់លោកយ៉ាកុបរហូតតទៅ
ខ្ញុំនឹងស្មូត្រទំនុកតម្កើងថ្វាយព្រះអង្គ។
១១ ព្រះអង្គនឹងបំបាក់អំនួតរបស់មនុស្សពាល
តែព្រះអង្គនឹងលើកមុខមនុស្សសុចរិតឡើង។
៧៦
ពីភ្នំស៊ីយ៉ូន ព្រះជាម្ចាស់ពន្លត់ភ្លើងសង្គ្រាម
១ ទំនុកពីសៀវភៅរបស់គ្រូចម្រៀង។
ប្រគំជាមួយតន្ដ្រីដែលមានខ្សែ។
ទំនុករបស់លោកអសាភ។ ចម្រៀងតម្កើងព្រះជាម្ចាស់។
២ នៅស្រុកយូដា គេស្គាល់ព្រះជាម្ចាស់គ្រប់ៗគ្នា
នៅស្រុកអ៊ីស្រាអែល
ព្រះនាមរបស់ព្រះអង្គល្បីល្បាញណាស់!
៣ ព្រះពន្លារបស់ព្រះអង្គស្ថិតនៅក្រុងសាឡឹម
ព្រះដំណាក់របស់ព្រះអង្គស្ថិតនៅក្រុងស៊ីយ៉ូន។
៤ នៅទីនោះហើយដែលព្រះអង្គបានកម្ទេចគ្រឿង
សាស្ត្រាវុធ គឺមានធ្នូ ខែល និងដាវជាដើម។ - សម្រាក
៥ ឱព្រះជាម្ចាស់អើយ
ព្រះអង្គប្រកបដោយសិរីរុងរឿង
គួរជាទីស្ញប់ស្ញែង
នៅពេលព្រះអង្គវិលត្រឡប់មកពីភ្នំវិញ
ក្រោយពីបានយកជ័យជម្នះ។
៦ ព្រះអង្គបានដកអាវុធពីអ្នក
ចម្បាំងដ៏ជំនាញទាំងនោះ
ពួកគេដេកលង់លក់បាត់ស្មារតី
ទាហានដ៏ពូកែទាំងនោះ
លែងមានកម្លាំងច្បាំងទៀតហើយ។
៧ ឱព្រះនៃលោកយ៉ាកុបអើយ
ពេលព្រះអង្គស្រែកគំរាម
កងទ័ពសេះ និងសេះរបស់ពួកគេកម្រើកលែងរួច។
៨ ព្រះអង្គអើយ ព្រះអង្គគួរជាទីស្ញែងខ្លាចណាស់!
ពេលព្រះអង្គព្រះអង្គព្រះពិរោធ តើនរណាអាច
ទ្រាំឈរនៅចំពោះព្រះភ័ក្ត្ររបស់ព្រះអង្គបាន?
៩ ព្រះអង្គមានព្រះបន្ទូលជំនុំជម្រះពីលើមេឃមក
មនុស្សម្នាលើផែនដីនៅស្ងៀមស្ងាត់
ដោយកោតខ្លាច
១០ គឺព្រះអង្គក្រោកឡើងវិនិច្ឆ័យទោស
និងសង្គ្រោះមនុស្សទន់ទាបទាំងប៉ុន្មាន
នៅលើផែនដីនេះ។ - សម្រាក
១១ ព្រះអង្គធ្វើឲ្យកំហឹងរបស់មនុស្សលោក
ប្រែទៅជាការលើកសរសើរតម្កើងព្រះអង្គវិញ
ហើយអស់អ្នកដែលនៅសេសសល់
ពីសង្គ្រាមនឹងនាំគ្នាមកថ្វាយបង្គំព្រះអង្គ។
១២ ចូរថ្វាយទៅព្រះអម្ចាស់
ជាព្រះរបស់អ្នករាល់គ្នានូវអ្វីៗ
ដែលអ្នករាល់គ្នាបានសន្យាចំពោះព្រះអង្គ
អស់អ្នកដែលនៅជុំវិញព្រះ
ដ៏គួរឲ្យស្ញែងខ្លាចអើយ
ចូរយកតង្វាយមកថ្វាយព្រះអង្គ!
១៣ ព្រះអង្គបំបាក់អំនួតរបស់ស្តេចនានា
ហើយធ្វើឲ្យព្រះមហាក្សត្រទាំងឡាយ
នៅលើផែនដីស្ញែងខ្លាចព្រះអង្គ។
៧៧
ពេលមានទុក្ខ ទូលបង្គំនឹកឃើញពីការអស្ចារ្យរបស់ព្រះអង្គកាលពីជំនាន់ដើម
១ បទពីសៀវភៅរបស់គ្រូចម្រៀង។
សម្រាប់លោកយេឌូទូន។
ទំនុករបស់លោកអសាភ។
២ ខ្ញុំបន្លឺសំឡេងទៅកាន់ព្រះជាម្ចាស់
ខ្ញុំស្រែកអង្វរព្រះអង្គ
ខ្ញុំបន្លឺសំឡេងទៅកាន់ព្រះជាម្ចាស់
ព្រះអង្គផ្ទៀងព្រះកាណ៌ស្ដាប់ពាក្យខ្ញុំ។
៣ នៅថ្ងៃមានអាសន្ន ខ្ញុំស្វែងរកព្រះអម្ចាស់
នៅពេលយប់ ខ្ញុំលើកដៃអង្វរព្រះអង្គឥតឈប់ឈរ
ខ្ញុំមិនចង់ឲ្យនរណាសម្រាលទុក្ខខ្ញុំសោះឡើយ។
៤ ពេលនឹកដល់ព្រះជាម្ចាស់ ខ្ញុំស្រែកថ្ងូរ
ហើយពេលរំពឹងគិត ខ្ញុំក៏បាក់ទឹកចិត្តដែរ។ - សម្រាក
៥ ព្រះអម្ចាស់អើយ ព្រះអង្គធ្វើឲ្យទូលបង្គំ
ទទួលទានដំណេកមិនលក់សោះ
ទូលបង្គំខ្វល់ខ្វាយក្នុងចិត្ត រកនិយាយអ្វីមិនកើត។
៦ ទូលបង្គំរំពឹងគិតអំពីអតីតកាល
គឺពីជំនាន់ដើមដ៏យូរលង់ណាស់មកហើយ
៧ ទូលបង្គំរិះគិតដដែលៗ ពេញមួយយប់
ទូលបង្គំចេះតែត្រិះរិះពិចារណានៅក្នុងចិត្ត
ដើម្បីស្វែងយល់ថា
៨ តើព្រះអម្ចាស់បោះបង់ចោលយើងរហូតឬ?
តើព្រះអង្គមិនគាប់ព្រះហឫទ័យ
នឹងយើងទៀតទេឬ?
៩ តើព្រះអង្គលែងមានព្រះហឫទ័យ
មេត្តាករុណាចំពោះយើងហើយឬ?
តើព្រះអង្គនៅស្ងៀមលែងមានព្រះបន្ទូល
មកយើងអស់កល្បជាអង្វែងតរៀងទៅឬ?
១០ តើព្រះជាម្ចាស់ភ្លេចសម្ដែងព្រះហឫទ័យ
ប្រណីសន្ដោសចំពោះយើងហើយឬ?
នៅពេលព្រះអង្គព្រះអង្គព្រះពិរោធ
តើព្រះអង្គឈប់អាណិតអាសូរយើងហើយឬ? - សម្រាក
១១ ទូលបង្គំគិតទៀតថា ទូលបង្គំរងទុក្ខវេទនាដូច្នេះ
មកពីព្រះដ៏ខ្ពង់ខ្ពស់បំផុត
លែងសម្ដែងព្រះបារមីជួយយើងទៀតហើយ!
១២ ព្រះអម្ចាស់អើយ ទូលបង្គំរំឭកឡើងវិញ
នូវស្នាព្រះហស្ដរបស់ព្រះអង្គ
ទូលបង្គំនៅចាំពីកិច្ចការដ៏អស្ចារ្យ
ដែលព្រះអង្គបានធ្វើកាលពីជំនាន់ដើម។
១៣ ទូលបង្គំរិះគិតអំពីកិច្ចការទាំងប៉ុន្មាន
ដែលព្រះអង្គបានធ្វើ
ទូលបង្គំពិចារណាអំពីស្នាព្រះហស្ដ
ដ៏ថ្កុំថ្កើងរបស់ព្រះអង្គ។
១៤ ព្រះជាម្ចាស់អើយ
មាគ៌ារបស់ព្រះអង្គជាមាគ៌ាដ៏វិសុទ្ធ
គ្មានព្រះឯណាទៀតធំឧត្តុង្គឧត្ដម
ដូចព្រះអង្គឡើយ។
១៥ មានតែព្រះអង្គទេដែលធ្វើការអស្ចារ្យ
ព្រះអង្គបានសម្ដែងឫទ្ធានុភាព
ឲ្យជាតិសាសន៍នានាឃើញ។
១៦ ព្រះអង្គបានប្រើឫទ្ធិបារមី
លោះប្រជារាស្ដ្ររបស់ព្រះអង្គ
គឺព្រះអង្គបានរំដោះពូជពង្សរបស់លោកយ៉ាកុប
និងពូជពង្សរបស់លោកយ៉ូសែប។ - សម្រាក
១៧ ឱព្រះជាម្ចាស់អើយ
ទឹកសមុទ្របានឃើញព្រះអង្គ!
ពេលទឹកសមុទ្របានឃើញព្រះអង្គ វាពុះកញ្ជ្រោល
សូម្បីតែបាតសមុទ្រក៏រញ្ជួយញាប់ញ័រដែរ។
១៨ មានភ្លៀងបង្អុរធ្លាក់ចុះពីលើមេឃ
ដូចទឹកជ្រោះធ្លាក់
ហើយក៏មានផ្គរលាន់ឮពីលើមេឃ
មកយ៉ាងខ្លាំងដែរ
រន្ទះរបស់ព្រះអង្គភ្លឺផ្លេកពាសពេញផ្ទៃមេឃ។
១៩ នៅពេលផ្គរលាន់បន្លឺសំឡេងយ៉ាងគគ្រឹកគគ្រេង
ផ្លេកបន្ទោររបស់ព្រះអង្គភ្លឺចាំងមកលើពិភពលោក
ធ្វើឲ្យផែនដីរញ្ជួយញាប់ញ័រ។
២០ ព្រះអង្គយាងកាត់សមុទ្រ
ព្រះអង្គយាងកាត់មហាសាគរ
គ្មាននរណាអាចរកដានព្រះបាទា
របស់ព្រះអង្គឃើញទេ។
២១ ព្រះអង្គដឹកនាំប្រជារាស្ដ្ររបស់ព្រះអង្គ
តាមរយៈលោកម៉ូសេ និងលោកអរ៉ុន
ដូចគង្វាលដឹកនាំហ្វូងចៀមដែរ។
៧៨
អតីតកាលជាមេរៀនដែលយើងត្រូវចងចាំទុក
១ កំណាព្យរបស់លោកអសាភ។
ប្រជាជនរបស់ខ្ញុំអើយ ចូរត្រងត្រាប់សេចក្ដី
ដែលខ្ញុំប្រៀនប្រដៅអ្នករាល់គ្នា!
ចូរផ្ទៀងត្រចៀកស្ដាប់ពាក្យ
ដែលខ្ញុំនិយាយប្រាប់អ្នករាល់គ្នា!។
២ ខ្ញុំនឹងថ្លែងប្រាប់អ្នករាល់គ្នា
នូវបទពិសោធពីអតីតកាល
ខ្ញុំនឹងបរិយាយប្រាប់អ្នករាល់គ្នាអំពីអត្ថន័យ
លាក់កំបាំងនៃព្រឹត្តិការណ៍នៅបុរាណកាល។
៣ អ្វីៗដែលយើងធ្លាប់ឮ អ្វីៗដែលយើងដឹង
អ្វីៗដែលដូនតាយើងធ្លាប់រ៉ាយរ៉ាប់ប្រាប់
៤ យើងនឹងថ្លែងប្រាប់កូនចៅរបស់យើង
ឥតលាក់លៀមឡើយ
យើងនឹងពណ៌នាពីឫទ្ធានុភាពរបស់ព្រះអម្ចាស់
និងពីស្នាព្រះហស្ដដ៏អស្ចារ្យដែលព្រះអង្គបានធ្វើ
ប្រាប់កូនចៅនៅជំនាន់ក្រោយ
ដើម្បីលើកតម្កើងព្រះអង្គ។
៥ ព្រះអង្គតាក់តែងច្បាប់ឲ្យកូនចៅ
របស់លោកយ៉ាកុប
ព្រះអង្គប្រទានវិន័យមកឲ្យពូជពង្ស
របស់លោកអ៊ីស្រាអែល
ព្រះអង្គបង្គាប់បុព្វបុរសរបស់យើង
ឲ្យបង្រៀនសេចក្ដីទាំងនោះដល់កូនចៅ
៦ ដើម្បីឲ្យមនុស្សនៅជំនាន់ក្រោយស្គាល់ដែរ
ហើយឲ្យកូនចៅដែលនឹងកើតមក
បង្រៀនតៗគ្នារហូតទៅ។
៧ ធ្វើយ៉ាងនេះ ពួកគេនឹងផ្ញើជីវិតលើព្រះជាម្ចាស់
មិនភ្លេចពីស្នាព្រះហស្ដរបស់ព្រះអង្គ
ហើយពួកគេនឹងគោរពតាមបទបញ្ជារបស់ព្រះអង្គ
៨ ដើម្បីកុំឲ្យពួកគេបានដូចបុព្វបុរស
នៅជំនាន់មុន ដែលមានចិត្តកោងកាច
បះបោរប្រឆាំងនឹងព្រះជាម្ចាស់
មានចិត្តមិនទៀង ហើយមានគំនិតមិនស្មោះត្រង់
នឹងព្រះអង្គនោះឡើយ។
៩ កុលសម្ព័ន្ធអេប្រាអ៊ីមដែលជាកងទ័ពបាញ់ព្រួញ
បានបាក់ទ័ពនៅថ្ងៃធ្វើចម្បាំង
១០ មកពីពួកគេពុំបានគោរពសម្ពន្ធមេត្រី
របស់ព្រះជាម្ចាស់
គឺមិនព្រមកាន់តាមវិន័យរបស់ព្រះអង្គ
១១ ពួកគេបានភ្លេចពីស្នាព្រះហស្ដដ៏ឧត្តុង្គឧត្ដម
និងភ្លេចពីការដ៏អស្ចារ្យផ្សេងៗ
ដែលព្រះអង្គបានសម្ដែងឲ្យគេឃើញ។
១២ នៅតំបន់សូអាន ក្នុងស្រុកអេស៊ីប
ព្រះអង្គបានធ្វើការអស្ចារ្យមួយ
ឲ្យបុព្វបុរសរបស់គេឃើញ
១៣ គឺព្រះអង្គបានញែកទឹកសមុទ្រ
ឲ្យពួកគេដើរឆ្លង
ព្រះអង្គធ្វើឲ្យទឹកផ្តុំគ្នានៅនឹងថ្កល់
មួយកន្លែងដូចកំពែង។
១៤ នៅពេលថ្ងៃ ព្រះអង្គដឹកនាំគេដោយដុំពពក
ហើយរាល់យប់ព្រះអង្គដឹកនាំគេ
ដោយដុំភ្លើងជាពន្លឺ។
១៥ ព្រះអង្គបានបំបែកផ្ទាំងថ្មក្នុងវាលរហោស្ថាន
ឲ្យគេហូបទឹកដែលហូរចេញ
យ៉ាងបរិបូណ៌ពីបាតដីមក។
១៦ ព្រះអង្គបានធ្វើឲ្យមានទឹក
ហូរចេញពីផ្ទាំងសិលាមក
ដូចជាទឹកទន្លេ។
១៧ ទោះជាយ៉ាងនេះក្តី
ពួកគេនៅតែប្រព្រឹត្តអំពើបាប
ខុសនឹងព្រះហឫទ័យព្រះអង្គជានិច្ច
ពួកគេបះបោរប្រឆាំងនឹងព្រះដ៏ខ្ពង់ខ្ពស់បំផុត
នៅវាលរហោស្ថានដ៏ហួតហែងនោះ។
១៨ ពួកគេហ៊ានល្បងលមើលព្រះជាម្ចាស់
ដោយសូមឲ្យព្រះអង្គប្រទានម្ហូបអាហារ
តាមទំនើងចិត្តរបស់ខ្លួន។
១៩ គេនាំគ្នាពោលពាក្យប្រឆាំងនឹងព្រះជាម្ចាស់ថា:
តើព្រះជាម្ចាស់អាចជប់លៀងយើង
ក្នុងវាលរហោស្ថាននេះបានឬ?
២០ ព្រះអង្គបានវាយផ្ទាំងថ្មឲ្យមានទឹក
ហូរចេញមក ដូចជាទឹកជ្រោះធ្លាក់មែន
ប៉ុន្តែ តើព្រះអង្គអាចប្រទាននំបុ័ង
និងផ្គត់ផ្គង់សាច់មកឲ្យ
ប្រជារាស្ដ្ររបស់ព្រះអង្គបានដែរឬ?
២១ ពេលព្រះអម្ចាស់ឮពាក្យរបស់ពួកគេ
ព្រះអង្គព្រះអង្គព្រះពិរោធក្រៃលែង
ព្រះអង្គក្ដៅក្រហាយនឹងពូជពង្ស
របស់លោកយ៉ាកុប
ព្រះអង្គខ្ញាល់ទាស់នឹងជនជាតិអ៊ីស្រាអែល
២២ ព្រោះពួកគេគ្មានជំនឿលើព្រះជាម្ចាស់
ពួកគេពុំបានផ្ញើជីវិតលើព្រះអង្គ
ដែលអាចសង្គ្រោះគេនោះឡើយ។
២៣ ទោះជាយ៉ាងណាក្តី ព្រះអង្គបានបង្គាប់ពពក
ព្រះអង្គបានបើកផ្ទៃមេឃ
២៤ ហើយប្រទាននំម៉ាណាធ្លាក់ចុះមកដូចភ្លៀង
ឲ្យពួកគេធ្វើជាអាហារ
គឺព្រះអង្គប្រទានស្រូវពីស្ថានសួគ៌
មកឲ្យពួកគេ។
២៥ ពួកគេម្នាក់ៗបានបរិភោគអាហាររបស់ពួកទេវទូត
ព្រះអង្គប្រទានឲ្យគេ
បរិភោគឆ្អែតទាំងអស់គ្នា។
២៦ នៅលើមេឃ ព្រះអង្គបានធ្វើឲ្យមានខ្យល់
បក់មកពីទិសខាងកើត
ហើយព្រះអង្គក៏ធ្វើឲ្យមានខ្យល់
បក់មកពីទិសខាងត្បូងដែរ។
២៧ ព្រះអង្គធ្វើឲ្យមានសាច់យ៉ាងច្រើន
ដូចធូលីដីធ្លាក់ពីលើមេឃមក
គឺព្រះអង្គប្រទានសត្វស្លាបយ៉ាងច្រើន
ដូចគ្រាប់ខ្សាច់នៅតាមឆ្នេរសមុទ្រ
២៨ ធ្លាក់ចុះមកកណ្ដាលជំរំរបស់ពួកគេ
ជុំវិញកន្លែងដែលគេស្នាក់នៅ។
២៩ ពួកគេបានបរិភោគឆ្អែតស្កប់ស្កល់
ដោយព្រះជាម្ចាស់ធ្វើតាមចិត្ត
ប៉ងប្រាថ្នារបស់ពួកគេ។
៣០ ប៉ុន្តែ ទោះបីគេមានម្ហូបអាហារនៅពេញមាត់ក្តី
ក៏ពួកគេនៅតែពុំព្រមស្កប់ចិត្តដដែល
៣១ ជាហេតុនាំឲ្យព្រះជាម្ចាស់ព្រះអង្គព្រះពិរោធ
ហើយប្រហារជីវិតពួកអ្នកខ្លាំងពូកែជាងគេ
ព្រមទាំងយុវជនដែលកំពុងតែពេញកម្លាំង
ក្នុងចំណោមជនជាតិអ៊ីស្រាអែលផងដែរ។
៣២ ទោះបីយ៉ាងនេះក្តី
ក៏ពួកគេនៅតែប្រព្រឹត្តអំពើបាបដដែល
ពួកគេពុំបានជឿលើព្រះអង្គ
ដែលធ្វើការអស្ចារ្យទាំងនោះទេ។
៣៣ ដូច្នេះ ព្រះអង្គក៏ប្រហារជីវិតរបស់គេ
តែក្នុងមួយរយៈពេលដ៏ខ្លី
ព្រះអង្គផ្ដាច់អាយុជីវិតរបស់គេ
យ៉ាងសែនវេទនាបំផុត។
៣៤ ពេលឃើញព្រះជាម្ចាស់ប្រហារជីវិត
អ្នកខ្លះក្នុងចំណោមពួកគេ
ពួកគេក៏នាំគ្នាស្វែងរកព្រះអង្គ
ហើយប្រែចិត្តគំនិតមករកព្រះអង្គវិញ។
៣៥ ពួកគេនឹកឃើញថា
ព្រះជាម្ចាស់ជាថ្មដារបស់ពួកគេ
ហើយថាព្រះដ៏ខ្ពង់ខ្ពស់បំផុតបានការពារពួកគេ។
៣៦ ក៏ប៉ុន្តែតាមពិត ពួកគេចង់បោកប្រាស់ព្រះអង្គ
គឺអ្វីៗដែលគេនិយាយចេញមក
សុទ្ធតែជាពាក្យកុហកទាំងអស់។
៣៧ ពួកគេមានចិត្តមិនទៀងនឹងព្រះអង្គទេ
ហើយក៏ក្បត់នឹងសម្ពន្ធមេត្រីរបស់ព្រះអង្គដែរ។
៣៨ រីឯព្រះអង្គវិញ
ព្រះអង្គមានព្រះហឫទ័យអាណិតអាសូរជានិច្ច
ព្រះអង្គបានលើកលែងទោសឲ្យពួកគេ
គឺព្រះអង្គមិនប្រហារជីវិតពួកគេទេ
ជាច្រើនលើកច្រើនសា ព្រះអង្គតែងតែទប់
ព្រះហឫទ័យមិនឲ្យមានព្រះពិរោធ
ព្រះអង្គអត់ធ្មត់ចំពោះពួកគេ។
៣៩ ព្រះអង្គនឹកចាំថា
ពួកគេគ្រាន់តែជាមនុស្សលោកីយ៍ប៉ុណ្ណោះ
ជីវិតរបស់ពួកគេប្រៀបបាននឹងដង្ហើម
ដែលរសាត់បាត់ទៅឥតវិលមកវិញឡើយ។
៤០ ពួកគេបានបះបោរប្រឆាំងនឹងព្រះអង្គ
នៅវាលរហោស្ថានជាច្រើនលើកច្រើនសា
ហើយក្នុងវាលហួតហែងនោះ ពួកគេតែងតែ
ធ្វើឲ្យព្រះអង្គព្រួយព្រះហឫទ័យ!។
៤១ ពួកគេចេះតែល្បងលមើលព្រះជាម្ចាស់ជានិច្ច
ពួកគេនាំគ្នាធ្វើឲ្យព្រះដ៏វិសុទ្ធ
របស់ជនជាតិអ៊ីស្រាអែលទាស់ព្រះហឫទ័យ។
៤២ ពួកគេពុំបាននឹកឃើញ
អំពីឫទ្ធានុភាពរបស់ព្រះអង្គទេ
ហើយក៏ពុំបាននឹកឃើញពីថ្ងៃ
ដែលព្រះអង្គបានរំដោះពួកគេ
ឲ្យរួចពីកណ្ដាប់ដៃរបស់បច្ចាមិត្តដែរ។
៤៣ ពួកគេពុំបាននឹកឃើញពីទីសម្គាល់អស្ចារ្យផ្សេងៗ
ដែលព្រះអង្គធ្វើនៅស្រុកអេស៊ីបទេ
ពួកគេពុំបាននឹកឃើញពីការអស្ចារ្យផ្សេងៗ
ដែលព្រះអង្គធ្វើនៅតំបន់សូអានឡើយ។
៤៤ ព្រះអង្គបានធ្វើឲ្យទឹកនៅដៃទន្លេនីល
ប្រែទៅជាឈាមជាហេតុធ្វើឲ្យជនជាតិ
អេស៊ីបរកទឹកផឹកមិនបាន។
៤៥ ព្រះអង្គបានចាត់មូសឲ្យទៅខាំជនជាតិអេស៊ីប
និងចាត់កង្កែបឲ្យទៅបំផ្លិចបំផ្លាញ
អ្វីៗទាំងអស់។
៤៦ ព្រះអង្គធ្វើឲ្យមានចង្រិត
ទៅស៊ីបង្ហិនភោគផលរបស់ពួកគេ
ហើយឲ្យកណ្ដូបទៅស៊ីបង្ហិនដំណាំរបស់គេ។
៤៧ ព្រះអង្គបានធ្វើឲ្យមានព្រិលធ្លាក់មក
កម្ទេចចម្ការទំពាំងបាយជូររបស់គេ
ហើយមានធាតុអាកាសត្រជាក់
មកបំផ្លាញដើមឈើរបស់គេខូចអស់។
៤៨ ហ្វូងគោរបស់គេត្រូវវិនាសដោយសារព្រិល
ហ្វូងចៀមរបស់គេត្រូវវិនាស
ដោយសាររន្ទះបាញ់។
៤៩ ព្រះជាម្ចាស់ព្រះអង្គព្រះពិរោធ
ទាស់នឹងជនជាតិអេស៊ីបយ៉ាងខ្លាំង
ព្រះអង្គដាក់ទោសពួកគេ
ឲ្យរងទុក្ខលំបាកយ៉ាងសែនវេទនា
ដោយចាត់ពួកទេវទូតឲ្យមកប្រហារពួកគេ។
៥០ ព្រះអង្គធ្វើតាមព្រះពិរោធរបស់ព្រះអង្គ
ដោយឥតសំចៃជីវិតជនជាតិនោះឡើយ
ព្រះអង្គបានធ្វើឲ្យគ្រោះកាច
កើតមានដល់ពួកគេ
៥១ គឺព្រះអង្គប្រហារជីវិតកូនច្បងទាំងប៉ុន្មាន
របស់ជនជាតិអេស៊ីប កូនដែលកើតមកមុនគេ
ក្នុងពូជពង្សរបស់លោកហាំ។
៥២ ព្រះអង្គបាននាំប្រជារាស្ដ្ររបស់ព្រះអង្គ
ចេញពីស្រុកនោះដូចហ្វូងចៀមចេញពីក្រោល
ព្រះអង្គដឹកនាំពួកគេនៅវាលរហោស្ថាន
ដូចគង្វាលឃ្វាលហ្វូងចៀមរបស់ខ្លួន។
៥៣ ព្រះអង្គដឹកនាំពួកគេយ៉ាងសុខសាន្ត
ឥតភ័យខ្លាចអ្វីឡើយ
តែខ្មាំងសត្រូវរបស់ពួកគេ
ត្រូវលិចលង់ក្នុងទឹកសមុទ្រ។
៥៤ ព្រះអង្គនាំពួកគេទៅកាន់ទឹកដីដ៏វិសុទ្ធ
គឺទៅកាន់ភ្នំដែលព្រះអង្គវាយយកបាន
ដោយឫទ្ធិបារមីរបស់ព្រះអង្គ។
៥៥ ព្រះអង្គបណ្តេញប្រជាជាតិនានាចេញពីមុខពួកគេ
ហើយចែកទឹកដីឲ្យពួកគេជាមត៌ក
គឺព្រះអង្គឲ្យកុលសម្ព័ន្ធអ៊ីស្រាអែល
រស់នៅក្នុងលំនៅស្ថានរបស់ប្រជាជាតិទាំងនោះ។
៥៦ ប៉ុន្តែ ពួកគេបានល្បងលព្រះជាម្ចាស់
ជាព្រះដ៏ខ្ពង់ខ្ពស់បំផុត
ពួកគេបានបះបោរប្រឆាំងនឹងព្រះអង្គ
ដោយមិនព្រមធ្វើតាមដំបូន្មានរបស់ ព្រះអង្គឡើយ។
៥៧ ពួកគេបានងាកចេញពីព្រះអង្គ
និងក្បត់ព្រះអង្គដូចដូនតារបស់ពួកគេ
ពួកគេមានចិត្តវៀចវេរដូចផ្លែកណ្ដៀវ។
៥៨ ពួកគេប្រព្រឹត្តខុសចំពោះព្រះអង្គ
ដោយទៅថ្វាយបង្គំព្រះក្លែងក្លាយ
នៅតាមទីសក្ការៈរបស់សាសន៍ដទៃនៅលើភ្នំ
ធ្វើឲ្យទាស់ព្រះហឫទ័យព្រះអង្គជាខ្លាំង។
៥៩ ព្រះជាម្ចាស់ឃើញគេប្រព្រឹត្តដូច្នេះ
ព្រះអង្គព្រះអង្គព្រះពិរោធ
ហើយលែងរវីរវល់នឹងជនជាតិ
អ៊ីស្រាអែលទៀត។
៦០ ព្រះអង្គបោះបង់ចោលព្រះដំណាក់នៅស៊ីឡូ
ព្រះអង្គបោះបង់ចោលព្រះពន្លា
ដែលព្រះអង្គធ្លាប់គង់នៅជាមួយមនុស្សលោក។
៦១ ព្រះអង្គបណ្តោយឲ្យខ្មាំងសត្រូវ
រឹបអូសយកបានហិបនៃសម្ពន្ធមេត្រី
ដែលជានិមិត្តរូបនៃឫទ្ធិបារមី
និងសិរីរុងរឿងរបស់ព្រះអង្គ។
៦២ ព្រះអង្គបណ្តោយឲ្យខ្មាំងសត្រូវប្រហារជីវិត
ប្រជារាស្ដ្ររបស់ព្រះអង្គដោយមុខដាវ
ព្រោះព្រះអង្គព្រះអង្គព្រះពិរោធ
នឹងពួកគេជាខ្លាំង។
៦៣ ពួកយុវជនបានបាត់បង់ជីវិត
ដោយសារភ្លើងសង្គ្រាម
ហើយគ្មាននៅសល់កំលោះ
ដើម្បីរៀបការជាមួយពួកស្ត្រីក្រមុំទៀតឡើយ។
៦៤ ពួកបូជាចារ្យបានស្លាប់ដោយមុខដាវ
ហើយស្ត្រីមេម៉ាយ
មិនអាចធ្វើពិធីកាន់ទុក្ខបានទេ។
៦៥ ពេលនោះ ព្រះអម្ចាស់តើនឡើង
ដូចគេក្រោកពីដំណេក
ឬដូចអ្នកចម្បាំងដ៏ពូកែទើបនឹងស្វាងស្រាឡើងវិញ
៦៦ ព្រះអង្គវាយខ្មាំងសត្រូវពីក្រោយ
ឲ្យបាក់មុខអស់កល្បជានិច្ច។
៦៧ ព្រះអង្គមិនរវីរវល់នឹងពូជពង្សរបស់លោកយ៉ូសែប
ព្រះអង្គពុំបានជ្រើសរើសកុលសម្ព័ន្ធអេប្រាអ៊ីមទេ
៦៨ តែព្រះអង្គបានជ្រើសរើសកុលសម្ព័ន្ធយូដាវិញ
ព្រះអង្គគាប់ព្រះហឫទ័យនឹងភ្នំស៊ីយ៉ូន។
៦៩ នៅទីនោះ ព្រះអង្គបានសង់ទីសក្ការៈ
របស់ព្រះអង្គយ៉ាងល្អរឹងប៉ឹង ដូចផ្ទៃមេឃដ៏ខ្ពស់
ព្រះអង្គធ្វើឲ្យទីសក្ការៈនោះ
បានរឹងមាំដូចផែនដីរហូតតទៅ។
៧០ ព្រះអង្គបានជ្រើសរើសព្រះបាទដាវីឌ
ជាអ្នកបម្រើរបស់ព្រះអង្គ
ព្រះអង្គបានយកស្តេចចេញពីកន្លែងឃ្វាលចៀម
៧១ ព្រះអង្គបានយកស្តេចចេញពីហ្វូងចៀមមក
ដើម្បីឲ្យឃ្វាលពូជពង្សរបស់លោកយ៉ាកុប
គឺជនជាតិអ៊ីស្រាអែល
ដែលជាប្រជារាស្ដ្រផ្ទាល់របស់ព្រះអង្គ។
៧២ ព្រះបាទដាវីឌដឹកនាំជនជាតិអ៊ីស្រាអែល
ដោយចិត្តស្មោះត្រង់
ព្រះរាជាដឹកនាំពួកគេយ៉ាងប៉ិនប្រសប់។
៧៩
ឱព្រះអម្ចាស់អើយ សូមយាងមកជួយសង្គ្រោះយើងខ្ញុំផង!
១ ទំនុករបស់លោកអសាភ។
ឱព្រះជាម្ចាស់អើយ
ប្រជាជាតិនានាបានឈ្លានពាន
ទឹកដីរបស់ព្រះអង្គ
ពួកគេបានធ្វើឲ្យព្រះវិហារ
ដ៏វិសុទ្ធរបស់ព្រះអង្គទៅជាសៅហ្មង
ពួកគេបានកម្ទេចក្រុងយេរូសាឡឹម។
២ ពួកគេបានបោះសាកសពអ្នកបម្រើរបស់ព្រះអង្គ
ទៅឲ្យត្មាតស៊ី
យកសាកសពអ្នកជឿព្រះអង្គ
ទៅឲ្យសត្វតិរច្ឆានធ្វើជាចំណី។
៣ ពួកគេបានបង្ហូរឈាមប្រជាជន
នៅជុំវិញក្រុងយេរូសាឡឹមឲ្យហូរដូចទឹក
ហើយគ្មាននរណាបញ្ចុះសព
ប្រជាជនទាំងនោះទេ។
៤ អ្នកស្រុកជិតខាងនាំគ្នាជេរប្រមាថយើងខ្ញុំ
អ្នកនៅជុំវិញយើងខ្ញុំ នាំគ្នាចំអកឡកឡឺយ
យករឿងយើងខ្ញុំទៅលេងសើច។
៥ ព្រះអម្ចាស់អើយ តើព្រះអង្គទ្រង់ព្រះពិរោធ
នឹងយើងខ្ញុំដូច្នេះ រហូតដល់កាលណា?
តើព្រះអង្គនៅតែមានព្រះហឫទ័យ
ក្ដៅឆេះឆួលនឹងយើងខ្ញុំដល់កាលណាទៀត?
៦ គួរតែព្រះអង្គជះព្រះពិរោធ
ទៅលើប្រជាជាតិដែលពុំស្គាល់ព្រះអង្គ
និងនគរនានាដែលមិនគោរពបម្រើព្រះនាម
ព្រះអង្គនោះវិញ។
៧ ដ្បិតពួកគេបានសម្លាប់រង្គាលពូជពង្ស
របស់លោកយ៉ាកុប
ព្រមទាំងបំផ្លាញស្រុកទេសរបស់លោកផង។
៨ សូមកុំដាក់ទោសយើងខ្ញុំ ព្រោះតែបុព្វបុរស
របស់យើងខ្ញុំបានធ្វើខុសនោះឡើយ
ផ្ទុយទៅវិញ សូមប្រញាប់សម្ដែងព្រះហឫទ័យ
អាណិតអាសូរយើងខ្ញុំផង!
ដ្បិតយើងខ្ញុំកំពុងតែលិចលង់។
៩ ឱព្រះជាម្ចាស់ជាព្រះសង្គ្រោះនៃយើងខ្ញុំអើយ
សូមយាងមកជួយយើងខ្ញុំ ដោយយល់ដល់
សិរីរុងរឿងនៃព្រះនាមរបស់ព្រះអង្គ
សូមរំដោះយើងខ្ញុំ
និងលើកលែងទោសយើងខ្ញុំឲ្យរួចពីបាប
ដោយយល់ដល់ព្រះនាមរបស់ព្រះអង្គ។
១០ ហេតុអ្វីបានជាបណ្តោយឲ្យប្រជាជាតិនានា
ពោលថា «ព្រះរបស់គេនៅឯណា?»
ព្រះអង្គអើយ សូមឲ្យប្រជាជាតិទាំងឡាយ
បានដឹងនៅចំពោះមុខយើងខ្ញុំថា
ព្រះអង្គនឹងដាក់ទោសពួកគេ
ព្រោះគេបានបង្ហូរឈាមអ្នកបម្រើរបស់ព្រះអង្គ។
១១ សូមស្ដាប់សំឡេងថ្ងូររបស់ពួកអ្នកទោស
ហើយដោយព្រះអង្គមានឫទ្ធានុភាព
សូមរំដោះអ្នកដែលមានទោស
ដល់ជីវិតទាំងនោះផង។
១២ ព្រះអម្ចាស់អើយ ប្រជាជាតិជិតខាង
បានធ្វើឲ្យព្រះអង្គបាត់បង់កិត្តិយស
ដូច្នេះ សូមធ្វើឲ្យគេបាត់បង់កិត្តិយសវិញ
មួយជាប្រាំពីរ។
១៣ រីឯយើងខ្ញុំដែលជាប្រជារាស្ដ្រ
និងជាហ្វូងចៀមរបស់ព្រះអង្គ
នឹងនាំគ្នាលើកតម្កើងព្រះអង្គអស់កល្បជានិច្ច
យើងខ្ញុំនឹងសរសើរតម្កើងព្រះអង្គ
អស់កល្បជាអង្វែងតរៀងទៅ។
៨០
ឱព្រះអម្ចាស់ជាព្រះនៃពិភពទាំងមូលអើយ សូមនាំយើងខ្ញុំមកវិញ!
១ បទពីសៀវភៅរបស់គ្រូចម្រៀង។
បទ«ផ្កាម្លិះ»។ សក្ខីភាព។
ទំនុកតម្កើងរបស់លោកអសាភ។
២ ឱព្រះជាម្ចាស់ដែលជាគង្វាល
នៃជនជាតិអ៊ីស្រាអែលអើយ
សូមផ្ទៀងព្រះកាណ៌ស្ដាប់យើងខ្ញុំ
ព្រះអង្គដឹកនាំពូជពង្សរបស់លោកយ៉ូសែប
ដូចគង្វាលដឹកនាំហ្វូងចៀម
ឱព្រះអង្គដែលគង់នៅលើពួកខេរូប៊ីម*អើយ
សូមសម្ដែងព្រះបារមីដ៏រុងរឿងរបស់ព្រះអង្គ
៣ សូមសម្ដែងព្រះចេស្ដាឲ្យកុលសម្ព័ន្ធ
អេប្រាអ៊ីម បេនយ៉ាមីន និងម៉ាណាសេឃើញ
សូមយាងមកសង្គ្រោះយើងខ្ញុំផង!
៤ ឱព្រះជាម្ចាស់អើយ សូមនាំយើងខ្ញុំមកវិញ
សូមទតមកយើងខ្ញុំដោយព្រះហឫទ័យ
សប្បុរសផង នោះយើងខ្ញុំនឹងបានរួចជីវិត!
៥ ឱព្រះអម្ចាស់ជាព្រះនៃពិភពទាំងមូលអើយ
តើព្រះអង្គព្រះអង្គព្រះពិរោធ
មិនស្ដាប់ពាក្យទូលអង្វររបស់ប្រជារាស្ដ្រព្រះអង្គ
ដល់កាលណាទៀត?
៦ ព្រះអង្គធ្វើឲ្យយើងខ្ញុំសោកសង្រេង
ឥតស្រាកស្រាន្ត ឲ្យយើងខ្ញុំយំខ្សោះទឹកភ្នែក។
៧ ព្រះអង្គធ្វើឲ្យប្រជាជាតិជិតខាងឈ្លោះគ្នា
ដណ្ដើមយកទឹកដីយើងខ្ញុំ
ហើយខ្មាំងសត្រូវចំអកឡកឡឺយឲ្យយើងខ្ញុំ។
៨ ឱព្រះជាម្ចាស់នៃពិភពទាំងមូលអើយ
សូមនាំយើងខ្ញុំមកវិញ
សូមទតមកយើងខ្ញុំដោយ
ព្រះហឫទ័យសប្បុរសផង
នោះយើងខ្ញុំនឹងបានរួចជីវិត!
៩ ព្រះអង្គបានគាស់ទំពាំងបាយជូរមួយដើម
ពីស្រុកអេស៊ីបមក
ព្រះអង្គបានដេញប្រជាជាតិនានាចេញពីទឹកដី
ហើយយកទំពាំងបាយជូរនេះមកដាំជំនួស។
១០ ព្រះអង្គឆ្ការដីកន្លែងនោះយ៉ាងស្អាត
ដើមទំពាំងបាយជូរក៏ចាក់ឫស
ហើយដុះពាសពេញនៅក្នុងស្រុក
១១ ម្លប់ទំពាំងបាយជូរគ្របដណ្តប់ទៅលើភ្នំនានា
ហើយមែករបស់វាគ្របពីលើដើមតាត្រៅដ៏ខ្ពស់ៗ។
១២ ដើមទំពាំងបាយជូរបែកមែករហូតទៅដល់សមុទ្រ
ហើយមានពន្លកលាស់ចេញមក
រហូតទៅដល់ទន្លេអឺប្រាត។
១៣ ហេតុអ្វីបានជាព្រះអង្គរំលំរបងចម្ការ
ទំពាំងបាយជូរនេះ
បណ្តាលឲ្យអស់អ្នកធ្វើដំណើរ
កាត់តាមនោះនាំគ្នាបេះផ្លែដូច្នេះ?
១៤ ជ្រូកព្រៃមកបំផ្លិចបំផ្លាញចម្ការទំពាំងបាយជូរ
ហើយសត្វនានានៅទីវាលក៏នាំគ្នាស៊ីដើម
ទំពាំងបាយជូរនេះដែរ។
១៥ ឱព្រះជាម្ចាស់នៃពិភពទាំងមូលអើយ
សូមយាងមកវិញ!
សូមទតមើលពីស្ថានបរមសុខមក!
សូមយាងមកជួយចម្ការទំពាំងបាយជូរនេះផង!
១៦ សូមការពារចម្ការទំពាំងបាយជូរ
ដែលព្រះអង្គបានដាំ ដោយព្រះអង្គផ្ទាល់
គឺបុត្រដែលព្រះអង្គបានពង្រឹងឲ្យមាំមួនឡើង!
១៧ សូមឲ្យខ្មាំងសត្រូវដែលបានដុតបំផ្លាញ
និងកាប់ឆ្ការចម្ការទំពាំងបាយជូរនេះ
ត្រូវវិនាសសូន្យទៅ
នៅពេលព្រះអង្គគំរាមកំហែងពួកគេ។
១៨ សូមដាក់ព្រះហស្ដលើមនុស្ស
ដែលស្ថិតនៅខាងស្តាំព្រះអង្គ
គឺលើបុត្រមនុស្សដែលព្រះអង្គបានពង្រឹង
ឲ្យមាំមួនឡើង។
១៩ យើងខ្ញុំនឹងមិនបែកចិត្តចេញពីព្រះអង្គទៀតឡើយ
សូមប្រោសប្រទានឲ្យយើងខ្ញុំ
រស់រានមានជីវិតឡើងវិញផង
នោះយើងខ្ញុំគោរពបម្រើព្រះនាមរបស់ព្រះអង្គ។
២០ ឱព្រះអម្ចាស់ជាព្រះនៃពិភពទាំងមូលអើយ
សូមនាំយើងខ្ញុំមកវិញ
សូមទតមកយើងខ្ញុំដោយព្រះហឫទ័យ
សប្បុរសផង នោះយើងខ្ញុំនឹងបានរួចជីវិត!
៨១
ប្រជារាស្ដ្ររបស់យើងអើយ ចូរស្ដាប់សេចក្ដីដែលយើងរំឭកដាស់តឿនអ្នក
១ ទំនុកពីសៀវភៅរបស់គ្រូចម្រៀង។
សម្រាប់ពិណពីស្រុកកាថ។ ទំនុករបស់លោកអសាភ។
២ ចូរបន្លឺសំឡេង
ដោយអំណរថ្វាយព្រះជាម្ចាស់
ដែលជាកម្លាំងរបស់យើង!
ចូរបន្លឺសំឡេងសរសើរតម្កើងព្រះ
របស់លោកយ៉ាកុប!
៣ ចូរនាំគ្នាប្រគំតូរ្យតន្ដ្រីឡើង
ចូរវាយស្គរ និងលេងពិណយ៉ាងពីរោះ
ព្រមទាំងដេញចាប៉ីផងដែរ!
៤ ចូរផ្លុំស្នែងនៅពេលចាប់ផ្តើមខ្នើត
នៅពេលខែពេញបូណ៌មី
គឺជាថ្ងៃបុណ្យរបស់យើង
៥ ព្រោះជាច្បាប់នៅស្រុកអ៊ីស្រាអែល
ជាវិន័យនៃព្រះរបស់លោកយ៉ាកុប
៦ ជាដំបូន្មានដែលព្រះអង្គបង្គាប់មក
ពូជពង្សរបស់លោកយ៉ូសែប
នៅពេលព្រះអង្គវាយប្រហារស្រុកអេស៊ីប។
ខ្ញុំបានឮសំឡេងមួយដែលខ្ញុំមិនធ្លាប់ស្គាល់
ទាល់តែសោះ បន្លឺថា:
៧ យើងបានយកអម្រែកដ៏ធ្ងន់ចុះពីស្មាអ្នក
ហើយក៏យកបន្ទុកដ៏ធ្ងន់ចេញពីដៃអ្នកដែរ!
៨ នៅគ្រាមានទុក្ខវេទនា អ្នកបានស្រែកហៅយើង
យើងក៏បានជួយរំដោះអ្នក
យើងបានឆ្លើយតបពីក្នុងខ្យល់ព្យុះ
យើងបានល្បងលមើលចិត្តអ្នក
នៅប្រភពទឹកមេរីបា។ - សម្រាក
៩ ប្រជារាស្ដ្ររបស់យើងអើយ
ចូរស្ដាប់សេចក្ដីដែលយើងរំឭកដាស់តឿនអ្នក
ឱអ៊ីស្រាអែលអើយ ចូរស្ដាប់ពាក្យយើង
១០ កុំឲ្យមានព្រះណាមួយទៀត
នៅក្នុងចំណោមអ្នកឡើយ
កុំថ្វាយបង្គំព្រះដទៃឲ្យសោះ
១១ ដ្បិតយើងជាព្រះអម្ចាស់ ជាព្រះរបស់អ្នក
យើងបាននាំអ្នកចេញពីស្រុកអេស៊ីប
ចូរបើកចិត្តឲ្យទូលាយ
យើងនឹងឲ្យពរអ្នកយ៉ាងពេញបរិបូណ៌។
១២ ប៉ុន្តែ ប្រជារាស្ដ្ររបស់យើង
មិនបានធ្វើតាមពាក្យយើងទេ
អ៊ីស្រាអែលមិនចង់ស្គាល់យើងទៀតទេ។
១៣ ហេតុនេះហើយបានជាយើងបណ្តោយគេ
ទៅតាមចិត្តរឹងរូសរបស់ខ្លួន
គេក៏នាំគ្នាប្រព្រឹត្តតាមទំនើងចិត្ត។
១៤ ប្រសិនបើប្រជារាស្ដ្ររបស់យើងស្ដាប់ពាក្យយើង
ប្រសិនបើអ៊ីស្រាអែលដើរតាមមាគ៌ារបស់យើង
១៥ យើងមុខជាបង្ក្រាបខ្មាំងសត្រូវរបស់គេ
យើងនឹងវាយប្រហារបច្ចាមិត្តរបស់គេ
មួយរំពេចជាមិនខាន។
១៦ អស់អ្នកដែលស្អប់ព្រះអម្ចាស់
នឹងនាំគ្នាមកចុះចូលនឹងព្រះអង្គ
ហើយអ៊ីស្រាអែលនឹងបានសុខសាន្តរហូតតទៅ។
១៧ ព្រះជាម្ចាស់នឹងប្រទានស្រូវដ៏ល្អៗ
មកឲ្យអ៊ីស្រាអែលបរិភោគ
ព្រមទាំងឲ្យគេមានទឹកឃ្មុំបរិភោគ
យ៉ាងបរិបូណ៌ផង។
៨២
ព្រះជាម្ចាស់ជាចៅក្រមដ៏ខ្ពង់ខ្ពស់បំផុត
១ ទំនុកតម្កើងរបស់លោកអសាភ។
ព្រះជាម្ចាស់គង់នៅ
ក្នុងអង្គប្រជុំរបស់ព្រះអង្គ។
ព្រះអង្គកាត់ក្តីនៅក្នុងចំណោមព្រះនានា។
២ តើអ្នករាល់គ្នានៅតែកាត់ក្តីដោយអយុត្តិធម៌
គឺឲ្យមនុស្សអាក្រក់ឈ្នះដូច្នេះ
ដល់កាលណាទៀត? - សម្រាក
៣ ចូររកយុត្តិធម៌ឲ្យមនុស្សទន់ខ្សោយ
និងក្មេងកំព្រា
ចូរកាត់ក្តីឲ្យមនុស្សកំសត់ទុរគត
និងមនុស្សតោកយ៉ាក។
៤ ចូររំដោះមនុស្សទន់ខ្សោយ និងមនុស្សក្រីក្រ
ចូរយកពួកគេចេញឲ្យផុតពីកណ្ដាប់ដៃ
របស់មនុស្សអាក្រក់។
៥ អ្នករាល់គ្នាមិនដឹងមិនយល់អ្វីទាំងអស់
អ្នករាល់គ្នាដើរនៅក្នុងសេចក្ដីងងឹត
អ្នករាល់គ្នាលុបបំបាត់យុត្តិធម៌
ដែលជាគ្រឹះនៃពិភពលោក។
៦ យើងបានប្រាប់រួចហើយថា អ្នករាល់គ្នាជាព្រះ
អ្នករាល់គ្នាសុទ្ធតែជាបុត្ររបស់ព្រះ
ដ៏ខ្ពង់ខ្ពស់បំផុត។
៧ ប៉ុន្តែ អ្នករាល់គ្នានឹងត្រូវស្លាប់ដូចមនុស្សលោក
អ្នករាល់គ្នានឹងត្រូវបាត់បង់ជីវិត
ដូចអ្នកធំបាត់បង់តំណែងដែរ។
៨ ឱព្រះជាម្ចាស់អើយ
សូមក្រោកឡើងវិនិច្ឆ័យទោសមនុស្សលោក
ដ្បិតមនុស្សគ្រប់ជាតិសាសន៍
សុទ្ធតែជាប្រជារាស្ដ្រផ្ទាល់របស់ព្រះអង្គ!។
៨៣
ឱព្រះជាម្ចាស់អើយ សូមកុំនៅសំងំស្ងៀមឡើយ!
១ ចម្រៀងតម្កើងព្រះជាម្ចាស់។
ទំនុកតម្កើងរបស់លោកអសាភ។
២ ឱព្រះជាម្ចាស់អើយ
សូមកុំនៅសំងំស្ងៀមឡើយ!
ឱព្រះជាម្ចាស់អើយ សូមកុំនៅស្ងៀមស្ងាត់
ឥតកម្រើកដូច្នេះ!
៣ ដ្បិតខ្មាំងសត្រូវរបស់ព្រះអង្គ
កំពុងតែធ្វើសកម្មភាព
អស់អ្នកដែលស្អប់ព្រះអង្គ
កំពុងតែនាំគ្នាបះបោរ។
៤ ពួកគេរៀបចំគម្រោងការប្រឆាំង
នឹងប្រជារាស្ដ្ររបស់ព្រះអង្គ
ហើយឃុបឃិតគ្នាប្រឆាំងនឹងអស់អ្នក
ដែលស្ថិតនៅក្រោមការគ្រប់គ្រងរបស់ព្រះអង្គ។
៥ ពួកគេពោលថា “តោ៎ះ! យើងនាំគ្នាទៅប្រហារ
ជាតិសាសន៍នោះឲ្យរលាយសូន្យ
ដើម្បីកុំឲ្យនរណានឹកឃើញ
ឈ្មោះអ៊ីស្រាអែលទៀត!”។
៦ ពួកគេពិភាក្សាគ្នា ដោយមានចិត្តគំនិតតែមួយ
គេចុះសន្ធិសញ្ញាជាមួយគ្នាប្រឆាំងនឹងព្រះអង្គ
៧ គឺមានជនជាតិអេដុម ជនជាតិអ៊ីស្មាអែល
ជនជាតិម៉ូអាប់ ជនជាតិហាការ
៨ ជនជាតិកេបាល ជនជាតិអាម៉ូន
ជនជាតិអាម៉ាឡេក
ជនជាតិភីលីស្ទីន និងអ្នកស្រុកទីរ៉ុស
៩ ហើយសូម្បីតែជនជាតិអាស្ស៊ីរីក៏ចូលរួមជាមួយដែរ
គឺពួកគេបានចូលដៃជាមួយ
ពូជពង្សរបស់លោកឡុត។ - សម្រាក
១០ សូមប្រព្រឹត្តចំពោះពួកគេ
ដូចព្រះអង្គបានប្រព្រឹត្តចំពោះជនជាតិម៉ាឌីយ៉ាន
លោកស៊ីសេរ៉ា និងស្តេចយ៉ាប៊ីន
នៅត្រង់ទឹកជ្រោះគីសូនដែរ!
១១ ព្រះអង្គបានប្រហារពួកគេ
ឲ្យវិនាសនៅអែនឌ័រ
ហើយសាកសពរបស់ពួកគេបានក្លាយទៅជាជី។
១២ សូមដាក់ទោសអ្នកដឹកនាំរបស់គេ
ដូចព្រះអង្គបានដាក់ទោសស្តេចអូរឹប
និងស្តេចសឹប ហើយដាក់ទោសមេរបស់គេ
ដូចព្រះអង្គបានដាក់ទោសសេបា
និងសាល់មូណាដែរ ១៣ ដ្បិតពួកគេបាននិយាយថា
“យើងនាំគ្នាវាយដណ្ដើមយក
ទឹកដីរបស់ព្រះជាម្ចាស់!”។
១៤ ឱព្រះនៃទូលបង្គំអើយ
សូមឲ្យពួកគេបានដូចធូលីដីដែលត្រូវខ្យល់កួច
ឬដូចចំបើងដែលត្រូវខ្យល់ផាត់យកទៅ។
១៥ ភ្លើងឆាបឆេះព្រៃ
ឬអណ្ដាតភ្លើងឆាបឆេះភ្នំយ៉ាងណា
១៦ សូមប្រើខ្យល់ព្យុះរបស់ព្រះអង្គដេញតាមពួកគេ
និងប្រើព្យុះសង្ឃរារបស់ព្រះអង្គ
ធ្វើឲ្យពួកគេញ័ររន្ធត់យ៉ាងនោះដែរ។
១៧ ឱព្រះអម្ចាស់អើយ
សូមធ្វើឲ្យពួកគេអាម៉ាស់មុខ
ដើម្បីឲ្យគេស្វែងរកព្រះនាមរបស់ព្រះអង្គ។
១៨ សូមឲ្យពួកគេបាក់មុខ បាក់ស្បាតរហូតតទៅ
សូមឲ្យពួកគេងើបមុខមិនរួច
ហើយវិនាសសូន្យទៅ!
១៩ សូមឲ្យគេទទួលស្គាល់ថា
មានតែព្រះអង្គប៉ុណ្ណោះដែលជាព្រះអម្ចាស់
ព្រះអង្គជាព្រះដ៏ខ្ពង់ខ្ពស់បំផុត
នៅលើផែនដីទាំងមូល!។
៨៤
ទូលបង្គំស្រឡាញ់ព្រះដំណាក់របស់ព្រះអង្គណាស់!
១ ទំនុកពីសៀវភៅរបស់គ្រូចម្រៀង។
សម្រាប់ពិណពីស្រុកកាថ។
ទំនុករបស់កូនចៅលោកកូរេ។
២ ឱព្រះអម្ចាស់នៃពិភពទាំងមូលអើយ
ទូលបង្គំស្រឡាញ់ព្រះដំណាក់
របស់ព្រះអង្គណាស់!
៣ ទូលបង្គំអន្ទះអន្ទែងប្រាថ្នាចង់ចូល
ទៅក្នុងព្រះវិហាររបស់ព្រះអម្ចាស់ពន់ពេកក្រៃ
ទូលបង្គំបន្លឺសំឡេងតម្កើងព្រះដ៏មានព្រះជន្មគង់នៅ
អស់ពីកម្លាំងកាយ និងកម្លាំងចិត្ត។
៤ ឱព្រះអម្ចាស់នៃពិភពទាំងមូល
ឱព្រះជាម្ចាស់ជាព្រះមហាក្សត្រនៃទូលបង្គំអើយ!
សូម្បីតែសត្វចាប និងសត្វត្រចៀកកាំ
ក៏រកបានកន្លែងធ្វើសំបុកដាក់កូនចៅវា
នៅជិតអាសនៈរបស់ព្រះអង្គដែរ។
៥ មានសុភមង្គលហើយ
អស់អ្នកដែលរស់នៅក្នុងព្រះដំណាក់របស់ព្រះអង្គ
គេនឹងសរសើរតម្កើងព្រះអង្គរហូតតរៀងទៅ!។ - សម្រាក
៦ អ្នកណាពឹងផ្អែកលើកម្លាំងដែលមកពីព្រះអង្គ
អ្នកនោះមានសុភមង្គលហើយ!
ដ្បិតគេធ្វើដំណើរឡើងទៅកាន់ព្រះដំណាក់
របស់ព្រះអង្គដោយចិត្តស្មោះសរ។
៧ នៅពេលពួកគេដើរកាត់ជ្រោះរីងស្ងួត
ព្រះអង្គបានធ្វើឲ្យទីនោះប្រែទៅជាប្រភពទឹក
ហើយភ្លៀងនៅដើមរដូវក៏ធ្លាក់មកជាព្រះពរ
លើកន្លែងនោះដែរ។
៨ ពួកគេកាន់តែមានកម្លាំងខ្លាំងឡើងៗជានិច្ច
នៅពេលពួកគេកាន់តែខិតចូលជិតព្រះជាម្ចាស់
នៅលើភ្នំស៊ីយ៉ូន។
៩ ឱព្រះអម្ចាស់ជាព្រះនៃពិភពទាំងមូលអើយ
សូមស្ដាប់ពាក្យទូលអង្វររបស់ទូលបង្គំ!
ឱព្រះនៃលោកយ៉ាកុបអើយ
សូមផ្ទៀងព្រះកាណ៌ស្ដាប់ទូលបង្គំផង!។ - សម្រាក
១០ ឱព្រះជាម្ចាស់អើយ
ព្រះអង្គជាខែលការពារយើងខ្ញុំ
សូមព្រះអង្គព្រះសន្ដោសទតមកព្រះរាជា
ដែលព្រះអង្គបានចាក់ប្រេងអភិសេក!។
១១ មួយថ្ងៃនៅក្នុងព្រះវិហាររបស់ព្រះអង្គ
ប្រសើរជាងមួយពាន់ថ្ងៃនៅកន្លែងផ្សេងទៀត
ហេតុនេះបានជាខ្ញុំសម្រេចចិត្តឈរនៅ
មាត់ទ្វារព្រះដំណាក់នៃព្រះជាម្ចាស់របស់ខ្ញុំ
ជាជាងទៅស្នាក់នៅក្នុងផ្ទះរបស់មនុស្សអាក្រក់
១២ ដ្បិតព្រះជាអម្ចាស់ជាពន្លឺថ្ងៃ
និងជាខែលការពារយើង
ព្រះអម្ចាស់ប្រណីសន្ដោស
និងប្រទានឲ្យយើងបានរុងរឿង
ព្រះអង្គតែងតែប្រទានសុភមង្គលឲ្យអស់អ្នក
ដែលរស់នៅ ដោយគ្មានសៅហ្មង។
១៣ ឱព្រះអម្ចាស់ជាព្រះនៃពិភពទាំងមូលអើយ
អ្នកណាទុកចិត្តលើព្រះអង្គ
អ្នកនោះមានសុភមង្គលហើយ!។
៨៥
ឱព្រះជាម្ចាស់ជាព្រះសង្គ្រោះនៃយើងខ្ញុំអើយ សូមពង្រឹងយើងខ្ញុំឡើងវិញ
១ ទំនុកពីសៀវភៅរបស់គ្រូចម្រៀង។
ទំនុករបស់កូនចៅលោកកូរេ។
២ ឱព្រះអម្ចាស់អើយ
ព្រះអង្គគាប់ព្រះហឫទ័យ
នឹងទឹកដីរបស់ព្រះអង្គ
ព្រះអង្គបាននាំពូជពង្សរបស់លោកយ៉ាកុប
ដែលគេចាប់យកទៅជាឈ្លើយនោះ
ឲ្យត្រឡប់មកវិញ។
៣ ព្រះអង្គបានលើកលែងទោស
ឲ្យប្រជារាស្ដ្ររបស់ព្រះអង្គ
ព្រះអង្គបានអត់ទោសគេ
ឲ្យរួចពីអំពើបាបទាំងប៉ុន្មាន។ - សម្រាក
៤ ព្រះអង្គបានដកព្រះពិរោធចេញពីយើងខ្ញុំ
ព្រះអង្គឈប់ខ្ញាល់នឹងយើងខ្ញុំទៀតហើយ។
៥ ឱព្រះជាម្ចាស់ជាព្រះសង្គ្រោះនៃយើងខ្ញុំអើយ
សូមពង្រឹងយើងខ្ញុំឡើងវិញ
សូមឈប់ប្រកែប្រកាន់យើងខ្ញុំទៀតទៅ។
៦ តើព្រះអង្គខ្ញាល់នឹងយើងខ្ញុំរហូតឬ?
តើព្រះអង្គព្រះអង្គព្រះពិរោធនឹងយើងខ្ញុំ
អស់កល្បជាអង្វែងតរៀងទៅឬ?
៧ តើព្រះអង្គមិនយាងមកវិញ
ប្រទានឲ្យយើងខ្ញុំរស់រានមានជីវិត
ដើម្បីឲ្យប្រជារាស្ដ្ររបស់ព្រះអង្គ
មានអំណរសប្បាយរួមជាមួយព្រះអង្គទេឬ?
៨ ឱព្រះអម្ចាស់អើយ សូមសម្ដែងព្រះហឫទ័យ
មេត្តាករុណាចំពោះយើងខ្ញុំ
ហើយសូមសង្គ្រោះយើងខ្ញុំផង!
៩ ខ្ញុំត្រងត្រាប់ស្ដាប់សេចក្ដីដែលព្រះជាអម្ចាស់
មានព្រះបន្ទូល
ដ្បិតព្រះអង្គមានព្រះបន្ទូលថា នឹងប្រទាន
សេចក្ដីសុខសាន្តមកប្រជារាស្ដ្រ ដែលជឿលើ
ព្រះអង្គ គឺអស់អ្នកដែលមិនបែរចិត្តគំនិត
ទៅរកអំពើលេលារបស់ខ្លួនវិញ។
១០ ពិតមែនហើយ ព្រះអង្គនឹងសង្គ្រោះអស់អ្នក
ដែលគោរពកោតខ្លាចព្រះអង្គក្នុងពេលឆាប់ៗ
សិរីរុងរឿងរបស់ព្រះអង្គនឹងមកសណ្ឋិត
នៅលើទឹកដីរបស់យើង។
១១ ព្រះអម្ចាស់នឹងសម្ដែងព្រះហឫទ័យមេត្តាករុណា
និងព្រះហឫទ័យស្មោះស្ម័គ្រចំពោះយើង
ធ្វើឲ្យយើងស្គាល់យុត្តិធម៌
និងសេចក្ដីសុខសាន្ត។
១២ ពេលនោះ សេចក្ដីពិតនឹងដុះចេញពីដីមក
ហើយក៏មានសេចក្ដីសុចរិត
លេចចេញមកពីផ្ទៃមេឃដែរ។
១៣ ព្រះអម្ចាស់ផ្ទាល់ប្រទានសុភមង្គលមកយើង
ទឹកដីរបស់យើងក៏បង្កើតភោគផល។
១៤ សេចក្ដីសុចរិតដើរនៅមុខព្រះអម្ចាស់
ដើម្បីរៀបចំផ្លូវថ្វាយព្រះអង្គ។
៨៦
សូមថែរក្សាជីវិតទូលបង្គំផង!
១ ពាក្យអធិស្ឋានរបស់ស្តេចដាវីឌ។
ឱព្រះអម្ចាស់អើយ
សូមផ្ទៀងព្រះកាណ៌ស្ដាប់ទូលបង្គំ
ហើយឆ្លើយតបមកទូលបង្គំវិញផង
ដ្បិតទូលបង្គំជាមនុស្សកំសត់ទុរគត!
២ សូមរក្សាការពារជីវិតទូលបង្គំផង
ដ្បិតទូលបង្គំមានចិត្តស្មោះត្រង់ចំពោះព្រះអង្គ
ឱព្រះនៃទូលបង្គំអើយ
សូមសង្គ្រោះអ្នកបម្រើរបស់ព្រះអង្គ
ដែលបានផ្ញើជីវិតលើព្រះអង្គនេះផង!
៣ ឱព្រះអម្ចាស់អើយ សូមប្រណីសន្ដោសទូលបង្គំ
ដ្បិតទូលបង្គំស្រែកអង្វររកព្រះអង្គពេញមួយថ្ងៃ។
៤ សូមប្រោសអ្នកបម្រើរបស់ព្រះអង្គ
ឲ្យមានអំណរសប្បាយ
ព្រះអម្ចាស់អើយ
ទូលបង្គំផ្ចង់ចិត្តគំនិតទៅរកព្រះអង្គ
៥ ឱព្រះអម្ចាស់អើយ មានតែព្រះអង្គទេ
ដែលប្រកបដោយព្រះហឫទ័យសប្បុរស
និងចេះអត់ឱនឲ្យយើងខ្ញុំ
ព្រះអង្គមានព្រះហឫទ័យមេត្តាករុណាដ៏លើសលប់
ចំពោះអស់អ្នកដែលអង្វររកព្រះអង្គ។
៦ ឱព្រះអម្ចាស់អើយ សូមផ្ទៀងព្រះកាណ៌
ស្ដាប់ពាក្យអធិស្ឋានរបស់ទូលបង្គំ
សូមយកព្រះហឫទ័យទុកដាក់
នឹងពាក្យទូលអង្វររបស់ទូលបង្គំផង។
៧ នៅថ្ងៃមានអាសន្ន ទូលបង្គំអង្វររកព្រះអង្គ
ដ្បិតព្រះអង្គឆ្លើយតបមកទូលបង្គំ។
៨ ឱព្រះអម្ចាស់អើយ ក្នុងចំណោមព្រះទាំងឡាយ
គ្មានព្រះណាដូចព្រះអង្គទេ
ហើយក៏គ្មានព្រះណាអាចធ្វើការអស្ចារ្យ
ដូចព្រះអង្គឡើយ។
៩ ព្រះអម្ចាស់អើយ
ប្រជាជាតិទាំងប៉ុន្មានដែលព្រះអង្គបានបង្កើតមក
នឹងនាំគ្នាមកក្រាបថ្វាយបង្គំព្រះអង្គ
ហើយលើកតម្កើងសិរីរុងរឿងព្រះនាមព្រះអង្គ។
១០ ដ្បិតព្រះអង្គជាព្រះដ៏ឧត្តុង្គឧត្ដម
ព្រះអង្គធ្វើការអស្ចារ្យ
មានតែព្រះអង្គប៉ុណ្ណោះដែលជាព្រះជាម្ចាស់។
១១ ព្រះអម្ចាស់អើយ សូមបង្រៀនទូលបង្គំ
ឲ្យស្គាល់មាគ៌ារបស់ព្រះអង្គ
ទូលបង្គំនឹងប្រព្រឹត្តតាមសេចក្ដីពិតរបស់ព្រះអង្គ
សូមប្រទានឲ្យទូលបង្គំមានចិត្តស្មោះត្រង់
គោរពកោតខ្លាចព្រះនាមព្រះអង្គ។
១២ ឱព្រះអម្ចាស់ជាព្រះនៃទូលបង្គំអើយ
ទូលបង្គំលើកតម្កើងព្រះអង្គយ៉ាងអស់ពីចិត្ត
ទូលបង្គំនឹងលើកតម្កើងសិរីរុងរឿង
ព្រះនាមរបស់ព្រះអង្គរហូតតទៅ
១៣ ដ្បិតព្រះអង្គមានព្រះហឫទ័យមេត្តាករុណា
ចំពោះទូលបង្គំខ្លាំងណាស់
ព្រះអង្គបានរំដោះជីវិតទូលបង្គំ
ឲ្យរួចផុតពីមច្ចុរាជ។
១៤ ឱព្រះជាម្ចាស់អើយ
មនុស្សព្រហើនលើកគ្នាប្រឆាំងនឹងទូលបង្គំ
មនុស្សឃោរឃៅមួយពួកចង់ដកជីវិតទូលបង្គំ
អ្នកទាំងនោះមិនរវីរវល់នឹងព្រះអង្គទេ។
១៥ ព្រះអម្ចាស់អើយ
ព្រះអង្គប្រកបដោយព្រះហឫទ័យអាណិតអាសូរ
ព្រះអង្គតែងតែប្រណីសន្ដោសព្រះអង្គអត់ធ្មត់
ហើយពោរពេញទៅដោយ
មេត្តាករុណាដ៏ស្មោះស្ម័គ្រ។
១៦ សូមបែរមកទតមើលទូលបង្គំ
សូមប្រណីសន្ដោសទូលបង្គំ
សូមប្រទានកម្លាំងមកទូលបង្គំ
ហើយសង្គ្រោះទូលបង្គំ
ដែលជាខ្ញុំបម្រើរបស់ព្រះអង្គផង!។
១៧ សូមសម្ដែងទីសម្គាល់ដ៏អស្ចារ្យមួយ
ចំពោះទូលបង្គំ
ដើម្បីឲ្យអស់អ្នកដែលស្អប់ទូលបង្គំឃើញ
ហើយត្រូវអាម៉ាស់។
ឱព្រះអម្ចាស់អើយ
មានតែព្រះអង្គទេដែលជួយសង្គ្រោះ
និងសម្រាលទុក្ខទូលបង្គំ។
៨៧
ក្រុងស៊ីយ៉ូនជាប្រភពនៃព្រះពររបស់យើង
១ ទំនុកតម្កើងរបស់កូនចៅលោកកូរេ។
ចម្រៀងតម្កើងព្រះជាម្ចាស់។
ព្រះអម្ចាស់បានសង់ក្រុងយេរូសាឡឹម
នៅលើភ្នំដ៏វិសុទ្ធ។
២ ព្រះអម្ចាស់ស្រឡាញ់បុរីស៊ីយ៉ូន
ជាងកន្លែងឯទៀតៗទាំងអស់
នៅលើទឹកដីលោកយ៉ាកុប។
៣ ឱក្រុងរបស់ព្រះជាម្ចាស់អើយ
គេលើកតម្កើងសិរីរុងរឿងរបស់អ្នក
ដោយពោលថា: - សម្រាក
៤ “ក្នុងចំណោមអស់អ្នកដែលស្គាល់ខ្ញុំ
មានអ្នកខ្លះកើតនៅស្រុកអេស៊ីប
អ្នកខ្លះកើតនៅស្រុកបាប៊ីឡូន
ខ្លះទៀតនៅស្រុកភីលីស្ទីន
ខ្លះទៀតនៅស្រុកទីរ៉ុស
និងខ្លះទៀតនៅស្រុកអេត្យូពី”
៥ ប៉ុន្តែ ចំពោះក្រុងស៊ីយ៉ូនវិញគេពោលថា
“យើងទាំងអស់គ្នាសុទ្ធតែកើតចេញ
មកពីក្រុងស៊ីយ៉ូន!”
ព្រះដ៏ខ្ពង់ខ្ពស់បំផុតបានធ្វើឲ្យក្រុងនេះរឹងមាំ។
៦ ព្រះអម្ចាស់រាប់ចំនួនប្រជារាស្ដ្រនានាចុះក្នុងបញ្ជី
ហើយសរសេរថា ក្រុងស៊ីយ៉ូនជាស្រុកកំណើត
របស់ពួកគេទាំងអស់គ្នា។
៧ ពេលនោះ ទាំងពួកអ្នកច្រៀង
ទាំងពួកអ្នករាំ នឹងពោលឡើងថា
“ក្រុងស៊ីយ៉ូនជាប្រភពនៃព្រះពររបស់យើង!”។
៨៨
សេចក្ដីស្លាប់បានខិតមកជិតទូលបង្គំហើយ
១ ចម្រៀងតម្កើងព្រះជាម្ចាស់។
ទំនុកតម្កើងរបស់កូនចៅលោកកូរេ។
ទំនុកពីសៀវភៅរបស់គ្រូចម្រៀង។
ចាប់ផ្តើមជាមួយខ្លុយ។
កំណាព្យរបស់លោកហេម៉ាន់ជាអ្នកស្រុកអេសរ៉ា។
២ ឱព្រះអម្ចាស់
ជាព្រះសង្គ្រោះនៃទូលបង្គំអើយ
ពេលថ្ងៃទូលបង្គំស្រែកអង្វរព្រះអង្គ
ហើយពេលយប់
ទូលបង្គំនៅតែរកព្រះអង្គដដែល។
៣ សូមឲ្យពាក្យអធិស្ឋានរបស់ទូលបង្គំ
បានឡើងទៅដល់ព្រះអង្គ!
សូមផ្ទៀងព្រះកាណ៌ស្ដាប់សម្រែករបស់ទូលបង្គំផង!
៤ ដ្បិតទូលបង្គំមានទុក្ខខ្លោចផ្សាឥតឧបមា
សេចក្ដីស្លាប់បានខិតមកជិតទូលបង្គំហើយ។
៥ គេចាត់ទុកទូលបង្គំជាអ្នកស្ថិតនៅក្នុងចំណោម
មនុស្សដែលត្រូវធ្លាក់ទៅក្នុងរណ្ដៅ
ឬជាអ្នកស្ថិតនៅក្នុងចំណោមមនុស្ស
ដែលលែងមានកម្លាំងទៀត។
៦ ទូលបង្គំដេកស្តូកដូចមនុស្សស្លាប់នៅក្នុងផ្នូរ
ទូលបង្គំប្រៀបបាននឹងអស់អ្នកដែលព្រះអង្គ
លែងនឹកនា និងលែងជួយទៀត។
៧ ព្រះអង្គបានបោះទូលបង្គំទៅក្នុងរណ្ដៅដ៏ជ្រៅ
ទៅក្នុងទីងងឹតសូន្យសុងនៃសេចក្ដីស្លាប់។
៨ ព្រះពិរោធរបស់ព្រះអង្គសង្កត់មកលើទូលបង្គំ
ដូចទឹករលកបក់បោកមកលើទូលបង្គំ។ - សម្រាក
៩ ព្រះអង្គបានធ្វើឲ្យអស់អ្នក
ដែលជិតស្និទ្ធនឹងទូលបង្គំចេញឆ្ងាយពីទូលបង្គំ
ព្រះអង្គធ្វើឲ្យអ្នកទាំងនោះខ្ពើមទូលបង្គំ
ទូលបង្គំគេចពីស្លាប់មិនរួចឡើយ។
១០ ភ្នែកទូលបង្គំស្រវាំង
ដោយកើតទុក្ខវេទនាខ្លាំងពេក
ឱព្រះអម្ចាស់អើយ
ទូលបង្គំអង្វរព្រះអង្គជារៀងរាល់ថ្ងៃ!
ទូលបង្គំលើកដៃឡើងទៅរកព្រះអង្គ!
១១ តើព្រះអង្គអាចធ្វើការអស្ចារ្យ
សម្រាប់មនុស្សស្លាប់បានឬ?
តើមនុស្សដែលស្លាប់ទៅហើយ
អាចក្រោកឡើងសរសើរតម្កើងព្រះអង្គកើតឬ? - សម្រាក
១២ តើអ្នកនៅក្នុងផ្នូរអាចថ្លែងពីព្រះហឫទ័យ
មេត្តាករុណារបស់ព្រះអង្គ
ហើយអ្នកដែលវិនាសបាត់បង់ជីវិតទៅហើយនោះ
អាចថ្លែងពីព្រះហឫទ័យស្មោះស្ម័គ្រ
របស់ព្រះអង្គកើតឬ?
១៣ តើអ្នកដែលនៅក្នុងស្ថានងងឹតអាចស្គាល់
ស្នាព្រះហស្ដដ៏អស្ចារ្យរបស់ព្រះអង្គបានឬ?
តើអ្នកដែលមនុស្សម្នាភ្លេចសូន្យទៅហើយនោះ
អាចស្គាល់សេចក្ដីសុចរិត
របស់ព្រះអង្គដូចម្ដេចបាន?
១៤ ឱព្រះអម្ចាស់អើយ ទូលបង្គំស្រែកអង្វរព្រះអង្គ
ទូលបង្គំចូលមកអធិស្ឋាន
នៅចំពោះព្រះភ័ក្ត្រព្រះអង្គតាំងពីព្រឹក។
១៥ ឱព្រះអម្ចាស់អើយ ហេតុអ្វីបានជាព្រះអង្គបោះ
បង់ចោលទូលបង្គំដូច្នេះ?
ហេតុអ្វីបានជាព្រះអង្គលាក់ព្រះភ័ក្ត្រនឹងទូលបង្គំ?
១៦ ទូលបង្គំលំបាកវេទនា ជិតស្លាប់តាំងពីក្មេងមកម៉្លេះ
ព្រះអង្គធ្វើឲ្យទូលបង្គំភ័យ
តក់ស្លុតអស់សង្ឃឹម។
១៧ ព្រះពិរោធដ៏ខ្លាំងក្លារបស់ព្រះអង្គ
សង្កត់មកលើទូលបង្គំ
ព្រះអង្គធ្វើឲ្យទូលបង្គំ
ភ័យតក់ស្លុតបាត់ស្មារតី។
១៨ ទុក្ខទោសទាំងនេះប្រៀបបាននឹងមហាសាគរ
ដែលនៅឡោមព័ទ្ធទូលបង្គំ
ព្រមទាំងគ្របពីលើទូលបង្គំជារៀងរាល់ថ្ងៃ។
១៩ ព្រះអង្គបានយកមិត្តភក្ដិ ព្រមទាំងអ្នកជិតស្និទ្ធ
នឹងទូលបង្គំ ចេញឆ្ងាយពីទូលបង្គំ
គឺមានតែភាពងងឹតប៉ុណ្ណោះ
ដែលនៅជាមួយទូលបង្គំ។
៨៩
ខ្ញុំនឹងប្រកាសអំពីព្រះហឫទ័យស្មោះស្ម័គ្ររបស់ព្រះអង្គ
១ កំណាព្យរបស់លោកអេតន ជាអ្នកស្រុកអេសរ៉ា។
២ ខ្ញុំនឹងច្រៀងសរសើរព្រះហឫទ័យ
មេត្តាករុណារបស់ព្រះអម្ចាស់រហូតតទៅ។
ខ្ញុំនឹងប្រកាសអំពីព្រះហឫទ័យស្មោះស្ម័គ្រ
របស់ព្រះអង្គ អស់កល្បជាអង្វែងតរៀងទៅ។
៣ ខ្ញុំដឹងថាព្រះហឫទ័យមេត្តាករុណារបស់ព្រះអង្គ
នៅស្ថិតស្ថេរអស់កល្បជានិច្ច
ហើយព្រះហឫទ័យស្មោះស្ម័គ្ររបស់ព្រះអង្គ
នៅស្ថិតស្ថេររឹងប៉ឹងដូចផ្ទៃមេឃ។
៤ ព្រះអម្ចាស់មានព្រះបន្ទូលថា
«យើងបានចងសម្ពន្ធមេត្រីជាមួយអ្នក
ដែលយើងបានជ្រើសរើស
យើងបានចុះខសន្យាជាមួយដាវីឌ
ជាអ្នកបម្រើរបស់យើងថា:
៥ យើងនឹងតែងតាំងពូជពង្សអ្នក
ឲ្យគ្រងរាជ្យរហូតតទៅ
យើងនឹងពង្រឹងរាជ្យរបស់អ្នកឲ្យនៅស្ថិតស្ថេរ
អស់កល្បជាអង្វែងតរៀងទៅ!»។
៦ ព្រះអម្ចាស់អើយ សូមឲ្យផ្ទៃមេឃ
សរសើរតម្កើងស្នាព្រះហស្ដដ៏អស្ចារ្យរបស់ព្រះអង្គ
សូមឲ្យអង្គប្រជុំដ៏វិសុទ្ធច្រៀង
សរសើរព្រះហឫទ័យស្មោះស្ម័គ្ររបស់ព្រះអង្គ។
៧ នៅលើមេឃ គ្មាននរណាម្នាក់អាចផ្ទឹមស្មើ
នឹងព្រះអង្គឡើយ
ក្នុងចំណោមពពួកទេវទូត ក៏គ្មាននរណា
អាចប្រៀបប្រដូចនឹងព្រះអង្គដែរ។
៨ អស់អ្នកដែលស្ថិតនៅក្នុងអង្គប្រជុំដ៏វិសុទ្ធ
នាំគ្នាស្ញែងខ្លាចព្រះអង្គ
ហើយអស់អ្នកដែលនៅជុំវិញព្រះអង្គ
ក៏កោតស្ញប់ស្ញែងព្រះអង្គដែរ។
៩ ឱព្រះអម្ចាស់ ព្រះអម្ចាស់ជាព្រះនៃពិភព
ទាំងមូលអើយ
គ្មាននរណាមានឫទ្ធានុភាពដូចព្រះអង្គឡើយ!
ព្រះអង្គប្រកបទៅដោយ
ព្រះហឫទ័យស្មោះស្ម័គ្រ។
១០ ព្រះអង្គបង្ក្រាបអំនួតរបស់សមុទ្រ
នៅពេលរលកសមុទ្រកក្រើកឡើង
ព្រះអង្គបានធ្វើឲ្យស្ងប់ទៅវិញ។
១១ ព្រះអង្គបានជាន់ និងសម្លាប់នាគរាជ
ព្រះអង្គបានកម្ចាត់កម្ចាយខ្មាំងសត្រូវ
ដោយសារឫទ្ធិបារមីដ៏ខ្លាំងក្លារបស់ព្រះអង្គ។
១២ មេឃ និងផែនដីជាកម្មសិទ្ធិរបស់ព្រះអង្គ
ព្រះអង្គបានបង្កើតពិភពលោក និងអ្វីៗទាំងអស់
ដែលស្ថិតនៅក្នុងពិភពលោកនេះ។
១៣ ព្រះអង្គបានបង្កើតទិសខាងជើង និងទិសខាងត្បូង
ភ្នំតាប៊រ និងភ្នំហ៊ែរម៉ូន
សរសើរតម្កើងព្រះនាមព្រះអង្គ។
១៤ ព្រះអង្គប្រកបដោយព្រះចេស្ដាដ៏ខ្លាំងក្លា
ព្រះអង្គមានឫទ្ធានុភាព
និងឫទ្ធិបារមីដ៏ខ្ពង់ខ្ពស់បំផុត។
១៥ ព្រះអង្គគ្រងរាជ្យដោយសុចរិត យុត្តិធម៌
អ្វីៗដែលព្រះអង្គធ្វើ
សុទ្ធតែបង្ហាញអំពីព្រះហឫទ័យមេត្តាករុណា
និងព្រះហឫទ័យស្មោះស្ម័គ្ររបស់ព្រះអង្គ។
១៦ ព្រះអម្ចាស់អើយ
ប្រជាជនណាលើកតម្កើងព្រះអង្គ
ព្រមទាំងរស់នៅក្រោមពន្លឺ
ដ៏សប្បុរសរបស់ព្រះអង្គ
ប្រជាជននោះមានសុភមង្គលហើយ!
១៧ រៀងរាល់ថ្ងៃ គេនឹងបានសប្បាយរីករាយ
ដោយសារព្រះនាមព្រះអង្គ
ហើយគេនឹងបានខ្ពស់មុខ
ដោយសារសេចក្ដីសុចរិតរបស់ព្រះអង្គ
១៨ ដ្បិតព្រះអង្គប្រទានឲ្យគេមានសិរីជោគជ័យ។
យើងខ្ញុំបានថ្កុំថ្កើង
ដោយសារព្រះអង្គប្រោសប្រទានឲ្យ។
១៩ ព្រះអម្ចាស់ជាព្រះដ៏វិសុទ្ធរបស់ជនជាតិអ៊ីស្រាអែល
បានជ្រើសរើសព្រះរាជា
ឲ្យធ្វើជាខែលការពារយើងខ្ញុំ។
២០ នៅថ្ងៃមួយ ព្រះអង្គមានព្រះបន្ទូល
មកកាន់ប្រជារាស្ដ្រដ៏ស្មោះត្រង់របស់ព្រះអង្គ
តាមការនិមិត្តឃើញមួយថា:
«យើងបានជួយគាំទ្រ
អ្នកចម្បាំងមួយរូបដ៏ចំណាន
យើងបានលើកតម្កើងយុវជនមួយរូប
ក្នុងចំណោមប្រជាជន
២១ គឺយើងរកបានដាវីឌជាអ្នកបម្រើរបស់យើង
យើងបានចាក់ប្រេងអភិសេកគេ
ដោយប្រេងដ៏វិសុទ្ធរបស់យើង
២២ កម្លាំងរបស់យើងនឹងជួយជ្រោមជ្រែងគេ
ឫទ្ធិបារមីរបស់យើងនឹងធ្វើឲ្យ
គេបានខ្លាំងពូកែ។
២៣ ខ្មាំងសត្រូវពុំអាចមានប្រៀបលើគេ
មនុស្សទុច្ចរិតពុំអាចបំបាក់មុខគេឡើយ។
២៤ យើងនឹងកម្ទេចបច្ចាមិត្តនៅមុខគេ
យើងនឹងប្រហារអស់អ្នកដែលស្អប់គេ។
២៥ យើងនឹងសម្ដែងចិត្តស្មោះត្រង់
និងចិត្តមេត្តាករុណាចំពោះគេជានិច្ច
គេនឹងបានថ្កុំថ្កើងឡើង
ដោយសារនាមរបស់យើង។
២៦ យើងនឹងឲ្យគេមានអំណាចគ្រប់គ្រង
លើសមុទ្រ និងលើទន្លេនានា។
២៧ ពេលនោះ ដាវីឌនឹងហៅយើងថា
“ព្រះអង្គជាព្រះបិតា និងជាព្រះនៃទូលបង្គំ
ព្រះអង្គជួយការពារ និងសង្គ្រោះទូលបង្គំ!”។
២៨ រីឯយើងវិញ យើងនឹងធ្វើឲ្យដាវីឌ
បានទៅជាបុត្រច្បងរបស់យើង
ជាស្តេចដ៏ធំជាងគេទាំងអស់នៅលើផែនដី។
២៩ យើងនឹងសម្ដែងចិត្តមេត្តាករុណាចំពោះគេជានិច្ច
ហើយយើងនឹងរក្សាសម្ពន្ធមេត្រី ដែលយើងចង
ជាមួយគេ ដោយមិនប្រែប្រួលឡើយ។
៣០ យើងនឹងធ្វើឲ្យពូជពង្សរបស់គេ
នៅស្ថិតស្ថេររហូតតទៅ
ហើយរាជ្យរបស់គេនឹងគង់វង្ស
នៅជាយូរអង្វែងដូចផ្ទៃមេឃដែរ។
៣១ ប្រសិនបើកូនចៅរបស់ដាវីឌ
បោះបង់ចោលវិន័យរបស់យើង
ហើយលែងដើរតាមមាគ៌ារបស់យើង
៣២ ប្រសិនបើពួកគេបំពានលើបញ្ញត្តិរបស់យើង
ហើយលែងប្រតិបត្តិតាមបទបញ្ជា
របស់យើងទៀតនោះ
៣៣ យើងនឹងវាយប្រដៅពួកគេ ព្រោះតែការបះបោរ
យើងនឹងធ្វើទារុណកម្មពួកគេ
ព្រោះតែកំហុសដែលពួកគេបានប្រព្រឹត្ត។
៣៤ ក៏ប៉ុន្តែ យើងនៅតែសម្ដែងចិត្តមេត្តាករុណា
ចំពោះដាវីឌជានិច្ច
យើងនឹងសម្ដែងចិត្តស្មោះស្ម័គ្រចំពោះគេ
ឥតងាករេឡើយ។
៣៥ យើងនឹងមិនផ្ដាច់សម្ពន្ធមេត្រី
ដែលយើងបានចងជាមួយគេនោះទេ
គឺអ្វីដែលយើងនិយាយចេញមកហើយ
យើងនឹងមិនប្រែក្រឡាស់វិញឡើយ។
៣៦ យើងបានសន្យាយ៉ាងឱឡារិកក្នុងនាមដ៏វិសុទ្ធ
របស់យើង យើងមិនកុហកដាវីឌទេ!
៣៧ ពូជពង្សរបស់គេនឹងនៅស្ថិតស្ថេររហូតតទៅ
រាជ្យរបស់គេនឹងគង់វង្សនៅចំពោះមុខយើង
ដូចព្រះអាទិត្យ
៣៨ ហើយដូចព្រះច័ន្ទដែលនៅស្ថិតស្ថេររហូត
ធ្វើជាសាក្សីស្រាប់»។ - សម្រាក
៣៩ ប៉ុន្តែ ព្រះអង្គបានបោះបង់ចោល
ព្រះអង្គបានកាត់កាល់
ព្រះអង្គព្រះអង្គព្រះពិរោធនឹងព្រះរាជា
ដែលព្រះអង្គបានចាក់ប្រេងអភិសេក។
៤០ ព្រះអង្គបានផ្ដាច់សម្ពន្ធមេត្រី
ជាមួយអ្នកបម្រើរបស់ព្រះអង្គ
ព្រះអង្គបានទំលាក់មកុដរាជ្យ
របស់ព្រះរាជាទៅដី។
៤១ ព្រះអង្គបានធ្វើឲ្យកំពែងទាំងប៉ុន្មាន
របស់ព្រះរាជាត្រូវធ្លុះធ្លាយ
និងធ្វើឲ្យបន្ទាយដ៏រឹងមាំត្រូវរលំបាក់បែក។
៤២ ពួកអ្នកដែលដើរកាត់តាមនោះ
នាំគ្នាប្លន់យកអ្វីៗដែលស្តេចមាន
ហើយប្រទេសជិតខាងនាំគ្នាសើចចំអក
ឲ្យស្តេច។
៤៣ ព្រះអង្គបានធ្វើឲ្យបច្ចាមិត្តរបស់ស្តេចមានកម្លាំង
ព្រះអង្គបានធ្វើឲ្យខ្មាំងសត្រូវទាំងប៉ុន្មាន
របស់ស្តេចមានអំណរសប្បាយ។
៤៤ ព្រះអង្គបានធ្វើឲ្យគ្រឿងសាស្ត្រាវុធ
របស់ស្តេចលែងមានប្រសិទ្ធភាព
ព្រះអង្គពុំបានគាំទ្រស្តេចក្នុងចម្បាំងឡើយ។
៤៥ ព្រះអង្គដកអំណាចចេញពីស្តេច
ព្រះអង្គបានរំលំរាជបល្ល័ង្ករបស់ស្តេច
៤៦ ព្រះអង្គពុំបានធ្វើឲ្យស្តេច
មានព្រះជន្មាយុយឺនយូរទេ
ព្រះអង្គបានធ្វើឲ្យស្តេច
ត្រូវអាម៉ាស់យ៉ាងខ្លាំង។ - សម្រាក
៤៧ ព្រះអម្ចាស់អើយ តើព្រះអង្គធ្វើព្រងើយ
កន្តើយដល់កាលណាទៀត
តើព្រះពិរោធរបស់ព្រះអង្គ
នៅតែឆាបឆេះដល់ពេលណាទៀត?
៤៨ សូមព្រះអង្គកុំភ្លេចថា
អាយុជីវិតទូលបង្គំខ្លីណាស់!
ព្រះអង្គបង្កើតមនុស្សលោកទាំងអស់មក
ដើម្បីឲ្យរលាយសូន្យទៅវិញទេដឹង!
៤៩ ពុំដែលមាននរណាអាចរស់រហូត
ឥតស្គាល់សេចក្ដីស្លាប់នោះឡើយ
ហើយក៏ពុំដែលមាននរណា
អាចធ្វើឲ្យជីវិតរបស់ខ្លួន
គេចផុតពីមច្ចុរាជបានដែរ! - សម្រាក
៥០ ព្រះអម្ចាស់អើយ
តើស្នាព្រះហស្ដដែលព្រះអង្គធ្លាប់សម្ដែង
ដោយព្រះហឫទ័យមេត្តាករុណា
កាលពីគ្រាមុននោះ នៅឯណា?
តើព្រះបន្ទូលដែលព្រះអង្គបានសន្យាយ៉ាង
ស្មោះស្ម័គ្រចំពោះព្រះបាទដាវីឌនៅឯណា?។
៥១ ព្រះអម្ចាស់អើយ សូមកុំភ្លេចអ្នកបម្រើ
របស់ព្រះអង្គដែលកំពុងតែបាក់មុខ
សូមព្រះអង្គកុំភ្លេចថា ប្រជារាស្ដ្រដ៏ច្រើននេះ
ស្ថិតនៅក្នុងបន្ទុករបស់ទូលបង្គំ។
៥២ ព្រះអម្ចាស់អើយ ខ្មាំងសត្រូវរបស់ព្រះអង្គ
នាំគ្នាបំបាក់មុខស្តេច
ដែលព្រះអង្គចាក់ប្រេងអភិសេក
គឺទោះបីទូលបង្គំទៅទីណាក៏ដោយ
ក៏ពួកគេនាំគ្នាបំបាក់មុខទូលបង្គំជានិច្ច។
៥៣ សូមលើកតម្កើងព្រះអម្ចាស់រហូតតទៅ!
អាម៉ែន! អាម៉ែន!។
៩០
ភាគទីបួន
(ទំនុកតម្កើង ៩០-១០៦)
មនុស្សលោកតែងតែស្លាប់ តែព្រះជាម្ចាស់គង់នៅរហូត
១ ពាក្យអធិស្ឋានរបស់លោកម៉ូសេ
ជាអ្នកបម្រើរបស់ព្រះជាម្ចាស់។
ឱព្រះអម្ចាស់អើយ
ព្រះអង្គធ្លាប់ធ្វើជាជម្រករបស់យើងខ្ញុំ
ពីជំនាន់មួយទៅជំនាន់មួយ។
២ មុនពេលភ្នំនានាកកើតឡើង
ហើយមុនពេលព្រះអង្គបង្កើតផែនដី
និងពិភពលោកមកនោះ
ព្រះអង្គជាព្រះជាម្ចាស់តាំងពីអស់កល្បរៀងមក។
៣ ព្រះអង្គបានធ្វើឲ្យមនុស្សលោក
វិលត្រឡប់ទៅជាធូលីដីវិញ
គឺព្រះអង្គមានព្រះបន្ទូលថា
«ពូជពង្សរបស់អដាំអើយ ចូរវិលទៅវិញទៅ!»
៤ ចំពោះព្រះអង្គ រយៈពេលមួយពាន់ឆ្នាំ
ប្រៀបបានដូចថ្ងៃម្សិលមិញដែលកន្លងផុតទៅ
ឬដូចមួយយាមក្នុងពេលយប់។
៥ ព្រះអង្គបានដកជីវិតចេញពីមនុស្សលោក
គឺជីវិតរបស់គេប្រៀបបាន
នឹងការលង់លក់មួយស្របក់ប៉ុណ្ណោះ។
ជីវិតរបស់គេប្រៀបបីដូចជាស្មៅ
៦ នៅពេលព្រឹក វាដុះចេញមក
ហើយលូតលាស់ឡើង
នៅពេលល្ងាច វាស្រពោន
ហើយក្រៀមស្ងួតអស់ទៅ។
៧ យើងខ្ញុំត្រូវវិនាស
ដោយសារព្រះពិរោធរបស់ព្រះអង្គ
ហើយយើងខ្ញុំញ័ររន្ធត់
ដោយសារព្រះអង្គខ្ញាល់យ៉ាងខ្លាំង។
៨ ព្រះអង្គយកកំហុសរបស់យើងខ្ញុំ
មកលាតត្រដាងនៅចំពោះព្រះភ័ក្ត្រព្រះអង្គ
ហើយពន្លឺរបស់ព្រះអង្គ
ចាំងឲ្យឃើញអំពើទាំងប៉ុន្មាន
ដែលយើងខ្ញុំប្រព្រឹត្តដោយលាក់កំបាំង។
៩ ដោយសារព្រះអង្គដាក់ទោសយើងខ្ញុំ
ជីវិតរបស់យើងខ្ញុំកាន់តែដុនដាបទៅៗ
ហើយអាយុជីវិតត្រូវចប់ដូចមួយដង្ហើម។
១០ អាយុជីវិតរបស់យើងខ្ញុំបានត្រឹមតែចិតសិបឆ្នាំ
ប៉ុណ្ណោះ អ្នកមាំមួនជាងគេរស់បានប៉ែតសិបឆ្នាំ
ប៉ុន្តែ ក្នុងរយៈពេលដែលយើងខ្ញុំរស់នោះ
យើងខ្ញុំតែងតែខ្វល់ខ្វាយ
និងមានទុក្ខលំបាកជាច្រើន
អាយុជីវិតយើងខ្ញុំឈានទៅមុខយ៉ាងលឿន
បោះពួយទៅរកសេចក្ដីស្លាប់។
១១ តើនរណាអាចស្គាល់កម្លាំង
នៃព្រះពិរោធរបស់ព្រះអង្គបាន?
តើនរណាអាចស្គាល់ព្រះពិរោធនេះ
ដើម្បីគោរពកោតខ្លាច
ព្រះអង្គយ៉ាងត្រឹមត្រូវបាន?
១២ សូមណែនាំយើងខ្ញុំឲ្យដឹងច្បាស់ថា
អាយុជីវិតយើងខ្ញុំកំណត់ត្រឹមណា
ដើម្បីឲ្យចិត្តយើងខ្ញុំចេះរិះគិត
ប្រកបដោយប្រាជ្ញា។
១៣ ព្រះអម្ចាស់អើយ សូមយាងមកវិញ
តើព្រះអង្គនៅបង្អង់ដល់កាលណាទៀត
សូមអាណិតមេត្តាយើងខ្ញុំ
ដែលជាអ្នកបម្រើរបស់ព្រះអង្គផង!
១៤ សូមសម្ដែងព្រះហឫទ័យមេត្តាករុណា
ដ៏លើសលប់ចំពោះយើងខ្ញុំតាំងពីព្រលឹម
នោះយើងខ្ញុំនឹងមានអំណរសប្បាយរីករាយ
អស់មួយជីវិត។
១៥ ព្រះអង្គបានធ្វើឲ្យយើងខ្ញុំកើតទុក្ខ
អស់រយៈពេលយ៉ាងយូរ
ហើយយើងខ្ញុំវេទនាជាច្រើនឆ្នាំយ៉ាងណា
សូមប្រោសប្រទានឲ្យយើងខ្ញុំ
មានអំណរសប្បាយយ៉ាងនោះដែរ។
១៦ សូមសម្ដែងឲ្យយើងខ្ញុំបានឃើញ
ស្នាព្រះហស្ដរបស់ព្រះអង្គ
ហើយសម្ដែងឲ្យកូនចៅយើងខ្ញុំ
បានឃើញភាពថ្កុំថ្កើងរបស់ព្រះអង្គផង។
១៧ ព្រះអម្ចាស់ជាព្រះនៃយើងខ្ញុំអើយ
សូមសម្ដែងសេចក្ដីស្រឡាញ់ចំពោះយើងខ្ញុំផង
សូមជួយឲ្យកិច្ចការដែលយើងខ្ញុំធ្វើបានខ្ជាប់ខ្ជួន
ពិតមែនហើយ
សូមជួយឲ្យកិច្ចការរបស់យើងខ្ញុំ
បានខ្ជាប់ខ្ជួនរហូតតទៅ។
៩១
នៅក្រោមម្លប់បារមីព្រះដ៏ខ្ពង់ខ្ពស់បំផុត
១ អ្នកណារស់នៅក្រោមការគ្រប់គ្រង
របស់ព្រះដ៏ខ្ពង់ខ្ពស់បំផុត
អ្នកនោះនឹងជ្រកនៅក្រោមម្លប់បារមី
របស់ព្រះដ៏មានឫទ្ធានុភាពលើអ្វីៗទាំងអស់។
២ ខ្ញុំទូលព្រះអម្ចាស់ថា:
ព្រះអង្គជាជម្រក និងជាកំពែងការពារទូលបង្គំ
ព្រះអង្គជាព្រះនៃទូលបង្គំ
ទូលបង្គំផ្ញើជីវិតលើព្រះអង្គ!
៣ ព្រះអម្ចាស់រំដោះអ្នកឲ្យរួចផុតពីអន្ទាក់
ឲ្យរួចផុតពីជំងឺរាតត្បាតផ្សេងៗ។
៤ ព្រះអង្គនឹងការពារអ្នក
អ្នកអាចជ្រកកោនក្រោមម្លប់បារមីរបស់ព្រះអង្គ
ព្រះហឫទ័យស្មោះស្ម័គ្ររបស់ព្រះអង្គ
ប្រៀបបីដូចជាខែល និងអាវក្រោះការពារអ្នក។
៥ នៅពេលយប់ អ្នកនឹងមិនភ័យខ្លាច
គ្រោះថ្នាក់ដែលគួរឲ្យតក់ស្លុតនោះឡើយ
នៅពេលថ្ងៃ អ្នកក៏នឹងមិនភ័យខ្លាចព្រួញ
ដែលគេបាញ់មកដែរ។
៦ អ្នកនឹងមិនភ័យខ្លាចគ្រោះកាចនៅយប់ងងឹត
ហើយក៏មិនភ័យខ្លាចមហន្តរាយ
នៅពេលថ្ងៃត្រង់ដែរ។
៧ ទោះបីមានមនុស្សមួយពាន់នាក់
ដួលស្លាប់នៅជិតអ្នក
ហើយមានមនុស្សមួយម៉ឺននាក់
ស្លាប់នៅខាងស្តាំអ្នកក្តី
ក៏គ្មានអ្វីអាចប៉ះពាល់អ្នកឡើយ។
៨ ចូរសម្លឹងមើល អ្នកនឹងឃើញថា
តើមនុស្សអាក្រក់ទទួលទោសយ៉ាងណា។
៩ ព្រះអម្ចាស់ជាជម្រករបស់អ្នក
អ្នកបានមកជ្រកកោនក្រោមម្លប់
របស់ព្រះដ៏ខ្ពង់ខ្ពស់បំផុត។
១០ គ្មានទុក្ខវេទនាណាមួយកើតមាន
ដល់អ្នកឡើយ
ហើយក៏គ្មានគ្រោះកាចណាមួយ
ចូលទៅជិតទីលំនៅរបស់អ្នកដែរ
១១ ដ្បិតព្រះអម្ចាស់នឹងបញ្ជាឲ្យ
ពួកទេវទូតជួយអ្នក
ពួកទេវទូតនឹងការពារអ្នក
នៅគ្រប់ទីកន្លែងដែលអ្នកទៅ។
១២ ទេវទូតទាំងនោះនឹងចាំទ្រអ្នក
មិនឲ្យជើងអ្នកប៉ះទង្គិចនឹងថ្មឡើយ។
១៣ អ្នកនឹងដើរជាន់សត្វសិង្ហ និងពស់វែក
អ្នកនឹងជាន់ឈ្លីកូនសិង្ហ និងនាគ។
១៤ ព្រះអម្ចាស់មានព្រះបន្ទូលថា:
«ដោយគេស្ថិតនៅជាប់នឹងយើង
យើងនឹងជួយរំដោះគេ
យើងនឹងការពារគេ
ព្រោះគេទទួលស្គាល់ថាយើងជាព្រះអម្ចាស់!
១៥ គេនឹងអង្វររកយើង
ហើយយើងនឹងឆ្លើយតបមកគេវិញ
នៅពេលគេមានអាសន្ន
យើងនឹងស្ថិតនៅជាមួយគេ យើងនឹងរំដោះគេ
ព្រមទាំងលើកតម្កើងគេផង។
១៦ យើងនឹងឲ្យគេមានអាយុយឺនយូរ
ហើយយើងនឹងឲ្យគេឃើញថា
យើងពិតជាព្រះសង្គ្រោះមែន»។
៩២
ទូលបង្គំសប្បាយចិត្តនឹងកិច្ចការដែលព្រះអង្គធ្វើ
១ ទំនុកតម្កើង។ ចម្រៀងតម្កើង
ព្រះជាម្ចាស់នៅថ្ងៃសប្ប័ទ*
២ ឱព្រះអម្ចាស់អើយ
ជាការប្រពៃណាស់
ដែលទូលបង្គំលើកតម្កើងព្រះអង្គ
ស្មូត្រទំនុកតម្កើងសរសើរព្រះនាម
របស់ព្រះដ៏ខ្ពង់ខ្ពស់បំផុត!
៣ ទូលបង្គំប្រកាសអំពីព្រះហឫទ័យ
មេត្តាករុណារបស់ព្រះអង្គ តាំងពីព្រលឹមមក
ហើយប្រកាសអំពីព្រះហឫទ័យស្មោះស្ម័គ្រ
របស់ព្រះអង្គនៅពេលយប់
៤ ដោយលេងឃឹម ដេញចាប៉ី និងដេញពិណ។
៥ ឱព្រះអម្ចាស់អើយ កិច្ចការដែលព្រះអង្គធ្វើ
បាននាំឲ្យទូលបង្គំមានអំណរដ៏លើសលប់
ទូលបង្គំសប្បាយចិត្តនឹងស្នាព្រះហស្ដរបស់ព្រះអង្គ។
៦ ឱព្រះអម្ចាស់អើយ
ស្នាព្រះហស្ដរបស់ព្រះអង្គប្រសើរឧត្តុង្គឧត្ដមណាស់
ព្រះតម្រិះរបស់ព្រះអង្គជ្រៅពន់ប្រមាណ!
៧ មនុស្សល្ងីល្ងើមិនយល់អ្វីទាំងអស់
ហើយមនុស្សឆោតល្ងង់ក៏មិនដឹងអ្វីដែរ។
៨ មនុស្សអាក្រក់លូតលាស់ឡើងដូចស្មៅ
ហើយមនុស្សទាំងប៉ុន្មានដែលប្រព្រឹត្ត
អំពើទុច្ចរិតក៏រីកដុះដាលឡើងដែរ
ប៉ុន្តែ គេនឹងត្រូវវិនាសអន្តរាយរហូតតទៅ។
៩ រីឯព្រះអង្គវិញ នៅស្ថានលើ
ព្រះអង្គនៅតែជាព្រះអម្ចាស់ជានិច្ច!
១០ ឱព្រះអម្ចាស់អើយ
ខ្មាំងសត្រូវរបស់ព្រះអង្គកំពុងតែវិនាស
អស់អ្នកដែលប្រព្រឹត្តអំពើទុច្ចរិត
នឹងត្រូវខ្ចាត់ខ្ចាយអស់ទៅ។
១១ ព្រះអង្គប្រទានឲ្យទូលបង្គំ
មានកម្លាំងដូចដំរី
ព្រះអង្គបានចាក់ប្រេងថ្មីមកលើទូលបង្គំ។
១២ ទូលបង្គំឃើញខ្មាំងសត្រូវបរាជ័យ
ព្រមទាំងឮសម្រែករបស់អស់អ្នក
ដែលស្អប់ទូលបង្គំ។
១៣ មនុស្សសុចរិតនឹងបានរីកដុះដាលឡើង
ដូចដើមត្នោត
ហើយចម្រើនធំឡើងដូចដើមតាត្រៅ
នៅស្រុកលីបង់។
១៤ ពួកគេប្រៀបបាននឹងដើមឈើដុះ
នៅក្នុងព្រះដំណាក់របស់ព្រះអម្ចាស់
ហើយលូតលាស់នៅក្នុងព្រះវិហារ
របស់ព្រះជាម្ចាស់។
១៥ ទោះបីគេមានវ័យចាស់ជរាក្តី
ក៏គេនៅតែអាចបង្កើតកូនបានដដែល
គឺប្រៀបបាននឹងដើមឈើដែលមានពន្លកថ្មី
និងមានស្លឹកលាស់ខៀវខ្ចីជានិច្ច។
១៦ ការទាំងនេះសម្ដែងឲ្យឃើញថា
ព្រះអម្ចាស់ជាថ្មដារបស់ខ្ញុំ
ព្រះអង្គមានព្រះហឫទ័យទៀងត្រង់ជានិច្ច
ឥតប្រែប្រួលសោះឡើយ។
៩៣
ព្រះអម្ចាស់ជាព្រះមហាក្សត្រ
១ ព្រះអម្ចាស់ជាព្រះមហាក្សត្រ
ប្រកបដោយភាពថ្កុំថ្កើងរុងរឿង
ព្រះអម្ចាស់ប្រកបទៅដោយព្រះចេស្ដា
ដូច្នេះ ផែនដីនឹងបានរឹងមាំឥតរង្គើសោះឡើយ។
២ បល្ល័ង្ករបស់ព្រះអង្គនៅស្ថិតស្ថេរយ៉ាងមាំ
តាំងពីដើមរៀងមក
ព្រះអង្គមានព្រះជន្មគង់នៅ
តាំងពីអស់កល្បជានិច្ច។
៣ ឱព្រះអម្ចាស់អើយ
មហាសាគរទាំងឡាយបន្លឺសំឡេងឡើង
មហាសាគរទាំងឡាយបន្លឺសំឡេងឡើង
យ៉ាងគគ្រឹកគគ្រេង។
៤ ប៉ុន្តែ នៅស្ថានបរមសុខ
ព្រះអម្ចាស់គ្រងរាជ្យយ៉ាងរុងរឿងឧត្តុង្គឧត្ដម
ព្រះអង្គមានមហិទ្ធិឫទ្ធិខ្លាំង
ជាងសំឡេងមហាសាគរ
ព្រះអង្គមានបារមីខ្លាំងជាង
រលកសមុទ្រទៅទៀត។
៥ ឱព្រះអម្ចាស់អើយ
វិន័យរបស់ព្រះអង្គសុទ្ធតែត្រឹមត្រូវទាំងស្រុង
ហើយព្រះដំណាក់របស់ព្រះអង្គជាកន្លែងដ៏វិសុទ្ធ
អស់កល្បតរៀងទៅ។
៩៤
សូមព្រះអង្គសម្ដែងឫទ្ធិបារមី ដើម្បីសងសឹក
១ ព្រះអម្ចាស់អើយ
ព្រះអង្គតែងតែសងសឹក
ឱព្រះដែលតែងតែសងសឹក សូមសម្ដែងឫទ្ធិបារមី!
២ ឱព្រះដែលជាចៅក្រមនៃពិភពលោកអើយ
សូមក្រោកឡើង!
សូមដាក់ទោសមនុស្សព្រហើន
ឲ្យសមនឹងអំពើដែលគេបានប្រព្រឹត្ត!
៣ ឱព្រះអម្ចាស់អើយ
តើទុកឲ្យមនុស្សអាក្រក់លើកតម្កើងខ្លួន
ដល់កាលណាទៀត?
៤ ពួកគេពោលពាក្យអួតបំប៉ោង
ពួកគេវាយឫកខ្ពស់
ជនទុច្ចរិតទាំងនោះនាំគ្នានិយាយក្អេងក្អាង។
៥ ឱព្រះអម្ចាស់អើយ ពួកគេជិះជាន់សង្កត់សង្កិន
ប្រជារាស្ដ្ររបស់ព្រះអង្គ
ពួកគេបន្ទាបបន្ថោកប្រជាជនរបស់ព្រះអង្គ
៦ ពួកគេសម្លាប់ស្ត្រីមេម៉ាយ និងជនអន្តោប្រវេសន៍
ពួកគេធ្វើឃាតក្មេងកំព្រា
៧ ហើយពោលថា «ព្រះអម្ចាស់មើលមិនឃើញទេ
ព្រះរបស់លោកយ៉ាកុបមិនរវីរវល់ឡើយ!»
៨ មនុស្សល្ងីល្ងើជាងគេអើយ ចូរប្រយ័ត្នខ្លួន!
មនុស្សឆោតល្ងង់អើយ
តើពេលណាទើបអ្នករាល់គ្នាចេះរិះគិត?
៩ ព្រះអង្គដែលជាអ្នកបង្កើតត្រចៀកមនុស្សមក
តើព្រះអង្គមិនចេះស្ដាប់ឬ?
ព្រះអង្គដែលជាអ្នកបង្កើតភ្នែកមនុស្សមក
តើព្រះអង្គមិនចេះទតឬ?
១០ ព្រះអង្គដែលជាអ្នកវាយប្រដៅប្រជាជាតិនានា
តើព្រះអង្គមិនចេះដាក់ទោសទេឬ?
ព្រះអង្គដែលជាអ្នកបង្រៀនមនុស្សលោក
ឲ្យចេះដឹង
តើព្រះអង្គមិនចេះដឹងទេឬ?
១១ ព្រះអម្ចាស់ជ្រាបគំនិតរបស់មនុស្សលោក
ច្បាស់ណាស់!
គឺគំនិតរបស់គេឥតខ្លឹមសារអ្វីទាំងអស់!
១២ ឱព្រះអម្ចាស់អើយ
អ្នកណាមានព្រះអង្គរំឭកដាស់តឿន
ហើយយកវិន័យមកប្រៀនប្រដៅ
អ្នកនោះមានសុភមង្គលហើយ!
១៣ នៅថ្ងៃមានអាសន្ន
ព្រះអង្គប្រទានឲ្យគេមានចិត្តស្ងប់
រីឯមនុស្សអាក្រក់វិញ
មានរណ្ដៅបម្រុងទុកសម្រាប់កប់ពួកគេ
១៤ ដ្បិតព្រះអម្ចាស់មិនបោះបង់ប្រជារាស្ដ្រ
របស់ព្រះអង្គឡើយ
ព្រះអង្គមិនចោលប្រជាជនរបស់ព្រះអង្គផ្ទាល់
ជាដាច់ខាត។
១៥ ពេលនោះ ចៅក្រមនឹងកាត់ក្តី
ដោយយុត្តិធម៌ឡើងវិញ
ហើយអស់អ្នកដែលមានចិត្តទៀងត្រង់
នឹងដើរតាមគន្លងយុត្តិធម៌។
១៦ តើមាននរណាក្រោកឡើងការពារខ្ញុំ
ជំទាស់នឹងមនុស្សអាក្រក់?
តើមាននរណាឈរជាមួយខ្ញុំ
ប្រឆាំងនឹងអស់អ្នកប្រព្រឹត្តអំពើទុច្ចរិត?
១៧ ប្រសិនបើព្រះអម្ចាស់មិនបានជួយខ្ញុំទេនោះ
ខ្ញុំមុខជាវិនាសសាបសូន្យភ្លាមៗមិនខាន។
១៨ ឱព្រះអម្ចាស់អើយ ពេលណាទូលបង្គំពោលថា
«ខ្ញុំដួលឥឡូវហើយ!»
នោះព្រះអង្គសម្ដែងព្រះហឫទ័យមេត្តាករុណា
ជួយទ្រទូលបង្គំ។
១៩ ពេលណាមានទុក្ខកង្វល់ញាំញីក្នុងចិត្តទូលបង្គំ
ព្រះអង្គសម្រាលទុក្ខទូលបង្គំ
ដោយប្រទានឲ្យទូលបង្គំមានអំណរសប្បាយ។
២០ តើអ្នកមានពាក់ព័ន្ធជាមួយនឹងចៅក្រម
ដ៏ទុច្ចរិតទាំងនោះ
ដែលប្រើច្បាប់ជិះជាន់សង្កត់សង្កិនប្រជាជនឬទេ?
២១ ពួកគេព្រួតគ្នាព្យាបាទជីវិតមនុស្សសុចរិត
ពួកគេកាត់ទោសប្រហារជីវិតមនុស្សស្លូតត្រង់។
២២ ប៉ុន្តែ ព្រះអម្ចាស់ជាកំពែងការពារខ្ញុំ
ព្រះរបស់ខ្ញុំជាថ្មដា និងជាជម្រក សម្រាប់ខ្ញុំ។
២៣ ព្រះអង្គសងទៅពួកគេវិញ
សមតាមកំហុសដែលគេបានប្រព្រឹត្ត
ព្រះអង្គធ្វើឲ្យគេវិនាសសូន្យ
ដោយសារអំពើកំណាចរបស់ខ្លួនផ្ទាល់
ព្រះអម្ចាស់ជាព្រះនៃយើង
នឹងធ្វើឲ្យពួកគេវិនាសសូន្យទៅ។
៩៥
ចូរយើងនាំគ្នាលើកតម្កើងព្រះអម្ចាស់!
១ សូមអញ្ជើញមក
យើងនាំគ្នាលើកតម្កើងព្រះអម្ចាស់!
ចូរស្រែកច្រៀងដោយអំណរ
ថ្វាយព្រះជាម្ចាស់ដែលជាថ្មដាសង្គ្រោះយើង។
២ ចូរយើងនាំគ្នាចូលមកចំពោះព្រះភ័ក្ត្រព្រះអង្គ
ទាំងអរព្រះគុណ
និងស្មូត្រទំនុកតម្កើងថ្វាយព្រះអង្គ
៣ ដ្បិតព្រះអម្ចាស់ជាព្រះដ៏ប្រសើរឧត្ដម
ព្រះអង្គជាព្រះមហាក្សត្រ
ដ៏ខ្ពង់ខ្ពស់លើសព្រះនានា។
៤ ព្រះអង្គគ្រប់គ្រងលើអ្វីៗទាំងអស់
គឺចាប់តាំងពីបាតដីរហូតដល់ចុងកំពូលភ្នំ។
៥ សមុទ្រស្ថិតនៅក្រោមការគ្រប់គ្រងរបស់ព្រះអង្គ
ព្រោះព្រះអង្គបានបង្កើតសមុទ្រមក
រីឯផែនដីក៏ព្រះអង្គបានបង្កើតមកដែរ។
៦ ចូរនាំគ្នាមក យើងនឹងឱនកាយថ្វាយបង្គំព្រះអង្គ
ចូរយើងក្រាបនៅចំពោះព្រះភ័ក្ត្រព្រះអម្ចាស់
ដែលបានបង្កើតយើងមក
៧ ដ្បិតព្រះអង្គជាព្រះនៃយើង
យើងជាប្រជារាស្ដ្រដែលព្រះអង្គថែរក្សា
ជាហ្វូងចៀមដែលព្រះអង្គដឹកនាំ។
ថ្ងៃនេះ បើអ្នករាល់គ្នាឮព្រះសូរសៀងរបស់ព្រះអង្គ
៨ មិនត្រូវមានចិត្តរឹងរូស
ដូចកាលបះបោរនៅមេរីបា
ដូចថ្ងៃល្បងលនៅម៉ាសា
ក្នុងវាលរហោស្ថាននោះឡើយ
៩ គឺបុព្វបុរសរបស់អ្នករាល់គ្នាបានល្បងលយើង
គេសាកមើលយើង ទោះបីគេបានឃើញកិច្ចការ
ដែលយើងធ្វើក៏ដោយ។
១០ ក្នុងអំឡុងពេលសែសិបឆ្នាំ
មនុស្សនៅជំនាន់នោះ
បានធ្វើឲ្យយើងឆ្អែតចិត្តជាខ្លាំង
ហើយយើងបានពោលថា:
ពួកនេះជាប្រជាជនដែលមានចិត្តវង្វេង
គេពុំស្គាល់មាគ៌ារបស់យើងឡើយ។
១១ ហេតុនេះ យើងខឹងនឹងពួកគេ ហើយប្ដេជ្ញាថា
មិនឲ្យពួកគេចូលមកសម្រាក
ជាមួយយើងជាដាច់ខាត!
៩៦
ចូរច្រៀងបទថ្មីថ្វាយព្រះអម្ចាស់!
១ ចូរច្រៀងបទថ្មីថ្វាយព្រះអម្ចាស់!
មនុស្សនៅផែនដីទាំងមូលអើយ
ចូរច្រៀងថ្វាយព្រះអម្ចាស់!
២ ចូរច្រៀងថ្វាយព្រះអម្ចាស់
និងសរសើរតម្កើងព្រះនាមព្រះអង្គ
ចូរប្រកាសជារៀងរាល់ថ្ងៃ
អំពីការសង្គ្រោះរបស់ព្រះអង្គ។
៣ ចូរប្រកាសនៅក្នុងចំណោមប្រជាជាតិនានា
អំពីសិរីរុងរឿងរបស់ព្រះអង្គ
ហើយប្រកាសនៅក្នុងចំណោម
ប្រជាជនទាំងឡាយ អំពីស្នាព្រះហស្ដ
ដ៏អស្ចារ្យរបស់ព្រះអង្គ!
៤ ដ្បិតព្រះអម្ចាស់ជាព្រះដ៏ប្រសើរឧត្ដម
ដែលយើងត្រូវតែសរសើរតម្កើងអស់ពីចិត្ត
ព្រះអង្គគួរជាទីស្ញែងខ្លាចជាងព្រះផងទាំងពួង។
៥ ព្រះទាំងប៉ុន្មានរបស់សាសន៍នានា
សុទ្ធតែឥតបានការអ្វីទាំងអស់
រីឯព្រះអម្ចាស់វិញ ព្រះអង្គបានបង្កើតផ្ទៃមេឃ។
៦ មានពន្លឺរស្មីចិញ្ចែងចិញ្ចាច
ចាំងចេញពីព្រះភ័ក្ត្ររបស់ព្រះអង្គ
ព្រះដំណាក់របស់ព្រះអង្គពោរពេញ
ទៅដោយឫទ្ធិបារមីដ៏ថ្កុំថ្កើងរុងរឿង។
៧ ប្រជាជាតិទាំងឡាយអើយ
ចូរនាំគ្នាលើកតម្កើងសិរីរុងរឿងព្រះអម្ចាស់
ហើយថ្លែងអំពីឫទ្ធានុភាពរបស់ព្រះអង្គ។
៨ ចូរលើកតម្កើងសិរីរុងរឿង
ព្រះនាមរបស់ព្រះអម្ចាស់!
ចូរនាំគ្នាយកតង្វាយចូលមក
ក្នុងព្រះវិហាររបស់ព្រះអង្គ!
៩ ចូរនាំគ្នាក្រាបថ្វាយបង្គំព្រះអម្ចាស់
នៅពេលព្រះអង្គសម្ដែងភាពវិសុទ្ធរបស់ព្រះអង្គ!
មនុស្សនៅលើផែនដីទាំងមូលអើយ
ចូរញាប់ញ័រនៅចំពោះព្រះភ័ក្ត្រព្រះអង្គចុះ!
១០ ចូរប្រកាសនៅក្នុងចំណោមប្រជាជាតិនានាថា
ព្រះអម្ចាស់គ្រងរាជ្យ
ពិភពលោករឹងមាំឥតរង្គើសោះឡើយ។
ព្រះអម្ចាស់គ្រប់គ្រងលើប្រជារាស្ដ្រនានា
ដោយយុត្តិធម៌។
១១ ចូរឲ្យផ្ទៃមេឃមានអំណរសប្បាយ
ឲ្យផែនដីបានរីករាយឡើង
ហើយសមុទ្រ និងអ្វីៗដែលស្ថិតនៅក្នុងសមុទ្រ
បន្លឺសំឡេងយ៉ាងអឺងកង!
១២ ចូរឲ្យស្រែចម្ការ និងអ្វីៗដែលស្ថិតនៅទីនោះ
ត្រេកអរសប្បាយ
ចូរឲ្យព្រៃព្រឹក្សាទាំងប៉ុន្មាន
ស្រែកហ៊ោនៅចំពោះព្រះភ័ក្ត្រព្រះអម្ចាស់
១៣ ដ្បិតព្រះអង្គយាងមកហើយ
ព្រះអង្គយាងមកវិនិច្ឆ័យទោសផែនដី
ព្រះអង្គវិនិច្ឆ័យទោសផែនដី ដោយយុត្តិធម៌
ព្រះអង្គវិនិច្ឆ័យប្រជាជនទាំងឡាយ
ដោយទៀងត្រង់។
៩៧
ព្រះអម្ចាស់គ្រងរាជ្យ
១ ព្រះអម្ចាស់គ្រងរាជ្យ!
ចូរឲ្យផែនដីបានរីករាយឡើង!
ចូរឲ្យកោះទាំងឡាយមានអំណរសប្បាយ!
២ មានពពកដ៏ខ្មៅងងឹតនៅព័ទ្ធជុំវិញព្រះអង្គ
ព្រះអង្គគ្រងរាជ្យដោយសុចរិតយុត្តិធម៌។
៣ មានភ្លើងឆេះនៅខាងមុខព្រះអង្គ
បំផ្លាញខ្មាំងសត្រូវដែលនៅជុំវិញព្រះអង្គ។
៤ ផ្លេកបន្ទោររបស់ព្រះអង្គជះពន្លឺ
មកលើពិភពលោក
ផែនដីឃើញពន្លឺនេះ ហើយញាប់ញ័រជាខ្លាំង។
៥ ភ្នំនានារលាយនៅចំពោះព្រះភ័ក្ត្រព្រះអម្ចាស់
ដូចជាក្រមួនត្រូវថ្ងៃ
គឺនៅចំពោះព្រះភ័ក្ត្រព្រះអម្ចាស់
នៃផែនដីទាំងមូល។
៦ ផ្ទៃមេឃប្រកាសអំពីសេចក្ដីសុចរិតរបស់ព្រះអង្គ
ហើយប្រជារាស្ដ្រទាំងអស់
នឹងឃើញសិរីរុងរឿងរបស់ព្រះអង្គ។
៧ អស់អ្នកដែលថ្វាយបង្គំព្រះក្លែងក្លាយ
ហើយអួតអាងក្នុងការគោរពបម្រើ
ព្រះឥតបានការ នឹងត្រូវអាម៉ាស់!។
ព្រះទាំងឡាយអើយ
ចូរនាំគ្នាក្រាបថ្វាយបង្គំព្រះអង្គ។
៨ ឱព្រះអម្ចាស់អើយ ពេលអ្នកក្រុងស៊ីយ៉ូន
ឮដំណឹងថា ព្រះអង្គវិនិច្ឆ័យទោសដូច្នេះ
គេនឹងមានអំណររីករាយ
ហើយអ្នកក្រុងនានានៅស្រុកយូដា
ក៏ត្រេកអរសប្បាយយ៉ាងខ្លាំងដែរ
៩ ឱព្រះអម្ចាស់អើយ មានតែព្រះអង្គទេ
ដែលជាព្រះដ៏ខ្ពង់ខ្ពស់នៅលើផែនដីទាំងមូល
ព្រះអង្គប្រសើរបំផុតលើសព្រះនានាទាំងអស់។
១០ អស់អ្នកដែលស្រឡាញ់ព្រះអម្ចាស់អើយ
ចូរស្អប់អំពើអាក្រក់!
ព្រះអង្គនឹងថែរក្សាអាយុជីវិតអស់អ្នក
ដែលស្មោះត្រង់នឹងព្រះអង្គ
ព្រះអង្គដោះលែងគេឲ្យរួចពីកណ្ដាប់ដៃ
របស់មនុស្សអាក្រក់។
១១ មានពន្លឺបំភ្លឺមនុស្សសុចរិត
ហើយមនុស្សដែលមានចិត្តទៀងត្រង់
នឹងមានអំណរសប្បាយ។
១២ មនុស្សសុចរិតអើយ ចូរនាំគ្នាអរសប្បាយ
ចំពោះកិច្ចការដែលព្រះអម្ចាស់បានធ្វើ!
ចូរលើកតម្កើងព្រះនាមដ៏វិសុទ្ធរបស់ព្រះអង្គ!
៩៨
ព្រះអម្ចាស់យាងមកជំនុំជម្រះផែនដី
ទំនុកតម្កើង។
១ ចូរច្រៀងបទថ្មីថ្វាយព្រះអម្ចាស់!
ដ្បិតព្រះអង្គបានធ្វើការអស្ចារ្យ
ព្រះអង្គយកជ័យជម្នះដោយឫទ្ធិបារមី
និងព្រះចេស្ដាដ៏វិសុទ្ធរបស់ព្រះអង្គ។
២ ព្រះអម្ចាស់បានបង្ហាញការសង្គ្រោះរបស់ព្រះអង្គ
ព្រះអង្គបានសម្ដែងឲ្យប្រជាជាតិនានា
ឃើញសេចក្ដីសុចរិតរបស់ព្រះអង្គ។
៣ ព្រះអង្គតែងតែសម្ដែងព្រះហឫទ័យមេត្តាករុណា
និងព្រះហឫទ័យស្មោះស្ម័គ្រ
ចំពោះកូនចៅអ៊ីស្រាអែលជានិច្ច។
មនុស្សម្នាដែលរស់នៅគ្រប់ទី
ដាច់ស្រយាលនៃផែនដី
បានឃើញការសង្គ្រោះនៃព្រះរបស់យើង។
៤ មនុស្សនៅលើផែនដីទាំងមូលអើយ
ចូរបន្លឺសំឡេងតម្កើងព្រះអម្ចាស់ដោយអំណរ!
ចូរស្រែកហ៊ោយ៉ាងសប្បាយ
ព្រមទាំងស្មូត្រទំនុកតម្កើង!
៥ ចូរស្មូត្រទំនុកតម្កើងថ្វាយព្រះអម្ចាស់
ដោយដេញពិណ
គឺដេញពិណលើកទំនុកយ៉ាងពីរោះ
៦ ចូរលើកតម្កើងព្រះអង្គដោយផ្លុំត្រែ និងផ្លុំស្នែង
ចូរបន្លឺសំឡេងតម្កើងព្រះអម្ចាស់
ជាព្រះមហាក្សត្រ!
៧ សមុទ្រ និងអ្វីៗដែលស្ថិតនៅក្នុងសមុទ្រ
ហើយផែនដី និងអ្វីៗដែលរស់នៅលើផែនដី
ចូរនាំគ្នាបន្លឺសំឡេងយ៉ាងអឺងកង!
៨ ទន្លេទាំងឡាយ ចូរអបអរសាទរ
ភ្នំទាំងឡាយ ចូរស្រែកហ៊ោព្រមៗគ្នាឡើង
៩ នៅចំពោះព្រះភ័ក្ត្រព្រះអម្ចាស់
ដ្បិតព្រះអង្គយាងមកគ្រប់គ្រងផែនដី
ព្រះអង្គគ្រប់គ្រងផែនដីដោយយុត្តិធម៌
ព្រះអង្គគ្រប់គ្រងប្រជាជនទាំងឡាយ
ដោយទៀងត្រង់។
៩៩
ព្រះអម្ចាស់ជាព្រះមហាក្សត្រ ព្រះអង្គជាព្រះដ៏វិសុទ្ធ
១ ព្រះអម្ចាស់គ្រងរាជ្យ
ប្រជាជនទាំងឡាយត្រូវញ័ររន្ធត់។
ព្រះអង្គគង់នៅពីលើពួកខេរូប៊ីម*
ហើយផែនដីកក្រើកញាប់ញ័រ។
២ ព្រះអម្ចាស់ជាព្រះដ៏ប្រសើរឧត្ដមនៅក្រុងស៊ីយ៉ូន
ព្រះអង្គជាព្រះដ៏ខ្ពង់ខ្ពស់លើសប្រជាជាតិទាំងអស់។
៣ មនុស្សគ្រប់ៗរូបត្រូវតែលើកតម្កើងព្រះនាម
ដ៏ឧត្តុង្គឧត្ដម គួរជាទីស្ញែងខ្លាចរបស់ព្រះអង្គ
ដ្បិតព្រះអង្គជាព្រះដ៏វិសុទ្ធ!។
៤ ព្រះអម្ចាស់អើយ ព្រះអង្គប្រកបដោយឫទ្ធានុភាព
ព្រះអង្គជាព្រះមហាក្សត្រ
ដែលស្រឡាញ់យុត្តិធម៌!
ព្រះអង្គបានតែងច្បាប់
ហើយព្រះអង្គធ្វើឲ្យមានសេចក្ដីសុចរិត
និងយុត្តិធម៌នៅក្នុងស្រុកអ៊ីស្រាអែល!
៥ ចូរលើកតម្កើងព្រះអម្ចាស់ជាព្រះនៃយើង
ចូរនាំគ្នាក្រាបទៀបព្រះបាទារបស់ព្រះអង្គ
ដ្បិតព្រះអង្គជាព្រះដ៏វិសុទ្ធ!
៦ លោកម៉ូសេ និងលោកអរ៉ុន
ជាបូជាចារ្យរបស់ព្រះអង្គ
លោកសាមូអែលជាមនុស្សម្នាក់ក្នុងចំណោម
អ្នកដែលអង្វររកព្រះអង្គ
ពេលលោកទាំងនោះអង្វររកព្រះអម្ចាស់
ព្រះអង្គឆ្លើយតបមកលោកវិញ។
៧ ព្រះអង្គមានព្រះបន្ទូលពីក្នុងផ្ទាំងពពក*
មកពួកលោក
ពួកលោកបានកាន់តាមព្រះបញ្ជា
និងប្រតិបត្តិតាមសេចក្ដីទាំងប៉ុន្មាន
ដែលព្រះអង្គបង្គាប់ឲ្យពួកលោកធ្វើ។
៨ ឱព្រះអម្ចាស់ជាព្រះនៃយើងខ្ញុំអើយ
ព្រះអង្គបានឆ្លើយតបមកពួកលោក
ទោះបីព្រះអង្គដាក់ទោសលោកទាំងនោះ
ព្រោះតែកំហុសដែលលោកបានប្រព្រឹត្តក្តី
ក៏ព្រះអង្គតែងតែអត់ទោសឲ្យពួកលោកជានិច្ច។
៩ ចូរលើកតម្កើងព្រះអម្ចាស់ជាព្រះនៃយើង
ចូរនាំគ្នាក្រាបថ្វាយបង្គំព្រះអង្គ
តម្រង់ទៅរកភ្នំដ៏វិសុទ្ធ
ដ្បិតព្រះអម្ចាស់ជាព្រះនៃយើងព្រះអង្គជាព្រះដ៏វិសុទ្ធ!
១០០
ចូរគោរពបម្រើព្រះអម្ចាស់ដោយចិត្តរីករាយ
១ ទំនុកតម្កើងសម្រាប់ពិធី
ថ្វាយតង្វាយអរព្រះគុណ។
មនុស្សនៅលើផែនដីទាំងមូលអើយ
ចូរបន្លឺសំឡេងតម្កើងព្រះអម្ចាស់!
២ ចូរគោរពបម្រើព្រះអម្ចាស់ដោយចិត្តរីករាយ
ចូរនាំគ្នាចូលមកជិតព្រះអង្គ
ដោយច្រៀងយ៉ាងសប្បាយ!
៣ ចូរដឹងថា ព្រះអម្ចាស់ពិតជាព្រះជាម្ចាស់មែន!
ព្រះអង្គបានបង្កើតយើងមក
យើងជាប្រជារាស្ដ្ររបស់ព្រះអង្គ
ហើយជាប្រជាជនដែលព្រះអង្គថែរក្សា។
៤ ចូរនាំគ្នាចូលតាមទ្វារព្រះដំណាក់របស់ព្រះអង្គ
ដោយអរព្រះគុណ
ចូរនាំគ្នាចូលមកក្នុងព្រះវិហារ
ដោយពាក្យសរសើរតម្កើង!
ចូរលើកតម្កើងព្រះអង្គ
ចូរសរសើរតម្កើងព្រះនាមព្រះអង្គ!
៥ ដ្បិតព្រះអម្ចាស់មានព្រះហឫទ័យសប្បុរស
ព្រះហឫទ័យមេត្តាករុណារបស់ព្រះអង្គ
នៅស្ថិតស្ថេរជានិច្ច
ហើយព្រះហឫទ័យស្មោះស្ម័គ្ររបស់ព្រះអង្គ
នៅស្ថិតស្ថេរអស់កល្បជាអង្វែងតរៀងទៅ។
១០១
ពាក្យសន្យារបស់ព្រះរាជា
១ ទំនុកតម្កើងរបស់ស្តេចដាវីឌ។
ទូលបង្គំនឹងច្រៀងរៀបរាប់អំពី
ព្រះហឫទ័យមេត្តាករុណា និងយុត្តិធម៌
ព្រះអម្ចាស់អើយ
ទូលបង្គំនឹងស្មូត្រទំនុកតម្កើងថ្វាយព្រះអង្គ។
២ ទូលបង្គំនឹងយកចិត្តទុកដាក់
អំពីមាគ៌ាដ៏ទៀងត្រង់។
តើដល់ពេលណាទើបព្រះអង្គ
យាងមករកទូលបង្គំ?
ទូលបង្គំនឹងរស់នៅក្នុងគ្រួសាររបស់ទូលបង្គំ
ដោយកាន់ចិត្តទៀងត្រង់។
៣ ទូលបង្គំមិនពេញចិត្តនឹងអំពើអាក្រក់
ណាមួយជាដាច់ខាត
ទូលបង្គំមិនចូលចិត្តនឹងអាកប្បកិរិយា
របស់អស់អ្នកដែលក្បត់ព្រះអង្គឡើយ
គឺទូលបង្គំមិនចង់ជាប់ពាក់ព័ន្ធ
នឹងអាកប្បកិរិយាបែបនេះទេ។
៤ ទូលបង្គំមិនទុកឲ្យមនុស្ស
ដែលមានចិត្តវៀចវេរ
ចូលជិតទូលបង្គំឡើយ
ហើយទូលបង្គំក៏មិនទាក់ទងនឹងអ្វីៗ
ដែលអាក្រក់ដែរ។
៥ ទូលបង្គំនឹងបំបិទមាត់អស់អ្នកដែលនិយាយអាក្រក់
ពីក្រោយខ្នងបងប្អូនរបស់ខ្លួន
ទូលបង្គំនឹងមិនយោគយល់ដល់អស់អ្នក
ដែលវាយឫកខ្ពស់
ហើយមានចិត្តអួតបំប៉ោងនោះឡើយ។
៦ ទូលបង្គំនឹងស្វែងរកអស់អ្នកដែលមានចិត្ត
ស្មោះត្រង់នៅក្នុងស្រុក
ដើម្បីរស់នៅជាមួយទូលបង្គំ
ហើយនរណាដើរតាមមាគ៌ាទៀងត្រង់
ទូលបង្គំនឹងឲ្យគេធ្វើជាជំនិតរបស់ទូលបង្គំ។
៧ រីឯមនុស្សបោកប្រាស់វិញ ទូលបង្គំមិនអនុញ្ញាត
ឲ្យរស់នៅក្នុងផ្ទះទូលបង្គំឡើយ
ហើយអ្នកនិយាយកុហក
ក៏មិនអាចនៅជិតទូលបង្គំបានដែរ។
៨ រាល់ព្រឹក ទូលបង្គំបំបិទមាត់មនុស្សអាក្រក់
ទាំងប៉ុន្មាននៅក្នុងស្រុក
ទូលបង្គំដកពួកទុច្ចរិត
ចេញពីទីក្រុងរបស់ព្រះអម្ចាស់។
១០២
នៅពេលទូលបង្គំមានអាសន្ន សូមកុំលាក់ព្រះភ័ក្ត្រឡើយ!
១ ពាក្យអធិស្ឋានរបស់ជនទុរគត
នៅពេលអស់សង្ឃឹម
គេចូលមកទូលអង្វរព្រះអម្ចាស់។
២ ឱព្រះអម្ចាស់អើយ
សូមព្រះសណ្ដាប់ពាក្យ
ទូលអង្វររបស់ទូលបង្គំ
សូមមេត្តាទទួលពាក្យដែលទូលបង្គំ
ស្រែកអង្វរនេះផង!
៣ នៅពេលទូលបង្គំមានអាសន្ន
សូមកុំលាក់ព្រះភ័ក្ត្រឡើយ!
នៅថ្ងៃទូលបង្គំស្រែកអង្វរព្រះអង្គ
សូមផ្ទៀងព្រះកាណ៌ស្ដាប់ទូលបង្គំផង!
សូមឆ្លើយតបមកទូលបង្គំជាប្រញាប់!
៤ ដ្បិតជីវិតទូលបង្គំនឹងត្រូវរសាត់បាត់ទៅ
ដូចជាផ្សែង
ហើយខ្លួនប្រាណទូលបង្គំក្ដៅដូចរងើកភ្លើង។
៥ ទូលបង្គំអស់ទឹកចិត្ត ប្រៀបដូចជាស្មៅក្រៀមស្ងួត
សូម្បីតែអាហារក៏ទូលបង្គំលែងនឹកនាទៀតដែរ។
៦ ទូលបង្គំចេះតែស្រែកថ្ងូរជានិច្ច
ទូលបង្គំនៅសល់តែស្បែក និងឆ្អឹង
៧ ទូលបង្គំប្រៀបដូចជាសត្វក្អែក
នៅវាលរហោស្ថាន
ឬដូចសត្វទីទុយនៅទីស្មសាន។
៨ ទូលបង្គំនៅទន្ទឹងរង់ចាំប្រៀបដូចជា
សត្វស្លាបឯកោទំនៅលើដំបូលផ្ទះ។
៩ រៀងរាល់ថ្ងៃ ខ្មាំងសត្រូវរបស់ទូលបង្គំ
នាំគ្នាប្រមាថមាក់ងាយទូលបង្គំ
ពួកគេចំអកឡកឡឺយឲ្យទូលបង្គំ
ហើយយកឈ្មោះទូលបង្គំទៅដាក់បណ្ដាសាគ្នា។
១០ ទូលបង្គំបរិភោគទាំងទុក្ខសោក
ទូលបង្គំបរិភោគលាយជាមួយទឹកភ្នែក
នឹងទូលបង្គំយ៉ាងខ្លាំង
១១ ព្រោះព្រះអង្គព្រះអង្គព្រះពិរោធ
ព្រះអង្គលើកទូលបង្គំបោះទៅឆ្ងាយ។
១២ អាយុជីវិតទូលបង្គំប្រៀបដូចជាស្រមោល
នៅពេលល្ងាច
និងដូចស្មៅដែលក្រៀមស្ងួតដែរ។
១៣ រីឯព្រះអង្គវិញ ឱព្រះអម្ចាស់អើយ
ព្រះអង្គគ្រងរាជ្យអស់កល្បជានិច្ច
គេនឹងរំឭកពីព្រះអង្គអស់កល្ប
ជាអង្វែងតរៀងទៅ។
១៤ ដោយព្រះអង្គអាណិតមេត្តាក្រុងស៊ីយ៉ូន
ព្រះអង្គមុខជាក្រោកឡើង
ព្រោះដល់ពេលកំណត់ដែលព្រះអង្គ
ត្រូវប្រណីសន្ដោសក្រុងនេះហើយ។
១៥ យើងខ្ញុំដែលជាអ្នកបម្រើរបស់ព្រះអង្គ
យើងខ្ញុំស្រឡាញ់ថ្មរបស់ក្រុងនេះណាស់
សូម្បីតែសំណល់បាក់បែករបស់ក្រុងនេះ
ក៏យើងខ្ញុំជាប់ចិត្តដែរ។
១៦ សូមឲ្យប្រជាជាតិនានាកោតខ្លាច
ព្រះនាមរបស់ព្រះអម្ចាស់
ហើយឲ្យស្តេចទាំងប៉ុន្មាននៅលើផែនដី
កោតខ្លាចសិរីរុងរឿងរបស់ព្រះអង្គ!
១៧ ពេលព្រះអម្ចាស់សង់ក្រុងស៊ីយ៉ូនឡើងវិញ
ព្រះអង្គនឹងសម្ដែងសិរីរុងរឿងឲ្យគេឃើញ។
១៨ ព្រះអង្គបែរព្រះភ័ក្ត្រទតទៅមនុស្សទុរគត
ព្រះអង្គលែងព្រងើយកន្តើយ
នឹងពាក្យទូលអង្វររបស់គេទៀតហើយ។
១៩ ចូរសរសេរសេចក្ដីទាំងនេះទុក
ឲ្យមនុស្សនៅជំនាន់ក្រោយបានដឹង
ដើម្បីឲ្យប្រជារាស្ដ្រដែលនឹងកកើតឡើងវិញ
នាំគ្នាសរសើរតម្កើងព្រះអម្ចាស់!
២០ ដ្បិតព្រះអង្គទតមើលពីទីសក្ការៈរបស់ព្រះអង្គមក
ព្រះអម្ចាស់ទតពីស្ថានបរមសុខមើលមកផែនដី
២១ ដើម្បីស្ដាប់សម្រែកថ្ងូររបស់អ្នកដែលជាប់ឃុំឃាំង
និងដើម្បីរំដោះអស់អ្នក
ដែលគេកាត់ទោសប្រហារជីវិត។
២២ ពេលនោះ គេនឹងប្រកាសអំពីព្រះកិត្តិនាម
របស់ព្រះអម្ចាស់នៅក្រុងស៊ីយ៉ូន
គេនឹងសរសើរតម្កើងព្រះអង្គនៅក្រុងយេរូសាឡឹម
២៣ គឺនៅពេលដែលប្រជាជាតិនានាមកជួបជុំគ្នា
ហើយប្រជាជនពីនគរទាំងឡាយ
នាំគ្នាគោរពបម្រើព្រះអម្ចាស់។
២៤ ពេលខ្ញុំនៅពេញកម្លាំងនៅឡើយ
ព្រះអង្គធ្វើឲ្យខ្ញុំទន់ជង្គង់
ព្រះអង្គបង្រួញអាយុជីវិតរបស់ខ្ញុំ។
២៥ ហេតុនេះហើយបានជាខ្ញុំអង្វរព្រះអង្គថា
«ឱព្រះនៃទូលបង្គំអើយ
ព្រះអង្គមានព្រះជន្មគង់នៅ
ពីជំនាន់មួយទៅជំនាន់មួយ
សូមកុំដកជីវិតទូលបង្គំក្នុងពេលដែល
ទូលបង្គំមិនទាន់ចាស់នៅឡើយ!»។
២៦ ព្រះអង្គបានបង្កើតផែនដី
តាំងពីយូរលង់ណាស់មកហើយ
ហើយផ្ទៃមេឃក៏ជាស្នាព្រះហស្ដ
របស់ព្រះអង្គដែរ។
២៧ ផ្ទៃមេឃ និងផែនដី នឹងវិនាសសូន្យទៅ
រីឯព្រះអង្គវិញ ព្រះអង្គនៅស្ថិតស្ថេររហូតតទៅ
ផ្ទៃមេឃ និងផែនដី នឹងរិចរឹលទៅ
ដូចសម្លៀកបំពាក់
ព្រះអង្គនឹងផ្លាស់វាដូចផ្លាស់សម្លៀកបំពាក់
ហើយវានឹងបាត់សូន្យទៅ។
២៨ ចំពោះព្រះអង្គវិញ ព្រះអង្គនៅតែដដែល
ព្រះជន្មាយុរបស់ព្រះអង្គគ្មានទីបញ្ចប់ទេ។
២៩ កូនចៅយើងខ្ញុំដែលជាអ្នកបម្រើរបស់ព្រះអង្គ
នឹងរស់នៅដោយសុខសាន្ត
ហើយព្រះអង្គនឹងថែរក្សាកូនចៅរបស់គេ
រហូតតទៅ។
១០៣
ខ្ញុំសូមសរសើរតម្កើងព្រះនាមដ៏វិសុទ្ធរបស់ព្រះអង្គអស់ពីដួងចិត្ត!
១ ទំនុករបស់ស្តេចដាវីឌ។
ខ្ញុំសូមសរសើរតម្កើងព្រះអម្ចាស់!
ខ្ញុំសូមសរសើរតម្កើងព្រះនាមដ៏វិសុទ្ធ
របស់ព្រះអង្គអស់ពីដួងចិត្ត!
២ ខ្ញុំសូមសរសើរតម្កើងព្រះអម្ចាស់
ដោយឥតភ្លេចពីកិច្ចការណាមួយដែលព្រះអង្គ
បានធ្វើដោយព្រះហឫទ័យសប្បុរសនោះឡើយ!
៣ ព្រះអង្គបានអត់ទោសនូវកំហុសទាំងប៉ុន្មាន
ដែលខ្ញុំបានប្រព្រឹត្ត
ព្រះអង្គប្រោសខ្ញុំឲ្យបានជាពីជំងឺគ្រប់យ៉ាង
៤ ព្រះអង្គបានរំដោះជីវិតខ្ញុំឲ្យរួចពីរណ្ដៅ
ព្រះអង្គតែងសម្ដែងព្រះហឫទ័យមេត្តាករុណា
និងអាណិតអាសូរចំពោះខ្ញុំយ៉ាងបរិបូណ៌
៥ ព្រះអង្គប្រទានឲ្យខ្ញុំរស់នៅ
ប្រកបដោយសុភមង្គល
ហើយព្រះអង្គប្រទានឲ្យខ្ញុំ
មានកម្លាំងឡើងវិញដូចសត្វឥន្ទ្រី។
៦ ព្រះអម្ចាស់ប្រព្រឹត្តដោយសុចរិត
ព្រះអង្គរកយុត្តិធម៌ឲ្យ
អស់អ្នកដែលត្រូវគេសង្កត់សង្កិន។
៧ ព្រះអង្គបង្ហាញឲ្យលោកម៉ូសេ
ស្គាល់គម្រោងការរបស់ព្រះអង្គ
ព្រះអង្គបង្ហាញឲ្យប្រជាជនអ៊ីស្រាអែល
ស្គាល់ស្នាព្រះហស្ដដ៏អស្ចារ្យរបស់ព្រះអង្គ។
៨ ព្រះអម្ចាស់ប្រកបដោយព្រះហឫទ័យ
អាណិតអាសូរ ព្រះអង្គតែងតែប្រណីសន្ដោស
ព្រះអង្គមានព្រះហឫទ័យអត់ធ្មត់
ហើយពោរពេញទៅដោយព្រះហឫទ័យ
មេត្តាករុណា។
៩ ព្រះអង្គមិនបន្ទោសជានិច្ចជាកាលទេ
ហើយព្រះអង្គក៏មិនព្រះពិរោធរហូតដែរ។
១០ ព្រះអង្គមិនដាក់ទោសយើង
ឲ្យសមនឹងអំពើបាប
ដែលយើងប្រព្រឹត្តនោះឡើយ
ហើយព្រះអង្គក៏មិនឲ្យយើងទទួលទោស
សមនឹងកំហុសរបស់យើងនោះដែរ។
១១ ផ្ទៃមេឃខ្ពស់ពីផែនដីយ៉ាងណា
ព្រះហឫទ័យមេត្តាករុណារបស់ព្រះអង្គ
ចំពោះអស់អ្នកដែលគោរពកោតខ្លាចព្រះអង្គ
ក៏ខ្ពស់យ៉ាងនោះដែរ។
១២ ទិសខាងកើតនៅឆ្ងាយពីទិសខាងលិចយ៉ាងណា
ព្រះអង្គក៏ដកកំហុសរបស់យើង
ចេញឆ្ងាយពីយើងយ៉ាងនោះដែរ។
១៣ ឪពុកអាណិតអាសូរកូនរបស់ខ្លួនយ៉ាងណា
ព្រះអម្ចាស់ក៏អាណិតអាសូរអស់អ្នក
ដែលគោរពកោតខ្លាចព្រះអង្គយ៉ាងនោះដែរ
១៤ ដ្បិតព្រះអង្គជ្រាបថាយើងមានដើមកំណើតពីអ្វី
គឺព្រះអង្គឥតភ្លេចទេថា
មនុស្សយើងមានកំណើតមកពីធូលីដី។
១៥ ជីវិតមនុស្សយើងប្រៀបបាននឹងស្មៅ
ឬដូចជាផ្កាដែលរីកឡើងនៅទីវាល
១៦ ពេលណាមានខ្យល់បក់មក
វាក៏រុះរោយបាត់អស់ទៅ
ឥតមានទុកស្នាមអ្វីសោះឡើយ។
១៧ តែព្រះហឫទ័យមេត្តាករុណារបស់ព្រះអម្ចាស់
ស្ថិតនៅអស់កល្បជានិច្ច
ជាមួយអស់អ្នកដែលគោរពកោតខ្លាចព្រះអង្គ
ព្រះអង្គក៏នឹងសម្ដែងព្រះហឫទ័យស្មោះស្ម័គ្រ
ចំពោះកូនចៅរបស់គេនៅជំនាន់ក្រោយដែរ
១៨ ប្រសិនបើគេកាន់តាមសម្ពន្ធមេត្រីរបស់ព្រះអង្គ
ព្រមទាំងប្រតិបត្តិតាមព្រះបញ្ជា
របស់ព្រះអង្គឥតភ្លេចសោះឡើយ។
១៩ ព្រះអម្ចាស់បានតាំងបល្ល័ង្ករបស់ព្រះអង្គ
នៅស្ថានបរមសុខ
ព្រះអង្គគ្រងរាជ្យលើអ្វីៗទាំងអស់។
២០ ទេវទូតដ៏ខ្លាំងពូកែរបស់ព្រះអម្ចាស់អើយ
ចូរនាំគ្នាសរសើរតម្កើងព្រះអង្គ!
អស់លោកតែងតែអនុវត្តតាម
ព្រះបន្ទូលរបស់ព្រះអង្គ
ហើយស្ដាប់តាមព្រះបញ្ជារបស់ព្រះអង្គជានិច្ច។
២១ អស់លោកដែលជាកងពលរបស់ព្រះអម្ចាស់អើយ
ចូរនាំគ្នាសរសើរតម្កើងព្រះអង្គ!
អស់លោកតែងតែបម្រើព្រះអង្គ
ស្របតាមព្រះហឫទ័យរបស់ព្រះអង្គជានិច្ច!
២២ ឱស្នាព្រះហស្ដទាំងឡាយរបស់ព្រះអម្ចាស់អើយ
ទោះបីនៅទីណាក្តី ក៏អ្នករាល់គ្នាស្ថិតនៅ
ក្រោមការគ្រប់គ្រងរបស់ព្រះអង្គដែរ
ចូរនាំគ្នាសរសើរតម្កើងព្រះអង្គ!
ខ្ញុំសូមសរសើរតម្កើងព្រះអម្ចាស់!
១០៤
អស់មួយជីវិត ខ្ញុំច្រៀងតម្កើងព្រះអម្ចាស់!
១ ខ្ញុំសូមសរសើរតម្កើងព្រះអម្ចាស់!
ឱព្រះអម្ចាស់ជាព្រះនៃទូលបង្គំអើយ
ព្រះអង្គជាព្រះដ៏ឧត្តុង្គឧត្ដមបំផុត!
នៅជុំវិញព្រះអង្គមានពេញទៅដោយពន្លឺរស្មី
ដ៏រុងរឿងចិញ្ចែងចិញ្ចាច!
២ ព្រះអង្គយកពន្លឺមកគ្របដណ្តប់ជុំវិញព្រះអង្គ
ព្រះអង្គលាតផ្ទៃមេឃធ្វើជាព្រះពន្លា។
៣ ព្រះអង្គបានសង់ព្រះដំណាក់ខ្ពស់
លើសផ្ទៃមេឃទៅទៀត
ព្រះអង្គយកពពកធ្វើជាព្រះរាជរថ
ព្រះអង្គប្រើវាយោធ្វើជាជំនិះ។
៤ ព្រះអង្គយកខ្យល់ធ្វើជាអ្នកនាំសាររបស់ព្រះអង្គ
ហើយយកផ្លេកបន្ទោរ
ធ្វើជាអ្នកបម្រើរបស់ព្រះអង្គ។
៥ ព្រះអង្គបានដាក់ផែនដីនៅលើគ្រឹះរបស់វា
ហើយផែនដីក៏រឹងមាំ ឥតរង្គើសោះឡើយ។
៦ នៅគ្រាដើម ព្រះអង្គយកមហាសាគរ
មកគ្របពីលើផែនដីទាំងមូល
ហើយសូម្បីតែកំពូលភ្នំ ក៏មានទឹកគ្របពីលើដែរ
៧ ប៉ុន្តែ នៅពេលឮព្រះអង្គគំរាម
ទឹកទាំងនោះក៏រត់ចេញ
នៅពេលផ្គររបស់ព្រះអង្គលាន់ឮឡើង
វានាំគ្នាភិតភ័យរត់បាត់អស់ទៅ។
៨ ទឹកខ្លះឡើងទៅលើកំពូលភ្នំ
ខ្លះទៀតហូរចុះទៅជ្រលងភ្នំ
តាមកន្លែងដែលព្រះអង្គបានកំណត់ទុក។
៩ ព្រះអង្គបានកម្រិតព្រំប្រទល់ទឹកទាំងនោះ
ដើម្បីកុំឲ្យវាលិចផែនដីបានទៀត។
១០ ព្រះអង្គបានដឹកនាំប្រភពទឹក
ឲ្យហូរទៅក្នុងជ្រោះ
គឺហូរតាមជ្រលងភ្នំនានា
១១ សត្វទាំងប៉ុន្មាននាំគ្នាមកផឹកទឹកនេះ
ហើយសត្វលាព្រៃក៏នាំគ្នាមកផឹក
ដើម្បីបំបាត់សម្រេកដែរ។
១២ បក្សាបក្សីធ្វើទ្រនំនៅក្បែរទឹកជ្រោះទាំងនោះ
ហើយនាំគ្នាច្រៀងយ៉ាងពីរោះនៅតាមមែកព្រឹក្សា។
១៣ ពីស្ថានដ៏ខ្ពស់ ព្រះអង្គបានស្រោចស្រព
ភ្នំទាំងឡាយ
ហើយព្រះអង្គប្រទានឲ្យផែនដី
មានទឹកយ៉ាងបរិបូណ៌។
១៤ ព្រះអង្គធ្វើឲ្យស្មៅដុះឡើងសម្រាប់ជាចំណីសត្វ
ព្រះអង្គក៏ធ្វើឲ្យដំណាំដុះឡើង
សម្រាប់មនុស្សលោក
ដើម្បីឲ្យគេមានអាហារបរិភោគ
១៥ មានស្រាទំពាំងបាយជូរផឹកឲ្យសប្បាយចិត្ត
មានប្រេងសម្រាប់លាបមុខឲ្យបានស្រស់ស្អាត
ព្រមទាំងម្ហូបអាហារបរិភោគឲ្យមានកម្លាំង។
១៦ សូម្បីតែដើមឈើដែលព្រះអម្ចាស់បានដាំ
គឺដូចជាដើមតាត្រៅនៅស្រុកលីបង់
ក៏មានទឹកគ្រប់គ្រាន់ដែរ។
១៧ បក្សាបក្សីនាំគ្នាធ្វើសំបុក
នៅលើដើមឈើទាំងនោះ
ហើយសត្វកុកនាំគ្នាធ្វើទ្រនំ
នៅលើដើមឈើទាល។
១៨ រីឯភ្នំខ្ពស់ៗជាជម្រករបស់ពពែភ្នំ
ហើយថ្មដានានាជាទីស្នាក់អាស្រ័យរបស់ទន្សាយ។
១៩ ព្រះអង្គបានបង្កើតព្រះច័ន្ទ
ដើម្បីកំណត់ពេលវេលា
ហើយព្រះអាទិត្យក៏ស្គាល់ពេល
ដែលត្រូវលិចទៅវិញដែរ។
២០ ព្រះអង្គនាំភាពងងឹតចូលមក រាត្រីកាលក៏មកដល់
ពេលនោះ សត្វព្រៃចាប់ផ្តើមសកម្មភាពរបស់វា
២១ សត្វសិង្ហស្ទាវគ្រហឹមរករំពា
វាទាមទារចំណីពីព្រះជាម្ចាស់។
២២ ពេលព្រះអាទិត្យរះឡើង វានាំគ្នាដកខ្លួនថយ
ទៅដេកក្នុងរូងរបស់វាវិញ។
២៣ ពេលនោះ មនុស្សម្នាចាកចេញពីផ្ទះ
ដើម្បីបំពេញការងាររៀងៗខ្លួន
គេធ្វើការរហូតដល់ល្ងាច។
២៤ ឱព្រះអម្ចាស់អើយ
ស្នាព្រះហស្ដរបស់ព្រះអង្គមានច្រើនឥតគណនា
ព្រះអង្គធ្វើការទាំងអស់នោះ
ប្រកបដោយព្រះប្រាជ្ញាញាណ
ផែនដីមានពោរពេញទៅដោយអ្វីៗ សព្វសារពើ
ដែលព្រះអង្គបានបង្កើតមក។
២៥ មើល៍ហ្ន៎! សមុទ្រធំធេងដាច់កន្ទុយភ្នែក
នៅក្នុងនោះមានមច្ឆាជាតិគ្រប់យ៉ាង ទាំងធំ
ទាំងតូច គ្មាននរណាអាចរាប់អស់ឡើយ។
២៦ នាវាទាំងឡាយធ្វើដំណើរនៅលើសមុទ្រ
ហើយនាគដែលព្រះអង្គបង្កើត
ក៏លេងនៅក្នុងសមុទ្រនោះដែរ។
២៧ សត្វទាំងប៉ុន្មាននាំគ្នាផ្ញើជីវិតលើព្រះអង្គ
ដើម្បីទទួលចំណីអាហារតាមពេលកំណត់។
២៨ ពេលព្រះអង្គប្រទានចំណីអាហារ
វាក៏នាំគ្នាទទួលយក
ពេលព្រះអង្គផ្គត់ផ្គង់ឲ្យ
វាបានឆ្អែតស្កប់ស្កល់។
២៩ ប៉ុន្តែ បើព្រះអង្គមិនរវីរវល់ទេនោះ
វាមុខជាភ័យញាប់ញ័រ
ហើយបើព្រះអង្គដកខ្យល់ដង្ហើមចេញពីវា
វានឹងផុតដង្ហើម វិលត្រឡប់ទៅជាធូលីដី។
៣០ ពេលណាព្រះអង្គប្រទានខ្យល់ដង្ហើម
សត្វទាំងនោះនឹងកកើតឡើង
ហើយអ្វីៗទាំងអស់នៅលើផែនដី
មានជីវិតឡើងវិញ។
៣១ សូមសិរីរុងរឿងរបស់ព្រះអម្ចាស់
នៅស្ថិតស្ថេររហូតតទៅ!
សូមព្រះអម្ចាស់រីករាយ
នឹងស្នាព្រះហស្ដរបស់ព្រះអង្គ!
៣២ ពេលព្រះអង្គទតមកផែនដី
នោះផែនដីក៏ញាប់ញ័រ
ពេលព្រះអង្គពាល់ភ្នំ
នោះក៏មានផ្សែងហុយឡើង។
៣៣ អស់មួយជីវិត ខ្ញុំច្រៀងតម្កើងព្រះអម្ចាស់!
ខ្ញុំនឹងស្មូត្រទំនុកតម្កើងថ្វាយព្រះរបស់ខ្ញុំ
ក្នុងពេលដែលខ្ញុំនៅមានជីវិត!
៣៤ សូមឲ្យទំនុករបស់ខ្ញុំ
បានគាប់ព្រះហឫទ័យព្រះអង្គ
សូមឲ្យខ្ញុំបានសប្បាយដោយសារព្រះអម្ចាស់។
៣៥ សូមឲ្យមនុស្សបាបវិនាសសូន្យពីផែនដី
សូមកុំឲ្យមានមនុស្សអាក្រក់ទៀតឡើយ
ខ្ញុំសូមសរសើរតម្កើងព្រះអម្ចាស់!។
ហាលេលូយ៉ា!
១០៥
ព្រះហឫទ័យស្មោះស្ម័គ្ររបស់ព្រះអម្ចាស់
១ ចូរនាំគ្នាលើកតម្កើងព្រះអម្ចាស់
ចូរប្រកាសព្រះនាមព្រះអង្គ!
ចូរថ្លែងអំពីស្នាព្រះហស្ដរបស់ព្រះអង្គ
ប្រាប់ប្រជាជាតិនានា!
២ ចូរច្រៀងតម្កើងព្រះអង្គ
ចូរស្មូត្រទំនុកតម្កើងថ្វាយព្រះអង្គ!
ចូររៀបរាប់អំពីការអស្ចារ្យទាំងប៉ុន្មាន
ដែលព្រះអង្គបានធ្វើ!
៣ ចូរខ្ពស់មុខឡើងព្រោះអ្នករាល់គ្នា
ជាប្រជាជនរបស់ព្រះដ៏វិសុទ្ធ!
អស់អ្នកស្វែងរកព្រះអម្ចាស់អើយ
ចូរសប្បាយចិត្តចុះ!
៤ ចូរស្វែងរកព្រះអម្ចាស់ប្រកបដោយព្រះចេស្ដា
ចូរស្វែងរកព្រះភ័ក្ត្រព្រះអង្គឥតឈប់ឈរឡើយ!
៥ ចូរនឹកដល់ការអស្ចារ្យផ្សេងៗដែលព្រះអង្គបានធ្វើ
ចូរនឹកដល់ឫទ្ធិបាដិហារិយ៍ និង
ការជំនុំជម្រះទាំងប៉ុន្មានដែលព្រះអង្គបានសម្រេច។
៦ អ្នករាល់គ្នាជាពូជពង្សរបស់លោកអប្រាហាំ
ដែលជាអ្នកបម្រើរបស់ព្រះអង្គ
អ្នករាល់គ្នាជាកូនចៅរបស់លោកយ៉ាកុប
ដែលព្រះអង្គបានជ្រើសរើសអើយ
៧ មានតែព្រះអម្ចាស់ទេដែលជាព្រះរបស់យើង
ព្រះអង្គគ្រប់គ្រងលើផែនដីទាំងមូល។
៨ ព្រះអង្គតែងតែនឹកដល់សម្ពន្ធមេត្រី
របស់ព្រះអង្គជានិច្ច
គឺជាព្រះបន្ទូលដែលនៅស្ថិតស្ថេរ
រហូតដល់មួយពាន់តំណ
៩ ព្រះអង្គនឹកដល់សម្ពន្ធមេត្រី
ដែលព្រះអង្គបានចងជាមួយលោកអប្រាហាំ
ព្រមទាំងព្រះបន្ទូលដែលព្រះអង្គបានសន្យា
ជាមួយលោកអ៊ីសាក
១០ ព្រះអង្គបានបញ្ជាក់សម្ពន្ធមេត្រីនេះ
ជាមួយលោកយ៉ាកុប
ទុកជាសម្ពន្ធមេត្រីអស់កល្បជានិច្ច
ជាមួយលោកអ៊ីស្រាអែល។
១១ គឺព្រះអង្គមានព្រះបន្ទូលថា:
«យើងនឹងប្រគល់ស្រុកកាណានឲ្យអ្នក
ទុកជាចំណែកមត៌ក»។
១២ នៅគ្រានោះ ប្រជាជនអ៊ីស្រាអែល
ជាក្រុមមួយដ៏តូច
ដែលចូលមករស់នៅលើទឹកដីស្រុកកាណាន។
១៣ គេធ្វើដំណើរពីស្រុកមួយទៅស្រុកមួយ
ពីនគរមួយទៅនគរមួយទៀត។
១៤ ប៉ុន្តែ ព្រះអង្គមិនអនុញ្ញាតឲ្យនរណាម្នាក់
សង្កត់សង្កិនគេទេ
ដើម្បីការពារពួកគេ
ព្រះអង្គបានបន្ទោសស្តេចនានាថា:
១៥ «កុំប៉ះពាល់អស់អ្នក
ដែលយើងបានចាក់ប្រេងអភិសេកនេះឡើយ
កុំធ្វើបាបព្យាការីរបស់យើងឲ្យសោះ!»។
១៦ ព្រះអង្គបានធ្វើឲ្យទុរ្ភិក្សកើតមាន
នៅក្នុងស្រុកនោះ
ព្រះអង្គធ្វើឲ្យពួកគេខ្វះម្ហូបអាហារ
១៧ ព្រះអង្គចាត់បុរសម្នាក់ឲ្យទៅមុន
គឺលោកយ៉ូសែបដែលគេបានលក់ជាទាសករ។
១៨ គេដាក់ខ្នោះជើងលោក
ហើយដាក់ច្រវាក់កលោក
១៩ រហូតដល់មានហេតុការណ៍កើតឡើង
ស្របតាមពាក្យដែលលោកបានថ្លែងទុក
គឺព្រះបន្ទូលរបស់ព្រះអម្ចាស់បានធ្វើ
ជាភស្តុតាងបញ្ជាក់ថាលោកជាមនុស្សស្លូតត្រង់។
២០ ស្តេចស្រុកអេស៊ីប
ដែលជាម្ចាស់លើប្រជារាស្ដ្រនានា
បានចេញបញ្ជាឲ្យគេស្រាយចំណង
ដោះលែងលោក។
២១ បន្ទាប់មក ស្តេចបានតែងតាំងលោកឲ្យ
ត្រួតត្រាលើព្រះរាជវាំង
ព្រមទាំងឲ្យលោកមើលខុសត្រូវ
លើព្រះរាជ្យទ្រព្យទាំងអស់ទៀតផង។
២២ ស្តេចប្រទានឲ្យលោកត្រួតត្រា
លើមន្ត្រីទាំងអស់
ហើយឲ្យលោកប្រៀនប្រដៅ
ពួកព្រឹទ្ធាចារ្យរបស់ស្តេចទៀតផង។
២៣ ពេលនោះ ជនជាតិអ៊ីស្រាអែលទៅរស់នៅ
ក្នុងស្រុកអេស៊ីប
កូនចៅរបស់លោកយ៉ាកុបស្នាក់អាស្រ័យ
នៅលើទឹកដីរបស់កូនចៅលោកហាំ។
២៤ ព្រះជាម្ចាស់ប្រោសប្រទានឲ្យ
ប្រជារាស្ដ្ររបស់ព្រះអង្គកើនចំនួនច្រើនឡើង
មានកម្លាំងជាងបច្ចាមិត្តទៅទៀត។
២៥ ព្រះអង្គបានធ្វើឲ្យជនជាតិ
អេស៊ីបដូរចិត្តគំនិត
គឺពួកគេនាំគ្នាស្អប់ប្រជារាស្ដ្ររបស់ព្រះអង្គ
ពួកគេបានបោកប្រាស់
និងធ្វើបាបអ្នកបម្រើរបស់ព្រះអង្គ។
២៦ ព្រះអង្គបានចាត់លោកម៉ូសេ
ជាអ្នកបម្រើរបស់ព្រះអង្គ
ព្រមទាំងលោកអរ៉ុន
ជាអ្នកដែលព្រះអង្គបានជ្រើសរើសឲ្យទៅ។
២៧ លោកទាំងពីរបានប្រើអំណាចមកពីព្រះអង្គ
សម្ដែងទីសម្គាល់ និងឫទ្ធិបាដិហារិយ៍ផ្សេងៗនៅស្រុកអេស៊ីប។
២៨ ព្រះជាម្ចាស់បានធ្វើឲ្យមានភាពអន្ធការ
នៅពេញស្រុក គ្មាននរណាជំទាស់នឹងព្រះបន្ទូល
របស់ព្រះអង្គបានឡើយ។
២៩ ព្រះអង្គបានប្រែទឹកឲ្យទៅជាឈាម
ព្រះអង្គធ្វើឲ្យត្រីនៅស្រុកគេវិនាសអស់។
៣០ ព្រះអង្គធ្វើឲ្យមានកង្កែបឡើង
មកពេញក្នុងស្រុក
គឺឡើងរហូតទៅដល់ក្រឡាបន្ទំរបស់ស្តេច។
៣១ ពេលព្រះអង្គមានព្រះបន្ទូល
នោះក៏មានរុយដែលមានពិស និងមូស
មករាតត្បាតពាសពេញក្នុងស្រុករបស់គេ។
៣២ ព្រះអង្គធ្វើឲ្យមានព្រឹលបង្អុរ
ចុះមកជំនួសភ្លៀង
ព្រមទាំងមានរន្ទះបាញ់ឆេះស្រុករបស់គេផង។
៣៣ ព្រះអង្គបានបំផ្លាញចម្ការទំពាំងបាយជូរ
និងចម្ការដំណាំរបស់គេ
ព្រះអង្គបំបាក់ដើមឈើទាំងប៉ុន្មាន
នៅលើទឹកដីរបស់គេ។
៣៤ ពេលព្រះអង្គមានព្រះបន្ទូល
នោះក៏មានកណ្ដូប និងក្រា
ដែលមានចំនួនច្រើនឥតគណនា
៣៥ ទៅស៊ីបង្ហិនដំណាំទាំងប៉ុន្មាននៅក្នុងស្រុកគេ
ព្រមទាំងស៊ីបង្ហិនបន្លែបង្ការ
ដែលដុះចេញពីដីរបស់គេផង។
៣៦ បន្ទាប់មក ព្រះអង្គបានប្រហារកូនច្បងទាំងប៉ុន្មាន
នៅក្នុងស្រុករបស់គេ
គឺកូនដែលកើតមកក្នុងពេលគេ
នៅពេញកម្លាំងនៅឡើយ។
៣៧ បន្ទាប់មក ព្រះអង្គនាំប្រជារាស្ដ្ររបស់ព្រះអង្គ
ចាកចេញពីស្រុកអេស៊ីប
ទាំងនាំយកមាសប្រាក់ទៅជាមួយផង
ហើយក្នុងចំណោមកុលសម្ព័ន្ធរបស់គេ
គ្មាននរណាម្នាក់ទន់ខ្សោយឡើយ។
៣៨ ពេលពួកគេចាកចេញទៅ
ជនជាតិអេស៊ីបនាំគ្នាសប្បាយចិត្ត
ដ្បិតជនជាតិអេស៊ីបភ័យខ្លាចពួកគេជាខ្លាំង។
៣៩ ព្រះអង្គបានដាក់ពពក*បាំងពីលើពួកគេ
ហើយប្រទានដុំភ្លើងមកបំភ្លឺពួកគេ
នៅពេលយប់។
៤០ ពួកគេសុំអាហារ ព្រះអង្គប្រទានសត្វក្រួច
និងប្រទានអាហារពីស្ថានសួគ៌
មកឲ្យគេបរិភោគយ៉ាងឆ្អែតបរិបូណ៌។
៤១ ព្រះអង្គបានបំបែកថ្ម
ធ្វើឲ្យមានទឹកហូរចេញមក
ប្រៀបបាននឹងទន្លេហូរនៅក្នុងវាលហួតហែង។
៤២ ព្រះអង្គនឹកដល់ព្រះបន្ទូលដ៏វិសុទ្ធ
ដែលព្រះអង្គបានសន្យាជាមួយលោកអប្រាហាំ
ជាអ្នកបម្រើរបស់ព្រះអង្គ។
៤៣ ព្រះអង្គបាននាំប្រជារាស្ដ្ររបស់ព្រះអង្គ
ចេញមកដោយអំណរសប្បាយ
ព្រះអង្គបាននាំប្រជាជនដែលព្រះអង្គ
បានជ្រើសរើសចេញមកដោយហ៊ោកញ្ជ្រៀវ។
៤៤ ព្រះអង្គបានយកទឹកដីរបស់ប្រជាជាតិនានា
មកចែកឲ្យពួកគេ
ព្រមទាំងឲ្យពួកគេទទួលភោគផល
ដែលប្រជាជាតិទាំងនោះបានដាំ
៤៥ ដើម្បីឲ្យពួកគេប្រតិបត្តិតាម
សេចក្ដីប្រៀនប្រដៅរបស់ព្រះអង្គ
និងធ្វើតាមព្រះបញ្ជារបស់ព្រះអង្គ។
ហាលេលូយ៉ា!
១០៦
ព្រះអម្ចាស់មានព្រះហឫទ័យស្មោះស្ម័គ្រជានិច្ច
១ ហាលេលូយ៉ា!
ចូរលើកតម្កើងព្រះអម្ចាស់
ដ្បិតព្រះអង្គសប្បុរស
ព្រះហឫទ័យមេត្តាករុណារបស់ព្រះអង្គ
នៅស្ថិតស្ថេររហូតតទៅ!
២ តើនរណាអាចរៀបរាប់អំពីស្នាព្រះហស្ដ
ដ៏អស្ចារ្យរបស់ព្រះអង្គបាន?
តើនរណាអាចថ្លែងពីការអស្ចារ្យទាំងប៉ុន្មាន
ដើម្បីសរសើរតម្កើងព្រះអង្គបាន?
៣ អ្នកណាប្រព្រឹត្តដោយយុត្តិធម៌
ហើយប្រតិបត្តិតាមសេចក្ដីសុចរិតគ្រប់ពេលវេលា
អ្នកនោះមានសុភមង្គលហើយ។
៤ ឱព្រះអម្ចាស់អើយ ពេលណាព្រះអង្គ
គាប់ព្រះហឫទ័យនឹងប្រជារាស្ដ្ររបស់ព្រះអង្គ
សូមនឹកដល់ទូលបង្គំផង!
ពេលណាព្រះអង្គសង្គ្រោះពួកគេ
សូមជួយទូលបង្គំ
៥ ដើម្បីឲ្យទូលបង្គំឃើញសុភមង្គល
របស់ប្រជាជនដែលព្រះអង្គបានជ្រើសរើស
ឲ្យទូលបង្គំមានអំណររួមជាមួយ
ប្រជាជាតិរបស់ព្រះអង្គ
ហើយឲ្យទូលបង្គំបានខ្ពស់មុខ
រួមជាមួយប្រជារាស្ដ្ររបស់ព្រះអង្គ។
៦ យើងខ្ញុំបានប្រព្រឹត្តអំពើបាប
ដូចបុព្វបុរសរបស់យើងខ្ញុំ
យើងខ្ញុំបានប្រព្រឹត្តខុស និងប្រព្រឹត្តអំពើអាក្រក់!
៧ កាលនៅស្រុកអេស៊ីប បុព្វបុរសរបស់យើងខ្ញុំ
ពុំបានយល់អំពីការអស្ចារ្យរបស់ព្រះអង្គទេ
ពួកគេបំភ្លេចកិច្ចការជាច្រើន
ដែលព្រះអង្គបានធ្វើចំពោះពួកគេ
ដោយព្រះហឫទ័យមេត្តាករុណា
ពួកគេបានបះបោរប្រឆាំងនឹងព្រះអង្គ
នៅក្បែរសមុទ្រកក់។
៨ ក៏ប៉ុន្តែ ព្រះអង្គបានសង្គ្រោះពួកគេ
ដោយយល់ដល់ព្រះនាមរបស់ព្រះអង្គ
ដើម្បីបង្ហាញឫទ្ធានុភាពរបស់ព្រះអង្គ។
៩ ព្រះអង្គបានគំរាមសមុទ្រកក់ សមុទ្រក៏រីង
ព្រះអង្គបានឲ្យគេដើរកាត់បាតសមុទ្រ
ដូចដើរនៅវាលរហោស្ថាន។
១០ ព្រះអង្គបានសង្គ្រោះពួកគេឲ្យរួច
ពីកណ្ដាប់ដៃរបស់អ្នកដែលស្អប់ពួកគេ
ព្រះអង្គបានរំដោះពួកគេពីកណ្ដាប់ដៃ
របស់ខ្មាំងសត្រូវ។
១១ ទឹកសមុទ្របានគ្របពីលើបច្ចាមិត្ត
គ្មាននរណាម្នាក់បានរួចជីវិតសោះឡើយ។
១២ ពួកបុព្វបុរសក៏នាំគ្នាជឿព្រះបន្ទូលរបស់ព្រះអង្គ
ហើយនាំគ្នាច្រៀងសរសើរតម្កើងព្រះអង្គ។
១៣ ប៉ុន្តែ ក្រោយមក ពួកគេឆាប់ភ្លេចពីកិច្ចការ
ដែលព្រះអង្គបានធ្វើ
ពួកគេពុំបានរង់ចាំឲ្យព្រះអង្គ
សម្រេចតាមគម្រោងការរបស់ព្រះអង្គឡើយ។
១៤ នៅវាលរហោស្ថានពួកគេមានចិត្តលោភលន់
ហើយនាំគ្នាល្បងលព្រះអង្គ
នៅវាលដ៏ហួតហែងនោះ។
១៥ ព្រះអង្គបានប្រទានឲ្យគេនូវអាហារ
ដែលគេទាមទារ
គឺព្រះអង្គធ្វើឲ្យពួកគេបានឆ្អែត
រហូតដល់ធុញទ្រាន់។
១៦ នៅក្នុងជំរំពួកគេនាំគ្នាច្រណែននឹងលោកម៉ូសេ
ហើយច្រណែននឹងលោកអរ៉ុន
ដែលជាអ្នកបម្រើដ៏វិសុទ្ធរបស់ព្រះអម្ចាស់
១៧ ពេលនោះ ដីក៏ប្រេះលេបលោកដាតាន
ព្រមទាំងស្រូបបក្សពួក
របស់លោកអប៊ីរ៉ាមទៀតផង។
១៨ មានភ្លើងមកឆេះបក្សពួករបស់គេ
ហើយអណ្ដាតភ្លើងឆាបឆេះមនុស្ស
អាក្រក់ទាំងនោះអស់គ្មានសល់។
១៩ ក្រោយមក ពួកគេឆ្លាក់រូបកូនគោមួយ
នៅភ្នំហូរែប
ហើយនាំគ្នាក្រាបថ្វាយបង្គំរូប
ដែលធ្វើពីលង្ហិននោះ។
២០ ពួកគេបែរជាយករូបសត្វដែលស៊ីស្មៅ
មកថ្វាយបង្គំជំនួសព្រះជាម្ចាស់
ប្រកបដោយសិរីរុងរឿងវិញ។
២១ ពួកគេភ្លេចថាព្រះជាម្ចាស់បានសង្គ្រោះពួកគេ
ដោយស្នាព្រះហស្ដដ៏ឧត្តុង្គឧត្ដមនៅស្រុកអេស៊ីប
២២ គឺការអស្ចារ្យផ្សេងៗនៅស្រុក
របស់កូនចៅលោកហាំ
និងដោយស្នាព្រះហស្ដដ៏គួរឲ្យ
ស្ញែងខ្លាចនៅសមុទ្រកក់។
២៣ ព្រះអង្គមានព្រះបន្ទូលថានឹងកម្ទេចប្រជារាស្ដ្រនេះ
ប៉ុន្តែ លោកម៉ូសេដែលព្រះអង្គជ្រើសរើស
បានឃាត់ព្រះអង្គមិនឲ្យលុបបំបាត់ពួកគេ
តាមព្រះពិរោធរបស់ព្រះអង្គឡើយ។
២៤ បន្ទាប់មកទៀត ពួកគេចង់បដិសេធ
មិនចូលទៅក្នុងទឹកដីដ៏សម្បូណ៌សប្បាយ
ពួកគេពុំព្រមជឿព្រះបន្ទូលរបស់ព្រះអម្ចាស់ទេ
២៥ ពួកគេនាំគ្នារអ៊ូរទាំនៅក្នុងជំរំរៀងៗខ្លួន
មិនព្រមស្ដាប់ព្រះសូរសៀង
របស់ព្រះអម្ចាស់ឡើយ។
២៦ ដូច្នេះ ព្រះអង្គក៏ប្រកាសយ៉ាងដាច់ខាតថា
នឹងទុកពួកគេឲ្យវិនាស
នៅក្នុងវាលរហោស្ថាន
២៧ ព្រមទាំងកម្ចាត់កម្ចាយពូជពង្សរបស់ពួកគេ
ទៅនៅពាសពេញក្នុងចំណោមប្រជាជាតិនានា
ហើយឲ្យគេស្លាប់នៅលើទឹកដី
របស់សាសន៍ដទៃ។
២៨ នៅពេអ៊រ ពួកគេបាននាំគ្នាបែរទៅ
ថ្វាយបង្គំព្រះបាល
ព្រមទាំងបរិភោគម្ហូបអាហារដែលគេបានសែន
ទៅព្រះដែលគ្មានជីវិតទាំងនោះទៀតផង។
២៩ ពួកគេបានប្រព្រឹត្តអំពើដែលធ្វើ
ឲ្យព្រះអម្ចាស់ព្រះអង្គព្រះពិរោធ
បណ្តាលឲ្យកើតមានគ្រោះកាច
ក្នុងចំណោមពួកគេ។
៣០ ពេលនេះ លោកភីនេហាសបានក្រោកឡើង
ដាក់ទោសពួកគេ
ហើយគ្រោះកាចនោះក៏ស្ងប់ទៅវិញ។
៣១ ព្រោះតែការនេះ
ព្រះអម្ចាស់បានប្រោសលោកឲ្យសុចរិត
អស់កល្បជាអង្វែងតរៀងទៅ។
៣២ នៅប្រភពទឹកមេរីបា ពួកគេបាននាំគ្នា
ធ្វើឲ្យព្រះអម្ចាស់ព្រះអង្គព្រះពិរោធ
ហើយលោកម៉ូសេទទួលទោស ព្រោះតែពួកគេ
៣៣ គឺពួកគេធ្វើឲ្យលោកឆ្អែតចិត្ត
ហើយមានប្រសាសន៍ចេញមក
ដោយពុំបានគិត។
៣៤ ពួកគេពុំបានប្រហារប្រជាជាតិនានា
តាមព្រះបញ្ជារបស់ព្រះអម្ចាស់ទេ។
៣៥ ពួកគេបែរជាទៅពាក់ព័ន្ធជាមួយ
ប្រជាជាតិទាំងនោះ
ហើយនាំគ្នាប្រព្រឹត្តតាមសាសន៍ទាំងនោះ
៣៦ គឺថ្វាយបង្គំព្រះក្លែងក្លាយរបស់សាសន៍ដទៃ
ដែលជាអន្ទាក់នាំឲ្យពួកគេវិនាស។
៣៧ ពួកគេបានយកកូនប្រុស
កូនស្រីទៅធ្វើយញ្ញបូជាឲ្យអារក្ខ។
៣៨ ពួកគេប្រហារជីវិតកូនប្រុសកូនស្រីរបស់ខ្លួន
ដែលគ្មានកំហុស
ដើម្បីធ្វើយញ្ញបូជាឲ្យព្រះក្លែងក្លាយ
នៅស្រុកកាណាន
ឃាតកម្មទាំងនោះបណ្តាលឲ្យទឹកដី
របស់ពួកគេលែងវិសុទ្ធទៀត។
៣៩ អំពើដែលពួកគេប្រព្រឹត្តបានធ្វើឲ្យខ្លួនគេ
ទៅជាសៅហ្មង ពួកគេបានក្បត់ព្រះជាម្ចាស់
ដោយសារអំពើរបស់ខ្លួន។
៤០ ព្រះអម្ចាស់ព្រះអង្គព្រះពិរោធនឹងប្រជារាស្ដ្រ
របស់ព្រះអង្គយ៉ាងខ្លាំង
ព្រះអង្គទាស់ព្រះហឫទ័យនឹងប្រជាជន
ផ្ទាល់របស់ព្រះអង្គ។
៤១ ព្រះអង្គប្រគល់ពួកគេទៅក្នុងកណ្ដាប់
ដៃរបស់ប្រជាជាតិនានា
ព្រះអង្គឲ្យបច្ចាមិត្តគ្រប់គ្រងលើពួកគេ។
៤២ ខ្មាំងសត្រូវជិះជាន់សង្កត់សង្កិនពួកគេ
ព្រមទាំងបង្ក្រាបពួកគេឲ្យចុះចូល
ក្រោមអំណាចរបស់ខ្លួនទៀតផង។
៤៣ ព្រះអង្គបានរំដោះពួកគេច្រើនលើកច្រើនគ្រា
ក៏ប៉ុន្តែ ពួកគេនៅតែនាំគ្នាបះបោរ
ប្រឆាំងនឹងព្រះអង្គ
ហើយប្រព្រឹត្តអំពើបាបកាន់តែខ្លាំងឡើងៗ។
៤៤ ពេលព្រះអង្គឮពួកគេស្រែកអង្វរ
ព្រះអង្គក៏មានព្រះហឫទ័យអាណិតពួកគេ
ដែលកំពុងរងទុក្ខលំបាក
៤៥ ព្រះអង្គប្រោសប្រណីពួកគេ
ដោយនឹកដល់សម្ពន្ធមេត្រីរបស់ព្រះអង្គ
ព្រះអង្គដូរព្រះហឫទ័យ
ព្រោះព្រះអង្គមានមេត្តាករុណាធម៌ដ៏លើសលប់។
៤៦ ព្រះអង្គធ្វើឲ្យអស់អ្នកដែលចាប់ពួកគេ
យកទៅធ្វើជាឈ្លើយ
មានចិត្តអាណិតមេត្តាពួកគេ។
៤៧ ឱព្រះអម្ចាស់ជាព្រះនៃយើងខ្ញុំអើយ
សូមសង្គ្រោះយើងខ្ញុំផង!
សូមប្រមែប្រមូលយើងខ្ញុំពីចំណោម
ប្រជាជាតិនានាមកវិញ
ដើម្បីឲ្យយើងខ្ញុំលើកតម្កើង
ព្រះនាមដ៏វិសុទ្ធរបស់ព្រះអង្គ
ហើយបានខ្ពស់មុខ ដោយសរសើរតម្កើងព្រះអង្គ!
៤៨ សូមលើកតម្កើងព្រះអម្ចាស់
ជាព្រះរបស់ជនជាតិអ៊ីស្រាអែល
តាំងពីដើមរៀងមក ហើយអស់កល្បតរៀងទៅ!
សូមឲ្យប្រជារាស្ដ្រពោលទាំងអស់គ្នាថា:
អាម៉ែន! ហាលេលូយ៉ា!
១០៧
ភាគទីប្រាំ
(ទំនុកតម្កើង ១០៧-១៥០)
ចូរលើកតម្កើងព្រះអម្ចាស់ជាព្រះសង្គ្រោះ
១ ចូរលើកតម្កើងព្រះអម្ចាស់
ដ្បិតព្រះអង្គមាន
ព្រះហឫទ័យសប្បុរស
ដ្បិតព្រះហឫទ័យមេត្តាករុណា
របស់ព្រះអង្គនៅស្ថិតស្ថេររហូតតទៅ
២ គួរឲ្យអស់អ្នកដែលព្រះអម្ចាស់
បានរំដោះមក ពោលសេចក្ដីនេះ
គឺអស់អ្នកដែលព្រះអង្គបានរំដោះ
ឲ្យរួចពីកណ្ដាប់ដៃរបស់បច្ចាមិត្ត
៣ ហើយនាំពីប្រទេសនានាមកវិញ
គឺពីទិសខាងកើត ពីទិសខាងលិច
ពីទិសខាងជើង និងទិសខាងត្បូង។
៤ អ្នកខ្លះវង្វេងនៅក្នុងវាលរហោស្ថានដ៏ហួតហែង
រកស្រុកភូមិស្នាក់អាស្រ័យនៅពុំបានឡើយ។
៥ ពួកគេឃ្លានអាហារ ស្រេកទឹក
ហើយបាត់បង់ទឹកចិត្ត។
៦ ក្នុងពេលមានអាសន្នដូច្នេះ
គេស្រែកអង្វរព្រះអម្ចាស់ ព្រះអង្គក៏រំដោះពួកគេ
ឲ្យរួចផុតពីការភ័យបារម្ភ
៧ ព្រះអង្គដឹកនាំគេតម្រង់ទៅក្រុងមួយ
ដែលគេអាចស្នាក់អាស្រ័យនៅបាន។
៨ អ្នកទាំងនោះត្រូវតែលើកតម្កើងព្រះអម្ចាស់
ដែលបានសម្ដែងព្រះហឫទ័យមេត្តាករុណា
និងស្នាព្រះហស្ដដ៏អស្ចារ្យចំពោះមនុស្សលោក!
៩ ដ្បិតព្រះអង្គបានប្រទានទឹកឲ្យអ្នកដែលស្រេក
ហើយប្រទានអាហារបរិបូណ៌
ដល់អស់អ្នកដែលឃ្លាន។
១០ អ្នកខ្លះទៀតរស់នៅក្នុងទីងងឹត
ស្ថិតនៅក្រោមអំណាចនៃសេចក្ដីស្លាប់
ជាប់ឃុំឃាំង ជាប់ច្រវាក់យ៉ាងសែនវេទនា
១១ ដ្បិតពួកគេបានបះបោរប្រឆាំង
នឹងព្រះបន្ទូលរបស់ព្រះជាម្ចាស់
និងមាក់ងាយការប្រៀនប្រដៅ
របស់ព្រះដ៏ខ្ពង់ខ្ពស់បំផុត។
១២ ព្រះអង្គធ្វើឲ្យពួកគេបាក់ស្បាត
ដោយសារទុក្ខវេទនា
ពួកគេធ្លាក់ទឹកចិត្ត ហើយគ្មាននរណាជួយ
ពួកគេឲ្យក្រោកឡើងវិញឡើយ។
១៣ ក្នុងពេលមានអាសន្នដូច្នេះ
គេស្រែកអង្វរព្រះអម្ចាស់
ព្រះអង្គក៏សង្គ្រោះពួកគេ
ឲ្យរួចផុតពីការភ័យបារម្ភ
១៤ ព្រះអង្គនាំពួកគេចេញពីទីងងឹត
ស្ថិតនៅក្រោមអំណាចនៃសេចក្ដីស្លាប់
ហើយព្រះអង្គបានផ្ដាច់ច្រវាក់ចេញពីពួកគេ។
១៥ អ្នកទាំងនោះត្រូវតែលើកតម្កើងព្រះអម្ចាស់
ដែលបានសម្ដែងព្រះហឫទ័យមេត្តាករុណា
និងស្នាព្រះហស្ដដ៏អស្ចារ្យចំពោះមនុស្សលោក!
១៦ ដ្បិតព្រះអង្គបានបំបែកទ្វារដែលធ្វើពីលង្ហិន
និងកាច់បំបាក់សោរដែលធ្វើពីដែក។
១៧ អ្នកខ្លះទៅជាល្ងីល្ងើ ព្រោះតែអំពើបាប
និងកំហុសដែលគេបានប្រព្រឹត្ត
បណ្តាលឲ្យគេរងទុក្ខវេទនា។
១៨ គេលេបអាហារលែងចូលទៀតហើយ
គឺគេនៅជិតសេចក្ដីស្លាប់។
១៩ ក្នុងពេលមានអាសន្នដូច្នេះ
គេស្រែកអង្វរព្រះអម្ចាស់
ព្រះអង្គក៏សង្គ្រោះពួកគេឲ្យរួចផុត
ពីការភ័យបារម្ភ។
២០ ពេលព្រះអង្គមានព្រះបន្ទូល ពួកគេក៏ជា
ព្រះអង្គបានរំដោះគេឲ្យរួចពីរណ្ដៅ។
២១ អ្នកទាំងនោះត្រូវតែលើកតម្កើងព្រះអម្ចាស់
ដែលបានសម្ដែងព្រះហឫទ័យមេត្តាករុណា
និងស្នាព្រះហស្ដដ៏អស្ចារ្យចំពោះមនុស្សលោក!
២២ គេត្រូវតែថ្វាយយញ្ញបូជា
ដើម្បីអរព្រះគុណព្រះអង្គ
ហើយថ្លែងអំពីស្នាព្រះហស្ដរបស់ព្រះអង្គ
ដោយបទចម្រៀងដ៏សប្បាយ!
២៣ អស់អ្នកដែលធ្វើដំណើរតាមនាវានៅលើសមុទ្រ
ហើយអស់អ្នកដែលរកស៊ីនៅតាមមហាសាគរ
២៤ បានឃើញស្នាព្រះហស្ដរបស់ព្រះអម្ចាស់
ព្រមទាំងការអស្ចារ្យរបស់ព្រះអង្គនៅសមុទ្រ។
២៥ ពេលព្រះអង្គមានព្រះបន្ទូលបញ្ជា
នោះស្រាប់តែមានខ្យល់ព្យុះបក់បោកមក
បង្កើតជារលកធំៗ
២៦ លើកនាវាទាំងឡាយឡើងយ៉ាងខ្ពស់
រួចធ្វើឲ្យធ្លាក់ចុះទៅវិញ រហូតដល់បាតសមុទ្រ
ពួកគេត្រូវវេទនាអស់សង្ឃឹម។
២៧ ពួកគេវិលវល់ ហើយធីងធោងដូចមនុស្សស្រវឹង
គេលែងដឹងថាត្រូវធ្វើយ៉ាងណាទៀតហើយ។
២៨ ក្នុងពេលមានអាសន្នដូច្នេះ
គេស្រែកអង្វរព្រះអម្ចាស់
ព្រះអង្គក៏រំដោះពួកគេឲ្យរួចផុត
ពីការភ័យបារម្ភ។
២៩ ព្រះអង្គបានបញ្ឈប់ខ្យល់ព្យុះឲ្យនៅស្ងៀម
ទឹករលកក៏ស្ងប់ទៅវិញ។
៣០ អ្នកទាំងនោះមានអំណរដោយឃើញរលកស្ងប់
ហើយព្រះអម្ចាស់ក៏នាំគេទៅដល់ត្រើយ
ដែលគេប្រាថ្នាចង់ទៅ។
៣១ អ្នកទាំងនោះត្រូវតែលើកតម្កើងព្រះអម្ចាស់
ដែលបានសម្ដែងព្រះហឫទ័យមេត្តាករុណា
និងស្នាព្រះហស្ដដ៏អស្ចារ្យចំពោះមនុស្សលោក!
៣២ គេត្រូវតែលើកតម្កើងព្រះអង្គ
នៅក្នុងអង្គប្រជុំរបស់ប្រជាជន
ហើយសរសើរតម្កើងព្រះអង្គ
ក្នុងអង្គប្រជុំរបស់ពួកព្រឹទ្ធាចារ្យ។
៣៣ ព្រះអង្គបានធ្វើឲ្យទន្លេ
ក្លាយទៅជាវាលរហោស្ថាន
ធ្វើឲ្យប្រភពទឹករីងស្ងួត
៣៤ ព្រះអង្គឲ្យទឹកដីដែលមានជីជាតិ
ក្លាយទៅជាទឹកដីដែលមានសុទ្ធតែអំបិល
ព្រោះតែគំនិតអាក្រក់របស់អ្នកស្រុកនោះ។
៣៥ ព្រះអង្គបានធ្វើឲ្យវាលរហោស្ថានប្រែទៅជាបឹង
ធ្វើឲ្យដីហួតហែងប្រែទៅជាប្រភពទឹក
៣៦ ហើយព្រះអង្គនាំអស់អ្នកដែលស្រេកឃ្លាន
ទៅរស់នៅទីនោះ
ព្រមទាំងសង់ទីក្រុងសម្រាប់ស្នាក់អាស្រ័យផង។
៣៧ ពួកគេសាបព្រោះ និងដាំចម្ការទំពាំងបាយជូរ
ដែលផ្តល់ភោគផលយ៉ាងបរិបូណ៌។
៣៨ ព្រះអង្គប្រទានពរឲ្យពួកគេ
ហើយពួកគេក៏បានកើនចំនួនឡើងជាច្រើន
ព្រះអង្គមិនបណ្តោយឲ្យហ្វូងសត្វរបស់គេ
ចុះអន់ថយឡើយ។
៣៩ ពួកគេចុះអន់ថយ និងបាត់បង់កិត្តិយស
ដោយខ្មាំងសង្កត់សង្កិន
រងទុក្ខវេទនា និងឈឺចុកចាប់។
៤០ ព្រះអង្គធ្វើឲ្យពួកអ្នកធំធ្លាក់ទៅក្នុងសភាព
ថោកទាប ហើយវង្វេងនៅក្នុងផ្លូវអន្តរាយ។
៤១ ប៉ុន្តែ ព្រះអង្គយកមនុស្សទុរគតចេញពីភាពវេទនា
ព្រះអង្គធ្វើឲ្យគ្រួសាររបស់គេ
មានកូនចៅជាច្រើន។
៤២ ពេលមនុស្សសុចរិតឃើញដូច្នេះ
គេនឹងមានអំណរសប្បាយ
តែមនុស្សទុច្ចរិតនឹងបិទមាត់យ៉ាងស្ងៀមស្ងាត់។
៤៣ អស់អ្នកដែលមានប្រាជ្ញាត្រូវចងចាំសេចក្ដីនេះទុក
ហើយស្វែងយល់ពីស្នាព្រះហស្ដប្រកបដោយ
ព្រះហឫទ័យមេត្តាករុណារបស់ព្រះអម្ចាស់។
១០៨
ខ្ញុំដាស់ព្រះអាទិត្យឲ្យរះឡើង
១ បទចម្រៀងតម្កើងព្រះជាម្ចាស់។
ទំនុកតម្កើងរបស់ស្តេចដាវីឌ។
២ ឱព្រះជាម្ចាស់អើយ ទូលបង្គំ
ត្រៀមចិត្តគំនិតជាស្រេច!
ទូលបង្គំនឹងច្រៀង
ទូលបង្គំនឹងស្មូត្រទំនុកតម្កើងអស់ពីដួងចិត្ត!
៣ ឱឃឹម និងពិណរបស់ខ្ញុំអើយ ចូរភ្ញាក់ឡើង!
ខ្ញុំដាស់ព្រះអាទិត្យឲ្យរះ
៤ ឱព្រះអម្ចាស់អើយ ទូលបង្គំនឹងលើកតម្កើង
ព្រះអង្គក្នុងចំណោមប្រជាជនទាំងឡាយ
ទូលបង្គំនឹងស្មូត្រទំនុកតម្កើង
ថ្វាយព្រះអង្គក្នុងចំណោមប្រជាជាតិនានា
៥ ដ្បិតព្រះហឫទ័យមេត្តាករុណារបស់ព្រះអង្គ
ខ្ពស់រហូតដល់ផ្ទៃមេឃ
ហើយព្រះហឫទ័យស្មោះស្ម័គ្រ
របស់ព្រះអង្គខ្ពស់ដល់អាកាសវេហាស៍។
៦ ឱព្រះជាម្ចាស់អើយ សូមបង្ហាញភាពថ្កុំថ្កើង
ឧត្តុង្គឧត្ដមរបស់ព្រះអង្គនៅលើផ្ទៃមេឃ
ហើយសូមឲ្យសិរីរុងរឿងរបស់ព្រះអង្គ
ភ្លឺចែងចាំងនៅលើផែនដីទាំងមូល!
៧ សូមយាងមកសង្គ្រោះយើងខ្ញុំ
ដោយឫទ្ធិបារមីរបស់ព្រះអង្គ
សូមឆ្លើយតបនឹងយើងខ្ញុំផង
ដើម្បីឲ្យប្រជាជនជាទីស្រឡាញ់
របស់ព្រះអង្គបានរួចជីវិត!
៨ ព្រះជាម្ចាស់មានព្រះបន្ទូលពីទីសក្ការៈ
របស់ព្រះអង្គមកថា:
«យើងនឹងយកជ័យជម្នះ
យើងនឹងបែងចែកស្រុកស៊ីគែម
យើងនឹងវាស់ជ្រលងភ្នំស៊ូកូត
ចែកប្រជារាស្ដ្ររបស់យើង។
៩ កាឡាតជាទឹកដីរបស់យើង
ហើយម៉ាណាសេក៏ជាទឹកដីរបស់យើងដែរ
អេប្រាអ៊ីមប្រៀបដូចជាមួកដែករបស់យើង
ហើយយូដាជាដំបងរាជ្យរបស់យើង។
១០ ទឹកដីម៉ូអាប់ជាកន្លែងដែលយើងលាងជើង
យើងបោះស្បែកជើងយើងលើទឹកដីអេដុម
ដើម្បីបញ្ជាក់ថាយើងជាម្ចាស់លើទឹកដីនេះ។
យើងនឹងស្រែកប្រកាសសង្គ្រាម
ប្រឆាំងនឹងស្រុកភីលីស្ទីន!»។
១១ តើនរណាអាចនាំខ្ញុំចូលទៅក្នុងទីក្រុង
ដ៏រឹងមាំបាន?
តើនរណាអាចនាំខ្ញុំចូលទៅក្នុងស្រុកអេដុម?
១២ ឱព្រះជាម្ចាស់អើយ!
មានតែព្រះអង្គទេដែលអាចនាំយើងខ្ញុំ
ប៉ុន្តែ ព្រះអង្គបានបោះបង់ចោលយើងខ្ញុំ
ព្រះអង្គឈប់យាងទៅជាមួយកងទ័ព
យើងខ្ញុំទៀតហើយ។
១៣ សូមជួយយើងខ្ញុំឲ្យប្រឆាំងតទល់
នឹងពួកសត្រូវផង
ដ្បិតការសង្គ្រោះមកពីមនុស្សលោក
ឥតប្រយោជន៍អ្វីសោះ។
១៤ បើព្រះជាម្ចាស់គង់នៅជាមួយយើង
នោះយើងនឹងមានជ័យជម្នះ
ដ្បិតព្រះអង្គនឹងបង្ក្រាបបច្ចាមិត្ត
របស់យើងឲ្យរាប។
១០៩
សូមឲ្យអស់អ្នកដែលចោទប្រកាន់ទូលបង្គំត្រូវអាម៉ាស់មុខ
១ ទំនុកពីសៀវភៅរបស់គ្រូចម្រៀង។
ទំនុកតម្កើងរបស់ស្តេចដាវីឌ។
ឱព្រះដែលទូលបង្គំសរសើរតម្កើងអើយ
សូមកុំនៅស្ងៀមទៀតឡើយ!
២ ដ្បិតមនុស្សអាក្រក់ និងមនុស្សមានល្បិច
នាំគ្នាពោលពាក្យប្រឆាំងនឹងទូលបង្គំ
គេនិយាយកុហកទាស់នឹងទូលបង្គំ។
៣ គេពោលពាក្យសម្អប់មកលើទូលបង្គំ
ហើយវាយប្រហារទូលបង្គំ
ដោយឥតមានមូលហេតុអ្វីទាល់តែសោះ។
៤ ទូលបង្គំស្រឡាញ់ពួកគេ
ប៉ុន្តែ ពួកគេបែរជាចោទប្រកាន់ទូលបង្គំ
ទូលបង្គំបានអធិស្ឋានឲ្យពួកគេ។
៥ ពួកគេប្រព្រឹត្តអំពើអាក្រក់មកលើទូលបង្គំ
តបសងនឹងអំពើល្អ ហើយសម្ដែងចិត្តស្អប់
តបសងនឹងសេចក្ដីស្រឡាញ់។
៦ សូមដាក់មនុស្សកំណាចម្នាក់ឲ្យត្រួត
ពីលើអ្នកនោះ ហើយម្នាក់ទៀតឈរនៅខាងស្តាំ
ដើម្បីចោទប្រកាន់។
៧ សូមឲ្យអ្នកនោះទទួលទោសនៅពេលជំនុំជម្រះ
ហើយសូមឲ្យពាក្យអធិស្ឋានរបស់គេ
ក្លាយទៅជាអំពើបាបទៅវិញ។
៨ សូមកុំឲ្យគេរស់បានយូរឡើយ
សូមឲ្យមានម្នាក់ទៀតកាន់តំណែងជំនួស។
៩ សូមឲ្យកូនចៅរបស់គេក្លាយទៅជាក្មេងកំព្រា
ហើយប្រពន្ធរបស់គេក្លាយទៅជាស្ត្រីមេម៉ាយ!។
១០ សូមឲ្យកូនរបស់អ្នកនោះ
ក្លាយទៅជាមនុស្សអនាថាដើរសុំទាន
ហើយត្រូវគេដេញចេញពីទីលំនៅ
ដែលរលំបាក់បែក!
១១ សូមឲ្យម្ចាស់បំណុលមករឹបអូសអ្វីៗ
ដែលគេមាន
ហើយឲ្យជនបរទេសមកប្លន់យកអ្វីៗ
ដែលគេខំប្រឹងរកបាន!
១២ សូមកុំឲ្យមាននរណាម្នាក់សម្ដែងចិត្តមេត្តា
ករុណាចំពោះគេឡើយ
ហើយក៏កុំឲ្យមាននរណាម្នាក់អាណិត
អាសូរកូនចៅរបស់គេដែលនៅកំព្រាដែរ!
១៣ សូមដកជីវិតពូជពង្សរបស់គេ
ហើយលុបបំបាត់នាមត្រកូលរបស់គេ
នៅជំនាន់ក្រោយ!
១៤ សូមព្រះអម្ចាស់ចងចាំនូវកំហុសដែលដូនតា
របស់គេបានប្រព្រឹត្ត
ហើយកុំឲ្យព្រះអង្គភ្លេចអំពើបាប
ដែលម្ដាយរបស់គេបានប្រព្រឹត្តដែរ!
១៥ សូមព្រះអម្ចាស់ចងចាំនូវអំពើបាបរបស់ពួកគេជានិច្ច
ពេលពួកគេស្លាប់ សូមព្រះអង្គធ្វើ
កុំឲ្យមាននរណានឹកនាដល់ពួកគេឡើយ!
១៦ ដ្បិតជននេះពុំបាននឹកសម្ដែងចិត្តមេត្តាករុណាសោះ
គេបានធ្វើបាបមនុស្សកំសត់ទុរគត
ព្រមទាំងសម្លាប់អ្នកដែលមានចិត្ត
សោកសង្រេងទៀតផង។
១៧ គេចូលចិត្តដាក់បណ្ដាសា
ដូច្នេះ សូមឲ្យគេត្រូវបណ្ដាសាចុះ!
គេមិនពេញចិត្តនឹងពរទេ ដូច្នេះ
សូមកុំឲ្យមាននរណាជូនពរគេឡើយ!
១៨ សូមឲ្យគេយកបណ្ដាសាគ្របដណ្តប់ពីលើគេ
សូមឲ្យបណ្ដាសាចូលទៅក្នុងខ្លួនគេដូចទឹក
ហើយចូលទៅក្នុងឆ្អឹងគេដូចខ្លាញ់!
១៩ សូមឲ្យបណ្ដាសាបានដូចជាសម្លៀកបំពាក់
បិទបាំងកាយពួកគេ
ហើយរុំព័ទ្ធខ្លួនគេជានិច្ចដូចខ្សែក្រវាត់។
២០ អស់អ្នកដែលចោទប្រកាន់ខ្ញុំ
និងអស់អ្នកដែលនិយាយអាក្រក់ប្រឆាំងនឹងខ្ញុំ
សូមឲ្យគេទទួលទោសពីព្រះអម្ចាស់
បែបនេះឯង!
២១ ឱព្រះជាអម្ចាស់អើយ
សូមព្រះអង្គមេត្តា
ជួយទូលបង្គំដោយយល់ដល់ព្រះនាមព្រះអង្គ
ព្រះអង្គមានព្រះហឫទ័យមេត្តាករុណា
ដ៏លើសលប់ សូមរំដោះទូលបង្គំផង!
២២ ទូលបង្គំជាមនុស្សកំសត់ទុរគត
ទូលបង្គំរបួសដួងចិត្ត។
២៣ ទូលបង្គំកំពុងតែរសាត់បាត់ទៅ
ដូចជាស្រមោលនៅពេលល្ងាច
គេកម្ចាត់ទូលបង្គំដូចកម្ចាត់សត្វល្អិត។
២៤ ទូលបង្គំទន់ជង្គង់
ព្រោះតែតមអាហារយូរពេក
ទូលបង្គំស្គមនៅសល់តែស្បែក និងឆ្អឹង។
២៥ ពេលមនុស្សម្នាឃើញទូលបង្គំ
គេនាំគ្នាសើចចំអក
និងគ្រវីក្បាលដាក់ទូលបង្គំ។
២៦ ឱព្រះអម្ចាស់ជាព្រះនៃទូលបង្គំអើយ
សូមជួយទូលបង្គំផង!
សូមសង្គ្រោះទូលបង្គំ
ដោយព្រះហឫទ័យមេត្តាករុណារបស់ព្រះអង្គ!
២៧ សូមឲ្យអ្នកទាំងនោះទទួលស្គាល់ថា
ព្រះអង្គបានសង្គ្រោះទូលបង្គំ
ដោយឫទ្ធិបារមីរបស់ព្រះអង្គ។
២៨ ទោះបីអ្នកទាំងនោះដាក់បណ្ដាសាទូលបង្គំ
ក៏ដោយ ក៏ព្រះអង្គប្រទានពរឲ្យទូលបង្គំដែរ
ប្រសិនបើពួកគេវាយប្រហារទូលបង្គំ
ពួកគេមុខជាត្រូវបាក់មុខ
ហើយទូលបង្គំដែលជាអ្នកបម្រើរបស់ព្រះអង្គ
នឹងមានអំណរសប្បាយ។
២៩ សូមឲ្យអស់អ្នកដែលចោទប្រកាន់ទូលបង្គំ
ត្រូវអាម៉ាស់មុខ សូមឲ្យសេចក្ដីអាម៉ាស់
នៅជាប់ជាមួយពួកគេរហូតតទៅ!
៣០ ខ្ញុំនឹងបន្លឺសំឡេងលើកតម្កើងព្រះអម្ចាស់
ខ្ញុំនឹងសរសើរតម្កើងព្រះអង្គក្នុងចំណោម
បណ្តាជនដ៏ច្រើនកុះករ!
៣១ ដ្បិតព្រះអង្គការពារជនកំសត់ទុរគត
ដើម្បីសង្គ្រោះគេឲ្យរួចផុតពីកណ្ដាប់ដៃ
របស់អស់អ្នកដែលចង់ដាក់ទោសគេ។
១១០
ព្រះករុណាជាបូជាចារ្យអស់កល្បតរៀងទៅ
១ ទំនុកតម្កើងពីសៀវភៅរបស់ស្តេចដាវីឌ។
ព្រះជាអម្ចាស់មានព្រះបន្ទូល
មកកាន់ព្រះរាជា
ជាព្រះអម្ចាស់របស់ខ្ញុំ ដូចតទៅនេះ៖
«សូមគង់នៅខាងស្តាំយើង
ទម្រាំដល់យើងបង្ក្រាបខ្មាំងសត្រូវរបស់ព្រះអង្គ
មកដាក់ក្រោមព្រះបាទារបស់ព្រះអង្គ!»។
២ សូមព្រះជាអម្ចាស់ប្រោសប្រទានឲ្យរាជ្យ
របស់ព្រះករុណា
លាតសន្ធឹងចាប់តាំងពីក្រុងស៊ីយ៉ូនទៅ!
សូមព្រះករុណាបង្ក្រាបខ្មាំងសត្រូវដែលនៅជុំវិញ!
៣ នៅថ្ងៃព្រះករុណាកេណ្ឌទ័ពទៅច្បាំង
ប្រជារាស្ដ្រចូលរួមដោយស្ម័គ្រចិត្ត
ពួកយុវជននាំគ្នាចូលមកគាល់ព្រះករុណា
នៅលើភ្នំដ៏វិសុទ្ធ
ប្រៀបដូចជាទឹកសន្សើមនៅពេលព្រឹកព្រលឹម។
៤ ព្រះអម្ចាស់មានព្រះបន្ទូលសន្យា
ដោយឥតប្រែប្រួលថា:
«ព្រះអង្គជាបូជាចារ្យអស់កល្បតរៀងទៅ
តាមរបៀបស្តេចមែលគីសេដែក»។
៥ ព្រះអម្ចាស់គង់នៅខាងស្តាំព្រះករុណា
នៅថ្ងៃដែលព្រះអង្គព្រះអង្គព្រះពិរោធ
ព្រះអង្គកម្ទេចស្តេចនានា។
៦ ព្រះអង្គវិនិច្ឆ័យទោសប្រជាជាតិទាំងឡាយ
ព្រះអង្គទុកសាកសពរបស់គេ
ឲ្យនៅពាសពេញគ្រប់ទីកន្លែង
ហើយព្រះអង្គកម្ទេចមេដឹកនាំរបស់គេ
នៅទួទាំងប្រទេស។
៧ នៅតាមផ្លូវ ព្រះរាជាសោយទឹកជ្រោះ
រួចហើយ ព្រះអង្គងើបព្រះភ័ក្ត្រ
ប្រកបដោយជោគជ័យ។
១១១
ស្នាព្រះហស្ដដ៏អស្ចារ្យរបស់ព្រះអម្ចាស់
១ ចូរសរសើរតម្កើងព្រះអម្ចាស់!
ខ្ញុំនឹងលើកតម្កើងព្រះអម្ចាស់
យ៉ាងអស់ពីចិត្ត
នៅក្នុងអង្គប្រជុំរបស់មនុស្សទៀងត្រង់។
២ ព្រះអម្ចាស់បានធ្វើការអស្ចារ្យយ៉ាងឧត្តុង្គឧត្ដម
ហើយអស់អ្នកដែលពេញចិត្តនឹងស្នាព្រះហស្ដនេះ
នាំគ្នាស្វែងយល់។
៣ ស្នាព្រះហស្ដរបស់ព្រះអង្គប្រកបទៅដោយ
រស្មីភ្លឺចិញ្ចែងចិញ្ចាច
សេចក្ដីសុចរិតរបស់ព្រះអង្គ
នៅស្ថិតស្ថេររហូតតទៅ។
៤ ព្រះអង្គសព្វព្រះហឫទ័យឲ្យយើង
នឹកដល់ស្នាព្រះហស្ដដ៏អស្ចារ្យរបស់ព្រះអង្គ
ព្រះអម្ចាស់តែងតែប្រណីសន្ដោស
ហើយប្រកបដោយព្រះហឫទ័យអាណិតអាសូរ។
៥ ព្រះអង្គប្រទានអាហារឲ្យអស់អ្នក
ដែលគោរពកោតខ្លាចព្រះអង្គ
ព្រះអង្គតែងនឹកដល់សម្ពន្ធមេត្រី
របស់ព្រះអង្គជានិច្ច។
៦ ព្រះអង្គសម្ដែងឫទ្ធានុភាព
ឲ្យប្រជារាស្ដ្ររបស់ព្រះអង្គឃើញ
តាមរយៈស្នាព្រះហស្ដរបស់ព្រះអង្គ
គឺប្រគល់ទឹកដីរបស់ប្រជាជាតិនានា
ឲ្យពួកគេ។
៧ ស្នាព្រះហស្ដដែលព្រះអង្គធ្វើ
សុទ្ធតែពិត និងប្រាកដប្រជា
ព្រះបញ្ជារបស់ព្រះអង្គ
គួរឲ្យជឿទុកចិត្តទាំងស្រុង។
៨ ព្រះបញ្ជាទាំងនោះនៅស្ថិតស្ថេររហូត
ព្រោះព្រះអង្គមានព្រះបន្ទូល
ដោយសេចក្ដីពិត និងត្រឹមត្រូវ។
៩ ព្រះអង្គបានរំដោះប្រជារាស្ដ្ររបស់ព្រះអង្គ
ឲ្យមានសេរីភាព
ព្រះអង្គបានចងសម្ពន្ធមេត្រីជាមួយ
ប្រជារាស្ដ្ររបស់ព្រះអង្គរហូតតទៅ
ព្រះនាមរបស់ព្រះអង្គជាព្រះនាមដ៏វិសុទ្ធ
គួរឲ្យកោតស្ញប់ស្ញែង។
១០ ការគោរពកោតខ្លាចព្រះអម្ចាស់
ជាប្រភពនៃប្រាជ្ញា
អស់អ្នកដែលប្រតិបត្តិតាមប្រាជ្ញានេះ
តែងតែដឹងខុសត្រូវ។
សូមសរសើរតម្កើងព្រះអង្គរហូតតទៅ!។
១១២
មនុស្សល្អមិនដែលរង្គើទេ
១ ចូរសរសើរតម្កើងព្រះអម្ចាស់!
អ្នកណាគោរពកោតខ្លាចព្រះអម្ចាស់
ហើយពេញចិត្តនឹងគោរពតាម
វិន័យរបស់ព្រះអង្គ
អ្នកនោះមានសុភមង្គលហើយ!
២ ពូជពង្សរបស់គេនឹងមានអំណាចនៅក្នុងស្រុក
ដ្បិតព្រះជាម្ចាស់នឹងប្រទានពរ
ដល់មនុស្សទៀងត្រង់។
៣ នៅក្នុងផ្ទះរបស់អ្នកនោះ
នឹងមានទ្រព្យសម្បត្តិស្តុកស្តម្ភ
សេចក្ដីសុចរិតរបស់គាត់នៅស្ថិតស្ថេររហូតតទៅ។
៤ ក្នុងទីងងឹត មានពន្លឺលេចឡើង
បំភ្លឺមនុស្សទៀងត្រង់
ដែលមានចិត្តប្រណីសន្ដោស
អាណិតមេត្តា និងសុចរិត។
៥ អ្នកណាមានចិត្តទូលាយ
ហើយយករបស់ខ្លួនឲ្យគេខ្ចី
ព្រមទាំងរកស៊ីដោយទៀងត្រង់
អ្នកនោះប្រព្រឹត្តយ៉ាងល្អប្រពៃហើយ។
៦ មនុស្សល្អនឹងបានសុខជានិច្ច
គេនឹងរំឭកកេរ្តិ៍ឈ្មោះគាត់រហូតតទៅ។
៧ គាត់នឹងមិនខ្លាចនរណានិយាយអាក្រក់
ពីគាត់សោះឡើយ គាត់មានចិត្តរឹងប៉ឹង
ហើយផ្ញើជីវិតលើព្រះអម្ចាស់ទាំងស្រុង។
៨ គាត់មានចិត្តនឹងន ឥតភ័យខ្លាចអ្វីទាំងអស់
រហូតទាល់តែបានឃើញខ្មាំងសត្រូវបរាជ័យ។
៩ គាត់តែងចែកទានឲ្យអ្នកក្រដោយចិត្តទូលាយ
សេចក្ដីសុចរិតរបស់គាត់នៅស្ថិតស្ថេររហូតតទៅ
ហើយគាត់ចម្រើនកម្លាំងកាន់តែរុងរឿងឡើងៗ។
១០ ពេលមនុស្សអាក្រក់ឃើញដូច្នេះ
ក៏មានចិត្តទោមនស្ស គេសង្កៀតធ្មេញ
ហើយរលាយសូន្យទៅ មនុស្សអាក្រក់
ពុំដែលបានសម្រេចដូចបំណងឡើយ។
១១៣
ព្រះអង្គលើកមនុស្សទន់ខ្សោយឡើង
១ ចូរសរសើរតម្កើងព្រះអម្ចាស់!
អ្នកបម្រើរបស់ព្រះអម្ចាស់អើយ
ចូរនាំគ្នាសរសើរតម្កើងព្រះអង្គ!
ចូរនាំគ្នាសរសើរតម្កើងព្រះនាមព្រះអម្ចាស់!
២ ចូរលើកតម្កើងព្រះនាមព្រះអម្ចាស់
តាំងពីពេលនេះរហូតតទៅ!
៣ តាំងពីពេលថ្ងៃរះ រហូតទល់ថ្ងៃលិច
ចូរសរសើរតម្កើងព្រះនាមរបស់ព្រះអម្ចាស់!
៤ ព្រះអម្ចាស់គង់នៅពីលើប្រជាជាតិទាំងឡាយ
សិរីរុងរឿងរបស់ព្រះអង្គខ្ពស់ជាង
ផ្ទៃមេឃទៅទៀត។
៥ តើមាននរណាអាចផ្ទឹមស្មើនឹងព្រះអម្ចាស់
ជាព្រះរបស់យើងបាន?
ព្រះអង្គគង់នៅលើស្ថានដ៏ខ្ពស់បំផុត
៦ ព្រះអង្គទតមើលមកផ្ទៃមេឃ
និងផែនដី ដែលនៅខាងក្រោមព្រះអង្គ។
៧ ព្រះអង្គលើកមនុស្សទន់ខ្សោយឡើងពីធូលីដី
ព្រះអង្គលើកមនុស្សទុរគតឡើងពីភក់ជ្រាំ
៨ ដើម្បីឲ្យគេកាន់កាប់អំណាច
រួមជាមួយពួកអ្នកធំ
គឺរួមជាមួយពួកអ្នកធំនៅក្នុងចំណោម
ប្រជារាស្ដ្ររបស់ព្រះអង្គ។
៩ ព្រះអង្គប្រទានឲ្យស្ត្រីអារមានកូន
ឲ្យនាងរស់នៅក្នុងផ្ទះយ៉ាងសប្បាយ
ជាមួយកូនៗរបស់នាង។
ហាលេលូយ៉ា!
១១៤
ពេលជនជាតិអ៊ីស្រាអែលចាកចេញពីស្រុកអេស៊ីប
១ ពេលជនជាតិអ៊ីស្រាអែល
ចាកចេញពីស្រុកអេស៊ីប
ពេលកូនចៅរបស់លោកយ៉ាកុប
ចាកចេញពីទឹកដីបរទេស
២ ជនជាតិយូដាបានទៅជាប្រជាជន
ដ៏វិសុទ្ធរបស់ព្រះជាម្ចាស់
ហើយជនជាតិអ៊ីស្រាអែល
ជាប្រជាជនផ្ទាល់របស់ព្រះអង្គ។
៣ ពេលឃើញពួកគេ សមុទ្រក៏រត់បាត់ទៅ
ហើយទន្លេយ័រដាន់ក៏ដកខ្លួនថយដែរ។
៤ ភ្នំនានានាំគ្នាលោតឡើងដូចពពែឈ្មោល
ហើយភ្នំតូចៗទាំងឡាយក៏នាំគ្នាលោត
ដូចកូនចៀមដែរ។
៥ សមុទ្រអើយ ហេតុអ្វីបានជាអ្នករត់គេចដូច្នេះ?
ទន្លេយ័រដាន់អើយ
ហេតុអ្វីបានជាអ្នកដកខ្លួនថយ?
៦ ភ្នំនានាអើយ ហេតុដូចម្ដេចបានជាអ្នកនាំគ្នា
លោតដូចពពែឈ្មោល?
ភ្នំតូចៗទាំងឡាយអើយ
ហេតុដូចម្ដេចបានជាអ្នកលោតដូចកូនចៀម?
៧ ផែនដីអើយ ចូរញាប់ញ័រនៅចំពោះព្រះភ័ក្ត្រ
ព្រះអម្ចាស់! ចូរញាប់ញ័រនៅចំពោះព្រះភ័ក្ត្រ
ព្រះរបស់លោកយ៉ាកុប
៨ ដែលបានធ្វើឲ្យផ្ទាំងសិលាប្រែទៅជាបឹង
ហើយធ្វើឲ្យថ្មប្រែទៅជាប្រភពទឹក។
១១៥
ព្រះអម្ចាស់នឹងប្រទានពរឲ្យអ្នករាល់គ្នា
១ ព្រះអម្ចាស់អើយ
យើងខ្ញុំមិនសមនឹងទទួល
ការលើកតម្កើងទេ
គឺមានតែព្រះអង្គប៉ុណ្ណោះដែលត្រូវ
ទទួលការលើកតម្កើងប្រកបដោយសិរីរុងរឿង
ដ្បិតព្រះអង្គមានព្រះហឫទ័យមេត្តាករុណា
ដ៏ស្មោះស្ម័គ្រ!។
២ ហេតុអ្វីបានជាប្រជាជាតិនានានាំគ្នាពោលថា:
«ព្រះរបស់ពួកគេនៅឯណា?»។
៣ ព្រះរបស់យើងខ្ញុំគង់នៅស្ថានបរមសុខ
ព្រះអង្គធ្វើអ្វីៗក៏បាន
តាមតែព្រះហឫទ័យរបស់ព្រះអង្គ។
៤ រីឯព្រះរបស់អ្នកទាំងនោះវិញ
សុទ្ធតែជាព្រះក្លែងក្លាយធ្វើពីមាសពីប្រាក់
ដែលជាស្នាដៃរបស់មនុស្ស។
៥ ព្រះទាំងនោះមានមាត់ តែមិនចេះនិយាយ
មានភ្នែក តែមើលមិនឃើញ
៦ មានត្រចៀក តែស្ដាប់មិនឮ
មានច្រមុះ តែមិនចេះដឹងក្លិន
៧ មានដៃ តែមិនចេះប៉ះពាល់
មានជើង តែមិនចេះដើរ
ហើយមានបំពង់ក
តែមិនអាចបញ្ចេញសំឡេងអ្វីឡើយ។
៨ សូមឲ្យអស់អ្នកដែលបានសូន
ធ្វើរូបព្រះក្លែងក្លាយ
ហើយផ្ញើជីវិតលើព្រះទាំងនោះ
បានដូចរូបព្រះទាំងនោះដែរ។
៩ ជនជាតិអ៊ីស្រាអែលអើយ
ចូរផ្ញើជីវិតលើព្រះអម្ចាស់
ព្រះអង្គនឹងជួយ ហើយការពារអ្នករាល់គ្នា!
១០ ក្រុមគ្រួសាររបស់លោកអរ៉ុនអើយ
ចូរផ្ញើជីវិតលើព្រះអម្ចាស់
ព្រះអង្គនឹងជួយ ហើយការពារអ្នករាល់គ្នា!
១១ អ្នករាល់គ្នាដែលគោរពកោតខ្លាច
ព្រះអម្ចាស់អើយ
ចូរផ្ញើជីវិតលើព្រះអម្ចាស់
ព្រះអង្គនឹងជួយ ហើយការពារអ្នករាល់គ្នា!
១២ ព្រះអម្ចាស់មិនភ្លេចយើងទេ
ព្រះអង្គនឹងប្រទានពរឲ្យយើង
ព្រះអង្គនឹងប្រទានពរឲ្យកូនចៅ
លោកអ៊ីស្រាអែល
ព្រះអង្គនឹងប្រទានពរឲ្យកូនចៅលោកអរ៉ុន
១៣ ព្រះអង្គនឹងប្រទានពរឲ្យអស់អ្នកទាំងតូច
ទាំងធំ ដែលគោរពកោតខ្លាចព្រះអង្គ។
១៤ ព្រះអម្ចាស់នឹងប្រទានពរឲ្យអ្នករាល់គ្នា
បានចម្រើនឡើង គឺទាំងអ្នករាល់គ្នា
ទាំងកូនចៅរបស់អ្នករាល់គ្នា។
១៥ សូមទទួលព្រះពរពីព្រះអម្ចាស់
ដែលបានបង្កើតផ្ទៃមេឃ និងផែនដី!
១៦ ផ្ទៃមេឃជាកម្មសិទ្ធិរបស់ព្រះអម្ចាស់
តែព្រះអង្គប្រទានផែនដីមក
ឲ្យមនុស្សលោក។
១៧ មនុស្សស្លាប់ទៅហើយ
ពុំអាចសរសើរតម្កើងព្រះអម្ចាស់ឡើយ
ហើយអស់អ្នកដែលចុះទៅស្ថានមនុស្សស្លាប់
ក៏ពុំអាចសរសើរព្រះអង្គដែរ។
១៨ រីឯយើងវិញ យើងលើកតម្កើងព្រះអម្ចាស់
ចាប់ពីពេលនេះ រហូតតទៅ!
ហាលេលូយ៉ា!
១១៦
ព្រះអង្គបានរំដោះទូលបង្គំឲ្យរួចពីស្លាប់
១ ខ្ញុំស្រឡាញ់ព្រះអម្ចាស់
ដ្បិតព្រះអង្គព្រះសណ្ដាប់សំឡេង
ដែលខ្ញុំទទូចអង្វរ
២ ព្រះអង្គផ្ទៀងព្រះកាណ៌ស្ដាប់ខ្ញុំ
អស់មួយជីវិត ខ្ញុំនឹងអង្វរព្រះអង្គ។
៣ មច្ចុរាជបានរួបរឹតខ្ញុំ
ធ្វើឲ្យខ្ញុំអន្ទះអន្ទែងភ័យខ្លាចស្លាប់
ខ្ញុំរងទុក្ខលំបាក ហើយឈឺចុកចាប់ពន់ប្រមាណ។
៤ ពេលនោះ ខ្ញុំបានអង្វររកព្រះនាមព្រះអម្ចាស់ថា៖
ឱព្រះអម្ចាស់អើយ
សូមមេត្តាសង្គ្រោះជីវិតទូលបង្គំផង!
៥ ព្រះអម្ចាស់តែងតែប្រណីសន្ដោស ព្រះអង្គសុចរិត
ព្រះរបស់យើងប្រកបដោយព្រះហឫទ័យ
អាណិតមេត្តា។
៦ ព្រះអម្ចាស់ជួយការពារមនុស្សទន់ទាប
ពេលខ្ញុំធ្លាក់ខ្លួនខ្សោយ ព្រះអង្គបានសង្គ្រោះខ្ញុំ។
៧ ខ្ញុំនឹងលែងខ្វល់ខ្វាយអ្វីទៀតហើយ
ដ្បិតព្រះអម្ចាស់ប្រោសប្រទានឲ្យខ្ញុំ
បានសុខសាន្ត។
៨ ព្រះអង្គបានរំដោះខ្ញុំឲ្យរួចពីស្លាប់
ព្រះអង្គជូតទឹកភ្នែកខ្ញុំ
ហើយការពារខ្ញុំមិនឲ្យជំពប់ដួលឡើយ។
៩ ខ្ញុំនឹងដើរនៅចំពោះព្រះភ័ក្រ្ដព្រះអម្ចាស់
ក្នុងពិភពមនុស្សលោកនេះ។
១០ ខ្ញុំនៅតែមានជំនឿដដែល
ទោះបីខ្ញុំពោលថា ខ្ញុំជាមនុស្សវេទនា។
១១ ពេលខ្ញុំមានភ័យអាសន្ន ខ្ញុំពោលឡើងថា
យើងមិនអាចទុកចិត្តលើមនុស្ស
ណាម្នាក់បានឡើយ។
១២ តើខ្ញុំអាចយកអ្វីមកតបស្នង
នឹងព្រះគុណទាំងប៉ុន្មាន
ដែលព្រះអម្ចាស់បានសម្ដែងមកលើរូបខ្ញុំ?
១៣ ខ្ញុំនឹងលើកពែងឡើងថ្វាយព្រះអម្ចាស់
ដែលបានរំដោះខ្ញុំ
ខ្ញុំនឹងអង្វររកព្រះនាមរបស់ព្រះអម្ចាស់។
១៤ ខ្ញុំនឹងយកតង្វាយមកថ្វាយព្រះអម្ចាស់
តាមពាក្យដែលខ្ញុំបានសន្យា
នៅចំពោះមុខប្រជាជនទាំងមូលរបស់ព្រះអង្គ។
១៥ ព្រះអម្ចាស់ព្រួយព្រះហឫទ័យណាស់
នៅពេលប្រជាជនដ៏វិសុទ្ធណាម្នាក់ស្លាប់។
១៦ ឱព្រះអម្ចាស់អើយ ទូលបង្គំជាអ្នកបម្រើ
របស់ព្រះអង្គ ដូចម្ដាយរបស់ទូលបង្គំដែរ
ព្រះអង្គបានរំដោះទូលបង្គំឲ្យរួចពីស្លាប់។
១៧ ទូលបង្គំសូមថ្វាយយញ្ញបូជា
ដើម្បីអរព្រះគុណព្រះអង្គ
ខ្ញុំនឹងអង្វររកព្រះនាមរបស់ព្រះអម្ចាស់។
១៨ ខ្ញុំនឹងយកតង្វាយមកថ្វាយព្រះអម្ចាស់
តាមពាក្យដែលខ្ញុំបានសន្យា
នៅចំពោះមុខប្រជាជនទាំងមូលរបស់ព្រះអង្គ
១៩ គឺនៅក្នុងព្រះវិហាររបស់ព្រះអម្ចាស់
ដែលស្ថិតនៅកណ្ដាលក្រុងយេរូសាឡឹម។
ហាលេលូយ៉ា!
១១៧
ពាក្យសរសើរតម្កើងសកល
១ ប្រជាជាតិទាំងឡាយអើយ
ចូរសរសើរតម្កើងព្រះអម្ចាស់
ប្រជារាស្ដ្រទាំងប៉ុន្មានអើយ
ចូរលើកតម្កើងសិរីរុងរឿងរបស់ព្រះអង្គ!
២ ដ្បិតព្រះអង្គមានព្រះហឫទ័យ
មេត្តាករុណាចំពោះយើងពន់ពេកក្រៃ
ព្រះអម្ចាស់មានព្រះហឫទ័យស្មោះស្ម័គ្រ
ចំពោះយើងរហូតតទៅ។
ហាលេលូយ៉ា!
១១៨
ព្រះហឫទ័យមេត្តាករុណារបស់ព្រះអង្គនៅស្ថិតស្ថេររហូតតទៅ
១ ចូរលើកតម្កើងព្រះអម្ចាស់
ដ្បិតព្រះអង្គសប្បុរស
ព្រះហឫទ័យមេត្តាករុណារបស់ព្រះអង្គ
នៅស្ថិតស្ថេររហូតតទៅ!
២ សូមឲ្យជនជាតិអ៊ីស្រាអែលពោលឡើងថា៖
ព្រះហឫទ័យមេត្តាករុណារបស់ព្រះអង្គ
នៅស្ថិតស្ថេររហូតតទៅ!
៣ សូមឲ្យកូនចៅរបស់លោកអរ៉ុន
ពោលឡើងថា៖
ព្រះហឫទ័យមេត្តាករុណារបស់ព្រះអង្គ
នៅស្ថិតស្ថេររហូតតទៅ!
៤ សូមឲ្យអស់អ្នកដែលគោរពកោតខ្លាច
ព្រះអម្ចាស់ពោលឡើងថា៖
ព្រះហឫទ័យមេត្តាករុណារបស់ព្រះអង្គ
នៅស្ថិតស្ថេររហូតតទៅ!
៥ នៅពេលមានអាសន្ន ខ្ញុំបានអង្វរព្រះអម្ចាស់
ព្រះអម្ចាស់ក៏បានឆ្លើយតបមកខ្ញុំវិញ
ហើយប្រទានឲ្យខ្ញុំមានសេរីភាព។
៦ ព្រះអម្ចាស់កាន់ខាងខ្ញុំ ខ្ញុំមិនភ័យខ្លាចឡើយ
តើមនុស្សលោកអាចធ្វើអ្វីខ្ញុំកើត?
៧ ដោយព្រះអម្ចាស់កាន់ខាងខ្ញុំ ហើយជួយខ្ញុំ
ខ្ញុំនឹងឃើញខ្មាំងសត្រូវបរាជ័យ។
៨ ផ្ញើជីវិតលើព្រះអម្ចាស់
នោះប្រសើរជាងទុកចិត្តលើមនុស្ស។
៩ ផ្ញើជីវិតលើព្រះអម្ចាស់
នោះប្រសើរជាងទុកចិត្តលើអ្នកធំ។
១០ ប្រជាជាតិទាំងប៉ុន្មាននាំគ្នាមកឡោមព័ទ្ធខ្ញុំ
តែខ្ញុំនឹងកម្ទេចពួកគេ
ដោយសារព្រះនាមរបស់ព្រះអម្ចាស់។
១១ ប្រជាជាតិទាំងនោះឡោមព័ទ្ធខ្ញុំគ្រប់ទិសទី
តែខ្ញុំនឹងកម្ទេចពួកគេ
ដោយសារព្រះនាមរបស់ព្រះអម្ចាស់។
១២ ប្រជាជាតិទាំងនោះឡោមព័ទ្ធខ្ញុំដូចហ្វូងឃ្មុំ
តែពួកគេនឹងឆេះអស់ទៅដូចភ្លើងឆេះបន្លា
ខ្ញុំនឹងកម្ទេចពួកគេ
ដោយសារព្រះនាមរបស់ព្រះអម្ចាស់។
១៣ គេបានច្រានខ្ញុំយ៉ាងខ្លាំង ដើម្បីឲ្យខ្ញុំដួល
តែព្រះអម្ចាស់បានជួយសង្គ្រោះខ្ញុំ។
១៤ ព្រះអម្ចាស់ជាកម្លាំងរបស់ខ្ញុំ
ខ្ញុំច្រៀងថ្វាយព្រះអង្គ ព្រះអង្គសង្គ្រោះខ្ញុំ។
១៥ មនុស្សសុចរិតនឹងនាំគ្នាស្រែកហ៊ោ
នៅក្នុងជំរំរបស់ខ្លួន ព្រោះតែមានជ័យជម្នះ
ព្រះអម្ចាស់សម្ដែងព្រះបារមីប្រកប
ដោយឫទ្ធានុភាព!
១៦ ព្រះអម្ចាស់សម្ដែងព្រះបារមីដ៏ខ្ពង់ខ្ពស់បំផុត!
ព្រះអម្ចាស់សម្ដែងព្រះបារមី
ប្រកបដោយឫទ្ធានុភាព។
១៧ ខ្ញុំនឹងមានជីវិត ខ្ញុំនឹងមិនស្លាប់ឡើយ
ហើយខ្ញុំនឹងរៀបរាប់
អំពីស្នាព្រះហស្ដរបស់ព្រះអម្ចាស់។
១៨ មែនហើយ ព្រះអម្ចាស់បានវាយប្រដៅខ្ញុំយ៉ាងខ្លាំង
តែព្រះអង្គមិនបណ្តោយឲ្យខ្ញុំស្លាប់ឡើយ។
១៩ ចូរនាំគ្នាបើកទ្វារនៃសេចក្ដីសុចរិតឲ្យខ្ញុំ
ដើម្បីខ្ញុំចូលទៅលើកតម្កើងព្រះអម្ចាស់។
២០ នេះនែ៎ ទ្វារដែលនាំចូលទៅរកព្រះអម្ចាស់
មានតែមនុស្សសុចរិតទេ
ដែលចូលតាមទ្វារនេះបាន។
២១ ទូលបង្គំនឹងលើកតម្កើងព្រះអង្គ
ព្រោះព្រះអង្គបានឆ្លើយតបមកទូលបង្គំ
ព្រះអង្គបានសង្គ្រោះទូលបង្គំ។
២២ ថ្មដែលពួកជាងសង់ផ្ទះបោះបង់ចោល
បានត្រឡប់មកជាថ្មគ្រឹះដ៏សំខាន់បំផុត។
២៣ ព្រះអម្ចាស់បានសម្រេចការអស្ចារ្យ
យើងក៏បានឃើញ ហើយស្ងើចសរសើរផង។
២៤ ថ្ងៃនេះជាថ្ងៃដែលព្រះអម្ចាស់បានបង្កើតមក
យើងនាំគ្នាត្រេកអរសប្បាយរីករាយនៅថ្ងៃនេះ!
២៥ ព្រះអម្ចាស់អើយ សូមសង្គ្រោះយើងខ្ញុំ!
ព្រះអម្ចាស់អើយ
សូមប្រទានឲ្យយើងខ្ញុំមានជោគជ័យ!
២៦ សូមលើកតម្កើងព្រះអង្គដែលយាងមក
ក្នុងព្រះនាមព្រះអម្ចាស់
យើងសូមឲ្យពរអ្នករាល់គ្នា
ពីក្នុងព្រះដំណាក់របស់ព្រះអម្ចាស់។
២៧ មានតែព្រះអម្ចាស់ទេដែលជាព្រះដ៏ពិត
តែមួយព្រះអង្គ ព្រះអង្គបំភ្លឺយើង
ចូរនាំគ្នាលើកធាងទន្សែឡើង
ហើយហែជាក្បួន
រហូតដល់ជ្រុងអាសនៈរបស់ព្រះអម្ចាស់!
២៨ ព្រះអង្គជាព្រះនៃទូលបង្គំ
ទូលបង្គំនឹងសរសើរតម្កើងព្រះអង្គ
ឱព្រះនៃទូលបង្គំអើយ
ទូលបង្គំសូមលើកតម្កើងព្រះអង្គ!
២៩ ចូរលើកតម្កើងព្រះអម្ចាស់ ដ្បិតព្រះអង្គសប្បុរស
ព្រះហឫទ័យមេត្តាករុណារបស់ព្រះអង្គ
នៅស្ថិតស្ថេររហូតតទៅ!
១១៩
វិន័យរបស់ព្រះអម្ចាស់
១ អ្នកណាមានកិរិយាមារយាទ
ល្អត្រឹមត្រូវឥតខ្ចោះ
ហើយប្រតិបត្តិតាមវិន័យរបស់ព្រះអម្ចាស់
អ្នកនោះមានសុភមង្គលហើយ!។
២ អ្នកណាប្រតិបត្តិតាមដំបូន្មានរបស់ព្រះអង្គ
ហើយស្វែងរកព្រះអង្គអស់ពីចិត្ត
អ្នកនោះមានសុភមង្គលហើយ!
៣ អ្នកទាំងនោះមិនប្រព្រឹត្តអំពើទុច្ចរិតទេ
គេដើរតាមមាគ៌ារបស់ព្រះអង្គ។
៤ ព្រះអង្គបានចេញច្បាប់មក
ដើម្បីឲ្យយើងខ្ញុំយកចិត្តទុកដាក់ប្រតិបត្តិតាម។
៥ សូមជួយទូលបង្គំឲ្យចេះប្រព្រឹត្តត្រឹមត្រូវ
ដោយប្រតិបត្តិតាមវិន័យរបស់ព្រះអង្គ។
៦ ដូច្នេះ ពេលណាទូលបង្គំពិនិត្យមើល
វិន័យទាំងប៉ុន្មានរបស់ព្រះអង្គ
នោះទូលបង្គំនឹងមិនត្រូវអាម៉ាស់ឡើយ។
៧ ទូលបង្គំសូមលើកតម្កើងព្រះអង្គ
ដោយចិត្តទៀងត្រង់
ហើយពិចារណាមើលព្រះបន្ទូលដ៏សុចរិត
ដែលព្រះអង្គបានបង្គាប់មក។
៨ ទូលបង្គំចង់ប្រតិបត្តិតាម
វិន័យរបស់ព្រះអង្គ
សូមកុំបោះបង់ចោលទូលបង្គំសោះឡើយ!
៩ តើមនុស្សកំលោះត្រូវធ្វើយ៉ាងណា
ដើម្បីឲ្យកិរិយាមារយាទរបស់ខ្លួន
បានល្អត្រឹមត្រូវ?
គឺដោយប្រតិបត្តិតាមព្រះបន្ទូលរបស់ព្រះអង្គ។
១០ ទូលបង្គំស្វែងរកព្រះអង្គយ៉ាងអស់ពីចិត្ត
សូមកុំបណ្តោយឲ្យទូលបង្គំងាកចេញ
ពីវិន័យរបស់ព្រះអង្គឡើយ!
១១ ទូលបង្គំរក្សាព្រះបន្ទូលរបស់ព្រះអង្គ
ទុកនៅក្នុងចិត្ត ដើម្បីកុំឲ្យប្រព្រឹត្តអំពើបាប
ទាស់នឹងព្រះហឫទ័យព្រះអង្គ។
១២ ព្រះអម្ចាស់អើយ ទូលបង្គំសូមលើកតម្កើងព្រះអង្គ
សូមបង្រៀនឲ្យទូលបង្គំ
ស្គាល់វិន័យរបស់ព្រះអង្គ!
១៣ ទូលបង្គំរៀបរាប់អំពីព្រះបន្ទូលទាំងប៉ុន្មាន
ដែលព្រះអង្គបានបង្គាប់មក។
១៤ ទូលបង្គំសប្បាយចិត្តនឹងអនុវត្តតាម
ដំបូន្មានរបស់ព្រះអង្គ
ដូចជាទូលបង្គំសប្បាយចិត្ត
នឹងមានសម្បត្តិដ៏ស្តុកស្តម្ភ។
១៥ ទូលបង្គំនឹងពិចារណាពីច្បាប់របស់ព្រះអង្គ
ទូលបង្គំសញ្ជឹងគិតអំពីមាគ៌ារបស់ព្រះអង្គជានិច្ច។
១៦ ទូលបង្គំពេញចិត្តនឹងវិន័យ
របស់ព្រះអង្គខ្លាំងណាស់
ទូលបង្គំមិនភ្លេចព្រះបន្ទូលរបស់ព្រះអង្គឡើយ។
១៧ សូមប្រណីសន្ដោសទូលបង្គំ
ជាអ្នកបម្រើរបស់ព្រះអង្គ
ដើម្បីឲ្យទូលបង្គំមានជីវិត
ហើយប្រតិបត្តិតាមព្រះបន្ទូលរបស់ព្រះអង្គ។
១៨ សូមបើកភ្នែកទូលបង្គំ
ដើម្បីឲ្យទូលបង្គំមើលឃើញភាពថ្លៃថ្នូរ
ដ៏អស្ចារ្យនៃវិន័យរបស់ព្រះអង្គ។
១៩ ទូលបង្គំគ្រាន់តែស្នាក់នៅជាបណ្តោះអាសន្ន
លើផែនដីនេះប៉ុណ្ណោះ
សូមកុំលាក់វិន័យរបស់ព្រះអង្គ
នឹងទូលបង្គំឡើយ។
២០ ចិត្តទូលបង្គំតែងតែផ្តោតទៅរកព្រះបន្ទូល
ដែលព្រះអង្គបង្គាប់មកជានិច្ច។
២១ ព្រះអង្គគំរាមកំហែងមនុស្សអួតបំប៉ោង
ដែលជាជនត្រូវបណ្ដាសា
វង្វេងចេញឆ្ងាយពីវិន័យរបស់ព្រះអង្គ។
២២ សូមដកយកការអាម៉ាស់ចេញពីទូលបង្គំ
កុំឲ្យមាននរណាមើលងាយទូលបង្គំឡើយ
ដ្បិតទូលបង្គំកាន់តាមដំបូន្មាន
របស់ព្រះអង្គហើយ។
២៣ ទោះបីពួកមេដឹកនាំឃុបឃិតគ្នា
ប្រឆាំងនឹងទូលបង្គំក៏ដោយ
ទូលបង្គំដែលជាអ្នកបម្រើរបស់ព្រះអង្គ
នៅតែសញ្ជឹងគិតពីវិន័យរបស់ព្រះអង្គជានិច្ច។
២៤ ទូលបង្គំពេញចិត្តនឹងដំបូន្មានរបស់ព្រះអង្គណាស់
ដំបូន្មានព្រះអង្គជួយជាគំនិតដល់ទូលបង្គំ។
២៥ ទូលបង្គំបានធ្លាក់ខ្លួនដុនដាបយ៉ាងខ្លាំង
សូមប្រោសឲ្យទូលបង្គំបានរស់
ស្របតាមព្រះបន្ទូលរបស់ព្រះអង្គផង។
២៦ ទូលបង្គំរៀបរាប់អំពីដំណើរជីវិតរបស់ទូលបង្គំ
ហើយព្រះអង្គក៏ឆ្លើយតបមកទូលបង្គំ
សូមបង្រៀនឲ្យទូលបង្គំស្គាល់វិន័យ
របស់ព្រះអង្គ!។
២៧ សូមជួយទូលបង្គំឲ្យយល់អំពីអត្ថន័យ
នៃច្បាប់របស់ព្រះអង្គ
ដើម្បីឲ្យទូលបង្គំអាចសញ្ជឹងគិតពីការអស្ចារ្យ
ទាំងប៉ុន្មានដែលព្រះអង្គបានសម្ដែង!។
២៨ ទូលបង្គំមានទុក្ខសោកសង្រេង
សូមលើកទឹកចិត្តទូលបង្គំឡើងវិញ
ដូចព្រះអង្គបានសន្យា។
២៩ សូមនាំទូលបង្គំចេញឆ្ងាយពីផ្លូវខុសឆ្គង
ហើយជួយឲ្យទូលបង្គំប្រតិបត្តិតាម
វិន័យរបស់ព្រះអង្គ!
៣០ ទូលបង្គំប្ដេជ្ញាចិត្តស្មោះត្រង់នឹងព្រះអង្គ
ទូលបង្គំសុខចិត្តធ្វើតាមព្រះបន្ទូល
ដែលព្រះអង្គបង្គាប់មក។
៣១ ទូលបង្គំជំពាក់ចិត្តនឹងដំបូន្មានរបស់ព្រះអង្គ
ព្រះអម្ចាស់អើយ
សូមកុំឲ្យទូលបង្គំត្រូវអាម៉ាស់ឡើយ!
៣២ ទូលបង្គំសប្បាយចិត្តនឹងដើរ
តាមមាគ៌ារបស់ព្រះអង្គ
ដ្បិតព្រះអង្គធ្វើឲ្យចិត្តទូលបង្គំបានភ្លឺស្វាង។
៣៣ ព្រះអម្ចាស់អើយ សូមបង្រៀនឲ្យទូលបង្គំ
ស្គាល់វិន័យរបស់ព្រះអង្គ
ដើម្បីឲ្យទូលបង្គំកាន់តាម
រហូតដល់ទីបញ្ចប់!។
៣៤ សូមប្រទានឲ្យទូលបង្គំមានប្រាជ្ញា
ដើម្បីរក្សាវិន័យរបស់ព្រះអង្គ
ហើយប្រតិបត្តិតាមយ៉ាងអស់ពីចិត្ត!។
៣៥ សូមនាំទូលបង្គំដើរតាមមាគ៌ា
នៃវិន័យរបស់ព្រះអង្គ
ដ្បិតទូលបង្គំពេញចិត្តនឹងវិន័យ
ទាំងនេះណាស់។
៣៦ សូមទាក់ទាញចិត្តទូលបង្គំ
ឲ្យធ្វើតាមដំបូន្មានរបស់ព្រះអង្គ
គឺមិនមែនឲ្យរកកម្រៃឡើយ!
៣៧ សូមទាញអារម្មណ៍ទូលបង្គំ
ឲ្យបែរចេញពីអ្វីៗដែលឥតខ្លឹមសារ
ហើយឲ្យទូលបង្គំមានជីវិតរស់នៅ
តាមមាគ៌ារបស់ព្រះអង្គ!
៣៨ សូមសម្រេចតាមព្រះបន្ទូលដែលព្រះអង្គបានសន្យា
ជាមួយទូលបង្គំជាអ្នកបម្រើរបស់ព្រះអង្គ
គឺព្រះបន្ទូលដែលព្រះអង្គបានសន្យា
ចំពោះអស់អ្នកគោរពកោតខ្លាចព្រះអង្គ។
៣៩ សូមយកសេចក្ដីអាម៉ាស់ដែលទូលបង្គំ
ខ្លាចរអែងនេះ ចេញឲ្យឆ្ងាយពីទូលបង្គំទៅ
ដ្បិតការសម្រេចរបស់ព្រះអង្គសុទ្ធតែល្អទាំងអស់។
៤០ ទូលបង្គំប្រាថ្នាចង់ធ្វើតាមច្បាប់របស់ព្រះអង្គ
សូមប្រទានឲ្យទូលបង្គំមានជីវិតឡើងវិញ
ដោយសេចក្ដីសុចរិតរបស់ព្រះអង្គ!
៤១ ព្រះអម្ចាស់អើយ សូមសម្ដែងព្រះហឫទ័យ
មេត្តាករុណាចំពោះទូលបង្គំ សូមសង្គ្រោះ
ទូលបង្គំតាមព្រះបន្ទូលសន្យារបស់ព្រះអង្គ!
៤២ សូមជួយឲ្យទូលបង្គំអាចឆ្លើយតប
នឹងអ្នកដែលជេរប្រមាថទូលបង្គំ
ដ្បិតទូលបង្គំផ្ញើជីវិតលើព្រះបន្ទូលរបស់ព្រះអង្គ។
៤៣ សូមកុំឲ្យទូលបង្គំនិយាយអ្វីប្រាសចាក
ពីសេចក្ដីពិតឡើយ
ដ្បិតទូលបង្គំសង្ឃឹមលើការសម្រេចរបស់ព្រះអង្គ។
៤៤ ទូលបង្គំនឹងគោរពតាមវិន័យរបស់ព្រះអង្គ
ជានិច្ចនិរន្តរ៍រហូតតរៀងទៅ។
៤៥ ទូលបង្គំចង់រស់នៅដោយមានសេរីភាពពេញទី
ដ្បិតទូលបង្គំស្វែងរកច្បាប់របស់ព្រះអង្គ។
៤៦ ទូលបង្គំនឹងថ្លែងអំពីដំបូន្មានរបស់ព្រះអង្គ
ប្រាប់ស្តេចនានា
ទូលបង្គំនឹងមិនខ្មាសសោះឡើយ។
៤៧ ទូលបង្គំពេញចិត្តនឹងវិន័យរបស់ព្រះអង្គ
ទូលបង្គំស្រឡាញ់វិន័យនេះណាស់។
៤៨ ទូលបង្គំលើកដៃប្រណម្យគោរព
វិន័យរបស់ព្រះអង្គ
ព្រោះទូលបង្គំស្រឡាញ់វិន័យនេះ
ទូលបង្គំចង់សញ្ជឹងគិតអំពីវិន័យរបស់ព្រះអង្គ។
៤៩ សូមនឹកដល់ព្រះបន្ទូលដែលព្រះអង្គបានសន្យា
ជាមួយទូលបង្គំ
ដ្បិតព្រះអង្គបានធ្វើឲ្យទូលបង្គំមានសង្ឃឹម!
៥០ នៅពេលទូលបង្គំមានទុក្ខវេទនា
ព្រះបន្ទូលនេះធ្វើឲ្យចិត្តទូលបង្គំបានធូរស្បើយ
ព្រះបន្ទូលសន្យារបស់ព្រះអង្គ
បានធ្វើឲ្យទូលបង្គំមានជីវិតឡើងវិញ។
៥១ មនុស្សអួតបំប៉ោងនាំគ្នាចំអកឲ្យទូលបង្គំ
តែទូលបង្គំមិនឃ្លាតចាកពីវិន័យ
របស់ព្រះអង្គឡើយ។
៥២ ព្រះអម្ចាស់អើយ ទូលបង្គំនឹកដល់
ការសម្រេចរបស់ព្រះអង្គ កាលពីអតីតកាល
ហើយចិត្តទូលបង្គំក៏បានធូរស្បើយ។
៥៣ មនុស្សពាលបានធ្វើឲ្យទូលបង្គំ
ក្ដៅក្រហាយយ៉ាងខ្លាំង
ព្រោះពួកគេបោះបង់ចោលវិន័យ
របស់ព្រះអង្គ។
៥៤ ពេលដែលទូលបង្គំស្នាក់អាស្រ័យ
ជាបណ្តោះអាសន្នក្នុងលោកនេះ
ទូលបង្គំបានយកវិន័យរបស់ព្រះអង្គ
មកធ្វើជាទំនុកតម្កើង។
៥៥ ឱព្រះអម្ចាស់អើយ នៅពេលយប់ទូលបង្គំនឹកដល់
ព្រះនាមរបស់ព្រះអង្គ ហើយទូលបង្គំ
ប្រតិបត្តិតាមវិន័យរបស់ព្រះអង្គ។
៥៦ ទូលបង្គំរកឃើញសុភមង្គល
ដោយអនុវត្តតាមច្បាប់របស់ព្រះអង្គ។
៥៧ ឱព្រះអម្ចាស់អើយ ទូលបង្គំសូមទូលព្រះអង្គថា
ការប្រតិបត្តិតាមព្រះបន្ទូលព្រះអង្គ
ជាចំណែកមត៌ករបស់ទូលបង្គំ។
៥៨ ទូលបង្គំសូមអង្វរករព្រះអង្គយ៉ាងអស់ពីចិត្តថា
សូមប្រណីសន្ដោសទូលបង្គំ
តាមព្រះបន្ទូលសន្យារបស់ព្រះអង្គផង!
៥៩ ទូលបង្គំរិះគិតអំពីកិរិយាមារយាទរបស់ទូលបង្គំ
ហើយទូលបង្គំក៏បោះជំហានមករកដំបូន្មាន
របស់ព្រះអង្គវិញ។
៦០ ទូលបង្គំប្រញាប់ប្រញាល់ប្រតិបត្តិ
តាមវិន័យរបស់ព្រះអង្គ
ឥតធ្វេសប្រហែសសោះឡើយ។
៦១ មនុស្សអាក្រក់បានធ្វើឲ្យទូលបង្គំ
ជាប់អន្ទាក់របស់គេ
តែទូលបង្គំឥតភ្លេចវិន័យរបស់ព្រះអង្គទេ។
៦២ នៅពាក់កណ្ដាលអធ្រាត្រ ទូលបង្គំក្រោកឡើង
ដើម្បីលើកតម្កើងព្រះអង្គ
ព្រោះតែការសម្រេចដ៏ត្រឹមត្រូវរបស់ព្រះអង្គ។
៦៣ ទូលបង្គំជាមិត្តរបស់អស់អ្នក
ដែលគោរពកោតខ្លាចព្រះអង្គ
និងអស់អ្នកដែលប្រតិបត្តិតាម
ច្បាប់របស់ព្រះអង្គ។
៦៤ ឱព្រះអម្ចាស់អើយ ផែនដីពេញទៅដោយ
ព្រះហឫទ័យមេត្តាករុណារបស់ព្រះអង្គ
សូមបង្រៀនឲ្យទូលបង្គំស្គាល់វិន័យ
របស់ព្រះអង្គ!
៦៥ ឱព្រះអម្ចាស់អើយ សូមប្រណីសន្ដោសទូលបង្គំ
ជាអ្នកបម្រើរបស់ព្រះអង្គ
តាមព្រះបន្ទូលរបស់ព្រះអង្គផង។
៦៦ សូមបង្រៀនទូលបង្គំឲ្យដឹងខុសត្រូវ មានប្រាជ្ញា
ដ្បិតទូលបង្គំទុកចិត្តលើវិន័យរបស់ព្រះអង្គ។
៦៧ ពីមុនទូលបង្គំបានវង្វេង ហើយរងទុក្ខវេទនា
ឥឡូវនេះ ទូលបង្គំប្រតិបត្តិតាមព្រះបន្ទូល
របស់ព្រះអង្គហើយ។
៦៨ ព្រះអង្គមានព្រះហឫទ័យល្អសប្បុរស
សូមបង្រៀនឲ្យទូលបង្គំស្គាល់វិន័យ
របស់ព្រះអង្គ!
៦៩ មនុស្សអួតបំប៉ោងនាំគ្នាបង្ខូចកេរ្តិ៍ឈ្មោះទូលបង្គំ
តែទូលបង្គំនៅតែយកចិត្តទុកដាក់ធ្វើតាម
ច្បាប់របស់ព្រះអង្គជានិច្ច។
៧០ អ្នកទាំងនោះជាមនុស្សអត់ចិត្ត
រីឯទូលបង្គំវិញ ទូលបង្គំពេញចិត្តនឹងវិន័យ
របស់ព្រះអង្គណាស់។
៧១ ទូលបង្គំរងទុក្ខវេទនាដូច្នេះ ក៏ប្រពៃម្យ៉ាងដែរ
ព្រោះទូលបង្គំអាចរៀនក្រឹត្យវិន័យរបស់ព្រះអង្គ។
៧២ ចំពោះទូលបង្គំ ទោះបីមាសប្រាក់
ច្រើនយ៉ាងណាក៏ដោយ
ក៏គ្មានតម្លៃស្មើនឹងវិន័យរបស់ព្រះអង្គដែរ។
៧៣ ព្រះអង្គបានបង្កើតទូលបង្គំមក
ហើយប្រទានឲ្យទូលបង្គំបានមាំមួនឡើង
ដូច្នេះ សូមប្រទានឲ្យទូលបង្គំ
មានប្រាជ្ញាសិក្សាវិន័យរបស់ព្រះអង្គ។
៧៤ ពេលអស់អ្នកគោរពកោតខ្លាចព្រះអង្គ
ឃើញទូលបង្គំ គេនឹងមានអំណរ
ដ្បិតទូលបង្គំផ្ញើជីវិតលើព្រះបន្ទូលរបស់ព្រះអង្គ។
៧៥ ឱព្រះអម្ចាស់អើយ ទូលបង្គំដឹងថាការអ្វី
ដែលព្រះអង្គសម្រេចសុទ្ធតែត្រឹមត្រូវទាំងអស់
ហើយព្រះអង្គដាក់ទោសទូលបង្គំក៏ត្រឹមត្រូវដែរ។
៧៦ សូមសម្រាលទុក្ខទូលបង្គំ
ដោយសារព្រះហឫទ័យស្មោះស្ម័គ្ររបស់ព្រះអង្គ
តាមព្រះបន្ទូលដែលព្រះអង្គបានសន្យា
ជាមួយទូលបង្គំជាអ្នកបម្រើរបស់ព្រះអង្គ។
៧៧ សូមសម្ដែងព្រះហឫទ័យមេត្តាករុណាមកលើ
ទូលបង្គំ ដើម្បីឲ្យទូលបង្គំមានជីវិតឡើងវិញ
ដ្បិតទូលបង្គំពេញចិត្តនឹងវិន័យ
របស់ព្រះអង្គណាស់។
៧៨ សូមឲ្យមនុស្សអួតបំប៉ោងត្រូវអាម៉ាស់
ដ្បិតពួកគេនិយាយកុហកមួលបង្កាច់ទូលបង្គំ
រីឯទូលបង្គំវិញ
ទូលបង្គំសញ្ជឹងគិតពីច្បាប់របស់ព្រះអង្គ។
៧៩ សូមឲ្យអស់អ្នកដែលគោរពកោត
ខ្លាចព្រះអង្គ នាំគ្នាមករកទូលបង្គំ
ដើម្បីឲ្យបានស្គាល់ដំបូន្មានរបស់ព្រះអង្គ។
៨០ សូមជួយឲ្យទូលបង្គំប្រព្រឹត្តតាមវិន័យ
របស់ព្រះអង្គឥតខ្ចោះ
កុំឲ្យទូលបង្គំត្រូវខ្មាសឡើយ។
៨១ ទូលបង្គំទន្ទឹងរង់ចាំមើលព្រះអង្គសង្គ្រោះទូលបង្គំ
ទូលបង្គំរង់ចាំព្រះអង្គមានព្រះបន្ទូល។
៨២ ទូលបង្គំខំប្រឹងរង់ចាំមើលព្រះបន្ទូលសន្យា
របស់ព្រះអង្គ ទូលបង្គំពោលថា «តើដល់ពេលណា
ទើបព្រះអង្គសម្រាលទុក្ខទូលបង្គំ?»។
៨៣ ទូលបង្គំជាមនុស្សដែលគ្មាននរណារាប់រកទៀតទេ
តែទូលបង្គំមិនបំភ្លេចក្រឹត្យវិន័យ
របស់ព្រះអង្គឡើយ។
៨៤ តើទូលបង្គំដែលជាអ្នកបម្រើរបស់ព្រះអង្គ
ត្រូវរង់ចាំដល់ពេលណាទៀត
ទើបព្រះអង្គវិនិច្ឆ័យទោសអស់អ្នក
ដែលបៀតបៀនទូលបង្គំ?
៨៥ មនុស្សអួតបំប៉ោងមិនគោរពតាមវិន័យ
របស់ព្រះអង្គទេ
គេនាំគ្នាជីករណ្ដៅ ដើម្បីឲ្យទូលបង្គំធ្លាក់។
៨៦ វិន័យរបស់ព្រះអង្គទាំងប៉ុន្មាន
សុទ្ធតែពិតទាំងអស់
សូមជួយទូលបង្គំផង
ដ្បិតគេបៀតបៀនទូលបង្គំដោយឥតហេតុផល។
៨៧ នៅតែបន្តិចប៉ុណ្ណោះ
គេនឹងប្រហារទូលបង្គំឲ្យវិនាសសូន្យ
ប៉ុន្តែ ទូលបង្គំមិនបោះបង់ចោលច្បាប់
របស់ព្រះអង្គឡើយ។
៨៨ សូមប្រទានឲ្យទូលបង្គំមានជីវិតឡើងវិញ
ដោយព្រះហឫទ័យមេត្តាករុណា
ទូលបង្គំនឹងប្រតិបត្តិតាមដំបូន្មាន
ដែលព្រះអង្គបង្គាប់មក។
៨៩ ឱព្រះអម្ចាស់អើយ ព្រះបន្ទូលរបស់ព្រះអង្គ
ស្ថិតស្ថេររហូតតទៅ នៅក្នុងស្ថានបរមសុខ។
៩០ ព្រះហឫទ័យស្មោះស្ម័គ្ររបស់ព្រះអង្គ
នៅស្ថិតស្ថេរអស់កល្បជាអង្វែងតរៀងទៅ
ព្រះអង្គបានធ្វើឲ្យផែនដីរឹងមាំ
ហើយផែនដីក៏នៅស្ថិតស្ថេរដែរ។
៩១ អ្វីៗសព្វសារពើនៅស្ថិតស្ថេររហូតមកដល់សព្វថ្ងៃ
ដោយសារព្រះបញ្ជារបស់ព្រះអង្គ
ដ្បិតអ្វីៗទាំងអស់សុទ្ធតែនៅក្រោម
អំណាចរបស់ព្រះអង្គ។
៩២ ប្រសិនបើទូលបង្គំមិនពេញចិត្តនឹងវិន័យ
របស់ព្រះអង្គទេ ទូលបង្គំមុខជារងទុក្ខវេទនា
ហើយវិនាសអន្តរាយជាមិនខាន។
៩៣ ទូលបង្គំនឹងមិនភ្លេចច្បាប់
របស់ព្រះអង្គសោះឡើយ
ដ្បិតព្រះអង្គធ្វើឲ្យទូលបង្គំមានជីវិតឡើងវិញ
ដោយសារច្បាប់ទាំងនេះ។
៩៤ ទូលបង្គំនៅក្រោមឱវាទរបស់ព្រះអង្គហើយ
សូមសង្គ្រោះទូលបង្គំផង!
ដ្បិតទូលបង្គំយកចិត្តទុកដាក់
នឹងច្បាប់របស់ព្រះអង្គ។
៩៥ មនុស្សអាក្រក់រង់ចាំប្រហារជីវិតទូលបង្គំ
តែទូលបង្គំចាប់ចិត្តនឹងដំបូន្មានរបស់ព្រះអង្គ។
៩៦ ទូលបង្គំឃើញថា
សូម្បីអ្វីៗដ៏ល្អឥតខ្ចោះក៏នឹងមានទីបញ្ចប់ដែរ
ប៉ុន្តែ វិន័យរបស់ព្រះអង្គទូលំទូលាយ
ឥតមានព្រំដែនសោះឡើយ។
៩៧ ទូលបង្គំស្រឡាញ់វិន័យ
របស់ព្រះអង្គខ្លាំងណាស់
ទូលបង្គំសញ្ជឹងគិតអំពីវិន័យនេះ
ជារៀងរាល់ថ្ងៃ។
៩៨ វិន័យរបស់ព្រះអង្គធ្វើឲ្យទូលបង្គំ
មានប្រាជ្ញាវាងវៃជាងខ្មាំងសត្រូវ
ដ្បិតទូលបង្គំរិះគិតពីវិន័យនេះជានិច្ច។
៩៩ ទូលបង្គំចេះដឹងជាងគ្រូៗទាំងប៉ុន្មាន
របស់ទូលបង្គំទៅទៀត ដ្បិតទូលបង្គំ
យកដំបូន្មានទាំងប៉ុន្មាន មកសញ្ជឹងគិត។
១០០ ទូលបង្គំដឹងខុសត្រូវជាងចាស់ៗទៅទៀត
ដ្បិតទូលបង្គំប្រព្រឹត្តតាមច្បាប់របស់ព្រះអង្គ។
១០១ ទូលបង្គំចៀសចេញឆ្ងាយពីផ្លូវអាក្រក់ទាំងប៉ុន្មាន
ដើម្បីប្រតិបត្តិតាមព្រះបន្ទូលរបស់ព្រះអង្គ។
១០២ ទូលបង្គំមិនងាកចេញពីសេចក្ដី
ដែលព្រះអង្គបង្គាប់មកទូលបង្គំឡើយ
ដ្បិតព្រះអង្គប្រៀនប្រដៅទូលបង្គំដូច្នេះ។
១០៣ ព្រះបន្ទូលរបស់ព្រះអង្គប្រៀបបាននឹងអាហារ
ដ៏ឆ្ងាញ់ពិសេស សម្រាប់ទូលបង្គំ
ហើយក៏មានរសជាតិផ្អែមជាងទឹកឃ្មុំទៅទៀត។
១០៤ ច្បាប់របស់ព្រះអង្គបានធ្វើឲ្យទូលបង្គំ
ដឹងខុសត្រូវ ហេតុនេះហើយបានជា
ទូលបង្គំស្អប់ការវៀចវេរ។
១០៥ ព្រះបន្ទូលរបស់ព្រះអង្គជាចង្កៀងបំភ្លឺជំហាន
ទូលបង្គំ និងជាពន្លឺបំភ្លឺផ្លូវរបស់ទូលបង្គំ។
១០៦ ទូលបង្គំសូមសន្យាដោយឥតងាករេថា
ទូលបង្គំនឹងប្រតិបត្តិតាមព្រះបន្ទូល
ដ៏សុចរិតដែលព្រះអង្គបង្គាប់មក។
១០៧ ឱព្រះអម្ចាស់អើយ
ទូលបង្គំរងទុក្ខវេទនាខ្លាំងណាស់
សូមប្រោសប្រទានឲ្យទូលបង្គំមានជីវិត
ឡើងវិញ ស្របតាមព្រះបន្ទូលរបស់ព្រះអង្គផង!
១០៨ ឱព្រះអម្ចាស់អើយ
សូមទទួលយកពាក្យទូលអង្វររបស់ទូលបង្គំ
ទុកជាតង្វាយ ហើយសូមបង្រៀនឲ្យទូលបង្គំ
ស្គាល់វិន័យរបស់ព្រះអង្គ!
១០៩ ជីវិតទូលបង្គំប្រឈមមុខទល់នឹងអន្តរាយជានិច្ច
ប៉ុន្តែ ទូលបង្គំមិនភ្លេចវិន័យរបស់ព្រះអង្គទេ។
១១០ មនុស្សអាក្រក់នាំគ្នាដាក់អន្ទាក់ចាំចាប់ទូលបង្គំ
តែទូលបង្គំមិនវង្វេងចេញឆ្ងាយ
ពីច្បាប់របស់ព្រះអង្គឡើយ។
១១១ ដំបូន្មានរបស់ព្រះអង្គជាកេរមត៌ករបស់ទូលបង្គំ
ដ្បិតដំបូន្មានទាំងនេះធ្វើឲ្យទូលបង្គំ
មានអំណរនៅក្នុងចិត្ត។
១១២ ទូលបង្គំប្ដេជ្ញាចិត្តធ្វើតាមវិន័យ
របស់ព្រះអង្គរហូតដល់ទីបំផុត។
១១៣ ទូលបង្គំស្អប់មនុស្សដែលមានចិត្តពីរ
តែទូលបង្គំស្រឡាញ់វិន័យរបស់ព្រះអង្គ។
១១៤ ព្រះអង្គជាជម្រក និងជាខែលការពារទូលបង្គំ
ទូលបង្គំផ្ញើជីវិតលើព្រះបន្ទូល
របស់ព្រះអង្គជានិច្ច។
១១៥ មនុស្សអាក្រក់អើយ
ចូរនាំគ្នាចេញឲ្យឆ្ងាយពីខ្ញុំទៅ!
ទុកឲ្យខ្ញុំប្រតិបត្តិតាមវិន័យនៃព្រះរបស់ខ្ញុំ!
១១៦ សូមជួយគាំទ្រទូលបង្គំ
តាមព្រះបន្ទូលសន្យារបស់ព្រះអង្គ
ដើម្បីឲ្យទូលបង្គំមានជីវិត
សូមកុំឲ្យសេចក្ដីសង្ឃឹម
របស់ទូលបង្គំប្រែទៅជាខកចិត្តឡើយ។
១១៧ សូមធ្វើជាបង្អែករបស់ទូលបង្គំ
ដើម្បីឲ្យទូលបង្គំបានរួចជីវិត
ហើយផ្ចង់ចិត្តទៅរកវិន័យរបស់ព្រះអង្គជានិច្ច។
១១៨ ព្រះអង្គមិនរាប់រកអស់អ្នកដែលវង្វេង
ចេញឆ្ងាយពីក្រឹត្យវិន័យរបស់ព្រះអង្គឡើយ
ដ្បិតអ្វីៗដែលពួកគេធ្វើសុទ្ធតែ
ជាការបោកបញ្ឆោត។
១១០ ព្រះអង្គផាត់មនុស្សអាក្រក់ទាំងប៉ុន្មាន
នៅលើផែនដីចោល ដូចកម្ទេចសំរាម
ហេតុនេះហើយបានជាទូលបង្គំស្រឡាញ់
ដំបូន្មានរបស់ព្រះអង្គ។
១២០ រូបកាយទូលបង្គំភ័យញាប់ញ័រ
ដោយកោតខ្លាចព្រះអង្គ
ទូលបង្គំភ័យខ្លាចការសម្រេចរបស់ព្រះអង្គ។
១២១ ទូលបង្គំប្រព្រឹត្តអំពើសុចរិត យុត្តិធម៌
សូមកុំឲ្យទូលបង្គំធ្លាក់ទៅក្នុងកណ្ដាប់ដៃ
របស់អស់អ្នកដែលសង្កត់សង្កិនទូលបង្គំឡើយ។
១២២ សូមធានាឲ្យទូលបង្គំ
ដែលជាអ្នកបម្រើព្រះអង្គបានសុខសាន្តផង
សូមកុំទុកឲ្យមនុស្សអួតបំប៉ោង
សង្កត់សង្កិនទូលបង្គំឡើយ។
១២៣ ទូលបង្គំទន្ទឹងរង់ចាំមើលព្រះអង្គសង្គ្រោះទូលបង្គំ
ទូលបង្គំរង់ចាំព្រះបន្ទូលសន្យាដ៏សុចរិត
របស់ព្រះអង្គ។
១២៤ សូមប្រព្រឹត្តចំពោះទូលបង្គំដែលជាអ្នកបម្រើ
របស់ព្រះអង្គ ដោយព្រះហឫទ័យមេត្តាករុណា
សូមបង្រៀនឲ្យទូលបង្គំស្គាល់វិន័យ
របស់ព្រះអង្គ!
១២៥ ទូលបង្គំជាអ្នកបម្រើរបស់ព្រះអង្គ
សូមប្រទានប្រាជ្ញាមកទូលបង្គំផង
ដើម្បីឲ្យទូលបង្គំស្គាល់ដំបូន្មានរបស់ព្រះអង្គ។
១២៦ ព្រះអម្ចាស់អើយ ដល់ពេលធ្វើអន្តរាគមន៍ហើយ
ដ្បិតគេបានរំលោភលើវិន័យរបស់ព្រះអង្គ។
១២៧ ទូលបង្គំស្រឡាញ់វិន័យរបស់ព្រះអង្គ
លើសអ្វីៗទាំងអស់ គឺលើសមាសសុទ្ធទៅទៀត។
១២៨ ទូលបង្គំយល់ឃើញថាច្បាប់ទាំងប៉ុន្មាន
របស់ព្រះអង្គសុទ្ធតែត្រឹមត្រូវទាំងអស់
ទូលបង្គំស្អប់ការអាក្រក់គ្រប់យ៉ាង។
១២៩ ដំបូន្មានរបស់ព្រះអង្គល្អវិសេសណាស់
ហេតុនេះហើយបានជាទូលបង្គំខំប្រឹងធ្វើតាម។
១៣០ ការស្វែងយល់ព្រះបន្ទូលរបស់ព្រះអង្គ
ធ្វើឲ្យមនុស្សភ្លឺស្វាង
ហើយធ្វើឲ្យអ្នកទន់ទាបមានប្រាជ្ញា។
១៣១ ទូលបង្គំត្រងត្រាប់ស្ដាប់ព្រះបន្ទូល
របស់ព្រះអង្គដោយយកចិត្តទុកដាក់
ដ្បិតទូលបង្គំចង់ស្គាល់វិន័យ
របស់ព្រះអង្គណាស់។
១៣២ សូមបែរព្រះភ័ក្ត្រទតមកទូលបង្គំ
សូមប្រណីសន្ដោសទូលបង្គំ
ដូចព្រះអង្គធ្លាប់ប្រណីសន្ដោសអស់អ្នក
ដែលស្រឡាញ់ព្រះនាមរបស់ព្រះអង្គ។
១៣៣ សូមពង្រឹងទូលបង្គំឲ្យបានមាំមួន
តាមព្រះបន្ទូលសន្យារបស់ព្រះអង្គ
ហើយកុំបណ្តោយឲ្យទូលបង្គំធ្លាក់ទៅក្នុង
អំណាចរបស់អំពើទុច្ចរិតណាមួយឡើយ!។
១៣៤ សូមរំដោះទូលបង្គំឲ្យរួចផុតពីការ
ជិះជាន់របស់មនុស្ស ដើម្បីឲ្យទូលបង្គំ
ប្រតិបត្តិតាមច្បាប់របស់ព្រះអង្គ។
១៣៥ សូមសម្ដែងព្រះហឫទ័យអាណិតមេត្តា
ដល់ទូលបង្គំជាអ្នកបម្រើរបស់ព្រះអង្គ
ហើយសូមបង្រៀនទូលបង្គំឲ្យស្គាល់
វិន័យរបស់ព្រះអង្គផង!។
១៣៦ ទូលបង្គំបង្ហូរទឹកភ្នែកឥតស្រាកស្រាន្ត
ដោយឃើញគេមិនគោរព
តាមវិន័យរបស់ព្រះអង្គ។
១៣៧ ឱព្រះអម្ចាស់អើយ ព្រះអង្គសុចរិត
ការវិនិច្ឆ័យរបស់ព្រះអង្គសុទ្ធតែត្រឹមត្រូវ!
១៣៨ ព្រះអង្គប្រទានដំបូន្មានមកដោយសុចរិត
និងត្រឹមត្រូវបំផុត។
១៣៩ ទូលបង្គំក្ដៅក្រហាយយ៉ាងខ្លាំង
ដោយឃើញបច្ចាមិត្តរបស់ទូលបង្គំ
បំភ្លេចព្រះបន្ទូលរបស់ព្រះអង្គ។
១៤០ ព្រះបន្ទូលសន្យារបស់ព្រះអង្គ
សម្រេចជាក់ស្តែងហើយ
ទូលបង្គំជាអ្នកបម្រើរបស់ព្រះអង្គ
ស្រឡាញ់ព្រះបន្ទូលនេះណាស់។
១៤១ ទូលបង្គំជាមនុស្សតូចតាច
ហើយត្រូវគេមើលងាយទៀតផង
តែទូលបង្គំមិនភ្លេចច្បាប់របស់ព្រះអង្គឡើយ។
១៤២ សេចក្ដីសុចរិតរបស់ព្រះអង្គនៅ
ស្ថិតស្ថេរអស់កល្បជានិច្ច
ហើយវិន័យរបស់ព្រះអង្គជាសេចក្ដីពិត។
១៤៣ ទូលបង្គំកើតទុក្ខអន្ទះអន្ទែងជាខ្លាំង
តែវិន័យរបស់ព្រះអង្គ
ធ្វើឲ្យទូលបង្គំមានអំណរ។
១៤៤ ដំបូន្មានរបស់ព្រះអង្គសុចរិតជានិច្ច
សូមប្រទានប្រាជ្ញាមកទូលបង្គំ
ដើម្បីឲ្យទូលបង្គំមានជីវិត!
១៤៥ ឱព្រះអម្ចាស់អើយ
ទូលបង្គំអង្វរព្រះអង្គយ៉ាងអស់ពីចិត្ត
សូមឆ្លើយតបមកទូលបង្គំផង ដើម្បីឲ្យទូលបង្គំ
ប្រតិបត្តិតាមវិន័យរបស់ព្រះអង្គ!
១៤៦ ទូលបង្គំអង្វរព្រះអង្គ
សូមសង្គ្រោះទូលបង្គំផង
ដើម្បីឲ្យទូលបង្គំប្រព្រឹត្តតាមដំបូន្មាន
របស់ព្រះអង្គ!
១៤៧ ទូលបង្គំស្រែកអង្វរព្រះអង្គ
តាំងពីមុនថ្ងៃរះទៅទៀត
ទូលបង្គំទន្ទឹងរង់ចាំព្រះអង្គមានព្រះបន្ទូល។
១៤៨ ទូលបង្គំសញ្ជឹងគិតអំពីព្រះបន្ទូលសន្យា
របស់ព្រះអង្គមួយយប់ទល់ភ្លឺ។
១៤៩ សូមស្ដាប់ពាក្យទូលអង្វររបស់ទូលបង្គំ
ដោយព្រះហឫទ័យមេត្តាករុណា
ឱព្រះអម្ចាស់អើយ សូមជួយទូលបង្គំ
ឲ្យរស់នៅតាមការសម្រេចរបស់ព្រះអង្គ។
១៥០ អស់អ្នកដែលតាមព្យាបាទទូលបង្គំ
នាំគ្នាចូលមកជិតទូលបង្គំ
អ្នកទាំងនោះឃ្លាតចេញឆ្ងាយ
ពីវិន័យរបស់ព្រះអង្គ។
១៥១ ឱព្រះអម្ចាស់អើយ ព្រះអង្គនៅជិតទូលបង្គំ
វិន័យទាំងប៉ុន្មានរបស់ព្រះអង្គ
សុទ្ធតែត្រឹមត្រូវទាំងអស់
១៥២ តាំងពីយូរយារណាស់មកហើយ
ទូលបង្គំបានដឹងថា
ព្រះអង្គប្រទានដំបូន្មានរបស់ព្រះអង្គមក
ដើម្បីឲ្យនៅស្ថិតស្ថេរអស់កល្បជានិច្ច។
១៥៣ សូមទតមើលទុក្ខវេទនារបស់ទូលបង្គំ
សូមរំដោះទូលបង្គំផង!
ដ្បិតទូលបង្គំមិនភ្លេចវិន័យរបស់ព្រះអង្គទេ។
១៥៤ សូមរកយុត្តិធម៌ឲ្យទូលបង្គំ
ហើយរំដោះទូលបង្គំឲ្យមានសេរីភាពផង
សូមប្រទានឲ្យទូលបង្គំមានជីវិតឡើងវិញ
តាមព្រះបន្ទូលសន្យារបស់ព្រះអង្គ!
១៥៥ មនុស្សអាក្រក់ពុំអាចទទួលការសង្គ្រោះឡើយ
ដ្បិតពួកគេមិនស្វែងរកវិន័យរបស់ព្រះអង្គទេ។
១៥៦ ឱព្រះអម្ចាស់អើយ ព្រះអង្គតែងតែ
មានព្រះហឫទ័យអាណិតមេត្តាជានិច្ច
សូមប្រទានឲ្យទូលបង្គំមានជីវិតឡើងវិញ
តាមព្រះបន្ទូលដែលព្រះអង្គបានបង្គាប់មក។
១៥៧ អស់អ្នកដែលបៀតបៀនទូលបង្គំ
និងបច្ចាមិត្តរបស់ទូលបង្គំមានគ្នាច្រើនណាស់
តែទូលបង្គំមិនងាកចេញពីដំបូន្មាន
របស់ព្រះអង្គឡើយ។
១៥៨ ពេលទូលបង្គំឃើញមនុស្សក្បត់
ទូលបង្គំទាស់ចិត្តខ្លាំងណាស់
ដ្បិតពួកគេមិនប្រព្រឹត្តតាមព្រះបន្ទូល
របស់ព្រះអង្គទេ។
១៥៩ ឱព្រះអម្ចាស់អើយ សូមជ្រាបថា
ទូលបង្គំស្រឡាញ់ច្បាប់របស់ព្រះអង្គ
សូមប្រទានឲ្យទូលបង្គំមានជីវិតឡើងវិញ
ដោយព្រះហឫទ័យមេត្តាករុណារបស់ព្រះអង្គ។
១៦០ គោលការណ៍នៃព្រះបន្ទូលរបស់ព្រះអង្គ
ជាសេចក្ដីពិត
ហើយការទាំងប៉ុន្មានដែលព្រះអង្គសម្រេច
ដោយសុចរិតនៅស្ថិតស្ថេររហូតតទៅ។
១៦១ ពួកមេដឹកនាំបៀតបៀនទូលបង្គំ
ដោយឥតមូលហេតុ
ប៉ុន្តែ មានតែព្រះបន្ទូលរបស់ព្រះអង្គប៉ុណ្ណោះ
ដែលធ្វើឲ្យទូលបង្គំភ័យខ្លាច!។
១៦២ ទូលបង្គំរីករាយនឹងព្រះបន្ទូលសន្យារបស់ព្រះអង្គ
ដូចជាគេរកឃើញកំណប់
ដ៏មានតម្លៃលើសលប់ដែរ។
១៦៣ ទូលបង្គំស្អប់ខ្ពើមការកុហកណាស់
តែទូលបង្គំស្រឡាញ់វិន័យរបស់ព្រះអង្គ។
១៦៤ ទូលបង្គំសរសើរតម្កើងព្រះអង្គមួយថ្ងៃប្រាំពីរដង
ព្រោះតែការសម្រេចដ៏សុចរិតរបស់ព្រះអង្គ។
១៦៥ អស់អ្នកដែលស្រឡាញ់វិន័យរបស់ព្រះអង្គ
នឹងបានសុខក្សេមក្សាន្ត
គ្មានអ្វីអាចធ្វើឲ្យគេជំពប់ដួលសោះឡើយ។
១៦៦ ឱព្រះអម្ចាស់អើយ ទូលបង្គំសង្ឃឹមរង់ចាំ
ព្រះអង្គសង្គ្រោះទូលបង្គំ
ទូលបង្គំប្រតិបត្តិតាមវិន័យរបស់ព្រះអង្គ។
១៦៧ ទូលបង្គំប្រព្រឹត្តតាមដំបូន្មានរបស់ព្រះអង្គ
ហើយទូលបង្គំស្រឡាញ់ដំបូន្មាននេះណាស់។
១៦៨ ទូលបង្គំប្រព្រឹត្តតាមច្បាប់
និងដំបូន្មានរបស់ព្រះអង្គ
ដ្បិតអ្វីៗដែលទូលបង្គំធ្វើ
ព្រះអង្គជ្រាបសព្វគ្រប់ទាំងអស់។
១៦៩ សូមឲ្យសម្រែករបស់ទូលបង្គំ
បានឮទៅដល់ព្រះអង្គ
សូមប្រទានប្រាជ្ញាមកទូលបង្គំ
តាមព្រះបន្ទូលសន្យារបស់ព្រះអង្គ។
១៧០ សូមឲ្យពាក្យទទូចអង្វររបស់ទូលបង្គំ
បានឮទៅដល់ព្រះអង្គ សូមរំដោះទូលបង្គំ
តាមព្រះបន្ទូលសន្យារបស់ព្រះអង្គផង!។
១៧១ ទូលបង្គំនឹងពោលពាក្យសរសើរតម្កើង
ព្រះអង្គឥតឈប់ឡើយ
ដ្បិតព្រះអង្គបានបង្រៀនទូលបង្គំ
ឲ្យស្គាល់វិន័យរបស់ព្រះអង្គ។
១៧២ ទូលបង្គំនឹងបន្លឺសំឡេងច្រៀងតម្កើង
ព្រះបន្ទូលសន្យារបស់ព្រះអង្គ
ដ្បិតវិន័យទាំងប៉ុន្មានរបស់
ព្រះអង្គសុទ្ធតែសុចរិត។
១៧៣ សូមសម្ដែងព្រះបារមីសង្គ្រោះទូលបង្គំ
ដ្បិតទូលបង្គំបានសម្រេចចិត្តធ្វើតាមច្បាប់
របស់ព្រះអង្គហើយ។
១៧៤ ឱព្រះអម្ចាស់អើយ
ទូលបង្គំប្រាថ្នាចង់ឃើញព្រះអង្គ
សង្គ្រោះទូលបង្គំណាស់
ទូលបង្គំពេញចិត្តនឹងវិន័យ
របស់ព្រះអង្គជាខ្លាំង។
១៧៥ សូមឲ្យទូលបង្គំរស់រានមានជីវិត
ដើម្បីសរសើរតម្កើងព្រះអង្គ!
សូមឲ្យព្រះបន្ទូលរបស់ព្រះអង្គ
ជួយលើកទឹកចិត្តទូលបង្គំ។
១៧៦ ទូលបង្គំនៅវិលវល់ប្រៀបបាននឹងចៀមវង្វេង
សូមយាងមករកទូលបង្គំ
ដែលជាអ្នកបម្រើរបស់ព្រះអង្គផង!
ដ្បិតទូលបង្គំមិនភ្លេចវិន័យ
របស់ព្រះអង្គឡើយ!
១២០
ខ្ញុំបានរស់នៅជាមួយអស់អ្នកដែលមិនចូលចិត្តសន្តិភាព
១ បទចម្រៀងសម្រាប់ឡើងទៅព្រះវិហារ។
នៅពេលមានអាសន្ន
ខ្ញុំស្រែកអង្វរព្រះអម្ចាស់
ហើយព្រះអង្គក៏ឆ្លើយតបមកខ្ញុំវិញ។
២ ឱព្រះអម្ចាស់អើយ
សូមរំដោះទូលបង្គំឲ្យរួចផុតពីមនុស្ស
ដែលពោលពាក្យកុហក និងបោកបញ្ឆោត!
៣ អ្នកនិយាយបោកបញ្ឆោតដូច្នេះ
តើបានទទួលអ្វីខ្លះ?
៤ គឺមានតែទទួលព្រួញរបស់អ្នកចម្បាំង
និងភ្លើងឆេះសន្ធោសន្ធៅតែប៉ុណ្ណោះ!
៥ ខ្ញុំស្នាក់នៅក្នុងស្រុករបស់មនុស្សកាចសាហាវ
ហើយរស់នៅក្នុងចំណោមមនុស្សព្រៃផ្សៃដូច្នេះ
វេទនាណាស់!
៦ ខ្ញុំបានរស់នៅជាមួយអស់អ្នកដែលមិនចូលចិត្ត
សន្តិភាព ជាយូរឆ្នាំកន្លងមកហើយ។
៧ ពេលខ្ញុំនិយាយពីសន្តិភាព
ពួកគេបែរជាប្រកាសសង្គ្រាមទៅវិញ។
១២១
តើមាននរណាជួយខ្ញុំឬទេ?
១ បទចម្រៀងសម្រាប់ឡើងទៅព្រះវិហារ។
ខ្ញុំងើបមុខឡើង សម្លឹងឆ្ពោះទៅរកភ្នំ
តើមាននរណាមកជួយខ្ញុំឬទេ?
២ គឺមានតែព្រះអម្ចាស់ដែលបានបង្កើតផ្ទៃមេឃ
និងផែនដីប៉ុណ្ណោះដែលនឹងយាងមកជួយខ្ញុំ។
៣ ព្រះអង្គមិនបណ្តោយឲ្យជើង
របស់អ្នកជំពប់ដួល
ព្រះអង្គនឹងថែរក្សាការពារអ្នក
ដោយឥតធ្វេសប្រហែស
៤ ព្រះអង្គដែលថែរក្សាការពារជនជាតិអ៊ីស្រាអែល
ព្រះអង្គនឹងមិនងោកងុយ មិនផ្ទំលក់សោះឡើយ។
៥ ព្រះអម្ចាស់នឹងថែរក្សាការពារអ្នក
ព្រះអម្ចាស់គង់នៅខាងស្តាំ ធ្វើជាម្លប់របស់អ្នក។
៦ នៅពេលថ្ងៃ ព្រះអាទិត្យនឹងមិនធ្វើទុក្ខអ្នកឡើយ
ហើយនៅពេលយប់
ព្រះច័ន្ទក៏នឹងមិនធ្វើទុក្ខអ្នកដែរ។
៧ ព្រះអម្ចាស់នឹងថែរក្សាការពារជីវិតអ្នក
កុំឲ្យការអាក្រក់ណាមួយ
កើតមានដល់អ្នកឡើយ។
៨ ព្រះអម្ចាស់ថែរក្សាអ្នកនៅពេលចេញដំណើរ
រហូតដល់ពេលត្រឡប់មកវិញ
ចាប់តាំងពីពេលនេះរហូតតរៀងទៅ។
១២២
សូមព្រះអម្ចាស់ប្រទានសន្តិភាពមកក្រុងយេរូសាឡឹម
១ បទចម្រៀងសម្រាប់ឡើងទៅព្រះវិហារ។
ទំនុករបស់ស្តេចដាវីឌ។
ខ្ញុំមានអំណរខ្លាំងណាស់
នៅពេលគេប្រាប់ខ្ញុំថា:
ចូរយើងនាំគ្នាទៅព្រះដំណាក់របស់ព្រះអម្ចាស់!។
២ ក្រុងយេរូសាឡឹមអើយ
យើងនាំគ្នាឈានជើងចូលមកដល់មាត់ទ្វារ
របស់អ្នកហើយ!
៣ យេរូសាឡឹមអើយ
អ្នកជាក្រុងមួយដែលសង់ឡើងយ៉ាងរឹងមាំ
និងមានកំពែងដ៏ល្អប្រណីតព័ទ្ធជុំវិញ។
៤ កុលសម្ព័ន្ធនានារបស់ព្រះអម្ចាស់
នាំគ្នាឡើងមកទីនេះ
ដើម្បីលើកតម្កើងព្រះនាមព្រះអម្ចាស់
តាមច្បាប់របស់ជនជាតិអ៊ីស្រាអែល។
៥ នៅទីនេះក៏មានបល្ល័ង្កនៃព្រះរាជវង្ស
របស់ស្តេចដាវីឌ
ដើម្បីគ្រប់គ្រងប្រជារាស្ដ្រ ដោយយុត្តិធម៌ដែរ។
៦ ចូរនាំគ្នាទូលសូមព្រះអម្ចាស់ប្រទានសន្តិភាព
មកក្រុងយេរូសាឡឹម
សូមឲ្យអស់អ្នកដែលស្រឡាញ់ក្រុងនេះ
អាចរស់នៅយ៉ាងសុខសាន្ត!
៧ សូមឲ្យអ្នកដែលរស់នៅខាងក្នុងកំពែងក្រុង
បានប្រកបដោយសេចក្ដីសុខ
សូមឲ្យវិមាននានានៅក្នុងក្រុង
បានសុខក្សេមក្សាន្ត។
៨ ដោយយល់ដល់បងប្អូន និងញាតិមិត្តរបស់ខ្ញុំ
ខ្ញុំពោលថា: សូមឲ្យក្រុងយេរូសាឡឹម
បានប្រកបដោយសេចក្ដីសុខសាន្ត!
៩ ដោយយល់ដល់ព្រះដំណាក់
របស់ព្រះជាអម្ចាស់នៃយើង
ខ្ញុំទូលសូមឲ្យអ្នកបានប្រកបដោយសុភមង្គល!
១២៣
ទូលបង្គំទន្ទឹងរង់ចាំព្រះអង្គ
១ បទចម្រៀងសម្រាប់ឡើងទៅព្រះវិហារ។
ឱព្រះអម្ចាស់ដែលគង់នៅ
ស្ថានបរមសុខអើយ
ទូលបង្គំងើបមុខឡើងសម្លឹងទៅរកព្រះអង្គ។
២ យើងខ្ញុំក៏សម្លឹងមើលព្រះជាអម្ចាស់នៃយើង
ហើយទន្ទឹងរង់ចាំព្រះអង្គប្រណីសន្ដោស
ដូចអ្នកបម្រើសម្លឹងមើលទៅដៃម្ចាស់របស់ខ្លួន
និងដូចស្ត្រីបម្រើសម្លឹងមើលទៅដៃម្ចាស់ស្រី
របស់ខ្លួនយ៉ាងនោះដែរ។
៣ ឱព្រះអម្ចាស់អើយ សូមប្រណីសន្ដោសយើងខ្ញុំ
សូមប្រណីសន្ដោសយើងខ្ញុំផង
ដ្បិតយើងខ្ញុំត្រូវគេប្រមាថខ្លាំងណាស់។
៤ យើងខ្ញុំពុំអាចទ្រាំទ្រ
នឹងការមើលងាយពីសំណាក់មនុស្សព្រហើន
ព្រមទាំងការប្រមាថពីសំណាក់មនុស្សវាយឫកខ្ពស់
បានទៀតឡើយ។
១២៤
ប្រសិនបើគ្មានព្រះអម្ចាស់នៅខាងយើង
១ បទចម្រៀងសម្រាប់ឡើងទៅព្រះវិហារ។
ទំនុករបស់ស្តេចដាវីឌ។
ប្រសិនបើគ្មានព្រះអម្ចាស់
នៅខាងយើងទេនោះ
- សូមឲ្យជនជាតិអ៊ីស្រាអែលពោលតាមថា: -
២ ប្រសិនបើគ្មានព្រះអម្ចាស់នៅខាងយើងទេនោះ
ពេលណាខ្មាំងសត្រូវក្រោកឡើងវាយប្រហារយើង
៣ ហើយពេលណាពួកគេមានកំហឹងជាខ្លាំង
មកលើយើង
ពួកគេមុខជាត្របាក់លេបយើងទាំងរស់មិនខាន
៤ យើងនឹងលិចលង់ក្នុងទឹកសមុទ្រ
ទឹកនឹងហូរនាំយើងទៅបាត់
៥ ហើយក៏នឹងមានទឹកកួចយ៉ាងខ្លាំងពន្លិចយើងដែរ។
៦ ក៏ប៉ុន្តែ សូមអរព្រះគុណព្រះអម្ចាស់
ដ្បិតព្រះអង្គពុំបានប្រគល់យើង
ទៅក្នុងកណ្ដាប់ដៃគេ
ដូចជារំពាដែលស្ថិតនៅក្នុងចង្កូម
របស់ពួកគេនោះឡើយ។
៧ យើងបានរួចជីវិត ដូចបក្សាបក្សី
គេចផុតពីលប់របស់ព្រាន
គឺលប់បានធ្លុះធ្លាយ ហើយយើងក៏រត់រួច។
៨ ព្រះអម្ចាស់ផ្ទាល់បានជួយយើង
ដោយព្រះនាមព្រះអង្គ
គឺព្រះអង្គដែលបានបង្កើតផ្ទៃមេឃ និងផែនដី។
១២៥
សូមសម្ដែងព្រះហឫទ័យសប្បុរស ចំពោះអស់អ្នកដែលមានចិត្តសប្បុរស
១ បទចម្រៀងសម្រាប់ឡើងទៅព្រះវិហារ។
អ្នកណាផ្ញើជីវិតលើព្រះអម្ចាស់
អ្នកនោះប្រៀបបាននឹងភ្នំស៊ីយ៉ូន
ដែលនៅស្ថិតស្ថេររហូត ឥតរង្គើសោះឡើយ។
២ ភ្នំនានានៅព័ទ្ធជុំវិញក្រុងយេរូសាឡឹមយ៉ាងណា
ព្រះអម្ចាស់ក៏គង់នៅជុំវិញប្រជារាស្ដ្ររបស់ព្រះអង្គ
តាំងពីពេលនេះ រហូតដល់អស់កល្បជានិច្ច
យ៉ាងនោះដែរ
៣ ដ្បិតមនុស្សអាក្រក់ពុំអាចគ្រប់គ្រង
លើទឹកដីរបស់មនុស្សសុចរិតទេ
ដូច្នេះ មនុស្សសុចរិតគ្មានចិត្តលំអៀងទៅ
ប្រព្រឹត្តអំពើទុច្ចរិតឡើយ។
៤ ព្រះអម្ចាស់អើយ សូមសម្ដែងព្រះហឫទ័យសប្បុរស
ចំពោះអស់អ្នកដែលមានចិត្តសប្បុរស
និងទៀងត្រង់។
៥ រីឯអស់អ្នកដែលប្រព្រឹត្តតាមមាគ៌ាដ៏វៀចវេរវិញ
សូមព្រះអម្ចាស់នាំគេយកទៅធ្វើទោសជាមួយ
អស់អ្នកដែលប្រព្រឹត្តអំពើទុច្ចរិតដែរ។
សូមឲ្យអ៊ីស្រាអែលបានប្រកប
ដោយសេចក្ដីសុខសាន្ត!។
១២៦
ព្រះអម្ចាស់បានធ្វើកិច្ចការដ៏អស្ចារ្យដែលនាំឲ្យយើងមានអំណរសប្បាយ
១ បទចម្រៀងសម្រាប់ឡើងទៅព្រះវិហារ។
ពេលព្រះអម្ចាស់នាំអស់អ្នក
ដែលជាប់ជាឈ្លើយ
ត្រឡប់មកក្រុងស៊ីយ៉ូនវិញ
យើងទាំងអស់គ្នាដូចជាយល់សប្ដិ។
២ យើងសើចសប្បាយជានិច្ច
យើងស្រែកជយឃោស
ពេលនោះ ក្នុងចំណោមប្រជាជាតិនានា
គេបានពោលថា:
«ព្រះអម្ចាស់បានធ្វើការដ៏អស្ចារ្យចំពោះពួកគេ!»។
៣ ព្រះអម្ចាស់ពិតជាបានធ្វើការដ៏អស្ចារ្យ
ចំពោះយើងមែន
ហេតុនេះហើយបានជាយើងមានអំណរសប្បាយ។
៤ ឱព្រះអម្ចាស់អើយ សូមប្រោសប្រទានឲ្យ
យើងខ្ញុំបានចម្រុងចម្រើនឡើងវិញ
ដូចវាលរហោស្ថានដ៏ហួតហែង
មានទឹកហូរឡើងវិញយ៉ាងនោះដែរ។
៥ អ្នកណាសាបព្រោះទាំងទឹកភ្នែក
អ្នកនោះនឹងច្រូតយកផលយ៉ាងសប្បាយ។
៦ អ្នកណាយកគ្រាប់ពូជចេញទៅព្រោះទាំងយំសោក
អ្នកនោះនឹងកាន់កណ្ដាប់ស្រូវត្រឡប់មកវិញ
ទាំងស្រែកហ៊ោដោយអំណរ។
១២៧
ប្រសិនបើព្រះអម្ចាស់មិនសង់ផ្ទះ
១ បទចម្រៀងសម្រាប់ឡើងទៅព្រះវិហារ។
ទំនុករបស់ស្តេចសាឡូម៉ូន។
ប្រសិនបើព្រះអម្ចាស់
មិនសង់ផ្ទះទេនោះ
អស់អ្នកដែលសង់ផ្ទះនឹងខំប្រឹងសង់
ដោយឥតបានផលអ្វីឡើយ!
ប្រសិនបើព្រះអម្ចាស់មិនថែរក្សាទីក្រុងទេនោះ
អ្នកយាមទីក្រុងនឹងខំប្រឹងយាម
ដោយឥតបានផលអ្វីឡើយ!
២ អ្នករាល់គ្នាក្រោកឡើងតាំងពីព្រលឹម
ខំប្រឹងរកស៊ីចិញ្ចឹមជីវិតទាំងពិបាក
រហូតដល់យប់ជ្រៅ តែឥតបានផលអ្វីឡើយ
ដ្បិតព្រះអម្ចាស់ប្រទានអាហារដល់អស់អ្នក
ដែលព្រះអង្គស្រឡាញ់
ក្នុងពេលដែលគេកំពុងតែដេកលក់។
៣ កូនចៅជាកេរមត៌កដែលព្រះអម្ចាស់ប្រទានឲ្យ
និងជាព្រះពរមកពីព្រះអង្គ។
៤ កូនប្រុសៗដែលកើតមកក្នុងពេល
ដែលឪពុកនៅក្មេងនៅឡើយ
ប្រៀបបាននឹងព្រួញរបស់អ្នកចម្បាំងដូច្នោះដែរ។
៥ អ្នកណាមានកូនប្រុសច្រើន ដូចព្រួញ
ពេញក្នុងបំពង់ អ្នកនោះមានសុភមង្គលហើយ
ដ្បិតពេលណាគេត្រូវតយុទ្ធជាមួយបច្ចាមិត្ត
នៅមាត់ទ្វារក្រុង
គេនឹងមិនត្រូវខ្មាសសោះឡើយ។
១២៨
សុភមង្គលរបស់អ្នកគោរពកោតខ្លាចព្រះអម្ចាស់
១ បទចម្រៀងសម្រាប់ឡើងទៅព្រះវិហារ។
អ្នកណាគោរព
កោតខ្លាចព្រះអម្ចាស់
ហើយដើរតាមមាគ៌ារបស់ព្រះអង្គ
អ្នកនោះមានសុភមង្គលហើយ!
២ អ្នកនឹងទទួលផលពីកិច្ចការដែលអ្នកបានធ្វើ
អ្នកនឹងមានសុភមង្គល ហើយចម្រុងចម្រើន
៣ នៅក្នុងផ្ទះ ភរិយារបស់អ្នកប្រៀបដូចជាដើម
ទំពាំងបាយជូរដែលមានផ្លែជាច្រើន
ហើយនៅជុំវិញតុ កូនប្រុសៗរបស់អ្នក
ក៏ប្រៀបបាននឹងដើមអូលីវតូចៗដែរ។
៤ អ្នកដែលគោរពកោតខ្លាចព្រះអម្ចាស់
នឹងទទួលព្រះពរបែបនេះ។
៥ សូមព្រះអម្ចាស់ប្រទានពរឲ្យអ្នក ពីភ្នំស៊ីយ៉ូន
ហើយរៀងរាល់ថ្ងៃក្នុងជីវិតអ្នក
អ្នកនឹងឃើញសុភមង្គលរបស់ក្រុងយេរូសាឡឹម
៦ អ្នកក៏នឹងឃើញចៅរបស់អ្នកដែរ។
សូមឲ្យអ៊ីស្រាអែល
បានប្រកបដោយសេចក្ដីសុខសាន្ត!
១២៩
ពួកគេនាំគ្នាភ្ជួររាស់នៅលើខ្នងខ្ញុំ
១ បទចម្រៀងសម្រាប់ឡើងទៅព្រះវិហារ។
គេតែងតែនាំគ្នាធ្វើបាបខ្ញុំ
តាំងពីខ្ញុំនៅក្មេង
-សូមឲ្យជនជាតិអ៊ីស្រាអែលពោលតាមថា-
២ គេតែងតែនាំគ្នាធ្វើបាបខ្ញុំតាំងពីខ្ញុំនៅក្មេង
ប៉ុន្តែ គេពុំអាចយកជ័យជម្នះលើខ្ញុំបានឡើយ។
៣ គេនាំគ្នាភ្ជួររាស់នៅលើខ្នងខ្ញុំ
គេបានធ្វើគន្លងយ៉ាងវែង។
៤ ប៉ុន្តែ ព្រះអម្ចាស់មានព្រះហឫទ័យសុចរិត
ព្រះអង្គបានស្រាយចំណងរបស់មនុស្សអាក្រក់ចេញពីខ្ញុំ។
៥ សូមឲ្យអស់អ្នកដែលស្អប់ក្រុងស៊ីយ៉ូន
ត្រូវអាម៉ាស់ និងដកខ្លួនថយ!
៦ សូមឲ្យពួកគេបានដូចស្មៅដែលដុះ
ហើយក្រៀមស្ងួតទៅ មុនពេលលូតលាស់ធំឡើង!
៧ សូម្បីគេច្រូតស្មៅនោះ ក៏ក្តាប់មិនពេញដៃ
ហើយក៏ពុំមានល្មមសម្រាប់ឲ្យ
ចងជាកណ្ដាប់បានដែរ។
៨ សូមកុំឲ្យអស់អ្នកដែលដើរកាត់តាមនោះ
ពោលទៅពួកគេថា: «សូមព្រះអម្ចាស់ប្រទានពរ
អ្នករាល់គ្នា» សោះឡើយ។
យើងសូមជូនពរអ្នករាល់គ្នា
ក្នុងព្រះនាមព្រះអម្ចាស់!
១៣០
ពីក្នុងរណ្ដៅដ៏ជ្រៅ ទូលបង្គំស្រែកអង្វរព្រះអង្គ
១ បទចម្រៀងសម្រាប់ឡើងទៅព្រះវិហារ។
ឱព្រះអម្ចាស់អើយ ពីក្នុងរណ្ដៅដ៏ជ្រៅ
ទូលបង្គំស្រែកអង្វរព្រះអង្គ
២ ព្រះអម្ចាស់អើយ
សូមព្រះអង្គព្រះសណ្ដាប់ទូលបង្គំផង!
សូមផ្ទៀងព្រះកាណ៌ស្ដាប់ពាក្យ
ដែលទូលបង្គំទទូចអង្វរ!
៣ ឱព្រះអម្ចាស់អើយ
ប្រសិនបើព្រះអង្គចងចាំកំហុស
របស់យើងខ្ញុំទុកនោះ
គ្មាននរណាម្នាក់អាចរួចខ្លួនឡើយ។
៤ ប៉ុន្តែ ព្រះអង្គតែងតែអត់ទោសឲ្យយើងខ្ញុំជានិច្ច
ដើម្បីឲ្យយើងខ្ញុំគោរពកោតខ្លាចព្រះអង្គ។
៥ ខ្ញុំទុកចិត្តលើព្រះអម្ចាស់
ផ្ញើជីវិតលើព្រះអង្គទាំងស្រុង
ហើយខ្ញុំសង្ឃឹមលើព្រះបន្ទូលរបស់ព្រះអង្គ។
៦ ខ្ញុំទន្ទឹងរង់ចាំព្រះអម្ចាស់
ជាងអ្នកយាមរង់ចាំពេលព្រឹកទៅទៀត
ពិតមែនហើយ ខ្ញុំរង់ចាំព្រះអង្គជាងអ្នកយាម
រង់ចាំពេលព្រឹកទៅទៀត។
៧ អ៊ីស្រាអែលអើយ ចូរទុកចិត្តលើព្រះអម្ចាស់
ដ្បិតព្រះអង្គប្រកបដោយ
ព្រះហឫទ័យមេត្តាករុណា
ហើយព្រះអង្គសព្វព្រះហឫទ័យរំដោះអ្នកជានិច្ច!
៨ ព្រះអង្គនឹងរំដោះអ៊ីស្រាអែល
ឲ្យរួចពីកំហុសទាំងប៉ុន្មាន
ដែលគេបានប្រព្រឹត្ត។
១៣១
ទូលបង្គំមានចិត្តស្ងប់
១ បទចម្រៀងសម្រាប់ឡើងទៅព្រះវិហារ។
ទំនុករបស់ស្តេចដាវីឌ។
ឱព្រះអម្ចាស់អើយ
ទូលបង្គំគ្មានចិត្តអំនួត
ឬវាយឫកខ្ពស់ទេ
ទូលបង្គំមិនប្រាថ្នាចង់បានអ្វីដែលធំអស្ចារ្យ
ហួសពីសមត្ថភាពរបស់ទូលបង្គំឡើយ។
២ ផ្ទុយទៅវិញ ទូលបង្គំសុខចិត្តនៅស្ងៀមស្ងាត់
ទូលបង្គំមានចិត្តស្ងប់
ដូចកូនក្មេងនៅជាប់នឹងទ្រូងម្ដាយ
គឺទូលបង្គំបានស្កប់ចិត្តដូចកូនក្មេងស្កប់ចិត្ត
នៅជិតម្ដាយយ៉ាងនោះដែរ។
៣ អ៊ីស្រាអែលអើយ ចូរទុកចិត្តលើព្រះអម្ចាស់
តាំងពីពេលនេះរហូតដល់អស់កល្បជានិច្ច!
១៣២
ក្រុងស៊ីយ៉ូនជាព្រះដំណាក់របស់ព្រះអម្ចាស់ ជាវាំងរបស់ស្តេចដាវីឌ
១ បទចម្រៀងសម្រាប់ឡើងទៅព្រះវិហារ។
ឱព្រះអម្ចាស់អើយ សូមនឹកដល់ព្រះបាទដាវីឌ
និងការនឿយហត់ទាំងប៉ុន្មានរបស់ព្រះរាជាផង។
២ ព្រះរាជាបានស្បថជាមួយព្រះអម្ចាស់
គឺព្រះអង្គបានសន្យាជាមួយព្រះដ៏មានចេស្ដា
របស់លោកយ៉ាកុបថា:
៣ «ទូលបង្គំនឹងមិនចូលទៅជ្រកនៅក្នុងពន្លាទូលបង្គំ
ទូលបង្គំនឹងមិនឡើងទៅដេក
នៅលើគ្រែទូលបង្គំទេ។
៤ ទូលបង្គំមិនព្រមបិទភ្នែក
ទូលបង្គំមិនព្រមទទួលទានដំណេកលង់លក់ឡើយ
៥ ដរាបណាទូលបង្គំពុំទាន់រកបាន
កន្លែងថ្វាយព្រះអម្ចាស់
ដរាបណាទូលបង្គំពុំទាន់រកបាន
ព្រះដំណាក់ថ្វាយព្រះដ៏មានចេស្ដា
របស់លោកយ៉ាកុបទេនោះ!»។
៦ យើងបានឮគេនិយាយថា
ហិបនៃសម្ពន្ធមេត្រីស្ថិតនៅឯភូមិអេប្រាតា
យើងក៏បានរកឃើញហិបនេះនៅតំបន់យ៉ាអារ។
៧ ចូរយើងនាំគ្នាចូលទៅក្នុង
ព្រះដំណាក់របស់ព្រះអម្ចាស់
ចូរយើងក្រាបនៅទៀបព្រះបាទារបស់ព្រះអង្គ!
៨ ឱព្រះអម្ចាស់អើយ សូមក្រោកឡើង
សូមយាងមកជាមួយហិប*នៃឫទ្ធានុភាព
របស់ព្រះអង្គ ហើយគង់នៅក្នុងទីសម្រាក
របស់ព្រះអង្គរហូតតទៅ។
៩ សូមឲ្យពួកបូជាចារ្យរបស់ព្រះអង្គ
ប្រព្រឹត្តអំពើសុចរិតជានិច្ច
ហើយឲ្យប្រជារាស្ដ្ររបស់ព្រះអង្គ
ស្រែកហ៊ោឡើងយ៉ាងសប្បាយ!
១០ ដោយយល់ដល់ព្រះបាទដាវីឌ
ជាអ្នកបម្រើរបស់ព្រះអង្គ
សូមកុំបោះបង់ចោលស្តេចដែលព្រះអង្គ
បានចាក់ប្រេងអភិសេកនេះឡើយ!
១១ ព្រះអម្ចាស់មានព្រះបន្ទូលសន្យាជាមួយ
ព្រះបាទដាវីឌ ដោយឥតប្រែប្រួលថា:
«យើងនឹងតែងតាំងពូជពង្សរបស់អ្នក
ឲ្យឡើងគ្រងរាជ្យបន្តពីអ្នក។
១២ ប្រសិនបើបុត្ររបស់អ្នក
កាន់តាមសម្ពន្ធមេត្រីរបស់យើងតៗគ្នា
ហើយប្រតិបត្តិតាមដំបូន្មាន
ដែលយើងប្រៀនប្រដៅ
ពូជពង្សរបស់គេក៏នឹងឡើងគ្រងរាជសម្បត្តិ
របស់អ្នករហូតតរៀងទៅដែរ»។
១៣ ព្រះអម្ចាស់បានជ្រើសរើសក្រុងស៊ីយ៉ូន
ព្រះអង្គសព្វព្រះហឫទ័យគង់នៅក្នុងក្រុងនេះ។
១៤ ព្រះអង្គមានព្រះបន្ទូលថា
«យើងនឹងសម្រាកនៅទីនេះរហូតតទៅ
យើងចង់រស់នៅក្នុងកន្លែងនេះណាស់!
១៥ យើងនឹងឲ្យពរក្រុងនេះមានអ្វីៗ
តាមតែគេត្រូវការ យើងនឹងឲ្យជនក្រីក្រ
ក្នុងក្រុងនេះ មានអាហារបរិបូណ៌។
១៦ យើងនឹងសង្គ្រោះក្រុងនេះ
តាមរយៈពួកបូជាចារ្យរបស់គេ
យើងនឹងឲ្យប្រជាជននៅក្រុងនេះ
ស្រែកហ៊ោដោយអំណរ។
១៧ នៅទីនេះ យើងនឹងធ្វើឲ្យមានស្តេច
ប្រកបដោយឫទ្ធានុភាពកើតពី
ពូជពង្សរបស់ដាវីឌ
យើងនឹងរៀបចំឲ្យមានស្តេច
មួយអង្គស្នងរាជ្យ
ជំនួសស្តេចដែលយើងបានចាក់ប្រេងអភិសេក។
១៨ យើងនឹងធ្វើឲ្យខ្មាំងសត្រូវរបស់គេ
ត្រូវអាម៉ាស់មុខជាខ្លាំង
តែយើងនឹងឲ្យរាជ្យរបស់គេ
បានថ្កុំថ្កើងរុងរឿង»។
១៣៣
ពេលបងប្អូននៅរស់ជុំគ្នា
១ បទចម្រៀងសម្រាប់ឡើងទៅព្រះវិហារ។
ទំនុករបស់ស្តេចដាវីឌ។
ការដែលបងប្អូននៅរួមរស់ជាមួយគ្នា
គឺជាការល្អប្រពៃ និងសប្បាយក្រៃលែង។
២ គឺប្រៀបដូចជាទឹកអប់ដ៏មានតម្លៃ
ហូរនៅលើក្បាល
ចុះមកលើពុកចង្ការបស់លោកអរ៉ុន
រួចស្រក់ទៅលើជាយអាវរបស់លោក
៣ ហើយប្រៀបដូចជាទឹកសន្សើមធ្លាក់
ពីភ្នំហ៊ែរម៉ូន មកលើភ្នំស៊ីយ៉ូន
ជាកន្លែងដែលព្រះអម្ចាស់ប្រទានព្រះពរ
និងប្រទានជីវិតអស់កល្បជានិច្ច។
១៣៤
ចូរលើកដៃប្រណម្យទៅរកទីសក្ការៈ
១ បទចម្រៀងសម្រាប់ឡើងទៅព្រះវិហារ។
អស់អ្នកដែលបម្រើព្រះអម្ចាស់
ហើយស្ថិតនៅក្នុងព្រះដំណាក់
របស់ព្រះអង្គនាពេលយប់អើយ
ចូរនាំគ្នាមកសរសើរតម្កើងព្រះអម្ចាស់!
២ ចូរលើកដៃប្រណម្យទៅរកទីសក្ការៈ
ចូរសរសើរតម្កើងព្រះអម្ចាស់!
៣ សូមព្រះអម្ចាស់ដែលបានបង្កើតផ្ទៃមេឃ
និងផែនដី
ប្រទានពរដល់អ្នកពីក្រុងស៊ីយ៉ូន!។
១៣៥
ខ្ញុំដឹងច្បាស់ថាព្រះអម្ចាស់ជាព្រះដ៏ឧត្តុង្គឧត្ដម
១ ហាលេលូយ៉ា!
ចូរសរសើរតម្កើង
ព្រះនាមព្រះអម្ចាស់!
អ្នកបម្រើរបស់ព្រះអម្ចាស់អើយ
ចូរនាំគ្នាសរសើរតម្កើងព្រះអង្គ!
២ អ្នករាល់គ្នាដែលស្ថិតនៅក្នុង
ព្រះដំណាក់របស់ព្រះអម្ចាស់
អ្នករាល់គ្នាដែលស្ថិតនៅក្នុងបរិវេណ
ព្រះដំណាក់របស់ព្រះនៃយើងអើយ
៣ ចូរនាំគ្នាសរសើរតម្កើងព្រះអម្ចាស់
ដ្បិតព្រះអង្គមានព្រះហឫទ័យសប្បុរស
ចូរស្មូត្រទំនុកតម្កើងថ្វាយព្រះនាមព្រះអង្គ
ដ្បិតព្រះអង្គគាប់ព្រះហឫទ័យនឹងយើង។
៤ ព្រះអម្ចាស់បានជ្រើសរើសពូជពង្សលោកយ៉ាកុប
ហើយព្រះអង្គយកជនជាតិអ៊ីស្រាអែល
ធ្វើជាប្រជាជនផ្ទាល់របស់ព្រះអង្គ។
៥ ខ្ញុំដឹងច្បាស់ថា ព្រះអម្ចាស់ជាព្រះដ៏ឧត្តុង្គឧត្ដម
ព្រះអម្ចាស់របស់យើង
ព្រះអង្គប្រសើរលើសព្រះទាំងប៉ុន្មាន។
៦ បើព្រះអម្ចាស់សព្វព្រះហឫទ័យធ្វើការអ្វី
ព្រះអង្គនឹងសម្រេចការនោះ
នៅលើផ្ទៃមេឃ និងផែនដី នៅក្នុងសមុទ្រ
និងនៅក្នុងទីជម្រៅនៃបាតសមុទ្រ។
៧ ព្រះអង្គនាំពពកចេញពីជើងមេឃ
ព្រះអង្គធ្វើឲ្យមានផ្លេកបន្ទោរ
ដើម្បីឲ្យភ្លៀងធ្លាក់
ហើយព្រះអង្គក៏បានបញ្ចេញខ្យល់
ឲ្យបក់បោកមកដែរ។
៨ ព្រះអង្គបានប្រហារកូនច្បងទាំងឡាយ
នៅស្រុកអេស៊ីប
គឺចាប់តាំងពីមនុស្ស រហូតដល់សត្វពាហនៈ។
៩ ព្រះអង្គសម្ដែងទីសម្គាល់
និងឫទ្ធិបាដិហារិយ៍ផ្សេងៗ
នៅស្រុកអេស៊ីប
ដើម្បីដាក់ទោសព្រះចៅផារ៉ោន
និងមន្ត្រីទាំងប៉ុន្មានរបស់ស្តេច។
១០ ព្រះអង្គបានវាយប្រហារប្រជាជាតិជាច្រើន
ព្រះអង្គបានប្រហារជីវិតស្តេចដ៏ខ្លាំងពូកែ
១១ គឺព្រះបាទស៊ីហុនជាស្តេចស្រុកអាម៉ូរី
ព្រះបាទអុកជាស្តេចស្រុកបាសាន
និងស្តេចទាំងប៉ុន្មានរបស់ជនជាតិកាណាន
១២ ហើយព្រះអង្គប្រគល់ទឹកដីរបស់ពួកគេ
ឲ្យអ៊ីស្រាអែលជាប្រជារាស្ត្ររបស់ព្រះអង្គ
ទុកជាមត៌ក។
១៣ ឱព្រះអម្ចាស់អើយ ព្រះនាមរបស់ព្រះអង្គ
នៅគង់វង្សរហូតតទៅ
ឱព្រះអម្ចាស់អើយ ព្រះកិត្តិនាមរបស់ព្រះអង្គ
ល្បីល្បាញអស់កល្បជាអង្វែងតរៀងទៅ
១៤ ដ្បិតព្រះអង្គរកយុត្តិធម៌ឲ្យ
ប្រជារាស្ដ្ររបស់ព្រះអង្គ
ហើយព្រះអង្គអាណិតអាសូរអ្នកបម្រើ
របស់ព្រះអង្គ។
១៥ ព្រះរបស់ប្រជាជាតិនានា
សុទ្ធតែជាព្រះក្លែងក្លាយធ្វើពីមាស ពីប្រាក់
ដែលជាស្នាដៃរបស់មនុស្ស។
១៦ ព្រះទាំងនោះមានមាត់តែមិនចេះនិយាយ
មានភ្នែកតែមើលមិនឃើញ
១៧ មានត្រចៀក តែស្ដាប់មិនឮ
ព្រះទាំងនោះគ្មានដង្ហើមចេញចូលទេ។
១៨ សូមឲ្យអស់អ្នកដែលបានសូន
ធ្វើរូបព្រះក្លែងក្លាយ
ហើយដែលផ្ញើជីវិតលើព្រះទាំងនោះ
បានដូចរូបព្រះទាំងនោះដែរ។
១៩ ជនជាតិអ៊ីស្រាអែលអើយ
ចូរសរសើរតម្កើងព្រះអម្ចាស់
ក្រុមគ្រួសាររបស់លោកអរ៉ុនអើយ
ចូរសរសើរតម្កើងព្រះអម្ចាស់
២០ ក្រុមគ្រួសាររបស់លោកលេវីអើយ
ចូរសរសើរតម្កើងព្រះអម្ចាស់
អស់អ្នកដែលគោរពកោតខ្លាចព្រះអម្ចាស់អើយ
ចូរសរសើរតម្កើងព្រះអង្គ!
២១ ចូរសរសើរតម្កើងព្រះអម្ចាស់ដែលគង់នៅភ្នំស៊ីយ៉ូន
គឺព្រះអង្គដែលគង់នៅក្រុងយេរូសាឡឹម!
ហាលេលូយ៉ា!
១៣៦
ព្រះហឫទ័យមេត្តាករុណារបស់ព្រះអង្គនៅស្ថិតស្ថេររហូតតទៅ!
១ ចូរលើកតម្កើងព្រះអម្ចាស់
ដ្បិតព្រះអង្គមាន
ព្រះហឫទ័យសប្បុរស
ព្រះហឫទ័យមេត្តាករុណារបស់ព្រះអង្គ
នៅស្ថិតស្ថេររហូតតទៅ!
២ ចូរលើកតម្កើងព្រះដែលខ្ពង់ខ្ពស់លើសព្រះនានា
ដ្បិតព្រះហឫទ័យមេត្តាករុណារបស់ព្រះអង្គ
នៅស្ថិតស្ថេររហូតតទៅ!
៣ ចូរសរសើរតម្កើងព្រះអម្ចាស់
ដែលខ្ពង់ខ្ពស់លើសអម្ចាស់នានា
ដ្បិតព្រះហឫទ័យមេត្តាករុណារបស់ព្រះអង្គ
នៅស្ថិតស្ថេររហូតតទៅ!
៤ មានតែព្រះអង្គទេដែលធ្វើការអស្ចារ្យ
ដ៏ឧត្តុង្គឧត្ដមបំផុត
ដ្បិតព្រះហឫទ័យមេត្តាករុណារបស់ព្រះអង្គ
នៅស្ថិតស្ថេររហូតតទៅ!
៥ ព្រះអង្គបានបង្កើតផ្ទៃមេឃ
ដោយព្រះប្រាជ្ញាញាណ
ដ្បិតព្រះហឫទ័យមេត្តាករុណារបស់ព្រះអង្គ
នៅស្ថិតស្ថេររហូតតទៅ!
៦ ព្រះអង្គបានលាតសន្ធឹងផែនដីពីលើផ្ទៃទឹក
ដ្បិតព្រះហឫទ័យមេត្តាករុណារបស់ព្រះអង្គ
នៅស្ថិតស្ថេររហូតតទៅ!
៧ ព្រះអង្គបានបង្កើតដុំពន្លឺធំៗ សម្រាប់រះបំភ្លឺ
ដ្បិតព្រះហឫទ័យមេត្តាករុណារបស់ព្រះអង្គ
នៅស្ថិតស្ថេររហូតតទៅ!
៨ គឺព្រះអាទិត្យឲ្យគ្រប់គ្រងនៅពេលថ្ងៃ
ដ្បិតព្រះហឫទ័យមេត្តាករុណារបស់ព្រះអង្គ
នៅស្ថិតស្ថេររហូតតទៅ!
៩ ព្រះច័ន្ទ និងហ្វូងតារា
ឲ្យគ្រប់គ្រងនៅពេលយប់
ដ្បិតព្រះហឫទ័យមេត្តាករុណារបស់ព្រះអង្គ
នៅស្ថិតស្ថេររហូតតទៅ!
១០ ព្រះអង្គប្រហារជីវិតកូនច្បងរបស់ជនជាតិអេស៊ីប
ដ្បិតព្រះហឫទ័យមេត្តាករុណារបស់ព្រះអង្គ
នៅស្ថិតស្ថេររហូតតទៅ!
១១ ព្រះអង្គនាំជនជាតិអ៊ីស្រាអែល
ចេញពីស្រុកអេស៊ីប
ដ្បិតព្រះហឫទ័យមេត្តាករុណារបស់ព្រះអង្គ
នៅស្ថិតស្ថេររហូតតទៅ!
១២ ដោយឫទ្ធិបារមី និងតេជានុភាពរបស់ព្រះអង្គ
ដ្បិតព្រះហឫទ័យមេត្តាករុណារបស់ព្រះអង្គ
នៅស្ថិតស្ថេររហូតតទៅ!
១៣ ព្រះអង្គបានញែកសមុទ្រកក់ចេញជាពីរ
ដ្បិតព្រះហឫទ័យមេត្តាករុណារបស់ព្រះអង្គ
នៅស្ថិតស្ថេររហូតតទៅ!
១៤ ព្រះអង្គបាននាំជនជាតិអ៊ីស្រាអែល
ដើរកាត់បាតសមុទ្រនោះ
ដ្បិតព្រះហឫទ័យមេត្តាករុណារបស់ព្រះអង្គ
នៅស្ថិតស្ថេររហូតតទៅ!
១៥ ព្រះអង្គធ្វើឲ្យព្រះចៅផារ៉ោន
និងកងទ័ពរបស់ស្តេចលិចលង់
ក្នុងសមុទ្រកក់នោះ
ដ្បិតព្រះហឫទ័យមេត្តាករុណារបស់ព្រះអង្គ
នៅស្ថិតស្ថេររហូតតទៅ!
១៦ ព្រះអង្គដឹកនាំប្រជារាស្ដ្ររបស់ព្រះអង្គ
នៅវាលរហោស្ថាន
ដ្បិតព្រះហឫទ័យមេត្តាករុណារបស់ព្រះអង្គ
នៅស្ថិតស្ថេររហូតតទៅ!
១៧ ព្រះអង្គបានវាយប្រហារស្តេចមហាអំណាច
ដ្បិតព្រះហឫទ័យមេត្តាករុណារបស់ព្រះអង្គ
នៅស្ថិតស្ថេររហូតតទៅ!
១៨ ព្រះអង្គប្រហារជីវិតស្តេចដ៏ខ្លាំងពូកែទាំងឡាយ
ដ្បិតព្រះហឫទ័យមេត្តាករុណារបស់ព្រះអង្គ
នៅស្ថិតស្ថេររហូតតទៅ!
១៩ គឺព្រះបាទស៊ីហុន ជាស្តេចរបស់ជនជាតិអាម៉ូរី
ដ្បិតព្រះហឫទ័យមេត្តាករុណារបស់ព្រះអង្គ
នៅស្ថិតស្ថេររហូតតទៅ!
២០ ព្រះបាទអុកជាស្តេចស្រុកបាសាន
ដ្បិតព្រះហឫទ័យមេត្តាករុណារបស់ព្រះអង្គ
នៅស្ថិតស្ថេររហូតតទៅ!
២១ ហើយព្រះអង្គប្រគល់ទឹកដីរបស់ពួកគេ
មកឲ្យប្រជារាស្ដ្ររបស់ព្រះអង្គទុកជាមត៌ក
ដ្បិតព្រះហឫទ័យមេត្តាករុណារបស់ព្រះអង្គ
នៅស្ថិតស្ថេររហូតតទៅ!
២២ គឺប្រគល់ឲ្យជនជាតិអ៊ីស្រាអែល
ជាអ្នកបម្រើរបស់ព្រះអង្គ
ដ្បិតព្រះហឫទ័យមេត្តាករុណារបស់ព្រះអង្គ
នៅស្ថិតស្ថេររហូតតទៅ!
២៣ នៅពេលណាយើងរងទុក្ខវេទនា
ព្រះអង្គតែងតែនឹកដល់យើង
ដ្បិតព្រះហឫទ័យមេត្តាករុណារបស់ព្រះអង្គ
នៅស្ថិតស្ថេររហូតតទៅ!
២៤ ព្រះអង្គរំដោះយើងឲ្យរួចផុតពីកណ្ដាប់ដៃ
របស់បច្ចាមិត្ត
ដ្បិតព្រះហឫទ័យមេត្តាករុណារបស់ព្រះអង្គ
នៅស្ថិតស្ថេររហូតតទៅ!
២៥ ព្រះអង្គប្រទានអាហារដល់សត្វលោកទាំងឡាយ
ដ្បិតព្រះហឫទ័យមេត្តាករុណារបស់ព្រះអង្គ
នៅស្ថិតស្ថេររហូតតទៅ!
២៦ ចូរលើកតម្កើងព្រះជាម្ចាស់នៃស្ថានបរមសុខ
ដ្បិតព្រះហឫទ័យមេត្តាករុណារបស់ព្រះអង្គ
នៅស្ថិតស្ថេររហូតតទៅ!
១៣៧
យើងស្រណោះក្រុងស៊ីយ៉ូន
១ យើងអង្គុយនៅមាត់ទន្លេ ស្រុកបាប៊ីឡូន
ហើយយើងនាំគ្នាយំស្រណោះក្រុងស៊ីយ៉ូន។
២ យើងព្យួរពិណរបស់យើងនឹងដើមឈើ
នៅជិតមាត់ទន្លេ។
៣ ពេលនោះ ពួកអ្នកដែលចាប់យើងមកជាឈ្លើយ
សឹកបានសុំឲ្យយើងច្រៀង
ពួកអ្នកធ្វើទោសយើង បានសុំឲ្យយើង
ច្រៀងបទសប្បាយ គេពោលថា:
«ចូរនាំគ្នាច្រៀងបទខ្លះពីក្រុងស៊ីយ៉ូន
ឲ្យយើងស្ដាប់ផង!»។
៤ តើឲ្យយើងយកបទតម្កើងព្រះអម្ចាស់
មកច្រៀងនៅលើទឹកដីបរទេសដូចម្ដេចកើត?
៥ ឱក្រុងយេរូសាឡឹមអើយ
បើខ្ញុំភ្លេចអ្នក សូមឲ្យដៃស្តាំរបស់ខ្ញុំស្ពឹកចុះ!
៦ ប្រសិនបើខ្ញុំមិននឹកដល់អ្នកទេ
ហើយប្រសិនបើខ្ញុំមិនចាត់ទុកអ្នកជាអំណរ
ដ៏ខ្លាំងក្លាបំផុតរបស់ខ្ញុំទេនោះ
សូមឲ្យអណ្ដាតខ្ញុំរឹងទៅចុះ!
៧ ឱព្រះអម្ចាស់អើយ សូមកុំភ្លេចនូវអំពើ
ដែលជនជាតិអេដុម
បានប្រព្រឹត្តចំពោះយើងខ្ញុំ
នៅថ្ងៃដែលក្រុងយេរូសាឡឹមរលំនោះឡើយ
គឺពួកគេពោលថា: «ចូរកម្ទេចក្រុងនេះទៅ!
ចូរកម្ទេចក្រុងនេះរហូតដល់គ្រឹះ!»។
៨ រីឯក្រុងបាប៊ីឡូនវិញបន្តិចទៀត
ឯងក៏នឹងត្រូវគេបំផ្លាញខ្ទេចខ្ទីដែរ!
អ្នកណាធ្វើបាបឯង
តបស្នងនឹងអំពើដែលឯងបានប្រព្រឹត្តចំពោះយើង
អ្នកនោះមានសុភមង្គលហើយ!
៩ អ្នកណាចាប់កូនតូចៗរបស់ឯងបោកនឹងថ្ម
អ្នកនោះមានសុភមង្គលហើយ!
១៣៨
ទូលបង្គំសូមលើកតម្កើងព្រះអង្គយ៉ាងអស់ពីចិត្ត
១ ទំនុករបស់ស្តេចដាវីឌ។
ទូលបង្គំសូមលើកតម្កើងព្រះអង្គ
យ៉ាងអស់ពីចិត្ត
ទូលបង្គំស្មូត្រទំនុកតម្កើងថ្វាយព្រះអង្គ
នៅចំពោះមុខពពួកទេវទូត។
២ ទូលបង្គំក្រាបនៅក្នុងព្រះវិហារដ៏វិសុទ្ធ
របស់ព្រះអង្គ
ហើយទូលបង្គំលើកតម្កើងព្រះនាមព្រះអង្គ
ព្រោះព្រះអង្គប្រកបដោយព្រះហឫទ័យ
មេត្តាករុណាយ៉ាងស្មោះស្ម័គ្រ
ហើយព្រះអង្គសម្រេចតាមព្រះបន្ទូលសន្យា
លើសពីការទន្ទឹងរង់ចាំរបស់យើងខ្ញុំទៅទៀត។
៣ នៅថ្ងៃដែលទូលបង្គំស្រែកអង្វរព្រះអង្គ
ព្រះអង្គបានឆ្លើយតបមកទូលបង្គំវិញ
ព្រះអង្គប្រទានឲ្យទូលបង្គំ
មានកម្លាំងចិត្តក្លៀវក្លា។
៤ ឱព្រះអម្ចាស់អើយ សូមឲ្យស្តេចទាំងប៉ុន្មាន
នៅលើផែនដីនាំគ្នាលើកតម្កើងព្រះអង្គ
នៅពេលគេឮព្រះបន្ទូលសន្យារបស់ព្រះអង្គ។
៥ សូមឲ្យគេនាំគ្នាច្រៀងអំពីកិច្ចការ
ដែលព្រះអង្គបានធ្វើ:
ព្រះអម្ចាស់ប្រកបទៅដោយសិរីរុងរឿង
ឧត្តុង្គឧត្ដមបំផុត!
៦ ទោះបីព្រះអម្ចាស់ខ្ពង់ខ្ពស់បំផុតក្តី
ក៏ព្រះអង្គនៅតែគិតដល់មនុស្សទន់ទាបជានិច្ច
រីឯមនុស្សព្រហើនវិញ ព្រះអង្គស្គាល់គេពីចម្ងាយ។
៧ នៅពេលទូលបង្គំជួបប្រទះនឹងភាពអាសន្ន
ព្រះអង្គរក្សាការពារជីវិតទូលបង្គំ
ព្រះអង្គវាយប្រហារខ្មាំងសត្រូវដ៏ឃោរឃៅ
ហើយសង្គ្រោះទូលបង្គំ
ដោយឫទ្ធិបារមីរបស់ព្រះអង្គ។
៨ ព្រះអម្ចាស់អើយ
ព្រះអង្គធ្វើកិច្ចការគ្រប់យ៉ាងចំពោះទូលបង្គំ
តាមព្រះបន្ទូលសន្យា
ព្រះអង្គប្រកបដោយព្រះហឫទ័យ
មេត្តាករុណាជានិច្ច។
សូមកុំបោះបង់ចោលអស់អ្នក
ដែលព្រះអង្គបានបង្កើតមកនោះឡើយ!
១៣៩
ព្រះអង្គស្គាល់ទូលបង្គំយ៉ាងច្បាស់
១ ទំនុកពីសៀវភៅរបស់គ្រូចម្រៀង។
ទំនុកតម្កើងរបស់ស្តេចដាវីឌ។
ព្រះអម្ចាស់អើយ
ព្រះអង្គឈ្វេងយល់ដល់ជម្រៅចិត្តទូលបង្គំ
ហើយព្រះអង្គស្គាល់ទូលបង្គំយ៉ាងច្បាស់។
២ ព្រះអង្គជ្រាបពេលណាដែលទូលបង្គំអង្គុយ
ពេលណាដែលទូលបង្គំក្រោកឈរ
ព្រះអង្គឈ្វេងយល់គំនិតរបស់ទូលបង្គំ
តាំងពីចម្ងាយ។
៣ ព្រះអង្គជ្រាបពេលណាដែលទូលបង្គំធ្វើការ
ពេលណាដែលទូលបង្គំសម្រាក
ហើយព្រះអង្គជ្រាបច្បាស់នូវអ្វីៗទាំងអស់
ដែលទូលបង្គំប្រព្រឹត្ត។
៤ ព្រះអម្ចាស់អើយ
ពាក្យសម្ដីមិនទាន់ចេញពីមាត់ទូលបង្គំផង
ព្រះអង្គជ្រាបសេចក្ដីដែលទូលបង្គំបម្រុង
នឹងនិយាយនោះរួចស្រេចទៅហើយ។
៥ ព្រះអង្គនៅពីមុខពីក្រោយទូលបង្គំ
ព្រះអង្គការពារទូលបង្គំ
ដោយព្រះបារមីរបស់ព្រះអង្គ។
៦ ទូលបង្គំកោតស្ញប់ស្ញែងណាស់
ដោយព្រះអង្គស្គាល់ទូលបង្គំច្បាស់ដូច្នេះ
គឺអស្ចារ្យពេកដែលទូលបង្គំ
មិនអាចយល់បានឡើយ។
៧ តើទូលបង្គំអាចទៅណាឆ្ងាយពីព្រះអង្គបាន?
តើទូលបង្គំគេចចេញឲ្យឆ្ងាយ
ពីព្រះភ័ក្ត្ររបស់ព្រះអង្គដូចម្ដេចបាន?
៨ បើទូលបង្គំឡើងទៅលើមេឃ
ព្រះអង្គគង់នៅទីនោះ
បើទូលបង្គំទៅនៅស្ថានមនុស្សស្លាប់
ក៏ព្រះអង្គនៅទីនោះដែរ។
៩ ទោះបីទូលបង្គំពាក់ស្លាបហោះ
ទៅកន្លែងព្រះអាទិត្យរះ
ឬទោះបីទូលបង្គំទៅរស់នៅខាងនាយសមុទ្រក្តី
១០ ក៏ព្រះអង្គគង់នៅទីនោះ ដើម្បីដឹកនាំទូលបង្គំ
ហើយជួយទូលបង្គំ
ដោយព្រះបារមីរបស់ព្រះអង្គ។
១១ ប្រសិនបើទូលបង្គំពោលថា:
«សូមឲ្យភាពងងឹតគ្របពីលើខ្ញុំ
ហើយសូមឲ្យពន្លឺថ្ងៃដែលនៅជុំវិញខ្ញុំ
ប្រែទៅជាយប់ងងឹត!»។
១២ ប៉ុន្តែ ចំពោះព្រះអង្គទោះបីងងឹតយ៉ាងណាក្តី
ក៏នៅតែភ្លឺដដែល
គឺយប់ភ្លឺដូចថ្ងៃ ហើយភាពងងឹតដូចពន្លឺ។
១៣ ព្រះអង្គបានបង្កើតទូលបង្គំមក
ព្រះអង្គបានបង្កប់ទូលបង្គំនៅក្នុងផ្ទៃម្ដាយ។
១៤ ទូលបង្គំសូមលើកតម្កើងព្រះអង្គ
ដ្បិតទូលបង្គំជាស្នាព្រះហស្ដដ៏ល្អអស្ចារ្យ
ទូលបង្គំដឹងច្បាស់ថាអ្វីៗដែលព្រះអង្គធ្វើ
សុទ្ធតែល្អអស្ចារ្យទាំងអស់។
១៥ នៅពេលទូលបង្គំកកើតឡើង
ក្នុងទីលាក់កំបាំង គឺនៅក្នុងផ្ទៃមាតា
រូបកាយរបស់ទូលបង្គំមិនបានលាក់កំបាំង
នឹងព្រះអង្គទេ។
១៦ កាលទូលបង្គំមិនទាន់មានរូបរាងកាយនៅឡើយ
ព្រះអង្គទតឃើញទូលបង្គំរួចស្រេចទៅហើយ
ព្រះអង្គក៏បានកំណត់ចំនួនថ្ងៃនៃអាយុជីវិត
របស់ទូលបង្គំទុកក្នុងបញ្ជីរបស់ព្រះអង្គ
មុននឹងថ្ងៃទាំងនោះមកដល់ទៅទៀត។
១៧ ឱព្រះជាម្ចាស់អើយ
ព្រះតម្រិះរបស់ព្រះអង្គជ្រៅជ្រះណាស់
ហើយមានច្រើនឥតគណនាទៀតផង
១៨ ប្រសិនបើទូលបង្គំរាប់ ក៏រាប់មិនអស់ដែរ
ព្រោះមានចំនួនច្រើនជាងគ្រាប់ខ្សាច់ទៅទៀត
ហើយទោះបីទូលបង្គំអាចរាប់ជិតអស់ក្តី
ក៏ទូលបង្គំនៅតែពុំទាន់យល់ពីព្រះអង្គដដែល។
១៩ ឱព្រះជាម្ចាស់អើយ
ព្រះអង្គគួរតែប្រហារមនុស្សពាល
ហើយបណ្តេញពួកឃាតកចេញ
ឲ្យឆ្ងាយពីទូលបង្គំ។
២០ បច្ចាមិត្តរបស់ព្រះអង្គនាំគ្នាយកព្រះនាមព្រះអង្គ
ទៅប្រើសម្រាប់បោកបញ្ឆោត
ហើយគេនិយាយពីព្រះអង្គដោយឥតបានការ។
២១ ឱព្រះអម្ចាស់អើយ
ទូលបង្គំស្អប់អស់អ្នកដែលស្អប់ព្រះអង្គ
ទូលបង្គំស្អប់ខ្ពើមអស់អ្នកដែលឃុបឃិត
ប្រឆាំងនឹងព្រះអង្គ។
២២ ទូលបង្គំស្អប់អ្នកទាំងនោះយ៉ាងខ្លាំងបំផុត
ទូលបង្គំចាត់ទុកពួកគេជាខ្មាំងសត្រូវ
របស់ទូលបង្គំផ្ទាល់។
២៣ ឱព្រះជាម្ចាស់អើយ សូមពិនិត្យមើលទូលបង្គំ
ដើម្បីឲ្យស្គាល់ចិត្តទូលបង្គំ
សូមល្បងលមើលទូលបង្គំ
ដើម្បីឲ្យជ្រាបអ្វីៗដែលទូលបង្គំគិត!
២៤ សូមទតមើលទូលបង្គំផង
ប្រសិនបើឃើញទូលបង្គំដើរខុសផ្លូវ
នោះសូមដឹកនាំទូលបង្គំឲ្យដើរក្នុងមាគ៌ា
ដែលនៅស្ថិតស្ថេរអស់កល្បជានិច្ចផង។
១៤០
ពាក្យអធិស្ឋានរបស់អ្នកដែលត្រូវគេមួលបង្កាច់
១ ទំនុកពីសៀវភៅរបស់គ្រូចម្រៀង។
ទំនុករបស់ស្តេចដាវីឌ។
២ ឱព្រះអម្ចាស់អើយ សូមរំដោះទូលបង្គំ
ឲ្យរួចពីមនុស្សអាក្រក់
សូមការពារទូលបង្គំឲ្យផុត
ពីមនុស្សឃោរឃៅ។
៣ អ្នកទាំងនោះគិតតែពីប្រព្រឹត្តអំពើអាក្រក់
ហើយស្វែងរកជម្លោះជារៀងរាល់ថ្ងៃ!
៤ អណ្ដាតរបស់គេប្រៀបបាននឹងដាវដ៏មុត
មាត់របស់គេពោរពេញទៅដោយពិស
ដូចពស់វែក។ - សម្រាក
៥ ឱព្រះអម្ចាស់អើយ សូមការពារទូលបង្គំ
កុំឲ្យធ្លាក់ទៅក្នុងកណ្ដាប់ដៃ
របស់មនុស្សអាក្រក់!
សូមការពារទូលបង្គំឲ្យរួចផុតពីមនុស្ស
ឃោរឃៅដែលឃុបឃិតគ្នា
ចង់ផ្តួលរំលំទូលបង្គំ!
៦ មនុស្សអួតអាងនាំគ្នាដាក់ចម្រូង
និងបង្កប់ខ្សែចាំទាក់ទូលបង្គំ
ពួកគេរាយអន្ទាក់នៅតាមផ្លូវ
ហើយជីករណ្ដៅចាំចាប់ទូលបង្គំ។ - សម្រាក
៧ ខ្ញុំទូលព្រះអម្ចាស់ថា: ព្រះអង្គជាព្រះនៃទូលបង្គំ!
ព្រះអម្ចាស់អើយ សូមផ្ទៀងព្រះកាណ៌
ស្ដាប់ទូលបង្គំទទូចអង្វរព្រះអង្គ!
៨ ព្រះជាអម្ចាស់អើយ
ព្រះអង្គសង្គ្រោះដោយព្រះចេស្ដារបស់ព្រះអង្គ
នៅពេលធ្វើសឹកសង្គ្រាម
ព្រះអង្គការពារទូលបង្គំ។
៩ ឱព្រះអម្ចាស់អើយ
សូមកុំឲ្យចិត្តប៉ងប្រាថ្នារបស់មនុស្សអាក្រក់
បានសម្រេចឡើយ
ហើយកុំបណ្តោយឲ្យផែនការ
របស់គេបានជោគជ័យឲ្យសោះ។ - សម្រាក
១០ សូមកុំឲ្យអស់អ្នកដែលឡោមព័ទ្ធទូលបង្គំ
មានជ័យជម្នះ
តែឲ្យពាក្យដែលពួកគេដាក់បណ្ដាសាទូលបង្គំ
បានធ្លាក់ទៅលើពួកគេវិញ!
១១ សូមឲ្យមានរងើកភ្លើងដ៏ឆ្អិនឆ្អៅ
ស្រោចទៅលើពួកគេ
ហើយសូមច្រានពួកគេទំលាក់ទៅក្នុងឡភ្លើង
ដែលគេពុំអាចឡើងមកវិញបានឡើយ។
១២ សូមកុំឲ្យអ្នកមួលបង្កាច់គេ
អាចនៅស្ថិតស្ថេរលើផែនដីបាន
សូមឲ្យទុក្ខវេទនាតាមយាយីមនុស្សឃោរឃៅ
ឥតឈប់ឈរឡើយ។
១៣ ខ្ញុំដឹងថាព្រះអម្ចាស់រកយុត្តិធម៌ឲ្យមនុស្សកំសត់ទុរគត
ព្រះអង្គការពារមនុស្សក្រីក្រ។
១៤ ពិតមែនហើយ មនុស្សសុចរិតនឹងនាំគ្នាលើក
តម្កើងព្រះនាមរបស់ព្រះអង្គ
ហើយមនុស្សសុចរិតនឹងឃើញព្រះភ័ក្ត្រព្រះអង្គ។
១៤១
សូមរក្សាមាត់ទូលបង្គំ
១ ទំនុកតម្កើងរបស់ស្តេចដាវីឌ។
ឱព្រះអម្ចាស់អើយ
ទូលបង្គំសូមអង្វរព្រះអង្គ
មេត្តាយាងមកជួយទូលបង្គំជាប្រញាប់
ពេលទូលបង្គំអង្វរព្រះអង្គ
សូមផ្ទៀងព្រះកាណ៌ស្ដាប់ពាក្យទូលបង្គំផង!
២ សូមឲ្យពាក្យអធិស្ឋានរបស់ទូលបង្គំ
ឡើងទៅដល់ព្រះអង្គ ដូចផ្សែងគ្រឿងក្រអូប
សូមទទួលពាក្យសរសើរតម្កើងរបស់ទូលបង្គំ
ដូចតង្វាយនៅពេលល្ងាច!
៣ ឱព្រះអម្ចាស់អើយ សូមរក្សាមាត់ទូលបង្គំ
កុំឲ្យទូលបង្គំពោលពាក្យអាក្រក់សោះឡើយ។
៤ សូមកុំបណ្តោយឲ្យចិត្តទូលបង្គំ
មានលំអៀងទៅរកអំពើអាក្រក់
ហើយប្រព្រឹត្តអំពើអាក្រក់
រួមជាមួយមនុស្សទុច្ចរិត
សូមកុំឲ្យទូលបង្គំចូលរួមជប់លៀង
ជាមួយពួកគេឡើយ។
៥ បើមនុស្សសុចរិតវាយប្រដៅ
និងស្តីបន្ទោសទូលបង្គំដោយចិត្តស្មោះត្រង់
ទូលបង្គំមិនប្រកែកទេ
ព្រោះជាការល្អចំពោះទូលបង្គំ
ប្រៀបដូចជាទឹកអប់ហូរលើក្បាលទូលបង្គំ។
ក៏ប៉ុន្តែ ទូលបង្គំនៅតែបន្តអធិស្ឋាន
តបនឹងអំពើឃោរឃៅរបស់មនុស្សទុច្ចរិត។
៦ សូមឲ្យចៅក្រមរបស់ពួកនោះ
ត្រូវគេច្រានទំលាក់ទៅក្នុងក្រហែងថ្ម
ហើយសូមឲ្យបច្ចាមិត្តស្ដាប់សេចក្ដី
ដែលទូលបង្គំនិយាយដោយសុទ្ធចិត្ត។
៧ ដីប្រេះចេញពីគ្នាយ៉ាងណា
សូមឲ្យស្ថានមនុស្សស្លាប់បើកចំហ
លេបឆ្អឹងរបស់គេដែលនៅរាយប៉ាយ
គ្រប់ទីកន្លែងយ៉ាងនោះដែរ។
៨ ឱព្រះជាអម្ចាស់អើយ
ទូលបង្គំសម្លឹងទៅរកព្រះអង្គជានិច្ច
ទូលបង្គំផ្ញើជីវិតលើព្រះអង្គហើយ
សូមកុំបណ្តោយឲ្យទូលបង្គំបាត់បង់ជីវិត។
៩ សូមការពារទូលបង្គំឲ្យរួចផុតពីអន្ទាក់
ដែលគេដាក់ចាំចាប់ទូលបង្គំ
សូមកុំឲ្យទូលបង្គំធ្លាក់ទៅក្នុងរណ្ដៅ
របស់មនុស្សទុច្ចរិតឡើយ
១០ តែសូមឲ្យពួកគេជាប់អន្ទាក់
ដែលខ្លួនបានដាក់នោះវិញ!
រីឯទូលបង្គំ ទូលបង្គំនឹងបានរួចខ្លួន។
១៤២
មានតែព្រះអង្គទេដែលជាទីជម្រករបស់ទូលបង្គំ
១ កំណាព្យរបស់ស្តេចដាវីឌ។
រំឭកពីគ្រាដែលស្តេចគង់នៅ
តាមរូងភ្នំ។ ពាក្យអធិស្ឋាន។
២ ខ្ញុំបន្លឺសំឡេងស្រែកអង្វរព្រះអម្ចាស់
ខ្ញុំបន្លឺសំឡេងទទូចអង្វរព្រះអម្ចាស់។
៣ ខ្ញុំទូលព្រះអង្គឲ្យជ្រាប
អំពីពាក្យត្អូញត្អែររបស់ខ្ញុំ
ខ្ញុំរៀបរាប់អំពីទុក្ខវេទនារបស់ខ្ញុំប្រាប់ព្រះអង្គ។
៤ ពេលទូលបង្គំបាក់ទឹកចិត្ត
ព្រះអង្គជ្រាបច្បាស់ពីដំណើររបស់ទូលបង្គំ។
ពួកគេនាំគ្នាដាក់អន្ទាក់នៅតាមផ្លូវ
ដែលទូលបង្គំដើរ។
៥ សូមទតមើលជុំវិញទូលបង្គំមើល៍
គ្មាននរណាម្នាក់អើពើនឹងទូលបង្គំទេ
ទូលបង្គំគ្មានកន្លែងជ្រកកោន
ហើយក៏គ្មាននរណាម្នាក់រវីរវល់នឹងទូលបង្គំដែរ។
៦ ឱព្រះអម្ចាស់អើយ ទូលបង្គំស្រែកអង្វរព្រះអង្គ:
ព្រះអង្គជាជម្រករបស់ទូលបង្គំ
នៅក្នុងពិភពលោកនេះ ទូលបង្គំគ្មាន
អ្វីផ្សេងទៀតក្រៅពីព្រះអង្គឡើយ។
៧ សូមយកព្រះហឫទ័យទុកដាក់
នឹងសម្រែករបស់ទូលបង្គំផង
ដ្បិតទូលបង្គំទាល់ច្រកហើយ
សូមរំដោះទូលបង្គំឲ្យរួចផុតពីអស់អ្នក
ដែលតាមព្យាបាទទូលបង្គំ
ព្រោះពួកគេខ្លាំងពូកែជាងទូលបង្គំ។
៨ សូមដោះលែងទូលបង្គំឲ្យមានសេរីភាព
ដើម្បីឲ្យទូលបង្គំលើកតម្កើង ព្រះនាមព្រះអង្គ
ក្នុងអង្គប្រជុំនៃប្រជារាស្ដ្ររបស់ព្រះអង្គ
ព្រោះព្រះអង្គប្រណីសន្ដោសដល់ទូលបង្គំ។
១៤៣
សូមកុំប្រកាន់ទោសទូលបង្គំឡើយ
១ ទំនុកតម្កើងរបស់ស្តេចដាវីឌ។
ឱព្រះអម្ចាស់អើយ
សូមព្រះអង្គព្រះសណ្ដាប់ពាក្យ
អធិស្ឋានរបស់ទូលបង្គំផង
សូមផ្ទៀងព្រះកាណ៌ស្ដាប់ពាក្យ
ទទូចអង្វររបស់ទូលបង្គំ!
សូមឆ្លើយតបមកទូលបង្គំដោយព្រះហឫទ័យ
សុចរិតដ៏ស្មោះស្ម័គ្ររបស់ព្រះអង្គ។
២ សូមកុំយកទូលបង្គំ
ដែលជាអ្នកបម្រើរបស់ព្រះអង្គទៅកាត់ក្តីឡើយ
ដ្បិតគ្មានមនុស្សណាម្នាក់សុចរិតនៅចំពោះ
ព្រះភ័ក្ត្ររបស់ព្រះអង្គទេ។
៣ ខ្មាំងសត្រូវតាមយាយីទូលបង្គំ
គេជាន់ឈ្លីជីវិតទូលបង្គំ
គេយកទូលបង្គំទៅឃុំទុកក្នុងទីងងឹត
ដូចមនុស្សស្លាប់តាំងពីយូរមកហើយ។
៤ ទូលបង្គំបាក់ទឹកចិត្តជាខ្លាំង ទូលបង្គំទាល់គំនិត។
៥ ទូលបង្គំនឹកទៅដល់ជំនាន់ដើម
ទូលបង្គំសញ្ជឹងគិតអំពីកិច្ចការទាំងប៉ុន្មាន
ដែលព្រះអង្គបានធ្វើ
ទូលបង្គំពិចារណាអំពីស្នាព្រះហស្ដរបស់ព្រះអង្គ។
៦ ទូលបង្គំលើកដៃអង្វរព្រះអង្គ
ទូលបង្គំនៅចំពោះព្រះភ័ក្ត្ររបស់ព្រះអង្គ
ប្រៀបដូចជាដីហួតហែង។ - សម្រាក
៧ ឱព្រះអម្ចាស់អើយ
សូមឆ្លើយតបមកទូលបង្គំជាប្រញាប់
ដ្បិតទូលបង្គំពុំអាចទ្រាំតទៅទៀតទេ!
សូមកុំលាក់ព្រះភ័ក្ត្រនឹងទូលបង្គំឡើយ
ដ្បិតទូលបង្គំដូចជាមនុស្សធ្លាក់ក្នុងរណ្ដៅ។
៨ សូមសម្ដែងឲ្យទូលបង្គំស្គាល់ព្រះហឫទ័យ
មេត្តាករុណារបស់ព្រះអង្គតាំងពីព្រលឹម
ដ្បិតទូលបង្គំផ្ញើជីវិតលើព្រះអង្គហើយ។
សូមប្រោសប្រទានឲ្យទូលបង្គំស្គាល់ផ្លូវ
ដែលទូលបង្គំត្រូវដើរ
ដ្បិតទូលបង្គំផ្ចង់ចិត្តទៅរកព្រះអង្គ។
៩ ឱព្រះអម្ចាស់អើយ
សូមរំដោះទូលបង្គំឲ្យរួចពីខ្មាំងសត្រូវ
ទូលបង្គំមកជ្រកកោននៅក្បែរព្រះអង្គ។
១០ សូមបង្រៀនទូលបង្គំឲ្យធ្វើតាមព្រះហឫទ័យ
របស់ព្រះអង្គ ដ្បិតព្រះអង្គជាព្រះនៃទូលបង្គំ
សូមព្រះវិញ្ញាណដ៏សប្បុរសរបស់ព្រះអង្គដឹកនាំ
ទូលបង្គំឲ្យដើរក្នុងមាគ៌ាដែលគ្មានឧបសគ្គ។
១១ ឱព្រះអម្ចាស់អើយ
សូមប្រទានឲ្យទូលបង្គំមានជីវិតឡើងវិញ
ដោយយល់ដល់ព្រះនាមរបស់ព្រះអង្គ។
សូមនាំទូលបង្គំចេញពីភាពអាសន្ន
ដោយព្រះហឫទ័យដ៏សុចរិតរបស់ព្រះអង្គ!
១២ ដោយព្រះអង្គមានព្រះហឫទ័យមេត្តា
ករុណាចំពោះទូលបង្គំ
សូមកម្ទេចខ្មាំងសត្រូវ និងបច្ចាមិត្ត
ទាំងប៉ុន្មានរបស់ទូលបង្គំ
ឲ្យវិនាសសូន្យទៅ
ដ្បិតទូលបង្គំជាអ្នកបម្រើរបស់ព្រះអង្គ។
១៤៤
ពាក្យអធិស្ឋានរបស់ព្រះរាជា
១ ទំនុករបស់ស្តេចដាវីឌ។
សូមលើកតម្កើងព្រះអម្ចាស់
ដែលជាថ្មដារបស់ខ្ញុំ
ព្រះអង្គបង្រៀនខ្ញុំអំពីយុទ្ធសាស្ត្រ
ហើយហ្វឹកហ្វឺនខ្ញុំដើម្បីធ្វើសឹក។
២ ព្រះអង្គសម្ដែងព្រះហឫទ័យមេត្តាករុណា
ចំពោះខ្ញុំ ព្រះអង្គជួយការពារខ្ញុំ
ព្រះអង្គជាទីជម្រកដ៏រឹងមាំរបស់ខ្ញុំ
ព្រះអង្គរំដោះខ្ញុំ
ព្រះអង្គជាខែលការពារខ្ញុំ
ខ្ញុំតែងមកជ្រកកោននឹងព្រះអង្គជានិច្ច
ព្រះអង្គប្រគល់ប្រជាជាតិនានាមកក្រោម
អំណាចរបស់ខ្ញុំ
៣ ឱព្រះអម្ចាស់អើយ តើមនុស្សជាអ្វី បានជាព្រះអង្គ
យកព្រះហឫទ័យទុកដាក់នឹងគេដូច្នេះ?
តើមនុស្សលោកជាអ្វី
បានជាព្រះអង្គនឹកគិតដល់គេដូច្នេះ?
៤ មនុស្សលោកប្រៀបបាននឹងមួយដង្ហើមប៉ុណ្ណោះ
អាយុជីវិតរបស់គេប្រៀបបាននឹងស្រមោល
ដែលតែងតែរសាត់បាត់ទៅ។
៥ ឱព្រះអម្ចាស់អើយ សូមផ្អៀងផ្ទៃមេឃ
របស់ព្រះអង្គ ហើយយាងចុះមក!
សូមពាល់ភ្នំ ដើម្បីឲ្យមានផ្សែងហុយឡើង។
៦ សូមព្រះអង្គធ្វើឲ្យមានផ្លេកបន្ទោរ
កម្ចាត់កម្ចាយខ្មាំងសត្រូវ
សូមបាញ់ព្រួញរបស់ព្រះអង្គបំបាក់ទ័ពពួកគេ។
៧ សូមលាតព្រះហស្ដពីស្ថានលើមករំដោះទូលបង្គំ
សូមស្រង់ទូលបង្គំឲ្យចេញផុតពីទឹកសមុទ្រ
សូមរំដោះទូលបង្គំឲ្យរួចពីអំណាច
របស់ជនបរទេសទាំងនេះផង។
៨ ពួកគេមិនដែលនិយាយពាក្យពិតទេ
ហើយក៏មិនដែលគោរពពាក្យ
សម្បថរបស់ខ្លួនដែរ។
៩ ឱព្រះជាម្ចាស់អើយ
ទូលបង្គំសូមច្រៀងបទថ្មីថ្វាយព្រះអង្គ
ទូលបង្គំស្មូត្រទំនុកតម្កើងថ្វាយព្រះអង្គ
ដោយលេងឃឹមកំដរផង។
១០ ព្រះអម្ចាស់សង្គ្រោះស្តេចនានា
ព្រះអង្គរំដោះដាវីឌជាអ្នកបម្រើរបស់ព្រះអង្គ
ឲ្យរួចពីការស្លាប់ដោយមុខដាវ។
១១ សូមរំដោះទូលបង្គំឲ្យរួចពីអំណាច
របស់ជនបរទេសទាំងនេះផង
ពួកគេមិនដែលនិយាយពាក្យពិតទេ
ហើយក៏មិនដែលគោរពពាក្យ
សម្បថរបស់ខ្លួនដែរ។
១២ សូមឲ្យកូនប្រុសៗរបស់យើងប្រៀបដូចជា
កូនឈើ ដែលដុះឡើងយ៉ាងស្រស់បំព្រង
សូមឲ្យកូនស្រីៗបស់យើងមានរូបឆោមស្អាត
ដូចរូបទេពអប្សរដ៏ល្អប្រណីត។
១៣ សូមឲ្យជង្រុករបស់យើងមានពោរពេញ
ទៅដោយភោគផលសព្វបែបយ៉ាង
សូមឲ្យហ្វូងចៀមនៅតាមវាលស្មៅ
របស់យើងកើនចំនួនឡើងរាប់ពាន់រាប់ម៉ឺន។
១៤ សូមឲ្យហ្វូងគោរបស់យើង
បានកើនចំនួនជាច្រើន គ្មានបាត់
គ្មាននរណាលួចចាប់យកទៅឡើយ
ហើយសូមកុំឲ្យមានសម្រែកភ័យអាសន្ន
នៅតាមទីសាធារណៈរបស់យើងដែរ។
១៥ ប្រជាជាតិណាមានព្រះពរដូច្នេះ
ប្រជាជាតិនោះមានសុភមង្គលហើយ
ប្រជាជាតិណាគោរពព្រះអម្ចាស់
ទុកជាព្រះរបស់ខ្លួន
ប្រជាជាតិនោះមានសុភមង្គលហើយ!
១៤៥
ព្រះរាជ្យរបស់ព្រះអង្គនៅស្ថិតស្ថេរអស់កល្បជានិច្ច
ពាក្យសរសើរតម្កើង។ ទំនុករបស់ស្តេចដាវីឌ។
១ ឱព្រះនៃទូលបង្គំ
ឱព្រះមហាក្សត្រនៃទូលបង្គំអើយ
ទូលបង្គំសូមលើកតម្កើងព្រះអង្គ!
ទូលបង្គំសូមសរសើរតម្កើងព្រះនាម
របស់ព្រះអង្គអស់កល្បជាអង្វែងតរៀងទៅ!
២ ទូលបង្គំសរសើរតម្កើងព្រះអង្គជារៀងរាល់ថ្ងៃ
ទូលបង្គំកោតសរសើរព្រះនាម
របស់ព្រះអង្គអស់កល្បជាអង្វែងតរៀងទៅ!
៣ ព្រះអម្ចាស់ប្រសើរឧត្ដម ដែលយើងត្រូវតែ
សរសើរតម្កើងយ៉ាងខ្ពង់ខ្ពស់បំផុត។
ព្រះអង្គឧត្តុង្គឧត្ដមរកអ្វីប្រៀបផ្ទឹមស្មើពុំបាន។
៤ សូមឲ្យមនុស្សនៅគ្រប់ជំនាន់
លើកតម្កើងស្នាព្រះហស្ដរបស់ព្រះអង្គ
សូមឲ្យគេរៀបរាប់អំពីកិច្ចការដ៏អស្ចារ្យ
ដែលព្រះអង្គបានធ្វើ
៥ ព្រមទាំងរៀបរាប់ពីភាពថ្កុំថ្កើងនៃសិរីរុងរឿង
របស់ព្រះអង្គផង។
ទូលបង្គំនឹងសញ្ជឹងគិតពីស្នាព្រះហស្ដដ៏អស្ចារ្យ
របស់ព្រះអង្គ។
៦ គេនឹងរៀបរាប់អំពីឫទ្ធានុភាព
ដ៏គួរឲ្យស្ញែងខ្លាចរបស់ព្រះអង្គ
ហើយទូលបង្គំក៏នឹងថ្លែងអំពីភាពឧត្តុង្គឧត្ដម
របស់ព្រះអង្គដែរ។
៧ គេនឹងរំឭកឡើងវិញនូវព្រះហឫទ័យសប្បុរស
ដ៏លើសលប់របស់ព្រះអង្គ
គេនឹងប្រកាសអំពីសេចក្ដីសុចរិត
របស់ព្រះអង្គដោយអំណរ។
៨ ព្រះអម្ចាស់ប្រកបដោយព្រះហឫទ័យ
ប្រណីសន្ដោស និងអាណិតអាសូរ
ព្រះអង្គមានព្រះហឫទ័យអត់ធ្មត់
ហើយពោរពេញទៅដោយ
ព្រះហឫទ័យមេត្តាករុណា។
៩ ព្រះអម្ចាស់មានព្រះហឫទ័យសប្បុរស
ចំពោះមនុស្សទាំងអស់
ព្រះអង្គមានព្រះហឫទ័យអាណិតអាសូរ
ដល់សត្វលោកទាំងអស់
ដែលព្រះអង្គបានបង្កើតមក។
១០ ឱព្រះអម្ចាស់អើយ សត្វលោកដែលព្រះអង្គបានបង្កើតមក
នឹងនាំគ្នាលើកតម្កើងព្រះអង្គ
ហើយប្រជាជនរបស់ព្រះអង្គ
ក៏នឹងនាំគ្នាសរសើរតម្កើងព្រះអង្គដែរ។
១១ គេនឹងរៀបរាប់អំពីព្រះរាជ្យ
ដ៏រុងរឿងរបស់ព្រះអង្គ
គេនឹងថ្លែងអំពីឫទ្ធានុភាពរបស់ព្រះអង្គ
១២ ដើម្បីឲ្យមនុស្សទាំងអស់បានដឹង
ពីការអស្ចារ្យរបស់ព្រះអង្គ
និងសិរីរុងរឿងដ៏ភ្លឺចិញ្ចែងចិញ្ចាច
នៃព្រះរាជ្យរបស់ព្រះអង្គ
១៣ ព្រះអង្គគ្រងរាជ្យគ្រប់ជំនាន់ទាំងអស់
ព្រះអង្គជាព្រះមហាក្សត្រ
អស់កល្បជាអង្វែងតរៀងទៅ។
ព្រះអម្ចាស់តែងគោរពតាមព្រះបន្ទូល
សន្យារបស់ព្រះអង្គជានិច្ច
ហើយអ្វីៗដែលព្រះអង្គប្រព្រឹត្ត
សុទ្ធតែផុសចេញពីព្រះហឫទ័យសប្បុរស។
១៤ ព្រះអម្ចាស់ជួយគាំទ្រអស់អ្នកដែលជំពប់ដួល
ព្រះអង្គលើកអ្នកដែលអស់សង្ឃឹម
ឲ្យងើបឡើងវិញ។
១៥ ព្រះអម្ចាស់អើយ សត្វលោកទាំងអស់
ទន្ទឹងរង់ចាំព្រះអង្គ ដោយចិត្តសង្ឃឹម
ដ្បិតព្រះអង្គប្រទានអាហារឲ្យគេ
តាមពេលកំណត់។
១៦ ព្រះអង្គមានព្រះហឫទ័យទូលាយ
ព្រះអង្គប្រទានឲ្យគេ
បានឆ្អែតតាមបំណងរបស់គេ។
១៧ ព្រះអម្ចាស់ធ្វើគ្រប់កិច្ចការ
ដោយព្រះហឫទ័យសុចរិត
ហើយព្រះអង្គសម្ដែងព្រះហឫទ័យមេត្តាករុណា
ក្នុងគ្រប់កិច្ចការដែលព្រះអង្គធ្វើ។
១៨ ព្រះអម្ចាស់គង់នៅជិតអស់អ្នកដែលអង្វរព្រះអង្គ
គឺអស់អ្នកដែលអង្វរព្រះអង្គដោយសុទ្ធចិត្ត។
១៩ ព្រះអង្គសម្រេចតាមចិត្តប៉ងប្រាថ្នា
របស់អស់អ្នកដែលគោរពកោតខ្លាចព្រះអង្គ
ព្រះអង្គព្រះសណ្ដាប់ឮសម្រែក
ទូលអង្វររបស់គេ ហើយសង្គ្រោះគេ។
២០ ព្រះអម្ចាស់ការពារអស់អ្នកដែលស្រឡាញ់ព្រះអង្គ
តែព្រះអង្គបំផ្លាញមនុស្សអាក្រក់វិញ។
២១ ខ្ញុំសូមថ្លែងពាក្យសរសើរតម្កើងព្រះអម្ចាស់
សូមឲ្យសត្វលោកទាំងអស់លើកតម្កើង
ព្រះនាមដ៏វិសុទ្ធរបស់ព្រះអង្គ
រហូតដល់អស់កល្បជាអង្វែងតរៀងទៅ!
១៤៦
ព្រះអម្ចាស់សម្ដែងឫទ្ធានុភាពតាមរយៈធម្មជាតិ
១ ហាលេលូយ៉ា!
ស្មូត្រទំនុកតម្កើងថ្វាយព្រះនៃយើង
ជាការល្អប្រពៃណាស់
សរសើរតម្កើងព្រះអង្គ
ជាការមួយដ៏សប្បាយ ហើយប្រសើរបំផុត។
២ ព្រះអម្ចាស់សង់ក្រុងយេរូសាឡឹមឡើងវិញ
ព្រះអង្គនាំជនជាតិអ៊ីស្រាអែល
ដែលខ្ចាត់ខ្ចាយឲ្យត្រឡប់មកវិញ។
៣ ព្រះអង្គប្រោសអ្នកដែលមានចិត្តគ្រាំគ្រា
ឲ្យបានធូរស្បើយ ព្រះអង្គរុំរបួសឲ្យគេ។
៤ ព្រះអង្គរាប់ចំនួនផ្កាយទាំងប៉ុន្មាន
ហើយព្រះអង្គដាក់ឈ្មោះឲ្យផ្កាយទាំងនោះ។
៥ ព្រះរបស់យើងធំឧត្តុង្គឧត្ដម
ព្រះអង្គមានព្រះចេស្ដាដ៏ខ្លាំងបំផុត
ព្រះតម្រិះរបស់ព្រះអង្គឥតមានព្រំដែនឡើយ។
៦ ព្រះអម្ចាស់ជួយគាំទ្រជនក្រីក្រ
តែព្រះអង្គបន្ទាបមនុស្សអាក្រក់ដល់ដី។
៧ ចូរនាំគ្នាច្រៀងអរព្រះគុណព្រះអម្ចាស់
ចូរស្មូត្រទំនុកតម្កើងថ្វាយព្រះនៃយើង
ទាំងដេញពិណកំដរផង!
៨ ព្រះអង្គធ្វើឲ្យមានពពកបាំងបិទផ្ទៃមេឃ
ព្រះអង្គរៀបចំឲ្យមាន
ភ្លៀងធ្លាក់មកលើផែនដី
ព្រះអង្គធ្វើឲ្យមានស្មៅដុះនៅតាមភ្នំ
៩ ព្រះអង្គប្រទានចំណីដល់សត្វពាហនៈ
ហើយពេលកូនក្អែកយំ
ព្រះអង្គក៏ប្រទានចំណីដល់វាដែរ។
១០ ព្រះអង្គមិនសព្វព្រះហឫទ័យនឹងកម្លាំងរបស់សេះទេ
ហើយព្រះអង្គក៏មិនរវីរវល់នឹងកម្លាំងកាយ
របស់មនុស្សដែរ
១១ តែព្រះអង្គគាប់ព្រះហឫទ័យនឹងអស់អ្នក
ដែលគោរពកោតខ្លាចព្រះអង្គ
គឺអស់អ្នកដែលផ្ញើជីវិតលើព្រះហឫទ័យ
មេត្តាករុណារបស់ព្រះអង្គ។
១២ ក្រុងយេរូសាឡឹមអើយ
ចូរលើកតម្កើងសិរីរុងរឿងរបស់ព្រះអម្ចាស់!
ក្រុងស៊ីយ៉ូនអើយ
ចូរសរសើរតម្កើងព្រះរបស់អ្នក!
១៣ ដ្បិតព្រះអង្គការពារ
និងពង្រឹងអ្នកឲ្យមានសន្តិសុខ
ព្រះអង្គនឹងប្រទានពរដល់ប្រជាជន
ដែលរស់នៅក្នុងទីក្រុង។
១៤ ព្រះអង្គប្រទានឲ្យទឹកដីអ្នកមានសន្តិភាព
ព្រះអង្គប្រទានឲ្យអ្នកមានស្រូវដ៏ល្អៗ
យ៉ាងបរិបូណ៌
១៥ ព្រះអង្គមានព្រះបន្ទូលបញ្ជាទៅផែនដី
ហើយព្រះបន្ទូលរបស់ព្រះអង្គផ្សព្វផ្សាយ
ទៅយ៉ាងរហ័ស
១៦ ព្រះអង្គធ្វើឲ្យមានទឹកកកធ្លាក់ចុះមកដូចសម្លី
ព្រះអង្គធ្វើឲ្យមានសន្សើម
ត្រជាក់ធ្លាក់ចុះមកយ៉ាងសក្បុស
១៧ ព្រះអង្គធ្វើឲ្យមានព្រឹលធ្លាក់ចុះមកទាំងដុំៗ
តើនរណាអាចទ្រាំនឹងធាតុអាកាសត្រជាក់
ដែលព្រះអង្គបានបង្កើតមកនេះ?
១៨ ពេលព្រះអង្គមានព្រះបន្ទូល
នោះទឹកកក និងព្រឹលក៏រលាយទៅជាទឹក
ព្រះអង្គធ្វើឲ្យមានខ្យល់បក់មក
ហើយទឹកនោះក៏ហូរទៅ។
១៩ ព្រះអង្គសម្ដែងឲ្យពូជពង្ស
របស់លោកយ៉ាកុបស្គាល់ព្រះបន្ទូលរបស់ព្រះអង្គ
ព្រះអង្គប្រទានក្រឹត្យវិន័យផ្សេងៗ
និងព្រះបញ្ជារបស់ព្រះអង្គ
ឲ្យជនជាតិអ៊ីស្រាអែល។
២០ ព្រះអង្គពុំបានប្រោសប្រទានដូច្នេះ
ចំពោះប្រជាជាតិទាំងឡាយទេ
ពួកគេពុំស្គាល់វិន័យរបស់ព្រះអង្គឡើយ។
ហាលេលូយ៉ា!។
១៤៧
ព្រះអម្ចាស់សម្ដែងឫទ្ធានុភាពតាមរយៈធម្មជាតិ
១ ហាលេលូយ៉ា!
ស្មូត្រទំនុកតម្កើងថ្វាយព្រះនៃយើង
ជាការល្អប្រពៃណាស់
សរសើរតម្កើងព្រះអង្គ
ជាការមួយដ៏សប្បាយ ហើយប្រសើរបំផុត។
២ ព្រះអម្ចាស់សង់ក្រុងយេរូសាឡឹមឡើងវិញ
ព្រះអង្គនាំជនជាតិអ៊ីស្រាអែល
ដែលខ្ចាត់ខ្ចាយឲ្យត្រឡប់មកវិញ។
៣ ព្រះអង្គប្រោសអ្នកដែលមានចិត្តគ្រាំគ្រា
ឲ្យបានធូរស្បើយ ព្រះអង្គរុំរបួសឲ្យគេ។
៤ ព្រះអង្គរាប់ចំនួនផ្កាយទាំងប៉ុន្មាន
ហើយព្រះអង្គដាក់ឈ្មោះឲ្យផ្កាយទាំងនោះ។
៥ ព្រះរបស់យើងធំឧត្តុង្គឧត្ដម
ព្រះអង្គមានព្រះចេស្ដាដ៏ខ្លាំងបំផុត
ព្រះតម្រិះរបស់ព្រះអង្គឥតមានព្រំដែនឡើយ។
៦ ព្រះអម្ចាស់ជួយគាំទ្រជនក្រីក្រ
តែព្រះអង្គបន្ទាបមនុស្សអាក្រក់ដល់ដី។
៧ ចូរនាំគ្នាច្រៀងអរព្រះគុណព្រះអម្ចាស់
ចូរស្មូត្រទំនុកតម្កើងថ្វាយព្រះនៃយើង
ទាំងដេញពិណកំដរផង!
៨ ព្រះអង្គធ្វើឲ្យមានពពកបាំងបិទផ្ទៃមេឃ
ព្រះអង្គរៀបចំឲ្យមាន
ភ្លៀងធ្លាក់មកលើផែនដី
ព្រះអង្គធ្វើឲ្យមានស្មៅដុះនៅតាមភ្នំ
៩ ព្រះអង្គប្រទានចំណីដល់សត្វពាហនៈ
ហើយពេលកូនក្អែកយំ
ព្រះអង្គក៏ប្រទានចំណីដល់វាដែរ។
១០ ព្រះអង្គមិនសព្វព្រះហឫទ័យនឹងកម្លាំងរបស់សេះទេ
ហើយព្រះអង្គក៏មិនរវីរវល់នឹងកម្លាំងកាយ
របស់មនុស្សដែរ
១១ តែព្រះអង្គគាប់ព្រះហឫទ័យនឹងអស់អ្នក
ដែលគោរពកោតខ្លាចព្រះអង្គ
គឺអស់អ្នកដែលផ្ញើជីវិតលើព្រះហឫទ័យ
មេត្តាករុណារបស់ព្រះអង្គ។
១២ ក្រុងយេរូសាឡឹមអើយ
ចូរលើកតម្កើងសិរីរុងរឿងរបស់ព្រះអម្ចាស់!
ក្រុងស៊ីយ៉ូនអើយ
ចូរសរសើរតម្កើងព្រះរបស់អ្នក!
១៣ ដ្បិតព្រះអង្គការពារ
និងពង្រឹងអ្នកឲ្យមានសន្តិសុខ
ព្រះអង្គនឹងប្រទានពរដល់ប្រជាជន
ដែលរស់នៅក្នុងទីក្រុង។
១៤ ព្រះអង្គប្រទានឲ្យទឹកដីអ្នកមានសន្តិភាព
ព្រះអង្គប្រទានឲ្យអ្នកមានស្រូវដ៏ល្អៗ
យ៉ាងបរិបូណ៌
១៥ ព្រះអង្គមានព្រះបន្ទូលបញ្ជាទៅផែនដី
ហើយព្រះបន្ទូលរបស់ព្រះអង្គផ្សព្វផ្សាយ
ទៅយ៉ាងរហ័ស
១៦ ព្រះអង្គធ្វើឲ្យមានទឹកកកធ្លាក់ចុះមកដូចសម្លី
ព្រះអង្គធ្វើឲ្យមានសន្សើម
ត្រជាក់ធ្លាក់ចុះមកយ៉ាងសក្បុស
១៧ ព្រះអង្គធ្វើឲ្យមានព្រឹលធ្លាក់ចុះមកទាំងដុំៗ
តើនរណាអាចទ្រាំនឹងធាតុអាកាសត្រជាក់
ដែលព្រះអង្គបានបង្កើតមកនេះ?
១៨ ពេលព្រះអង្គមានព្រះបន្ទូល
នោះទឹកកក និងព្រឹលក៏រលាយទៅជាទឹក
ព្រះអង្គធ្វើឲ្យមានខ្យល់បក់មក
ហើយទឹកនោះក៏ហូរទៅ។
១៩ ព្រះអង្គសម្ដែងឲ្យពូជពង្ស
របស់លោកយ៉ាកុបស្គាល់ព្រះបន្ទូលរបស់ព្រះអង្គ
ព្រះអង្គប្រទានក្រឹត្យវិន័យផ្សេងៗ
និងព្រះបញ្ជារបស់ព្រះអង្គ
ឲ្យជនជាតិអ៊ីស្រាអែល។
២០ ព្រះអង្គពុំបានប្រោសប្រទានដូច្នេះ
ចំពោះប្រជាជាតិទាំងឡាយទេ
ពួកគេពុំស្គាល់វិន័យរបស់ព្រះអង្គឡើយ។
ហាលេលូយ៉ា!។
១៤៨
ចូរឲ្យអ្វីៗទាំងអស់សរសើរតម្កើងព្រះនាមព្រះអម្ចាស់
១ ហាលេលូយ៉ា!
ចូរសរសើរតម្កើងព្រះអម្ចាស់
នៅស្ថានបរមសុខ!
អ្នករាល់គ្នាដែលស្ថិតនៅស្ថានដ៏ខ្ពស់បំផុតអើយ
ចូរសរសើរតម្កើងព្រះអង្គ!
២ ទេវទូតទាំងអស់អើយ ចូរសរសើរតម្កើងព្រះអង្គ!
ពពួកទេវទូតទាំងប៉ុន្មានអើយ
ចូរសរសើរតម្កើងព្រះអង្គ!
៣ ព្រះអាទិត្យ និងព្រះច័ន្ទអើយ ចូរសរសើរតម្កើងព្រះអង្គ!
ផ្កាយដ៏ភ្លឺទាំងប៉ុន្មានអើយ
ចូរសរសើរតម្កើងព្រះអង្គ!
៤ ផ្ទៃមេឃដ៏ខ្ពស់បំផុតអើយ
ចូរសរសើរតម្កើងព្រះអង្គ!
ទឹកទាំងឡាយដែលស្ថិតនៅពីលើផ្ទៃមេឃអើយ
ចូរសរសើរតម្កើងព្រះអង្គ!
៥ ចូរឲ្យអ្វីៗសព្វសារពើសរសើរតម្កើង
ព្រះនាមព្រះអម្ចាស់
ដ្បិតពេលព្រះអង្គមានព្រះបន្ទូល
នោះអ្វីៗទាំងអស់កើតមានឡើង។
៦ ព្រះអង្គបានតាំងអ្វីៗទាំងអស់
ឲ្យនៅស្ថិតស្ថេរជានិច្ចរហូតតទៅ
ព្រះអង្គបានដាក់ច្បាប់មួយ
ដែលមិនប្រែប្រួលឡើយ។
៧ ចូរសរសើរតម្កើងព្រះអម្ចាស់នៅលើផែនដី
មហាសាគរ និងសត្វដ៏ធំៗនៅក្នុងសមុទ្រអើយ
ចូរសរសើរតម្កើងព្រះអង្គ។
៨ ភ្លើង ព្រឹល ទឹកកក និងអ័ព្ទ ព្រមទាំងខ្យល់ព្យុះ
ដែលតែងតែធ្វើតាមបញ្ជារបស់ព្រះអង្គ
៩ ភ្នំតូចធំទាំងឡាយ ដើមឈើដែលមានផ្លែ
និងដើមគគីរទាំងប៉ុន្មានអើយ
ចូរសរសើរតម្កើងព្រះអង្គ!
១០ សត្វព្រៃ និងសត្វស្រុក ព្រមទាំងបក្សាបក្សី
និងសត្វលូនវារទាំងឡាយអើយ
ចូរសរសើរតម្កើងព្រះអង្គ!
១១ ស្តេចទាំងឡាយនៅផែនដីព្រមទាំងប្រជារាស្ដ្រ
អ្នកដឹកនាំ និងអ្នកគ្រប់គ្រងទាំងប៉ុន្មាននៅផែនដី
ចូរសរសើរតម្កើងព្រះអង្គ!
១២ យុវជន និងយុវនារី
មនុស្សចាស់ជរា និងកូនក្មេង
ចូរសរសើរតម្កើងព្រះអង្គ!
១៣ ចូរឲ្យទាំងអស់គ្នាសរសើរតម្កើង
ព្រះនាមព្រះអម្ចាស់
ដ្បិតមានតែព្រះនាមព្រះអង្គប៉ុណ្ណោះ
ដែលឧត្ដមប្រសើរលើសគេ
ព្រះអង្គសម្ដែងភាពថ្កុំថ្កើងរុងរឿង
ពាសពេញលើផែនដី និងផ្ទៃមេឃ។
១៤ ព្រះអង្គប្រោសប្រទានឲ្យប្រជារាស្ដ្រ
របស់ព្រះអង្គមានកម្លាំងឡើងវិញ
ហើយធ្វើឲ្យអស់អ្នក
ដែលស្មោះត្រង់នឹងព្រះអង្គ
គឺប្រជារាស្ដ្រអ៊ីស្រាអែលទាំងមូល
ដែលស្និទ្ធស្នាលនឹងព្រះអង្គ បានខ្ពស់មុខឡើង!
ហាលេលូយ៉ា!
១៤៩
កិត្តិយសដ៏រុងរឿងរបស់ប្រជាជនដែលស្មោះត្រង់នឹងព្រះអង្គ
១ ហាលេលូយ៉ា!
ចូរច្រៀងបទថ្មីថ្វាយព្រះអម្ចាស់!
ចូរច្រៀងសរសើរព្រះអង្គ
នៅក្នុងអង្គប្រជុំរបស់អ្នកជឿព្រះអង្គ!
២ ចូរឲ្យជនជាតិអ៊ីស្រាអែល
រីករាយនឹងព្រះអង្គដែលបានបង្កើតគេមក
សូមឲ្យប្រជាជនក្រុងស៊ីយ៉ូន
មានអំណរសប្បាយនឹងព្រះមហាក្សត្ររបស់ខ្លួន!
៣ ចូរនាំគ្នារាំសរសើរតម្កើងព្រះអង្គ
ចូរនាំគ្នាស្មូត្រទំនុកតម្កើងថ្វាយព្រះអង្គ
ដោយវាយក្រាប់ និងដេញពិណ!
៤ ដ្បិតព្រះអម្ចាស់គាប់ព្រះហឫទ័យ
នឹងប្រជារាស្ដ្ររបស់ព្រះអង្គ
ព្រះអង្គលើកកិត្តិយសមនុស្សទន់ទាប
ដោយសង្គ្រោះពួកគេ
៥ ចូរឲ្យអស់អ្នកដែលជឿលើព្រះអង្គ
នាំគ្នាអរសប្បាយដ៏លើសលប់
ដោយលើកតម្កើងសិរីរុងរឿងរបស់ព្រះជាម្ចាស់
សូម្បីតែនៅពេលយប់
ក៏គេស្រែកតម្កើងព្រះអង្គដោយអំណរដែរ!
៦ សូមឲ្យគេសរសើរតម្កើងព្រះអង្គមិនដាច់ពីមាត់
ហើយឲ្យគេកាន់ដាវមុខពីរនៅជាប់នឹងដៃជានិច្ច
៧ ដើម្បីសងសឹកប្រជាជាតិនានា
និងដាក់ទោសជាតិសាសន៍ទាំងឡាយ
៨ ហើយយកច្រវាក់ចងស្តេច
និងដាក់ខ្នោះមេដឹកនាំរបស់ពួកគេ។
៩ ការដាក់ទោសសាសន៍ទាំងនោះ
ស្របតាមការសម្រេចរបស់ព្រះជាម្ចាស់នេះហើយ
ដែលជាកិត្តិយសដ៏រុងរឿងរបស់អស់អ្នក
ស្មោះត្រង់នឹងព្រះអង្គ!
ហាលេលូយ៉ា!
១៥០
ចូរឲ្យអ្វីៗទាំងអស់ដែលមានដង្ហើមចេញចូល សរសើរតម្កើងព្រះអម្ចាស់!
១ ហាលេលូយ៉ា!
ចូរសរសើរតម្កើង
ព្រះជាម្ចាស់នៅក្នុងកន្លែងដ៏វិសុទ្ធ!
ចូរសរសើរតម្កើងព្រះអង្គនៅក្នុងលំហអាកាស
ដែលជាព្រះដំណាក់ដ៏រឹងមាំរបស់ព្រះអង្គ!
២ ចូរសរសើរតម្កើងព្រះអង្គ
ចំពោះស្នាព្រះហស្ដដ៏អស្ចារ្យ!
ចូរសរសើរតម្កើងព្រះអង្គ
ដ្បិតព្រះអង្គប្រសើរឧត្តុង្គឧត្ដមបំផុត!
៣ ចូរសរសើរតម្កើងព្រះអង្គដោយសំឡេងត្រែ
ចូរសរសើរតម្កើងព្រះអង្គ
ដោយដេញចាប៉ី និងដេញពិណ!
៤ ចូរសរសើរតម្កើងព្រះអង្គ
ដោយវាយក្រាប់ និងរាំរបាំ!
ចូរសរសើរតម្កើងព្រះអង្គ
ដោយវាយឃឹម និងផ្លុំខ្លុយ!
៥ ចូរសរសើរតម្កើងព្រះអង្គ
ដោយវាយស្គរយ៉ាងពីរោះ!
ចូរសរសើរតម្កើងព្រះអង្គ
ដោយវាយស្គរឲ្យលាន់ឮរំពង!
៦ ចូរឲ្យអ្វីៗទាំងអស់ដែលមានដង្ហើមចេញចូល
សរសើរតម្កើងព្រះអម្ចាស់!
ហាលេលូយ៉ា!
885 Views
