តើខ្ញុំត្រូវជឿលើអ្វីនៅក្នុងពិភពព័ត៌មានក្លែងក្លាយនេះ? | What do I believe in a world of fake news?

មាតិកា | Contents

តើខ្ញុំត្រូវជឿលើអ្វីនៅក្នុងពិភពព័ត៌មានក្លែងក្លាយនេះ?
What do I believe in a world of fake news?

យើងកំពុងរស់នៅក្នុងពិភពលោកដែលព័ត៌មានពិតជះឥទ្ធិពលបន្តិចបន្តួចមកលើការបំផុសគំនិត និងជំនឿ តែបែរជាជះឥទ្ធិពលខ្លាំងលើការទាក់ទាញអារម្មណ៍ទៅវិញ។

មូលហេតុបណ្តាលមកពីបណ្តាញទំនាក់ទំនងសង្គមជាប្រភពព័ត៌មាន ដែលកើតឡើងយ៉ាងផុសផុលក្រោមផែនការមហិច្ឆតានយោបាយ និងសេដ្ឋកិច្ច។ ប៉ុន្តែ នៅពេលខ្លះ ព័ត៌មានក្លែងក្លាយក៏អាចកើតឡើងដោយគ្មានផែនការច្បាស់លាស់នោះទេ។ ជារឿយៗ នៅលើបណ្តាញទំនាក់ទំនងសង្គមមានព័ត៌មានច្រើនដែលគ្មានការត្រួតពិនិត្យច្បាស់លាស់ ហើយរីកសាយឆាប់រហ័ស និងទូលំទូលាយ បណ្តាលឱ្យមនុស្សទទួលបានព័ត៌មានក្លែងក្លាយថាជាការពិត។

តើលទ្ធិព្រះសហគមន៍ចែងអ្វីខ្លះ?

នៅក្នុងពាក្យដាស់តឿន ព្រះគ្រីស្តមានព្រះជន្មគង់នៅ សម្តេចប៉ាប ហ្រ្វង់ស៊ីស្កូ ទូន្មានយើងថា៖

«ការផ្សព្វផ្សាយព័ត៌មានក្លែងក្លាយដ៏សម្បើមបែបនេះឆ្លុះបញ្ចាំងអំពីវប្បធម៌ដែលបាត់បង់អត្ថន័យនៃសេចក្តីពិត
និងបង្វែរការពិតដើម្បីចំណេញផលប្រយោជន៍ដល់បុគ្គលមួយក្រុមតូច។»
(Christus Vivit លេខ៨៩)

ក៏ប៉ុន្តែ សម្តេចប៉ាប ហ្រ្វង់ស៊ីស្កូ ក៏កត់សម្គាល់អំពីសារៈសំខាន់នៃប្រព័ន្ធអ៊ីនធឺណែត និងបណ្តាញទំនាក់ទំនងសង្គមផងដែរថា “ជាមធ្យោបាយដ៏មានសក្ដានុពលយ៉ាងខ្លាំងសម្រាប់ការសន្ទនា ទំនាក់ទំនង និងការចែករំលែក ទាំងព័ត៌មាន និងចំនេះដឹងរវាងគ្នានឹងគ្នាផងដែរ។ ម្យ៉ាងវិញទៀត ពិភពបច្ចេកវិទ្យាព័ត៌មានគឺជាការចូលរួមចំណែកកសាងសង្គម នយោបាយ និងពលរដ្ឋសកម្ម ព្រមទាំងអាចចែកចាយព័ត៌មានឯករាជ្យដ៏មានប្រសិទ្ធភាព ដើម្បីការពារជនងាយរងគ្រោះបំផុត និងការរំលោភពបំពានទៅលើសិទ្ធិរបស់ពួកគេផងដែរ។”

តើព្រះគម្ពីរចែងអ្វីខ្លះ?

«ហេតុនេះហើយ បានជាព្រះ‌អង្គមិនរកយុត្តិ‌ធម៌ឱ្យយើងខ្ញុំទេ
យើងខ្ញុំគ្មានចិត្តទៀងត្រង់សោះ។
សេចក្ដីពិតបានបាត់ពីខ្លួនយើងខ្ញុំទៅហើយ
សូម្បីអ្នកដែលងាកចេញពីអំពើអាក្រក់
ក៏ត្រូវអ្នកដទៃប្លន់យកអ្វីៗដែលគេមាន។
ព្រះ‌អម្ចាស់បានទតមើលការទាំងនេះ
ហើយយល់ឃើញថាសុទ្ធតែអាក្រក់
គឺគ្មានយុត្តិ‌ធម៌ទាល់តែសោះ។»
(អស ៥៩,១៤-១៥)

ព្យាការីអាចបរិយាយអំពីអ្វីដែលកំពុងតែកើតឡើងនៅក្នុងសង្គមយើងនាពេលបច្ចុប្បន្នេះ។ គេមើលងាយ និងបៀតបៀនអ្នកប្រកាសសេចក្តីពិត។ យើងត្រូវបញ្ឈប់គាំទ្រអំពើកាឡៃការពិត ហើយត្រូវរារាំងមិនឱ្យបានសម្រេចផងដែរ។

នៅក្នុងសកលនីយកម្មនេះ យើងត្រូវតែមានប្រាជ្ញាឈ្លាសវៃ និងចេះថ្លឹងថ្លែងឱ្យបានច្បាស់លាស់ជាងពេលណាទាំងអស់ ដើម្បីបង្កើតទំនាក់ទំនងតាមប្រព័ន្ធបច្ចេកវិទ្យា និងចេះប្រឈមទៅនឹងការរីករាលដាលយ៉ាងឆាប់រហ័សនៃព័ត៌មានក្លែងក្លាយ។

ការរិះគិត

ព័ត៌មានគ្រប់ប្រភេទ ទាំងព័ត៌មានទាក់ទាញ ទាំងពាក្យសន្ទរកថាអសុរោះ និងព័ត៌មានក្លែងក្លាយសុទ្ធតែបំផុសអារម្មណ៍របស់យើង។ ទោះបីយ៉ាងណា យើងត្រូវចេះអភិវឌ្ឍប្រព័ន្ធការពារខ្លួនយើង ដោយអានយឺតៗ និងវិភាគអំពីព័ត៌មានទាំងនោះ។ ដំណាក់កាលចាំបាច់ដំបូង គឺចេះពញ្ញាក់ស្មារតីខ្លួនឯងនៅពេលអានសេចក្តីណាមួយដើម្បីដឹងថាត្រឹមត្រូវតាមការពិតខ្លាំងពេក ឬខុសពីការពិតខ្លាំងពេក។ បើមានសាច់រឿងណាដែលអ្នកចាប់អារម្មណ៍ដោយប្រការណាមួយ សូមអានយឺតៗ និងពិនិត្យឱ្យបានល្អិតល្អន់។ ក្រោយមក ត្រូវដឹងថាសាច់រឿងនេះមានប្រភពមកពីណា និងរកមើលចំនុចខ្វះខាត ឬចំនុចខុសគ្នារវាងអត្ថន័យ និងប្រភពជាក់ស្តែងក្នុងសាច់រឿងនោះ។ ចូរអនុវត្តឱ្យបានទៀងទាត់តាមដំណាក់កាលទាំងនេះ នោះអ្នករាល់គ្នាអាចយល់សាច់រឿងកាន់តែប្រសើរឡើង ឬប្រសិនបើមាននរណាម្នាក់និយាយខុស ឬនិយាយឆ្គងសាច់រឿង អ្នករាល់គ្នាក៏អាចស្វែងរកសេចក្តីពិតបានស៊ីជម្រៅផងដែរ។

ពាក្យអធិដ្ឋានរបស់សម្តេចប៉ាប ហ្រ្វង់ស៊ីស្កូ

បពិត្រព្រះអម្ចាស់!
សូមបង្រៀនទូលបង្គំកុំឱ្យគិតតែពីខ្លួនឯង និងចេះស្វែងរកសេចក្តីពិត។
សូមបង្រៀនទូលបង្គំឱ្យចេះធ្វើដំណើរ ចេះមើល ចេះស្ដាប់ ដោយមិនប្រញាប់វិនិច្ឆ័យ និងវាយតម្លៃឡើយ។
សូមបង្រៀនទូលបង្គំឱ្យទៅទីកន្លែងណាដែលគ្មានអ្នកទៅ ចេះយកពេលវេលាស្វែងយល់
ចេះចាប់អារម្មណ៍នូវអ្វីដែលចាំបាច់ កុំឱ្យចាញ់បញ្ឆោតរឿងឥតបានការ និងចេះបែងចែកការពិតពីការប្រឌិត។
សូមព្រះអង្គប្រោសប្រទានឱ្យយើងខ្ញុំចេះទទួលស្គាល់ព្រះអង្គដែលមានព្រះជន្មគង់នៅក្នុងពិភពលោកយើងនេះ
និងចេះនាំអ្នកឯទៀតឱ្យស្គាល់ព្រះអង្គនូវអ្វីដែលយើងខ្ញុំបានជួបព្រះអង្គដោយចិត្តស្មោះត្រង់ផង។
អាមែន។

58 Views

Post Views: 49