តើអ្នកជាអ្នកដឹកនាំ ឬជាអ្នកដើរតាម? | Are you a leader or a follower?

មាតិកា | Contents

តើអ្នកជាអ្នកដឹកនាំ ឬជាអ្នកដើរតាម?
Are you a leader or a follower?

ក្រុមអ្នកដឹកនាំល្អ គឺជាមនុស្សដែលចេះយកឈ្នះលើឧបសគ្គនៅក្នុងជីវិត ដើម្បីក្លាយទៅជាមនុស្សដែលអ្នកដទៃយកតម្រាប់តាម។

កាលណាពួកគេរស់នៅដោយអំពើសុចរិត មនសិការមោះមុត និងការលះបង់ដោយមិនគិតពីខ្លួនឯង នោះរឿងរ៉ាវរបស់ពួកគេជួយបំភ្លឺយើងឱ្យជឿថា យើងអាចជោគជ័យតាមគោលបំណងរបស់យើងស្រដៀងគ្នាដែរ។ ក្រុមអ្នកដឹកនាំទាំងនោះកើតឡើងដោយការបណ្តុះបណ្តាល មិនមែនកើតមកពីកំណើតនោះទេ។

មុនពេលមានឈ្មោះល្បីល្បាញ អ្នកដឹកនាំជាច្រើននាក់ចាប់ផ្តើមរៀនជាប្រចាំតាំងពីនៅក្នុងក្រុមគ្រួសារ នៅក្នុងសាលា ឬនៅក្នុងសហគមន៍ជាដើម។ ពួកគេព្យាយាមមើល ស្វែងយល់ និងរៀនដោយស្ងាត់ស្ងៀមនូវអ្វីដែលចាំបាច់ ដើម្បីអភិវឌ្ឍ និងបង្កើនជីវភាពរស់នៅរបស់មនុស្សដែលពួកគេស្ម័គ្រចិត្តបម្រើ។ ដើម្បីដើរតួនាទីជាគំរូ ពួកគេបានធ្វើកិច្ចការជាច្រើនដើម្បីបំភ្លឺអស់អ្នកដែលចង់យកតម្រាប់តាមគំរូរបស់ពួកគេ។

តើព្រះគម្ពីរចែងអ្វីខ្លះ?

ក្រុមអ្នកដឹកនាំជាគ្រីស្តបរិស័ទយកតម្រាប់តាមព្រះយេស៊ូទាំងស្រុង។ ព្រះអង្គរស់នៅដោយដាក់ខ្លួនយ៉ាងសាមញ្ញ និងយកចិត្តទុកដាក់យ៉ាងខ្លាំងចំពោះជនក្រីក្រ និងអនាថជន ដែលឆ្លុះបញ្ចាំងអំពីព្រះហប្ញទ័យប្រណីសណ្តោស និងស្អាតហ្មត់ហ្មងឥតប្រែប្រួល ដែលទាក់ទាញចិត្តអ្នកដទៃយ៉ាងខ្លាំង។

ព្រះយេស៊ូបង្ហាញឱ្យដឹងថា ការស្រឡាញ់ព្រះជាម្ចាស់ និងស្រឡាញ់បងប្អូនឯទៀតដោយចិត្តមោះមុត និងចិត្តមេត្តា គឺជាកត្ដាដ៏ចាំបាច់ក្នុងភាពជាអ្នកដឹកនាំ ជាជាងការស្វែងរកឋានន្តរ ចំណេះដឹង និងទេពកោសល្យក្នុងសង្គម។ ព្រះយេស៊ូបង្ហាញអំពីគុណភាពជាអ្នកដឹកនាំតាមរបៀបពីរយ៉ាងដ៏ពិសេសសម្រាប់យើងរៀនសូត្រតាមគឺ មនសិការបម្រើ និងឆន្ទៈបូជាជីវិត។

«ដ្បិតបុត្រមនុស្សមកក្នុងពិភព‌លោកនេះ
មិន‌មែនដើម្បីឱ្យគេបម្រើលោកឡើយ
គឺលោកមកបម្រើគេវិញ ព្រមទាំងបូជាជីវិត
ដើម្បីលោះមនុស្សទាំងអស់ផង។»
(មក ១០,៤៥)

ក្រុមអ្នកដឹកនាំជាគ្រីស្តបរិស័ទត្រូវតែមានបេះដូងជាអ្នកបម្រើ ហើយចេះត្រៀមខ្លួនប្រឈមមុខនឹងគូប្រជែង និងការបដិសេធដោយចិត្តអត់ធ្មត់ ក្លាហាន និងចិត្តសង្ឃឹមជានិច្ច។

តើព្រះជាម្ចាស់ត្រាស់ហៅអ្នករាល់គ្នាឱ្យក្លាយទៅជាអ្នកដឹកនាំ?

ព្រះជាម្ចាស់ត្រាស់ហៅលោកម៉ូសេក្នុងវ័យ៨០ឆ្នាំពីភាពឯកោរបស់គាត់ ដើម្បីដឹកនាំប្រជារាស្រ្តព្រះអង្គដោយធ្វើដំណើរតាមផ្លូវដ៏សែនគ្រោះថ្នាក់ចាកចេញពីទេសភាពទៅកាន់សេរីភាព។ ព្រះអម្ចាស់ត្រាស់ហៅកុមារសាមូអែលក្នុងវ័យ១២ឆ្នាំដែលកំពុងតែដេកឱ្យកា្លយទៅជាព្យាការី។ ព្រះនាងម៉ារី គឺជាយុវនារីនៅពេលពេលទេវទូតជូនដំណឹងថា ព្រះជាម្ចាស់បានជ្រើសរើសនាងឱ្យក្លាយទៅជាមាតានៃព្រះបុត្រាដ៏ជាទីស្រឡាញ់របស់ព្រះជាម្ចាស់។ វ័យមិនមែនជាឧបសគ្គចំពោះបុគ្គលណាម្នាក់ពីភាពជាអ្នកដឹកនាំឡើយ។

ព្រះជាម្ចាស់អាចត្រាស់ហៅអ្នករាល់គ្នាឱ្យបម្រើ និងឱ្យដឹកនាំដោយហេតុផលណាមួយ ក្នុងគ្រាណាមួយ ឬពេញមួយជីវិត។ ដូចព្យាការីយេរេមី កុំនិយាយថាៈ “ទូលបង្គំនៅក្មេងពេកនោះឡើយ!” ឬដូចលោកម៉ូសេពោលថាៈ “ទូលបង្គំក្រីក្រ” ឬដូចលោកសិលាសារភាពថាៈ “ទូលបង្គំជាមនុស្សបាប“។ យើងទាំងអស់គ្នា គ្មាននរណាម្នាក់ចាប់ផ្តើមជាមួយព្រះជាម្ចាស់ដោយល្អឥតខ្ចោះនោះទេ។ ព្រះជាម្ចាស់មិនត្រាស់ហៅអ្នកដែលមានគុណភាពនោះទេ គឺព្រះអង្គប្រោសឱ្យមនុស្សដែលព្រះអង្គត្រាស់ហៅមានគុណភាព។ ដូចព្យាការីអេសាយហ៊ានពោលថាៈ “ទូល‌បង្គំនៅទីនេះស្រាប់ហើយ! សូមព្រះ‌អង្គចាត់ទូល‌បង្គំចុះ!“។

វីដេអូសក្ខីភាព

50 Views

Post Views: 45