អែសរ៉ា

សម្ពន្ធមេត្រីចាស់ | Old Testament 46

១. គម្ពីរធម្មវិន័យ | Pentateuch 5

២. គម្ពីរប្រវត្តិសាស្រ្ត | History 16

៣. គម្ពីរប្រាជ្ញាញាណ | Wisdom 7

៤. គម្ពីរព្យាការី | Prophet 18

សម្ពន្ធមេត្រីថ្មី | New Testament 27

១. គម្ពីរដំណឹងល្អ | Gospels 4

២. គម្ពីរប្រវត្តិសាស្រ្ត | History 1

កិច្ចការគ្រីស្តទូត (កក)
Acts of the Apostles (Ac)

៣. លិខិតសន្តប៉ូល | Paul Letter 13

៤. សំណេរសកល | Catholic Letter 5

៥. សំណេរសន្តយ៉ូហាន | John Writing 4

^{កណ្ឌគម្ពីរ}
អែសរ៉ា

ពាក្យលំនាំ

ពាក្យលំនាំ

គម្ពីរអែសរ៉ា រៀប‌រាប់ប្រវត្តិជនជាតិអ៊ីស្រា‌អែល បន្តពីគម្ពីររបា‌ក្សត្រទី១ និងទី២ ហើយចងក្រងឡើងក្នុងគោលគំនិតតែមួយ និងទស្សនៈតែមួយដូចគម្ពីររបា‌ក្សត្រដែរ។

គម្ពីរនេះចាប់ផ្តើមដោយរៀប‌រាប់អំពីរាជា‌នុញ្ញាតរបស់ព្រះ‌ចៅស៊ីរូស ឲ្យជនជាតិយូដាវិលត្រឡប់ទៅសង់ព្រះ‌វិហារនៅក្រុងយេរូ‌សាឡឹមឡើងវិញ (ចំពូក ១)។ ពេលនោះ ជនជាតិយូដាដែលជាប់ជាឈ្លើយសឹក នាំគ្នាវិលត្រឡប់ទៅស្រុកវិញ (ចំពូក ២)។ សកម្ម‌ភាពដំបូងបង្អស់ដែលពួកគេចាប់ផ្តើមធ្វើនៅក្រុងយេរូ‌សាឡឹម គឺដំឡើងអាសនៈ ហើយធ្វើពិធីគោរពបម្រើព្រះ‌អម្ចាស់ឡើងវិញ (ចំពូក ៣)។ ប៉ុន្តែ ពួកគេបានជួបប្រទះនឹងការប្រឆាំងពីសំណាក់បច្ចា‌មិត្តមួយចំនួន ដែលតម្រូវឲ្យមានទំនាក់‌ទំនងតាមសំបុត្រជាមួយរដ្ឋ‌បាលពែរ្ស រហូតទាល់តែជនជាតិយូដាទទួលលិខិតបញ្ជាក់ពីព្រះ‌ចៅអធិ‌រាជ ក្នុងការសាងសង់នេះ (ចំពូក ៤‑៦)។

ប្រមាណមួយសតវត្សកន្លងមក គឺផ្នែកទីពីរនៃគម្ពីរនេះ មានរៀប‌រាប់អំពីលោកបូជា‌ចារ្យអែសរ៉ា ទទួលរាជា‌នុញ្ញាតពីព្រះ‌ចៅអ័រតា‌ស៊ែរ‌សេស ដើម្បីរៀប‌ចំសកម្ម‌ភាពផ្នែកខាងជំនឿសាសនា នៅក្រុងយេរូ‌សាឡឹមឡើងវិញ។

ខ្លឹមសារនៃកណ្ឌគម្ពីរអែសរ៉ាសង្កត់ទៅលើជំនឿមុត‌មាំ និងជីវិតបរិសុទ្ធ ដែលប្រជា‌រាស្ដ្ររបស់ព្រះ‌ជាម្ចាស់ត្រូវតែប្រកាន់យក ហើយបង្ហាញអំពីទឹកចិត្តក្លា‌ហាន និងការប្ដេជ្ញាចិត្តរបស់បូជា‌ចារ្យមួយរូប ដើម្បីណែ‌នាំប្រជា‌ជាតិអ៊ីស្រា‌អែលឲ្យមានជំនឿត្រឹម‌ត្រូវលើព្រះ‌ជាម្ចាស់ឡើងវិញ។

១

មាតុ‌ភូមិ‌និវត្តន៍ក្រោមការដឹកនាំរបស់លោកសូរ៉ូ‌បាបិល

ព្រះ‌ចៅស៊ីរូសអនុញ្ញាតឲ្យសង់ព្រះ‌វិហារឡើងវិញ

១ ក្នុងឆ្នាំទីមួយនៃរជ្ជ‌កាលព្រះ‌ចៅស៊ីរូស ជាស្តេចស្រុកពែរ្ស ព្រះ‌អម្ចាស់បានជំរុញព្រះ‌ហឫ‌ទ័យព្រះ‌ចៅស៊ីរូសឲ្យចេញសេចក្ដីប្រកាស និងរាជក្រឹត្យ ក្នុងអាណា‌ចក្ររបស់ស្តេចទាំងមូល ស្របតាមព្រះ‌បន្ទូលដែលព្រះ‌អង្គបានថ្លែងតាម‌រយៈលោកយេរេមី មានសេចក្ដីដូចតទៅ៖

២ «ព្រះ‌ចៅស៊ីរូស ជាស្តេចស្រុកពែរ្ស មានរាជ‌ឱង្ការដូចតទៅ: ព្រះ‌អម្ចាស់ ជាព្រះនៃស្ថានបរម‌សុខ បានប្រគល់នគរទាំងអស់នៅលើផែន‌ដីមកឲ្យយើងគ្រប់‌គ្រង។ ព្រះ‌អង្គបញ្ជាឲ្យយើងសង់ព្រះ‌ដំណាក់មួយ នៅក្រុងយេរូ‌សាឡឹមក្នុងស្រុកយូដា ថ្វាយព្រះ‌អង្គ។ ៣ ក្នុងចំណោមអ្នករាល់គ្នា អ្នកណាជាប្រជា‌រាស្ដ្ររបស់ព្រះ‌អង្គ សូមឲ្យអ្នកនោះវិលទៅកាន់ក្រុងយេរូ‌សាឡឹម ក្នុងស្រុកយូដាវិញ ហើយសង់ព្រះ‌ដំណាក់របស់ព្រះ‌អម្ចាស់ ជាព្រះនៃជនជាតិអ៊ីស្រា‌អែល គឺជាព្រះដែលគង់នៅក្រុងយេរូ‌សាឡឹម។ សូមឲ្យព្រះរបស់គេគង់នៅជាមួយគេ។ ៤ ជនជាតិអ៊ីស្រា‌អែលដែលនៅសេស‌សល់ ទោះបីរស់នៅទីណាក៏ដោយ ប្រជាជននៅទីនោះត្រូវតែផ្តល់វិភាគ‌ទានដល់ពួកគេ ជាប្រាក់ មាស ទ្រព្យ‌សម្បត្តិ និងសត្វ ព្រមទាំងថ្វាយតង្វាយស្ម័គ្រចិត្ត សម្រាប់ព្រះ‌ដំណាក់របស់ព្រះ‌ជាម្ចាស់ នៅក្រុងយេរូ‌សាឡឹមផង»។

៥ ពេលនោះ ពួកមេក្រុមគ្រួសារនៃកុល‌សម្ព័ន្ធយូដា និងកុល‌សម្ព័ន្ធបេន‌យ៉ា‌មីន ក្រុមបូជា‌ចារ្យ ក្រុមលេវី គឺអស់អ្នកដែលព្រះ‌ជាម្ចាស់ជំរុញចិត្ត នាំគ្នាក្រោកឡើង រៀប‌ចំខ្លួនទៅសង់ព្រះ‌ដំណាក់របស់ព្រះ‌អម្ចាស់ នៅក្រុងយេរូ‌សាឡឹម។ ៦ អ្នកជិតខាងរបស់ពួកគេយករបស់របរធ្វើពីប្រាក់ ពីមាស ព្រមទាំងទ្រព្យ‌សម្បត្តិ សត្វ និងវត្ថុដ៏មានតម្លៃគ្រប់យ៉ាង មកជួយឧបត្ថម្ភពួកគេ ហើយក៏មានតង្វាយស្ម័គ្រចិត្តថែមទៀតផង។

៧ គ្រឿងបរិក្ខារផ្សេងៗនៃព្រះ‌ដំណាក់របស់ព្រះ‌អម្ចាស់ ដែលព្រះ‌ចៅនេប៊ូ‌កានេសាររឹបអូសពីក្រុងយេរូ‌សាឡឹម យកមកដាក់ក្នុងវិហារនៃព្រះរបស់ខ្លួននោះ ព្រះ‌ចៅស៊ីរូសប្រគល់មកវិញ។ ៨ ព្រះ‌ចៅស៊ីរូសបញ្ជាឲ្យលោកមីត្រេ‌ដាត ជាអ្នកទទួលខុសត្រូវលើរាជ‌ទ្រព្យ យករបស់ទាំងនោះប្រគល់ជូនលោកសេស‌បាសា ជាមេដឹកនាំរបស់ជនជាតិយូដា។ ៩ គ្រឿងបរិក្ខារទាំងនោះមានដូចតទៅ: ចានមាសចំនួនសាម‌សិប ចានប្រាក់ចំនួនមួយពាន់ កាំបិតចំនួនម្ភៃប្រាំបួន ១០ ពែងមាសចំនួនសាម‌សិប ពែងប្រាក់គុណ‌ភាពលេខពីរចំនួនបួន‌រយដប់ និងវត្ថុផ្សេងៗទៀតចំនួនមួយពាន់។ ១១ សរុបទាំងអស់ វត្ថុធ្វើពីមាស និងប្រាក់ មានចំនួនប្រាំ‌ពាន់បួន‌រយ។ លោកសេស‌បាសាបាននាំវត្ថុទាំងនោះទៅជាមួយ នៅពេលជនជាតិអ៊ីស្រា‌អែល ដែលជាប់ជាឈ្លើយ ចាក‌ចេញពីក្រុងបាប៊ីឡូន វិលត្រឡប់ទៅក្រុងយេរូ‌សាឡឹមវិញ។

២

ចំនួនប្រជាជនយូដាដែលវិលត្រឡប់មកស្រុកវិញ

(នេហេមី ៧.៦-៧២)

១ ក្នុងចំណោមអស់អ្នកដែលព្រះ‌ចៅនេប៊ូ‌កានេសារ ជាស្តេចស្រុកបាប៊ីឡូន ចាប់ទៅជាឈ្លើយនោះ មានមួយចំនួនវិលមកក្រុងយេរូ‌សាឡឹម និងស្រុកយូដាវិញ ហើយទៅរស់នៅតាមស្រុកភូមិរបស់គេរៀងៗខ្លួន។ ២ អ្នកទាំងនោះវិលត្រឡប់មកវិញ ក្រោមការដឹកនាំរបស់លោកសូរ៉ូ‌បា‌បិល លោកយ៉ូស៊ូអា លោកនេហេមី លោកសេរ៉ាយ៉ា លោករេឡាយ៉ា លោកម៉ាដេកាយ លោកប៊ីលសន លោកមីសប៉ារ លោកប៊ីគ‌វ៉ាយ លោករេហ៊ូម និងលោកបាណា។ ចំនួនមនុស្សក្នុងចំណោមប្រជាជនអ៊ីស្រា‌អែលមានដូចតទៅ:

៣ កូនចៅរបស់លោកប៉ារ៉ូសមាន ២១៧២នាក់

៤ កូនចៅរបស់លោកសេផា‌ទីយ៉ាមាន ៣៧២នាក់

៥ កូនចៅរបស់លោកអរ៉ាមាន ៧៧៥នាក់

៦ កូនចៅរបស់លោកប៉ាហាត់-‌ម៉ូអាប់ កូនចៅរបស់លោកយ៉ូស៊ូអា និងកូនចៅរបស់លោកយ៉ូអាប់មាន ២៨១២នាក់

៧ កូនចៅរបស់លោកអេឡាំមាន ១២៥៤នាក់

៨ កូនចៅរបស់លោកសាធូមាន ៩៤៥នាក់

៩ កូនចៅរបស់លោកសូកៃមាន ៧៦០ នាក់

១០ កូនចៅរបស់លោកបានីមាន ៦៤២នាក់

១១ កូនចៅរបស់លោកបេបាយមាន ៦២៣នាក់

១២ កូនចៅរបស់លោកអាស‌កាដមាន ១២២២នាក់

១៣ កូនចៅរបស់លោកអដូ‌នី‌កាំមាន ៦៦៦នាក់

១៤ កូនចៅរបស់លោកប៊ីគ‌វ៉ាយមាន ២ ០៥៦នាក់

១៥ កូនចៅរបស់លោកអឌីនមាន ៤៥៤នាក់

១៦ កូនចៅរបស់លោកអធែរ ដែលជាពូជ‌ពង្សរបស់លោកយេហ៊ីស‌គីយ៉ាមាន ៩៨នាក់

១៧ កូនចៅរបស់លោកបេសាយមាន ៣២៣ នាក់

១៨ កូនចៅរបស់លោកយ៉ូរ៉ាមាន ១១២នាក់

១៩ កូនចៅរបស់លោកហាស៊ូមមាន ២២៣ នាក់

២០ កូនចៅរបស់លោកគីបបារមាន ៩៥នាក់

២១ អ្នកភូមិបេថ្លេ‌ហិមមាន ១២៣នាក់

២២ អ្នកភូមិនេតូផាមាន ៥៦នាក់

២៣ អ្នកភូមិអាណា‌តូតមាន ១២៨នាក់

២៤ អ្នកភូមិអាសម៉ា‌វិតមាន ៤២នាក់

២៥ អ្នកក្រុងគៀរីយ៉ាត-‌អារីម កេភីរ៉ា និងបេរ៉ូតមាន ៧៤៣នាក់

២៦ អ្នកក្រុងរ៉ាម៉ា និងកេបាមាន ៦២១នាក់

២៧ អ្នកក្រុងមីក‌ម៉ាសមាន ១២២នាក់

២៨ អ្នកក្រុងបេត‌អែល និងអៃមាន ២២៣នាក់

២៩ អ្នកភូមិណាបូមាន ៥២នាក់

៣០ កូនចៅរបស់លោកម៉ាក‌ប៊ីសមាន ១៥៦នាក់

៣១ កូនចៅរបស់លោកអេឡាំម្នាក់ទៀតមាន ១២៥៤នាក់

៣២ កូនចៅរបស់លោកហារីមមាន ៣២០នាក់

៣៣ អ្នកក្រុងឡូដ ហាឌីដ និងអូណូមាន ៧២៥នាក់

៣៤ អ្នកក្រុងយេរីខូមាន ៣៤៥នាក់

៣៥ អ្នកក្រុងសេណាមាន ៣៦៣០នាក់

៣៦ ក្រុមបូជា‌ចារ្យ ជាកូនចៅលោកយេដាយ៉ា ក្នុងក្រុមគ្រួសាររបស់លោកយ៉ូស៊ូអាមាន ៩៧៣នាក់

៣៧ កូនចៅរបស់លោកអ៊ីមែរមាន ១ ០៥២នាក់

៣៨ កូនចៅរបស់លោកប៉ាសួរមាន ១២៤៧នាក់

៣៩ កូនចៅរបស់លោកហារីមមាន ១ ០១៧នាក់។

៤០ ក្រុមលេវី ជាកូនចៅរបស់លោកយ៉ូស៊ូអា កូនចៅរបស់លោកកាដ‌មី‌អែល និងកូនចៅរបស់លោកហូដា‌វីយ៉ាមាន ៧៤នាក់

៤១ ក្រុមចម្រៀងជាកូនចៅរបស់លោកអសាភមាន ១២៨នាក់

៤២ ក្រុមយាមទ្វារជាកូនចៅរបស់លោកសាលូម កូនចៅរបស់លោកអធែរ កូនចៅរបស់លោកថាល់‌ម៉ូន កូនចៅរបស់លោកអាក‌គូប កូនចៅរបស់លោកហាធីថា និងកូនចៅរបស់លោកសូបាយមាន ១៣៩នាក់

៤៣ ក្រុមអ្នកបម្រើព្រះ‌វិហារ ជាកូនចៅរបស់លោកស៊ីហា កូនចៅរបស់លោកហាស៊ូផា កូនចៅរបស់លោកថាបូត ៤៤ កូនចៅរបស់លោកកេរ៉ូស កូនចៅរបស់លោកស៊ីយ៉ាហា កូនចៅរបស់លោកប៉ាដូន ៤៥ កូនចៅរបស់លោកលេបាណា កូនចៅរបស់លោកហាកាបា កូនចៅរបស់លោកអាក‌គូប ៤៦ កូនចៅរបស់លោកហាកាប កូនចៅរបស់លោកសាមឡៃ កូនចៅរបស់លោកហាណន ៤៧ កូនចៅរបស់លោកគីដេល កូនចៅរបស់លោកកាហា កូនចៅរបស់លោករេយ៉ា ៤៨ កូនចៅរបស់លោករេស៊ីន កូនចៅរបស់លោកនេកូដា កូនចៅរបស់លោកកាសាម ៤៩ កូនចៅរបស់លោកអ៊ូសា កូនចៅរបស់លោកប៉ាសេអា កូនចៅរបស់លោកបេសាយ ៥០ កូនចៅរបស់លោកអស្នា កូនចៅរបស់លោកមេអ៊ូ‌នីម កូនចៅរបស់លោកនេភូ‌ស៊ីម ៥១ កូនចៅរបស់លោកបាគ‌ប៊ូគ កូនចៅរបស់លោកហាគូបា កូនចៅរបស់លោកហាហួរ ៥២ កូនចៅរបស់លោកបាស‌លូត កូនចៅរបស់លោកមេហ៊ីដា កូនចៅរបស់លោកហារសា ៥៣ កូនចៅរបស់លោកបារកូស កូនចៅរបស់លោកស៊ីសេរ៉ា កូនចៅរបស់លោកថាម៉ា ៥៤ កូនចៅរបស់លោកនេស៊ីយ៉ា កូនចៅរបស់លោកហាធីផា ៥៥ កូនចៅពួកអ្នកបម្រើរបស់ព្រះ‌បាទសាឡូម៉ូន គឺកូនចៅរបស់លោកសូថាយ កូនចៅរបស់លោកសូផេរេត កូនចៅរបស់លោកពេរូដា ៥៦ កូនចៅរបស់លោកយ៉ាឡា កូនចៅរបស់លោកដារកុន កូនចៅរបស់លោកគីដិល ៥៧ កូនចៅរបស់លោកសេផា‌ទីយ៉ា កូនចៅរបស់លោកហាធីល កូនចៅរបស់លោកប៉ូកេ‌រិត-ហា‌សេ‌បា‌អ៊ីម និងកូនចៅរបស់លោកអមី។ ៥៨ សរុបទាំងអស់ក្រុមអ្នកបម្រើព្រះ‌វិហារ និងកូនចៅពួកអ្នកបម្រើព្រះ‌បាទសាឡូម៉ូនមាន ៣៩២នាក់។

៥៩ រីឯអស់អ្នកដែលមកពីតេល-‌មេឡា តេល-‌ហារ‌សា កេរូប-អាដូន និងអ៊ីមែរ ហើយពុំស្គាល់ញាតិ‌សន្ដាន និងដូន‌តារបស់ខ្លួន ដើម្បីបញ្ជាក់ថា គេពិតជាជនជាតិអ៊ីស្រា‌អែលមែននោះគឺ ៦០ កូនចៅរបស់លោកដេឡាយ៉ា កូនចៅរបស់លោកតូប៊ី‌យ៉ា និងកូនចៅរបស់លោកនេកូដា ដែលមានចំនួន ៦៥២នាក់។

៦១ ក្នុងចំណោមក្រុមបូជា‌ចារ្យ មានកូនចៅរបស់លោកហូបាយ៉ា កូនចៅរបស់លោកហាកូស កូនចៅរបស់លោកបាស៊ី‌ឡាយ ដែលបានរៀប‌ការជាមួយកូនស្រីរបស់លោកបាស៊ី‌ឡាយ ជាអ្នកស្រុកកាឡាដ ហើយដាក់ឈ្មោះខ្លួនដូចឪពុកក្មេក។ ៦២ អ្នកទាំងនោះរកនាមត្រកូលពូជ‌ពង្សរបស់ខ្លួនពុំឃើញទេ ដូច្នេះ គេចាត់ទុកអ្នកទាំងនោះមិនបរិសុទ្ធ* ដែលពុំអាចបំពេញមុខ‌ងារជាបូជា‌ចារ្យបានឡើយ។ ៦៣ លោកទេសា‌ភិបាលហាមពួកគេបរិភោគអាហារដ៏សក្ការៈបំផុត រហូតទាល់តែបូជា‌ចារ្យណាម្នាក់សាក‌សួរអ៊ូរីម និងទូមីម*ជាមុនសិន។

៦៤ សហគមន៍ទាំងមូលមានចំនួន ៤២៣៦០នាក់ ៦៥ ដោយឥតរាប់បញ្ចូលអ្នកបម្រើប្រុសស្រីរបស់ពួកគេដែលមានចំនួន ៧៣៣៧នាក់ទេ។ ក្នុងចំណោមពួកគេមានអ្នកចម្រៀងប្រុសស្រី ២០០ នាក់។ ៦៦ មានសេះទាំងអស់ ៧៣៦ក្បាល លាកាត់ ២៤៥ក្បាល ៦៧ អូដ្ឋ ៤៣៥ក្បាល និងលា ៦៧២០ក្បាល។

៦៨ ពេលមកដល់ព្រះ‌ដំណាក់របស់ព្រះ‌អម្ចាស់នៅក្រុងយេរូ‌សាឡឹម មានមេដឹកនាំក្រុមគ្រួសារមួយចំនួនធំបានថ្វាយតង្វាយស្ម័គ្រចិត្ត សម្រាប់ការសាងសង់ព្រះ‌ដំណាក់របស់ព្រះ‌ជាម្ចាស់ នៅកន្លែងដើមឡើងវិញ។ ៦៩ ពួកគេថ្វាយសម្រាប់ការសង់ព្រះ‌វិហារ តាមសមត្ថ‌ភាពរបស់ខ្លួន គឺមានមាសចំនួនប្រាំមួយ‌ម៉ឺនមួយពាន់តម្លឹង និងប្រាក់ប្រាំ‌ពាន់ណែន ព្រមទាំងសម្លៀក‌បំពាក់បូជា‌ចារ្យចំនួនមួយ‌រយសាម‌សិបសម្រាប់។ ៧០ ក្រុមបូជា‌ចារ្យ ក្រុមលេវី ប្រជាជន ក្រុមចម្រៀង ក្រុមយាមទ្វារ ក្រុមអ្នកបម្រើព្រះ‌វិហារ និងជនជាតិអ៊ីស្រា‌អែលទាំងមូល នាំគ្នាទៅរស់នៅតាមក្រុងរបស់គេរៀងៗខ្លួនវិញ។

៣

ការសង់អាសនៈឡើងវិញ

១ លុះដល់ខែទីប្រាំពីរ ជនជាតិអ៊ីស្រា‌អែល ដែលរស់នៅតាមក្រុងរបស់ខ្លួន បានមកជួប‌ជុំគ្នានៅក្រុងយេរូ‌សាឡឹម ដោយមានចិត្តគំនិតតែមួយ។ ២ លោកយ៉ូស៊ូអា ជាកូនរបស់យ៉ូសា‌ដាក និងបូជា‌ចារ្យឯទៀតៗ ដែលជាបង‌ប្អូនលោកមកជាមួយផង ព្រមទាំងលោកសូរ៉ូ‌បា‌បិល ជាកូនរបស់លោកសាល‌ធាល និងបង‌ប្អូនរបស់លោក នាំគ្នាសង់អាសនៈរបស់ព្រះនៃអ៊ីស្រា‌អែល ដើម្បីថ្វាយតង្វាយដុតទាំងមូល ដូចមានចែងទុកក្នុងវិន័យរបស់លោកម៉ូសេ ជាអ្នកជំនិតរបស់ព្រះ‌ជាម្ចាស់។ ៣ ពួកគេនាំគ្នាសង់អាសនៈនេះនៅលើគ្រឹះចាស់ ព្រោះពួកគេភ័យ‌ខ្លាចចំពោះប្រជាជនដែលរស់នៅក្នុងស្រុក ហើយថ្វាយតង្វាយដុតទាំងមូលចំពោះព្រះ‌អម្ចាស់ នៅលើអាសនៈនោះ ទាំងព្រឹក ទាំងល្ងាច។ ៤ បន្ទាប់មក ជនជាតិអ៊ីស្រា‌អែលប្រារព្ធពិធីបុណ្យបារាំ ដូចមានចែងទុកក្នុងគម្ពីរ ហើយពួកគេថ្វាយតង្វាយដុតទាំងមូលជារៀង‌រាល់ថ្ងៃ តាមចំនួនដូចមានចែងទុកក្នុងគម្ពីរ‌វិន័យ។ ៥ ចាប់ពីពេលនោះមក ពួកគេនាំគ្នាថ្វាយតង្វាយដុតជាអចិន្ត្រៃយ៍ តង្វាយដុតសម្រាប់បុណ្យចូលខែថ្មី និងបុណ្យដ៏សំខាន់ៗទាំងប៉ុន្មាន ដែលគេប្រារព្ធថ្វាយព្រះ‌អម្ចាស់ ព្រមទាំងតង្វាយស្ម័គ្រចិត្តដែលប្រជាជនយកមកថ្វាយព្រះ‌អម្ចាស់។ ៦ ចាប់តាំងពីថ្ងៃទីមួយនៃខែទីប្រាំពីរ ពួកគេចាប់ផ្តើមថ្វាយតង្វាយដុតទាំងមូលចំពោះព្រះ‌អម្ចាស់ ទោះ‌បីគ្រឹះនៃព្រះ‌វិហាររបស់ព្រះ‌អម្ចាស់ពុំទាន់បានចាក់នៅឡើយក៏ដោយ។

៧ ពួកគេជួលជាងដាប់ថ្ម និងជាងឈើ ព្រមទាំងផ្តល់ស្បៀងអាហារ ភេសជ្ជៈ និងប្រេងអូលីវ ដល់អ្នកក្រុងស៊ីដូន និងក្រុងទីរ៉ុស ដើម្បីឲ្យពួកនោះនាំឈើតាត្រៅតាមសមុទ្រ ពីស្រុកលីបង់ រហូតមកដល់កំពង់‌ផែយ៉ាផា យោងតាមការអនុញ្ញាតរបស់ព្រះ‌បាទស៊ីរូស ជាស្តេចស្រុកពែរ្ស។ ៨ នៅឆ្នាំទីពីរ ក្នុងខែទីពីរ ក្រោយពួកគេវិលត្រឡប់មកដល់ព្រះ‌ដំណាក់នៃព្រះ‌ជាម្ចាស់ នៅក្រុងយេរូ‌សាឡឹមវិញ លោកសូរ៉ូ‌បា‌បិល ជាកូនរបស់លោកសាល‌ធាល លោកយ៉ូស៊ូអា ជាកូនលោកយ៉ូសា‌ដាក និងបូជា‌ចារ្យឯទៀតៗជាបង‌ប្អូនរបស់លោក ក្រុមលេវី ព្រមទាំងអស់អ្នកដែលត្រូវគេកៀរទៅជាឈ្លើយ ហើយវិលត្រឡប់មកក្រុងយេរូ‌សាឡឹមវិញ ក៏នាំគ្នាចាប់ផ្តើមសង់ព្រះ‌ដំណាក់។ ពួកគេចាត់តាំងក្រុមលេវី ដែលមានអាយុចាប់ពីម្ភៃឆ្នាំឡើងទៅ មើលខុសត្រូវលើការសាងសង់ព្រះ‌ដំណាក់របស់ព្រះ‌អម្ចាស់។ ៩ លោកយ៉ូស៊ូអា និងកូន ព្រមទាំងបង‌ប្អូនរបស់លោក គឺមានលោកកាដ‌មី‌អែល និងកូនរបស់លោក ដែលមកពីអំបូរហូដា‌វីយ៉ា កូនចៅរបស់លោកហេណា‌ដាដ ព្រមទាំងកូន និងក្រុមលេវីឯទៀតៗដែលជាបង‌ប្អូនរបស់ពួកគេ រួមគ្នាត្រួតពិនិត្យមើលអស់អ្នកដែលសាងសង់ព្រះ‌ដំណាក់ព្រះ‌ជាម្ចាស់។

១០ នៅពេលពួកជាងចាក់គ្រឹះព្រះ‌វិហាររបស់ព្រះ‌អម្ចាស់ គេសុំឲ្យអស់លោកបូជា‌ចារ្យដែលស្លៀកសម្លៀក‌បំពាក់សម្រាប់ពិធីបុណ្យ នាំគ្នាមក ទាំងកាន់ត្រែ ហើយក្រុមលេវីដែលជាកូនចៅរបស់លោកអសាភ កាន់ឈិង សម្រាប់ប្រគំភ្លេងសរសើរតម្កើងព្រះ‌អម្ចាស់ ដូចព្រះ‌បាទដាវីឌ ជាស្តេចស្រុកអ៊ីស្រា‌អែល បានបង្គាប់ទុក។ ១១ ពួកគេច្រៀងឆ្លើយ‌ឆ្លងគ្នាលើកតម្កើង និងអរ‌ព្រះ‌គុណព្រះ‌អម្ចាស់ថា៖

«ព្រះ‌អម្ចាស់មានព្រះ‌ហឫទ័យសប្បុរស

ព្រះ‌ហឫទ័យមេត្តាករុណារបស់ព្រះ‌អង្គ

ចំពោះជនជាតិអ៊ីស្រា‌អែល

ស្ថិត‌ស្ថេរនៅអស់កល្ប‌ជានិច្ច!»។

ប្រជាជនទាំងមូលក៏ស្រែកជយ‌ឃោស សរសើរតម្កើងព្រះ‌អម្ចាស់យ៉ាងកងរំពង ព្រោះគេចាក់គ្រឹះព្រះ‌ដំណាក់របស់ព្រះ‌អម្ចាស់។ ១២ មានបូជា‌ចារ្យជាច្រើន ព្រមទាំងក្រុមលេវី និងមេក្រុមគ្រួសារដែលមានវ័យចាស់ៗ ហើយធ្លាប់ឃើញព្រះ‌ដំណាក់ពីជំនាន់មុន នាំគ្នាយំសោកយ៉ាងខ្លាំង នៅពេលដែលឃើញគេចាក់គ្រឹះព្រះ‌ដំណាក់ថ្មីនេះ។ ប៉ុន្តែ មនុស្សជាច្រើននាំគ្នាស្រែកហ៊ោកញ្ជ្រៀវយ៉ាងសប្បាយ។ ១៣ ហេតុនេះហើយបានជាប្រជាជនពុំអាចដឹងថា សំឡេងណាជាសំឡេងហ៊ោកញ្ជ្រៀវយ៉ាងសប្បាយ ហើយសំឡេងណាជាសំឡេងយំសោកឡើយ ព្រោះប្រជាជនទាំងអស់ស្រែកយ៉ាងរំពង លាន់ឮទៅឆ្ងាយ។

៤

ការប្រឆាំងនឹងការសាងសង់ព្រះ‌វិហារឡើងវិញ

១ ពេលបច្ចា‌មិត្តរបស់កុល‌សម្ព័ន្ធយូដា និងកុល‌សម្ព័ន្ធបេន‌យ៉ា‌មីន ឮថា ពួកឈ្លើយដែលត្រឡប់មកវិញ នាំគ្នាសង់ព្រះ‌វិហារថ្វាយព្រះ‌អម្ចាស់ ជាព្រះនៃជនជាតិអ៊ីស្រា‌អែល ២ នោះពួកគេនាំគ្នាមកជួបលោកសូរ៉ូ‌បា‌បិល និងអស់លោកជាមេក្រុមគ្រួសារ ហើយជម្រាបថា៖ «ពួកយើងចង់សាងសង់ជាមួយអស់លោក ដ្បិតពួកយើងក៏គោរពបម្រើព្រះ‌ជាម្ចាស់ ជាព្រះរបស់អស់លោក ដូចជាអស់លោកដែរ ព្រមទាំងថ្វាយយញ្ញ‌បូជាចំពោះព្រះ‌អង្គ តាំងពីជំនាន់ដែលព្រះ‌ចៅអេសារ-‌ហាដូន ជាស្តេចស្រុកអាស្ស៊ីរី នាំពួកយើងមកទីនេះ»។

៣ ប៉ុន្តែ លោកសូរ៉ូ‌បា‌បិល លោកយ៉ូស៊ូអា និងអស់លោកឯទៀតៗ ជាមេក្រុមគ្រួសារនៃជនជាតិអ៊ីស្រា‌អែល ឆ្លើយទៅពួកគេថា៖ «អស់លោកមិនត្រូវចូលរួមជាមួយពួកយើង ក្នុងការសាងសង់ព្រះ‌ដំណាក់ថ្វាយព្រះរបស់ពួកយើងទេ មានតែពួកយើងប៉ុណ្ណោះដែលត្រូវសង់ថ្វាយព្រះ‌អម្ចាស់ ជាព្រះនៃជនជាតិអ៊ីស្រា‌អែល ដូចព្រះ‌ចៅស៊ីរូស ជាស្តេចស្រុកពែរ្ស បានបញ្ជាដល់ពួកយើង»។

៤ ពេលនោះ អ្នកស្រុកនាំគ្នាធ្វើឲ្យប្រជាជនយូដាបាក់ទឹកចិត្ត ព្រមទាំងបំភ័យពួកគេមិនឲ្យសាងសង់ទៀត។ ៥ អ្នកស្រុកទាំងនោះបានសូក‌ប៉ាន់ពួកទីប្រឹក្សារបស់ស្តេច ឲ្យរា‌រាំងគម្រោងការរបស់ជនជាតិយូដា តាំងពីរជ្ជ‌កាលព្រះ‌ចៅស៊ីរូស រហូតដល់រជ្ជ‌កាលព្រះ‌ចៅដារី‌យូស ជាស្តេចស្រុកពែរ្ស។

៦ នៅដើមរជ្ជ‌កាលព្រះ‌ចៅស៊ែរ‌សេស អ្នកស្រុកនោះបានផ្ញើសារមួយថ្វាយស្តេច ដើម្បីចោទប្រកាន់អ្នកស្រុកយូដា និងអ្នកក្រុងយេរូ‌សាឡឹម។

៧ នៅរជ្ជ‌កាលព្រះ‌ចៅអ័រតា‌ស៊ែរ‌សេស ជាស្តេចស្រុកពែរ្ស លោកប៊ីសឡាំ លោកមីត្រេ‌ដាត លោកតាបេ‌អែល និងបក្ស‌ពួករបស់គេ ក៏បានសរសេរសារថ្វាយព្រះ‌ចៅអ័រតា‌ស៊ែរ‌សេស ជាស្តេចស្រុកពែរ្សដែរ។ សារនោះសរសេរជាអក្សរអារ៉ាម និងភាសាអារ៉ាម។

៨ លោកទេសា‌ភិបាលរេហ៊ូម និងលោកស៊ីម‌សៃ ជាលេខា ក៏បានសរសេរសារថ្វាយព្រះ‌ចៅអ័រតា‌ស៊ែរ‌សេសស្តីអំពីក្រុងយេរូ‌សាឡឹម។ សារនោះមានសេចក្ដីដូចតទៅ៖

៩ «ទូល‌បង្គំយើងខ្ញុំ រេហ៊ូម ជាទេសា‌ភិបាល និងស៊ីម‌សៃ ជាលេខា ព្រមទាំងសហ‌ការីគ្រប់រូបនៃតំបន់ឌីន អាផា‌សាតាក់ តារប៉ែល អាផា‌រ៉ាស អេរិក បាប៊ីឡូន ស៊ូសា ដេហា អេឡាំ ១០ និងប្រជាជនឯទៀតៗដែលព្រះ‌បាទអាស្នាប៉ា ជាស្តេចដ៏ប្រសើរឧត្ដមបានកៀរឲ្យមករស់នៅក្នុងក្រុងសាម៉ារី និងតំបន់ដែលនៅប៉ែកខាងលិចទន្លេអឺប្រាត។ ល។»

១១ សេចក្ដីនៅក្នុងសារ ដែលពួកគេផ្ញើថ្វាយព្រះ‌ចៅអ័រតា‌ស៊ែរ‌សេស មានដូចតទៅ៖ «ទូល‌បង្គំយើងខ្ញុំជាប្រជាជនរស់នៅប៉ែកខាងលិចទន្លេអឺប្រាត។ ល។

១២ សូមព្រះ‌ករុណាជ្រាបថា ជនជាតិយូដាដែលត្រឡប់ពីនគររបស់ព្រះ‌ករុណា មកដល់ក្រុងយេរូ‌សាឡឹម ក្នុងចំណោមយើងខ្ញុំ កំពុងតែនាំគ្នាសង់ក្រុងអាក្រក់ និងបះ‌បោរនេះឡើងវិញ។ ពួកគេជួស‌ជុលកំពែងក្រុង ព្រមទាំងកំពុងចាក់គ្រឹះទៀតផង។ ១៣ សូមព្រះ‌ករុណាជ្រាបថា ប្រសិនបើពួកគេសង់ក្រុងនេះឡើងវិញ ហើយជួស‌ជុលកំពែងក្រុង ពួកគេមុខជាឈប់បង់ពន្ធដារ សួយ‌សារ‌អាករ និងពន្ធផ្លូវ ធ្វើឲ្យព្រះ‌ករុណាខាតបង់រាជ‌ទ្រព្យមិនខាន។ ១៤ ដោយយើងខ្ញុំជ្រកក្រោមម្លប់បារមីរបស់ព្រះ‌ករុណា យើងខ្ញុំមិនអាចព្រងើយកន្តើយ ទុកឲ្យគេបង្អាប់កិត្តិ‌យសរបស់ព្រះ‌ករុណាឡើយ ដូច្នេះ ទើបយើងខ្ញុំផ្ញើដំណឹងទាំងនេះមកថ្វាយព្រះ‌ករុណា។ ១៥ សូមព្រះ‌ករុណាឲ្យគេស្រាវ‌ជ្រាវក្នុងឯក‌សារ ដែលអយ្យកោរបស់ព្រះ‌ករុណាចងក្រងទុក នោះព្រះ‌រាជានឹងឃើញច្បាស់ថា ក្រុងនេះតែង‌តែបះ‌បោរជា‌និច្ច ព្រមទាំងបង្កឲ្យមានវិបត្តិដល់ព្រះ‌មហាក្សត្រ និងទេសា‌ភិបាលនានា។ តាំងពីដើមរៀងមក ប្រជាជននៅក្រុងនេះតែង‌តែបង្កឲ្យមានចលនាបះ‌បោរជា‌និច្ច។ ហេតុនេះហើយបានជាក្រុងនេះត្រូវគេបំផ្លាញខ្ទេច‌ខ្ទីអស់។ ១៦ ទូល‌បង្គំយើងខ្ញុំសូមទូលព្រះ‌ករុណាឲ្យបានជ្រាបថា ប្រសិនបើពួកគេសង់ក្រុងនេះឡើងវិញ ហើយជួស‌ជុលកំពែងក្រុង នោះព្រះ‌ករុណានឹងបាត់‌បង់ទឹកដី នៅប៉ែកខាងលិចទន្លេអឺប្រាតជាមិនខាន»។

ចម្លើយរបស់ព្រះ‌ចៅអ័រតា‌ស៊ែរ‌សេស

១៧ ព្រះ‌រាជាផ្ញើសារតបវិញដូចតទៅ៖ «ជូនចំពោះលោកទេសា‌ភិបាលរេហ៊ូម និងលោកស៊ីម‌សៃ ជាលេខា ព្រមទាំងសហ‌ការីគ្រប់រូបនៅស្រុកសាម៉ារី និងតំបន់ដែលនៅប៉ែកខាងលិចទន្លេអឺប្រាត សូមជ្រាប។

១៨ សារដែលអស់លោកផ្ញើមកយើងនោះ គេបានបកប្រែ និងអានឲ្យយើងស្ដាប់សព្វគ្រប់ហើយ។ ១៩ យើងបញ្ជាឲ្យគេស្រាវ‌ជ្រាវ ហើយឃើញថា តាំងពីដើមរៀងមក អ្នកក្រុងយេរូ‌សាឡឹមតែង‌តែបង្កចលនាបះ‌បោរ និងឃុប‌ឃិតគ្នាប្រឆាំងនឹងស្តេចជា‌និច្ច។ ២០ កាលពីដើម នៅក្រុងយេរូ‌សាឡឹមនេះ មានស្តេចខ្លាំងពូកែ គ្រប់‌គ្រងតំបន់ខាងលិចទន្លេអឺប្រាតទាំងមូល ព្រមទាំងហូតពន្ធដារសួយ‌សារ‌អាករ និងពន្ធផ្លូវទៀតផង។ ២១ ឥឡូវនេះ ចូរអស់លោកបញ្ជាឲ្យពួកគេបញ្ឈប់កិច្ច‌ការរបស់ខ្លួនទៅ។ ដរាបណាគ្មានបញ្ជាពីយើងទេ គេមិនត្រូវសង់ក្រុងនោះឡើងវិញជាដាច់ខាត។ ២២ សូមយកចិត្តទុកដាក់នឹងកិច្ច‌ការនេះឲ្យបានដិតដល់ ក្រែងលោផលអាក្រក់កាន់តែរីកធំឡើង នាំឲ្យខាតបង់រាជ‌ទ្រព្យ»។

២៣ កាលគេអានរាជ‌សាររបស់ព្រះ‌ចៅអ័រតា‌ស៊ែរ‌សេសឲ្យលោករេហ៊ូម និងលោកស៊ីម‌សៃ ជាលេខា ព្រមទាំងសហ‌ការីគ្រប់រូប ស្ដាប់ហើយ អ្នកទាំងនោះក៏ប្រញាប់‌ប្រញាល់នាំគ្នាទៅក្រុងយេរូ‌សាឡឹម ហើយប្រើកម្លាំងបង្ខំឲ្យជនជាតិយូដាបញ្ឈប់ការសាងសង់ជាបន្ទាន់។

ជនជាតិយូដានាំគ្នាសង់ព្រះ‌វិហារជាបន្តទៀត

២៤ ជនជាតិយូដាផ្អាកការសាងសង់ព្រះ‌ដំណាក់របស់ព្រះ‌ជាម្ចាស់ នៅក្រុងយេរូ‌សាឡឹម រហូតដល់ឆ្នាំទីពីរនៃរជ្ជ‌កាលព្រះ‌ចៅដារី‌យូស ជាស្តេចស្រុកពែរ្ស។

៥

១ ព្យាការីហាកាយ និងព្យាការីសាការី ជាកូនរបស់លោកអ៊ីដូ បាននាំព្រះ‌បន្ទូលរបស់ព្រះនៃជនជាតិអ៊ីស្រា‌អែល ទៅថ្លែងប្រាប់ជនជាតិយូដានៅក្រុងយេរូ‌សាឡឹម និងនៅស្រុកយូដា។ ២ គ្រានោះ លោកសូរ៉ូ‌បា‌បិល ជាកូនរបស់លោកសាល‌ធាល និងលោកយ៉ូស៊ូអា ជាកូនរបស់លោកយ៉ូសា‌ដាក ក៏នាំគ្នាងើបឡើង សង់ព្រះ‌ដំណាក់របស់ព្រះ‌ជាម្ចាស់ឡើងវិញ ដោយមានព្យាការីរបស់ព្រះ‌ជាម្ចាស់ជួយគាំ‌ទ្រផង។

៣ គ្រាដដែលនោះ លោកថាត‌ណាយ ជាទេសា‌ភិបាលនៅតំបន់ប៉ែកខាងលិចទន្លេអឺប្រាត និងលោកសេថា-‌បូស‌ណាយ ព្រមទាំងសហ‌ការី នាំគ្នាមកជួបជនជាតិយូដា ហើយសួរថា៖ «តើនរណាអនុញ្ញាតឲ្យអ្នករាល់គ្នាសង់ដំណាក់នេះ ព្រមទាំងជួស‌ជុលជញ្ជាំងឡើងវិញ។ ៤ ចូរស្រង់ឈ្មោះអស់អ្នកដែលចូលរួមក្នុងការសង់នេះឲ្យយើងមក!»។ ៥ ប៉ុន្តែ ព្រះ‌ជាម្ចាស់តាមការ‌ពារអស់លោកព្រឹទ្ធា‌ចារ្យនៃជនជាតិយូដា។ ក្នុងពេលដែលគេបញ្ជូនសំណុំរឿងថ្វាយព្រះ‌ចៅដារី‌យូស ហើយរង់‌ចាំចម្លើយវិញនោះ គេមិនបានបញ្ឈប់ការសាងសង់ទេ។

៦ សារដែលលោកថាត‌ណាយ ជាទេសា‌ភិបាល និងលោកសេថា-‌បូស‌ណាយ ព្រមទាំងពួករាជការ ជាសហ‌ការីរបស់ពួកគេ នៅតំបន់ប៉ែកខាងលិចទន្លេអឺប្រាត ផ្ញើថ្វាយព្រះ‌ចៅដារី‌យូស ៧ មានសេចក្ដីដូចតទៅ៖ «សូមថ្វាយចំពោះព្រះ‌ចៅដារី‌យូស សូមព្រះ‌ករុណាប្រកបដោយសេចក្ដីសុខចម្រើន!

៨ សូមព្រះ‌ករុណាជ្រាបថា យើងខ្ញុំបានទៅស្រុកយូដា ហើយទៅដល់ព្រះ‌ដំណាក់របស់ព្រះដ៏ប្រសើរឧត្ដម។ ពួកគេយកថ្មធំៗមកសង់ព្រះ‌ដំណាក់ និងយកឈើមកស៊កក្នុងជញ្ជាំង ធ្វើជាធ្នឹម។ គេធ្វើកិច្ច‌ការនេះយ៉ាងម៉ត់‌ចត់ ហើយរីកចម្រើនយ៉ាងឆាប់រហ័សទៀតផង។

៩ យើងខ្ញុំបានសួរពួកព្រឹទ្ធា‌ចារ្យថា “តើនរណាអនុញ្ញាតឲ្យអ្នករាល់គ្នាសង់ដំណាក់នេះ ព្រមទាំងជួស‌ជុលជញ្ជាំងឡើងវិញ?”។ ១០ យើងខ្ញុំក៏បានសួរឈ្មោះពួកគេដែរ ដើម្បីស្រង់ឈ្មោះអស់អ្នកដែលដឹកនាំកិច្ច‌ការនោះ យកមកថ្វាយព្រះ‌ករុណា។ ១១ ពួកគេឆ្លើយមកយើងខ្ញុំថា “ពួកយើងជាអ្នកបម្រើរបស់ព្រះនៃស្ថានបរម‌សុខ* និងផែន‌ដី ពួកយើងសង់ព្រះ‌ដំណាក់នេះឡើងវិញ គឺព្រះ‌ដំណាក់ដែលស្តេចមួយអង្គដ៏ប្រសើរឧត្ដម នៃជនជាតិអ៊ីស្រា‌អែលបានសង់តាំងពីយូរ‌លង់ណាស់មកហើយ។ ១២ ប៉ុន្តែ ដូន‌តារបស់ពួកយើង បានធ្វើឲ្យព្រះនៃស្ថានបរម‌សុខព្រះ‌អង្គព្រះ‌ពិរោធ ហើយព្រះ‌អង្គក៏ប្រគល់ពួកគេទៅក្នុងកណ្ដាប់ដៃរបស់ព្រះ‌ចៅនេប៊ូ‌កានេសារ ជាជនជាតិខាល់ដេ និងជាស្តេចស្រុកបាប៊ីឡូន។ ព្រះ‌ចៅនេប៊ូ‌កានេសារ បានបំផ្លាញព្រះ‌ដំណាក់នេះ ហើយកៀរប្រជាជនទៅស្រុកបាប៊ីឡូន។ ១៣ ប៉ុន្តែ នៅឆ្នាំទីមួយនៃរជ្ជ‌កាលព្រះ‌ចៅស៊ីរូស ជាស្តេចស្រុកបាប៊ីឡូន ស្តេចបានបញ្ជាឲ្យសង់ព្រះ‌ដំណាក់របស់ព្រះ‌ជាម្ចាស់ឡើងវិញ។ ១៤ កាលពីមុនព្រះ‌ចៅនេប៊ូ‌កានេសារ បានរឹបអូសយកគ្រឿងបរិក្ខារអំពីមាស និងប្រាក់ពីព្រះ‌វិហាររបស់ព្រះ‌ជាម្ចាស់ នៅក្រុងយេរូ‌សាឡឹម ទៅដាក់ក្នុងវិហារនៅក្រុងបាប៊ីឡូន។ ក្រោយមក ព្រះ‌ចៅស៊ីរូសយកគ្រឿងបរិក្ខារទាំងនោះ ចេញពីវិហារនៅក្រុងបាប៊ីឡូន ប្រគល់ឲ្យលោកសេស‌បាសា ដែលស្តេចបានតែង‌តាំងជាទេសា‌ភិបាលរបស់អាណា‌ខេត្តយូដា។ ១៥ ស្តេចក៏បានបង្គាប់ឲ្យលោកយកគ្រឿងបរិក្ខារទាំងនេះ ទៅដាក់ក្នុងព្រះ‌វិហារក្រុងយេរូ‌សាឡឹមវិញ ហើយសង់ព្រះ‌ដំណាក់របស់ព្រះ‌ជាម្ចាស់ នៅកន្លែងដើមឡើងវិញ។ ១៦ ដូច្នេះ លោកសេស‌បាសាបានមកក្រុងយេរូ‌សាឡឹម ព្រមទាំងបានចាក់គ្រឹះព្រះ‌ដំណាក់របស់ព្រះ‌ជាម្ចាស់។ ចាប់តាំងពីពេលនោះមក គេនៅតែសង់ព្រះ‌ដំណាក់ តែមិនទាន់បានចប់សព្វគ្រប់នៅឡើយ”។

១៧ ឥឡូវនេះ ប្រសិនបើព្រះ‌ករុណាគាប់ព្រះ‌ហឫ‌ទ័យ សូមឲ្យគេស្រាវ‌ជ្រាវក្នុងឯក‌សាររបស់រាជ‌ទ្រព្យនៃស្តេចស្រុកបាប៊ីឡូនដើម្បីបញ្ជាក់ថា ព្រះ‌ចៅស៊ីរូសពិតជាបានចេញបញ្ជាឲ្យសាងសង់ព្រះ‌ដំណាក់របស់ព្រះ‌ជាម្ចាស់ នៅក្រុងយេរូ‌សាឡឹមមែនឬយ៉ាងណា រួចសូមព្រះ‌ករុណាផ្ញើសេចក្ដីសម្រេចអំពីរឿងនេះមកយើងខ្ញុំផង»។

៦

ចម្លើយរបស់ព្រះ‌បាទដារី‌យូស

១ ព្រះ‌ចៅដារី‌យូសបញ្ជាឲ្យគេស្រាវ‌ជ្រាវឯក‌សាររាជ‌ទ្រព្យ ដែលគេរក្សាទុកក្នុងមន្ទីរតម្កល់ឯក‌សារនៅក្រុងបាប៊ីឡូន។ ២ គេរកឃើញក្រាំងមួយនៅអេក‌បា‌តាន ជាក្រុងដែលមានកំពែងរឹង‌មាំនៃអាណា‌ខេត្តម៉ែដ។ ក្នុងក្រាំងនោះមានចែងដូចតទៅ៖ «កំណត់ហេតុ:

៣ នៅឆ្នាំទីមួយនៃរជ្ជ‌កាលព្រះ‌ចៅស៊ីរូស ស្តេចបានចេញរាជ‌បញ្ជាមួយស្តីអំពីព្រះ‌ដំណាក់របស់ព្រះ‌ជាម្ចាស់ នៅក្រុងយេរូ‌សាឡឹម។ ត្រូវសង់ព្រះ‌ដំណាក់ឡើងវិញនៅលើគ្រឹះចាស់ ទុកជាកន្លែងថ្វាយយញ្ញ‌បូជា។ ព្រះ‌ដំណាក់នេះត្រូវមានកម្ពស់ហុក‌សិបហត្ថ និងទទឹងហុក‌សិបហត្ថ។ ៤ គេត្រូវរៀបថ្មធំៗបីជួរឆ្លាស់គ្នានឹងឈើមួយជួរ។ រីឯប្រាក់ចំណាយលើការសង់ ត្រូវបើកពីឃ្លាំងរាជ‌ទ្រព្យ។ ៥ គ្រឿងបរិក្ខារអំពីមាស និងប្រាក់នៃព្រះ‌ដំណាក់របស់ព្រះ‌ជាម្ចាស់ ដែលស្តេចនេប៊ូ‌កានេសារ បានរឹបអូសយកពីព្រះ‌វិហារ នៅក្រុងយេរូ‌សាឡឹមមកក្រុងបាប៊ីឡូននោះ ត្រូវតែនាំទៅព្រះ‌វិហារនៅក្រុងយេរូ‌សាឡឹម ហើយដាក់នៅកន្លែងដើមក្នុងព្រះ‌ដំណាក់របស់ព្រះ‌ជាម្ចាស់»។ ៦ ព្រះ‌ចៅដារី‌យូសផ្ញើរាជ‌សារទៅលោកថាត‌ណាយ ជាទេសា‌ភិបាលនៅតំបន់ប៉ែកខាងលិចទន្លេអឺប្រាត និងលោកសេថា-‌បូស‌ណាយ ព្រមទាំងពួករាជការ ជាសហ‌ការីរបស់ពួកគេ នៅតំបន់ប៉ែកខាងលិចទន្លេអឺប្រាត មានសេចក្ដីដូចតទៅ៖

«សុំអស់លោកកុំរវី‌រវល់នឹងរឿងនេះឡើយ។ ៧ ទុកឲ្យជនជាតិយូដាសង់ព្រះ‌ដំណាក់របស់ព្រះ‌ជាម្ចាស់ឡើងវិញចុះ។ ត្រូវឲ្យទេសា‌ភិបាល និងពួកព្រឹទ្ធា‌ចារ្យរបស់ជនជាតិយូដា សង់ព្រះ‌ដំណាក់ត្រង់កន្លែងដើម។ ៨ សុំអស់លោកជួយពួកព្រឹទ្ធា‌ចារ្យរបស់ជនជាតិយូដា ក្នុងការសាងសង់ព្រះ‌ដំណាក់របស់ព្រះ‌ជាម្ចាស់ឡើងវិញផង។ ចំពោះចំណាយក្នុងការសង់ត្រូវយកពីឃ្លាំងរាជ‌ទ្រព្យ គឺប្រាក់នៃពន្ធ‌អាករដែលទារពីតំបន់ខាងលិចទន្លេអឺប្រាត មកបើកឲ្យពួកគេគ្រប់ចំនួន កុំបីអាក់‌ខានឡើយ។ ៩ សុំអស់លោកផ្គត់‌ផ្គង់អ្វីៗដែលក្រុមបូជា‌ចារ្យ នៅក្រុងយេរូ‌សាឡឹមត្រូវការជារៀង‌រាល់ថ្ងៃ គឺគោបា ចៀមឈ្មោល និងកូនចៀម សម្រាប់ជាតង្វាយដុតទាំងមូល ថ្វាយចំពោះព្រះ‌ជាម្ចាស់នៃស្ថានបរម‌សុខ ព្រមទាំងស្រូវ អំបិល ស្រាទំពាំង‌បាយ‌ជូរ និងប្រេង តាមសំណូមពររបស់ក្រុមបូជា‌ចារ្យ កុំបីអាក់‌ខានឡើយ។ ១០ ធ្វើដូច្នេះ ពួកគេអាចថ្វាយតង្វាយដែលមានក្លិនឈ្ងុយជាទីគាប់ព្រះ‌ហឫ‌ទ័យព្រះ‌ជាម្ចាស់ ហើយពួកគេទូល‌អង្វរ សូមឲ្យព្រះ‌រាជា និងរាជ‌បុត្រ មានជន្មាយុយឺន‌យូរ។ ១១ ប្រសិនបើនរណាម្នាក់មិនគោរពតាមសេចក្ដីដែលយើងបង្គាប់ទេ ត្រូវដកឈើពីផ្ទះរបស់អ្នកនោះ បញ្ឈរឡើងសម្រាប់ដោតគេ ហើយយកផ្ទះរបស់គេធ្វើជាកន្លែងបន្ទោរ‌បង់ផង។ ១២ សូមឲ្យព្រះ‌ជាម្ចាស់ដែលតាំងព្រះ‌នាមរបស់ព្រះ‌អង្គនៅទីនោះ ទម្លាក់ស្តេច ឬប្រជាជនណាដែលបំពានលើសេចក្ដីសម្រេចរបស់យើង ដោយមានបំណងបំផ្លាញព្រះ‌ដំណាក់របស់ព្រះ‌អង្គ នៅក្រុងយេរូ‌សាឡឹម។

យើងដារី‌យូសចេញបញ្ជានេះ ដូច្នេះ ត្រូវតែអនុវត្តតាមជាកំហិត»។

១៣ លោកថាត‌ណាយ ជាទេសា‌ភិបាលនៅតំបន់ប៉ែកខាងលិចទន្លេអឺប្រាត និងលោកសេថា-‌បូស‌ណាយ ព្រមទាំងពួកសហ‌ការី នាំគ្នាអនុវត្តតាមរាជ‌បញ្ជារបស់ព្រះ‌ចៅដារី‌យូសយ៉ាងម៉ត់‌ចត់បំផុត។

ពិធីបុណ្យឆ្លងព្រះ‌វិហារ

១៤ ពួកព្រឹទ្ធា‌ចារ្យនៃជនជាតិយូដាបន្តការសាងសង់ព្រះ‌វិហារដោយជោគ‌ជ័យ ស្របតាមសេចក្ដីដែលព្យាការីហាកាយ និងព្យាការីសាការី ជាកូនរបស់លោកអ៊ីដូ បានថ្លែង។ ពួកគេបង្ហើយការសាងសង់ព្រះ‌វិហារ ស្របតាមបញ្ជារបស់ព្រះនៃអ៊ីស្រា‌អែល និងស្របតាមរាជ‌ក្រឹត្យរបស់ព្រះ‌ចៅស៊ីរូស ព្រះ‌ចៅដារី‌យូស និងព្រះ‌ចៅអ័រតា‌ស៊ែរ‌សេស ជាស្តេចស្រុកពែរ្ស។ ១៥ គេបានសង់ព្រះ‌ដំណាក់ចប់សព្វគ្រប់ នៅថ្ងៃទីបី ខែផល្គុន ក្នុងឆ្នាំទីប្រាំមួយនៃរជ្ជ‌កាលព្រះ‌បាទដារី‌យូស។ ១៦ ជនជាតិអ៊ីស្រា‌អែល ក្រុមបូជា‌ចារ្យ ក្រុមលេវី និងប្រជាជននៅសេស‌សល់ ដែលត្រូវគេកៀរទៅជាឈ្លើយ ហើយវិលត្រឡប់មកវិញនោះ នាំគ្នាប្រារព្ធពិធីបុណ្យឆ្លងព្រះ‌ដំណាក់របស់ព្រះ‌ជាម្ចាស់ ដោយអំណរ។ ១៧ ក្នុងឱកាសពិធីបុណ្យឆ្លងព្រះ‌ដំណាក់របស់ព្រះ‌ជាម្ចាស់នេះ ពួកគេយកគោបាមួយ‌រយក្បាល ចៀមឈ្មោលពីរ‌រយក្បាល និងកូនចៀមចំនួនបួន‌រយក្បាល មកថ្វាយជាយញ្ញ‌បូជារំដោះបាប សម្រាប់ប្រជាជនអ៊ីស្រា‌អែលទាំងមូល។ គេក៏បានថ្វាយពពែឈ្មោលដប់‌ពីរក្បាល តាមចំនួនកុល‌សម្ព័ន្ធរបស់ជនជាតិអ៊ីស្រា‌អែលដែរ។ ១៨ គេបានតែង‌តាំងក្រុមបូជា‌ចារ្យតាមឋានៈរបស់ពួកគេ ព្រមទាំងតែង‌តាំងពួកលេវីជាក្រុមៗ តាមមុខ‌ងារ ដែលពួកគេបំពេញថ្វាយព្រះ‌ជាម្ចាស់នៅក្រុងយេរូ‌សាឡឹម ដូចមានចែងទុកក្នុងគម្ពីររបស់លោកម៉ូសេ។

ជនជាតិយូដាធ្វើពិធីបុណ្យចម្លង

១៩ អស់អ្នកដែលគេកៀរទៅជាឈ្លើយ ហើយវិលត្រឡប់មកវិញនោះ នាំគ្នាប្រារព្ធពិធីបុណ្យចម្លង នៅថ្ងៃទីដប់‌បួន ក្នុងខែទីមួយ។ ២០ ក្រុមបូជា‌ចារ្យ និងក្រុមលេវី នាំគ្នាធ្វើពិធីជម្រះកាយឲ្យបរិសុទ្ធ ហើយពួកគេក៏បានបរិសុទ្ធទាំងអស់គ្នា។ ពួកគេអារ កកូនចៀមនៃពិធីបុណ្យចម្លង សម្រាប់ប្រជាជនទាំងអស់ដែលជាប់ជាឈ្លើយ ហើយវិលត្រឡប់មកវិញ សម្រាប់ក្រុមបូជា‌ចារ្យ ជាបង‌ប្អូន និងសម្រាប់ខ្លួនឯងផ្ទាល់។ ២១ ជនជាតិអ៊ីស្រា‌អែលដែលជាប់ជាឈ្លើយ ហើយវិលត្រឡប់មកវិញ នាំគ្នាបរិភោគអាហារនៃបុណ្យចម្លងរួមជាមួយអស់អ្នក ដែលផ្ដាច់ខ្លួនចេញពីភាពសៅ‌ហ្មង*របស់សាសន៍ដទៃដែលរស់នៅក្នុងស្រុក ហើយវិលមករកព្រះ‌អម្ចាស់ ជាព្រះរបស់អ៊ីស្រា‌អែលវិញ។ ២២ ពួកគេធ្វើពិធីបុណ្យនំបុ័ងឥតមេនេះ អស់‌រយៈពេលប្រាំពីរថ្ងៃយ៉ាងសប្បាយ ដ្បិតព្រះ‌អម្ចាស់ប្រទានឲ្យពួកគេបានពោរ‌ពេញដោយអំណរ គឺព្រះ‌អង្គដូរព្រះ‌ហឫ‌ទ័យរបស់ព្រះ‌ចៅអធិ‌រាជឲ្យមេត្តាចំពោះពួកគេ ដើម្បីលើកទឹកចិត្តពួកគេក្នុងការសង់ព្រះ‌ដំណាក់របស់ព្រះ‌ជាម្ចាស់ ជាព្រះនៃជនជាតិអ៊ីស្រា‌អែល។

៧

សកម្ម‌ភាពរបស់លោកបូជា‌ចារ្យអែសរ៉ា

លោកបូជា‌ចារ្យអែសរ៉ា

១ ក្រោយមក ក្នុងរជ្ជ‌កាលព្រះ‌ចៅអ័រតា‌ស៊ែរ‌សេស ជាស្តេចស្រុកពែរ្ស មានបូជា‌ចារ្យមួយរូប ឈ្មោះអែសរ៉ា ជាកូនរបស់លោកសេរ៉ាយ៉ា ដែលត្រូវជាកូនរបស់លោកអសា‌រីយ៉ា ជាកូនរបស់លោកហ៊ីល‌គីយ៉ា ២ ជាកូនរបស់លោកសាលូម ជាកូនរបស់លោកសាដុក ជាកូនរបស់លោកអហ៊ី‌ទូប ៣ ជាកូនរបស់លោកអម៉ា‌រីយ៉ា ជាកូនរបស់លោកអសា‌រីយ៉ា ជាកូនរបស់លោកមេរ៉ា‌យ៉ូត ៤ ជាកូនរបស់លោកសេរ៉ាហ៊ីយ៉ា ជាកូនរបស់លោកអ៊ូស៊ី ជាកូនរបស់លោកប៊ូគី ៥ ជាកូនរបស់លោកអប៊ីសួ ជាកូនរបស់លោកភីនេ‌អាស ជាកូនរបស់អេឡាសារ ជាកូនរបស់មហា‌បូជា‌ចារ្យអរ៉ុន។ ៦ លោកអែសរ៉ាមកពីស្រុកបាប៊ីឡូន លោកជាបណ្ឌិតខាងវិន័យ ហើយស្គាល់គម្ពីរ‌វិន័យរបស់លោកម៉ូសេយ៉ាងជ្រៅជ្រះ គឺគម្ពីរ‌វិន័យដែលព្រះ‌អម្ចាស់ ជាព្រះនៃជនជាតិអ៊ីស្រា‌អែល ប្រទានឲ្យ។ ព្រះ‌អម្ចាស់ ជាព្រះរបស់លោក បានដាក់ព្រះ‌ហស្ដលើលោក ហេតុនេះហើយ ទើបព្រះ‌រាជាប្រទានអ្វីៗទាំងអស់ តាមសំណូមពររបស់លោក។ ៧ នៅឆ្នាំទីប្រាំពីរនៃរជ្ជ‌កាលព្រះ‌ចៅអ័រតា‌ស៊ែរ‌សេស ប្រជាជនអ៊ីស្រា‌អែលមួយចំនួន ព្រមទាំងក្រុមបូជា‌ចារ្យ ក្រុមលេវី ក្រុមចម្រៀង ក្រុមឆ្មាំទ្វារ និងក្រុមអ្នកបម្រើព្រះ‌វិហារ នាំគ្នាវិលមកក្រុងយេរូ‌សាឡឹមវិញ។ ៨ នៅគ្រានោះ លោកអែសរ៉ាបានមកដល់ក្រុងយេរូ‌សាឡឹម នៅខែទីប្រាំ ក្នុងឆ្នាំទីប្រាំពីរនៃរជ្ជ‌កាលព្រះ‌ចៅអ័រតា‌ស៊ែរ‌សេស។ ៩ លោកកំណត់ពេលចេញដំណើរពីក្រុងបាប៊ីឡូន នៅថ្ងៃទីមួយ ក្នុងខែទីមួយ ហើយមកដល់ក្រុងយេរូ‌សាឡឹម នៅថ្ងៃទីមួយ ក្នុងខែទីប្រាំ ដ្បិតព្រះដ៏សប្បុរសរបស់លោកបានដាក់ព្រះ‌ហស្ដលើលោក។ ១០ លោកអែសរ៉ាខិត‌ខំរៀនសូត្រ និងកាន់តាមវិន័យរបស់ព្រះ‌អម្ចាស់យ៉ាងអស់ពីចិត្ត ព្រមទាំងបង្រៀនក្រឹត្យ‌វិន័យ និងច្បាប់ដល់ជនជាតិអ៊ីស្រា‌អែលទៀតផង។

រាជ‌សាររបស់ព្រះ‌ចៅអ័រតា‌ស៊ែរ‌សេស

១១ ព្រះ‌ចៅអ័រតា‌ស៊ែរ‌សេសប្រគល់រាជ‌សារមួយជូនលោកបូជា‌ចារ្យអែសរ៉ា ជាបណ្ឌិតខាងវិន័យ លោកមាននាទីចម្លងព្រះ‌បន្ទូលនៃក្រឹត្យ‌វិន័យ ដែលព្រះ‌អម្ចាស់ប្រទានមកអ៊ីស្រា‌អែល។ រាជ‌សារនោះមានសេចក្ដីដូចតទៅ៖

១២ «យើង អ័រតា‌ស៊ែរ‌សេស ជាព្រះ‌មហាក្សត្រលើមហា‌ក្សត្រទាំងអស់

ផ្ញើជូនលោកបូជា‌ចារ្យអែសរ៉ា ជាបណ្ឌិតខាងវិន័យរបស់ព្រះនៃស្ថានបរម‌សុខ

១៣ យើងចេញបញ្ជាថា ក្នុងចំណោមជនជាតិអ៊ីស្រា‌អែលទាំងអស់ ដែលរស់នៅក្នុងរាជា‌ណា‌ចក្ររបស់យើង គឺប្រជាជន ក្រុមបូជា‌ចារ្យ ក្រុមលេវី អស់អ្នកដែលមានបំណងត្រឡប់ទៅក្រុងយេរូ‌សាឡឹម នោះយើងអនុញ្ញាតឲ្យគេចាក‌ចេញទៅជាមួយលោក។ ១៤ យើង និងទីប្រឹក្សាទាំងប្រាំពីរនាក់ ចាត់លោកឲ្យទៅពិនិត្យមើល នៅក្រុងយេរូ‌សាឡឹម និងស្រុកយូដា អំពីរបៀបដែលគេគោរពគម្ពីរ‌វិន័យនៃព្រះរបស់លោក គឺគម្ពីរដែលលោកកាន់នេះ។ ១៥ យើងក៏ចាត់លោកឲ្យនាំយកមាសប្រាក់ ដែលយើង និងទីប្រឹក្សាទាំងប្រាំពីររូប សម្រេចថ្វាយចំពោះព្រះនៃជនជាតិអ៊ីស្រា‌អែល ដែលគង់នៅក្រុងយេរូ‌សាឡឹម។ ១៦ លោកក៏ត្រូវនាំយកប្រាក់ និងមាសទាំងប៉ុន្មាន ដែលលោករៃបានក្នុងអាណា‌ខេត្តបាប៊ីឡូនទាំងមូល ព្រមទាំងតង្វាយដែលប្រជាជន និងបូជា‌ចារ្យស្ម័គ្រចិត្តថ្វាយ សម្រាប់ព្រះ‌ដំណាក់នៃព្រះរបស់ពួកគេ នៅក្រុងយេរូ‌សាឡឹមដែរ។ ១៧ លោកត្រូវលៃ‌លកយកប្រាក់ទាំងនោះ ទិញគោបា ចៀមឈ្មោល និងកូនចៀម ព្រមទាំងតង្វាយម្សៅ និងស្រាទំពាំង‌បាយ‌ជូរដែលត្រូវច្រួចជាមួយ។ លោកត្រូវថ្វាយតង្វាយទាំងនោះ នៅលើអាសនៈរបស់ព្រះ‌ដំណាក់នៃព្រះរបស់ពួកលោក នៅក្រុងយេរូ‌សាឡឹម។ ១៨ ប្រសិនបើមានមាសប្រាក់នៅសល់ លោក និងបង‌ប្អូនរបស់លោក អាចយកទៅប្រើការតាមតែលោកយល់ឃើញថាល្អត្រឹម‌ត្រូវ ស្របតាមព្រះ‌ហឫ‌ទ័យនៃព្រះរបស់អស់លោក។ ១៩ ចំពោះគ្រឿងបរិក្ខារសម្រាប់ប្រើ‌ប្រាស់ក្នុងព្រះ‌ដំណាក់នៃព្រះរបស់លោក ដែលគេបានប្រគល់ដល់លោកនោះ ចូរយកទៅដាក់ក្នុងព្រះ‌វិហាររបស់ព្រះ‌ជាម្ចាស់ នៅក្រុងយេរូ‌សាឡឹម។ ២០ ប្រសិនបើលោកត្រូវការចំណាយអ្វីផ្សេងទៀត សម្រាប់ព្រះ‌វិហារនៃព្រះរបស់លោក ចូរបើកពីឃ្លាំងរាជ‌ទ្រព្យទៅចំណាយចុះ។

២១ យើង ព្រះ‌ចៅអ័រតា‌ស៊ែរ‌សេស ចេញបញ្ជាដល់អ្នកកាន់ឃ្លាំងរាជ‌ទ្រព្យទាំងអស់ នៅតំបន់ប៉ែកខាងលិចទន្លេអឺប្រាតថា បើលោកបូជា‌ចារ្យអែសរ៉ា ជាបណ្ឌិតខាងវិន័យរបស់ព្រះនៃស្ថានបរម‌សុខ សុំអ្វី ត្រូវប្រគល់ជូនលោកកុំបីអាក់‌ខានឡើយ។ ២២ ពួកគេនឹងប្រគល់ជូនលោករហូតដល់ប្រាក់បីតោន ស្រូវសាម‌សិបតោន ស្រាទំពាំង‌បាយ‌ជូរបួន‌ពាន់លីត្រ ប្រេងអូលីវបួន‌ពាន់លីត្រ ព្រមទាំងអំបិលតាមសេចក្ដីត្រូវការ។ ២៣ អ្វីៗដែលព្រះ‌ជាម្ចាស់នៃស្ថានបរម‌សុខបង្គាប់ ស្តីអំពីព្រះ‌ដំណាក់របស់ព្រះ‌អង្គ ត្រូវតែធ្វើតាមយ៉ាងរួស‌រាន់ ដើម្បីកុំឲ្យព្រះ‌ជាម្ចាស់ព្រះ‌អង្គព្រះ‌ពិរោធទាស់នឹងនគរ ឬរាជ‌វង្សរបស់យើង។ ២៤ មួយវិញទៀត យើងសុំប្រាប់អស់លោកឲ្យដឹងថា អស់លោកគ្មានសិទ្ធិទារពន្ធដារ សួយ‌សារ‌អាករ និងពន្ធផ្លូវ ពីក្រុមបូជា‌ចារ្យ ក្រុមលេវី ក្រុមអ្នកចម្រៀង ក្រុមឆ្មាំទ្វារ ក្រុមអ្នកបម្រើព្រះ‌វិហារ ឬអ្នកបំពេញការ‌ងារផ្សេងទៀត ក្នុងព្រះ‌ដំណាក់របស់ព្រះ‌ជាម្ចាស់ឡើយ។

២៥ ចំពោះលោកអែសរ៉ាវិញ យោងតាមគម្ពីរដែលបង្ហាញអំពីព្រះ‌ប្រាជ្ញា‌ញាណនៃព្រះរបស់លោក គឺគម្ពីរដែលលោកកាន់នោះ ចូរតែង‌តាំងចៅ‌ក្រម និងអ្នកគ្រប់‌គ្រង ដើម្បីកាត់ក្តីឲ្យប្រជាជន ដែលរស់នៅតំបន់ប៉ែកខាងលិចទន្លេអឺប្រាត គឺអស់អ្នកដែលស្គាល់គម្ពីរ‌វិន័យនៃព្រះរបស់លោកហើយ។ លោកក៏ត្រូវតែបង្ហាត់បង្រៀនអស់អ្នកដែលមិនស្គាល់វិន័យដែរ។ ២៦ អ្នកណាមិនគោរពតាមវិន័យនៃព្រះរបស់លោក ហើយមិនគោរពតាមច្បាប់របស់ស្តេចឲ្យបានម៉ត់‌ចត់ទេ អ្នកនោះនឹងត្រូវទទួលទោស សមតាមការដែលខ្លួនប្រព្រឹត្ត គឺទទួលទោសដល់ស្លាប់ ឬត្រូវនិរទេស ឬត្រូវរឹបអូសយកទ្រព្យ‌សម្បត្តិ ឬត្រូវជាប់ពន្ធ‌នាគារ»។

លោកអែសរ៉ាអរ‌ព្រះ‌គុណព្រះ‌ជាម្ចាស់

២៧ លោកអែសរ៉ាបន្លឺសំឡេងថា៖ «សូមលើកតម្កើងព្រះ‌អម្ចាស់ ជាព្រះនៃបុព្វ‌បុរសរបស់យើង ដែលព្រះ‌អង្គជំរុញព្រះ‌ហឫ‌ទ័យព្រះ‌រាជា ឲ្យមានបំណងលើកកិត្តិ‌យសព្រះ‌ដំណាក់នៃព្រះ‌អម្ចាស់ នៅក្រុងយេរូ‌សាឡឹម។ ២៨ ព្រះ‌អម្ចាស់សម្ដែងព្រះ‌ហឫ‌ទ័យមេត្តាករុណាដល់ខ្ញុំ នៅចំពោះព្រះ‌ភ័ក្ត្រព្រះ‌មហាក្សត្រ ចំពោះអស់លោកដែលជាទីប្រឹក្សា ព្រមទាំងនាម៉ឺនសព្វមុខមន្ត្រីរបស់ព្រះ‌រាជាទៀតផង។ ព្រះ‌អម្ចាស់ ជាព្រះរបស់ខ្ញុំ បានដាក់ព្រះ‌ហស្ដលើខ្ញុំ ធ្វើឲ្យខ្ញុំមានកម្លាំង ហើយប្រមូលអស់លោក ដែលជាមេដឹកនាំរបស់អ៊ីស្រា‌អែលឲ្យចេញដំណើរទៅជាមួយខ្ញុំ»។

៨

បញ្ជីរាយនាមអស់អ្នកដែលវិលត្រឡប់ទៅជាមួយលោកអែសរ៉ា

១ «នេះជាបញ្ជីរាយនាមមេក្រុមគ្រួសារ ដែលវិលត្រឡប់ពីស្រុកបាប៊ីឡូនមកជាមួយខ្ញុំ ក្នុងរជ្ជ‌កាលព្រះ‌ចៅអ័រតា‌ស៊ែរ‌សេស:

២ ក្នុងអំបូរភីនេ‌ហាសមានលោកគែរសូម។ ក្នុងអំបូរអ៊ីតាម៉ារមានលោកដានីអែល។ ក្នុងអំបូរដាវីឌមានលោកហាត់ទូស។ ៣ ក្នុងអំបូរសេកា‌នីយ៉ា និងអំបូរប៉ារ៉ូស មានលោកសាការី ហើយមានមនុស្សប្រុស ១៥០ នាក់នៅជាមួយលោក។ ៤ ក្នុងអំបូរប៉ាហាត់-‌ម៉ូអាប់ មានលោកអេលី‌យ៉ូណៃ ជាកូនរបស់លោកសេរ៉ាយ៉ា ហើយមានមនុស្សប្រុស ២០០ នាក់នៅជាមួយលោក។ ៥ ក្នុងអំបូរសាទូមានលោកសេកា‌នីយ៉ា ជាកូនរបស់លោកយ៉ាស៊ី‌អែល ហើយមានមនុស្សប្រុស ៣០០ នាក់នៅជាមួយលោក។ ៦ ក្នុងអំបូរអឌីនមានលោកអេបេដ ជាកូនរបស់លោកយ៉ូណាថាន ហើយមានមនុស្សប្រុស ៥០ នាក់នៅជាមួយលោក។ ៧ ក្នុងអំបូរអេឡាំមានលោកយេសាយ៉ា ជាកូនរបស់លោកអថាលីយ៉ា ហើយមានមនុស្សប្រុស ៧០ នាក់នៅជាមួយលោក។ ៨ ក្នុងអំបូរសេផា‌ទីយ៉ាមានលោកសេបា‌ឌីយ៉ា ជាកូនរបស់លោកមីកា‌អែល ហើយមានមនុស្សប្រុស ៨០ នាក់នៅជាមួយលោក។ ៩ ក្នុងអំបូរយ៉ូអាប់មានលោកអូបា‌ឌីយ៉ា ជាកូនរបស់លោកយេហ៊ី‌អែល ហើយមានមនុស្សប្រុស ២១៨ នាក់នៅជាមួយលោក។ ១០ ក្នុងអំបូរបានីមានលោកសេឡូ‌មីត ជាកូនរបស់យ៉ូស៊ី‌ភីយ៉ា ហើយមានមនុស្សប្រុស ១៦០ នាក់ នៅជាមួយលោក។ ១១ ក្នុងអំបូរបេបៃមានលោកសាការី ជាកូនរបស់លោកបេបៃ ហើយមានមនុស្សប្រុស ២៨ នាក់នៅជាមួយលោក។ ១២ ក្នុងអំបូរអាស‌កាដមានលោកយ៉ូហាណន ជាកូនរបស់លោកហាក់‌កា‌ថាន ហើយមានមនុស្ស ១១០ នាក់នៅជាមួយលោក។ ១៣ ក្នុងអំបូរអដូនីកាំមានលោកអេលី‌ផេ‌លេត លោកយេអែល និងលោកសេម៉ាយ៉ាដែលក្មេងជាងគេ ហើយមានមនុស្សប្រុស ៦០ នាក់នៅជាមួយ។ ១៤ ក្នុងអំបូរប៊ីគ‌វ៉ាយមានលោកអ៊ូថាយ និងលោកសាកួរ ហើយមានមនុស្សប្រុស ៧០ នាក់នៅជាមួយលោក»។

ការរៀប‌ចំដំណើរឆ្ពោះទៅក្រុងយេរូ‌សាឡឹម

១៥ «ខ្ញុំបានប្រមូលបណ្តា‌ជនទាំងនោះ នៅជិតព្រែកដែលហូរឆ្ពោះទៅស្រុកអាហាវ៉ា ហើយយើងបោះជំរំនៅទីនោះអស់‌រយៈពេលបីថ្ងៃ។ ខ្ញុំសង្កេតឃើញថា មានតែប្រជាជន និងក្រុមបូជា‌ចារ្យ គឺពុំឃើញមានក្រុមលេវីទេ។ ១៦ ដូច្នេះ ខ្ញុំបានចាត់អស់លោកដែលជាមេដឹកនាំ គឺមានលោកអេលី‌យេ‌ស៊ែរ លោកអរីអែល លោកសេម៉ាយ៉ា លោកអែល‌ណា‌ថាន លោកយ៉ារីប លោកអែល‌ណា‌ថាន លោកណាថាន លោកសាការី និងលោកមេស៊ូឡាំ ព្រមទាំងលោកយ៉ូយ៉ារីប និងលោកអែល‌ណា‌ថាន អ្នកបង្រៀនវិន័យ ១៧ ខ្ញុំបានបង្គាប់លោកទាំងនោះឲ្យទៅជួបលោកអ៊ីដូ ដែលជាមេដឹកនាំនៅតំបន់កាស៊ី‌ភីយ៉ា។ ខ្ញុំក៏បានប្រាប់ពួកគេអំពីរបៀបដែលត្រូវនិយាយជាមួយលោកអ៊ីដូ និងបង‌ប្អូនលោក ជាក្រុមអ្នកបម្រើព្រះ‌វិហារដែលរស់នៅតំបន់កាស៊ី‌ភីយ៉ា ដើម្បីឲ្យពួកគេនាំមនុស្សមកបម្រើការ‌ងារក្នុងព្រះ‌ដំណាក់នៃព្រះរបស់យើង។ ១៨ ដោយព្រះដ៏សប្បុរសបានដាក់ព្រះ‌ហស្ដលើយើង ពួកគេនាំលោកសេរេ‌ប៊ីយ៉ាមកឲ្យពួកយើង។ គាត់ជាបុរសម្នាក់ដែលមានសុភ‌និច្ឆ័យ ជាពូជ‌ពង្សរបស់លោកម៉ាលី ដែលត្រូវជាកូនរបស់លោកលេវី ជាកូនរបស់លោកអ៊ីស្រា‌អែល។ គាត់នាំកូនប្រុស និងបង‌ប្អូនរបស់គាត់មកជាមួយដែរ ដែលមានចំនួន ១៨ នាក់។ ១៩ បន្ទាប់មក មានលោកហាសា‌ប៊ីយ៉ា និងលោកយេសាយ៉ាពីអំបូរមេរ៉ារី ព្រមទាំងបង‌ប្អូន និងកូនៗរបស់ពួកគេ ដែលមានចំនួន ២០ នាក់។ ២០ បន្ទាប់មកទៀត មានក្រុមបម្រើព្រះ‌វិហារចំនួន ២២០ នាក់ ដែលមានឈ្មោះក្នុងបញ្ជី។ ពួកគេជាកូនចៅរបស់អស់អ្នកដែលព្រះ‌បាទដាវីឌ និងមេដឹកនាំ តែង‌តាំងឲ្យជួយធ្វើការក្រុមលេវី។

២១ នៅក្បែរព្រែកអាហាវ៉ានោះ ខ្ញុំបានប្រកាសឲ្យធ្វើពិធីតមអាហារ ដើម្បីដាក់ខ្លួននៅចំពោះព្រះ‌ភ័ក្ត្ររបស់ព្រះនៃយើង សូមព្រះ‌អង្គប្រោសប្រទានឲ្យយើង និងកូនចៅរបស់យើង ធ្វើដំណើរប្រកបដោយសុខ‌សាន្ត ហើយឲ្យទ្រព្យ‌សម្បត្តិរបស់យើងបានគង់‌វង្សផង។

២២ ខ្ញុំនឹកខ្មាសមិនហ៊ានទូលសូមព្រះ‌រាជាប្រទានកង‌ទ័ព‌សេះ សម្រាប់ការ‌ពារពួកយើង នៅតាមផ្លូវ ក្រែងលោមានខ្មាំងមកយាយីនោះឡើយ ដ្បិតពួកយើងបានទូលព្រះ‌រាជាថា ព្រះនៃយើងសម្ដែងព្រះ‌ចេស្ដា និងព្រះ‌ហឫ‌ទ័យសប្បុរសការ‌ពារអស់អ្នកដែលស្វែងរកព្រះ‌អង្គ តែព្រះ‌អង្គពិរោធដាក់ទោសអស់អ្នកដែលបោះ‌បង់ចោលព្រះ‌អង្គ។ ២៣ ហេតុនេះហើយបានជាពួកយើងតមអាហារ និងអង្វររកព្រះនៃយើង ហើយព្រះ‌អង្គព្រះ‌អង្គព្រះ‌សណ្ដាប់ពួកយើង។

២៤ បន្ទាប់មក ខ្ញុំញែកបូជា‌ចារ្យដប់‌ពីររូបពីចំណោមមេដឹកនាំរបស់ក្រុមបូជា‌ចារ្យ គឺមានលោកសេរេ‌ប៊ីយ៉ា និងលោកហាសា‌ប៊ីយ៉ា ព្រមទាំងបង‌ប្អូនរបស់ពួកលោកដប់រូបទៀត។ ២៥ ខ្ញុំបានថ្លឹងប្រាក់ មាស និងវត្ថុផ្សេងៗ មួយចំណែកជូនអស់លោកទាំងនោះ គឺចំណែកញែកចេញពីតង្វាយដែលព្រះ‌រាជា ទីប្រឹក្សា មន្ត្រីរបស់ស្តេច និងជនជាតិអ៊ីស្រា‌អែល នៅក្នុងស្រុកបានថ្វាយសម្រាប់ព្រះ‌ដំណាក់របស់ព្រះនៃយើង។ ២៦ ខ្ញុំបានប្រគល់ប្រាក់ជូនលោកទាំងនោះចំនួនម្ភៃតោន វត្ថុធ្វើអំពីប្រាក់ចំនួនបីតោន មាសបីតោន ២៧ ពែងមាសចំនួនម្ភៃ ដែលមានតម្លៃជាមាសមួយពាន់តម្លឹង ព្រមទាំងផើងពីរធ្វើពីលង្ហិនដ៏រលើប ដែលមានតម្លៃដូចមាសដែរ។ ២៨ បន្ទាប់មក ខ្ញុំពោលទៅកាន់បូជា‌ចារ្យទាំងនោះថា: “អស់លោកបានញែកខ្លួនជាសក្ការៈថ្វាយព្រះ‌អម្ចាស់ រីឯវត្ថុទាំងនេះក៏សក្ការៈដែរ។ ប្រាក់ និងមាសនេះសុទ្ធ‌សឹងជាតង្វាយស្ម័គ្រចិត្ត ដែលគេថ្វាយចំពោះព្រះ‌អម្ចាស់ ជាព្រះរបស់បុព្វ‌បុរសនៃអស់លោក។ ២៩ សូមយកចិត្តទុកដាក់ថែ‌រក្សាវត្ថុទាំងនេះ រហូតដល់ក្រុងយេរូ‌សាឡឹម។ នៅទីនោះ អស់លោកត្រូវថ្លឹងវត្ថុទាំងនេះ នៅចំពោះមុខមេដឹកនាំក្រុមបូជា‌ចារ្យ និងក្រុមលេវី ព្រមទាំងមេដឹកនាំក្រុមគ្រួសារនៃជនជាតិអ៊ីស្រា‌អែល នៅក្នុងបន្ទប់នៃព្រះ‌ដំណាក់របស់ព្រះ‌អម្ចាស់”។

៣០ ក្រុមបូជា‌ចារ្យ និងក្រុមលេវី ទទួលយកមាស ប្រាក់ និងវត្ថុទាំងអស់ដែលគេបានថ្លឹង ដើម្បីនាំទៅក្រុងយេរូ‌សាឡឹម ដាក់ក្នុងព្រះ‌ដំណាក់នៃព្រះរបស់យើង»។

ការមកដល់ក្រុងយេរូ‌សាឡឹម

៣១ «នៅថ្ងៃទីដប់‌ពីរ ក្នុងខែទីមួយ ពួកយើងបានចាក‌ចេញពីព្រែកអាហាវ៉ា ឆ្ពោះទៅក្រុងយេរូ‌សាឡឹម។ នៅតាមផ្លូវ ព្រះនៃយើងបានដាក់ព្រះ‌ហស្ដការ‌ពារយើង មិនឲ្យមានខ្មាំងសត្រូវមកយាយី ឬត្រូវចោរប្លន់ឡើយ។ ៣២ ពេលទៅដល់ក្រុងយេរូ‌សាឡឹម យើងនាំគ្នាសម្រាកចំនួនបីថ្ងៃ។ ៣៣ នៅថ្ងៃទីបួន យើងបានថ្លឹងប្រាក់ មាស និងវត្ថុទាំងអស់ នៅក្នុងព្រះ‌ដំណាក់របស់ព្រះនៃយើង រួចប្រគល់ជូនលោកបូជា‌ចារ្យមេរេម៉ុត ជាកូនលោកអ៊ូរីយ៉ា។ នៅជាមួយលោក មានលោកអេឡាសារ ជាកូនរបស់លោកភីនេ‌អាស ព្រមទាំងមានលោកយ៉ូសា‌បាដ ជាកូនរបស់លោកយ៉ូស៊ូអា និងលោកណូអា‌ឌីយ៉ា ជាកូនរបស់លោកប៊ីនូអ៊ី ដែលជាក្រុមលេវី។ ៣៤ គេបានរាប់ចំនួន និងថ្លឹងវត្ថុទាំងនោះ ព្រមទាំងកត់‌ត្រាទម្ងន់សរុប ទុកជាលាយ‌លក្ខណ៍អក្សរផង។

៣៥ អស់អ្នកដែលគេកៀរទៅជាឈ្លើយ ហើយវិលត្រឡប់មកវិញនោះ នាំគ្នាថ្វាយតង្វាយដុតទាំងមូលចំពោះព្រះនៃជនជាតិអ៊ីស្រា‌អែល គឺគោ ១២ក្បាល សម្រាប់ប្រជាជនអ៊ីស្រា‌អែលទាំងមូល ចៀមឈ្មោល ៩៦ក្បាល កូនចៀម ៧៧ក្បាល និងពពែឈ្មោល ២០ក្បាល ជាតង្វាយរំដោះបាប។ ពួកគេដុតសត្វទាំងនោះជាតង្វាយដុតទាំងមូលថ្វាយព្រះ‌អម្ចាស់។ ៣៦ បន្ទាប់មក គេបានប្រគល់រាជក្រឹត្យជូនអស់លោកឧបរាជ និងទេសា‌ភិបាល តំបន់ប៉ែកខាងលិចទន្លេអឺប្រាត។ អស់លោកទាំងនោះបានជួយគាំ‌ទ្រជនជាតិអ៊ីស្រា‌អែល និងព្រះ‌ដំណាក់របស់ព្រះ‌ជាម្ចាស់»។

៩

ជនជាតិយូដាដែលរៀប‌ការជាមួយសាសន៍ដទៃ

១ ក្រោយពីនោះមក ពួកមេដឹកនាំមកប្រាប់ខ្ញុំថា “ប្រជាជនអ៊ីស្រា‌អែល ក្រុមបូជា‌ចារ្យ និងក្រុមលេវី មិនបានញែកខ្លួនចេញពីជាតិសាសន៍នានា ដែលនៅក្នុងស្រុកនោះទេ។ ពួកគេប្រព្រឹត្តអំពើគួរឲ្យស្អប់ខ្ពើមដូចសាសន៍ទាំងនោះដែរ គឺមានជនជាតិកាណាន ជនជាតិហេត ជនជាតិពេរីស ជនជាតិយេប៊ូស ជនជាតិអាំម៉ូន ជនជាតិម៉ូអាប់ ជនជាតិអេស៊ីប និងជនជាតិអាម៉ូរី។ ២ ពួកគេ និងកូនប្រុសរបស់គេ បានយកកូនស្រីរបស់ជនជាតិទាំងនោះមកធ្វើជាប្រពន្ធ ជាហេតុធ្វើឲ្យជាតិដ៏‌វិសុទ្ធ លាយជាមួយជាតិសាសន៍នៅក្នុងស្រុកនោះ។ ពួកមេដឹកនាំ និងពួកគ្រប់‌គ្រងនាំគ្នាប្រព្រឹត្តអំពើក្បត់នេះមុនគេ”។

៣ ពេលឮពាក្យទាំងនេះ ខ្ញុំហែកអាវធំ និងសម្លៀក‌បំពាក់របស់ខ្ញុំ ខ្ញុំបោចសក់ និងបោចពុកចង្កាខ្លួនឯង ហើយអង្គុយកើតទុក្ខ។ ៤ អស់អ្នកដែលខ្លាចព្រះនៃជនជាតិអ៊ីស្រា‌អែល ដាក់ទោសជនជាតិយូដាជាប់ជាឈ្លើយ ដែលត្រឡប់មកវិញ ហើយប្រព្រឹត្តអំពើក្បត់បែបនេះ ក៏នាំគ្នាមកអង្គុយជុំ‌វិញខ្ញុំដែរ។ ខ្ញុំអង្គុយបែបនេះ រហូតដល់ពេលថ្វាយតង្វាយល្ងាច។

៥ លុះដល់ពេលថ្វាយតង្វាយល្ងាច ខ្ញុំក៏ងើបពីភាពសោកសៅ។ ខ្ញុំនៅតែស្លៀកសម្លៀក‌បំពាក់ និងពាក់អាវធំរហែកដដែលនោះ ខ្ញុំលុតជង្គង់ចុះ ហើយលើកដៃឆ្ពោះទៅរកព្រះ‌អម្ចាស់ ជាព្រះនៃខ្ញុំ ៦ ដោយទូល‌អង្វរថា៖

«ឱព្រះនៃទូល‌បង្គំអើយ! ទូល‌បង្គំអាម៉ាស់មុខខ្លាំងណាស់! ព្រះនៃទូល‌បង្គំអើយ ទូល‌បង្គំខ្មាសមិនហ៊ានសម្លឹងទៅរកព្រះ‌អង្គទេ ដ្បិតកំហុសរបស់យើងខ្ញុំកើនកាន់តែច្រើនឡើង ខ្ពស់ជាងក្បាលយើងខ្ញុំទៅទៀត។ រីឯអំពើបាបរបស់យើងខ្ញុំក៏គរឡើងជាច្រើន រហូតដល់ផ្ទៃមេឃដែរ។ ៧ តាំងពីជំនាន់ដូន‌តារបស់យើងខ្ញុំ រហូតដល់សព្វថ្ងៃ យើងខ្ញុំមានកំហុសធ្ងន់ណាស់។ ដោយ‌សារតែអំពើអាក្រក់នេះហើយ បានជាព្រះ‌អង្គប្រគល់យើងខ្ញុំ ស្តេចរបស់យើងខ្ញុំ និងបូជា‌ចារ្យរបស់យើងខ្ញុំ ទៅក្នុងកណ្ដាប់ដៃស្តេចរបស់ប្រជា‌ជាតិនានា។ ពួកគេកាប់សម្លាប់យើងខ្ញុំដោយមុខដាវ កៀរយើងខ្ញុំយកទៅជាឈ្លើយ រឹបអូសយកទ្រព្យ‌សម្បត្តិរបស់យើងខ្ញុំ ធ្វើឲ្យយើងខ្ញុំត្រូវអាម៉ាស់ដូចសព្វថ្ងៃ។ ៨ ប៉ុន្តែ មិនយូរប៉ុន្មាន ព្រះ‌អម្ចាស់ជាព្រះនៃយើងខ្ញុំ បានសម្ដែងព្រះ‌ហឫ‌ទ័យប្រណី‌សន្ដោសមកលើយើងខ្ញុំ ដោយប្រោសប្រទានឲ្យប្រជាជនមួយចំនួននៅសេស‌សល់ ហើយមករស់នៅក្នុងទឹកដីដ៏‌វិសុទ្ធរបស់ព្រះ‌អង្គ។ ទោះ‌បីយើងធ្លាក់ខ្លួនជាទាសករក្តី ក៏ព្រះនៃយើងខ្ញុំប្រោសឲ្យយើងខ្ញុំបានភ្លឺភ្នែក និងឲ្យយើងខ្ញុំមានជីវិតធូរ‌ស្រាលឡើងវិញ។ ៩ យើងខ្ញុំជាទាសករមែន ប៉ុន្តែ ព្រះនៃយើងខ្ញុំពុំបានបោះ‌បង់ចោលយើងខ្ញុំឡើយ។ ព្រះ‌អង្គសម្ដែងព្រះ‌ហឫ‌ទ័យសប្បុរសដល់យើងខ្ញុំ នៅចំពោះព្រះ‌ភ័ក្ត្រស្តេចទាំងប៉ុន្មាននៃស្រុកពែរ្ស គឺព្រះ‌អង្គប្រទានជីវិតថ្មីដល់យើងខ្ញុំ ដើម្បីឲ្យយើងខ្ញុំសង់ព្រះ‌ដំណាក់របស់ព្រះនៃយើងខ្ញុំឡើងវិញ ជួស‌ជុលកន្លែងបាក់‌បែក ព្រមទាំងឲ្យយើងខ្ញុំមានទីជម្រកដ៏រឹង‌មាំនៅស្រុកយូដា និងក្រុងយេរូ‌សាឡឹម។

១០ ឥឡូវនេះ ឱព្រះនៃយើងខ្ញុំអើយ ក្រោយពីមានហេតុ‌ការណ៍កើតឡើងដូច្នេះ តើឲ្យយើងខ្ញុំពោលដូចម្ដេច? ដ្បិតយើងខ្ញុំពុំបានគោរពតាមបទ‌បញ្ជារបស់ព្រះ‌អង្គទេ ១១ គឺបទ‌បញ្ជាដែលព្រះ‌អង្គប្រទានដល់យើងខ្ញុំ តាម‌រយៈព្យាការី ជាអ្នកបម្រើរបស់ព្រះ‌អង្គ។ ព្រះ‌អង្គមានព្រះ‌បន្ទូលមកយើងខ្ញុំជាមុនថា “ស្រុកដែលអ្នករាល់គ្នាចូលទៅចាប់យកនោះ ជាស្រុកមិនបរិសុទ្ធ ដ្បិតជាតិសាសន៍ដែលរស់នៅលើទឹកដីនោះជាមនុស្សមិនបរិសុទ្ធ ហើយគោរពព្រះក្លែង‌ក្លាយ គួរស្អប់ខ្ពើមពាស‌ពេញក្នុងស្រុក។ ១២ ដូច្នេះ មិនត្រូវលើកកូនស្រីរបស់អ្នករាល់គ្នាឲ្យរៀប‌ការជាមួយកូនប្រុសរបស់សាសន៍ដទៃ ហើយក៏មិនត្រូវឲ្យកូនប្រុសរបស់អ្នករាល់គ្នា រៀប‌ការជាមួយកូនស្រីរបស់ពួកគេដែរ។ ទោះ‌បីពួកគេបានសុខ និងចម្រុងចម្រើនក្តី កុំរវី‌រវល់នឹងពួកគេឡើយ។ ធ្វើដូច្នេះ អ្នករាល់គ្នានឹងមានកម្លាំងខ្លាំងក្លា ហើយបរិភោគភោគ‌ផលដ៏ល្អៗនៅក្នុងស្រុក ព្រមទាំងទុកទឹកដីនេះជាកេរ‌មត៌ក ឲ្យកូនចៅរបស់អ្នករហូតតរៀងទៅ”។

១៣ ឱព្រះនៃយើងខ្ញុំអើយ យើងខ្ញុំរងទុក្ខវេទនាបែបនេះ ព្រោះតែអំពើបាប និងកំហុសដ៏ធ្ងន់របស់យើងខ្ញុំ។ ប៉ុន្តែ ព្រះ‌អង្គពុំបានដាក់ទោសយើងខ្ញុំឲ្យសមនឹងកំហុសរបស់យើងខ្ញុំឡើយ គឺព្រះ‌អង្គបានទុកឲ្យពួកយើងខ្ញុំមួយចំនួននៅសេស‌សល់។ ១៤ យើងខ្ញុំពុំអាចរំលោភលើបទ‌បញ្ជារបស់ព្រះ‌អង្គ ដោយទៅចងស្ពាន‌មេត្រីជាមួយជាតិសាសន៍ដ៏គួរស្អប់ខ្ពើមទាំងនោះទៀតទេ។ បើមិនដូច្នោះទេ ព្រះ‌អង្គមុខជាព្រះ‌ពិរោធទាស់នឹងពួកយើងខ្ញុំ រហូតបំផ្លាញយើងខ្ញុំឲ្យវិនាសសូន្យ ឥតទុកឲ្យនៅសេស‌សល់ឡើយ។ ១៥ បពិត្រព្រះ‌អម្ចាស់ ជាព្រះនៃជនជាតិអ៊ីស្រា‌អែល ព្រះ‌អង្គជាព្រះដ៏សុចរិត ហេតុនេះហើយ បានជាព្រះ‌អង្គទុកឲ្យយើងខ្ញុំនៅសេស‌សល់។ យើងខ្ញុំស្ថិតនៅចំពោះព្រះ‌ភ័ក្ត្ររបស់ព្រះ‌អង្គ ទាំងមានបាប។ ធម្មតា អ្នកដែលប្រព្រឹត្តអំពើបាបបែបនេះ មិនអាចឈរនៅចំពោះព្រះ‌ភ័ក្ត្ររបស់ព្រះ‌អង្គឡើយ»។

១០

ជនជាតិអ៊ីស្រា‌អែលលែងប្រពន្ធដែលជាសាសន៍ដទៃ

១ ពេលលោកអែសរ៉ាក្រាបនៅមុខព្រះ‌ដំណាក់ព្រះ‌ជាម្ចាស់ លោកទូល‌អង្វរ និងលន់‌តួបាប ទាំងសម្រក់ទឹកភ្នែក ជនជាតិអ៊ីស្រា‌អែលជាច្រើន ទាំងប្រុស ទាំងស្រី និងក្មេង នាំគ្នាមកជុំ‌វិញលោក ហើយយំសោកយ៉ាងខ្លាំង។ ២ ពេលនោះ លោកសេកា‌នីយ៉ា ជាកូនរបស់លោកយេហ៊ី‌អែល និងជាពូជ‌ពង្សរបស់លោកអេឡាំ ជម្រាបលោកអែសរ៉ាថា៖ «យើងខ្ញុំបានក្បត់ព្រះ‌ជាម្ចាស់ ដោយរៀប‌ការជាមួយស្ត្រីសាសន៍ដទៃ ជាប្រជាជនរស់នៅក្នុងស្រុកនេះ។ ប៉ុន្តែ ទោះបីយ៉ាងនេះក្តី ក៏ជនជាតិអ៊ីស្រា‌អែលនៅតែមានសង្ឃឹម។ ៣ យើងខ្ញុំសូមចងសម្ពន្ធ‌មេត្រីជាមួយព្រះនៃយើងថា យើងខ្ញុំនឹងបោះ‌បង់ប្រពន្ធសាសន៍ដទៃ ព្រមទាំងកូនដែលកើតពីស្ត្រីទាំងនោះទៀតផង។ យើងខ្ញុំសុខចិត្តធ្វើតាមសំណូមពររបស់លោកម្ចាស់ និងអស់អ្នកដែលគោរពកោតខ្លាច ចំពោះបទ‌បញ្ជារបស់ព្រះនៃយើង។ សូមឲ្យបានសម្រេចតាមគម្ពីរ‌វិន័យចុះ។ ៤ សូមលោកក្រោកឡើង ហើយបំពេញកិច្ច‌ការរបស់លោកចុះ យើងខ្ញុំគាំ‌ទ្រលោក។ សូមលោកមានចិត្តក្លាហានឡើង រួចសម្រេចកិច្ច‌ការនេះទៅ»។

៥ លោកអែសរ៉ាក្រោកឡើង បង្គាប់មេដឹកនាំក្រុមបូជា‌ចារ្យ និងក្រុមលេវី ព្រមទាំងមេដឹកនាំជនជាតិអ៊ីស្រា‌អែលទាំងមូល ឲ្យស្បថ ហើយធ្វើតាមសំណើរបស់លោកសេកា‌នីយ៉ា។ ពួកគេក៏នាំគ្នាស្បថ។ ៦ បន្ទាប់មក លោកអែសរ៉ាចាក‌ចេញពីមុខព្រះ‌ដំណាក់របស់ព្រះ‌ជាម្ចាស់ ហើយចូលទៅក្នុងបន្ទប់របស់លោកយ៉ូហាណន ដែលជាកូនលោកអេលី‌យ៉ា‌ស៊ីប។ នៅទីនោះ លោកមិនព្រមពិសាអាហារ ឬទឹកឡើយ ដ្បិតលោកនៅតែសោក‌សង្រេង ដោយ‌សារកំហុសដ៏ធ្ងន់របស់ប្រជាជនដែលជាប់ជាឈ្លើយ ហើយវិលមកវិញ។

៧ បន្ទាប់មកទៀត គេចេញប្រកាសពាស‌ពេញក្រុងយេរូ‌សាឡឹម និងស្រុកយូដា បង្គាប់ឲ្យអស់អ្នកដែលជាប់ជាឈ្លើយ ហើយវិលមកវិញនោះ ជួប‌ជុំគ្នានៅក្រុងយេរូ‌សាឡឹម។ ៨ អ្នកណាមិនព្រមមក ក្នុង‌រយៈពេលបីថ្ងៃ តាមសេចក្ដីសម្រេចរបស់មេដឹកនាំ និងព្រឹទ្ធា‌ចារ្យ គេនឹងរឹបអូសទ្រព្យ‌សម្បត្តិរបស់អ្នកនោះ ហើយបណ្តេញគាត់ចេញពីសហគមន៍អ៊ីស្រា‌អែល។

៩ ក្នុងអំឡុងពេលបីថ្ងៃ ប្រុសៗទាំងអស់ក្នុងកុល‌សម្ព័ន្ធយូដា និងបេន‌យ៉ា‌មីន មកជួប‌ជុំគ្នានៅក្រុងយេរូ‌សាឡឹម។ នៅថ្ងៃទីម្ភៃ ក្នុងខែទីប្រាំបួន ប្រជាជនទាំងមូលអង្គុយនៅត្រង់ទី‌ធ្លា ខាងមុខព្រះ‌ដំណាក់របស់ព្រះ‌ជាម្ចាស់។ ពួកគេញាប់‌ញ័រជាខ្លាំង ព្រោះតែព្រឹត្តិ‌ការណ៍នេះ និងព្រោះតែមានភ្លៀងផង។ ១០ លោកបូជា‌ចារ្យអែសរ៉ាក្រោកឈរឡើង ពោលទៅកាន់ពួកគេថា៖ «អ្នករាល់គ្នាបានក្បត់ព្រះ‌ជាម្ចាស់ ដោយរៀប‌ការជាមួយស្ត្រីសាសន៍ដទៃ ធ្វើឲ្យជនជាតិអ៊ីស្រា‌អែលរឹតតែមានទោស។ ១១ ឥឡូវនេះ ចូរលន់‌តួបាបនៅចំពោះព្រះ‌ភ័ក្ត្រព្រះ‌អម្ចាស់ ជាព្រះនៃបុព្វ‌បុរសរបស់អ្នករាល់គ្នា ហើយប្រព្រឹត្តតាមព្រះ‌ហឫ‌ទ័យព្រះ‌អង្គ។ ចូរញែកខ្លួនចេញពីជាតិសាសន៍ដែលរស់នៅក្នុងស្រុក ព្រមទាំងញែកខ្លួនចេញពីប្រពន្ធរបស់អ្នករាល់គ្នា ដែលជាសាសន៍ដទៃផង»។

១២ សហគមន៍ទាំងមូលឆ្លើយតប ដោយបន្លឺសំឡេងយ៉ាងខ្លាំងៗថា៖ «ពិតមែនហើយ យើងខ្ញុំនឹងធ្វើតាមពាក្យរបស់លោក! ១៣ ប៉ុន្តែយើងខ្ញុំមានគ្នាច្រើន ហើយជារដូវភ្លៀងផង ដូច្នេះ យើងខ្ញុំមិនអាចនៅខាងក្រៅបានទេ។ មួយវិញទៀត កិច្ច‌ការនេះពុំអាចសម្រេចក្នុង‌រយៈពេលមួយថ្ងៃ ឬពីរថ្ងៃឡើយ ដ្បិតមានគ្នាច្រើនក្នុងចំណោមពួកយើងបានប្រព្រឹត្តអំពើបាបនេះ។ ១៤ សូមឲ្យមេដឹកនាំរបស់យើងខ្ញុំស្ថិតនៅទីនេះ ក្នុងនាមសហគមន៍ទាំងមូល។ រីឯអស់អ្នកដែលរស់នៅតាមទី‌ក្រុងរបស់យើង ហើយរៀប‌ការជាមួយស្ត្រីសាសន៍ដទៃនោះ ត្រូវមកបង្ហាញខ្លួនចំពោះមុខមេដឹកនាំនៅថ្ងៃដែលព្រឹទ្ធា‌ចារ្យ និងអ្នកគ្រប់‌គ្រងក្រុងនីមួយៗ បានកំណត់ទុក។ យើងខ្ញុំនឹងធ្វើបែបនេះ រហូតទាល់តែព្រះ‌ពិរោធរបស់ព្រះនៃយើងខ្ញុំបានស្ងប់»។

១៥ មានតែលោកយ៉ូណាថាន ជាកូនរបស់លោកអសាអែល និងលោកយ៉ាស៊ីយ៉ា ជាកូនរបស់លោកទីកវ៉ាប៉ុណ្ណោះ ដែលជំទាស់នឹងការសម្រេចនេះ ដោយមានការគាំ‌ទ្រពីសំណាក់លោកមេស៊ូឡាំ និងលោកសាប់‌ថាយ ពីក្រុមលេវី។ ១៦ ប្រជាជនដែលជាប់ជាឈ្លើយ ហើយវិលមកវិញ យល់ស្របទាំងអស់គ្នា។ លោកបូជា‌ចារ្យអែសរ៉ាបានជ្រើស‌រើសមេក្រុមគ្រួសារក្នុងអំបូរនីមួយៗ តាមឈ្មោះរបស់ពួកគេរៀងៗខ្លួន។ អ្នកទាំងនោះចូលរួមពិនិត្យមើលសំណុំរឿងនេះ នៅថ្ងៃទីមួយ ក្នុងខែទីដប់។ ១៧ នៅថ្ងៃទីមួយ ក្នុងខែទីមួយ គេបង្ហើយការពិនិត្យមើលសំណុំរឿងរបស់អស់អ្នក ដែលរៀប‌ការនឹងស្ត្រីសាសន៍ដទៃនោះ។

បញ្ជីឈ្មោះជនជាតិយូដាដែលបានរៀប‌ការជាមួយស្ត្រីសាសន៍ដទៃ

១៨ ក្នុងចំណោមក្រុមបូជា‌ចារ្យ ដែលបានរៀប‌ការជាមួយស្ត្រីសាសន៍ដទៃមាន: កូនចៅលោកយ៉ូស៊ូអា កូនចៅលោកយ៉ូសា‌ដាក និងកូនចៅរបស់បង‌ប្អូនគាត់ គឺលោកម៉ាសេយ៉ា លោកអេលី‌យេ‌ស៊ែរ លោកយ៉ារីប និងលោកកេដេ‌លីយ៉ា។ ១៩ ពួកគេបានសន្យាថានឹងលែង‌លះប្រពន្ធរបស់ខ្លួន ហើយថ្វាយចៀមឈ្មោលមួយជាយញ្ញ‌បូជារំដោះបាប។ ២០ បន្ទាប់មក មានកូនចៅលោកអ៊ីមែរ គឺលោកហាណានី និងលោកសេបា‌ឌីយ៉ា ២១ កូនចៅលោកហារីម គឺលោកម៉ាសេយ៉ា លោកអេលីយ៉ា លោកសេម៉ាយ៉ា លោកយេហ៊ី‌អែល និងលោកអសា‌រីយ៉ា ២២ កូនចៅលោកប៉ាសួរ គឺលោកអេលី‌យ៉ូណៃ លោកម៉ាសេយ៉ា លោកអ៊ីស្មា‌អែល លោកនេតា‌នេ‌អែល លោកយ៉ូសា‌បាដ និងលោកអេឡាសារ។

២៣ ក្នុងចំណោមក្រុមលេវីមានលោកយ៉ូសា‌បាដ លោកស៊ីម៉ៃ លោកកេឡាយ៉ា ហៅកេលីតា លោកប៉េតាយ៉ា និងលោកអេលី‌យេ‌ស៊ែរ។

២៤ ក្នុងចំណោមក្រុមចម្រៀងមានលោក អេលី-‌យ៉ា‌ស៊ីប។ ក្នុងចំណោមក្រុមយាមទ្វារមានលោកសាលូម លោកថេលេម និងលោកអ៊ូរី។

២៥ ក្នុងចំណោមជនជាតិអ៊ីស្រា‌អែល: កូនចៅលោកប៉ារ៉ូសមានលោករ៉ាមីយ៉ា លោកអ៊ីស៊ីយ៉ា លោកម៉ាល់‌គីយ៉ា លោកមីយ៉ា‌មីន លោកអេឡាសារ លោកម៉ាល់‌គីយ៉ា និងលោកបេណាយ៉ា។ ២៦ កូនចៅលោកអេឡាំមានលោកម៉ាថា‌នីយ៉ា លោកសាការី លោកយេហ៊ី‌អែល លោកអាប់ឌី លោកយេរេ‌ម៉ុត និងលោកអេលីយ៉ា។ ២៧ កូនចៅលោកសាធូមានលោកអេលី‌យ៉ូណៃ លោកអេលី‌យ៉ា‌ស៊ីប លោកម៉ាថា‌នីយ៉ា លោកយេរេ‌ម៉ុត លោកសេបាដ និងអស៊ីសា។ ២៨ កូនចៅលោកបេបៃមានលោកយ៉ូហាណន លោកហាណា‌នីយ៉ា លោកសាបៃ និងលោកអាត់ឡៃ។ ២៩ កូនចៅលោកបានីមានលោកមេស៊ូឡាំ លោកម៉ាលូក លោកអដាយ៉ា លោកយ៉ាស៊ូប លោកសេអាល់ និងលោកយេរេម៉ុត។ ៣០ កូនចៅលោកប៉ាហាត់-‌ម៉ូអាប់មាន លោកអាដណា លោកកេឡាល លោកបេណាយ៉ា លោកម៉ាសេយ៉ា លោកម៉ាថា‌នីយ៉ា លោកបេសា‌លេអែល លោកប៊ីនូអ៊ី និងលោកម៉ាណាសេ។ ៣១ កូនចៅលោកហារីមមានលោកអេលី‌យេ‌ស៊ែរ លោកយីស៊ីយ៉ា លោកម៉ាល់‌គីយ៉ា លោកសេម៉ាយ៉ា លោកស៊ីម៉ូន ៣២ លោកបេន‌យ៉ា‌មីន លោកម៉ាលូក និងលោកសេម៉ា‌រីយ៉ា។ ៣៣ កូនចៅលោកហាស៊ូមមានលោកម៉ាត់ណៃ លោកម៉ាត់‌តាថា លោកសេបាដ លោកអេលី‌ផេ‌លេត លោកយេរេម៉ៃ លោកម៉ាណាសេ និងលោកស៊ីម៉ៃ។ ៣៤ កូនចៅលោកបានីមាន លោកម៉ាដាយ លោកអាំរ៉ាម លោកអ៊ូអែល ៣៥ លោកបេណាយ៉ា លោកបេឌី‌យ៉ា លោកកេលូ‌ហ៊ូ ៣៦ លោកវ៉ានីយ៉ា លោកមេរេម៉ុត លោកអេលី‌យ៉ា‌ស៊ីប ៣៧ លោកម៉ាថា‌នីយ៉ា លោកម៉ាត់ណៃ លោកយ៉ាសៃ ៣៨ លោកបានី លោកប៊ីនូអ៊ី លោកស៊ីម៉ៃ ៣៩ លោកសេឡេ‌មីយ៉ា លោកណាថាន លោកអដាយ៉ា ៤០ លោកម៉ាក់ណាដបៃ លោកសាសៃ លោកសារ៉ៃ ៤១ លោកអសា‌រេ‌អែល លោកសេឡេ‌មីយ៉ា លោកសេម៉ា‌រីយ៉ា ៤២ លោកសាលូម លោកអម៉ា‌រីយ៉ា និងលោកយ៉ូសែប។ ៤៣ កូនចៅលោកនេបូមានលោកយេអែល លោកម៉ាធី‌ធីយ៉ា លោកសេបាដ លោកសេប៊ីណា លោកយ៉ាត់ដៃ លោកយ៉ូអែល និងលោកបេណាយ៉ា។ ៤៤ អ្នកទាំងនេះបានរៀប‌ការជាមួយស្ត្រីសាសន៍ដទៃ ហើយមួយចំនួនមានកូនទៀតផង៕

540 Views

Post Views: 517