(PDF)

ទំនុកតម្កើងលេខ ១ បទកាកគតិ

១	អ្នកមិនប្រព្រឹត្ត	តាមមនុស្សទុច្ចរិត	មិនស្តាប់ទូន្មាន
	ហើយមិនចូលចិត្ត	ដើរតាមស្នាមដាន	អ្នកនោះនឹងមាន
		មង្គលពេកក្រៃ ។
២	តែតាមការពិត	ពួកគេចូលចិត្ត	នឹងធម្មវិន័យ
	របស់ព្រះម្ចាស់	ទាំងយប់ទាំងថ្ងៃ	សញ្ជឹងរំពៃ
		ឥតមានភ្លេចភ្លឹក ។
៣	អ្នកនោះប្រៀបបាន	ដើមឈើល្អថ្កាន	ដុះក្បែរផ្លូវទឹក
	មិនស្លោកស្រពោន	ឱ្យផលផ្លែស្លឹក	ចម្រើនសន្ធឹក
		តាមកាលរដូវ ។
៤	រីមនុស្សអាក្រក់	មានចិត្តគម្រក់	កេរ្តិ៍ឈ្មោះអាស្រូវ
	ពួកគេប្រៀបបាន	អង្កាមដែលត្រូវ	ខ្យល់ផាត់ប៉ើងទៅ
		បាចសាចខ្ចាត់ខ្ចាយ ។
៥	ថ្ងៃព្រះអម្ចាស់	វិនិច្ឆ័យទោស	ជនពាលទាំងឡាយ
	ព្រមទាំងមនុស្សបាប	មិនស្ថិតស្ថេរឡើយ	ត្រូវតែឃ្លាតឆ្ងាយ
		ពីអ្នកសុចរិត ។
៦	ដ្បិតព្រះអម្ចាស់	ស្គាល់ប្រាកដណាស់	មាគ៌ាប្រណីត
	នៃមនុស្សល្អ	ស្មោះសរសុចរិត	មាគ៌ាឧក្រិដ្ឋ
		នាំខ្លួនអន្តរាយ ។

ទំនុកតម្កើងលេខ ២ បទពាក្យ ៧

១	ហេតុអ្វីបានជាប្រជាជាតិ	នាំគ្នាខ្មីឃ្មាតកើតកង្វល់
	បង្កើតវឹកវរចលាចល	រអ៊ូខ្វាយខ្វល់គ្មានខ្លឹមសារ	។
២	ពួកស្តេចនៅលើភពផែនដី	បះបោរពួតដៃឃុបឃិតគ្នា
	ប្រឆាំងព្រះម្ចាស់ឥតរួញរា	និងព្រះគ្រីស្តជាបុត្រព្រះអង្គ	។
៣	គេពោលថា៖ «យើងទៅបំបាក់	នឹមព្រះអម្ចាស់កុំរេរង់
	គ្រវែងច្រវាក់កុំបង្អង់	របស់ព្រះអង្គចោលចេញទៅ!»	។
៤	ប៉ុន្តែព្រះអម្ចាស់គ្រងរាជ្យ	ពេញដោយអំណាចមិនអាស្រូវ
	នាស្ថានបរមសុខគ្មានហ្មងសៅ	ចំអកដាក់ទៅខ្មាំងល្ងង់ឆោត	។
៥	ព្រះអង្គមានព្រះបន្ទូលទៅ	ពួកខ្មាំងសត្រូវដោយក្រេវក្រោធ
	ទ្រង់ធ្វើឱ្យគេភ័យតក់ស្លុត	ដោយព្រះពិរោធដូច្នេះថា៖	។
៦	«គឺយើងនេះហើយដែលអភិសេក	ឱ្យទៅដល់ស្តេចយើងនោះណា
	នៅលើស៊ីយ៉ូនភ្នំដែលជា	ទីដ៏សុខាសែនវិសុទ្ធ»	។
៧	ខ្ញុំនឹងថ្លែងក្រឹត្យព្រះអម្ចាស់	មានបន្ទូលច្បាស់យ៉ាងមោះមុត
	ថា៖ «ព្រះអង្គនេះពិតជាបុត្រ	ដែលយើងបង្កើតនៅថ្ងៃនេះ»	។
៨	បើព្រះអង្គសុំយើងនឹងផ្តល់	ប្រជាជាតិដល់ទ្រង់ទាំងអស់
	ឱ្យព្រះអង្គទុកជាមត៌ក	ផែនដីទាំងអស់ជាកម្មសិទ្ធិ	។
៩	ទ្រង់នឹងបង្ក្រាបមិនទុកទេ	ឱ្យអស់ពួកគេទើបអស់ចិត្ត
	ដំបងដែកវាយជនទុច្ចរិត	កំពាចកំពិតដូចភាជន៍បែក	។
១០	ស្តេចទាំងឡាយអើយឥឡូវនេះ	ចូរគិតត្រិះរិះកុំរារែក
	អស់អ្នកគ្រប់គ្រងកុំអស់អែក	ត្រូវចេះបែងចែកទទួលយក	។
១១	នូវការអប់រំដ៏ប្រពៃ	បម្រើម្ចាស់ថ្លៃដោយចូលមក
	គោរពកោតខ្លាចក្រាបលុតក្រោក	គាល់រកព្រះអង្គទាំងញាប់ញ័រ	។
១២	ចូរថ្វាយបង្គំព្រះរាជបុត្រ	ក្រែងទ្រង់ពិរោធនាំបង្ក
	វិនាសអន្តរាយទាំងមាគ៌ា	នៃអ្នករាល់គ្នាគ្មានប្រណី	។
	ដ្បិតព្រះពិរោធនៃព្រះអង្គ	នឹងឆាបឆេះឡើងឆាប់ៗក្រៃ
	អ្នកដែលជ្រកកោនក្រោមបារមី	ពិតជាមានជ័យសុភមង្គល	។

ទំនុកតម្កើងលេខ ៣ បទបន្ទោលកាក

២	ឱ! ព្រះអម្ចាស់	សត្រូវច្រើនណាស់ជិតជុំ
	អ្នកប្រឆាំងខ្ញុំ	ក៏មកមូលផ្តុំច្រើនដែរ	។
៣	អ្នកខ្លះពោលថា៖	«អង្គម្ចាស់ក្សត្រាងាកបែរ
	មិនសង្គ្រោះទេ	ទ្រង់ទុកឱ្យគេឯកា»	។
៤	ឱ! ព្រះអម្ចាស់	ទ្រង់វិសេសណាស់អស្ចារ្យ
	ជាខែលការពារ	ដល់ខ្ញុំនេះណាពិតណាស់	។
	ព្រះអង្គប្រទាន	សិរីឱ្យមានត្រចះ
	ហើយព្រះអង្គប្រោស	ឱ្យខ្ញុំងើបមុខវិញបាន	។
៥	ខ្ញុំហៅរកព្រះ	ជាម្ចាស់អស់ពីចិត្តប្រាណ
	ព្រះអង្គក៏បាន	តបឆ្លើយពីភ្នំឥតសល់	។
៦	ខ្ញុំទម្រេតខ្លួន	លង់លក់សមសួនស្កប់ស្កល់
	ភ្ញាក់ឡើងឥតខ្វល់	ដ្បិតទ្រង់ផ្តល់ការគាំទ្រ	។
៧	ទោះបីមានមនុស្ស	លើកគ្នាស្រីប្រុសឈូឆរ
	ប្រឆាំងតបត	ក៏ខ្ញុំមិនភ័យខ្លាចដែរ	។
៨	ព្រះអម្ចាស់អើយ	សូមកុំព្រងើយងាកបែរ
	សូមកុំកែប្រែ	មេត្តាជួយរូបខ្ញុំផង	។
	ព្រះអង្គមិនខ្លាច	ទ្រង់ប្រើអំណាចតែម្តង
	បំបាក់ធ្មេញផង	ទះកំផ្លៀងខ្មាំងសត្រូវ	។
៩	ឱ! ព្រះអម្ចាស់	ទ្រង់ពិតជាព្រះនាំផ្លូវ
	សូមប្រទាននូវ	ព្រះពរដល់ទៅរាស្រ្តផង	។

ទំនុកតម្កើងលេខ ៤ បទពាក្យ៧

២	ឱព្រះអម្ចាស់ថ្លៃបវរ	ដែលរកយុត្តិធម៌ឱ្យយើងខ្ញុំ
	ពេលទូលបង្គំអង្វរសុំ	សូមតបមកខ្ញុំកុំបង្អង់	។
	ពេលយើងខ្ញុំមានទុក្ខធុរៈ	ព្រះអង្គថ្នមថ្នាក់មិនឱ្យឆ្គង
	យើងបានធូរស្បើយផុតសៅហ្មង	សូមសណ្តាប់ផងដោយមេត្តា	។
៣	តើពួកមនុស្សទាំងអស់នោះ	ជាន់ឈ្លីកិត្តិយសខ្ញុំដល់ណា
	ហើយចូលចិត្តអ្វីមិនបានការ	និយាយមុសាដល់ណាទៀត ?	។
៤	ត្រូវដឹងថាព្រះជាអម្ចាស់	តែងប្រណីប្រោសមិនរវាត
	ពេលខ្ញុំស្រែករកព្រះអង្គឆ្លៀត	ស្តាប់ខ្ញុំមិនឃ្លាតជាប់ជានិច្ច	។
៥	ចូរស្អប់អំពើណាអាក្រក់	ស្មោកគ្រោកកខ្វក់មានកលល្បិច
	កុំប្រព្រឹត្តបាបទោះច្រើនតិច	ពេលដេកកុំភ្លេចពិចារណា	។
៦	ថ្វាយយញ្ញបូជាតាមវិន័យ	ពឹងផ្អែកក្សត្រថ្លៃគ្រងលោកា
	លះបង់ឱ្យអស់ក្តីមុសា	ថ្វាយ កាយ វាចា ចិត្ត ស្មោះត្រង់	។
៧	មានមនុស្សជាច្រើនតែងពោលថា	តើមាននរណានាំតម្រង់
	សុភមង្គលដ៏ត្រចង់	ឱ្យយើងខ្ញុំផងសូមទតចុះ	។
៨	ព្រះអង្គបានដាក់ក្តីអំណរ	សប្បាយអបអរចិត្តស្រស់បស់
	ជាងពេលប្រមូលផលទាំងអស់	និងពេលច្រូតបេះផលផ្លែផ្កា	។
៩	ពេលទូលបង្គំចូលដំណេក	ទូលបង្គំដេកស្កប់កាយា
	ព្រះអង្គឱ្យមនុស្សក្នុងលោកា	បានសុខរមនាតទៅអើយ	។

ទំនុកតម្កើងលេខ ៥ បទព្រហ្មគីតិ

២	ឱ! ព្រះអម្ចាស់អើយ	កុំកន្តើយផ្ទៀងព្រះកាណ៌
	ស្តាប់សព្ទខ្ញុំវាចា	ខ្ញុំឈឺផ្សារពន់ពេកក្រៃ	។
៣	ឱ! ព្រះជាអម្ចាស់	ទ្រង់ជាព្រះមហាក្សត្រថ្លៃ
	សូមយកព្រះហឫទ័យ	នឹងសម្រែកទូលបង្គំ	។
៤	នាពេលអារុណរះ	ព្រះអម្ចាស់សណ្តាប់ខ្ញុំ
	ដែលចូលមកគាល់សុំ	ពីព្រលឹមមិនទៅណា	។
៥	ទ្រង់មិនសព្វព្រះទ័យ	អំពើព្រៃផ្សៃឫស្យា
	ជនអាក្រក់មុសា	ក្បែរភក្ត្រាព្រះអង្គឡើយ	។
៦	ព្រះអង្គមិនចង់ឃើញ	ជនព្រហើនចូលកៀកកើយ
	មិនសព្វព្រះទ័យឡើយ	ជនណាហើយធ្វើអាក្រក់	។
៧	អស់អ្នកបង្ហូរឈាម	អស់អ្នកបៀមល្បិចកខ្វក់
	ពួកអ្នកភូតកុហក	បោកវីវក់វិនាសបង់	។
៨	រីឯទូលបង្គំ	ចូលក្នុងដំណាក់ព្រះអង្គ
	ដោយព្រះហឫទ័យទ្រង់	សប្បុរសខ្លាំងអស្ចារ្យ	។
	រូបខ្ញុំសូមឱនក្រាប	បង្គំទាបទាំងកាយា
	តម្រង់ទៅវិហារ	ដ៏វិសុទ្ធទាំងកោតខ្លាច	។
៩	ឱ! ព្រះជាអម្ចាស់	មនុស្សច្រើនណាស់ឃ្លាំព្រឹកល្ងាច
	សូមនាំឱ្យខ្ញុំអាច	ធ្វើតាមរាជហឫទ័យផង	។
	សូមជួយពង្រាបផ្លូវ	ខ្ញុំដើរទៅឱ្យបានត្រង់
	ជាផ្លូវនៃព្រះអង្គ	នាំតម្រង់ខ្ញុំតទៅ	។
១០	អ្នកទាំងនោះស្រដី	ពាក្យគ្មានន័យមិនត្រឹមត្រូវ
	អណ្តាតគ្រលាស់នូវ	ពាក្យអាស្រូវដោយពិសពុល	។
១១	ឱ! ព្រះជាម្ចាស់អើយ	សូមកុំឱ្យមានយោគយល់
	ឱ្យវិនាសគ្មានសល់	ដោយគម្រោងការផងខ្លួន	។
	ពួកគេបានប្រព្រឹត្ត	រឿងទុច្ចរិតច្រើនផ្ទួនៗ
	ប្រឆាំងនឹងក្សត្រខ្លួន	ល្មមសមសួនកាត់កាល់ចុះ	។
១២	រីឯអ្នកជ្រកកោន	ដោយថ្វាយខ្លួនសុំរួមរស់
	ក្រោមបារមីសន្តោស	សូមសង្គ្រោះថែរក្សា	។
១៣	បពិត្រព្រះអម្ចាស់	ប្រាកដណាស់មានមេត្តា
	ប្រទានពរថ្លៃថ្លា	ដល់មនុស្សម្នាដែលសុចរិត	។
	ហឫទ័យករុណា	ប្រៀបឧបមាខែលជុំជិត
	ការពារជនសុចរិត	ឱ្យរួចផុតក្តីសៅហ្មង	។

ទំនុកតម្កើងលេខ ៦ បទពាក្យ៧

២	សូមព្រះអម្ចាស់កុំពិរោធ	បើទ្រង់ខ្ញាល់ក្រោធសូមដាក់ទោស
	ដល់ទូលបង្គំតាមកំហុស	ដែលបានធ្វើខុសកុំចាប់ថ្នាក់	។
៣	ព្រះអម្ចាស់អើយប្រណីប្រោស	ខន្តីសន្តោសបង្គំជាក់
	សូមប្រោសឱ្យជាកុំអន់អាក់	ដ្បិតកាយញ័រញាក់សែនរងា	។
៤	ក្នុងចិត្តគំនិតទាល់ថប់ធុញ	តប់ប្រមល់សុញសែនវេទនា
	ឱ! ព្រះអម្ចាស់សូមករុណា	ឱ្យខ្ញុំឈឺផ្សាដល់ណាទៀត	។
៥	ឱ! ព្រះអម្ចាស់សូមយាងមក	សង្គ្រោះមនុស្សលោកកុំរវាត
	កុំឱ្យរូបខ្ញុំជួបទុក្ខទៀត	កុំបីឃ្លាងឃ្លាតពីហឫទ័យ	។
៦	ពេលដែលគេស្លាប់ផុតទៅហើយ	ពុំដែលមានឡើយនឹកស្រមៃ
	ដល់នាមព្រះអង្គម្ចាស់ថ្លាថ្លៃ	នៅនាស្ថាននៃមនុស្សស្លាប់ឡើយ	។
៧	ទូលបង្គំយំស្រែកទួញថ្ងូរ	គ្មានឈប់គ្មានឈរឮល្វើយៗ
	រៀងរាល់ថ្ងៃយប់ទុក្ខឥតស្បើយ	ទឹកភ្នែកជោកខ្នើយនៅលើគ្រែ	។
៨	ទុក្ខកង្វល់ច្រើនធ្វើឱ្យខ្ញុំ	ស្លេកស្លាំងស្គមគ្មានពេលល្ហែ
	ឯភ្នែកខ្ញុំក៏ស្រវាំងដែរ	នេះពីព្រោះតែបច្ចាមិត្ត	។
៩	ចូរចៀសចេញចាកឆ្ងាយពីខ្ញុំ	កុំពួនសំងំមនុស្សទុច្ចរិត
	ដ្បិតព្រះអម្ចាស់សណ្តាប់ពិត	រៀងរាល់យប់ព្រឹកខ្ញុំស្រែកយំ	។
១០	ព្រះអម្ចាស់ទ្រង់ព្រះសណ្តាប់	ពាក្យខ្ញុំរ៉ាយរ៉ាប់ដោយក្រៀមក្រំ
	ព្រះអង្គទទួលអង្វរខ្ញុំ	ឥតមានបន្លំមួយម៉ាត់សោះ	។
១១	សូមខ្មាំងសត្រូវទាំងប៉ុន្មាន	ចិត្តជាតិរច្ឆានត្រូវអាម៉ាស់
	ដកខ្លួនថយទៅទាំងអៀនខ្មាស់	ខ្ចាត់ខ្ចាយព្រាត់ប្រាសបាត់សោះសូន្យ	។

ទំនុកតម្កើងលេខ ៧ បទពាក្យ៧

២	ឱ! ព្រះជាអម្ចាស់ខ្ញុំអើយ	ខ្ញុំសូមពឹងហើយលើព្រះអង្គ
	សង្គ្រោះរំដោះនិងទ្រទ្រង់	រួចពីអន្លង់អ្នកបៀតបៀន	។
៣	ក្រែងលោគេហែកទូលបង្គំ	ដូចសត្វសិង្ហខាំដោយស្រេកឃ្លាន
	នោះគ្មាននរណាអាចនឹងហ៊ាន	រំដោះឱ្យបានរួចជីវិត	។
៤	ឱ! ព្រះអម្ចាស់ទូលបង្គំ	ប្រសិនបើខ្ញុំបានប្រព្រឹត្ត
	ដូចពាក្យគេថាដោយគ្មានគិត	ប្រឡាក់ដាមដិតក្តីកខ្វក់	។
៥	ប្រសិនបើទូលបង្គំបាន	ប្រព្រឹត្តសាមាន្យចិត្តអាក្រក់
	តបនឹងមិត្តភក្តិដោយគម្រក់	រឹបអូសលួចឆក់យកទ្រព្យា	។
៦	សូមឱ្យសត្រូវខ្មាំងដេញទាន់	និងឱ្យគេជាន់ឈ្លីប្រហារ
	ព្រមទាំងកិត្តិយសខ្ញុំនេះណា	ទម្លាក់អាត្មាក្នុងភក់ចុះ	។
៧	ឱ! ព្រះអម្ចាស់សូមតើនឡើង	ពិរោធឱ្យប៉ើងតបចំពោះ
	អំពើឃោរឃៅសត្រូវនេាះ	ដ្បិតអង្គសប្បុរសតែងតាំងច្បាប់	។
៨	សូមឱ្យប្រជាជាតិនានា	ចោមរោមនាំគ្នាមកត្រងត្រាប់
	ជុំវិញព្រះអង្គល្អគួរគាប់	លើអស់មនុស្សសព្វសត្វនានា	។
៩	ព្រះអង្គជាចៅក្រមវិនិច្ឆ័យ	ប្រជាប្រុសស្រីគ្រប់អង្គា
	ព្រះអម្ចាស់អើយសូមមេត្តា	រូបខ្ញុំនេះណាអ្នកស្លូតត្រង់	។
១០	សូមឈប់ធ្វើអំពើទុច្ចរិត​	ជួយគាំទ្រចិត្តមនុស្សរឹងប៉ឹង
	បពិត្រព្រះដ៏សុចរិតថ្កើង	ព្រះអង្គតែងឈ្វេងយល់ចិត្តមនុស្ស	។
១១	ព្រះអង្គជាខែលការពារខ្ញុំ	ទ្រង់ជួយឧបត្ថម្ភនិងសង្គ្រោះ
	អ្នកដែលមានចិត្តទៀងត្រង់ស្មោះ	បានភ្លឺត្រចះត្រចង់ជាក់	។
១២	ព្រះម្ចាស់ជាចៅក្រមសុចរិត	ព្រះអង្គតែងគិតដាក់ទោសអ្នក
	ប្រព្រឹត្តអាក្រក់ឥតមានអាក់	គ្មាននរណាម្នាក់រួចខ្លួនទេ	។
១៣	ជនអាក្រក់មិនដូរគំនិត	សំលៀងកាំបិតដាវរិះរេ
	យិតធ្នូប្រុងបាញ់ប្រហារគេ	ព្រៃផ្សៃម៉្លេះទេជនអប្រីយ៍	។
១៤	គេនឹងរៀបចំអាវុធស្នា	ដើម្បីប្រហារអ្នកដទៃ
	ព្រមទាំងត្រៀមបាញ់ព្រួញភ្លើងជ័យ	សម្លឹងរំពៃចាំជាស្រេច	។
១៥	អ្នកណាគិត​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​តែពីប្រព្រឹត្ត	អំពើទុច្ចរិតមួលបង្កាច់
	សាងរឿង​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​ឧក្រិដ្ឋជាចាំបាច់	ចូលចិត្តសម្រេចរឿងបោកប្រាស	។
១៦	រីអ្នក​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​ដែលខំជីករណ្តៅ	ឱ្យកាន់តែជ្រៅអ្នកនោះច្បាស់
	នឹងធ្លាក់ខ្លួនឯងប្រាកដណាស់	ព្រោះខ្លួនគេនោះជីកកកាយ	។
១៧	អំពើទុច្ចរិតដែលគេបាន	ធ្វើមិនស្រាកស្រាន្តមិនជិនណាយ
	អំពើឃោរឃៅនាំអន្តរាយ	ធ្លាក់លើរូបកាយក្បាលគេពិត	។
១៨	ខ្ញុំនឹងសរសើរតម្កើងព្រះ	អម្ចាស់មានហឫទ័យសុចរិត
	ខ្ញុំនឹងច្រៀងលើកតម្កើងឫទ្ធិ	ព្រះនាមបរិសុទ្ធខ្ពស់ឧត្តម	។

ទំនុកតម្កើងលេខ ៨ បទកាកគតិ

២	ឱ! ព្រះអម្ចាស់	ព្រះអង្គជាព្រះ	របស់យើងខ្ញុំ
	ព្រះនាមព្រះអង្គ	រុងរឿងឧត្តម	ពាសពេញជិតជុំ
		ផ្ទៃមេឃផែនដី	។
៣	ព្រះអង្គបានប្រើ	ពាក្យកោតសរសើរ	តម្កើងថ្លាថ្លៃ
	របស់ក្មេងៗ	និងទារកក្តី	ជាកម្លាំងជ័យ
		លើសត្រូវមារ	។
៤	ពេលទូលបង្គំ	សម្លឹងមើលចំ	ទៅផ្ទៃមេឃា
	មើលហ្វូងតារា	មើលព្រះចន្ទ្រា	ដ៏ស្រស់សោភា
		ស្នាព្រះហស្តថ្លៃ	។
៥	ខ្លួនខ្ញុំសួរថា	តើមនុស្សយើងណា	មានឋានៈអ្វី
	បានជាព្រះអង្គ	នឹកគិតរំពៃ	យកព្រះហឫទ័យ
		ទុកដាក់ដូច្នោះ?	។
៦	ព្រះអង្គប្រទាន	ឱ្យមនុស្សយើងមាន	កិត្តិយសខ្ពង់ខ្ពស់
	ទាបជាងទេវតា	បន្តិចប៉ុណ្ណោះ	ទៅដល់មនុស្ស
		ទុកជាមកុដរាជ្យ	។
៧	ព្រះអម្ចាស់ទ្រង់	ឱ្យគេគ្រប់គ្រង	រាល់ថ្ងៃព្រឹកល្ងាច
	លើអ្វីទាំងអស់	ពេញដោយអំណាច	ព្រមទាំងបង្ក្រាប
		នៅក្រោមជើងគេ	។
៨	ដោយសារអំណាច	អ្វីៗមិនអាច	ផ្លាស់ប្តូប្រួលប្រែ
	ទាំងចៀមទាំងគោ	សត្វព្រៃផងដែរ	ឱ្យមនុស្សមើលថែ
		ប្រើប្រាស់គ្រប់គ្រង	។
៩	ព្រមទាំងបក្សី	នៅលើផែនដី	នៅលើមេឃផង
	ត្រីក្នុងសមុទ្រ	សព្វសត្វតែម្តង	សត្វលូនវារផង
		មកនៅជួបជុំ	។
១០	បពិត្រព្រះម្ចាស់	ព្រះអង្គជាព្រះ	របស់យើងខ្ញុំ
	ព្រះនាមព្រះអង្គ	រុងរឿងឧត្តម	ពាសពេញជិតជុំ
		ផ្ទៃមេឃផែនដី	។

ទំនុកតម្កើងលេខ ៩ បទពាក្យ៧

២	បពិត្រព្រះម្ចាស់ជាទីពឹង	ទូលបង្គំនឹងលើកតម្កើង
	និទានពីការអស្ចារ្យឡើង	មានទាំងប៉ុន្មានឱ្យគេស្តាប់	។
៣	ព្រោះតែព្រះអង្គខ្ញុំត្រេកអរ	រីករាយសាទរជាដរាប
	បពិត្រព្រះអង្គខ្ពស់ឥតប្រៀប	សូមទ្រង់សណ្តាប់ចម្រៀងខ្ញុំ	។
៤	ពួកខ្មាំងសត្រូវដកខ្លួនថយ	សូមព្រះអង្គជួយទូលបង្គំ
	ឱ្យវាជំពប់ជើងដួលគ្រាំ	វិនាសនៅចំពោះព្រះភក្ត្រ	។
៥	ទ្រង់រកយុត្តិធម៌ល្អថ្លៃថ្លា	ឱ្យគេឃើញថារូបខ្ញុំជាក់
	គ្មានទោសពៃរ៍អ្វីគួរចាប់ថ្នាក់	ក្នុងព្រះឋានៈជាចៅក្រម	។
៦	ព្រះអង្គគំរាមសាសន៍នានា	ពួកមនុស្សពាលាវិនាសព្រម
	កេរ្តិ៍ឈ្មោះពួកគេត្រូវរលំ	ខ្ចាត់ខ្ចាយទ្រុឌទ្រោមឥតមានសល់	។
៧	ពួកខ្មាំងសត្រូវនឹងខ្ចាត់ខ្ចាយ	វិនាសអន្តរាយច្រើនកប្បកល្ប
	ទីក្រុងនានារលាយខ្សុល	គ្មានគេនឹកដល់ឃើញទៀតឡើយ	។
៨	ព្រះជាអម្ចាស់ឡើងគ្រងរាជ្យ	ពេញដោយអំណាចសុខឥតស្បើយ
	ឡើងគ្រងនៅលើបល្ល័ង្កហើយ	ដើម្បីវិនិច្ឆ័យគ្រប់កិច្ចការ	។
៩	ព្រះអង្គគ្រប់គ្រងលើផែនដី	ប្រកបដោយក្តីសុចរិតថ្លា
	ទ្រង់វិនិច្ឆ័យទោសប្រជា	យុត្តិធម៌ឥតរាមិនអាស្រូវ	។
១០	សូមព្រះអម្ចាស់ជាបន្ទាយ	ការពាររាងកាយអ្នកដែលត្រូវ
	គេជិះគេជាន់កប់សែនជ្រៅ	សូមការពារនៅពេលអាសន្ន	។
១១	សូមឱ្យអស់អ្នកដែលស្គាល់ព្រះ	នាមព្រះអម្ចាស់ឆាប់រួសរាន់
	ទុកចិត្តព្រះអង្គជាបន្ទាន់	ទ្រង់មិនធុញទ្រាន់ចោលអ្នកឡើយ	។
១២	ចូរនាំគ្នាច្រៀងលើកតម្កើង	ព្រះអម្ចាស់យើងដែលគង់កើយ
	នៅក្រុងស៊ីយ៉ូនណាអ្នកអើយ	ប្រកាសប្រាប់ហើយជនទាំងឡាយ	។
១៣	ដ្បិតព្រះអង្គដាក់ទោសអ្នកដែល	សម្លាប់គេក្រែលឥតសោកស្តាយ
	ព្រះអង្គមិនភ្លេចក្តីអន្តរាយ	សម្រែកជិតឆ្ងាយជនរងគ្រោះ	។
១៤	សូមព្រះមេត្តាទូលបង្គំ	ទតមករូបខ្ញុំដែលជាមនុស្ស
	រងទុក្ខលំបាកស្ទើរមិនរស់	ព្រោះខ្មាំងទុយ៌សមកពាធា	។
១៥	ទូលបង្គំសរសើរលើកតម្កើង	ព្រះអង្គគ្រប់យ៉ាងនៅមាត់ទ្វារ
	ទីក្រុងស៊ីយ៉ូនរាល់ទិវា	សប្បាយគ្រប់គ្នាអរពេកពន់	។
១៦	ប្រជាជាតិនានាធ្លាក់ទៅ	ក្នុងរណ្តៅជ្រៅដ៏សែនធ្ងន់
	ជើងជាប់អន្ទាក់យ៉ាងទារុណ	ដែលពួកគេបានដាក់បង្កប់	។
១៧	ព្រះជាអម្ចាស់បានសម្តែង	ឱ្យដល់គេឯងបានស្គាល់សព្វ
	ព្រះអង្គកាត់ទោសមិនឈរឈប់	ឱ្យពួកគេជាប់អន្ទាក់ខ្លួន	។
១៨	សូមឱ្យពពួកជនអាក្រក់	ជនជាតិកខ្វក់ទាំងប៉ុន្មាន
	ដែលគេបំភ្លេចម្ចាស់ថ្កើងថ្កាន	វិលរកទីស្ថានមនុស្សស្លាប់ចុះ	។
១៩	ព្រះអង្គមិនភ្លេចជនក្រក្រី	នៅលើផែនដីនេះទាំងអស់
	ឯក្តីសង្ឃឹមដ៏ស្ម័គ្រស្មោះ	អ្នកវេទនានោះមិនសូន្យឡើយ	។
២០	សូមកុំឱ្យមនុស្សលោកមានជ័យ	សូមវិនិច្ឆ័យកុំកន្តើយ
	ដាក់ទោសប្រជាជាតិនោះហើយ	នៅជិតបង្កើយព្រះភក្ត្រទ្រង់	។
២១	សូមព្រះអម្ចាស់ធ្វើឱ្យគេ	តក់ស្លុតឥតរេខ្វះទីពឹង
	ឱ្យជាតិទាំងឡាយបានយល់ដឹង	ថារូបគេហ្នឹងមនុស្សធម្មតា	។

ទំនុកតម្កើងលេខ ១០ (៩ ត) បទព្រហ្មគីតិ

១	ឱ! ព្រះជាម្ចាស់អើយ	ហេតុអ្វីឡើយក៏ព្រះអង្គ
	ចាកឆ្ងាយយាងទៅគង់	សម្ងំឈឹងដូច្នេះណា?	។
២	មនុស្សពាលតាមធ្វើបាប	អ្នកទន់ទាបរងសោកា
	គេប្រើល្បិចឫស្យា	ឱ្យអ្នកជាជាប់អន្ទាក់	។
៣	មនុស្សពាលតែងតែអួត	កុហកភូតភរលួចលាក់
	ពេលបានជោគជ័យជាក់	គេចំអកដាក់ព្រះអង្គ	។
៤	ពួកគេវាយឫកខ្ពស់	ពោលទ្រគោះដោយមិនចង់
	រវល់នឹងព្រះអង្គ	គិតលះបង់ព្រះអម្ចាស់	។
៥	អ្វីៗដែលគេធ្វើ	តែងប្រសើរចម្រើនណាស់
	មិនដែលគិតថាព្រះ	វិនិច្ឆ័យច្បាស់ទោសនោះឡើយ	។
៦	គេតែងនឹកគិតថា	«អញនេះណាមាំមួនហើយ
	មិនរង្គើសោះឡើយ	ទុក្ខទាំងឡាយមិនហ៊ានបៀត»	។
៧	មាត់គាត់ជេរផ្តាសា	មិនបានការពាក្យចោលម្សៀត
	បង្កាច់កុហកទៀត	ស្តែងមារយាទមិនគួររាប់	។
៨	គេតែងពួនស្ទាក់ចាំ	នៅក្បែរភូមិត្រៀមសន្ធាប់
	គេចាំឃ្លាំមើលជាប់	រួចសម្លាប់ជនត្រង់ស្លូត	។
៩	គេពួនដូចសត្វសិង្ហ	សំងំឈឹងតាមគម្ពោត
	ស្នាក់ចាប់ជនទុរគត	ទាក់ទាញព័ទ្ធចូលអន្ទាក់	។
១០	គេក្រាបពួននៅដី	ហើយឃ្មាតខ្មីទាញទម្លាក់
	ស្ទុះចាប់មិនសល់ម្នាក់	សាហាវជាក់គ្មានបន្លំ	។
១១	ជនពាលគិតថា៖«ព្រះ	ជាអម្ចាស់មិនបារម្ភ
	ព្រះនេត្របិទសំងំ	មិនទតចំទាល់តែសោះ»	។
១២	ឱ! ព្រះអម្ចាស់អើយ	ពេលនេះហើយកុំបង់បោះ
	តើនឡើងបង្ហាញអស់	ឫទ្ធិតេជះនៃព្រះអង្គ	។
១៣	ហេតុអ្វីមនុស្សអាក្រក់	ពោលចំអកព្រះយ៉ាងហ្នឹង!
	ចិត្តគេតែងរំពឹង	ថា «ព្រះអង្គមិនរករឿង»	។
១៤	ព្រះអង្គទតឃើញទុក្ខ	លំបាកសុខនៃមនុស្សយើង
	កម្សត់អត់ទីពឹង	ព្រះអង្គនឹងជួយជានិច្ច	។
	មនុស្សដែលទន់ទាប	ជាដរាបផ្ញើជីវិត
	លើព្រះម្ចាស់ជានិច្ច	ទ្រង់មិនភ្លេចជនទុរគត	។
១៥	សូមទ្រង់កាច់បំបាក់	ដៃអស់អ្នកពាលឧក្រិដ្ឋ
	ដាក់ទោសពួកទុច្ចរិត	ឱ្យគេឈប់ប្រព្រឹត្តពាល	។
១៦	ព្រះអម្ចាស់ជាព្រះ	ខ្ពង់ខ្ពស់ណាស់ជាក្សត្រដែល
	គ្រងរាជ្យអស់កល្បក្រែល	បំបាត់ចោលសាសន៍ដទៃ	។
១៧	បពិត្រព្រះអម្ចាស់	ឈ្វេងយល់ច្បាស់បំណងថ្មី
	នៃមនុស្សទន់ទាបក្តី	អង្គក្សត្រថ្លៃលើកទឹកចិត្ត	។
១៨	ព្រះអង្គរកយុត្តិធម៌	ឱ្យអ្នកក្រមនុស្សសុចរិត
	ត្រូវគេជាន់សង្កត់	ពួកទុច្ចរិតមិនឱ្យមាន	។
	មនុស្សនៅលើផែនដី	ជនប្រុសស្រីទាំងប៉ុន្មាន
	មិនអាចនឹងជិះជាន់	អ្នកខ្សោយអន់ទៀតបានទេ	។

ទំនុកតម្កើងលេខ ១១ (១០) បទកាកគតិ

១	ខ្ញុំបានជ្រកកោន	មិនដែលស្រពោន	ក្រោមម្លប់បារមី
	នៃព្រះអម្ចាស់	ចុះរឿងហេតុអ្វី	អ្នករាល់គ្នាស្តី
		ឱ្យជ្រកតាមភ្នំ ?	។
២	ជនពាលយិតធ្នូ	ព្រួញខ្សែទាំងគូ	បម្រុងបាញ់ផ្គុំ
	ពីទីងងឹត	ដែលគេសំងំ	ត្រៀមបាញ់ឱ្យចំ
		ពួកអ្នកត្រង់ស្មោះ	។
៣	ប្រសិនបើច្បាប់	ជាគ្រឹះមាំជាប់	ត្រូវរលំអស់
	តើមនុស្សសុចរិត	ទាំងស្រីទាំងប្រុស	ធ្វើអ្វីកើតនោះ
		សូមជួយរិះគិត	។
៤	ព្រះម្ចាស់គង់ក្នុង	វិហារព្រះអង្គ	ដ៏វិសុទ្ធពិត
	បល្ល័ង្ករបស់	ព្រះអង្គស្ថេរស្ថិត	ឈ្វេងយល់គំនិត
		របស់មនុស្សលោក	។
៥	ព្រះអង្គពេញចិត្ត	នឹងមនុស្សសុចរិត	តែមិនព្រមយក
	មនុស្សកាចពាលា	ចូលចិត្តឆរបោក	តែងតែរិះរក
		ប្រព្រឹត្តឃោរឃៅ	។
៦	សូមទ្រង់ដាក់ទោស	មនុស្សពាលទាំងនោះ	ដោយភ្លើងសន្ធៅ
	មានទាំងស្ពាន់ធម៌	បង្អុរចុះទៅ	មានទាំងខ្យល់ក្តៅ
		បក់បោកមកដែរ	។
៧	ដ្បិតព្រះអម្ចាស់	មានហឫទ័យស្មោះ	ឥតមានបែកបែរ
	មនុស្សទៀងត្រង់	គ្មានចិត្តរៀចវេរ	នឹងបាននៅក្បែរ
		ឃើញភក្ត្រព្រះអង្គ	។

ទំនុកតម្កើងលេខ ១២ (១១) បទកាកគតិ

២	ឱ! ព្រះអម្ចាស់សូមជួយផង	មនុស្សច្រើនកន្លងសឹងលែងមាន
	ក្នុងចំណោមមនុស្សរាប់សែនលាន	បាត់បង់អស់គ្មានអ្នកត្រង់ស្មោះ	។
៣	ម្នាក់ៗគិតតែមួលបង្កាច់	ដាក់គ្នាមិនដាច់ឥតឈប់សោះ
	ពាក្យគេនិយាយស្ទើរទាំងអស់	សុទ្ធតែបញ្ជោះបញ្ចើចគ្នា	។
៤	សូមព្រះអម្ចាស់បំបិទមាត់	ដែលពោលបញ្ចើចកុំរួញរា
	និងកាត់អណ្តាតដែលមុសា	និយាយឫស្យាយ៉ាងព្រហើន	។
៥	ពួកគេពោលថា«ដោយសារមាត់	របស់យើងពិតអ្វីក៏បាន
	ជោគជ័យដរាបឥតស្រាកស្រាន្ត	គ្មាននរណាហ៊ានត្រួតលើយើង»	។
៦	ពេលព្រះអង្គឃើញគេជាន់ជិះ	ជនទុរគតនេះនៅនឹងជើង
	និងឮសម្រែកអ្នកក្រផង	ដែលទទួលរងទុក្ខលំបាក	។
	ព្រះអម្ចាស់មានបន្ទូលថា	«ឥឡូវនេះណាកុំកំសាក
	យើងក្រោកឡើងមកជួយអស់អ្នក	ដែលមនុស្សគម្រក់គេមើលងាយ »	។
៧	បន្ទូលរបស់ព្រះអម្ចាស់	គួរទុកចិត្តណាស់ពេញអង្គកាយ
	បរិសុទ្ធជាងប្រាក់ភ្លឺពណ្ណរាយ	ដែលដុតរំលាយប្រាំពីរដង	។
៨	ព្រះអម្ចាស់ដែលគ្រប់គ្រងថែ	ព្រះអង្គតែងតែធ្វើឥតឆ្គង
	តាមព្រះបន្ទូលគ្មានសៅហ្មង	ជានិច្ចសព្វដងប្រពៃពិត	។
៩	ទោះបីជនពាលដើរក្រឡឹង	ទោះបីមនុស្សប្រឹងតែប្រព្រឹត្ត
	អំពើទុយ៌សច្រើនឥតគិត	ព្រះអង្គនៅជិតការពារខ្ញុំ	។

ទំនុកតម្កើងលេខ ១៣ (១២) បទពំនោល

២	បពិត្រព្រះអម្ចាស់អើយ	តើនៅកន្តើយ	ព្រងើយនឹងខ្ញុំដល់ណា?	។
	ម្តេចនៅតែងាកភក្ត្រា	ចេញពីកាយា	ទូលបង្គំដល់ណាទៀត?	។
៣	តើទ្រូងខ្ញុំត្រូវចង្អៀត	កង្វល់ឥតឃ្លាត	ក្នុងចិត្តរហូតដល់ណា?	។
	តើចិត្តខ្ញុំត្រូវខ្លោចផ្សា	កើតក្តីទុក្ខា	អាត្មាព្រួយដល់អង្កាល់?	។
	តើខ្មាំងមានប្រៀបផ្ចាញ់ផ្ចាល	លើខ្ញុំអង្កាល់	ទើបស្រាលនឹងបានល្ហែល្ហើយ?	។
៤	ឱ! ព្រះជាអម្ចាស់អើយ	សូមទតហើយឆ្លើយ	ចម្លើយមកទូលបង្គំ	។
	សូមមេត្តាប្រោសឱ្យខ្ញុំ	ឃើញពន្លឺចំ	សូមកុំទុកខ្ញុំឱ្យស្លាប់	។
៥	ក្រែងខ្មាំងសត្រូវបង្អាប់	ថា៖«អញសម្លាប់	អញចាប់បានឈ្នះវាហើយ»	។
	ពួកសត្រូវឥតកន្តើយ	ត្រេកអរសប្បាយ	ព្រោះតែខ្ញុំបរាជ័យ	។
៦	ចំពោះរូបខ្ញុំឃ្មៀតខ្មី	ទុកចិត្តហឫទ័យ	ប្រណីរបស់ព្រះអង្គ	។
	សូមឱ្យខ្ញុំត្រេកអរផង	ពីព្រោះព្រះអង្គ	បានសង្គ្រោះទូលបង្គំ	។
	សូមឱ្យខ្ញុំច្រៀងរងំ	សរសើរឧត្តម	ដល់ខ្ញុំព្រះអង្គប្រណី	។

ទំនុកតម្កើងលេខ ១៤ (១៣) បទកាកគតិ

១	ពួកមនុស្សលេលា	គេតែងនាំគ្នា	គិតថាគ្មានព្រះ
	ចូលចិត្តប្រព្រឹត្ត	ថោកទាបផ្តេសផ្តាស	គួរស្អប់ខ្ពើមណាស់
		គ្មានអ្នកល្អសោះ	។
២	ព្រះម្ចាស់ទតមក	មើលមនុស្សលោក	ឥតមានចន្លោះ
	ក្រែងមានអ្នកណា	មានប្រាជ្ញាខ្ពស់	ហើយមានចិត្តស្មោះ
		ស្វែងរកព្រះអង្គ	។
៣	ពួកគេសុទ្ធតែ	វង្វេងបែកបែរ	ឥតមានស្មោះត្រង់
	រួមគ្នាប្រព្រឹត្ត	ទុច្ចរិតយង់ឃ្នង	សូម្បីម្នាក់ផង
		ក៏គ្មានល្អដែរ	។
៤	មនុស្សដែលប្រព្រឹត្ត	អំពើទុច្ចរិត	ឥតមានទំនេរ
	តើពួកទាំងនោះ	ឆោតល្ងង់ឬទេ	រកស៊ីព្រោះតែ
		កឹបគៃប្រជា	។
៥	ពួកគេភ័យញ័រ	ព្រោះព្រះបវរ	គាំទ្រមនុស្សម្នា
	ជាអ្នកសុចរិត	ស្មោះត្រង់ល្អជា	ព្រះម្ចាស់ធានា
		មិនឱ្យភ័យស្លុត	។
៦	អ្នករាល់គ្នាឱ្យ	អ្នកក្រទន់ខ្សោយ	និងជនទុរគត
	បាត់ក្តីសង្ឃឹម	ភិតភ័យរន្ធត់	តែព្រះមានឫទ្ធិ
		ជាជម្រកគេ	។
៧	សូមព្រះអង្គដែល	គង់នៅជាខែល	សង្គ្រោះកុំរេ
	ជួយអ៊ីស្រាអែល	កុំនៅទំនេរ	រំដោះពួកគេ
		ត្រឡប់ទៅស្រុក	។
	ពូជលោកយ៉ាកុប	ត្រេកអរឥតឈប់	រួចពីទោសទុក្ខ
	ពូជអ៊ីស្រាអែល	ជួបតែក្តីសុខ	ពីនេះទៅមុខ
		សប្បាយពេកហោង	។

ទំនុកតម្កើងលេខ ១៥ (១៤) បទព្រហ្មគីតិ

១	បពិតព្រះអម្ចាស់	នរណាខ្លះអាចរស់ក្នុង
	ព្រះពន្លាព្រះអង្គ	ស្ថិតនៅលើភ្នំវិសុទ្ធ	។
២	គឺមានតែមនុស្ស	ដែលគ្មានទោសនិងប្រព្រឹត្ត
	អំពើសុចរិត	និយាយពិតជាដរាប	។
៣	គេមិននិយាយមួល	បង្កាច់ផ្តួលមិនធ្វើបាប
	បងប្អូនដែលទន់ទាប	មិនបង្អាប់កិត្តិយស	។
៤	គេមិនរាប់រកអ្នក	ដែលព្រះម្ចាស់មិនស្ម័គ្រស្មោះ
	តែគេលើកកិត្តិយស	អ្នកគោរពកោតព្រះអង្គ	។
	បើគេសន្យាអ្វី	ឬទោះបីខូចខាតបង់
	ក៏គេមិនបង្អង់	គេគោរពពាក្យសម្តី	។
៥	បើមាននរណាម្នាក់	មករកប្រាក់គេឱ្យខ្ចី
	មិនចង់បានកំរៃ	ច្រើនតិចក្តីគេមិនយក	។
	អ្នកប្រព្រឹត្តដូច្នេះ	ជាមនុស្សចេះអាចចូលជ្រក
	ក្រោមបារមីរៀងមក	នឹងបានសុខជានិរន្តរ	។

ទំនុកតម្កើងលេខ ១៦ (១៥) បទពាក្យ៧

១	ឱ! ព្រះជាម្ចាស់ដ៏ឧត្តម	សូមការពារខ្ញុំឱ្យសុខសាន្ត
	ដ្បិតទូលបង្គំសុំផ្ញើប្រាណ	ជ្រកក្រោមទីស្ថានម្លប់បារមី	។
២	ខ្ញុំសូមទូលថ្វាយព្រះម្ចាស់ថា	ព្រះអង្គពិតជាអម្ចាស់ថ្លៃ
	ក្រៅពីព្រះអង្គឥតមានអ្វី	ផ្តល់មង្គលជ័យគ្រាអាសន្ន	។
៣	អារុក្ខអារក្សអ្នកតាព្រៃ	ម្ចាស់ទឹកម្ចាស់ដីកាលពីមុន
	ដែលខ្ញុំពេញចិត្តខ្លាំងពេកពន់	ផ្តល់តែទារុណរាល់វេលា	។
៤	ទូលបង្គំនឹងមិនចូលរួម	មិនទទួលព្រមរួមជាគ្នា
	គោរពនិងថ្វាយយញ្ញបូជា	មិនពោលនាមាព្រះក្លែងក្លាយ	។
៥	បពិត្រព្រះអ​​​​​​ម្ចាស់ឧត្តម	ព្រះអង្គជាចំណែកស្រស់ស្រាយ
	មរតកនៃខ្ញុំឥតក្លែងក្លាយ	ផ្តល់អ្វីទាំងឡាយតាមប្រាថ្នា	។
៦	ព្រះអង្គប្រទានកេរមតក	វិសេសឥតអាក់ដ៏ថ្លៃថ្លា
	មកទូលបង្គំខ្ញុំនេះណា	ជាកេរអស្ចារ្យប្រសើរផុត	។
៧	ខ្ញុំសូមតម្កើងព្រះអម្ចាស់	ព្រោះព្រះអង្គនេះសែនមោះមុត
	ទ្រង់ផ្តល់យោបល់ខ្ញុំម្នាក់គត់	ទោះយប់ងងឹតក៏តឿនដែរ	។
៨	ខ្ញុំនឹកដល់ព្រះអម្ចាស់ជាប់	ដែលជាទម្លាប់ទ្រង់គង់ក្បែរ
	ខាងស្តាំរូបខ្ញុំឥតប្រួលប្រែ	ខ្ញុំមិនបែកបែរញាប់ញ័រឡើយ	។
៩	ហេតុនេះបានជាខ្ញុំរីករាយ	ត្រេកអរសប្បាយបានល្ហែល្ហើយ
	ខ្ញុំបានសម្រាកកាយធូរស្បើយ	ដោយសុខសាន្តហើយផុតកង្វល់	។
១០	ដ្បិតព្រះអង្គមិនបោះបង់ខ្ញុំ​​	ឱ្យរងទុក្ខធំស្លាប់សោតសល់
	ព្រះអង្គក៏មិនបណ្តោយដល់	សពបម្រើផ្ទាល់ស្អុយរលួយ	។
១១	ព្រះអង្គបង្ហាញផ្លូវជីវិត	ឱ្យខ្ញុំឃើញពិតគ្មានភ័យព្រួយ
	ដោយព្រះអង្គគង់នៅជាមួយ	ទូលបង្គំគ្មានព្រួយអរសប្បាយ	។
	ដោយព្រះអង្គគង់នៅខាងស្តាំ	ជាប់ជាប្រចាំមិនជិនណាយ
	ទូលបង្គំសែនរីករាយសប្បាយ	អស់កល្បវែងឆ្ងាយតរៀងទៅ	។

ទំនុកតម្កើងលេខ ១៧ (១៦) បទពាក្យ៧

១	ឱ!ព្រះអម្ចាស់សូមសណ្តាប់	ទូលបង្គំប្រាប់សំណូមពរ
	ដ៏ល្អត្រឹមត្រូវស្រស់បវរ	សូមរកយុត្តិធម៌ឱ្យរូបខ្ញុំ	។
	សូមយកព្រះហឫទ័យវែកញែក	និងសូរសម្រែកទូលបង្គំ
	សូមផ្ទៀងព្រះកាណ៌ស្តាប់ពាក្យខ្ញុំ​	ដែលអង្វរសុំដោយត្រង់ស្មោះ	។
២	សូមរកយុត្តិធម៌ឱ្យខ្ញុំផង	កុំបីសៅហ្មងឬបង់បោះ
	សូមព្រះអង្គទតឱ្យច្បាស់ចុះ	អ្វីទៅដែលខុសអ្វីត្រឹមត្រូវ	។
៣	ព្រះអង្គឈ្វេងយល់ចិត្តខ្ញុំច្បាស់	ហើយព្រះអង្គត្រាស់ពិនិត្យនូវ
	ល្បងលចិត្តខ្ញុំទាំងយប់ជ្រៅ	មិនឃើញអាស្រូវឬឆ្គាំឆ្គង	។
៤	ទូលបង្គំខំយកចិត្តទុកដាក់	តាមបន្ទូលជាក់ព្រះអង្គផង
	ហើយប្រព្រឹត្តខ្លួនមិនឱ្យហ្មង	ដូចមនុស្សយង់ឃ្នងឯទៀតឡើយ	។
៥	ទូលបង្គំខំដើរតាមមាគ៌ា	នៃអង្គក្សត្រាខ្ជាប់ខ្ជួនហើយ
	ក៏បោះជំហានដើរតាមក្រោយ	មិនឱ្យថ្លោះធ្លោយលំអៀងបែរ	។
៦	ឱព្រះអម្ចាស់នៃខ្ញុំអើយ	ខ្ញុំស្រែកដង្ហោយមិនប្រួលប្រែ
	ហៅរកព្រះម្ចាស់មិនបែកបែរ	សូមកុំងាករេផ្ទៀងព្រះកាណ៌	។
៧	ព្រះអង្គតែងតែសង្គ្រោះអ្នក	ដែលមកជ្រកស្នាក់ដោយមេត្តា
	ក្រោមម្លប់បារមីដ៏អស្ចារ្យ	ឱ្យរួចពីការគាបសង្កត់	។
៨	សូមថែរក្សាទូលបង្គំ	ដូចកែវភ្នែកកុំឱ្យបង់បាត់
	ការពារខ្ញុំដូចបក្សីសត្វ	ក្រុងកូនកម្សត់របស់វា	។
៩	សូមកុំឱ្យពួកមនុស្សពាល	ចាក់រុកឆ្កិះឆ្កៀលខ្ញុំវេទនា
	កុំឱ្យពួកខ្មាំងមកទាមទារ	ក្រសោបប្រហាររូបខ្ញុំឡើយ	។
១០	ពួកគេគ្មានចិត្តត្រាប្រណី	មាត់គេចេញស្តីពាក្យជម្លើយ
	អួតបំប៉ោងខ្លួនគ្មានកោះត្រើយ	ព្រះអង្គម្ចាស់អើយមិនអៀនខ្មាស	។
១១	ពេលដែលពួកគេដេញតាមទាន់	គេនឹងដើរជាន់ខ្ញុំអាម៉ាស់
	សំឡក់សម្លឹងខ្ញុំខ្លាំងណាស់	បម្រុងព្រលះជីវិតបង់	។
១២	ចិត្តរបស់គេសែនឃោរឃៅ	កំណាចអាស្រូវដូចសត្វសិង្ហ
	ដែលតែងតែពួនចាំរំពឹង	សំងំសម្លឹងចាប់រំពា	។
១៣	ឱព្រះម្ចាស់អើយសូមតើនឡើង	ឱ្យសត្រូវប៉ើងកុំរួញរា
	សូមយកព្រះខ័នមកការពារ	រំដោះខ្ញុំពីជនទុរយស	។
១៤	សូមប្រើអំណាចឫទ្ធិចេស្តា	ដេញតាមប្រហារដោយតេជៈ
	ដាក់ទោសពួកគេកុំស្រណោះ	ឱ្យអន្តរាយអស់ដល់កូនចៅ	។
១៥	ចំពោះខ្ញុំវិញគឺប្រព្រឹត្ត	តាមក្តីសុចរិតមិនអាស្រូវ
	ខ្ញុំឃើញព្រះភក្ត្រទ្រង់គង់នៅ	ទើបផុតហ្មងសៅពេលភ្ញាក់ឡើង	។

ទំនុកតម្កើងលេខ ១៨ (១៧) បទពាក្យ៧

២	ឱ! ព្រះអម្ចាស់អើយ	ខ្ញុំកោតហើយលើកព្រះអង្គ
	ព្រោះទ្រង់ជាកម្លាំង	របស់ខ្ញុំធំមាំមួន	។
៣	ព្រះម្ចាស់ជាថ្មដា	រឹងអស្ចារ្យខ្ញុំលាក់ខ្លួន
	ជាខែលមាំហំហួន	ខ្ញុំរួចខ្លួនមានជោគជ័យ	។
៤	ពេលខ្ញុំស្រែកដង្ហោយ	ព្រះម្ចាស់ជួយឱ្យផុតភ័យ
	ផុតពីខ្មាំងចង្រៃ	សូមលើកដៃថ្កើងព្រះអង្គ	។
៥	ក្តីស្លាប់រួបរឹតខ្ញុំ	ដូចទឹកធំហូរតម្រង់
	កួចឆក់មិនបង្អង់	អន្តរាយបង់សូន្យឥតអាក់	។
៦	ក្តីស្លាប់បានរួមរិត	ខ្ញុំសែនភិតភ័យញ័រញាក់
	ដូចចូលក្នុងអន្ទាក់	ដែលគេដាក់ចង់ប្រល័យ	។
៧	នៅពេលខ្ញុំកើតទុក្ខ	ខ្ញុំស្រែករកព្រះម្ចាស់ថ្លៃ
	ទ្រង់សណ្តាប់សម្តី	ដោយមេត្រីវិហារ	។
	សំឡេងរបស់ខ្ញុំ	លាន់រងំឮខ្ទ័រខ្ទារ
	ទៅប៉ះដល់ព្រះកាណ៌	ក្នុងសោតាព្រះម្ចាស់ខ្ញុំ	។
៨	ផែនដីកក្រើកញ័រ	លាន់ខ្ទារខ្ទ័រគ្រប់ជ្រោយជ្រុង
	ភ្នំក៏មិនគង់វង្ស	ព្រោះព្រះអង្គខ្ញាល់ពេកក្រៃ	។
៩	ផ្សែងចេញពីនាសា	អង្គក្សត្រាព្រះម្ចាស់ថ្លៃ
	ភ្លើងឆេះច្រើនឥតបី	ច្រើនពេកក្រៃពីព្រះឱស្ឋ	។
១០	ព្រះអង្គផ្អៀងមេឃា	រួចម្នីម្នាទ្រង់យាងចុះ
	មានទាំងពពកក្រាស់	ពណ៌សក្បុសទ្រាប់បាទា	។
១១	គង់លើខេរ៉ូប៊ីន	ដែលជាយានហោះម្នីម្នា
	ទ្រង់យកវាយោជា	យានបក្សានៃក្សត្រថ្លៃ	។
១២	ហើយយកភាពងងឹត	មកបាំងបិទស្នាក់អាស្រ័យ
	ពពកខ្មៅក្រាស់ក្រៃ	ទ្រង់លកលៃជាពន្លា	។
១៣	ផ្លេកបន្ទោរចែងចាំង	ពីមុខទ្រង់ភ្លឺមហិមា
	ធ្លាក់ព្រឹលសែនរងារ	លើពសុធាមានភ្លើងធ្លាក់	។
១៤	ព្រះអម្ចាស់ធ្វើឱ្យ	មេឃរញ្ជួយផ្គរឥតអាក់
	ព្រះដ៏ខ្ពស់ផុតថ្នាក់	សូរសៀងធ្លាក់ពីលើមក	។
១៥	ទ្រង់បាញ់ព្រួញតម្រង់	ទៅលើខ្មាំងច្រើនគរគោក
	បាញ់ផ្លេកបន្ទោរមក	ខ្ទេចជម្រកបាក់ទ័ពអស់	។
១៦	បពិត្រព្រះអម្ចាស់	បន្ទូលច្បាស់ដូចខ្យល់ព្យុះ
	ឱ្យបាតសមុទ្រផុស	ហើយលេចគ្រឹះផែនដីមក	។
១៧	ព្រះអង្គលាតព្រះហស្ត	ពីស្ថានខ្ពស់បីទ្រយក
	ស្រង់ខ្ញុំឱ្យរួចមក	ពីរលកសមុទ្រជ្រៅ	។
១៨	ព្រះអង្គបានរំដោះ	ឱ្យផុតគ្រោះផុតសត្រូវ
	ផុតពីមនុស្សឃោរឃៅ	មនុស្សកម្លៅខ្លាំងជាងខ្ញុំ	។
១៩	ពេលមានទុក្ខវេទនា	គេនាំគ្នាចងគំនុំ
	គេវាយប្រហារខ្ញុំ	ព្រះឧត្តមជួយការពារ	។
២០	ព្រះអង្គនាំខ្ញុំផុត	ក្តីតក់ស្លុតទុក្ខគ្រាំគ្រា
	រំដោះផុតវេទនា	ទ្រង់គាំពារទូលបង្គំ	។
២១	ព្រះអម្ចាស់ប្រព្រឹត្ត	តាមសុចរិតរបស់ខ្ញុំ
	តបមកទូលបង្គំ	ស្របតាមខ្ញុំដែលបរិសុទ្ធ	។
២២	ដ្បិតខ្ញុំបានប្រណិប័តន៍	យ៉ាងទៀងទាត់ល្អបំផុត
	តាមមាគ៌ាមោះមុត	តែមួយគត់នៃព្រះអង្គ	។
២៣	ខ្ញុំប្រព្រឹត្តវិន័យ	ល្អឥតបីហើយស្មោះត្រង់
	តាមមាគ៌ាព្រះអង្គ	មិនបោះបង់បទបញ្ជា	។
២៤	ខ្ញុំគ្មានក្តីសៅហ្មង	ឥតមានឆ្គងឥតរេរា
	ប្រយ័ត្នខ្លួនការពារ	ឱ្យល្អជាគ្មានកំហុស	។
២៥	ព្រះអម្ចាស់ប្រណី	តាមសេចក្តីសុចរិតស្មោះ
	អំពើខ្ញុំទាំងអស់	បែបជាមនុស្សបរិសុទ្ធ	។
២៦	បពិត្រព្រះអម្ចាស់	ហឫទ័យស្មោះត្រង់បំផុត
	អ្នកដែលគ្មានពុតត្បុត	ចិត្តបរិសុទ្ធស្មោះសរក្រៃ	។
២៧	ចំពោះអ្នកមានចិត្ត	បរិសុទ្ធតាមព្រះទ័យ
	ចំពោះមនុស្សអប្រីយ៍	ព្រះអង្គលៃប្រើកល្បិច	។
២៨	ព្រះអង្គជួយសង្គ្រោះ	មនុស្សទាំងអស់គ្មានកលកិច្ច
	បន្ទាបជាន់ពន្លិច	មនុស្សមានល្បិចចិត្តឆ្មើងឆ្មៃ	។
២៩	បពិត្រព្រះម្ចាស់អើយ	ព្រះអង្គហើយគឺរង្សី
	ពន្លឺភ្លឺពេកក្រៃ	មានសិរីផុតងងឹត	។
៣០	ទ្រង់ប្រទានកម្លាំង	ឱ្យឈ្នះខ្មាំងដែលជុំជិត
	ហើយទូលបង្គំពិត	ជាលោតផុតកំពែងក្រុង	។
៣១	មាគ៌ាព្រះអម្ចាស់	សែនល្អល្អះច្បាស់យល់យង់
	បន្ទូលពិតទាំងស្រុង	ជាខែលរងរាំងការពារ	។
៣២	មានតែព្រះអម្ចាស់	ដែលជាព្រះពិតសត្យា
	គ្មានព្រះផ្សេងឯណា	ជាថ្មដាឱ្យជ្រកសោះ	។
៣៣	ទ្រង់ប្រទានកម្លាំង	ឱ្យខ្ញុំខ្លាំងក្លាមុតមោះ
	មាគ៌ាខ្ញុំទាំងអស់	ឥតមានទាស់សោះឡើយណា	។
៣៤	ព្រះអម្ចាស់ប្រទាន	ឱ្យខ្ញុំមានល្បឿនអស្ចារ្យ
	ដូចក្តាន់ក្នុងព្រឹក្សា	ខ្ញុំយាត្រាឈរទីខ្ពស់	។
៣៥	ព្រះអង្គបានបង្ហាត់	ខ្ញុំឱ្យស្ទាត់ចេះទាំងអស់
	ធ្វើសឹកក៏មិនទាស់	ជំនាញខ្ពស់យឹតធ្នូបាន	។
៣៦	បពិត្រព្រះអម្ចាស់	ប្រពៃណាស់ការពារប្រាណ
	សង្គ្រោះឱ្យថ្កើងថ្កាន	រស់សុខសាន្តដោយបារមី	។
	ព្រះអង្គគាំទ្រខ្ញុំ	ទូលបង្គំដោយប្រពៃ
	លើកឡើងខ្ពង់ខ្ពស់ក្រៃ	ដោយហឫទ័យមានមេត្តា	។
៣៧	ព្រះអង្គប្រោសប្រទាន	ឱ្យខ្ញុំមានល្បឿនអស្ចារ្យ
	មិនឱ្យខ្មាំងឫស្យា	ដេញអាត្មាភ្លាត់ជើងឡើយ	។
៣៨	ខ្ញុំដេញតាមពួកខ្មាំង	ចាប់ឃុំឃាំងមិនកន្តើយ
	កម្ទេចពួកវាហើយ	មិននៅឡើយវិលទីស្ថាន	។
៣៩	ខ្ញុំកម្ទេចពួកវា	ឱ្យវេទនាងើបមិនបាន
	ដេកដួលស្លាប់ទាំងប្រាណ	ដូចតិរច្ឆានក្រោមជើងខ្ញុំ	។
៤០	ព្រះអង្គបានប្រទាន	ឱ្យខ្ញុំមានកម្លាំងមាំ
	តយុទ្ធមិនបាច់ខំ	ជោគជ័យធំឈ្នះសត្រូវ	។
៤១	ទ្រង់ឱ្យគេបាក់ទ័ព	រត់ទៅស្លាប់សែនអាស្រូវ
	អ្នកប្រឆាំងអស់ផ្លូវ	មិនឱ្យនៅវិនាសសូន្យ	។
៤២	គេស្រែករកជំនួយ	គ្មានអ្នកជួយមុខស្រពោន
	ព្រះម្ចាស់ក៏លាក់ខ្លួន	សំងំពួនមិនតបឆ្លើយ	។
៤៣	ទូលបង្គំកម្ទេច	មិនឱ្យគេចផុតរួចឡើយ
	ដូចខ្យល់បក់រួចហើយ	បោសខ្ចាត់ខ្ចាយជ្រាំតាមផ្លូវ	។
៤៤	ព្រះអង្គជួយរំដោះ	ផុតពីគ្រោះកាចអាស្រូវ
	ហើយទ្រង់ត្រួសត្រាយផ្លូវ	តែងតាំងនូវទូលបង្គំ	។
	ធ្វើជាអ្នកដឹកនាំ	ឱ្យរឹងមាំផុតទុក្ខធំ
	ប្រជាមកមូលផ្តុំ	ចុះចូលខ្ញុំជាប្រញាប់	។
៤៥	ជនបរទេសនាំគ្នា	មកម្នីម្នាប្រុងចាំស្តាប់
	តាមពាក្យខ្ញុំបង្គាប់	ដូចកូនត្រាប់តាមមាតា	។
៤៦	បរទេសបាក់ទឹកចិត្ត	សែនភ័យភិតខ្លាចមរណា
	ភ័យញាប់ញ័រកាយា	ចេញអាត្មាពីជំរក	។
៤៧	ជយោ! ព្រះជាម្ចាស់	ព្រះអង្គច្បាស់មានជ័យជោគ
	ជាថ្មដែលយើងជ្រក	យើងរត់រកការសង្គ្រោះ	។
៤៨	ឱ្យរូបទូលបង្គំ	មានជ័យធំដ៏មុតមោះ
	ព្រះអង្គបង្ក្រាបអស់	ជនទាំងនោះឱ្យចូលចុះ	។
៤៩	ទ្រង់ប្រោសទូលបង្គំ	ផុតទុក្ខធំសត្រូវអស់
	ហើយលើកឱ្យបានខ្ពស់	រួចរំដោះផុតបច្ចា	។
៥០	ហេតុនេះទូលបង្គំ	សូមប្រណម្យអង្គក្សត្រា
	កណ្តាលសាសន៍នានា	លើកនាមាព្រះអង្គថ្លៃ	។
៥១	ព្រះអង្គប្រោសឱ្យអ្នក	ដែលទ្រង់ស្ម័គ្រឱ្យមានជ័យ
	ជំនះយ៉ាងប្រពៃ	ដែលល្បាញល្បីដ៏អស្ចារ្យ	។
	ទ្រង់មានហឫទ័យស្មោះ	ស្ម័គ្រចំពោះព្រះគ្រីស្តណា
	ចាក់ប្រេងលើសិរសា	ទាំងវង្សាស្តេចដាវីឌ	។

ទំនុកតម្កើងលេខ ១៩ (១៨) បទកាកគតិ

២	ផ្ទៃមេឃថ្លាថ្លែង	រុងរឿងស្ញប់ស្ញែង	របស់ព្រះម្ចាស់
	អាកាសវេហាស៍	ក៏បានប្រកាស	ពីស្នាព្រះហស្ត
		របស់ព្រះអង្គ	។
៣	ថ្ងៃមួយពោលប្រាប់	ថ្ងៃមួយទៀតស្តាប់	មិននៅរេរង់
	យប់មួយទៀតប្រាប់	យប់ផ្សេងឱ្យដឹង	អំពីដំណឹង
		ល្បីល្បាញអស្ចារ្យ	។
៤	មិនប្រើសម្តី	មិនចារសេចក្តី	ឬប្រើភាសា
	ហើយក៏មិនចេញ	សូរស័ព្ទវាចា	បន្តិចឡើយណា
		ឱ្យគេដឹងឮ	។
៥	ដំណឹងទាំងនោះ	ឮឆ្ងាយសាយសុះ	ពេញពាសរន្ទឺ
	លើភពផែនដី	ទីងងឹតភ្លឺ	លាន់ល្បីរន្ទឺ
		គ្មានសល់ចន្លោះ	។
៦	ព្រះអាទិត្យរះ	ផ្តល់ពន្លឺច្បាស់	ដូចកូនកំលោះ
	ចេញមកក្រាបផ្ទឹម	សែនសង្ហាស្រស់	ដូចវីរបុរស
		ដ៏ខ្លាំងពូកែ	។
៧	ព្រះអាទិត្យក៏	យាត្រាបន្ត	មិននៅអង់អែ
	ពីជើងមេឃម្ខាង	ទៅម្ខាងទៀតដែរ	គ្មានអ្វីបំបែរ
		កម្តៅនោះបាន	។
៨	ព្រះធម្មវិន័យ	ល្អល្អះប្រពៃ	ប្រសើរថ្កើងថ្កាន
	ផ្តល់កម្លាំងចិត្ត	ឥតមានស្រាកស្រាន្ត	អ្នកល្ងង់ប្រែប្រាណ
		ជាមានប្រាជ្ញា	។
៩	បញ្ជារបស់	ព្រះម្ចាស់ទាំងអស់	ត្រឹមត្រូវសត្យា
	ឱ្យចិត្តអំណរ	សប្បាយក្រៃណា	បំភ្លឺចិន្តា
		ថ្លៃថ្លាត្រចង់	។
១០	ការគោរពកោត	ព្រះអម្ចាស់សោត​​	វិសេសយល់យង់
	ស្ថិតស្ថេចិរកាល	តទៅគង់វង្ស	ការវិនិច្ឆ័យទ្រង់
		ក៏ត្រង់ត្រឹមត្រូវ	។
១១	គួរឱ្យប្រាថ្នា	ចង់បានណាស់ណា	ជាងមាសឆ្អិនឆ្អៅ
	ផ្អែមជាងទឹកឃ្មុំ	ខែចែត្រខែក្តៅ	ហូរជោរចេញទៅ
		ចាកពីបង្គង	។
១២	ព្រះធម្មវិន័យ	បំពេញសេចក្តី	ខ្ញុំភ្លឺឥតហ្មង
	ខ្ញុំអ្នកបម្រើ	របស់ព្រះអង្គ	ធ្វើតាមគ្មានឆ្គង
		បានផលប្រណីត	។
១៣	គ្មាននរណាម្នាក់	ឃើញកំហុសជាក់	ដែលខ្លួនប្រព្រឹត្ត
	ដោយអចេតនា	មិនបានរិះគិត	សូមទ្រង់អាណិត
		លើកលែងទោសា	។
១៤	សូមការពារខ្ញុំ	ឱ្យរួចទុក្ខធំ	អំនួតឫស្យា
	សូមកុំឱ្យចិត្ត	អួតអាងអាត្មា	សោយរាជ្យត្រួតត្រា
		លើទូលបង្គំ	។
១៥	ទ្រង់ជាថ្មដា	ជាព្រះរក្សា	ការពាររូបខ្ញុំ
	សូមប្រោសប្រណី	តាមពាក្យទូលសុំ	សេចក្តីនៃខ្ញុំ
		ចំពោះព្រះអង្គ	។

ទំនុកតម្កើងលេខ ២០ (១៩) បទពាក្យ ៧

២	សូមព្រះអម្ចាស់ជួយតបឆ្លើយ	ទៅនឹងចម្លើយព្រះករុណា
	សូមនឹកនាមព្រះយ៉ាកុបណា	ជួយថែរក្សាការពារស្តេច	។
៣	សូមព្រះអង្គជួយព្រះរាជា	ពីព្រះវិហារឱ្យសម្រេច
	គាំទ្រករុណាដែលជាស្តេច	ឱ្យបានសម្រេចពីស៊ីយ៉ូន	។
៤	សូមទ្រង់នឹកឃើញដល់តង្វាយ	ដែលរាជាថ្វាយកុំសោះសូន្យ
	ឱ្យគាប់ហឫទ័យកុំស្រពោន	រាជាបញ្ជូនមកបូជា	។
៥	សូមទ្រង់ប្រទាននូវអ្វីៗ	ដែលមហាក្សត្រថ្លៃប៉ងប្រាថ្នា
	ឱ្យសម្រេចតាមគម្រោងការ	សូមព្រះករុណាបានជោគជ័យ	។
៦	យើងនាំគ្នាសើចហ៊ោរសប្បាយ	សំណើចក្អាកក្អាយគ្មានព្រួយភ័យ
	នាំគ្នាជួយលើកដងទង់ជ័យ	ក្នុងនាមម្ចាស់ថ្លៃព្រះខ្ពង់ខ្ពស់	។
៧	ឥឡូវនេះខ្ញុំបានដឹងច្បាស់	ថាព្រះអម្ចាស់ព្រះសង្គ្រោះ
	ចាក់ប្រេងអភិសេកព្រះគ្រីស្តនោះ	បានថ្កើងថ្កានខ្ពស់ឆ្ពោះបរមសុខ	។
៨	អ្នកខ្លះពឹងផ្អែករទេះច្បាំង	ខ្លះពឹងកម្លាំងសេះនាំមុខ
	រីឯយើងវិញបានក្តីសុខ	ព្រោះតែយើងទុកចិត្តព្រះម្ចាស់	។
៩	ពួកគេបាក់ទ័ពបរាជ័យ	ដេកដួលនៅដីរត់ព្រាត់ប្រាស
	រីឯយើងវិញមាំមួនណាស	ជំហរឈរច្បាស់យ៉ាងរឹងប៉ឹង	។
១០	សូមព្រះជាម្ចាស់ជួយសង្គ្រោះ	ព្រះរាជានោះមានលំនឹង
	សំឡេងយើងខ្ញុំរកទីពឹង	សូមទ្រង់ឆ្លើយវិញកុំបីខាន	។

ទំនុកតម្កើងលេខ ២១ (២០) បទពាក្យ ៧

២	បពិត្រអម្ចាស់	រាជាអរណាស់	ព្រោះតែឫទ្ធា
	នុភាពព្រះអង្គ	ដែលជួយការពារ	ឱ្យព្រះករុណា
		មានជោគមានជ័យ	។
៣	ព្រះអង្គប្រទាន	ឱ្យរាជាបាន	ទទួលអ្វីៗ
	ទ្រង់មិនបដិសេធ	ពាក្យអង្វរស្តី	ទៅតាមព្រះទ័យ
		របស់រាជា	។
៤	ព្រះអង្គប្រទាន	ពរជ័យឱ្យមាន	ដល់ស្តេចគ្រប់គ្រា
	ទ្រង់ពាក់មកុដមាស	ពីលើសិរសា	នៃព្រះករុណា
		រុងរឿងប្រណីត	។
៥	រាជាទូលសូម	ព្រះអង្គក៏ព្រម	ប្រទានជីវិត
	ឱ្យព្រះករុណា	ព្រះជន្មវែងពិត	ដោយគ្មានកម្រិត
		អង្វែងឥតស្រាន្ត	។
៦	ដោយព្រះអម្ចាស់	មានជ័យជំនះ	រាជាក៏បាន
	ទទួលសិរី	រុងរឿងថ្កើងថ្កាន	អម្ចាស់ប្រទាន
		ថ្លៃថ្លាឧត្តម	។
៧	ព្រះអង្គតែងតាំង	រាជាឱ្យនាំ	ព្រះពរសក្តិសម
	ទ្រង់គង់ជាមួយ	រាជារឹងមាំ	ហើយមានទាំងព្រម
		អំណរបរិបូណ៌	។
៨	រាជាផ្អែកពឹង	បង្អែកពំនឹង	គ្មានចិត្តផ្លាស់ប្តូរ
	ហឫទ័យស្មោះត្រង់	បរិសុទ្ធហែហូរ	ព្រះរាជ្យយឺនយូរ
		ឥតមានរង្គោះ	។
៩	ព្រះករុណាចាប់	ខ្មាំងសត្រូវជាប់	ឱ្យបានទាំងអស់
	ទ្រង់ប្រើអំណាច	ឫទ្ធីខ្ពង់ខ្ពស់	ចាប់ពួកទាំងនោះ
		ដែលស្អប់រាជា	។
១០	ករុណាមកដល់	កម្ទេចគ្មានសល់	ឱ្យគេវេទនា
	ដូចភ្លើងឆេះសុស	ព្រះម្ចាស់មុខជា	រំលាយពួកវា
		ដោយព្រះអង្គខ្ញាល់	។
១១	ព្រះករុណាទ្រង់	នឹងលុបពូជពង្ស	វាមិនឱ្យសល់
	អស់ពីផែនដី	រហូតកប្បកល្ប	មិនឱ្យកង្វល់
		ប្រហារផុតពូជ	។
១២	បើគេឃុបឃិត	រួមផ្សំគំនិត	អំពើខិលខូច
	នោះគេមិនអាច	ធ្វើទៅបានរួច	គម្រោងការដូច
		ចិត្តគេប៉ុនប៉ង	។
១៣	រាជាទ្រង់ឫទ្ធិ	ទ្រង់ទាញធ្នូយឹត	បាញ់សត្រូវផង
	ព្រះករុណាធ្វើ	ឱ្យភ័យកន្លង	ពួកខ្មាំងយង់ឃ្នង
		ត្រូវបរាជ័យ	។
១៤	ឱព្រះអម្ចាស់	សូមទតឱ្យច្បាស់	កុំផ្ទុំទៀតអី
	មេត្តាតើនឡើង	សម្តែងបារមី	ខ្ញុំច្រៀងបទថ្វាយ
		តម្កើងព្រះអង្គ	។

ទំនុកតម្កើងលេខ ២២ (២១) បទកាកគតិ

២	ឱ! ព្រះម្ចាស់អើយ	ចុះហេតុម្តេចឡើយ	ក៏ព្រះអង្គបោះ
	បង់ចោលរូបខ្ញុំ	ឥតមានស្រណោះ	ខ្ញុំស្រែកស្ទើរខ្សោះ
		ពុំឃើញទ្រង់ជួយ	។
៣	ឱ! ព្រះម្ចាស់អើយ	ខ្ញុំស្រែកដង្ហោយ	រកព្រះតែមួយ
	ស្រែករកពេលថ្ងៃ	ក៏ទ្រង់មិនជួយ	ពេលយប់ដេកព្រួយ
		ក៏មិនស្បើយដែរ	។
៤	ប៉ុន្តែព្រះអង្គ	វិសុទ្ធឥតហ្មង	គង់នៅឥតប្រែ
	លើបល្ល័ង្ករាជ្យ	អ៊ីស្រាអែលតែងតែ	នាំគ្នាដង្ហែ
		តម្កើងព្រះអង្គ	។
៥	បុព្វបុរស	យើងខ្ញុំទាំងអស់	ផ្ញើចិត្តទាំងស្រុង
	ផ្ញើទាំងជីវិត	ទាំងរូបកាយផង	សូមឱ្យព្រះអង្គ
		រំដោះពួកគាត់	។
៦	ដូនតាយើងខ្ញុំ	អង្វរទូលសុំ	ព្រះអង្គកម្ចាត់
	អស់ពួកសត្រូវ	ដោយផ្ញើជីវិត	នឹងមិនខកចិត្ត
		ព្រោះព្រះអង្គឡើយ	។
៧	រីឯខ្ញុំវិញ	ទុក្ខសោកទោម្នេញ	ឥតបីល្ហែល្ហើយ
	គេលែងចាត់ទុក	ជាមនុស្សទៀតហើយ	មើលងាយឥតស្បើយ
		ប្រមាថជេរស្តី	។
៨	អស់អ្នកឃើញខ្ញុំ	ឡកឡឺយដាក់ចំ	គ្មានត្រាប្រណី
	គេពេបជ្រាយដាក់	ឥតមានគិតអ្វី	ហើយមិនចេញស្តី
		គ្រវីក្បាលដាក់	។
៩	គេពោលពាក្យថា	កាត់ផ្ញើវាសនា	ព្រះជាម្ចាស់ជាក់
	ឱ្យព្រះអង្គជួយ	រំដោះគ្រោះថ្នាក់	បើព្រះអង្គជាក់
		ពិតជាស្ម័គ្រស្មោះ	។
១០	ឱព្រះម្ចាស់អើយ	ព្រះអង្គនេះហើយ	ដែលជួយរំដោះ
	ឱ្យទូលបង្គំ	ចេញពីផ្ទៃពោះ	ផ្ញើខ្ញុំឱ្យរស់
		ឱ្យម្តាយបំបៅ	។
១១	កាលខ្ញុំកើតមក	ទ្រង់ទទួលយក	ខ្ញុំជាកូនចៅ
	ព្រះអង្គជាព្រះ	ដែលបានត្រាស់ហៅ	តាំងពីខ្ញុំនៅ
		ពុំស្គាល់ពន្លឺ	។
១២	ពេលខ្ញុំជួបភ័យ	អាសន្នខ្លាំងក្រៃ	គ្មានអ្នកដឹងឮ
	មិនមានអ្នកជួយ	ផុតភ័យព្រួយព្រឺ	សូមទ្រង់ដឹងឮ
		កុំទៅឆ្ងាយខ្ញុំ	។
១៣	សត្រូវច្រើននាក់	ចោមរោមពួនស្ទាក់	រួមរឹតជិតជុំ
	ប្រៀបបានគោបា	ឡោមព័ទ្ធរូបខ្ញុំ	ដូចគោមកចោម
		ពីស្រុកបាសាន	។
១៤	ពួកគេប្រឹងបើក	មាត់គេកម្រើក​	ប្រឆាំងឥតស្រាន្ត
	នឹងទូលបង្គំ	ដូចសិង្ហសាមាន្យ	បម្រុងហែកប្រាណ
		ស៊ីជាអាហារ	។
១៥	កម្លាំងខ្ញុំខ្សោយ	មិនត្រឡប់ឡើយ	ដូចខ្សែជលសា
	ដែលហូរធ្លាក់ទៅ	មិនវិលឡើយណា	ឆ្អឹងសាច់ផងរ៉ា
		រលេះបាត់អស់	។
	ទឹកចិត្តក្លាហាន	ដែលខ្ញុំធ្លាប់មាន	បែរជាហេវខ្សោះ
	បីដូចក្រមួន	រលាយរលោះ	ឥតមានសល់សោះ
		ព្រោះកម្តៅថ្ងៃ	។
១៦	បំពង់កស្ងួត	ដូចដីប្រេះហួត	ស្គមស្គាំងរីងរៃ
	អណ្តាតខ្ញុំស្អិត	ដិតជាប់ពេកក្រៃ	ទ្រង់ឱ្យខ្ញុំក្ស័យ
		ក្លាយជាធូលី	។
១៧	ពួកឆ្កែព័ទ្ធខ្ញុំ	មានជនមួយក្រុម	វាមកញាំញី
	ជាជនទុរយ៌ស	ក្រវែលគ្រប់ទី	ទម្លុះជីវី
		ជើងដៃខ្លួនប្រាណ	។
១៨	រូបខ្ញុំអាចរាប់	ឆ្អឹងជំនីរគ្រប់	មានទាំងប៉ុន្មាន
	សត្រូវទុយ៌ស	ចិត្តដូចតិរច្ឆាន	សម្លក់រំខាន
		សម្លឹងមកខ្ញុំ	។
១៩	ពួកគេដោះយក	ខោអាវខ្ញុំមក	ចែកចាយគ្នាជុំ
	នាំគ្នាចាប់ឆ្នោត	យកខោអាវខ្ញុំ	ធ្វើដោយមិនសម
		ជាល្បែងសប្បាយ	។
២០	ឱ!ព្រះម្ចាស់អើយ	កុំនៅកន្តើយ	ឱ្យខ្ញុំឃ្លាតឆ្ងាយ
	ទ្រង់ជាកម្លាំង	គាំទ្ររាងកាយ	សូមយាងមកអាយ
		សង្គ្រោះប្រញាប់	។
២១	សូមដោះលែងខ្ញុំ	ឱ្យផុតទុក្ខធំ	បានលឿនឆាប់ៗ
	ផុតពីមុខដាវ	ដែលគេចាក់កាប់	សូមជួយប្រញាប់
		ពីចង្កូមឆ្កែ	។
២២	សូមសង្គ្រោះខ្ញុំ	ឱ្យផុតទុក្ខធំ	ពីមាត់សិង្ហដែរ
	ឱ្យផុតពីស្នែង	សូមជួយបំបែរ	ឆ្លើយតបកុំល្ហែ
		មកទូលបង្គំ	។
២៣	ខ្ញុំនឹងថ្លាថ្លែង	ព្រះនាមស្ញប់ស្ញែង	ឱ្យបងប្អូនខ្ញុំ
	បានស្គាល់ព្រះអង្គ	ខ្ពង់ខ្ពស់ឧត្តម	ក្នុងអង្គប្រជុំ
		សូមលើកតម្កើង	។
២៤	អ្នករាល់គ្នាអើយ	កុំនៅកន្តើយ	នាំគ្នាក្រោកឡើង
	សរសើរព្រះអង្គ	ថា្លថ្លៃរុងរឿង	ឱ្យលើកតម្កើង
		អម្ចាស់ក្សត្រា	។
	អស់អ្នកដែលជា	ពូជពង្សសោភា	យ៉ាកុបថ្លៃថ្លា
	ព្រមទាំងអស់ពូជ	អ៊ីស្រាអែលផងណា	កុំនៅរួញរា
		ស្ញែងខ្លាចព្រះអង្គ	។
២៥	ទ្រង់មិនព្រងើយ	ឬធ្វើកន្តើយ	នឹងជនស្លូតត្រង់
	ដែលស្រែកហៅរក	សូមជួយស្រោចស្រង់	ទាំងសណ្តាប់ផង
		មិនលាក់ព្រះភក្ត្រ	។
២៦	ព្រះអង្គបានប្រោស	ប្រណីសន្តោស	ជាម្លប់ត្រជាក់​
	ខ្ញុំលើកតម្កើង	ដោយចិត្តស្មោះស្ម័គ្រ	នៅមុខអស់អ្នក
		ក្នុងអង្គប្រជុំ	។
២៧	មនុស្សទន់ទាប	ស្លូតបូតសុភាព	បានក្តីសុខដុម
	បរិភោគឆ្អែតឆ្អល់	ឥតព្រួយបារម្ភ	រកព្រះឧត្តម
		សរសើរបារមី	។
២៨	មនុស្សទាំងប៉ុន្មាន	ដែលរស់សុខសាន្ត	នៅលើផែនដី
	នឹកឃើញព្រះម្ចាស់	ត្រឡប់វិលវៃ	នាំគ្នាឃ្មាតខ្មី
		ក្រាបថ្វាយបង្គំ	។
២៩	ព្រះជាអម្ចាស់	ជាមហាក្សត្រច្បាស់	ប្រពៃសក្តិសម
	គ្រប់គ្រងទាំងអស់	លើជាតិតូចធំ	រស់នៅជួបជុំ
		ក្សេមក្សាន្តរមនា	។
៣០	អ្នកធំទាំងឡាយ	នៅជិតឬឆ្ងាយ	ក្រាបថ្វាយគ្រប់គ្នា
	បង្គំព្រះអង្គ	ទោះមនុស្សធម្មតា	តែងក្ស័យអាត្មា
		ក៏ចូលមកដែរ	។
៣១	ជនជំនាន់ក្រោយ	គោរពព្រះដោយ	ចិត្តមិនបែកបែរ
	បម្រើព្រះម្ចាស់	មិនមានវៀចវេរ	ហើយគេតែងតែ
		ថ្លែងប្រាប់កូនចៅ	។
៣២	គេប្រកាសប្រាប់	ឱ្យប្រជាស្តាប់	តអស់ពង្សផៅ
	ពីក្តីសុចរិត	ទៀងត្រង់ត្រឹមត្រូវ	ទ្រង់ត្រួសត្រាយផ្លូវ
		រំដោះប្រជា	។

ទំនុកតម្កើងលេខ ២៣ (២២) បទពាក្យ៧

១	ឱ! ព្រះអម្ចាស់ជាគង្វាល	មើលឥតរយាលណែនាំខ្ញុំ
	ឱ្យដើរតាមផ្លូវដែលសក្តិសម	ភោគផលជិតជុំឥតខ្វះឡើយ	។
២	ព្រះអង្គឱ្យខ្ញុំសម្រាកនៅ	លើវាលមានស្មៅបានធូរស្បើយ
	នាំខ្ញុំទៅក្បែរមាត់ទឹកហើយ	ប្រទានឱ្យកាយមានកម្លាំង	។
៣	ទ្រង់់នាំខ្ញុំតាមផ្លូវសុចរិត	ល្អល្អះប្រណីតភ្លឺចែងចាំង
	ព្រះកិត្តិនាមល្បីក្លាខ្លាំង	គ្មានអ្វីរារាំងព្រះអង្គឡើយ	។
៤	ទោះបីរូបខ្ញុំដើរកាត់ភ្នំ	ជ្រលងតូចធំស្លាប់ក៏ដោយ
	ក៏ខ្ញុំមិនភ័យខ្លាចអ្វីឡើយ	ទ្រង់គង់ជាមួយតាមការពារ	។
៥	ព្រះអង្គរៀបចំឱ្យបរិភោគ	អាហារគរគោកមុខបច្ចា
	រួចទ្រង់ចាក់ប្រេងលើសិរសា	បំពេញពែងស្រាខ្ញុំហៀរហូរ	។
៦	ព្រះអង្គប្រទានសុភមង្គល	ហឫទ័យខ្វាយខ្វល់ដោយអាសូរ
	មកទូលបង្គំជាហែហូរ	ឥតមានឈប់ឈរមួយជីវិត	។
	ដរាបណាជីវិតនៅមាន	ខ្ញុំសែនសុខសាន្តឥតមានគិត
	ក្នុងព្រះដំណាក់ល្អប្រណីត	ព្រះអម្ចាស់ស្ថិតស្ថេរជានិច្ច	។

ទំនុកតម្កើងលេខ ២៤ (២៣) បទពាក្យ៧

១	អ្វីៗដែលនៅលើផែនដី	កើតមកច្រើនក្រៃមីរដេរដាស
	សុទ្ធជាកម្មសិទ្ធព្រះអម្ចាស់	ជាស្នាព្រះហស្តនៃព្រះអង្គ	។
២	គឺព្រះអង្គហើយដែលចាក់គ្រឹះ	គ្រប់ទីគ្រប់ទិសគ្រប់ជ្រោយជ្រុង
	ធ្វើឱ្យផែនដីនៅរឹងប៉ឹង	ធំធេងល្វើយល្វឹងលើសមុទ្រ	។
៣	តើនរណាអាចឡើងលើភ្នំ	វិហារឧត្តមដ៏វិសុទ្ធ
	ដែលជាទីស្ថានតែមួយគត់	ល្អល្អះបំផុតសែនសុខសាន្ត	។
៤	គឺមានតែអ្នកត្រឹមត្រូវល្អ	ទឹកចិត្តស្មោះសរបរិសុទ្ធថ្កាន
	មិនបណ្តោយខ្លួនស្បថបំពាន	នោះទើបអាចបានឡើងទីខ្ពស់	។
៥	ព្រះជាអម្ចាស់ប្រទានពរ	ជោគជ័យបវរសព្វទាំងអស់
	ហើយព្រះអង្គបានជួយសង្គ្រោះ	ទាំងប្រោសឱ្យរស់មានជីវិត	។
៦	អ្នកទាំងនេះហើយគឺប្រជា	ស្វះស្វែងម្នីម្នាចូលមកជិត
	ជាអ្នកស្វែងរកព្រះម្ចាស់ពិត	ព្រះភក្ត្រល្អល្អិតព្រះយ៉ាកុប	។
៧	ឱ!ទ្វារទាំងឡាយចូរកក្រើក	ចូរអ្នកខំបើកកុំឈរឈប់
	ចូរបើកចំហទាំងថ្ងៃយប់	មហាក្សត្រជាម្លប់យាងចូលមក	។
៨	តើព្រះមហាក្សត្រជានរណា	រុងរឿងថ្លៃថ្លាជាជម្រក
	គឺព្រះដែលខ្លាំងធ្លាប់ច្បាំងមក	មានជ័យមានជោគលើពិភព	។
៩	ឱទ្វារទាំងឡាយចូរកក្រើក	ចូរអ្នកខំបើកកុំឈរឈប់
	ចូរបើកចំហទាំងថ្ងៃយប់	មហាក្សត្រជាម្លប់យាងចូលមក	។
១០	តើព្រះមហាក្សត្រជានរណា	រុងរឿងថ្លៃថ្លាជាជម្រក
	គឺទ្រង់ជាម្ចាស់ពិភពលោក	ពីដើមរៀងមកលុះឥឡូវ	។

ទំនុកតម្កើងលេខ ២៥ (២៤) បទពាក្យ៧

១	ឱ! ព្រះអម្ចាស់ខ្ញុំផ្ចង់ចិត្ត	ផ្ចង់ទាំងគំនិតឥតរវាត
	ទៅលើព្រះអង្គមិនឃ្លាងឃ្លាត	នឹកហើយគិតទៀតមិនបែកចិត្ត	។
២	បពិត្រព្រះម្ចាស់ទូលបង្គំ	ពេលនេះរូបខ្ញុំផ្ញើជីវិត
	សូមកុំឱ្យខ្ញុំត្រូវខកចិត្ត	ព្រោះខ្មាំងជុំជិតមានជោគជ័យ	។
៣	អស់អ្នកសង្ឃឹមលើព្រះអង្គ	នឹងមិនត្រូវបង់ខកចិត្តអ្វី
	គឺមានតែអ្នកក្បត់ម្ចាស់ថ្លៃ	ទើបខកចិត្តក្រៃអ្វីក៏គ្មាន	។
៤	ឱព្រះអម្ចាស់ទូលបង្គំ	សូមជួយណែនាំនិងបង្រៀន
	ឱ្យស្គាល់មាគ៌ាល្អថ្កើងថ្កាន	វិសុទ្ធហួសស្មាននៃព្រះអង្គ	។
៥	សូមជួយអប់រំខ្ញុំឱ្យរស់	តាមក្តីពិតស្មោះព្រះអង្គផង
	ដ្បិតទ្រង់សង្គ្រោះខ្ញុំឥតហ្មង	សង្ឃឹមព្រះអង្គរៀងរាល់ថ្ងៃ	។
៦	ឱព្រះអម្ចាស់សូមកុំភ្លេច	ចាំជាប់ជានិច្ចពេញព្រះទ័យ
	ដែលធ្លាប់អាណិតពន់ពេកក្រៃ	ករុណាប្រណីខ្ញុំជានិច្ច	។
៧	សូមបំភ្លេចបាបនិងកំហុស	ដែលខ្ញុំមានទោះច្រើនឬតិច
	នៅពីក្មេងខ្ចីសូមបំភ្លេច	ទ្រង់គ្មានកលកិច្ចធ្លាប់មេត្តា	។
៨	ព្រះអម្ចាស់មានព្រះហឫទ័យ	សប្បុរសពេកក្រៃករុណា
	សូមជួយបង្ហាញពីមាគ៌ា	មនុស្សបាបរាល់គ្នាបានស្គាល់ផង	។
៩	ព្រះអង្គនាំមនុស្សដែលមានចិត្ត	សុភាពសុចរិតតាមគន្លង
	មាគ៌ាត្រឹមត្រូវល្អផូរផង់	មិនឱ្យមានហ្មងស្គាល់ផ្លូវល្អ	។
១០	មាគ៌ារបស់ព្រះអម្ចាស់	សម្តែងយ៉ាងច្បាស់ករុណាធម៌
	ដល់អ្នកគោរពទោះក្រីក្រ	ខ្ពង់ខ្ពស់បវរតាមសម្ពន្ធ	។
១១	ឱ! ព្រះអម្ចាស់ប្រណីប្រោស	កុំប្រកាន់ទោសខ្ញុំធ្ងរធ្ងន់
	អំពើទុច្ចរិតមានពីមុន	សូមក្រាបកាយលន់តួព្រះម្ចាស់	។
១២	អស់អ្នកគោរពហើយកោតខ្លាច	ឫទ្ធីអំណាចបានស្គាល់ច្បាស់
	ទ្រង់បង្ហាញផ្លូវឥតក្រឡះ	ដែលគេត្រូវជ្រើសតាមចិន្តា	។
១៣	នោះគាត់បានសុខមានមង្គល	ឥតមានខ្វាយខ្វល់គ្រប់វេលា
	ពូជពង្សកូនចៅទាំងអស់គ្នា	គ្រងស្រុកទុកជាកេរមតក	។
១៤	ព្រះតែងសម្តែងភក្តីភាព	អ្នកតូចខ្ពស់ទាបយ៉ាងស្ម័គ្រស្មោះ
	អ្នកដែលកោតខ្លាចទ្រង់សប្បុរស	ឱ្យគេទាំងអស់ស្គាល់មេត្រី	។
១៥	រូបខ្ញុំសម្លឹងរកព្រះអង្គ	ឥតមានភ្លេចម្តងរៀងរាល់ថ្ងៃ
	ព្រះអង្គរំដោះផុតទុក្ខភ័យ	ផុតពីក្សិណក្ស័យផុតអន្ទាក់	។
១៦	សូមព្រះអង្គបែរព្រះភក្ត្រមក	សណ្តោងយោងយកកុំអន់អាក់
	ប្រណីសន្តោសផុតគ្រោះថ្នាក់	ដ្បិតរូបខ្ញុំម្នាក់នៅឯកា	។
១៧	រូបខ្ញុំលំបាកចិត្តពេកក្រៃ	រាល់ពេលយប់ថ្ងៃសែនខ្លោចផ្សា
	មេត្តាដកយកទុក្ខនេះណា	ធុញថប់គ្រាំគ្រាពីចិត្តខ្ញុំ	។
១៨	សូមទតមកមើលទុក្ខវេទនា	ចុកចាប់ឈឺផ្សាទូលបង្គំ
	អត់ទោសឱ្យរួចពីទុក្ខធំ	វេទនាទួញយំផុតបាបផង	។
១៩	សូមទតមកមើលខ្មាំងសត្រូវ	គ្នាច្រើនពេកកូវចិត្តយង់ឃ្នង
	គេស្អប់គេខ្ពើមក្រៃកន្លង	ចិត្តគេប៉ុនប៉ងចងគួនគុំ	។
២០	មេត្តាជួយការពារជីវិត	រំដោះឱ្យផុតពីទុក្ខធំ
	ខ្ញុំសូមពឹងលើព្រះឧត្តម	កុំឱ្យរូបខ្ញុំខកចិត្តឡើយ	។
២១	រូបខ្ញុំទុកចិត្តលើព្រះអង្គ	សូមមេត្តាផងកុំកន្តើយ
	រក្សាជីវិតខ្ញុំបានស្បើយ	ព្រោះខ្ញុំនេះហើយចិត្តសប្បុរស	។
២២	ឱព្រះអម្ចាស់នៃខ្ញុំអើយ	សូមកុំព្រងើយធ្វើដូច្នោះ
	រំដោះអ៊ីស្រាអែលឱ្យរួចទោស	វេទនាទាំងអស់បានសុខសាន្ត	។

ទំនុកតម្កើងលេខ ២៦ (២៥) បទពាក្យ៧

១	ឱព្រះអម្ចាស់	ព្រះអង្គជាព្រះ	ប្រពៃឧត្តម
	សូមរកយុត្តិធម៌	ឱ្យទូលបង្គំ	ដែលអស់យើងខ្ញុំ
		ទុកចិត្តព្រះអង្គ	។
២	ឱព្រះអម្ចាស់	សូមស្ទង់ឱ្យច្បាស់	លចិត្តមើលផង
	ពិនិត្យរូបខ្ញុំ	ហើយពិសោធន៍ល្បង	ចិត្តខ្ញុំឥតហ្មង
		ស្មោះស្ម័គ្រជានិច្ច	។
៣	ទូលបង្គំស្រមៃ	នឹកពីព្រះទ័យ	ព្រះអង្គឥតភ្លេច
	ហើយបានធ្វើតាម	ឥតមានកែគេច	តាមជាប់ជានិច្ច
		មិនគេចបែកបែរ	។
៤	ទូលបង្គំមិនធ្លាប់	អង្គុយអែបជាប់	ពួកពាលប៉ោឡែ
	ឬមនុស្សខិលខូច	ជនអាវាសែ	ពុតត្បុតហូរហែ
		ក៏មិនសេពគប់	។
៥	ខ្ញុំមិនចូលចិត្ត	ពួកអ្នកប្រព្រឹត្ត	អាក្រក់ងល់ងប់
	ខ្ញុំមិនល្ងីល្ងើ	អង្គុយរួមរួប	ទោះថ្ងៃឬយប់
		នឹងពួកពាលា	។
៦	ឱ!​​​ព្រះអម្ចាស់	ខ្ញុំសូមប្រកាស	ស្មោះឥតរួញរា
	ខ្ញុំសម្អាតដៃ	គឺបញ្ជាក់ថា	រូបខ្ញុំគឺជា
		មនុស្សឥតសៅហ្មង	។
៧	ព្រមទាំងបន្លឺ	សំឡេងរន្ទឺ	អរគុណព្រះអង្គ
	និងរៀបរាប់ពី	ការអស្ចារ្យផង	របស់ព្រះអង្គ
		មានទាំងប៉ុន្មាន	។
៨	បពិត្រព្រះម្ចាស់	ខ្ញុំចូលចិត្តណាស់	ដំណាក់សុខសាន្ត
	របស់ព្រះអង្គ	គឺជាទីស្ថាន	សិរីថ្កើងថ្កាន
		ព្រះអង្គស្ថិតនៅ	។
៩	សូមកុំទុកឱ្យ	ខ្ញុំស្លាប់ជាមួយ	មនុស្សបាបអាស្រូវ
	កុំដកជីវិត	របស់ខ្ញុំទៅ	នឹងពួកឃោរឃៅ
		ធ្លាប់បង្ហូរឈាម	។
១០	ពួកនោះចូលចិត្ត	នាំគ្នាប្រព្រឹត្ត	ផ្ទុយពីបម្រាម
	អំពើទុច្ចរិត	ដែលព្រះលោកហាម	ខំបង្ហូរឈាម
		ឬស៊ីសំណូក	។
១១	ឯខ្ញុំចូលចិត្ត	ធ្វើតែសុចរិត	មិនព្រមច្របូក
	ច្របល់់នឹងពួក	ធ្លាប់ស៊ីធ្លាប់សូក	សូមរំដោះយក
		រូបខ្ញុំនេះផង	។
១២	រូបខ្ញុំឈរនៅ	កន្លែងត្រឹមត្រូវ	សុចរិតទៀងត្រង់
	ខ្ញុំនឹងលើកថ្កើង	តម្កើងព្រះអង្គ	ឱ្យខ្ពស់ឧត្តុង្គ
		ក្នុងប្រជុំធំ	។

ទំនុកតម្កើងលេខ ២៧ (២៦) បទពាក្យ៧

១	ព្រះអម្ចាស់ទ្រង់ជាពន្លឺ	នាមល្បីរន្ទឺព្រះសង្គ្រោះ
	មិនឱ្យខ្ញុំខ្លាចនរណាសោះ	ជាកំពែងខ្ពស់ជួយជីវិត	។
២	ពេលពួកជនពាលជាបច្ចា	រូតរះម្នីម្នាចូលមកជិត
	ពួកគេចង់មកផ្តាច់ជីវិត	តែពួកឧក្រិដ្ឋត្រូវភ្លាត់ដួល	។
៣	ទោះមានទ័ពច្រើនមករោមរឹត	ឡោមព័ទ្ធខ្ញុំជិតក៏មិនជ្រួល
	ទោះលើកគ្នាច្បាំងខ្ញុំសុខស្រួល	ចិត្តមិនប្រែប្រួលសង្ឃឹមព្រះ	។
៤	ខ្ញុំទូលព្រះម្ចាស់នូវសេចក្តី	តែមួយគត់ខ្លីឱ្យបានច្បាស់
	គឺចង់ស្នាក់នៅដំណាក់ព្រះ	ឥតមានក្រឡះមួយជីវិត	។
	ដើម្បីខ្ញុំបានកោតស្ញែងស្ញប់	ឫទ្ធានុភាពថ្កុំថ្កើងពិត
	នឹងថ្វាយបង្គំម្ចាស់ជីវិត	ព្រះអង្គគង់ស្ថិតក្នុងវិហារ	។
៥	ពេលខ្ញុំជួបគ្រោះអាសន្នភ័យ	ព្រះអង្គដឹកដៃខ្ញុំម្នីម្នា
	ចូលខ្លួនជ្រកក្នុងព្រះពន្លា	បំពួនអាត្មាថ្មដាបាំង	។
៦	ឥឡូវព្រះអង្គលើករូបខ្ញុំ	ឱ្យខ្ពស់ឧត្តមហួសពួកខ្មាំង
	ថ្វាយយញ្ញបូជាហើយព្រមទាំង	ស្រែកជ័យឃោសផងស្មូតតម្កើង	។
៧	ឱព្រះម្ចាស់អើយសូមសណ្តាប់	ស្នូរខ្ញុំស្រែកប្រាប់ឮលាន់ឡើង
	អាណិតឆ្លើយតបកុំឆ្មៃឆ្មើង	មកខ្ញុំវិញផងកុំកន្តើយ	។
៨	ខ្ញុំនឹកទៅដល់ព្រះបន្ទូល	ព្រះអង្គថ្លែងពោលទុកមកហើយ
	ចូរស្វែងរកយើងនឹងបានស្បើយ	ខ្ញុំមិនព្រងើយស្វែងរកភ័ក្ត្រ	។
៩	សូមទ្រង់អាណិតដល់រូបខ្ញុំ	កុំពួនសំងំនៅលួចលាក់
	កុំព្រះពិរោធកុំអន់អាក់	កុំបណ្តេញអ្នកបម្រើចោល	។
	ព្រះអង្គសង្គ្រោះទូលបង្គំ	កុំទុករូបខ្ញុំនៅតែលតោល
	ឱព្រះសង្គ្រោះដូចស្រមោល	កុំទុកខ្ញុំចោលដូច្នេះណា	។
១០	ទោះឪពុកម្តាយទូលបង្គំ	បោះបង់ចោលខ្ញុំឱ្យឯកា
	ព្រះម្ចាស់នៅតែថែរក្សា	ប្រណីមេត្តាជាប់ជានិច្ច	។
១១	សូមព្រះអម្ចាស់បង្រៀនខ្ញុំ	ស្គាល់ផ្លូវឧត្តមគ្មានកលកិច្ច
	ដើរតាមមាគ៌ាមិនបែរគេច	ព្រោះខ្មាំងមានល្បិចចាំឃ្លាំមើល	។
១២	សូមកុំបណ្តោយឱ្យខ្ញុំធ្លាក់	ចូលក្នុងអន្ទាក់ខ្មាំងងងើល
	សាក្សីក្លែងក្លាយបង្កាច់មួល	អ្នកនោះតែងពោលពាក្យឃោរឃៅ	។
១៣	ខ្ញុំជឿជាក់ថាខ្ញុំនឹងបាន	ឃើញសុខក្សេមក្សាន្តមិនអាស្រូវ
	មង្គលកើតពីព្រះម្ចាស់នៅ	ក្នុងលោកតទៅជាមិនខាន	។
១៤	ចូរទុកចិត្តលើព្រះអម្ចាស់	ព្រះអង្គជាព្រះដ៏ថ្កើងថ្កាន
	ចូរមានកម្លាំងចិត្តក្លាហាន	នោះអ្នកនឹងមានសុខមង្គល	។

ទំនុកតម្កើងលេខ ២៨ (២៧) បទព្រហ្មគីតិ

១	ឱព្រះអម្ចាស់អើយ	ខ្ញុំស្រែកហើយរកព្រះអង្គ
	ទ្រង់ជាថ្មដាបាំង	ការពារឃាំងទូលបង្គំ	។
	សូមទ្រង់ស្តាប់សម្រែក	ដែលខ្ញុំស្រែកស្ទើរទួញយំ
	បើទ្រង់នៅសំងំ	នោះរូបខ្ញុំធ្លាក់មរណា	។
២	ពេលខ្ញុំដង្ហោយហៅ	លើកដៃទៅទីសក្ការ
	គ្រប់ពេលតែងវាចា	សូមមេត្តាសណ្តាប់ផង	។
៣	កុំឱ្យខ្ញុំមានទោស	ដូចកំហុសពួកយង់ឃ្នង
	គេរាក់ទាក់ឥតឆ្គង	តែបំណងមានកលល្បិច	។
៤	សូមទ្រង់ជួយដាក់ទោស	តាមកំហុសកុំបីភ្លេច
	ឱ្យសមតាមកលល្បិច	កុំឱ្យគេចរួចខ្លួនឡើយ	។
៥	ពួកគេមិនយល់សោះ	ស្នាព្រះហស្តនៅបង្កើយ
	សូមទ្រង់ផ្តួលគេហើយ	កុំបីឡើយឱ្យងើបបាន	។
៦	សូមនាំគ្នាលើកឡើង	ជួយតម្កើងព្រះថ្កើងថ្កាន
	ដ្បិតព្រះអម្ចាស់បាន	ព្រះសណ្តាប់ពាក្យផងខ្ញុំ	។
៧	ព្រះម្ចាស់ជាបន្ទាយ	កំពែងរាយខែលព័ទ្ធជុំ
	ការពារសង្គ្រោះខ្ញុំ	ទូលបង្គំគួរទុកចិត្ត	។
	ខ្ញុំរីករាយសប្បាយ	លែងខ្វល់ខ្វាយឈប់ភ័យភិត
	សរសើរព្រះម្ចាស់ពិត	ដោយមានបទច្រៀងតម្កើង	។
៨	ព្រះម្ចាស់ជាកម្លាំង	ការពារពាំងរាស្រ្តព្រះអង្គ
	ទ្រង់ជាកំពែងផង	សម្រាប់់សង្គ្រោះព្រះគ្រីស្ត	។
៩	ឱព្រះជាអម្ចាស់	សូមសង្គ្រោះប្រជារាស្រ្ត
	ទ្រង់ជាគង្វាលឈ្លាស	វៃរវៀសថែទាំគេ	។

ទំនុកតម្កើងលេខ ២៩ (២៨) បទកាកគតិ

១	ទេវតាទាំងឡាយ	ចូរនាំគ្នាថ្វាយ	តម្កើងព្រះម្ចាស់
	លើកស្ទួយសេរី	រុងរឿងត្រចះ	អនុភាពតេជៈ
		របស់ព្រះអង្គ	។
២	ចូរលើកតម្កើង	ព្រះនាមថ្កុំថ្កើង	ក្នុងពេលនេះផង
	ចូរនាំគ្នាថ្វាយ	បង្គំព្រះអង្គ	វិសុទ្ធឥតហ្មង
		ព្រះនាមល្បាញល្បី	។
៣	សូរសៀងព្រះម្ចាស់	លាន់ឮយ៉ាងច្បាស់	ពាសពេញផែនដី
	ពីលើសាគរ	សមុទ្រធំក្រៃ	ព្រះអម្ចាស់ថ្លៃ
		គង់នៅលើទឹក	។
៤	សូរសៀងព្រះម្ចាស់	ស្ទើរបែកអាកាស	លាន់ឮសន្ធឹក
	ឫទ្ធានុភាព	គគ្រឹមគគ្រឹក	ទោះយប់ល្ងាចព្រឹក
		នៅតែថ្កុំថ្កើង	។
៥	សូរសៀងព្រះម្ចាស់	មានបារមីណាស់	ដើមឈើដួលប៉ើង
	ដើមធំបាក់មែក	ដើមតូចរលើង	នៅភ្នំលីបង់
		ខ្ទេចខ្ទីគ្មានសល់	។
៦	ព្រះអង្គឱ្យភ្នំ	ស៊ីរីយ៉ូនធំ	លោតឥតមានខ្វល់
	ដូចកូនក្របី	កូនគោគ្មានក្រោល	ត្រូវមេដើរចោល
		គ្មានអ្នករក្សា	។
៧	សូរសៀងព្រះម្ចាស់	ខ្ទ័រខ្ទារខ្លាំងណាស់	ពាសពេញវេហាស៍
	មានទាំងរន្ទះ	បាញ់រះផងណា	នេះគឺចេស្តា
		បារមីថ្កើងថ្កាន	។
៨	សូរសៀងរបស់	ព្រះម្ចាស់ទាំងអស់	ឱ្យរហោស្ថាន
	កក្រើកញាប់ញ័រ	គ្មានអ្វីស្មើបាន	ទាំងរហោស្ថាន
		ផែនដីរញ្ជួយ	។
៩	សូរសៀងព្រះម្ចាស់	អង្រួនទាំងអស់	ឱ្យក្តាន់ញីព្រួយ
	កំពុងកើតកូន	អារម្មណ៍រញ្ជួយ	ព្រមទាំងធ្វើឱ្យ
		ស្លឹកឈើជ្រុះអស់	។
	ពេលនោះមនុស្សម្នា	ទាំងអស់នាំគ្នា	ស្រែកដោយស្រួលស្រុះ
	ក្នុងវិហារថា	តម្កើងព្រះម្ចាស់	ព្រះនាមរបស់
		អម្ចាស់ថ្លាថ្លៃ	។
១០	ព្រះអង្គគ្រប់គ្រង	ទឹកជំនន់ផង	ធំធេងពេកក្រៃ
	ទ្រង់គឺជាព្រះ	មហាក្សត្រថ្លៃ	ព្រះនាមល្បាញល្បី
		គ្រងរាជ្យតទៅ	។
១១	សូមព្រះអម្ចាស់	ប្រណីសន្តោស	កុំបង្អង់នៅ
	ប្រទានកម្លាំង	ឱ្យរាស្ត្រតទៅ	កុំបីហ្មងសៅ
		ឱ្យគេសុខសាន្ត	។

ទំនុកតម្កើងលេខ ៣០ (២៩) បទពាក្យ៧

២	បពិត្រព្រះម្ចាស់ដ៏ឧត្តម	ទូលបង្គំសូមលើកតម្កើង
	ព្រោះព្រះអង្គបានស្រង់ខ្ញុំឡើង	មិនឱ្យពួកខ្មាំងលេងសើចបាន	។
៣	ឱព្រះអម្ចាស់ដែលជាព្រះ	ប្រសើរពេកណាស់ខ្ពស់ថ្កើងថ្កាន
	ខ្ញុំអង្វរសុំក្តីសុខសាន្ត	ហើយទ្រង់ប្រោសប្រាណឱ្យបានជា	។
៤	បពិត្រព្រះម្ចាស់ដ៏ឧត្តម	ស្រង់ទូលបង្គំផុតវេទនា
	ចេញពីរណ្តៅជនមរណា	ប្រទានជីវ៉ារស់ជាថ្មី	។
៥	ឱអ្នករាល់គ្នាដែលជារាស្រ្ត	របស់ព្រះម្ចាស់ដ៏ប្រពៃ
	ចូរច្រៀងតម្កើងនាមម្ចាស់ថ្លៃ	វិសុទ្ធពេកក្រៃនៃព្រះអង្គ	។
៦	ព្រះអង្គខ្ញាល់តែមួយភ្លែតសោះ	ប្រណីសន្តោសមនុស្សទាំងពួង
	ពេលល្ងាចគេយំចិត្តមួរហ្មង	ព្រលឹមស្រាងឡើងអរសប្បាយ	។
៧	ពេលទូលបង្គំរស់បានសុខ	មិនដែលមានទុក្ខមកបៀតកាយ
	ខ្ញុំពោលឡើងថាព្រះម្ចាស់ថ្លៃ	រូបខ្ញុំគ្មានអ្វីរលំឡើយ	។
៨	បពិត្រព្រះម្ចាស់ដែលធ្លាប់ប្រោស	ប្រណីសន្តោសមិនកន្តើយ
	ឱ្យខ្ញុំរឹងប៉ឹងដូចភ្នំហើយ	កុំលាក់ភ័ក្ត្រឡើយខ្ញុំតក់ស្លុត	។
៩	ឱព្រះជាអម្ចាស់ខ្ញុំអើយ	ខ្ញុំស្រែកដង្ហោយមិនកំណត់
	អង្វរព្រះអង្គតែមួយគត់	រាល់ពេលទៀងទាត់ទទូចថា	។
១០	«បើព្រះអង្គទុកឱ្យរូបខ្ញុំ	ទុក្ខសោកក្រៀមក្រំបង់សង្ខារ
	តើបានប្រយោជន៍អ្វីទៅណា	ខ្ញុំក្ស័យសង្ខារក្នុងរណ្តៅ	។
	តើមនុស្សស្លាប់ឬដែលសរសើរ	ព្រះគ្មានអ្វីស្មើគ្មានហ្មងសៅ
	តើគេអាចថ្លែងដូចម្តេចទៅ	ពីទឹកព្រះទ័យព្រះអង្គបាន	។
១១	ឱព្រះអម្ចាស់សូមមេត្តា	សណ្តាប់ករុណាកុំខកខាន
	ឱព្រះម្ចាស់អើយសូមវិលថ្កាន	សង្គ្រោះប្រោសប្រាណរូបខ្ញុំផង»	។
១២	ព្រះអង្គធ្វើឱ្យផុតអស់ទុក្ខ	អាប់អួរសព្វមុខមិនមានហ្មង
	ឥតមានកាន់ទុក្ខរីករាយម្តង	ខោអាវល្អផងពាក់សប្បាយ	។
១៣	ខ្ញុំមិននៅស្ងៀមធ្វើឆ្មៃឆ្មើង	ស្មូតបទតម្កើងមិនជិនណាយ
	ឱព្រះម្ចាស់អើយខ្ញុំឱនកាយ	ក្រាបបង្គំថ្វាយលើកតម្កើង	។

ទំនុកតម្កើងលេខ ៣១ (៣០) បទកាកគតិ

២	ឱព្រះអម្ចាស់	ខ្ញុំសូមប្រកាស	សូមជ្រកក្រោមម្លប់
	ជារៀងរហូត	ឥតមានឈរឈប់	ទាំងថ្ងៃទាំងយប់
		សូមរំដោះផង	។
៣	សូមទ្រង់ផ្ទៀងស្តាប់	ពាក្យខ្ញុំរៀបរាប់	មិនឱ្យមានឆ្គង
	សូមរំដោះខ្ញុំ	ឱ្យឆាប់តែម្តង	ជាកំពែងផង
		សង្គ្រោះរូបខ្ញុំ	។
៤	ទ្រង់ជាសិលា	កំពែងថ្មដា	ពាំងទូលបង្គំ
	សូមជួយដឹកនាំ	ឆ្លងផ្លូវតូចធំ	តម្រង់ទិសខ្ញុំ
		ដោយយល់ព្រះនាម	។
៥	សូមប្រោសឱ្យរួច	ពីពួកមនុស្សខូច	ពួនឃ្លាំចាំយាម
	សូមជួយរំដោះ	ពីអន្ទាក់ភ្លាម	ដ្បិតតែព្រះនាម
		ទ្រង់ជួយការពារ	។
៦	ខ្ញុំសូមប្រគល់	វិញ្ញាណនិមល	ថ្វាយអង្គក្សត្រា
	ទៅក្នុងព្រះហស្ត	ព្រះម្ចាស់ហើយណា	ព្រោះព្រះអង្គជា
		ព្រះទុកចិត្តបាន	។
៧	ទូលបង្គំសូមផ្ញើ	ជីវិតទៅលើ	ព្រះម្ចាស់ថ្កើងថ្កាន
	ហើយខ្ញុំក៏ស្អប់	មនុស្សចិត្តសាមាន្យ	ស្មោះស្ម័គ្រផ្ញើប្រាណ
		លើព្រះក្លែងក្លាយ	។
៨	ចិត្តខ្ញុំស្រស់ថ្លា	អរឥតឧបមា	រីករាយសប្បាយ
	ដោយសារព្រះអង្គ	ទ្រង់មានព្រះទ័យ	ករុណាប្រណី
		ពេលខ្ញុំវេទនា	។
៩	ទ្រង់មិនបណ្តោយ	ឱ្យរូបខ្ញុំធ្លោយ	ខ្លោចផ្សាគ្រាំគ្រា
	ធ្លាក់ទៅក្នុងដៃ	របស់បច្ចា	សូមទ្រង់ករុណា
		មេត្តាប្រណី	។
១០	ឱព្រះម្ចាស់អើយ	សូមអាណិតហើយ	សន្តោសខន្តី
	ដ្បិតទូលបង្គំ	ជួបអាសន្នភ័យ	យំស្ទើររីងរៃ
		បាក់ធ្លាក់ទឹកចិត្ត	។
១១	លុះដល់ខ្ញុំចាស់	ទុក្ខនោះធ្ងន់ណាស់	អស់មួយជីវិត
	កម្លាំងចុះខ្សោយ	កំហុសជុំជិត	ខ្ញុំខុសមែនពិត
		ឆ្អឹងឆ្អែងពុកផុយ	។
១២	សត្រូវទាំងអស់	ពោលពាក្យគំរោះ	ប្រមាថជេរស្តី
	ទោះអ្នកជិតខាង	ធ្លាប់មានមេត្រី	ពេលខ្ញុំដេកដី
		គេនាំគ្នាគេច	។
១៣	គេមិនខ្ចីនឹក	គេមិនរំព្ញក	គេខំបំភ្លេច
	ដូចចោលអ្នកស្លាប់	គ្មានគិតតួចតិច	ដូចឆ្នាំងកំបែក
		ត្រូវគេបង់បោះ	។
១៤	ខ្ញុំឮគេពោល	ពាក្យបង្កាច់មួយ	ថាមនុស្សទាំងអស់
	នៅជុំវិញខ្ញុំ	មានចិត្តមិនស្មោះ	ពួកគេទាំងនោះ
		បម្រុងប្រហារ	។
១៥	បពិត្រព្រះម្ចាស់	ទូលបង្គំភ័យណាស់	សូមផ្ញើជីវ៉ា
	ទៅលើព្រះអង្គ	ហើយសូមពោលថា	ព្រះអង្គពិតជា
		ព្រះរបស់ខ្ញុំ	។
១៦	អាយុជីវិត	របស់ខ្ញុំស្ថិត	ដោយក្តីសុខដុម
	នៅក្នុងព្រះហស្ត	ព្រះម្ចាស់ឧត្តម	សូមរំដោះខ្ញុំ
		ផុតពីដៃខ្មាំង	។
១៧	សូមបែរព្រះភក្ត្រ	ទតមកមើលអ្នក	បម្រើព្រះអង្គ
	មេត្តាសង្គ្រោះ	ទូលបង្គំផង	ដោយហឫទ័យទ្រង់
		ប្រណីករុណា	។
១៨	ឱព្រះអម្ចាស់	ខ្ញុំអង្វរព្រះ	ដែលធ្លាប់មេត្តា
	កុំឱ្យរូបខ្លុំ	ខកចិត្តឡើយណា	ឱ្យមនុស្សពាលា
		ទៅជួបមច្ចុរាជ	។
១៩	សូមឱ្យអស់អ្នក	តែងតែកុហក	និងពួកកំណាច
	ពួកធ្លាប់និយាយ	ព្រហើនកោងកាច	បាត់បង់អំណាច
		ហារស្តីមិនបាន	។
២០	បពិត្រព្រះម្ចាស់	ព្រះទ័យសន្តោស	វិសេសថ្កើងថ្កាន
	ដល់អ្នកគោរព	កោតខ្លាចគ្រប់ប្រាណ	មិនដែលរំខាន
		អ្នកជ្រកជាមួយ	។
២១	ព្រះអង្គទ្រង់លាក់	គេនៅក្បែរភក្ត្រ	ឱ្យផុតពីព្រួយ
	ពីមនុស្សទុច្ចរិត	ព្រះអង្គតែងជួយ	ឱ្យនៅជាមួយ
		ក្នុងព្រះពន្លា	។
២២	សូមលើកតម្កើង	សិរីរុងរឿង	ពេលដែលបច្ចា
	ឡោមព័ទ្ធរូបខ្ញុំ	ច្រើនឥតឧបមា	ហឫទ័យមេត្តា
		អស្ចារ្យពេកក្រៃ	។
២៣	ពេលខ្ញុំខ្វល់ចិត្ត	វិលវល់គំនិត	ជួបទុក្ខគ្រោះភ័យ
	ខ្ញុំនឹកស្មានថា	ទ្រង់លែងប្រណី	តែពេលខ្ញុំស្តី
		ទ្រង់ស្តាប់ពាក្យខ្ញុំ	។
២៤	សូមឱ្យអស់អ្នក	គោរពស្មោះស្ម័គ្រ	ព្រះម្ចាស់ជាធំ
	នាំគ្នាស្រឡាញ់	ព្រះខ្ពស់ឧត្តម	ការពារឧបត្ថម្ភ
		រក្សាអ្នកជឿ	។
	តែព្រះអង្គដាក់	ទោសតឹងដល់ថ្នាក់	អ្នកគ្មានជំនឿ
	មនុស្សព្រហើន	កាចកោងមិនជឿ	អ្នកគ្មានជំនឿ
		ព្រះអង្គផ្តន្ទា	។
២៥	អស់អ្នកទុកចិត្ត	សង្ឃឹមស្មោះពិត	ព្រះម្ចាស់លោកា
	ចូរមានកម្លាំង	ទឹកចិត្តហានក្លា	នោះព្រះមុខជា
		ការពារសុខសាន្ត	។

ទំនុកតម្កើងលេខ ៣២ (៣១) បទព្រហ្មគីតិ

១	អ្នកដែលព្រះជាម្ចាស់	លើកលែងទោសប្រោសប្រណី
	រួចពីបាបទុក្ខភ័យ	មានសេរីសុខមង្គល	។
២	អស់អ្នកដែលព្រះម្ចាស់	មិនចាប់ទោសផុតអំពល់
	គ្មានចិត្តរៀចវិលវល់	មានមង្គលសុខឥតល្ហែ	។
៣	ដរាបណារូបខ្ញុំ	នៅមិនព្រមសារភាពទេ
	នោះខ្ញុំកើតទុក្ខទ្វេ	មិនឈប់ទេចុកចាប់ក្រៃ	។
៤	ដ្បិតព្រះអង្គដាក់ទោស	ព្រោះខ្ញុំខុសទាំងយប់ថ្ងៃ
	ហេវខ្សោះស្ទើរក្សិណក្ស័យ	ដូចជាដីហួតទឹកអស់	។
៥	រូបខ្ញុំបានសារភាព	អំពើបាបមុខព្រះម្ចាស់់
	ខ្ញុំមិនលាក់លៀមសោះ	នូវកំហុសខ្ញុំនោះឡើយ	។
	ទូលបង្គំពោលថា	ខ្ញុំនេះណាសារភាពហើយ
	ទោសខ្ញុំធ្ងន់ឥតស្បើយ	ទ្រង់លើកឱ្យរួចពីបាប	។
៦	ហេតុនេះហើយបានជា	អ្នករាល់គ្នាប្រណិប័តន៍ក្រាប
	ព្រះម្ចាស់ជាដរាប	ជាប់រៀងរៀបមិនភិតភ័យ	។
	ទោះជាមានកង្វល់	ជួបព្យុះខ្យល់ទឹកជន់ក្តី
	ព្រះម្ចាស់តែងប្រណី	មិនឱ្យក្ស័យឬលិចលង់	។
៧	ព្រះអង្គជាជម្រក	ឱ្យខ្ញុំជ្រកមិនឱ្យហ្មង
	ការពាររូបខ្ញុំផង	កម្ចាត់បង់អាសន្នភ័យ	។
៨	យើងនឹងប្រដៅអ្នក	ឱ្យស្គាល់ជាក់ផ្លូវប្រពៃ
	ផ្តល់យោបល់ថ្លាថ្លៃ	ថែរាល់ថ្ងៃមិនឱ្យឆ្គង	។
៩	កុំឆោតល្ងង់ដូចលា	ឬសេះជាជំនិះម្តង
	ដាក់ដែកបង្ខាំផង	រួចមានចងទាំងបង្ហៀរ	។
១០	ជនពាលត្រូវរងគ្រប់	ទុក្ខទោសសព្វវេទនា
	ព្រះម្ចាស់តែងមេត្តា	ដល់អ្នកណាពឹងព្រះអង្គ	។
១១	មនុស្សសុចរិតអើយ	កុំកន្តើយសប្បាយឡើង
	អស់អ្នកដែលទៀងត្រង់	ស្រែកហ៊ោរផងដោយអំណរ	។

ទំនុកតម្កើងលេខ ៣៣ (៣២) បទព្រហ្មគីតិ

១	មនុស្សដែលសុចរិត	អបអរពិតលើកតម្កើង
	មានតែមនុស្សទៀងត្រង់	ដែលចិត្តចង់កោតសរសើរ	។
២	ដេញពិណលើកតម្កើង	ព្រះនៃយើងគ្មានអ្វីស្មើ
	លេងចាប៉ីបណ្តើរ	ដេញបង្ហើរខ្សែដប់ថ្វាយ	។
៣	ចូរច្រៀងទំនុកថ្មី	ទាំងតន្ត្រីកុំជិនណាយ
	សូរសៀងពិរោះក្រៃ	ពេលសប្បាយអបអរទ្រង់	។
៤	ដ្បិតព្រះជាអម្ចាស់	បន្ទូលច្បាស់ពិតទៀងត្រង់
	ព្រះអង្គតែងផ្ចិតផ្ចង់	ហើយតម្រង់តាមសន្យា	។
៥	ព្រះអង្គសព្វព្រះទ័យ	នឹងសេចក្តីពិតសត្យា
	សុចរិតគ្រប់ប្រការ	ហើយរក្សាយុត្តិធម៌	។
	ផែនដីទាំងមូលថ្លែង	ខំសម្តែងដោយអំណរ
	ពីហឫទ័យបវរ	ករុណាល្អព្រះជាម្ចាស់	។
៦	ផ្ទៃមេឃហ្វូងតារា	កើតដោយសារបន្ទូលច្បាស់
	ដោយបញ្ជារបស់	ព្រះជាអម្ចាស់នៃយើង	។
៧	ព្រះអង្គបានធ្វើឱ្យ	សមុទ្រថយផ្តុំគ្នាឡើង
	រួចទ្រង់ក៏បង្ខាំង	សមុទ្រគាំងមួយកន្លែង	។
៨	សូមឱ្យមនុស្សទាំងអស់	ដែលនៅរស់កោតស្ញប់ស្ញែង
	ព្រះមានឫទ្ធិក្រៃលែង	គួរស្ញប់ស្ញែងកោតព្រះអង្គ	។
៩	ដ្បិតពេលមានបន្ទូល	អ្វីមកមូលមិនរេរង់
	តាមបង្គាប់ព្រះអង្គ	សព្វអ្វីផងមានទាំងអស់	។
១០	ទ្រង់បំបែកផែនការ	នៃប្រជាអសប្បុរស
	កម្រោងការរបស់	ជនទាំងនោះត្រូវរលាយ	។
១១	ឯផែនការព្រះអង្គ	ស្ថិតនៅគង់មិនអន្តរាយ
	កម្រោងការទាំងឡាយ	មិនរលាយនៅស្ថិតស្ថេរ	។
១២	ប្រជាដែលគោរព	បម្រើគ្រប់គ្មានទំនេរ
	ទុកជាព្រះឥតប្រែ	នោះជួយតែសុខគ្រប់គ្រា	។
	ជនដែលព្រះអង្គជ្រើស	ឥតមានឃ្នើសជាទ្រព្យា
	ជារាស្រ្តផ្ទាល់អង្គា	នោះមុខជារួចផុតទុក្ខ	។
១៣	ព្រះម្ចាស់ទតមកពី	ស្ថានរមណីបរមសុខ
	ទតមើលពីលើមក	ឃើញមនុស្សយើងទាំងអស់	។
១៤	ពីព្រះរាជដំណាក់	ល្អសមសក្តិឥតមានទាស់
	ទតមើលជនទាំងអស់	ដែលនៅរស់លើផែនដី	។
១៥	គឺពិតជាព្រះអង្គ	ដែលបង្កើតចិត្តប្រុសស្រី
	ទ្រង់ពិនិត្យរំពៃ	មើលសព្វអ្វីដែលគេធ្វើ	។
១៦	ពុំដែលមានស្តេចណា	ឈ្នះដោយសារទ័ពពូកែ
	ហើយក៏ពុំមានដែរ	អ្នកពូកែដោយកម្លាំង	។
១៧	ឯសេះចេះប្រយុទ្ធ	ស្ទាត់បំផុតធ្វើចម្បាំង
	ទោះបីវាក្លាខ្លាំង	ក៏នៅគាំងមិនអាចឈ្នះ	។
១៨	ព្រះអង្គតាមរក្សា	អស់អ្នកណាដែលខ្លាចព្រះ
	អ្នកពឹងលើអម្ចាស់	ដ៏សប្បុរសមានមេត្តា	។
១៩	ព្រះអង្គបានសង្គ្រោះ	ឱ្យគេរស់មានសង្ខារ
	ផុតពីក្តីមរណា	នៅក្នុងគ្រាដែលអត់ឃ្លាន	។
២០	យើងសូមផ្ញើជីវិត	លើព្រះពិតឥតខកខាន
	ជាខែលដ៏ចំណាន	សង្គ្រោះប្រាណផុតភិតភ័យ	។
២១	យើងខ្ញុំសែនរីករាយ	ចិត្តសប្បាយអរពេកក្រៃ
	សូមផ្ញើជីវិតថ្លៃ	លើព្រះទ័យល្អបំផុត	។
២២	សូមព្រះជាអម្ចាស់	សម្តែងព្រះទ័យវិសុទ្ធ
	មេត្តាខ្ពស់បំផុត	កាយជីវិតផ្ញើព្រះអង្គ	។

ទំនុកតម្កើងលេខ ៣៤ (៣៣) បទកាកគតិ

២	ខ្ញុំអរព្រះគុណ	អម្ចាស់ពេកពន់	គ្រប់ពេលវេលា
	សូមលើកតម្កើង	ព្រះអង្គគ្រប់គ្រា	ឥតមានរួញរា
		ឈប់ឈរសោះឡើយ	។
៣	ខ្ញុំខ្ពស់មុខព្រោះ	ព្រះម្ចាស់សង្គ្រោះ	ខ្ញុំមិនកន្តើយ
	ចូរអ្នកទន់ទាប	ស្តាប់កុំព្រងើយ	នឹងបានធូរស្បើយ
		អំណរខ្លាំងក្លា	។
៤	សូមមកប្រកាស	នឹងខ្ញុំឱ្យច្បាស់	ដោយពោលឡើងថា
	ព្រះម្ចាស់ថ្កុំថ្កើង	រុងរឿងក្រៃណា	យើងនាំគ្នីគ្នា
		តម្កើងព្រះអង្គ	។
៥	ខ្ញុំបានស្វែងរក	ព្រះម្ចាស់តបមក	ឥតមានបង្អង់
	ទ្រង់បានរំដោះ	ខ្ញុំអស់ទុក្ខផង	តក់ស្លុតមួរហ្មង
		ឆ្លងផុតទាំងអស់	។
៦	អ្នកដែលសម្លឹង	ឆ្ពោះទៅព្រះអង្គ	បានសុខឥតមោះ
	ផុតអស់ទុក្ខសោក	វិយោគរងគ្រោះ	ពួកគេទាំងនោះ
		មិនខកចិត្តឡើយ	។
៧	អស់អ្នកកម្សត់	និងមនុស្សទុរគត	គេស្រែកដង្ហោយ
	ហៅរកព្រះម្ចាស់	ទ្រង់សណ្តាប់ហើយ	សង្គ្រោះគេឱ្យ
		ផុតពីគ្រោះកាច	។
៨	ទេវទូតរបស់	ព្រះម្ចាស់ទាំងអស់	ថែទាំអ្នកខ្លាច
	រក្សាការពារ	គេក្រោមអំណាច	រំដោះឱ្យរួច
		ផុតពីទុក្ខភ័យ	។
៩	ចូរអ្នកផ្អែកពឹង	ពិសោធន៍ឱ្យដឹង	ថាព្រះម្ចាស់ថ្លៃ
	ទ្រង់មានមេត្តា	សប្បុរសពេកក្រៃ	អស់ជនប្រុសស្រី
		មានជ័យមង្គល	។
១០	ឱប្រជារាស្រ្ត	របស់ព្រះម្ចាស់	ចូរកោតខ្លាចដល់
	ព្រះម្ចាស់នៃយើង	បានសុខឥតខ្វល់	មិនជួបអំពល់
		ឬខ្វះខាតអ្វី	។
១១	អ្នកមានមុខជា	ជួបទុក្ខវេទនា	ខ្វះម្ហូបចំណី
	តែអ្នកដែលស្វែង	រកព្រះម្ចាស់ថ្លៃ	នឹងមិនខ្វះអ្វី
		សុខសាន្តតទៅ	។
១២	ឱកូនចៅអើយ	កុំនៅព្រងើយ	ស្តាប់ខ្ញុំប្រដៅ
	ឱ្យចេះគោរព	ដរាបតទៅ	កុំធ្វើល្ងង់ខ្លៅ
		ត្រូវកោតខ្លាចព្រះ	។
១៣	តើមាននរណា	ចង់បានសង្ខារ	យឺនយូរត្រចះ
	មានអ្វីគ្រប់យ៉ាង	មិនខ្វះទាស់សោះ	ហើយចង់នៅរស់
		សុខសាន្តឬទេ?	។
១៤	ចូរទប់អណ្តាត	កាន់ចិត្តឱ្យស្អាត	កុំពោលវៀចវេរ
	និយាយកុហក	បោកបញ្ឆោតគេ	ឬក៏ដៀលជេរ
		នាំឱ្យអាស្រូវ	។
១៥	ចូរងាកចេញឆ្ងាយ	អំពើអន្តរាយ	អាក្រក់ជាផ្លូវ
	សាងអំពើល្អ	ខំស្វែងរកទៅ	សុខសាន្តទុកនៅ
		យ៉ាងអស់ពីចិត្ត	។
១៦	ព្រះម្ចាស់តែងតែ	រំពៃមើលថែ	អស់មនុស្សសុចរិត
	ទ្រង់យកព្រះទ័យ	ទុកដាក់ពិតៗ	ថែទាំនៅជិត
		រាល់ទិនទិវា	។
១៧	ព្រះជាអម្ចាស់	តែងតែប្រកាស	ប្រឆាំងគ្រប់គ្រា
	នឹងមនុស្សអាក្រក់	ទុច្ចរិតពាលា	កុំមាននរណា
		នឹកនាដល់ឡើយ	។
១៨	ពេលអ្នកទៀងត្រង់	ស្រែករកព្រះអង្គ	ទ្រង់មិនកន្តើយ
	ព្រះអង្គសណ្តាប់	ពាក្យគេរួចហើយ	រំដោះគេឱ្យ
		ផុតគ្រោះទាំងឡាយ	។
១៩	ព្រះម្ចាស់គង់ស្ថិត	ក្បែរអ្នកគ្រាំចិត្ត	មានទុក្ខខ្វល់ខ្វាយ
	ព្រះអង្គសង្គ្រោះ	អស់អ្នកទាំងឡាយ	បានសុខសប្បាយ
		ផុតទុក្ខរីងរៃ	។
២០	មនុស្សសុចរិត	រមែងជួបពិត	ទុក្ខលំបាកក្រៃ
	ប៉ុន្តែព្រះម្ចាស់	តែងជួយលកលៃ	រំដោះផុតភ័យ
		បានសុខគ្រប់គ្រា	។
២១	ព្រះជាអម្ចាស់	ទ្រង់សប្បុរសណាស់	តាមថែរក្សា
	ដល់មនុស្សសុចរិត	គ្រប់ៗអាត្មា	គ្មានឆ្អឹងមួយណា
		ត្រូវបាក់បែកឡើយ	។
២២	អំពើអាក្រក់	ខ្មួលខ្មៅកខ្វក់	នាំឱ្យគេព្រួយ
	រហូតដល់ស្លាប់	មិនមានអ្នកជួយ	គ្មានអ្នកលើកស្ទួយ
		ដល់ក្ស័យជីវិត	។
	អ្នកដែលប្រឆាំង	ប្រយុទ្ធតតាំង	នឹងមនុស្សសុចរិត
	តែងតែទទួល	ទុក្ខទោសពិតៗ	ក្នុងមួយជីវិត
		មិនមានខកខាន	។
២៣	ព្រះម្ចាស់សង្គ្រោះ	ជីវិតទាំងអស់	ដល់អ្នកដែលបាន
	បម្រើព្រះអង្គ	ពឹងផ្អែកផ្ញើប្រាណ	តែងទទួលបាន
		សុខផុតទុក្ខទោស	។

ទំនុកតម្កើងលេខ ៣៥ (៣៤) បទពាក្យ ៧

១	ឱព្រះជាអម្ចាស់ខ្ញុំអើយ	កុំនៅកន្តើយសូមប្រឆាំង
	តទល់អស់អ្នកដែលចង់ច្បាំង	សូមជួយតតាំងកុំសុំចៃ	។
២	ខ្ញុំសូមពឹងផ្អែកលើព្រះអង្គ	មេត្តាសូមទ្រង់កុំឆ្មើងឆ្មៃ
	យកខែលអាវក្រោះតើនឃ្មាតខ្មី	សម្តែងបារមីសង្គ្រោះផង	។
៣	សូមហូតលំពែងនិងពូថៅ	ប្រហារសំដៅពួកយង់ឃ្នង
	សូមមានបន្ទូលមកខ្ញុំផង	មានតែព្រះអង្គព្រះសង្គ្រោះ	។
៤	សូមឱ្យអ្នកដែលចង់ប្រហារ	ជីវិតជីវ៉ារូបខ្ញុំនោះ
	ឱ្យវាខកចិត្តបាក់មុខចុះ	ដល់ក្តីអាម៉ាស់ដកខ្លួនថយ	។
៥	នៅពេលទេវទូតព្រះអម្ចាស់	បណ្តេញគេប្រាសវិលទៅក្រោយ
	សូមឱ្យពួកគេខ្ទាតទៅឆ្ងាយ	ដូចអង្កាមរាយដោយខ្យល់ផាត់	។
៦	ទេវទូតព្រះម្ចាស់ដេញមិនឈប់	ទោះថ្ងៃឬយប់មិនឱ្យបាត់
	ឱ្យផ្លូវធ្លាប់ភ្លឺប្រែងងឹត	ភក់រអិលស្អិតទៅមិនបាន	។
៧	ពួកគេបានដាក់រាយអន្ទាក់	លបពួនចាំស្ទាក់ប៉ងរំខាន
	គេជីករណ្តៅឱ្យធ្លាក់ប្រាណ	ដោយចិត្តសាមាន្យមិនទោរទន់	។
៨	សូមឱ្យពួកគេត្រូវវិនាស	ដោយមិនដឹងច្បាស់ទុកជាមុន
	ឱ្យជាប់អន្ទាក់របស់ខ្លួន	អន្តរាយផ្ទួនៗកុំរំលង	។
៩	ពេលនោះរូបខ្ញុំនឹងត្រេកអរ	រីករាយសាទរអស់មួរហ្មង
	សប្បាយពន់ពេកគ្រានេះម្តង	ព្រោះតែព្រះអង្គជួយសង្គ្រោះ	។
១០	ខ្ញុំសូមក្រាបទូលយ៉ាងជាក់ច្បាស់	ស្មោះឥតក្រឡះអស់ពីពោះ
	គ្មាននរណាដូចព្រះអង្គសោះ	ព្រះអង្គរំដោះអ្នកទន់ខ្សោយ	។
	ទ្រង់ជួយឱ្យរួចផុតពីដៃ	ពួកជនអប្រីយ៍មិនថ្លោះធ្លោយ
	រំដោះអ្នកក្រទុរគតឱ្យ	រួចផុតពីដៃមនុស្សទុច្ចរិត	។
១១	សាក្សីក្លែងក្លាយឈរប្រឆាំង	រារាំងតតាំងដោយប្រឌិត
	ចោទសួរមកខ្ញុំរឿងមិនពិត	ដែលខ្ញុំមិនគិតដល់ទាល់សោះ	។
១២	គេធ្វើអាក្រក់មកតបត	នឹងអំពើល្អខ្ញុំទាំងអស់
	ដែលខ្ញុំបានធ្វើលើគេនោះ	ម្តេចមិនគិតសោះឱ្យទោសពៃរ៍	។
១៣	ពេលដែលពួកគេមានជំងឺ	ចុកចាប់ផ្សាឈឺខ្ញុំលកលៃ
	បន្ទាបទាំងខ្លួនតមចំណី	អង្វររាល់ថ្ងៃឱ្យពួកគេ	។
១៤	ខ្ញុំបានប្រព្រឹត្តអំពើល្អ	ដោយចិត្តស្មោះសរឥតវៀចវេរ
	ដូចធ្វើចំពោះមិត្តភក្តិដែរ	ព្រួយចិត្តឥតល្ហែសោកសង្រេង	។
១៥	តែពេលរូបខ្ញុំមានជំងឺ	គេមកបញ្ឈឺសើចជាល្បែង
	រួមគ្នាប្រឆាំងមិនរអែង	ហែកហួរគ្មានក្រែងមិនឈប់ឡើយ	។
១៦	ពួកគេចូលដៃជនពាលា	ចោមរោមផ្តន្ទាមិនល្ហែល្ហើយ
	មិនឈប់មិនឈរមិនកន្តើយ	មិនបង្អង់ឡើយខាំធ្មេញដាក់	។
១៧	ឱព្រះអម្ចាស់ម្តេចព្រងើយ	ម្តេចទ្រង់មិនជួយផុតគ្រោះថ្នាក់
	ជួយការពារខ្ញុំកុំឱ្យធ្លាក់	ទៅក្នុងអន្ទាក់ពួកសិង្ហសត្វ	។
១៨	ខ្ញុំសូមថ្លែងពាក្យអរព្រះគុណ	ព្រះអម្ចាស់ធ្ងន់មិនឱ្យស្ងាត់
	សរសើរតម្កើងពន់ពេកក្តាត់	ព្រះតែមួយគត់នៃប្រជា	។
១៩	សូមកុំបណ្តោយឱ្យសត្រូវ	ខ្ញុំបានរស់នៅដោយសុខា
	កុំឱ្យអ្នកស្អប់ខ្ញុំផន្ទា	ពេបជ្រាយលេលាដាក់រូបខ្ញុំ	។
២០	ពួកគេមិនដែលនិយាយល្អ	ចេះតែភូតភរចងគំនុំ
	ប្រឌិតរឿងផ្សេងទោះតូចធំ	ចោទអ្នកសន្សំសុខក្នុងស្រុក	។
២១	ពួកគេពោលពាក្យចោទដាក់ទោស	ថាខ្ញុំធ្វើខុសឱ្យកើតទុក្ខ
	គេស្រែកចំអកដាក់នឹងមុខ	ថាខ្ញុំគម្រក់គេឃើញហើយ	។
២២	ឱព្រះអម្ចាស់ទតឃើញស្រាប់	សូមទ្រង់ត្រងត្រាប់កុំកន្តើយ
	ឱព្រះអង្គអើយជួយឱ្យស្បើយ	កុំទៅណាឆ្ងាយពីរូបខ្ញុំ	។
២៣	ឱព្រះអម្ចាស់សូមតើនឡើង	កុំនៅឆ្មៃឆ្មើងពួនសំងំ
	សូមរកយុត្តិធម៌ឱ្យរូបខ្ញុំ	កុំបីបង្អង់សូមជួយផង	។
២៤	ឱព្រះម្ចាស់នៃទូលបង្គំ	សូមជួយរូបខ្ញុំសុចរិតត្រង់
	កុំបណ្តោយខ្ញុំឱ្យមួរហ្មង	គេសប្បាយផងព្រោះតែឈ្នះ	។
២៥	កុំឱ្យគេនាំគ្នាពោលថា	ខ្ញុំនេះចាញ់ជាប្រាកដណាស់
	កុំឱ្យវាពោលពាក្យផ្តេសផ្តាស	ថាអាចបោកប្រាសរូបខ្ញុំបាន	។
២៦	សូមឱ្យអស់អ្នកដែលសប្បាយ	រីករាយក្អាកក្អាយទាំងប៉ុន្មាន
	ត្រូវអាម៉ាស់មុខទុក្ខពេញប្រាណ	កិត្តិយសប៉ុន្មានត្រូវបាត់អស់	។
២៧	រីអ្នកដែលបានរកយុត្តិធម៌	សុចរិតបវរឱ្យខ្ញុំនោះ
	ឱ្យគេពោលពាក្យថ្កើងព្រះម្ចាស់	អ្នកបម្រើព្រះបានសុខសាន្ត	។
២៨	ពេលនោះខ្ញុំនឹងថ្លែងអំពី	សុចរិតគ្រប់ទីព្រះថ្កើងថ្កាន
	តម្កើងព្រះអង្គខ្ពស់ហួសស្មាន	ខ្ពស់ហួសអស់ស្ថានរៀងរាល់ថ្ងៃ	។

ទំនុកតម្កើងលេខ ៣៦ (៣៥) បទកាកគតិ

២	ខ្ញុំនឹកឃើញអស់	ពាក្យពោលទ្រគោះ	របស់ជនពាល
	ក្នុងពេលបះបោរ	ចាក់រុកឆ្កឹះឆ្កៀល	ប្រមាថតិះដៀល
		មិនកោតខ្លាចព្រះ	។
៣	គេពោលបញ្ចើច	បញ្ចើសំណើច	ថាខ្លួនគ្រាន់ណាស់
	មិនទទួលដឹង	ថាមានកំហុស	អំពើបាបនោះ
		គួរស្អប់ពេកក្រៃ	។
៤	គេពោលអាក្រក់	ពាក្យភូតកុហក	បោកប្រាសរាល់ថ្ងៃ
	គេលែងស្គាល់ខុស	ស្គាល់ត្រូវជាអ្វី	ពាលាអប្រីយ៍
		ប្រព្រឹត្តយង់ឃ្នង	។
៥	ពេលគេនិន្ទ្រា	ក៏គេនាំគ្នា	រិះគិតគ​ម្រោង
	អំពើអាក្រក់	មិនព្រមលះបង់	មានៈមិនត្រង់
		ដើរផ្លូវមិនល្អ	។
៦	បពិត្រព្រះម្ចាស់	ហឫទ័យល្អណាស់	ខ្ពង់ខ្ពស់ស្មោះសរ
	សប្បុរសស្មោះស្ម័គ្រ	ដោយមេត្តាធម៌	ខ្ពស់ស្មើព្ធដ៏
		វេហាស៍អាកាស	។
៧	ព្រះហឫទ័យ	សុចរិតប្រពៃ	ត្រចង់ត្រចះ
	តម្រិះព្រះអង្គ	ជ្រាលជ្រៅខ្លាំងណាស់	ទ្រង់ជាអម្ចាស់
		សង្គ្រោះមនុស្សសត្វ	។
៨	បពិត្រព្រះម្ចាស់	ទ្រង់សប្បុរសណាស់	ករុណាអាណិត
	ហឫទ័យព្រះអង្គ	ខ្ពង់ខ្ពស់ពេកក្តាត់	ទាំង​មនុស្សទាំងសត្វ
		ជ្រកក្រោមបារមី	។
៩	ព្រះអង្គបានផ្តល់	អាហារស្កប់ស្កល់	ឱ្យជនប្រុសស្រី
	ពីព្រះដំណាក់	មានម្ហូបចំណី	ហូរហៀរពេកក្រៃ
		ឆីតាមសប្បាយ	។
១០	ទ្រង់ជាប្រភព	ជីវិតសព្វគ្រប់	ទាំងរូបទាំងកាយ
	ឱ្យខ្ញុំមានភ្នែក	មើលឃើញវែងឆ្ងាយ	ពន្លឺពណ្ណរាយ
		របស់ព្រះអង្គ	។
១១	សូមទ្រង់ករុណា	ផ្តល់ក្តីមេត្តា	ដល់អ្នកទៀងត្រង់
	សម្តែងហឫទ័យ	សុចរិតត្រចង់	ដល់អស់អ្នកផង
		ស្គាល់ទ្រង់តទៅ	។
១២	សូមកុំឱ្យមនុស្ស	កោងកាចទុយ៌ស	មិនដឹងខុសត្រូវ
	ព្រមទាំងជនពាល	អាក្រក់ឃោរឃៅ	បណ្តេញខ្ញុំទៅ
		ឆ្ងាយពីព្រះអង្គ	។
១៣	ជនដែលប្រព្រឹត្ត	អំពើទុច្ចរិត	ចិត្តវៀចមិនត្រង់
	ត្រូវបរាជ័យ	មិនអាចស្រោចស្រង់	ទោះបីជាចង់
		ក៏ងើបពុំរួច	។

ទំនុកតម្កើងលេខ ៣៧ (៣៦) បទព្រហ្មគីតិ

១	សូមកុំចងកំហឹង	ច្រណែននឹងអ្នកប្រព្រឹត្ត
	អំពើទុច្ចរិត	និងចូលចិត្តពោលមុសា	។
២	ដ្បិតគេនឹងវិនាស	មិនអាចចៀសផុតឡើយណា
	ប្រៀបដូចស្មៅឬផ្កា	អស់ខ្លឹមសារស្រពោនស្វិត	។
៣	ចូរធ្វើអំពើល្អ	ចិត្តស្មោះសរផ្ញើជីវិត
	លើព្រះដ៏សក្តិសិទ្ធ	នោះអ្នកពិតជាសុខសាន្ត	។
៤	ចូរស្វែងរកមង្គល	កុំបីខ្វល់ឬខកខាន
	ព្រះអង្គនឹងប្រទាន	ឱ្យអ្នកមានតាមបំណង	។
៥	ចូរផ្ញើព្រេងវាសនា	ក្នុងហត្ថាព្រះអង្គផង
	ព្រះអង្គនឹងគ្រប់គ្រង	ឥតមានហ្មងតាមសន្យា	។
៦	ព្រះអង្គនឹងបង្ហាញ	ឱ្យគេឃើញយ៉ាងច្បាស់ថា
	អ្នកសុចរិតថ្លៃថ្លា	ដូចសុរិយាពេញរស្មី	។
៧	ចូរស្ងប់ស្ងៀមចំពោះ	ព្រះភក្ត្រព្រះអម្ចាស់ថ្លៃ
	កុំខឹងច្រណែនអី	នឹងជោគជ័យមនុស្សសុចរិត	។
៨	កំហឹងចោលឱ្យឆ្ងាយ	ក្តៅក្រហាយត្រូវឈប់គិត
	ព្រោះនាំឱ្យខូចចិត្ត	នាំគំនិតកករល្អក់	។
៩	ព្រះម្ចាស់នឹងកាត់កាល់	អស់អ្នកដែលធ្វើអាក្រក់
	តែអ្នកសង្ឃឹមជាក់	ទៅលើព្រះនឹងបានកេរ	។
១០	នៅតែបន្តិចទៀត	មនុស្សមានស្នៀតមិនមានទេ
	ទោះអ្នកខំរិះរេ	រកមើលគេក៏គ្មានអ្វី	។
១១	មនុស្សស្លូតស្មោះសរ	គេនឹងទទួលទឹកដី
	ជាមរតកប្រពៃ	លែងព្រួយភ័យបានសុខសាន្ត	។
១២	ជនពាលតែងឃុបឃិត	រឿងឧក្រិដ្ឋចិត្តសាមាន្យ
	ប្រឆាំងឥតស្រាកស្រាន្ត	ទៅរំខានមនុស្សសុចរិត	។
១៣	តែព្រះម្ចាស់ចំអក	ដាក់ឱ្យពួកជនឧក្រិដ្ឋ
	ព្រះអង្គជ្រាបរឿងពិត	ព្រោះគេជិតវិនាសហើយ	។
១៤	គេខំហូតធ្នូដាវ	យ៉ាងសាហាវមិនកន្តើយ
	ប្រហារមិនទុកឡើយ	អ្នកខ្សត់ខ្សោយទុរគតត្រង់	។
១៥	ប៉ុន្តែដាវពួកគេ	នឹងវិលរេបែរតម្រង់
	ចាក់ទម្លុះបេះដូង	គេតែម្តងមិនរារែក	។
១៦	ទ្រព្យនៃជនសុចរិត	តិចមែនពិតតែល្អឯក
	ប្រសើរជាពន់ពេក	ជាងសម្បត្តិមនុស្សអាក្រក់	។
១៧	ព្រះអង្គនឹងទម្លាក់	កាច់បំបាក់មនុស្សគម្រក់
	តែទ្រង់បែរថ្នមថ្នាក់	ថែទាំអ្នកដែលសុចរិត	។
១៨	ព្រះម្ចាស់យកព្រះទ័យ	ទុកដាក់ក្រៃនឹងជីវិត
	រក្សាមិនឱ្យបាត់	នៅស្ថេរស្ថិតជាកេរកោះ	។
១៩	នៅពេលមានអាសន្ន	គេមិនស្លន់ឬអាម៉ាស់
	មានអាហារមិនខ្វះ	ទោះប្រទះគ្រោះទុរ្ភិក្ស	។
២០	រីឯមនុស្សអាក្រក់	ចិត្តគម្រក់ទ្រង់មិននឹក
	សត្រូវច្រើនសន្ធឹក	ជួបវរវឹកវិនាសអស់	។
២១	បើមនុស្សពាលខ្ចីអ្វី	មិនដែលលៃសងវិញសោះ
	រីអ្នកសុចរិតស្មោះ	ចេះរំដោះទ្រព្យឥតស្តាយ	។
២២	អ្នកដែលព្រះអម្ចាស់	តែងសន្តោសប្រោសប្រណី
	ទ្រង់ប្រទានពរជ័យ	ទាំងទឹកដីទុកជាកេរ	។
	រីអ្នកដែលមិនគាប់	មិនសំណព្វទ្រង់បង្វែរ
	បណ្តាសាទៅគេ	មិនទុកទេទ្រង់កាត់ចិត្ត
២៣	ព្រះម្ចាស់បានពង្រឹង	ជំហរនឹងមនុស្សសុចរិត
	ឱ្យបានមាំមួនពិត	រួចទ្រង់គិតសព្វព្រះទ័យ	។
២៤	ទោះបីបើគេភ្លាត់	ជើងមិនស្ទាត់ក៏មិនភ័យ
	មិនដួលធ្លាក់ដល់ដី	ព្រោះបារមីព្រះអម្ចាស់	។
២៥	តាំងពីខ្ញុំក្មេងខ្ចី	មិនដឹងអីលុះចំណាស់
	មិនដែលឃើញព្រះម្ចាស់	ទ្រង់បង់បោះអ្នកសុចរិត	។
២៦	មនុស្សស្លូតទៀងត្រង់	ឥតសៅហ្មងតែងអាណិត
	អាសូរញាតិឆ្ងាយជិត	គ្មានគំនិតគៃកឹបទេ	។
២៧	ចូរកុំធ្វើអាក្រក់	រឿងគម្រក់កុំទៅក្បែរ
	នោះអ្នកនឹងស្ថិតស្ថេរ	លើដីកេរតរៀងទៅ	។
២៨	ព្រះម្ចាស់សព្វព្រះទ័យ	ពន់ពេកក្រៃគ្មានហ្មងសៅ
	យុត្តិធម៌ត្រង់ត្រឹមត្រូវ	តរៀងទៅទ្រង់មិនភ្លេច	។
	ព្រះអង្គមិនបង់បោះ	គេទាំងនោះដោយកលល្បិច
	ព្រះអង្គជាន់ពន្លិច	វិនាសខ្ទេចពូជអាក្រក់	។
២៩	អ្នកត្រង់នឹងទទួល	ដីនិមលជាកេរកោះ
	ជីវិតគេនឹងរស់	លើដីនោះរហូតទៅ	។
៣០	មនុស្សសុចរិត	គេចូលចិត្តត្រង់ត្រឹមត្រូវ
	ពោលពាក្យមិនអាស្រូវ	ឥតហ្មងសៅឥតងាករេ	។
៣១	វិន័យព្រះអម្ចាស់	ដិតជាប់ច្បាស់ក្នុងចិត្តគេ
	មិនឃ្លាតចាកបែកបែរ	ពីមាគ៌ាព្រះអង្គឡើយ	។
៣២	ពួកពាលចាំឃ្លាំមើល	យ៉ាងងងើលមិនកន្តើយ
	លើមនុស្សសុចរិតហើយ	មិនព្រងើយរកសម្លាប់	។
៣៣	ប៉ុន្តែព្រះអម្ចាស់	មិនបង់បោះឱ្យគេស្លាប់
	ធ្លាក់ចូលដោយមិនប្រាប់	ជាចំណាប់ជនអាក្រក់	។
៣៤	ចូរសង្ឃឹមទុកចិត្ត	ផ្ញើជីវិតកុំដំអក់
	លើព្រះដ៏សប្បុរស	ទ្រង់នឹងប្រោសហើយលើកអ្នក	។
	ឱ្យគ្រប់គ្រងលើដី	មរតកថ្លៃប្រាកដជាក់
	អ្នកនឹងឃើញប្រត្យក្ស	មនុស្សអាក្រក់កាត់កាល់ចោល	។
៣៥	ខ្ញុំឃើញជនបាបកាច	ប្រើអំណាចបែបកំរោល
	គេលូតលាស់ឡើងថ្គោល	ដូចដើមឈើស្លឹកខៀវខ្ចី	។
៣៦	ក្រោយមកគេរលាយ	សូន្យទៅឆ្ងាយមិនសល់អ្វី
	ខ្ញុំខំរករំពៃ	មិនឃើញអ្វីទាល់តែសោះ	។
៣៧	ចូរមើលមនុស្សទៀងត្រង់	មិនវៀចវង់ពិតជាស្មោះ
	សន្សំសុខទាំងអស់	ខាងមុខនោះនឹងរុងរឿង	។
៣៨	រីឯពួកមនុស្សបាប	ដូចភ្លើងឆាបឬខ្យល់ប៉ើង
	ព្រះអង្គកាត់ពូជពង្ស	ពួកមនុស្សពាលទមិឡចោលចេញ	។
៣៩	ព្រះម្ចាស់តែងសង្គ្រោះ	មនុស្សទាំងអស់ឥតទោរម្នេញ
	ជាកំពែងពោរពេញ	ការពារពាំងគ្រាអាសន្ន	។
៤០	ព្រះអម្ចាស់សង្គ្រោះ	និងរំដោះមិនភាំងភាន់
	សង្គ្រោះគេបន្ទាន់	ព្រោះជ្រកកោនក្រោមបារមី	។

ទំនុកតម្កើងលេខ ៣៨ (៣៧) បទពាក្យ ៧

២	ឱព្រះជាអម្ចាស់ខ្ញុំអើយ	សូមកុំកន្តើយដាក់ទោសខ្ញុំ
	សូមកុំពិរោធហើយគួនគុំ	សូមដាក់ទោសខ្ញុំតាមកំហុស	។
៣	ព្រួញនៃព្រះអង្គខ្ញុំចុកចាប់	ឈឺស្ទើរតែស្លាប់គ្មានស្រណោះ
	ព្រះហស្តសង្កត់មិនព្រមប្រោស	រូបខ្ញុំធ្វើខុសសែនឈឺផ្សា	។
៤	ពេលដែលព្រះទ្រង់អង្គពិរោធ	ខ្ញុំឈឺចាក់ដោតឥតឧបមា​
	ឆ្អឹងឆ្អែងពុកផុយអស់ហើយណា	ព្រោះមានវេរាបាបអនេក	។
៥	មែនហើយខ្ញុំខុសច្រើនពេកពន់	រហូតជោរជន់ស្ទើរដល់មេឃ
	ហាក់ដូចបន្ទុកធ្ងន់អនេក	ទ្រូងខ្ញុំស្ទើរបែកស្រែកមិនបាន	។
៦	របួសខ្ញុំក្លាយជាដំបៅ	រលួយយូរទៅស្អុយពេញប្រាណ
	ព្រោះគំនិតខ្ញុំដូចតិរច្ឆាន	លេលាសាមាន្យមិនសមសួន	។
៧	ទូលបង្គំឈឺចាប់យ៉ាងខ្លាំង	រហូតចំកោងអស់ទាំងខ្លួន
	ទុក្ខធ្ងន់ក៏ធ្លាក់មកផ្ទួនៗ	ស្ថិតនៅខ្ជាប់ខ្ជួនពេញមួយថ្ងៃ	។
៨	ខ្ញុំសែនរងារក្តៅទាំងប្រាណ	ទ្រាំស្ទើរមិនបានសព្វរាងកាយ
	ឈឺចុកចាប់ណាស់ព្រះម្ចាស់អើយ	ស្លាប់ឥឡូវហើយសូមមេត្តា	។
៩	ខ្ញុំអស់កម្លាំងហេវខ្សោះល្វើយ	ស្រែកហៅខ្វើយៗញ័រកាយា
	ខ្ញុំស្រែកថ្ងូរថ្ងួចចុកពើតផ្សា	ឈឺឥតឧបមាស្ទើរក្ស័យប្រាណ	។
១០	បពិត្រព្រះម្ចាស់អើយព្រះអង្គ	ឈ្វេងយល់ចិត្តប៉ងទាំងប៉ុន្មាន
	ទ្រង់សណ្តាប់ខ្ញុំមិនដែលខាន	សំឡេងខ្ញុំបានថ្ងូរស្រែកហៅ	។
១១	បេះដូងខ្ញុំចាប់ផ្តើមញាប់ញ័រ	ឯកម្លាំងក៏ចុះខ្សោយទៅ
	ភ្នែកប្រែស្រវាំងថាមិនត្រូវ	ទោះជាមើលផ្លូវក៏មិនបាន	។
១២	មិត្តភក្តិទាំងអ្នកធ្លាប់ជិតស្និទ្ធ	មិនហ៊ានចូលជិតនាំរំខាន
	ព្រោះខ្លាចដំបៅសព្វទាំងប្រាណ	ទោះញាតិសន្តានក៏គេចឆ្ងាយ	។
១៣	ពួកគេចាំឃ្លាំចាប់ប្រហារ	ឱ្យខ្ញុំមរណាគេសប្បាយ
	គេដាក់អន្ទាក់សើចក្អាកក្អាយ	ឱ្យខ្ញុំអន្តរាយវិនាសបង់	។
១៤	ខ្ញុំធ្វើមិនឮសព្វអ្វីៗ	ទោះជិតឆ្ងាយក្តីដូចមនុស្សថ្លង់
	មាត់មិននិយាយចិត្តមិនចង់	ធ្វើដូចមនុស្សល្ងង់គមិនស្តី	។
១៥	រូបខ្ញុំដូចជាមនុស្សដែលឈឺ	អ្នកមានជំងឺមិនឮអ្វី
	និយាយមិនរួចពិបាកក្រៃ	ទោះជាចង់ស្តីក៏មិនបាន	។
១៦	បពិត្រព្រះម្ចាស់ខ្ញុំសូមថ្វាយ	ទាំងជីវិតកាយទាំងអង្គប្រាណ
	ព្រះម្ចាស់ជាព្រះដ៏ថ្កើងថ្កាន	ទ្រង់តបមិនខានឆ្លើយមកខ្ញុំ	។
១៧	សូមកុំបណ្តោយឱ្យពួកខ្មាំង	សប្បាយចិត្តខ្លាំងពេលខ្ញុំយំ
	វេទនាឈឺចាប់រងទុក្ខធំ	ឬឃើញរូបខ្ញុំទន់ជើងដួល	។
១៨	ខ្ញុំធ្លាក់ខ្លួនស្គមស្គាំងរីងរៃ	ទុក្ខព្រួយរាល់ថ្ងៃទ្រូងឆាបឆួល
	ឈឺចាប់ជានិច្ចឥតប្រែប្រួល	ខ្លួនខ្ញុំចង់ដួលកាយទោរទន់	។
១៩	ពេលនេះរូបខ្ញុំសុំសារភាព	កំហុសទោសបាបកាលគ្រាមុន
	ទុក្ខព្រួយក្នុងចិត្តច្រើនពេកពន់	ដូចលីសែងធ្ងន់ព្រោះបាបកម្ម	។
២០	ឯខ្មាំងសត្រូវខ្ញុំទាំងអស់	សាច់ឈាមស្រស់បស់រាងកាយមាំ
	អស់អ្នកដែលធ្លាប់ស្អប់រូបខ្ញុំ	គេចូលមកផ្តុំគ្នាច្រើនណាស់	។
២១	ពួកអ្នកដែលប្រព្រឹត្តមិនល្អ	នាំគ្នាឈូឆរមីរដេរដាស
	ចោទប្រកាន់ខ្ញុំឥតអៀនខ្មាស	ព្រោះរូបខ្ញុំនេះខំធ្វើល្អ	។
២២	ឱព្រះម្ចាស់អើយកុំបង់បោះ	ចោលខ្ញុំឱ្យរស់ទាំងត្រដរ
	មេត្តារូបខ្ញុំសូមអង្វរ	កុំយាងចេញចរខ្ញុំខ្លោចផ្សារ	។
២៣	ឱព្រះអម្ចាស់ព្រះសង្គ្រោះ	សូមជួយឱ្យរស់ផុតមរណា
	យាងមកឆាប់ៗស្រង់សង្ខារ	នោះទើបជីវ៉ាផុតក្សិណក្ស័យ	។

ទំនុកតម្កើងលេខ ៣៩ (៣៨) បទកាកគតិ

២	ខ្ញុំនឹកគិតថា	នូវគ្រប់កិច្ចការ	ដែលខ្ញុំប្រព្រឹត្ត
	ខ្ញុំត្រូវប្រយ័ត្ន	ខ្លាចមនុស្សឆ្ងាយជិត	នាំបាបឧក្រិដ្ឋ
		ឱ្យខ្លួនអប្រិយ៍	។
	ខ្ញុំខ្លាចមានបាប	អាក្រក់ឆ្អេះឆ្អាប	ដោយពាក្យសម្តី
	ដរាបណាមនុស្ស	ទុយ៌សព្រៃផ្សៃ	នៅក្បែររាល់ថ្ងៃ
		ខ្ញុំមិនស្តីទេ	។
៣	ខ្ញុំតែងបិទមាត់	ទោះបីឃើញគាត់	ចម្រើនឡើងទ្វេ
	ខ្ញុំមិននិយាយ	មិនចេញស្តីទេ	ដូច្នេះកាន់តែ
		ឈឺចាប់ខ្លាំងក្រៃ	។
៤	ខ្ញុំក្តៅចិត្តខ្លាំង	ដូចជាមានភ្លើង	ឆាបឆេះក្នុងកាយ
	រហូតលែងទ្រាំ	តទៅទៀតហើយ	ខ្ញុំក៏ដង្ហោយ
		ស្រែកពោលឡើងថា	។
៥	ឱព្រះម្ចាស់អើយ	សូមសម្តែងឱ្យ​	ខ្ញុំដឹងអាត្មា
	ថាជីវិតខ្ញុំ	មានដល់ត្រឹមណា	ចុះតើសង្ខារ
		ផុយយ៉ាងដូចម្តេច?	។
៦	ព្រះម្ចាស់នាំយក	កំណើតខ្ញុំមក	ដូចទឹកច្រើនតិច
	ដក់លើស្លឹកឈូក	ជួនងើបជួនលិច	តាមខ្យល់ខ្លាំងតិច
		ដែលបានបោកបក់	។
	ជីវិតសត្វលោក	ដែលបានកើតមក	ចំពោះព្រះភក្ត្រ
	អាយុសង្ខារ	នៃជនម្នាក់ៗ	ប្រៀបបានខ្យល់បក់
		មួយដង្ហើមខ្លី	។
៧	ជីវិតអណ្តែត	រសាត់ត្រសែត	គ្មានគោលដៅអ្វី
	ដូចជាស្រមោល	តាមប្រាណរាល់ថ្ងៃ	ទោះធ្វើអ្វីៗ
		ក៏ឥតបានការ	។
	គេប្រមូលទ្រព្យ	សម្បត្តិគួរគាប់	នៅក្បែរអាត្មា
	តែគេពុំដឹង	ទ្រព្យសព្វប្រការ	បានលើនរណា
		នៅគ្រាចុងក្រោយ	។
៨	ឱព្រះអម្ចាស់	បើសិនដូច្នោះ	ម្តេចទ្រង់បណ្តោយ
	ឱ្យទូលបង្គំ	ពឹងអ្វីថ្ងៃក្រោយ	មានតែទ្រង់ហើយ
		ដែលខ្ញុំសង្ឃឹម	។
៩	សូមជួយរំដោះ	ឱ្យខ្ញុំផុតគ្រោះ	រួចពីបាបកម្ម
	ដែលខ្ញុំបានសាង	យូរថ្ងៃខែឆ្នាំ	កុំទុកឱ្យខ្ញុំ
		ត្រូវគេមើលងាយ	។
១០	ខ្ញុំស្ងៀមមិនស្តី	មិននិយាយអ្វី	នាំចិត្តរាយមាយ
	ស៊ូសំងំស្ងៀម	បៀមទុកក្នុងកាយ	ដ្បិតព្រះអង្គហើយ
		ដាក់ទោសរូបខ្ញុំ	។
១១	សូមទ្រង់មេត្តា	កុំដាក់ទោសា	មកទូលបង្គំ
	ខ្ញុំស្ទើរតែស្លាប់	ឈឺចាប់អួលងំ	កើតទុក្ខរណ្តំ
		ព្រោះព្រះអង្គវាយ	។
១២	ពេលទ្រង់ប្រដៅ	មនុស្សល្ងង់ខ្លៅ	មិនដឹងសេចក្តី
	ព្រះអង្គធ្វើឱ្យ	របស់ទាំងឡាយ	វិនាសអន្តរាយ
		អស់មិនសល់ទេ	។
១៣	ឱព្រះម្ចាស់អើយ	កុំគង់កន្តើយ	សណ្តាប់កុំប្រែ
	ពាក្យខ្ញុំអង្វរ	មានជាហូរហែ	កុំក្រឡះកែ
		គេចបែរពីខ្ញុំ	។
	សូមកុំព្រងើយ	ពេលនេះឯងហើយ	ស្តាប់ទំនួញយំ
	ខ្ញុំគ្រាន់តែស្នាក់	មានអ្វីមិនសម	ដូចបុព្វបុរសខ្ញុំ
		ពេលមុនប៉ុណ្ណោះ	។
១៤	សូមបែរភក្ត្រា	ដោយក្តីមេត្តា	ឱ្យខ្ញុំស្រឡះ
	ផុតទុក្ខសោយសោក	បាបកម្មដ៏ក្រាស់	មុនរូបខ្ញុំនេះ
		លាចាកលោកទៅ	។

ទំនុកតម្កើងលេខ ៤០ (៣៩) បទពាក្យ ៧

២	ខ្ញុំខំព្យាយាមចាំព្រះម្ចាស់	ព្រះអង្គបានប្រោសព្រះកាណ៌ផ្ទៀង
	ស្តាប់សូរសម្រែកមិនលំអៀង	ពាក្យខ្ញុំពិតទៀងស្មោះឥតអាក់	។
៣	ព្រះអង្គយកខ្ញុំពីរណ្តៅ	ពីភក់ជ្រាំជ្រៅយកមកដាក់
	នៅលើថ្មដាគ្មានថ្នាំងថ្នាក់	ថែទាំទុកដាក់ខ្ញុំរុងរឿង	។
៤	ព្រះអង្គប្រទានខ្ញុំឱ្យច្រៀង	បទថ្មីសំនៀងលើកតម្កើង
	មនុស្សច្រើននឹងឃើញក្អាកក្អាយឡើង	ព្រះម្ចាស់ថ្កុំថ្កើងគេកោតខ្លាច	។
៥	ជនណាដែលបានផ្ញើជីវិត	លើព្រះមានឫទ្ធិដ៏អង់អាច
	មិនបែរគោរពទៅខ្លបខ្លាច	ព្រះមានអំណាចព្រះបោកប្រាស	។
៦	បពិត្រព្រះម្ចាស់ព្រះនៃខ្ញុំ	ព្រះអង្គឧត្តមប្រសើរណាស់
	ការអស្ចារ្យទ្រង់ច្រើនដេរដាស	ជាព្រះសង្គ្រោះមិនបែកបែរ	។
	ព្រះអង្គក៏មានគម្រោងការ	ច្រើនឥតឧបមាឥតងាករេ
	គ្មាននរណាស្មើព្រះអង្គទេ	ការអស្ចារ្យទ្វេរាប់មិនអស់	។
៧	ព្រះអង្គមិនចង់បានតង្វាយ	យញ្ញបូជាថ្វាយអ្វីទាល់សោះ
	ទ្រង់បើកត្រចៀកខ្ញុំទាំងអស់	ស្តាប់ព្រះតម្រិះនៃព្រះអង្គ	។
៨	ដូច្នេះរូបខ្ញុំសូមពោលថា	បពិត្រករុណាដ៏ឧត្តុង្គ
	ខ្ញុំប្រព្រឹត្តតាមឥតរេរង់	តាមសេចក្តីក្នុងព្រះគម្ពីរ	។
៩	ខ្ញុំសែនពេញចិត្តធ្វើតាមព្រះ	ហឫទ័យអម្ចាស់គ្រប់ទិសទី
	វិន័យទ្រង់ដិតជាប់ជីវី	ក្នុងចិត្តគិតពីទ្រង់ជានិច្ច	។
១០	ខ្ញុំនឹងប្រកាសធម៌មេត្តា	ធម៌ករុណាធម៌សុចរិត
	ព្រះអង្គជ្រាបហើយទ្រង់អាណិត	ខ្ញុំថ្លាថ្លែងឥតឈរឈប់សោះ	។
១១	ខ្ញុំមិនលាក់ទេក្តីសុចរិត	ទុកក្នុងដួងចិត្តតែងប្រកាស
	ព្រះហឫទ័យនៃព្រះអម្ចាស់	ដែលបានសង្គ្រោះទូលបង្គំ	។
	រូបខ្ញុំពុំបាននៅស្ងាត់ស្ងៀម	សំងំអឹមអៀនក្នុងប្រជុំ
	ពីព្រះហឫទ័យដ៏ឧត្តម	ព្រះម្ចាស់ដ៏ធំលើលោកា	។
១២	បពិត្រព្រះម្ចាស់តែងអាណិត	អាសូរពេកពិតករុណា
	ខ្ញុំមិនឈប់ទេថ្លែងវាចា	ពីព្រះមេត្តាដ៏ស្មោះត្រង់	។
១៣	ទុក្ខលំបាកច្រើនឥតគណនា	រួមរឹតអាត្មាមិនរេរង់
	កំហុសខ្ញុំផ្ទាល់តាមញុះញង់	ឥតមានបង្អង់គ្មានប្រណី	។
	ធ្វើឱ្យរូបខ្ញុំប្រែងងឹត	មើលមិនឃើញពិតសព្វអ្វីៗ
	កំហុសខ្ញុំមានច្រើនពេកក្រៃ	ច្រើនជាងសរសៃសក់ទៅទៀត	។
១៤	ឱព្រះអម្ចាស់សូមរំដោះ	រូបខ្ញុំឱ្យរស់កុំបីឃ្លាត
	យាងមកសង្គ្រោះកុំរវាត	ជួយប្រោសម្តងទៀតឱ្យបានរស់	។
១៥	ឱ្យអ្នកដែលចង់ដកជីវិត	ជួបភាពងងឹតរងទុក្ខទោស
	សប្បាយព្រោះឃើញខ្ញុំរងគ្រោះ	បាក់មុខអាប់យសដកខ្លួនថយ	។
១៦	សូមឱ្យអស់អ្នកដែលពេបជ្រាយ	ចំអកមើលងាយជាញឹកញយ
	ត្រូវអាម៉ាស់មុខទាំងមុខក្រោយ	រួចហើយសូមឱ្យបរាជ័យ	។
១៧	រីឯអស់អ្នកដែលស្វែងស្វះ	រកព្រះអម្ចាស់បានរីករាយ
	ថ្លែងឥតឈប់ឈរអរក្អាកក្អាយ	យើងខ្ញុំឱនកាយថ្កើងព្រះអង្គ	។
១៨	រូបខ្ញុំជាមនុស្សក្រីក្រពិត	តែព្រះគូរគិតខ្ញុំឥតហ្មង
	ព្រះអង្គតែងតែជួយចម្លង​	សង្គ្រោះសណ្តោងមិនដែលខាន	។

ទំនុកតម្កើងលេខ ៤១ (៤០) បទកាកគតិ

២	អ្នកដែលយកចិត្ត	នឹងមនុស្សកម្សត់	ទុរគតក្រីក្រ
	នឹងបានក្តីសុខ	សិរីបវរ	ពេលអាសន្នក្រ
		ព្រះនឹងរំដោះ	។
៣	ទ្រង់នឹងរក្សា	អាយុសង្ខារ	ឱ្យផុតពីគ្រោះ
	ហើយឱ្យអ្នកនោះ	បានសុខឥតមោះ	មង្គលឥតខ្ចោះ
		នៅលើផែនដី	។
	ទ្រង់មិនបណ្តោយ	ឱ្យរូបគេធ្លោយ	ធ្លាក់ទៅក្នុងដៃ
	ពួកមនុស្សខិលខូច	កោងកាចព្រៃផ្សៃ	ជនពាលចង្រៃ
		ទាំងនោះបានឡើយ	។
៤	ទ្រង់រក្សាថែ	ថ្នាក់ថ្នមរូបគេ	មិននៅកន្តើយ
	ពេលឈឺចុកចាប់	នឹងបានធូរស្បើយ	ទ្រង់មិនបណ្តោយ
		ឱ្យគេគ្រាំគ្រា	។
៥	ខ្ញុំតែងតែនឹក	រាល់ល្ងាចយប់ព្រឹក	នឹកគ្រប់វេលា
	ឱព្រះម្ចាស់អើយ	សូមទ្រង់មេត្តា	ដ្បិតខ្ញុំនេះណា
		សាងបាបដ៏ធ្ងន់	។
៦	សត្រូវរបស់	ខ្ញុំនេះទាំងអស់	នាំគ្នារិះគន់
	និយាយអាក្រក់	រួចគេបែរបន់	ឱ្យរូបខ្ញុំសូន្យ
		វិនាសបង់ទៅ	។
៧	អ្នកដែលបានមក	សាកសួរសុខទុក្ខ	ចិត្តគេអាស្រូវ
	គេមកប្រមូល	ដំណឹងមិនត្រូវ	លុះពេលចេញទៅ
		និយាយបរិហារ	។
៨	អស់អ្នកដែលស្អប់	និយាយខ្សៀវខ្សឹប	ដាក់គ្រប់គ្នីគ្នា
	ពីទូលបង្គំ	រូបខ្ញុំនេះថា	នឹងរងវេទនា
		រហូតដល់ក្ស័យ	។
៩	គេពោលឡើងថា	ឈឺមើលមិនជា	រស់នៅធ្វើអ្វី
	គាត់ក្រោកពុំរួច	រស់មិនប្រពៃ	នាំធ្ងន់ផែនដី
		គួរតែស្លាប់ទៅ	។
១០	សូម្បីមិត្តភក្តិ	ធ្លាប់ស្និទ្ធស្មោះស្ម័គ្រ	ក៏គេមិនត្រូវ
	បែរមកប្រឆាំង	ដូចខ្មាំងសត្រូវ	ធា្លប់ដើររួមផ្លូវ
		រួមតុអាហារ	។
១១	ព្រះអម្ចាស់អើយ	សូមកុំកន្តើយ	ប្រោសខ្ញុំឱ្យជា
	ខ្ញុំនឹងតបត	ទៅលើពួកវា	សូមទ្រង់ករុណា
		ឱ្យខ្ញុំសមចិត្ត	។
១២	បើសិនពួកខ្មាំង	លែងមកប្រឆាំង	នោះខ្ញុំនឹកគិត
	ថាព្រះអម្ចាស់	ស្រឡាញ់ខ្ញុំពិត	ព្រោះបច្ចាមិត្ត
		ត្រូវបរាជ័យ	។
១៣	ព្រះអង្គជួយខ្ញុំ	ផុតអស់ទុក្ខធំ	រោគាទាំងឡាយ
	បានជាទាំងស្រុង	ទាំងប្រទានឱ្យ	ខ្ញុំគង់ជាមួយ
		ព្រះអង្គតទៅ	។
១៤	សូមលើកព្រះម្ចាស់	ខ្ពង់ខ្ពស់ខ្លាំងណាស់	មិនដែលអាស្រូវ
	ជាព្រះរបស់	អ៊ីស្រាអែលតទៅ	ព្រះអង្គគង់នៅ
		អង្វែងរៀងអើយ	។

ទំនុកតម្កើងលេខ ៤២ (៤១) បទកាកគតិ

២	បពិត្រព្រះម្ចាស់	ខ្ញុំប្រាថ្នាណាស់	ចង់នៅជាមួយ
	គិតដេកមិនលក់	យប់នឹកថ្ងៃព្រួយ	ចង់នៅជាមួយ
		ដូចក្តាន់រកទឹក	។
៣	ខ្ញុំស្រេកខ្ញុំឃ្លាន	ព្រះម្ចាស់ដ៏មាន	បារមីមានឫទ្ធិ
	ព្រះជន្មគង់នៅ	ស្ថិតស្ថេរពិតៗ	ខ្ញុំចង់នៅជិត
		ព្រះភក្ត្រព្រះអង្គ	។
៤	ខ្ញុំស្រក់ទឹកភ្នែក	ស្រែកទួញយំយែក	ឥតមានបង្អង់
	ទាំងយប់ទាំងថ្ងៃ	ចិត្តនៅតែចង់	ស្វែងរកព្រះអង្គ
		គង់នៅឯណា	។
៥	ខ្ញុំយំខ្ញុំសោក	ស្រណោះស្រណោក	នឹកឃើញកាលគ្រា
	ខ្ញុំដឹកនាំមុខ	អស់ទាំងប្រជា	ច្រើនឥតគណនា
		ឆ្ពោះទៅដំណាក់	។
	គេស្រែកគេហ៊ោរ	គេមានអំណរ	ក្អាកក្អាយឥតអាក់
	គេអរព្រះគុណ	ព្រះខ្ពស់ហួសថ្នាក់	មិនដែលអន់អាក់
		សប្បាយពេកក្រៃ	។
៦	ខ្ញុំនឹកគិតថា	តើខ្ញុំនេះណា	ស្រយុតចិត្តថ្វី
	តូចចិត្តខ្លួនឯង	តើបានការអី	ផ្ញើជីវិតថ្លៃ
		លើព្រះម្ចាស់ទៅ
	ខ្ញុំមុខជានឹង	សរសើរតម្កើង	មិនបង្អង់នៅ
	ពីនេះទៅមុខ	រហូតតទៅ	ព្រះអង្គគង់នៅ
		ជាព្រះសង្គ្រោះ	។
៧	ព្រះអម្ចាស់អើយ	រូបខ្ញុំនេះហើយ	ស្រយុតចិត្តណាស់
	ហេតុនេះទើបខ្ញុំ	នឹកដល់ព្រះម្ចាស់	ឥតមានក្រឡះ
		មួយវេលាណា	។
៨	ព្រះអង្គធ្វើឱ្យ	កង្វល់មុខក្រោយ	ធ្លាក់ផ្ទួនៗគ្នា
	មកលើរូបខ្ញុំ	បីដូចគង្គារ	ហូរធ្លាក់ខ្ទ័រខ្ទារ
		ពីគីរីខ្ពស់	។
៩	សូមព្រះមេត្តា	សម្តែងករុណា	ស្មោះស្ម័គ្រចំពោះ
	ខ្ញុំនៅពេលថ្ងៃ	ពេលយប់ស្រណោះ	ខ្ញុំច្រៀងពិរោះ
		តម្កើងព្រះអង្គ	។
១០	ខ្ញុំទូលព្រះម្ចាស់	ហេតុអ្វីពេលនេះ	ព្រះអង្គបោះបង់
	ទ្រង់ជាថ្មដា	ស្ថិតស្ថេរគង់វង្ស	ហេតុអ្វីឱ្យខ្មាំង
		បៀតបៀនរូបខ្ញុំ	។
១១	ខ្មាំងសត្រូវដៀល	ប្រមាថឆ្កឹះឆ្កៀល	ខ្ញុំស្ទើរស្រែកយំ
	គេ​ចេះតែពោល	មកទូលបង្គំ	ថាតើព្រះខ្ញុំ
		នោះនៅឯណា?	។
	ខ្ញុំឈឺចុកចាប់	ដូចគេចាក់កាប់	សព្វពេញកាយា
	គេស្រែកក្តែងៗ	គ្រប់ពេលវេលា	ខ្ញុំស្ទើរមរណា
		លាភពផែនដី	។
១២	ខ្ញុំនឹកគិតថា	តើខ្ញុំនេះណា	ស្រយុតចិត្តថ្វី
	តូចចិត្តខ្លួនឯង	តើបានការអី	ផ្ញើជីវិតថ្លៃ
		លើព្រះម្ចាស់ទៅ	។
	ខ្ញុំមុខជានឹង	សរសើរតម្កើង	មិនបង្អង់នៅ
	ពីនេះទៅមុខ	រហូតតទៅ	ព្រះអង្គគង់នៅ
		ជាព្រះសង្គ្រោះ	។

ទំនុកតម្កើងលេខ ៤៣ (៤២) បទពាក្យ ៧

១	ឱព្រះជាអម្ចាស់ខ្ញុំអើយ	សូមកុំកន្តើយរកយុត្តិធម៌
	សូមជួយកាន់ក្តីទល់តបត	ពួកមនុស្សមិនល្អមនុស្សទុច្ចរិត	។
២	បពិត្រព្រះជាអម្ចាស់អើយ	ព្រះអង្គនេះហើយជួយជីវិត
	ទ្រង់ជាកំពែងបាំងជុំជិត	សូមទ្រង់អាណិតកុំបោះបង់	។
៣	សូមផ្តល់ពន្លឺនិងក្តីពិត	ឱ្យនៅស្ថេរស្ថិតហើយតម្រង់
	ទៅភ្នំវិសុទ្ធដ៏ផូរផង់	ដំណាក់ព្រះអង្គសមសព្វគ្រប់	។
៤	ខ្ញុំនឹងឆ្ពោះទៅទីអាសនៈ	ព្រះអង្គឥតអាក់ជាប្រភព
	នៃក្តីអំណរដ៏លើសលប់	តម្កើងមិនឈប់ដោយតន្ត្រី	។
៥	ខ្ញុំតែងតែនឹកគិតឥតភ្លេច	«តើខ្ញុំស្រយុតចិត្តធ្វើអ្វី
	ចូរផ្ញើជីវិតកុំសោកស្តាយ	ផ្ញើទាំងរូបកាយនឹងទ្រង់ទៅ »	។
	ខ្ញុំមុខជានឹងលើកតម្កើង	ព្រះអង្គខ្ពស់ឡើងមិនអាស្រូវ
	ជាព្រះសង្គ្រោះល្អត្រឹមត្រូវ	ឈ្នះអស់សត្រូវគ្រប់ទិសទី	។

ទំនុកតម្កើងលេខ ៤៤ (៤៣) បទកាកគតិ

២	បពិត្រព្រះម្ចាស់	ដូនតាចាស់ៗ	ធ្លាប់រៀបរាប់ប្រាប់
	ឱ្យយើងខ្ញុំឮ	ហើយបានត្រងត្រាប់	ស្នាព្រះហស្តគ្រប់
		ដែលទ្រង់ប្រព្រឹត្ត	។
៣	ព្រះអង្គប្រដេញ	ជាតិនានាចេញ	មិនឱ្យនៅជិត
	ដោយសារបារមី	ព្រះអង្គមានឫទ្ធិ	ឱ្យរាស្រ្តមកស្ថិត
		ជុំជិតការពារ	។
៤	ទឹកដីទាំងអស់	គឺមិនមែនរាស្រ្ត	ឈ្នះមកដោយសារ
	កម្លាំងអាវុធ	ខ្លួនគេឡើយណា	ឬឈ្នះដោយសារ
		កម្លាំងខ្លួនអី	។
	គឺគេបានឈ្នះ	ដោយសារតេជះ	ឫទ្ធីបារមី
	និងព្រះចេស្តា	ព្រះអង្គខ្លាំងក្រៃ	ព្រោះព្រះអង្គថ្លៃ
		ស្រឡាញ់គេណាស់	។
៥	បពិត្រព្រះអើយ	ព្រះអង្គនេះហើយ	ជាក្សត្រជាក់ច្បាស់
	មានតែទ្រង់ទេ	ផ្តល់ជ័យជំនះ	ដល់ប្រជារាស្រ្ត
		បានសុខសិរី	។
៦	ដោយសារទ្រង់ហើយ	យើងខ្ញុំបានស្បើយ	យកជំនះជ័យ
	លើបច្ចាមិត្រ	ដោយព្រះនាមល្បី	បង្ក្រាបអស់ដៃ
		អ្នកដែលប្រឆាំង	។
៧	ខ្ញុំមិនផ្អែកពឹង	ទៅលើពំនឹង	ធ្នូជាកម្លាំង
	ក៏មិនមានជ័យ	ដោយដាវចម្បាំង	គឺពឹងរនាំង
		របាំងព្រះម្ចាស់	។
៨	មានតែព្រះអង្គ	ដែលបានតម្រង់	ឱ្យខ្ញុំបានឈ្នះ
	លើពួកបច្ចា	និងមនុស្សទាំងអស់	ដែលស្អប់ខ្ញុំនោះ
		អាម៉ាស់មុខក្រៃ	។
៩	យើងខ្ញុំទាំងអស់	ថ្កើងសិរីយស	ព្រះអម្ចាស់ថ្លៃ
	ខ្ញុំលើកតម្កើង	ទាំងយប់ទាំងថ្ងៃ	តម្កើងបារមី
		របស់ព្រះអង្គ	។
១០	តែឥឡូវនេះ	ព្រះអង្គបានលះ	ចោលខ្ញុំសូន្យបង់
	មិនយាងជាមួយ	មិនជួយតម្រង់	មិននាំទ័ពផង
		ឱ្យខ្ញុំបាក់មុខ	។
១១	ព្រះអង្គធ្វើឱ្យ	ខ្ញុំដកទ័ពថយ	នៅមិនបានសុខ
	មុខបច្ចាមិត្ត	ដែលបានសម្រុក	ប្រមូលទ្រព្យទុក
		ធ្វើជាជយភណ្ឌ	។
១២	ព្រះអង្គប្រគល់	រូបយើងខ្ញុំផ្ទាល់	ឱ្យខ្មាំងជិះជាន់
	គេលេបត្របាក់	សង្កត់សង្កិន	កំចាយរូបខ្ញុំ
		ទៅស្រុកនានា	។
១៣	ព្រះអង្គបានលក់	រាស្រ្តអស់ទាំងស្រុក	ថោកឥតឧបមា
	ខ្ញុំស្មានមិនយល់	ទ្រង់គ្មានករុណា	ម្តេចធ្វើច្នេះណា
		លក់មិនចំណេញ	។
១៤	ព្រះអង្គបណ្តោយ	ប្រទេសមុខក្រោយ	ជិតខាងជុំវិញ
	មើលងាយយើងខ្ញុំ	ចំអកជ្រក់ជ្រេញ	ខ្ញុំសែនទោម្នេញ
		ដោយក្តីអាម៉ាស់	។
១៥	ព្រះអង្គធ្វើឱ្យ	ប្រជាជិតឆ្ងាយ	យករឿងខ្ញុំនេះ
	ជាល្បែងលេងសើច	ចំអកដៀលត្មះ	ឱ្យពួកទាំងនេះ
		មើលងាយយើងខ្ញុំ	។
១៦	ខ្ញុំសែនអៀនខ្មាស	មនុស្សម្នាដេរដាស	មើលងាយសើចយំ
	ថ្ងៃដេកកើតទុក្ខ	យប់ដេកសំងំ	អាម៉ាស់មុខធំ
		និយាយមិនបាន	។
១៧	ពេលខ្ញុំឮសូរ	សម្រែកខ្មាំងហ៊ោរ	ប៉ុនប៉ងរំខាន
	ចង់ចងគំនុំ	ឥតឈប់ស្រាកស្រាន្ត	បន្ថោកទាំងប្រាណ
		យើងដូចសត្វធាតុ	។
១៨	ឱព្រះម្ចាស់អើយ	ហេតុទាំងនេះហើយ	កើតហើយកើតទៀត
	យើងខ្ញុំពុំភ្លេច	មិនបែកឃ្លាឃ្លាត	ហើយមិនរវាត
		សម្ពន្ធមេត្រី	។
១៩	យើងខ្ញុំពុំបាន	បែកចិត្តគេចប្រាណ	ពីព្រះម្ចាស់ថ្លៃ
	ឬធ្វើព្រងើយ	កាត់ផ្តាច់និស្ស័យ	ក៏ពុំឃ្លាតឆ្ងាយ
		ពីព្រះមាគ៌ា	។
២០	មិនគួរព្រះអង្គ	បំបរបំបង់	ឱ្យខ្ញុំកំព្រា
	នៅក្នុងកន្លែង	ខ្លាសិង្ហស្វានស្វា	ខ្ញុំសែនវេទនា
		ក្នុងដៃមច្ចុរាជ	។
២១	ប្រសិនបើខ្ញុំ	បំភ្លេចព្រះនាម	ឬមានកលកិច្ច
	បែរទៅគោរព	ព្រះផ្សេងមានល្បិច	ឬចង់កែគេច
		នោះទ្រង់នឹងដឹង	។
២២	ទ្រង់ជ្រាបចិត្តមនុស្ស	ទោះស្រីឬប្រុស	គ្មានអ្វីកំបាំង
	អ្វីក៏ទ្រង់យល់	សព្វអស់ទាំងពួង	ដែលលាក់កំបាំង
		នៅក្នុងចិត្តមនុស្ស	។
២៣	ពួកគេប្រហារ	យើងខ្ញុំគ្រប់គ្រា	ឥតមានចន្លោះ
	ព្រោះតែព្រះអង្គ	គេទុកខ្ញុំនេះ	ដូចចៀមគោសេះ
		សម្រាប់់ប្រហារ	។
២៤	ឱព្រះម្ចាស់អើយ	កុំបង្អង់ឡើយ	សូមប្រែកាយា
	ម្តេចក៏ព្រះអង្គ	ផ្ទុំលក់ច្នេះណា	កុំដាច់មេត្តា
		ខ្ញុំរហូតឡើយ	។
២៥	ហេតុអ្វីព្រះអង្គ	បែរភក្ត្រចេញវឹង	គ្មានស្រណោះស្ដាយ
	ធ្វើដូចមិនស្គាល់	បំភ្លេចព្រងើយ	ខ្ញុំវេទនាហើយ
		ត្រូវគេជិះជាន់	។
២៦	គេបានជាន់ឈ្លី	ខ្ញុំក្នុងធូលី	ចុកចាប់ពេកពន់
	ខ្ញុំបរាជ័យ	ធ្ងន់អើយសែនធ្ងន់	ស្ទើរតែក្ស័យជន្ម
		ផុតពីផែនដី	។
២៧	ព្រះអើយក្រោកឡើង	កុំនៅឆ្មៃឆ្មើង	សូមទ្រង់ប្រណី
	យាងមករំដោះ	ដោយទឹកព្រះទ័យ	ករុណាប្រណី
		សង្គ្រោះកុំខាន	។

ទំនុកតម្កើងលេខ ៤៥ (៤៤) បទព្រហ្មគីតិ

២	ពាក្យខ្ញុំពោលពិរោះ	ដ៏ស្ម័គ្រស្មោះអស់ពីចិត្ត
	តែងបទថ្វាយមហាក្សត្រ	សូមឱ្យបទដូចកវី	។
៣	ព្រះអង្គល្អជាងគេ	រកគ្មានទេវោហារស្តី
	ព្រះប្រទានពរជ័យ	មានសិរីទាំងអំណាច	។
៤	វីរៈបុរសឫទ្ធិ	គន់គាប់ចិត្តសែនអង់អាច
	សូមពាក់ព្រះខ័នរាជ្យ	ភ្លឺចិញ្ចាចចិញ្ចែងទៅ	។
៥	សូមគង់លើរាជរថ	យាងតយុទ្ធនឹងសត្រូវ
	ការពារពាំងទុកនូវ	រឿងត្រឹមត្រូវនិងសុចរិត	។
	សូមទ្រង់បានជោគជ័យ	ដ៏ថ្លាថ្លៃអស់ពីចិត្ត
	ដោយបារមីមានឫទ្ធិ	ដ៏ប្រណីតនៃព្រះអង្គ	។
៦	សូមឱ្យព្រួញដ៏មុត	ស្រួចបំផុតជួយតម្រង់
	ឱ្យព្រួញនៃព្រះអង្គ	បាញ់តម្រង់ទ្រូងបច្ចា	។
	សូមគ្រប់ប្រជាជាតិ	កុំបីឃ្លាតឃ្លាទៅណា
	ឱ្យធ្លាក់ក្រោមបាទា	ព្រះរាជាដ៏មានឫទ្ធិ	។
៧	រាជាដ៏ខ្ពស់ខ្ពង់	បល្ល័ង្កទ្រង់នៅស្ថេរស្ថិត
	គ្រងរាជ្យមិនរខិត	គង់នៅពិតដោយយុត្តិធម៌	។
៨	ព្រះអង្គសព្វព្រះទ័យ	នឹងសេចក្តីសុចរិតល្អ
	អំពើអយុត្តិធម៌	ទ្រង់មិនគាប់ព្រះហឫទ័យ	។
	ហេតុនេះព្រះជាម្ចាស់	ដែលជាព្រះដ៏ប្រពៃ
	ជ្រើសរើសអង្គក្សត្រថ្លៃ	ពីចំណោមមិត្តព្រះអង្គ	។
	ចាក់ប្រេងអភិសេក	មិនអល់អែកល្អផូរផង់
	ប្រទានឱ្យព្រះអង្គ	មានសព្វទាំងក្តីសប្បាយ	។
៩	រាជាគ្រងភូសា	ល្អអស្ចារ្យក្រអូបសាយ
	តន្ត្រីប្រគុំថ្វាយ	ក្នុងប្រាសាទភ្លុកដំរី	។
១០	ស្រីស្នំទាំងប៉ុន្មាន	ស្រស់ភុំផានជាបុត្រី
	របស់ស្តេចផែនដី	អង្គក្សត្រិយ៍គង់ខាងស្តាំ	។
១១	ព្រះម្ចាស់ក្សត្រិយ៍អើយ	កុំកន្តើយសណ្តាប់ខ្ញុំ
	កុំនឹកនាពួនយំ	ដល់រាជវង្សព្រះនាងអី	។
១២	សូមឱ្យមហាក្សត្រ	បានគាប់ចិត្តអង្គក្សត្រិយ៍
	បង្គំគាល់ក្រាបថ្វាយ	កុំនឿយណាយទ្រង់ជាម្ចាស់	។
១៣	អ្នកមានក្រុងទីរ៉ុស	ទាំងស្រីប្រុសមានច្រើនណាស់
	នាំតង្វាយទាំងអស់	តម្រង់ឆ្ពោះផ្គាប់ក្សត្រិយ៍	។
១៤	ព្រះនាងគង់នៅក្នុង	ព្រះរាជវាំងសុខពេកក្រៃ
	រូបឆោមស្រស់ឥតបី	ព្រះភូសារំលេចមាស	។
១៥	គេដង្ហែព្រះនាង	ចូលក្នុងវាំងមនុស្សដេរដាស
	ភីលៀងមានច្រើនណាស់	ហែទៅគាល់ព្រះរាជា	។
១៦	ព្រះនាងចូលទៅកាន់	វិមានស្ថានអង្គក្សត្រា
	អស់ទាំងរាស្រ្តប្រជា	គ្រប់ៗគ្នារីករាយក្រៃ	។
១៧	បពិត្រព្រះមហាក្សត្រ	មេត្តាចាត់បុត្រថ្លាថ្លៃ
	គ្រងរាជ្យដ៏ប្រពៃ	តពីព្រះអយ្យកោស្តេច	។
១៨	ទូលបង្គំនឹងថ្លែង	រំលឹកចែងឥតមានភ្លេច
	ព្រះនាមល្អបណ្តាច់	នាំគ្នាលើកថ្កើងព្រះអង្គ	។

ទំនុកតម្កើងលេខ ៤៦ (៤៥) បទពាក្យ ៧

២	ព្រះអម្ចាស់ជាទីជម្រក	ឱ្យយើងចូលជ្រករាល់ខែឆ្នាំ
	ព្រះអង្គតែងតែប្រុងប្រៀបចាំ	មិនមើលបំណាំពេលអាសន្ន	។
៣	ទោះបីផែនដីប្រះរញ្ជួយ	ភ្នំប្រែរលួយដោយទាន់ហន់
	ទោះធ្លាក់សមុទ្រជ្រៅរាប់ពាន់	ជាច្រើនរយជាន់ខ្ញុំមិនភ័យ	។
៤	ទោះទឹកសមុទ្របោកបាចសាច	ជួនជោរជួននាចយ៉ាងណាក្តី
	ទោះភ្នំកក្រើកខ្ទ័រផែនដី	ក៏យើងមិនភ័យមិនខ្ចីខ្លាច	។
៥	មានទន្លេមួយនាំអំណរ	សិរីបវរស្រោចបាចសាច
	បុរីព្រះម្ចាស់មានអំណាច	វិសុទ្ធក្រៃពេកព្រះដំណាក់	។
៦	ព្រះម្ចាស់គង់ក្នុងបុរីណា	បានក្តីសុខាមិនអន់អាក់
	ព្រោះទ្រង់សង្គ្រោះមិនថ្នាំងថ្នាក់	តាំងពីថ្ងៃរះព្រឹកព្រលឹម	។
៧	ជនជាតិនានាតែងគំរាម	ស្រុកកើតសង្គ្រាមភ័យជ្រួលជ្រើម
	ព្រះម្ចាស់បន្លឺសូរសៀងឡើង	ផែនដីត្រូវប៉ើងបែកខ្ចាត់ខ្ចាយ	។
៨	ព្រះជាអម្ចាស់នៃពិភព	ទ្រង់គង់ប្រសព្វមិនឃ្លាតឆ្ងាយ
	ព្រះលោកយ៉ាកុបមិនទន់ជ្រាយ	កំពែងមាំក្រៃនៃយើងខ្ញុំ	។
៩	ចូរនាំគ្នាមើលស្នាព្រះហស្ត	របស់ព្រះម្ចាស់ដ៏ឧត្តម
	កិច្ចការអស្ចារ្យទាំងតូចធំ	ដែលទ្រ​ង់ខិតខំលើផែនដី	។
១០	ទ្រង់បានប្រមូលធ្នូលំពែង	ខែលដាវខ្លីវែងគ្មានសល់អ្វី
	រទេះគ្រឿងក្រោះបោះទៅដី	ដុតខ្ទេចគ្មានស្តាយមិនស្រណោះ	។
១១	ចូរឈប់ច្បាំងទៅត្រូវដឹងថា	គឺយើងនេះណាជាព្រះម្ចាស់
	យើងគ្រប់គ្រងលើជាតិទាំងអស់	មិនសល់ចន្លោះលើលោកា	។
១២	ព្រះអម្ចាស់នៃភពផែនដី	ស្ម័គ្រស្មោះមេត្រីគ្រប់ៗគ្រា
	គង់នៅជាមួយរាល់វេលា	កំពែងការពារដ៏មាំមួន	។

ទំនុកតម្កើងលេខ ៤៧ (៤៦) បទកាកគតិ

២	ឱជនទាំងឡាយ	ចូរអរសប្បាយ	ទះដៃអបអរ
	ច្រៀងលើកតម្កើង	ព្រះម្ចាស់បវរ	ទទួលអំណរ
		ដោយចិត្តរីករាយ	។
៣	ដ្បិតព្រះអម្ចាស់	ព្រះខ្ពង់ខ្ពស់ណាស់	គួរស្ញប់ស្ញែងក្រៃ
	ព្រោះតែព្រះអង្គ	ជាមហាក្សត្រថ្លៃ	ឧត្តមប្រពៃ
		លើដីទាំងអស់	។
៤	ព្រះអង្គបង្ក្រាប	គ្រប់ជាតិឱ្យរាប	មកជាចំណុះ
	មិនឱ្យរួចខ្លួន	ជាតិណាមួយសោះ	ស្ម័គ្រចិត្តស្រួលស្រុះ
		ក្រោមអំណាចយើង	។
៥	ព្រះអង្គជ្រើសរើស	ទឹកដីគ្រប់ទិស	ជាមរតកថ្កើង
	ឱ្យយើងខ្ពស់មុខ	គ្មានអ្វីកើតឡើង	វិសេសរុងរឿង
		យ៉ាកុបល្អឯក	។
៦	ព្រះអម្ចាស់យាង	ឡើងក្រោមសូរសៀង	ខ្ញៀវខ្ញាអនេក
	ទ្រង់យាងទៅខ្ពស់	ឥតមានរារែក	អមដោយសម្រែក
		ស្នូរត្រែតន្ត្រី	។
៧	ចូរយើងនាំគ្នា	រូតរះម្នីម្នា	ថ្វាយពរសិរី
	ព្រះជាអម្ចាស់	រុងរឿងពេកក្រៃ	ស្មូតលាយតន្ត្រី
		ថ្វាយព្រះនៃយើង	។
៨	ដ្បិតព្រះអង្គជា	ព្រះមហាក្សត្រា	វិសេសថ្កុំថ្កើង
	នៅលើផែនដី	ជាព្រះនៃយើង	ចូរនាំគ្នាថ្កើង
		ស្មូតកំណាព្យថ្វាយ	។
៩	ព្រះម្ចាស់គ្រងរាជ្យ	ពេញដោយអំណាច	លើជាតិជិតឆ្ងាយ
	គង់លើបល្ល័ង្ក	ឥតបីនឿយណាយ	វិសុទ្ធពេកក្រៃ
		រាស្រ្តបានសុខសាន្ត	។
១០	ពួកមេដឹកនាំ	មកមីរជួបជុំ	ឥតមានខកខាន
	ជាប្រជាជន	វិសុទ្ធថ្កើងថ្កាន	ព្រះដ៏ចំណាន
		អប្រាហាំថ្លៃ	។
	ដ្បិតមហាក្សត្រ	ម្ចាស់ផែនដីស្ថិត	ក្រោមម្លប់បារមី
	អំណាចព្រះម្ចាស់	ខ្លាំងលើសអ្វីៗ	ក្នុងនាលោកីយ៍
		គ្មានអ្វីស្មើផង	។

ទំនុកតម្កើងលេខ ៤៨ (៤៧) បទពាក្យ ៧

២	ព្រះម្ចាស់ជាព្រះឧត្តម	ប្រសើរសក្តិសមខ្ពស់បំផុត
	ស៊ីយ៉ូនបុរីតែមួយគត់	ភ្នំដ៏វិសុទ្ធនៃព្រះអង្គ	។
៣	ភ្នំជារបស់ព្រះអម្ចាស់	ល្អប្រណីតណាស់ឥតមានហ្មង
	ស៊ីយ៉ូនជាកំពូលភពផង	មហាក្សត្រទូទាំងភពផែនដី	។
៤	ព្រះម្ចាស់សម្តែងឱ្យដឹងថា	ព្រះអង្គគឺជាកំពែងជ័យ
	រឹងប៉ឹងមាំមួនពន់ពេកក្រៃ	នៅក្នុងបុរីនោះប្រាកដ	។
៥	មានស្តេចនានាច្រើនគរគោក	បំណងវាយយកតាមកំណត់
	កម្ទេចស៊ីយ៉ូនភ្នំឱ្យម៉ត់	យកឈ្នះប្រាកដតាមកម្លាំង	។
៦	ពេលដែលគេឃើញភ្នំស៊ីយ៉ូន	ទើបគេភ្ញាក់ខ្លួនស្រឡាំងកាំង
	តក់ស្លុតព្រឺព្រួចភ័យភាន់ភាំង	នាំគ្នាឈប់ច្បាំងរត់ចូលព្រៃ	។
៧	គេភ័យញាប់ញ័រដូចកូនសត្វ	ឈឺចាប់ពេកក្តាត់ដូចស្ត្រី
	ហៀបនឹងសម្រាលបុត្រក្នុងផ្ទៃ	ទន់ជើងទន់ដៃស្ទើររលំ	។
៨	ដូចជាខ្យល់ព្យុះបោកបក់មក	ប៉ះទឹករលកបោកគគ្រឹម
	កម្ទេចនាវាឱ្យខ្ទេចខ្ទាំ	ពីទិសបស្ចឹមសែនភិតភ័យ	។
៩	យើងបានឮគេថ្លែងវាចា	សព្វអំពីស្នាព្រះហស្តថ្លៃ
	ឥឡូវឃើញផ្ទាល់ក្នុងបុរី	ព្រះអម្ចាស់ថ្លៃលើលោកា	។
១០	បពិត្រព្រះម្ចាស់ដ៏ឧត្តុង្គ	រូបខ្ញុំនៅក្នុងព្រះវិហារ
	ខ្ញុំនឹកពីព្រះទ័យមេត្តា	សប្បុរសករុណានៃព្រះអង្គ	។
១១	បពិត្រព្រះជាអម្ចាស់ថ្លៃ	ព្រះនាមល្បាញល្បីរបស់ទ្រង់
	មនុស្សម្នាគ្រប់គ្នាលើកតម្កើង	ព្រះនាមព្រះអង្គដល់ទីឆ្ងាយ	។
១២	សូមឱ្យអ្នកទីក្រុងស៊ីយ៉ូន	កុំបីស្រពោនចូរស្រស់ស្រាយ
	អ្នកស្រុកយូដាអរសប្បាយ	ព្រោះព្រះវិនិច្ឆ័យដោយយុត្តិធម៌	។
១៣	ចូរនាំគ្នាហែកុំទោម្នេញ	ហែព័ទ្ធជុំវិញក្រុងបវរ
	រាប់ចំនួនប៉មជាបន្ត	របស់ក្រុងល្អនេះមើលទៅ	។
១៤	ចូរស្ងើចសរសើរកំពែងក្រុង	ពិនិត្យផ្ចិតផ្ចង់កុំសល់នៅ
	ដើម្បីអ្នករាល់គ្នាយកទៅ	ថ្លែងប្រាប់មនុស្សនៅក្រោយគ្រប់គ្នា	។
១៥	ថាព្រះជាម្ចាស់ពិតជាព្រះ	យើងប្រាកដណាស់ពីយូរយារ
	ព្រះអង្គដឹកនាំយើងឥតរា	តទៅមុខជាអង្វែងអើយ	។

ទំនុកតម្កើងលេខ ៤៩ (៤៨) បទកាកគតិ

២	ឱជនទាំងឡាយ	ចូរកុំខ្វល់ខ្វាយ	នាំគ្នាត្រងត្រាប់
	មនុស្សរស់លើដី	ណែនណាន់តាន់តាប់	ត្រូវតែប្រុងស្តាប់
		ដោយចិត្តទុកដាក់	។
៣	គឺទូទាំងអស់	មនុស្សទាំងស្រីប្រុស	កុំបីអន់អាក់
	ទាំងអ្នកតូចទាប	អ្នកធំហួសថ្នាក់	អ្នកសម្បូរប្រាក់
		អ្នកក្រវេទនា	។
៤	ខ្ញុំនឹងបរិយាយ	ឱ្យបានក្បោះក្បាយ	ដល់អ្នករាល់គ្នា
	អំពីគតិ	បណ្ឌិតភ្លឺថ្លា	ពិតដោយប្រាជ្ញា
		ខ្លឹមសារប្រពៃ	។
៥	ខ្ញុំនឹងផ្ចិតផ្ចង់	ដាក់ចិត្តតម្រង់	ស្តាប់ពាក្យសម្តី
	របស់អ្នកប្រាជ្ញ	ដែលធ្លាប់ល្បាញល្បី	ដោះប្រស្នាក្តី
		ដោយមានដេញពិណ	។
៦	ពេលមានទុក្ខភ័យ	ជួបគ្រោះចង្រៃ	ឬភ័យអាសន្ន
	សត្រូវឡោមព័ទ្ធ	ក៏ខ្ញុំមិនស្លន់	វង្វេងវង្វាន់
		ភ័យមិនបានការ	។
៧	មនុស្សទុច្ចរិត	តែងតែទុកចិត្ត	លើទ្រព្យមហិមា
	គេអួតគេអាង	ព្រោះខ្លួនគេជា	អ្នកមានទ្រព្យា
		មហាសេដ្ឋី	។
៨	គ្មាននរណាម្នាក់	អាចនឹងបង់ប្រាក់	លោះអ្នកដទៃ
	ហើយមិនអាចបង់	ថ្វាយព្រះម្ចាស់ថ្លៃ	កុំឱ្យខ្លួនក្ស័យ
		ជីវិតនោះដែរ	។
៩	ថ្លៃលោះជីវិត	មនុស្សយើងពិតៗ	កាត់មិនបានទេ
	ទោះជាខំបង់	មួយកើនជាទ្វេ	ក៏មិនគ្រប់ដែរ
		ចៀសស្លាប់មិនបាន	។
១០	តើមនុស្សនេះណា	អាចមានជីវ៉ា	រស់បានប៉ុន្មាន
	ផុតពីរណ្តៅ	អាចនៅសុខសាន្ត	ឬអាចរស់បាន
		រហូតមិនស្លាប់
១១	យើងឃើញច្បាស់ថា	អ្នកមានប្រាជ្ញា	ក៏ដូចអ្នកអាប់
	អ្នកល្ងង់ឥតប្រាជ្ញ	ក៏គង់តែស្លាប់	ទុកទ្រព្យច្រើនកប្ប
		ឱ្យអ្នកដទៃ	។
១២	គេនឹកគិតថា	រស់បានយូរយារ	ក្នុងលំនៅថ្មី
	បាននៅស្ថិតស្ថេរ	ក្នុងផ្ទះល្អក្រៃ	បានដាក់ឈ្មោះដី
		ទៅគ្រប់ជំនាន់	។
១៣	មនុស្សមានកិត្តិយស	រុងរឿងខ្ពង់ខ្ពស់	ក៏គេចមិនបាន
	គង់តែនឹងស្លាប់	ដូចសត្វតិរច្ឆាន	ជាក់ជាមិនខាន
		ឥតបីឃ្លាងឃ្លាត	។
១៤	អ្នកដែលទុកចិត្ត	លើខ្លួនឯងពិត	នោះគ្មានមារយាទ
	ពេញចិត្តពាក្យខ្លួន	ជាមនុស្សមានស្នៀត	អនាគតទៀត
		យ៉ាប់យ៉ឺនពេកក្រៃ	។
១៥	អ្នកនោះប្រៀបបាន	ចៀមសត្វតិរច្ឆាន	ដែលគេប្រល័យ
	មច្ចុរាជឃុំគ្រង	វាយឥតសំចៃ	ឃ្វាលរាល់យប់ថ្ងៃ
		មិនឱ្យឃ្លាតឆ្ងាយ	។
	រីមនុស្សសុចរិត	នឹងជាន់ឈ្លីពិត	លើរូបរាងកាយ
	របស់ពួកគេ	រលាយអន្តរាយ	ទៅដល់ទីឆ្ងាយ
		ក្នុងស្ថានមនុស្សស្លាប់	។
១៦	ប៉ុន្តែព្រះម្ចាស់	មានឫទ្ធិខ្លាំងណាស់	រំដោះខ្ញុំឆាប់
	ផុតពីអំណាច	នៃសេចក្តីស្លាប់	ព្រះអង្គប្រញាប់
		មកយកខ្ញុំទៅ	។
១៧	ពេលអ្នកឃើញគេ	សម្បត្តិឡើងទ្វេ	កុំបីហ្មងសៅ
	ឃើញទ្រព្យគេច្រើន	ចម្រើនតទៅ	សំងំពួននៅ
		កុំភ័យខ្លាច​អី	។
១៨	ពេលដែលគេស្លាប់	គេពុំអាចចាប់	យករបស់អ្វី
	អស់ទាំងសម្បត្តិ	ទ្រព្យធនផ្សេងក្តី	ចូលទៅក្នុងដី
		អ្នកក្ស័យបានឡើយ	។
១៩	ពេលមានជីវិត	គេតែងនឹកគិត	ថាសុខឥតស្បើយ
	ថាខ្លួនគេនឹង	មិនខ្វល់អ្វីឡើយ	អ្នកផងកោតហើយ
		ដែលគេមានបាន	។
២០	គេគង់នឹងត្រូវ	ធ្លាក់ខ្លួនចុះទៅ	ជួបនឹងសន្តាន
	ជីតាជីដូន	មានទាំងប៉ុន្មាន	ទៅក្នុងទីស្ថាន
		ដែលគ្មានពន្លឺ	។
២១	អ្នកមានកិត្តិយស	រុងរឿងខ្ពង់ខ្ពស់	ល្បីល្បាញរន្ទឺ
	មិនយល់អ្វីសោះ	មិនភ័យព្រួយព្រឺ	អ្នកនោះហើយគឺ
		ដូចសត្វដែលស្លាប់	។

ទំនុកតម្កើងលេខ ៥០ (៤៩) បទព្រហ្មគីតិ

១	ព្រះអង្គម្ចាស់ជាព្រះ	ប្រសើរណាស់លើសអ្វីៗ
	ទ្រង់កោះហៅផែនដី	ខាងលិចក្តីដល់ខាងកើត	។
២	ព្រះជាម្ចាស់ចែងចាំង	ពីទីក្រុងស៊ីយ៉ូនឆើត
	ដែលជាក្រុងល្អស្អាត	ត្រូវតាមខ្នាតឥតមានខ្ចោះ	។
៣	សូមព្រះអង្គយាងមក	ជាជម្រកយើងរួមរស់
	កុំនៅស្ងៀមដូច្នោះ	សូមសន្តោសត្រួសត្រាយផ្លូវ	។
	ពេលព្រះអង្គយាងមក	ខ្យល់បក់បោកខ្លាំងពេកកូវ
	មានភ្លើងឆេះសន្ធៅ	ជុំវិញនៅមុខព្រះអង្គ	។
៤	ព្រះអង្គហៅមេឃដី	ធ្វើសាក្សីគ្រានោះផង
	វិនិច្ឆ័យទោសខុសឆ្គង	រាស្រ្តព្រះអង្គទាំងប៉ុន្មាន	។
៥	ព្រះអង្គមានបន្ទូល	ថាប្រមូលកុំខកខាន
	គឺអស់អ្នកដែលបាន	ចងសម្ពន្ធជាមួយគ្នា	។
៦	ផ្ទៃមេឃប្រកាសប្រាប់	ឱ្យបានឆាប់ឥតរួញរា
	ព្រះម្ចាស់មានឫទ្ធា	ជាចៅក្រមដ៏សុចរិត	។
៧	ប្រជាជនបវរ	នាំគ្នាមកស្តាប់ពាក្យពិត
	អ៊ីស្រាអែលកុំគិត	យើងនេះពិតព្រះអ្នកហើយ	។
៨	យើងមិនស្តីបន្ទោស	អ្នកទាំងអស់ដែលបានថ្វាយ
	យញ្ញបូជាទាំងឡាយ	អចិន្ត្រៃយ៍មិនដែលអាក់	។
៩	យើងមិនត្រូវការយក	គោបាមកពីផ្ទះអ្នក
	ពពែធាត់ដល់ថ្នាក់	ពីក្រោលអ្នកនោះឡើយណា	។
១០	ដ្បិតសត្វទាំងប៉ុន្មាន	ដែលធ្លាប់មានក្នុងព្រឹក្សា
	សត្វរាប់សែននោះណា	គឺសុទ្ធជាកម្មសិទ្ធិយើង	។
១១	យើងស្គាល់អស់បក្សី	នៅតាមព្រៃមិនរំលង
	សត្វរស់តាមភ្នំផង	ជារបស់យើងមិនសល់	។
១២	ប្រសិនបើយើងឃ្លាន	យើងនឹងហ៊ានមិនបាច់ខ្វល់
	អ្វីៗគ្មានសេសសល់	លើសកលយើងជាម្ចាស់	។
១៣	យើងមិនដែលត្រូវការ	សាច់គោបាយើងស្អប់ណាស់
	ហើយក្រៅអំពីនោះ	យើងមិនប៉ះឈាមពពែ	។
១៤	តង្វាយផងទាំងឡាយ	ដែលអ្នកថ្វាយជាហូរហែ
	គឺពាក្យតម្កើងដែរ	អ្នកត្រូវតែគោរពតាម	។
១៥	នៅពេលមានអាសន្ន	កុំស្លោស្លន់រកយើងភ្លាម
	យើងនឹងមិននៅស្ងៀម	យើងមកភ្លាមរំដោះអ្នក	។
១៦	ព្រះម្ចាស់មានបន្ទូល	ទៅមនុស្សពាលឥតស្ទើរស្ទាក់
	ហេតុអ្វីបានជាអ្នក	សូត្រឥតអាក់ក្រឹត្យវិន័យ	។
	ហើយចេះតែទន្ទេញ	ឥតទោម្នេញរៀងរាល់ថ្ងៃ
	ពាក្យសម្ពន្ធមេត្រី	ជាមួយយើងដូច្នេះណា?	។
១៧	ប៉ុន្តែអ្នកថ្លោះធ្លោយ	មិនស្តាប់ឡើយនូវវាចា
	ទូន្មានគ្រប់អាត្មា	អ្នកបែរជាចោលបង់បោះ	។
១៨	ពេលណាអ្នកជួបចោរ	អ្នកអបអររួមស្ម័គ្រស្មោះ
	ចូលដៃគិតរួមរស់	ពួកទុយ៌សពិតជាក់ច្បាស់	។
១៩	មាត់អ្នកតែងស្រដី	ពាក្យអប្រីយ៍ឥតអៀនខ្មាស
	អណ្តាតអ្នកគ្រលាស់	ពាក្យបោកប្រាសមិនដែលភ្លេច	។
២០	អ្នកត្រៀមចិត្តត្រៀមកាយ	ឥតជិនណាយជាប់ជានិច្ច
	ចោទបងប្អូនដោយល្បិច	ទោះជាសាច់ខ្លួនបង្កើត	។
២១	អ្នកដែលធ្លាប់ប្រព្រឹត្ត	រឿងឧក្រិដ្ឋឥតកំណើត
	យើងនៅស្ងៀមម្តេចកើត	គ្មានកំណើតយើងដាក់ទោស	។
២២	អស់អ្នកដែលកែគេច	ខំបំភ្លេចព្រះជាម្ចាស់
	ចូររិះគិតឱ្យច្បាស់	សេចក្តីនេះទាំងអស់ទៅ	។
	ក្រែងយើងបំផ្លាញអ្នក	ពិតជាជាក់មិនទុកទៅ
	ហើយគ្មានអ្នកណាទៅ	ជួយរំដោះយកអ្នកឡើយ	។
២៣	អ្នកណាថ្វាយពាក្យថ្កើង	មកដល់យើងជាតង្វាយ
	យើងរីករាយស្រស់ស្រាយ	យើងសប្បាយជួយសង្គ្រោះ	។

ទំនុកតម្កើងលេខ ៥១ (៥០) បទពាក្យ ៧

៣	ឱព្រះជាម្ចាស់ទូលបង្គំ	សូមលើកទោសខ្ញុំហើយមេត្តា
	តាមព្រះហឫទ័យករុណា	លើសលប់អស្ចារ្យព្រះអង្គផង	។
	សូមលើកទោសឱ្យទូលបង្គំ	ផុតទុក្ខក្រៀមក្រំគ្រានេះម្តង
	ព្រះទ័យអាណិតអាសូរផង	ព្រោះតែព្រះអង្គឥតមានខ្ចោះ	។
៤	សូមជួយលុបលាងខ្ញុំឱ្យជ្រះ	ឱ្យស្អាតស្រឡះពីកំហុស
	ជួយជំរះខ្ញុំស្អាតផងចុះ	ឱ្យបរិសុទ្ធអស់អំពើបាប	។
៥	ខ្ញុំដាក់ខ្លួនប្រាណសុំទទួល	ឥតមានប្រែប្រួលសុំសារភាព
	រូបទូលបង្គំបានសាងបាប	ដិតដក់នៅជាប់ក្នុងអារម្មណ៍	។
៦	ខ្ញុំបានប្រព្រឹត្តអំពើទាស់	ព្រះហឫទ័យស្មោះព្រះនៃខ្ញុំ
	ហើយប្រព្រឹត្តរឿងមិនសក្តិសម	ក្បត់ព្រះឧត្តមធ្វើពាលា	។
	ទោះជាព្រះអង្គដាក់ទុក្ខទោស	ទៅតាមកំហុសខ្ញុំយ៉ាងណា
	ទ្រង់នៅសុចរិតបរិសុទ្ធថ្លា	ទោះជាម្តេចម្តាទ្រង់គ្មានខុស	។
៧	ខ្ញុំមានកំហុសពីកំណើត	តាំងតែពីកើតមកឯណោះ
	បាបខ្ញុំជាប់ប្រាណមិនចេះអស់	មកទល់ពេលនេះមិនរសាយ	។
៨	ប៉ុន្តែព្រះម្ចាស់សព្វព្រះទ័យ	ជ្រាបអស់សេចក្តីពិតទាំងឡាយ
	សូមប្រោសឱ្យអស់មនុស្សគ្រប់កាយ	ស្គាល់ជម្រៅនៃប្រាជ្ញាញាណ	។
៩	សូមជំរះខ្ញុំឱ្យបរិសុទ្ធ	នោះរូបខ្ញុំពិតជានឹងបាន
	សជាងសំឡីជាមិនខាន	បរិសុទ្ធថ្កើងថ្កានមិនអប្រីយ៍	។
១០	សូមប្រាប់ឱ្យទូលបង្គំដឹង	ថាព្រះអង្គហ្នឹងអត់ទោសពៃរ៍
	នោះខ្ញុំនឹងមានអំណរក្រៃ	ចិត្តសោករីងរៃប្រែរីករាយ	។
១១	ព្រះម្ចាស់អើយសូមកុំទតមក	បាបច្រើនគរគោកខ្ញុំនោះឡើយ
	សូមលុបកំហុសដែលមានហើយ	ឱ្យបានធូរស្បើយល្អបំផុត	។
១២	ឱព្រះជាអម្ចាស់ខ្ញុំអើយ	សូមជួយប្រោសឱ្យបរិសុទ្ធ
	បង្កើតចិត្តថ្មីមាំមោះមុត	រឹងប៉ឹងបំផុតដល់ខ្ញុំផង	។
១៣	សូមកុំបោះបង់រូបខ្ញុំចោល	ឱ្យនៅតែលតោលឆ្ងាយព្រះអង្គ
	កុំដកវិញ្ញាណដ៏ត្រចង់	វិសុទ្ធព្រះអង្គពីខ្ញុំឡើយ	។
១៤	សូមប្រោសឱ្យខ្ញុំអរសប្បាយ	ព្រោះព្រះម្ចាស់ថ្លៃសង្គ្រោះហើយ
	សូមគាំទ្រខ្ញុំកុំកន្តើយ	ដោយប្រទានឱ្យធ្វើតាមផង	។
១៥	រូបខ្ញុំនឹងខំប្រៀនប្រដៅ	មនុស្សពាលកម្លៅមិនឱ្យហ្មង
	ឱ្យស្គាល់មាគ៌ាដ៏ត្រចង់	របស់ព្រះអង្គជាដរាប	។
១៦	ឱព្រះជាម្ចាស់ព្រះសង្គ្រោះ	សូមជួយរំដោះខ្ញុំពីស្លាប់
	ខ្ញុំនឹងទន្ទេញប្រកាសប្រាប់	សុចរិតគួរគាប់នៃព្រះអង្គ	។
១៧	ឱព្រះអម្ចាស់កុំស្ទាក់ស្ទើរ	ជួយខ្ញុំបន្លឺសំឡេងផង
	ខ្ញុំនឹងប្រកាសឱ្យរំពង	ពាក្យលើកតម្កើងទ្រង់ឥតភ្លេច	។
១៨	ព្រះអង្គមិនដែលសព្វព្រះទ័យ	ឱ្យដាក់យញ្ញថ្វាយច្រើនឬតិច
	ទោះតង្វាយដុតទាំងមូលស្រេច	ក៏ទ្រង់គ្មានកិច្ចចង់បានដែរ	។
១៩	យញ្ញដែលព្រះអង្គសព្វព្រះទ័យ	ឱ្យរូបខ្ញុំថ្វាយរាល់ថ្ងៃខែ
	គឺចិត្តសោកសៅទុក្ខឥតល្ហែ	និងចិត្តកែប្រែលែងក្អេងក្អាង	។
២០	ឱព្រះម្ចាស់អើយសូមប្រណី	ក្រុងស៊ីយ៉ូនថ្មីស្រស់ស្រឡាង
	មេត្តាសូមទ្រង់ជួយកសាង	សាឡឹមថ្កើងថ្កានឡើងវិញផង	។
២១	ពេលនោះព្រះអង្គមុខជាសព្វ	ព្រះហឫទ័យគាប់មិនសៅហ្មង
	តង្វាយដុតនិងយញ្ញតែម្តង	គោឈ្មោលមកផងថ្វាយអាសនៈ	។

ទំនុកតម្កើងលេខ ៥២ (៥១) បទកាកគតិ

៣	អ្នកខ្លាំងពូកែ	ហេតុម្តេចចេះតែ	អួតពីអាក្រក់
	ព្រះអម្ចាស់មាន	ហឫទ័យត្រង់ស្មោះ	ករុណាសន្តោស
		ដល់អ្នកជានិច្ច	។
៤	រៀងរាល់ខែថ្ងៃ	អ្នកតែងស្រមៃ	ឥតមានពេលភ្លេច
	ចង់តែប្រព្រឹត្ត	ដោយមិនកែគេច	ចង់ធ្វើជានិច្ច
		អំពើទុច្ចរិត	។
	ពាក្យពេចន៍សម្តី	ចេញវាចាស្តី	មិនដែលសុក្រឹត្យ
	កុហកភូតភរ	បញ្ឆៀងបញ្ឆិត	មុតជាងកាំបិត
		ដែលគេសំលៀង	។
៥	ចូលចិត្តអាក្រក់	ល្បិចខ្មៅកខ្វក់	មិនសុចរិតទៀង
	និយាយកុហក	អាក្រក់លំអៀង	វៀចវេរមិនទៀង
		ជាជាងការល្អ
៦	បើអ្នកហារស្តី	វោហារឥតន័យ	អសប្បុរសធម៌
	ពាក្យកុហកភូត	ចិត្តមិនស្មោះសរ	អ្វីដែលចេញមក
		សុទ្ធតែបោកប្រាស	។
៧	ព្រះនឹងកម្ទេច	រូបអ្នកជានិច្ច	ឱ្យអស់ស្រឡះ
	ដកហូតរូបអ្នក	ឱ្យចេញពីផ្ទះ	មិនឱ្យសល់សោះ
		ពីលើផែនដី	។
៨	មនុស្សសុចរិត	នឹងឃើញការពិត	កោតខ្លាចបារមី
	គេសើចសប្បាយ	ក្អាកក្អាយពេកក្រៃ	រួចគេនិយាយ
		ចំអកពោលថា	។
៩	«មើលន៎! អ្នកនោះ	ពុំបានយកព្រះ	ដែលមានចេស្តា
	ធ្វើជាទីពឹង	លំនៅអាត្មា	ដោយគាត់ស្មានថា
		គាត់ខ្លាំងពូកែ»	។
១០	រីឯខ្ញុំវិញ	ចិត្តខ្ញុំពោរពេញ	គ្មានគេចកែប្រែ
	នៅក្នុងដំណាក់	ព្រះម្ចាស់ឥតបែរ	រៀងរាល់ថ្ងៃខែ
		នៅក្បែរព្រះអង្គ	។
	ដូចដើមខៀវខ្ចី	អូលីវស្រស់ថ្មី	ល្អល្អះផូរផង់
	ដោយពឹងផ្អែកលើ	បារមីព្រះអង្គ	ត្រចះត្រចង់
		រៀងទៅឥតភ្លេច	។
១១	ទូលបង្គំនឹង	សរសើរតម្កើង	ព្រះអង្គជានិច្ច
	ចំពោះគ្រប់កិច្ច	ការទ្រង់ប្រព្រឹត្ត	ខ្ញុំសូមទុកចិត្ត
		ព្រះនាមព្រះអង្គ	។
	នៅមុខអស់អ្នក	គោរពស្មោះស្ម័គ្រ	ប្រណិប័តន៍ទ្រង់
	ព្រោះព្រះហឫទ័យ	សប្បុរសទៀងត្រង់	យើងខ្ញុំផ្ចិតផ្ចង់
		តាមទ្រង់ទៅអើយ	។

ទំនុកតម្កើងលេខ ៥៣ (៥២) បទពាក្យ ៧

២	ពួកមនុស្សលេលានាំគ្នាគិត	ថាតាមការពិតគ្មានព្រះទេ
	គេខំប្រព្រឹត្តមិនកែប្រែ	រឿងថោកមិនកែគួរអាម៉ាស់	។
៣	ព្រះម្ចាស់ទតពីស្ថានលើមក	ឃើញមនុស្សលោកមីរដេរដាស
	ក្រែងលោមានម្នាក់វាងវៃឈ្លាស	រវៃរវាសរកព្រះអង្គ	។
៤	ពួកគេវង្វេងទាំងអស់គ្នា	ជាមនុស្សពាលាកាចយង់ឃ្នង
	រកអ្នកដែលមានចិត្តទៀងត្រង់	សូម្បីម្នាក់ផងក៏មិនបាន	។
៥	តើអ្នកដែលចូលចិត្តប្រព្រឹត្ត	អំពើទុច្ចរិតទាំងប៉ុន្មាន
	សុទ្ធតែល្ងង់ល្ងិតខ្វះវិញ្ញាណ	ទើបពួកគេហ៊ានធ្វើច្នោះឬ ?	។
	ជីវិតគេរស់ព្រោះកិបគៃ	លើរាស្ត្ររាល់ថ្ងៃទាំងបញ្ឈឺ
	គេធ្វើមិនដឹងធ្វើមិនឮ	មិនដែលព្រួយព្រឺស្រែករកព្រះ	។
៦	ទោះបីជាគ្មានមូលហេតុអ្វី	គួរឱ្យភិតភ័យទាល់តែសោះ
	ក៏ពួកគេភ័យស្លន់ទាំងអស់	គ្មានដឹងអីសោះជាន់ជើងគ្នា	។
	ដ្បិតព្រះជាម្ចាស់ធ្វើឱ្យខ្មាំង	ដែលធ្លាប់ប្រឆាំងនឹងប្រជា
	ស្លាប់ខ្លួនចោលឆ្អឹងគ្រប់ៗគ្នា	ដោយសារឫទ្ធាព្រះខ្ពង់ខ្ពស់	។
៧	សូមព្រះអង្គគង់ក្នុងបុរី	ស៊ីយ៉ូនប្រិមប្រីយ៍ជួយសង្គ្រោះ
	ជនជាតិអ៊ីស្រាអែលទាំងនោះ	ឱ្យវិលមករស់ក្នុងស្រុកវិញ	។
	ពូជលោកយ៉ាកុបអរសប្បាយ	សំណើចក្អាកក្អាយឥតទោម្នេញ
	ឯពូជលោកអ៊ីស្រាអែលវិញ	អំណរពោរពេញដ៏លើសលប់	។

ទំនុកតម្កើងលេខ ៥៤ (៥៣) បទព្រហ្មគីតិ

៣	ឱព្រះជាម្ចាស់អើយ	កុំកន្តើយសូមជួយផង
	ដោយបារមីព្រះអង្គ	មេត្តាទ្រង់រកយុត្តិធម៌	។
៤	ឱព្រះជាម្ចាស់អើយ	កុំព្រងើយស្តាប់អង្វរ
	សម្រែកខ្ញុំស្រែករក	សូមស្តាប់មកពាក្យខ្ញុំផង	។
៥	ដ្បិតមានជនបរទេស	រឹងចចេសមកប៉ុនប៉ង
	ប្រឆាំងខ្ញុំតែម្តង	ចិត្តគេចង់ផ្តាច់ជីវិត	។
៦	ព្រះម្ចាស់ទ្រង់យាងមក	សង្គ្រោះយកទាំងអាណិត
	រូបខ្ញុំឱ្យនៅជិត	ទាំងជីវិតទ្រង់ការពារ	។
៧	សូមព្រះអង្គតតាំង	នឹងពួកខ្មាំងចិត្តពាធា
	តាមអំពើពាលា	ដែលពួកវាតែងប្រព្រឹត្ត	។
៨	រូបខ្ញុំនឹងដាក់ថ្វាយ	យញ្ញតង្វាយអស់ពីចិត្ត
	សូមឱ្យទ្រង់អាណិត	ខ្ញុំថ្កើងពិតនាមព្រះអង្គ	។
៩	ព្រះអង្គបានរំដោះ	ឱ្យផុតគ្រោះអាសន្នផង
	ផុតពួកពាលយង់ឃ្នង	សត្រូវផងបរាជ័យ	។

ទំនុកតម្កើងលេខ ៥៥ (៥៤) បទពាក្យ ៧

២	ឱព្រះម្ចាស់អើយសូមមេត្តា	សូមផ្ទៀងព្រះកាណ៌ស្តាប់ពាក្យខ្ញុំ
	ដែលខំអង្វរទទូចសុំ	សូមទ្រង់សណ្តាប់កុំគេចចេញ	។
៣	ពេលទ្រង់ស្តាប់ពាក្យខ្ញុំរួចហើយ	សូមកុំន្តើយតបមកវិញ
	ព្រោះខ្ញុំចុកចាប់ទុក្ខទោម្នេញ	ទុក្ខព្រួយពោរពេញក្នុងអាត្មា	។
៤	ពេលឮសម្រែកខ្មាំងសត្រូវ	មនុស្សពាលកម្លៅចិត្តឫស្យា
	ឱ្យរូបខ្ញុំរងទុក្ខវេទនា	ហើយតាមប្រហារដោយកំហឹង	។
៥	ខ្ញុំសែនតក់ស្លុតពន់ពេកក្រៃ	ញាប់ញ័រភិតភ័យអស់ព្រលឹង
	ស្រយង់ស្រយុតនៅមិននឹង	ដូចគ្មានព្រលឹងខ្លាចមរណា	។
៦	ខ្ញុំសែនរន្ធត់ពន់ពេកក្រៃ	ដូចជាមានអ្វីផ្តាច់សង្ខារ
	ព្រឺព្រួចក្នុងចិត្តឥតឧបមា	ដូចមនុស្សជរាឈឺដុនដាប	។
៧	ទូលបង្គំតែងនឹកគិតថា	បើខ្ញុំនេះណាប្រែមានស្លាប
	ខ្ញុំនឹងហោះហើររៀងដរាប	រកទីសម្រាប់់ជ្រកលាក់ខ្លួន	។
៨	ខ្ញុំនឹងហោះហើរទៅឱ្យឆ្ងាយ	ទៅឯទីនាយសំងំពួន
	ដេកទាំងយប់ថ្ងៃឱ្យបាត់សូន្យ	ក្នុងរហោស្ថានស្មសានស្ងាត់់	។
៩	ខ្ញុំនឹងភៀសខ្លួនទៅឱ្យឆ្ងាយ	មិននៅរៀងអាយទៅឱ្យបាត់
	បើទៅយ៉ាងឆាប់ល្អពេកក្តាត់	ចៀសឱ្យរួចផុតព្យុះសង្ឃរា	។
១០	ឱព្រះអម្ចាស់ថ្លៃខ្ញុំអើយ	សូមជួយកុំឱ្យពួកបច្ចា
	និយាយស្តាប់បានគ្រប់អាត្មា	ព្រោះតែពួកវាចិត្តអប្រិយ៍	។
១១	ទាំងយប់ទាំងថ្ងៃមានសុទ្ធតែ	ទាស់ទែងឥតល្ហែមិនដឹងអី
	អំពើពាលាកាប់ប្រល័យ	សាហាវពេកក្រៃទាំងក្រៅក្នុង	។
១២	ក្នុងក្រុងមានតែឧក្រិដ្ឋកម្ម	រាល់ថ្ងៃខែឆ្នាំមិនរំលង
	នៅតាមទីផ្សារតាមភូមិផង	ជិះជាន់ប៉ុនប៉ងបោកប្រាសគ្នា	។
១៣	ពួកអ្នកដែលតែងជេរតិះដៀល	មិនមែនពួកពាលចិត្តឫស្យា
	បើវាជាពួកធា្លប់ផ្តន្ទា	នោះខ្ញុំពាំងវាជាមិនខាន	។
១៤	គឺឯងធ្លាប់នៅជាមួយខ្ញុំ	ធ្លាប់នៅជួបជុំសែនសុខសាន្ត
	ជាអ្នកជិតស្និទ្ធឥតរំខាន	ជាមិត្រកល្យណធ្លាប់ស្ម័គ្រស្មោះ	។
១៥	យើងធ្លាប់ស្និទ្ធស្នាលជាមួយគ្នា	គ្រប់ពេលវេលាមិនទំនាស់
	ធ្លាប់ថ្វាយបង្គំព្រះជាម្ចាស់	វិសុទ្ធពេកណាស់ក្នុងដំណាក់	។
១៦	សូមឱ្យបច្ចាមិត្តត្រូវស្លាប់	ទាន់ហន់ឆុតឆាប់កុំបីអាក់
	ឱ្យពួកគេទាំងអស់នោះធ្លាក់	ក្នុងឋាននរកទាំងនៅរស់	។
១៧	រីឯខ្ញុំវិញសូមស្រែករក	ព្រះម្ចាស់ឱ្យមកជួយសង្គ្រោះ
	ព្រះអង្គនឹងយាងមករំដោះ	ខ្ញុំផុតពីគ្រោះជាមិនខាន	។
១៨	ពេលតប់ប្រមល់ខ្ញុំស្រែកថ្ងូរ	ឥតមានឈប់ឈរគ្មានស្រាកស្រាន្ត
	ទាំងព្រឹកថ្ងៃត្រង់ល្ងាចឥតខាន	ព្រះអង្គទ្រង់បានសណ្តាប់ខ្ញុំ	។
១៩	ទោះបីសត្រូវលើកគ្នីគ្នា	មកវាយប្រហារទូលបង្គំ
	ក៏ទ្រង់រំដោះផុតទុក្ខធំ	ជួយឱ្យរូបខ្ញុំរស់ជីវិត	។
២០	ព្រះម្ចាស់គ្រងរាជ្យពីដើមមក	ធ្វើជាជម្រកដ៏ស្ថេរស្ថិត
	ទ្រង់ព្រះសណ្តាប់ពាក្យខ្ញុំពិត	ឱ្យបច្ចាមិត្តបាក់មុខអស់	។
	ពួកគេទាំងនោះមិនព្រមផ្លាស់	ប្តូរគំនិតចាស់ទាល់តែសោះ
	ធ្វើមិនដឹងឮអ្វីទាំងអស់	មិនគោរពស្មោះស្ម័គ្រខ្លាចព្រះ	។
២១	អ្នកនោះតែងតែវាយប្រហារ	មិត្តភក្តិផងណាមិនគិតសោះ
	បំពានសន្យាពីមុនអស់	ដែលគេធ្លាប់ស្មោះទៅទៀតផង	។
២២	ពាក្យគេផ្អែមល្ហែមជាងទឹកឃ្មុំ	ពិរោះរងំឥតមានហ្មង
	ចិត្តកាចឃោរឃៅពាលយង់ឃ្នង	គេមានបំណងតែប្រយុទ្ធ	។
២៣	ចូរផ្ញើជីវិតលើព្រះម្ចាស់	នោះមិនប្រទះក្តីតក់ស្លុត
	ព្រះអង្គគាំទ្រអ្នកឱ្យផុត	ពីភ័យរន្ធត់មានសេរី	។
២៤	សូមព្រះជាម្ចាស់ឱ្យគេធ្លាក់	ជួយច្រានទម្លាក់កុំប្រណី
	ព្រោះគេសុទ្ធតែជនអប្រីយ៍	ឃាតករប្រល័យជីវិតមនុស្ស	។
	សូមកុំឱ្យពួកគេរស់រាន	អាយុវែងបានយូរឱ្យសោះ
	ចំណែកឯរូបខ្ញុំវិញនោះ	ទុកចិត្តស្ម័គ្រស្មោះតែព្រះអង្គ	។

ទំនុកតម្កើងលេខ ៥៦ (៥៥) បទព្រហ្មគីតិ

២	ឱព្រះម្ចាស់ថ្លាថ្លៃ	សូមប្រណីហើយមេត្តា
	មនុស្សច្រើនណាស់ណា	វាយប្រហារទូលបង្គំ	។
៣	ជារៀងរាល់ខែឆ្នាំ	សត្រូវចាំចង់គំនុំ
	ដេញវាយប្រហារខ្ញុំ	ធ្វើឫកធំមកប្រយុទ្ធ	។
៤	ឱព្រះជាម្ចាស់អើយ	ថ្ងៃនេះហើយខ្ញុំតក់ស្លុត
	ភ័យខ្លាចញ័ររន្ធត់	ផ្ញើជីវិតលើព្រះអង្គ	។
៥	ខ្ញុំកោតសរសើរព្រះ	បន្ទូលច្បាស់មិនដែលឆ្គង
	ទុកចិត្តលើព្រះអង្គ	ខ្ញុំគ្មានហ្មងមិនខ្លាចអ្វី	។
៦	ជារៀងរាល់ថ្ងៃខែ	គេតែងតែតិះដៀលស្តី
	ឱរាខ្ញុំរីងរៃ	មនុស្សចង្រៃតាមផ្តន្ទា	។
៧	គេឃ្លាំចាំតាមដាន	មិនដែលខានរាល់វេលា
	រកឱកាសផ្តន្ទា	ចង់ប្រហារខ្ញុំឱ្យក្ស័យ	។
៨	ឱព្រះជាអម្ចាស់	សូមដាក់ទោសកុំប្រណី
	តាមតែមនុស្សព្រៃផ្សៃ	កុំប្រណីដល់សោះឡើយ	។
៩	ព្រះអង្គជ្រាបយ៉ាងច្បាស់	ខ្ញុំរងទោសទុក្ខឥតស្បើយ
	ទ្រង់ជ្រាបមិនកន្តើយ	ទឹកភ្នែកខ្ញុំរាល់វេលា	។
១០	ថ្ងៃខ្ញុំស្រែករកព្រះ	ជាអម្ចាស់លើលោកា
	សត្រូវថយគ្រប់គ្នា	ខ្ញុំដឹងថាព្រះជួយខ្ញុំ	។
១១	ខ្ញុំកោតខ្លាចខ្លាំងណាស់	សន្យាច្បាស់ឥតបន្លំ
	ព្រះបន្ទូលរងំ	ធ្វើឱ្យខ្ញុំស្ញប់ស្ញែងក្រៃ	។
១២	ខ្ញុំទុកចិត្តលើព្រះ	ជាអម្ចាស់រៀងរាល់ថ្ងៃ
	មនុស្សដែលតែងតែក្ស័យ	អាចធ្វើអ្វីរូបខ្ញុំបាន ?	។
១៣	ឱព្រះជាម្ចាស់អើយ	ពេលនេះហើយមិនហ៊ានខាន
	ថ្វាយតង្វាយប៉ុន្មាន	ដែលខ្ញុំបានពោលបែរបន់	។
១៤	ដ្បិតទ្រង់បានរំដោះ	ខ្ញុំឱ្យរស់រានមានជន្ម
	ការពារគ្រាអាសន្ន	មិនឱ្យមានអ្វីរំខាន	។
	ឱ្យខ្ញុំបានដើរឆ្ពោះ	រកភក្ត្រព្រះដោយសុខសាន្ត
	ក្រោមពន្លឺថ្កើងថ្កាន	បំភ្លឺស្ថានមនុស្សលោក	។

ទំនុកតម្កើងលេខ ៥៧ (៥៦) បទព្រហ្មគីតិ

២	ឱព្រះជាម្ចាស់	សូមមេត្តាប្រោស	អាណិតមេត្តា
	ដ្បិតទូលបង្គំ	ពឹងរាល់វេលា	ជ្រកក្រោមឫទ្ធា
		ចេស្តាបារមី	។
៣	ខ្ញុំស្រែកហៅរក	សូមព្រះយាងមក	ប្រញាប់ឃ្មាតខ្មី
	ព្រះខ្ពស់បំផុត	លើភពផែនដី	ប្រទានសព្វអ្វី
		តាមខ្ញុំប្រាថ្នា	។
៤	សូមទ្រង់ប្រទាន	សង្គ្រោះពីស្ថាន	បរមសុខណា
	សូមជួយកម្ចាត់	សត្រូវឫស្យា	សម្តែងមេត្តា
		ករុណាដល់ខ្ញុំ	។
៥	សត្រូវនាំគ្នា	ព័ទ្ធខ្ញុំដូចជា	សត្វសិង្ហដ៏ធំ
	ចាំស៊ីសាច់មនុស្ស	ដូចមានគំនុំ	វាមើលមកខ្ញុំ
		ដូចនំចំណី	។
៦	ឱព្រះម្ចាស់អើយ	កុំគង់កន្តើយ	សម្តែងបារមី
	ឧត្តុង្គឧត្តម	ថ្កុំថ្កើងថ្លាថ្លៃ	ចែងចាំងលើដី
		រស្មីត្រចង់	។
៧	សត្រូវរបស់	រូបខ្ញុំទាំងអស់	ប្រុងប្រៀបប៉ុនប៉ង
	គេរាយអន្ទាក់	ចាំដាក់ខ្ញុំផង	ចាប់ខ្ញុំតែម្តង
		យកទៅសម្លាប់	។
	គេជីករណ្តៅ	ធំហើយសែនជ្រៅ	ហើយគេពួនស្តាប់
	ពេលណាខ្ញុំធ្លាក់	គេនឹងមកចាប់	តែមិនចំណាប់
		ភ្លាត់ធ្លាក់ខ្លួនឯង	។
៨	បពិត្រព្រះម្ចាស់	ខ្ញុំទុកចិត្តច្បាស់	លើទ្រង់ក្រៃលែង
	ទុកចិត្តទាំងស្រុង	បារមីជាក់ស្តែង	ខ្ញុំសូមសម្តែង
		បទទំនុកថ្មី	។
៩	ព្រលឹងខ្ញុំអើយ	កុំនៅកន្តើយ	ប្រញាប់ឃ្មាតខ្មី
	ឱឃឹមនិងពិណ	កុំនៅស្ងៀមអី	បន្លឺបទថ្មី
		ដាស់ថ្ងៃឱ្យរះ	។
១០	ឱព្រះម្ចាស់អើយ	រូបខ្ញុំនេះហើយ	នឹងតម្កើងព្រះ
	នៅក្នុងចំណោម	ប្រជាទាំងអស់	លើកព្រះដោយស្មោះ
		ឱ្យជាតិផ្សេងយល់	។
១១	ដ្បិតព្រះហឫទ័យ	ករុណាប្រណី	ព្រះម្ចាស់ខ្ពស់ដល់
	ទៅលើផ្ទៃមេឃ	ឥតមានកិច្ចកល	បារមីខ្ពស់ដល់
		វេហាស៍អាកាស	។
១២	ព្រះជាម្ចាស់អើយ	កុំនៅកន្តើយ	បង្ហាញឱ្យច្បាស់
	បារមីឧត្តុង្គ	ឧត្តមត្រចះ	ព្រះខ្ពង់ខ្ពស់ណាស់
		នៅលើមេឃា	។
	សូមឱ្យសិរី	រុងរឿងថ្លាថ្លៃ	ភ្លឺមហិមា
	រស្មីចែងចាំង	នៅលើវេហា	ភ្លឺខ្លាំងអស្ចារ្យ
		លើដីទាំងមូល	។

ទំនុកតម្កើងលេខ ៥៨ (៥៧) បទពាក្យ ៧

២	ឱពួកចៅក្រមទាំងឡាយអើយ	ពាក្យអ្នកនិយាយពេលកាត់ក្តី
	ជាពាក្យត្រឹមត្រូវល្អប្រពៃ	ហើយមានអត្ថន័យពិតឬទេ ?	។
៣	តែផ្ទុយទៅវិញតាមការពិត	ពួកអ្នកប្រព្រឹត្តទុច្ចរិតទ្វេ
	ដោយចិត្តចេតនាឥតកែប្រែ	ចូលចិត្តគិតតែរឿងឃោរឃៅ	។
៤	ឯមនុស្សវៀចវេរចិត្តអាក្រក់	ល្បិចខ្មៅកខ្វក់សែនអាស្រូវ
	មានតាំងពីខ្លួនគេស្ថិតនៅ	មិនដឹងខុសត្រូវក្នុងផ្ទៃម្តាយ	។
៥	ខ្លួនគេមានពិសដូចសត្វពស់	មិនខ្ចីស្រណោះមិនខ្វល់ខ្វាយ
	ធ្វើថ្លង់មិនឮសព្វស័ព្ទអ្វី	ដូចពស់ចង្រៃដ៏កំណាច	។
៦	មិនដែលចេះឮសូរសំឡេង	ទោះគ្រូចាស់ក្មេងមានអំណាច
	គ្រូអាលម្ពាយចាប់ពស់កាច	អ្នកមានអំណាចពូកែក្តី	។
៧	ឱព្រះជាអម្ចាស់ខ្ញុំអើយ	សូមកុំកន្តើយកុំប្រណី
	កាច់បំបាក់ធ្មេញមនុស្សអប្រីយ៍	ចង្កូមសត្វព្រៃអស់ទាំងនោះ	។
៨	សូមឱ្យជីវិតគេរសាត់	ប៉ើងបក់ទៅបាត់កុំស្រណោះ
	ដូចទឹកដែលហូរធ្លាក់ពីជ្រោះ	ឱ្យពួកគេនោះរាបដូចស្មៅ	។
៩	សូមឱ្យពួកគេដូចជន្លេន	ដងខ្លួនពត់ពេនហើយវារទៅ
	ស្ងួតខ្លួនក្រៀមក្រោះដោយកម្តៅ	ដូចកូនដែលត្រូវធ្លាក់រលូត	។
១០	ព្រះម្ចាស់ធ្វើឱ្យពួកមនុស្ស	ចិត្តពាលទុយ៌សវិនាសផុត
	ដូចជាបន្លាដ៏ស្រួចមុត	ត្រូវក្រៀមក្រោះស្វិតខ្យល់ផាត់ទៅ	។
១១	រីឯពួកមនុស្សសុចរិត	រីករាយក្នុងចិត្តមិនអាស្រូវ
	ដោយព្រះសងសឹកនឹងសត្រូវ	ឱ្យគេស្គាល់នូវក្តីវិនាស	។
១២	មនុស្សម្នានាំគ្នាពោលថា	អ្នកត្រង់ល្អជាចម្រើនច្បាស់
	ព្រោះយើងមានព្រះជាអម្ចាស់	នៅជួយជំរះក្តីមនុស្សលោក	។

ទំនុកតម្កើងលេខ ៥៩ (៥៨) បទកាកគតិ

២	ឱព្រះម្ចាស់អើយ	សូមកុំកន្តើយ	ជួយរំដោះខ្ញុំ
	ឱ្យរួចពីខ្មាំង	សត្រូវតូចធំ	វាមានគំនុំ
		ចង់ចាប់ធ្វើបាប	។
៣	សូមជួយរំដោះ	ជីវិតឱ្យរស់	ជារៀងដរាប
	ផុតពីពួកពាល	ពីអ្នកសាងបាប	អាក្រក់ឆ្អេះឆ្អាប
		ពួកជនស្រេកឈាម	។
៤	ឱព្រះអម្ចាស់	ទោះខ្ញុំពុំខុស	ក៏គេព្យាយាម
	ចាំស្ទាក់ប្រហារ	ជីវិតខ្ញុំភ្លាម	ពួកគេព្យាយាម
		ប្រឆាំងជានិច្ច	។
៥	ទោះខ្ញុំមិនខុស	ក៏ពួកទាំងនោះ	នៅតែមានល្បិច
	ពួនចាំស្ទាក់ចាប់	រូបខ្ញុំមិនភ្លេច	សូមកុំកែគេច
		បែរភក្ត្រមើលផង	។
៦	ឱព្រះម្ចាស់អើយ	ព្រះអង្គនេះហើយ	ជាព្រះខ្ពស់ខ្ពង់
	លើពិភពលោក	គ្មានអ្វីស្មើទ្រង់	សូមជួយខ្ញុំផង
		ដាក់ទោសពួកក្បត់	។
៧	ល្ងាចគេនាំគ្នា	រូតរះម្នីម្នា	តាមពេលកំណត់
	ដើរលូដូចឆ្កែ	ដែលរសាត់ព្រាត់	ដើរក្រឡឹងព័ទ្ធ
		ជុំក្រុងទាំងអស់	។
៨	មាត់របស់គេ	ពោលមិនគិតទេ	ពាក្យអសុរស
	ដូចដាវដ៏មុត	និយាយគំរោះ	ពួកគេទាំងនោះ
		ថាគ្មានគេឮ	។
៩	ឱព្រះម្ចាស់អើយ	ព្រះអង្គនេះហើយ	អ្នកសើចបញ្ឈឺ
	ឱ្យពួកទាំងនោះ	ចុកចាប់ផ្សាឈឺ	គ្រប់ជាតិដឹងឮ
		ទ្រង់សើចចំអក	។
១០	រូបខ្ញុំខំប្រឹង	មើលទៅព្រះអង្គ	មិនឱ្យខានខក
	ទ្រង់ជាកម្លាំង	កំពែងជម្រក	មិនឱ្យខ្មាំងមក
		ពាធាបំភ័យ	។
១១	ព្រះរបស់ខ្ញុំ	ហឫទ័យទូលំ	ទូលាយឥតបី
	មេត្តាករុណា	សន្តោសប្រណី	ឱ្យខ្ញុំសប្បាយ
		ដោយខ្មាំងចាញ់ដៃ	។
១២	ព្រះម្ចាស់ជាខែល	ការពារក្រវែល	រក្សាយប់ថ្ងៃ
	សូមកុំប្រហារ	ជីវិតគេក្ស័យ	ក្រែងជនប្រុសស្រី
		ភ្លេចជ័យព្រះអង្គ	។
១៣	ពេលគេហាមាត់	និយាយស្តីសុទ្ធ	ពាក្យមិនទំនង
	សូមឱ្យពួកគេ	ជាប់អន្ទាក់ផង	ព្រោះចិត្តគេប៉ង
		កុហកផ្តាសា	។
១៤	សូមបំផ្លាញឱ្យ	ពួកគេអន្តរាយ	វិនាសអសារ
	នោះទើបពួកគេ	បានដឹងច្បាស់ថា	ព្រះគឺក្សត្រា
		ជាម្ចាស់ពិភព	។
១៥	ល្ងាចគេនាំគ្នា	រូតរះម្នីម្នា	ឥតមានឈរឈប់
	ដើរលូដូចឆ្កែ	ទាំងថ្ងៃទាំងយប់	ដើរព័ទ្ធឥតឈប់
		ជុំវិញទីក្រុង	។
១៦	ពួកគេដើរជ្រក	តត្រុកទៅមក	ដោយក្តីសៅហ្មង
	ស្វែងរកអាហារ	ចម្អែតពោះផង	គ្រហឹមម្តងៗ
		ព្រោះស៊ីមិនគ្រប់	។
១៧	រីឯខ្មុំវិញ	ក្នុងចិត្តពោរពេញ	សរសើរមិនឈប់
	ច្រៀងលើកតម្កើង	ព្រះម្ចាស់ជាម្លប់	ថ្លែងមិនឈរឈប់
		ហឫទ័យមេត្តា	។
	ពេលព្រឹកព្រលឹម	ថ្លែងទាំងញញឹម	ពីក្តីករុណា
	របស់ព្រះអង្គ	ជាកំពែងការ	ជួយខ្ញុំនេះណា
		ពេលអាសន្នភ័យ	។
១៨	បពិត្រព្រះម្ចាស់	ព្រះអង្គជាព្រះ	មានឫទ្ធិបារមី
	ខ្ញុំនឹងច្រៀងស្មូត	បទតម្កើងថ្វាយ	ព្រះអង្គនេះហើយ
		ជាកំពែងមាំ	។

ទំនុកតម្កើងលេខ ៦០ (៥៩) បទព្រហ្មគីតិ

៣	ឱព្រះជាម្ចាស់អើយ	ហេតុម្តេចឡើយក៏បោះបង់
	ចោលខ្ញុំនៅត្រមង់	ព្រមទាំងឱ្យបរាជ័យ	។
	ទោះបីទ្រង់ពិរោធ	ឬខ្ញាល់ក្រោធសូមប្រណី
	ជួយខ្ញុំផុតពីក្ស័យ	រួចពីដៃសត្រូវផង	។
៤	ព្រះអង្គប្រើបារមី	ឱ្យផែនដីប្រេះតែម្តង
	របេះចេញទៀតផង	សូមជួយចងភ្ជិតឱ្យជាប់	។
៥	ព្រះអង្គធ្វើឱ្យរាស្រ្ត	ទ្រង់ទាំងអស់រស់មិនគាប់
	វេទនាមិនឈរឈប់	រងទោសទុក្ខក្តៅឈឺផ្សា	។
៦	ព្រះអង្គបានប្រទាន	ទង់ជ័យមានជាសញ្ញា
	ដល់អ្នកខ្លាចចេស្តា	អាចផុតពីបរាជ័យ	។
៧	សូមយាងមកសង្គ្រោះ	យើងទាំងអស់ដោយបារមី
	តបកុំបង្អង់អី	រាស្រ្តប្រុសស្រីរួចជីវិត	។
៨	ព្រះមានបន្ទូលពី	ដែលជាទីដ៏វិសុទ្ធ
	ទ្រង់យកជ័យបំផុត	ទាំងចែកស្រុកស៊ីគែមឱ្យ	។
	យើងនឹងវាស់ជ្រលង	ស៊ូកូតផងមិនបណ្តោយ
	ទុកឱ្យរាស្រ្តចែកចាយ	ជាអំណោយដ៏ថ្លាថ្លៃ	។
៩	កាឡាតស្រុកយើងទេ	ម៉ាណាសេដ៏ប្រពៃ
	នោះសុទ្ធតែជាដី	ដ៏ថ្លាថ្លៃរបស់យើង	។
	ប្រាអ៊ីមដូចមួកដែក	ល្អអនេកគួរតម្កើង
	យូដាជាស្រុកយើង	ដូចដំបងរាជ្យវិសេស	។
១០	ម៉ូអាប់ជាកន្លែង	ដែលយើងស្វែងមិនប្រហែស
	ស្បែកជើងយើងលាងបោះ	លើដីនោះគឺអេដុម	។
១១	លោកនេះមាននរណា	ចិត្តហានក្លាអាចដឹកនាំ
	រូបខ្ញុំឱ្យចូលចំ	ក្រុងអេដុមដ៏អស្ចារ្យ	។
១២	ឱព្រះជាម្ចាស់អើយ	ព្រះអង្គហើយដែលហានក្លា
	តែទ្រង់ប្រែទៅជា	មិនមេត្តាប្រែបោះបង់	។
១៣	សូមយាងជួយយើងខ្ញុំ	ឱ្យប្រឆាំងសត្រូវផង
	ដ្បិតអ្វីសព្វទាំងពួង	មកពីមនុស្សជួយមិនបាន	។
១៤	បើទ្រង់គង់ជាមួយ	ខ្ញុំមិនព្រួយមិនរំខាន
	ព្រះអង្គបង្ក្រាបបាន	ពួកសាមាន្យឱ្យវិនាស	។

ទំនុកតម្កើងលេខ ៦១ (៦០) បទកាកគតិ

២	ឱព្រះម្ចាស់អើយ	កុំគង់ព្រងើយ	សូមព្រះសណ្តាប់
	យកហឫទ័យទុក	ដាក់ហើយត្រងត្រាប់	ពាក្យអង្វរគាប់
		ទូលបង្គំផង	។
៣	ពេលខ្ញុំនៅឆ្ងាយ	សន្លឹមអន្លាយ	ហាក់អស់កម្លាំង
	ខ្ញុំស្រែកហៅរក	ព្រះនាមព្រះអង្គ	សូមដឹកនាំខ្ញុំ
		ទៅកាន់ថ្មខ្ពស់	។
៤	ព្រះអង្គជាទី	ជម្រករមណី	រឹងមាំឥតខ្ចោះ
	ជាប៉មមាំមួន	កំពែងដ៏ខ្ពស់	ព្រះជាអម្ចាស់
		តទល់សត្រូវ	។
៥	ទូលបង្គំចង់	រស់និត្យនៅក្នុង	ពន្លាពេកកូវ
	របស់ព្រះអង្គ	រហូតតទៅ	ហើយសូមក្រាបនៅ
		ក្រោមម្លប់ព្រះអង្គ	។
៦	ឱព្រះម្ចាស់អើយ	ព្រះអង្គនេះហើយ	តែងស្តាប់ពាក្យខ្ញុំ
	ព្រះអង្គប្រទាន	មកទូលបង្គំ	មរតកដ៏ធំ
		បម្រុងទុកឱ្យ	។
៧	សូមទ្រង់ប្រទាន	ព្រះរាជាមាន	ជន្មាមិនថយ
	អាយុយឺនយូរ	សតវត្សទៅក្រោយ	ជាម្លប់ផ្តល់ឱ្យ
		ប្រជាប្រុសស្រី	។
៨	សូមឱ្យមហាក្សត្រ	គ្រងរាជ្យរហូត	ក្រោមភក្រ្តម្ចាស់ថ្លៃ
	រហូតតទៅ	ដោយព្រះហឫទ័យ	មេត្តាប្រណី
		ករុណាស្មោះស្ម័គ្រ	។
៩	ខ្ញុំនឹងតម្កើង	ព្រះម្ចាស់ខ្ពស់ឡើង	រាល់ថ្ងៃឥតអាក់
	ឥតឈប់ឥតឈរ	ឱ្យសមនឹងពាក្យ	សន្យាលាយល័ក្ខណ៍
		ចំពោះព្រះអង្គ	។

ទំនុកតម្កើងលេខ ៦២ (៦១) បទពាក្យ ៧

២	ពេលខ្ញុំនៅក្បែរព្រះអម្ចាស់	ចិត្តរីករាយណាស់មិនព្រួយសោះ
	ព្រោះតែព្រះអង្គជួយសង្គ្រោះ	ជីវិតខ្ញុំរស់ផុតមរណា	។
៣	ព្រះអង្គប្រៀបដូចជាបន្ទាយ	វាយបុកមិនធ្លាយដូចថ្មដា
	ជាកំពែងមាំរងការពារ	ខ្ញុំមិនវេទនាមិនព្រួយភ័យ	។
៤	តើអ្នករាល់គ្នានៅតែចង់	ប្រហារបំបង់អ្នកនេះថ្វី
	ដូចចង់រំលំកំពែងជ័យ	ដេកដួលទៅដីឬយ៉ាងណា ?	។
៥	គេចង់ឱ្យអ្នកនោះអាប់យស	និយាយកុហកពាក្យមុសា
	មាត់គេឱ្យពរចិត្តឫស្យា	ដាក់បណ្តាសាមិនស្រណោះ	។
៦	មែនហើយខ្ញុំនឹងបានស្ងប់ចិត្ត	ពេលបាននៅជិតព្រះអម្ចាស់
	ខ្ញុំតែងសង្ឃឹមគ្មានក្រឡះ	លើព្រះអម្ចាស់របស់ខ្ញុំ	។
៧	ព្រះអង្គតែមួយជាថ្មដា	សង្គ្រោះពាំងពារខ្មាំងជិតជុំ
	ទ្រង់ជាកំពែងដ៏រឹងមាំ	ខ្ញុំផុតទុក្ខធំគ្មានសៅហ្មង	។
៨	ឯការសង្គ្រោះនិងសិរី	រុងរឿងថ្លាថ្លៃខ្ញុំតែម្តង
	ស្ថិតលើព្រះអម្ចាស់ទាំងស្រុង	ព្រោះតែព្រះអង្គជាថ្មដា	។
៩	ឱប្រជាជនទាំងអស់អើយ	ចូរកុំកន្តើយនាំគ្នីគ្នា
	ផ្ញើកាយផ្ញើចិត្តទាំងជន្មា	លើព្រះគ្រប់គ្រាតរៀងទៅ	។
	ចូរទូលទុក្ខសោកក្តីកង្វល់	សព្វអស់អំពល់កុំទុកនៅ
	ទ្រង់ជាជម្រកមិនអាស្រូវ	ដរាបរៀងទៅជាប់ជានិច្ច	។
១០	ជីវិតដូចមួយដង្ហើមខ្លី	ដូចជាគ្មានន័យគ្មានប្រាកដ
	រួមទាំងរូបកាយទាំងដួងចិត្ត	ស្រាលហួសបើគិតឥតតម្លៃ	។
១១	មិនត្រូវប្រកាន់ចិត្តហឹង្សា	ឬក៏ប្រាថ្នាការកេងគៃ
	ទោះកើតសម្បត្តិធនច្រើនក្តី	កុំនឹកមមៃជាប់ឱ្យសោះ	។
១២	ខ្ញុំឮព្រះម្ចាស់បន្ទូលថា	អំណាចចេស្តាគ្រប់ទាំងអស់
	ស្ថិតលើព្រះអង្គព្រះសង្គ្រោះ	មានអំណាចខ្ពស់ហួសផែនដី	។
១៣	ព្រះអង្គប្រកបដោយចេស្តា	ហឫទ័យករុណាត្រាប្រណី
	ព្រះអង្គតបស្នងមនុស្សប្រុសស្រី	តាមតែអ្វីៗគេប្រព្រឹត្ត	។

ទំនុកតម្កើងលេខ ៦៣ (៦២) បទកាកគតិ

២	បពិត្រព្រះម្ចាស់	ទ្រង់ពិតជាព្រះ	នៃទូលបង្គំ
	ខ្ញុំខំស្វែងរក	មិននៅសំងំ	តាំងពីព្រលឹម
		ស្វះស្វែងដើររក	។
	រូបខ្ញុំស្រេកឃ្លាន	ព្រះប្រាជ្ញាញាណ	អាល័យនឹងភ្នក
	ដូចដីប្រេះបែក	គ្មានភ្លៀងធា្លក់មក	ខ្ញុំដើរកាត់ជ្រក
		គ្រប់ទីទិសា	។
៣	សូមឱ្យរូបខ្ញុំ	បានឃើញព្រះអង្គ	ក្នុងទីសក្ការ
	ខ្ញុំចង់ឃើញណាស់	បារមីឫទ្ធា	អំណាចចេស្តា
		របស់ព្រះអង្គ	។
៤	ព្រះទ័យមេត្តា	សន្តោសករុណា	ប្រសើរឥតហ្មង
	ខ្ញុំនឹងពោលពាក្យ	សរសើរតម្កើង	សិរីរុងរឿង
		ព្រះម្ចាស់មានឫទ្ធិ	។
៥	ខ្ញុំសូមថ្លាថ្លែង	អំណរក្រៃលែង	អស់មួយជីវិត
	ខ្ញុំសូមលើកដៃ	បង្គំថ្វាយថ្វាត់	ព្រះនាមវិសុទ្ធ
		ព្រះអង្គតែមួយ	។
៦	ខ្ញុំនឹងសប្បាយ	ឥតមានខ្វល់ខ្វាយ	ព្រោះមានព្រះជួយ
	បានសុខរមនា	គ្មានភ័យគ្មានព្រួយ	ព្រះម្ចាស់តែមួយ
		ខ្ញុំច្រៀងតម្កើង	។
៧	រៀងរាល់រាត្រី	ខ្ញុំនឹកស្រមៃ	ទៅដល់ព្រះអង្គ
	អស់ពេញមួយយប់	រាត្រីកន្លង	នឹកដល់ព្រះអង្គ
		ឥតមានពេលភ្លេច	។
៨	ព្រោះតែព្រះអង្គ	បានជួយតម្រង់	រូបខ្ញុំជានិច្ច
	ខ្ញុំច្រៀងខ្ញុំរាំ	សប្បាយពន់ពេក	ឥតមានរារែក
		ក្រោមម្លប់បារមី	។
៩	ចិត្តខ្ញុំជំពាក់	ឥតមានស្រាន្តស្រាក	នឹកគិតអាល័យ
	ទៅដល់ព្រះម្ចាស់	ទោះយប់ឬថ្ងៃ	ទ្រង់គាំទ្រឱ្យ
		រីកមុខស្រស់ថា្ល	។
១០	រីឯអស់អ្នក	ដែលចាំពួនស្ទាក់	ចង់ផ្តាច់សង្ខារ
	សូមឱ្យគេធា្លក់	ជ្រោះជ្រៅក្រៃណា	ជ្រៅឥតឧបមា
		រកស្មានមិនត្រូវ	។
១១	ឱ្យពួកគេស្លាប់	ដោយមុខដាវកាប់	កុំបីសល់នៅ
	សាច់ឈាមរហែក	ខ្ទេចខ្ទីដូចម្សៅ	ដូចសាច់សត្វត្រូវ
		ចចកខាំហែក	។
១២	ព្រោះតែព្រះម្ចាស់	ស្តេចត្រេកអរណាស់	រីករាយអនេក
	អ្នកស្បថក្នុងនាម	ព្រះម្ចាស់ល្អឯក	ឯអ្នកដែលវៀច
		បាត់មាត់សូន្យឈឹង	។

ទំនុកតម្កើងលេខ ៦៤ (៦៣) បទព្រហ្មគីតិ

២	ឱព្រះជាម្ចាស់អើយ	សូមប្រោសហើយព្រះសណ្តាប់
	រូបខ្ញុំភ័យញ័រញាប់	ជួយការពារជីវិតផង	។
៣	រារាំងរួចពីដៃ	ពួកព្រៃផ្សៃពាលយង់ឃ្នង
	ឃុបឃិតចិត្តប៉ុនប៉ង	សូមព្រះអង្គជួយឱ្យផុត	។
៤	គេប្រើពាក្យសម្តី	មិនប្រពៃដូចអាវុធ
	ដូចដាវដែលស្រួចមុត	ផ្តាច់ជីវិតមិនបង្អង់	។
៥	ពួកគេលួចប្រហារ	មនុស្សធម្មតាស្លូតទៀងត្រង់
	លបលួចពីក្រោយខ្នង	ដោយមិនក្រែងរអែងចិត្ត	។
៦	គេនាំគ្នានិយាយ	ពួកគេឱ្យធ្វើទុច្ចរិត
	រួចហើយគេឃុបឃឹត	រួមគំនិតដាក់អន្ទាក់	។
៧	បង្ករឿងឧក្រិដ្ឋ	ទុច្ចរិតឥតស្ទើរស្ទាក់
	ទាំងពោលស្តីបញ្ជាក់	ថាគ្មានអ្នកដឹងឮឡើយ	។
៨	តែព្រះមានឫទ្ធា	បានប្រហារពួកគេហើយ
	មិនឱ្យដឹងខ្លួនឡើយ	គេដេកដួលរងរបួស	។
៩	ពាក្យពេចន៍គ្មានអត្ថន័យ	និយាយស្តីច្រើនតែហួស
	នាំឱ្យពួកគេនោះ	ត្រូវវិនាសអន្តរាយ	។
១០	មនុស្សនាំគ្នាស្ញែង	ប្រកាថ្លែងគ្រប់ៗគ្នា
	ពីស្នាព្រះហស្តថ្លៃ	ហើយយល់អ្វីដែលទ្រង់ធ្វើ	។
១១	អ្នកសុចរិតសប្បាយ	គេឱ្យនកាយក្រោមបន្ទើរ
	ព្រះម្ចាស់ដែលជាធ្នើ	អ្នកទៀងត្រង់លើកតម្កើង	។

ទំនុកតម្កើងលេខ ៦៥ (៦៤) បទពាក្យ ៧

២	ឱព្រះម្ចាស់អើយខ្ញុំតម្កើង	លើកព្រះអង្គឡើងនៅក្នុងក្រុង
	ស៊ីយ៉ូនហើយថ្វាយតង្វាយផង	ស្របតាមពាក្យប៉ងបន់សន្យា	។
៣	ព្រះអង្គតែងតែព្រះសណ្តាប់	ពាក្យមនុស្សរ៉ាយរ៉ាប់សព្វវេលា
	មនុស្សលោកក៏អាចចរយាត្រា	រកព្រះនាមាទ្រង់បានដែរ	។
៤	ខ្ញុំមានកំហុសទោសធ្ងន់ណាស់	មានតែព្រះអង្គទើបជួយប្រែ
	លើកលែងកំហុសទោសបង្វែរ	ឱ្យខ្ញុំល្ហើយល្ហែរួចទុក្ខភ័យ	។
៥	អស់អ្នកដែលទ្រង់បានជ្រើសរើស	គេនឹងប្រទះសុខសិរី
	រស់ក្នុងសក្ការដ៏ប្រពៃ	វិសេសថ្លាថ្លៃលើលោកា	។
	យើងខ្ញុំនឹងបានស្កប់ស្កល់ចិត្ត	ព្រោះបាននៅជិតក្នុងវិហារ
	ទទួលព្រះពរក្នុងពន្លា	ដំណាក់ថ្លៃថ្លាដ៏វិសុទ្ធ	។
៦	បពិត្រព្រះម្ចាស់ព្រះសង្គ្រោះ	ទ្រង់គឺជាព្រះដ៏សុចរិត
	ប្រជាជិតឆ្ងាយនាយសមុទ្រ	គេផ្ញើជិវិតលើព្រះអង្គ	។
៧	ព្រះអង្គពង្រឹងភ្នំទាំងឡាយ	មិនឱ្យទន់ជ្រាយរឹងមាំម៉ឹង
	ដោយសារចេស្តាព្រះថ្កុំថ្កើង	រុងរឿងខ្ពស់ឡើងដោយបារមី	។
៨	ព្រះអង្គធ្វើឱ្យទឹកសមុទ្រ	រលកបោកផុតស្ងប់ធ្វើហី
	ទាំងចលាចលមនុស្សប្រុសស្រី	ស្ងប់គ្មានឮអ្វីគួរតក់ស្លុត	។
៩	អ្នកដែលរស់នៅដាច់ស្រយាល	នាំគ្នាជ្រួលច្រាលភ័យរន្ធត់
	ឃើញទីសម្គាល់អស្ចារ្យផុត	លែងភ័យតក់ស្លុតសប្បាយសើច	។
១០	ព្រះអង្គថែទាំមើលរក្សា	បោចស្មៅបន្លារែកទឹកស្រោច
	ផែនដីជោកសព្វមិនឱ្យខ្លោច	រួចបានបង្កើតផលបរិបូរណ៍	។
	អស់ទាំងទន្លេព្រែកបឹងស្ទឹង	ព្រៀបពេញទំហឹងពេញហៀរហូរ
	ពេញទាំងបឹងបួទាំងដងអូរ	ព្រះអង្គចាប់ផ្គូដូចតទៅ	។
១១	ព្រះអង្គស្រោចស្រពស្រែចំការ	ទាំងដីផងណារាបគ្មានស្មៅ
	មានភ្លៀងធ្លាក់មកទឹកដក់នៅ	តាមវាលស្រែស្រូវពូជធាដុះ	។
១២	ដល់ពេលច្រូតកាត់ព្រះអង្គបាន	ផ្តល់ស្រូវជាទានដ៏សប្បុរស
	ដែលជាអំណោយដ៏ខ្ពង់ខ្ពស់	សម្បូរទាំងអស់ឥតមានខ្វះ	។
១៣	រីឯនៅវាលរហោស្ថាន	មានស្មៅដុះច្រើនពោរពេញពាស
	ភ្នំតូចភ្នំធំភ្នំទាំងអស់	ញញឹមស្រស់បស់ដោយអំណរ	។
១៤	ហ្វូងសត្វពាសពេញតាមវាលស្មៅ	ជ្រលងពេញទៅស្រូវដ៏ល្អ
	អ្វីសព្វសារពើសូរអ៊ូអរ	ច្រៀងដោយអំណរដ៏លើសលប់	។

ទំនុកតម្កើងលេខ ៦៦ (៦៥) បទកាកគតិ

១	ប្រជាប្រុសស្រី	នៅលើផែនដី	ទាំងអស់គ្នាអើយ
	នាំគ្នាអបអរ	កុំបីកន្តើយ	អបអរសប្បាយ
		សាទរព្រះម្ចាស់	។
២	ចូរច្រៀងតម្កើង	សិរីរុងរឿង	ព្រះនាមរបស់
	ព្រះម្ចាស់នៃយើង	បារមីខ្ពង់ខ្ពស់	តម្កើងថ្កើងយស
		ថ្វាយដល់ព្រះអង្គ	។
៣	ចូរទូលទ្រង់ថា	បពិត្រព្រះជា	អម្ចាស់នៃយើង
	គ្រប់ស្នាព្រះហស្ត	វិសេសថ្កុំថ្កើង	យើងសូមលើកឡើង
		ឱ្យខ្ពស់ដរាប	។
	ពួកខ្មាំងសត្រូវ	ព្រះអង្គចាំនៅ	នាំគ្នាលុតក្រាប
	ដោយឃើញចេស្តា	ឫទ្ធានុភាព	ព្រះអង្គរៀងរៀប
		ធំធេងកន្លង	។
៤	មនុស្សលើដី	ទាំងប្រុសទាំងស្រី	ក្រាបថ្វាយព្រះអង្គ
	គេនាំគ្នាច្រៀង	លើកសិរីផង	ច្រៀងបទតម្កើង
		ព្រះនាមល្បាញល្បី	។
៥	ចូរយើងនាំគ្នា	ពីគ្រប់ទិសា	កុំនៅធ្វើហី
	មើលស្នាព្រះហស្ត	សុទ្ធតែប្រពៃ	ដែលទ្រង់លកលៃ
		ធ្វើមកមនុស្សលោក	។
៦	ទ្រង់ធ្វើឱ្យទឹក	សមុទ្រគគ្រឹក	ប្រែជារីងគោក
	ឱ្យប្រជាជន	ដើរឆ្លងទៅមក	យើងផុតទុក្ខសោក
		ប្រែជាសប្បាយ	។
៧	ព្រះអង្គគ្រប់គ្រង	អស់កល្បយូរលង់	ដោយឫទ្ធិបារមី
	ទ្រង់ត្រួតពិនិត្យ	ប្រជាប្រុសស្រី	កុំឱ្យគ្រប់កាយ
		ក្រោកប្រឆាំងបាន	។
៨	ប្រជាជនអើយ	កុំនៅកន្តើយ	រួញរាខកខាន
	តម្កើងព្រះអង្គ	ខ្ពស់ហួសអស់ស្ថាន	នោះយើងនឹងបាន
		សុខដោយបារមី	។
៩	ព្រះអង្គប្រទាន	ពួកយើងឱ្យមាន	ជីវិតស្រស់ថ្មី
	ទ្រង់មិនបណ្តោយ	ឱ្យភ្លាត់ដល់ដី	មិនឱ្យយើងក្ស័យ
		រួចរស់ជីវិត	។
១០	បពិត្រព្រះម្ចាស់	ព្រះអង្គជ្រាបច្បាស់	ល្បងលមើលចិត្ត
	ព្រះអង្គលុតដំ	យើងខ្ញុំពិតៗ	ដូចគេបន្សុទ្ធ
		ដុតមើលមាសប្រាក់	។
១១	ព្រះអង្គបាននាំ	ឱ្យពួកយើងខ្ញុំ	ជួបទុក្ខលំបាក
	ឱ្យរស់វេទនា	កំព្រាតោកយ៉ាក	ឈឺចាប់ឥតស្រាក
		ឥតស្រាន្តពេលណា	។
១២	ព្រះអង្គបណ្តោយ	សត្រូវមុខក្រោយ	ជិះជាន់សិរសា
	យើងឆ្លងកាត់ភ្លើង	ក្តៅឥតឧបមា	ឆ្លងទឹកផងណា
		ឈឺផ្សារពេកពន់	។
	ប៉ុន្តែព្រះអង្គ	មិនបានបោះបង់	នាំប្រជាជន
	ហើយទ្រង់ប្រទាន	ភោគផលធានធន	ឱ្យប្រជាជន
		សម្បូណ៌មិនខ្វះ	។
១៣	រូបខ្ញុំចូលស្នាក់	ក្នុងព្រះដំណាក់	របស់ព្រះម្ចាស់
	ទាំងនាំតង្វាយ	ដុតមកថ្វាយព្រះ	ឥតមានចន្លោះ
		ពាក្យដែលបានបន់	។
១៤	ពាក្យពេចន៍អ្វីណា	ដែលខ្ញុំសច្ចា	កាលគ្រាអាសន្ន
	ពេលនេះដាក់ថ្វាយ	លាពាក្យបំណន់	ដែលខ្ញុំបានបន់
		គ្រប់គ្រាគ្រប់កាល	។
១៥	ខ្ញុំជ្រើសរើសយក	សត្វធាត់ៗមក	ពពែគោឈ្មោល
	ព្រមទាំងចៀមផង	យកចេញពីក្រោល	ក្លិនសាយភាយដល់
		ទៅឯព្រះអង្គ	។
១៦	សូមអ្នកទាំងអស់	ដែលធ្លាប់ស្ម័គ្រស្មោះ	លើព្រះគ្មានហ្មង
	ខ្ញុំនឹងរៀបរាប់	គ្រប់កិច្ចដែលទ្រង់	មានមកកន្លង
		លើរូបកាយខ្ញុំ	។
១៧	ខ្ញុំស្រែកហៅរក	សូមព្រះយាងមក	កុំគង់សំងំ
	ខ្ញុំស្រែកដង្ហោយ	រកព្រះឧត្តម	សូរសំឡេងខ្ញុំ
		តម្កើងទ្រង់ផង	។
១៨	បើខ្ញុំជាមនុស្ស	ទុច្ចរិតទុយ៌ស	អាក្រក់សៅហ្មង
	នោះព្រះអង្គនឹង	ជ្រាបមិនសល់ហោង	ទោះវាចាផង
		ក៏ទ្រង់មិនស្តាប់	។
១៩	ប៉ុន្តែព្រះម្ចាស់	សព្វព្រះទ័យណាស់	ទ្រង់ព្រះសណ្តាប់
	ហឫទ័យទូលាយ	ស្ម័គ្រស្មោះដរាប	ទ្រង់ចូលចិត្តស្តាប់
		ពាក្យខ្ញុំអង្វរ	។
២០	សូមថ្កើងព្រះម្ចាស់	ខ្ពង់ខ្ពស់ពេកណាស់	ដោយចិត្តស្មោះសរ
	ទ្រង់ពុំបដិសេធ	ពាក្យខ្ញុំអង្វរ	ទ្រង់ប្រទានពរ
		ដល់ខ្ញុំជានិច្ច

ទំនុកតម្កើងលេខ ៦៧ (៦៦) បទពាក្យ ៧

២	ឱព្រះម្ចាស់អើយសូមមេត្តា	សន្តោសករុណាដល់យើងខ្ញុំ
	ប្រទានព្រះពរដ៏ឧត្តម	ទតមើលយើងខ្ញុំដោយសប្បុរស	។
៣	ដូច្នេះមនុស្សលើផែនដី	ស្គាល់មាគ៌ាថ្លៃព្រះអម្ចាស់
	ក្នុងចំណោមជនជាតិទាំងអស់	ស្គាល់ការសង្គ្រោះនៃព្រះអង្គ	។
៤	បពិត្រព្រះម្ចាស់អើយសូមឱ្យ	ប្រជាទាំងឡាយនាំគ្នាថ្កើង
	ព្រះនាមព្រះអង្គឱ្យខ្ពស់ឡើង	នាមព្រះនៃយើងគ្រប់ៗកាយ	។
៥	ប្រជាទាំងឡាយនាំគ្នាច្រៀង	បន្លឺសំនៀងដោយសប្បាយ
	ដ្បិតទ្រង់គ្រប់គ្រងគ្មាននឿយណាយ	ប្រជាទាំងឡាយមិនឆ្មៃឆ្មើង	។
៦	បពិត្រព្រះម្ចាស់អើយសូមឱ្យ	ប្រជាទាំងឡាយនាំគ្នាថ្កើង
	ព្រះនាមព្រះអង្គឱ្យខ្ពស់ឡើង	នាមព្រះនៃយើងគ្រប់ៗកាយ	។
៧	ផែនដីបង្កើតនូវភោគផល	មិនឱ្យយើងខ្វល់ពីអន្តរាយ
	ព្រះម្ចាស់ជាព្រះយើងទាំងឡាយ	ប្រទានពរឱ្យសុខគ្រប់គ្រា	។
៨	សូមទ្រង់ប្រទានពរឱ្យយើង	និងមនុស្សទាំងពួងគ្រប់អាត្មា
	ទាំងអ្នករស់នៅឆ្ងាយផងណា	មនុស្សលើលោកាខ្លាចព្រះអង្គ	។

ទំនុកតម្កើងលេខ ៦៨ (៦៧) បទព្រហ្មគីតិ

២	ពេលព្រះម្ចាស់ក្រោកឡើង	សត្រូវប៉ើងបាក់ខ្លបខ្លាច
	ចេស្តាឫទ្ធិអំណាច	អ្នកកោងកាចក៏រត់ចេញ	។
៣	ទ្រង់ឱ្យគេរលាយ	សូន្យរូបកាយដូចជាផ្សែង
	ដូចថ្ងៃក្តៅហួតហែង	ឱ្យក្រមួនរលាយអស់	។
៤	រីឯជនសុចរិត	មិនប្រព្រឹត្តរឿងទុយ៌ស
	គេរីករាយខ្លាំងណាស់	នៅចំពោះភក្ត្រព្រះម្ចាស់	។
៥	ចូរច្រៀងលើកតម្កើង	ព្រះនៃយើងកុំក្រឡះ
	ត្រួសត្រាយផ្លូវថ្វាយព្រះ	ជិះរទេះកាត់វេហាស៍	។
៦	ព្រះម្ចាស់គង់នៅក្នុង	ដំណាក់ទ្រង់ល្អអស្ចារ្យ
	ព្រះអង្គជាបិតា	អស់កុមារដែលកំព្រា	។
	ព្រះអង្គទ្រង់កាត់ក្តី	ឱ្យអស់ស្រីដែលវេទនា
	មេម៉ាយគ្រប់ៗគ្នា	អ្នកវេទនាឱ្យមានផ្ទះ	។
៧	រីអ្នកនៅជាប់គុក	មិនស្រណុកស្ទើរព្រាត់ប្រាស
	ទ្រង់បើករួចស្រឡះ	បានភ្លឺច្បាស់ចិត្តរីករាយ	។
	ឯពួកអ្នកបះបោរ	គេឆោឡោមិនសប្បាយ
	គេនឹងទៅរស់ឆ្ងាយ	នៅឯនាយដីហួតហែង	។
៨	បពិត្រព្រះជាម្ចាស់	មានឫទ្ធិច្បាស់គួរស្ញប់ស្ញែង
	នៅពេលដែលទ្រង់យាង	នាំរាស្រ្តនៅរហោស្ថាន	។
៩	ផែនដីស្ទើរប្រេះបែក	ទាំងផ្ទៃមេឃមិនស្រាកស្រាន្ត
	ភ្លៀងធ្លាក់គ្រប់ទីស្ថាន	ដូចកាលយាងពីស៊ីណៃ	។
១០	បពិត្រព្រះអម្ចាស់	ព្រះអង្គប្រោសយើងគ្មានភ័យ
	ភ្លៀងធ្លាក់ត្រជាក់ដី	រាស្រ្តក្រក្រីរស់ឡើងវិញ	។
១១	ប្រជារាស្រ្តព្រះអង្គ	បានមកតាំងលំនៅពេញ
	ដោយទ្រង់បានបញ្ចេញ	ក្តីសប្បុរសដល់ទុរគត	។
១២	ពេលព្រះចេញបញ្ជា	ស្ត្រីមានគ្នាច្រើនបំផុត
	ដូចទ័ពស្រួចមោះមុត	ចេញប្រកាសជាដំណឹង	។
១៣	ពេលនោះស្តេចបាក់ទ័ព	ពលខ្លះស្លាប់បាត់សូន្យឈឹង
	ស្ត្រីៗដែលនៅក្នុង	ស្ទុះមកវឹងចែកជយភណ្ឌ	។
១៤	ចុះតើអ្នករាល់គ្នា	ម្តេចប្រែជាពួនសំងំ
	សម្រាកក្នុងជំរំ	ម្តេចមិនខំមើលបក្សា	។
	សូម្បីតែសត្វព្រាប	មានមាសជាប់ពេញស្លាបវា
	រោមមានរស្មីថ្លា	ខ្លួនបក្សាភ្លឺរន្ទាល	។
១៥	ពេលព្រះម្ចាស់មានឫទ្ធិ	ធើ្វឱ្យស្តេចនិងជនពាល
	បាក់ទ័ពមានទាំងព្រឹក	ធ្លាក់មកកើលភ្នំសាលម៉ូន	។
១៦	បាសានគឺជាភ្នំ	ដ៏សែនធំកំពូលច្រើន
	ជាសក្ការសំខាន់	គួរគយគន់ដ៏ស្មោះស្ម័គ្រ	។
១៧	ហេតុម្តេចមកក្រវែល	នឹងភ្នំដែលព្រះជ្រើស្នាក់
	ច្រណែននឹងដំណាក់	ព្រះជាម្ចាស់គង់រហូត	។
១៨	ទ័ពសេះរបស់ទ្រង់	ច្រើនរញង់រាប់លានកោដិ
	ព្រះអង្គគង់រហូត	លើស៊ីណៃជាសក្ការ	។
១៩	ឱព្រះម្ចាស់ថ្កើងថ្កាន	យាងឡើងស្ថានខ្ពស់អស្ចារ្យ
	នាំឈ្លើយទៅផងណា	យញ្ញសក្ការទ្រង់ព្រមយក	។
	សូម្បីអ្នកប្រឆាំង	ធ្លាប់តតាំងច្រើនគរគោក
	ក៏ទ្រង់នៅតែយក	មិនឱ្យគេខកចិត្តឡើយ	។
២០	សូមសរសើរតម្កើង	ព្រះនៃយើងមិនកន្តើយ
	ដ្បិតមានតែទ្រង់ហើយ	ជួយគាំទ្រសង្គ្រោះយើង	។
២១	ព្រះម្ចាស់ព្រះសង្គ្រោះ	យើងឱ្យរស់ទ្រង់មិនឆ្មើង
	ព្រះម្ចាស់អាចជួយយើង	ឱ្យរួចផុតពីមរណា	។
២២	ពួកខ្មាំងទុកសក់វែង	ចង់ប្រជែងនឹងសាសនា
	ប៉ុន្តែគេច្បាស់ជា	ត្រូវផ្តន្ទាជាមិនខាន	។
២៣	ទ្រង់មានព្រះបន្ទូល	នឹងប្រមូលពីបាសាន
	ត្រឡប់វិលវិញថ្កាន	មកពីបាតសមុទ្រភ្លាម	។
២៤	ដើម្បីឱ្យអស់អ្នក	ដែលច្បាស់ជាក់ដើរលុយឈាម
	ពួកឆ្កែមិនទីមទាម	មកលិទ្ធឈាមពួកសត្រូវ	។
២៥	ឱព្រះជាអម្ចាស់	មនុស្សឃើញច្បាស់មិនអាស្រូវ
	ទ្រង់ឈ្នះអស់សត្រូវ	ទ្រង់ចូលទៅទីសក្ការ	។
២៦	អ្នកច្រៀងដើរខាងមុខ	អ្នកភ្លេងទុកខាងក្រោយណា
	នារីច្រើនអាត្មា	ដើរត្រៀបត្រាទាំងវាយភ្លេង	។
២៧	ចូរលើកតម្កើងព្រះ	ជាអម្ចាស់ខ្ពស់ក្រៃលែង
	តម្កើងកុំរអែង	ទាំងពូជពង្សអ៊ីស្រាអែល	។
២៨	មានទាំងកុលសម្ព័ន្ធ	បេនយ៉ាមីនដើរអ៊ូអែ
	បន្ទាប់មកហូរហែ	ជាសម្ពន្ធនៃយូដា	។
	មានសម្លៀកបំពាក់	ល្អឥតអាក់ដ៏ថ្លៃថ្លា
	រួចអ្នកនាំមាគ៌ា	សាប់ប៊ូឡូនណែថាលី	។
២៩	ព្រះអ្នកសព្វព្រះទ័យ	ឱ្យអ្នកថ្លៃខ្លាំងគ្មានពីរ
	សូមព្រះម្ចាស់ជីវី	បង្ហាញឫទ្ធីសង្គ្រោះ	។
៣០	ពីដំណាក់ព្រះអង្គ	ក្រុងយេរូសាឡឹមខ្ពស់
	កន្លែងស្តេចទាំងនោះ	យកតង្វាយថ្វាយសក្ការ	។
៣១	សូមព្រះអង្គគំរាម	កុំទីមទាមសូមផ្តន្ទា
	ពួកនោះវាដូចជា	សត្វនានាតាមដើមត្រែង	។
	ពួកអ្នកដឹកនាំស្រុក	ដើរតត្រុកគ្មានកោតក្រែង
	ដូចជាគោបាតែង	តែរត់លេងពីរនាក់កូន	។
	ពួកគេនឹងចុះចូល	មកមីរមូលឱនក្រាបលូន
	យកប្រាក់ជាជំនូន	តង្វាយជូនព្រះជាម្ចាស់	។
៣២	អេស៊ីបចាត់ទូតមក	លើកដៃរកដោយរូតរះ
	អេត្យូពីស្វែងស្វះ	រកព្រះម្ចាស់ពីចម្ងាយ	។
៣៣	នគរនានាអើយ!	កុំកន្តើយចូរច្រៀងថ្វាយ
	ព្រះម្ចាស់ដូចពណ្ណរាយ	លេងភ្លេងថ្វាយកុំរួញរា	។
៣៤	ទ្រង់គង់លើរាជរថ	ឡើងខ្ពស់ផុតផ្ទៃមេឃា
	បន្លឺសូរខ្ទ័រខ្ទារ	ព្រះសូរសៀងនៃព្រះអង្គ	។
៣៥	ចូរយើងប្រកាសថា	ឫទ្ធិចេស្តារបស់ទ្រង់
	ចេស្តានៃព្រះអង្គ	ទ្រង់គ្រងលើអ៊ីស្រាអែល	។
៣៦	ឱព្រះជាម្ចាស់អើយ	ព្រះអង្គហើយជាព្រះដែល
	មានឫទ្ធិបារមីក្រែល	អ៊ីស្រាអែលកោតខ្លបខ្លាច	។
	ព្រះអង្គទ្រង់ប្រទាន	រាស្រ្តឱ្យមានចិត្តអង់អាច
	មានកម្លាំងអំណាច	សូមសរសើរថ្កើងព្រះអង្គ	។

ទំនុកតម្កើងលេខ ៦៩ (៦៨) បទកាកគតិ

២	ឱ! ព្រះជាម្ចាស់	សូមជួយសង្គ្រោះ	ឱ្យរួចខ្លួនផង
	ទឹកដល់ច្រមុះ	ខ្ញុំភ័យកន្លង	ស្លាប់គ្រានេះម្តង
		តៃហោងសូន្យបង់	។
៣	ខ្ញុំផុងក្នុងភក់	ស្រូបបឺតជញ្ជក់	ធ្លាក់ចុះលិចលង់
	ធា្លក់ជ្រៅសែនជ្រៅ	គ្មានអ្វីទ្រទ្រង់	ហើយខ្ញុំកំពុង
		កាន់តែលិចទៅ	។
៤	ខ្ញុំអស់កម្លាំង	ស្រែកមិនបានខ្លាំង	នៅខំស្រែកហៅ
	ស្រែកឡើងស្ងួតក	ទន្ទឹងមើលផ្លូវ	ផ្សាភ្នែកពេកកូវ
		មើលផ្លូវយូរពេក	។
៥	ខ្មាំងទូលបង្គំ	នាំគ្នាស្អប់ខ្ញុំ	មានច្រើនអនេក
	ពួកវាទាំងនោះ	ពុំអាចដាក់លេខ	ច្រើនក្រាស់ស្កះស្អេក
		ជាងសរសៃសក់	។
	ពួកគេទាំងនោះ	កម្លាំងខ្លាំងហួស​​​​	មិននៅដំអក់
	គេចង់ព្យាបាទ	ខ្ញុំមនុស្សត្រង់ស្មោះ	មិនលួចអ្វីសោះ
		ឱ្យខ្ញុំសងគេ	។
៦	ឱ! ព្រះជាម្ចាស់	ព្រះអង្គជ្រាបច្បាស់	ទោសខ្ញុំឡើងទ្វេ
	បាបទាំងប៉ុន្មាន	លាក់មិនបានទេ	ព្រះម្ចាស់មុខតែ
		ជ្រាបអស់គ្មានសល់	។
៧	ឱព្រះជាម្ចាស់	ទ្រង់ពិតជាព្រះ	លើភពទាំងមូល
	សូមកុំឱ្យអ្នក	ជឿសង្ឃឹមដល់	មានទុក្ខកង្វល់
		ត្រូវខ្មាសគេអី	។
៨	ខ្ញុំទ្រាំឱ្យគេ	ប្រមាថដៀលជេរ	មើលងាយពេកក្រៃ
	ព្រោះតែព្រះអង្គ	ខ្មាសគេស្ទើរក្ស័យ	អាប់ឱនសិរី
		ព្រោះតែព្រះអង្គ	។
៩	ញាតិទូលបង្គំ	មិនរាប់អានខ្ញុំ	ពួកគេបោះបង់
	បងប្អូនបង្កើត	ក៏មិនស្មោះត្រង់	ចាត់ទុកខ្ញុំនឹង
		ដូចជនបរទេស	។
១០	នោះមកពីខ្ញុំ	ចិត្តនៅមូលផ្តុំ	ស្រឡាញ់ខ្លាំងណាស់
	ដំណាក់ព្រះអង្គ	គេតិះដៀលត្មះ	តែពាក្យទាំងនោះ
		ត្រូវធា្លក់លើខ្ញុំ	។
១១	ខ្ញុំយំសោយសោក	តមមិនបរិភោគ	បាយចំណីនំ
	ធ្វើឱ្យមនុស្សម្នា	រឹតតែជេរខ្ញុំ	ប្រមាថគួនគុំ
		ថែមហើយថែមទៀត	។
១២	រូបខ្ញុំស្លៀកពាក់	របៀបជាអ្នក	កាន់ទុក្ខឥតឃ្លាត
	ពួកគេនាំគ្នា	ខំប្រឹងឈ្លបឆ្លៀត	យករឿងនេះទៅ
		សើចលេងសប្បាយ	។
១៣	មិនតែប៉ុណ្ណោះ	គេទាំងស្រីប្រុស	នាំគ្នានិយាយ
	ដៀលត្មះពីខ្ញុំ	តាមផ្សារជិតឆ្ងាយ	ចំអកឡកឡឺយ
		អាក្រក់ក្រៃលែង	។
១៤	ឱ! ព្រះអម្ចាស់	ពេលឥឡូវនេះ	សូមទ្រង់សម្តែង
	ហឫទ័យសន្តោស	ករុណាធំធេង	សង្គ្រោះកុំលែង
		សូមឆ្លើយតបផង	។
១៥	សូមរំដោះខ្ញុំ	រួចពីភក់ជ្រាំ	ទុក្ខសោកសៅហ្មង
	ពីកណ្តាប់ដៃ	អ្នកស្អប់ខ្ញុំផង	សូមជួយស្រោចស្រង់
		ឱ្យផុតទឹកជ្រៅ	។
១៦	កុំឱ្យខ្សែទឹក	ត្របាញ់គគ្រឹក	ទាញវឹងយកទៅ
	រូបខ្ញុំឱ្យលង់	ក្នុងទឹកជ្រោះជ្រៅ	កុំឃុំខ្ញុំនៅ
		ក្នុងអណ្តូងអី	។
១៧	ឱព្រះអម្ចាស់	ព្រះអង្គមានព្រះ	ហឫទ័យប្រណី
	ដ្បិតព្រះអង្គមាន	ករុណាឥតបី	មេត្តាប្រណី
		ទតមកខ្ញុំផង	។
១៨	សូមព្រះអង្គកុំ	លាក់ភក្ត្រពីខ្ញុំ	សូមឆ្លើយទាក់ទង
	ខ្ញុំអ្នកបម្រើ	វេទនាកន្លង	ក្នុងគ្រានេះម្តង
		ជួយខ្ញុំប្រញាប់	។
១៩	សូមយាងមកជិត	ហើយលោះជីវិត	រំដោះខ្ញុំឆាប់
	សូមជួយពីខ្មាំង	ឱ្យខ្ញុំត្រឡប់	វិលទៅកាន់កាប់
		មាតុភូមិវិញ	។
២០	ព្រះអង្គជ្រាបច្បាស់	ថាខ្ញុំគេត្មះ	បន្ថោកជ្រក់ជ្រេញ
	បង្អាប់កិត្តិយស	ខ្ញុំខ្មាសគេពេញ	តែអ្នកនោះវិញ
		ព្រះអង្គស្គាល់ជាក់	។
២១	ពាក្យត្មះតិះដៀល	ចាក់រុកឆ្កឹះឆ្កៀល	ឈឺស្មើទាត់ធាក់
	ចិត្តខ្ញុំខ្លោចផ្សា	ឈឺចុកញ័រញាក់	គិតថាមានម្នាក់
		នឹងអាណិតខ្ញុំ	។
	ក្រែងមានអ្នកជួយ	តែឥតមានមួយ	ខ្ញុំកើតទុក្ខធំ
	សង្ឃឹមថាមាន	គេមកលួងលោម	រំលែកទុក្ខខ្ញុំ
		តែរកមិនបាន	។
២២	ខ្ញុំឃ្លានបរិភោគ	គេមិនបានយក	អាហារហូបបាន
	បែរយកថ្នាំពុល	ឱ្យខ្ញុំក្ស័យប្រាណ	ទោះស្រេកពុំបាន
		ស្គាល់រសជាតិទឹក	។
២៣	សូមឱ្យពិធី	ជប់លៀងវក់វី	ក្លាយជាវរវឹក
	ចាប់គេចងជាប់	គ្នាច្រើនសន្ធឹក	ទាំងយប់ល្ងាចព្រឹក
		ឱ្យវិនាសខ្ចាយ	។
២៤	ឱ្យភ្នែកពួកគេ	ស្រវាំងឡើងទ្វេ	មើលមិនយល់អ្វី
	កុំឱ្យគេឈ្នះ	ឱ្យបរាជ័យ	វិនាសក្សិណក្ស័យ
		រហូតតទៅ	។
២៥	សូមព្រះអង្គជះ	ពិរោធទាំងអស់	លើពួកសត្រូវ
	ធ្វើទារុណកម្ម	គេឆាប់ៗទៅ	កុំបង្អង់នៅ
		យល់ដល់គេឡើយ	។
២៦	សូមឱ្យលំនៅ	របស់គេត្រូវ	ស្ងាត់ជ្រងំហើយ
	កុំឱ្យមានម្នាក់	រស់នៅបានឡើយ	ទីនោះឯងហើយ
		ជារហោស្ថាន	។
២៧	ដ្បិតគេបានធ្វើ	ទុក្ខម្នេញមិនស្ទើរ	ព្យាបាទរំខាន
	ដល់អ្នកដែលព្រះ	បានដាក់ទោសទណ្ឌ	របួសសែនធ្ងន់
		គេឈឺចាប់ណាស់	។
២៨	សូមព្រះអង្គដាក់	ទោសឱ្យដល់ថ្នាក់	កុំប្រែក្រឡះ
	តាមគេប្រព្រឹត្ត	ចិត្តពាលទុយ៌ស	សូមកុំស្រណោះ
		អាឡោះមេត្តា	។
២៩	សូមទ្រង់លុបឈ្មោះ	គេចេញពីមនុស្ស	ឱ្យគេមរណា
	សូមដកគេចេញ	ពីឈ្មោះមនុស្សា	សុចរិតមេត្តា
		កុំឱ្យមានសល់	។
៣០	រីឯរូបខ្ញុំ	ទុរគតក្រៀមក្រំ	ចុកចាប់ខ្វាយខ្វល់
	ឱ! ព្រះម្ចាស់អើយ	ជួយសង្គ្រោះដល់	ខ្ញុំអ្នកទីទ័ល
		សូមស្តារវិញផង	។
៣១	ខ្ញុំនឹងច្រៀងកោត	សរសើរបំផុត	ព្រះនាមព្រះអង្គ
	ប្រកាសពីភាព	ថ្កុំថ្កើងរឿងរុង	របស់ព្រះអង្គ
		បម្រើគោរព	។
៣២	តម្កើងដូច្នេះ	ប្រសើរត្រចះ	និងជាទីសព្វ
	ព្រះហឫទ័យ	ព្រះអម្ចាស់គាប់	លើសពីការដុត
		កូនគោទៅថ្វាយ	។
៣៣	អស់អ្នកទុរគត	វេទនាក្រខ្សត់	ចិត្តគេសប្បាយ
	គេមានអំណរ	ឥតមានខ្វល់ខ្វាយ	នឹងរស់វែងឆ្ងាយ
		អាយុយឺនយូរ	។
៣៤	ដ្បិតទ្រង់សណ្តាប់	ពាក្យអ្នកសុភាព	និយាយទូលថ្ងូរ
	ទ្រង់មិនលះបង់	អ្នកជាប់ឃុំយូរ	ឱ្យទួញទ្រហោរ
		នៅឯកោទេ	។
៣៥	ផែនដីផ្ទៃមេឃ	សមុទ្រជ្រៅជ្រែក	កុំនៅទំនេរ
	សត្វក្នុងសមុទ្រ	ទាំងអស់ហែលរេ	ចូរតម្កើងដែរ
		សិរីរុងរឿង	។
៣៦	ដ្បិតព្រះជាម្ចាស់	ទ្រង់នឹងសង្គ្រោះ	ក្រុងយើងខ្ពស់ឡើង
	ទីក្រុងនានា	ស្រុកយូដាផង	ព្រះអង្គកសាង
		ថ្មីវិញទាំងអស់	។
	ឱ្យប្រជាជន	ចូលមកបន្ទន់	ចូលជ្រកនៅរស់
	កន្លែងដើមវិញ	ឥតមានបង់បោះ	សុខស្រួលឥតខ្ចោះ
		កាន់កាប់ជាថ្មី	។
៣៧	កូនចៅរបស់	អ្នកបម្រើស្មោះ	នឹងទទួលដី
	មកទុកជាកេរ	មរតកប្រពៃ	បវរថ្លាថ្លៃ
		តាំងជាលំនៅ	។

ទំនុកតម្កើងលេខ ៧០ (៦៩) បទពាក្យ ៧

២	ឱព្រះជាម្ចាស់នៃខ្ញុំអើយ	សូមយាងមកហើយជួយរំដោះ
	ករុណាអាសូរដោយសង្គ្រោះ	ប្រោសខ្ញុំឱ្យរស់បានឆាប់ៗ	។
៣	ឱ្យអ្នកព្យាបាទជីវិតខ្ញុំ	ត្រូវជួបទុក្ខធំកេរ្តិ៍ឈ្មោះអាប់
	ទាំងអ្នកដែលប៉ងចង់ធ្វើបាប	វិនាសឆុតឆាប់ត្រូវដកខ្លួន	។
៤	សូមឱ្យអ្នកដែលសើចចំអក	លែបខាយឡឺយឡកវិនាសសូន្យ
	ត្រូវបរាជ័យមិនរួចខ្លួន	កេរ្តិ៍ឈ្មោះសាបសូន្យអន្តរាយ	។
៥	រីអ្នកស្រឡាញ់ការសង្គ្រោះ	ឱ្យគេទាំងនោះជួបសប្បាយ
	ថ្លែងឥតឈប់ឈរទាំងយប់ថ្ងៃ	សូមលើកសិរីថ្កើងព្រះម្ចាស់	។
៦	ឱព្រះអម្ចាស់ទូលបង្គំ	រស់រងទុក្ខធំវេទនាណាស់
	សូមយាងមកជួយដោយរូតរះ	មេត្តាសង្គ្រោះកុំបង្អង់	។

ទំនុកតម្កើងលេខ ៧១ (៧០) បទពាក្យ ៧

១	បពិត្រព្រះម្ចាស់ខ្ញុំសូមជ្រក	ក្រោមម្លប់ជម្រកនៃព្រះអង្គ
	កុំឱ្យរូបខ្ញុំត្រូវបាត់បង់	ទាំងកេរ្តិ៍ឈ្មោះផងអាប់អាសារ	។
២	ដោយព្រះអង្គមានព្រះហឫទ័យ	សុចរិតថ្លាថ្លៃសូមមេត្តា
	ផ្ទៀងព្រះកាណ៌ស្តាប់ខ្ញុំវាចា	សង្គ្រោះជីវ៉ាឱ្យបានរស់	។
៣	សូមព្រះអង្គទៅជាថ្មដា	លាក់ពួនអាត្មាខ្ញុំផុតគ្រោះ
	ទ្រង់សព្វព្រះទ័យប្រណីប្រោស	ជីវិតខ្ញុំរស់បានសុខសាន្ត	។
៤	ឱព្រះជាម្ចាស់សូមរំដោះ	ខ្ញុំពីឃ្នាងខ្នោះពួកតិរច្ឆាន
	រួចផុតពីដៃជនសាមាន្យ	មនុស្សទាំងប៉ុន្មានប៉ងយាយី	។
៥	បពិត្រព្រះជាអម្ចាស់អើយ	រូបខ្ញុំនេះហើយផ្ញើជីវី
	ជីវិតលើទ្រង់គ្រប់នាទី	សង្ឃឹមតាំងពីនៅក្មេងវ័យ	។
៦	ខ្ញុំសូមពឹងផ្អែកលើព្រះអង្គ	តាំងពីនៅក្នុងផ្ទៃម្តាយថ្លៃ
	ព្រះអង្គតែមួយសព្វព្រះទ័យ	ដុសខាត់កែឆ្នៃខ្ញុំឥតឈប់	។
៧	មនុស្សម្នាជាច្រើនចេះតែនឹក	ឆ្ងល់ខ្ញុំល្ងាចព្រឹកទាំងថ្ងៃយប់
	តាមពិតខ្ញុំមានព្រះជាម្លប់	ជិវិតខ្ញុំស្ងប់រៀងរហូត	។
៨	ខ្ញុំតែងពោលពាក្យកោតសរសើរ	ព្រះគ្មានអ្វីស្មើខ្ពស់បំផុត
	តម្កើងសិរីទ្រង់រហូត	ព្រះតែមួយគត់ទាំងយប់ថ្ងៃ	។
៩	ឥឡូវនេះខ្ញុំចាស់ជរា	ទ្រុឌទ្រោមគ្រាំគ្រាកម្លាំងថយ
	មេត្តាកុំបោះបង់ខ្ញុំឡើយ	កុំទុកខ្ញុំឱ្យនៅឯកា	។
១០	ដ្បិតខ្មាំងសត្រូវរបស់ខ្ញុំ	គេនៅជួបជុំពោលមុសា
	អស់អ្នកដែលឃ្លាំចាំប្រហារ	គេពិភាក្សាយោបល់គ្នា	។
១១	គេថាព្រះម្ចាស់លែងអើពើ	លែងការពារមើលថែគាំពារ
	ចូរដេញតាមចាប់គាត់គ្រប់គ្នា	ព្រោះគ្មាននរណាជួយគាត់បាន	។
១២	ឱ! ព្រះជាម្ចាស់អើយសូមកុំ	យាងចាកចោលខ្ញុំចេញចាកស្ថាន
	សូមយាងមកជួយកុំបីខាន	ឆាប់ៗនឹងបានខ្ញុំធូរស្បើយ	។
១៣	សូមឱ្យអស់អ្នកដែលប៉ុនប៉ង	ប្រហារខ្ញុំបង់ត្រូវអន្តរាយ
	សាបសូន្យទាំងឈ្មោះបាត់ទាំងកាយ	កិត្តិយសប្រែក្លាយបាត់សូន្យឈឹង	។
១៤	រីឯរូបខ្ញុំ ខ្ញុំសង្ឃឹម	លើព្រះជាធំជាពំនឹង
	នៅតែសរសើរគិតសញ្ជឹង	កោតក្រែងព្រះអង្គជាដរាប	។
១៥	ពីព្រឹកដល់ល្ងាចខ្ញុំនៅតែ	តំណាលហូរហែនិយាយប្រាប់
	ពីស្នាព្រះហស្តថ្លៃគួរគាប់	ពីដើមរៀបរាប់ច្រើនមហិមា	។
១៦	បពិត្រព្រះជាម្ចាស់ខ្ញុំអើយ	ព្រោះព្រះអង្គហើយយកអាសា
	ខ្ញុំថ្កើងរំលឹកធម៌ករុណា	សុចរិតថ្លៃថ្លារបស់ទ្រង់	។
១៧	បពិត្រព្រះជាម្ចាស់ខ្ញុំអើយ	ទ្រង់អប់រំហើយគ្មានសៅហ្មង
	តាំងពីក្មេងទល់គ្រានេះម្តង	ចិត្តនៅចាំចងតែព្រះអង្គ	។
១៨	ឱ! ព្រះជាម្ចាស់ថ្លៃខ្ញុំអើយ	សក់សទៅហើយធ្មេញបាក់ផង
	ខ្ញុំចាស់ជរាគ្រានេះម្តង	សូមកុំបោះបង់ខ្ញុំចោលឡើយ	។
	ដើម្បីឱ្យខ្ញុំអាចប្រកាស	ពីស្នាព្រះហស្តព្រះម្ចាស់ថ្លៃ
	ប្រាប់អ្នកជាន់ក្រោយឱ្យយល់ន័យ	ឫទ្ធាបារមីព្រះជាម្ចាស់	។
១៩	បពិត្រព្រះជាម្ចាស់ខ្ញុំអើយ	ហឫទ័យល្វឹងល្វើយសុចរិតណាស់
	ដ្បិតទ្រង់ធ្វើការអស្ចារ្យខ្ពស់	ឱព្រះជាម្ចាស់គ្មានអ្នកដូច	។
២០	ព្រះអង្គបានធ្វើឱ្យយើងខ្ញុំ	ជួបអាសន្នធំឈឺថ្ងូរថ្ងួច
	ព្រះអង្គនឹងស្រង់ខ្ញុំឱ្យរួច	ជីវិតខ្ញុំដូចកើតជាថ្មី	។
២១	ព្រះនឹងប្រទានឱ្យរូបខ្ញុំ	មានកិត្តិយសធំរឹតប្រពៃ
	ព្រះអង្គសម្រាលទុក្ខជាថ្មី	ខ្ញុំរាល់ខែថ្ងៃមិនដែលខាន	។
២២	រីឯរូបខ្ញុំនឹងរៀបចំ	ចាប់ទាញប្រគុំឥតស្រាកស្រាន្ត
	ចាប៉ីកំដរលេងកំសាន្ត	ថ្លែងអរព្រះគុណព្រះអង្គខ្លាំង	។
	ដ្បិតព្រះអង្គមានព្រះហឫទ័យ	ស្មោះស្ម័គ្រប្រពៃខ្ញុំព្រមទាំង
	ដេញពិណច្រៀងរាំថ្វាយព្រះអង្គ	ព្រះម្ចាស់ផូរផង់អ៊ីស្រាអែល	។
២៣	ខ្ញុំនឹងលេងភ្លេងច្រៀងអំណរ	ព្រោះទ្រង់បន្តប្រោសឥតដែល
	ឱ្យខ្ញុំមានទុក្ខធ្ងន់ក្រាស់ក្រែល	រំដោះជីវិតខ្ញុំតទៅ	។
២៤	ខ្ញុំនឹងពោលថ្លែងពីសេចក្តី	សុចរិតប្រពៃគ្មានហ្មងសៅ
	ដ្បិតអ្នកដែលមានចិត្តអាស្រូវ	អ្នកនោះនឹងត្រូវអាម៉ាស់មុខ	។

ទំនុកតម្កើងលេខ ៧២ (៧១) បទកាកគតិ

១	ព្រះជាម្ចាស់អើយ	សូមប្រទានឱ្យ	រាជបុត្រនេះចេះ
	វិនិច្ឆ័យក្តី	តាមព្រះតម្រិះ	សុចរិតវិសេស
		របស់ព្រះអង្គ	។
២	សូមឱ្យរាជា	គ្រប់គ្រងគ្រប់គ្នា	ប្រជារាស្រ្តទ្រង់
	ដោយយុត្តិធម៌	សុចរិតផូរផង់	វិសេសឥតហ្មង
		ត្រឹមត្រូវតាមច្បាប់	។
៣	សូមឱ្យអស់ភ្នំ	ទាំងតូចទាំងធំ	ផ្តល់ផលគួរគាប់
	សម្បូរសប្បាយ	ឱ្យបានសព្វគ្រប់	នាំមកស្រោចស្រព
		ក្តីសុចរិតផង	។
៤	សូមរាជារក	យុត្តិធម៌មក	កុំបីមានហ្មង
	ដល់ជនក្រីក្រ	កម្សត់ទាំងពួង	ហើយកម្ទេចផង
		អ្នកដែលជិះជាន់	។
៥	បើព្រះអាទិត្យ	នៅតែរះពិត	ព្រមទាំងព្រះច័ន្ទ
	នៅតែបញ្ចេញ	រស្មីស្រទន់	សូមទ្រង់មានជន្ម
		យឺនយូរប្រពៃ	។
៦	សូមផ្តល់ព្រះពរ	សិរីបវរ	ដល់រាស្រ្តប្រុសស្រី
	ដូចជាភ្លៀងធ្លាក់	មកលើផែនដី	ត្រជាក់ឥតបី
		គ្មានសល់ចន្លោះ	។
៧	សូមឱ្យសេចក្តី	សុចរិតថ្លាថ្លៃ	ចម្រើនខ្ពង់ខ្ពស់
	នៅក្នុងរជ្ជកាល	រាជាអង្គនោះ	កុំបីមានទាស់
		សុខសាន្តតទៅ	។
៨	សូមព្រះរាជា	គ្រប់គ្រងកុំរា	កុំឱ្យហ្មងសៅ
	ពីសមុទ្រមួយ	មិនបង្អង់នៅ	រហូតដល់ទៅ
		ស្រុកដាច់ស្រយាល	។
៩	ប្រជាដែលរស់	តាមវាលទាំងនោះ	នឹងត្រេកត្រអាល
	ក្រាបថ្វាយបង្គំ	គ្រប់សម័យកាល	សត្រូវជ្រួលច្រាល់
		វិនាសអាសារ	។
១០	អស់ស្តេចទាំងឡាយ	នឹងយកតង្វាយ	មកថ្វាយករុណា
	ឥតមានខកខាន	មួយវេលាណា	ទាំងកោះនានា
		យកមកទាំងអស់	។
១១	ស្តេចទាំងប៉ុន្មាន	ឥតមានខកខាន	ចូលរួមដោយស្មោះ
	ក្រាបថ្វាយបង្គំ	រាជាទាំងអស់	ប្រជាទាំងនោះ
		បម្រើករុណា	។
១២	ទ្រង់នឹងរំដោះ	អ្នកក្រទាំងអស់	ដោយធម៌មេត្តា
	អ្នកទុរគតស្រែក	សុំក្តីករុណា	ព្រះអង្គរក្សា
		អ្នកគ្មានទីពឹង	។
១៣	ទ្រង់សែនអាណិត	អាសូរពេកពិត	អ្នកអត់លំនឹង
	និងជនកម្សត់	គ្មានអ្វីរំពឹង	ព្រះអម្ចាស់នឹង
		សង្គ្រោះជិវិត	។
១៤	ទ្រង់នឹងរំដោះ	ពួកគេឱ្យរស់	ពីពួកឧក្រិដ្ឋ
	ជនកាចសាហាវ	ពាលាទុច្ចរិត	ព្រោះតែជីវិត
		ថ្លៃថ្លាក្រៃលែង	។
១៥	សូមឱ្យរាជា	មានព្រះជន្មា	យឺនយូរអង្វែង
	គេនឹងយកមាស	មកថ្វាយទ្រង់ផង	អង្វរព្រះអង្គ
		ឥតមានឈប់ឈរ	។
១៦	សូមឱ្យក្នុងស្រុក	ស្រូវពេញជង្រុក	ផ្តល់ភោគផលល្អ
	តាមកំពូលភ្នំ	ក៏ឱ្យសម្បូរ	ប្រជាកុះករ
		កើនឡើងដូចស្មៅ	។
១៧	សូមឱ្យរាជា	មានព្រះនាមា	ល្បីល្បាញតទៅ
	នាមព្រះករុណា	ស្ថិតស្ថេរគង់នៅ	ដរាបរៀងទៅ
		លើដីក្រោមមេឃ	។
១៨	សូមលើកតម្កើង	ព្រះអង្គខ្ពស់ឡើង	ឥតមានអល់អែក
	ព្រះអ៊ីស្រាអែល	ល្អល្អះអនេក	ការអស្ចារ្យពេក
		ដែលទ្រង់សម្តែង	។
១៩	សូមលើកតម្កើង	ព្រះនាមថ្កុំថ្កើង	ព្រះអង្គគួរស្ញែង
	សូមឱ្យផែនដី	ទាំងមូលកោតក្រែង	សិរីចាំងចែង
		របស់ព្រះអង្គ	។

ទំនុកតម្កើងលេខ ៧៣ (៧២) បទពាក្យ ៧

១	ព្រះម្ចាស់ពិតជាមានព្រះទ័យ	សប្បុរសប្រពៃថ្លៃក្រៃក្រែល
	ចំពោះជនជាតិអ៊ីស្រាអែល	និងអស់អ្នកដែលចិត្តបរិសុទ្ធ	។
២	ចំពោះខ្ញុំផ្ទាល់ហៀបភ្លាត់ជើង	ទប់ខ្លួនមិននឹងស្ទើរតែផុត
	ចាប់អ្វីមិនជាប់ចង់របូត	បើសិនខ្ញុំភ្លាត់ច្បាស់ជាដួល	។
៣	ព្រោះខ្ញុំមានចិត្តច្រណែនខឹង	ពួកពាលអស់ហ្នឹងរស់សុខស្រួល
	គេរីកចម្រើនកើនពាសវាល	ទោះរឿងធ្ងន់ស្រាលគ្មានទុក្ខា	។
៤	គេរស់ដូចជាគ្មានភិតភ័យ	គ្មានកង្វល់អ្វីសោះឡើយណា
	ក្នុងមួយជីវិតមិនវេទនា	មានសាច់ឈាមថ្លាល្អម៉ត់ហ្មង	។
៥	គេពុំដែលស្គាល់ទុក្ខលំបាក	វេទនាតោកយ៉ាកដូចអ្នកផង
	មិនដែលស្គាល់អត់ឃ្លានបានម្តង	ដូចអស់អ្នកផងដែលវេទនា	។
៦	ពួកគេជាជនមានអំនួត	ចូលចិត្តអាងអួតខុសធម្មតា
	អំពើឃោរឃៅកាចឫស្យា	គេទុកដូចជាខោអាវពាក់	។
៧	ពួកគេមានចិត្តសែនអាក្រក់	វៀចវេរវីវក់អបលក្ខណ៍
	មិនអាចបាំងបាត់ឬពួនលាក់	គឺលេចច្បាស់ជាក់ដោយខ្លួនឯង	។
៨	គេនាំគ្នាពោលសើចចំអក	ពាក្យសែនអាក្រក់មិនរអែង
	គេពោលប្រកាសស្រែកក្តែងៗ	ជិះជាន់គ្មានក្រែងអ្នកដទៃ	។
៩	មាត់ពោលព្រហើនពាក្យផ្តេសផ្តាស	ប្រមាថព្រះម្ចាស់មិនដឹងអី
	អណ្តាតទៀតសោតឥតសំចៃ	ពេលគេហារស្តីឥតមានគិត	។
១០	សូម្បីប្រជារាស្រ្តព្រះម្ចាស់	ក៏វង្វេងប្រាសក្បត់ក្រមក្រឹត្យ
	ចូលចិត្តស្តាប់ពាក្យដែលមិនពិត	ពួកពាលឧក្រិដ្ឋដូចផឹកទឹក	។
១១	គេពោលមើលងាយព្រះជាម្ចាស់​	ព្រះដ៏ខ្ពង់ខ្ពស់ទាំងយប់ព្រឹក
	គេថាព្រះនោះកុំនៅនឹក	ព្រះនោះសំពឹកមិនដឹងអ្វី	។
១២	នេះហើយជនពាលដៀលស្តីជេរ	គ្មានព្រួយអ្វីទេគ្មានភិតភ័យ
	បានសុខជានិច្ចមិនខ្វល់អី	ចម្រើនឆាប់ក្រៃតរៀងទៅ	។
១៣	ឯទូលបង្គំខំកាន់ចិត្ត	បរិសុទ្ធពេកពិតឥតអាស្រូវ
	មិនប្រព្រឹត្តបាបសោកហ្មងសៅ	ទោះជាធ្វើត្រូវក៏គ្មានផល	។
១៤	ខ្ញុំមានទុក្ខព្រួយសែនសោយសោក	ទឹកភ្នែកស្រក់ជោគហូរដូចជល
	រងទារុណកម្មទុក្ខកង្វល់	ម្តេចទ្រង់មិនខ្វល់នឹងប្រណី	។
១៥	ប្រសិនបើរូបទូលបង្គំ	ព្រមស៊ុំគ្រលុំមនុស្សអប្រីយ៍
	នោះដូចក្បត់បងប្អូនប្រុសស្រី	បុត្រធីតាថ្លៃទ្រង់មិនខាន	។
១៦	រាល់ខែរាល់ថ្ងៃខ្ញុំសញ្ជឹង	រំពឹងចង់ដឹងហេតុដើមដាន
	ពីបញ្ហានេះមិនដែលខាន	តែយល់មិនបានពិបាកហួស	។
១៧	ទាល់តែដល់ទីសក្ការៈ	ទើបបានយល់ជាក់ដឹងទាំងអស់
	ថាចុងបញ្ចប់ពួកគេនោះ	នឹងរងទុក្ខទោសរបៀបណា	។
១៨	តាមពិតព្រះអង្គដាក់គេនៅ	ទីជម្រាលជ្រៅគួររអា
	ព្រះអង្គឱ្យគេធ្លាក់អាត្មា	ក្នុងជ្រោះអន្ធិកា មហន្តរាយ	។
១៩	ក្នុងពេលតែមួយប៉ព្រិចភ្នែក	ពួកគេបាក់បែកសែនសោកស្តាយ
	ជួបតែវិនាសប្រាសអន្តរាយ	សាបសូន្យរលាយគួររន្ធត់	។
២០	បពិត្រព្រះម្ចាស់សូមតើនឡើង	កុំនៅឆ្មៃឆ្មើងជួយកម្ចាត់
	កម្ចាយពួកគេឱ្យខ្ទាតបាត់	រលាយរលត់ដូចយល់សប្តិ	។
២១	ពេលខ្ញុំឆ្អែតចិត្តឈឺចុកចាប់	អារម្មណ៍អួអាប់ដូចមិនស្ងប់
	ខ្ញុំដូចតិរច្ឆានគេចោមស្អប់	នៅចំពោះភក្ត្រព្រះជាម្ចាស់	។
២២	តែខ្ញុំរស់នៅជាមួយព្រះ	គ្មានខ្វល់អ្វីសោះភ្លឺស្រឡះ
	ទ្រង់កាន់ដៃខ្ញុំមិនរបេះ	ខ្ញុំមិនភ័យសោះអស់សៅហ្មង	។
២៣	ព្រះអង្គដឹកនាំទូលបង្គំ	ឱ្យដើរតាមព្រមព្រះទ័យទ្រង់
	នៅចុងបញ្ចប់នោះព្រះអង្គ	យកខ្ញុំផ្ចិតផ្ចង់នៅជាមួយ	។
២៤	ឯស្ថានបរមសុខខ្ញុំគ្មានពឹង	ព្រះក្រៅពីហ្នឹងទេព្រះអើយ
	មានតែព្រះមួយអង្គនេះហើយ	បានសុខឥតស្បើយគ្មានទុក្ខា	។
	បើលើផែនដីព្រះគង់ជិត	នោះខ្ញុំមិនភិតភ័យឡើយណា
	មិនចង់បានអ្វីសព្វប្រការ	អរឥតឧបមាគ្មានព្រួយភ័យ	។
២៥	ចិត្តគំនិតកាយចេះតែខ្សោយ	មិនដែលល្ហែល្ហើយទេព្រះអើយ
	ប៉ុន្តែព្រះម្ចាស់មិនកន្តើយ	ព្រះអង្គនោះហើយជាបង្អែក	។
២៦	ឯអ្នកដែលងាកចេញចាកឆ្ងាយ	នឹងត្រូវអន្តរាយខ្លាំងអនេក
	អ្នកដែលក្បត់ទ្រង់នឹងសង្វេគ	ស្រណោះខ្លួនពេកស្ទើរក្សិណក្ស័យ	។
២៧	រីទូលបង្គំមានមង្គល	ឥតមានអំពល់ឥតព្រួយភ័យ
	ពេលណានៅជិតព្រះម្ចាស់ថ្លៃ	នោះសព្វអ្វីៗស្រស់ផូរផង់	។
	បពិត្រព្រះម្ចាស់សូមមេត្តា	ជីវិតជីវ៉ាផ្ញើព្រះអង្គ
	ទូលបង្គំសូមប្រកាសផង	ស្នាព្រះហស្តទ្រង់ដ៏អស្ចារ្យ	។

ទំនុកតម្កើងលេខ ៧៤ (៧៣) បទព្រហ្មគីតិ

១	បពិត្រព្រះម្ចាស់អើយ	ចុះម្តេចឡើយក៏ព្រះអង្គ
	ឈប់នឹកហើយបោះបង់	ឱ្យរញង់នៅកំព្រា	។
	ម្តេចក៏ទ្រង់ពិរោធ	យើងរហូតឱ្យវេទនា
	ភ្លេចអស់រាស្រ្តប្រជា	ធ្លាប់គាំពារត្រាប្រណី	។
២	កុំភ្លេចព្រះសហគមន៍	ដែលទ្រង់សុំមកថ្នមបី
	ជាកម្មសិទ្ធិប្រពៃ	សូមអាល័យភ្នកនឹកនា	។
	គឺពួកកុលសម្ព័ន្ធ	ដែលទ្រង់បានលោះមកជា
	មរតកថ្លៃមហិមា	រកពណ៌នាក៏ពុំបាន	។
	សូមនឹកដល់បងប្អូន	ភ្នំស៊ីយ៉ូនល្អថ្កើងថ្កាន
	ទ្រង់យកជាទីស្ថាន	គង់នៅបានក្តីសុខដុម	។
៣	សូមយាងមកវិហារ	ដែលគ្រាំគ្រាយូរខែឆ្នាំ
	សក្ការៈត្រូវខ្ទេចខ្ទាំ	លែងរឹងមាំខ្មាំងបំផ្លាញ	។
៤	បច្ចាមិត្រព្រះអង្គ	ស្រែករំពងគ្រប់ទីស្ថាន
	ដែលព្រះអង្គធ្លាប់បាន	ជួបនឹងយើងរៀងរាល់ថ្ងៃ	។
៥	ពួកគេប្រៀបបានទៅ	ផ្លែពូថៅអ្នកកាប់ព្រៃ
	គេប្រឹងឥតសំចៃ	រៀងរាល់ថ្ងៃឥតឈប់ឈរ	។
៦	គេយកផ្លែពូថៅ	វាយសំដៅក្បាច់ដ៏ល្អ
	រចនាស្រស់បវរ	មិនឈប់ឈរមិនស្រណោះ	។
៧	គេដុតទីសក្ការ	ដ៏ថ្លៃថ្លាចោលទាំងអស់
	បន្ថោកដំណាក់ព្រះ	ជាអម្ចាស់ឥតមានក្រែង	។
៨	គេនាំគ្នាគិតថា	នឹងផ្តន្ទាឱ្យជាក់ស្តែង
	ដុតបំផ្លាញកន្លែង	គ្មានរអែងនៅក្នុងស្រុក	។
៩	យើងខ្ញុំលែងឃើញអ្វី	ដែលប្រពៃតទៅមុខ
	ជាទីសំគាល់ទុក	ថាទៅមុខយើងជាតិអ្វី ?	។
	យើងលែងមានទាំងអស់	បាត់ទាំងឈ្មោះព្យាការី
	គ្មាននរណាដឹងអី	ថាយើងនៅច្នេះដល់ណា	។
១០	បពិត្រព្រះម្ចាស់អើយ	ហេតុម្តេចឡើយនៅមេត្តា
	ឱ្យអស់ពួកបច្ចា	ដៀលមុសាដល់ណាទៀត ?	។
១១	សូមបារមីព្រះអង្គ	សង្គ្រោះផងកុំបីឃ្លាត
	លាក់ទុកធ្វើអ្វីទៀត	ឱ្យខ្មាំងឃ្លាតបាក់ខ្ចាយខ្ចាត់	។
១២	ឱព្រះជាម្ចាស់អើយ	ព្រះអង្គហើយគឺជាក្សត្រ
	នៃខ្ញុំពីដើមពិត	ទ្រង់តែងគិតជួយច្រើនសា	។
១៣	ទ្រង់បង្ក្រាបសមុទ្រ	ដោយសារឫទ្ធិខ្លាំងអស្ចារ្យ
	រួចហើយក៏ប្រហារ	ផ្តាច់សិរសានាគសាមាន្យ	។
១៤	ព្រះអង្គវាយកម្ទេច	សិរសាស្តេចក្រពើបាន
	ឱ្យអស់សត្វតិរច្ឆាន	ក្នុងរហោស្ថានជាអាហារ	។
១៥	ទ្រង់ធ្វើឱ្យទឹកផុស	ដូចទឹកជ្រោះខ្លាំងអស្ចារ្យ
	ទន្លេសព្វទិសា	រីងសោកាស្ងួតហួតហែង	។
១៦	ទ្រង់ជាម្ចាស់លើថ្ងៃ	ឬយប់ក្តីគ្រប់កន្លែង
	ព្រះចន្ទនិងសូរ្យសែង	ព្រះអង្គតែងដាក់បញ្ជា	។
១៧	ព្រះអង្គបានកំណត់	ជាប្រាកដផែនពសុធា
	មានរដូវរងា	ដាច់ពីគ្នាប្រាំងវស្សា	។
១៨	ឱព្រះដ៏ត្រចង់	សូមព្រះអង្គកុំភ្លេចថា
	សាសន៍ល្ងីល្ងើនោះណា	ជេរផ្តន្ទានាមព្រះអង្គ	។
១៩	កុំប្រគល់ជីវិត	រាស្រ្តកម្សត់របស់ទ្រង់
	ទៅក្នុងដៃពួកខ្មាំង	បែរប្រឆាំនឹងទ្រង់ឡើយ	។
២០	សូមនឹងដល់សម្ពន្ធ	ច្រើនជំនាន់យូរមកហើយ
	រាស្រ្តភ័យព្រួយឥតស្បើយ	ពាលនៅឡើយពាសពេញស្រុក	។
២១	សូមឱ្យពួកអស់អ្នក	ធ្លាប់លំបាកឈប់កើតទុក្ខ
	អ្នកក្រខ្សត់បានសុខ	តទៅមុខថ្កើងព្រះអង្គ	។
២២	ឱព្រះជាម្ចាស់អើយ	កុំកន្តើយការពារផង
	ព្រះនាមល្អឥតហ្មង	ពួកល្ងើល្ងង់ជេរខ្លាំងណាស់	។
២៣	កុំភ្លេចសូរសម្រែក	សត្រូវជ្រែកនឹងព្រះម្ចាស់
	គេស្រែកអឺងកងណាស់	ទាស់ព្រះម្ចាស់ឥតឈប់ឡើយ	។

ទំនុកតម្កើងលេខ ៧៥ (៧៤) បទកាកគតិ

២	ឱព្រះអម្ចាស់	យើងសូមប្រកាស	សរសើរតម្កើង
	ព្រះនាមព្រះអង្គ	ដែលគង់ជិតយើង	ស្នាព្រះហស្តថ្កើង
		ដែលខ្ញុំរៀបរាប់	។
៣	ទ្រង់បន្ទូលថា	នេះគឺវេលា	ដែលកំណត់ស្រាប់
	យើងវិនិច្ឆ័យ	ឱ្យបានសព្វគ្រប់	ទាំងថ្ងៃទាំងយប់
		យុត្តិធម៌ក្រៃណា	។
៤	ផែនដីសត្វលោក	រស់នៅគរគោក	លើផែនពសុធា
	នឹងត្រូវរលាយ	ប៉ុន្តែយើងជា	អ្នកធ្វើឱ្យវា
		រឹងមាំមិនស្រុត	។
៥	យើងធ្លាប់និយាយ	ប្រាប់ជារឿយៗ	ពួកមានអំនួត
	ថាកុំបំប៉ោង	កុំអាងកុំអួត	វាយឫកហួសមាឌ
		គ្មានប្រយោជន៍ទេ	។
៦	កុំធ្វើឫពេក	ខ្ពង់ខ្ពស់កប់មេឃ	ងាកមើលឯងគេ
	ពោលពាក្យព្រហើន	កោងកាចដៀលជេរ	ឥតប្រយោជន៍ទេ
		ល្មមឈប់ពោលហើយ	។
៧	អ្នកដែលវិនិច្ឆ័យ	កាត់សព្វសេចក្តី	មិនមកពីឆ្ងាយ
	ឬពីលិចកើត	ត្បូងជើងនាយអាយ	នៅរាល់តែថ្ងៃ
		ជិតៗយើងដែរ	។
៨	គឺព្រះអម្ចាស់	ទើបទ្រង់ជ្រាបច្បាស់	ឥតមានគេចកែ
	ជាអ្នកវិនិច្ឆ័យ	ឥតមានវៀចវេរ	អ្នកនេះអាចកែ
		អ្នកនោះអាចដោះ	។
៩	ទ្រង់កាន់ពែងទុក	នឹងចាក់សម្រុក	ពិរោធទាំងអស់
	ទៅលើផែនដី	នោះពួកអាក្រក់	នឹងទទួលទោស
		ចៀសមិនផុតឡើយ	។
១០	រីឯខ្ញុំវិញ	ឥតមានទោម្នេញ	មិននៅកន្តើយ
	ប្រកាសព្រះនាម	មិនឈប់ឈរឡើយ	រហូតទៅអើយ
		តម្កើងព្រះអង្គ	។
១១	ទ្រង់នឹងបំបាក់	អំនួតពួកអ្នក	ពាលាយង់ឃ្នង
	តែព្រះអង្គលើក	អ្នកសុចរិតឡើង	ខ្ពង់ខ្ពស់ថ្កុំថ្កើង
		ជានិច្ចរៀងទៅ	។

ទំនុកតម្កើងលេខ ៧៦ (៧៥) បទពាក្យ ៧

២	ព្រះម្ចាស់សម្តែងឱ្យគេស្គាល់	រូបព្រះអង្គផ្ទាល់នៅយូដា
	នៅអ៊ីស្រាអែលល្បីអស្ចារ្យ	ព្រះនាមនេះណាឮឆ្ងាយក្រៃ	។
៣	ព្រះពន្លាជ័យល្អប៉ប្រឹម	យេរូសាឡឹមក្រុងល្បាញល្បី
	ដំណាក់ព្រះអង្គដ៏ប្រិមប្រីយ៍	ស្ថិតនៅលើដីក្រុងស៊ីយ៉ូន	។
៤	គឺទីនោះហើយទ្រង់សម្រេច	ព្រះអង្គកម្ទេចឱ្យម៉ត់សូន្យ
	គ្រឿងសស្រ្តាវុធច្រើនរាប់ផ្លូន	ធ្នូដាវមាំមួនកប់ក្នុងដី	។
៥	បពិត្រព្រះម្ចាស់ដ៏ឧត្តម	ព្រះអង្គជិតជុំដោយសិរី
	រុងរឿងចិញ្ចែងចិញ្ចាចក្រៃ	ពេលត្រឡប់វៃមកពីភ្នំ	។
៦	ទ្រង់ដកអាវុធពីអ្នកច្បាំង	គេហេវហត់ខ្លាំងស្ទើររលំ
	ទាហានពូកែដេកសំងំ	មិនមកជួបជុំលែងប្រយុទ្ធ	។
៧	ឱព្រះនៃលោកយ៉ាកុបអើយ	ទ្រង់គំរាមហើយគេតក់ស្លុត
	រទេះចម្បាំងគាំងរហូត	សេះដើរមិនរួចលែងអង់អាច	។
៨	បពិត្រព្រះអង្គគួរស្ញប់ស្ញែង	បារមីសម្តែងដោយអំណាច
	ពេលទ្រង់ពិរោធគួរឱ្យខ្លាច	តើនរណាអាចឈរនៅបាន	។
៩	បន្ទូលព្រះអង្គកាត់ជំរះ	ពីលើមេឃច្បាស់មិនរំខាន
	លើផែនដីស្ងាត់ដូចស្មសាន​	មនុស្សម្នាគ្រប់ប្រាណខ្លាចបារមី	។
១០	នៅពេលព្រះអង្គយាងក្រោកឡើង	វិនិច្ឆ័យមិនឆ្មើងមនុស្សលោកីយ៍
	សង្គ្រោះអ្នកទន់ទាបក្រក្រី	នៅលើផែនដីមិនឱ្យសល់	។
១១	ទ្រង់ធ្វើឱ្យកំហឹងមនុស្ស	ដែលធ្លាប់ពោរពុះក្តៅក្រហល់
	បែរទៅតម្កើងថ្កើងវិបុល	រុងរឿងមង្គលព្រះខ្ពង់ខ្ពស់	។
	អស់អ្នកដែលសេសសល់ជីវិត	ពីសង្គ្រាមពិតមិនជ្រុលហួស
	នាំគ្នាឱនកាយថ្វាយចំពោះ	ព្រះដែលសង្គ្រោះជីវិតយើង	។
១២	អស់អ្នកនៅជិតជុំរៀងអាយ	កុំបីរាយមាយមកឆាប់ឡើង
	ចូរយកតង្វាយថ្វាយព្រះយើង	ជាព្រះថ្កុំថ្កើងគួរស្ញែងខ្លាច	។
១៣	ព្រះអង្គបំបាក់ស្តេចនានា	ធ្វើឱ្យក្សត្រាបាត់់អំណាច
	ភិតភ័យតក់ស្លុតលែងអង់អាច	ស្ញប់ស្ញែងខ្លបខ្លាចព្រះបារមី	។

ទំនុកតម្កើងលេខ ៧៧ (៧៦) បទកាកគតិ

២	ខ្ញុំស្រែកហៅរក	ព្រះម្ចាស់យាងមក	ខ្ញុំអង្វរទ្រង់
	ព្រះអង្គផ្ទៀងស្តាប់	ឥតមានបង្អង់	ខ្ញុំស្រែកហៅផង
		ព្រះអង្គសណ្តាប់	។
៣	ថ្ងៃមានអាសន្ន	ខ្ញុំខំបែរបន់	ឱ្យទ្រង់មកឆាប់
	នាពេលសន្ធិយា	ខ្ញុំចង់ប្រញាប់	អង្វរឥតឈប់
		ស្រែករកព្រះជួយ	។
៤	នឹកដល់ព្រះម្ចាស់	ចិត្តខ្លោចផ្សាណាស់	ស្រែកយំភ័យព្រួយ
	ពេលរំពឹងគិត	ស្ទើរតែរលួយ	ទឹកចិត្តរញ្ជួយ
		ហេវហត់ក្រៀមក្រោះ	។
៥	ឱព្រះម្ចាស់អើយ	ព្រះអង្គធ្វើឱ្យ	ខ្ញុំហត់ហេវខ្សោះ
	ដេកក៏មិនលក់	គំនិតខ្លីអស់	គិតមិនចេញសោះ
		និយាយមិនបាន	។
៦	ខ្ញុំតែងសញ្ជឹង	នឹកគិតរំពឹង	សព្វរឿងប៉ុន្មាន
	ពីអតីតៈ	ពីញាតិសន្តាន	តាំងពីបុរាណ
		ដើមដ៏យូរលង់	។
៧	មិនធ្លាយមិនធ្លុះ	គិតឡើងគិតចុះ	ខ្ញុំនៅតែល្ងង់
	អស់ពេញមួយយប់	មិនឃើញដើមចុង	ក្នុងចិត្តតែងប្រុង
		ព្រោះចង់យល់ថា	។
៨	តើព្រះអម្ចាស់	បោះចោលស្រឡះ	យើងឬយ៉ាងណា
	ឬក៏ព្រះអង្គ	មិនគាប់ចិន្តា	ផ្តាច់ធម៌មេត្តា
		ពីយើងធ្វើហី	។
៩	ហេតុអ្វីព្រះម្ចាស់	ភ្លេចព្រះទ័យព្រះ	គង់នៅមិនស្តី
	តើព្រះអង្គឈប់	មេត្តាប្រណី	នៅស្ងៀមលែងស្តី
		រហូតតែម្តង	។
១០	ម្តេចក៏ព្រះអង្គ	ភ្លេចបាត់សូន្យឈឹង	សូមមេត្តាផង
	ទ្រង់ធ្លាប់ប្រណី	សន្តោសឥតហ្មង	ឬក៏ព្រះអង្គ
		ទ្រង់ព្រះពិរោធ	។
១១	ខ្ញុំនឹកគិតថា	នឹងរងវេទនា	ទណ្ឌកម្មឧក្រិដ្ឋ
	មកពីព្រះម្ចាស់	ទ្រង់លែងអាណិត	បារមីទ្រង់ឫទ្ធិ
		លែងជួយយើងហើយ	។
១២	បពិត្រព្រះម្ចាស់	ខ្ញុំរំឭកច្បាស់	មិនប្រហែសឡើយ
	ខ្ញុំនឹកដល់ការ	អស្ចារ្យទាំងឡាយ	ដែលទ្រង់ត្រួសត្រាយ
		ធ្វើពីពេលមុន	។
១៣	ខ្ញុំរៀបរាប់ស្នា	ព្រះហស្តថ្លៃថ្លា	ច្រើនក្រៃលើសលន់
	ខ្ញុំនឹករំពឹង	សង្ឃឹមពេកពន់	កិច្ចការគ្រាមុន
		មានច្រើនអនេក	។
១៤	បពិត្រព្រះម្ចាស់	មាគ៌ាត្រចះ	វិសុទ្ធពន់ពេក
	កិច្ចការទាំងអស់	វិសេសល្អឯក	គ្មានព្រះណាអាច
		ធ្វើដូចទ្រង់ឡើយ	។
១៥	មានតែព្រះអង្គ	បារមីត្រចង់	ទ្រង់មិនកន្តើយ
	សព្វការអស្ចារ្យ	ប្រព្រឹត្តរួចហើយ	សម្តែងឫទ្ធិឱ្យ
		សាសន៍ផ្សេងបានយល់	។
១៦	ព្រះអង្គប្រើឫទ្ធិ	បារមីបំផុត	ឥតមានខ្វាយខ្វល់
	លោះប្រជារាស្រ្ត	ផុតអស់អំពល់	អ្នកក្រអស់ខ្វល់
		ផុតទុក្ខទាំងពួង	។
	គេជាកូនចៅ	សន្តានញាតិផៅ	លោកយ៉ាកុបផង
	ទាំងលោកយ៉ូសែប	ផុតអស់សៅហ្មង	រួចពីចំណង
		ពីស្រុកអេស៊ីប	។
១៧	សមុទ្រគ្រាំគ្រេង	ក៏ចេះកោតក្រែង	ឫទ្ធានុភាព
	ទោះបាតសមុទ្រ	ក៏គង់តែជ្រាប	រញ្ជួយញ័រញាប់
		ខ្លបខ្លាចឫទ្ធា	។
១៨	ភ្លៀងធ្លាក់ជោគជាំ	គគ្រឹកគគ្រាំ	ផ្គរលាន់ខ្ទ័រខ្ទារ
	រន្ទះព្រះអង្គ	ភ្លឺផ្លេកមហិមា	ពេញផ្ទៃមេឃា
		ដោយសារបារមី	។
១៩	ពេលឮសំឡេង	ផ្គរលាន់ក្តែងៗ	ខ្ទ័រខ្ទារផែនដី
	មានផ្លេកបន្ទោរ	ចែងចាំងរស្មី	ធ្វើឱ្យផែនដី
		ញាប់ញ័ររញ្ជួយ	។
២០	ព្រះអង្គយាងកាត់	តាមបាតសមុទ្រ	លឿនស្លេវបោះពួយ
	ទ្រង់យាងកាត់ទឹក	ឥតភិតភ័យព្រួយ	គ្មានអ្នកណាមួយ
		រកទ្រង់ឃើញឡើយ	។
២១	ព្រះអង្គរិះរេ	ឱ្យលោកម៉ូសេ	ពិចារណាហើយ
	ទាំងលោកអារ៉ុន	ក៏មិនកន្តើយ	ណែនាំកៀកកើយ
		ដូចគង្វាលចៀម	។

ទំនុកតម្កើងលេខ ៧៨ (៧៧) បទព្រហ្មគីតិ

១	ឱ! ប្រជាជនអើយ	ខ្ញុំនេះហើយប្រៀនប្រដៅ
	ផ្ទៀងត្រចៀកស្តាប់ទៅ	ហើយអ្នកត្រូវប្រុងប្រៀបប្រាណ	។
២	ខ្ញុំរៀបរាប់ប្រវត្តិ	តាមកំណត់មិនខកខាន
	ប្រជាជនគ្រប់ប្រាណ	ជាមេរៀនឱ្យបានដឹង	។
៣	យើងបានឮគេប្រាប់	ឱ្យយើងស្តាប់ជាដំណឹង
	ដូនតាលោកខំប្រឹង	តំណាលរឿងគ្រប់ទាំងអស់	។
៤	តំណាលពីឫទ្ធា	នុភាពជាស្នាព្រះហស្ត
	អស្ចារ្យគ្មានចន្លោះ	ល្អឥតខ្ចោះទ្រង់ប្រព្រឹត្ត	។
	យើងនឹងនិយាយប្រាប់	កូនចៅស្តាប់តទៅពិត
	កូនចៅត្រូវរិះគិត	មានគំនិតយល់មិនខាន	។
៥	ព្រះអង្គបានតាក់តែង	ច្បាប់សម្តែងដល់សន្តាន
	លោកយ៉ាកុបស្តាប់បាន	ទាំងប្រទានព្រះវិន័យ	។
	ឱ្យពូជអ៊ីស្រាអែល	កូនចៅដែលកើតមកក្រោយ
	ព្រះអង្គបង្គាប់ឱ្យ	កូនចៅក្រោយរៀនពីគេ	។
៦	ឱ្យកូនជាន់ក្រោយស្គាល់​	ព្រះអង្គផ្ទាល់កុំងាករេ
	កូនចៅកើតហូរហែ	បង្រៀនគេតរហូត	។
៧	ឱ្យគេផ្ញើជីវិត	ព្រះស្នេហ៍ស្និទ្ធមិនភរភូត
	គោរពតាមបែបបទ	ចាំឱ្យស្ទាត់ស្នាព្រះហស្ត	។
៨	កុំឱ្យប្រជាជន	ចិត្តទោរទន់ប្រព្រឹត្តហួស
	ដូចដូនតាទាំងនោះ	ចិត្តរឹងរូសប៉ងប្រឆាំង	។
	គំនិតរៀចវេរល្អៀង	ចិត្តមិនទៀងមិនស្មោះត្រង់
	នាំគ្នាក្បត់ព្រះអង្គ	មិនទៀងត្រង់សោះឡើយណា	។
៩	កងទ័ពអេប្រាអ៊ីម	ត្រូវនៅស្ងៀមលែងវាចា
	បាក់ទ័ពញ័រកាយា	ថ្ងៃនោះណាឈប់ចេញច្បាំង	។
១០	ពួកគេពុំគោរព	ទៅតាមច្បាប់នៃព្រះអង្គ
	មិនព្រមកាន់តាមផង	វិន័យទ្រង់ល្អបរិសុទ្ធ	។
១១	គេភ្លេចស្នាព្រះហស្ត	ព្រះម្ចាស់ខ្ពស់ខ្ពង់បំផុត
	ឫទ្ធិអស្ចារ្យមោះមុត	ព្រះវិសុទ្ធទ្រង់សម្តែង	។
១២	នៅតំបន់សូអាន	អេស៊ីបបានកោតស្ញប់ស្ញែង
	ការអស្ចារ្យក្រៃលែង	ទ្រង់សម្តែងឱ្យគេយល់	។
១៣	ទ្រង់ញែកទឹកសមុទ្រ	គេឆ្លងផុតឥតខ្វាយខ្វល់
	ឱ្យទឹកផ្តុំនឹងថ្កល់	ដូចកំណល់កល់កំពែង	។
១៤	ពេលថ្ងៃទ្រង់ដឹកនាំ	ដោយមានដុំពពកផ្សែង
	ពេលយប់ព្រះអង្គតែង	នាំសូរ្យសែងពន្លឺល្អ	។
១៥	ក្នុងវាលរហោស្ថាន	ព្រះអង្គបានបំបែកថ្ម
	ឱ្យទឹកហូរឈូឆរ	រាស្រ្តអបអរអ្វីម៉្លេះទេ	។
១៦	ទឹកហូរចេញពីថ្ម	ធ្លាក់ឈូឆរដូចទន្លេ
	បរិបូរមិនខ្វះទេ	ដូចទន្លេទឹកច្រើនពិត	។
១៧	ទោះជាទ្រង់ធ្វើត្រូវ	ពួកគេនៅតែប្រព្រឹត្ត
	អំពើបាបទុច្ចរិត	ដោយប្រព្រឹត្តទាស់ព្រះទ័យ	។
	នៅវាលរហោស្ថាន	ដូនតាបានគិតរំពៃ
	ប្រឆាំងព្រះម្ចាស់ថ្លៃ	មានបារមីឥតអ្វីប្រៀប	។
១៨	ពួកគេសម្រេចចិត្ត	ល្បងឥតគិតអានុភាព
	ទាមទារជាដរាប	ឱ្យទ្រង់រៀបចំអាហារ	។
១៩	គេមានចិត្តសង្ស័យ	លើម្ចាស់ថ្លៃយ៉ាងឫស្យា
	ដោយពោលពាក្យវាចា	ឱ្យក្សត្រាជប់លៀងគេ	។
២០	ព្រះអង្គអាចវាយថ្ម	ទឹកឈូឆរដូចទន្លេ
	តើព្រះអង្គអាចទេ	ឱ្យសាច់គេនិងអាហារ	។
២១	ព្រះម្ចាស់ពិរោធក្រៃ	ឮគេស្តីពាក្យមុសា
	ទ្រង់ខឹងញ័រកាយា	ពូជអ៊ីស្រាអែលយ៉ាកុប	។
២២	ព្រោះពួកគេពុំបាន	ផ្ញើរខ្លួនប្រាណជ្រកក្រោមម្លប់
	គេគ្មានជំនឿស៊ប់	លើទ្រង់គ្រប់វេលាឡើយ	។
២៣	ទោះជាយ៉ាងណាក្តី	ទ្រង់ប្រណីអត់ទោសឱ្យ
	បញ្ជាមិនថ្លោះធ្លោយ	ពពកឱ្យបើកផ្ទៃមេឃ	។
២៤	ហើយប្រទានអាហារ	នំម៉ាណ្ណាច្រើនក្រៃពេក
	ធ្លាក់មកពីលើមេឃ	ព្រះអង្គចែកពីសួគ៌ា	។
២៥	ពួកគេបរិភោគ	អាហារយកពីទេវតា
	ទ្រង់ប្រទានអាហារ	គ្រប់អាត្មាឆ្អែតស្កប់ស្កល់	។
២៦	ឯផ្ទៃមេឃខាងលើ	ព្រះអង្គធ្វើឱ្យមានខ្យល់
	បោកបាចបក់វិលវល់	ឥតមានសល់ពីកើតត្បូង	។
២៧	ទ្រង់ប្រទានសត្វស្លាប	ហើរឆ្វែលឆាបច្រើនទាំងហ្វូង
	ទាំងសាច់សត្វទៀតផង	ច្រើនកន្លងឥតគណនា	។
២៨	សាច់សត្វទាំងអស់នោះ	បានធ្លាក់ចុះពីមេឃា
	ចំកណ្តាលទីធ្លា	ទីនានាដែលគេស្នាក់	។
២៩	គេអាស្រ័យឆ្អែតឆ្អល់	បានស្កប់ស្កល់គ្មានសល់ម្នាក់
	ព្រះជាម្ចាស់ថ្នមថ្នាក់	តាមចិត្តអ្នកប៉ងប្រាថ្នា	។
៣០	ប៉ុន្តែទោះគេមាន	អាហារណែនមាត់យ៉ាងណា
	ក៏ពួកជនសាវា	មិនព្រមថាគេគ្រប់អី	។
៣១	ពេលនោះព្រះម្ចាស់ក្រោធ	ទ្រង់គ្រវាត់លែងប្រណី
	ប្រហារអ្នកខ្លាំងក្រៃ	ទាំងយុវវ័យពេញកម្លាំង	។
៣២	ទោះបីយ៉ាងនេះក្តី	ជនអប្រីយ៍នៅតែរឹង
	ពុំព្រមជឿព្រះអង្គ	មិនលះបង់ធ្វើព្រៃផ្សៃ	។
៣៣	ព្រះអង្គក៏ប្រហារ	ផ្តាច់សង្ខារជនអប្រីយ៍
	តែក្នុងពេលដ៏ខ្លី	ពួកគេក្ស័យសែនវេទនា	។
៣៤	ពេលគេឃើញដូច្នេះ	គេរេរិះឈប់រួញរា
	ប្រែចិត្តគំនិតជា	នាំគ្នីគ្នារកព្រះអង្គ	។
៣៥	ពួកគេនឹកឃើញថា	អង្គក្សត្រាមិនបោះបង់
	ជាថ្មដាបិទបាំង	ការពារពាំងមាំមួនណាស់	។
៣៦	ប៉ុន្តែតាមការពិត	គេមានចិត្តចង់បោកប្រាស
	និយាយពាក្យផ្តេសផ្តាស	ឃើញជាក់ច្បាស់ពាក្យកុហក	។
៣៧	គេមានចិត្តរៀចវេរ	មិនទៀងទេសែនអាក្រក់
	គេភូតភរកុហក	ក្បត់នឹងសម្ពន្ធមេត្រី	។
៣៨	រីឯព្រះអង្គវិញ	ទ្រង់បញ្ចេញព្រះហឫទ័យ
	មេត្តាករុណាក្រៃ	លើកទោសពៃរ៍ដោយយល់យោគ	។
៣៩	ព្រះអង្គនៅចាំថា	គ្រប់អាត្មាជាមនុស្សលោក
	ជីវិតសែនសោយសោក	ដូចខ្យល់បោកមិនត្រឡប់	។
៤០	ពួកគេតែងប្រឆាំង	នឹងព្រះអង្គឥតឈរឈប់
	ឱ្យទ្រង់ព្រួយសព្វគ្រប់	នឹងទីភពវាលហួតហែង	។
៤១	ពួកគេនៅតែល្បង	ជាច្រើនដងឥតកោតក្រែង
	ធ្វើឱ្យទ្រង់ចំបែង	មិនរអែងព្រះចេស្តា	។
៤២	ពួកគេពុំបានគិត	អំពីឫទ្ធាខ្លាំងក្លា
	គេមិននឹកចាំថា	ទ្រង់នេះណារំដោះគេ	។
៤៣	ពួកគេពុំនឹងដល់	ទីសំគាល់អស្ចារ្យទេ
	ដែលទ្រង់គិតគ្នាន់គ្នេរ	នៅអេស៊ីបក្រុងសូអាន	។
៤៤	ឱ្យទឹកទន្លេនីល	ប្រែឥតសល់ជាឈាមបាន
	ជាតិអេស៊ីបគ្រប់ប្រាណ	ព្រួយឥតស្រាន្តព្រោះគ្មានទឹក	។
៤៥	ទ្រង់ចាត់កង្កែបមូស	ឱ្យហើរចុះច្រើនសន្ធឹក
	បំផ្លាញទាំងល្ងាចព្រឹក	អេស៊ីបនឹកសែនភ័យព្រួយ	។
៤៦	មានកណ្តូបចង្រឹត	ទាំងឆ្ងាយជិតច្រើនរញ្ជួយ
	ស៊ីបង្ហិនអស់ត្រួយ	គ្មានសល់មួយផលដំណាំ	។
៤៧	ព្រមទាំងមានព្រឹលធ្លាក់	សែនត្រជាក់ជាប្រចាំ
	បំផ្លាញឱ្យខ្ទេចខ្ទាំ	ផលដំណាំខូចរេចរិល	។
៤៨	ហ្វូងគោត្រូវវិនាស	មិនអាចចៀសដោយសារព្រឹល
	ហ្វូងចៀមងាប់គ្មានសល់	ដោយសារខ្យល់និងរន្ទះ	។
៤៩	ព្រះម្ចាស់ទ្រង់ពិរោធ	ទ្រង់ខ្ញាល់ក្រោធខឹងខ្លាំងណាស់
	ជនជាតិអេស៊ីបច្បាស់	ជួបប្រទះក្តីអន្តរាយ	។
៥០	ទ្រង់ធ្វើតាមព្រះទ័យ	គ្មានប្រណីជាតិនោះឡើយ
	ព្រះអង្គបានធ្វើឱ្យ	គ្រោះអន្តរាយកើតមានឡើង	។
៥១	ព្រះអង្គបានប្រហារ	យកសង្ខារអស់កូនច្បង
	ជាតិអេស៊ីបនេះផង	ក្នុងពូជពង្សអប្រាហាំ	។
៥២	ព្រះអង្គនាំប្រជា	រូតម្នីម្នាមិនរង់ចាំ
	ដោយទ្រង់មើលថែឃ្លាំ	ហើយដឹកនាំទៅរហោស្ថាន	។
៥៣	ព្រះអង្គដឹកនាំគេ	មិនរារេដោយសុខសាន្ត
	ឯសត្រូវសាមាន្យ	ត្រូវលង់ប្រាណក្នុងសមុទ្រ	។
៥៤	ព្រះអង្គនាំពួកគេ	ទៅកាន់ទីដ៏វិសុទ្ធ
	ដូចគង្វាលចាំសត្វ	ដើរឆ្លងកាត់វាលស្មៅខ្ចី	។
៥៥	ព្រះអង្គបានបណ្តេញ	ជាតិផ្សេងចេញមិនប្រណី
	ហើយទ្រង់ចែកទឹកដី	ដ៏ថ្លាថ្លៃដល់ស្រាអែល	។
៥៦	ប៉ុន្តែពួកគេបាន	ល្បងរំខានព្រះម្ចាស់ដែល
	មានតេជះក្រាស់ក្រែល	ដោយមិនធ្វើតាមបញ្ជា	។
៥៧	ពួកគេក្បត់ព្រះអង្គ	មិនត្រាប់ត្រងគ្រប់ៗគ្នា
	ដូចដូនតាពួកគេ	ចិត្តវៀចវេរដូចកណ្តៀវ	។
៥៨	គេបែរថ្វាយបង្គំ	នៅលើភ្នំព្រះក្លែងក្លាយ
	ដែលជាហេតុធ្វើឱ្យ	ទាស់ព្រះហឫទ័យព្រះអង្គ	។
៥៩	ព្រះអង្គឃើញដូច្នេះ	ទ្រង់ព្រះពិរោធយ៉ាងខ្លាំង
	ហើយលែងរវល់នឹង	ជាតិក្បាលរឹងអ៊ីស្រាអែល	។
៦០	ព្រះអង្គបានបង់បោះ	មិនស្រណោះកន្លែងដែល
	ជាដំណាក់នៅឯ	ភូមិស៊ីឡូធ្លាប់អាស្រ័យ	។
៦១	ព្រះអង្គបណ្តោយឱ្យ	ខ្មាំងរាប់រយចិត្តអប្រិយ៍
	យកហឹបសម្ពន្ធមេត្រី	ជាបារមីនៃព្រះអង្គ	។
៦២	ហើយទ្រង់បណ្តោយឱ្យ	រាស្រ្តទន់ខ្សោយស្លាប់បាត់បង់
	ដោយមុខដាវតម្រង់	សត្រូវប៉ងកាប់ប្រល័យ	។
៦៣	ឯយុវជនទាំងឡាយ	ក៏អន្តរាយដោយក្សិណក្ស័យ
	ក្នុងភ្លើងសង្គ្រាមជ័យ	គ្មានសល់អ្វីនឹងរៀបការ	។
៦៤	មនុស្សស្ទើរទាំងអស់	ជាពិសេសបូជាចារ្យ
	ស្លាប់ដោយដាវប្រហារ	គ្មានស្រីណាកាន់ទុក្ខបាន	។
៦៥	ពេលនោះទ្រង់តើនមក	ដូចគេក្រោកពីសម្រាន្ត
	ដូចអ្នកច្បាំងក្លាហាន	ស្វាងស្រាកស្រាន្តពីសុរា	។
៦៦	ព្រះអង្គវាយសត្រូវ	មិនឱ្យនៅសល់ឡើយណា
	ពួកខ្មាំងគ្រប់អាត្មា	បង់អសារជាដរាប	។
៦៧	ព្រះអង្គនៅតែខឹង	នឹងពូជពង្សលោកយ៉ូសែប
	ទ្រង់ក៏មិនជ្រើសបែប	កុលសម្ព័ន្ធអេប្រាអ៊ីម	។
៦៨	ទ្រង់ពេញព្រះហឫទ័យ	ពន់ពេកក្រៃយូដាវិញ
	គាប់ចិត្តឥតទោម្នេញ	ស៊ីយ៉ូនវិញភ្នំវិសុទ្ធ	។
៦៩	ទ្រង់សង់សក្ការៈ	ល្អឥតអាក់ខ្ពស់បំផុត
	ដូចមេឃរឹងមោះមុត	ឥតផុងទ្រុឌដូចផែនដី	។
៧០	ដាវីឌដ៏ល្អឯក	ទ្រង់ជ្រើសញែកជាទាសី
	អ្នកបម្រើប្រពៃ	យកស្តេចថ្លៃពីឃ្វាលចៀម	។
៧១	ទ្រង់បានដកយកចេញ	មិនទោម្នេញនៅទីមទាម
	ឃ្វាលពូជយ៉ាកុបភ្លាម	គឺជាតិនាមអ៊ីស្រាអែល	។
៧២	ស្តេចដាវីឌដឹកនាំ	ជាតិរឹងមាំមិនអែកអល់
	ស្មោះត្រង់គ្មានកិច្ចកល	នាំគេដល់ត្រើយសុខសាន្ត	។

ទំនុកតម្កើងលេខ ៧៩ (៧៨) បទពាក្យ ៧

១	បពិត្រព្រះជាអម្ចាស់អើយ	ជនជាតិទាំងឡាយចូលឈ្លានពាន
	វិហារវិសុទ្ធត្រូវរុករាន	សាឡឹមថ្កើងថ្កានខូចខ្ទេចខ្ទីរ	។
២	សាកសពអ្នកបម្រើព្រះអង្គ	ត្រូវគេបោះបង់ឱ្យសត្វស៊ី
	សាកសពអ្នកជឿពេញធរណី	ត្រូវតិរច្ឆានស៊ីជាអាហារ	។
៣	គេបានសម្លាប់ប្រជាជន	ជុំវិញទីក្រុងគ្មានមេត្តា
	ឈាមរាស្រ្តហូរក្រាលពសុធា	ចាស់ក្មេងមរណាគ្មានអ្នកកប់	។
៤	អ្នកស្រុកជិតខាងនាំគ្នាជេរ	ប្រមាថឥតល្ហែគេលែងរាប់
	គេសើចចំអកឡកឡឺយសព្វ	រូបខ្ញុំគេស្អប់គេមើលងាយ	។
៥	ឱ! ព្រះជាម្ចាស់ទូលបង្គំ	ម្តេចទ្រង់សំងំដូចជិនណាយ
	តើថ្ងៃណាទៅទើបទ្រង់ស្រាយ	ពិរោធឱ្យឆ្ងាយមកស្រោចស្រង់	។
៦	សូមជះក្តីក្រោធលើជាតិផ្សេង	ឱ្យជនវង្វេងស្គាល់ព្រះអង្ក
	និងនគរនានានោះផង	ដែលមិនស្មោះត្រង់នឹងព្រះម្ចាស់	។
៧	ដ្បិតពួកគេបានកាប់សម្លាប់	ពូជលោកយ៉ាកុបចោលទាំងអស់
	បំផ្លាញទឹកដីជារបស់	មរតកកេរកោះលោកទៀតផង	។
៨	សូមកុំចាប់ទោសយកកំហុស	ព្រោះបុព្វបុរសខ្ញុំខុសឆ្គង
	មេត្តាលើកទោសកំហុសម្តង	អាណិតខ្ញុំផងដ្បិតលិចលង់	។
៩	ឱព្រះជាម្ចាស់ព្រះសង្គ្រោះ	សូមទ្រង់យាងចុះកុំបង្អង់
	ដោយយល់សិរីដ៏រឿងរុង	មេត្តាព្រះអង្គជួយផងណា	។
១០	ហេតុអ្វីបានជាទ្រង់បណ្តោយ	ជាតិផ្សេងៗឱ្យមកពោលថា
	«តើព្រះគេនោះនៅឯណា	សូមទ្រង់មេត្តាដាក់ទោសចុះ	។
១១	សូមស្តាប់សំឡេងឈ្លើយថ្ងូរថ្ងួច	លាន់ឮគ្រលួចគួរស្រណោះ
	សូមប្រើបារមីជួយរំដោះ	អ្នកដែលមានទោសដល់មរណា	។
១២	សូមព្រះជាម្ចាស់កុំអាណិត	ប្រជាជាតិជិតទាំងអស់គ្នា
	ធ្វើឱ្យគេរស់ដោយវេទនា	អាប់មុខមួយជាប្រាំពីរដង	។
១៣	ឯពួកយើងខ្ញុំដែលជារាស្រ្ត	ដូចចៀមទាំងអស់របស់ទ្រង់
	នាំគ្នាតម្កើងលើកព្រះអង្គ	អស់កល្បយូរលង់អង្វែងទៅ	។

ទំនុកតម្កើងលេខ ៨០ (៧៩) បទព្រហ្មគីតិ

២	ព្រះម្ចាស់ជាគង្វាល	អ៊ីស្រាអែលសូមសណ្តាប់
	ពូជពង្សលោកយ៉ូសែប	ដែលព្រះអង្គបានដឹកនាំ	។
	ដូចជាអ្នកគង្វាល	ចាំយាមឃ្វាលចៀមថែទាំ
	គេរស់ដោយសុខដុម	សូមសម្ដែងព្រះបារមី	។
៣	ឱ្យពួកកុលសម្ព័ន្ធ	អេប្រាអ៊ីមឃើញស្នាដៃ
	និងជាតិផ្សេងៗក្តី	សូមទ្រង់លៃជួយសង្គ្រោះ	។
៤	ឱ! ព្រះជាម្ចាស់អើយ	កុំកន្តើយសូមសន្តោស
	ទតមើលដោយសប្បុររស	នោះយើងខ្ញុំរួចជីវិត	។
	សូមទ្រង់បែរព្រះភ័ក្ត្រ	ញញឹមដាក់យើងខ្ញុំពិត
	សង្គ្រោះឱ្យនៅជិត	កុំឱ្យបែកបាក់ខ្ចាត់ខ្ចាយ	។
៥	បពិត្រព្រះជាម្ចាស់	ទ្រង់ជាព្រះគង់ខ្ពស់ឆ្ងាយ
	ខ្ពស់ហួសព្រះទាំងឡាយ	ម្តេចមិនស្រាយពិរោធចេញ	។
៦	ម្តេចទ្រង់មកដាក់ទោស	ចាប់កំហុសយើងទៅវិញ
	ឱ្យទឹកភ្នែកហូរចេញ	ដូចគង្គាមិនចេះចប់	។
៧	ទ្រង់ធ្វើឱ្យប្រជា	ជិតខាងគ្នាឈ្លោះសំអប់
	ដណ្តើមមិនចេះស្កប់	យកទឹកដីរបស់យើង	។
៨	ឱ! ព្រះជាអម្ចាស់	សូមសង្គ្រោះយើងឆាប់ឡើង
	សូមជួយនាំពួកយើង	ឱ្យត្រឡប់វិលមកវិញ	។
៩	ព្រះអង្គគាស់រំលើង	ដើមទំពាំងបាយជូរចេញ
	រួចហើយទ្រង់បណ្តេញ	ជាតិផ្សេងចេញពីទឹកដី	។
	ព្រះអង្គយកមកដាំ	ដើមទំពាំងបាយជូរថ្មី
	ត្រួយលាស់ស្លឹកខៀវខ្ចី	ល្អពេកក្រៃស្រស់បំព្រង	។
១០	ព្រះអង្គបានឆ្ការដី	ឱ្យដើមថ្មីចាក់ឫសផង
	ដុះពេញស្រុកតែម្តង	ល្អកន្លងសែនសុខដុម	។
១១	មែកវាផ្តល់ជាម្លប់	គ្របដណ្តប់ទៅលើភ្នំ
	គ្របដើមគគីរធំ	នៅលើភ្នំខ្ពស់បំផុត	។
១២	បែកមែកម្លប់សាខា	បែកលុះត្រាដល់សមុទ្រ
	ពន្លកលាស់ចេញផុត	រហូតទន្លេអឺប្រាត	។
១៣	ហេតុអ្វីក៏ព្រះអង្គ	ផ្តួលរបងដោយក្រេវក្រោធ
	មនុស្សម្នាដែលដើរកាត់	បេះបោចបាត់ផ្លែដូច្នេះ	។
១៤	សត្វជ្រូកមកបំផ្លិច	បំផ្លាញខ្ទេចមិនឈប់សោះ
	បង្ហិនគ្រប់ទាំងអស់	ដំណាំនោះវាស៊ីម៉ត់	។
១៥	ឱ! ព្រះជាម្ចាស់អើយ	កុំកន្តើយសូមទ្រង់ទត
	ពីស្ថានសួគ៌ាមក	ជួយយើងខ្ញុំកុំខានឡើយ	។
១៦	សូមទ្រង់ជួយរក្សា	ថែចំការដែលមានហើយ
	ការពារកុំបណ្តោយ	ក្រែងថ្លោះធ្លោយខ្មាំងញាំញី	។
១៧	សូមឱ្យពួកបច្ចា	ដែលកាប់ឆ្ការចំការថ្មី
	វិនាសកុំសល់អី	ដោយព្រះអង្គទ្រង់គំរាម	។
១៨	សូមទ្រង់ដាក់ព្រះហស្ត	លើស្តេចនោះគង់ខាងស្តាំ
	បុត្រមនុស្សដ៏ឧត្តម	ដែលព្រះអង្គពង្រឹងឡើង	។
១៩	យើងខ្ញុំមិនបែកបែរ	ចិត្តងាករេពីព្រះអង្គ
	សូមប្រោសប្រទានផង	ឱ្យយើងខ្ញុំមានជីវិត	។
	ពេលខ្ញុំរស់ឡើងវិញ	ចិត្តពោរពេញនៅនែបនិត្យ
	គោរពបម្រើពិត	ឥតមានក្បត់ឆ្ងាយពីទ្រង់	។
២០	ឱ! ព្រះជាម្ចាស់ខ្ញុំ	សូមជួយនាំកុំរេរង់
	វិលមករកព្រះអង្គ	ឱ្យយើងខ្ញុំក្រាមបង្គំ	។
	សូមបែរព្រះភក្ត្រមក	ញញឹមរកពួកយើងខ្ញុំ
	ដោយព្រះទ័យឧត្តម	នោះយើងខ្ញុំរួចជីវិត	។

ទំនុកតម្កើងលេខ ៨១ (៨០) បទកាកគតិ

២	នាំគ្នាពន្លឺ	សំឡេងឱ្យឮ	ថ្វាយព្រះជាម្ចាស់
	ដែលជាកម្លាំង	នៃយើងទាំងអស់	សាទរដល់ព្រះ
		របស់យ៉ាកុប	។
៣	ចូរយើងប្រគុំ	តន្ត្រីរងំ	ឱ្យបានឆាប់ៗ
	ដេញពិណវាយស្គរ	ចាប៉ីវាយក្រាប់	ប្រគុំឱ្យជាប់
		កុំបីបង្អង់	។
៤	ផ្លុំស្នែងប្រកាស	ពេលដាច់ខែចាស់	ចូលដល់ថ្មីម្តង
	ថ្ងៃចន្ទពេញវង់	ល្អល្អះបំព្រង	ពេញបូណ៌មីផង
		ថ្ងៃបុណ្យដំណែល	។
៥	ព្រោះជាក្បួនច្បាប់	រៀងមកដរាប	នៅអ៊ីស្រាអែល
	តាមបទបញ្ជា	មាគ៌ាក្រាស់ក្រែល	របស់ព្រះដែល
		ជាព្រះយ៉ាកុប	។
៦	នេះជាវិន័យ	ព្រះអង្គលកលៃ	ពេលទ្រង់បង្គាប់
	មកដល់ពូជពង្ស	របស់យ៉ូសែប	នៅស្រុកអេស៊ីប
		ហើយខ្ញុំឮថា	។
៧	យើងដកអម្រែក	ដ៏ធ្ងន់អនេក	ចេញពីលើស្មា
	ហើយក៏បានដក	ការធ្ងន់អស្ចារ្យ	ចេញពីហត្ថា
		របស់អ្នកដែរ	។
៨	ពេលអ្នកមានទុក្ខ	អ្នកបានស្រែករក	យើងគ្មានពេលល្ហែ
	យើងក៏រំដោះ	មិននៅទំនេរ	ហើយយើងរិះរេ
		ល្បងមើលចិត្តអ្នក	។
៩	ឱប្រជារាស្រ្ត	នៃយើងទាំងអស់	ចូរស្តាប់ឱ្យជាក់
	ពាក្យយើងរំលឹក	យើងដាស់តឿនអ្នក	កុំបីអន់អាក់
		ត្រងត្រាប់លកលៃ	។
១០	ក្នុងចំណោមអ្នក	កុំទៅស្មោះស្ម័គ្រ	នឹងព្រះដទៃ
	កុំទៅគោរព	កោតខ្លាចធ្វើអ្វី	ព្រោះព្រះដទៃ
		ជាព្រះក្លែងក្លាយ	។
១១	យើងជាព្រះម្ចាស់	មិនមែនជាព្រះ	ក្លែងក្លាយនោះឡើយ
	យើងបានយកអ្នក	ពីអេស៊ីបហើយ	កុំនៅកន្តើយ
		ទទួលពរយើង	។
១២	តែរាស្រ្តមិនស្តាប់	ពាក្យយើងបង្គាប់	គេធ្វើឫកឆ្មើង
	ទោះអ៊ីស្រាអែល	ក៏លែងស្គាល់យើង	ធ្វើតាមទំនើង
		អំពើអាក្រក់	។
១៣	ហេតុដូច្នេះហើយ	ទើបយើងបណ្តោយ	ឱ្យពួកគេធ្លាក់
	យើងឱ្យគេធ្វើ	តាមចិត្តគម្រក់	ប្រព្រឹត្តអាក្រក់
		តាមទំនើងចិត្ត	។
១៤	តែបើប្រជា	រាស្រ្តទាំងអស់គ្នា	គេប្តូរគំនិត
	ស្តាប់សំឡេងយើង	ហើយគេប្រព្រឹត្ត	តាមមាគ៌ាពិត
		របស់យើងនោះ	។
១៥	នោះយើងមុខជា	បង្ក្រាបបច្ចា	ជាខ្មាំងទាំងអស់
	ហើយយើងសម្លាប់	មិនឱ្យសល់សោះ	សត្រូវទាំងអស់
		តែមួយរំពេច	។
១៦	អស់អ្នកដែលធ្លាប់	ស្អប់ព្រះម្ចាស់ជាប់	គេឈប់រត់គេច
	នាំគ្នាមកចូល	ព្រះអង្គជានិច្ច	តែទ្រង់មិនភ្លេច
		ដាក់ទោសគេឡើយ	។
១៧	ព្រះអម្ចាស់បាន	ផ្តល់ស្រូវជាទាន	យ៉ាងល្អមកឱ្យ
	ពួកអ៊ីស្រាអែល	បរិភោគរួចហើយ	ទាំងប្រទានឱ្យ
		ទឹកឃ្មុំបរិបូណ៌	។

ទំនុកតម្កើងលេខ ៨២ (៨១) បទពាក្យ ៧

១	ព្រះម្ចាស់គង់ក្នុងអង្គប្រជុំ	នៃស្ថានបរមសុខពេកក្រៃ
	ទ្រង់តែងតែយាងមកកាត់ក្តី	ក្នុងចំណោមនៃពួកទេវតា	។
២	ពេលណាទើបអ្នកឈប់កាត់ក្តី	ដោយចិត្តអប្រីយ៍ដូច្នេះណា
	ឱ្យមនុស្សអាក្រក់ចិត្តឫស្យា	ឈ្នះគេដល់ណា ត ទៅទៀត ?	។
៣	ព្រះម្ចាស់មានព្រះបន្ទូលថា	ចូររកយុត្តិធម៌កុំរវាត
	ឱ្យអ្នកក្រីក្រខ្សត់គ្មានញាតិ	កូនកំព្រាអត់មានឪម៉ែ	។
៤	ចូរកុំនៅស្ងៀមចេញរំដោះ	អ្នកទន់ខ្សោយខ្សោះគ្មានអ្នកថែ
	ឱ្យគ្នារួចខ្លួនបានល្ហើយល្ហែ	ជនពាលតែងតែតាមធ្វើបាប	។
៥	តែគេមិនដឹងមិនយល់សោះ	ចិត្តគេទុយ៌សជាដរាប
	អំពើយុត្តិធម៌ក៏សូន្យសាប	ដែលទុកសម្រាប់់គ្រឹះផែនដី	។
៦	យើងនឹងប្រកាសថាអស់អ្នក	រាល់គ្នាពិតជាក់ជាបុត្រី
	បុត្រារបស់ម្ចាស់ផែនដី	ជាព្រះស្កឹមស្កៃដ៏ខ្ពង់ខ្ពស់	។
៧	តែអ្នកត្រូវស្លាប់ដូចមនុស្សលោក	ដែលដួលដេកស្តូកពុំអាចរស់
	ស្លាប់ដូចជាមនុស្សទូទាំងអស់	ដូចអ្នកធំខ្ពស់បាត់តំណែង	។
៨	ឱព្រះម្ចាស់អើយសូមតើនឡើង	វិនិច្ឆ័យកុំឆ្មើងឫទ្ធិគួរស្ញែង
	ដ្បិតមនុស្សគ្រប់ជាតិទាំងនោះឯង	ជារាស្រ្តឥតក្លែងនៃព្រះអង្គ	។

ទំនុកតម្កើងលេខ ៨៣ (៨២) បទកាកគតិ

២	ឱព្រះម្ចាស់អើយ	សូមកុំកន្តើយ	គង់ស្ងៀមស្ងាត់ឈឹង
	សូមទ្រង់មេត្តា	កុំធ្វើមិនដឹង	ម្តេចព្រងើយធ្មឹង
		យ៉ាងដូច្នេះណា	។
៣	សត្រូវព្រះអង្គ	គ្រប់គ្នាកំពុង	បង្កបញ្ហា
	នាំចលាចល	គ្រប់ៗអាត្មា	អ្នកស្អប់ក្សត្រា
		កំពុងបះបោរ	។
៤	ពួកគេរៀបចំ	គម្រោងការធំ	ប្រឆាំងឆោឡោ
	គេឃុបឃិតគ្នា	ប្រឆាំងបះបោរ	រាស្រ្តក្នុងនគរ
		របស់ព្រះម្ចាស់	។
៥	គេពោលឡើងថា	« តោះយើងនាំគ្នា	ប្រហារឱ្យអស់
	កុំឱ្យមានសល់	ជនជាតិទាំងនោះ	កុំឱ្យនឹកឈ្មោះ
		អ៊ីស្រាអែលទៀត»	។
៦	គេពិភាក្សា	គំនិតរួមគ្នា	ពីរឿងចោលម្សៀត
	ចុះសិន្ធិសញ្ញា	ពីការបៀនបៀត	នឹងព្រះម្ចាស់ទៀត
		រួមគ្នាប្រឆាំង	។
៧	មានជាតិអេដំ	អ៊ីស្មាអែលព្រម	ម៉ូអាប់អ្នកខ្លាំង
	ជនជាតិហាកា	រួមគ្នាតតាំង	ចូលមកប្រឆាំង
		នឹងព្រះអម្ចាស់	។
៨	ជនជាតិកេបាល	អាំម៉ូនរាលដាល	អាម៉ាឡេករូរះ
	ទាំងភីលីស្ទីន	ទីរ៉ុសស្អេកស្កះ	ប្រឆាំងព្រះម្ចាស់
		ពីគ្រប់ទិសទី	។
៩	នៅមានច្រើនទៀត	សូម្បីជនជាតិ	ពួកអាស្ស៊ីរី
	ក៏បានចូលរួម	កុះករមូលមីរ	ចូលដៃគ្រប់ទី
		លោកឡុតសាមាន្យ	។
១០	សូមព្រះអង្គធ្វើ	ដូចប្រព្រឹត្តលើ	ពួកម៉ាឌីយ៉ាន
	លោកស៊ីសេរ៉ា	ស្តេចទាំងប៉ុន្មាន	និងស្តេចយ៉ាប៊ីន
		ឯជ្រោះគីសូន	។
១១	ព្រះអង្គប្រហារ	ឱ្យគេមរណា	វិនាសទាំងកូន
	ដូចនៅអែនឌ័រ	សពទាំងប៉ុន្មាន	រលួយម៉ត់សូន្យ
		ជាជីទាំងអស់	។
១២	សូមព្រះអង្គដាក់	ទោសគេម្នាក់ៗ	ដូចបានដាក់ទោស
	ដល់ស្តេចអូរឹប	និងស្តេចសឹបនោះ	ហើយកុំស្រណោះ
		ពួកនោះឡើយណា	។
	ដាក់ទោសទាំងមេ	កុំបីរិះរេ	ដូចជាសេបា
	កុំឱ្យរួចខ្លួន	មួយសោះឡើយណា	ដូចដាក់ទោសា
		សាល់ម៉ូណាដែរ	។
១៣	គេនិយាយថា	«យើងនាំគ្នីគ្នា	កុំនៅរិះរេ
	វាយដណ្តើមដី	មកធ្វើជាកេរ	ដីនោះគឺជា
		របស់ព្រះម្ចាស់ »	។
១៤	ឱព្រះខ្ញុំអើយ	កុំអែអង់ឡើយ	ឱ្យគេនិរាស
	ដូចជាធូលី	ខ្យល់បកបញ្រ្ចាស់	ដូចចំបើងវាស
		វាត់ប៉ើងតាមខ្យល់	។
១៥	ដូចភ្លើងវក់វី	ឆេះម៉ត់ខ្ទេចខ្ទី	ដុតអស់គ្មានសល់
	អណ្តាតស្កឹមស្កៃ	ភ្លើងព្រៃត្រូវខ្យល់	ឆេះអស់មិនសល់
		វិនាសអសារ	។
១៦	សូមប្រើព្យុះខ្យល់	បក់បោកឱ្យដល់	ដេញតាមពួកវា
	ហើយសូមបន្ថែម	ទាំងព្យុះសង្ឃរា	ធ្វើឱ្យពួកវា
		រន្ធត់ញ័រញាប់	។
១៧	ព្រះអម្ចាស់អើយ	មេត្តាធ្វើឱ្យ	ពួកគេមុខអាប់
	និងឱ្យគេស្វែង	នាមព្រះអង្គគាប់	ពួកគេមុខអាប់
		រហូតតទៅ	។
១៨	សូមឱ្យពួកគេ	បាក់មុខខ្មៅអែ	វិនាសមិននៅ
	ងើបមុខមិនរួច	គ្មានញាតិពូជផៅ	ឈ្មោះគេអាស្រូវ
		គ្មានញាតិគ្មានមិត្រ	។
១៩	ឱ្យគេស្គាល់ថា	ព្រះអម្ចាស់ជា	ព្រះគង់នៅជិត
	ព្រះខ្ពស់ឧត្តុង្គ	ឧត្តមបំផុត	ប្រសើរពេកពិត
		លើភពផែនដី	។

ទំនុកតម្កើងលេខ ៨៤ (៨៣) បទព្រហ្មគីតិ

២	ព្រះម្ចាស់លើពិភព	ទូទាំងសព្វលើផែនដី
	ខ្ញុំស្ម័គ្រពន់ពេកក្រៃ	តំណាក់ថ្លៃព្រះអង្គណាស់	។
៣	ខ្ញុំសែនអន្ទះសារ	ចិត្តប្រាថ្នាយ៉ាងជាក់ច្បាស់
	ចង់ចូលវិហារព្រះ	ជាអម្ចាស់ទាំងចិត្តកាយ	។
	ចិត្តចង់នៅជាមួយ	ព្រះអង្គជួយមិនរសាយ
	អស់ពីកម្លាំងកាយ	មិនមានណាយរួមទាំងចិត្ត	។
៤	ត្រចៀកកាំនិងចាប	ជាដរាបវានែបនិត្យ
	សំបុកធ្វើនៅជិត	អាសនៈពិតនៃព្រះអង្គ	។
៥	អស់អ្នកដែលបានស្នាក់	ក្នុងដំណាក់ដ៏ត្រចង់
	មានសុខ មង្គលផង	សរសើរថ្កើងទ្រង់មិនឈប់	។
៦	អ្នកណាដែលផ្អែកពឹង	លើកម្លាំងព្រះជាម្លប់
	ដ្បិតគេស្វែងមិនឈប់	ដំណាក់គាប់ដោយស្មោះសរ	។
៧	នៅពេលគេដើរកាត់	ជ្រោះរីងស្ងួតគ្មានទឹកហូរ
	ព្រះអង្គប្រទានពរ	ទឹកធ្លាក់ឆរគ្រប់កន្លែង	។
៨	គេខិតកាន់តែជិត	ឥតភ័យភិតព្រួយចំបែង
	មានកម្លាំងក្រៃលែង	នឹកស្ញប់ស្ញែងគ្រប់អាត្មា	។
	នៅចំពោះព្រះភក្ត្រ	ព្រះអម្ចាស់ដ៏ថ្លៃថ្លា
	លើភ្នំដ៏អស្ចារ្យ	ឈ្មោះហៅថាភ្នំស៊ីយ៉ូន	។
៩	ឱ! ព្រះជាអម្ចាស់	មានតេជះខ្លាំងពេកពន់
	ស្តាប់ពាក្យទូលបង្គំ	អង្វរសុំក្តីករុណា	។
	ព្រះលោកយ៉ាកុបអើយ	កុំកន្តើយផ្ទៀងព្រះកាណ៌
	សណ្តាប់យើងខ្ញុំណា	ដោយមេត្តាករុណាផង	។
១០	ឱ! ព្រះជាអម្ចាស់	ទតឱ្យច្បាស់កុំរំលង
	មើលស្តេចដែលឃុំគ្រង	ជាខែលរងបាំងការពារ	។
	សូមទ្រង់ព្រះសន្តោស	មេត្តាប្រោសព្រះរាជា
	ដែលព្រះអង្គគាំពារ	តែងតាំងងារដោយប្រេងជ័យ	។
១១	មួយថ្ងៃដែលនៅក្នុង	វិហារទ្រង់សប្បាយក្រៃ
	ជាងរស់មួយពាន់ថ្ងៃ	នៅកន្លែងដទៃទៀត	។
	ខ្ញុំបានសម្រេចចិត្ត	ឈរនៅជិតមិនចង់ឃ្លាត
	ជាជាងស្នាក់នៅបៀត	លំនៅញាតិមនុស្សអាក្រក់	។
១២	ព្រះជាម្ចាស់ដូចជា	ខែលការពារប្រាកដជាក់
	ជាពន្លឺភ្លឺច្បាស់	យើងម្នាក់ៗមានសិរី	។
	ព្រះអង្គតែងតែផ្តល់	សុខមង្គលដល់ប្រុសស្រី
	រស់នៅដោយប្រពៃ	គ្មានទុក្ខភ័យផុតកង្វល់	។
១៣	ឱ! ព្រះជាអម្ចាស់	មានតេជះលើសាកល
	អ្នកផ្ញើកាយមិនខ្វល់	មានមង្គលសុខរហូត	។

ទំនុកតម្កើងលេខ ៨៥ (៨៤) បទកាកគតិ

២	បពិត្រព្រះម្ចាស់	ព្រះអង្គគាប់ព្រះ	ទ័យនឹងទឹកដី
	ទ្រង់បានដឹកនាំ	ពូជពង្សប្រពៃ	យ៉ាកុបថ្លាថ្លៃ
		ឱ្យវិលមកវិញ	។
៣	ព្រះអង្គលើកទោស	អស់ប្រជារាស្រ្ត	ឥតមានទោម្នេញ
	ឱ្យគេរួចបាប	មកល្អជាវិញ	ចិត្តគេពោរពេញ
		អំណរសប្បាយ	។
៤	ទ្រង់លែងពិរោធ	ឈប់ខ្ញាល់លែងក្រោធ	ដល់យើងទាំងឡាយ
	ទ្រង់តែងមេត្តា	យើងលែងខ្វល់ខ្វាយ	បានសុខសប្បាយ
		ដោយសារព្រះអង្គ	។
៥	ព្រះម្ចាស់ឧត្តម	សង្គ្រោះថ្នាក់ថ្នម	បីបមត្រកង
	សូមប្រោសឱ្យខ្ញុំ	ត្រឡប់វិញផង	ហើយសូមព្រះអង្គ
		កុំយកទោសា	។
៦	តើព្រះអង្គខ្ញាល់	ពួកយើងនេះដល់	រហូតពេលណា
	ឬទ្រង់ពិរោធ	រៀងរាល់វេលា	ឬក៏អស់ជា
		អង្វែងតទៅ	។
៧	តើទ្រង់មិនបាន	យាងមកទីស្ថាន	ឱ្យខ្ញុំរស់នៅ
	មានទាំងជិវិត	សែនល្អពេកកូវ	ពីនេះតទៅ
		អំណរសប្បាយ	។
៨	ឱ! ព្រះអម្ចាស់	សូមសម្តែងព្រះ	ហឫទ័យទូលាយ
	មេត្តាករុណា	អាសូរប្រណី	មកខ្ញុំរាល់ថ្ងៃ
		សូមសង្គ្រោះផង	។
៩	យើងខ្ញុំត្រងត្រាប់	ត្រចៀកប្រុងស្តាប់	បន្ទូលព្រះអង្គ
	ទ្រង់នឹងប្រទាន	សុខសាន្តគ្មានហ្មង	លើរាស្ត្រទ្រង់ផង
		ដែលមិនលេលា	។
១០	ក្នុងពេលឆាប់ៗ	ទ្រង់នឹងប្រញាប់	ជួយយើងរាល់គ្នា
	ដល់អ្នកកោតខ្លាច	ព្រះអង្គគ្រប់គ្រា	សិរីមហិមា
		នៅលើដីយើង	។
១១	ទ្រង់មានព្រះទ័យ	សប្បុរសថ្លាថ្លៃ	បារមីរុងរឿង
	ព្រះអង្គស្មោះស្ម័គ្រ	ករុណាមិនឆ្មើង	យុត្តិធម៌កើតឡើង
		នៅលើលោកីយ៍	។
១២	សេចក្តីទៀងត្រង់	ចាប់ដុះរហង់	ពាសពេញផែនដី
	សេចក្តីសុចរិត	ក៏លាស់ជាថ្មី	ពីសួគ៌ាល័យ
		ចុះជួយរក្សា	។
១៣	ព្រះអម្ចាស់ផ្ទាល់	ប្រទានមង្គល	ឱ្យយើងគ្រប់គ្នា
	ចំណែកផែនដី	បង្កើតផលា	ភោគផលផ្លែផ្កា
		សម្បូរមិនខ្វះ	។
១៤	សេចក្តីសុចរិត	យុត្តិធម៌ប្រណីត	នៅមុខព្រះម្ចាស់
	សុខសាន្តតាមដាន	រៀបផ្លូវថ្វាយព្រះ	ឥតមានក្រឡះ
		សុខសាន្តរហូត	។

ទំនុកតម្កើងលេខ ៨៦ (៨៥) បទព្រហ្មគីតិ

១	ឱព្រះអម្ចាស់អើយ	កុំកន្តើយផ្ទៀងព្រះកាណ៌​
	ស្តាប់ស័ព្ទខ្ញុំវាចា	ហើយមេត្តាតបវិញផង	។
	ដ្បិតខ្ញុំជាមនុស្ស	កម្សត់ខុសគេទាំងពួង
	ទុរគតពេកកន្លង	តោកយ៉ាកផងរាល់វេលា	។
២	សូមរក្សាជីវិត	ឱ្យខ្ញុំស្ថិតផុតគ្រាំគ្រា
	ដ្បិតខ្ញុំត្រង់ល្អជា	ស្ម័គ្រគ្រប់គ្រាគ្មានគេចកែ	។
	សូមមេត្តាសង្គ្រោះ	ដ្បិតខ្ញុំស្មោះឥតប្រួលប្រែ
	ជាបម្រើនៅក្បែរ	ពឹងផ្អែកតែលើម្ចាស់ថ្លៃ	។
៣	ឱ! ព្រះអម្ចាស់អើយ	អាណិតហើយសូមប្រណី
	ខ្ញុំស្រែកទូលរាល់ថ្ងៃ	រកព្រះអង្គមិនឈប់ឈរ	។
៤	ឱព្រះអម្ចាស់អើយ	សូមប្រោសឱ្យបម្រើល្អ
	មានសប្បាយអំណរ	តម្រង់រកព្រះអម្ចាស់	។
៥	បពិត្រព្រះម្ចាស់ខ្ញុំ	ព្រះឧត្តមសប្បុរសណាស់
	អត់ឱនមិនថ្កោលទោស	តែងសន្តោសខ្ញុំបរិបូណ៌	។
	ព្រះអង្គតែងអាណិត	អ្នកផ្តេកផ្តិតទ្រង់អាសូរ
	អ្នកដែលដង្ហោយថ្ងូរ	ហៅព្រះអង្គមកសង្គ្រោះ	។
៦	ឱព្រះអម្ចាស់អើយ	ទ្រង់ផ្ទៀងហើយសូមសន្តោស
	ពាក្យខ្ញុំស្រែករកនោះ	សូមទ្រង់ប្រោសរូបខ្ញុំផង	។
៧	នៅថ្ងៃមានអាសន្ន	ខ្ញុំបែរបន់មិនរំលង
	អង្វររកព្រះអង្គ	ទ្រង់ឆ្លើយត្រង់តបមកខ្ញុំ	។
៨	ឱព្រះជាអម្ចាស់	ទ្រង់ជាព្រះដ៏ឧត្តម
	ព្រះអង្គសែនសក្តិសម	គ្មានព្រះធំដូចទ្រង់ឡើយ	។
៩	បពិត្រព្រះអម្ចាស់	គ្រប់ជាតិសាសន៍ដែលកើតហើយ
	គេនឹងមិនកន្តើយ	តម្កើងកើយនាមព្រះអង្គ	។
១០	ព្រោះដ្បិតទ្រង់ជាព្រះ	ដ៏ខ្ពង់ខ្ពស់អស្ចារ្យផ្ចង់
	នោះគឺមានតែទ្រង់	ដែលជាអង្គលើលោកា	។
១១	ឱ! ព្រះអម្ចាស់ខ្ញុំ	មេត្តាសូមប្រាប់មាគ៌ា
	ឱ្យខ្ញុំស្គាល់គ្រប់គ្រា	នឹងយាត្រាចេញដើរតាម	។
	យើងខ្ញុំនឹងប្រព្រឹត្ត	តាមសុចរិតមាគ៌ាស្នាម
	ឱ្យខ្ញុំចេះប្រណម្យ	កោតឧត្តមបរមនាម	។
១២	បពិត្រព្រះម្ចាស់ខ្ញុំ	ទូលបង្គំមិនទីមទាម
	ថ្លែងអរព្រះគុណភ្លាម	ឥតលាក់លៀមពីដួងចិត្ត	។
	ខ្ញុំនឹងលើកតម្កើង	ព្រះនាមឡើងអស់កល្បពិត
	ថ្កើងថ្កានខ្ពស់ប្រណីត	រៀងស្ថេរស្ថិតជាប់រហូត	។
១៣	ដ្បិតទ្រង់មានព្រះទ័យ	ករុណាក្រៃមិនរលត់
	ជួយរំដោះជីវិត	ខ្ញុំឱ្យផុតពីក្សិណក្ស័យ	។
១៤	បពិត្រព្រះជាម្ចាស់	ពួកមនុស្សច្រើនពេកក្រៃ
	ព្រហើនមិនយល់អ្វី	គេពួតដៃប្រឆាំងខ្ញុំ	។
	មានអ្នកខ្លាំងពូកែ	បានប្រមែប្រមូលផ្តុំ
	ចង់ដកជីវិតខ្ញុំ	មិនបារម្ភព្រះអង្គសោះ	។
១៥	បពិត្រព្រះម្ចាស់អើយ	ព្រះអង្គហើយព្រះទ័យស្មោះ
	ករុណាទ្រង់សន្តោស	សប្បុរសមានមេត្តា	។
១៦	សូមទ្រង់បែរព្រះភក្ត្រ	ទតឱ្យជាក់ខ្ញុំនេះណា
	សូមអាណិតមេត្តា	ខ្ញុំគ្រប់គ្រាកុំបីខាន	។
	សង្គ្រោះខ្ញុំជាអ្នក	បម្រើស្ម័គ្រសូមឱ្យមាន
	កម្លាំងខ្លាំងក្លាហាន	សូមផ្ញើប្រាណនឹងព្រះអង្គ	។
១៧	សូមមេត្តាសម្តែង	ការស្ញប់ស្ញែងគេឃើញផង
	អ្នកស្អប់ខ្ញុំកន្លង	ឃើញព្រះអង្គប្រោសសង្គ្រោះ	។
	សូមឱ្យខ្មាំងសត្រូវ	វាអស់ផ្លូវត្រូវអាម៉ាស់
	នៅពេលដែលទ្រង់ត្រាស់	ប្រោសសង្គ្រោះការពារខ្ញុំ	។

ទំនុកតម្កើងលេខ ៨៧ (៨៦) បទកាកគតិ

១	ព្រះម្ចាស់សង់ក្រុង	ឧត្តមឧត្តុង្គ	ល្អល្អះប៉ប្រិម
	លើភ្នំវិសុទ្ធ	គ្មានអ្វីប្រៀបផ្ទឹម	យេរូសាឡឹម
		ជាក្រុងថ្លៃថ្លា	។
២	ព្រះអង្គស្រឡាញ់	ស៊ីយ៉ូនពោរពេញ	ជាក្រុងអស្ចារ្យ
	វិសេសវិសាល	លើសក្រុងនានា	លើទឹកដីជា
		របស់យ៉ាកុប	។
៣	ឱក្រុងរបស់	ព្រះជាអម្ចាស់	គេនឹងរៀបរាប់
	តម្កើ់ងសិរី	រុងរឿងគួរគាប់	របស់អ្នកជាប់
		ដោយពោលថ្លាថ្លែង	។
៤	ក្នុងចំណោមអ្នក	អេស៊ីបស្គាល់ជាក់	បាប៊ីឡូននេះឯង
	អ្នកខ្លះកើតនៅ	ទីរ៉ូសធំខែង	ភីលីស្ទីនស្តែង
		អេត្យូពីដែរ	។
៥	ចំពោះបុរី	ស៊ីយ៉ូនស្រស់ខ្ចី	មិនរួញរាទេ
	យើងទាំងអស់គ្នា	សុទ្ធកើតពីគេ	ព្រះម្ចាស់ជួយថែ
		ឱ្យក្រុងរឹងមាំ	។
៦	ពេលនោះព្រះម្ចាស់	កត់ឈ្មោះទាំងអស់	ក្នុងបញ្ជីធំ
	ប្រជាទាំងនេះ	សុទ្ធតែកើតក្នុង	ស៊ីយ៉ូនជាក្រុង
		ដែលផ្តល់កំណើត	។
៧	ពេលនោះមនុស្ស	គេលោតឡកគោះ	ច្រៀងរាំរហូត
	ថាគេជាកូន	ដែលគេបានកើត	មានដើមកំណើត
		ពីក្រុងស៊ីយ៉ូន	។

ទំនុកតម្កើងលេខ ៨៨ (៨៧) បទព្រហ្មគីតិ

២	បពិត្រព្រះអម្ចាស់	ទ្រង់ជាព្រះសង្គ្រោះខ្ញុំ
	ថ្ងៃយប់ខ្ញុំស្រែកយំ	អង្វរសុំក្តីមេត្តា	។
៣	សូមឱ្យពាក្យអង្វរ	ខ្ញុំឮខ្ទ័រដល់សោតា
	សូមទ្រង់ផ្ទៀងព្រះកាណ៌	ស្តាប់ផងណាសូរសម្រែក	។
៤	ព្រោះដ្បិតទូលបង្គំ	មានទុក្ខធំខ្លាំងអនេក
	ខ្លោចផ្សាជាពន់ពេក	ក្តីស្លាប់ស្រែកហៅកៀកកិត	។
៥	គេចាត់ទុករូបខ្ញុំ	ក្នុងចំណោមអ្នកដែលជិត
	ហៀបនឹងអស់ជីវិត	ឬនៅជិតអ្នកដែលស្លាប់	។
៦	ខ្លួនខ្ញុំដេកស្តូកស្តឹង	គ្មានទីពឹងសែនអួរអាប់
	បីដូចមនុស្សស្លាប់	ទ្រង់លែងរាប់រកនឹកនា	។
៧	ព្រះអង្គបានបង់បោះ	រូបខ្ញុំរស់នៅកំព្រា
	ឱ្យរងទុក្ខវេទនា	សែនរងាក្នុងរណ្តៅ	។
៨	ព្រះពិរោធព្រះអង្គ	សង្កត់ចងខ្ញុំទុកនៅ
	ដូចទឹកបោកសំដៅ	រារាំងផ្លូវទូលបង្គំ	។
៩	ព្រះអង្គឱ្យអស់អ្នក	ដែលធ្លាប់ស្ម័គ្រស្និទ្ធនឹងខ្ញុំ
	ឆ្ងាយពីទូលបង្គំ	ទាំងស្អប់ខ្ពើមថែមទៀតផង	។
១០	ភ្នែកខ្ញុំប្រែស្រវាំង	វេទនាខ្លាំងពេកកន្លង
	ខ្ញុំអង្វរព្រះអង្គ	លើកដៃផងសូមប្រណី	។
១១	តើមនុស្សដែលស្លាប់ទៅ	នឹងនិត្យនៅក្រោកឃ្មាតខ្មី
	តម្កើងជោគសិរី	ព្រះអង្គថ្លៃកើតឬទេ ?	។
១២	តើអ្នកនៅក្នុងផ្នូរ	អាចថ្លែងអរគិតរិះរេ
	ពីព្រះទ័យស្និទ្ធស្នេហ៍	ព្រះអង្គដែរកើតទេឬ ?	។
១៣	តើពួកអ្នកដែលស្ថិត	ទីងងឹតអាចដឹងឮ
	ស្គាល់ស្នាដៃរន្ទឺ	ព្រះអង្គឬ ដូចម្តេចបាន ?	។
១៤	ឱព្រះអម្ចាស់អើយ	ខ្ញុំដង្ហោយឥតស្រាកស្រាន្ត
	អង្វរម្ចាស់ថ្កើងថ្កាន	លំឱនប្រាណតាំងពីព្រឹក	។
១៥	ឱព្រះអម្ចាស់អើយ	ហេតុម្តេចឡើយទ្រង់មិននឹក
	ចោលខ្ញុំឱ្យវរវឹក	មិននានឹកខ្ញុំយ៉ាងនេះ ?	។
១៦	ខ្ញុំលំបាកកាយា	ជិតមរណាពីក្មេងម៉េ្លះ
	ព្រះអង្គធ្វើយ៉ាងនេះ	ឱ្យខ្ញុំអស់ក្តីសង្ឃឹម	។
១៧	ព្រះពិរោធព្រះអង្គ	សង្កត់ត្រង់លើរូបខ្ញុំ
	ធ្វើឱ្យទូលបង្គំ	ភ័យអួលងំបាត់ស្មារតី	។
១៨	ទុក្ខទោសនេះដូចជា	ផ្ទៃជលសាធំពេកក្រៃ
	ឡោមព័ទ្ធខ្ញុំរាល់ថ្ងៃ	គ្មានប្រណីគ្របពីលើ	។
១៩	ព្រះអង្គបានដេញមិត្ត	ធ្លាប់ជិតស្និទ្ធមិនអើពើ
	ចេញឆ្ងាយលែងងាកមើល	ខ្ញុំស្ទាក់ស្ទើរនៅកំព្រា	។
	រូបខ្ញុំប្រែធុញងប់	លំបាកសព្វវេទនា
	ឃើញតែភាពអន្ធិកា	នៅជាគ្នាជាប់រហូត	។

ទំនុកតម្កើងលេខ ៨៩ (៨៨) បទកាកគតិ

២	ឱ! ព្រះជាម្ចាស់	ខ្ញុំមិនគេចប្រាស	នឹងច្រៀងតម្កើង
	បង្គំព្រះអង្គ	ព្រះទ័យខ្ពស់ថ្កើង	អស់កល្បយូរលង់
		អង្វែងតទៅ	។
៣	ខ្ញុំប្រកាសថា	ព្រះទ័យមេត្តា	ករុណាត្រឹមត្រូវ
	របស់ព្រះអង្គ	ស្ថិតស្ថេរគង់នៅ	មាំមិនអាស្រូវ
		ដូចផ្ទៃមេឃា	។
៤	យើងចងសម្ពន្ធ	មេត្រីបន្ទាន់	ចុះខសន្យា
	ជ្រើសលោកដាវីឌ	ហើយតែងតាំងជា	បម្រើការពារ
		ឥតមានប្រែប្រួល	។
៥	យើងនឹងតាំងពង្ស	ពូជអ្នកឱ្យគង់	នៅជុំត្រកូល
	តាំងរាជ្យឱ្យអ្នក	នៅបានសុខស្រួល	គ្មានអ្វីប្រែប្រួល
		អង្វែងដរាប	។
៦	ឱព្រះម្ចាស់អើយ	ទេវតានេះហើយ	សរសើររៀងរាប់
	ពីស្នាព្រះហស្ត	អស្ចារ្យគួរគាប់	ច្រៀងកោតមិនឈប់
		ពីព្រះទ័យស្ម័គ្រ	។
៧	នៅស្ថានសួគ៌ា	ឥតមាននរណា	ស្មើរព្រះអង្គជាក់
	ពពួកទេវតា	ក៏មិនមានអ្នក	ឱ្យបានដូចព្រះ
		អម្ចាស់នោះទេ	។
៨	ពពួកទេវតា	ក៏ខ្លាចឫទ្ធា	ព្រះអម្ចាស់ដែរ
	អ្នកនៅជុំវិញ	កៀកកិតអែបក្បែរ	ខ្លបខ្លាចគ្មានប្រែ
		ព្រះនាមព្រះអង្គ	។
៩	បពិត្រព្រះម្ចាស់	ព្រះអង្គជាព្រះ	នៃភពទូទាំង
	គ្មានអ្នកណាមាន	អនុភាពក្លាខ្លាំង	បារមីប្រណាំង
		ព្រះអង្គបានឡើយ	។
១០	ព្រះអង្គបង្ក្រាប	សមុទ្រឱ្យរាប	ឈប់បោកបក់ហើយ
	ពេលវាកក្រើក	ទ្រង់មិនកន្តើយ	បញ្ជាវាហើយ
		ដោយឫទ្ធិបារមី	។
១១	ព្រះអង្គបានជាន់	កម្ទេចអង្កន់	មិនឱ្យសល់អី
	ប្រហារនាគរាជ	សត្រូវអប្រីយ៍	ដោយឫទ្ធិបារមី
		ចេស្តាខ្លាំងណាស់	។
១២	ផែនដីនិងមេឃ	គឺជាចំណែក	នៃព្រះអម្ចាស់
	ព្រះអង្គបង្កើត	អ្វីសព្វទាំងអស់	លើមេឃដីកោះ
		នៅក្នុងលោកនេះ	។
១៣	ព្រះអង្គបង្កើត	ទិសត្បូងល្អឆើត	ខាងជើងស្រឡះ
	មានភ្នំតាប៊រ	ភ្នំហែរម៉ូននោះ	សរសើរថ្កើងព្រះ
		នាមនៃព្រះអង្គ	។
១៤	ទ្រង់ប្រកបដោយ	ចេស្តាមិនថយ	ឫទ្ធាខ្ពស់ខ្ពង់
	បារមីខ្លាំងក្រៃ	មិនចេះបាត់បង់	អានុភាពព្រះអង្គ
		លើសគេលើលោក	។
១៥	ព្រះម្ចាស់គ្រងរាជ្យ	ដោយក្តីសុចរិត	យុត្តិធម៌រៀងមក
	អ្វីដែលទ្រង់ធ្វើ	សុទ្ធល្អហ្មងម៉ត់	ហឫទ័យអំណត់
		សន្តោសមេត្តា	។
១៦	បពិត្រព្រះម្ចាស់	ប្រជាអរណាស់	រស់ក្រោមចេស្តា
	ពន្លឺសប្បុរស	សន្តោសករុណា	រាស្រ្តផុតទុក្ខា
		មានសុខមង្គល	។
១៧	គេនឹងសប្បាយ	រីករាយរាល់ថ្ងៃ	ដោយស្មោះទទួល
	ព្រះនាមព្រះអង្គ	ឥតមានប្រែប្រួល	ខ្ពស់មុខសុខស្រួល
		ឥតមានសៅហ្មង	។
១៨	ព្រះម្ចាស់ប្រទាន	ពួកគេឱ្យមាន	ជោគសិរីផង
	ដោយព្រះសន្តោស	ប្រណីឥតហ្មង	យើងខ្ញុំថ្កុំថ្កើង
		ព្រោះព្រះអង្គជួយ	។
១៩	ព្រះម្ចាស់វិសុទ្ធ	ល្អល្អះបំផុត	អ៊ីស្រាអែលតែមួយ
	ទ្រង់បានជ្រើសរើស	ស្តេចជាជំនួយ	មិនឱ្យមានព្រួយ
		ជាខែលការពារ	។
២០	នាថ្ងៃមួយនោះ	ព្រះអង្គមានព្រះ	បន្ទូលមកថា
	យើងនឹងគាំទ្រ	អ្នកច្បាំងហានក្លា	យុវជនសង្ហា
		ពីក្នុងរាស្រ្តយើង	។
២១	យើងឃើញដាវីឌ	ជាអ្នកប្រណិប័តន៍	ឥតមានឆ្មៃឆ្មើង
	យើងក៏ចាក់ប្រេង	អភិសេកគេឡើង	ជាស្តេចថ្កុំថ្កើង
		គ្រងរាជ្យរហូត	។
២២	ហើយយើងនឹងជួយ	ជ្រែងជាជំនួយ	មិនឱ្យរបូត
	ទាំងផ្តល់កម្លាំង	រៀងរៀបមិនស្ងួត	ពូកែរហូត
		អំណាចពេញប្រៀប	។
២៣	សត្រូវពុំអាច	ពង្រឹងអំណាច	ឬចង់មកគាប
	ពួកអ្នកបះបោរ	ក៏មិនអាចធៀប	វិនាសរៀងរៀប
		ចេញពីមុខអស់	។
២៤	យើងនឹងកម្ទេច	សត្រូវមានល្បិច	មិនទុកនៅសោះ
	ព្រមទាំងប្រហារ	ពួកគេទាំងអស់	អ្នកស្អប់គាត់នោះ
		មិនឱ្យនៅជិត	។
២៥	យើងនឹងបញ្ចេញ	ហឫទ័យពោរពេញ	ករុណាអាណិត
	ចំពោះរូបគេ	នឹងបាននែបនិត្យ	ថ្កើងរុងរឿងពិត
		ដោយសារនាមយើង	។
២៦	យើងនឹងធ្វើឱ្យ	ដាវីឌពេញដោយ	អំណាចថ្កុំថ្កើង
	រេលើសមុទ្រ	និងត្រួតគ្រប់គ្រង	ដល់ទន្លេផង
		ទាំងតូចទាំងធំ	។
២៧	ដាវីឌហៅយើង	បិតាមិនឆ្មើង	ថាថ្មខែងហំ
	ដែលបានសង្គ្រោះ	រំដោះរូបខ្ញុំ	បានឡើងឧត្តម
		ខ្ពង់ខ្ពស់សង្ហារ	។
២៨	រីឯយើងវិញ	យើងនឹងបំពេញ	ដាវីឌស្ងួនភ្ងារ
	តាំងជាបុត្រច្បង	របស់យើងណា	ស្តេចធំអស្ចារ្យ
		នៅលើផែនដី	។
២៩	យើងនឹងបញ្ចេញ	ឥតមានទោម្នេញ	ដោយចិត្តប្រណី
	នឹងរក្សាទុក	សម្ពន្ធមេត្រី	ចងជាប់មិនស្រាយ
		មិនគេចប្រែប្រួល	។
៣០	យើងនឹងតែងតាំង	ត្រកូលពូជពង្ស	ឱ្យរស់សុខស្រួល
	ស្ថិតស្ថេរអស់កល្ប	ដាវីឌតែមួយ	ល្បីល្បាញរញ្ជួយ
		ដូចមេឃខៀវខ្ចី	។
៣១	បើសិនពូជពង្ស	ដាវីឌបោះបង់	ចោលធម្មវិន័យ
	ហើយឈប់ដើរតាម	មាគ៌ាប្រពៃ	ធ្វើងើយមិនស្តី
		មិនតាមបញ្ជា	។
៣២	ប្រសិនបើគេ	បំពានវៀចវេរ	កែប្រែរេរា
	ហើយលែងប្រតិបត្តិ	តាមបទបញ្ជា	វិន័យនានា
		ជារបស់យើង	។
៣៣	យើងនឹងប្រដៅ	ពួកឆោតល្ងង់ខ្លៅ	បង្ករឿងឡើង
	យើងដាក់ទណ្ឌកម្ម	ទារុណធ្ងន់ថ្កើង	កំហុសមានច្រើន
		គេបានប្រព្រឹត្ត	។
៣៤	ប៉ុន្តែយើងតែង	បញ្ជាក់សម្តែង	សេចក្តីអាណិត
	ស្មោះស្ម័គ្រនឹងគេ	ឥតប្រែប្រួលចិត្ត	ឬចង់បែរគេច
		បែកចិត្តចោលឡើយ	។
៣៥	យើងនឹងមិនផ្តាច់	សម្ពន្ធមានស្រេច	នោះទេអ្នកអើយ
	មិនក្បត់ក្រឡាស់	ប្រែមុខជាក្រោយ	អ្វីនិយាយហើយ
		យើងមិនបំបាត់	។
៣៦	យើងបានសន្យា	យ៉ាងច្បាស់អស្ចារ្យ	ឥតមានតក់ស្លុត
	នៅក្នុងនាមយើង	ជាព្រះវិសុទ្ធ	ល្បីមិនរលត់
		មិនភរបោកប្រាស	។
៣៧	ពូជរបស់គាត់	នឹងនៅស្ថេរស្ថិត	សុខឥតក្រឡះ
	រាជ្យរបស់គេ	រុងរឿងខ្លាំងណាស់	រស្មីត្រចះ
		ដូចព្រះអាទិត្យ	។
៣៨	ឬដូចច័ន្ទថ្លៃ	ដែលមានរស្មី	គង់វង្សស្ថេរស្ថិត
	ធ្វើជាសាក្សី	អែបអង្គនែបនិត្យ	មិនអាចបំបិទ
		ឬមានល្បិចកល	។
៣៩	ប៉ុន្តែព្រះម្ចាស់	ព្រះអង្គបានលះ	បង់ចោលកាត់កាល់
	ទ្រង់ព្រះពិរោធ	ព្រះរាជាដែល	ថ្នាក់ថ្នមក្រវែល
		ចាក់ប្រេងអភិសេក	។
៤០	ព្រះអង្គបានផ្តាច់	សម្ពន្ធបណ្តាច់	មេត្រីល្អឯក
	ជាមួយបម្រើ	ទម្លាក់មកុដរាជ្យ	រាជានោះទៀត
		ឱ្យធ្លាក់ដល់ដី	។
៤១	កំពែងទាំងអស់	ត្រូវខូចធ្លាយធ្លុះ	មិនមានសល់អ្វី
	ទាំងតួបន្ទាយ	រលំដល់ដី	បាក់បែកខ្ចាត់ខ្ចាយ
		មិនសល់ចន្លោះ	។
៤២	អ្វីដែលស្តេចបាន	គេប្លន់បំពាន	រឹបអូសយកអស់
	ប្រទេសជិតខាង	ពេបជ្រាយខាកស្តោះ	មើលងាយចំពោះ
		អង្គព្រះរាជា	។
៤៣	ព្រះអង្គប្រទាន	កម្លាំងឱ្យមាន	ដល់ពួកបច្ចា
	ខ្លាំងក្លាពេកក្រៃ	ដូចដំរីសា	សត្រូវនាំគ្នា
		រីករាយសប្បាយ	។
៤៤	ព្រះអង្គធ្វើឱ្យ	សាស្រ្តាវុធថយ	ឫទ្ធីបារមី
	ឈប់ឱ្យសក្តិសិទ្ធិ	ព្រះអង្គមិនខ្ចី	អាណិតប្រណី
		ស្តេចក្នុងចម្បាំង	។
៤៥	ទ្រង់ដកអំណាច	ដោយឥតមានខ្លាច	ព្រះរាជាគាំង
	បន្ថយជន្មា	រំលំបល្ល័ង្ក	ស្តេចភ័យស្លេកស្លាំង
		បាក់មុខអាប់យស	។
៤៦	ព្រះអង្គពុំឱ្យ	ព្រះរាជាសោយ	រាជ្យបានយូរសោះ
	ទ្រង់ធ្វើឱ្យស្តេច	ទទួលអាម៉ាស់	រងទុក្ខក្រៃក្រាស់
		ខ្មាសអស់ប្រជា	។
៤៧	ឱព្រះម្ចាស់អើយ	ម្តេចគង់ព្រងើយ	ពុំព្រមវាចា
	សូមស្រាយពិរោធ	សង្គ្រោះសង្ខារ	ឬមិនមេត្តា
		នៅតែឆាបឆេះ	។
៤៨	នៅតែឆាបឆេះ	អាយុសង្ខារ	ខ្ញុំខ្លីអ្វីម៉េ្លះ
	ព្រះអង្គបង្កើត	មនុស្សលោកមកនេះ	ដើម្បីបញ្ឆេះ
		រំលាយទៅវិញ	។
៤៩	គ្មាននរណាម្នាក់	រស់នៅទៀងជាក់	មិនដែ​លទោម្នេញ
	កើតហើយតែងស្លាប់	ទៅជាដីវិញ	មិនអាចគេចចេញ
		ពីមច្ចុរាជបាន	។
៥០	ឱ! ព្រះអម្ចាស់	តើស្នាព្រះហស្គ	ទ្រង់ទាំងប៉ុន្មាន
	មេត្តាករុណា	ដែលព្រះអង្គបាន	ធ្លាប់ប្រោសប្រទាន
		ដាវីឌទៅណា ?	។
៥១	ព្រះអម្ចាស់អើយ	សូមកុំព្រងើយ	បំភ្លេចទាសា
	កំពុងបាក់មុខ	ស្ទើរក្ស័យសង្ខារ	អស់រាស្រ្តប្រជា
		ក្នុងបន្ទុកខ្ញុំ	។
៥២	បពិត្រព្រះម្ចាស់	សត្រូវទាំងនោះ	បំបាក់មុខចំ
	ស្តេចដែលទ្រង់បាន	អភិសេកជាធំ	ដៀលជេរមិនសម
		រាជាឥតហេតុ
៥៣	សូមលើកតម្កើង	សិរីរុងរឿង	ថ្លៃខ្ពស់ត្រដែត
	របស់ព្រះម្ចាស់	ភ្លឺចាំងក្រឡែត	អស់កល្បរហូត
		អង្វែងរៀងទៅ	។

ទំនុកតម្កើងលេខ ៩០ (៨៩) បទពាក្យ ៧

១	បពិត្រព្រះម្ចាស់ដ៏ប្រសើរ	ព្រះអង្គធ្លាប់ធ្វើជាជម្រក
	ពីជំនាន់មុនតរៀងមក	ឱ្យយើងខ្ញុំជ្រកបានប្រពៃ	។
២	មុនពេលមានភ្នំកកើតឡើង	មុនពេលព្រះអង្គបង្កើតដី
	មុនពិភពលោកនិងអ្វីៗ	ព្រះអម្ចាស់ថ្លៃជាបិតា	។
៣	ព្រះអង្គធើ្វឱ្យមនុស្សគ្រប់ទី	ក្លាយជាធូលីដីវិញណា
	គឺព្រះអង្គមានបន្ទូលថា៖	«អស់ពូជពង្សអដាំវិលវិញ!»	។
៤	ចំពោះព្រះអង្គរយៈពេល	មួយពាន់ឆ្នាំក្រែលដូចម្សិលមិញ
	ឬដូចជាពេលមួយយប់ពេញ	កន្លងផុតចេញទៅថ្មីៗ	។
៥	ព្រះអង្គដកយកជីវិតមនុស្ស	ជីវិតទាំងអស់សព្វអ្វីៗ
	គឺប្រៀបបីដូចជាស្មៅខ្ចី	មិនពិបាកអីដូចយល់សប្តិ	។
៦	នៅពេលព្រឹកព្រាងមានរស្មី	ស្មៅដុះពីដីហើយត្រឡប់
	ជាក្រៀមស្រពោនសែនអភ័ព្វ	ពេលល្ងាចស្ងួតងាប់គ្មានសល់អ្វី	។
៧	យើងខ្ញុំនឹងត្រូវវិនាសបង់	ដោយសារព្រះអង្គមិនប្រណី
	ពេលទ្រង់ខ្ញាល់ខ្លាំងខ្ញុំភិតភ័យ	ព្រោះព្រះម្ចាស់ថ្លៃដាច់មេត្តា	។
៨	ព្រះអង្គចាប់យកកំហុសខ្ញុំ	មកត្រដាងចំមុខភ័ក្ត្រា
	ពន្លឺព្រះអង្គចាំងកាលណា	ឃើញអស់កិច្ចការខ្ញុំប្រព្រឹត្ត	។
៩	ដោយសារព្រះអង្គព្រះពិរោធ	ជីវិតខ្ញុំសោតដុនដាបពិត
	អាយុត្រូវចប់ផុតជីវិត	ដង្ហើមបើកបិទកាន់តែខ្លី	។
១០	អាយុយើងខ្ញុំរស់បានត្រឹម	តែចិតសិបឆ្នាំមិនវែងអី
	បើបានប៉ែតសិបនោះប្រពៃ	ក្រោយមកស្នូលដីបែកខ្ចាត់ខ្ចាយ	។
	ក្នុងពេលដែលខ្ញុំមានជីវិត	ខ្ញុំតែងនឹកគិតតែងខ្វល់ខ្វាយ
	និងជួបតែទុក្ខឥតស្រស់ស្រាយ	ជីវិតឃ្លាតឆ្ងាយត្រូវមរណា	។
១១	តើនរណាស្គាល់កម្លាំងក្រោធ	នៃព្រះពិរោធដ៏អស្ចារ្យ
	ដើម្បីគោរពខ្លាចចេស្តា	ព្រះអង្គយ៉ាងណាឱ្យត្រឹមត្រូវ	។
១២	សូមណែនាំខ្ញុំឱ្យដឹងថា	អាយុសង្ខារខ្ញុំឥឡូវ
	កំណត់ប៉ុណ្ណាឱ្យត្រឹមត្រូវ	ដើម្បីជាផ្លូវខ្ញុំរិះគិត	។
១៣	ឱព្រះអម្ចាស់សូមប្រញាប់	យាងមកឆាប់ៗប្រាប់ការពិត
	កុំនៅបង្អង់សូមអាណិត	អាសូរដល់ចិត្តអ្នកបម្រើ	។
១៤	សូមសម្តែងហឫទ័យមេត្តា	ដោយក្តីករុណាដ៏ប្រសើរ
	ចំពោះខ្ញុំជាអ្នកបម្រើ	ខ្ញុំមានអំណរគ្រប់វេលា	។
១៥	ព្រះអង្គឱ្យខ្ញុំកើតទុក្ខធំ	អស់ពេលច្រើនឆ្នាំខ្ញុំវេទនា
	សូមប្រោសឱ្យខ្ញុំផុតទុក្ខា	សប្បាយយូរយាយ៉ាងនោះដែរ	។
១៦	សូមសម្តែងឱ្យខ្ញុំឃើញច្បាស់	ពីការសង្គ្រោះឥតកែប្រែ
	ឱ្យកូនចៅខ្ញុំឃើញហូរហែ	ភាពថ្កុំថ្កើងដែរនៃព្រះអង្គ	។
១៧	ឱព្រះម្ចាស់អើយសូមសម្តែង	សេចក្តីស្រឡាញ់មកខ្ញុំផង
	សូមជួយពង្រឹងការទាំងពួង	ខ្ញុំឱ្យខ្ជាប់ខ្ជួនរៀងរហូត	។

ទំនុកតម្កើងលេខ ៩១ (៩០) បទកាកគតិ

១	អ្នកដែលរស់ក្រោម	ការថែគ្រប់គ្រង	របស់ព្រះម្ចាស់
	ជាព្រះខ្ពង់ខ្ពស់	វិសុទ្ធពេកណាស់	មានឫទ្ធិតេជះ
		បារមីខ្លាំងក្រៃ	។
២	ខ្ញុំសូមទូលថា	«ព្រះអម្ចាស់ជា	ជម្រកយប់ថ្ងៃ
	និងជាកំពែង	ជ្រកកោនផុតភ័យ	មិនបង្អង់អី
		ផ្ញើកាយជីវិត»
៣	ព្រះម្ចាស់តែងតែ	ជួយមិនគេចកែ	ឱ្យអ្នករួចផុត
	ចេញពីអន្ទាក់	ពួកជនទុច្ចរិត	ជំងឺរាតត្បាត
		ចង្រៃឧបទ្រព	។
៤	ទ្រង់នឹងការពារ	រូបអ្នកគ្រប់គ្នា	នៅជ្រកក្រោមម្លប់
	បារមីព្រះអង្គ	ទាំងថ្ងៃទាំងយប់	ឥតមានឈរឈប់
		ម្លប់ដ៏ត្រជាក់	។
	ព្រះហឫទ័យ	មេត្តាប្រណី	មិនដែលថ្នាំងថ្នាក់
	របស់ព្រះអង្គ	ជួយការពារអ្នក	ជាអាវក្រោះពាក់
		របស់អ្នកហើយ	។
៥	នៅពេលរាត្រី	អ្នកនឹងមិនភ័យ	អំពីអ្វីឡើយ
	អាសន្នគ្រប់យ៉ាង	ចៀសផុតធូរស្បើយ	ពេលថ្ងៃក៏ដោយ
		ក៏អាចរួចផុត	។
៦	អ្នកនឹងមិនអាច	ជួបគ្រោះកំណាច	ក្នុងយប់ងងឹត
	ទាំងមហន្តរាយ	ទោះនៅឆ្ងាយជិត	ថ្ងៃត្រង់ក៏ផុត
		មិនអាចជួបសោះ	។
៧	ទោះបីជាមាន	មនុស្សម៉ឺនពាន់	ដេកស្លាប់ទាំងអស់
	ក៏មិនមានអ្វី	មកប៉ះអ្នកសោះ	ផុតអស់ទុក្ខគ្រោះ
		គ្មានព្រួយភិតភ័យ	។
៨	បើអ្នកពិនិត្យ	មើលឱ្យបានជិត	ឃើញច្បាស់ដូចថ្ងៃ
	ពីពួកមនុស្ស	អបលក្ខណ៍អប្រីយ៍	រងទោសរាល់ថ្ងៃ
		មិនមានអាក់ខាន	។
៩	ព្រះអម្ចាស់ជា	ជម្រកពន្លា	គ្មានអ្វីស្មើបាន
	អ្នកជ្រកក្រោមម្លប់	ព្រះខ្ពស់ហួសស្មាន	វិសុទ្ធថ្កើងថ្កាន
		នៅលើលោកីយ៍	។
១០	គ្មានទុក្ខវេទនា	ណាមកពាធា	ធ្វើឱ្យអ្នកភ័យ
	ទោះជាគ្រោះកាច	ឧបសគ្គចង្រៃ	ចូលមិនបានអី
		ដល់លំនៅអ្នក	។
១១	ដ្បិតព្រះអម្ចាស់	នឹងបញ្ជាច្បាស់	ទេវទូតគ្រប់ថ្នាក់
	តាមជួយរក្សា	ការពាររូបអ្នក	គ្រប់ទីសំណាក់
		ដែលអ្នកនឹងនៅ	។
១២	ទេវទូតយកដៃ	ចាំទ្រថ្នមបី	មិនឱ្យហ្មងសៅ
	លើកអ្នកឱ្យឈរ	រឹងប៉ឹងពេកកូវ	មិនឱ្យជើងត្រូវ
		ទង្គិចថ្មឡើយ	។
១៣	អ្នកនឹងដើរជាន់	សត្វមានរាប់ពាន់	នៅជិតបង្កើយ
	សត្វគោកសត្វទឹក	សត្វព្រៃក៏ដោយ	ជាន់សិង្ហពស់ហើយ
		ទាំងសត្វនាគខ្លា	។
១៤	ព្រះអម្ចាស់មាន	ព្រះបន្ទូលថ្កាន	យ៉ាងច្បាស់មកថា
	យើងនឹងចេញមុខ	រំដោះរងការ	ដ្បិតគេស្គាល់ថា
		យើងជាព្រះគេ	។
១៥	បើគេស្រែករក	ហៅយើងឱ្យមក	យើងតបមិនរេ
	ពេលមានអាសន្ន	យើងនៅនឹងគេ	ឥតមានបែកបែរ
		ទាំងថ្កើងគេផង	។
១៦	យើងឱ្យគេបាន	រស់នៅសុខសាន្ត	យូរឆ្នាំកន្លង
	អាយុយឺនយូរ	មិនឱ្យមានហ្មង	ឱ្យគេដឹងផង
		ថាយើងសង្គ្រោះ	។

ទំនុកតម្កើងលេខ ៩២ (៩១) បទពាក្យ ៧

២	បពិត្រព្រះអម្ចាស់ខ្ញុំអើយ​​​​	ទូលបង្គំនេះហើយស្មូត្រតម្កើង
	ពិតជាការគួរប្រពៃផង	ប្រសើរកន្លងថ្កើងព្រះនាម	។
៣	ខ្ញុំសូមប្រកាសពីព្រះទ័យ	ករុណាប្រណីពីព្រហាម
	ពេលយប់ក៏ថ្លែងមិននៅស្ងៀម	ឥតរេទីមទាមមិនឈប់ឈរ	។
៤	យើងខ្ញុំបន្ទន់ឱនទាំងកាយ	បង្គំក្រាបថ្វាយទាំងកំដរ
	មានតូរ្យតន្ត្រីចាប៉ីស្គរ	បន្ថែមបន្ទរពិណពីក្រោយ	។
៥	បពិត្រព្រះម្ចាស់គ្រប់កិច្ចការ	ដ៏ល្អអស្ចារ្យទ្រង់ធ្វើហើយ
	ខ្ញុំសែនរីករាយចិត្តល្ហែល្ហើយ	ស្នាព្រះហស្តថ្លៃនៃព្រះអង្គ	។
៦	បពិត្រព្រះម្ចាស់ស្នាព្រះហស្ត	ព្រះអង្គទាំងអស់ខ្ពស់ឧត្តុង្គ
	សន្លឹមអន្លាយជ្រៅកន្លង	ជាងសមុទ្រផងវាស់ពុំបាន	។
៧	មនុស្សល្ងីល្ងើទាំងប្រុសស្រី	មិនយល់សេចក្តីគ្រប់ៗប្រាណ
	ឯពួកអ្នកល្ងង់ក៏មិនបាន	ចេះដឹងប្រមាណអ្វីនោះដែរ	។
៨	ពួកអ្នកអាក្រក់រីកចម្រើន	លូតលាស់ដុះកើនមួយជាទ្វេ
	ឯអ្នកទុច្ចរិតចម្រើនដែរ	ប៉ុន្តែពួកគេវិនាសអស់	។
៩	ទោះបីទ្រង់គង់លើអាកាស	វិសុទ្ធពេកណាស់ហើយខ្ពង់ខ្ពស់
	ជាស្ថានវិសេសឥតមានមោះ	ទ្រង់នៅជាព្រះម្ចាស់ជានិច្ច	។
១០	បពិត្រព្រះម្ចាស់សត្រូវខ្មាំង	របស់ព្រះអង្គវិនាសខ្ទេច
	ពួកអ្នកទុច្ចរិតមានកលកិច្ច	នឹងត្រូវកម្ទេចមិនសល់អី	។
១១	ព្រះអង្គប្រទានឱ្យរូបខ្ញុំ	មានកម្លាំងហំដូចដំរី
	រួចទ្រង់បានចាក់ទាំងប្រេងថ្មី	ក្រអូបពេកក្រៃសព្វអង្គា	។
១២	ខ្ញុំឃើញពួកខ្មាំងសត្រូវឃ្លាំ	គេលបនៅចាំរាល់វេលា
	ឮទាំងសម្រែកហ៊ោខ្ញៀវខ្ញា	របស់បច្ចាដែលស្អប់ខ្ញុំ	។
១៣	មនុស្សសុចរិតនឹងដុះដាល	លូតលាស់ត្រកាលដូចត្នោតធំ
	បែកមែកសាខាម្លប់ត្រសុំ	ដូចគគីរផ្តុំនៅជិតគ្នា	។
១៤	ពួកគេប្រៀបបាននឹងដើមឈើ	លូតលាស់ដុះលើព្រះពន្លា
	គេរីកដុះដាលក្នុងវិហារ	របស់ព្រះជាម្ចាស់ថ្លាថ្លៃ	។
១៥	ទោះបីគេមានវ័យចំណាស់	ទោះខ្លួនគេចាស់ដូចម្តេចក្តី
	គេបង្កើតផ្លែពន្លកថ្មី	ស្លឹកលាស់ខៀវខ្ចីជាប់ជានិច្ច	។
១៦	ការនេះសម្តែងឱ្យឃើញថា	ព្រះអម្ចាស់ជាថ្មមាំពិត
	ទ្រង់មានព្រះទ័យត្រង់សុចរិត	ឥតប្រែប្រួលចិត្តសោះឡើយណា	។

ទំនុកតម្កើងលេខ ៩៣ (៩២) បទកាកគតិ

១	ព្រះអម្ចាស់ថា	មហាក្សត្រា	រុងរឿងថ្កើងថ្កុំ
	ទ្រង់ប្រកបដោយ	ចេស្តាឧត្តម	ផែនដីនៅមាំ
		ឥតរង្គើឡើយ
២	បល្ល័ង្កព្រះអង្គ	ស្ថិតស្ថេររឿងរុង	យូរលង់មកហើយ
	ជន្មាព្រះអង្គ	អស់កល្បអន្លាយ	ដើមមករៀងអាយ
		អង្វែងជានិច្ច	។
៣	បពិត្រព្រះម្ចាស់	រលកលោតផ្លោះ	មុជងើបខ្លាំងតិច
	ខ្ទ័រខ្ទារគគ្រឹក	ជួនជោរជួននាច	សំឡេងបាចសាច
		សម្បើមអស្ចារ្យ	។
៤	ប៉ុន្តែព្រះម្ចាស់	គ្រងរាជ្យខ្ពស់ណាស់	ងរឿងមហា
	នៅបរមសុខ	មានឫទ្ធិចេស្តា	ខ្លាំងមហិមា
		ជាងមហាសមុទ្រ	។
៥	បពិតព្រះម្ចាស់	ក្រឹត្យវិន័យព្រះ	ត្រឹមត្រូវបរិសុទ្ធ
	ដំណាក់ព្រះអង្គ	ល្អល្អះបំផុត	វិសេសវិសុទ្ធ
		អស់កល្បតទៅ	។

ទំនុកតម្កើងលេខ ៩៤ (៩៣) បទព្រហ្មគីតិ

១	បពិត្រព្រះអម្ចាស់	ទ្រង់តែងប្រោសរកយុត្តិធម៌
	ព្រះនាមល្បីខ្ទារខ្ទ័រ	ដោយចេស្តាឫទ្ធិបារមី	។
២	ព្រះដែលជាចៅក្រម	ដ៏ឧត្តមលើផែនដី
	តើនឡើងដាក់ទោសពៃរ៍	មនុស្សអប្រីយ៍តាមអំពើ	។
៣	ឱព្រះអម្ចាស់អើយ	តើទុកឱ្យមនុស្សល្ងីល្ងើ
	អាក្រក់មានជ័យលើ	តាមអំពើដល់ពេលណា	។
៤	គេពោលពាក្យក្អេងក្អាង	អួតបំប៉ោងឫកសង្ហា
	ចូលចិត្តពាក្យមុសា	នាំអាត្មាធ្វើទុច្ចរិត	។
៥	បពិត្រព្រះជាម្ចាស់	ពួកគេជិះជាន់សង្កត់
	ប្រជាជនសុចរិត	ទឹកដីពិតជាអន្តរាយ	។
៦	ពួកវាកាប់សម្លាប់	ដោយសំអប់ស្រីមេម៉ាយ
	អន្តោប្រវេសន៍ក្ស័យ	ហើយប្រល័យក្មេងកំព្រា	។
៧	គេថាព្រះអម្ចាស់	ទតមិនច្បាស់មិនបានការ
	ព្រះយ៉ាកុបនេះណា	មិនបានការមិនយល់អ្វី	។
៨	មនុស្សល្ងីល្ងើអើយ	អ្នកនេះហើយប្រាជ្ញាខ្លី
	ចិត្តខ្មៅជួអប្រីយ៍	មិនដឹងអីមិនចេះគិត	។
៩	ព្រះអង្គបង្កើតភ្នែក	ឱ្យក្រឡេកមើលឆ្ងាយជិត
	តើទ្រង់មិនចេះគិត	មិនចេះទតអ្វីទេឬ ?	។
	ឯត្រចៀកមនុស្ស	ទាំងស្រីប្រុសឱ្យស្តាប់ឮ
	ព្រះអង្គធ្វើបញ្ឈឺ	ឬមិនចេះស្តាប់សំឡេង	។
១០	ព្រះអង្គវាយប្រដៅ	មនុស្សល្ងង់ខ្លៅឱ្យចេះដឹង
	ម្តេចក៏ទ្រង់មិនខឹង	មិនរំពឹងដាក់ទោសអី ?	។
១១	ទ្រង់ជ្រាបគំនិតអស់	របស់មនុស្សលើលោកីយ៍
	គំនិតពួកគេខ្លី	មិនដឹងអីមនុស្សខ្លៅ	។
១២	បពិត្រព្រះអម្ចាស់	អ្នកដែលព្រះបង្ហាញផ្លូវ
	អប់រំប្រៀនប្រដៅ	អ្នកនោះត្រូវមានមង្គល	។
១៣	នៅថ្ងៃមានអាសន្ន	ទ្រង់បន្ទន់គេលែងខ្វល់
	មានរណ្តៅនៅសល់	ទុកតម្កល់កប់ជនពាល	។
១៤	ដ្បិតទ្រង់មិនបង់បោះ	ប្រជារាស្រ្តឱ្យគេដៀល
	ព្រះអង្គក៏មិនចោល	ចំណែកផ្ទាល់មរតកទ្រង់	។
១៥	ចៅក្រមនឹងកាត់ក្តី	ដោយប្រពៃមិនបង្អង់
	អ្នកដែលមានចិត្តត្រង់	តាមគន្លងយុត្តិធម៌	។
១៦	តើមាននរណានឹង	ហ៊ានប្រឆាំងពួកមិនល្អ
	នរណាដែលហ៊ានឈរ	ប្រឆាំង ត ពួកអប្រិយ៍	។
១៧	ប្រសិនបើព្រះម្ចាស់	មិនសង្គ្រោះខ្ញុំភិតភ័យ
	ច្បាស់ជាត្រូវក្សិណក្ស័យ	វិនាសឆ្ងាយជាមិនខាន	។
១៨	ពេលខ្ញុំពោលថាអស់	កម្លាំងខ្សោះជិតដួលប្រាណ
	ព្រះអង្គទ្រខ្ញុំបាន	មិនខកខានព្រះទ័យស្មោះ	។
១៩	ពេលណាមានកង្វល់	ទុក្ខខ្វាយខ្វល់រាប់មិនអស់
	ព្រះអង្កទ្រង់សន្តោស	ប្រោសខ្ញុំរស់អរសប្បាយ	។
២០	តើទ្រង់មានជំពាក់	ទៅស្មោះស្ម័គ្រមនុស្សព្រៃផ្សៃ
	យកយុត្តិធម៌ក្រឡៃ	ឬកែឆ្នៃទាំងច្បាប់ក្បួន	។
២១	ពួកគេព្រួតព្យាបាទ	ពួកសុចរិតមិនសមសួន
	ប្រហារប្រជាជន	ដាក់ទោសទណ្ឌទាំងបង្ខំ	។
២២	ទ្រង់គឺជាកំពែង	មាំហំហែងការពារខ្ញុំ
	ព្រះអង្គជាថ្មដុំ	សម្រាប់ខ្ញុំចូលពួនជ្រក	។
២៣	ព្រះអង្គសងតប ត	មិនឈប់ឈររៀបរៀងមក
	តាមអំពើស្មោគគ្រោក	ល្បិចគរគោកខ្លួនគេផ្ទាល់	។
	ទ្រង់ឱ្យគេវិនាស	បាត់សូន្យឈ្មោះគ្មានគេស្គាល់
	ព្រះជាម្ចាស់បានផ្តល់	តាមហេតុផលគេប្រព្រឹត្ត	។

ទំនុកតម្កើងលេខ ៩៥ (៩៤) បទកាកគតិ

១	យើងស្រែកច្រៀងឡើង	សរសើរតម្កើង	ថ្វាយព្រះអម្ចាស់
	ដោយចិត្តអបអរ	សាទរថ្វាយព្រះ	ជាថ្មមាំណាស់
		ជួយសង្គ្រោះយើង	។
២	យើងនាំគ្នីគ្នា	រូតរះម្នីម្នា	ជួបភក្ត្រព្រះអង្គ
	ទាំងអរព្រះគុណ	ស្មូត្របទតម្កើង	កោតសរសើរទ្រង់
		អស់កល្បអង្វែង	។
៣	ដ្បិតព្រះអម្ចាស់	ប្រសើរពេកណាស់	វិសេសក្រៃលែង
	ទ្រង់គឺជាក្សត្រ	សោយរាជ្យអង្វែង	ខ្ពស់ខ្ពង់ស្ញប់ស្ញែង
		លើសព្រះទាំងឡាយ	។
៤	ព្រះអង្គគ្រប់គ្រង	លើអ្វីទាំងពួង	ឥតមានខ្វល់ខ្វាយ
	តាំងពីបាតដី	សន្លឹមអន្លាយ	ដល់ទីសែនឆ្ងាយ
		កំពូលភ្នំផង	។
៥	ព្រះអង្គជាម្ចាស់	សមុទ្រទាំងអស់	មើលថែគ្រប់គ្រង
	ព្រោះទ្រង់បង្កើត	សមុទ្រមកផង	ដីល្អកន្លង
		ជាស្នាដៃទ្រង់	។
៦	ចូរនាំគ្នីគ្នា	គោរពវន្ទា	ក្រាបថ្វាយព្រះអង្គ
	យើងក្រាបចំពោះ	ព្រះភ័ក្ត្រផូរផង់	បារមីត្រចង់
		ទ្រង់បង្កើតយើង	។
៧	ព្រះអង្គជាព្រះ	នៃយើងទាំងអស់	បារមីថ្កុំថ្កើង
	ទ្រង់ជាគង្វាល	ដឹកនាំពួកយើង	ថ្ងៃនេះព្រះអង្គ
		បន្លឺឡើងថា	។
៨	មិនត្រូវផ្តេសផ្តាស	ដូចកាលបោរបះ	នៅមេរីបា
	ដូចថ្ងៃល្បងល	នៅឯម៉ាសា	ក្នុងវាលឯកា
		ទីរហោស្ថាន	។
៩	គឺបុព្វបុរស	នៃអ្នកទាំងអស់	ចិត្តគេសាមាន្យ
	គេបានល្បងល	ទោះបីគេបាន	ឃើញកិច្ចប៉ុន្មាន
		យើងបានប្រព្រឹត្ត	។
១០	ក្នុងអំឡុងពេល	សែសិបឆ្នាំដែល	យើងចាំមិនបាត់
	មនុស្សជំនាន់នោះ	ឱ្យយើងឆ្អែតចិត្ត	គេធ្វើទុច្ចរិត
		ឱ្យយើងពោលថា	។
	ពួកគេទាំងនេះ	ជាប្រជារាស្រ្ត	មានចិត្តឫស្យា
	ជាមនុស្សវង្វេង	មិនស្គាល់មាគ៌ា	ពួកគេគ្រប់គ្នា
		មិនស្តាប់យើងឡើយ	។
១១	ហេតុនេះយើងខឹង	ពួកគេយ៉ាងខ្លាំង	ឥតមានល្ហែល្ហើយ
	យើងប្តេជ្ញាចិត្ត	មិនជួយគេឡើយ	ព្រមទាំងមិនឱ្យ
		គេចូលក្នុងស្រុក	។

ទំនុកតម្កើងលេខ ៩៦ (៩៥) បទព្រហ្មគីតិ

១	ចូរច្រៀងបទថ្មីថ្វាយ	ព្រះម្ចាស់ថ្លៃកុំឈរឈប់
	មនុស្សនៅលើពិភព	ច្រៀងកុំឈប់ថ្វាយព្រះអង្គ	។
២	ចូរច្រៀងថ្វាយព្រះម្ចាស់	តម្កើងព្រះនាមត្រចង់
	ប្រកាសរាល់ថ្ងៃផង	ពីបំណងដ៏ថ្លាថ្លៃ	។
៣	ចូរប្រកាសនៅម្តុំ	ចំណោមក្រុមជាតិទីទៃ
	នូវរុងរឿងសិរី	ព្រះហស្តថ្លៃដ៏អស្ចារ្យ	។
៤	ដ្បិតព្រះម្ចាស់ឧត្តម	យើងត្រូវខំសរសើរថា
	អស់ពីដួងចិន្តា	ព្រះក្សត្រាប្រសើរខ្ពស់	។
៥	ព្រះនៃសាសន៍ផ្សេងណា	មិនបានការអ្វីទាំងអស់
	រីឯព្រះអម្ចាស់	ទ្រង់ជាក់ច្បាស់សាងផ្ទៃមេឃ	។
៦	មានពន្លឺរស្មី	ចែងចាំងក្រៃល្អពន់ពេក
	ដំណាក់គន់គាប់ភ្នែក	បារមីប្លែកថ្កើងត្រចង់	។
៧	ប្រជាទាំងឡាយអើយ	កុំកន្តើយចូរតម្រង់
	លើកតម្កើងព្រះអង្គ	ថ្លែងឥតហ្មងពីឫទ្ធា	។
៨	លើកតម្កើងសិរី	រុងរឿងជ័យព្រះនាមា
	យកតង្វាយគ្រប់គ្នា	ទៅព្រះវិហារថ្វាយក្សត្រា	។
៩	ចូរក្រាបថ្វាយបង្គំ	ពេលទ្រង់សម្តែងបាដិហារីយ៍
	មនុស្សលើផែនលោកា	ញ័រកាយាចំពោះភក្ត្រ	។
១០	ចូរប្រកាសនៅម្តុំ	ចំណោមក្រុមជាតិច្រើននាក់
	ថាទ្រង់គ្រងរាជ្យជាក់	ឥតបែកបាក់រឹងមាំល្អ	។
	ព្រះម្ចាស់គ្រប់គ្រងលើ	សព្វសារពើមានអំណរ
	ពេញដោយយុត្តិធម៌	រាស្រ្តអបអរពន់ពេកក្រៃ	។
១១	សូមឱ្យអស់ផ្ទៃមេឃ	ផែនដីស្រែកកុំសំចៃ
	សមុទ្រមានទឹកប្រៃ	និងអ្វីៗមានសង្ឃឹម	។
១២	ចូរឱ្យស្រែចំការ	អ្វីសព្វសារអរញញឹម
	ឱ្យដើមឈើរេរាំ	លោតទន្ទ្រាំមុខព្រះម្ចាស់	។
១៣	ដ្បិតព្រះអង្គយាងមក	វិនិច្ឆ័យរកយុត្តិធម៌ណាស់
	កាត់ក្តីប្រជាច្បាស់	គ្មានក្រឡះដោយទៀងត្រង់	។

ទំនុកតម្កើងលេខ ៩៧ (៩៦) បទពាក្យ ៧

១	ព្រះជាអម្ចាស់ទ្រង់គ្រងរាជ្យ	ពេញដោយអំណាចដ៏យូរលង់
	ចូរឱ្យផែនដីរីករាយឡើង	កោះទាំងឡាយផងអរសប្បាយ	។
២	មានពពកខ្មួលខ្មៅងងឹត	ព័ទ្ធពេនជុំជិតព្រះម្ចាស់ថ្លៃ
	ព្រះអង្គគ្រងរាជ្យដោយប្រពៃ	សុចរិតថ្លាថ្លៃល្អត្រចង់	។
៣	មានភ្លើងឆេះនៅមុខព្រះម្ចាស់	សត្រូវច្រើនណាស់ត្រូវបាត់បង់
	អ្នកដែលប្រឆាំងច្បាំងព្រះអង្គ	គ្មានសល់ម្នាក់ផងក្ស័យសង្ខារ	។
៤	មានផ្លេកបន្ទោរជះពន្លឺ	ខ្ទ័រខ្ទាររន្ទឺសព្វលោកា
	ផែនដីតក់ស្លុតឥតឧបមា	ញ័រអស់កាយាដោយភិតភ័យ	។
៥	ភ្នំនានាដែលនៅចំពោះ	ភក្ត្រព្រះអម្ចាស់ត្រូវអន្តរាយ
	ដូចជាក្រមួនត្រូវរលាយ	ដោយកម្តៅថ្ងៃនៅមិនបាន	។
៦	ផ្ទៃមេឃក៏បានស្រែកប្រកាស	ពីក្តីសប្បុរសល្អថ្កើងថ្កាន
	ឱ្យប្រជារាស្រ្តទាំងប៉ុន្មាន	នៅគ្រប់ទីស្ថានបានដឹងយល់	។
៧	អស់អ្នកដែលថ្វាយបង្គំព្រះ	ក្លែងក្លាយទាំងអស់នឹងកង្វល់
	អួតអាងពីការគោរពដល់	ព្រះឥតបានផលត្រូវអាម៉ាស់	។
	ឱព្រះទាំងឡាយមានគរគោក	ច្រើននៅលើលោកចូររូតរះ
	ក្រាបថ្វាយបង្គំព្រះអម្ចាស់	គឺទ្រង់ជាព្រះលើលោកា
៨	បពិត្រព្រះម្ចាស់ពេលដែលក្រុង	ស៊ីយ៉ូនបានដឹងដំណឹងថា
	ព្រះអង្គវិនិច្ឆ័យដូច្នេះណា	អ្នកក្រុងយូដាសប្បាយក្រៃ	។
៩	បពិត្រព្រះជាអម្ចាស់ខ្ញុំ	ព្រះអង្គឧត្តមផុតផែនដី
	ប្រសើរលើសអស់ព្រះដទៃ	ទោះព្រះផ្សេងក្តីមិនស្មើផង	។
១០	អ្នកដែលស្រឡាញ់ព្រះអម្ចាស់	និងអ្នកដែលស្មោះស្ម័គ្រទៀងត្រង់
	ចូរស្អប់អំពើកាចយង់ឃ្នង	ព្រះអង្គនឹងរងថែរក្សា	។
១១	មានទាំងពន្លឺបំភ្លឺមនុស្ស	មានចិត្តសប្បុរសសុចរិតថ្លា
	ជនដែលទៀងត្រង់គ្រប់អាត្មា	អរឥតឧបមាសប្បាយក្រៃ	។
១២	ឱពួកអ្នកសុចរិតទាំងឡាយ	ចូរអ្នករីករាយកុំគិតអ្វី
	ចំពោះកិច្ចការព្រះម្ចាស់ថ្លៃ	ប្រព្រឹត្តរាល់ថ្ងៃកន្លងមក	។

ទំនុកតម្កើងលេខ ៩៨ (៩៧) បទកាកគតិ

១	ចូរច្រៀងបទថ្មី	ថ្វាយព្រះម្ចាស់ថ្លៃ	កុំភ្លេចឡើយណា
	ដ្បិតទ្រង់ប្រព្រឹត្ត	សព្វកិច្ចអស្ចារ្យ	ដោយឫទ្ធិចេស្តា
		យកជ័យជំនះ	។
២	ព្រះម្ចាស់បង្ហាញ	ប្រជាឱ្យឃើញ	ពីកាសង្គ្រោះ
	ព្រះអង្គសម្តែង	ឱ្យគេទាំងអស់	ឃើញសុចរិតស្មោះ
		របស់ព្រះអង្គ	។
៣	ព្រះអង្គនៅតែ	សម្តែងឥតប្រែ	ករុណាត្រចង់
	ព្រះទ័យស្មោះស្ម័គ្រ	អ៊ីស្រាអែលផង	សុចរិតឥតហ្មង
		ចងចាំទាំងអស់	។
	មនុស្សម្នាមូលមីរ	រស់នៅគ្រប់ទី	ឆ្ងាយទាំងស្រីប្រុស
	នៃភពផែនដី	ឃើញការសង្គ្រោះ	ព្រះម្ចាស់របស់
		យើងគ្រប់ៗគ្នា	។
៤	ជនទាំងប្រុសស្រី	នៅលើផែនដី	រៀបចំអង្គា
	អបអរសាទរ	ថ្វាយព្រះនាមា	ស្រែកហ៊ោរខ្ញៀវខ្ញា
		ដោយតូរ្យតន្ត្រី	។
៥	សូមផ្ញើចិត្តកាយ	ដេញទាំងពិណថ្វាយ	ព្រះធ្លាប់ប្រណី
	ព្រោះព្រះអង្គនោះ	ធ្លាប់ថ្នមបមបី	ថែទាំយប់ថ្ងៃ
		រៀងរាល់វេលា	។
៦	ចូរនាំគ្នាផ្លុំ	ត្រែស្នែងប្រគុំ	ថ្វាយព្រះរាជា
	អបអរសាទរ	អង្គព្រះនាមា	ខ្ពស់់លើពសុធា
		គ្មានអ្វីស្មើព្រះ	។
៧	ចូរសមុទ្រលាន់	រលករាប់ពាន់	រំពងអាកាស
	ចូរឱ្យផែនដី	និងអ្វីទាំងអស់	មានជីវិតរស់
		ស្រែកឮអឺងកង	។
៨	ទន្លេទាំងឡាយ	ចូរអសប្បាយ	សាទរត្រសង
	ចូរភ្នំទាំងអស់	ស្រែកហ៊ោអឺងកង	ព្រមៗគ្នាឡើង
		ដោយស័ព្ទខ្ញៀវខ្ញា	។
៩	ចំពោះព្រះភ័ក្ត្រ	ព្រះអម្ចាស់ជាក់	គ្រប់គ្រងលោកា
	លើភពផែនដី	យុត្តិធម៌ថ្លៃថ្លា	អស់រាស្រ្តប្រជា
		ទៀងត្រង់បរិសុទ្ធ	។

ទំនុកតម្កើងលេខ ៩៩ (៩៨) បទពាក្យ ៧

១	ព្រះជាអម្ចាស់ទ្រង់គ្រងរាជ្យ	ប្រជារាស្រ្តខ្លាចភ័យមមើ
	ផែនដីកក្រើកញ័ររង្គើ	ព្រះអង្គគង់លើខេរ៉ូប៊ីន	។
២	ព្រះអម្ចាស់ជាព្រះឧត្តម	ខ្ពង់ខ្ពស់ស្កៃស្កឹមលើស៊ីយ៉ូន
	ព្រះអង្គខ្ពស់ហួសអស់ជាតិជន	គ្រប់ទីតំបន់លើលោកា	។
៣	មនុស្សម្នាគ្រប់រូបត្រូវតម្កើង	ព្រះនាមរុងរឿងដ៏អស្ចារ្យ
	គួរឱ្យស្ញែងខ្លាចព្រះនាមា	ព្រះអង្គពិតជាឥតមានហ្មង	។
៤	បពិត្រព្រះម្ចាស់ជាមហាក្សត្រ	បារមីពេកក្តាត់ក្តីភ្លឺត្រចង់
	ទ្រង់ជាក្សត្រាតែមួយអង្គ	សុចរិតត្រឹមត្រង់យុត្តិធម៌	។
	ព្រះអង្គបានរៀបតាក់តែងច្បាប់	ឱ្យមានសព្វគ្រប់ដោយស្មោះសរ
	សុចរិតទៀងត្រង់ស្រស់បវរ	ក្នុងស្រុកដ៏ល្អអ៊ីស្រាអែល	។
៥	ចូរលើកតម្កើងព្រះអម្ចាស់	ព្រះអង្គជាព្រះយើងមិនដែល
	ស្គាល់ទុក្ខលំបាកដ៏ក្រាស់ក្រែល	ព្រះអ៊ីស្រាអែលព្រះវិសុទ្ធ	។
៦	លោកម៉ូសេជាបូជាចារ្យ	ដែលមកត្រៀបត្រាពេញជុំជិត
	អរ៉ុនជាបូជាចារ្យពិត	ចំណោមអ្នកស្និទ្ធនឹងព្រះអង្គ	។
	លោកសាមូអែលជាមនុស្សម្នាក់	ក្នុងចំណោមអ្នកអង្វរទ្រង់
	ទាំងអស់គ្នាទូលថ្វាយព្រះអង្គ	នោះទ្រង់ឆ្លើយត្រង់មិនរារែក	។
៧	ព្រះអង្គមានព្រះបន្ទូលមក	ពីក្នុងពពកខ្មៅអនេក
	លោកក៏កាន់តាមមិនអល់អែក	ឥតមានប្រកែកច្បាប់ព្រះអង្គ	។
៨	បពិត្រព្រះម្ចាស់ព្រះរបស់	យើងខ្ញុំទាំងអស់ខ្ពស់ឧត្តុង្គ
	ព្រះអង្គតបឆ្លើយមិនបង្អង់	ទោះបីជាទ្រង់ដាក់ទោសក្តី	។
	ព្រោះតែកំហុសលោកប្រព្រឹត្ត	មានពីអតិ (អតីត) មិនថាអី
	ព្រះអង្គតែងមានព្រះហឫទ័យ	អត់ធ្មត់ខន្តីលោកជានិច្ច	។
៩	ចូរលើតម្កើងព្រះអម្ចាស់	ជាព្រះរបស់យើងកុំភ្លេច
	ចូរក្រាបបង្គំកុំកែព្រះ	តម្រង់ជានិច្ចភ្នំវិសុទ្ធ	។
	ដ្បិតព្រះអម្ចាស់គឺជាព្រះ	នៃយើងទាំងអស់ខ្ពស់បំផុត
	ជាម្ចាស់ផែនដីមេឃសមុទ្រ	អស់ទាំងសព្វសត្វលើលោកា	។

ទំនុកតម្កើងលេខ ១០០ (៩៩) បទកាកគតិ

១	មនុស្សលើផែនដី	ទាំងប្រុសទាំងស្រី	ចូរអបអរឡើង
	សាទរព្រះម្ចាស់	ជាព្រះថ្កុំថ្កើង	ព្រះម្ចាស់នៃយើង
		កុំរាឡើយណា	។
២	នាំគ្នាគោរព	ទាំងថ្ងៃទាំងយប់	ដោយចិត្តជ្រះថ្លា
	នាំគ្នាមកជិត	អង្គព្រះចេស្តា	ច្រៀងហ៊ោខ្ញៀវខ្ញា
		ដោយអរសប្បាយ	។
៣	ចូរដឹងគ្រប់គ្នា	ថាព្រះម្ចាស់ជា	ព្រះយើងគ្រប់កាយ
	ជាព្រះអម្ចាស់	ពិតឥតក្លែងក្លាយ	បង្កើតយើងហើយ
		ទ្រង់ថែថ្នាក់ថ្នម	។
៤	យើងនាំគ្នីគ្នា	ចូលកុំរួញរា	ដំណាក់សក្តិសម
	ទាំងអរព្រះគុណ	ព្រះម្ចាស់ឧត្តម	សរសើរបង្ខំ
		ព្រះនាមព្រះអង្គ	។
៥	ដ្បិតព្រះអម្ចាស់	ទ្រង់សប្បុរសណាស់	ករុណាហ្មត់ហ្មង
	គង់នៅស្ថិតស្ថេរ	អង្វែងកន្លង	ស្មោះស្ម័គ្រច្បាស់ច្បង
		អស់កល្បតទៅ	។

ទំនុកតម្កើងលេខ ១០១ (១០០) បទពាក្យ ៧

១	បពិត្រព្រះម្ចាស់ខ្ញុំនឹងច្រៀង	រៀបរាប់មិនល្អៀងពីព្រះទ័យ
	មេត្តាករុណាដ៏ថ្លាថ្លៃ	ទាំងស្មូត្របទថ្វាយព្រះអង្គផង	។
២	យើងខ្ញុំនឹងយកចិត្តទុកដាក់	នឹងមាគ៌ាជាក់ល្អឥតហ្មង
	តើពេលណាទៅទើបព្រះអង្គ	យាងរកខ្ញុំផងទាំងគ្រួសារ	។
៣	យើងខ្ញុំមិនដែលទៅចូលចិត្ត	អំពើឧក្រិដ្ឋពាលឫស្យា
	មិនចូលចិត្តអ្នកក្បត់សាវា	ពាលឥតមេត្តាមិនចង់ជួប	។
៤	រូបខ្ញុំមិនឱ្យមនុស្សទុច្ចរិត	ខិតចូលមកជិតទោះថ្ងៃយប់
	ហើយក៏មិនចង់ទៅសេពគប់	ជំពាក់ជំពប់មនុស្សអាក្រក់	។
៥	យើងខ្ញុំបិទមាត់អ្នកនិយាយ	បរិហារពីក្រោយដោយគម្រក់
	ខ្ញុំមិនអាចទ្រាំចំពោះអ្នក	វាយឫកហួសថ្នាក់អួតបំប៉ោង	។
៦	ខ្ញុំនឹងស្វែងរកអ្នកមានចិត្ត	ស្មោះត្រង់សុចរិតមិនកាចកោង
	ឱ្យគេកាន់កាប់ក្នុងស្រុកយើង	មិនចេះឆ្មៃឆ្មើងនៅជាមួយ	។
៧	រីឯមនុស្សដែលបោកប្រាស	ខ្ញុំមិនឱ្យរស់ក្នុងផ្ទះឡើយ
	អ្នកនិយាយភូតភរក៏ដោយ	មិនអាចកៀកកើយជិតខ្ញុំបាន	។
៨	រាល់ព្រឹកខ្ញុំតែងតែបិទមាត់	ពួកមនុស្សទុច្ចរិតទាំងប៉ុន្មាន
	ខ្ញុំនឹងដកពួកគេឱ្យបាន	ពីក្រុងថ្កើងថ្កាននៃព្រះអង្គ	។

ទំនុកតម្កើងលេខ ១០២ (១០១) បទព្រហ្មគីតិ

២	ឱព្រះអម្ចាស់អើយ	សូមផ្ទៀងហើយព្រះសណ្តាប់
	សម្រែកខ្ញុំរ៉ាយរ៉ាប់	សូមទ្រង់ស្តាប់យើងខ្ញុំផង	។
៣	ពេលខ្ញុំមានអាសន្ន	កុំលាក់ពួនភក្ត្រព្រះអង្គ
	ខ្ញុំស្រែកហៅរកទ្រង់	សូមឆ្លើយផងកុំស្ងៀមស្ងាត់	។
៤	ព្រោះដ្បិតជីវិតខ្ញុំ	ត្រូវរលំរលាយខ្ចាត់
	ដូចផ្សែងត្រូវខ្យល់ផាត់	ខ្លួនប្រាណប្រឹតស្គមរីងរៃ	។
៥	រូបខ្ញុំអស់ទឹកចិត្ត	ដូចស្មៅស្វិតក្រៀមត្រូវថ្ងៃ
	ទោះជាអាហារក្តី	ក៏ខ្ញុំលៃលែងនឹកនា	។
៦	រូបខ្ញុំចេះតែថ្ងូរ	ទួញទ្រហោររាល់វេលា
	លែងជាមនុស្សល្អជា	សែនវេទនាស្បែកគ្របឆ្អឹង	។
៧	រូបខ្ញុំដូចសត្វក្អែក	ដែលតែងស្រែកហោះកាត់បឹង
	ក្នុងព្រៃស្មសានឈឹង	ដូចសត្វជ្រឹងក្នុងព្រឹក្សព្រៃ	។
៨	ខ្ញុំដេកមិនលក់សោះ	សែនក្រៀមក្រោះអស់ជើងដៃ
	បីដូចសត្វបក្សី	ទាំងយប់ថ្ងៃទំលើផ្ទះ	។
៩	ជារៀងរាល់ខែថ្ងៃ	ខ្មាំងចង្រៃមាក់ងាយណាស់
	គេបានយកទាំងឈ្មោះ	ទៅដាក់ដោះបណ្តាសា	។
១០	ពេលខ្ញុំបរិភោគ	ទាំងទុក្ខសោកឥតឧបមា
	ខ្ញុំបរិភោគពេលណា	ទឹកនេត្រាហូរសស្រាក់	។
១១	ពីព្រោះព្រះពិរោធ	ទ្រង់ខ្ញាល់ក្រោធតែខ្ញុំម្នាក់
	ទ្រង់ឥតមានថ្នមថ្នាក់	បោះទម្លាក់ខ្ញុំវេទនា	។
១២	ជីវិតខ្ញុំហាក់ដូច	ស្រមោលតូចពេលសន្ទិយា
	ដូចស្មៅខ្វះគង្គា	គ្មានមនុស្សម្នានៅថែទាំ	។
១៣	បពិត្រព្រះអម្ចាស់	គ្រងរាជ្យអស់កល្បយូរឆ្នាំ
	គេនឹងរំលឹកចាំ	យូរខែឆ្នាំអង្វែងទៅ	។
១៤	ព្រះអង្គសព្វព្រះទ័យ	នឹងបុរីនេះពេកកូវ
	ស៊ីយ៉ូនពេលឥឡូវ	ទ្រង់តម្រូវអាណិតហើយ	។
១៥	អ្នកបម្រើព្រះអង្គ	ស្រឡាញ់ក្រុងមិនកន្តើយ
	ទោះជាបែកបាក់ហើយ	មិនចោលឡើយចាំជានិច្ច	។
១៦	សូមឱ្យជនគ្រប់សាសន៍	កោតខ្លាចព្រះកុំមានភ្លេច
	សូមឱ្យអស់ទាំងស្តេច	ចាំជានិច្ចកោតខ្លាចទ្រង់	។
១៧	នៅពេលព្រះអម្ចាស់	សាងស្រឡះស៊ីយ៉ូនក្រុង
	ទ្រង់ស្តែងសិរីរុង	ដ៏ត្រចង់ឱ្យគេយល់	។
១៨	ពេលនោះទ្រង់នឹងបែរ	ព្រះភក្ត្ររេទតមកដល់
	មនុស្សលែងខ្វាយខ្វល់	ទ្រង់ទទួលពាក្យយើងហើយ	។
១៩	សូមកត់ក្តីនេះចុះ	ទុកឱ្យមនុស្សជំនាន់ក្រោយ
	ប្រជារាស្រ្តកើតហើយ	កុំកន្តើយថ្កើងព្រះអង្គ	។
២០	ព្រះអម្ចាស់ទតពី	សក្ការៈទីដ៏ត្រចង់
	ស្ថានសួគ៌សុខឥតហ្មង	មិនរំលងសព្វផែនដី	។
២១	ដើម្បីស្តាប់សម្រែក	ពួកឈ្លើយស្រែកទាំងយប់ថ្ងៃ
	អ្នកដែលត្រូវក្សិណក្ស័យ	គេកាត់ក្តីមិនសុចរិត	។
២២	គេនឹងប្រកាសប្រាប់	ព្រះនាមគាប់ម្ចាស់វរមិត្ត
	នៅក្រុងស៊ីយ៉ូនពិត	តម្កើងឫទ្ធិនៅសាឡឹម	។
២៣	គឺពេលដែលប្រជា	ជាតិនានាមកជួបជុំ
	ដើម្បីគោរពសុំ	បម្រើអម្ចាស់ជាព្រះ	។
២៤	ពេលខ្ញុំពេញកម្លាំង	ខ្ញុំក្លាខ្លាំងមិនហេវខ្សោះ
	ទ្រង់ឱ្យខ្ញុំទន់អស់	ហើយបន្សោះទាំងជីវិត	។
២៥	ហេតុនេះហើយទើបខ្ញុំ	លើកដៃសុំទ្រង់អាណិត
	សូមកុំដកជីវិត	ពេលខ្ញុំឋិតមិនទាន់ចាស់	។
២៦	ទ្រង់បង្កើតផែនដី	យូរយារក្រៃអង្វែងណាស់
	ផ្ទៃមេឃអ្វីទាំងអស់	ស្នាព្រះហស្តព្រះអង្គដែរ	។
២៧	ផ្ទៃមេឃនិងផែនដី	ត្រូវរលាយបែកហូរហែ
	តែទ្រង់ឥតកែប្រែ	គង់ស្ថិតស្ថេរជាប់រហូត	។
២៨	ព្រះម្ចាស់គង់ជាខែល	នៅដដែលមិនរបូត
	ព្រះជន្មមិនរលត់	មិនចេះផុតគ្មានបញ្ចប់	។
២៩	កូនចៅរបស់ខ្ញុំ	នៅជួបជុំបម្រើស្រាប់
	រស់ដោយសុខគួរគាប់	ទ្រង់គង់ជាប់ថែកូនចៅ	។

ទំនុកតម្កើងលេខ ១០៣ (១០២) បទកាកគតិ

១	ខ្ញុំសូមសរសើរ	ព្រះគ្មានអ្វីស្មើ	អស់ពីដួងចិត្ត
	ខ្ញុំសូមតម្កើង	នាមដ៏វិសុទ្ធ	ព្រះដ៏មានឫទ្ធិ
		ផុតលើលោកា	។
២	ខ្ញុំសូមតម្កើង	សរសើរលើកឡើង	អស់ពីចិន្តា
	ខ្ញុំសូមរំលឹក	ព្រះហស្តអស្ចារ្យ	សប្បុរសករុណា
		មិនបំភ្លេចឡើយ	។
៣	ព្រះអង្គអត់ទោស	នូវរាល់កំហុស	ដែលមានមកហើយ
	ខ្ញុំបានប្រព្រឹត្ត	ព្រះអង្គប្រោសឱ្យ	ខ្ញុំបានធូរស្បើយ
		ផុតរោគសោកសៅ	។
៤	ព្រះអង្គរំដោះ	ជីវិតឱ្យរស់	ផុតពីរណ្តៅ
	ព្រះអង្គអាណិត	អាសូរពេកកូវ	ខ្ញុំផុតសោកសៅ
		ដោយទ្រង់មេត្តា	។
៥	ព្រះអង្គប្រទាន	ឱ្យខ្ញុំរស់រាន	ដោយក្តីសុខា
	ឱ្យមានកម្លាំង	ដូចដំរីសារ	មានទាំងសង្ខា
		វែងដូចឥន្ទ្រី	។
៦	ព្រះម្ចាស់ប្រព្រឹត្ត	សព្វអស់ការកិច្ច	ល្អល្អះគ្មានពីរ
	ហឫទ័យសុចរិត	យុត្តិធ៌មគ្រប់ទី	ដល់អស់ជីវី
		ត្រូវគេជិះជាន់	។
៧	ព្រះអង្គសម្តែង	ឫទ្ធីគួរស្ញែង	ឱ្យម៉ូសេបាន
	ស្គាល់មាគ៌ាទ្រង់	គ្មានអ្វីរំខាន	ប្រជាគ្រប់ប្រាណ
		ដឹងហេតុអស្ចារ្យ	។
៨	ព្រះអម្ចាស់ថ្លៃ	មានព្រះហឫទ័យ	អាណិតករុណា
	ប្រណីសន្តោស	គ្រប់ពេលវេលា	ដល់ជនគ្រប់គ្នា
		មិនឱ្យមានភ័យ	។
៩	ទ្រង់មិនបន្ទោស	ប្រើពាក្យគំរោះ	ដាក់យើងរាល់ថ្ងៃ
	ទ្រង់មិនពិរោធ	មិនខឹងជេរស្តី	ហើយតែងប្រណី
		ដល់យើងគ្រប់គ្នា	។
១០	ព្រះអង្គមិនដាក់	ទោសយើងម្នាក់ៗ	ឱ្យឈឺគ្រាំគ្រា
	សមតាមអំពើ	បាបច្រើនមហិមា	ទ្រង់តែងគាំពារ
		មិនយកទោសពៃរ៍	។
១១	មេឃនៅខ្ពស់ឆ្ងាយ	សន្លឹមអន្លាយ	ពីភពផែនដី
	ព្រះទ័យព្រះម្ចាស់	ដែលធ្លាប់ប្រណី	ក៏នៅខ្ពស់ឆ្ងាយ
		យ៉ាងដូច្នោះដែរ	។
១២	ទិសកើតទិសលិច	ឆ្ងាយគ្នាមិនតិច	ឥតមានកែប្រែ
	ព្រះអង្គធ្វើឱ្យ	អំពើបាបបែរ	ឆ្ងាយមិនជិតទេ
		ពីយើងយ៉ាងនោះ	។
១៣	ឪពុកអាណិត	ថ្នាក់ថ្នមផ្តេកផ្តិត	កូនៗទាំងអស់
	ព្រះក៏មេត្តា	អាសូរស្រណោះ	ដល់អ្នកដែលស្មោះ
		គោរពរាល់ថ្ងៃ	។
១៤	ព្រះអង្គជ្រាបថា	មនុស្សយើងនេះណា	កើតមកពីអ្វី
	ព្រះអង្គមិនភ្លេច	យើងទាំងប្រុសស្រី	គឺកើតពីដី
		ដែលសូនមកទេ	។
១៥	អាយុជីវិត	មនុស្សយើងរីកស្វិត	ផ្លាស់ប្តូរប្រួលប្រែ
	ដូចផ្កាដែលរីក	នៅតាមវាលដែរ	ឬស្មៅតែងតែ
		ស្រពោនក្រៀមក្រំ	។
១៦	ពេលខ្យល់បក់បោក	ផ្កាក៏វិយោគ	ទាំងទុក្ខរណ្តំ
	ត្រូវរោយលំអង	ស្រពោនខ្ទេចខ្ទាំ	ឥតមានទុកស្នាម
		វក់វីខ្ទាំខ្ទេច	។
១៧	តែព្រះហឫទ័យ	ករុណាប្រណី	ព្រះអង្គមិនភ្លេច
	មេត្តាដល់អ្នក	កោតខ្លាចជានិច្ច	មិនដែលកែគេច
		ដរាបរៀងទៅ	។
១៨	ប្រសិនគេកាន់	ជាប់តាមសម្ពន្ធ	មិនមានអាស្រូវ
	ទាំងប្រព្រឹត្តតាម	បញ្ជាជាផ្លូវ	ព្រះល្អពេកកូវ
		ឥតភ្លេចសោះនោះ	។
១៩	ព្រះអង្គបានតាំង	ព្រះរាជបល្ល័ង្ក	នៅទីស្ថានខ្ពស់
	គឺបរមសុខ	ឥតបីមានមោះ	គ្រងរាជ្យទាំងអស់
		មិនចន្លោះអ្វី	។
២០	ទេវទូតដ៏ខ្លាំង	របស់ព្រះអង្គ	ពូកែពេកក្រៃ
	លោកតែងអនុវត្ត	តាមបន្ទូលថ្លៃ	ចូរកុំសង្ស័យ
		តម្កើងព្រះម្ចាស់	។
២១	អស់់ហ្វូងតារា	នៅជុំត្រៀបត្រា	មូលមីរដេរដាស
	អ្នកតែងបម្រើ	តាមព្រះទ័យព្រះ	តម្កើងអម្ចាស់
		ព្រះខ្ពស់ពេកក្រៃ	។
២២	គ្រប់ស្នាព្រះហស្ត	ទាំងឡាយរបស់	ព្រះអម្ចាស់ថ្លៃ
	គឺទាំងសត្វលោក	ទាំងអស់លើដី	នៅទីណាក្តី
		តម្កើងព្រះអង្គ	។

ទំនុកតម្កើងលេខ ១០៤ (១០៣) បទពាក្យ ៧

១	ខ្ញុំសូមតម្កើងព្រះអម្ចាស់	ប្រសើរខ្លាំងណាស់អស់ពីចិត្ត
	ព្រះអង្គជាព្រះនៃខ្ញុំពិត	ឧត្តមបំផុតលើលោកា	។
២	ទ្រង់យកពន្លឺមកដណ្តប់	គ្រងគ្រប់អង្គជាប់ជាភូសា
	ទ្រង់លាតអស់ទាំងហ្វូងតារា	ផ្ទៃមេឃផងណាជាពន្លា	។
៣	ទ្រង់សង់ដំណាក់ខ្ពស់អនេក	ខ្ពស់លើសផ្ទៃមេឃអ្វីនានា
	ទ្រង់យកពពកវាយោជា	រាជរថបរពាជំនិះជ័យ	។
៤	ព្រះអង្គយកខ្យល់ឱ្យនាំសារ	រន្ទះផងណាចាំរំពៃ
	ទាំងផ្លេកបន្ទោរក៏ឃ្មាតឃ្មៃ	បម្រើម្ចាស់ថ្លៃគ្រប់អន្លើ	។
៥	រីឯផែនដីមហាធំ	ទ្រង់បានតាំងមាំឥតរង្គើ
	នៅលើគ្រឹះរឹងឥតអ្វីស្មើ	ឥតមានរង្គើមាំមួនក្រៃ	។
៦	ព្រះអង្គយកមហាសាគរ	មកគ្របពីលើភពផែនដី
	ដូចជាអាវប៉ាក់ល្អឥតបី	លើភ្នំខ្ពស់ក្រៃមានទឹកដែរ	។
៧	ពេលឮព្រះអង្គស្រែកគំរាម	ទឹកមិននៅស្ងៀមត្រឡប់បែរ
	ផ្គរព្រះអម្ចាស់លាន់ហូរហែរ	វាភ័យម៉េ្លះទេរត់បាត់អស់	។
៨	ទឹកខ្លះនៅលើកំពូលភ្នំ	ទឹកខ្លះទៅផ្តុំធ្លាក់តាមជ្រោះ
	ទៅកាន់កន្លែងដែលព្រះម្ចាស់	កំណត់មកនោះរួចស្រេចហើយ	។
៩	ព្រះអង្គដាក់ខណ្ឌសីមាពាំង	បាំងការពាររាំងមិនកន្តើយ
	ដើម្បីស្កាត់ទឹកទប់មិនឱ្យ	ជន់លិចបានឡើយដីទាំងអស់	។
១០	ទ្រង់បញ្ជូនទឹកពីប្រភព	ឱ្យហូរសាយសព្វទៅក្នុងជ្រោះ
	ហូរតាមជ្រលងភ្នំទាំងអស់	មិនមានចន្លោះសព្វទិសា	។
១១	សត្វទាំងប៉ុន្មានមកផឹកទឹក	មានច្រើនសន្ធឹកសព្វម្រឹគា
	លាព្រៃក៏រូតរះម្នីម្នា	ផឹកទាំងអស់គ្នាបំបាត់ស្រេក	។
១២	បក្សីបក្សាធ្វើសំបុក	រស់នៅអែអុកច្រើនពន់ពេក
	នាំគ្នាយំពិរោះអនេក	នៅគ្រប់តាមមែកដើមព្រឹក្សា	។
១៣	ព្រះអង្គស្រោចស្រពដីទាំងឡាយ​	ពីស្ថានខ្ពស់ឆ្ងាយឥតឧបមា
	ទ្រង់ប្រទានឱ្យមានគង្គា	បរិបូណ៌ហូរហៀរលើផែនដី	។
១៤	ព្រះអង្គធ្វើឱ្យមានដុះស្មៅ	ឱ្យដល់សត្វទៅជាចំណី
	ដំណាំស្អេកស្កះច្រើនពេញដី	ដល់មនុស្សប្រុសស្រីបរិភោក្តា	។
១៥	មានទាំងស្រាទំពាំងបាយជូរ	គេផឹកបរិបូណ៌ច្រើនក្រៃណា
	មានប្រេងលាបមុខស្រស់សង្ហា	ដោយចិត្តក្លៀវក្លាសប្បាយខ្លាំង	។
	មិនតែប៉ុណ្ណោះមានអាហារ	ឆីរួចកាលណាមានកម្លាំង
	សាច់ឈាមស្រស់បស់លែងស្លេកស្លាំង	ដូចមនុស្សរីងរាំងខ្វះចំណី	។
១៦	សូម្បីដើមឈើដែលទ្រង់ដាំ	បែកមែកត្រសុំម្លប់ត្រឈៃ
	មានទឹកគ្រប់គ្រាន់ផ្សើមជោគដី	ដូចឈើក្នុងព្រៃភ្នំលីបង់	។
១៧	បក្សាបក្សីធ្វើសំបុក	លើដើមឈើញ៉ុកនៅរញង់
	សត្វកុកមកធ្វើទ្រនំផង	បានសុខឥតហ្មងហើរទៅមក	។
១៨	រីឯភ្នំធំខ្ពស់សន្លឹម	ខ្ពស់ឆ្ងាយត្រដឹមជាជម្រក
	សត្វតែងពឹងពាក់ដើរទៅមក	ទន្សាយរត់រកចូលនិន្ទ្រា	។
១៩	ទ្រង់បានបង្កើតទាំងព្រះច័ន្ទ	ដើម្បីចែកខ័ណ្ឌពេលវេលា
	ព្រះអាទិត្យក៏ស្គាល់សីមា	ដែលត្រូវយាត្រាឬឈរឈប់	។
២០	ទ្រង់បាននាំយកភាពងងឹត	មកគ្របជុំជិតនៅពេលយប់
	សត្វព្រៃចាប់ផ្តើមពីព្រលប់	ឥតមានសញ្ជប់ចេញរៀងខ្លួន	។
២១	តោសិង្ហគ្រហឹមបង្អើលម្រឹគ	ស្ទុះបោលសន្ធឹកខ្លះគេចពួន
	ទាមទារអាហារចម្អែតខ្លួន	ព្រោះព្រះប្រទានវាឱ្យរស់	។
២២	មនុស្សម្នាក៏ចេញអស់ពីផ្ទះ	ម្នីម្នារូតរះដើរតម្រង់
	ទៅចំការស្រែឥតបង្អង់	ធ្វើការរញង់ល្ងាចវិលមក	។
២៣	បពិត្រព្រះអើយព្រះអម្ចាស់	គ្រប់ស្នាព្រះហស្តច្រើនគរគោក
	ផែនដីពេញដោយសិរីជោគ	សុទ្ធតែកើតមកពីព្រះអង្គ	។
២៤	មើលហ៎្ន!សមុទ្រដ៏ធំធេង	ឆ្ងាយដាច់សង្វែងក្រៃកន្លង
	មានមច្ឆាជាតិតូចធំផង	រវើករវ័ណ្ឌរាប់មិនអស់	។
២៥	សំពៅទូកក្តោងដឹកទំនិញ	ដឹកចូលនាំចេញមិនឈប់សោះ
	នាគរាជដែលទ្រង់បង្កើតនោះ	លេងទឹកបឺតព្រួសក្នុងសមុទ្រ	។
២៦	សត្វទាំងប៉ុន្មានផ្ញើជីវិត	លើព្រះម្ចាស់ពិតដោយមោះមុត
	រង់ចាំទទួលតាមកំណត់	ចំណីមិនអត់តាមត្រូវការ	។
២៧	ពេលដែលព្រះអង្គព្រះប្រទាន	គេកំពុងឃ្លានបានអាហារ
	ព្រះអង្គផ្គត់ផ្គង់គ្រប់អាត្មា	ឆ្អែតគ្រប់កាយាបានតឹងពោះ	។
២៨	ប្រសិនបើទ្រង់មិនរវល់	នោះគេនឹងខ្វល់ជួបភ័យគ្រោះ
	បើទ្រង់ដកយកខ្យល់ទាំងអស់	នោះគេលែងរស់នឹងក្សិណក្ស័យ	។
២៩	ពេលណាព្រះអង្គទ្រង់ប្រទាន	ដង្ហើមឱ្យមានខ្យល់និស្ស័យ
	គេកើតឡើងវិញពេញផែនដី	សព្វអស់អ្វីៗមានព្រមគ្នា	។
៣០	សូមសិរីរុងរឿងរបស់	ព្រះអម្ចាស់អស់កល្បយូរយារ
	សូមទ្រង់រីករាយដោយសារស្នា	ព្រះហស្តអស្ចារ្យរបស់ទ្រង់	។
៣១	ពេលព្រះអង្គទតមកផែនដី	វាញាប់ញ័រក្រៃខ្លាចព្រះអង្គ
	ពេលទ្រង់ប៉ះពាល់ភ្នំទាំងពួង	មានផ្សែងហុយផងខ្មៅងងឹត	។
៣២	ខ្ញុំច្រៀងតម្កើងព្រះអម្ចាស់	ឥតមានក្រឡះមួយជីវិត
	ខ្ញុំច្រៀងទាំងស្មូត្រមានបែបបទ	ថ្វាយព្រះម្ចាស់ពិតជាដរាប	។
៣៣	ឱ! ព្រះអម្ចាស់សូមឱ្យបទ	ដែលខ្ញុំកំណត់បានគួរគាប់
	ឱ្យខ្ញុំសប្បាយចិត្តអរជាប់	ដោយសារទម្លាប់ព្រះអម្ចាស់	។
៣៤	សូមឱ្យអ្នកបាបវិនាសបាត់	រលាយខ្ចាយខ្ចាត់ផុតស្រឡះ
	សូមឱ្យពួកគេអស់ទាំងនោះ	រលាយបាត់អស់ក្លាយជាដី	។
	រីឯរូបខ្ញុំសូមប្រណម្យ	ហត្ថាបង្គំថ្វាយម្ចាស់ថ្លៃ
	សូមលើកតម្កើងជោគសិរី	រុងរឿងប្រពៃព្រះអម្ចាស់	។

ទំនុកតម្កើងលេខ ១០៥ (១០៤) បទកាកគតិ

១	ចូរយើងតម្កើង	លើកព្រះខ្ពស់ឡើង	ព្រមទាំងប្រកាស
	ព្រះនាមព្រះអង្គ	ឱ្យបានឮច្បាស់	ពីស្នាព្រះហស្ត
		ប្រាប់ជាតិនានា	។
២	ចូរច្រៀងបទថ្វាយ	តម្កើងកុំណាយ	រៀងរាល់វេលា
	រៀបរាប់អំពី	សព្វអស់ការងារ	អស្ចារ្យគ្រប់គ្រា
		ដែលទ្រង់ប្រព្រឹត្ត	។
៣	ចូរខ្ពស់មុខឡើង	ព្រោះតែព្រះយើង	ជាព្រះវិសុទ្ធ
	អ្នកស្វែងរកទ្រង់	ខ្ពង់ខ្ពស់បំផុត	ចូរសប្បាយចិត្ត
		កុំបីសៅហ្មង	។
៤	ចូរស្វែងរកព្រះ	ដែលមានតេជះ	បារមីត្រចង់
	ស្វែងរកព្រះភ័ក្ត្រ	របស់ព្រះអង្គ	កុំនៅរេរង់
		ឈប់ឈរសោះឡើយ	។
៥	សូមនឹកដល់ការ	សម្បើមអស្ចារ្យ	ទ្រង់បានធ្វើហើយ
	នឹកដល់បាដិហារិយ៍	កុំនៅកន្តើយ	និងការវិនិច្ឆ័យ
		ដែលទ្រង់សម្រេច	។
៦	ពូជពង្សរបស់	ប្រាហាំទាំងអស់	នៅបម្រើស្រេច
	កូនចៅយ៉ាកុប	ដ៏ល្អបណ្តាច់	ព្រះអង្គសម្រេច
		ជ្រើសយកយូរហើយ	។
៧	ព្រះជាអម្ចាស់	ទ្រង់គឺជាព្រះ	របស់យើងអើយ
	កុំនៅបង្អង់	រេរង់តោះតើយ	គឺព្រះនោះហើយ
		គ្រប់គ្រងផែនដី	។
៨	ព្រះអង្គតែងខ្វល់	នឹកគិតទៅដល់	សម្ពន្ធមេត្រី
	ជាព្រះបន្ទូល	សន្យាថ្លាថ្លៃ	ស្ថិតស្ថេរយូរក្រៃ
		មួយពាន់តំណ	។
៩	សម្ពន្ធមេត្រី	ដែលទ្រង់លកលៃ	ដោយស្ម័គ្រស្មោះសរ
	នឹងអប្រាហាំ	ជាបន្ទូលល្អ	សន្យាស្មោះស​រ
		នឹងលោកអ៊ីសាក	។
១០	ទ្រង់បញ្ជាក់ន័យ	សម្ពន្ធមេត្រី	ឥតមានលៀមលាក់
	ទុកជាចំណង	សម្ពន្ធជាជាក់	អស់កល្បឥតអាក់
		នឹងអ៊ីស្រាអែល	។
១១	ទ្រង់មានបន្ទូល	ថានឹងប្រគល់	ទុកជាតំណែល
	គឺស្រុកកាណាន	ជាកេរក្រាស់ក្រែល	មរតកនេះដែល
		ដល់អ្នកគ្រប់ប្រាណ	។
១២	នៅក្នុងគ្រានោះ	ប្រជាស្រីប្រុស	តិចតួចរាប់បាន
	ចូលមករស់នៅ	លើដីកាណាន	បានសុខក្សេមក្សាន្ត
		គ្មានភ័យព្រួយអ្វី	។
១៣	គេអាចចេញចរ	ពីស្រុកមួយត	ដល់ស្រុកទីទៃ
	ចេញពីស្រុកមួយ	ទៅស្រុកផ្សេងក្តី	នោះក៏អាស្រ័យ
		នៅលើចិត្តចង់	។
១៤	តែមិនអាចធ្វើ	ទៅតាមអំពើ	ដែលចិត្តខ្លួនប៉ង
	ទ្រង់មិនបណ្តោយ	ឱ្យមនុស្សទាំងពួង	សង្កត់សង្កិន
		អ៊ីស្រាអែលថ្លៃ	។
១៥	ព្រះអង្គបន្ទោស	ស្តេចអស់ទាំងនោះ	ឱ្យចេះប្រណី
	កុំប៉ះពាល់អ្នក	យើងអភិសេកថ្មី	កុំធ្វើបាបអី
		ព្យាការីនោះ	។
១៦	ទ្រង់ធ្វើឱ្យមាន	ទុរ្ភិក្សអត់ឃ្លាន	អ្នកស្រុករងគ្រោះ
	កូនចៅគ្រប់កាយ	គ្មានអ្វីឆីសោះ	អ្នកភូមិស្រីប្រុស
		យំខ្វះអាហារ	។
១៧	តែទ្រង់ចាត់លោក	យ៉ូសែបឱ្យមក	ដើរមុខប្រជា
	តែទាស់បងប្អូន	មានចិត្តលេលា	លក់លោកធ្វើជា
		ទាសករជាតិផ្សេង	។
១៨	គេធ្វើបាបគាត់	ដាក់ខ្នោះវាយវាត់	រំពាត់ខ្វាត់ខ្វែង
	គេយកច្រវាក់	ទាក់ ក គ្មានក្រែង	ខ្នោះដាក់ខ្វាត់ខ្វែង
		រឹបជើងខ្លួនប្រាណ	។
១៩	រហូតហេតុការណ៍	កើតឡើងសព្វសារ	តាមពាក្យលោកបាន
	ថ្លែងទុកជាយូរ	លុះព្រះម្ចាស់មាន	បន្ទូលថ្កើងថ្កាន
		ថាគាត់ស្លូតត្រង់	។
២០	ស្តេចស្រុកអេស៊ីប	ឱ្យលែងយ៉ូសែប	ស្រាយទាំងចំណង
	ដោះលែងឱ្យរួច	ទាំងម្ចាស់រាស្រ្តផង	ដ៏មានបំណង
		ដោះលែងលោកដែរ	។
២១	គ្រាបន្ទាប់មក	ស្តេចក៏តាំងលោក	ឱ្យត្រួតមើលថែ
	រក្សារាជវាំង	នៅនែបនិត្យក្បែរ	រាជទ្រព្យហូរហែ
		ទាំងអស់ទៀតផង	។
២២	ស្តេចប្រទានឱ្យ	ត្រួតសព្វគ្រប់ហើយ	មន្ត្រីទាំងពួង
	ឱ្យប្រៀនប្រដៅ	មិនឱ្យមានឆ្គង	ព្រឹទ្ធាចារ្យផង
		ឱ្យឆ្លាតវាងវៃ	។
២៣	ពេលនោះជនជាតិ	អ៊ីស្រាអែលជ្រៀត	រស់នៅលើដី
	របស់អេស៊ីប	ពូជយ៉ាកុបថ្លៃ	រស់លើទឹកដី
		លោកអប្រាហាំ	។
២៤	ព្រះម្ចាស់ប្រទាន	ប្រជាឱ្យមាន	កើនឡើងរាល់ឆ្នាំ
	ឱ្យមានកម្លាំង	ក្លាខ្លាំងសម្បើម	សត្រូវជ្រួលជ្រើម
		តទល់មិនបាន	។
២៥	ព្រះអង្គធ្វើឱ្យ	ពួកអេស៊ីបធ្លោយ	ផ្លាស់ប្តូរចិត្តប្រាណ
	ស្អប់ខ្ពើមប្រជា	រាស្រ្តទាំងប៉ុន្មាន	បោកប្រាសបំភាន់
		អ្នកបម្រើទ្រង់	។
២៦	ព្រះអង្គបង្គាប់	ម៉ូសេប្រញាប់	មិននៅបង្អង់
	អរ៉ុនជាអ្នក	ដែលទ្រង់ជ្រើសតាំង	ឱ្យចេញតម្រង់
		ទ្រង់បញ្ជាទៅ	។
២៧	លោកទាំងពីរនាក់	សម្តែងបញ្ជាក់	សំគាល់ត្រឹមត្រូវ
	ឫទ្ធិបាដិហារិយ៍	ផ្សេងៗទុកនៅ	ព្រះម្ចាស់តម្រូវ
		ក្នុងស្រុកអេស៊ីប	។
២៨	ព្រះម្ចាស់ធ្វើឱ្យ	អន្ធិកាកើតហើយ	ពាសពេញទាំងទ្វីប
	បើទ្រង់បញ្ជា	ដោយមហទ្ធិឫទ្ធិ	គ្មាននរណាឃាត់
		ជំទាស់បានឡើយ	។
២៩	ទ្រង់បានប្រែទឹក	ត្រីច្រើនសន្ធឹក	វិនាសអស់ហើយ
	ទឹកក្លាយជាឈាម	គ្មានអ្វីរស់ឡើយ	រលេះរលួយ
		ខ្ទេចអស់គ្មានសល់	។
៣០	មានទាំងកង្កែប	យំឮអូបអែប	ពាសពេញមណ្ឌល
	ឡើងមកស្អេកស្កះ	រហូតទៅដល់	ក្រឡានិមល
		ព្រះបន្ទំស្តេច	។
៣១	ពេលមានបន្ទូល	មានរុយមកមូល	ដូចមានទ្រនិច
	មានពិសមានពុល	មូសក៏មិនតិច	ពាសពេញមិនដាច់
		ក្នុងស្រុកភូមិគេ	។
៣២	ព្រឹលធ្លាក់ដូចភ្លៀង	រន្ទះបាញ់ផាំង	ឆេះមិនសល់ទេ
	ព្រះអង្គធ្វើឱ្យ	អន្តរាយបែកបែរ	នោះដោយសារតែ
		ឫទ្ធីបារមី	។
៣៣	ទ្រង់បំផ្លាញទាំង	ចំការទំពាំង	បាយជូរខ្ញុកខ្ញី
	ព្រមទាំងបំបាក់	ដើមឈើស្រស់ខ្ចី	នៅលើទឹកដី
		ពួកគេខ្ទេចខ្ទី	។
៣៤	ពេលមានបន្ទូល	កណ្តូបមកមូល	ដង្កូវមកមីរ
	ចេញមកពាសពេញ	សាសព្វទិសទី	កើតច្រើនវក់វី
		ស្មានមិនត្រូវអី	។
៣៥	ទៅស៊ីដំណាំ	ដែលអ្នកស្រុកដាំ	មិនថាទុំខ្ចី
	បំផ្លាញបន្លែ	លើគោកក្នុងដី	មិនឱ្យមានអ្វី
		នៅសល់មួយទង	។
៣៦	ព្រះអម្ចាស់វាយ	សម្លាប់ឱ្យពាយ	អស់ទាំងកូនច្បង
	ប៉ុន្មានក្នុងស្រុក	អេស៊ីបអឺងកង	កូនសមបំណង
		ស្រឡាញ់លើសគេ	។
៣៧	ទ្រង់នាំប្រជា	រូតរះម្នីម្នា	ញាប់ឥតទំនេរ
	ប្រញាប់ជើងការ	យកមាសប្រាក់ព្រែ	កុលសម្ព័ន្ធគេ
		គ្មានអ្នកទន់ខ្សោយ	។
៣៨	ពួកនោះចេញទៅ	អេស៊ីបរស់នៅ	នាំគ្នាសប្បាយ
	ព្រោះតែគេខ្លាច	ពួកនោះពេកក្រៃ	ពេលនេះលែងភ័យ
		ខ្លាចអ្វីទៀតទេ	។
៣៩	ព្រះអង្គបានដាក់	ពពកបាំងពាក់	គ្របលើពួកគេ
	ហើយទ្រង់ប្រទាន	ដុំភ្លើងងាករេ	ជំនួសដួងខែ
		នៅពេលរាត្រី	។
៤០	គេសុំអាហារ	ព្រះអង្គបញ្ជា	សត្វក្រួចច្រើនក្រៃ
	គឺទ្រង់ប្រទាន	ពីសួគ៌ាល័យ	លែងព្រួយលែងភ័យ
		បាឆីបរិបូណ៌	។
៤១	ព្រះអង្គបំបែក	ថ្មដូចគេហែក	ឱ្យមានទឹកហូរ
	ដូចជាទន្លេ	ទឹកមិនដាច់សូរ	រាស្រ្តបានសម្បូរ
		ទឹកមិនចេះអត់	។
៤២	ព្រះអម្ចាស់នឹក	ចាំទាំងរឭក	បន្ទូលវិសុទ្ធ
	សន្យានឹងលោក	អប្រាហាំពិត	បម្រើពិសិដ្ឋ
		ព្រះអង្គពេកពន់	។
៤៣	ព្រះអង្គបានប្រោស	ប្រណីសន្តោស	ឱ្យប្រជាជន
	ព្រះអង្គចេញទាំង	អំណរលើសលន់	កញ្ជ្រៀវពេកពន់
		សប្បាយគ្មានល្ហែ	។
៤៤	ព្រះអង្គយកដី	ជាតិនានាលៃ	ចែកឱ្យគេដែរ
	និងឱ្យទទួល	ភោគផលផ្កាផ្លែ	ដែលជាតិខាងក្បែរ
		ទាំងនោះបានដាំ	។
៤៥	ទ្រង់ធ្វើដូច្នេះ	ឱ្យពួកគេចេះ	ប្រតិបត្តិតាម
	ពាក្យប្រៀនប្រដៅ	ដែលទ្រង់បានផ្តាំ	សុខចិត្តធ្វើតាម
		ឥតមានរួញរា	។

ទំនុកតម្កើងលេខ ១០៦ (១០៥) បទពាក្យ ៧

១	ចូរលើកតម្កើងព្រះអម្ចាស់	ព្រះអង្គមានព្រះទ័យសន្តោស
	មេត្តាករុណាសប្បុរស	ព្រះដ៏ខ្ពង់ខ្ពស់នៅរហូត	។
២	តើនរណាអាចរាប់ពីស្នា	ព្រះហស្តអស្ចារ្យដ៏វិសុទ្ធ
	តើនរណាអាចថ្កើងបំផុត	សរសើររហូតគ្រប់គ្រាន់បាន ?	។
៣	អ្នកណាប្រព្រឹត្តដោយយុត្តិធម៌	សុចរិតស្មោះសរឥតខកខាន
	គ្រប់ពេលវេលានោះនឹងបាន	ជួយក្តីសុខសាន្តគ្មានសៅហ្មង	។
៤	បពិត្រព្រះជាអម្ចាស់ថ្លៃ	ពេលគាប់ព្រះទ័យរាស្រ្តព្រះអង្គ
	សូមនឹកដល់ទូលបង្គំផង	កុំបីបោះបង់ខ្ញុំកំព្រា	។
៥	ដើម្បីឱ្យទូលបង្គំបាន	ជួបក្តីសុខសាន្តគ្រប់វេលា
	អ្នកដែលទ្រង់ជ្រើសទុកជាគ្នា	ខ្ញុំសូមរួមជាមួយគេផង	។
	ឱ្យទូលបង្គំបានខ្ពស់មុខ	រួមរស់សុខទុក្ខឥតមួរហ្មង
	នឹងប្រជារាស្រ្តផ្ទាល់ព្រះអង្គ	ក្នុងគ្រានេះម្តងនិងតទៅ	។
៦	យើងខ្ញុំបានធ្វើអំពើបាប	អាក្រក់ឆ្អេះឆ្អាបច្រើនពេកកូវ
	ដូចបុព្វបុរសកន្លងទៅ	ធ្វើរឿងអាស្រូវមិនទំនង	។
៧	កាលនៅអេស៊ីបបុព្វបុរស	បំភ្លេចទាំងអស់គ្រាកន្លង
	ពុំយល់ពីការអស្ចារ្យផង	របស់ព្រះអង្គធ្វើនោះទេ	។
៨	ប៉ុន្តែព្រះអង្គបានសង្គ្រោះ	ពួកគេឱ្យរស់បានល្ហើយល្ហែ
	ដោយយល់ព្រះនាមទ្រង់ឥតប្រែ	ទើបបង្ហាញគេស្គាល់អានុភាព	។
៩	ព្រះអង្គគំរាមសមុទ្រកក់	នោះវាភ័យតក់ស្លុតរីងជ្រាប
	ទ្រង់ឱ្យគេដើរកាត់បាតរាប	ដូចទីទំនាបរហោស្ថាន	។
១០	ព្រះអង្គសង្គ្រោះគេឱ្យផុត	ពីមនុស្សទុច្ចរិតចិត្តតិរច្ឆាន
	និងកណ្តាប់ដៃជនសាមាន្យ	អស់ក្តីរំខានបានល្ហើយល្ហែរ	។
១១	ទ្រង់ឱ្យសមុទ្រគ្របបាំងជិត	លើបច្ចាមិត្រមិនបង្អែរ
	បង្អង់ឱ្យនៅសល់ម្នាក់ទេ	មួយក៏គ្មានដែរដែលនៅរស់	។
១២	ពេលបុព្វបុរសឃើញដូច្នោះ	គេជឿលើព្រះជាអម្ចាស់
	ទើបគេនាំគ្នាច្រៀងទាំងអស់	តម្កើងព្រះខ្ពស់លើលោកា	។
១៣	ក្រោយមកពួកគេឆាប់ភ្លេចភ្លឹក	កិច្ចការសន្ធឹកច្រើនអស្ចារ្យ
	គេពុំរង់ចាំពេលមួយណា	សម្រេចកិច្ចការព្រះអង្គឡើយ	។
១៤	នៅរហោស្ថានគេមានចិត្ត	លោភលន់មិនគិតធ្វើឫកជើយ
	ល្បងលព្រះម្ចាស់លេងព្រងើយ	ទីនោះឯងហើយដីហួតហែង	។
១៥	ព្រះអង្គប្រទានឱ្យគេឆី	អាហារប្រពៃច្រើនក្រៃលែង
	ពួកគេបានឆ្អែតពោះសំញែង	គេធ្វើឫកខែងដូចជិនណាយ	។
១៦	នៅក្នុងជំរំគេនាំគ្នា	ច្រណែននិន្ទាខ្លាំងពេកក្រៃ
	ម៉ូសេអារ៉ុនទាំងពីរកាយ	បម្រើប្រពៃនៃព្រះម្ចាស់	។
១៧	ពេលនោះផែនដីញ័ររញ្ជួយ	បែកប្រេះរលួយខ្ទេចខ្ទាំអស់
	ស្រូបយកដាថានមិនឱ្យរស់	បក្សពួករបស់អប៊ីរ៉ាមផង	។
១៨	មានភ្លើងសន្ធៅមកឆាបឆេះ	ពួកគេទាំងអស់ខ្ទេចសូន្យសុង
	អណ្តាតភ្លើងឆេះមនុស្សយង់ឃ្នង	ទាំងអស់តែម្តងគ្មានសល់មួយ	។
១៩	លើភ្នំហូរ៉ែបគេជួបជុំ	យកមាសទាំងដុំនាំគ្នាជួយ
	ឆ្លាក់ដាប់ដុតដំបានគោមួយ	គេលែងភ័យព្រួយទុកជាព្រះ	។
២០	ពួកគេបែរជាយករូបសត្វ	មកទុកថ្វាយថ្វាត់ក្រាបសំពះ
	ជាសត្វស៊ីស្មៅដើរពេញពាស	ទុកដូចជាព្រះគួរគោរព	។
២១	ពួកគេភ្លេចថាព្រះតែមួយ	ជាព្រះដែលជួយទាំងថ្ងៃយប់
	ដោយស្នាព្រះហស្តខ្ពស់លើសលប់	ពាសពេញសាយសព្វស្រុកអេស៊ីប	។
២២	ការអស្ចារ្យទៀតដែលមាននៅ	ក្នុងស្រុកកូនចៅប្រាហាំស្រាប់
	និងស្នាព្រះហស្តដ៏ចំណាប់	គួរឱ្យស្ញែងស្ញប់ឯសមុទ្រ	។
២៣	ព្រះអង្គសម្រេចព្រះហឫទ័យ	កម្ទេចប្រល័យគេឱ្យផុត
	តែលោកម៉ូសេដ៏វិសុទ្ធ	ចេញមកក្រាបលុតអង្វរសុំ	។
	គាត់ឃាត់ព្រះអង្គមិនឱ្យលប់	តាមព្រះពិរោធដោយគំនុំ
	មិនឱ្យព្រះអង្គគិតគួនគុំ	ពួកគេនឹងយំដោយទ្រង់ខ្ញាល់	។
២៤	គេពុំព្រមចុះចូលទៅក្នុង	ទឹកដីបំព្រងជារៀងរាល់
	សម្បូណ៌សប្បាយដោយភោគផល	ពុំទទួលស្គាល់បន្ទូលទេ	។
២៥	គេពោលរអ៊ូក្នុងជំរំ	លាន់ឮរងំគ្មានពេលល្ហែ
	មិនព្រមស្តាប់ព្រះសូរសៀងទេ	គេមិនប្រួលប្រែជឿព្រះអង្គ	។
២៦	ដូច្នេះព្រះម្ចាស់ខ្ញាល់ខ្លាំងណាស់	ទ្រង់ក៏ប្រកាសមិនរេរង់
	នឹងបំផ្លាញគេឱ្យខ្ទេចផង់	ឱ្យវិនាសក្នុងរហោស្ថាន	។
២៧	ទ្រង់នឹងកម្ចាត់ឱ្យរលាយ	វិនាសអន្តារាយគ្រប់ៗប្រាណ
	ដោយឱ្យគេស្លាប់ចៀសមិនបាន	លើទឹកដីស្ថានសាសន៍ដទៃ	។
២៨	នៅឯពេអ៊រគេនាំគ្នា	ឱនកាយវន្ទាទាំងលើកដៃ
	គោរពព្រះបាលរាល់ខែថ្ងៃ	ជាព្រះអប្រីយ៍គ្មានវិញ្ញាណ	។
២៩	ពួកគេប្រព្រឹត្តអំពើទាស់	នឹងព្រះអម្ចាស់មិនខកខាន
	ទ្រង់ព្រះពិរោធពន់ប្រមាណ	នាំឱ្យកើតមានគ្រោះកង្វល់	។
៣០	លោកភេនេអាសក្រោកដាក់ទោស	គេតាមកំហុសឥតមានសល់
	គ្រោះកាចស្ងប់ស្ងៀមលែងអំពល់	ពួកគេបានស្គាល់តែសុខសាន្ត	។
៣១	ព្រោះតែកើតហេតុការណ៍ទាំងនេះ	ព្រះអម្ចាស់ប្រោសលោកឱ្យបាន
	ជាមនុស្សសុចរិតឥតសាមាន្យ	អស់កល្បសុខសាន្ដអង្វែងទៅ	។
៣២	នៅប្រភពទឹកមេរីបា	គេគ្រប់កាយាធ្វើអាស្រូវ
	នាំឱ្យព្រះម្ចាស់ខ្ញាល់ពេកកូវ	លោកម៉ូសេត្រូវទទួលទោស	។
៣៣	គេធ្វើឱ្យរូបលោកឆ្អែតចិត្ត	ថប់ក្នុងគំនិតមិនដឹងខុស
	ជាហេតុឱ្យលោកវិលវល់អស់	ហើយមានប្រសាសន៍ដោយមិនគិត	។
៣៤	ពួគេពុំបានវាយប្រហារ	ប្រជានានាប្រែទៅស្និទ្ធ
	រួមរស់នឹងគេដោយមិនគិត	ហើយបានក្បត់ផិតនឹងបញ្ជា	។
៣៥	ពួកគេបែរទៅជាប់ព័ន្ធពាក់	ជាមួយពួកអ្នកសាសន៍នានា
	ហើយគេបានរៀនតៗគ្នា	ប្រព្រឹត្តពាលាតាមសាសន៍ផ្សេង	។
៣៦	គេថ្វាយបង្គំព្រះក្លែងក្លាយ	រៀងរាល់តែថ្ងៃគ្មានកោតក្រែង
	ថ្ងៃក្រោយគេនឹងសោកសង្រេង	ដោយសារខ្លួនឯងនាំវិនាស	។
៣៧	គេយកបុត្រភ្ងារទាំងស្រីប្រុស	ធ្វើយញ្ញទាំងខុសគ្មានអៀនខ្មាស
	ទៅថ្វាយអារក្សដោយផ្តេសផ្តាស	ថ្វាយទៅដល់ព្រះមិនដឹងអី	។
៣៨	គេបានប្រហារជិវិតកូន	ប្រុសស្រស់ស្រីស្ងួនទាំងក្មេងខ្ចី
	ដែលគ្មានកំហុសមិនដឹងអី	ធ្វើឱ្យទឹកដីលែងវិសុទ្ធ	។
៣៩	អំពើដែលពួកគេប្រព្រឹត្ត	ធ្វើឱ្យដក់ដិតរៀងរហូត
	គេបានក្បត់ព្រះតែមួយគត់	ព្រោះគេមានពុតមិនព្រមកែ	។
៤០	ពេលនោះព្រះអម្ចាស់មិនទ្រាំ	នឹងប្រជាជនទ្រង់ទៀតទេ
	ទ្រង់ព្រះពិរោធនឹងពួកគេ	ដែលជាប្រជាផ្ទាល់ព្រះអង្គ	។
៤១	ព្រះអង្គបញ្ជូនគេឱ្យធ្លាក់	ទៅក្នុងអន្ទាក់ជាតិផ្សេងម្តង
	ឱ្យពួកបច្ចាមិត្រគ្រប់គ្រង	លើពួកនោះផងឱ្យដឹងដៃ	។
៤២	ខ្មាំងសត្រូវជិះជាន់សង្កត់	ពួកគេតាមចិត្តមិនប្រណី
	បង្ក្រាបពួកគេទាំងយប់ថ្ងៃ	ចុះចូលក្នុងដៃគេទៀតផង	។
៤៣	ទ្រង់សង្គ្រោះគេច្រើនលើកគ្រា	គេនៅនាំគ្នាចង់ប៉ុនប៉ង
	បះបោរប្រឆាំងនឹងព្រះអង្គ	បាបច្រើនកន្លងមិនព្រមឈប់	។
៤៤	ពេលព្រះអង្គឮពួកគេស្រែក	ថ្ងូរថ្ងួចអនេកទាំងថ្ងៃយប់
	ព្រះអង្គក៏មានព្រះទ័យស្ងប់	លែងខឹងលែងស្អប់ថែមអាណិត	។
៤៥	ព្រះអង្គសន្តោសប្រោសប្រណី	នឹកដល់មេត្រីចងជុំជិត
	ព្រះទ័យទ្រង់ដូរមកអាណិត	មេត្តាធម៌ស្ថិតនៅលើសលប់	។
៤៦	ទ្រង់បានធ្វើឱ្យខ្មាំដែលកៀរ	ពួកគេទៅជាឈ្លើយសំអប់
	មានចិត្តអាណិតពួគេគ្រប់	លែងខឹងលែងស្អប់លែងធ្វើបាប	។
៤៧	ឱព្រះអម្ចាស់យើងខ្ញុំអើយ	ក្នុងពេលនេះហើយសូមប្រញាប់
	យាងមកសង្គ្រោះយើងផុតស្លាប់	ឱ្យបានឆាប់ៗកុំបង្អង់	។
	ដើម្បីឱ្យខ្ញុំថ្វាយបង្គំ	ព្រះនាមឧត្តមសែនខ្ពស់ខ្ពង់
	វិសុទ្ធវិសាលល្អត្រចង់	បានខ្ពស់មុខផងដោយថ្កើងទ្រង់	។
៤៨	សូមលើកតម្កើងព្រះអម្ចាស់	ប្រសើរពេកណាស់មានយូរលង់
	ជាព្រះអ៊ីស្រាអែលតពូជពង្ស	ដរាប់ទៅផងរៀងទៅអើយ	។

ទំនុកតម្កើងលេខ ១០៧ (១០៦) បទព្រហ្មគីតិ

១	ចូរលើកតម្កើងព្រះ	ជាអម្ចាស់មានព្រះទ័យ
	ដ្បិតទ្រង់សប្បុរសក្រៃ	ត្រាប្រណីរៀងរហូត	។
២	អ្នកដែលព្រះជាអម្ចាស់	បានរំដោះឱ្យរបូត
	ពោលពាក្យនេះរហូត	កុំភរភូតត្រូវស្ម័គ្រស្មោះ	។
៣	ព្រះអង្គប្រមូលជុំ	មកពីភូមិគ្មានចន្លោះ
	នាំយកមកទាំងអស់	ពីកើតកោះលិចជើងត្បូង	។
៤	អ្នកខ្លះត្រូវវង្វេង	វាលបែកផ្សែងដីប្រេះខូង
	រកស្រុកភូមិទាំងពួង	ស្នាក់នៅផងអ្វីក៏គ្មាន	។
៥	គេស្ទើតែដាច់ពោះ	សឹងមិនរស់ព្រោះតែឃ្លាន
	រកទឹកក៏មិនបាន	បាត់បងប្រាណទាំងទឹកចិត្ត	។
៦	ក្នុងពេលមានអាសន្ន	គេស្រែកបន់គួរអាណិត
	សូមព្រះជួយជីវិត	ទ្រង់អាណិតក៏រំដោះ	។
៧	ព្រះអង្គបានដឹកនាំ	គេដាក់ចំក្រុងល្អស្រស់
	ដែលគេបានសង្គ្រោះ​	អាស្រ័យរស់ដោយសុខសាន្ត	។
៨	គេត្រូវលើកតម្កើង	ព្រះខ្ពស់ឡើងហួសទីស្ថាន
	ករុណាដែលទ្រង់មាន	ប្រោសប្រទានគ្មានជិនណាយ	។
៩	ដ្បិតទ្រង់ប្រទានទឹក	ឱ្យអ្នកផឹកលែងខ្វល់ខ្វាយ
	ប្រទានម្ហូបនិងបាយ	អ្នកទាំងឡាយឆីតាមចង់	។
១០	អ្នកខ្លះទៀតរស់នៅ	ទីជម្រៅងងឹតស្លុង
	ជាអ្នកជាប់នៅក្នុង	ច្រវាក់ឃាំងយ៉ាងវេទនា	។
១១	ដ្បិតគេបានតតាំង	បះប្រឆាំងព្រះដែលជា
	ម្ចាស់ដែលតែងការពារ	មិននឹកនាពាក្យប្រដៅ	។
១២	ព្រះអង្គលុតដំគេ	ឱ្យជួបតែទុក្ខសោកសៅ
	វេទនាគ្មានអ្នកហៅ​​​​​​	ពួកគេត្រូវធ្លាក់ទឹកចិត្ត	។
១៣	ក្នុងពេលមានអាសន្ន	គេស្រែកបន់គួរអាណិត
	សូមព្រះជួយជីវិត	ទ្រង់អាណិតក៏រំដោះ	។
១៤	ព្រះអង្គនាំគេគេច	ពីអំណាចស្លាប់ឱ្យរស់
	ទ្រង់ផ្តាច់ចេញទាំងអស់	ច្រវាក់ខ្នោះផុតពីដៃ	។
១៥	គេត្រូវលើកតម្កើង	ព្រះម្ចាស់ឡើងឱ្យប្រពៃ
	ដែលសម្តែងព្រះទ័យ	ប្រោសប្រណីចំពោះមនុស្ស	។
១៦	ដ្បិតព្រះអង្គបំបាក់	សោរច្រវាក់ដែកទាំងអស់
	ឯទ្វារលង្ហិននោះ	ទ្រង់បោកបោះបំបែកបាន	។
១៧	ខ្លះទៅជាល្ងីល្ងើ	ព្រោះអំពើបាបរំខាន
	កំហុសទាំងប៉ុន្មាន	ធើ្វឱ្យប្រាណគេខ្លោចផ្សា	។
១៨	គេព្រួយបារម្ភខ្លាំង	លែងចង់ទាំងលេបអាហារ
	ព្រួយខ្លាចសូន្យសង្ខារ	ក្តីមរណាកាន់តែជិត	។
១៩	ក្នុងពេលមានអាសន្ន	គេស្រែកបន់គួរអាណិត
	សូមព្រះជួយជីវិត	ទ្រង់អាណិតក៏រំដោះ	។
២០	ព្រះអង្គមានបន្ទូល	ឱ្យប្រមូលពួកទាំងនោះ
	ឱ្យគេបានជាអស់	និងរំដោះបានប្រពៃ	។
២១	ពួកគេត្រូវតម្កើង	ព្រះខ្ពស់ឡើងផុតផែនដី
	និងស្នាព្រះហស្តថ្លៃ	ទ្រង់ប្រណីមកមនុស្សា	។
២២	គេត្រូវតែដាក់ថ្វាយ	យញ្ញទាំងឡាយជាសក្ការ
	អរគុណសព្វប្រការ	ថ្លែងពីស្នាព្រះហស្តផង	។
២៣	អ្នកដែលដើររកស៊ី	គ្រប់ទិសទីកុំមានហ្មង
	តាមផ្លូវសមុទ្រផង	គ្រានេះម្តងយល់ហេតុការណ៍	។
២៤	បានឃើញស្នាព្រះហស្ត	ព្រះអម្ចាស់ដ៏ថ្លៃថ្លា
	សព្វកិច្ចដ៏អស្ចារ្យ	គ្រប់ប្រការនៅសមុទ្រ	។
២៥	ពេលព្រះជាអម្ចាស់	បន្ទូលច្បាស់លាស់បំផុត
	ខ្យល់បោកបក់គួរស្លុត	ទឹកសមុទ្ររលកខ្លាំង	។
២៦	ធ្វើឱ្យតួនាវា	សែនគ្រាំគ្រាបោកគ្រាំគ្រាំង
	ជួនលិចជួនងើបឡើង	ជួនផាត់ប៉ើងស្ទើរមរណា	។
២៧	ពួកគេវិលវល់់ខ្លាំង	ដូចស្រវឹងគ្រប់អាត្មា
	ថែមទាំងលែងដឹងថា	ធ្វើយ៉ាងណារួចជីវិត	។
២៨	ក្នុងពេលមានអាសន្ន	គេស្រែកបន់គួរអាណិត
	សូមព្រះជួយជីវិត	ទ្រង់អាណិតក៏រំដោះ	។
២៩	ព្រះអង្គបានបង្ក្រាប	សមុទ្ររាបព្យុះស្ងាត់អស់
	រលកក៏ថយចុះ	ឈប់ទាំងអស់នៅស្ងាត់ស្ងៀម	។
៣០	គេត្រេកអរខ្លាំងណាស់	ដោយដឹងច្បាស់ព្រះគំរាម
	រលកសមុទ្រស្ងៀម	ទ្រង់ដឹងនាំឱ្យផុតភ័យ	។
៣១	ពួកគេលើកតម្កើង	ព្រះម្ចាស់ឡើងដោយប្រពៃ
	ដែលសម្តែងព្រះទ័យ	ប្រោសប្រណីគ្រប់មនុស្សម្នា	។
៣២	គេថ្កើងនាមព្រះអង្គ	ក្នុងប្រជុំជននានា
	ក្នុងក្រុមចាស់ព្រឹទ្ធា	ឱ្យគ្រប់គ្នាបានយល់ដឹង	។
៣៣	ព្រះអង្គឱ្យទន្លេ	ហូររាល់ខែវស្សាប្រាំង
	ទៅជាវាលស្ងាត់ឈឹង	ទឹកក៏រាំងរឹងហួតហែង	។
៣៤	ទ្រង់ធ្វើឱ្យទឹកដី	ទៅជាប្រៃគ្រប់កន្លែង
	ដីស្ងួតប្រេះក្រហែង	ព្រោះខ្លាចក្រែងគេមិនត្រង់	។
៣៥	ព្រះអង្គអាចធ្វើឱ្យ	ទីវាលក្លាយប្រែជាបឹង
	ដីហួតស្ងួតប្រេះរឹង	វាលស្ងាត់ឈឹងប្រែមានទឹក	។
៣៦	ទ្រង់នាំអ្នកស្រេកឃ្លាន	ទៅរស់រានច្រើនសន្ធឹក
	ទៅរស់នៅជិតទឹក	ក្រុងសន្ធឹកនៅទៀតផង	។
៣៧	ពួកគេបានសាបព្រោះ	ដំណាំដុះស្រស់ហ្មត់ហ្មង
	ទំពាំងបាយជូរផង	ល្អបំព្រងបេះយកផល	។
៣៨	ព្រះអង្គប្រទានពរ	ជ័យបវរសុខមង្គល
	កកើតឱ្យបានដល់	ទាំងហ្វូងសត្វក៏មិនអន់	។
៣៩	ពេលពួកគេថយចុះ	បាត់កិត្តិយសគ្រោះអាសន្ន
	ពួកសត្រូវជិះជាន់	ឥតស្រាកស្រាន្តរងទុក្ខសោក	។
៤០	ព្រះអង្គធ្វើឱ្យអ្នក	មានបុណ្យសក្តិចុះទាបថោក
	វង្វេងមិនអាចរក	ផ្លូវទៅមកឃើញសោះឡើយ	។
៤១	តែទ្រង់តែងសង្គ្រោះ	អ្នកគ្មានយសក្រខ្សត់ខ្សោយ
	អ្នកទាបបានធូរស្បើយ	បានកូនសាយច្រើនពន់ពេក	។
៤២	ពេលពួកអ្នកសុចរិត	ឃើញរឿងពិតអរអនេក
	អ្នកទុច្ចរិតលែងស្រែក	គួរសង្វេគនៅស្ងៀមស្ងាត់	។
៤៣	អស់អ្នកមានប្រាជ្ញា	ត្រូវកត់ត្រាកុំឱ្យបាត់
	ទុកជាទីកំណត់	យល់ឱ្យហ្មត់ស្នាព្រះហស្ត	។
៤៤	មានច្រើនមហិមា	អស្ចារ្យជារាប់មិនអស់
	ព្រះហឫទ័យសន្តោស	ប្រណីប្រោសនៃព្រះម្ចាស់	។

ទំនុកតម្កើងលេខ ១០៨ (១០៧) បទពាក្យ ៧

២	ឱព្រះជាអម្ចាស់ខ្ញុំអើយ	ខ្ញុំមិនកន្តើយត្រៀមកាយចិត្ត
	ទូលបង្គំនឹងច្រៀងស្មូតបទ	អស់ពីដួងចិត្តរាល់វេលា	។
៣	ឱពិណនិងឃឹមទាំងឡាយអើយ	ចូរកុំកន្តើយចាកនិន្ទ្រា
	ខ្ញុំនឹងទៅដាស់ព្រះសុរិយា	ឱ្យចរយាត្រាបំភ្លឺលោក	។
៤	បពិត្រព្រះអម្ចាស់ថ្លាថ្លៃ	ខ្ញុំតម្កើងថ្វាយទាំងលើកយក
	នៅក្នុងជនជាតិច្រើនគរគោក	ខ្ញុំសូមស្មូត្រមកថ្វាយព្រះអង្គ	។
៥	ដ្បិតព្រះហឫទ័យធ្លាប់មេត្តា	អាសូរករុណាដ៏ត្រចង់
	ព្រះទ័យស្ម័គ្រស្មោះឥតមានហ្មង	ទោះវេហាស៍ផងខ្ពស់មិនស្មើ	។
៦	ឱព្រះម្ចាស់សូមបង្ហាញឡើង	ភាពស្រស់ថ្កានថ្កើងនៅស្ថានលើ
	សិរីរុងរឿងចាំងផ្លេកភ្លឺ	ល្បាញល្បីរន្ទឺទាំងផែនដី	។
៧	សូមយាងសង្គ្រោះដោយឫទ្ធា	អំណាចចេស្តានិងបារមី
	ឆ្លើយតបមកខ្ញុំដោយឃ្មាតខ្មី	ឱ្យជនប្រុសស្រីរួចជីវិត	។
៨	ព្រះម្ចាស់ទ្រង់មានបន្ទូលពី	សក្ការៈទីដ៏វិសុទ្ធ
	ថាយើងនឹងយកជ័យបំផុត	រួចនឹងពិនិត្យបែងចែកស្រុក	។
	យើងនឹងវាស់កាត់ចែកស៊ីគែម	ជ្រលងបន្ថែមភ្នំស៊ូកូត
	ចែកឱ្យប្រជារាស្រ្តត្រង់ស្លូត	ទុកឱ្យរហូតជាមរតក	។
៩	ទឹកដីកាឡាតយើងយកជា	ទ្រព្យគាប់ទ័យាមិនតំអក់
	ទាំងម៉ាណាសេក៏យើងយក	ជាទីជម្រករាស្រ្តយើងផង	។
	អេប្រាអ៊ីមអើយអ្នកដូចជា	មួកដែកការពារពេលចម្បាំង
	យូដាក៏ដូចជាដំបង	រាជ្យល្អហ្មត់ហ្មងឫទ្ធិថ្កុំថ្កើង	។
១០	ជើងយើងលាងលើដីម៉ូអាប់	អេដំសម្រាប់់បោះស្បែកជើង
	បញ្ជាក់ថាម្ចាស់ដីគឺយើង	ប្រកាសប្រឆាំងភីលីស្ទីន	។
១១	នរណានាំខ្ញុំឱ្យចូលដល់	ទីក្រុងមង្គលរឹងមាំមួន
	តើនរណានាំខ្ញុំដល់ស្ថាន	ភូមិអេដំបានគ្មានភ័យព្រួយ	។
១២	បពិត្រព្រះជាម្ចាស់ខ្ញុំអើយ	ព្រះអង្គនេះហើយអាចលើកស្ទួយ
	ទ្រង់បានបោះបង់ហើយបណ្តោយ	ឈប់យាងមកជួយក្នុងកងទ័ព	។
១៣	សូមជួយយើងខ្ញុំប្រឆាំងត	ពេលនេះវឹកវរបាក់មុខអាប់
	ការជួយពីមនុស្សពិតមិនគាប់	មានច្រើនតាន់តាប់គ្មានផលអ្វី	។
១៤	បើព្រះជាម្ចាស់គង់នឹងយើង	នេះនឹងថ្កុំថ្កើងបានជោគជ័យ
	ព្រះអង្គបង្ក្រាបពួកអប្រីយ៍	វិនាសអន្តរាយជារៀងរាប	។

ទំនុកតម្កើងលេខ ១០៩ (១០៨) បទកាកគតិ

១	ឱព្រះអម្ចាស់	ខ្ញុំសូមប្រកាស	សរសើរតម្កើង
	សូមកុំបង្អង់	កុំធ្វើឆ្មៃឆ្មើង	យាងមកឆាប់ឡើង
		កុំនៅស្ងៀមឡើយ	។
២	ដ្បិតជនអាក្រក់	ភូតភរកុហក	ប្រឆាំងមិនស្បើយ
	គេមួលបង្កាច់	គ្មានពេលល្ហែល្ហើយ	គេមិនស្ងៀមឡើយ
		បង្ខូចឈ្មោះខ្ញុំ	។
៣	គេពោលសំអប់	រូបខ្ញុំគ្រប់សព្វ	ដោយមិនសក្តិសម
	គេវាយប្រហារ	មកលើរូបខ្ញុំ	ដូចមានគំនុំ
		មិនដឹងហេតុការណ៍	។
៤	ខ្ញុំស្រឡាញ់គេ	តែគេងាករេ	បែកបែរសាវា
	គេចោទប្រកាន់	ខ្ញុំខុសតម្រា	ទោះជាម្តេចម្តា
		ខ្ញុំមិនទោម្នេញ	។
៥	គេធ្វើអាក្រក់	អំពើលាមក	តបស្នងមកវិញ
	គេស្អប់រូបខ្ញុំ	តបក្តីស្រឡាញ់	ស្មោះឥតទោម្នេញ
		តទៅឥតរា	។
៦	សូមមេត្តាដាក់	ជនកំណាចម្នាក់	មកកាន់ការងារ
	ពីលើអ្នកនោះ	ឈរខាងស្តាំវា	គេនឹងត្រួតត្រា
		ចោទប្រកាន់ទោស	។
៧	ឱ្យគេទទួល	ទោសកុំប្រែប្រួល	នៅពេលជំរះ
	ក្តីក្នុងជំនុំ	ដឹងចាញ់ដឹងឈ្នះ	ពាក្យគេបន់ព្រះ
		ឱ្យក្លាយជាបាប	។
៨	សូមកុំឱ្យគេ	រស់បានយូរខែ	តទៅដរាប
	សូមឱ្យមានម្នាក់	មកនៅកាន់កាប់	តំណែងគួរគាប់
		ជំនួសកុំខាន	។
៩	ឱ្យកូនឱ្យចៅ	អស់ទាំងពង្សផៅ	ទាំងញាតិសន្តាន
	ទៅជាកំព្រា	គ្មានគេរាប់អាន	ប្រពន្ធគេបាន
		ក្លាយជាមេម៉ាយ	។
១០	ឱ្យទាំងចៅកូន	ជីតាជីដូន	បាក់បែកខ្ចាត់ខ្ចាយ
	ឱ្យអនាថា	ដើររើសកកាយ	សុំដល់ស្រុកឆ្ងាយ
		ពីលំនៅស្ថាន	។
១១	សូមម្ចាស់បំណុល	រឹបអូសកុំសល់	អ្វីទាំងប៉ុន្មាន
	ឱ្យជនបរទេស	ឆក់ប្លន់កុំខាន	អ្វីគេរកបាន
		យកអស់កុំទុក	។
១២	សូមកុំឱ្យមាន	អ្នកណាប្រទាន	ឱ្យគេបានសុខ
	កុំគិតអាសូរ	ឱ្យស្គាល់តែទុក្ខ	រស់មិនស្រណុក
		ជាកូនឯកា	។
១៣	សូមដកជីវិត	ពូជគេកុំគិត	ប្រណីករុណា
	លុបបំបាត់ចោល	ត្រកូលឫស្យា	កុំនៅមេត្តា
		ដល់ជំនាន់ក្រោយ	។
១៤	សូមព្រះម្ចាស់ចាំ	កត់ត្រាចំណាំ	ដូនតាទុកឱ្យ
	កំហុសប៉ុន្មាន	គេបានធ្វើហើយ	រួមផងទាំងម្តាយ
		អ្នកផ្សំគំនិត	។
១៥	សូមព្រះចងចាំ	អំពើបាបកម្ម	ពួកជនឧក្រិដ្ឋ
	ពេលគេស្លាប់ទៅ	កុំឱ្យមានមិត្ត	ឬមានអ្នកគិត
		ដល់គេធ្វើអី	។
១៦	ជននេះពុំបាន	សម្តែងសន្តាន	ចិត្តចេះប្រណី
	គេបៀតគេបៀន	អ្នកខ្សត់ក្រក្រី	ព្រមទាំងប្រល័យ
		អ្នកសោកសង្រេង	។
១៧	គេចូលចិត្តឈ្លោះ	មិនអនុគ្រោះ	គ្មានគិតខ្លាចក្រែង
	រករឿងឥតឈប់	មិនថាចាស់ក្មេង	ពួកគេវង្វេង
		នឹងបណ្តាសា	។
	គេមិនចូលចិត្ត	ពាក្យពរប្រសិទ្ធិ	រុងរឿងថ្លៃថ្លា
	ហេតុនេះកុំឱ្យ	មានមនុស្សណា	ជូនពរធុកា
		ដល់ពួកវាឡើយ	។
១៨	សូមឱ្យគេយក	សូមឱ្យគេយក	គ្របកុំកន្តើយ
	ដូចអាវដែលពាក់	នៅលើខ្លួនហើយ	កុំបណ្តោយឡើយ
		ខកខានសោះសូន្យ	។
	សូមបណ្តាសា	ចូលក្នុងកាយា	ដូចទឹកក្នុងខ្លួន
	ជ្រាបចូលក្នុងសាច់	រឹងប៉ឹងមាំមួន	ដូចខ្លាញ់ចូលខ្លួន
		ជារៀងដរាប	។
១៩	ឱ្យបណ្តាសា	បានក្លាយទៅជា	ខោអាវបាំងគ្រប
	បិទជិតជុំកាយ	ព័ទ្ធពេនជិតជាប់	ដូចខ្សែក្រវាត់
		រុំសព្វកាយា	។
២០	អស់អ្នកដែលចោទ​	ប្រកាន់ខ្ញុំសោត	និងអ្នកមុសា
	និយាយអាក្រក់	ប្រឆាំងឫស្យា	សូមគ្រប់អាត្មា
		ទទួលទោសចុះ	។
២១	ឱព្រះម្ចាស់អើយ	កុំនៅព្រងើយ	សូមមេត្តាប្រោស
	យល់ដល់ព្រះនាម	អម្ចាស់លើកទោស	ហឫទ័យសន្តោស
		ធម៌ករុណា	។
២២	ខ្ញុំជនកម្សត់	ក្រីក្រទុរគត	ដួងចិត្តឯកា
	សូមមេត្តាជួយ	ឱ្យជាផងណា	ស្រាកស្រាន្តកាយា
		ផុតទុក្ខសោកសៅ	។
២៣	ជីវិតរសាត់	ដោយវាយោផាត់	ដូចស្រមោលខ្មៅ
	គេកម្ចាត់ខ្ញុំ	ឱ្យខ្ចាត់បាត់ទៅ	ដូចសត្វល្អិតត្រូវ
		វិនាសអន្តរាយ	។
២៤	ខ្ញុំហេវល្ហិតល្ហៃ	ទន់អស់ជើងដៃ	ខ្សោះអស់ទាំងកាយ
	ព្រោះតមអាហារ	យូរថ្ងៃមកហើយ	គ្មានសល់សាច់ឡើយ
		ស្បែកដណ្តប់ឆ្អឹង	។
២៥	មនុស្សម្នាឃើញខ្ញុំ	ពេបជ្រាយសើចយំ	ខ្ញុំស្គមកំព្រឹង
	អ្នកខ្លះងក់ក្បាល	សម្លក់សម្លឹង	មើលខ្ញុំដូចខឹង
		ធ្វើមុខក្រញូវ	។
២៦	ឱព្រះអម្ចាស់	ព្រះអង្គជាព្រះ	នៃខ្ញុំឥឡូវ
	សូមជួយរូបខ្ញុំ	ឱ្យផុតហ្មងសៅ	កុំបង្អង់នៅ
		សូមទ្រង់សន្តោស	។
២៧	សូមឱ្យពួកវា	ទទួលស្គាល់ថា	ព្រះបានសង្គ្រោះ
	រូបទូលបង្គំ	ចាកផុតទុក្ខទោស	ដោយបារមីនោះ
		វិសេសអស្ចារ្យ	។
២៨	គេជេរប្រទេច	ផ្តាសាពាក្យពេចន៍	រូបខ្ញុំឯកា
	ព្រះអង្គប្រទាន	ពរជ័យថ្លៃថ្លា	ខ្ញុំមិនមរណា
		បានសុខថ្កើងថ្កាន	។
២៩	សូមឱ្យពួកអ្នក	ប្រកាន់ចាប់ថ្នាក់	ខ្ញុំគ្រប់ទីស្ថាន
	ជួបតែអាម៉ាស់	ពុំស្គាល់សុខសាន្ត	សោកសៅប៉ុន្មាន
		នៅជាប់រាល់ថ្ងៃ	។
៣០	ខ្ញុំលើកតម្កើង	សំឡេងលាន់ឡើង	ថ្កើងព្រះម្ចាស់ថ្លៃ
	សរសើរព្រះអង្គ	ជារៀងរាល់ថ្ងៃ	ប្រជាប្រុសស្រី
		កកកុញកុះករ	។
៣១	ដ្បិតទ្រង់ការពារ	អ្នកខ្សត់វេទនា	ទុរគតក្រីក្រ
	ដើម្បីសង្គ្រោះ	ឱ្យរស់បន្ត	ពីមនុស្សមិនល្អ
		ចង់ដាក់ទោសគេ	។

ទំនុកតម្កើងលេខ ១១០ (១០៩) បទកាកគតិ

១	ព្រះអម្ចាស់មាន	បន្ទូលមកកាន់	ព្រះរាជាខ្ញុំ
	ថាសូមអញ្ជើញ	អង្គុយខាងស្តាំ	កុំនៅសំងំ
		ចាំយើងចាត់ចែង	។
	ទំរាំយើងច្បាំង	បង្ក្រាបពួកខ្មាំង	ចិត្តធំឥតក្រែង
	យើងដាក់វានៅ	ក្រោមជើងព្រះស្តែង	ឱ្យវាចំបែង
		អ្នកកុំខ្វល់ខ្វាយ	។
២	សូមព្រះប្រទាន	ព្រះករុណាបាន	លាតសន្ធឹងឆ្ងាយ
	ព្រះរាជ្យព្រះអង្គ	ពីស៊ីយ៉ូននាយ	តទៅអន្លាយ
		បង្ក្រាបលើខ្មាំង	។
៣	ថ្ងៃព្រះករុណា	កេណ្ឌទ័ពនោះណា	ប្រជាទូទាំង
	រួមនិងយុវជន	ស្ម័គ្រស្មោះទៅច្បាំង	ដូចសន្សើមខ្លាំង
		ធ្លាក់ចុះរាល់ថ្ងៃ	។
៤	ព្រះអម្ចាស់មាន	បន្ទូលថ្កើងថ្កាន	សន្យាថ្លាថ្លៃ
	យើងបូជាចារ្យ	ជាអចិន្ត្រៃយ៍	យកតាមនិស្ស័យ
		មែលគីសេដែក	។
៥	ព្រះអម្ចាស់គង់	ឈរនៅយូរលង់	ខាងស្តាំចាំស្រែក
	ពេលព្រះអង្គខ្ញាល់	គំរាមប្រកែក	កម្ទេចបំបែក
		ពួកស្តេចនានា	។
៦	ព្រះអង្គវិនិច្ឆ័យ	ជាតិសាសន៍ដទៃ	ឱ្យភ័យគ្រប់គ្នា
	ព្រះអង្គទុកសព	គរជើងលើគ្នា	ដេកដួលត្រៀបត្រា
		គ្រប់ទីកន្លែង	។
	ព្រះអង្គបំបាក់	អ្នកធំគ្រប់ថ្នាក់	គ្មានខ្លាចរអែង
	ឱ្យគេចុះចេញ	បោះបង់តំណែង	គេកោតស្ញប់ស្ញែង
		ទូទាំងប្រទេស	។
៧	ពេលស្តេចយាងទៅ	សព្វតាមទីផ្លូវ	ទ្រង់សោយទឹកជ្រោះ
	ដូចជាព្រះស្ងោយ	ចម្អែតក្រពះ	រួចងើបព្រះភក្ត្រ
		ដោយជោគសិរី	។

ទំនុកតម្កើងលេខ ១១១ (១១០) បទពាក្យ ៧

១	ចូរលើតម្កើងព្រះជាម្ចាស់	ប្រសើរពេកណាស់លើលោកា
	ខ្ញុំថ្កើងព្រះអង្គហួសសិរសា	ក្នុងហ្វូងមនុស្សណាដែលទៀងត្រង់	។
២	គ្រប់ស្នាព្រះហស្តព្រះអម្ចាស់	ប្រសើរពេកណាស់ខ្ពស់ឧត្តុង្គ
	អ្នកពេញចិត្តស្នាព្រះហស្តទ្រង់	ស្វះស្វែងយល់ផងកុំរារែក	។
៣	គ្រប់ស្នាព្រះហស្តបានបញ្ចេញ	រស្មីចិញ្ចែងភ្លឺអនេក
	សេចក្តីសុចរិតល្អពន់ពេក	មិនប្រេះបាក់បែកនៅរហូត	។
៤	ព្រះអង្គទ្រង់សព្វព្រះហឫទ័យ	ឱ្យយើងស្រមៃមិនរលត់
	ដល់ការអស្ចារ្យខ្ពស់បំផុត	ហឫទ័យអាណិតចិត្តអាសូរ	។
៥	ព្រះអង្គប្រទានទាំងអាហារ	ដល់អ្នកវេទនាស្រែកទ្រហោរ
	អ្នកដែលកោតខ្លាចទ្រង់អាសូរ	សម្ពន្ធមានយូរធ្លាប់មេត្រី	។
៦	ព្រះអង្គសម្តែងអានុភាព	ឱ្យរាស្រ្តជ្រួតជ្រាបឥតសង្ស័យ
	គឺព្រះអង្គបានឱ្យទឹកដី	ប្រជាដទៃមកពួកគេ	។
៧	គ្រប់ស្នាព្រះហស្តព្រះអង្គធ្វើ	សុទ្ធតែអំពើល្អឥតរេ
	សុចរិតយុត្តិធម៌ឥតប្រួលប្រែ	ដូច្នេះគួរតែជឿទាំងស្រុង	។
៨	បញ្ជាទាំងនោះឥតចន្លោះ	មិនបាត់មួយសោះស្ថិតគង់វង្ស
	សុចរិតល្អល្អះភ្លឺត្រចង់	ក្តីពិតទៀងត្រង់យ៉ាងប្រពៃ	។
៩	ព្រះអង្គរំដោះប្រជារាស្រ្ត	ពួកគេទាំងអស់មានសេរី
	ទ្រង់បានចងសម្ពន្ធមេត្រី	នឹងរាស្រ្តប្រុសស្រីរហូតទៅ	។
	ព្រះនាមព្រះអង្គគង់ទីខ្ពស់	វិសុទ្ធឥតមោះឥតហ្មងសៅ
	បារមីគួរស្ញែងខ្លាចពេកកូវ	រាល់យប់ថ្ងៃត្រូវតែគោរព	។
១០	អ្នកណាដែលចង់មានប្រាជ្ញា	គួរតែគិតថាមានប្រភព
	ប្រាជ្ញានឹងកើតមានសព្វគ្រប់	បើអ្នកគោរពខ្លាចព្រះម្ចាស់	។
	អ្នកប្រតិបត្តិតាមប្រាជ្ញានេះ	គេអាចត្រិះរិះបានល្អល្អះ
	យើងសូមតម្កើងព្រះអម្ចាស់	ជាព្រះខ្ពង់ខ្ពស់រហូតទៅ	។

ទំនុកតម្កើងលេខ ១១២ (១១១) បទពាក្យ ៧

១	អ្នកឱនកោតខ្លាចព្រះអម្ចាស់	ប្រតិបត្តិច្បាស់តាមព្រះទ័យ
	ស្មោះស្ម័គ្រគោរពតាមវិន័យ	បានសុខពេកក្រៃមានមង្គល	។
២	ពូជរបស់គេមានអំណាច	ចិត្តក្លាអង់អាចគ្មានកង្វល់
	ដ្បិតព្រះជាម្ចាស់ប្រទានផល	ព្រះពរពិតដល់អ្នកសុចរិត	។
៣	ក្នុងផ្ទះជនដែលមានចិត្តធម៌	មានទ្រព្យបវរល្អប្រណីត
	សេចក្តីសុចរិតនៅស្ថេរស្ថិត	ព្រះអង្គអាណិតឱ្យពរជាប់	។
៤	ក្នុងទីងងឹតមានពន្លឺ	លេចឡើងបំភ្លឺមិនស្រអាប់
	ចិត្តគាត់ប្រណីល្អគួរគាប់	សន្តោសលើសព្វជនប្រុសស្រី	។
៥	ជនណាដែលមានចិត្តទូលាយ	យកអ្វីទៅឱ្យអ្នកផងខ្ចី
	ព្រមទាំងរករស៊ីមិនកេងគៃ	អ្នកនោះប្រពៃល្អបំផុត	។
៦	កេរ្តិ៍ឈ្មោះរន្ទឺឮសុសសាយ	ទីជិតទីឆ្ងាយមិនរលត់
	ជនគ្រប់សម័យតែងចាំស្ទាត់	នឹកទៅដល់គាត់ជាប់ជានិច្ច	។
៧	អ្នកនោះមិនស្លុតមិនព្រឺខ្លាច	មានចិត្តអង់អាចមិនខ្លាចល្បិច
	មិនខ្លាចគេដៀលត្មះពន្លិច	ហើយផ្ញើជីវិតលើព្រះម្ចាស់	។
៨	គាត់មានចិត្តនឹងហើយអង់អាច	មិនចេះភ័យខ្លាចអ្វីទាំងអស់
	ទាល់តែគាត់ឃើញខ្មាំងទាំងនោះ	បាក់ទ័ពរត់អស់ទើបស្កប់ចិត្ត	។
៩	គាត់តែងចែកទានដល់អ្នកក្រ	ដោយចិត្តស្មោះសរស្ម័គ្រពិតៗ
	ចិត្តគាត់ទូលាយត្រង់សុចរិត	កម្លាំងគាត់ស្ថិតមិនបាត់បង់	។
១០	ពេលជនអាក្រក់ឃើញដូច្នោះ	ចិត្តគេទោមនស្សខាំធ្មេញផង
	បាក់ធ្លាក់ទឹកចិត្តខូចបំណង	ពុំសម្រេចម្តងណាសោះឡើយ	។

ទំនុកតម្កើងលេខ ១១៣ (១១២) បទព្រហ្មគីតិ

១	អស់អ្នកបម្រើព្រះ	ជាអម្ចាស់ចូរនាំគ្នា
	សរសើរកុំរួញរា	ថ្កើងនាមានៃព្រះម្ចាស់	។
២	ចូរតម្កើងព្រះនាម	ព្រះម្ចាស់ភ្លាមកុំក្រឡះ
	កុំភ្លេចព្រះអម្ចាស់	ពីពេលនេះរហូតទៅ	។
៣	តាំងពីអារុណរះ	ភ្លឺស្រឡះមានកម្តៅ
	ទល់ពេលថ្ងៃលិចទៅ	សរសើរនៅយ៉ាងស្ម័គ្រស្មោះ	។
៤	ព្រះអម្ចាស់គងស្ថិត	លើប្រជាជាតិទាំងអស់
	សិរីរុងរឿងខ្ពស់	ព្រះម្ចាស់ហួសផុតអាកាស	។
៥	តើមាននរណាមួយ	អាចធ្វើឱ្យដូចព្រះម្ចាស់
	ព្រះអង្គគង់ខ្ពស់ណាស់	លើអាកាសវិសុទ្ធក្រៃ	។
៦	ព្រះអង្គត្រួតពិនិត្យ	យ៉ាងល្អន់ល្អិតមកផែនដី
	លើមេឃមិនសល់អ្វី	សព្វផែនដីមិនកំបាំង	។
៧	ទ្រង់លើកអ្នកទន់ខ្សោយ​	មិនបណ្តោយឱ្យឈឺស្លាំង
	លើកផុតពីភក់់ជ្រាំ	ផុតអស់ទាំងធូលីដី	។
៨	ដើម្បីឱ្យគេកាន់	អំណាចបានល្អប្រពៃ
	នឹងពួកដឹកនាំនៃ	រាស្រ្តប្រុសស្រីរបស់ទ្រង់	។
៩	ព្រះអង្គប្រទានឱ្យ	ស្រ្តីអារខ្សោយមានកូនផង
	សប្បាយឥតសៅហ្មង	កូនរហង់នៅក្នុងផ្ទះ	។

ទំនុកតម្កើងលេខ ១១៤ (១១៣ ក) បទពាក្យ ៧

១	ពេល​​​​​​​​​​​​​​​​​​​​​​អ៊ីស្រាអែលបានចាកចេញ	ពីអេស៊ីបវិញហើយពេលនោះ
	ពូជពង្សយ៉ាកុបចេញទាំងអស់	ពីដីបរទេសមិនសល់នៅ	។
២	ឯប្រជាជនជាតិយូដា	បានក្លាយទៅជាឥតហ្មងសៅ
	ជាប្រជាជាតិមិនអាស្រូវ	វិសុទ្ធពេកកូវផ្ទាល់ព្រះអង្គ	។
៣	ពេលទឹកសមុទ្រឃើញពួកគេ	តក់ស្លុតម៉េ្លះទេមិនរេរង់
	គេចខ្លួនថយទៅមិនបង្អង់	ទាំងយ័រដាន់ផងក៏ថយដែរ	។
៤	ភ្នំធំភ្នំតូចភ្នំទាំងអស់	នៅមិនស្ងៀមសោះដូចពពែ
	លោតទៅលោតមកមិនឈប់ទេ	ភ្នំតូចលោតដែរដូចកូនចៀម	។
៥	ឱ! សមុទ្រអើយម្តេចក៏អ្នក	រត់គេចជាជាក់ទៅនៅស្ងៀម
	អ្នកធ្លាប់រលកបោករវាម	ម្តេចសំងំស្ងៀមធ្មឹងដូច្នេះ ?	។
	ឱ! ទឹកទន្លេយ័រដាន់អើយ	ពេលនេះម្តេចឡើយរត់លឿនម៉េ្លះ
	ម្តេចអ្នកដកខ្លួនឆាប់ដូច្នេះ	តើរឿងទាំងនេះមកពីអ្វី ?
៦	ភ្នំអើយម្តេចអ្នកមិនឈប់លោត	ផ្លាស់ប្តូររហូតដូចសត្វព្រៃ
	ភ្នំតូចតើអ្នកលោតព្រោះអ្វី	មិនស្គាល់យប់ថ្ងៃមិនសម្រាក	។
៧	ឱ! ផែនដីអើយចូររីករាយ	ត្រេកអរសប្បាយចំពោះភក្ត្រ
	ព្រះជាអម្ចាស់របស់អ្នក	និងចំពោះភក្ត្រព្រះយ៉ាកុប	។
៨	គឺទ្រង់បានធ្វើឱ្យសិលា	ប្រែក្លាយទៅជាបឹងសាយសព្វ
	ឱ្យថ្មប្រែក្លាយជាប្រភព	ទឹកហូរឥតឈប់ឥតស្រាកស្រាន្ត	។

ទំនុកតម្កើងលេខ ១១៥ (១១៣ ខ) បទកាកគតិ

១	បពិត្រព្រះម្ចាស់	ខ្ញុំមិនគួរសោះ	ឱ្យគេតម្កើង
	មានតែព្រះអង្គ	ទើបត្រូវលើកឡើង	ឱ្យខ្ពស់ថ្កុំថ្កើង
		ព្រោះទ្រង់សប្បុរស	។
២	ម្តេចក៏ប្រជា	គ្រប់ជាតិនានា	នាំគ្នាសួរខុស
	មកយើងខ្ញុំថា	«ពួកឯងទាំងអស់	តើព្រះឯងនោះ
		ស្ថិតនៅឯណា ?»	។
៣	ព្រះរបស់ខ្ញុំ	នៅទីបរម	សុខឥតឧបមា
	ទ្រង់សព្វព្រះទ័យ	ធ្វើកិច្ចអស្ចារ្យ	អ្វីសព្វប្រការ
		បានឥតមានទាស់	។
៤	ឯព្រះពួកអ្នក	ប្រាកដជាជាក់	ព្រះក្លែងក្លាយស្មោះ
	ខ្លះធ្វើពីឈើ	គគីរកកោះ	ពីប្រាក់ពីមាស
		ជាព្រះគេច្នៃ	។
៥	ព្រះនោះមានមាត់	និយាយមិនកើត	មិនដែលចេញស្តី
	តាមតែជាងឆ្លាក់	ដាក់មកធ្វើអ្វី	ភ្នែកឥតប្រស្រី
		មើលអ្វីមិនបាន	។
៦	រីឯត្រចៀក	មានប្រាកដជាក់	តែមិនចំណាន
	ព្រោះស្តាប់មិនកើត	មិនដឹងដើមដាន	ច្រមុះក៏មាន
		តែមិនដឹងក្លិន	។
៧	មានសព្វទាំងដៃ	តែមិនអាចលៃ	ប៉ះពាល់ឬកាន់
	មានជើងនៅស្ងៀម	ព្រោះដើរមិនបាន	បំពង់កមាន
		តែគ្មានសំឡេង	។
៨	សូមឱ្យអស់អ្នក	ដែលបានដាប់ឆ្លាក់	រូបព្រះនោះឯង
	ហើយផ្ញើជីវិត	គ្មានគិតកោតក្រែង	ឱ្យគេចំបែង
		ដូចព្រះទាំងនោះ	។
៩	អ៊ីស្រាអែលអើយ	ចូរកុំកន្តើយ	ផ្ញើជិវិតចុះ
	លើព្រះអម្ចាស់	ទ្រង់និងសង្គ្រោះ	ជាខែលគ្រឿងក្រោះ
		ពាំងអ្នករាល់គ្នា	។
១០	ពូជពង្សរបស់	អរ៉ុនទាំងអស់	ចូរអ្នកម្នីម្នា
	ផ្ញើជន្មជីវ៉ា	លើព្រះនាមា	ទ្រង់និងការពារ
		ឱ្យអ្នកបានសុខ	។
១១	អ្នកដែលកោតខ្លាច	ព្រះមានអំណាច	នឹងមិនជួបទុក្ខ
	បើផ្ញើជិវិត	អ្នកនឹងបានសុខ	ពីនេះទៅមុខ
		ផុតទុក្ខល្ហើយល្ហែ	។
១២	ព្រះមិនបំភ្លេច	សូម្បីបន្តិច	ដល់ពួកយើងទេ
	ព្រះអង្គឱ្យពរ	យើងកើនឡើងទ្វេ	អ៊ីស្រាអែលដែរ
		និងលោកអរ៉ុន	។
១៣	ព្រះអង្គប្រទាន	ពរទាំងអ្នកមាន	អ្នកតូចអ្នកធំ
	ដែលចេះកោតខ្លាច	ក្រាបថ្វាយបង្គំ	យកព្រះជាធំ
		ជាម្លប់គ្រប់គ្រា	។
១៤	សូមព្រះប្រទាន	ពរនោះឱ្យមាន	ដល់អ្នករាល់គ្នា
	បានចម្រើនឡើង	គ្រប់ពេលវេលា	បានសុខរមនា
		កូនចៅប្រុសស្រី	។
១៥	សូមអ្នកទទួល	កុំបីអំពល់	ពីម្ចាស់មេឃដី
	ទ្រង់ប្រទានពរ	បវរសួស្តី	ព្រះអម្ចាស់ថ្លៃ
		ជាព្រះយើងពិត	។
១៦	ផ្ទៃមេឃវែងឆ្ងាយ	សន្លឹកអន្លាយ	គឺជាកម្មសិទ្ធ
	របស់ព្រះម្ចាស់	តែមួយអង្គគត់	ព្រះអង្គអាណិត
		ឱ្យដីមកមនុស្ស	។
១៧	អ្នកស្លាប់ជាខ្មោច	មានក្លិនអសោច	ពុំអាចថ្កើងយស
	អស់អ្នកដែលចុះ	ទៅស្ថានក្រោមនោះ	ក៏ពុំមានឈ្មោះ
		តម្កើងសិរី	។
១៨	គឺយើងនេះហើយ	គ្មានអ្នកផ្សេងឡើយ	ដែលរស់លើដី
	បានលើកតម្កើង	ព្រះអង្គរាល់ថ្ងៃ	ឥតមានសំចៃ
		ជារៀងរហូត	។

ទំនុកតម្កើងលេខ ១១៦ (១១៥) បទព្រហ្មគីតិ

១	ខ្ញុំស្រឡាញ់ព្រះម្ចាស់	ដ្បិតទ្រង់ព្រះសណ្តាប់ខ្ញុំ
	សំឡេងសោកទួញយំ	ទទូចសុំទូលអង្វរ	។
២	ព្រះអង្គផ្ទៀងព្រះកាណ៌	រាល់វេលាដោយស្មោះសរ
	ខ្ញុំនឹងស្រែកអង្វរ	មិនឈប់ឈរមួយជីវិត	។
៣	ខ្ញុំរងទុក្ខលំបាក	គ្មានស្រាន្តស្រាកទាំងភ័យភិត
	មច្ចុរាជមករួបរឹត	ខ្ញុំតក់ស្លុតខ្លាចខ្លួនក្ស័យ	។
៤	ខ្ញុំខំអង្វរស្រែក	ខ្លាំងពន់ពេករកម្ចាស់ថ្លៃ
	អាណិតកុំឱ្យក្ស័យ	សូមប្រណីសង្គ្រោះផង	។
៥	ព្រះអង្គតែងសន្តោស	ប្រណីប្រោសមិនដែលហ្មង
	សុចរិតយុត្តិធម៌ផង	ព្រះទ័យទ្រង់មានមេត្តា	។
៦	ព្រះអម្ចាស់បានជួយ	អ្នកខ្សត់ឱ្យផុតខ្លោចផ្សា
	ពេលខ្ញុំធ្លាក់កាយា	អង្គក្សត្រាមកសង្គ្រោះ	។
៧	ខ្ញុំលែងគិតខ្វល់ខ្វាយ	អ្វីទាំងឡាយសព្វទាំងអស់
	ដ្បិតព្រះម្ចាស់ទ្រង់ប្រោស	ទ្រង់សន្តោសខ្ញុំសុខសាន្ត	។
៨	ព្រះអង្គបានរំដោះ	ខ្ញុំផុតគ្រោះបានថ្កើងថ្កាន
	ការពារជ្រែងទប់ប្រាណ	ខ្ញុំដើរបានមិនភ័យសោះ	។
៩	ខ្ញុំដើរមិនឈរឈប់	ទាំងថ្ងៃយប់នៅចំពោះ
	ព្រះភ័ក្ត្រព្រះជាម្ចាស់	ភពមនុស្សក្នុងលោកនេះ	។
១០	ទោះជាខ្ញុំពោលថា	រស់ខ្លោចផ្សាទ្រូងស្ទើរប្រេះ
	គង់តែរូបខ្ញុំនេះ	មិនចោលព្រះសង្ឃឹមជាប់	។
១១	ពេលខ្ញុំមានកង្វល់	ចិត្តខ្វាយខ្វល់មិនបានស្ងប់
	ខ្ញុំពោលឡើងគ្រប់សព្វ	ថាខ្ញុំស្អប់ជនគ្រប់ប្រាណ	។
១២	តើខ្ញុំអាចយកអ្វី	តបព្រះទ័យម្ចាស់ថ្កើងថ្កាន
	ដែលព្រះអម្ចាស់បាន	ប្រោសគ្រប់ប្រាណបានសមរម្យ	។
១៣	គឺខ្ញុំត្រូវលើកពែង	ទាំងថ្លាថ្លែងនាមឧត្តម
	ព្រះអង្គរំដោះខ្ញុំ	យើងស្រែកសុំរកព្រះម្ចាស់	។
១៤	ខ្ញុំនឹងយកតង្វាយ	មកដាក់ថ្វាយក្រាបសំពះ
	លាបំណន់ពីព្រះ	ជាអម្ចាស់មុខប្រជា	។
១៥	ទ្រង់ព្រួយព្រះទ័យណាស់	ពេលមានរាស្រ្តស្លាប់វេទនា
	ជនវិសុទ្ធគ្រប់គ្នា	ទ្រង់ការពារមិនស្លាប់ឡើយ	។
១៦	ឱ! ព្រះម្ចាស់ប្រសើរ	ខ្ញុំបម្រើព្រះអង្គហើយ
	ព្រះអង្គមិនកន្តើយ	ខ្ញុំបានស្បើយពីមរណា	។
១៧	ទូលបង្គំសូមថ្វាយ	យញ្ញទាំងឡាយដោយជ្រះថ្លា
	អង្វរព្រះបិតា	ព្រះបុត្រាខ្ពស់ពេកពន់	។
១៨	ខ្ញុំនឹងយកតង្វាយ	មកដាក់ថ្វាយលាបំណន់
	នៅមុខប្រជាជន	ដែលបានបន់ដល់ព្រះអង្គ	។
១៩	គឺនៅក្នុងទីធ្លា	ព្រះវិហារស្រស់បំព្រង
	ស្ថិតនៅកណ្តាលក្រុង	សូមផ្ចិតផ្ចង់លើកតម្កើង	។

ទំនុកតម្កើងលេខ ១១៧ (១១៦) បទពាក្យ ៧

១	ឱ! ប្រជាជនទាំងឡាយអើយ	ចូរសរសើរហើយលើកម្កើង
	អស់ប្រជារាស្រ្តឆ្មៃឆ្មើង	តម្កើងសិរីនៃព្រះអង្គ	។
២	ដ្បិតព្រះអង្គមានហឫទ័យ	ករុណាប្រណីពេកកន្លង
	សប្បុរសស្មោះស្ម័គ្រឥតមានហ្មង	នឹងយើងរហូតតរៀងទៅ	។

ទំនុកតម្កើងលេខ ១១៨ (១១៧) បទពាក្យ ៧

១	សូមលើកតម្កើងព្រះអម្ចាស់	ប្រសើរពេកណាស់ព្រះទ័យថ្លៃ
	សប្បុរសករុណាត្រាប្រណី	ស្ថិតស្ថេររាល់ថ្ងៃរហូតទៅ	។
២	សូមឱ្យប្រជាទ្រង់ប្រកាស	សម្តែងចេញច្បាស់កុំទុកនៅ
	ព្រះទ័យមេត្តាដ៏ត្រឹមត្រូវ	ស្ថិតស្ថេរគង់នៅដូចថ្ងៃរះ	។
៣	ឱ្យអស់ពូជពង្សលោកអរ៉ុន	កុំនៅទំរន់ស្រែកឱ្យច្បាស់
	ប្រកាសព្រះទ័យករុណាព្រះ	ស្ថិតនៅយ៉ាងច្បាស់គ្រប់កន្លែង	។
៤	អស់អ្នកគោរពកោតខ្លាចព្រះ	ក៏ត្រូវប្រកាសឱ្យក្តែងៗ
	ដូចអ៊ីស្រាអែលកុំបីក្រែង	ហឫទ័យស្ញប់ស្ញែងនៅស្ថិតស្ថេរ	។
៥	ពេលខ្ញុំមានទុក្ខតប់ប្រមល់	ខ្ញុំអង្វរដល់ព្រះឥតប្រែ
	ព្រះម្ចាស់ក៏តបមកវិញដែរ	ទ្រង់ថ្នមបំពេរខ្ញុំបានសុខ	។
៦	ព្រះអម្ចាស់គង់កាន់ខាងខ្ញុំ	ទុក្ខភ័យតូចធំចេញពីមុខ
	លែងព្រួយលែងខ្លាចលែងកើតទុក្ខ	តើមនុស្សលោកធ្វើអ្វីបាន ?	។
៧	ព្រះអង្គម្ចាស់គង់នៅជាមួយ	ទ្រង់ការពារជួយខ្ញុំសុខសាន្ត
	ឃើញអ្នកប្រឆាំងទាំងប៉ុន្មាន	រត់ប្រាសចាកស្ថានដូចចិត្តប៉ង	។
៨	ខ្ញុំសង្ឃឹមជ្រកនិងពឹងពាក់	មានជំនឿជាក់និងបំណង
	លើព្រះអម្ចាស់ពេកកន្លង	ជាងពឹងផ្អែកផងជនក្បាលខ្មៅ	។
៩	ខ្ញុំសង្ឃឹមជ្រកនិងពាក់ពឹង	មានជំនឿរឹងមាំទាំទៅ
	លើព្រះអម្ចាស់ទើបត្រឹមត្រូវ	ជាងយើងពឹងទៅលើអ្នកធំ	។
១០	ជនជាតិដទៃអ្នកប្រឆាំង	បានឡោមព័ទ្ធពាំងលើរូបខ្ញុំ
	តែដោយព្រះម្ចាស់អំណាចធំ	ជួយប្រយុទ្ធខ្ញុំបានឈ្នះគេ	។
១១	គេបានរោមជិតរឹតឡោមព័ទ្ធ	ចង់ចូលសង្កត់ឱ្យខ្ញុំប្រែ
	តែដោយព្រះអម្ចាស់មើលថែ	ជួយប្រយុទ្ធដែរខ្ញុំមានជ័យ	។
១២	វាមកឡោមព័ទ្ធខ្ញុំជិតជុំ	ដូចជាហ្វូងឃ្មុំច្រើនដាសដី
	តែវាត្រូវឆេះដូចភ្លើងព្រៃ	ខ្ទេចខ្ទីម៉ត់ខៃដោយនាមព្រះ	។
១៣	ខ្មាំងបានច្រានផ្តួលខ្ញុំយ៉ាងខ្លាំង	ខ្ញុំដួលស្លេកស្លាំងប្រឹងសំពះ
	រកឱ្យព្រះជួយឆាប់រហ័ស	ពេលនោះព្រះម្ចាស់ទ្រង់យាងមក	។
១៤	ព្រះម្ចាស់ពិតជាកម្លាំងខ្ញុំ	ខ្ញុំស្រែកខ្ញុំយំប្រឹងស្រែករក
	មានព្រះនាមព្រះផុតទុក្ខសោក	ព្រះអង្គចេញមកច្បាំងការពារ	។
១៥	មនុស្សសុចរិតចិត្តអង់អាច	មិនចេះកោតខ្លាចស្រែកគ្រប់គ្នា
	ច្រៀងថ្វាយព្រះអង្គមានឫទ្ធា	សម្តែងតេជាអានុភាព	។
១៦	ព្រះអង្គសម្តែងបារមីខ្ពស់	ប្រសើរលើសលស់មិនទន់ទាប
	ព្រះអង្គបង្ហាញឱ្យគេជ្រាប	ឫទ្ធានុភាពអស្ចារ្យក្រៃ	។
១៧	ខ្ញុំត្រូវនៅរស់មានជីវិត	មិនត្រូវស្លាប់ផុតចាកលោកីយ៍
	ដើម្បីរៀបរាប់ពីសេចក្តី	ស្នាព្រះហស្តថ្លៃព្រះអម្ចាស់	។
១៨	ព្រះអង្គវាយប្រដៅអប់រំ​​	ទះតប់រូបខ្ញុំប្រាកដណាស់
	តែទ្រង់ស្រឡាញ់មិនឱ្យប្រាស	មិនឱ្យមានគ្រោះឬត្រូវស្លាប់	។
១៩	ចូរនាំគ្នាបើកទ្វារឱ្យមនុស្ស	សុចរិតស្រីប្រុសមកប្រញាប់
	ខ្ញុំនឹងចូលទៅឱ្យបានឆាប់	នឹងថ្លែងរៀបរាប់អរគុណទ្រង់	។
២០	ទ្វារនេះជាទ្វារព្រះអម្ចាស់	សូមជនស្រីប្រុសដើរតម្រង់
	អ្នកសុចរិតអើយកុំបង្អង់	ទ្វារបើកបម្រុងនៅចាំអ្នក	។
២១	ខ្ញុំនឹងតម្កើងព្រះអម្ចាស់	ដ្បិតព្រះអង្គត្រាស់ដោយច្បាស់ជាក់
	តបឆ្លើយមកខ្ញុំពាក្យរាក់ទាក់	ថែមទាំងថ្នមថ្នាក់ខ្ញុំដិតដល់	។
២២	ថ្មដែលជាងផ្ទះចោលខ្ទេចខ្ទាំ	ប្រែជារឹងមាំបែរជាកល់
	ជើងសសរផ្ទះមាំឥតខ្វល់	ល្បីល្បាញឮដល់សព្វជាតិសាសន៍	។
២៣	ព្រះអង្គសម្រេចការអស្ចារ្យ	ដោយឫទ្ធិថ្លៃថ្លានៃអម្ចាស់
	អស្ចារ្យពេកក្រៃយើងឃើញច្បាស់	គួរស្ញប់ស្ញែងណាស់គួរគោរព	។
២៤	ថ្ងៃនេះជាថ្ងៃដែលព្រះម្ចាស់	កំណត់ទុកច្បាស់ឱ្យយើងឈប់
	នាំគ្នាសប្បាយកុំនៅជ្រប់	ខេត្តស្រុកភូមិគ្រប់អរទាំងអស់	។
២៥	ឱ! ព្រះអម្ចាស់សូមសង្គ្រោះ	ឱ្យខ្ញុំល្បីឈ្មោះមានសម្រស់
	មានជោគមានជ័យខ្លាំងឥតខ្ចោះ	យើងនឹកអាឡោះអាល័យណាស់	។
២៦	យើងសូមតម្កើងលើកព្រះអង្គ	ដែលយាងមកក្នុងនាមព្រះម្ចាស់
	យើងដែលស្ថិតក្នុងដំណាក់ព្រះ	សូមពរតេជះល្អប្រពៃ	។
២៧	ព្រះអម្ចាស់បានបំភ្លឺយើង	ភ្លឺផ្លេកច្បាស់ឡើងដូចពេលថ្ងៃ
	ធាងទន្សែយើងកាន់នៅដៃ	ហែក្បួនវែងក្រៃដល់អាសនៈ	។
២៨	ព្រះអង្គជាព្រះទូលបង្គំ	ផ្តល់ក្តីសុខុមឥតមានអាក់
	ខ្ញុំសូមតម្កើងដោយស្មោះស្ម័គ្រ	ដោយការជឿជាក់អស់ពីចិត្ត	។
២៩	ចូរលើកតម្កើងព្រះអម្ចាស់	ដ្បិតទ្រង់មានព្រះទ័យអាណិត
	សប្បុរសករុណាត្រង់សុចរិត	អស់កល្បស្ថេរស្ថិតរហូតទៅ	។

ទំនុកតម្កើងលេខ ១១៩ (១១៨) បទកាកគតិ

១	អ្នកណាដែលមាន	កិរិយាជាប់ប្រាណ	ត្រឹមត្រូវឥតខ្ចោះ
	ប្រតិបត្តិតាម	ធម្មវិន័យព្រះ	អ្នកនោះប្រទះ
		តែសុខមង្គល	។
២	អ្នកដែលប្រតិបត្តិ	តាមផ្លូវល្អពិត	បញ្ជានិម្មល
	ហើយស្វែងរកព្រះ	មិនខ្ជីខ្ជាខ្ជិល	ពិតជាបានផល
		មង្គលពេកហោង	។
៣	អ្នកនោះមិនធ្វើ	ប្រព្រឹត្តអំពើ	នាំឱ្យសៅហ្មង
	អាក្រក់អាប់អួ	តែគេដើរឆ្លង	តាមស្នាមគន្លង
		ព្រះអម្ចាស់វិញ	។
៤	ព្រះអង្គចេញច្បាប់	ដោយប្រកាសប្រាប់	ឱ្យយើងស្រឡាញ់
	យកចិត្តទុកដាក់	ព្យាយាមទន្ទេញ	ខិតខំបំពេញ
		ដានស្នាមព្រះអង្គ	។
៥	សូមជួយខ្ញុំផង	ឱ្យដូចបំណង	មានចិត្តរឹងប៉ឹង
	ដើម្បីប្រតិបត្តិ	តាមក្រឹត្យព្រះអង្គ	វិន័យត្រឹមត្រង់
		តាមទ្រង់បញ្ជា	។
៦	ប្រសិនដូច្នេះ	ពេលណាខ្ញុំត្រិះ	រិះពិចារណា
	វិន័យទាំងអស់	សព្វគ្រប់ប្រការ	នោះខ្ញុំនេះណា
		មិនខកបំណង	។
៧	ខ្ញុំសូមតម្កើង	ព្រះអង្គខ្ពស់ឡើង	ដោយចិត្តស្មោះត្រង់
	ដោយពិចារណា	ក្តីសុចរិតផង	ពេលដែលព្រះអង្គ
		សម្រេចឥតខ្ចោះ	។
៨	ខ្ញុំចង់កាន់តាម	វិន័យបំរាម	ដែលមានទាំងអស់
	តែសូមព្រះអង្គ	កុំប្រែបង់បោះ	ចោលខ្ញុំស្រឡះ
		ឱ្យសោះឡើយណា	។

សូមដូរទៅជាបទពាក្យ ៧

៩	តើពួកយុវជនធ្វើយ៉ាងណា	ឱ្យមានកិរិយាល្អត្រឹមត្រូវ
	គឺប្រតិបត្តិត្រង់តាមផ្លូវ	មាគ៌ាតទៅនៃព្រះអង្គ	។
១០	ខ្ញុំខំស្វះស្វែងមិនមានឈប់	ទោះថ្ងៃឬយប់ចិត្តតម្រង់
	កុំទុកឱ្យខ្ញុំនៅត្រមង់	វង្វេងវង្វាន់ពីវិន័យ	។
១១	ខ្ញុំសូមតាំងចិត្តថែរក្សា	បន្ទូលសន្យាដ៏ប្រពៃ
	នៅក្នុងចិត្តខ្ញុំមិនធ្វើអ្វី	ឱ្យទាស់ហឫទ័យទ្រង់ឡើយណា	។
១២	បពិត្រព្រះម្ចាស់ដ៏ឧត្តម	ទូលបង្គំខ្ញុំលើកហត្ថា
	តម្កើងព្រះអង្គសូមមេត្តា	បង្រៀនខ្ញុំណាស្គាល់វិន័យ	។
១៣	ខ្ញុំតែងតែពោលឥតឈរឈប់	រៀបរាប់សព្វគ្រប់នូវសេចក្តី
	ទាំងប៉ុន្មានដែលអម្ចាស់ថ្លៃ	សម្រេចព្រះទ័យផ្តល់ជាទាន	។
១៤	ទូលបង្គំត្រេកអរអនេក	ដោយបានពឹងផ្អែកដំបូន្មាន
	ប្រៀបដូចជាខ្ញុំទទួលបាន	សម្បត្តិថ្កើងថ្កានដ៏ស្តុកស្តម្ភ	។
១៥	ទូលបង្គំនឹងពិចារណា	ច្បាប់គ្រប់ប្រការទ្រង់ណែនាំ
	សញ្ជឹងពីមាគ៌ាឧត្តម	ព្រះអង្គរឹងមាំជាប់ជានិច្ច	។
១៦	ខ្ញុំពេញចិត្តណាស់នឹងវិន័យ	ព្រះអម្ចាស់ថ្លៃមិនមានភ្លេច
	បន្ទូលព្រះអង្គចាំជានិច្ច	ចាំគ្រប់ពាក្យពេចន៍មិនភ្លេចឡើយ	។
១៧	សូមសន្តោសខ្ញុំដែលជាអ្នក	បម្រើស្មោះស្ម័គ្រព្រះអង្គហើយ
	នោះជីវិតខ្ញុំបានធូរស្បើយ	មិននៅកន្តើយគោរពតាម	។
១៨	សូមទ្រង់បើកភ្នែកទូលបង្គំ	ពេលនោះរូបខ្ញុំនឹងឃើញស្នាម
	ឃើញភាពថ្លៃថ្នូរគ្មានប្រេះស្រាំ	អស្ចារ្យនៃធម្មវិន័យទ្រង់	។
១៩	ខ្ញុំស្នាក់នៅលើផែនដីនេះ	គឺគ្រាន់បណ្តោះមិនយូរលង់
	សូមកុំលាក់វិន័យព្រះអង្គ	បង្ហាញខ្ញុំផងសូមប្រណី	។
២០	ចិត្តទូលបង្គំតែងនឹកភ្នក	ផ្តោតចិត្តទៅរកសព្វសេចក្តី
	ដែលទ្រង់សម្រេចព្រះហឫទ័យ	ឱ្យជនប្រុសស្រីចាំជានិច្ច	។
២១	ព្រះអង្គគំរាមកំហែងមនុស្ស	ដែលអួតអាងខុសមានកលល្បិច
	ត្រូវបណ្តាសាជាប់ឥតភ្លេច	វង្វេងឆ្ងាយគេចពីវិន័យ	។
២២	សូមដកយកនូវការអាម៉ាស់	កុំឱ្យគេត្មះដៀលជេរស្តី
	ព្រោះទូលបង្គំកាន់វិន័យ	ដំបូន្មានថ្លៃឥតថ្លោះធ្លោយ	។
២៣	ទោះមេដឹកនាំខំប្រឆាំង	ពុះពាររារាំងខ្ញុំក៏ដោយ
	ខ្ញុំនៅសញ្ជឹងមិនកន្តើយ	ក្រឹត្យព្រះអង្គហើយជាប់ជានិច្ច	។
២៤	ខ្ញុំពេញចិត្តនឹងដំបូន្មាន	ឥតបីស្រាកស្រាន្តឥតកែគេច
	ដំបូន្មានទ្រង់ចាំងរំលេច	នាំផ្លូវជីវិតខ្ញុំសុខសាន្ត	។
២៥	ឥឡូវនេះខ្ញុំដុនដាបខ្លាំង	ឥតមានកម្លាំងស្ទើរក្ស័យប្រាណ
	សូមប្រោសឱ្យខ្ញុំរស់ឡើងបាន	តាមបន្ទូលថ្កានទ្រង់សន្យា	។
២៦	ខ្ញុំបានរៀបរាប់ពីជីវិត	ដំណើររឿងពិតគ្រប់ប្រការ
	ទ្រង់សណ្តាប់ហើយសូមមេត្តា	ឱ្យខ្ញុំនេះណាស្គាល់វិន័យ	។
២៧	ទាំងប្រោសប្រទានឱ្យខ្ញុំយល់	សព្វទាំងឫសគល់នូវអត្ថន័យ
	បញ្ជាព្រះអង្គខ្ញុំរំពៃ	ការអស្ចារ្យក្រៃទ្រង់ទាំងអស់	។
២៨	ខ្ញុំមានទុក្ខព្រួយយ៉ាងធំធេង	យំសោកសង្រេងមិនឈប់សោះ
	សូមលើកទឹកចិត្តឱ្យស្រស់បស់	តាមបន្ទូលព្រះអង្គសន្យា	។
២៩	សូមឱ្យខ្ញុំចៀសចាកចេញផុត	ឆ្ងាយពីពាក្យភូតភរឫស្យា
	សូមជួយបង្ហាញក្តីករុណា	វិន័យថ្លៃថ្លាឱ្យខ្ញុំស្គាល់	។
៣០	ខ្ញុំប្តេជ្ញាចិត្តជឿស្មោះត្រង់	ទៅលើព្រះអង្គឥតមានខ្វល់
	ជឿដោយចិត្តស្មោះឥតសេសសល់	តាមបង្គំគាល់ព្រះបញ្ជា	។
៣១	ខ្ញុំជំពាក់ចិត្តស្អិតអនេក	ដំបូន្មានឯកឥតរួញរា
	ឱ! ព្រះអម្ចាស់សូមមេត្តា	ខ្ញុំផុតទុក្ខាផុតអាម៉ាស់	។
៣២	ខ្ញុំខំយកចិត្តទុកដាក់នឹង	មាគ៌ាព្រះអង្គពន់ពេកណាស់
	ដ្បិតទ្រង់ប្រោសចិត្តខ្ញុំស្រឡះ	ឱ្យបានយល់ច្បាស់ភ្លឺថ្លាថ្លៃ	។
៣៣	ឱ! ព្រះម្ចាស់អើយសូមព្រះអង្គ	បង្ហាញខ្ញុំផងពីវិន័យ
	ឱ្យខ្ញុំកាន់តាមរៀងរាល់ថ្ងៃ	តាមព្រះវិន័យដោយស្ម័គ្រស្មោះ	។
៣៤	សូមព្រះប្រទាននូវប្រាជ្ញា	ឱ្យខ្ញុំភ្លឺថ្លាសព្វទាំងអស់
	របស់ព្រះអង្គកុំចន្លោះ	កាន់តាមឥតខ្ចោះដោយស្ម័គ្រចិត្ត	។
៣៥	សូមណែនាំខ្ញុំតាមមាគ៌ា	វិន័យធម្មាច្បាប់ក្រមក្រឹត្យ
	ដ្បិតខ្ញុំស្រឡាញ់ហើយពេញចិត្ត	វិន័យនោះពិតល្អត្រជាក់	។
៣៦	សូមទាក់ទាញចិត្តទូលបង្គំ	ឱ្យធ្វើតាមដំបូន្មានទ្រង់
	កុំឱ្យចិត្តខ្ញុំនៅរេរង់	ឬមានបំណងរកកម្រៃ	។
៣៧	សូមទាក់ទាញអារម្មណ៍ខ្ញុំឱ្យ	ងាកបកថយក្រោយចេញពីអ្វី
	ដែលគ្មានខ្លឹមសារមិនប្រពៃ	ជីវិតខ្ញុំថ្លៃព្រោះមាគ៌ា	។
៣៨	សូមសម្រេចមកទូលបង្គំ	បម្រើឧត្តមដ៏ថ្លៃថ្លា
	តាមព្រះបន្ទូលបានសន្យា	សម្រាប់់អ្នកណាកោតខ្លាចទ្រង់	។
៣៩	សូមការពារខ្ញុំកុំឱ្យគេ	មើលងាយដៀលជេរមិនទំនង
	ដ្បិតការសម្រេចនៃព្រះអង្គ	សុទ្ធតែត្រឹមត្រង់ត្រូវទាំងអស់	។
៤០	ខ្ញុំមានបំណងចង់ធ្វើតាម	វិន័យបំរាមល្អឥតខ្ចោះ
	ដោយក្តីសុចរិតព្រះអង្គនោះ	ជួយខ្ញុំឱ្យរស់ឡើងវិញផង	។
៤១	ឱព្រះម្ចាស់អើយសូមប្រណី	សម្តែងព្រះទ័យឥតមានហ្មង
	សង្គ្រោះមកទូលបង្គំផង	តាមបន្ទូលទ្រង់បានសន្យា	។
៤២	សូមឱ្យខ្ញុំអាចតប ត ឆ្លើយ	នឹងអ្នកណាហើយដែលមុសា
	ដ្បិតខ្ញុំសង្ឃឹមផ្ញើវាសនា	ជីវិតកាយាលើព្រះអង្គ	។
៤៣	សូមកុំបណ្តោយខ្ញុំស្រដី	ពាក្យមិនប្រពៃមិនត្រឹមត្រង់
	ដ្បិតខ្ញុំសង្ឃឹមលើព្រះអង្គ	ការសម្រេចទ្រង់ឥតសង្ស័យ	។
៤៤	ទូលបង្គំនឹងគោរពតាម	បញ្ញត្តិបំរាមទាំងវិន័យ
	របស់ព្រះអង្គរៀងរាល់ថ្ងៃ	ជានិច្ចលុះក្ស័យសូន្យជីវី	។
៤៥	ខ្ញុំចង់រស់នៅដោយមានន័យ	និងមានសេរីភាពពេញទី
	ដ្បិតទូលបង្គំស្វែងសំភី	រកច្បាប់គ្រប់ទីរបស់ទ្រង់	។
៤៦	ខ្ញុំនឹងថ្លែងពីដំបូន្មាន	គ្រប់ទិសទីស្ថានមិនបង្អង់
	ទូលស្តេចនានាទាំងអស់ផង	នោះរូបខ្ញុំនឹងមិនខ្មាសឡើយ	។
៤៧	ខ្ញុំពេញចិត្តណាស់នឹងវិន័យ	ពេញចិត្តរាល់ថ្ងៃមិនកន្តើយ
	ខ្ញុំស្រឡាញ់ណាស់ព្រះម្ចាស់អើយ	វិន័យនេះហើយខ្ញុំសុខសាន្ត	។
៤៨	ទូលបង្គំលើកដៃប្រណម្យ	គោរពទាំងព្រមមិនខកខាន
	ស្រឡាញ់វិន័យមិនស្រាកស្រាន្ត	ចង់គិតចង់បានក្រឹត្យវិន័យ	។

សូមដូរទៅជាបទកាកគតិ

៤៩	ឱព្រះអម្ចាស់	សូមនឹកដល់ព្រះ	បន្ទូលសន្យា
	ជាមួយនឹងខ្ញុំ	កុំបីប្រេះឆា	ជនគ្រប់កាយា
		សង្ឃឹមទុកចិត្ត	។
៥០	ពេលខ្ញុំមានទុក្ខ	នៅមិនស្រណុក	ព្រះអង្គអាណិត
	ឱ្យខ្ញុំធូរស្បើយ	ទាំងកាយទាំងចិត្ត	ធ្វើឱ្យជីវិត
		ខ្ញុំរស់វិញបាន	។
៥១	ទោះបីជនពាល	ចាក់រុកឆ្កឹះឆ្កៀល	ចំអកសាមាន្យ
	តែខ្ញុំមិនឃ្លាត	វិន័យថ្កើងថ្កាន	ឬចង់ប្រែប្រាណ
		ក្រឡាស់បំភ្លៃ	។
៥២	បពិត្រព្រះម្ចាស់	ខ្ញុំនឹកទ្រង់ណាស់	បន្ទូលថ្លាថ្លៃ
	សន្យាព្រះអង្គ	ពីដើមប្រពៃ	ខ្ញុំសុខឥតបី
		ទុក្ខសោករសាយ	។
៥៣	ពេលពួកមនុស្ស	ពាលមិនស្គាល់ខុស	ឱ្យខ្ញុំខ្វល់ខ្វាយ​​
	ចាក់រុកឆ្កឹះឆ្កៀល	ឱ្យក្តៅក្រហាយ	គេចង់កម្ចាយ
		វិន័យព្រះអង្គ	។
៥៤	ខ្ញុំស្នាក់អាស្រ័យ	នៅលើផែនដី	រាល់ថ្ងៃផ្ចិតផ្ចង់
	ខ្ញុំយកវិន័យ	របស់ព្រះអង្គ	មកច្នៃតម្រង់
		ធ្វើបទតម្កើង	។
៥៥	ព្រះអម្ចាស់អើយ	រាល់ពេលយប់ហើយ	ខ្ញុំរឭកឡើង
	ព្រះនាមព្រះអង្គ	ខ្ពង់ខ្ពស់ថ្កុំថ្កើង	វិន័យរុងរឿង
		ខ្ញុំប្រតិបត្តិតាម	។
៥៦	រូបខ្ញុំបានសុខ	មង្គលគ្រប់មុខ	ព្រោះតែបំរាម
	វិន័យបញ្ញត្តិ	ដែលទ្រង់បានហាម	ខ្ញុំខំធ្វើតាម
		មិនហ៊ានបំពាន	។

សូមដូរទៅជាបទពាក្យ ៧

៥៧	បពិត្រព្រះម្ចាស់អើយខ្ញុំសូម	បង្គំទូលព្រមព្រះអង្គថា
	ធ្វើតាមបញ្ជារកុំសាវា	ជាកេរថ្លៃថ្លារបស់ខ្ញុំ	។
៥៨	ខ្ញុំខិតខ្ញុំខំទាំងយប់ថ្ងៃ	ឱ្យ​គាប់ព្រះទ័យព្រះឧត្តម
	សូមត្រាប្រណីសន្តោសខ្ញុំ	តាមការទូលសុំទ្រង់សន្យា	។
៥៩	ខ្ញុំរិះគិតអំពីមារយាទ	គំនិតចោលម្សៀតឥតបានការ
	បោះជំហានត្រង់ចរយាត្រា	ឆ្ពោះឥតរួញរារកព្រះអង្គ	។
៦០	ប្រញាប់ប្រញាល់ប្រតិបត្តិ	តាមវិន័យក្រឹត្យឥតមានឆ្គង
	មិនធ្វេសប្រហែសមិនមានហ្មង	ដោយចិត្តស្ម័គ្រផងមិនរួញរា	។
៦១	ពួកជនអាក្រក់ធ្វើឱ្យខ្ញុំ	ជាប់អន្ទាក់រុំរបស់វា
	តែទូលបង្គំខំពុះពារ	គោរពមាគ៌ាច្បាប់ព្រះអង្គ	។
៦២	ពេលកណ្តាលយប់អ​​​ធ្រាតស្ងាត់	ខ្ញុំក្រោកថ្វាយថ្វាត់ដៃផ្ចិតផ្ចង់
	គោរពសរសើរថ្កើងព្រះអង្គ	សម្រេចត្រឹមត្រង់ល្អពេកកូវ	។
៦៣	ខ្ញុំរួមកាយចិត្តគំនិតជាក់	ជាមួយអស់អ្នកល្អត្រឹមត្រូវ
	គឺអ្នកដែលប្រព្រឹត្តតាមផ្លូវ	មាគ៌ាត្រឹមត្រូវព្រះនៃយើង	។
៦៤	ផែនដីពេញដោយព្រះហឫទ័យ	ព្រះម្ចាស់ថ្លើមថ្លៃក៏ថ្កានថ្កើង
	សូមទ្រង់បង្រៀនវិន័យផង	ព្រះនាមព្រះអង្គឱ្យខ្ញុំស្គាល់	។
៦៥	បពិត្រព្រះអម្ចាស់ខ្ញុំអើយ	ទ្រង់សន្តោសហើយខ្ញុំមិនខ្វល់
	ខ្ញុំអ្នកបម្រើបង្គំគាល់	តាមព្រះបន្ទូលទ្រង់សន្យា	។
៦៦	សូមប្រោសប្រណីឱ្យខ្ញុំចេះ	គិតគូរវៃឈ្លាសមានប្រាជ្ញា
	ឱ្យស្គាល់វិន័យសព្វប្រការ	ដ្បិតខ្ញុំនេះណាមិនក្រឡាស់	។
៦៧	កាលគ្រាមុននោះខ្ញុំវង្វេង	កណ្តោចកណ្តែងវេទនាណាស់
	តែឥឡូវនេះខ្ញុំយល់ច្បាស់	ខ្ញុំខំរួតរះតាមបញ្ជា	។
៦៨	ទ្រង់មានព្រះទ័យសប្បុរស	ករុណាសន្តោសមនុស្សនានា
	សូមទ្រង់បង្រៀនក្រឹត្យធម្មា	វិន័យបញ្ជាតរៀងទៅ	។
៦៩	អ្នកអួតបំប៉ោងនាំគ្នាជុំ	បង្ខូចឈ្មោះខ្ញុំឱ្យអាស្រូវ
	តែទូលបង្គំឆ្ពោះសំដៅ	ដើរទៅតាមផ្លូវច្បាស់ព្រះអង្គ	។
៧០	ពួកគេជាអ្នកដែលគ្មានចិត្ត	មិនចេះរិះគិតដ្បិតគេល្ងង់
	ឯខ្ញុំពេញចិត្តឥតរេរង់	វិន័យព្រះអង្គល្អត្រចះ	។
៧១	ទូលបង្គំរងទុក្ខវេទនា	នោះក៏គឺជាប្រពៃណាស់
	ដើម្បីខ្ញុំបានរៀនឱ្យច្បាស់	ពីវិន័យព្រះដ៏ថ្លាថ្លៃ	។
៧២	ធម្មវិន័យដែលព្រះអង្គបាន	ប្រកាសឱ្យកាន់មានតម្លៃ
	ប្រសើរជាងមាសពេជ្រចរណៃ	ជាងប្រាក់ក្រាស់ក្រៃច្រើនលើសលប់	។
៧៣	ព្រះអង្គបង្កើតទូលបង្គំ	ឱ្យបានរឹងមាំមានសព្វគ្រប់
	សូមឱ្យមានទាំងប្រាជ្ញាគាប់	បានសិក្សាច្បាប់វិន័យផង	។
៧៤	អ្នកដែលគោរពកោតខ្លាចព្រះ	បានឃើញខ្ញុំច្បាស់ឥតមូរហ្មង
	គេនឹងសប្បាយពេកកន្លង	ជីវិតខ្ញុំផងផ្ញើលើព្រះ	។
៧៥	បពិត្រព្រះម្ចាស់អើយខ្ញុំស្គាល់	ខ្ញុំដឹងខ្ញុំយល់ថាព្រះម្ចាស់
	សម្រេចពីអ្វីសុចរិតច្បាស់	ទ្រង់ដាក់ទោសណាស់ក៏ត្រឹមត្រូវ	។
៧៦	សូមទ្រង់មេត្តាជួយសម្រាល	ទុក្ខខ្ញុំឱ្យស្រាលកុំឱ្យនៅ
	តាមទ្រង់សន្យាកុំហ្មងសៅ	ដល់ខ្ញុំដែលត្រូវជាបម្រើ	។
៧៧	សូមទ្រង់បង្ហាញធម៌មេត្តា	ឱ្យមានជីវ៉ារស់គ្រាន់បើ
	លើលោកីយ៍នេះខ្ញុំបម្រើ	តាមវិន័យធម៌ដោយរីករាយ	។
៧៨	ឱ្យអ្នកអួតអាងត្រូវអាម៉ាស់	ដ្បិតគេពោលផ្តាសពាក្យមើលងាយ
	បង្កាច់រូបខ្ញុំឱ្យអន្តរាយ	ឯខ្ញុំមិនណាយពីច្បាប់ទ្រង់	។
៧៩	សូមអ្នកគោរពព្រះមកជុំ	នាំគ្នារកខ្ញុំកុំបង្អង់
	ឱ្យខ្ញុំស្គាល់ពាក្យទូន្មានផង	របស់ព្រះអង្គល្អពេកក្រៃ	។
៨០	សូមជួយរូបខ្ញុំឱ្យប្រព្រឹត្ត	តាមវិន័យក្រឹត្យរៀងរាល់ថ្ងៃ
	បានល្អឥតខ្ចោះមិនក្រឡៃ	រូបខ្ញុំគ្មានថ្ងៃត្រូវខ្មាសគេ	។
៨១	ខ្ញុំទន្ទឹងចាំព្រះសង្គ្រោះ	ជាព្រះរបស់ខ្ញុំគ្មានល្ហែ
	រូបខ្ញុំពឹងលើរាល់ថ្ងៃខែ	សង្ឃឹមឥតប្រែលើព្រះអង្គ	។
៨២	ខ្ញុំខិតខំប្រឹងនៅរង់ចាំ	បន្ទូលឧត្តមរបស់ទ្រង់
	តើពេលណាទៅទើបព្រះអង្គ	សម្រាលទុក្ខផងខ្ញុំល្ហែល្ហើយ	។
៨៣	រូបខ្ញុំជាអ្នកគ្មានគេរាប់	រស់នៅអភ័ព្វណាស់ព្រះអើយ
	ចាំតែវិន័យមិនកន្តើយ	ឥតមានភ្លេចឡើយលុះមរណា	។
៨៤	តើឱ្យរូបខ្ញុំទ្រាំម្តេចកើត	ឬទ្រាំរហូតសូន្យសង្ខា
	ម្តេចទ្រង់មិនប្រទេចផ្តាសា	ដាក់ទោសជនណាដែលសាមាន្យ	។
៨៥	អ្នកមិនគោរពច្បាប់វិន័យ	គេចង់ធ្វើអ្វីដែលរំខាន
	គេជីករណ្តៅចាំរុញច្រាន	ឱ្យខ្ញុំក្ស័យប្រាណនៅក្នុងនោះ	។
៨៦	វិន័យព្រះអង្គសុទ្ធតែពិត	សូមទ្រង់អាណិតប្រណីប្រោស
	សូមជួយរូបខ្ញុំនេះផងចុះ	គេបៀតបៀនហួសគ្មានហេតុផល	។
៨៧	នៅតែបន្តិចគេប្រហារ	ឱ្យខ្ញុំមរណាមិនទុកសល់
	តែទូលបង្គំមិនខ្វាយខ្វល់	ឬមានកិច្ចកលចោលវិន័យ	។
៨៨	សូមប្រទានខ្ញុំមានជីវិត	រស់ឡើងវិញពិតដោយហឫទ័យ
	មេត្តាករុណាល្អប្រពៃ	ព្រះបន្ទូលថ្លៃខ្ញុំប្រតិបត្តិ	។
៨៩	បពិត្រព្រះម្ចាស់ព្រះបន្ទូល	គង់វង្សមុតមូលមិនខ្ចាយខ្ចាត់
	នៅស្ថានបរមសុខមិនរលត់	អស់កល្បរហូតតរៀងទៅ	។
៩០	ព្រះអង្គមានព្រះទ័យស្ម័គ្រស្មោះ	ប្រសើរសប្បុរសមិនអាស្រូវ
	ព្រះអង្គតែងតាំងផែនដីនៅ	រឹងប៉ឹងពេកកូវនៅស្ងប់ស្ងៀម	។
៩១	អ្វីៗទាំងអស់សព្វសារពើ	ឥតប្រែប្រួលរើឬស្វិតក្រៀម
	មកដល់សព្វថ្ងៃឥតលាក់លៀម	សុទ្ធតែនៅក្រោមអំណាចព្រះ	។
៩២	បើទូលបង្គំមិនពេញចិត្ត	នឹងវិន័យក្រឹត្យព្រះជាម្ចាស់
	នោះខ្ញុំមុខជារងទុក្ខទោស	វេទនារងគ្រោះលុះក្សិណក្ស័យ	។
៩៣	ខ្ញុំមិនដែលភ្លេចច្បាប់ព្រះអង្គ	ទាំងវិន័យផងដ៏ប្រពៃ
	ដោយសារតែច្បាប់នេះឯងហើយ	ទ្រង់ប្រទានឱ្យមានជីវិត	។
៩៤	ជីវិតខ្ញុំផ្ញើរលើព្រះអង្គ	តម្រែតម្រង់តាមឱវាទ
	ដ្បិតទូលបង្គំតែងឈ្លបឆ្លៀត	មិនបង់មារយាទរកច្បាប់ផង	។
៩៥	មានជនអាក្រក់ជនពាលា	វាចង់ផ្តន្ទាខ្ញុំតែម្តង
	តែខ្ញុំនៅតែគិតបំណង	រកច្បាប់ព្រះអង្គនិងវិន័យ	។
៩៦	ខ្ញុំយល់ឃើញថាគ្រប់ទាំងអស់	ដែលល្អឥតខ្ចោះនិងអ្វីៗ
	គង់មានដើមចុងមានចាស់ថ្មី	ឯព្រះវិន័យគ្មានព្រំដែន	។

សូមដូរទៅជាបទកាកគតិ

៩៧	ខ្ញុំសែនពេញចិត្ត	វិន័យក្រមក្រឹត្យ	របស់ព្រះអង្គ
	ខ្ញុំតែងសញ្ជឹង	ពីវិន័យទ្រង់	សព្វប្រការផង
		ជារៀងរាល់ថ្ងៃ	។
៩៨	វិន័យព្រះអង្គ	ឱ្យខ្ញុំត្រឹមត្រង់	ប្រាជ្ញាវាងវៃ
	ជាងពួកសត្រូវ	ដ្បិតខ្ញុំលកលៃ	រិះគិតរំពៃ
		ពីវិន័យនេះ	។
៩៩	ខ្ញុំវាងវៃឆ្លាត	ជាងគ្រូទៅទៀត	ព្រោះតែខ្ញុំចេះ
	យកដំបូន្មាន	ទាំងប៉ុន្មាននេះ	មកសញ្ជឹងរិះ
		គិតពិចារណា	។
១០០	កាន់តាមបញ្ញត្ដិ	វិន័យមិនបាត់	ខ្ញុំយល់ឃើញថា
	មានប្រាជ្ញវាងវៃ	ជាងយាយជាងតា	ទោះចាស់យ៉ាងណា
		មិនដល់ខ្ញុំសោះ	។
១០១	ខ្ញុំគេចឱ្យឆ្ងាយ	ពីផ្លូវអន្តរាយ	អាក្រក់ទាំងអស់
	គេចចេញឱ្យផុត	ប្រព្រឹត្តតាមព្រះ	បន្ទូលអម្ចាស់
		នៅជាប់ស្ថិតស្ថេរ	។
១០២	ខ្ញុំមិនងាកគេច	អ្វីទ្រង់សម្រេច	ត្រឹមត្រូវឥតប្រែ
	ដ្បិតទ្រង់ប្រដៅ	ខ្ញុំរាល់ថ្ងៃខែ	ខ្ញុំមិនគេចកែ
		ចាកចោលទ្រង់ឡើយ	។
១០៣	បញ្ជានេះណា	ប្រៀបបានអាហារ	ឆ្ងាញ់ពិសេសហើយ
	សម្រាប់រូបខ្ញុំ	គ្មានអ្វីស្មើឡើយ	ផ្អែមណាស់ព្រះអើយ
		លើសទឹកឃ្មុំផង	។
១០៤	គឺធម្មវិន័យ	របស់ម្ចាស់ថ្លៃ	ធ្វើឱ្យខ្ញុំត្រង់
	ចេះពិចារណា	រិះគិតឥតឆ្គង	ស្អប់ផ្លូវសៅហ្មង
		វៀចវេរបោកប្រាស	។
១០៥	បន្ទូលព្រះអង្គ	គឺជាចង្កៀង	ខ្ញុំបានឃើញច្បាស់
	ពិតជាពន្លឺ	ត្រចង់ត្រចះ	ឃើញផ្លូវស្រឡះ
		ឱ្យខ្ញុំសុខសាន្ត	។
១០៦	ខ្ញុំសូមសន្យា	ឥតងាករេថា	ធ្វើតាមមិនខាន
	ខ្ញុំនឹងប្រតិបត្តិ	សេចក្តីប៉ុន្មាន	សុចរិតថ្កើងថ្កាន
		របស់ព្រះអង្គ	។
១០៧	បពិត្រព្រះម្ចាស់	ខ្ញុំវេទនាណាស់	សូមប្រោសខ្ញុំផង
	ឱ្យមានជីវិត	សូមកុំបោះបង់	ជួយឱ្យរស់ផង
		តាមទ្រង់សន្យា	។
១០៨	ឱ! ព្រះអម្ចាស់	សូមទទួលត្រាស់​	ពាក្យខ្ញុំនេះណា
	ចាត់ដូចតង្វាយ	ដាក់ថ្វាយក្សត្រា	ឱ្យស្គាល់បញ្ជា
		វិន័យម្ចាស់ថ្លៃ	។
១០៩	ខ្សែជីវិតខ្ញុំ	ប្រឈមមុខចំ	នឹងក្តីអន្តរាយ
	តែខ្ញុំមិនភ្លេច	ពីធម្មវិន័យ	ចងចាំរាល់ថ្ងៃ
		ឥតបីងាករេ	។
១១០	មានជនអាក្រក់	គេលបចាំដាក់	អន្ទាក់ឥតល្ហែ
	ចាប់ទូលបង្គំ	រាល់ឆ្នាំថ្ងៃខែ	ក៏ខ្ញុំមិនប្រែ
		ពីច្បាប់ព្រះអង្គ	។
១១១	ពាក្យដំបូន្មាន	ព្រះបានប្រទាន	ជាកេរផូរផង់
	ឱ្យទូលបង្គំ	រីករាយកន្លង	មានអំណរផង
		នៅក្នុងដួងចិត្ត	។
១១២	ខ្ញុំសូមប្តេជ្ញា	ធ្វើតាមបញ្ជា	វិន័យក្រមក្រឹត្យ
	របស់ព្រះអង្គ	ដោយអស់ពីចិត្ត	លុះទីបំផុត
		ជីវិតក្សិណក្ស័យ	។
១១៣	ខ្ញុំស្អប់មនុស្ស	អាក្រក់ទុរយស	មានចិត្តពីរបី
	តែខ្ញុំស្រឡាញ់	ព្រះធម្មវិន័យ	ព្រះអម្ចាស់ថ្លៃ
		គ្មានថ្ងៃភ្លេចឡើយ	។
១១៤	ទ្រង់ជាជម្រក	ជាខែលឱ្យជ្រក	ផុតទុក្ខល្ហែល្ហើយ
	សូមផ្ញើជីវិត	លើព្រះម្ចាស់ហើយ	សូមកុំកន្តើយ
		ទទួលយកផង	។
១១៥	ជនអាក្រក់អើយ	បើអ្នកចេញឆ្ងាយ	ខ្ញុំអស់សៅហ្មង
	ឱ្យខ្ញុំប្រតិបត្តិ	វិន័យព្រះផង	ល្អល្អះឥតហ្មង
		ជាព្រះនៃខ្ញុំ	។
១១៦	សូមព្រះអង្គជួយ	គាំទ្រលើកស្ទួយ	ជួយទូលបង្គំ
	តាមព្រះបន្ទូល	បញ្ជាមកខ្ញុំ	កុំឱ្យសង្ឃឹម
		ខ្ញុំប្រែខកចិត្ត	។
១១៧	សូមធ្វើបង្អែក	កុំបីរារែក	ខ្ញុំមានជីវិត
	ខ្ញុំនឹងតម្រង់	ខំផ្ចង់ទាំងចិត្ត	រកវិន័យក្រឹត្យ
		របស់ព្រះម្ចាស់	។
១១៨	ព្រះអង្គមិនលះ	បង់ចោលអស់អ្នក	ដែលវេទនាប្រាស
	ពីក្រឹត្យវិន័យ	នៃព្រះជាម្ចាស់	ធ្វើអ្វីទាំងអស់
		ជាការកុហក	។
១១៩	ពួកអាក្រក់នោះ	ព្រះអង្គផាត់អស់	មិនមានសល់ទុក
	ដូចជាសំរាម	គ្មានអ្វីសោយសោក	ហេតុនេះខ្ញុំយក
		ដំបូន្មានទ្រង់	។
១២០	រូបកាយខ្ញុំភ័យ	ញ័រអស់ជើងដៃ	ដោយខ្លាចព្រះអង្គ
	ទូលបង្គំកោត	សេចក្តីត្រឹមត្រង់	អ្វីដែលព្រះអង្គ
		បានសម្រេចយក	។
១២១	ខ្ញុំខំប្រព្រឹត្ត	អំពើសុចរិត	យុត្តិធម៌រៀងមក
	កុំឱ្យខ្ញុំធ្លាក់	រណ្តៅលាមក	កុំឱ្យជួយអ្នក
		សង្កត់សង្កិន	។
១២២	សូមជួយធានា	រូបខ្ញុំដែលជា	អ្នកបម្រើទ្រង់
	បានសេចក្តីសុខ	ក្សេមក្សាន្តយូរលង់	អ្នកអួតបំប៉ោង
		កុំមកជិះជាន់	។
១២៣	យើងខ្ញុំទន្ទឹង	រង់ចាំព្រះអង្គ	សង្គ្រោះបន្ទាន់
	បញ្ជានេះណា	កាលពីគ្រាមុន	មិននៅទំរន់
		ខ្ញុំចងចាំគិត	។
១២៤	សូមទ្រង់មេត្តា	ផ្តល់ក្តីករុណា	អាសូរអាណិត
	មេត្តាប្រទាន	បង្រៀនទាំងក្រឹត្យ	វិន័យនោះពិត
		ឱ្យខ្ញុំស្គាល់ផង	។
១២៥	សូមមេត្តាព្រះ	ប្រទានខ្ញុំចេះ	កុំនៅបង្អង់
	ចេះពិចារណា	ខុសត្រូវឆ្គាំឆ្គង	ដំបូន្មានផង
		ទ្រង់ទូន្មានខ្ញុំ	។
១២៦	បពិត្រម្ចាស់អើយ	ក្នុងពេលនេះហើយ	ជួយទូលបង្គំ
	ដ្បិតគេរំលោភ	វិន័យព្រះអង្គ	កុំបីរេរង់
		បង្អង់កែគេច	។
១២៧	ខ្ញុំស្រឡាញ់ព្រះ	វិន័យអម្ចាស់	ពេកក្រៃមិនភ្លេច
	ស្រឡាញ់ជាងមាស	រស្មីរំលេច	ជាងប្រាក់ជាងពេជ្រ
		ទាំងឡាយទៅទៀត	។
១២៨	យើងខ្ញុំយល់ថា	ច្បាប់គ្រប់ប្រការ	ឥតបីឃ្លាងឃ្លាត
	សុទ្ធតែត្រឹមត្រូវ	ឥតមានរវាត	ខ្ញុំតែងឈ្លបឆ្លៀត
		ត្រងត្រាប់គ្រប់យ៉ាង	។

សូមដូរទៅជាបទពាក្យ ៧

១២៩	ដំបូន្មាននៃព្រះអម្ចាស់	ល្អវិសេសណាស់គ្រប់ពាក្យពេចន៍
	ហេតុនេះខ្ញុំធ្វើតាមជានិច្ច	ឥតបីមានភ្លេចភ្លាត់របេះ	។
១៣០	ការស្វែងរកព្រះបន្ទូលទ្រង់	ឱ្យចិត្តភ្លឺស្វាងប្រាកដណាស់
	ហើយធ្វើឱ្យអ្នកទន់ទាបចេះ	ពិចារណាត្រិះរិះគូរគិត	។
១៣១	ខ្ញុំខំយកចិត្តទុកដាក់ស្តាប់	ដោយក្តីត្រង់ត្រាប់អស់ពីចិត្ត
	ដ្បិតខ្ញុំចង់ស្គាល់វិន័យក្រឹត្យ	ព្រះម្ចាស់ពេកពិតឥតមានណាយ	។
១៣២	សូមបែរព្រះភក្ត្រទតមកខ្ញុំ	សូមប្រណីកុំបីរសាយ
	ដូចទ្រង់ប្រណីជនទាំងឡាយ	ធ្លាប់ស្មោះឱនកាយថ្វាយព្រះអង្គ	។
១៣៣	សូមជួយពង្រឹងទូលបង្គំ	មានចិត្តរឹងមាំមិនឃ្លេងឃ្លោង
	កុំបណ្តោយខ្ញុំធ្លាក់ទៅក្នុង	រណ្តៅអន្លង់​​​​​​​ជ្រោះជ្រៅឡើយ	។
១៣៤	សូមជួយរំដោះខ្ញុំឱ្យរួច	ពីអ្នកខិលខូចខ្ញុំបានស្បើយ
	អ្នកដែលជិះជាន់ឈប់មានហើយ	ខ្ញុំមិនកន្តើយធ្វើតាមច្បាប់	។
១៣៥	សូមទ្រង់សម្តែងព្រះហឫទ័យ	អាណិតប្រណីមកឆាប់ៗ
	អ្នកបម្រើទ្រង់ឱ្យចេះច្បាប់	វិន័យគ្រប់សព្វបានភ្លឺស្វាង	។
១៣៦	ទឹកភ្នែកខ្ញុំហូរឥតស្រាន្តស្រាក	យំឥតសម្រាកជាតឹកតាង
	ដោយខ្ញុំឃើញអ្នកគ្មានទីអាង	មិនគោរពតាមធម្មវិន័យ	។
១៣៧	បពិត្រព្រះជាអម្ចាស់អើយ	ទ្រង់ប្រកបដោយសុចរិតក្រៃ
	សេចក្តីសម្រេចទ្រង់ថ្លាថ្លៃ	ត្រឹមត្រូវប្រពៃពេកកន្លង	។
១៣៨	ព្រះជាអម្ចាស់បានប្រទាន	នូវដំបូន្មានល្អហ្មត់ហ្មង
	សុចរិតត្រឹមត្រូវពេកកន្លង	ឥតមានឆ្គាំឆ្គងសោះឡើយណា	។
១៣៩	ខ្ញុំសែនក្តួលក្តៅមួម៉ៅខ្លាំង	ដោយឃើញពួកខ្មាំងចិត្តឫស្យា
	បំភ្លេចព្រះបន្ទូលនោះណា	សូមទ្រង់មេត្តាជួយតតាំង	។
១៤០	បន្ទូលបញ្ជោពោលចេញជាក់	ឥតលៀមឥតលាក់ឥតកំបាំង
	ទូលបង្គំអ្នកបម្រើទ្រង់	ស្រឡាញ់យ៉ាងខ្លាំងបន្ទូលនេះ	។
១៤១	ខ្ញុំជាមនុស្សក្រតូចតាច	គ្មានទាំងអំណាចគ្មានសក្តិយស
	តែខ្ញុំនៅចាំមិនភ្លេចសោះ	ពីច្បាប់ទាំងអស់ស្មោះឥតស្បើយ	។
១៤២	សេចក្តីសុចរិតនៃព្រះអង្គ	ស្ថិតស្ថេរយូរលង់អស់កល្បហើយ
	ទោះធម្មវិន័យទ្រង់ក៏ដោយ	សុទ្ធតែនាំឱ្យប្រពៃពិត	។
១៤៣	ខ្ញុំកើតទោសទុក្ខធំក្រៃលែង	អន្ទះអន្ទែងចំបែងចិត្ត
	វិន័យព្រះអង្គខ្ញុំនែបនិត្យ	មានក្តីសុខពិតឥតសោយសោក	។
១៤៤	ដំបូន្មានទ្រង់សុចរិត	អស់កល្បអស់កប្បអង្វែងមក
	សូមប្រទានឱ្យខ្ញុំចេះរក	ពិចារណារយកការខុសត្រូវ	។
១៤៥	ខ្ញុំសូមអង្វរព្រះអម្ចាស់	ព្រះអង្គជាព្រះល្អពេកកូវ
	សូមឆ្លើយមកខ្ញុំកុំទុកនៅ	ខ្ញុំប្រព្រឹត្តត្រូវតាមវិន័យ	។
១៤៦	យើងខ្ញុំអង្វរសូមព្រះអង្គ	សូមសង្គ្រោះផងប្រញាប់ខ្មី
	ខ្ញុំធ្វើតាមមិនបង្អង់អី	ពាក្យពេចន៍ថ្លាថ្លៃនៃព្រះអង្គ	។
១៤៧	ខ្ញុំខំស្រែកទួញអង្វរព្រះ	មុនពេលថ្ងៃរះទៅទៀតផង
	ទន្ទឹងរង់ចាំមិនមានហ្មង	ស្តាប់ពាក្យព្រះអង្គមានបន្ទូល	។
១៤៨	ខ្ញុំខំសញ្ជឹងនឹករិះគិត	ព្រះបន្ទូលពិតដែលទ្រង់ពោល
	បញ្ជាមកខ្ញុំនៅផុសថ្គោល	គឺព្រះបន្ទូលមុនភ្លឺច្បាស់	។
១៤៩	សូមស្តាប់ពាក្យដែលខ្ញុំអង្វរ	ដោយករុណាធម៌ដ៏ត្រចះ
	ឱព្រះម្ចាស់អើយជួយឱ្យរស់	តាមការទាំងអស់ទ្រង់សម្រេច	។
១៥០	ពួកអ្នកឃ្លាតចាកពីវិន័យ	ធម៌ព្រះម្ចាស់ថ្លៃគេមានល្បិច
	ខិតចូលមកជិតខ្ញុំជានិច្ច	ចិត្តគេគួចកិច្ចគុំកម្លៅ	។
១៥១	បពិត្រព្រះម្ចាស់ពេលទ្រង់គង់	នៅជិតរូបខ្ញុំសែនកក់ក្តៅ
	វិន័យទាំងអស់ទ្រង់ប្រដៅ	សែនត្រង់ត្រឹមត្រូវឥតមានខ្ចោះ	។
១៥២	យើខ្ញុំបានដឹងច្បាស់ហើយថា	តាំងពីដូនតាមកហើយនោះ
	ដំបូន្មានទ្រង់ល្អឥតខ្ចោះ	គង់វង្សនៅអស់កល្បយូរយារ	។
១៥៣	សូមព្រះអង្គទតមើលឱ្យច្បាស់	ខ្ញុំរងទុក្ខទោសសោកគ្រាំគ្រា
	សូមរំដោះខ្ញុំផុតវេរា	មិនភ្លេចធម្មាក្រឹត្យវិន័យ	។
១៥៤	សូមរកយុត្តិធម៌ឱ្យរូបខ្ញុំ	ការពារអប់រំដោយប្រណី
	ឱ្យមានជីវិតរស់ជាថ្មី	ដោយបន្ទូលថ្លៃថាប្រទាន	។
១៥៥	ព្រះអង្គទ្រង់មិនសង្គ្រោះអ្នក	ដែលមិនជឿជាក់ចិត្តសាមាន្យ
	មិនកាន់វិន័យល្អថ្កើងថ្កាន	គេធ្វើមិនបានតាមបញ្ញត្តិ	។
១៥៦	បពិត្រព្រះម្ចាស់អើយព្រះអង្គ	ព្រះហឫទ័យត្រង់តែងអាណិត
	សូមប្រោសឱ្យខ្ញុំមានជីវិត	តាមក្តីសម្រេចនោះឡើងវិញ	។
១៥៧	អ្នកដែលបៀតបៀនទូលបង្គំ	មានចិត្តគួនគុំខ្ញុំជ្រក់ជ្រេញ
	តែខ្ញុំមិនព្រមឃ្លាតបែកចេញ	វិន័យពោរពេញសែនវិសុទ្ធ	។
១៥៨	ពេលដែលខ្ញុំឃើញជនទុរយស	ខ្ញុំសែនទើសទាស់ពេញក្នុងចិត្ត
	ដ្បិតគេមិនធ្វើតាមបែបបទ	បន្ទូលវិសុទ្ធព្រះអង្គទេ	។
១៥៩	សូមព្រះអម្ចាស់ឈ្វេងយល់ថា	រូបខ្ញុំនេះណាគ្មានកែប្រែ
	ស្រឡាញ់ច្បាប់ទ្រង់គ្មានពេលល្ហែ	សូមប្រទានតែជីវិតផង	។
១៦០	បន្ទូលព្រះអង្គសុទ្ធតែពិត	ពេញដោយសុចរិតទៀងស្មោះត្រង់
	ការវិនិច្ឆ័យល្អកន្លង	ស្ថិតស្ថេរយូរលង់អស់កប្បកល្ប	។
១៦១	ពួកអ្នកដឹកនាំបៀតបៀនខ្ញុំ	ដោយមិនសក្តិសមគ្មានហេតុផល
	ខ្ញុំឥតមានព្រួយឥតខ្វាយខ្វល់	មានតែបន្ទូលទើបខ្ញុំខ្លាច	។
១៦២	ខ្ញុំរីករាយចិត្តនឹងទទួល	បញ្ជាទ្រង់ផ្ទាល់ដែលសម្រេច
	ដូចអ្នកទទួលបានមាសពេជ្រ	ជ័យភណ្ឌរំលេចថ្លៃពន់ពេក	។
១៦៣	ខ្ញុំស្អប់ខ្ពើមការបោកកុហក	ភូតភរគម្រក់ខ្លាំងអនេក
	ដ្បិតខ្ញុំស្រឡាញ់នឹកឃ្លានស្រេក	ធម្មវិន័យពេកព្រះអង្គថ្លៃ	។
១៦៤	ខ្ញុំសូមសរសើរកោតព្រះអង្គ	បានប្រាំពីរដងក្នុងមួយថ្ងៃ
	អ្វីទ្រង់សម្រេចល្អប្រពៃ	សុចរិតពេកក្រៃមិនប្រែប្រួល	។
១៦៥	អ្នកណាស្រឡាញ់វិន័យធម៌	នឹងមានជោគល្អហើយទទួល
	បានក្តីសុខសាន្តរស់នៅស្រួល	មិនជួបភ័យជ្រួលបានថ្កើងថ្កាន	។
១៦៦	ខ្ញុំជឿសង្ឃឹមថាព្រះម្ចាស់	មុខជាសង្គ្រោះខ្ញុំពុំខាន
	ខ្ញុំសូមប្រព្រឹត្តតាមស្នាមដាន	វិន័យថ្កើងថ្កាននៃព្រះអង្គ	។
១៦៧	ខ្ញុំប្រព្រឹត្តតាមដំបូន្មាន	ខកខានមិនហ៊ានគឺស្មោះត្រង់
	ស្រឡាញ់ដំបូន្មានព្រះអង្គ	ឥតមានវាងវង់ឬកលកិច្ច	។
១៦៨	ទូលបង្គំប្រព្រឹត្តតាមច្បាប់	បញ្ជាបង្គាប់មិនមានភ្លេច
	អ្វីដែលខ្ញុំធ្វើទ្រង់ជ្រាបខ្ទេច	ឥតមានស្រពេចស្រពិលឡើយ	។

សូមដូរទៅជាបទកាកគតិ

១៦៩	ឱ! ព្រះអម្ចាស់	សូមសណ្តាប់ច្បាស់	សំឡេងខ្លាំងល្វើយ
	ដែលខ្ញុំបានស្រែក	ទ្រង់សណ្តាប់ហើយ	សូមប្រទានឱ្យ
		ខ្ញុំចេះរិះគិត	។
១៧០	សូមពាក្យទទូច	អង្វរថ្ងូរថ្ងួច	លាន់ឮទៅជិត
	សូមជួយរំដោះ	ឱ្យរួចជីវិត	តាមបន្ទូលពិត
		សន្យាទ្រង់ផង	។
១៧១	សូមឱ្យរូបខ្ញុំ	ពោលពាក្យឧត្តម	សរសើរព្រះអង្គ
	ដ្បិតទ្រង់បង្រៀន	វិន័យថ្កុំថ្កើង	របស់ព្រះអង្គ
		ខ្ញុំបានយល់ច្បាស់	។
១៧២	ខ្ញុំនឹងស្រែកច្រៀង	បន្លឺសំនៀង	សរសើរដល់ព្រះ
	បន្ទូលសន្យា	សក្តិសមឥតខ្ចោះ	ធម្មវិន័យនោះ
		សុចរិតកន្លង	។
១៧៣	សូមសម្តែងព្រះ	បារមីទាំងអស់	ហើយសង្គ្រោះផង
	ដ្បិតទូលបង្គំ	សម្រេចបំណង	តាមច្បាប់ព្រះអង្គ
		មិនគេចកែឡើយ	។
១៧៤	បពិត្រព្រះម្ចាស់	ខ្ញុំចង់ឱ្យព្រះ	សង្គ្រោះផុតក្ស័យ
	ខ្ញុំពេញចិត្តណាស់	នឹងធម្មវិន័យ	ជារៀងរាល់ថ្ងៃ
		ពុំមានស្រាកស្រាន្ត	។
១៧៥	សូមឱ្យជីវិត	ខ្ញុំនៅរស់ពិត	ដើម្បីនឹងបាន
	សរសើរតម្កើង	ព្រះដ៏ថ្កើងថ្កាន	សេចក្តីប៉ុន្មាន
		ជួយលើកទឹកចិត្ត	។
១៧៦	ខ្ញុំដើរដូចសត្វ	ចៀមវង្វេងបាត់	សូមយាងនែបនិត្យ
	មករកខ្ញុំជា	បម្រើស្មោះពិត	ដ្បិតខ្ញុំមិនភ្លាត់
		ភ្លេចវិន័យទ្រង់	។

ទំនុកតម្កើងលេខ ១២០ (១១៩) បទព្រហ្មគីតិ

១	ពេលខ្ញុំមានអាសន្ន	ភ័យស្លោស្លន់ខ្ញុំហៅរក
	ព្រះម្ចាស់ឱ្យយាងមក	ទ្រង់ឆ្លើយរកតបនឹងខ្ញុំ	។
២	ឱព្រះអម្ចាស់អើយ	កុំកន្តើយគង់សំងំ
	រំដោះផុតទុក្ខធំ	កុំឱ្យខ្ញុំជួបបោកប្រាស	។
៣	អ្នកនិយាយមិនពិត	ពោលបញ្ឆិតពាក្យផ្តេសផ្តាស
	តើត្រូវទទួលទោស	យ៉ាងណាខ្លះនៅពេលក្រោយ	។
៤	គឺត្រូវទទួលទុក្ខ	ឈឺចាប់ចុកមិនផុតឡើយ
	ផ្លែព្រួញមុតធ្លុះហើយ	ភ្លើងឆេះកាយមិនប្រណី	។
៥	ខ្ញុំរស់មិនបានសុខ	នៅក្នុងស្រុកមនុស្សព្រៃ
	ជនពាលសាហាវក្រៃ	ខ្ញុំស្ទើរក្ស័យសែនខ្វាយខ្វល់	។
៦	ជាយូរឆ្នាំកន្លង	ខ្ញុំរស់រងទុក្ខអំពល់
	ពួកមនុស្សមិនយល់	មិនចង់ស្គាល់សន្តិភាព	។
៧	ពេលណាខ្ញុំហាស្តី	គេមិនខ្ចីបែរមកស្តាប់
	មិនចង់សន្តិភាព	បែរជារៀបធ្វើសង្គ្រាម	។

ទំនុកតម្កើងលេខ ១២១ (១២០) បទពាក្យ ៧

១	ខ្ញុំងើបមុខឡើងភ្នែកសម្លឹង	ឯនាយល្វើយល្វឹងទៅដល់ភ្នំ
	ថាតើនរណានឹងជួយខ្ញុំ	ឱ្យផុតទុក្ខធំគ្រប់ៗគ្រា	។
២	គឺមានតែអង្គព្រះអម្ចាស់	ដែលប្រណីប្រោសរាល់វេលា
	ទ្រង់បង្កើតដីផ្ទៃមេឃា	ព្រះអង្គគឺជាព្រះសង្គ្រោះ	។
៣	សូមទ្រង់មេត្តាកុំបណ្តោយ	ឱ្យជើងអ្នកធ្លោយរងរបួស
	ករុណាអាសូរជួយសង្គ្រោះ	កុំឱ្យមានគ្រោះឬត្រូវដួល	។
៤	ព្រះអង្គដែលថែទាំការពារ	ស្រាអែលគ្រប់គ្នាបានសុខស្រួល
	ព្រះអង្គសង្គ្រោះមិនឱ្យដួល	ទ្រង់មិនប្រែប្រួលផ្ទុំលក់ឡើយ	។
៥	ព្រះអម្ចាស់តែងរក្សាថែ	ការពារឥតល្ហែមិនកន្តើយ
	ទ្រង់គង់នៅខាងស្តាំអ្នកហើយ	កុំខ្វល់ខ្វាយឡើយទ្រង់ជាម្លប់	។
៦	ព្រះអាទិ្យរះក្នុងពេលថ្ងៃ	មិនធ្វើទុក្ខអ្វីភ្លឺគ្រងគ្រប់
	ឯព្រះច័ន្ទចរនៅពេលយប់	ទុក្ខសោកក៏ឈប់ដល់អ្នកដែរ	។
៧	ព្រះអម្ចាស់នឹងថែរក្សា	រារាំងបាំងការពារថ្នមថែ
	ហេតុការណ៍អាក្រក់ទ្រង់បង្វែរ	មិនឱ្យកើតក្បែររូបអ្នកឡើយ	។
	ព្រះម្ចាស់ថែអ្នកគ្មានឈរឈប់	អ្វីៗសព្វគ្រប់មិនកន្តើយ
	កិច្ចការអ្នកធ្វើនឹងធូរស្បើយ	ពីពេលនេះហើយតរៀងទៅ	។

ទំនុកតម្កើងលេខ ១២២ (១២១) បទកាកគតិ

១	គេប្រាប់ខ្ញុំថា	យើងគ្រប់កាយា	ទៅព្រះដំណាក់
	ទីដែលព្រះជា	អម្ចាស់គង់ស្នាក់	ល្អស្អាតត្រជាក់
		ខ្ញុំសប្បាយក្រៃ	។
២	យេរូសាឡឹម	ភ័្រក្តអ្នកប៉ប្រិម	ឥតមានទាស់អ្វី
	យើងនាំគ្នាឈាន	ជើងចូលដល់ដី	ដល់ទ្វារបុរី
		នៃអ្នកហើយណា	។
៣	យេរូសាឡឹម	ជាក្រុងមួយធំ	សែនស្រស់សង្ហា
	ដែលសង់ឡើងបាន	រឹងមាំក្រៃណា	កំពែងអស្ចារ្យ
		ល្អព័ទ្ធជុំជិត	។
៤	គ្រប់កុលសម្ព័ន្ធ	នានារួសរាន់	នាំគ្នាមកស្ថិត
	ច្រៀងលើកតម្កើង	ព្រះម្ចាស់មានឫទ្ធិ	តាមច្បាប់នៃជាតិ
		ជនអ៊ីស្រាអែល	។
៥	ទីនេះក៏មាន	បល្ល័ង្កថ្កើងថ្កាន	នៃរាជវង្សដែល
	ជាស្តេចដាវីឌ	បារមីក្រាស់ក្រែល	គ្រប់គ្រងក្រវែល
		រាស្រ្តដោយយុត្តិធម៌	។
៦	សូមព្រះអម្ចាស់	ប្រណីសន្តោស	សន្តិភាពបវរ
	ដល់ក្រុងសាឡឹម	ឱ្យអ្នកស្មោះសរ	ស្រឡាញ់ក្រុងល្អ
		រស់នៅសុខសាន្ត	។
៧	ឱ្យអ្នករស់ក្នុង	កំពែងទីក្រុង	បានសុខក្សេមក្សាន្ត
	សូមឱ្យវិមាន	ក្នុងក្រុងប៉ុន្មាន	ជួបតែសុខសាន្ត
		ឥតមានទុក្ខភ័យ	។
៨	យល់ដល់សន្តាន	ញាតិមិត្តភុំផាន	បងប្អូនប្រុសស្រី
	ខ្ញុំពោលឡើងថា	សូមឱ្យសិរី	បវរសួស្តី
		ដល់ក្នុងថ្កុំថ្កើង	។
៩	យល់ដល់ដំណាក់	ល្អស្រស់វលក្ខណ៍	ជាព្រះនៃយើង
	សូមឱ្យអ្នកបាន	សិរីរុងរឿង	ខ្ពង់ខ្ពស់ថ្កុំថ្កើង
		សុភមង្គល	។

ទំនុកតម្កើងលេខ ១២៣ (១២២) បទព្រហ្មគីតិ

១	ឱ! ព្រះជាអម្ចាស់	គង់ខ្ពស់ណាស់ស្ថានសុខអើយ
	ខ្ញុំងើបមុខឡើងហើយ	សម្លឹងងើយទៅព្រះអង្គ	។
២	យើងខ្ញុំក៏សម្លឹង	និងទន្ទឹងរង់ចាំទ្រង់
	ដូចបម្រើរំពឹង	មើលដៃជើងម្ចាស់សន្តោស	។
៣	ឱ! ព្រះអម្ចាស់អើយ	អាណិតហើយមេត្តាប្រោស
	យើងខ្ញុំនេះផងចុះ	ខ្ញុំឥតខុសគេមើលងាយ	។
៤	យើងខ្ញុំមិនអាចទ្រាំ	គេសើចយំដោយពេបជ្រាយ
	គេជេរពីជិតឆ្ងាយ	អ្នកទាំងឡាយវាយឫកខ្ពស់	។

ទំនុកតម្កើងលេខ ១២៤ (១២៣) បទពាក្យ ៧

១	ប្រសិនបើគ្មានព្រះអម្ចាស់​	មិនជួយសន្តោសគាំទ្រទេ
	សូមអ៊ីស្រាអែលពោលហូរហែរ	ពោលកុំទំនេរទាំងអស់គ្នា	។
២	ប្រសិនបើគ្មានព្រះអម្ចាស់	នៅខាងយើងនោះគ្រប់វេលា
	ពេលណាសត្រូវលើកគ្នីគ្នា	សម្រុកពុះពារវាយលើយើង	។
៣	ពេលណាគេមានកំហឹងខ្លាំង	គេមកប្រឆាំងយើងនឹងប៉ើង
	គេនឹងត្របាក់លេបដូចភ្លើង	មិនឱ្យពួកយើងសុខសាន្តឡើយ	។
៤	យើងនឹងលិចលង់ក្នុងសមុទ្រ	ភិតភ័យតក់ស្លុតឥតមានស្បើយ
	ទឹកហូរនាំយើងគ្មានកោះត្រើយ	ទៅកាន់ទីឆ្ងាយគ្មានគោលដៅ	។
៥	ពេលយើងកំពុងអស់កម្លាំង	មានទឹកកួចខ្លាំងពន្លិចទៅ
	ដល់បាតជលសាដ៏សែនជ្រៅ	ជីវិតយើងត្រូវលង់ក្សិណក្ស័យ	។
៦	សូមលើកតម្កើងព្រះអម្ចាស់	ដ្បិតទ្រង់ជាព្រះមានបារមី
	ទ្រង់ពុំប្រគល់យើងក្នុងដៃ	ធ្វើរំពានៃពួកនោះឡើយ	។
៧	យើងរួចជីវិតដូចបក្សី	គេចផុតពីដៃព្រានព្រៃហើយ
	គឺលប់ធ្លុះធ្លាយគ្មានសល់ឡើយ	យើងបានធូរស្បើយរស់ជីវ៉ា	។
៨	ព្រះអម្ចាស់បានសង្គ្រោះយើង	ដោយព្រះនាមថ្កើងមានចេស្តា
	គឺព្រះអង្គដែលមានមេត្តា	បង្កើតវេហានិនផែនដី	។

ទំនុកតម្កើងលេខ ១២៥ (១២៤) បទកាកគតិ

១	អ្នកផ្ញើជីវិត	លើព្រះមានឫទ្ធិ	អ្នកនោះប្រៀបបាន
	នឹងភ្នំស៊ីយ៉ូន	ស្រស់បស់ភុំផាន	ស្ថិតស្ថេរសុខសាន្ត
		ជាទីសង្ឃឹម	។
២	ភ្នំព័ទ្ធជិតជុំ	ទីក្រុងឧត្តម	យេរូសាឡឹម
	ឯព្រះអម្ចាស់	ក៏គង់នៅជុំ	រាស្រ្តផុតទុក្ខធំ
		បានសុខសិរី	។
៣	ដ្បិតស្តេចយង់ឃ្នង	ពុំអាចគ្រប់គ្រង	នៅលើទឹកដី
	នៃជនសុចរិត	គ្មានចិត្តព្រៃផ្សៃ	ចិត្តចង់ធ្វើអ្វី
		ដែលជាកំហុស	។
៤	ឱ! ព្រះអម្ចាស់	សូមសម្តែងព្រះ	ហឫទ័យសប្បុរស
	ទៅលើអស់អ្នក	មានចិត្តត្រង់ស្មោះ	ល្អឥតមានទាស់
		ជាមនុស្សទៀងត្រង់	។
៥	រីអ្នកចូលចិត្ត	ដើរផ្លូវទុច្ចរិត	វៀចវេរសៅហ្មង
	សូមព្រះអម្ចាស់	ដេញគេទៅផង	ឱ្យទៅនៅក្នុង
		ហ្វូងមនុស្សគម្រក់	។
	សូមទ្រង់ប្រទាន	អ៊ីស្រាអែលបាន	ផុតគ្រោះអាក្រក់
	រួចពីមនុស្សបាប	ភូតភរកុហក	ផុតមនុស្សគម្រក់
		សុខសាន្តតទៅ	។

ទំនុកតម្កើងលេខ ១២៦ (១២៥) បទព្រហ្មគីតិ

១	ពេលព្រះដឹកនាំអ្នក	ដែលជំពាក់ខ្លួនជាឈ្លើយ
	មកក្រុងស៊ីយ៉ូនហើយ	យើងធូរស្បើយដូចយល់សប្តិ	។
២	យើងសើចហ៊ោរសប្បាយ	អរក្អាកក្អាយឥតមានឈប់
	ស្រែកជ័យឃោសន៍សាយសព្វ	លាន់សូរស័ព្ទគ្រប់ទិសា	។
	ពេលនោះក្នុងចំណោម	ជាតិទាំងព្រមគេពោលថា៖
	«ព្រះម្ចាស់មានចេស្តា	ធ្វើអស្ចារ្យចំពោះគេ»	។
៣	ព្រះអង្គបានធ្វើការ	ដ៏អស្ចារ្យអ្វីម៉េ្លះទេ
	យើងលែងគិតគ្នាន់គ្នេរ	បានល្ហើយល្ហែអរសប្បាយ	។
៤	ឱ! ព្រះម្ចាស់ឧត្តម	សូមប្រោសខ្ញុំឱ្យរីកសាយ
	ដូចរហោស្ថានឆ្ងាយ	សូមប្រែក្លាយមានទឹកហូរ	។
៥	អ្នកណាសាបព្រោះស្រូវ	ដោយសោកសៅគួរអាសូរ
	ទាំងទឹកភ្នែកជន់ជោរ	នឹងច្រូតយកទាំងសប្បាយ	។
៦	គេយកពូជទៅព្រោះ	ទាំងស្រណោះយំសោកស្តាយ
	ក្រោយមកគេប្រែក្លាយ	ហ៊ោសប្បាយដោយអំណរ	។

ទំនុកតម្កើងលេខ ១២៧ (១២៦) បទពាក្យ ៧

១	ប្រសិនបើព្រះជាអម្ចាស់	មិនជួយសង់ផ្ទះនោះទេណា
	អ្នកសង់ខំប្រឹតឥតបានការ	គឺគ្មានវាសនាខ្វះលំនឹង	។
	បើព្រះអម្ចាស់មិនរក្សា	ទីក្រុងទេណាឱ្យរឹងប៉ឹង
	អ្នកយាមទីក្រុងដែលខំប្រឹង	យាមរាល់ថ្ងៃហ្នឹងអត់អសារ	។
២	អ្នករាល់គ្នាក្រោកពីព្រលឹម	រកស៊ីចិញ្ចឹមជន្មជីវ៉ា
	ខំទាំងលំបាកគ្រប់កាយា	តែឥតបានការផលចំណេញ	។
	ព្រះជាអម្ចាស់បានប្រទាន	អាហារធនធានច្រើនពាសពេញ
	ដល់អ្នកដែលព្រះអង្គស្រឡាញ់	ក្នុងពេលយប់យន់គេនិទ្រា	។
៣	ព្រះអម្ចាស់ប្រទានកូនចៅ	ស្ថិតស្ថេរគង់នៅចាត់ទុកជា
	ចំណែកមរតកដ៏មហិមា	ជាពរជ័យាពីព្រះអង្គ	។
៤	កូនប្រុសៗដែលកើតចេញមក	ពេលដែលឪពុកពេញកម្លាំង
	ដូចព្រួញដែលស្រួចមុតយ៉ាងខ្លាំង	នៃអ្នកចម្បាំងពេលប្រយុទ្ធ	។
៥	អ្នកដែលមានកូនប្រុសយ៉ាងច្រើន	នោះនឹងចម្រើនសុខបំផុត
	ពេលមានបច្ចាមកប្រយុទ្ធ	គេមិនតក់ស្លុតមិនអាម៉ាស	។

ទំនុកតម្កើងលេខ ១២៨ (១២៧) បទកាកគតិ

១	អ្នកណាកោតខ្លាច	គោរពអំណាច	ព្រះជាអម្ចាស់
	ដើរតាមគន្លង	មាគ៌ានៃព្រះ	អ្នកនោះឥតទាស់
		ពោរពេញមង្គល	។
២	អ្នកនឹងទទួល	បានឥតប្រែប្រួល	យកនូវភោគផល
	ចេញពីកិច្ចការ	គ្រប់ពេលរៀងរាល់	នឹងមានមង្គល
		ចម្រើនពេកក្រៃ	។
៣	ឯភរិយាអ្នក	ដែលនៅក្នុងផ្ទះ	ដូចដើមស្រស់ខ្ចី
	មានស្លឹកមានផ្លែ	ស្រគាលទុំខ្ចី	កូនប្រុសរញ៉ី
		ដូចដើមឈើតូច	។
៤	នេះជាអំណោយ	ទ្រង់ប្រទានឱ្យ	គេបានសម្រេច
	ដល់អ្នកកោតខ្លាច	ឫទ្ធីអំណាច	ផលច្រើនពន់ពេក
		មិនពិបាករក	។
៥	សូមទ្រង់ប្រសិទ្ធិ	ពរជ័យវិចិត្រ	ពីស៊ីយ៉ូនមក
	ជារៀងរាល់ថ្ងៃ	កុំបាច់លៃលក	ដើរតត្រុករក
		ក្នុងជីវិតអ្នក	។
៦	អ្នកនឹងឃើញចៅ	របស់អ្នកនៅ	បីបមថ្នមថ្នាក់
	ឱ្យអ៊ីស្រាអែល	បានសុខជាជាក់	គ្មានគ្រោះឧបសគ្គ
		ជួបតែសុខសាន្ត	។

ទំនុកតម្កើងលេខ ១២៩ (១២៨) បទព្រហ្មគីតិ

១	គេតែងធ្វើបាប	ខ្ញុំជាដរាប	តាំងពីក្មេងខ្ចី
	ឱ្យអ៊ីស្រាអែល	ទាំងប្រុសទាំងស្រី	ស្រែកពោលស្រដី
		តាមដូច្នេះថា៖	។
២	«គេធ្វើបាបខ្ញុំ	ដូចចងគំនុំ	តាំងពីកុមារ
	គេចង់សម្លាប់	ចាក់កាប់ប្រហារ	តែទោះយ៉ាងណា
		ក៏មិនឈ្នះខ្ញុំ	។
៣	គេភ្ជួរគេរាស់	គេដាំគេដុះ	ធ្វើគន្លងធំ
	គេភ្ជួរលើខ្នង	ដូចភ្ជួរដីភូមិ	លើសាច់ឈាមខ្ញុំ
		ឱ្យឈឺគ្រាំគ្រា	។
៤	ប៉ុន្តែព្រះម្ចាស់	ទ្រង់សប្បុរសណាស់	ដល់យើងគ្រប់គ្នា
	ទ្រង់ស្រាយចំណង	ពួកជនពាល	ចេញពីអង្គា
		ខ្ញុំសុខសាន្តណាស់	។
៥	សូមឱ្យអស់ជន	ស្អប់ក្រុងស៊ីយ៉ូន	ជួបក្តីអាម៉ាស់
	និងដកខ្លួនថយ	ចេញឆ្ងាយស្រឡះ	វិនាសព្រាត់ប្រាស
		កុំបីសល់នៅ	។
៦	សូមឱ្យពួកគេ	កុំបីល្ហើយល្ហែ	ដូចជាដើមស្មៅ
	លើដំបូលផ្ទះ	ហើយត្រូវកម្តៅ	ស្ងួតក្រៀមស្វិតទៅ
		មុនពេលលាស់ខ្ចី	។
៧	សូម្បីតែគេ	ច្រូតស្មៅនោះដែរ	ក៏មិនពេញដៃ
	មិនល្មមសម្រាប់	ចងកណ្តាប់អី	ព្រោះស្មៅក្សិណក្ស័យ
		អស់ន័យខ្លឹមសារ	។
៨	សូមកុំឱ្យអស់	អ្នកដើរតាមនោះ	ពោលទៅគេថា
	«សូមព្រះអម្ចាស់	ប្រទានជ័យា	ដល់អ្នករាល់គ្នា»
		តទៅទៀតឡើយ	។

ទំនុកតម្កើងលេខ ១៣០ (១២៩) បទពាក្យ ៧

១	បពិត្រព្រះជាអម្ចាស់អើយ	ខ្ញុំស្រែកដង្ហើយរកព្រះអង្គ
	ពីក្នុងរណ្តៅជ្រៅកន្លង	មេត្តាជួយផងផុតពីស្លាប់	។
២	សំឡេងខ្ញុំឮដូចចម្រៀង	សូមព្រះអង្គផ្ទៀងព្រះកាណ៌ស្តាប់
	ពាក្យខ្ញុំអង្វរទទូចប្រាប់	រៀបរាប់រ៉ាយរ៉ាប់សូមសន្តោស	។
៣	បពិត្រព្រះម្ចាស់ដ៏ឧត្តម	បើព្រះអង្គចាំពីកំហុស
	អំពើបាបកម្មជនស្រីប្រុស	គ្មានម្នាក់ណាសោះរួចខ្លួនឡើយ	។
៤	ប៉ុន្តែព្រះអង្គតែងអត់ទោស	ប្រណីសន្តោសខ្ញុំធូរស្បើយ
	រួចផុតទុក្ខទោសបានល្ហែល្ហើយ	គឺព្រះអង្គហើយខ្ញុំគោរព	។
៥	ខ្ញុំទុកចិត្តលើព្រះអម្ចាស់	ជីវិតខ្ញុំនេះផ្ញើសព្វគ្រប់
	សង្ឃឹមលើព្រះបន្ទូលគាប់	មិនឈរមិនឈប់ទេព្រះអង្គ	។
៦	ខ្ញុំទន្ទឹងចាំព្រះអម្ចាស់	ជាងអ្នកយាមផ្ទះទៅទៀតផង
	ពេលឃើញថ្ងៃរះស្រស់បំព្រង	រួចផុតទុក្ខផងមួយរាត្រី	។
៧	ឱ! អ៊ីស្រាអែលសូមទុកចិត្ត	ព្រះល្អវិសុទ្ធដោយព្រះទ័យ
	មេត្តាករុណាត្រាប្រណី	ទ្រង់សព្វព្រះទ័យជួយជានិច្ច	។
៨	ព្រះអង្គរំដោះអ៊ីស្រាអែល	ពីកំហុសដែលមានច្រើនតិច
	គេបានប្រព្រឹត្តជាប់ជានិច្ច	ព្រះអង្គសម្រេចបានសុខសាន្ត	។

ទំនុកតម្កើងលេខ ១៣១ (១៣០) បទកាកគតិ

១	បពិត្រព្រះម្ចាស់	ខ្ញុំជាមនុស្ស	ដែលមិនអំនួត
	មិនវាយឫកខ្ពស់	មិនអាងមិនអួត	មិនចង់ប្រកួត
		អ្នកតូចអ្នកទាប	។
	ខ្ញុំមិនលោភលន់	ចង់បានទ្រព្យធន	គេជារៀងរាប
	មិនចង់បានអ្វី	ដែលធំហួសប្រៀប	លើសសមត្ថភាព
		របស់ខ្ញុំឡើយ	។
២	តែផ្ទុយទៅវិញ	ចិត្តខ្ញុំពោរពេញ	ស្ងៀមស្ងាត់ព្រងើយ
	ដូចជាកូនក្មេង	ជាប់ទ្រូងម្តាយហើយ	វាធ្វើកន្តើយ
		នឹងអ្វីទាំងអស់	។
៣	អ៊ីស្រាអែលអើយ	កុំបង្អង់ឡើយ	ទុកចិត្តលើព្រះ
	តាំងពីឥឡូវ	តទៅឥតខ្ចោះ	រហូតដល់អស់
		កប្បកល្បជានិច្ច	។

ទំនុកតម្កើងលេខ ១៣២ (១៣១) បទព្រហ្មគីតិ

១	ឱ! ព្រះអម្ចាស់អើយ	កុំកន្តើយសូមនឹកដល់
	ដាវីឌសែនខ្វាយខ្វល់	នឿយហត់ជ្រុលគ្រប់កិច្ចការ	។
២	ព្រះរាជាបានស្បថ	ជាកំណត់ទ្រង់សន្យា
	ព្រះដ៏មានចេស្តា	នៃលោកយ៉ាកុបគ្រប់គ្នា	។
៣	ថាខ្ញុំមិនចូលជ្រក	ក្នុងជម្រកព្រះពន្លា
	មិនព្រមចូលនិទ្រា	លើគ្រែគ្រានេះឡើយណា	។
៤	ខ្ញុំមិនព្រមបិទភ្នែក	មិនព្រមដេកលង់នេត្រា
	ដរាបខ្ញុំនេះណា	ចាត់ចែងការថ្វាយមិនបាន	។
៥	គឺព្រះតំណាក់ជ័យ	ថ្វាយក្សត្រថ្លៃខ្លាំងក្លាហាន
	ព្រះយ៉ាកុបថ្កើងថ្កាន	បើមិនបានខ្ញុំសោកា	។
៦	ហឹបសម្ពន្ធមេត្រី	ឮគេស្តីនិយាយថា
	ឯភូមិអេប្រាតា	នៅយ៉ាអាឃើញហឹបជាក់	។
៧	ចូរយើងនាំគ្នីគ្នា	គ្រប់អង្គាចូលដំណាក់
	ក្រាបទាបបាទាព្រះ	ដោយស្មោះស្ម័គ្រគោរពថ្កើង	។
៨	ឱ! ព្រះជាអម្ចាស់	មេត្តាប្រោសសូមតើនឡើង
	ជាមួយហឹបព្រះអង្គ	សូមយាងគង់រហូតទៅ	។
៩	សូមឱ្យបូជាចារ្យ	គ្រប់កាយាកុំហ្មងសៅ
	ធ្វើសុចរិតជាផ្លូវ	រាស្រ្តរស់នៅហ៊ោរសប្បាយ	។
១០	ដោយយល់ដល់ព្រះបាទ	នាមដាវីឌដ៏ស្រស់ស្រាយ
	កុំចោលស្តេចនេះឡើយ	គឺទ្រង់ហើយបានអភិសេក	។
១១	ព្រះអង្គបានសន្យា	នឹងស្តេចដាវីឌល្អឯក
	យើងនឹងតែងតាំងពូជ	ឱ្យគ្រងរាជ្យជាបន្ត	។
១២	ប្រសិនបើបុត្រអ្នក	កាន់បានជាក់សម្ពន្ធល្អ
	មេត្រីយើងតៗ	គ្រប់តំណយើងប្រដៅ	។
	នោះពូជគេនឹងបាន	ល្អថ្កើងថ្កានមិនអាស្រូវ
	ឡើងគ្រងរាជ្យតទៅ	តកូនចៅឥតស្រាកស្រាន្ត	។
១៣	ព្រះអម្ចាស់បានជ្រើស	ពិនិត្យរើសក្រុងថ្កើងថ្កាន
	ជាទីល្អចំណាន	ស៊ីយ៉ូនបានជាលំនៅ	។
១៤	យើងនឹងស្នាក់សម្រាក	មួយរយៈមិនចេញទៅ
	ចង់រស់ស្នាក់និត្យនៅ	មិនចេញទៅកន្លែងណា	។
១៥	យើងនឹងប្រទានពរ	ក្រុងបវរតាមត្រូវការ
	ឱ្យអ្នកខ្សត់ខ្លោចផ្សា	មានអាហារមិនខ្វះទេ	។
១៦	យើងនឹងសង្គ្រោះក្រុង	ឱ្យរឿងរុងល្អឡើងទ្វេ
	ដោយបូជាចារ្យគេ	រាស្រ្តរិះរេអរអនេក	។
១៧	ទីនេះយើងឱ្យស្តេច	មានអំណាចខ្ពស់ពន់ពេក
	កើតពីពូជដាវីឌ	ឱ្យស្នងរាជ្យពេលនេះណា	។
	យើងនឹងរៀបចំឱ្យ	ស្តេចអង្គក្រោយមានចេស្តា
	គ្រងរាជ្យយូរវស្សា	ជួសក្សត្រាយើងអភិសេក	។
១៨	យើងនឹងធ្វើឱ្យខ្មាំង	បាក់មុខខ្លាំងខ្មាសពន់ពេក
	តែយើងនឹងឱ្យរាជ្យ	យើងអភិសេកបានថ្កុំថ្កើង	។

ទំនុកតម្កើងលេខ ១៣៣ (១៣២) បទពាក្យ ៧

១	បងប្អូនទាំងអស់ចេះរួមរស់	ចេះស្រួលចេះស្រុះស្មោះសោភា
	គឺល្អប្រពៃឥតគណានា	សប្បាយគ្រប់គ្នាត្រេកត្រអាល	។
២	គឺប្រៀបបីដូចជាទឹកអប់	ក្រអូបឈ្ងុយឈ្ងប់ហូរសព្វក្បាល
	មកពុកចង្កាហើយរាលដាល	ចុះមកជាយអាវលោកអារ៉ុន	។
៣	ប្រៀបបីដូចជាធ្លាក់សន្សើម	ពីហ៊ែរម៉ូនភ្នំនិងស៊ីយ៉ូន
	ជាកន្លែងព្រះម្ចាស់ប្រទាន	ជីវិតឱ្យមានអស់កល្បកប្ប	។

ទំនុកតម្កើងលេខ ១៣៤ (១៣៣) បទពាក្យ ៧

១	អស់អ្នកបម្រើព្រះអម្ចាស់	នៅក្នុងដំណាក់ពេលរាត្រី
	នាំគ្នាតម្កើងព្រះម្ចាស់ថ្ងៃ	ដ៏ខ្ពង់ខ្ពស់ក្រៃពេកអស្ចារ្យ	។
២	ចូរលើកដៃឡើងហើយប្រណម្យ	បែរទៅឱ្យចំទីសក្ការ
	ចូរច្រៀងសរសើរដោយជ្រះថ្លា	ថ្កើងព្រះចេស្តានៃព្រះអង្គ	។
៣	សូមព្រះអម្ចាស់ដែលបង្កើត	មេឃដីល្អឆើតកុំរេរង់
	សូមប្រទានពរដល់អ្នកផង	ពីក្រុងស៊ីយ៉ូនមកកុំខាន	។

ទំនុកតម្កើងលេខ ១៣៥ (១៣៤) បទកាកគតិ

១	អាលេលូយ៉ា	ចូរគ្រប់អាត្មា	សរសើរតម្កើង
	ព្រះនាមអម្ចាស់	ជាព្រះនៃយើង	អ្នកបម្រើផង
		នាំគ្នាអបអរ	។
២	អ្នកដែលស្ថិតក្នុង	ដំណាក់ព្រះអង្គ	មូលមីរកុះករ
	នៅក្នុងបរិវេណ	ដំណាក់បវរ	នាំគ្នាឈូឆរ
		សរសើរព្រះម្ចាស់	។
៣	ដ្បិតព្រះអង្គថ្លៃ	ទ្រង់មានព្រះទ័យ	សប្បុរសខ្លាំងណាស់
	ចូរច្រៀងតម្កើង	ថ្វាយព្រះនាមព្រះ	ដ្បិតព្រះអម្ចាស់
		គាប់ចិត្តនឹងយើង	។
៤	ព្រះម្ចាស់ជ្រើសរើស	មិនឱ្យមានទាស់	ពូជយ៉ាកុបថ្កើង
	ព្រះអង្គយកជាតិ	អ៊ីស្រាអែលឡើង	ជារាស្រ្តព្រះអង្គ
		រុងរឿងប្រពៃ	។
៥	ខ្ញុំដឹងច្បាស់ថា	ព្រះម្ចាស់នេះណា	ឧត្តមថ្លាថ្លៃ
	ព្រះម្ចាស់នៃយើង	ប្រសើរពេកក្រៃ	លើសព្រះដទៃ
		មានទាំងប៉ុន្មាន	។
៦	បើទ្រង់ពេញចិត្ត	ធ្វើការអ្វីពិត	ជាសម្រេចបាន
	លើមេឃលើដី	សមុទ្រគ្រប់ស្ថាន	ជម្រៅប៉ុន្មាន
		ក៏ទ្រង់ឥតរា	។
៧	ព្រះអង្គនាំយក	ទាំងដុំពពក	ពីជើងមេឃា
	ទ្រង់ធ្វើឱ្យមាន	រន្ទះខ្ទ័រខ្ទារ	ភ្លៀងច្រើនមហិមា
		ខ្យល់បក់សព្វសាយ	។
៨	នៅស្រុកអេស៊ីប	ព្រះអង្គសម្លាប់	កូនច្បងទាំងឡាយ
	តាំងពីកូនមនុស្ស	កូនសត្វអន្តរាយ	ព្រះអង្គគ្មានស្តាយ
		ខ្ចាត់ខ្ចាយគ្មានសល់	។
៩	ព្រះអង្គសម្តែង	បាដិហារិយ៍ផ្សេងៗ	អេស៊ីបខ្វាយខ្វល់
	ដើម្បីដាក់ទោស	ស្តេចផារ៉ោនផ្ទាល់	និងអស់មន្ត្រី
		នៃស្តេចផងដែរ	។
១០	ព្រះអង្គបានវាយ	ប្រហារស្លាប់ពាយ	ជាតិច្រើនហូរហែ
	រួមទាំងជីវិត	ស្តេចខ្លាំងពូកែ	មិនបានសុខទេ
		ត្រូវក្ស័យជីវី	។
	គឺស្តេចស៊ីហុន​​​	គ្រប់គ្រងតំបន់	ស្រុកអាម៉ូរី
	ទាំងព្រះបាទអុក	ស្រុកបាសានទី	និងស្តេចមូលមី
		នៃជាតិកាណាន	។
១២	ទ្រង់សព្វព្រះទ័យ	ប្រគល់ទឹកដី	ជាមរតកថ្កាន
	ឱ្យអ៊ីស្រាអែល	ជារាស្រ្តទ្រង់បាន	រស់ដោយសុខសាន្ត
		ត្រចង់រឿងរុង	។
១៣	បពិត្រព្រះម្ចាស់	ព្រះនាមរបស់	ព្រះអង្គគង់វង្ស
	ជារៀងរហូត	ល្បីល្បាញយូរលង់	ត្រចះត្រចង់
		អស់កល្បគ្រប់គ្រា	។
១៤	ដ្បិតព្រះអង្គរក	យុត្តិធម៌នាំមក	ឱ្យរាស្រ្តប្រជា
	ព្រះអង្គអាណិត	អាសូរគ្រប់គ្នា	អស់កូនចៅជា
		អ្នកស្ម័គ្របម្រើ	។
១៥	ព្រះផ្សេងឯទៀត	ជាព្រះមិនពិត	កើតពីមនុស្សធ្វើ
	ពីមាសពីប្រាក់	ពីស្ពាន់ពីឈើ	អ្វីសព្វសារពើ
		ជាព្រះក្លែងក្លាយ	។
១៦	ព្រះនោះមានមាត់	បើកបិទមិនកើត	មិនអាចនិយាយ
	មាត់ដែលជាងឆ្លាក់	គេដាក់មកឱ្យ	ភ្នែកដែលមានហើយ
		តែបើកមិនរួច	។
១៧	ត្រចៀកក៏មាន	តែស្តាប់មិនបាន	ដូចត្រចៀកខូច
	ស្រេចតែជាងធ្វើ	តាមធំតាមតូច	ខ្យល់ចូលមិនរួច
		ដង្ហើមក៏គ្មាន	។
១៨	សូមឱ្យអស់អ្នក	ដែលខំសូនឆ្លាក់	ឥតមានស្រាកស្រាន្ត
	ធ្វើព្រះក្លែងក្លាយ	មានទាំងប៉ុន្មាន	ឱ្យពួកគេបាន
		ដូចព្រះទាំងនោះ	។
១៩	អ៊ីស្រាអែលអើយ	កុំនៅកន្តើយ	នាំគ្នាទាំងអស់
	ខំលើកតម្កើង	ព្រះជាអម្ចាស់	ទាំងពូជរបស់
		លោកអរ៉ុនផង	។
២០	គ្រួសារលេវី	ចូរមកមូលមីរ	សរសើរផ្គូផ្គង
	និងអ្នកដែលធ្លាប់	គោរពព្រះអង្គ	សរសើរថ្កើងថ្កាន
		ព្រះម្ចាស់នៃយើង	។
២១	ចូរយើងនាំគ្នា	គ្រប់ៗអង្គា	មូលផ្តុំតម្កើង
	ព្រះជាអម្ចាស់	គង់ភ្នំស៊ីយ៉ូន	និងនៅក្នុងក្រុង​
		យេរូសាឡឹម	។

ទំនុកតម្កើងលេខ ១៣៦ (១៣៥) បទកាកគតិ

១	សូមតម្កើងព្រះ	ដែលជាអម្ចាស់	គ្រប់ទីតំបន់
	ទ្រង់មានព្រះទ័យ	សប្បុរសពេកពន់	ប្រសើរលើសលន់
		រហូតរៀងទៅ	។
២	ចូរលើកតម្កើង	ព្រះដ៏ខ្ពស់ថ្កើង	មិនដែលអាស្រូវ
	ដោយធម៌មេត្តា	ករុណាជាផ្លូវ	ដែលស្ថិតស្ថេរនៅ
		អស់កល្បរហូត	។
៣	សរសើរតម្កើង	ព្រះម្ចាស់ខ្ពស់ឡើង	លើសគេបំផុត
	ដោយធម៌មេត្តា	ករុណាមោះមុត	នៅជាប់រហូត
		កប្បកល្បអនេក	។
៤	មានតែព្រះអង្គ	ធ្វើការឧត្តុង្គ	ឧត្តមក្រៃពេក
	ដោយធម៌មេត្តា	ករុណាល្អឯក	ប្រណីសង្វេគ
		អស់កល្បជានិច្ច	។
៥	ព្រះអង្គបង្កើត	ផ្ទៃមេឃល្អឆើត	ដោយគ្មានកលកិច្ច
	ដ្បិតព្រះហឫទ័យ	មេត្តាជានិច្ច	ករុណាពន់ពេក
		ស្ថិតនៅយូរលង់	។
៦	ព្រះអង្គបានដាក់	ផែនដីតាមថ្នាក់	ស្ថិតស្ថេរគង់វង្ស
	នៅលើផ្ទៃទឹក	ដ្បិតហឫទ័យទ្រង់	ស្ថិតនៅយូរលង់
		អស់កល្បប្រិមប្រិយ៍	។
៧	ព្រះអង្គបង្កើត​	ដុំពន្លឺឆើត	ចែងចាំងរស្មី
	ដោយធម៌មេត្តា	ករុណាប្រណី	ស្ថិតនៅពាសដី
		អស់កល្បអន្លាយ	។
៨	គឺព្រះអាទិត្យ	ព្រះអង្គបង្កើត	បំភ្លឺពេលថ្ងៃ
	ដោយធម៌មេត្តា	ករុណាប្រណី	ស្ថិតនៅអាល័យ
		អស់កល្បសព្វគ្រប់	។
៩	ព្រះច័ន្ទតារា	គ្រប់គ្រងត្រៀបត្រា	បំភ្លឺពេលយប់
	ដោយធម៌មេត្តា	ករុណាគួរគាប់	ស្ថិតស្ថេរនៅជាប់
		អស់កល្បរៀងរាប	។
១០	ព្រះអង្គប្រល័យ	កូនច្បងគ្រប់កាយ	របស់អេស៊ីប
	ដ្បិតធម៌មេត្តា	ចែងចាំងដរាប	មិនចេះស្រអាប់
		អស់កល្បរហូត	។
១១	ទ្រង់នាំប្រជា	ស្រាអែលគ្រប់គ្នា	ឱ្យរួចរបូត
	ពីស្រុកអេស៊ីប	ដោយព្រះទ័យកួច	នាំគេឱ្យរួច
		អស់កល្បយូរលង់	។
១២	ដោយឫទ្ធិបារមី	តេជះខ្លាំងក្រៃ	ទាំងមានអានុភាពផង
	ដ្បិតធម៌មេត្តា	ករុណាកន្លង	នៅជាប់ឥតហ្មង
		ស្ថិតស្ថេរពេញទី	។
១៣	ទ្រង់ញែកសមុទ្រ	គ្មានព្រឺតក់ស្លុត	ចែកចេញជាពីរ
	ដោយធម៌មេត្តា	ករុណាកន្លង	នៅជាប់ឥតហ្មង
		ស្ថិតស្ថេរពេញទី	។
១៤	ទ្រង់នាំជនជាតិ	ស្រាអែលដើរកាត់	តាមបាតសមុទ្រ
	ដោយធម៌មេត្តា	ករុណាបំផុត	នៅមិនរលត់
		អស់កប្បកល្បហោង	។
១៥	ព្រះអង្គធ្វើឱ្យ	ស្តេចផារ៉ោនធ្លោយ	ទាំងកងទ័ពផង
	លង់ក្នុងសមុទ្រ	ស្លាប់គ្រានោះម្តង	ករុណាព្រះអង្គ
		ស្ថិតនៅឥតស្រាន្ត	។
១៦	ព្រះអង្គណែនាំ	ប្រជាឱ្យទ្រាំ	តាមរហោស្ថាន
	ដោយធម៌មេត្តា	ករុណាថ្កើងថ្កាន	ស្ថិតគ្មានអវសាន
		អស់កល្បមានជោគ	។
១៧	ទ្រង់ប្រហារស្តេច	ពេញដោយអំណាច	ច្រើនអង្គដួលស្តូក
	ដោយធម៌មេត្តា	ករុណាមានមក	ស្ថិតនៅក្នុងលោក
		អស់កល្បកន្លង	។
១៨	ព្រះអង្គប្រហារ	ស្តេចខ្លាំងអស្ចារ្យ	ឱ្យក្ស័យគ្រប់អង្គ
	ដោយធម៌មេត្តា	ករុណាត្រចង់	ស្ថិតនៅគង់វង្ស
		អស់កល្បគ្រប់ទី	។
១៩	គឺមានព្រះបាទ	ស៊ីហុនសោយរាជ្យ	លើអាម៉ូរី
	ដ្បិតទ្រង់មេត្តា	ករុណាគ្រប់ទី	ស្ថិតស្ថេរមូលមីរ
		រហូតប្រពៃ	។
២០	និងព្រះបាទអុក	គ្រប់គ្រងលើស្រុក	បាសាននោះនៃ
	ព្រោះតែព្រះអង្គ	ទ្រង់មានព្រះទ័យ	ស្មោះស្ម័គ្រមេត្រី
		អស់កល្បស្ថិតស្ថេរ	។
២១	ព្រះអង្គប្រទាន	អ៊ីស្រាអែលមាន	ដីទុកជាកេរ
	ដ្បិតព្រះហឫទ័យ	ទ្រង់ឥតងាករេ	ព្រះអង្គស្ថិតស្ថេរ
		អស់កល្បតទៅ	។
២២	ព្រះអង្គប្រទាន	កូនចៅឱ្យមាន	ស្រុករស់និត្យនៅ
	ដោយធម៌មេត្តា	ករុណាពេកកូវ	ព្រះអង្គស្ថិតនៅ
		ជាអចិន្ត្រៃយ៍	។
២៣	ពេលយើងមានទុក្ខ	វេទនាគ្រប់មុខ	ទ្រង់តែងប្រណី
	ដោយធម៌មេត្តា	ករុណាឥតបី	ប្រសើរពេកក្រៃ
		គ្រប់សម័យកាល	។
២៤	ព្រះអង្គរំដោះ	យើងផុតពីគ្រោះ	លែងភ័យជ្រួលច្រាល
	ដោយព្រះហឫទ័យ	ករុណាត្រកាល	ស្ថិតនៅរៀងរាល់
		រហូតឥតឈប់	។
២៥	ព្រះអង្គប្រទាន	អាហារឱ្យមាន	ឆ្អែតឆ្អន់សព្វគ្រប់
	ដោយធម៌មេត្តា	ករុណាលើសលប់	ស្ថិតនៅតាំងជាប់
		ឥតបីរលត់	។
២៦	ចូរលើកតម្កើង	ព្រះម្ចាស់ខ្ពស់ឡើង	គ្មានទីបំផុត
	ដោយធម៌មេត្តា	ករុណាវិសុទ្ធ	ស្ថិតមិនរលត់
		អស់កល្បកប្បហោង	។

ទំនុកតម្កើងលេខ ១៣៧ (១៣៦) បទពាក្យ ៧

១	យើងអង្គុយនឹកគិតរិះរេ	នៅមាត់ទន្លេបាប៊ីឡូន
	យំនឹកស្រណោះក្រុងស៊ីយ៉ូន	ធ្មេចភ្នែកក៏ឃើញក្នុងនេត្រា	។
២	ព្រះច័ន្ទចោលរស្មីឆ្អៅឆ្អិន	យើងបានព្យួរពិណយើងនោះណា
	ជិតមាត់ទន្លេដើមរុក្ខា	រួចចោលភក្ត្រាមើលទៅឆ្ងាយ	។
៣	ពេលនោះពួកអ្នកដែលចាប់យើង	គេសុំឱ្យច្រៀងបទសប្បាយ
	គេពោលថាចូរច្រៀងបរិយាយ	ក្រុងស៊ីយ៉ូនឱ្យយើងស្តាប់ផង	។
៤	តើឱ្យយើងច្រៀងបទតម្កើង	ថ្វាយព្រះនៃយើងពេលនេះម្តង
	នៅលើទឹកដីដ៏សៅហ្មង	នៃបរទេសផងដូចម្តេចកើត ?	។
៥	ឱ! ក្រុងយេរូសាឡឹមអើយ	ខ្ញុំមិនភ្លេចឡើយក្រុងល្អឆើត
	បើខ្ញុំភ្លេចអ្នកភ្លេចកំណើត	សូមដៃខ្ញុំពើតស្ពឹកចុកចាប់	។
៦	ប្រសិនបើខ្ញុំមិនជឿជាក់	មិនចាត់់ទុកអ្នកដូចខ្ញុំប្រាប់
	ជាអំណរដ៏ខ្លាំងក្លាគាប់	សូមអណ្តាតជាប់រឹងជិតជុំ	។
៧	ឱ! ព្រះអម្ចាស់សូមកុំភ្លេច	ពីអំពើល្បិចជាតិអេដុំ
	បានប្រព្រឹត្តចំពោះយើងខ្ញុំ	ដែលបានឮងំក្នុងសោតា	។
	ថ្ងៃដែលក្រុងយេរូសាឡឹម	ត្រូវអស់សង្ឃឹមគេពោលថា ៖
	« ចូរកម្ទេចក្រុងនេះទៅរ៉ា	កម្ទេចលុះត្រារលំគ្រឹះ »	។
៨	រីឯក្រុងបាប៊ីឡូនវិញ	បន្តិចទៀតឯងវិនាសអស់
	ត្រូវគេបំផ្លាញគ្មានចន្លោះ	មិនសល់អ្វីសោះយ៉ាងប្រាកដ	។
	អ្នកណាធ្វើបាបឯងពេលនេះ	តបនឹងតម្រិះដែលឯងក្បត់
	ចំពោះរូបយើងមិនកំណត់	អ្នកនោះគឺពិតមានមង្គល	។
៩	អ្នកណាចាប់កូនតូចៗឯង	ចាប់មិនខ្ចីលែងមិនខ្វាយខ្វល់
	បោកទៅនឹងថ្មខ្ទេចគ្មានសល់	នឹងមានមង្គលសុខរហូត	។

ទំនុកតម្កើងលេខ ១៣៨ (១៣៧) បទកាកគតិ

១	ខ្ញុំសូមតម្កើង	ព្រះម្ចាស់ខ្ពស់ឡើង	អស់ពីដួងចិត្ត
	នៅមុខទេវតា	ខ្ញុំស្មូត្រជាបទ	តម្កើងថ្វាយថ្វាត់
		ដល់ព្រះអង្គថ្លៃ	។
២	ខ្ញុំក្រាបបែរមុខ	តម្រង់ទៅរក	វិហារប្រពៃ
	ខ្ញុំលើកតម្កើង	ព្រះនាមថ្លាថ្លៃ	ដោយព្រះហឫទ័យ
		ស្មោះស្ម័គ្រឥតស្បើយ	។
៣	នៅថ្ងៃដែលខ្ញុំ	ស្រែកអង្វរសុំ	ព្រះអង្គតបឆ្លើយ
	ព្រះអង្គប្រទាន	ឥតមានកន្តើយ	ឱ្យខ្ញុំបានស្បើយ
		ក្នុងចិត្តក្លាហាន	។
៤	ឱ! ព្រះម្ចាស់អើយ	សូមទ្រង់ផ្តល់ឱ្យ	ស្តេចទាំងប៉ុន្មាន
	នៅលើផែនដី	នាំគ្នាគ្រប់ប្រាណ	តម្កើងពេលបាន
		ឮទ្រង់សន្យា	។
៥	សូមឱ្យគេនាំ	គ្នីគ្នាច្រៀងរាំ	តម្កើងកិច្ចការ
	ថា«ព្រះអម្ចាស់	រុងរឿងអស្ចារ្យ	ឧត្តមថ្លៃថ្លា
		បំផុតគ្មានពីរ	។
៦	ទោះបីព្រះម្ចាស់	ខ្ពង់ខ្ពស់ខ្លាំងណាស់	ក៏ទ្រង់សំភី
	គិតមនុស្សលោក	គ្រប់វិនាទី	ជនកាចយាយី
		ទ្រង់ស្គាល់ពីឆ្ងាយ	។
៧	ពេលទូលបង្គំ	ជួបអាសន្នធំ	ទ្រង់ឥតជិនណាយ
	ជួយការពារខ្ញុំ	វាយខ្មាំងខ្ចាត់ខ្ចាយ	សង្គ្រោះខ្ញុំដោយ
		ឫទ្ធីបារមី	។
៨	បពិត្រព្រះម្ចាស់	ការគ្រប់យ៉ាងនេះ	ពិតជាប្រពៃ
	ព្រះអង្គប្រកប	ដោយព្រះហឫទ័យ	ករុណាក្រៃ
		ឥតបីបោះបង់	។

ទំនុកតម្កើងលេខ ១៣៩ (១៣៨) បទពាក្យ ៧

១	បពិត្រព្រះម្ចាស់ដ៏សប្បុរស	ទ្រង់ឈ្វេងយល់អស់ជម្រៅចិត្ត
	នៃទូលបង្គំដែលមានពិត	ព្រះអង្គស្គាល់ឥតសល់ចន្លោះ	។
២	ទ្រង់ជ្រាបឥតបីមានសង្ស័យ	ក្រោកឈរអង្គុយគ្រប់ទាំងអស់
	ឈ្វេងយល់គំនិតខ្ញុំឥតខ្ចោះ	ពីមុនទាំងអស់ស្រេចទៅហើយ	។
៣	ទោះបីដើរដេកធ្វើកិច្ចការ	តិចច្រើនម្តេចម្តាមិនបាត់ឡើយ
	ព្រះអង្គទ្រង់ជ្រាបអស់ទៅហើយ	សម្រាកក៏ដោយមិនកំបាំង	។
៤	ទោះជាពាក្យពេចន៍ប្រុងនឹងស្តី	ទ្រង់យល់អត្ថន័យអស់តែម្តង
	សព្វទាំងសេចក្តីដែលបម្រុង	ទុកក្នុងចិត្តផងក៏មិនសល់	។
៥	ព្រះអង្គនៅពាំងទាំងមុខក្រោយ	ការពារមិនឱ្យមានកង្វល់
	មិនឱ្យខ្ញុំជួបគ្រោះអំពល់	ព្រោះតែទ្រង់ផ្តល់បារមីថ្លៃ	។
៦	នេះគឺព្រះអង្គទ្រង់ត្រាស់ញាណ	ទើបទ្រង់ជ្រាបបានមិនសល់អ្វី
	អស្ចារ្យពេកណាស់គួរស្ញែងក្រៃ	ខ្ញុំមិនយល់ន័យដូចម្តេចសោះ	។
៧	តើទូលបង្គំអាចទៅណា	ឆ្ងាយពីភក្ត្រាព្រះអង្គនោះ
	គេចទៅទីណាមិនផុតសោះ	ព្រះអង្គជ្រាបអស់សព្វទិសា	។
៨	បើខ្ញុំនឹងឡើងទៅលើមេឃ	ក៏មិនផុតភ្នែកផុតនេត្រា
	បើទៅនៅស្ថានមនុស្សមរណា	ក៏ជួបភក្ត្រាទ្រង់ជានិច្ច	។
៩	ទោះបីជាខ្ញុំពាក់ស្លាបហោះ	ទៅកន្លែងរះព្រះអាទិត្យ
	ឬទោះបីខ្ញុំចង់រត់គេច	ទៅរស់ឯលិចនាយសមុទ្រ	។
១០	ក៏ព្រះអង្គគង់នៅទីនោះ	ឥតមានចន្លោះឬគេចផុត
	ជួយដឹកនាំខ្ញុំលែងតក់ស្លុត	ដោយបារមីឫទ្ធិដ៏ឧត្តម	។
១១	ប្រសិនបើខ្ញុំពោលឡើងថា	សូមឱ្យអន្ធិកាគ្របលើខ្ញុំ
	ពន្លឺថ្ងៃដែលនៅជិតជុំ	ប្រែក្លាយយប់ផ្តុំឥតពន្លឺ	។
១២	ទោះបីងងឹតយ៉ាងណាក្តី	ព្រះអម្ចាស់ថ្លៃនៅតែភ្លឺ
	ពេលយប់ដូចថ្ងៃជះរន្ទឺ	ងងឹតប្រែភ្លឺមានរស្មី	។
១៣	ព្រះអង្គបង្កើតខ្ញុំបានសុខ	ហើយទ្រង់បានទុកខ្ញុំក្នុងផ្ទៃ
	អ្នកម្តាយមានគុណយូរខែថ្ងៃ	សន្តោសប្រណីគ្រប់កាយា	។
១៤	ខ្ញុំសូមលើកតម្កើងព្រះអង្គ	ស្នាព្រះហស្តទ្រង់ក៏អស្ចារ្យ
	ខ្ញុំដឹងថាអ្វីគ្រប់ប្រការ	សុទ្ធតែអស្ចារ្យកើតពីទ្រង់	។
១៥	ពេលទូលបង្គំចាប់កំណើត	នៅក្នុងទីស្ងាត់លាក់កំបាំង
	ក៏មិនអាចពួននឹងព្រះអង្គ	អ្វីៗក៏ទ្រង់ជ្រាបទាំងអស់	។
១៦	កាលទូលបង្គំមិនមានខ្លួន	រូបកាយមាំមួនសាច់ឈាមស្រស់
	ព្រះអង្គទតឃើញខ្ញុំទាំងអស់	ឥតមានចន្លោះត្រង់ណាឡើយ	។
	ព្រះអង្គកំណត់ពេលផងណា	អាយុសង្ខារខ្ញុំរួចហើយ
	កត់ទុកជាស្រេចមិនកន្តើយ	មុននឹងដល់ថ្ងៃនោះមកទៀត	។
១៧	បពិត្រព្រះម្ចាស់ព្រះតម្រិះ	ព្រះអង្គជ្រៅជ្រះជាងសមុទ្រ
	ខ្ពស់ហួសអាកាសវេហាស៍ផុត	មិនអាចកំណត់ដឹងប៉ុន្មាន	។
១៨	ប្រសិនបើចិត្តខ្ញុំចង់រាប់	ក៏មិនអាចគ្រប់ទាំងអស់បាន
	ពីការអស្ចារ្យទាំងប៉ុន្មាន	មានចំនួនច្រើនជាងគ្រាប់ខ្សាច់	។
១៩	បពិត្រព្រះម្ចាស់ទ្រង់គួរតែ	ប្រហារពួកគេឱ្យខ្ទីខ្ទេច
	ទាំងពួកឃាតករសូមក្រញិច	ឱ្យគេរត់គេចឆ្ងាយពីខ្ញុំ	។
២០	សត្រូវព្រះអង្គនាំគ្នាយក	នាមព្រះអង្គមកបោកបន្លំ
	គេពោលព្រះនាមទ្រង់ជាធំ	ដើម្បីបន្លំធ្វើអាក្រក់	។
២១	បពិត្រព្រះម្ចាស់អើយខ្ញុំស្អប់	អ្នកធ្វើមិនគាប់ចិត្តគម្រក់
	ចង់ចងគំនុំព្រះសង្គ្រោះ	បះបោរទុយ៌សប៉ងប្រឆាំង	។
២២	ខ្ញុំស្អប់ពួកគេខ្លាំងបំផុត	ពួកអ្នកមានចិត្តហ៊ានប្រណាំង
	ខ្ញុំបានចាត់ទុកគេជាខ្មាំង	តែងតែប្រឆាំងរូបខ្ញុំផ្ទាល់	។
២៣	ឱ! ព្រះម្ចាស់អើយសូមពិនិត្យ	ឱ្យបានស្គាល់ចិត្តផុតកង្វល់
	ទាំងល្បងមើលខ្ញុំឱ្យអស់ខ្វល់	ដើម្បីបានយល់អ្វីខ្ញុំគិត	។
២៤	សូមព្រះជាម្ចាស់ទតមើលតើ	ខ្ញុំមិនបានដើរខុសពីក្រឹត្យ
	ជួយដឹកនាំខ្ញុំឱ្យជួបជិត	មាគ៌ាប្រណីតនៅអស់កល្ប	។

ទំនុកតម្កើងលេខ ១៤០ (១៣៩) បទព្រហ្មគីតិ

២	ឱព្រះជាអម្ចាស់	សូមរំដោះខ្ញុំឱ្យផុត
	ពីអ្នកមានពុតត្បុត	ពួកទុច្ចរិតពាលឃោរឃៅ	។
៣	គេនាំគ្នាប្រព្រឹត្ត	រឿងឧក្រិដ្ឋទាំងល្ងង់ខ្លៅ
	មិនស្គាល់ពីរាក់ជ្រៅ	ខុសឬត្រូវចង់តែឈ្លោះ	។
៤	អណ្តាតគេសាហាវ	មុតដូចដាវពោលទ្រគោះ
	មាត់គេពេញដោយពិស	ដូចសត្វពស់គួរឱ្យខ្លាច	។
៥	ឱ! ព្រះជាអម្ចាស់	សូមសន្តោសដោយអំណាច
	ការពារខ្ញុំឱ្យរួច	ជនកំហូចចង់រំលំ	។
៦	គេខំអួតបំប៉ោង	ដាក់ចម្រូងពួនសំងំ
	អន្ទាក់ដាក់បន្លំ	ចាំចាប់ខ្ញុំរាល់តែថ្ងៃ	។
៧	ខ្ញុំទូលព្រះម្ចាស់ថា	ទ្រង់គឺជាព្រះម្ចាស់ថ្លៃ
	សូមមេត្តាប្រណី	ស្តាប់សម្តីខ្ញុំវាចា	។
៨	បពិត្រព្រះអម្ចាស់	សូមសង្គ្រោះដោយចេស្តា
	ពេលច្បាំងនឹងបច្ចា	ទ្រង់ពាំងការមិនឱ្យសូន្យ	។
៩	ឱ! ព្រះជាម្ចាស់អើយ	សូមកុំឱ្យពួកទុរជន
	សម្រេចផែនការមុន	ឱ្យគេសូន្យបរាជ័យ	។
១០	កុំឱ្យអ្នកឡោមព័ទ្ធ	ខ្ញុំមិនភ្លាត់អរសប្បាយ
	តែសូមជួយប្រែក្លាយ	ក្តីអន្តរាយដាក់ទៅគេ	។
១១	ឱ្យមានភ្លើងឆ្អិនឆ្អៅ	ឆេះសន្ធៅស្រោចបំបែរ
	សូមច្រានទម្លាក់គេ	មិនរួចទេភ្លើងឆេះប្រាណ	។
១២	ឯអ្នកបង្កាច់មួល	នៅមិនស្រួលពុំសុខសាន្ត
	ទុក្ខសោកតាមរំខាន	ញាំញីប្រាណមិនឈប់ឈរ	។
១៣	ខ្ញុំដឹងថាព្រះម្ចាស់	តាមសង្គ្រោះទាំងនគរ
	ព្រះអង្គរកយុត្តិធម៌	អ្នកក្រីក្រមិនភ័យព្រួយ	។
១៤	រីឯអ្នកសុចរិត	គេខំខិតតម្កើងស្ទួយ
	ព្រះម្ចាស់មានតែមួយ	គ្មានទុក្ខព្រួយពេលជួបភក្ត្រ	។

ទំនុកតម្កើងលេខ ១៤១ (១៤០) បទកាកគតិ

១	ឱព្រះអម្ចាស់	ខ្ញុំសូមប្រកាស	ទូលពាក្យអង្វរ
	សូមផ្ទៀងព្រះកាណ៌	ស្តាប់ស្នូរថ្ងួចថ្ងូរ	កុំ​​បង្អង់យូរ
		យាងមកជួយខ្ញុំ	។
២	សូមឱ្យវាចា	អធិដ្ឋានគ្រប់គ្រា	នៃទូលបង្គំ
	បានឡើងទៅដល់	ព្រះម្ចាស់ឧត្តម	ដូចផ្សែងហុយងំ
		ពីគ្រឿងក្រអូប	។
	រូបខ្ញុំលើកដៃ	អធិដ្ឋានរាល់ថ្ងៃ	ដូចតង្វាយគាប់
	ថ្វាយនៅពេលល្ងាច	ក្រអូបឈ្ងុយឈ្ងប់	ជះក្លិនសាយសព្វ
		ទៅគ្រប់ទិសា	។
៣	ឱ! ព្រះអម្ចាស់	សូមមេត្តាខ្ទាស់	មាត់ខ្ញុំផងណា
	កុំឱ្យនិយាយ	ពាក្យដែលមុសា	ពោលមិនបានការ
		ជាពាក្យអាក្រក់	។
៤	សូមកុំបណ្តោយ	កាយចិត្តខ្ញុំឱ្យ	ធ្វើរឿងគម្រក់
	ដែលមិនគប្បី	កុំទៅស្មោះស្ម័គ្រ	ជប់លៀងព័ទ្ធពាក់
		ពួកអ្នកទុច្ចរិត	។
៥	បើអ្នកជាល្អ	សុចរិតយុត្តិធម៌	ប្រដៅដោយចិត្ត
	ស្មោះត្រង់ស្រឡាញ់	ពោរពេញអាណិត	ខ្ញុំមិនបាច់គិត
		ការល្អសមរម្យ	។
	កុំឱ្យទឹកអប់	ពួកពាលហូរសព្វ	ស្រោចលើក្បាលខ្ញុំ
	ខ្ញុំខំស្រែករក	ព្រះម្ចាស់ឧត្តម	ជួយទូលបង្គំ
		ប្រឆាំងពួកពាល	។
៦	មេដឹកនាំនោះ	ត្រូវគេច្រានចុះ	ទៅក្នុងជំរាល
	តាមក្រហែងថ្ម	បច្ចាមិត្តយល់	ច្បាស់អស់គ្មានសល់
		ពាក្យខ្ញុំស្តីថា ៖	។
៧	« ដូចដីដែលប្រេះ	រលួយរលេះ	ពីគ្នាយ៉ាងណា
	ឱ្យស្ថានអ្នកស្លាប់	បើកចំហទ្វារ	លេបឆ្អឹងពួកវា
		ដែលនៅរាយប៉ាយ »	។
៨	បពិត្រព្រះម្ចាស់	ខ្ញុំខំប្រឹងណាស់	សម្លឹងទៅឆ្ងាយ
	រកព្រះជានិច្ច	ផ្ញើជីវិតកាយ	សូមកុំបណ្តោយ
		ឱ្យខ្ញុំបាត់បង់	។
៩	សូមជួយការពារ	រូបខ្ញុំគ្រប់គ្រា	ពីគ្រោះទាំងពួង
	ដែលគេលបដាក់	អន្ទាក់ខ្ញុំផង	កុំឱ្យខ្ញុំលង់
		ក្នុងដៃទុច្ចរិត	។
១០	តែសូមឱ្យគេ	ជាប់កុំគេចកែ	អន្ទាក់នោះពិត
	ដែលគេចង់ដាក់	រូបខ្ញុំរួមរិត	ឱ្យពួកគេស្ថិត
		ជាប់ខ្លួនឯងវិញ	។
	ឯទូលបង្គំ	រួចផុតទុក្ខធំ	ឥតមានទោម្នេញ
	ផុតពីច្រវាក់	គេចាក់គេដេញ	រួចស្រឡះវិញ
		ឥតមានព្រួយភ័យ	។

ទំនុកតម្កើងលេខ ១៤២ (១៤១) បទកាកគតិ

២	ខ្ញុំខំបន្លឺ	សម្លេងរន្ទឺ	អង្វរព្រះម្ចាស់
	ស្រែកដោយទទួច	ឱ្យទ្រង់ឮច្បាស់	ព្រោះរូបខ្ញុំនេះ
		វេទនាពេកក្រៃ	។
៣	ខ្ញុំទូលព្រះអង្គ	ឱ្យបានជ្រាបផង	នូវអស់អត្ថន័យ
	ពីពាក្យត្អូញត្អែរ	ទុក្ខសោករីងរៃ	វេទនារាល់ថ្ងៃ
		ស្ទើរក្ស័យជីវិត	។
៤	ពេលទូលបង្គំ	មានទុក្ខក្រៀមក្រំ	បាក់ធា្លក់ទឹកចិត្ត
	ព្រះអង្គជ្រាបច្បាស់	ពីដំណើរពិត	ពួកគេជុំជិត
		ដាក់អន្ទាក់ខ្ញុំ	។
៥	សូមទ្រង់ទតចុះ	គ្មាននរណាសោះ	ឃើញទូលបង្គំ
	គ្មានទីជ្រកកោន	ឱ្យបានសមរម្យ	នរណាក៏ពុំ
		រវល់ឡើយណា	។
៦	បពិត្រព្រះម្ចាស់	ខ្ញុំស្រែកពោលនេះ	អង្វរទ្រង់ថា
	«ទ្រង់ជាជម្រក	នៅក្នុងលោកា	គ្មានអ្វីអស្ចារ្យ
		ជាងព្រះអង្គឡើយ	។
៧	សូមទ្រង់ប្រណី	សម្តែងហឫទ័យ	កុំបីកន្តើយ
	ដ្បិតទូលបង្គំ	ទាល់ច្រកអស់ហើយ	រំដោះឱ្យស្បើយ
		ពីជនអប្រីយ៍	។
៨	សូមដោះលែងខ្ញុំ	ផុតពីទុក្ខធំ	មានសិទ្ធិសេរី
	ដើម្បីខ្ញុំអាច	ថ្កើងព្រះនាមល្បី	ចំណោមប្រុសស្រី
		នៃជនសុចរិត	។

ទំនុកតម្កើងលេខ ១៤៣ (១៤២) បទពាក្យ ៧

១	ឱ! ព្រះម្ចាស់អើយសូមសណ្តាប់	ពាក្យខ្ញុំរ៉ាយរ៉ាប់ទូលអង្វរ
	ផ្ទៀងព្រះកាណ៌ស្តាប់កុំឈប់ឈរ	សូមឆ្លើយតបតដោយប្រណី	។
២	សូមកុំចាប់ទោសយកកំហុស	អ្នកបម្រើស្មោះទៅកាត់ក្តី
	ដ្បិតគ្មានជនសុចរិតប្រពៃ	ចំពោះភ័ក្ត្រព្រះអង្គឡើយ	។
៣	ពួកខ្មាំងសត្រូវតាមយាយី	ពីគ្រប់ទិសទីមិនកន្តើយ
	ឃុំខ្ញុំក្នុងទីងងឹតហើយ	ដូចអ្នកក្សិណក្ស័យយូរណាស់ណា	។
៤	ខ្ញុំបាក់ធ្លុះធ្លាក់អស់ទឹកចិត្ត	ទាល់ទាំងគំនិតក្នុងកាយា
	ថយទាំងកម្លាំងខ្វះប្រាជ្ញា	មិនដឹងគិតថាត្រូវធ្វើម៉េច ?	។
៥	ខ្ញុំនឹកទៅដល់ជំនាន់មុន	សញ្ជឹងគូរគន់គ្រប់ភារកិច្ច
	ជាស្នាព្រះហស្តល្អបណ្តាច់	ឥតមានកលល្បិចគ្មានទើសទាល់	។
៦	ដៃខ្ញុំអង្វរខ្លួនបែរក្រាប	ដាក់កាយឱ្យទាបមុខព្រះម្ចាស់
	ដូចដីហួតហែងបែកប្រេះអស់	ស្ងួតរីងរាំងខ្សោះព្រោះគ្មានទឹក	។
៧	ឱ! ព្រះជាអម្ចាស់ខ្ញុំអើយ	សូមជួយតបឆ្លើយឱ្យញយញឹក
	ខ្ញុំបាត់បង់អស់ធ្លាក់ទឹកចិត្ត	កុំលាក់បាំងបិទភក្ត្រនឹងខ្ញុំ	។
	ព្រោះតែខ្ញុំដូចជាមនុស្ស	ដែលធ្លាក់ក្នុងជ្រោះជ្រៅសន្លឹម
	គ្មាននរណាជួយអស់សង្ឃឹម	ដូចមេឃរលឹមគ្មានរស្មី	។
៨	សូមទ្រង់បង្ហាញធម៌មេត្តា	សន្តោសករុណាត្រាប្រណី
	ខ្ញុំផ្ញើរូបកាយជីវិតក្តី	លើព្រះម្ចាស់ថ្លៃរួចទៅហើយ	។
	សូមប្រោសប្រទានឱ្យខ្ញុំស្គាល់	មាគ៌ានិមលកុំកន្តើយ
	ដ្បិតទូលបង្គំផ្ចង់ចិត្តហើយ	ព្រះជាម្ចាស់អើយមិនបោះបង់	។
៩	ឱ! ព្រះអម្ចាស់សូមរំដោះ	ខ្ញុំឱ្យផុតគ្រោះផុតពីខ្មាំង
	សត្រូវយាយីតាមប្រឆាំង	ខ្ញុំសូមព្រះអង្គពួនជ្រកផង	។
១០	សូមជួយបង្ហាត់ពត់បង្រៀន	ខ្ញុំព្រមតាមបានព្រះបំណង
	ដ្បិតទ្រង់ជាព្រះល្អហ្មត់ហ្មង	ដឹកនាំខ្ញុំផងដាក់ផ្លូវល្អ	។
១១	ឱ! ព្រះម្ចាស់អើយសូមគាំពារ	យល់ដល់នាមាព្រះបវរ
	ប្រទានជីវិតខ្ញុំកំដរ	ឱ្យបានរស់តទៅទៀតផង	។
	សូមជួយនាំខ្ញុំឱ្យចេញផុត	ពីភាពងងឹតអាប់មួរហ្មង
	គ្រោះថ្នាក់តូចធំអាសន្នផង	ដោយហឫទ័យទ្រង់សុចរិត	។
១២	ដោយព្រះអង្គមានធម៌មេត្តា	ហឫទ័យករុណាស្មោះអាណិត
	សូមកម្ទេចពួកបច្ចាមិត្ត	ឱ្យវិនាសផុតសាបសូន្យទៅ	។

ទំនុកតម្កើងលេខ ១៤៤ (១៤៣) បទព្រហ្មគីតិ

១	សូមលើកតម្កើងព្រះ	ជាអម្ចាស់ដ៏ឧត្តម
	ជាថ្មដានៃខ្ញុំ	ធំរឹងមាំមួនបំផុត	។
	ព្រះអង្គបា​នបង្ហាត់	ខ្ញុំចេះស្ទាត់ការប្រយុទ្ធ
	ធ្វើសឹកឥតភ័យស្លុត	ចេញតយុទ្ធខ្មាំងជិតជុំ	។
២	ទ្រង់សម្តែងហឫទ័យ	ករុណាក្រៃចំពោះខ្ញុំ
	ជាកំពែងរឹងមាំ	ការពារខ្ញុំយ៉ាងអង់អាច	។
	ព្រះអង្គជាជម្រក	ខ្ញុំមកជ្រកឥតភ័យខ្លាច
	ទ្រង់ប្រគល់អំណាច	ឱ្យខ្ញុំអាចមានថ្វីដៃ	។
៣	ឱ! ព្រះជាអម្ចាស់	តើមនុស្សគឺជាអ្វី
	ទើបទ្រង់យកព្រះទ័យ	ត្រាប្រណីមិនឈរឈប់	។
	តើមនុស្សលោកីយ៍	គេជាអ្វីទើបទ្រង់សព្វ
	ព្រះទ័យមិនឈរឈប់	ទោះថ្ងៃយប់នឹករិះរេ	។
៤	មនុស្សលោកប្រៀបផ្ទឹម	មួយដង្ហើមប៉ុណ្ណោះទេ
	អាយុជីវិតគេ	មិនទៀងទេគ្រប់ៗគ្នា	។
៥	ឱ! ព្រះជាអម្ចាស់	សូមរូតរះផ្ទៀងមេឃា
	សូមពាល់ភ្នំនានា	ឱ្យខ្ទ័រខ្ទារផ្សែងហុយឡើង	។
៦	សូមធ្វើផ្លេកបន្ទោរ	កម្ចាត់ចោលខ្មាំងឱ្យប៉ើង
	សូមទ្រង់បាញ់ព្រួញភ្លើង	ឱ្យរលើងទ័ពខ្មាំងផង	។
៧	សូមទ្រង់លាតព្រះហស្ត	មករំដោះនិងស្រោចស្រង់
	ផុតសមុទ្រជ្រោះជ្រង	អំណាចផងជនទុច្ចរិត	។
៨	គេមិនដែលនិយាយ	សេចក្តីអ្វីជាពាក្យពិត
	មិនគោរពសម្បថ	ដែលគេស្បថប្រែឥតន័យ	។
៩	បពិត្រព្រះម្ចាស់អើយ	ខ្ញុំច្រៀងថ្វាយនូវបទថ្មី
	និងប្រគុំតន្ត្រី	ពិរោះក្រៃថ្វាយព្រះម្ចាស់	។
១០	ព្រះអង្គបានប្រទាន	ឱ្យស្តេចមានជ័យជំនះ
	ព្រះអង្គបានសង្គ្រោះ	ដាវីឌរស់មានសិរី	។
១១	សូមសង្គ្រោះរំដោះ	ខ្ញុំឱ្យរស់ផុតពីដៃ
	ជនបរទេសអប្រីយ៍	ដែលនិយាយពាក្យមិនពិត	។
១២	សូមឱ្យកូនប្រុសៗ	យើងទាំងអស់ស្រស់ប្រណីត
	លូតលាស់ល្អហ្មត់ហ្មង	ដូចរុក្ខជាតិស្រស់ខៀវខ្ចី	។
	ឯកូនស្រីសំណព្វ	ល្អគួរគាប់ស្រស់ប្រិមប្រីយ៍
	ដូចទេពអប្សរស្រី	ល្អប្រពៃស្រស់ផូរផង់	។
១៣	សូមឱ្យក្នុងជង្រុក	យើងមានផ្ទុកភោគផលផង
	ចៀមក្នុងហ្វូងត្រសង	កើនច្រើនដងរាប់ម៉ឺនពាន់	។
១៤	ហ្វូងគោក៏ចម្រើន	មានកូនច្រើនមិនថយអន់
	គ្មានបាត់គ្មានគេប្លន់	គ្មានអាសន្នតាមទីផ្សារ	។
១៥	ប្រជាណាទទួល	ពរនិមលដូច្នេះណា
	កើតមានក្តីសុខា	មង្គលថ្លាល្អត្រចះ	។
	ប្រជាណាគោរព	ព្រះម្ចាស់ទុកធ្វើជាព្រះ
	នោះគេនឹងឃើញច្បាស់	ជួបប្រទះតែមង្គល	។

ទំនុកតម្កើងលេខ ១៤៥ (១៤៤) បទកាកគតិ

១	បពិត្រព្រះម្ចាស់	ជាក្សត្ររបស់	រូបទូលបង្គំ
	ពេលនេះខ្ញុំកោត	នាមព្រះឧត្តម	អស់កល្បយូរលង់
		ជារៀងដរាប	។
២	ខ្ញុំសូមតម្កើង	ព្រះអង្គខ្ពស់ឡើង	តទៅរៀងរៀប
	ខ្ញុំសូមសរសើរ	ព្រះនាមល្អគាប់	អស់កល្បដរាប
		រហូតតទៅ	។
៣	ព្រះម្ចាស់ឧត្តម	ប្រសើរសក្តិសម	ខ្ពង់ខ្ពស់ពេកកូវ
	យើងលើកតម្កើង	ព្រះនាមជាផ្លូវ	ពេលនេះតទៅ
		រកអ្វីផ្ទឹមគ្មាន	។
៤	សូមឱ្យមនុស្ស​	ទាំងស្រីទាំងប្រុស	នៅគ្រប់ជំនាន់
	លើកតម្កើងស្នា	ព្រះហស្តព្រះអង្គ	ការអស្ចារ្យផង
		ដែលទ្រង់ប្រព្រឹត្ត	។
៥	ខ្ញុំរាប់ខ្ញុំរៀប	ពីអនុភាព	បារមីមានឫទ្ធិ
	សិរីរុងរឿង	ព្រះអង្គមានពិត	ខ្ញុំសញ្ជឹងគិត
		គ្រប់ស្នាព្រះហស្ត	។
៦	គេនឹងថ្លាថ្លែង	អានុភាពស្ញប់ស្ញែង	បារមីខ្ពង់ខ្ពស់
	ខ្ញុំក៏ថ្លាថ្លែង	កិច្ចការទាំងអស់	ជាស្នាព្រះហស្ត
		ទ្រង់ធ្វើហូរហែ	។
៧	គេនឹងរំលឹក	ទាំងថ្ងៃយប់ព្រឹក	តទៅឥតប្រែ
	ព្រមទាំងប្រកាស	ក្តីសប្បុរសដែរ	សុចរិតឥតល្ហែ
		របស់ព្រះអង្គ	។
៨	ព្រះជាអម្ចាស់	ប្រកបដោយព្រះ	ហឫទ័យត្រចង់
	ប្រណីសន្តោស	ករុណាហ្មត់ហ្មង	អត់ធ្មត់កន្លង
		អាណិតមេត្តា	។
៩	ព្រះជាអម្ចាស់	ព្រះទ័យសប្បុរស	លើមនុស្សលោកា
	ទ្រង់មានព្រះទ័យ	សន្តោសករុណា	មនុស្សគ្រប់អាត្មា
		រស់ពេញផែនដី	។
១០	បពិត្រព្រះម្ចាស់	សត្វលោកទាំងអស់	មានច្រើនពេកក្រៃ
	នាំគ្នាតម្កើង	រុងរឿងសិរី	រាស្រ្តទាំងប្រុសស្រី
		ក៏ថ្កើងទ្រង់ដែរ	។
១១	គេនឹងរៀបរាប់	ព្រះរាជ្យគួរគាប់	រុងរឿងស្ថិតស្ថេរ
	របស់ព្រះអង្គ	ឥតមានប្រួលប្រែ	អានុភាពឥតកែ
		ព្រះអង្គនៅគង់	។
១២	ដើម្បីឱ្យមនុស្ស	ទាំងស្រីទាំងប្រុស	គ្រប់គ្នាបានដឹង
	ពីការអស្ចារ្យ	របស់ព្រះអង្គ	រស្មីរឿងរុង
		ចិញ្ចែងចិញ្ចាច	។
១៣	ព្រះរាជ្យព្រះអង្គ	ស្ថិតនៅយូរលង់	ពេញដោយអំណាច
	គ្រងរាជ្យអស់កល្ប	ព្រោះទ្រង់ជាស្តេច	បារមីអង់អាច
		ស្ថិតយូរវស្សា	។
	ព្រះអម្ចាស់តែង	គោរពឥតក្លែង	បន្ទូលសន្យា
	អ្វីដែលទ្រង់ធើ្វ	សុទ្ធតែអស្ចារ្យ	សប្បុរសមេត្តា
		ករុណាអាសូរ	។
១៤	ព្រះអង្គលើកស្ទួយ	អ្នកហេវហត់ព្រួយ	ដួលយំស្រែកថ្ងូរ
	ទ្រង់លើកអ្នកអស់	សង្ឃឹមឱ្យឈរ	ពង្រឹងជំហរ
		ឱ្យល្អវិញបាន	។
១៥	បពិត្រព្រះម្ចាស់	សត្វលោកទាំងអស់	ចាំមិនហ៊ានខាន
	ដោយចិត្តសង្ឃឹម	ពួកគេនឹងបាន	អាហារគ្រប់ប្រាណ
		តាមពេលកំណត់	។
១៦	ទ្រង់មានព្រះទ័យ	ទូលាយពេកក្រៃ	ពេញដោយប្រាកដ
	ព្រះអង្គប្រទាន	ដល់អ្នកក្រខ្សត់	បានឆ្អែតគ្រប់មាត់
		តាមចិត្តប្រាថ្នា	។
១៧	ព្រះជាអម្ចាស់	ធ្វើសព្វទាំងអស់	នូវរាល់កិច្ចការ
	ដោយព្រះហឫទ័យ	សុចរិតថ្លៃថ្លា	សន្តោសករុណា
		ទ្រង់បានប្រព្រឹត្ត	។
១៨	ព្រះអម្ចាស់គង់	នៅជិតអែបអង្គ	កៀកកើយនែបនិត្យ
	នឹងអ្នកអង្វរ	ដោយល្អសុទ្ធចិត្ត	រកព្រះអង្គពិត
		មិនយាងទៅណា	។
១៩	ទ្រង់បានសម្រេច	តាមបំណងកិច្ច	ដែលគេប្រាថ្នា
	របស់អស់អ្នក	កោតខ្លាចចេស្តា	ព្រះអង្គស្ទុះស្ទា
		ហើយសង្គ្រោះគេ	។
២០	អ្នកដែលស្រឡាញ់	ព្រះម្ចាស់ពោរពេញ	ឥតក្រឡះប្រែ
	ទ្រង់នឹងគ្រប់គ្រង	ការពារថ្នមថែ	ហើយទ្រង់តែងតែ
		បំផ្លាញមនុស្សខូច	។
២១	ខ្ញុំសូមថ្លែងឡើង	សរសើរតម្កើង	គ្មានចិត្តលាក់លួច
	តម្កើងព្រះម្ចាស់	សត្វលោកធំតូច	ទាំងអស់ជួយលើក
		ព្រះនាមព្រះអង្គ	។

ទំនុកតម្កើងលេខ ១៤៦ (១៤៥) បទពាក្យ ៧

១	ឱ! ព្រះអម្ចាស់អើយខ្ញុំសូម	តម្កើងទាំងព្រមដោយចិត្តស្មោះ
	ឥតមានលាក់លៀមទុកកៀនកោះ	បញ្ចេញដោយស្មោះអស់ពីចិត្ត	។
២	ខ្ញុំសូមសរសើរលើកតម្កើង	ព្រះម្ចាស់ខ្ពស់ឡើងមួយជីវិត
	ខ្ញុំស្មូត្រចម្រៀងមានបែបបទ	ឱ្យបានចាំស្ទាត់ពេលនៅរស់	។
៣	កុំទុកចិត្តពួកមនុស្សលោក	មានច្រើនគរគោកចិត្តមិនស្មោះ
	កុំទុកចិត្តមេដឹកនាំនោះ	ពុំអាចសង្គ្រោះបានឡើយណា	។
៤	ពេលដែលដង្ហើមគេត្រូវផុត	ជីវិតរលត់អស់សង្ខារ
	ក្លាយជាធូលីដីអសារ	ទាំងគម្រោងការរលាយព្រម	។
៥	អ្នកដែលព្រះលោកយ៉ាកុបជួយ	សង្គ្រោះផុតព្រួយហើយសង្ឃឹម
	ទុកចិត្តលើព្រះគ្មានអ្វីផ្ទឹម	រស់ដោយញញឹមគ្មានភិតភ័យ	។
៦	ព្រះអង្គបង្កើតទាំងផ្ទៃមេឃ	ផែនដីល្អឯកធំពេកក្រៃ
	សមុទ្រព្រមទាំងអស់អ្វីៗ	សន្យាថ្លាថ្លៃទ្រង់មិនភ្លេច	។
៧	ព្រះអង្គរកយុត្តិធម៌ឱ្យ	ដល់អ្នកទន់ខ្សោយមិនកែគេច
	ចែកអាហារដល់អ្នកឃ្លានស្រេច	ហើយទ្រង់សម្រេចលែងអ្នកទោស	។
៨	ព្រះអម្ចាស់ប្រោសមនុស្សខ្វាក់	ហើយលើកអស់អ្នកដែលនៅរស់
	អស់ក្តីសង្ឃឹមគ្មានអ្វីសោះ	ស្រឡាញ់អ្នកស្មោះត្រង់ល្អជា	។
៩	ព្រះម្ចាស់គាំទ្រជនបរទេស	មេម៉ាយនិងអស់ក្មេងកំព្រា
	តែទ្រង់ធ្វើឱ្យកម្រោងការ	ជនខូចពាលាវិនាសបង់	។
១០	ព្រះអម្ចាស់ទ្រង់នឹងគ្រងរាជ្យ	អស់កល្បជានិច្ចតយូរលង់
	ឱ! ក្រុងស៊ីយ៉ូនដ៏រឿងរុង	ព្រះអ្នកនឹងគ្រងរាជ្យតទៅ	។

ទំនុកតម្កើងលេខ ១៤៧ (១៤៦) បទព្រហ្មគីតិ

១	យើងស្មូត្របទថ្វាយព្រះ	ជាអម្ចាស់របស់យើង
	សរសើរលើកតម្កើង	ដ៏រុងរឿងល្អប្រពៃ	។
២	ព្រះម្ចាស់បានសង់ក្រុង	ល្អឧត្តុង្គឧត្តមក្រៃ
	យេរូសាឡឹមថ្មី	អ្នកខ្ចាត់ខ្ចាយនាំមកវិញ	។
៣	អ្នកដែលមានវិបត្តិ	គ្រាំគ្រាចិត្តគិតមិនចេញ
	ទ្រង់ប្រោសផុតទោម្នេញ	របួសវិញជាសះស្បើយ	។
៤	ព្រះអង្គអាចរាប់បាន	ផ្កាយឥតមានខ្វះមួយឡើយ
	ដាក់ឈ្មោះឱ្យរួចហើយ	មិនភ្លេចឡើយស្គាល់ទាំងអស់	។
៥	ព្រះម្ចាស់របស់យើង	សែនថ្កុំថ្កើងឧត្តមខ្ពស់
	ចេស្តាខ្លាំងមុតមោះ	ព្រះតម្រិះធំធេងក្រៃ	។
៦	ព្រះអម្ចាស់គាំទ្រ	ជនក្រីក្រខ្សត់រីងរៃ
	ទ្រង់បន្ទាបដល់ដី	ជនអប្រីយ៍ធ្វើអាក្រក់	។
៧	ចូរនាំគ្នាច្រៀងអរ	ថ្លែងអំណរគុណព្រះម្ចាស់
	ចូរដេញពិណថ្វាយព្រះ	ជាអម្ចាស់នៃយើងផង	។
៨	ទ្រង់ឱ្យពពកបិទ	គ្របជុំជិតអស់តែម្តង
	បាំងទាំងផ្ទៃមេឃផង	អាប់មួរហ្មងគ្មានរស្មី	។
	ព្រះអង្គបានឱ្យភ្លៀង	ធ្លាក់ទាត់ទៀងលើផែនដី
	ស្មៅលាស់ស្រស់ខៀវខ្ចី	ពាសពេញដីនៅលើភ្នំ
៩	ទ្រង់ផ្តល់ទាំងអាហារ	អស់សព្វសាសត្វតូចធំ
	កូនក្អែកដែលស្រែកយំ	ទ្រង់ថ្នាក់ថ្នមផ្តល់ចំណី	។
១០	ព្រះអង្គមិនដែលគាប់	ព្រះទ័យជាប់នឹងសេះថ្មី
	ទ្រង់មិនពេញព្រះទ័យ	មនុស្សពេញដីដែលខ្លាំងក្លា	។
១១	តែព្រះអង្គទ្រង់គាប់	ព្រះទ័យជាប់នឹងមនុស្សណា
	កោតខ្លាចព្រះចេស្តា	ផ្ញើជីវ៉ាលើព្រះអង្គ	។
១២	ក្រុងយេរូសាឡឹម	កុំស្ងាត់ស្ងៀមនៅរេរង់
	ព្រមទាំងក្រុងស៊ីយ៉ូន	ចូរត្រៀមខ្លួនថ្កើងព្រះម្ចាស់	។
១៣	ដ្បិតព្រះអង្គការពារ	អ្នករាល់គ្នាបានសុខណាស់
	ទ្រង់ឱ្យពរដល់រាស្រ្ត	ដែលរស់ពាសពេញទីក្រុង	។
១៤	ទ្រង់ប្រទានទឹកដី	មានសេរីសុខត្រចង់
	សន្តិភាពគ្រប់ជ្រុង	ស្រូវបំរុងច្រើនមហិមា	។
១៥	នៅលើផ្ទៃផែនដី	ស្រស់ប្រិមប្រីយ៍ទ្រង់បញ្ជា
	ផ្សព្វផ្សាយគ្រប់ទិសា	ពីបញ្ជាព្រះអម្ចាស់	។
១៦	ព្រះអង្គឱ្យទឹកកក	ធ្លាក់ចុះមកច្រើនដេរដាស
	សន្សើមត្រជាក់ណាស់	ក៏ធ្លាក់ចុះតាមបញ្ជា	។
១៧	ព្រះអង្គធ្វើឱ្យព្រឹល	ធ្លាក់មិនខ្ជិលច្រើនមហិមា
	ឱ្យមានធាតុរងា	តើនរណាអាចទ្រាំបាន ?	។
១៨	ពេលទ្រង់មានបន្ទូល	ធ្វើឱ្យព្រឹលទាំងប៉ុន្មាន
	ទឹកកកគ្រប់ទីស្ថាន	រលាយបានជាទឹកអស់	។
	ធ្វើឱ្យមានទាំងខ្យល់	បោកវិលវល់មិនឈប់សោះ
	បក់យកទឹកទាំងនោះ	ហូរតាមជ្រោះទៅមិនសល់	។
១៩	ទ្រង់សម្តែងឱ្យពូជ	លោកយ៉ាកុបស្តាប់បន្ទូល
	ក្រឹត្យវិន័យនិមល	ឱ្យអ៊ីស្រាអែលបានដឹង	។
២០	ព្រះអង្គពុំបញ្ជា	សព្វកិច្ចការអស់ទាំងហ្នឹង
	ឱ្យជាតិសាសន៍ផ្សេងដឹង	វិន័យទ្រង់នោះសោះឡើយ	។

ទំនុកតម្កើងលេខ ១៤៨ បទពាក្យ ៧

១	ចូរលើកតម្កើងព្រះអម្ចាស់	ទ្រង់គឺជាព្រះដ៏វិសុទ្ធ
	អ្នកដែលនៅស្ថានខ្ពស់បំផុត	បញ្ចេញពាក្យពិតថ្កើងព្រះអង្គ	។
២	ឱ! ពួកទេវទូតទាំងអស់អើយ	ចូរសរសើរហើយតម្កើងផង
	ទាំងពួកទេវតាកុំរេរង់	សរសើរព្រះអង្គព្រះនៃអ្នក	។
៣	ឯព្រះអាទិត្យនិងព្រះច័ន្ទ	កុំនៅអែរអន់ឬស្ទើរស្ទាក់
	តម្តើងព្រះអង្គជាព្រះអ្នក	ដាក់ខ្ពស់ដល់ថ្នាក់សួគ៌វិមាន	។
	អស់ផ្កាយទាំងឡាយដែលផ្លេកភ្លឺ	រស្មីរន្ទឺគ្រប់ទីស្ថាន
	ចូរកោតសរសើរព្រះថ្កើងថ្កាន	គោរពឱ្យបានដោយផ្ចិតផ្ចង់
៤	ឱ! មេឃដែលនៅខ្ពស់បំផុត	សរសើរក្រាបលុតថ្កើងព្រះអង្គ
	ទាំងទឹកដែលនៅលើមេឃផង	សូមជួយថ្កើងអង្គព្រះជាម្ចាស់	។
៥	ចូរឱ្យអ្វីៗសព្វសារពើ	តម្កើងសរសើរព្រះខ្ពង់ខ្ពស់
	ពេលព្រះអង្គមានបន្ទូលនោះ	អ្វីៗទាំងអស់កើតព្រោងព្រាត	។
៦	ព្រះអង្គបានតាំងសព្វអ្វីៗ	ស្ថិតស្ថេរប្រពៃឥតបីឃ្លាត
	ព្រះអង្គដាក់ច្បាប់មួយថែមទៀត	មិនឱ្យរវាតប្រែប្រួលថ្មី	។
៧	ចូរលើកតម្កើងសរសើរព្រះ	ទ្រង់ជាអម្ចាស់លើផែនដី
	សមុទ្រនិងសត្វទាំងអស់ក្តី	តម្កើងម្ចាស់ថ្ងៃកុំរួញរា	។
៨	ចូរព្រឹលផ្សែងអ័ព្ទនិងទឹកកក	ដែលធ្លាប់ធ្លាក់មកច្រើនមហិមា
	ភ្លើងដែលធ្លាប់ឆេះព្យុះព្យោមា	ធ្វើតាមបញ្ជានៃព្រះអង្គ	។
៩	ភ្នំតូចភ្នំធំជិតឆ្ងាយ	ដើមឈើទាំងឡាយកុំរេរង់
	និងដើមគគីរទាំងឡាយផង	កុំបីសៅហ្មងជួយតម្កើង	។
១០	សត្វព្រៃសត្វស្រុកទាំងម្រឹគា	ទាំងសត្វលូនវារសត្វដើរជើង
	បក្សាបក្សីចូរក្រោកឡើង	សរសើរតម្កើងព្រះខ្ពង់ខ្ពស់	។
១១	អស់ស្តេចទាំងឡាយលើផែនដី	ប្រជាប្រុសស្រីគ្រប់ទាំងអស់
	ទាំងអ្នកដឹកនាំថ្នាក់ទាបខ្ពស់	នាំគ្នាទាំងអស់ថ្កើងម្ចាស់ថ្លៃ	។
១២	យុវជននារីចាស់ជរា	កូនក្មេងនាំគ្នាលើកសិរី
	ព្រះម្ចាស់ខ្ពង់ខ្ពស់លើលោកីយ៍	មិនអាចរកអ្វីប្រៀបស្មើបាន	។
១៣	ចូរកោតសរសើរនាមព្រះម្ចាស់	ជាព្រះខ្ពង់ខ្ពស់លើសអស់ស្ថាន
	ព្រះនាមព្រះអង្គល្អថ្កើងថ្កាន	ពាសពេញទីស្ថានមេឃនិងដី	។
១៤	ព្រះអង្គបានប្រោសអស់ប្រជា	រាស្រ្តទាំងអស់គ្នាមានសេរី
	កម្លាំងមាំមួនខ្លាំងពេកក្រៃ	មិនឱ្យមានអ្វីមករំខាន	។
	អស់អ្នកដែលជឿងលើព្រះអង្គ	គឺជារាស្រ្តទ្រង់ដ៏ចំណាន
	អ៊ីស្រាអែលអើយអ្នកនឹងបាន	ខ្ពស់មុខសុខសាន្តតទៅអើយ	។

ទំនុកតម្កើងលេខ ១៤៩ បទកាកគតិ

១	ចូរច្រៀងបទថ្មី	ថ្វាយព្រះម្ចាស់ថ្លៃ	ប្រសើរកន្លង
	ចូរច្រៀងតម្កើង	ព្រះនាមព្រះអង្គ	ក្នុងចំណោមផង
		អ្នកដែលជឿព្រះ	។
២	ចូរឱ្យជនជាតិ	ស្រាអែលខ្មីឃ្មាត	រីករាយទាំងអស់
	ដោយសារព្រះអង្គ	បានបង្កើតមនុស្ស	ទាំងស្រីទាំងប្រុស
		ពាសពេញផែនដី	។
	សូមប្រជាជន	ក្នុងក្រុងស៊ីយ៉ូន	អបអរប្រពៃ
	នឹងព្រះមហាក្សត្រ	គ្រងលើផែនដី	ជាស្តេចល្បាញល្បី
		របស់ផងខ្លួន	។
៣	សូមនាំគ្នារាំ	ថ្វាយព្រះឧត្តម	កុំវេះគេចពួន
	តម្កើងព្រះនាម	ឱ្យបានសមសួន	វាយក្រាប់ផ្ទួនៗ
		ទាំងដេញពិណថ្វាយ	។
៤	ដ្បិតព្រះអម្ចាស់	សព្វព្រះទ័យណាស់	នឹងរាស្រ្តទាំងឡាយ
	ទ្រង់តែងសង្គ្រោះ	ដឹកនាំត្រួសត្រាយ	ហើយតែងខ្វល់ខ្វាយ
		ជួយអ្នកទន់ទាប	។
៥	សូមឱ្យអស់អ្នក	សង្ឃឹមជឿជាក់	លើព្រះដរាប
	នាំគ្នាសប្បាយ	ប្រសើរលើសលប់	តម្កើងសាយសព្វ
		សិរីព្រះម្ចាស់	។
	ទោះជាពេលយប់	ក៏គេមិនឈប់	គេនៅប្រកាស
	ទាំងលើកតម្កើង	សិរីព្រះម្ចាស់	ឱ្យបានខ្ពង់ខ្ពស់
		ទាំងអំណរផង	។
៦	សូមទាំងអស់គ្នា	សរសើរគ្រប់គ្រា	កុំបីរំលង
	មាត់ពោលពាក្យល្អ	ដៃកាន់ដាវផង	ទុក្ខសោកមួរហ្មង
		វិនាសខ្ចាត់ខ្ចាយ	។
៧	ឯការសងសឹក	ជាតិច្រើនសន្ធឹក	ឱ្យគេអន្តរាយ
	និងការដាក់ទោស	ជនជាតិទាំងឡាយ	វិនាសខ្ចាត់ខ្ចាយ
		រលាយបែកបាក់	។
៨	គេយកមកផង	ដើម្បីនឹងចង	ស្តេចនឹងច្រវាក់
	ហើយយកទាំងឃ្នាង	ទាំងខ្នោះអន្ទាក់	ដាក់ពួកអស់អ្នក
		ដឹកនាំពួកគេ	។
៩	ឯការដាក់ទោស	ជាតិសាសន៍ទាំងនោះ	ត្រឹមត្រូវឥតប្រែ
	តាមការសម្រេច	ព្រះមិនខុសទេ	ពួកវាត្រូវតែ
		ទទួលទោសនោះ	។
	កិច្ចការទាំងអស់	សក្តិសមឥតខ្ចោះ	គឺជាកិត្តិយស
	ដ៏សែនរុងរឿង	ដល់អ្នកទាំងអស់	ដែលជឿលើព្រះ
		មិនសាបសូន្យឡើយ	។

ទំនុកតម្កើងលេខ ១៥០ បទព្រហ្មគីតិ

១	ចូរកោតសរសើរព្រះ	ជាអម្ចាស់ក្នុងវិហារ
	ជាទីដ៏សក្ការ	សែនអស្ចារ្យឥតមានហ្មង	។
	ក្នុងលំហអាកាស	វិសេសណាស់មាំមួនផង
	ដំណាក់ល្អកន្លង	នៃព្រះអង្គក្នុងអាកាស	។
២	ចូរសរសើរគ្រប់គ្នា	អ្វីដែលជាស្នាព្រះហស្ត
	តម្កើងព្រះអម្ចាស់	ដ៏ខ្ពង់ខ្ពស់គ្មានអ្វីស្មើ	។
៣	ចូរប្រគុំភ្លេងភ្លាត់	ច្រៀងសព្វបទកុំស្ទាក់ស្ទើរ
	ចាប៉ីដេញបណ្តើរ	ពិណសរសើរកំដរផង	។
៤	វាយក្រាប់រាំចាក់ក្បាច់	ល្អបណ្តាច់ថ្វាយព្រះអង្គ
	វាយឃឹមផ្លុំខ្លុយផង	លើកតម្កើងព្រះជាម្ចាស់	។
៥	វាយស្គរឱ្យពិរោះ	តម្កើងព្រះដោយស្ម័គ្រស្មោះ
	វាយស្គរលាន់ទាំងអស់	សរសើរព្រះជាម្ចាស់យើង	។
៦	សូមឱ្យអ្វីទាំងអស់	ដែលនៅរស់មានដង្ហើម
	ចូរសរសើរតម្កើង	ព្រះម្ចាស់យើងរហូតទៅ	។

ព្រះចេស្តារបស់ព្រះជាម្ចាស់ បទព្រហ្មគីតិ

(ដំណើរឆ្ពោះទៅកាន់សេរីភាព ១៥,១-៤.៧-១៣.១៧-១៨)

១	ខ្ញុំស្រែកច្រៀងថ្វាយព្រះ	ជាអម្ចាស់ដែលមានជ័យ
	លើទ័ពសេះល្បាញល្បី	លិចលង់ក្ស័យក្នុងសមុទ្រ	។
២	ព្រះម្ចាស់ជាកម្លាំង	ខ្ញុំឈ្នះខ្មាំងមិនភ័យស្លុត
	ខ្ញុំសូមឱនក្រាបលុត	ទាំងច្រៀងបទថ្កើងព្រះអង្គ	។
	ព្រោះទ្រង់បានសង្គ្រោះ	ខ្ញុំឱ្យរស់ផុតសៅហ្មង
	ព្រះឪពុកខ្ញុំផង	ព្រះខ្ពស់ខ្ពង់លើសអ្វីៗ	។
៣	ទ្រង់ជាវីរបុរស	ប្រសើរខ្ពស់លើផែនដី
	អង់អាចពូកែក្រៃ	ព្រះនាមថ្លៃ “ព្រះអម្ចាស់	។
៤	ព្រះអង្គបានធ្វើឱ្យ	កងទ័ពថយវិនាសអស់
	ទាំងទ័ពទាំងរទេះ	ត្រូវវិនាសក្នុងសមុទ្រ	។
	ទាហានអេស៊ីបខ្លាំង	ពូកែច្បាំងចៀសមិនផុត
	ជីវិតត្រូវរលត់	ក្នុងសមុទ្រជ្រៅក្រៃលែង	។
៥	ព្រះអង្គមានចេស្តា	ខ្លាំងអស្ចារ្យគួរស្ញប់ស្ញែង
	រុងរឿងខ្លាំងក្រៃលែង	អ្នកប្រឆាំងទ្រង់ផ្តួលអស់	។
	ពេលព្រះអង្គពិរោធ	ព្រះអង្គក្រោធដូចភ្លើងឆេះ
	ពួកគេត្រូវរលេះ	ដូចភ្លើងឆេះស្មៅចំបើង	។
៦	ពេលខ្យល់បក់បោកមក	ទឹករលកផ្តុំគ្នាឡើង
	ទំនប់ទឹករលើង	មកនៅគឿងសមុទ្រជាន់	។
៧	ខ្មាំងសត្រូវពោលថា	ខ្ញុំដេញគេតាមឱ្យទាន់
	ខ្ញុំទទួលជយភណ្ឌ	ច្រើនគ្រប់គ្រាន់ទើបចាត់ការ	។
៨	ព្រះអង្គទ្រង់ផ្លុំខ្យល់	ទឹកវិលវល់គ្រប់កាយា
	ពួកគេលិចមរណា	ក្នុងជលសាដូចសំណ	។
៩	បពិត្រព្រះអម្ចាស់	ប្រសើរណាស់ពេញបវរ
	តើមានព្រះណាល្អ	យុត្តិធម៌ដូចព្រះអង្គ ?	។
	ទ្រង់វិសុទ្ធរឿងរុង	អស្ចារ្យខ្លាំងពេកកន្លង
	គួរស្ញែងខ្លាចព្រឺផង	ហើយមានទាំងឫទ្ធីខ្ពស់	។
១០	ព្រះអង្គក្តៅព្រះទ័យ	គ្មានប្រណីគិតស្រណោះ
	ពេលទ្រង់លើកព្រះហស្ត	ផែនដីប្រេះស្រូបគេឈឹង	។
១១	ព្រះអង្គបានលោះលា	រាស្រ្តគ្រប់គ្នាមានរំពឹង
	ដឹកនាំគេតម្រង់	ដំណាក់ទ្រង់ដ៏ឧត្តម	។
១២	ព្រះអង្គនាំប្រជា	រាស្រ្តគ្រប់គ្នាទៅលើភ្នំ
	ជាចំណែកដ៏ធំ	កន្លែងសំណាក់ព្រះអង្គ	។
	ឱ! ព្រះអម្ចាស់អើយ	ព្រះអង្គហើយដែលបានសង់
	ទីសក្ការៈត្រចង់	ព្រះហស្តទ្រង់កសាងផ្ទាល់	។
១៣	ព្រះម្ចាស់នឹងគ្រងរាជ្យ​​	ពេញអំណាចអស់កប្បកល្ប
	ជានិច្ចគ្មានពិភាល់	ជារៀងរាល់អង្វែងទៅ	។

ទំនុកតម្កើងរបស់លោកម៉ូសេ បទពាក្យ ៧

(ទុតិយកថា ៣២,១-១២)

១	ឱ! ផ្ទៃមេឃអើយចូរត្រងត្រាប់	ពាក្យខ្ញុំថ្លែងប្រាប់ជាដំណឹង
	ផែនដីអើយចូរអ្នកខំប្រឹង	ស្តាប់ឱ្យបានដឹងខ្ញុំបរិយាយ	។
២	សូមឱ្យពាក្យខ្ញុំទាំងប៉ុន្មាន	ដែលបានទូន្មានរៀងរាល់ថ្ងៃ
	ឱ្យដូចសន្សើមភ្លៀងធ្លាក់ថ្មី	រុក្ខជាតិខៀវខ្ចីស្រស់បំព្រង	។
៣	ខ្ញុំនឹងប្រកាសពីព្រះនាម	មិនព្រមនៅស្ងៀមមិនភ្លេចម្តង
	លើកតម្កើងភាពខ្ពស់កន្លង	រុងរឿងគ្មានហ្មងព្រះនៃយើង	។
៤	ព្រះអម្ចាស់ប្រៀបដូចថ្មដា	ជាផ្ទាំងសិលាដ៏សែនរឹង
	មាគ៌ាព្រះអង្គសុចរិតត្រង់	បរិសុទ្ធឥតហ្មងឥតមានខ្ចោះ	។
៥	ប៉ុន្តែព្រះអង្គទ្រង់ជ្រាបថា	អ្នកទាំងអស់គ្នាក្បត់ទាំងអស់
	ដោយអ្នកមានចិត្តមិនត្រង់ស្មោះ	ព្រះអង្គផាត់អស់មិនទុកនៅ	។
	លែងរាប់លែងរកលែងទុកថា	ជាបុត្រធីតា​​​ជាកូនចៅ
	អ្នករាល់គ្នាមានចិត្តអាស្រូវ	វៀចវេរមិនត្រូវក្បត់ព្រះអង្គ	។
៦	ឱ! ជនលេលាឥតប្រាជ្ញអើយ	ចុះហេតុម្តេចឡើយមិនលះបង់
	ព្រះគុណព្រះមានច្រើនកន្លង	តោងគិតផ្គូផ្គងគិតនឹកនា	។
	ទ្រង់ជាបិតាដែលបង្កើត	ឱ្យមានកំណើតកើតជន្មា
	ឱ្យអ្នកបានក្លាយជាប្រជា	ជាតិមាំអស្ចារ្យខ្លាំងទៀតផង	។
៧	ចូរអ្នករាល់គ្នានឹកនាចាំ	គិតអំពីឆ្នាំដែលកន្លង
	ឪពុកដូនតាកុំមានហ្មង	រ៉ាយរ៉ាប់ប្រាប់ផងហេតុការណ៍គ្រប់	។
៨	ពេលព្រះខ្ពង់ខ្ពស់ប្រទានដី	ជាកេរថ្លាថ្លៃទ្រព្យសំណព្វ
	ពេលទ្រង់បំបែកមនុស្សលោកសព្វ	ថែមទាំងកំណត់ព្រំដែនឱ្យ	។
	ព្រះអង្គប្រទានតាមចំនួន	ឱ្យបានសមសួនមិនបណ្តោយ
	គ្នាតិចបានតិចមិនឱ្យធ្លោយ	គ្នាច្រើនទ្រង់ឱ្យធំល្វើយល្វឹង	។
៩	ព្រះម្ចាស់ជ្រើសយកអ៊ីស្រាអែល	ទុកជារាស្រ្តផ្ទាល់នៃព្រះអង្គ
	ទាំងពូជយ៉ាកុបថែមទៀតផង	ទុកជាកេរទ្រង់ដ៏ថ្កើងថ្កាន	។
១០	ព្រះម្ចាស់រកឃើញអ៊ីស្រាអែល	នៅតាមទីវាលរហោស្ថាន
	ក្នុងដីហួតហែងព្រៃស្មសាន	សុទ្ធតែតិរច្ឆានស្នាក់នៅជុំ	។
	តែព្រះអង្គបានបីបាច់ថែ	ថ្នាក់ថ្នមរូបគេហើយអប់រំ
	ការពារក្រសោបឱបនៅជុំ	គេរស់សុខដុមផុតវេទនា	។
១១	ព្រះអង្គការពារនិងណែនាំ	ឱ្យដើរត្រង់ចំផ្លូវសាស្តា
	ដូចសត្វឥន្ទ្រីយ៍ជាបក្សា	ត្រដាងស្លាបវាបាំងកូនបាន	។
១២	មានតែព្រះម្ចាស់មួយព្រះអង្គ	ដឹកនាំរាស្រ្តទ្រង់យ៉ាងចំណាន
	ឱ្យគេរស់នៅយ៉ាងសុខសាន្ត	ព្រះផ្សេងមិនបានដូចទ្រង់ឡើយ	។

ទំនុកតម្កើងរបស់នាហាណ្ណា បទកាកគតិ

(លោកសាមូអែលភាគមួយ ២,១-១០)

១	ព្រះម្ចាស់ប្រទាន	ចិត្តខ្ញុំឱ្យមាន	អំណរសប្បាយ
	ព្រោះព្រះអង្គលើក	ខ្ញុំខ្ពស់ពេកក្រៃ	ខ្ញុំអាចនិយាយ
		តទល់ពួកខ្មាំង	។
២	គ្មាននរណាម្នាក់	វិសុទ្ធជាជាក់	ដូចជាព្រះអង្គ
	ឥតមាននរណា	ប្រសើរដូចទ្រង់	ជាថ្មជួយបាំង
		ដូចព្រះយើងទេ	។
៣	កុំអួតបំប៉ោង	ពោលពាក្យកាចកោង	ព្រហើនដៀលជេរ
	ដ្បិតព្រះជាម្ចាស់	ថ្លឹងថ្លែងរិះរេ	វិនិច្ឆ័យឥតប្រែ
		តាមអំពើមនុស្ស	។
៤	អ្នកខ្លាំងពូកែ	ព្រះអង្គបំបែរ	បំបាក់ទាំងអស់
	បំផ្លាញទាំងធ្នូ	តែទ្រង់សន្តោស	ប្រទានដល់មនុស្ស
		កម្លាំងទន់ខ្សោយ	។
៥	ពួកអ្នកដែលមាន	អាហារគ្រប់គ្រាន់	ឥឡូវគេធ្លោយ
	ធ្លាក់ខ្លួនវេទនា	ខ្វះខាតមុខក្រោយ	គ្មានអ្វីនឹងឱ្យ
		ចម្អែតក្រពះ	។
	ឯអ្នកធ្លាប់ឃ្លាន	បែរទៅជាមាន	អាហារមិនខ្វះ
	គេបរិភោគឆ្អែត	បរិបូណ៌ពេញពាស	មានច្រើនដេរដាស
		លែងមុខស្រពោន	។
	មិនតែប៉ុណ្ណោះ	ព្រះអង្គសន្តោស	ស្រីអារគ្មានកូន
	មិនឱ្យដាច់ពូជ	វិនាសសាបសូន្យ	អាចសម្រាលកូន
		បានប្រាំពីរដង	។
៦	ជីវិតមនុស្ស	ត្រូវស្លាប់ឬរស់	ស្រេចលើព្រះអង្គ
	គេត្រូវធ្លាក់ទៅ	ស្ថានអ្នកស្លាប់ផង	ឬក៏បានឡើង
		លើទ្រង់ចាត់ចែង	។
៧	មនុស្សមានក្រ	អាក្រក់ឬល្អ	មិនមែនខ្លួនឯង
	ព្រះម្ចាស់បន្ទាប	ឬក៏លើកឡើង	ព្រះអង្គចាត់ចែង
		តាមព្រះហឫទ័យ	។
៨	ទ្រង់លើកមនុស្ស	ទុរគតស្រីប្រុស	ពីធូលីដី
	ដកអ្នកកម្សត់	វេទនាក្រក្រី	នោះគឺដើម្បី
		ឱ្យស្មើអ្នកធំ	។
	ឱ្យបានគ្រងរាជ្យ	ពេញដោយអំណាច	រុងរឿងឧត្តម
	ដ្បិតព្រះអម្ចាស់	តាំងគ្រឹះរឹងមាំ	ផែនដីដ៏ធំ
		មិនរលំឡើយ	។
៩	ព្រះអង្គមើលថែ	ជីវិតពួកគេ	ផុតទុក្ខល្ហែល្ហើយ
	គឺអ្នកស្មោះត្រង់	ព្រះអង្គនោះហើយ	ទ្រង់មិនកន្តើយ
		ថ្នាក់ថ្នមបមបី	។
	ឯជនអាក្រក់	ចិត្តខ្មៅកខ្វក់	ទុយ៌សអប្រិយ៍
	គេនឹងវិនាស	ក្នុងពេលដ៏ខ្លី	ដ្បិតគេគ្មានជ័យ
		ដោយកម្លាំងទេ	។
១០	ព្រះអង្គបញ្ចេញ	រន្ទះដេញបាញ់	ទៅលើពួកគេ
	ព្រះម្ចាស់វិនិច្ឆ័យ	ទៅផែនដីដែរ	ទ្រង់គ្រប់គ្រងថែ
		មិនប្រែទាល់សោះ	។
	ព្រះអង្គប្រទាន	អានុភាពឱ្យមាន	ដល់ក្សត្រអង្គនោះ
	ប្រទានអំណាច	ចេស្តាទាំងអស់	ដែលទ្រង់ថ្កើងយស
		ចាក់ប្រេងអភិសេក	។

យើងនាំគ្នាដើរក្រោមពន្លឺរបស់ព្រះជាម្ចាស់ បទព្រហ្មគីតិ

(ព្យាការីអេសាយ ២,២-៥)

២	ថ្ងៃក្រោយព្រះអម្ចាស់	នឹងប្រែផ្លាស់ព្រះដំណាក់
	លើកភ្នំធ្លាប់គង់ស្នាក់	ហើយទ្រង់ដាក់លើភ្នំថ្មី	។
	ដើម្បីឱ្យភ្នំនោះ	បានខ្ពង់ខ្ពស់លើសគេក្រៃ
	ប្រជាជាតិទាំងឡាយ	អរសប្បាយឡើងហូរហែ	។
៣	មានទាំងប្រជាជន	ច្រើនពេកពន់ទៅផងដែរ
	ពោលថាយើងដង្ហែ	ឡើងទៅក្បែរភ្នំព្រះម្ចាស់	។
	យើងនាំគ្នាឡើងទៅ	ដើរតាមផ្លូវមាគ៌ាព្រះ
	ប្រញាប់ឆាប់រូតរះ	ដំណាក់ព្រះលោកយ៉ាកុប	។
	ព្រះអង្គនឹងប្រដៅ	យើងស្គាល់ផ្លូវមាគ៌ាគ្រប់
	ឱ្យស្គាល់ឱ្យសេពគប់	ឱ្យដើរសព្វតាមគន្លង	។
	ដ្បិតការប្រៀនប្រដៅ	អ្នកល្ងង់ខ្លៅគ្រាកន្លង
	ចេញពីស៊ីយ៉ូនផង	ល្អហ្មត់ហ្មងឥតមានទាស់	។
	ព្រះបន្ទូលប៉ុន្មាន	ល្អថ្កើងថ្កានឥតមានខ្ចោះ
	ចេញមកពីព្រះឱស្ឋ	ដ៏ស្ម័គ្រស្មោះក្រុងសាឡឹម	។
៤	ព្រះអង្គជាចៅក្រម	ដ៏ឧត្តមមិននៅស្ងៀម
	សម្រុះសម្រួលភ្លាម	ផ្អាកសង្គ្រាមកាប់ប្រល័យ	។
	ឱ្យឈប់ទាស់ទែងគ្នា	ចេះគាំពារត្រាប្រណី
	យកដាវធ្លាប់ប្រល័យ	មករំលាយផាលនង្គ័ល	។
	គ្រប់សាសន៍ឈប់តតាំង	ឈប់ហាត់ច្បាំងនៅហ្នឹងថ្កល់
	លែងចង់ឈ្នះចង់ជល់	លំពែងពលធ្វើកណ្ដៀវ	។
៥	ឱ! បងប្អូនកូនចៅ	ញាតិពង្សផៅរស់រញៀវ
	លោកយ៉ាកុបស្រស់ស្រាវ	ជ្រករញៀវក្រោមម្លប់ព្រះ	។

សូមអរព្រះគុណព្រះជាអម្ចាស់ដែលបានសង្គ្រោះប្រជាជនអ៊ីស្រាអែល បទពាក្យ ៧

(ព្យាការីអេសាយ ១២,១-៦)

១	ឱ! ព្រះម្ចាស់អើយទូលបង្គំ	លើកហត្ថប្រណម្យសូមតម្កើង
	គ្រាមុនព្រះអង្គពិរោធយើង	ឥឡូវព្រះអង្គសម្រាលទុក្ខ	។
២	ព្រះអម្ចាស់ជាព្រះសង្គ្រោះ	ជីវិតខ្ញុំរស់ស្គាល់តែសុខ
	លែងភ័យលែងខ្លាចលែងកើតទុក្ខ	ពីនេះទៅមុខពឹងលើព្រះ	។
	ដ្បិតព្រះអម្ចាស់ជាកម្លាំង	ខ្ញុំអាចតតាំងអាចយកឈ្នះ
	ខ្ញុំនឹងច្រៀងថ្វាយព្រះអម្ចាស់	ព្រោះទ្រង់សង្គ្រោះដល់រូបខ្ញុំ	។
៣	ព្រះម្ចាស់សង្គ្រោះអ្នករាល់គ្នា	ផុតទុក្ខគ្រប់គ្រារស់សុខដុម
	ចូរទៅដងទឹកត្រជាក់ជុំ	ចេញពីជើងភ្នំសង្គ្រោះផង	។
៤	ចូរអរព្រះគុណព្រះអម្ចាស់	ហើយចូរប្រកាសនាមព្រះអង្គ
	ថ្លែងស្នាព្រះហស្តអស្ចារ្យទ្រង់	ប្រាប់ប្រជាជនផងទាំងឡាយ	។
៥	ចូរស្មូត្រទំនុកតម្កើងថ្វាយ	ព្រះអម្ចាស់ថ្លៃគ្រប់ៗកាយ
	ដ្បិតការអស្ចារ្យច្រើនពេកក្រៃ	ឱ្យមនុស្សលើដីបានដឹងផង	។
៦	អុះឱ! អ្នកក្រុងស៊ីយ៉ូនអើយ	ចូរកុំកន្តើយស្រែករំពង
	ដោយអរសប្បាយដ្បិតព្រះអង្គ	វិសុទ្ធឥតហ្មងព្រះនៃយើង	។

ព្រះជាម្ចាស់ផ្តល់សន្តិភាពឱ្យប្រជាជន បទកាកគតិ

(ព្យាការីអេសាយ ២៦,១-៤.៧-៩.១២)

១	យើងមានក្រុងមួយ	មាំឥតភ័យព្រួយ	ព្រោះព្រះម្ចាស់បាន
	ប្រទាននូវការ	សង្គ្រោះគ្រប់ប្រាណ	ដូចកំពែងបាន
		ការពាររ៉ាប់រង	។
២	ចូរយើងបើកទ្វារ	កុំបីរួញរា	កុំឱ្យមានហ្មង
	ឱ្យប្រជាជាតិ	សុចរិតទាំងពួង	ស្ម័គ្រស្មោះកន្លង
		បានចូលមកជិត	។
៣	បពិត្រព្រះម្ចាស់	ព្រះអង្គទ្រង់ប្រោស	ដល់ប្រជាជាតិ
	មានក្តីសុខសាន្ត	ឥតបីឃ្លៀងឃ្លាត	ទាំងជីវិតទៀត
		ផ្ញើព្រះឥតភ្លេច	។
៤	ចូរមានសង្ឃឹម	ដោយក្តីញញឹម	លើព្រះជានិច្ច
	ទាំងកាយជីវិត	ឥតមានពេលភ្លេច	ជាថ្មរំលេច
		ស្ថិតស្ថេរអស់កល្ប	។
៧	បពិត្រព្រះម្ចាស់	អស្ចារ្យពេកណាស់	ទ្រង់បង្ហាញដល់
	មនុស្សសុចរិត	បានដឹងបានស្គាល់	មាគ៌ានិមល
		សែនល្អកន្លង	។
៨	ឱ! ព្រះអម្ចាស់	យើងខ្ញុំទាំងអស់	ជីវិតផ្ញើទ្រង់
	ហើយសូមដើរតាម	មាគ៌ារឿងរុង	ដែលព្រះអង្គទ្រង់
		ត្រួសត្រាយទុកស្រាប់	។
	ចិត្តយើងគ្រប់គ្នា	តែងតែប្រាថ្នា	ថ្លែងមិនឈរឈប់
	ព្រះនាមព្រះអង្គ	ដែលល្បីសាយសព្វ	ពាសពេញលើភព
		ប្រសើរកន្លង	។
៩	ទោះជាពេលយប់	ចង់ជ្រកក្រោមម្លប់	បារមីនៃទ្រង់
	ខ្ញុំខំស្វះស្វែង	រកតែព្រះអង្គ	តាំងពីព្រឹកព្រាង
		ឥតមានសំចៃ	។
	ព្រះអង្គដាក់ទោស	ទៅដល់មនុស្ស	នៅលើផែនដី
	ស្របទៅតាមការ	ដែលទ្រង់វិនិច្ឆ័យ	នោះគេស្គាល់ក្តី
		យុតិ្តធម៌សុចរិត	។
១២	បពិត្រព្រះម្ចាស់	ប្រសើរពេកណាស់	ទ្រង់តែងអាណិត
	ផ្តល់ក្តីសុខសាន្ត	អ្វីខ្ញុំប្រព្រឹត្ត	ដែលមានមកពិត
		គឺទ្រង់សម្រេច	។

ឱព្រះជាម្ចាស់អើយ! យើងខ្ញុំរង់ចាំតែព្រះអង្គមួយ បទកាកគតិ

(ព្យាការីអេសាយ ៣៣,១៣-១៦)

១៣	ឱ! អ្នកដែលនៅ	ស្រុកឆ្ងាយៗត្រូវ	នាំគ្នាប្រុងស្តាប់
	អំពីកិច្ចការ	ដែលយើងធ្វើស្រាប់	ត្រូវខំត្រងត្រាប់
		ស្តាប់ទាំងអស់គ្នា	។
	ឯអ្នកដែលនៅ	ជិតៗនេះត្រូវ	កុំនៅរួញរា
	ត្រូវទទួលស្គាល់	បារមីឫទ្ធា	អានុភាពចេស្តា
		យើងខ្លាំងក្លាក្រៃ	។
១៤	នៅក្រុងស៊ីយ៉ូន	អ្នកបាបញ័រខ្លួន	រន្ធត់ភិតភ័យ
	ពួកទមិឡតក់ស្លុត	ញ័រអស់ជើងដៃ	គេពោលស្រដី
		ស្តីតាមគំនិត	។
១៥	ថាមានតែអ្នក	ដែលប្រព្រឹត្តជាក់	មាគ៌ាសុចរិត
	និងអ្នកនិយាយ	តែពាក្យដែលពិត	ទើបអាចស្ថេរស្ថិត
		កៀកកិតនៅជាប់	។
	គឺអ្នកមិនធ្វើ	ទៅតាមអំពើ	ហឹង្សាមិនគាប់
	មិនរកកំរៃ	ប្រវ័ញ្ចគៃកិប	មិនទទួលយក
		សំណូកទៀតផង	។
១៦	មនុស្សបែបនេះ	នឹងបាននៅរស់	កន្លែងខ្ពស់ខ្ពង់
	មានថ្មរឹងមាំ	ជ្រកកោនទៀតផង	អាហារគ្រប់គ្រាន់
		ទាំងទឹកមិនខ្វះ	។

ទំនុតម្កើងរបស់ព្យាការីអេស៊េគីអែល បទកាកគតិ

(ព្យាការីអេសាយ ៣៨,១០-១៥.១៧-២០)

១០	ខ្ញុំនឹកគិតថា	នឹងមានវាសនា	រស់ពាក់កណ្តាល
	អាយុនៃមនុស្ស	មិនត្រេកត្រអាល	នៅស្ថានកណ្តាល
		ទៅទៀតបានឡើយ	។
១១	ខ្ញុំនឹកគិតថា	លែងឃើញភក្ត្រា	អម្ចាស់ទៀតហើយ
	លែងឃើញទាំងមុខ	លែងទាំងឆ្លងឆ្លើយ	ឱមនុស្សម្នាអើយ
		ខ្ញុំលាក្សិណក្ស័យ	។
១២	ជីវិតខ្ញុំត្រូវ	ឃ្លាតចាកឆ្ងាយទៅ	ផុតអាយុខៃ
	ដូចជាគង្វាល	រើគ្មានសំចៃ	ជំរំអាស្រ័យ
		ស្នាក់នៅពេលមុន	។
	ព្រះម្ចាស់ធ្វើឱ្យ	ជីវិតខ្ញុំផុយ	នាពេលសាយ័ណ្ហ
	ដូចជាងតម្បាញ	ត្បាញចប់គ្រប់គ្រាន់	រូតរះបន្ទាប់
		មូរក្រណាត់ទុក	។
១៣	ខ្ញុំត្រូវវិនាស	មុនពេលថ្ងៃរះ	នៅមិនស្រណុក
	ឈឺពេញទាំងកាយ	រស់ដូចទូលទុក្ខ	ដូចសិង្ហសម្រុក
		ចាប់ជាចំណី	។
	ឱព្រះម្ចាស់អើយ	ចាប់ពីថ្ងៃហើយ	លុះដល់រាត្រី
	ព្រះអង្គធ្វើឱ្យ	ជីវិតខ្ញុំក្ស័យ	ដេកនៅក្នុងដី
		ជារៀងដរាប	។
១៤	ខ្ញុំស្រែកខ្ញុំយំ	ដូចត្រចៀកកាំ	ខ្ញុំថ្ងូរដូចព្រាប
	ភ្នែកខ្ញុំស្រវាំង	មើលមិនឃើញទៀត	សូមព្រះម្ចាស់ឆ្លៀត
		ជួយផងព្រះអើយ	។
១៥	ឱ្យខ្ញុំនិយាយ	អ្វីខ្លះទូលថ្វាយ	ទើបព្រះអង្គឆ្លើយ
	គឺទ្រង់ធ្វើទុក្ខ	ពុំមានល្ហែល្ហើយ	ប្រាសដេកលើខ្នើយ
		មិនលក់ព្រួយចិត្ត	។
១៧	ឥឡូវទ្រង់ប្រោស	ឱ្យខ្ញុំជាសះ	ព្រោះទ្រង់អាណិត
	ប្រទានឱ្យខ្ញុំ	រស់មានជីវិត	ទុក្ខព្រួយខ្ញុំបាត់
		សែនអរព្រឺព្រួច	។
	ទ្រង់សព្វព្រះទ័យ	ករុណាប្រណី	រំដោះខ្ញុំរួច
	ពីដៃមច្ចុរាជ	អំពើបាបខូច​​	ខ្ញុំសែនអរព្រួច
		រួចផុតល្ហែល្ហើយ	។
១៨	អ្នកស្លាប់អស់ជន្ម	មិនអាចអរគុណ	ព្រះអង្គបានឡើយ
	រួមទាំងមច្ចុរាជ	ទៀតផងក៏ដោយ	គ្មានសង្ឃឹមឡើយ
		ពឹងលើព្រះអង្គ	។
១៩	មានតែមនុស្ស	មានជីវិតរស់	ស្ថិតស្ថេរគង់វង្ស
	ទើបគេអាចលើក	តម្កើងព្រះអង្គ	ប្រាប់តកូនផង
		ពីព្រះទ័យស្មោះ	។
២០	ឱព្រះម្ចាស់អើយ	សូមកុំកន្តើយ	មេត្តាសង្គ្រោះ
	យើងខ្ញុំមិនភ្លេច	ដំណាក់របស់	ព្រះជាអម្ចាស់
		លេងភ្លេងរាំថ្វាយ	។

ព្រះជាម្ចាស់ជាព្រះសង្គ្រោះ បទកាកគតិ

(ព្យាការីអេសាយ ៤០,៩-១៧)

៩	អ្នកក្រុងស៊ីយ៉ូន	ទាំងចៅទាំងកូន	ចូរអ្នកកុំភ្លេច
	ឡើងលើភ្នំខ្ពស់	ចែងចាំងរំលេច	ចូរស្រែកកុំខ្លាច
		ប្រាប់ស្រុកយូដា	។
	នុះហ្ន! ព្រះម្ចាស់	ជាព្រះរបស់	អស់អ្នករាល់គ្នា
	ទ្រង់មានអំណាច	បារមីខ្លាំងក្លា	ព្រះអ្នករាល់គ្នា
		តែមួយលើលោក	។
១០	មើលហ្ន! ព្រះជា	អម្ចាស់រាល់គ្នា	ទ្រង់បានយាងមក
	ដោយព្រះបារមី	ខ្លាំងក្រៃលើលោក	ព្រះអង្គយាងមក
		ដើម្បីគ្រងរាជ្យ	។
១១	ព្រះអង្គប្រៀបបាន	គង្វាលចំណាន	ពេញដោយអំណាច
	នាំអស់ហ្វូងចៀម	រាល់ថ្ងៃព្រឹកល្ងាច	ទាំងមេកូនតូច
		កំពុងបំបៅ	។
១២	តើនរណាចេះ	អាចមានតម្រិះ	នឹងវាស់ជម្រៅ
	មហាសមុទ្រ	ធំហើយសែនជ្រៅ	វាស់រហូតទៅ
		ទាំងផ្ទៃមេឃា	។
	តើនរណាអាច	មានតម្រិះប្រាជ្ញ	អាចនឹងគណនា
	ធូលីហ្មត់ល្អិត	ថ្លឹងទាំងព្រឹក្សា	គីរីបព្វតា
		ដោយខ្លួនឯងបាន	។
១៣	តើនរណាអាច	ស្ទង់នូវញាណប្រាជ្ញ	នៃព្រះថ្កើងថ្កាន
	អាចធ្វើជាទី	ប្រឹក្សាចំណាន	ផ្តល់គំនិតបាន
		ចំពោះព្រះអង្គ	។
១៤	ទ្រង់ឥតមានសួរ	យោបល់គាប់គួរ	ឬមួយផ្តោះផ្តង
	តែទ្រង់វិនិច្ឆ័យ	ត្រឹមត្រូវកន្លង	ប្រាជ្ញាញាណផង
		ទ្រង់ចេះដឹងសព្វ	។
១៥	ប្រជាទាំងឡាយ	ដូចទឹកហូរខ្ចាយ	ដែលគេកំពប់
	គេមានតម្លៃ	បីដូចជាគ្រាប់	ធូលីគេចាប់
		យកទៅដាក់ថ្លឹង	។
	ម៉្យាងទៀតដូចកោះ	ដែលមានទាំងអស់	មិនអាចនៅនឹង
	ដូចជាធូលី	ត្រូវខ្យល់បក់វឹង	កោះគ្មានលំនឹង
		ខ្យល់កួចទៅបាត់	។
១៦	ព្រៃឈើក្នុងស្រុក	ក៏មិនល្មមទុក	ធ្វើជាសម្បត្តិ
	ឬធ្វើជាអុស	រួមទាំងសព្វសត្វ	ទាំងអស់ត្រូវបាត់
		ធ្វើយញ្ញពុំបាន	។
១៧	ចំពោះព្រះភ័ក្ត្រ	ព្រះរបស់អ្នក	ប្រជាប៉ុន្មាន
	គ្មានតម្លៃអ្វី	ថោកហួសការស្មាន	ប្រើការមិនបាន
		ឥតមានប្រយោជន៍	។

បទថ្មីថ្វាយចំពោះព្រះអម្ចាស់ដែលមានជ័យជំនះ បទពាក្យ ៧

(ព្យាការីអេសាយ ៤២,១០-១៦)

១០	ចូរច្រៀងបទថ្មីថ្វាយព្រះម្ចាស់	ទាំងអ្នកដែលរស់នៅទីឆ្ងាយ
	ផ្លូវទឹកផ្លូវគោកកោះទាំងឡាយ	តម្កើងម្ចាស់ថ្លៃកុំបង្អង់	។
១១	អ្នកភូមិក្នុងវាលរហោស្ថាន	អ្នកក្រុងប៉ុន្មានស្រែករំពង
	ទាំងកុលសម្ពន្ធអ្នកភ្នំផង	ស្រែកឱ្យខ្លាំងឡើងកុំប្រណី	។
១២	នាំគ្នាតម្កើងសិរីយស	របស់ព្រះម្ចាស់ទាំងយប់ថ្ងៃ
	តាមភូមិកៀនកោះជិតឆ្ងាយក្តី	តម្កើងម្ចាស់ថ្ងៃដោយរីករាយ	។
១៣	ព្រះម្ចាស់ស្រឡាញ់ប្រជាជន	ព្រះអង្គពេកពន់មិនជិនណាយ
	ពេលដែលទ្រង់យាងចេញទៅឆ្ងាយ	ព្រះអម្ចាស់ថ្លៃដូចអ្នកច្បាំង	។
	ព្រះអង្គយាងចេញយ៉ាងអង់អាច	ការពារឥតខ្លាចជារនាំង
	វាយសំរុកលើ សត្រូវខ្មាំង	ទទួលបានទាំងជ័យជំនះ	។
១៤	ព្រះអង្គមានព្រះបន្ទូលថា	យើងចាំវេលាមកយូរណាស់
	ឥឡូវដល់ពេលយើងប្រកាស	ឱ្យបានដឹងច្បាស់ពេលនេះម្តង	។
១៥	យើងនឹងបំផ្លាញទាំងភ្នំធំ	ភ្នំតូចរលំមិនសល់ផង
	រុក្ខជាតិក្រៀមស្វិតទាំងទឹកបឹង	ប្រែជាគោករឹងឥតមានសល់	។
១៦	អ្នកខ្វាក់ប្រាកដជាអាចដើរ	គេធ្វើដំណើរមិនអំពល់
	ទៅតាមផ្លូវដែលគេមិនស្គាល់	ជាកន្លែងដែលមិនធ្លាប់ដើរ	។
	យើងនឹងធ្វើឱ្យយប់ងងឹត	ប្រែជាភ្លឺពិតយ៉ាងប្រសើរ
	ផ្លូវទួលគន្លុកបានរាបស្មើ	ប្រជាជនដើរដោយសុខសាន្ត	។

ព្រះជាម្ចាស់ពុំព្រងើយកន្តើយឡើយ បទពាក្យ ៧

(ព្យាការីអេសាយ ៤៥,១៥-២៥)

១៥	ឱ! ព្រះជាម្ចាស់នៃយើងខ្ញុំ	ជាព្រះឧត្តមព្រះសង្គ្រោះ
	មនុស្សពិបាករកឃើញណាស់	កិត្តិនាមព្រះម្ចាស់ភ្លឺចិញ្ចែង	។
១៦	ឱ្យអស់អ្នកដែលធ្វើរូបព្រះ	ឱនក្រាបសំពះគ្មានរអែង
	ត្រូវអាម៉ាស់មុខខ្លាំងក្រៃលែង	ចេញទៅទីផ្សេងទាំងអៀនខ្មាស	។
១៧	ចំណែកជនជាតិអ៊ីស្រាអែល	គេបានដំណែលពីព្រះម្ចាស់
	គឺការសង្គ្រោះយ៉ាងជាក់ច្បាស់	គេមិនអាម៉ាស់សោះឡើយណា	។
១៨	ព្រះម្ចាស់បង្កើតទាំងផ្ទៃមេឃ	ដីធំអនេកលើលោកា
	សត្វលោកស្នាក់នៅជួបជុំគ្នា	សុខដុមរមនាគ្រប់ៗប្រាណ	។
	ហើយទ្រង់មានព្រះបន្ទូលថា	យើងនេះគឺជាព្រះថ្កើងថ្កាន
	ព្រះក្រៅពីយើងនោះគឺគ្មាន	ទាំងប្រាជ្ញាញាណទាំងបារមី	។
១៩	យើងមិននិយាយលាក់លៀមស្ងាត់	ក្នុងទីងងឹតនៃផែនដី
	យើងមិនប្រាប់ពូជយ៉ាកុបអី	ឱ្យឆាប់វិលវៃរកយើងទេ	។
	យើងជាព្រះម្ចាស់និយាយទៅ	ពាក្យត្រឹមពាក្យត្រូវឥតវៀចវេរ
	អ្វីដែលយើងប្រកាសប្រាប់គេ	មិនភូតភរទេពិតត្រឹមត្រង់	។
២០	ជនជាតិសេសសល់គ្រប់គ្នាអើយ	កុំនៅកន្តើយធ្វើរេរង់
	ត្រូវខំខ្មីឃ្មាតកុំបង្អង់	ខិតចូលមកផងឱ្យជិតគ្នា	។
	ឱ! អ្នកដែលសែងព្រះខ្លួនធ្វើ	ពីស្ពាន់ពីឈើគ្រប់អង្គា
	បួងសួងដល់ព្រះដែលវេទនា	ពួកនោះសុទ្ធជាមនុស្សល្ងង់ខ្លៅ	។
២១	ចូរអ្នករាល់គ្នាគិតមើលចុះ	ឱ្យបានធ្លាយធ្លុះការនេះទៅ
	តើនរណាបានប្រាប់ទុកនៅ	ហេតុការណ៍ដែលត្រូវកើតមាននោះ	។
	គឺមានតែយើងព្រះជាម្ចាស់	ដែលបានប្រកាសមុនប៉ុណ្ណោះ
	យើងព្រះសុចរិតព្រះសង្គ្រោះ	ក្រៅពីយើងនោះគ្មានផ្សេងឡើយ	។
២២	ឱ! អ្នកដែលរស់នៅទីឆ្ងាយ	ចូរវិលមកអាយកុំកន្តើយ
	ខិតមកជិតយើងនឹងបានស្បើយ	គឺយើងនេះហើយព្រះនៃអ្នក	។
២៣	អ្វីៗដែលយើងនិយាយមក	មិនមែនឆបោកសុទ្ធសច្ចៈ
	មិនអាចក្រឡះភូតកុហក	យើងសូមប្រាប់អ្នកដូច្នេះថា៖	។
	«មនុស្សលោកទាំអស់នឹងមកសុំ	ក្រាបថ្វាយបង្គំយើងគ្រប់គ្នា
	មនុស្សគ្រប់សញ្ជាតិនឹងសច្ចា	គោរពសន្យាបម្រើយើង»	។
២៤	គេនឹងពោលថាមានតែព្រះ	ដែលជាអម្ចាស់មួយព្រះអង្គ
	ដែលមានព្រះទ័យស្ម័គ្រស្មោះត្រង់	អ្នកប្រឆាំងទ្រង់ត្រូវអាម៉ាស់	។
២៥	ពូជពង្សអ៊ីស្រាអែលទាំងអស់	នឹងបានខ្ពង់ខ្ពស់ភ្លឺត្រចះ
	ហើយបានសុចរិតឥតប្រែផ្លាស់	ដោយសារព្រះម្ចាស់តរៀងទៅ	។

ព្រះយេស៊ូសង្គ្រោះមនុស្សលោក បទពាក្យ ៧

(ព្យាការីអេសាយ ៦១,១០-១១)

១០	ខ្ញុំមានអំណរសប្បាយខ្លាំង	ព្រោះតែព្រះអង្គស្តាប់អង្វរ
	ព្រះអង្គសង្គ្រោះខ្ញុំកំដរ	រហូតរៀងមកមិនដែលខាន	។
	លំអខ្ញុំដូចកូនកំលោះ	ពាក់មកុដស្រស់ល្អភុំផាន
	ដូចកូនក្រមុំយ៉ាងចំណាន	នៅលើវិមានថ្ងៃរៀបការ	។
១១	ដីធ្វើឱ្យគ្រាប់ពូជផ្សេងដុះ	ពន្លកសក្បុសនៅក្នុងច្បារ
	លូតលាស់ស្គុះស្គាយស្រស់យ៉ាងណា	ក្តីសុចរិតថ្លាមិនបាត់បង់	។
	និងការសរសើរលើកតម្កើង	លូតលាស់ផុសឡើងមិនបង្អង់
	ចេញពីទឹកដីល្អផូរផង់	នៅមុខទូទាំងជាតិទាំងឡាយ	។

ព្រះយេស៊ូសង្គ្រោះមនុស្សលោក បទពាក្យ ៧

(ព្យាការីអេសាយ ៦២,១-៥)

១	យើងតែងគិតគូរការពារក្រុង	ឱ្យនៅគង់វង្សមានអ្នកថែ
	យេរូសាឡឹមស៊ីយ៉ូនដែរ	យើងមិនស្ងៀមទេមិនកន្តើយ	។
	ដរាបទាល់តែក្តីសុចរិត	ចាំងចែងពេញពិតទើបធូរស្បើយ
	ដូចថ្ងៃរះពេញពន្លឺហើយ	ការសង្គ្រោះឱ្យភ្លឺដូចភ្លើង	។
២	ពេលនោះមនុស្សគ្រប់ជាតិសាសន៍	ឃើញសុចរិតច្បាស់មិនឆ្មៃឆ្មើង
	ស្តេចទាំងប៉ុន្មាននឹកឃើញឡើង	សិរីរុងរឿងនៃអ្នកដែរ	។
	ឈ្មោះចាស់ក្រុងឯងគេលែងហៅ	គេពោលសំដៅតាមគេប្រែ
	ឈ្មោះល្អសែនសមអ្វីម៉េ្លះទេ	ព្រះប្រទានគេឱ្យរុងរឿង	។
៣	ក្រុងឯងនឹងទៅជាភួងជ័យ	ប្រណីតពេកក្រៃសែនថ្កុំថ្កើង
	នឹងទៅជាមកុដរាជ្យរុងរឿង	ព្រះហស្តព្រះយើងទ្រង់កាន់កាប់	។
៤	គេនឹងលែងហៅអ្នកឯងថា	ស្រីមិនបានការមិនចំណាប់
	ស្រីប្តីបោះបង់មិនគួររាប់	គេលែងបង្អាប់ដល់អ្នកទៀត	។
	តំបន់ជុំវិញគេក៏លែង	មើលងាយហៅឯងថាចោលម្សៀត
	ថាស្ងាត់ជ្រងុំដូចព្រៃស្បាត	ដែលមានដុះសុទ្ធស្មៅទៀតទេ	។
	តែផ្ទុយទៅវិញគេនឹងហៅ	ឯងថាពាលពៅបងសូមស្នេហ៍
	តំបន់ជុំវិញគេបំពេរ	ថាស្ងួនមាសមេភរិយាបង	។
	ដ្បិតព្រះអម្ចាស់គាប់ព្រះទ័យ	នឹងអ្នកពេកក្រៃគ្មានសៅហ្មង
	ដូចពាក្យសម្តីឆ្លើយសារសង	ពាក្យអូនពាក្យបងត្រូវរ៉ូវគ្នា	។
៥	ព្រះម្ចាស់បង្កើតជារូបអ្នក	ទ្រង់គង់ថ្នមថ្នាក់រាល់វេលា
	សប្បាយឥតខ្វល់ដូចភរិយា	ថ្មីថ្មោងជាគ្នានឹងស្វាមី	។

ក្រុងយេរូសាឡឹមថ្មី បទពាក្យ ៧

(ព្យាការីអេសាយ ៦១,១០-១១)

១០	ខ្ញុំមានអំណរសប្បាយខ្លាំង	ព្រោះតែព្រះអង្គស្តាប់អង្វរ
	ព្រះអង្គសង្គ្រោះខ្ញុំកំដរ	រហូតរៀងមកមិនដែលខាន	។
	លំអខ្ញុំដូចកូនកំលោះ	ពាក់មកុដស្រស់ល្អភុំផាន
	ដូចកូនក្រមុំយ៉ាងចំណាន	នៅលើវិមានថ្ងៃរៀបការ	។
១១	ដីធ្វើឱ្យគ្រាប់ពូជផ្សេងដុះ	ពន្លកសក្បុសនៅក្នុងច្បារ
	លូតលាស់ស្គុះស្គាយស្រស់យ៉ាងណា	ក្តីសុចរិតថ្លាមិនបាត់បង់	។
	និងការសរសើរលើកតម្កើង	លូតលាស់ផុសឡើងមិនបង្អង់
	ចេញពីទឹកដីល្អផូរផង់	នៅមុខទូទាំងជាតិទាំងឡាយ	។

ក្រុងយេរូសាឡឹមថ្មី បទពាក្យ ៧

(ព្យាការីអេសាយ ៦២,១-៥)

១	យើងតែងគិតគូរការពារក្រុង	ឱ្យនៅគង់វង្សមានអ្នកថែ
	យេរូសាឡឹមស៊ីយ៉ូនដែរ	យើងមិនស្ងៀមទេមិនកន្តើយ	។
	ដរាបទាល់តែក្តីសុចរិត	ចាំងចែងពេញពិតទើបធូរស្បើយ
	ដូចថ្ងៃរះពេញពន្លឺហើយ	ការសង្គ្រោះឱ្យភ្លឺដូចភ្លើង	។
២	ពេលនោះមនុស្សគ្រប់ជាតិសាសន៍	ឃើញសុចរិតច្បាស់មិនឆ្មៃឆ្មើង
	ស្តេចទាំងប៉ុន្មាននឹកឃើញឡើង	សិរីរុងរឿងនៃអ្នកដែរ	។
	ឈ្មោះចាស់ក្រុងឯងគេលែងហៅ	គេពោលសំដៅតាមគេប្រែ
	ឈ្មោះល្អសែនសមអ្វីម៉េ្លះទេ	ព្រះប្រទានគេឱ្យរុងរឿង	។
៣	ក្រុងឯងនឹងទៅជាភួងជ័យ	ប្រណីតពេកក្រៃសែនថ្កុំថ្កើង
	នឹងទៅជាមកុដរាជ្យរុងរឿង	ព្រះហស្តព្រះយើងទ្រង់កាន់កាប់	។
៤	គេនឹងលែងហៅអ្នកឯងថា	ស្រីមិនបានការមិនចំណាប់
	ស្រីប្តីបោះបង់មិនគួររាប់	គេលែងបង្អាប់ដល់អ្នកទៀត	។
	តំបន់ជុំវិញគេក៏លែង	មើលងាយហៅឯងថាចោលម្សៀត
	ថាស្ងាត់ជ្រងុំដូចព្រៃស្បាត	ដែលមានដុះសុទ្ធស្មៅទៀតទេ	។
	តែផ្ទុយទៅវិញគេនឹងហៅ	ឯងថាពាលពៅបងសូមស្នេហ៍
	តំបន់ជុំវិញគេបំពេរ	ថាស្ងួនមាសមេភរិយាបង	។
	ដូចពាក្យសម្តីឆ្លើយសារសង	ពាក្យអូនពាក្យបងត្រូវរ៉ូវគ្នា
៥	ព្រះម្ចាស់បង្កើតជារូបអ្នក	ទ្រង់គង់ថ្នមថ្នាក់រាល់វេលា
	សប្បាយឥតខ្វល់ដូចភរិយា	ថ្មីថ្មោងជាគ្នានឹងស្វាមី	។

ការប្រជុំនៅថ្ងៃចុងក្រោយបំផុត បទកាកគតិ

(ព្យាការីអេសាយ ៦៦,១០-១៤)

១០	ឱអ្នកទាំងអស់	ដែលស្រឡាញ់ស្មោះ	យេរូសាឡឹម
	ចូរអរសប្បាយ	ទាំងក្តីសង្ឃឹម	គ្រប់គ្នាញញឹម
		កុំបីសៅហ្មង	។
	អស់អ្នកកាន់ទុក្ខ	អាណិតមុខជ្រប់	ដល់ក្រុងនេះផង
	ចូរអរសប្បាយ	រីករាយវិញម្តង	រួមជាមួយក្រុង
		សាឡឹមនេះដែរ	។
១១	សូមគ្រប់កាយា	ស្កប់ក្នុងចិន្តា	បានសុខល្ហើយល្ហែ
	ដូចកូនដែលម្តាយ	បីបមថ្នមថែ	បំបៅនៅក្បែរ
		គ្មានពេលឃ្លាឃ្លាត	។
	អ្នករាល់គ្នានឹង	បានសុខថ្កុំថ្កើង	ឥតបីរវាត
	រុងរឿងសិរី	ដោយក្រុងនេះទៀត	អស់ទាំងមិត្តញាតិ
		បានសុខគ្រប់គ្រា	។
១២	ដ្បិតព្រះអម្ចាស់	មានបន្ទូលច្បាស់	ថានឹងបង្ហៀរ
	សេចក្តីសុខសាន្ត	លើក្រុងអ្នកជា	ដូចទន្លេហៀរ
		ទឹកធ្លាក់មិនដាច់	។
	យើងនឹងបង្ហូរ	ធនធានបរិបូណ៌	មកឯងឥតភ្លេច
	របស់ជនជាតិ	ដទៃជាស្រេច	ឥតមានកែគេច
		ដូចទឹកលិចច្រាំង	។
	យើងនឹងថ្នមថ្នាក់	ទៅដល់អស់អ្នក	ដូចម្តាយទូទាំង
	បីបមថ្នមកូន	បំបៅគ្របបាំង	ក្រសោបព្រមទាំង
		លើកដាក់លើភ្លៅ	។
១៣	ម្តាយតែងថ្នាក់ថ្នម	កូនដោយបីបម	មិនឱ្យអាស្រូវ
	ដូចយើងថ្នមថ្នាក់	អ្នកឱ្យស្ថិតនៅ	ក្នុងក្រុងតទៅ
		លែងមានព្រាត់ប្រាស	។
១៤	កាលណាឃើញក្រុង	យេរូសាឡឹម	សុខសាន្តដូច្នេះ
	អ្នករាល់គ្នានឹង	សប្បាយពេកណាស់	សាច់ឈាមថ្លាស្រស់
		ដូចស្មៅខៀវខ្ចី	។
	ព្រះអង្គពុំភ្លេច	ទោះបីបន្តិច	សម្តែងបារមី
	របស់ព្រះអង្គ	ជាប្រក្រតី	បម្រើប្រុសស្រី
		ព្រះអង្គបានឃើញ	។

ព្យាការីយេរេមីអង្វរព្រះអម្ចាស់ឱ្យប្រជាជនអ៊ីស្រាអែល បទពាក្យ ៧

(ព្យាការីយេរេមី ១៤,១៧-២១)

១៧	ទឹកភ្នែកខ្ញុំហូររាល់យប់ថ្ងៃ	ព្រោះតែស្រមៃឥតស្រាកស្រាន្ត
	ទីក្រុងដែលធ្លាប់តែថ្កើងថ្កាន	ត្រូវខ្មាំងសាមាន្យបំផ្លាញអស់	។
១៨	បើខ្ញុំចេញទៅទីវាលស្រែ	ឃើញសុទ្ធសឹងតែសាកសពសោះ
	ពេលចូលដល់ក្រុងឃើញទាំងអស់	សុទ្ធអ្នករងគ្រោះដោយទុរ្ភិក្ស	។
	អស់ព្យាការីដើរតត្រុក	ដើរឆ្លងកាត់ស្រុកពុំដែលនឹក
	ទាំងបូជាចារ្យច្រើនសន្ធឹក	ស្រុកកើតទុរ្ភិក្សគេមិនខ្វល់	។
១៩	ឱព្រះអម្ចាស់តើព្រះអង្គ	ពិតជាបោះបង់យូដាចោល
	ឬទុកស៊ីយ៉ូនឱ្យតែលតោល	ឬមួយកាត់ចោលស្អប់លែងរាប់	។
	យើងខ្ញុំសង្ឃឹមថាបានសុខ	តែជួបតែទុក្ខស្ទើរតែស្លាប់
	ថាបានសះស្បើយជាឆាប់ៗ	តែប្រែមិនគាប់ជួបអាសន្ន	។
២០	ឱព្រះម្ចាស់អើយខ្ញុំសូមក្រាប	ទទួលសារភាពមិនអាក់អន់
	ប្រព្រឹត្តអំពើបាបពីមុន	អាក្រក់ពេកពន់មិនគប្បី	។
	រួមទាំងដូនតានៃយើងខ្ញុំ	ក៏ធ្វើមិនសមចិត្តអប្រីយ៍
	យើងខ្ញុំសាងបាបរៀងរាល់ថ្ងៃ	ទាស់នឹងព្រះទ័យនៃព្រះអង្គ	។
២១	ដោយយល់ព្រះនាមព្រះអម្ចាស់	មេត្តាសន្តោសកុំបោះបង់
	បំបាត់មុខខ្ញុំធ្វើឱ្យក្រុង	ដែលធ្លាប់រឿងរុងត្រូវអាម៉ាស់	។
	សូមនឹកពីសម្ពន្ធមេត្រី	ដែលព្រះអង្គលៃចងយូរណាស់
	ជាមួយយើងខ្ញុំមិនគួរផ្លាស់	ផ្តាច់ចោលស្រឡះដូច្នេះឡើយ	។

ធម៌មេត្តាករុណារបស់ព្រះជាម្ចាស់ បទព្រហ្មគីតិ

(ព្យាការីយេរេមី ១៧,៧-៨)

៧	រីអ្នកណាដែលផ្ញើ	ជិវិតលើព្រះអម្ចាស់
	នឹងបានទទួលព្រះ	ពរត្រចះល្អមិនខាន	។
១១	អ្នកនោះប្រៀបដូចជា	រុក្ខាល្វាល្អថ្កើងថ្កាន
	ដុះនៅក្បែរទីស្ថាន	ផ្លូវទឹកមានស្លឹកខៀវខ្ចី	។
	នៅពេលរដូវប្រាំង	ទោះរីងរាំងវាមិនភ័យ
	មិនព្រួយបារម្ភអ្វី	ទោះម្តេចក្តីនៅផ្លែផ្កា	។

ប្រជាជនអ៊ីស្រាអែលមានអំណរសប្បាយនៅពេលត្រឡប់មកស្រុកវិញ បទព្រហ្មគីតិ

(ព្យាការីយេរេមី ៣១,១០-១៤)

១០	ប្រជាជាតិទាំងឡាយ	សូមខ្វល់ខ្វាយនាំគ្នាស្តាប់
	បន្ទូលព្រះផ្សាយផ្សព្វ	ទៅដល់សព្វកោះនៅឆ្ងាយ	។
	ចូរអ្នកប្រកាសថា ៖	«ព្រះដែលជាអ្នកកម្ចាយ
	ស្រាអែលឱ្យទៅឆ្ងាយ	តែពេលក្រោយទ្រង់ប្រមូល	។
	ព្រះអង្គថែរក្សា	ឱ្យគ្រប់គ្នាជុំត្រកូល
	ដូចគង្វាលប្រមូល	ចៀមមកមូលមិនឱ្យបាត់ »	។
១១	ព្រះអម្ចាស់បានលោះ	ឱ្យរួចគ្រោះលែងខ្ចាយខ្ចាត់
	រំដោះឱ្យរួចផុត	ពួកទុច្ចរិតដែលខ្លាំងក្លា	។
១២	ពួកគេត្រឡប់វិញ	គ្មានទោម្នេញស្រែកខ្ញៀវខ្ញា
	ហើយគេគ្រប់កាយា	ចាំត្រៀបត្រាទទួលទ្រព្យ	។
	ដែលព្រះម្ចាស់ប្រទាន​​	គេឱ្យមានលែងអភ័ព្វ
	មានស្រូវស្រាល្អគាប់	ប្រេងក្រអូបទាំងចៀមគោ	។
	ចិត្តពួកគេប្រៀបបាន	សួនឧទ្យានមានទឹកហូរ
	ស្រោចស្រពឡើងជន់ជោរ	គេលែងថ្ងួរលែងហេវហត់	។
១៣	គ្រានោះស្រីក្រមុំ	ចូលមករាំតាមបែបបទ
	ក្មេងចាស់មិនកំណត់	គេមិនហត់រាំសប្បាយ	។
	យើងប្រែទុក្ខវេទនា	គេទៅជាសើចក្អាកក្អាយ
	ឱ្យពួកគេសប្បាយ	គេរីករាយលែងលំបាក	។
១៤	អស់លោកបូជាចារ្យ	បានភោក្តាគ្មានសម្រាក
	សាច់ឆ្ងាញ់មិនស្រាន្តស្រាក	មិនលំបាកដើររុករក	។
	យើងនឹងផ្តល់អំណោយ	ទានទៅឱ្យរាស្រ្តគ្រប់ស្រុក
	លែងព្រួយលែងកើតទុក្ខ	រស់បានសុខសាន្តតទៅ	។

សម្ពន្ធមេត្រីថ្មី បទពាក្យ ៧

(ព្យាការីអេស៊េគីអែល ៣៦,២៤-២៨)

២៤	យើងនឹងនាំយកអ្នករាល់គ្នា	ចេញពីប្រជាជាតិទាំងឡាយ
	ប្រមូលមិនឱ្យនៅរាយប៉ាយ	ពីស្រុកជិតឆ្ងាយមកមាតុភូមិ	។
២៥	យើងនឹងប្រោះទឹកដ៏បរិសុទ្ធ	លើអ្នកប្រាកដដោយថ្នាក់ថ្នម
	ជំរះឱ្យអ្នកស្អាតទាំងព្រម	ផុតពីសៅហ្មងផងទាំងឡាយ	។
	លែងឱ្យអ្នករាល់គ្នាជាប់ចិត្ត	លើព្រះមិនពិតព្រះក្លែងក្លាយ
	ឱ្យអ្នកផុតទុក្ខជួបសប្បាយ	ក្តីសោកទាំងឡាយវិនាសបង់	។
២៦	យើងនឹងប្រគល់ចិត្តគំនិត	ថ្មីល្អប្រណីតវិញ្ញាណផង
	ដកចិត្តដូចថ្មរឹងកន្លង	ផ្លាស់ប្តូរវិញម្តងចេះជួយគ្នា	។
២៧	យើងដាក់វិញ្ញាណយើងទៅក្នុង	អ្នករាល់គ្នាផងមិនរួញរា
	ឱ្យអ្នកធ្វើតាមបទបញ្ជា	វិន័យធម្មាដំបូន្មាន	។
២៨	អ្នករាល់គ្នានឹងរស់ក្នុងស្រុក	ជួបតែក្តីសុខមិនរំខាន
	ទឹកដីដែលយើងប្រទានបាន	ដល់ទៅតាដូនរបស់អ្នក	។
	ហើយយើងនឹងព្រមទទួលយក	អ្នកទាំងអស់មកប្រាកដជាក់
	ធ្វើជារាស្រ្តយើងគ្មានសល់ម្នាក់	ព្រោះយើងជាព្រះអ្នកឯងហើយ	។

យុវជនបីនាក់នៅក្នុងឡភ្លើង លើកតម្កើងព្រះជាម្ចាស់ បទពាក្យ ៧

(ព្យាការីដានីអែល ៣,២៦-២៧.២៩.៣៤-៤១)

២៦	ព្រះអម្ចាស់ជាព្រះរបស់	បុព្វបុរសនៃយើងខ្ញុំ
	យើងសូមតម្កើងទាំងប្រណម	ព្រះនាមឧត្តមតរៀងទៅ	។
២៧	ដ្បិតអីព្រះអង្គបានប្រព្រឹត្ត	លើយើងខ្ញុំពិតមិនអាស្រូវ
	ព្រះទ័យសុចរិតត្រង់ត្រឹមត្រូវ	ធ្លាប់វិនិច្ឆ័យនូវក្តីយុត្តិធម៌	។
២៩	អំពើបាបច្រើនខ្ញុំប្រព្រឹត្ត	មិនប្រណិប័តន៍តាមផ្លូវល្អ
	ឃ្លាតពីព្រះអង្គចាកយុត្តិធម៌	យើងនៅបន្តខុសគ្រប់យ៉ាង	។
៣៤	ឱ! ព្រះអម្ចាស់សូមកុំចោល	ឱ្យយើងតែលតោលគ្មានទីអាង
	សម្ព័ន្ធមេត្រីថ្មីស្រឡាង	គឺជាភស្តុតាងមិនបាត់បង់	។
៣៥	សូមកុំដកយកក្តីមេត្តា	នឹកទៅដល់គ្រាដែលកន្លង
	នឹកដល់លោកអប្រាហាំផង	មិនដែលសៅហ្មងសម្លាញ់សិ្នទ្ធ	។
	នឹកដល់អ៊ីសាកជាបម្រើ	ស្រាអែលធ្លាប់ដើរតាមប្រកិត
	ទៅណាមកណាជាប់នែបនិត្យ	ដូចបងប្អូនឥតដែលមានខ្ចោះ	។
៣៦	ពីដើមព្រះអង្គបានសន្យា	ដោយបន្ទូលថាទ្រង់នឹងប្រោស
	ឱ្យអ្នកទាំងបីមានកូនប្រុស	កូនស្រីចម្រុះឥតគណនា	។
	ច្រើនពេកអនេករាប់ពុំបាន	ដូចផ្កាយដែលមានលើមេឃា
	ដូចគ្រាប់ខ្សាច់តាមឆ្នេរជលធារ	សមុទ្រនានាច្រើនក្រៃក្រាស់	។
៣៧	បពិត្រព្រះអម្ចាស់ថ្លៃអើយ	គឺថ្ងៃនេះហើយយើងព្រួយណាស់
	ធា្លក់ខ្លួនមកជាពូជអាម៉ាស់	ខ្ចាត់ខ្ចាយព្រាត់ប្រាសថោកបំផុត	។
	ទៅជាជនជាតិតូចជាងគេ	ទុក្ខធំឡើងទ្វេសែនស្រយ៉ុត
	ឥឡូវទន់ទាបស្ទើររលត់	មកពីយើងល្ងិតល្ងង់សាងបាប	។
៣៨	ពេលនេះយើងខ្សត់អត់ទាំងអស់	ជីវិតកក្រោះប្រៀបដូចសា្លប់
	គ្មានស្តេចមន្ត្រីសែនអភ័ព្វ	ព្យាការីគាប់ក៏មិនមាន	។
	យើងមិនអាចថ្វាយយញ្ញបូជា	ថ្វាយយញ្ញសក្ការទាំងប៉ុន្មាន
	ទាំងគ្រឿងក្រអូបម្សៅភុំផាន	ផលផ្លែមិនបានយកមកថ្វាយ	។
៣៩	សូមព្រះអង្គជួយទទួលយក	ទុក្ខព្រួយសោយសោកផងទាំងឡាយ
	និងចិត្តសុភាពរាបស្រស់ស្រាយ	ទុកជាតង្វាយគាប់ព្រះទ័យ	។
៤០	គឺតង្វាយដុតទាំងមូលមាន	កូនចៀមរាប់លានធាត់ពេកក្រៃ
	ពពែគោឈ្មោលនៅក្នុងព្រៃ	យើងខ្ញុំដាក់ថ្វាយនៅថ្ងៃនេះ	។
	សូមឱ្យយើងខ្ញុំអាចដើរតាម	មាគ៌ាដានស្នាមដ៏វិសេស
	របស់ព្រះអង្គមិនប្រហែស	អ្នកសង្ឃឹមព្រះមិនខកចិត្ត	។
៤១	ឥឡូវយើងខ្ញុំប្រែប្រួលប្រាណ	ប្រព្រឹត្តឱ្យបានគ្មានរខិត
	គន្លងព្រះអង្គធម៌ប្រណីត	កោតខ្លាចដាក់ចិត្តស្គាល់ព្រះភ័ក្ត្រ	។

បទលើកតម្កើងសិរីរុងរឿងរបស់ព្រះជាម្ចាស់ បទកាកគតិ

(ព្យាការីដានីអែល ៣,៥២-៨៨)

៥២	បពិត្រព្រះម្ចាស់	ជាព្រះរបស់	ដូនតាយើងខ្ញុំ
	សូមកោតសរសើ	ទាំងថ្វាយបង្គំ	ថ្កើងព្រះឧត្តម
		អស់កល្បតទៅ	។
	ខ្ញុំសូមតម្កើង	លើកព្រះនាមឡើង	ពុំមានអាស្រូវ
	សុចរិតយុត្តិធម៌	ទ្រង់គង់ជាផ្លូវ	អង្វែងតទៅ
		សរសើរព្រះអង្គ	។
៥៣	សូមកោតសរសើរ	ព្រះគ្មានអ្វីស្មើ	ក្នុងគ្រានេះម្តង
	ទ្រង់ប្រកបដោយ	សិរីរឿងរុង	ក្នុងវិហារទ្រង់
		កុំនៅទីមទាម	។
៥៤	សូមលើកតម្កើង	ព្រះម្ចាស់យាងឡើង	លើខេរ៉ូប៊ីន
	ខ្ពង់ខ្ពស់បំផុត	គ្មានអ្វីប្រៀបផ្ទឹម	ស្មូត្រទាំងញញឹម
		តម្កើងជានិច្ច	។
៥៥	សូមតម្កើងទ្រង់	ដែលយាងឡើងគង់	លើបល្ល័ង្ករាជ្យ
	សូមច្រៀងតម្កើង	រាល់ថ្ងៃព្រឹកល្ងាច	ព្រះម្ចាស់ជានិច្ច
		កុំប្រែក្រឡះ	។
៥៦	សូមថ្កើងសរសើរ	ព្រះអង្គនៅលើ	វេហាស៍អាកាស
	ព្រះអង្គគ្រប់គ្រង	ស្ថានបរមសុខខ្ពស់	លើកសិរីយស
		ព្រះអង្គរហូត	។
៥៧	គ្រប់ស្នាព្រះហស្ត	ព្រះម្ចាស់ទាំងអស់	នៅមិនរបូត
	ជារៀងដរាប	សូមនាំគ្នាស្មូត្រ	តម្កើងរហូត
		អស់កល្បអន្លាយ	។
៥៨	ឱផ្ទៃមេឃអើយ	កុំនៅកន្តើយ	ហាក់ដូចជិនណាយ
	ស្មូត្របទតម្កើង	ដោយចិត្តសប្បាយ	អស់កល្បអន្លាយ
		តទៅកុំឈប់	។
៥៩	សូមឱ្យទេវទូត	តម្កើងរហូត	ទាំងថ្ងៃទាំងយប់
	ព្រះម្ចាស់ថ្កុំថ្កើង	អស់កល្បអស់កប្ប	តម្កើងកុំឈប់
		តទៅរាល់ថ្ងៃ	។
៦០	ចូរទឹកទាំងឡាយ	អបអរសប្បាយ	លើនភាល័យ
	នាំគ្នាសរសើរ	តម្កើងម្ចាស់ថ្លៃ	កុំបង្អង់អី
		អស់កល្បអង្វែង	។
៦១	ហ្វូងតារារះ	នៃព្រះអម្ចាស់	នាំគ្នាសម្តែង
	តម្កើងព្រះអង្គ	សរសើរស្ញប់ស្ញែង	គ្រប់ទីកន្លែង
		តទៅឥតដាច់	។
៦២	សូមព្រះអាទិត្យ	ព្រះច័ន្ទមានឫទ្ធិ	ពន្លឺចិញ្ចាច
	តម្កើងព្រះអង្គ	ដោយចិត្តអង់អាច	កុំភ័យកុំខ្លាច
		តទៅកុំប្រែ	។
៦៣	សូមអស់ទាំងផ្កាយ	ដែលនៅរាត់រាយ	លើមេឃផងដែរ
	សរសើរតម្កើង	កុំបីប្រួលប្រែ	កុំក្រឡះកែ
		រាល់ថ្ងៃខែឆ្នាំ	។
៦៤	សូមឱ្យសន្សើម	ទឹកភ្លៀងដ៏ឆ្នើម	ធ្លាក់ជាប្រចាំ
	ចូរលើកតម្កើង	ទាំងថ្វាយបង្គំ	ព្រះម្ចាស់ឧត្តម
		ជានិច្ចកុំរា	។
៦៥	ចូរអស់ទាំងខ្យល់	ធ្លាប់បក់វិលវល់	រាល់ប្រាំងវស្សា
	គ្រប់ទីគ្រប់ទិស	តម្កើងព្រះជា	ម្ចាស់អ្នករាល់គ្នា
		កុំបីឆ្មៃឆ្មើង	។
៦៦	ចូរឱ្យកម្តៅ	ទាំងក្នុងទាំងក្រៅ	ឱ្យមានទាំងភ្លើង
	នាំគ្នាជួយលើក	សរសើរតម្កើង	ព្រះអង្គខ្ពស់ឡើង
		តទៅឥតអាក់	។
៦៧	ចូរឱ្យខ្យល់ក្តៅ	ពេលនេះតទៅ	និងខ្យល់ត្រជាក់
	សរសើរតម្កើង	ព្រះជាម្ចាស់អ្នក	កុំបីអន់អាក់
		ជានិច្ចតទៅ	។
៦៨	សន្សើមនិងព្រឹល	សូមអ្នកកុំខ្ជិល	កុំបង្អង់នៅ
	ស្មូត្រលើកតម្កើង	ព្រះម្ចាស់ជាផ្លូវ	អង្វែងតទៅ
		អស់កល្បជានិច្ច	។
៦៩	ចូរថ្ងៃនិងយប់	កោតកុំឈរឈប់	សរសើរកុំភ្លេច
	ស្មូត្រលើកតម្កើង	ព្រះម្ចាស់ជានិច្ច	កុំបីកែគេច
		អស់កល្បស្ថេរស្ថិត	។
៧០	ចូរឱ្យពន្លឺ	រន្ទាលរន្ទឺ	និងភាពងងឹត
	សរសើរតម្កើង	អម្ចាស់មានឫទ្ធិ	រាល់ថ្ងៃកុំគិត
		ខ្វល់ខ្វាយឡើយណា	។
៧១	អាកាសត្រជាក់	ខ្យល់រងាធ្លាក់	មកជាធម្មតា
	ចូរលើកតម្កើង	អម្ចាស់ក្សត្រា	ព្រះអ្នករាល់គ្នា
		កុំបីឃ្លាងឃ្លាត	។
៧២	សូមឱ្យទឹកកក	កុំបីខានខក	ទាំងសន្សើមទៀត
	ចូរលើកតម្កើង	ព្រះម្ចាស់ទាំងឆ្លៀត	កុំបីរវាត
		រហូតតទៅ	។
៧៣	សូមដុំពពក	ផ្លេកបន្ទោរមក	កុំបង្អង់នៅ
	តម្កើងព្រះអង្គ	កុំបីហ្មងសៅ	ស្មូត្ររហូតទៅ
		អស់កល្បយូរលង់	។
៧៤	សូមឱ្យផែនដី	ទាំងមូលលកលៃ	តម្កើងព្រះអង្គ
	សរសើរកុំឈប់	កុំនៅរេរង់	កោតសរសើរទ្រង់
		កុំប្រែសាវា	។
៧៥	សូមឱ្យភ្នំធំ	កុំនៅសំងំ	ភ្នំតូចផងណា
	ស្មូត្របទតម្កើង	ព្រះម្ចាស់រាល់គ្នា	ថ្កើងព្រះនាមា
		អស់កល្បជានិច្ច	។
៧៦	សព្វអស់អ្វីៗ	ដែលដុះលើដី	កុំបីមានភ្លេច
	ចូរលើកតម្កើង	ព្រះម្ចាស់ជានិច្ច	កុំប្រែមានល្បិច
		អស់កល្បជានិច្ច	។
៧៧	ចូរសមុទ្រស្ទឹង	ទន្លេល្វើយល្វឹង	តូចធំទាំងឡាយ
	នាំគ្នាតម្កើង	ដោយក្តីរីកសាយ	សរសើរម្ចាស់ថ្លៃ
		ឱ្យលាន់រងំ	។
៧៨	ចូរប្រភពទឹក	មានច្រើនសន្ធឹក	ព្រែកទាំងតូចធំ
	ទឹកហូរពីជ្រោះ	ទឹកធ្លាក់ពីភ្នំ	កុំនៅសំងំ
		តម្កើងព្រះអង្គ	។
៧៩	ចូរអស់ទាំងត្រី	តូចធំម្តេចក្តី	និងសត្វរស់ក្នុង
	ទន្លេសមុទ្រ	តាមព្រែកបួរបឹង	កុំសំងំឈឹង
		តម្កើងព្រះម្ចាស់	។
៨០	សូមបក្សីសត្វ	ដែលរស់ខ្វែងខ្វាត់	ច្រើនមីរដេរដាស
	ស្មូត្របទតម្កើង	ព្រះជាអម្ចាស់	កុំបីចន្លោះ
		អស់កល្បយូរលង់	។
៨១	សូមឱ្យសត្វស្រុក	រស់នៅអែរអុក	ទាំងសត្វព្រៃផង
	នាំគ្នាសរសើរ	តម្កើងព្រះអង្គ	អស់កល្បយូរលង់
		តទៅអន្លាយ	។
៨២	ចូរឱ្យមនុស្ស	ទាំងស្រីទាំងប្រុស	កុំបីឃ្លាតឆ្ងាយ
	សរសើរព្រះអង្គ	ជាព្រះម្ចាស់ថ្លៃ	រៀងរាល់យប់ថ្ងៃ
		កុំបីអល់អែក	។
៨៣	ឱអ៊ីស្រាអែល	អ្នកជាជាតិដែល	វិសុទ្ធពន់ពេក
	ចូរលើកតម្កើង	ព្រះខ្ពស់អនេក	ហួសទាំងផ្ទៃមេឃ
		កុំសំងំនៅ	។
៨៤	ចូរបូជាចារ្យ	គ្រប់ៗកាយា	ឆ្ពោះតម្រង់ទៅ
	តម្កើងព្រះអង្គ	ទាំងថ្ងៃយប់ជ្រៅ	កុំសងំនៅ
		សរសើរកុំឈប់	។
៨៥	ចូរអ្នកទាំងឡាយ	ដែលតែងខ្វល់ខ្វាយ	បម្រើគោរព
	ស្មូត្រតម្កើងព្រះ	ទាំងថ្ងៃទាំងយប់	កុំឈរកុំឈប់
		នៅស្ងៀមឱ្យសោះ	។
៨៦	ចូរវិញ្ញាណក្ខន្ធ	អ្នកស្លាប់ប៉ុន្មាន	កុំបីចន្លោះ
	ព្រលឹងនៃអ្នក	សុចរិតទាំងអស់	តម្កើងដោយស្មោះ
		កុំនៅកន្តើយ	។
៨៧	អស់អ្នកគោរព	ប្រណិប័តន៍សព្វគ្រប់	ព្រះអម្ចាស់អើយ
	និងអ្នកដាក់ចិត្ត	ជាអ្នកខ្សត់ហើយ	កុំបង្អង់ឡើយ
		តម្កើងព្រះអង្គ	។
៨៨	លោកអណានីយ៉ា	រួមជាមួយគ្នា	អសារីយ៉ាផង
	និងមីកាអែល	តម្កើងព្រះអង្គ	ស្មូត្រសរសើរផង
		តទៅដរាប	។
	ព្រះអង្គរំដោះ	យើងខ្ញុំឱ្យរស់	ផុតពីក្តីស្លាប់
	ហើយទ្រង់សង្គ្រោះ	ខ្ញុំជាប្រញាប់	រួចផុតទុក្ខសព្វ
		ទាំងភ្លើងសន្ធៅ	។

ព្រះជាម្ចាស់វិនិច្ឆ័យមនុស្សលោក បទព្រហ្មគីតិ

(ហាបាគូក ៣,២-៤.១៣.១៥-១៨)

២	ឱ! ព្រះជាអម្ចាស់	ខ្ញុំឮច្បាស់សព្វសេចក្តី
	ស្នាព្រះហស្តថ្លាថ្លៃ	រៀងរាល់ថ្ងៃខ្លាំងអស្ចារ្យ	។
	សូមទ្រង់ប្រោសប្រណី	ដោយសេចក្តីករុណា
	សម្តែងឫទ្ធិបាដិហារិយ៍	ឱ្យគ្រប់គ្នាស្គាល់ផងចុះ	។
	ប៉ុន្តែពេលព្រះអង្គ	ពិរោធខ្លាំងសូមសន្តោស
	ព្រះទ័យដែលធ្លាប់ស្មោះ	ធ្លាប់ស្រណោះគ្រាកន្លង	។
៣	ព្រះម្ចាស់យាងមកពី	ភ្នំជាទីឥតមានហ្មង
	វិសុទ្ធពេកកន្លង	បារមីទ្រង់ភ្លឺចែងចាំង	។
	សូមឱ្យផែនពសុធា	កុំរួញរាស្រែកឱ្យខ្លាំង
	លើកតម្កើងព្រះអង្គ	យប់ថ្ងៃផងកុំសោកា	។
៤	ព្រះអង្គភ្លឺពណ្ណរាយ	ចាំងពីនាយល្អអស្ចារ្យ
	ចែងចាំងរស្មីថ្លា	ព្រះចេស្តាបង្កប់ទុក	។
១៣	ព្រះអង្គចេញសង្គ្រោះ	មនុស្សទាំងអស់នៅលើលោក
	ទាំងស្តេចដែលចេញមក	ទ្រង់អភិសេកចាក់ប្រេងឱ្យ	។
	ព្រះអង្គបានប្រហារ	មេគ្រួសារមិនបណ្តោយ
	កម្ទេចមិនទុកឱ្យ	នៅសល់ឡើយទាំងអស់គ្នា	។
១៥	ព្រះអង្គត្រួសត្រាយផ្លូវ	សេះដើរទៅលាន់ខ្ទ័រខ្ទារ
	នៅក្នុងបាតជលធារ	ដែលពុះពារកញ្ជ្រោលខ្លាំង	។
១៦	ខ្ញុំឮសន្ធឹកនេះ	ទ្រូងស្ទើរប្រេះភ័យភាន់ភាំង
	ឆ្អឹងឆ្អែងពុកអស់ទាំង	ដៃជើងគាំងនៅស្ងៀមឈឹង	។
	ខ្ញុំរស់ចាំតែថ្ងៃ	អាសន្នភ័យទាំងទន្ទឹង
	ពេលពួកឈ្លានពានខឹង	ពួកវានឹងកាប់ប្រហារ	។
១៧	ឈើព្រៃលែងឱ្យផ្លែ	ស្រូវក្នុងស្រែស្កកអាសារ
	សត្វគោចៀមផងណា	ត្រូវមរណាគ្មានសល់ដែរ	។
១៨	ឯខ្ញុំសែនរីករាយ	អរសប្បាយបានល្ហើយល្ហែ
	ព្រោះព្រះម្ចាស់នៅក្បែរ	ទ្រង់តាមថែសង្គ្រោះខ្ញុំ	។

ចូរអរព្រះគុណនិងលើកតម្កើងព្រះនាមព្រះជាម្ចាស់ បទកាកគតិ

(របាក្សត្រភាគមួយ ២៩,១០-១៣)

១០	ឥឡូវនេះខ្ញុំ	មានបំណងធំ	ចង់ចងសម្ពន្ធ
	មេត្រីជាមួយ	ព្រះអង្គបន្ទាន់	ជាព្រះនៃជន
		ជាតិអ៊ីស្រាអែល	។
	ខ្ញុំសូមអង្វរ	ព្រះម្ចាស់បវរ	បារមីក្រាស់ក្រែល
	សូមទ្រង់ពង្វាង	ព្រះពិរោធដែល	គ្រប់គ្រងក្រវែល
		លើយើងគ្រប់គ្នា	។
១១	ពេលនេះកូនចៅ	ទាំងអស់គ្នាត្រូវ	ឈប់ធ្វើខ្ជីខ្ជា
	ដ្បិតព្រះអម្ចាស់	ជ្រើសអ្នករាល់គ្នា	បំពេញមុខងារ
		បម្រើព្រះអង្គ	។
	ទ្រង់សព្វព្រះទ័យ	លើអ្នកពេកក្រៃ	ឈរពីមុខទ្រង់
	បម្រើកិច្ចការ	តាមព្រះបំណង	គ្រឿងក្រអូបផង
		ដាក់ថ្វាយគ្មានទាស់	។
១២	ពេលនោះកូនចៅ	លេវីមិននៅ	ក្រោកឡើងទាំងអស់
	ជំរះដំណាក់	វិសុទ្ធឥតទាស់	ថែមទាំងជំរះ
		ខ្លួនពួកគេផង	។
១៣	អំបូរទាំងអស់	គ្មានសល់ម្នាក់សោះ	គ្រប់គ្នាតែម្តង
	គេបានញែកខ្លួន	ឱ្យអស់សៅហ្មង	វិសុទ្ធផូរផង់
		តាមបញ្ជាស្តេច	។

ទំនុកតម្កើងរបស់លោកតូប៊ីត បទកាកគតិ

(លោកគូប៊ីត ១៣,២-១៦.១៨)

១	សូមលើកតម្កើង	សិរីរុងរឿង	របស់ព្រះម្ចាស់
	ដែលមានព្រះជន្ម	គង់នៅយ៉ាងច្បាស់	កោតសរសើរណាស់
		អស់កល្បជានិច្ច	។
	ព្រះអង្គធ្វើឱ្យ	មនុស្សស្លាប់ទៅហើយ	ចុះស្ថានមច្ចុរាជ
	ក្រោយមកព្រះអង្គ	ប្រោសឱ្យបានរួច	គ្មានអ្វីដែលអាច
		គេចពីបារមី	។
៣	អ៊ីស្រាអែលអើយ	កុំនៅកន្តើយ	តម្កើងរាល់ថ្ងៃ
	នៅមុខជនជាតិ	ផ្សេងៗទាំងឡាយ	ដែលទ្រង់កម្ចាយ
		ឱ្យអ្នកទៅនៅ	។
៤	នៅទីនោះឯង	ព្រះអង្គសម្តែង	មិនមានអាស្រូវ
	ឫទ្ធាបារមី	មានច្រើនពេកកូវ	ទ្រង់សម្តែងនៅ
		មុខអស់សត្វលោក	។
	ព្រះអង្គពិតជា	ព្រះយើងរាល់គ្នា	អង្វែងរៀងមក
	ជាព្រះបិតា	តែមួយលើលោក	ពីនេះទៅមុខ
		អស់កល្បតទៅ	។
៥	ព្រះអង្គបានដាក់	ទោសដល់ពួកអ្នក	ជារឿងត្រឹមត្រូវ
	ព្រោះអ្នករាល់គ្នា	បានប្រព្រឹត្តនូវ	អំពើអាស្រូវ
		អាក្រក់អប្រីយ៍	។
	ប៉ុន្តែព្រះអង្គ	ទ្រង់មិនបោះបង់	តែងតែប្រណី
	អាណិតអាសូរ	ប្រជាប្រុសស្រី	នាំអ្នកវិលវៃ
		ឥតបីខ្ចាត់ខ្ចាយ	។
៦	ប្រសិនបើអ្នក	រាល់គ្នាស្មោះស្ម័គ្រ	ដោយចិត្តរីករាយ
	វិលរកព្រះអង្គ	នឹងផុតអន្តរាយ	រស់នៅសប្បាយ
		ប្រព្រឹត្តស្មោះត្រង់	។
	ព្រះអង្គមុខជា	រកអ្នករាល់គ្នា	ក្រសោបត្រកង
	ឈប់គេចព្រះភ័ក្ត្រ	ឈប់ប្រែបែរខ្នង	មិនឱ្យមានហ្មង
		អង្អែលភ័ក្ត្រា	។
៧	ឥឡូវពេលនេះ	ចូរគិតត្រិះរិះ	អំពីកិច្ចការ
	ព្រះអង្គប្រព្រឹត្ត	ដល់គ្រប់អាត្មា	តម្កើងក្សត្រា
		ឱ្យពេញទំហឹង	។
	សូមលើកតម្កើង	កុំធ្វើឆ្មៃឆ្មើង	ថ្កើងទាំងរំពឹង
	ដែលទ្រង់ប្រព្រឹត្ត	យុត្តិធម៌លំនឹង	ចូរកោតព្រះអង្គ
		អស់កល្បឥតបី	។
៨	រីឯខ្ញុំវិញ	ខ្ញុំឃ្លាតចាកចេញ	ពីដែនបុរី
	ហើយបានមករស់	នៅលើទឹកដី	ពួកខ្មាំងអប្រីយ៍
		ក៏មិនភ្លេចដែរ	។
	ខ្ញុំបង្ហាញប្រាប់	ឱ្យអស់អ្នកបាប	ស្គាល់ជាហូរហែរ
	ថាព្រះអង្គមាន	ឫទ្ធាពូកែ	បារមីគ្មានប្រែ
		ខ្លាំងក្លាឧត្តម	។
	អ្នកបាបប្រុងប្រៀប	កាន់ចិត្តសុភាព	វិលមកជួបជុំ
	ប្រព្រឹត្តសុចរិត	កុំនៅសំងំ	ទ្រង់នឹងថ្នាក់ថ្នម
		មេត្តាប្រណី	។
៩	ខ្ញុំលើកតម្កើង	ព្រះដ៏រុងរឿង	ដោយចិត្តមេត្រី
	អំណរសប្បាយ	លើសលប់ពេកក្រៃ	ដោយមហាក្សត្រថ្លៃ
		នៃស្ថានសួគ៌ា	។
១០	សូមឱ្យអស់អ្នក	ដែលបាននៅស្នាក់	ក្នុងក្រុងគ្រប់គ្នា
	ប្រកាសអំពី	បារមីឫទ្ធា	ព្រះអម្ចាស់ជា
		ព្រះរបស់យើង	។
	យេរូសាឡឹម	ក្រុងធំស្កៃស្កឹម	ទ្រង់នឹងបំប៉ើង
	ដាក់ទោសពួកអ្នក	រលំរលើង	ធ្វើឫកឆ្មៃឆ្មើង
		សាងអំពើបាប	។
	ប៉ុន្តែព្រះម្ចាស់	មិនព្រមបង់បោះ	ចោលជាដរាប
	ព្រះអង្គមុខជា	អាណិតអ្នកទាប	កូនចៅសុភាព
		សុចរិតមិនខាន	។
១១	សូមលើកតម្កើង	ព្រះម្ចាស់ខ្ពស់ឡើង	ផុតអស់ពីស្ថាន
	ជាមហាក្សត្រ	វិសុទ្ធថ្កើងថ្កាន	ដែលព្រះអង្គបាន
		សោយរាជ្យយូរលង់	។
	ព្រះអង្គមុខជា	ឱ្យគេគ្រប់គ្នា	សង់ដំណាក់ទ្រង់
	ឡើងវិញម្តងទៀត	មិនឱ្យបាត់បង់	នៅក្នុងទីក្រុង
		យេរូសាឡឹម	។
១២	សូមព្រះម្ចាស់ប្រោស	ប្រណីសន្តោស	អ្នកអស់សង្ឃឹម
	អ្នកត្រូវគេកៀរ	ប្រែជាញញឹម	ដូចភ្លៀងរលឹម
		រដូវវស្សា	។
	សូមទ្រង់អាណិត	អស់អ្នកសុចរិត	អ្នកខ្សត់ខ្លោចផ្សា
	មានទុក្ខសព្វកាយ	លំបាកម៉េ្លះណា	សូមជួយពាំងការ
		ផុតអស់ទុក្ខភ័យ	។
១៣	ពន្លឺចិញ្ចាច	ភ្លឺដល់ទីដាច់	ស្រយាលផែនដី
	ចុងកាត់មាត់ញក	ប្រជាប្រុសស្រី	នាំគ្នាឃ្មាតខ្មី
		មករកព្រះអង្គ	។
	មានកាន់តង្វាយ	នៅគ្រប់ៗដៃ	ឱនកាយក្រាបផង
	ថ្វាយមហាក្សត្រ	ស្ថានបរមសុខផង	ប្រជាទាំងពួង
		សប្បាយរីករាយ	។
	អ្នកជំនាន់ក្រោយ	នឹងមិនបណ្តាយ	ឬឱ្យរលាយ
	គេនឹងនឹកចាំ	ក្រុងល្បីសុះសាយ	ដែលព្រះម្ចាស់ថ្លៃ
		ជ្រើសរើសទុកដាក់	។
១៤	សូមជនទាំងឡាយ	ដែលធ្លាប់សប្បាយ	គំរាមពួកអ្នក
	រលំកំពែង	បំផ្លាញទីស្នាក់	ដុតចោលផ្ទះអ្នក
		ទទួលកម្មពា	។
	តែសូមព្រះអង្គ	ប្រទានពរផង	អស់កល្បយូរយា
	ដល់អស់អ្នកណា	ខ្លាចអ្នករាល់គ្នា	ផុតអស់វេទនា
		អង្វែងតទៅ	។
១៥	ចូរអរសប្បាយ	សើចលេងក្អាកក្អាយ	ព្រោះតែកូនចៅ
	មនុស្សសុចរិត	រួមគ្នាក្នុងក្រៅ	ប្រមូលគ្នានៅ
		មិនឱ្យខ្ចាត់ខ្ចាយ	។
	គេលើកតម្កើង	សិរីរុងរឿង	ព្រះម្ចាស់រាល់ថ្ងៃ
	ដែលមានព្រះជន្ម	គង់នៅវែងឆ្ងាយ	អស់កល្បអន្លាយ
		ស្ថិតស្ថេរជានិច្ច	។
	ជនណាសប្បាយ	រីករាយក្អាកក្អាយ	ឥតមានពេលភ្លេច
	គេជួយអបអរ	ដល់អ្នកជានិច្ច	ព្រះម្ចាស់មិនភ្លេច
		ឱ្យគេបានសុខ	។
១៦	អ្នកផងទាំងឡាយ	ដែលមិនសប្បាយ	ពេលអ្នកកើតទុក្ខ
	គេពិតជាបាន	មង្គលគ្រប់មុខ	ដ្បិតគេរួមសុខ
		ទុក្ខជាមួយអ្នក	។
១៨	អ្នកក្រុងនឹងច្រៀង	បន្លឺសូរសៀង	លាន់ឮឥតអាក់
	សរសើរតម្កើង	ព្រះរបស់អ្នក	គង់នៅជាជាក់
		អស់កល្បតទៅ	។

ព្រះជាម្ចាស់ដែលបង្កើតពិភពលោកទ្រង់ការពារប្រជាជន បទកាកគតិ

(នាងយូឌីត ១៦,១-២.១៣-១៥)

១	ចូរអ្នករាល់គ្នា	បង្គំវន្ទា	ច្រៀងរាំទូលថ្វាយ
	ព្រះជាអម្ចាស់	ប្រគុំភ្លេងលាយ	ឈឹងស្គរឱនកាយ
		សរសើរតម្កើង	។
២	ព្រះម្ចាស់ពិតជា	មានឫទ្ធិចេស្តា	ពន្លត់ភ្នក់ភ្លើង
	សង្គ្រាមរលត់	ព្រះនាមទ្រង់ថ្កើង	សុលសាយឮឡើង
		គឺព្រះអម្ចាស់	។
	ព្រះអង្គរំដោះ	ខ្ញុំផុតភ័យគ្រោះ	សត្រូវច្រើនណាស់
	វាដេញតាមខ្ញុំ	តែព្រះជាម្ចាស់	នាំខ្ញុំវិលច្រាស
		មកវិញសុខសាន្ត	។
១៣	ខ្ញុំនឹងច្រៀងបទ	ថ្មីហើយវិសុទ្ធ	ថ្វាយព្រះថ្កើងថ្កាន
	ព្រះអង្គពិតជា	ប្រសើរហួសស្មាន	បារមីចំណាន
		ខ្លាំងក្លាអស្ចារ្យ	។
១៤	សូមឱ្យសត្វលោក	ក្នុងទឹកលើគោក	កុំនៅសោកា
	សុខចិត្តបម្រើ	ព្រះមានចេស្តា	ឥតមាននរណា
		ជំទាស់បានឡើយ	។
១៥	ពេលទ្រង់យាងមក	ភ្នំក៏កក្រើក	រង្គើអស់ហើយ
	ធ្លាក់ក្នុងសមុទ្រ	នៅមិនបានឡើយ	ទោះថ្មក៏ដោយ
		រលាយជាដី	។
	ប៉ុន្តែព្រះម្ចាស់	តែងតែសន្តោស	អាណិតប្រណី
	អាសូរដល់រាស្រ្ត	អ្នកទាបក្រក្រី	គោរពរាល់ថ្ងៃ
		កោតខ្លាចព្រះអង្គ	។

បទអង្វរព្រះជាម្ចាស់ សូមទ្រង់ប្រទានព្រះប្រាជ្ញាញាណ បទពាក្យ ៧

(ព្រះប្រាជ្ញាញាណ ៩,១-៦.៩-១១)

១	ឱ! ព្រះជាម្ចាស់ថ្លៃឧត្តម	ប្រសើរសក្តិសមពន់ពេកណាស់
	ព្រះអង្គជាព្រះបុព្វបុរស	ទ្រង់ធ្លាប់សន្តោសស្ម័គ្រមេត្តា	។
	ព្រះអង្គបង្កើតពិភពលោក	ក្នុងទឹកលើគោកពេញត្រៀបត្រា
	ដោយព្រះបន្ទូលពោលវាចា	រស់ពេញលោកាច្រើនវាល់លាន	។
២	ព្រះអង្គបានសូនរូបមនុស្ស	ទាំងស្រីទាំងប្រុសដោយវិញ្ញាណ
	ឱ្យគ្រប់គ្រង់សត្វលោកប៉ុន្មាន	ដែលព្រះអង្គបានបង្កើតស្រេច	។
៣	ឱ្យត្រួតកាន់កាប់តាមសុចរិត	ដោយភាពវិសុទ្ធល្អបណ្តាច់
	ព្រមទាំងឱ្យវិនិច្ឆ័យសម្រេច	កុំឱ្យក្រឡាច់ពីយុត្តិធម៌	។
៤	សូមទ្រង់មេត្តាប្រោសប្រទាន	ព្រះប្រាជ្ញាញាណដ៏បវរ
	ដល់ខ្ញុំជាអ្នកនៅកំដរ	ហើយសូមអង្វរកុំកាត់កាល	។
៥	ទូលបង្គំជាអ្នកបម្រើ	ម្តាយខ្ញុំក៏ធ្វើគ្មានពិភាល់
	ខ្ញុំអ្នកឆោតល្ងង់មិនសូវយល់	វិន័យនិមលច្បាប់ព្រះអង្គ	។
៦	ទោះបីជាមានមនុស្សណា	ល្អគ្រប់ប្រការឥតសៅហ្មង
	តែគ្មានប្រាជ្ញាញាណតម្រង់	ជីវិតគេផងក៏គ្មានន័យ	។
៩	បពិត្រព្រះម្ចាស់ព្រះប្រាជ្ញា	ញាណដ៏ថ្លៃថ្លាគង់សព្វថ្ងៃ
	ជាមួយព្រះអង្គជ្រាបអស់ន័យ	ស្នាព្រះហស្តថ្លៃទាំងប៉ុន្មាន	។
	ពេលទ្រង់បង្កើតពិភពលោក	ប្រាជ្ញាញាណមកគង់សុខសាន្ត
	ជាមួយព្រះអង្គគ្មានរំខាន	ព្រះអង្គជ្រាបបានអ្វីទាំងអស់	។
១០	សូមទ្រង់ប្រទានព្រះប្រាជ្ញា	ញាណវិសុទ្ធថ្លាដោយសន្តោស
	ឱ្យចុះពីស្ថានបរមសុខខ្ពស់	ពីបល្ល័ង្កយសដ៏ឧត្តម	។
	សូមឱ្យព្រះប្រាជ្ញាញាណរួម	ធ្វើការទាំងព្រមជាមួយខ្ញុំ
	បង្ហាត់បង្រៀនការតូចធំ	កិច្ចការដែលល្មមគាប់ព្រះទ័យ	។
១១	ដ្បិតព្រះប្រាជ្ញាញាណជ្រាបសព្វ	ទ្រង់ឈ្វេងយល់គ្រប់ទាំងឈ្លាសវៃ
	ណែនាំរូបខ្ញុំទាំងរំពៃ	ការពារផុតភ័យខ្ញុំរុងរឿង	។

ពាក្យអធិដ្ឋាន បទពាក្យ ៧

(លោកបែនស៊ីរ៉ាក ៣៦,១-៥.៧.១០-១៣)

១	ឱ! ព្រះជាម្ចាស់ដែលគ្រប់គ្រង	លើលោកឥតហ្មងទាំងមូលអើយ
	សូមអាណិតអាសូរយើងហើយ	ទតកុំកន្តើយយើងខ្ញុំផង	។
២	សូមធ្វើឱ្យគ្រប់ជាតិទាំងឡាយ	រស់ទាំងខ្វល់ខ្វាយកុំបង្អង់
	ឱ្យគេបានឃើញឫទ្ធិព្រះអង្គ	ស្ញប់ស្ញែងខ្លាចផងអានុភាព	។
៣	សូមព្រះអង្គលើកព្រះហស្តវាយ	ប្រជាជិតឆ្ងាយជាដរាប
	ដើម្បីឱ្យគេស្គាល់អានុភាព	ឱ្យគេជ្រួតជ្រាបពីបារមី	។
៤	ដោយព្រះអង្គដាក់ទោសយើងខ្ញុំ	ពិតជាសក្តិសមគ្មានទាស់អ្វី
	តែសូមសម្តែងព្រះបារមី	ឱ្យជាតិដទៃឃើញច្បាស់ថា	។
	ព្រះអង្គជាព្រះវិសុទ្ធ	វិសេសបំផុតលើលោកា
	សូមសម្តែងឱ្យខ្ញុំដឹងថា	ទ្រង់ដាក់ទោសាពួកគេដែរ	។
៥	សូមឱ្យមនុស្សគ្រប់ជាតិសាសន៍	ទទួលស្គាល់ច្បាស់គ្មានកែប្រែ
	ក្រៅពីព្រះអង្គគ្មានព្រះទេ	ត្រូវចេះរិះរេស្គាល់ព្រះអង្គ	។
៧	សូមទ្រង់សម្តែងថ្លែងសិរី	រុងរឿងម្ចាស់ថ្លៃកុំរេរង់
	បារមីខ្លាំងក្លានៃព្រះអង្គ	ឱ្យអ្នកទាំងពួងកោតស្ញប់ស្ញែង	។
១០	សូមពេលចុងក្រោយឆាប់មកដល់	ព្រះអង្គកុំខ្វល់ភ្លេចសម្តែង
	គេនឹងរៀបរាប់ដោយកោតក្រែង	អស្ចារ្យជាក់ស្តែងទ្រង់ប្រព្រឹត្ត	។
១១	សូមឱ្យភ្លើងនៃព្រះពិរោធ	កំហឹងក្រេវក្រោធឆេះបំបាត់
	ដុតកម្ទេចពួកអ្នកទុច្ចរិត	កុំឱ្យវារត់រួចសោះឡើយ	។
១២	សូមទ្រង់បំបែកក្បាលសត្រូវ	កុំទុកឱ្យនៅពួកនោះហើយ
	វាពោលក្តែងៗគ្មានគិតឡើយ	ថាវានេះហើយសំខាន់ណាស់	។
១៣	សូមទ្រង់ប្រមូលកុលសម្ពន្ធ័	ឱ្យឆាប់រួសរាន់កុំក្រឡះ
	ពូជពង្សយ៉ាកុបមានច្រើនណាស់	រស់នៅដេរដាសឱ្យមកជុំ	។

ទំនុកតម្កើងរបស់នាងម៉ារី បទព្រហ្មគីតិ

(លូកា ១,៤៧-៥៥)

៤៧	ខ្ញុំមានចិត្តអំណរ	សប្បាយអរពន់ពេកណាស់
	ព្រោះខ្ញុំបានដឹងច្បាស់	ថាព្រះម្ចាស់ទ្រង់សង្គ្រោះ	។
៤៨	ព្រះអង្គទតមកខ្ញុំ	ជាអ្នកបម្រើស្ម័គ្រស្មោះ
	តទៅមនុស្សទាំងអស់	ថាខ្ញុំនេះសែនសុខក្រៃ	។
៤៩	ព្រះដ៏មានឫទ្ធា	ខ្លាំងអស្ចារ្យលើលោកីយ៍
	សម្តែងឫទ្ធិបារមី	ព្រះនាមថ្លៃថ្លាវិសុទ្ធ	។
៥០	ទ្រង់មានព្រះហឫទ័យ	ត្រាប្រណីខ្ពស់បំផុត
	ដល់អ្នកបរិសុទ្ធ	គោរពកោតទ្រង់រហូត	។
៥១	ព្រះអង្គសម្តែងឫទ្ធិ	អស្ចារ្យពិតមិនរបូត
	ការពារមនុស្សស្លូត	កម្ចាត់ហូតអ្នកឫកខែង	។
៥២	ទ្រង់បានច្រានទម្លាក់	អ្នកធំធ្លាក់ពីតំណែង
	ឥតមានខ្លាចរអែង	ហើយទ្រង់តែងលើកអ្នកទាប	។
៥៣	ព្រះអង្គប្រោសប្រទាន	ឱ្យអ្នកឃ្លានឆ្អែតពេញប្រៀប
	អ្នកមានធនធានពាប	ទ្រង់ដេញរាបដៃទទេ	។
៥៤	ព្រះអង្គបានជួយរាស្រ្ត	ទ្រង់ទាំងអស់ឥតប្រួលប្រែ
	ស្រាអែលដែលនៅក្បែរ	អ្នកពូកែបម្រើខ្លាំង	។
៥៥	ទ្រង់តែងមានព្រះទ័យ	ករុណាក្រៃមិនថ្នាក់ថ្នាំង
	ជាមួយអប្រាហាំ	និងពូជពង្សលោកជានិច្ច	។
	ដូចទ្រង់បានសន្យា	នឹងដូនតាឥតមានភ្លេច
	ព្រះអង្គចាំជានិច្ច	គ្មានកលកិច្ចប្រែប្រួលឡើយ	។

ទំនុកតម្កើងរបស់លោកសាការី បទពាក្យ ៧

(លូកា ១,៦៨-៧៩)

៦៨	សូមលើកតម្កើងព្រះអម្ចាស់	ប្រសើរពេកណាស់ព្រះរបស់
	ជាតិអ៊ីស្រាអែលធ្លាប់ស្មោះ	យាងមករំដោះរាស្រ្តព្រះអង្គ	។
៦៩	ទ្រង់បានប្រទានព្រះសង្គ្រោះ	ដែលមានឫទ្ធិខ្ពស់ដ៏ត្រចង់
	ពីក្នុងចំណោមព្រះញាតិវង្ស	ដាវីឌជាពង្សបម្រើជាក់	។
៧០	ព្រះម្ចាស់ប្រទានព្រះសង្គ្រោះ	យើងមិនដែលលោះមិនដែលលាក់
	ដូចបានសន្យាតាមរយៈ	ព្យាការីស្ម័គ្រកាលគ្រាមុន	។
៧១	ព្រះអង្គសង្គ្រោះយើងឱ្យរួច	ចេញពីអំណាចខ្មាំងលើសលន់
	និងផុតពីដៃពួកទុរជន	ដែលធ្លាប់ជិះជាន់ស្អប់ខ្ពើមយើង	។
៧២	ព្រះអង្គសម្តែងព្រះហឫទ័យ	ករុណាប្រណីមិនឆ្មៃឆ្មើង
	ដល់បុព្វបុរសដែលតម្កើង	សម្ពន្ធព្រះអង្គមិនភ្លេចសោះ	។
៧៣	គឺព្រះអង្គហើយបានសន្យា	ពាក្យពិតសត្យាមិនចន្លោះ
	នឹងអប្រាហាំបុព្វបុរស	ដូនតាយើងនោះដូចេ្នះថា	។
៧៤	ទ្រង់នឹងរំដោះយើងឱ្យរួច	ផុតពីអំណាចខ្មាំងឫស្យា
	ដើម្បីយើងអាចក្រាបកាយា	វន្ទាគ្រប់គ្រាគ្មានភ័យភិត	។
៧៥	ព្រមទាំងឱ្យយើងបានរស់នៅ	ឥតមានអាស្រូវដោយសុចរិត
	ជារៀងរាល់ថ្ងៃមួយជីវិត	គាប់ព្រះទ័យពិតព្រះម្ចាស់ថ្លៃ	។
៧៦	ចំណែកឯរូបរបស់កូន	នឹងក្លាយជាខ្លួនព្យាការី
	ព្រោះកូនដើរមុខព្រះម្ចាស់ថ្លៃ	រៀបផ្លូវល្អក្រៃថ្វាយព្រះអង្គ	។
៧៧	កូននឹងធ្វើឱ្យអស់ប្រជា	រាស្រ្តទាំងអស់គ្នាគេបានដឹង
	ថាព្រះសង្គ្រោះគឺព្រះអង្គ	ទាំងលើកទោសផងរួចពីបាប	។
៧៨	ព្រះរបស់យើងមានព្រះទ័យ	ករុណាប្រណីជាដរាប
	ទ្រង់ប្រទានថ្ងៃរះរៀងរាប	រំដោះរួចបាបយើងពិតៗ	។
៧៩	សម្រាប់់បំភ្លឺដល់អស់អ្នក	ដែលបាននៅស្នាក់ទីងងឹត
	ព្រមទាំងតម្រង់ផ្លូវជីវិត	យើងឆ្ពោះរកពិតក្តីសុខសាន្ត	។

ពាក្យអរព្រះគុណព្រះជាម្ចាស់របស់លោកតាស៊ីម៉ូន បទពាក្យ ៧

(លូកា ២,២៩-៣២)

២៩	«បពិត្រព្រះម្ចាស់ជាចៅហ្វាយ	ពេលនេះឯងហើយទ្រង់សម្រេច
	តាមព្រះបន្ទូលគ្មានកលកិច្ច	សន្យាឥតភ្លេចលុះឥឡូវ	។
	ដូច្នេះសូមឱ្យរូបខ្ញុំជា	បម្រើគ្រប់គ្រាផុតហ្មងសៅ
	សូមឱ្យខ្ញុំចាកលោកនេះទៅ	ឱ្យខ្ញុំជួបនូវក្តីសុខសាន្ត	។
៣០	ព្រោះដ្បិតភ្នែកខ្ញុំបានឃើញច្បាស់	ពីការសង្គ្រោះមិនដែលខាន
៣១	ដែលព្រះអង្គទ្រង់ប្រោសប្រទាន	ដល់ជនគ្រប់ប្រាណគ្រប់ជាតិសាសន៍	។
៣២	គឺជាពន្លឺដែលនាំឱ្យ	គ្រប់ជាតិជិតឆ្ងាយស្គាល់ព្រះម្ចាស់
	និងជាសិរីរុងរឿងច្បាស់	ស្រាអែលជារាស្រ្តនៃព្រះអង្គ»	។

សុភមង្គលដ៏ពិតប្រាកដ បទពាក្យ ៧

(ម៉ាថាយ ៥,៣-១២)

៣	អ្នកណាដាក់ចិត្តជាអ្នកខ្សត់	អ្នកនោះប្រាកដផុតទុក្ខា
	មានសុខមង្គលគ្រប់ប្រការ	មានរាជ្យចេស្តាសួគ៌ាផង	។
៤	អ្នកណាដែលមានចិត្តសុភាព	ស្លូតបូតរាបទាបសុចរិតត្រង់
	នឹងមានមង្គលដ៏ត្រចង់	ទាំងផែនដីផងបានជាកេរ	។
៥	រីអ្នកដែលមានចិត្តសោកសៅ	នោះមុខជាត្រូវបានល្ហើយល្ហែ
	មានសុខមង្គលគ្មានកែប្រែ	ដ្បិតទុក្ខពួកគេព្រះសម្រាល	។
៦	អ្នកដែលស្រេកឃ្លានក្តីសុចរិត	អ្នកនោះប្រាកដបានធូរស្រាល
	មានសុភមង្គលដ៏ត្រកាល	ដ្បិតព្រះម្ចាស់ផ្តល់ឱ្យគេឆ្អែត	។
៧	អ្នកដែលមានចិត្តករុណា	នោះប្រាកដថាខ្ពស់ត្រដែត
	នឹងមានមង្គលច្បាស់ក្រឡែត	ព្រោះទ្រង់នៅអែបគេគ្រប់ពេល	។
៨	អ្នកដែលមានចិត្តស្មោះបរិសុទ្ធ	អ្នកនោះគឺពិតមានមង្គល
	ដ្បិតគេនឹងបានឃើញបានយល់	ព្រះជាម្ចាស់ផ្ទាល់ច្បាស់នឹងភ្នែក	។
៩	ឯអ្នកកសាងសន្តិភាព	បានសុខរៀងរាបល្អអនេក
	ដ្បិតគេមានឈ្មោះជាបុត្រឯក	ជាទីគាប់ភ្នែកព្រះជាម្ចាស់	។
១០	អ្នកណាដែលត្រូវគេបៀតបៀន	ព្រោះតែគេបានធ្វើឥតខ្ចោះ
	តាមក្តីសុចរិតទៀងត្រង់ស្មោះ	អ្នកនោះមានឈ្មោះសុខឥតខ្វល់	។
១១	ប្រសិនបើមានគេតិះដៀល	ចាក់រុកឆ្កឹះឆ្កៀលនាំអំពល់
	បង្ខូចឈ្មោះព្រោះរូបខ្ញុំផ្ទាល់	នឹងមានមង្គលកើតដល់អ្នក	។
១២	ចូរនាំគ្នារីករាយសប្បាយ	អបអរក្អាកក្អាយកុំអន់អាក់
	នឹងបានទទួលរង្វាន់ជាក់	យ៉ាងធំដល់អ្នកនៅបរមសុខ	។
	ដ្បិតព្យាការីគ្រាកន្លង	មិនដែលថ្កុំថ្កើងស្គាល់តែទុក្ខ
	ត្រូវគេបៀតបៀនមិនបានសុខ	នៅមិនស្រណុកដូច្នេះដែរ	។

ព្រះគ្រីស្តជាម្ចាស់នៃពិភពលោក បទពាក្យ ៧

(កូឡូស ១,១២-២០)

១២	ចូរអរព្រះគុណព្រះបិតា	ដោយចិត្តជ្រះថ្លាអរសប្បាយ
	ព្រោះព្រះអង្គប្រោសប្រទានឱ្យ	បងប្អូនទាំងឡាយគ្រប់តំបន់	។
	មានសមត្ថភាពបានចំណែក	មរតកល្អឯកមិនអាក់អន់
	រួមជាមួយនឹងប្រជាជន	វិសេសពេកពន់សែនវិសុទ្ធ	។
១៣	ព្រះអង្គរំដោះយើងឱ្យរួច	ផុតពីអំណាចក្តីងងឹត
	ចម្លងយើងចូលពន្លឺពិត	ព្រះរាជ្យនៃបុត្រដ៏ស្រឡាញ់	។
១៤	ដោយរួមក្នុងអង្គព្រះបុត្រា	ទ្រង់បានលោះលារូបយើងចេញ
	លើកលែងផុតទោសទុក្ខទោម្នេញ	យើងរួចខ្លួនវិញផុតពីបាប	។
១៥	ព្រះគ្រីស្តតំណាងព្រះជាម្ចាស់	ដែលយើងទាំងអស់បានជ្រួតជ្រាប
	តែមើលពុំឃើញជាដរាប	ព្រោះអានុភាពខ្ពស់មហិមា	។
១៦	ដ្បិតអ្វីទាំងអស់ព្រះម្ចាស់បាន	បង្កើតក្នុងប្រាណអង្គបុត្រភ្ងា
	ទាំងលើផែនដីស្ថានសួគ៌ា	មានច្រើនមហិមារាប់មិនអស់	។
	ហើយព្រះជាម្ចាស់បានបង្កើត	ឱ្យមានកំណើតមិនចន្លោះ
	សម្រាប់ព្រះគ្រីស្តជាអម្ចាស់	និងដោយព្រះគ្រីស្តជារៀមច្បង	។
១៧	ព្រះគ្រីស្តមានព្រះជន្មមុនអ្វី	ទាំងអស់រាល់ថ្ងៃមិនកន្លង
	ស្ថិតស្ថេររួមគ្នានឹងព្រះអង្គ	នោះគឺទ្រង់គាំទ្រដែរ	។
១៨	ព្រះគ្រីស្តជាសិរសាឧត្តម	ប្រសើរសក្តិសមអ្វីម៉េ្លះទេ
	គឺព្រះសហគម៍តែងតែ	បង្កើតឥតប្រែអ្វីមិនខ្វះ	។
	ក្នុងចំណោមអ្នកដែលបានស្លាប់	ព្រះអង្គមានភ័ព្វមានជន្មរស់
	មុនគេក្នុងអ្នកស្លាប់ទាំងអស់	ដឹកនាំឥតខ្ចោះគ្រប់វិស័យ	។
១៩	ដ្បិតព្រះជាម្ចាស់ព្រះអង្គគាប់	ព្រះហឫទ័យជាប់គ្រប់អ្វីៗ
	លក្ខណៈសម្បត្តិដ៏ប្រពៃ	ស្ថិតនៅរាល់ថ្ងៃក្នុងព្រះគ្រីស្ត	។
២០	ដ្បិតព្រះអម្ចាស់សព្វព្រះទ័យ	បង្រួមអ្វីៗទាំងអស់នេះ
	ទាំងលើផែនដីស្ថានសួគ៌ខ្ពស់	ឱ្យមកស្រួលស្រុះនឹងព្រះអង្គ	។
	គឺព្រះជាម្ចាស់បានធ្វើឱ្យ	សន្តិភាពកើតហើយដោយសារទ្រង់
	បង្ហូរព្រះលោហិតព្រះអង្គ	នៅលើឈើឆ្កាងដើម្បីរាស្រ្ត	។

ព្រះជាម្ចាស់មានព្រះហឫទ័យមេត្តាករុណាដ៏លើសលប់ បទកាកគតិ

(អេភេសូ ១,៣-១០)

៣	សូមលើកតម្កើង	ព្រះម្ចាស់ខ្ពស់ឡើង	ជាព្រះបិតា
	នៃយេស៊ូគ្រីស្ត	ជាអង្គសាស្តា	ម្ចាស់យើងនេះណា
		វិសេសពេកក្រៃ	។
	ទ្រង់ប្រោសប្រទាន	ព្រះពរឱ្យមាន	វិសុទ្ធឥតបី
	ផ្នែកខាងវិញ្ញាណ	មករាស្រ្តប្រុសស្រី	ពីសួគ៌ាលៃ
		ក្នុងអង្គព្រះគ្រីស្ត	។
៤	ព្រះអង្គជ្រើសយក	យើងទាំងអស់មក	វិសាលវិសេស
	ពីមុនកំណើត	ពីភពលោកម៉េ្លះ	ក្នុងអង្គព្រះគ្រីស្ត
		ឥតមានសៅហ្មង	។
	ចំពោះព្រះភ័ក្ត្រ	ព្រះអម្ចាស់ជាក់	ព្រោះតែព្រះអង្គ
	ទ្រង់មានព្រះទ័យ	ស្ម័គ្រស្មោះកន្លង	ស្រឡាញ់ឥតហ្មង
		មិនប្រែសាវា	។
៥	ទ្រង់តម្រូវយើង	ទាំងលើកតម្កើង	ជាបុត្រធីតា
	របស់ព្រះអង្គ	នោះក៏ដោយសារ	ព្រះគ្រីស្តនេះណា
		ស្របតាមបំណង	។
៦	ដើម្បីតម្កើង	សិរីរុងរឿង	នៃព្រះទ័យទ្រង់
	ដែលធ្លាប់ប្រណី	សន្តោសឥតហ្មង	ប្រទានមកយើង
		ក្នុងអង្គបុត្រា	។
៧	ព្រះជាម្ចាស់បាន	លោះយើងគ្រប់ប្រាណ	រស់រានដោយសារ
	លោហិតព្រះគ្រីស្ត	ជាអង្គបុត្រា	ព្រោះគ្រប់កាយា
		រួមនឹងព្រះអង្គ	។
	ទ្រង់តែងលើកទោស	ពួកយើងទាំងអស់	ផុតទុក្ខសៅហ្មង
	តាមព្រះហឫទ័យ	សន្តោសព្រះអង្គ	លើសលប់កន្លង
		មិនមានអាស្រូវ	។
៨	ព្រះម្ចាស់ប្រណី	សន្តោសពេកក្រៃ	ដឹងខុសស្គាល់ត្រូវ
	ឱ្យមានតម្រិះ	ខ្លាំងក្លាពេកកូវ	មាំមិនអាស្រូវ
		ពេញដោយប្រាជ្ញា	។
៩	ព្រះម្ចាស់បានប្រោស	ឱ្យយើងទាំងអស់	ស្គាល់គម្រោងការ
	តាមព្រះបំណង	សប្បុរសថ្លៃថ្លា	គឺទ្រង់នេះណា
		ជាអ្នកសម្រេច	។
១០	ព្រះអង្គចាត់ចែង	គ្រោងការនេះឯង	រួចរាល់ស្រេចបាច់
	នៅគ្រាបំផុត	ឥតមានកលកិច្ច	គ្មានអ្វីត្រូវភ្លេច
		ប្រមូលគ្មានសល់	។
	ទាំងលើផែនដី	ទាំងសួគ៌ាលៃ	ដោយមិនកង្វល់
	ឱ្យរួមក្នុងអង្គ	ព្រះគ្រីស្តមិនសល់	គឺព្រះអង្គផ្ទាល់
		ជាម្ចាស់តែមួយ	។

ព្រះគ្រីស្តមានព្រះហឫទ័យសុភាបរាបសា បទពាក្យ ៧

(ភីលីព ២,៦-១១)

៦	ទោះបីព្រះគ្រីស្តមានឋានៈ	ស្មើព្រះជាម្ចាស់ដូចម្តេចក្តី
	ក៏ទ្រង់មិនដែលសព្វព្រះទ័យ	ក្តោបយកអ្វីៗជាកម្មសិទ្ធ	។
៧	តែផ្ទុយទៅវិញព្រះអង្គលះ	បង់ចោលស្រឡះមិនដែលគិត
	យកព្រះឋានៈទាសករពិត	រស់ក្នុងជីវិតមនុស្សធម្មតា	។
៨	ព្រះអង្គបន្ទាបព្រះកាយទៀត	ធ្វើតាមឱវាទឥតមុសា
	ដែលព្រះជាម្ចាស់បញ្ជាថា	លុះផុតសង្ខាឈើឆ្កាងចង	។
៩	ដោយហេតុនេះហើយទើបព្រះម្ចាស់	តម្កើងព្រះគ្រីស្តពេកកន្លង
	ហើយប្រោសប្រទានព្រះនាមផង	ប្រសើរគ្មានហ្មងសែនថ្លាថ្លៃ	។
១០	ដើម្បីឱ្យអ្វីៗទាំងអស់	ទាំងនៅស្ថានខ្ពស់សួគ៌ាលៃ
	ទោះនៅលើមេឃឬក្រោមដី	បង្គំក្សត្រថ្លៃព្រះអម្ចាស់	។
១១	និងឱ្យមនុស្សគ្រប់ភាសា	គ្រប់ៗកាយាស្រែកប្រកាស
	ថាព្រះគ្រីស្តជាព្រះអម្ចាស់	ថ្កើងសិរីយសព្រះបិតា	។

ព្រះគ្រីស្តមានព្រះជន្មរស់ឡើងវិញ បទព្រហ្មគីតិ

(១ ធីម៉ូថេ ៣,១៦)

១៦	យើងត្រូវតែស្គាល់ថា	គម្រោងការលាក់កំបាំង
	ការប្រណិប័តន៍ក្លាខ្លាំង	នៃព្រះអង្គធំធេងណាស់	។
	ព្រះគ្រីស្តបានយាងមក	ទ្រង់ជ្រើសយកធ្វើឋានៈ
	មនុស្សសុចរិតស្ម័គ្រ	ដោយជឿជាក់ព្រះវិញ្ញាណ	។
	ព្រះអង្គបង្ហាញច្បាស់	ទេវទូតអស់ទាំងប៉ុន្មាន
	បានឃើញមិនខកខាន	ហើយគេបានប្រកាសពី	។
	ព្រះអង្គក្នុងចំណោម	សាសន៍ផ្សេងព្រមនៅមូលមីរ
	គេជឿគ្រប់ទិសទី	គ្រប់ជីវីលោកទាំងអស់	។
	ព្រះជាម្ចាស់ទ្រង់បាន	លើកអង្គប្រាណព្រះគ្រីស្តនោះ
	ឱ្យមានសិរីយស	រុងរឿងខ្ពស់ពេកកន្លង	។

ព្រះគ្រីស្តមានព្រះជន្មរស់ឡើងវិញ បទពាក្យ ៧

(២ ធីម៉ូថេ ២,៨.១១-១៣)

៨	ចូរនឹកដល់ព្រះយេស៊ូនោះ	មានព្រះជន្មរស់ឡើងវិញផង
	ព្រះអង្គជាប់ព្រះញាតិវង្ស	នៃដាវីឌអង្គម្ចាស់ក្សត្រា	។
១១	ពាក្យនេះគួរឱ្យយើងជឿជាក់	ដោយឥតលៀមលាក់យ៉ាងច្បាស់ថា
	ប្រសិនបើយើងគ្រប់កាយា	ព្រមរួមវាសនានឹងព្រះអង្គ	។
	បើយើងព្រមរួមរស់រួមស្លាប់	នោះពិតជាគាប់ពេកកន្លង
	យើងនឹងបានរស់ជីវិតផង	រួមនឹងព្រះអង្គគ្មានកែប្រែ	។
១២	បើយើងជាអ្នកចេះស៊ូទ្រាំ	ទោះជាយូរឆ្នាំយូរថ្ងៃខែ
	នោះព្រះជាម្ចាស់នឹងគង់ក្បែរ	ឱ្យសោយរាជ្យដែរជាមួយទ្រង់	។
	តែបើយើងមិនព្រមទទួល	មិនព្រមស្រុះស្រួលស្គាល់ព្រះអង្គ
	ពេលនោះព្រះជាអម្ចាស់ទ្រង់	នឹងមិនស្គាល់យើងវិញម្តងដែរ	។
១៣	ប្រសិនបើយើងមិនស្មោះត្រង់	នោះព្រះអង្គគង់មិនកែប្រែ
	ស្មោះត្រង់ជានិច្ចក៏ព្រោះតែ	ទ្រង់មិនងាកបែរនៅតែស្មោះ	។

ព្រះគ្រីស្តជាព្រះសង្គ្រោះ បទពាក្យ ៧

(១ សិលា ២,២១-២៥)

២១	ព្រះបិតាហៅបងប្អូនមក	ឱ្យរងទុក្ខសោកគ្មានល្ហែល្ហើយ
	ព្រោះតែព្រះគ្រីស្តយើងនេះហើយ	រងទុក្ខឥតស្បើយគំរូស្រាប់	។
២២	ព្រះអង្គពុំដែលបានប្រព្រឹត្ត	អំពើឧក្រិដ្ឋនាំមានបាប
	ទាំងព្រះបន្ទូលធ្លាប់ថ្លែងប្រាប់	គួរឱ្យត្រងត្រាប់រហូតទៅ	។
២៣	ទោះបីត្រូវគេជេរប្រមាថ	ពាក្យបកអាក្រាតនាំហ្មងសៅ
	ក៏ទ្រង់វិនិច្ឆ័យរាល់វេលា	យុត្តិធម៌គ្រប់គ្រាគ្មានសង្ស័យ	។
	ព្រះអង្គបានផ្ញើខ្សែជីវិត	លើព្រះម្ចាស់ពិតមិនរួញរា
	ដែលទ្រង់វិនិច្ឆ័យរាល់វេលា	យុត្តិធម៌គ្រប់គ្រាគ្មានសង្ស័យ	។
២៤	ព្រះគ្រីស្តបានផ្ទុកអំពើបាប	យើងទុកដរាបពេញអង្គកាយ
	ដែលជាប់ឈើឆ្កាងលុះក្សិណក្ស័យ	ឱ្យជនប្រុសស្រីជ្រះស្រឡះ	។
	ព្រមទាំងឱ្យយើងមានជីវិត	ដោយរួមប្រព្រឹត្តសុចរិតច្បាស់
	បងប្អូននឹងបានស្បើយជាសះ	ស្នាមរបួសចាស់នៃព្រះអង្គ	។
២៥	ដ្បិតបងប្អូនដូចជាហ្វូងចៀម	មានទុក្ខក្រំក្រៀមដោយខុសឆ្គង
	វង្វេងប្រាសចាកពីគន្លង	មាគ៌ាព្រះអង្គខ្ពស់បំផុត	។
	ឥឡូវបងប្អូនជួបនឹងអ្នក	ដែលធ្លាប់ថ្នមថ្នាក់ដ៏វិសុទ្ធ
	គង្វាលដ៏សែនល្អមោះមុត	ថែទាំនៅជិតបងប្អូនវិញ	។

កូនចៀមរបស់ព្រះជាម្ចាស់ បទព្រហ្មគីតិ

(វិវរណៈ ៤,១១)

១១	បពិត្រព្រះអម្ចាស់	ទ្រង់ជាព្រះអស់យើងខ្ញុំ
	ព្រះអង្គសែនសក្តិសម	នឹងកិត្តិនាមអានុភាព	។
	ព្រះអង្គបង្កើតគ្រប់	អ្វីមានសព្វជាដរាប
	ដោយសារអានុភាព	ដែលពេញប្រៀបដោយហឫទ័យ	។

(វិវរណៈ ៥,៩-១០.១២)

៩	កូនចៀមសមទទួល	ក្រាំងនិមលមិនបង្អង់
	ទាំងបកត្រាទៀតផង	ព្រោះតែទ្រង់ត្រូវសម្លាប់	។
	មកធ្វើយញ្ញបូជា	ទ្រង់លោះលាមនុស្សសាយសព្វ
	គ្រប់ពូជឥតមានស្អប់	ភាសាគ្រប់លើផែនដី	។
	ប្រជាជនគ្រប់សាសន៍	យកថ្វាយព្រះជាម្ចាស់ថ្លៃ
	ដោយសារឫទ្ធិបារមី	លោហិតជ័យទ្រង់ជឿជាក់	។
១០	ព្រះអង្គបានបង្វែរ	ឱ្យគេប្រែអាណាចក្រ
	ឱ្យបូជាចារ្យស្ម័គ្រ	សោយរាជ្យជាក់លើផែនដី	។
១	កូនចៀមគេសម្លាប់	នោះទើបគាប់ពន់ពេកក្រៃ
	ទទួលឫទ្ធិបារមី	សម្បត្តិនៃប្រាជ្ញាញាណ	។
	ប្រកបដោយឥទ្ធិឫទ្ធិ	ខ្លាំងបំផុតរកផ្ទឹមគ្មាន
	កិត្តិនាមល្បីថ្កើងថ្កាន	សិរីបានរុងរឿងខ្ពស់	។

ចូរសរសើរតម្កើងព្រះជាម្ចាស់ បទកាកគតិ

(វិវរណៈ ១១,១៧-១៨)

១៧	បពិត្រព្រះម្ចាស់	ដ៏មានតេជះ	ចេស្តាខ្លាំងក្រៃ
	លើអ្វីទាំងអស់	លើភពផែនដី	គង់នៅសព្វថ្ងៃ
		និងពីដើមមក	។
	យើងខ្ញុំសូមអរ	ព្រះគុណបវរ	ព្រោះទ្រង់បានយក
	ឫទ្ធានុភាព	ដ៏ថ្លៃថ្លាមក	តាំងជាជម្រក
		រាជ្យព្រះអង្គឡើង	។
១៨	ជាតិសាសន៍នានា	បបួលគ្នីគ្នា	ចាប់ច្រឡោតខឹង
	ព្រមជាមួយនោះ	ជាពេលព្រះអង្គ	ទ្រង់បានពង្រឹង
		ព្រះពិរោធដែរ	។
	គឺដល់កំណត់	ពេលទ្រង់សន្មត	ដោយគ្មានប្រួលប្រែ
	កាត់ក្តីអ្នកស្លាប់	ឥតមានគេចកែ	ពីដើមហូរហែ
		ឱ្យភ័យស្លោស្លន់	។
	នៅពេលនោះឯង	ព្រះអង្គចាត់ចែង	ប្រទានរង្វាន់
	ដល់ព្យាការី	ឱ្យមានគ្រប់គ្រាន់	មិនឱ្យអាក់អន់
		និងជនវិសុទ្ធ	។
	ឱ្យទាំងអស់អ្នក	ដែលកោតខ្លាចជាក់	ព្រះនាមមោះមុត
	ទាំងតូចទាំងធំ	ព្រះអង្គមិនគិត	ឱ្យអស់កម្រិត
		ឱ្យឥតសំចៃ	។

(វិវរណៈ ១២,១០-១២) បទកាកគតិ

១០	ឥឡូវព្រះម្ចាស់	ទ្រង់បានសង្គ្រោះ	មនុស្សលើផែនដី
	ព្រមទាំងអំណាច	ឫទ្ធាបារមី	ព្រះគ្រីស្តថ្លាថ្លៃ
		ក៏យាងមកដែរ	។
	ដ្បិតអ្នកប្រកាន់	ចាប់ទោសបងប្អូន	គ្មានពេលល្ហើយល្ហែ
	ត្រូវគេទម្លាក់	ចោលមិននៅក្បែរ	គឺអ្នកតែងតែ
		ចោទដោយមិនគិត	។
១១	បងប្អូនយើងបាន	ឈ្នះមិនដែលខាន	ដោយព្រះលោហិត
	របស់កូនចៀម	ជាសក្ខីពិត	បងប្អូនស្ម័គ្រចិត្ត
		ប្តូរជីវិតកាយ	។
១២	ហេតុនេះអស់អ្នក	ដែលរស់នៅស្នាក់	ស្ថានបរមសុខអើយ
	ចូរមានអំណរ	រីករាយសប្បាយ	អបអរគ្រប់កាយ
		កុំបីរួញរា	។

ទំនុកតម្កើងរបស់នាងម៉ារី បទព្រហ្មគីតិ

(វិវរណៈ ១៥,៣-៤)

៣	ឱព្រះជាអម្ចាស់	ចេស្តាខ្ពស់គ្មានអ្វីផ្ទឹម
	ស្នាព្រះហស្តឧត្តម	ស្រស់ប៉ប្រឹមពន់ពេកណាស់	។
	ឱព្រះមហាក្សត្រ	នៃប្រជាជាតិទាំងអស់
	មាគ៌ាល្អឥតខ្ចោះ	នៃព្រះម្ចាស់សែនវិសុទ្ធ	។
៤	ឱព្រះជាអម្ចាស់	ទ្រង់ជាព្រះខ្ពស់បំផុត
	ខ្មាំងសត្រូវតក់ស្លុត	ត្រូវតែកោតនាមព្រះអង្គ	។
	មនុស្សគ្រប់ជាតិសាសន៍	នាំគ្នាស្រុះគោរពទ្រង់
	ប្រណិប័តន៍ថ្វាយផ្ចឹតផ្ចង់	ដ្បិតព្រះអង្គសែនវិសុទ្ធ	។

ចូរច្រៀងចម្រៀងជោគជ័យ បទកាកគតិ

(វិវរណៈ ១៩,១-២.៥-៧)

១	អាលេលូយ៉ា	ចូរឱនកាយា	តម្កើងព្រះម្ចាស់
	ទ្រង់បានស្រោចស្រង់	ព្រមទាំងសង្គ្រោះ	ជីវិតយើងរស់
		ដោយឫទ្ធិបារមី	។
២	ដ្បិតព្រះជាម្ចាស់	ទ្រង់វិនិច្ឆ័យច្បាស់	យុត្តិធម៌ប្រពៃ
	សូមអ្នករាល់គ្នា	ទោះជិតឆ្ងាយក្តី	សូមនឹកមមៃ
		កុំនៅស្ងៀមស្ងាត់	។
៥	អ្នករាល់គ្នាជា	បម្រើគ្រប់គ្រា	ទាំងអ្នកប្រណិប័តន៍
	ទាំងតូចទាំងធំ	សូមគោរពកោត	បង្គំថ្វាយថ្វាត់
		កុំនៅបង្អង់	។
៦	អាលេលូយ៉ា	ព្រះម្ចាស់ក្សត្រា	ប្រពៃត្រចង់
	ព្រះអង្គសោយរាជ្យ	ព្រះទ័យស្មោះត្រង់	សុចរិតផូរផង់
		ពាសពេញលោកីយ៍	។
៧	ចូរយើងរីករាយ	ត្រេកអរសប្បាយ	ឱ្យខ្ទ័រផែនដី
	ចូរលើកតម្កើង	រុងរឿងសិរី	ព្រះអម្ចាស់ថ្លៃ
		កុំធ្វើកន្តើយ	។
	ដ្បិតដល់វេលា	អាពាហ៍ពិពាហ៍	នៃកូនចៀមហើយ
	ភរិយាថ្មោងថ្មី	មិននៅព្រងើយ	តែងខ្លួនស្រេចហើយ
		សក្តិសមគ្មានទាស	។