ម៉ាឡាគី

សម្ពន្ធមេត្រីចាស់ | Old Testament 46

១. គម្ពីរធម្មវិន័យ | Pentateuch 5

២. គម្ពីរប្រវត្តិសាស្រ្ត | History 16

៣. គម្ពីរប្រាជ្ញាញាណ | Wisdom 7

៤. គម្ពីរព្យាការី | Prophet 18

សម្ពន្ធមេត្រីថ្មី | New Testament 27

១. គម្ពីរដំណឹងល្អ | Gospels 4

២. គម្ពីរប្រវត្តិសាស្រ្ត | History 1

កិច្ចការគ្រីស្តទូត (កក)
Acts of the Apostles (Ac)

៣. លិខិតសន្តប៉ូល | Paul Letter 13

៤. សំណេរសកល | Catholic Letter 5

៥. សំណេរសន្តយ៉ូហាន | John Writing 4

^{កណ្ឌគម្ពីរ}
ព្យាការីម៉ាឡាគី

ពាក្យលំនាំ

(ព្យាការីម៉ាឡា‌គី)

ពាក្យលំនាំ

កណ្ឌគម្ពីរម៉ាឡា‌គីត្រូវបានសរសេរឡើងនៅដើមសតវត្សទី ៥ មុនគ្រីស្ត‌សករាជ គឺប្រមាណជិតមួយ‌រយឆ្នាំ ក្រោយជនជាតិអ៊ីស្រា‌អែលធ្វើមាតុ‌ភូមិ‌និវត្តន៍។ ច្រើនឆ្នាំក្រោយពេលវិលត្រឡប់មកដល់ស្រុកវិញ សហគមន៍អ៊ីស្រា‌អែលលែងមានទឹកចិត្តឆេះ‌ឆួល ឬរវី‌រវល់នឹងការគោរពបម្រើព្រះ‌ជាម្ចាស់ឲ្យបានដិតដល់ដូចមុនទៀតហើយ។ ប្រមាណសាម‌សិប ឬហា‌សិបឆ្នាំមុនព្យាការីម៉ាឡា‌គីថ្លែងព្រះ‌បន្ទូលនេះ ជនជាតិអ៊ីស្រា‌អែលធ្វើតាមសេចក្ដីដែលព្យាការីហាកាយ និងព្យាការីសាការីប្រកាស ដោយនាំគ្នាសង់ព្រះ‌វិហារនៅក្រុងយេរូ‌សាឡឹមឡើងវិញ (៥២០-៥១៥ មុនគ.ស.)។ ប៉ុន្តែ ចាប់ពីពេលនោះមក ស្ថាន‌ភាពផ្នែកជំនឿសាសនា និងសីល‌ធម៌ កាន់តែចុះឱនថយទៅៗ: ប្រជាជនខ្ជីខ្ជាក្នុងការគោរពបម្រើព្រះ‌ជាម្ចាស់ (១:៦-១៤) គេថ្វាយតង្វាយដោយកេងបន្លំព្រះ‌ជាម្ចាស់ (៣:៦-១១) បូជា‌ចារ្យលែងចេះបម្រើព្រះ‌ជាម្ចាស់ ហើយប្រជាជនក៏លែងប្រព្រឹត្តតាមគម្ពីរ‌វិន័យដែរ (២:១-១៦)។ ដូច្នេះ ព្យាការីម៉ាឡា‌គីដាស់‌តឿនក្រុមបូជា‌ចារ្យ និងប្រជាជនឲ្យកែប្រែចិត្តគំនិត ដោយនឹកដល់ព្រះ‌ហឫទ័យស្រឡាញ់របស់ព្រះ‌ជាម្ចាស់ (១:១-៥) ហើយលោកក៏ប្រកាសថាព្រះ‌អង្គជិតយាងមក ដើម្បីវិនិច្ឆ័យទោសពួកគេដែរ (២:១៧-៣:៥, ៣:១៣-២៤)។ លោកម៉ាឡា‌គីប្រកាសប្រាប់ប្រជាជនថា ព្រះ‌ជាម្ចាស់ចាត់បុរសម្នាក់ឲ្យមករៀបចំផ្លូវថ្វាយព្រះ‌អង្គ (៣:១) លោកនោះជាព្យាការីដូចលោកអេលី (៣:២៣)។ លោកម៉ាថាយ និងលោកលូកាយល់ថា ព្យាការីដែលមករៀបចំផ្លូវថ្វាយព្រះ‌អម្ចាស់ ដូចលោកម៉ាឡា‌គីប្រកាសទុកនេះ គឺលោកយ៉ូហាន‌បាទីស្ដ ដែលរៀបចំប្រជាជនទទួលព្រះ‌យេស៊ូ‌គ្រីស្ត (មថ ១៧:១១-១៣; កណ ១:១៧)។

លោកម៉ាឡា‌គីស្តីប្រដៅប្រជាជននៅជំនាន់របស់លោក ដែលលែងរវី‌រវល់នឹងការគោរពប្រណិ‌ប័តន៍ព្រះ‌ជាម្ចាស់ ដើម្បីរៀបចំចិត្តគំនិតពួកគេទទួលព្រះរបស់ខ្លួន។ សេចក្ដីដែលលោកប្រកាសនេះនៅតែមានប្រសិទ្ធ‌ភាពសព្វថ្ងៃដែរ គឺសូមឲ្យកណ្ឌគម្ពីរនេះជួយយើងក្នុងការរៀបចំខ្លួន ទទួលព្រះ‌អម្ចាស់នៅក្នុងជីវិតរបស់យើង។

១

ព្រះ‌អម្ចាស់បានជ្រើស‌រើសជនជាតិអ៊ីស្រា‌អែល

១ សេចក្ដីប្រកាស

នេះជាព្រះ‌បន្ទូលដែលព្រះ‌អម្ចាស់ថ្លែងមកកាន់ជនជាតិអ៊ីស្រា‌អែល តាម‌រយៈលោកម៉ាឡា‌គី។

២ ព្រះ‌អម្ចាស់មានព្រះ‌បន្ទូលថា៖

«យើងស្រឡាញ់អ្នករាល់គ្នា

តែអ្នករាល់គ្នាបែរជាពោលថា

“តើមានអ្វីបញ្ជាក់ថា

ព្រះ‌អង្គស្រឡាញ់យើងខ្ញុំ?”។

- នេះជាព្រះ‌បន្ទូលរបស់ព្រះ‌អម្ចាស់ -

ទោះបីអេសាវជាបងរបស់យ៉ាកុបក្តី

ក៏យើងស្រឡាញ់យ៉ាកុបជាង

៣ គឺយើងមិនពេញចិត្តនឹងអេសាវទេ

យើងបានធ្វើឲ្យភ្នំនៅស្រុកអេសាវ

ក្លាយទៅជាទីស្មសាន

ហើយយើងបានឲ្យឆ្កែព្រៃមករស់នៅក្នុង

ទឹកដីដែលជាចំណែកមត៌ករបស់គេ។

៤ ប្រសិនបើអេដុមពោលថា

“ពួកយើងនឹងសង់ស្រុក

ដែលវិនាសនេះឡើងវិញ!”

ឲ្យពួកគេសង់ទៅ!

យើងនឹងកម្ទេចស្រុកនោះសាជាថ្មី។

គេនឹងហៅស្រុកនោះថា

“ទឹកដីរបស់ជនទុច្ចរិត”

“ប្រជាជនដែលព្រះ‌អម្ចាស់ខ្ញាល់រហូត”។

- នេះជាព្រះ‌បន្ទូលរបស់ព្រះ‌អម្ចាស់

នៃពិភពទាំងមូល។

៥ អ្នករាល់គ្នានឹងឃើញហេតុ‌ការណ៍នេះ

ហើយពោលថា: “ព្រះ‌អម្ចាស់សម្ដែងមហិទ្ធិ‌ឫទ្ធិ

ហួសព្រំ‌ដែនស្រុកអ៊ីស្រា‌អែលទៅទៀត!”»។

ការថ្វាយ‌បង្គំមិនត្រឹមត្រូវ

៦ «ធម្មតា កូនតែង‌តែគោរពឪពុក

ហើយអ្នកបម្រើតែង‌តែគោរពម្ចាស់របស់ខ្លួន។

ប្រសិនបើយើងជាបិតាមែន

ម្ដេចក៏មិនឃើញអ្នករាល់គ្នាគោរពយើង

ក្នុងឋានៈជាបិតា?

ប្រសិនបើយើងជាម្ចាស់មែន

ម្ដេចក៏មិនឃើញអ្នករាល់គ្នាគោរពយើង

ក្នុងឋានៈជាម្ចាស់?

- នេះជាព្រះ‌បន្ទូលរបស់ព្រះ‌អម្ចាស់

នៃពិភពទាំងមូល។

រីឯអ្នករាល់គ្នាដែលជាបូជា‌ចារ្យវិញ

អ្នករាល់គ្នាមាក់‌ងាយនាមរបស់យើង

តែអ្នករាល់គ្នាពោលថា “តើយើងខ្ញុំមាក់‌ងាយ

ព្រះ‌នាមរបស់ព្រះ‌អង្គត្រង់ណា?”។

៧ អ្នករាល់គ្នាយកម្ហូបអាហារសៅហ្មង

មកដាក់នៅលើអាសនៈរបស់យើង

ហើយអ្នករាល់គ្នាពោលថា

“តើយើងខ្ញុំបានធ្វើឲ្យព្រះ‌អង្គសៅហ្មង

ត្រង់ណា?”

គឺមកពីអ្នករាល់គ្នាពោលថា:

តុរបស់ព្រះ‌អម្ចាស់មិនសូវសំខាន់ទេ!

៨ ពេលអ្នករាល់គ្នាយកសត្វខ្វាក់

មកធ្វើយញ្ញ‌បូជា

តើមិនមែនជាការអាក្រក់ទេឬ?

ពេលអ្នករាល់គ្នាយកសត្វបាក់ជើង

ឬសត្វមានជំងឺមកធ្វើយញ្ញ‌បូជា

តើមិនមែនជាការអាក្រក់ទេឬ?

បើអ្នកយកសត្វបែបនេះទៅជូន

ទេសា‌ភិបាលរបស់អ្នក

តើគាត់សុខចិត្តទទួលយក

ហើយទទួលអ្នកដោយរាក់‌ទាក់ឬ?»

- នេះជាព្រះ‌បន្ទូលរបស់ព្រះ‌អម្ចាស់

នៃពិភពទាំងមូល។

៩ ឥឡូវនេះ ចូរនាំគ្នាទូល‌អង្វរព្រះ‌ជាម្ចាស់

សូមព្រះ‌អង្គប្រណីសន្ដោសពួកយើង!

«បើអ្នករាល់គ្នានៅតែធ្វើអំពើអាក្រក់ដូច្នេះ

តើអ្នករាល់គ្នាស្មានថា យើងទទួលអ្នករាល់គ្នា

ដោយរាក់‌ទាក់ឬ?

- នេះជាព្រះ‌បន្ទូលរបស់ព្រះ‌អម្ចាស់

នៃពិភពទាំងមូល។

១០ បើនៅតែដូច្នេះ គួរឲ្យនរណាម្នាក់

ក្នុងចំណោមអ្នករាល់គ្នាបិទទ្វារព្រះ‌វិហារ

ដើម្បីកុំឲ្យអ្នករាល់គ្នាបង្កាត់ភ្លើង

ជាអសារ‌បង់នៅលើអាសនៈរបស់យើងទៀត!

យើងមិនពេញចិត្តនឹងអ្នករាល់គ្នាទេ

ហើយយើងក៏មិនទទួលតង្វាយពីដៃ

របស់អ្នករាល់គ្នាដែរ!

- នេះជាព្រះ‌បន្ទូលរបស់ព្រះ‌អម្ចាស់

នៃពិភពទាំងមូល។

១១ ចាប់ពីទិសខាងកើត រហូតដល់ទិសខាងលិច

នាមរបស់យើងប្រសើរឧត្តុង្គ‌ឧត្ដម

ក្នុងចំណោមប្រជា‌ជាតិនានា។

នៅគ្រប់ទីកន្លែង គេនាំគ្នាដុតគ្រឿងក្រអូប

ដើម្បីលើកតម្កើងនាមរបស់យើង

ព្រមទាំងនាំយកតង្វាយបរិសុទ្ធមកជាមួយផង

ដ្បិតនាមរបស់យើងប្រសើរឧត្តុង្គ‌ឧត្ដម

ក្នុងចំណោមប្រជា‌ជាតិនានា

- នេះជាព្រះ‌បន្ទូលរបស់ព្រះ‌អម្ចាស់

នៃពិភពទាំងមូល។

១២ ប៉ុន្តែ អ្នករាល់គ្នាបង្អាប់‌បង្អោននាមរបស់យើង

ដោយពោលថា:

“តុរបស់ព្រះ‌អម្ចាស់សៅហ្មងហើយ

មិនបាច់យកអាហារថ្លៃ‌ថ្នូរ

ទៅតម្កល់លើតុនោះទេ”។

១៣ អ្នករាល់គ្នាពោលថា

“ពិធីទាំងនេះគួរឲ្យធុញ‌ទ្រាន់ណាស់!”

ហើយក៏នាំគ្នាមើល‌ងាយយើង

- នេះជាព្រះ‌បន្ទូលរបស់ព្រះ‌អម្ចាស់

នៃពិភពទាំងមូល។

អ្នករាល់គ្នាយកសត្វដែលលួចគេ

សត្វពិការ ឬសត្វមានជំងឺមកឲ្យយើង

ទុកជាតង្វាយ តើយើងទទួលតង្វាយនេះ

ពីដៃរបស់អ្នករាល់គ្នាកើតឬ?

- នេះជាព្រះ‌បន្ទូលរបស់ព្រះ‌អម្ចាស់។

១៤ ជនបោកប្រាស់មុខជាត្រូវវេទនាពុំ‌ខាន!

ដ្បិតគេទុកសត្វល្អៗក្នុងហ្វូងសត្វរបស់ខ្លួន

ហើយបែរជាយកសត្វពិការ

មកធ្វើជាយញ្ញ‌បូជាថ្វាយព្រះ‌អម្ចាស់ទៅវិញ!

យើងជាព្រះ‌មហាក្សត្រដ៏ឧត្ដម

ប្រជា‌ជាតិនានាស្ញែងខ្លាចនាមរបស់យើង»

- នេះជាព្រះ‌បន្ទូលរបស់ព្រះ‌អម្ចាស់

នៃពិភពទាំងមូល។

២

ព្រះ‌បន្ទូលព្រមានពួកបូជា‌ចារ្យ

១ «ពួកបូជា‌ចារ្យអើយ

ឥឡូវនេះ យើងព្រមានអ្នករាល់គ្នាដូចតទៅ:

២ ប្រសិនបើអ្នករាល់គ្នាមិនព្រមស្ដាប់យើង

ប្រសិនបើអ្នករាល់គ្នាមិនយកចិត្តទុកដាក់

លើកតម្កើងសិរី‌រុងរឿងនាមរបស់យើងទេ

យើងនឹងធ្វើឲ្យសេចក្ដីវេទនាកើតមាន

ក្នុងចំណោមអ្នករាល់គ្នា។

យើងនឹងធ្វើឲ្យពររបស់អ្នករាល់គ្នា

ក្លាយទៅជាបណ្ដាសា

មែនហើយ យើងធ្វើឲ្យពររបស់អ្នករាល់គ្នា

ក្លាយទៅជាបណ្ដាសា

ព្រោះអ្នករាល់គ្នាមិនយកចិត្តទុកដាក់

នឹងពាក្យរបស់យើងទេ។

៣ យើងប្រកាសប្រាប់អ្នករាល់គ្នាហើយថា

យើងនឹងដាក់ទោសពូជ‌ពង្សរបស់អ្នករាល់គ្នា

យើងនឹងជះលាមកលើមុខអ្នករាល់គ្នា

គឺលាមកសត្វដែលអ្នករាល់គ្នាសម្លាប់ធ្វើ

យញ្ញ‌បូជាក្នុងពិធីបុណ្យផ្សេងៗ។

គេនឹងយកអ្នករាល់គ្នាចេញទៅក្រៅ

ជាមួយលាមកសត្វនោះដែរ។

៤ ពេលនោះ អ្នករាល់គ្នានឹងទទួលស្គាល់ថា

យើងពិតជាបានព្រមានអ្នករាល់គ្នា

ដើម្បីឲ្យសម្ពន្ធ‌មេត្រីដែលយើងចងជាមួយ

កុល‌សម្ព័ន្ធលេវី ស្ថិតនៅគង់‌វង្ស

- នេះជាព្រះ‌បន្ទូលរបស់ព្រះ‌អម្ចាស់

នៃពិភពទាំងមូល។

៥ សម្ពន្ធ‌មេត្រីដែលយើងចងជាមួយលេវីនោះ

គឺយើងផ្តល់ជីវិត និងសេចក្ដីសុខ‌សាន្តដល់គេ

ហើយឲ្យគេគោរពកោតខ្លាចនាមយើង

និងភ័យញាប់‌ញ័រនៅចំពោះមុខយើង។

៦ គេបង្រៀនវិន័យដ៏ត្រឹមត្រូវ

ហើយមិនពោលពាក្យបោកបញ្ឆោតទេ។

គេរស់នៅជាមួយយើងដោយសុខ‌សាន្ត

និងដោយទៀងត្រង់

ព្រមទាំងណែ‌នាំមនុស្សជាច្រើន

ឲ្យងាកចេញពីអំពើអាក្រក់។

៧ ពាក្យសម្ដីរបស់បូជា‌ចារ្យបង្រៀនមនុស្ស

ឲ្យស្គាល់ព្រះ‌ជាម្ចាស់

ហើយវិន័យក៏ហូរចេញពីមាត់បូជា‌ចារ្យដែរ

ព្រោះគាត់ជាអ្នកនាំព្រះ‌បន្ទូលរបស់

ព្រះ‌អម្ចាស់នៃពិភពទាំងមូល។

៨ រីឯអ្នករាល់គ្នាវិញ

អ្នករាល់គ្នាបានងាកចេញពីមាគ៌ានេះ

ការបង្រៀនរបស់អ្នករាល់គ្នា

បាននាំមនុស្សជាច្រើនឲ្យវង្វេង។

អ្នករាល់គ្នាបានបំពានលើសម្ពន្ធ‌មេត្រី

ដែលយើងបានចងជាមួយកុល‌សម្ព័ន្ធលេវី

- នេះជាព្រះ‌បន្ទូលរបស់ព្រះ‌អម្ចាស់

នៃពិភពទាំងមូល។

៩ ដូច្នេះ យើងនឹងឲ្យប្រជាជនទាំងមូល

ប្រមាថមាក់‌ងាយ បន្តុះ‌បង្អាប់អ្នករាល់គ្នា

ដ្បិតអ្នករាល់គ្នាមិនធ្វើតាមមាគ៌ារបស់យើងទេ

ហើយអ្នករាល់គ្នាបង្រៀនវិន័យ

ដល់ប្រជាជនដោយរើសមុខ»។

ការក្បត់នឹងសម្ពន្ធ‌មេត្រី តាមរបៀបពីរយ៉ាង

១០ ពួកយើងទាំងអស់គ្នាមានឪពុកតែមួយគត់

ហើយព្រះ‌ជាម្ចាស់ដែលបង្កើតពួកយើងមក

ក៏មានតែមួយព្រះ‌អង្គដែរ

ហេតុដូចម្ដេចបានជាពួកយើងក្បត់គ្នា

ទៅវិញទៅមក ដោយបំពានលើសម្ពន្ធ‌មេត្រី

ដែលព្រះ‌ជាម្ចាស់បានចងជាមួយ

បុព្វបុរសរបស់ពួកយើងដូច្នេះ?

១១ ជនជាតិយូដាបានក្បត់នឹងសម្ពន្ធ‌មេត្រីនេះ

ពួកគេបានប្រព្រឹត្តអំពើដ៏គួរស្អប់ខ្ពើមនៅ

ស្រុកអ៊ីស្រា‌អែល និងនៅក្រុងយេរូ‌សាឡឹម។

យូដាបានប្រមាថទី‌សក្ការៈរបស់ព្រះ‌អម្ចាស់

ជាកន្លែងដែលព្រះ‌អង្គស្រឡាញ់

គឺពួកគេរៀប‌ការជាមួយស្ត្រី

ដែលថ្វាយ‌បង្គំព្រះដទៃ។

១២ សូមព្រះ‌អម្ចាស់ដកអ្នកដែលប្រព្រឹត្តដូច្នេះ

ចេញពីចំណោមពូជ‌ពង្សរបស់លោកយ៉ាកុប

ហើយកុំឲ្យគេមានកូនចៅ

ដើម្បីចូលរួមថ្វាយតង្វាយដល់

ព្រះ‌អម្ចាស់នៃពិភពទាំងមូលឡើយ។

១៣ អ្នករាល់គ្នាបានប្រព្រឹត្តការមួយទៀត

គឺអ្នករាល់គ្នាយំសោកសង្រេង សម្រក់ទឹកភ្នែក

ជោកអាសនៈរបស់ព្រះ‌អម្ចាស់នៃពិភពទាំងមូល

ព្រោះព្រះ‌អង្គលែងរវី‌រវល់នឹងតង្វាយ

របស់អ្នករាល់គ្នា

ព្រះ‌អង្គមិនសព្វព្រះ‌ហឫទ័យនឹងអ្វីៗដែល

អ្នករាល់គ្នាយកមកថ្វាយទេ។

១៤ អ្នករាល់គ្នាសួរថា “ហេតុអ្វីបានជាដូច្នេះ?”

គឺកាលពីនៅក្មេង អ្នកបានរៀប‌ការ

ដោយយកព្រះ‌អម្ចាស់ធ្វើសាក្សី។

នាងជាគូ‌ស្រករ ជាភរិយាពេញច្បាប់របស់អ្នក

តែអ្នកបានក្បត់ចិត្តចោលនាង។

១៥ តើព្រះ‌អម្ចាស់មិនបានផ្សំ‌ផ្គុំអ្នកទាំងពីរ

ឲ្យទៅជារូបកាយតែមួយ

មានចិត្តគំនិតតែមួយទេឬ?

ព្រះ‌អង្គធ្វើដូច្នេះ ក្នុងគោលបំណងអ្វី?

គឺឲ្យអ្នកទាំងពីរបង្កើតកូនចៅ

ដែលជាអំណោយទានរបស់ព្រះ‌ជាម្ចាស់។

ហេតុនេះ ចូរកាន់ចិត្តគំនិតឲ្យបានល្អ

គឺម្នាក់ៗមិនត្រូវក្បត់ចិត្តភរិយា

ដែលខ្លួនបានរៀប‌ការតាំងពីក្មេងនោះឡើយ។

១៦ ព្រះ‌អម្ចាស់ ជាព្រះនៃជនជាតិអ៊ីស្រា‌អែល

មានព្រះ‌បន្ទូលថា ព្រះ‌អង្គមិនសព្វព្រះ‌ហឫទ័យ

នឹងការលែង‌លះគ្នាទេ

ហើយព្រះ‌អម្ចាស់នៃពិភពទាំងមូល

ក៏មិនសព្វព្រះ‌ហឫទ័យនឹងអ្នកដែលប្រព្រឹត្ត

អំពើឃោរ‌ឃៅបែបនេះ

ចំពោះភរិយារបស់ខ្លួនដែរ!

ហេតុនេះ ចូរកាន់ចិត្តគំនិតឲ្យបានល្អ

មិនត្រូវមានចិត្តក្បត់ឡើយ។

ថ្ងៃព្រះ‌អម្ចាស់វិនិច្ឆ័យទោសជិតមកដល់ហើយ

១៧ អ្នករាល់គ្នាធ្វើឲ្យព្រះ‌អម្ចាស់នឿយណាយ

ព្រោះតែពាក្យសម្ដីរបស់អ្នករាល់គ្នា

តែអ្នករាល់គ្នាបែរជាពោលថា “តើពួកយើង

មានធ្វើអ្វីឲ្យព្រះ‌អង្គនឿយ‌ហត់?”

គឺមកពីអ្នករាល់គ្នាពោលថា:

“អ្នកណាប្រព្រឹត្តអំពើអាក្រក់

អ្នកនោះជាមនុស្សល្អនៅចំពោះព្រះ‌ភ័ក្ត្រ

របស់ព្រះ‌អម្ចាស់

ដ្បិតព្រះ‌អង្គគាប់ព្រះ‌ហឫទ័យនឹងមនុស្ស

បែបនេះ!”

ហើយអ្នករាល់គ្នាពោលទៀតថា:

“តើព្រះដែលវិនិច្ឆ័យ ដោយយុត្តិធម៌

នៅឯណា?”។

៣

១ ព្រះ‌អម្ចាស់នៃពិភពទាំងមូល

មានព្រះ‌បន្ទូលថា៖

«យើងចាត់ទូតរបស់យើងឲ្យទៅមុន

ដើម្បីរៀបចំផ្លូវសម្រាប់យើង។

រំពេចនោះ ព្រះ‌អម្ចាស់ដែលអ្នករាល់គ្នាស្វែងរក

នឹងយាងចូលក្នុងព្រះ‌វិហាររបស់ព្រះ‌អង្គ។

រីឯទូតនៃសម្ពន្ធ‌មេត្រី ដែលអ្នករាល់គ្នារង់‌ចាំ

កំពុងតែមកហើយ»។

២ ប៉ុន្តែ នៅថ្ងៃដែលព្រះ‌អង្គយាងមកដល់

តើនរណាអាចទ្រាំបាន?

នៅពេលព្រះ‌អង្គលេចមក

តើនរណាអាចឈរបាន?

ដ្បិតព្រះ‌អង្គប្រៀបបាននឹងភ្លើងរបស់ជាងដែក

និងដូចសាប៊ូរបស់អ្នកបោកសម្លៀក‌បំពាក់។

៣ ព្រះ‌អង្គនឹងគង់កាត់ក្តី ដូចជាងទងអង្គុយ

រំលាយ និងបន្សុទ្ធសាច់ប្រាក់។

ព្រះ‌អង្គនឹងជម្រះកូនចៅលេវីឲ្យបានបរិសុទ្ធ

ព្រះ‌អង្គនឹងបន្សុទ្ធពួកគេ

ដូចបន្សុទ្ធមាស និងប្រាក់។

ពួកគេនឹងនាំតង្វាយត្រឹមត្រូវតាមវិន័យ

មកថ្វាយព្រះ‌អម្ចាស់ដោយចិត្តស្មោះ‌ត្រង់។

៤ ពេលនោះ ព្រះ‌អម្ចាស់សព្វព្រះ‌ហឫទ័យទទួល

តង្វាយរបស់អ្នកស្រុកយូដា

និងអ្នកក្រុងយេរូ‌សាឡឹម

ដូចកាលពីដើម នៅជំនាន់មុនៗ។

៥ ព្រះ‌អម្ចាស់នៃពិភពទាំងមូលមានព្រះ‌បន្ទូលថា៖

«យើងនឹងមករកអ្នករាល់គ្នា

ដើម្បីវិនិច្ឆ័យទោស។

យើងនឹងប្រញាប់‌ប្រញាល់ចោទប្រកាន់

ពួកគ្រូធ្មប់ និងពួកក្បត់ចិត្តយើង

ពួកស្បថបំពាន

ពួកសង្កត់‌សង្កិនកម្មករ

ស្ត្រី‌មេម៉ាយ និងក្មេងកំព្រា

ពួកធ្វើបាបជនបរទេស

ហើយមិនគោរពកោតខ្លាចយើង»។

តង្វាយដែលត្រូវថ្វាយដល់ព្រះ‌អម្ចាស់

៦ «យើងជាព្រះ‌អម្ចាស់ យើងមិនប្រែ‌ប្រួលទេ

រីឯអ្នករាល់គ្នាវិញ អ្នករាល់គ្នានៅតែជា

កូនចៅយ៉ាកុបដដែល»។

៧ ព្រះ‌អម្ចាស់នៃពិភពទាំងមូលមានព្រះ‌បន្ទូលថា៖

«អ្នករាល់គ្នាក៏ដូចដូន‌តារបស់អ្នករាល់គ្នាដែរ

អ្នករាល់គ្នាងាកចេញពីក្រឹត្យវិន័យរបស់យើង

គឺអ្នករាល់គ្នាមិនព្រមកាន់តាមទេ។

ចូរនាំគ្នាវិលមករកយើង

នោះយើងក៏វិលមករកអ្នករាល់គ្នាវិញដែរ។

អ្នករាល់គ្នាពោលថា:

“យើងខ្ញុំត្រូវវិលមកវិញយ៉ាងដូចម្ដេច?”។

៨ តើមនុស្សកេង‌ប្រវ័ញ្ចព្រះ‌ជាម្ចាស់

ដូចម្ដេចបាន?

អ្នករាល់គ្នាកេង‌ប្រវ័ញ្ចយើង ហើយពោលថា

“យើងខ្ញុំកេង‌ប្រវ័ញ្ចព្រះ‌អង្គដូចម្ដេចខ្លះ?”។

គឺអ្នករាល់គ្នាកេង‌ប្រវ័ញ្ច

តង្វាយមួយភាគដប់ និងតង្វាយ

ដែលអ្នករាល់គ្នាត្រូវញែកទុកសម្រាប់យើង!

៩ អ្នករាល់គ្នាត្រូវបណ្ដាសាហើយ!

ព្រោះប្រជា‌ជាតិទាំងមូល

បានកេង‌ប្រវ័ញ្ចយើង»។

១០ ព្រះ‌អម្ចាស់នៃពិភពទាំងមូលមានព្រះ‌បន្ទូលថា៖

«ចូរនាំយកតង្វាយមួយភាគដប់ទាំងប៉ុន្មាន

មកដាក់នៅក្នុងឃ្លាំង

ដើម្បីឲ្យមានស្បៀងអាហារ

ក្នុងដំណាក់របស់យើង។

ចូរធ្វើយ៉ាងនេះ ដើម្បីល្បង‌លយើងទៅ

នោះអ្នករាល់គ្នានឹងឃើញថា

យើងនឹងបើកផ្ទៃមេឃ

បង្ហូរព្រះ‌ពរដ៏លើស‌លប់មកលើអ្នករាល់គ្នា»។

១១ ព្រះ‌អម្ចាស់នៃពិភពទាំងមូលមានព្រះ‌បន្ទូលថា៖

«យើងនឹងរារាំងសត្វល្អិតមិនឲ្យបំផ្លាញ

ដំណាំរបស់អ្នករាល់គ្នា

ហើយចម្ការទំពាំង‌បាយជូររបស់អ្នករាល់គ្នា

នឹងផ្តល់ភោគ‌ផលបរិបូណ៌»។

១២ ព្រះ‌អម្ចាស់នៃពិភពទាំងមូលមានព្រះ‌បន្ទូលថា៖

«ប្រជា‌ជាតិទាំងអស់នឹងពោលថា

អ្នករាល់គ្នាពិតជាមានសុភមង្គលមែន

ដ្បិតស្រុករបស់អ្នករាល់គ្នានឹងទៅជាស្រុកមួយ

ដ៏សម្បូណ៌‌សប្បាយ»។

ព្រះ‌អម្ចាស់ប្រទានពរដល់អ្នកគោរពបម្រើព្រះ‌អង្គ

១៣ ព្រះ‌អម្ចាស់មានព្រះ‌បន្ទូលថា៖

«អ្នករាល់គ្នាពោលពាក្យទ្រគោះបោះបោក

ប្រឆាំងនឹងយើង ហើយអ្នករាល់គ្នាពោលថា:

“តើយើងខ្ញុំនិយាយគ្នាប្រឆាំងនឹងព្រះ‌អង្គ

ដូចម្ដេចខ្លះ?”។

១៤ អ្នករាល់គ្នាពោលថា:

“ពួកយើងខំបម្រើព្រះ‌ជាម្ចាស់

តែគ្មានបានការអ្វីទេ

ពួកយើងខំធ្វើតាមបង្គាប់របស់ព្រះ‌អង្គ

ហើយខំដើរតាមព្រះ‌អម្ចាស់នៃពិភពទាំងមូល

ទាំងកាន់ទុក្ខដូច្នេះ តើបានចំណេញអ្វី?

១៥ ពួកយើងសង្កេតឃើញថា

ឥឡូវនេះ មានតែមនុស្សព្រហើនទេ

ដែលមានសុភមង្គល

ហើយមនុស្សប្រព្រឹត្តអំពើអាក្រក់

បែរជាបានចម្រុងចម្រើនទៅវិញ។

ទោះបីពួកគេល្បង‌លមើលព្រះ‌ជាម្ចាស់ក្តី

ក៏ពួកគេគេចផុតពីទុក្ខទោសជា‌និច្ច”»។

១៦ ពេលនោះ អស់អ្នកដែលគោរព

កោតខ្លាចព្រះ‌អម្ចាស់

ពិភាក្សាគ្នាទៅវិញទៅមក

ព្រះ‌អម្ចាស់ព្រះ‌អង្គព្រះ‌សណ្ដាប់

ហើយយកព្រះ‌ហឫទ័យទុកដាក់នឹង

ពាក្យសម្ដីរបស់ពួកគេ។

គេបានចារឈ្មោះរបស់អស់អ្នកដែលគោរព

កោតខ្លាចព្រះ‌នាមព្រះ‌អម្ចាស់ក្នុងក្រាំងមួយ

ទុកជាទីរំឭកនៅចំពោះព្រះ‌ភ័ក្ត្រព្រះ‌អង្គ។

១៧ ព្រះ‌អម្ចាស់នៃពិភពទាំងមូលមានព្រះ‌បន្ទូលថា៖

«នៅថ្ងៃដែលយើងបានកំណត់ទុក

អ្នកទាំងនោះនឹងទៅជាប្រជា‌រាស្ដ្ររបស់យើង

ពួកគេនឹងទៅជាប្រជា‌រាស្ដ្រដែលជា

ចំណែកមត៌ករបស់យើងផ្ទាល់។

យើងនឹងត្រាប្រណីពួកគេ

ដូចឪពុកត្រាប្រណីកូនដែលបម្រើឪពុក។

១៨ ពេលនោះ អ្នករាល់គ្នានឹងឃើញសាជាថ្មីថា

តើមនុស្សសុចរិត និងមនុស្សអាក្រក់

ខុសគ្នាយ៉ាងណា

ហើយអ្នកគោរពបម្រើព្រះ‌ជាម្ចាស់

និងអ្នកមិនគោរពបម្រើ ខុសគ្នាយ៉ាងណា

១៩ (៤.១) ដ្បិតថ្ងៃដែលយើងវិនិច្ឆ័យទោស

ជិតមកដល់ហើយ

ថ្ងៃនោះ ប្រៀបបាននឹងភ្លើងដ៏សន្ធោ‌សន្ធៅ។

មនុស្សព្រហើន មនុស្សប្រព្រឹត្តអំពើអាក្រក់

នឹងប្រៀបដូចជាចំបើង។

ថ្ងៃនោះនឹងឆេះកម្ទេចពួកគេ

ឥតទុកឲ្យនៅសេស‌សល់អ្វីឡើយ

- នេះជាព្រះ‌បន្ទូលរបស់ព្រះ‌អម្ចាស់

នៃពិភពទាំងមូល។

២០ (២) រីឯអ្នករាល់គ្នាដែលកោតខ្លាច

នាមយើងវិញ

ការសង្គ្រោះរបស់យើងនឹងលេចមក

ដូចព្រះ‌អាទិត្យរះលើអ្នករាល់គ្នា

ទាំងប្រោសឲ្យអ្នករាល់គ្នា

បានជាសះ‌ស្បើយផង។

អ្នករាល់គ្នានឹងមានសេរី‌ភាព

អ្នករាល់គ្នាលោតយ៉ាងសប្បាយ

ដូចគោដែលចេញពីក្រោល។

២១ (៣) នៅថ្ងៃដែលយើងកំណត់ទុក

អ្នករាល់គ្នានឹងដើរជាន់មនុស្សអាក្រក់

ពួកគេនឹងប្រៀបដូចជាផេះ

នៅក្រោមបាតជើងរបស់អ្នករាល់គ្នា។

នេះជាព្រះ‌បន្ទូលរបស់ព្រះ‌អម្ចាស់

នៃពិភពទាំងមូល។

២២ (៤) ចូរនឹកដល់វិន័យរបស់ម៉ូសេ

ជាអ្នកបម្រើរបស់យើង

ព្រមទាំងវិន័យ និងច្បាប់ផ្សេងៗ

ដែលយើងបានប្រគល់ឲ្យ

ជនជាតិអ៊ីស្រា‌អែលទាំងមូលនៅភ្នំហូរែប។

២៣ (៥) ចំណែកឯយើងវិញ

យើងនឹងចាត់ព្យាការីអេលីឲ្យមក

មុនថ្ងៃរបស់ព្រះ‌អម្ចាស់ ជាថ្ងៃដ៏ឧត្តុង្គ‌ឧត្ដម

គួរឲ្យស្ញែងខ្លាច។

២៤ (៦) គាត់នឹងបង្វែរចិត្តឪពុកទៅរកកូន

ហើយបង្វែរចិត្តកូនទៅរកឪពុក។

ដូច្នេះ យើងនឹងមិនមកបំផ្លាញស្រុករបស់

អ្នករាល់គ្នាឲ្យវិនាសសូន្យឡើយ»៕

563 Views

Post Views: 550

១. គម្ពីរធម្មវិន័យ | Pentateuch 5

២. គម្ពីរប្រវត្តិសាស្រ្ត | History 16

៣. គម្ពីរប្រាជ្ញាញាណ | Wisdom 7

៤. គម្ពីរព្យាការី | Prophet 18

១. គម្ពីរដំណឹងល្អ | Gospels 4

២. គម្ពីរប្រវត្តិសាស្រ្ត | History 1

៣. លិខិតសន្តប៉ូល | Paul Letter 13

៤. សំណេរសកល | Catholic Letter 5

៥. សំណេរសន្តយ៉ូហាន | John Writing 4

កណ្ឌគម្ពីរព្យាការីម៉ាឡាគី