តើហេតុអ្វីខ្ញុំមានអារម្មណ៍ថាមានសម្ពាធ? | Why do I feel pressure?

មាតិកា | Contents

តើហេតុអ្វីខ្ញុំមានអារម្មណ៍ថាមានសម្ពាធ?
Why do I feel pressure?

យើងកំពុងតែរស់នៅក្នុងពិភពលោកដែលងាយនឹងទទួលបានសារដែលពោរពេញដោយរូបភាពកាមគុណ។ យើងត្រូវចេះប្រើប្រាស់រូបភាពប្រកបដោយឫទ្ធានុភាពតាមប្រពៃណីគ្រីស្តសាសនារបស់យើងដើម្បីប្រឈមនឹងបញ្ហាទាំងនោះ។

ព្រះជាម្ចាស់ស្រឡាញ់យើងគ្រប់គ្នា ហើយព្រះវិញ្ញាណព្រះអង្គអញ្ជើញយើងឱ្យបង្ហាញអត្តសញ្ញាណខ្លួនជានរណា និងជំនឿរបស់យើងលើព្រះអង្គរហូតដល់ទីជម្រៅបំផុតនៃបទពិសោធន៍ និងទំនាក់ទំនងនៅក្នុងជីវិតប្រចាំថ្ងៃរបស់យើង។ ប៉ុន្តែ ការណ៍នេះមិនមែនងាយស្រួលជានិច្ចនោះទេ ហើយពេលខ្លះយើងក៏ពិបាកទប់ទល់នឹងសម្ពាធដែលសង្គមសម័យទំនើបដាក់មកលើយើងផងដែរ។

តើព្រះគម្ពីរចែងអ្វីខ្លះ?

«ព្រះ‌អង្គជាបុត្រដ៏ជាទីស្រឡាញ់របស់យើង
យើងគាប់‌ព្រះហឫទ័យនឹងព្រះ‌អង្គណាស់!»
(មក ១,១១)

ព្យាការីយ៉ូណាសមានឈ្មោះល្បីក្នុងគម្ពីរសម្ពន្ធមេត្រីទី១ គាត់ព្យាយាមរកមធ្យោបាយគេចចេញពីការត្រាស់ហៅរបស់ព្រះជាម្ចាស់ ហើយចុងក្រោយគាត់នៅក្នុងពោះត្រីដ៏ធំ។ កាលណាយើងផ្តល់សេចក្តីស្រឡាញ់របស់ព្រះជាម្ចាស់ដល់អ្នកដទៃ ហើយនៅក្នុងជីវិតយើងមានមនុស្សដែលចេះបង្ហាញសេចក្តីស្រឡាញ់របស់ព្រះជាម្ចាស់ នោះយើងអាចកសាងទំនាក់ទំនង អាចសម្តែងអំពីអារម្មណ៍ និងតម្រូវការរបស់យើងដល់ក្រុមគ្រួសារ និងមិត្តភក្ដិដែលនៅជុំវិញយើង។

លទ្ធិព្រះសហគមន៍ចែងអ្វីខ្លះ?

ខ្ញុំសូមអញ្ជើញបងប្អូនរាល់គ្នាឱ្យមានចិត្តសង្ឃឹមជានិច្ច។
សេចក្តីសង្ឃឹមដាស់យើងឱ្យចេះស្រេកឃ្លាន ចេះប៉ងប្រាថ្នា ចេះស្វែងរកជីវិតគ្រប់លក្ខណៈ និងឧត្តមភាពដូចជា សេចក្តីពិត សេចក្តីសប្បុរស សោភ័ណភាព យុត្តិធម៌ និងសេចក្តីស្រឡាញ់ ដែលបំពេញដួងចិត្ដ និងលើកវិញ្ញាណរបស់យើងឱ្យស្គាល់សេចក្តីថ្លៃថ្នូរ។ សេចក្តីសង្ឃឹមអាចនាំយើងឱ្យមានឧត្ដមគតិ ដែលញ៉ាំងឱ្យជីវិតយើងកាន់តែស្រស់ស្អាត និងមានប្រយោជន៍។
(Fratelli Tutti, លេខ ៥៥)

ការរិះគិត

រៀងរាល់ថ្ងៃ តែងមានរឿងហេងស៊យបណ្តាលឱ្យយើងជួបស្ថានការលំបាក ដែលនាំឱ្យចោទសំណួរថា តើយើងជានរណា ហើយនរណាជាមិត្ដរបស់យើង។ ការលំបាកទាំងនេះអាចបណ្តាលឱ្យអារម្មណ៍យើងមានមន្ទិល និងប៉ះពាល់ដល់សុខភាពផ្លូវចិត្តរបស់យើង។ នៅក្នុងសង្គម រូបភាព និងចំនងជើងទាក់ទងខាងផ្លូវភេទ តែងមានរំលេចនៅក្នុងខ្សែវីដេអូរឿងភាគ ឬការផ្សព្វផ្សាយពាណិជ្ជកម្ម តែទោះបីយ៉ាងណា យុវជនគឺជាអ្នកការពារយុត្តិធម៌ដ៏មោះមុត ដែលត្រូវដឹងថា ភេទ ជីវិតផ្លូវភេទ និងលក្ខណៈជាបុរសជាស្ត្រី គឺឆ្លុះបញ្ចាំងអំពីអត្តសញ្ញាណ និងសេចក្តីស្រឡាញ់។ របៀបដែលយើងបង្កើតទំនាក់ទំនងជាមួយអ្នកដទៃផ្តល់ឱ្យយើងមានឱកាសរីកចម្រើន និងក្លាយទៅជាមនុស្សដែលព្រះជាម្ចាស់សព្វព្រះហឫទ័យ។

នៅក្នុងកាលៈទេសៈណាក៏ដោយ អត្តសញ្ញាណរបស់ខ្ញុំ គឺបង្ហាញអំពីលក្ខណៈដោយឡែក និងលក្ខណៈរួមរបស់ព្រះជាម្ចាស់តាមរយៈកិច្ចការសប្បុរស និងយុត្តិធម៌ ដែលប្រឆាំងរាល់រូបភាពកាមគុណនៃពិភពលោកនេះ។

រៀនស្គាល់ខ្លួនឯងដើម្បីមានទំនាក់ទំនងល្អនៅក្នុងខ្លួន គឺត្រូវរៀនអស់មួយជីវិតដើម្បីគ្រប់គ្រងលើការសម្រេចកាមគុណ និងតណ្ហាភ្លាមៗតាមចំណង់របស់មនុស្ស។ ព្រះសហគមន៍ណែនាំយើងតាមរយៈគំរូរបស់សន្តសន្តីបុគ្គល ដែលបានតស៊ូដូចយើងដែរ។ ព្រះសហគមន៍ផ្តល់ដំបូន្មាន និងការអប់រំ ដែលជួយគាំទ្រយើងឱ្យមានភាពជិតស្និទ្ធ និងមានទំនាក់ទំនងល្អ ហួសពីរឿងស្នេហាខាងផ្លូវភេទ ដែលអាចល្បួងយើងឱ្យវង្វេង។

ព្រះបន្ទូល ប្រជារាស្រ្ដ សក្ការដ្ឋាន និងការអធិដ្ឋានទូលអង្វរព្រះជាម្ចាស់រំឭកយើងឱ្យដឹងថា ព្រះជាម្ចាស់បានបង្កើតយើងជារូបតំណាងដ៏ស្រស់ស្អាតរបស់ព្រះអង្គ ហើយព្រះអង្គត្រាស់ហៅយើងឱ្យបង្ហាញអត្តសញ្ញាណអំពីភេទ អំពីលក្ខណៈជាបុរសជាស្រ្តី និងអំពីជីវិតផ្លូវភេទ តាមរបៀបថ្លៃថ្នូរដើម្បីលើកតម្កើងព្រះជាម្ចាស់ និងគោរពអ្នកដទៃ។ ការប្រព្រឹត្តដូច្នេះ គឺជាការតស៊ូទប់ទល់ចំនឹងផែនការរបស់ពិភពកាមគុណនេះ។

ត្រូវដោះស្រាយសម្ពាធដូចម្តេច

ចេះសម្រួលអារម្មណ៍នៅពេលធ្លាក់ទឹកចិត្ត ដ្បិតគ្មានអ្វីកើតឡើងចំពោះអ្នករាល់គ្នាទេ សូមកុំប្រៀបធៀបខ្លួនឯងទៅតាមការចង់បាន និងតាមសម្ពាធរបស់សង្គមឡើយ។
ពឹងផ្អែក និងជជែកគ្នាដោយស្មោះត្រង់ជាមួយមនុស្សដែលអ្នករាល់គ្នាទុកចិត្ត។
បណ្តែតអារម្មណ៍ជាមួយសាច់រឿងក្នុងព្រះគម្ពីរ ឬជាមួយទេសភាពដ៏ស្រស់ត្រកាល ហើយប្រើប្រាស់ទិដ្ឋភាពទាំងនោះដើម្បីតាំងចិត្តអធិដ្ឋាន។
ធ្វើដំណើរទៅកាន់ទីសក្ការដ្ឋានខាងជំនឿ ដើម្បីនាំយើងឱ្យចូលទៅក្នុងព្រះបរមកិច្ចរបស់ព្រះយេស៊ូ។
ស្វែងរកឱកាស និងយកចិត្តទុកដាក់ស្តាប់ព្រះសូរសៀង ដែលព្រះជាម្ចាស់បំភ្លឺអ្នករាល់គ្នានៅក្នុងព្រឹត្តិការណ៍ទាំងនោះ។
ចូរនឹកចាំថា អ្នករាល់គ្នាជាបុត្រដ៏ជាទីស្រឡាញ់របស់ព្រះជាម្ចាស់ ព្រះអង្គគាប់‌ព្រះហឫទ័យនឹងអ្នករាល់គ្នាណាស់។

«សូមបង‌ប្អូនយកតម្រាប់តាមព្រះ‌ជាម្ចាស់ចុះ
ព្រោះបង‌ប្អូនជាបុត្រ‌ធីតាដ៏ជាទីស្រឡាញ់របស់ព្រះ‌អង្គ។
ចូររស់នៅដោយមានចិត្តស្រឡាញ់ ដូចព្រះ‌គ្រីស្តបានស្រឡាញ់យើង
ហើយបានបូជាព្រះ‌ជន្មសម្រាប់យើង ទុកជាតង្វាយថ្វាយព្រះ‌ជាម្ចាស់
និងទុកជាយញ្ញ‌បូជាដែលគាប់ព្រះ‌ហឫទ័យព្រះ‌អង្គ។»
(អភ ៥,១-២)