២កូរិនថូស - Catholic Faith Cambodia

សេចក្ដីផ្ដើម

១ ខ្ញុំ ប៉ូល ដែលព្រះ‌ជាម្ចាស់សព្វព្រះ‌ហឫទ័យតែង‌តាំងជាគ្រីស្តទូត*របស់ព្រះ‌គ្រីស្ត‌យេស៊ូ ខ្ញុំ និងលោកធីម៉ូថេ សូមជម្រាបមកព្រះ‌សហគមន៍របស់ព្រះ‌ជាម្ចាស់នៅក្រុងកូរិន‌ថូស និងជម្រាបមកប្រជាជនដ៏‌វិសុទ្ធ*ទាំងអស់ នៅស្រុកអាខៃទាំងមូល។ ២ សូមព្រះ‌ជាម្ចាស់ជាព្រះ‌បិតារបស់យើង និងព្រះ‌អម្ចាស់យេស៊ូ‌គ្រីស្តប្រណី‌សន្ដោស និងប្រទានសេចក្ដីសុខ‌សាន្តដល់បង‌ប្អូន!។

លោកប៉ូល និងអ្នកជឿនៅក្រុងកូរិន‌ថូស រួមសុខទុក្ខជាមួយគ្នា

៣ សូមលើកតម្កើងព្រះ‌ជាម្ចាស់ ជាព្រះ‌បិតារបស់ព្រះ‌យេស៊ូ ជាអម្ចាស់នៃយើង។ ព្រះ‌អង្គជាព្រះ‌បិតាប្រកបដោយព្រះ‌ហឫទ័យមេត្តា‌ករុណា និងជាព្រះដែលជួយសម្រាលទុក្ខគ្រប់បែបយ៉ាងទាំងអស់។ ៤ ព្រះ‌អង្គសម្រាលទុក្ខយើង នៅពេលយើងមានទុក្ខវេទនាសព្វបែបយ៉ាង ដើម្បីឲ្យយើងអាចសម្រាលទុក្ខអស់អ្នកដែលមានទុក្ខវេទនា ព្រោះព្រះ‌ជាម្ចាស់ប្រទានឲ្យយើងផ្ទាល់បានធូរស្បើយរួចហើយដែរ។ ៥ យើងរួមទុក្ខលំបាកផ្សេងៗជាមួយព្រះ‌គ្រីស្តកាន់តែច្រើនយ៉ាងណា យើងក៏បានធូរស្រាលពីទុក្ខតាម‌រយៈព្រះ‌គ្រីស្តកាន់តែច្រើនយ៉ាងនោះដែរ។ ៦ បើយើងត្រូវរងទុក្ខវេទនា គឺដើម្បីឲ្យព្រះ‌អង្គសម្រាលទុក្ខ និងសង្គ្រោះបង‌ប្អូន។ បើយើងបានធូរស្បើយក្នុងចិត្តហើយនោះ គឺដើម្បីឲ្យបង‌ប្អូនបានធូរស្បើយក្នុងចិត្ត ធ្វើឲ្យបង‌ប្អូនអាចស៊ូ‌ទ្រាំនឹងទុក្ខលំបាកផ្សេងៗដូចយើងដែរ។ ៧ ដូច្នេះ កាលណាយើងគិតពីបង‌ប្អូន យើងមានសង្ឃឹមយ៉ាងមុត‌មាំដោយដឹងថា បង‌ប្អូនរងទុក្ខលំបាករួមជាមួយយើងយ៉ាងណា បង‌ប្អូនក៏នឹងបានធូរស្រាល រួមជាមួយយើងយ៉ាងនោះដែរ។

៨ បង‌ប្អូនអើយ យើងចង់ឲ្យបង‌ប្អូនជ្រាបយ៉ាងច្បាស់អំពីទុក្ខវេទនា ដែលកើតមានដល់យើង នៅស្រុកអាស៊ីនេះ។ យើងបានរងទុក្ខយ៉ាងខ្លាំងហួសពីកម្លាំងដែលយើងអាចទ្រាំបាន រហូតដល់យើងអស់សង្ឃឹមថានឹងរស់រានមានជីវិតតទៅមុខទៀតផង។ ៩ យើងនឹកក្នុងចិត្តថា គេនឹងដាក់ទោសយើងដល់ស្លាប់។ រឿងនេះកើតឡើង ដើម្បីកុំឲ្យយើងពឹងផ្អែកលើខ្លួនឯង គឺពឹងផ្អែកលើព្រះ‌ជាម្ចាស់ ដែលប្រោសមនុស្សស្លាប់ឲ្យរស់ឡើងវិញ។ ១០ ព្រះ‌អង្គបានរំដោះយើងឲ្យរួចផុតពីការស្លាប់ដ៏សែនវេទនានេះ ហើយព្រះ‌អង្គក៏នឹងរំដោះយើងតទៅមុខទៀតដែរ។ ពិតមែនហើយ យើងសង្ឃឹមថា ព្រះ‌អង្គនឹងរំដោះយើងទៀតជាមិនខាន។ ១១ រីឯបង‌ប្អូនវិញ បង‌ប្អូនក៏បានជួយយើង ដោយទូល‌អង្វរព្រះ‌ជាម្ចាស់។ ហេតុនេះ ព្រះ‌អង្គប្រោស‌ប្រណីដល់យើង ដោយមានគ្នាច្រើនទូល‌អង្វរ ហើយក៏នឹងមានគ្នាជាច្រើនអរព្រះ‌គុណព្រះ‌អង្គអំពីយើងដែរ។

គម្រោង‌ការរបស់លោកប៉ូល

១២ សតិសម្បជញ្ញៈរបស់យើងបានបញ្ជាក់ប្រាប់យើងថា ឥរិយា‌បថដែលយើងប្រកាន់យកក្នុងលោកនេះពិតជាត្រូវមែន ជាពិសេស របៀបដែលយើងប្រព្រឹត្តចំពោះបង‌ប្អូនដោយចិត្តស្មោះសរ និងដោយសុទ្ធចិត្តចេញមកពីព្រះ‌ជាម្ចាស់។ យើងមិនបានធ្វើតាមប្រាជ្ញារបស់លោកីយ៍ទេ តែធ្វើតាមព្រះ‌ហឫទ័យប្រណី‌សន្ដោសរបស់ព្រះ‌ជាម្ចាស់វិញ ត្រង់នេះហើយ ដែលធ្វើឲ្យយើងបានខ្ពស់មុខ។ ១៣ យើងមិនសរសេរសេចក្ដីណាផ្សេងទៀតមកជូនបង‌ប្អូន ក្រៅពីសេចក្ដីដែលបង‌ប្អូនអាន និងយល់ស្រាប់ហើយនោះឡើយ។ ខ្ញុំសង្ឃឹមថាបង‌ប្អូនមុខជាយល់សេចក្ដីនេះជាក់ច្បាស់សព្វគ្រប់មិនខាន ១៤ ដូចបង‌ប្អូនយល់មួយផ្នែករួចមកហើយថា យើងបានធ្វើឲ្យបង‌ប្អូនខ្ពស់មុខ ហើយបង‌ប្អូនក៏នឹងធ្វើឲ្យយើងខ្ពស់មុខ នៅថ្ងៃព្រះ‌អម្ចាស់‌យេស៊ូនៃយើងព្រះ‌អង្គយាងមកនោះដែរ។ ១៥ ដោយខ្ញុំមានសេចក្ដីសង្ឃឹមដ៏មុត‌មាំនេះហើយ បានជាខ្ញុំមានបំណងចង់មករកបង‌ប្អូនជាមុនសិន ដើម្បីឲ្យព្រះ‌ជាម្ចាស់ប្រោស‌ប្រណីបង‌ប្អូនសាជាថ្មីម្ដងទៀត។ ១៦ បន្ទាប់មក ខ្ញុំនឹងចាកចេញពីបង‌ប្អូនឆ្ពោះទៅស្រុកម៉ាសេ‌ដូន ហើយវិលពីស្រុកម៉ាសេ‌ដូនមករកបង‌ប្អូនវិញ ដើម្បីឲ្យបង‌ប្អូនជួយខ្ញុំបន្ដដំណើរទៅស្រុកយូដាទៀត។ ១៧ ខ្ញុំសម្រេចចិត្តធ្វើដូច្នេះ តើខ្ញុំសម្រេចដោយឥតបើគិតឬ? ឬមួយគម្រោង‌ការរបស់ខ្ញុំកើតមកពីគំនិតលោកីយ៍ បានជាខ្ញុំនិយាយបាតដៃជាខ្នងដៃដូច្នេះ? ១៨ មានព្រះ‌ជាម្ចាស់ជាសាក្សីស្រាប់ហើយ យើងមិននិយាយមកកាន់បង‌ប្អូន ដោយពោលពាក្យប្រែ‌ប្រួលបាតដៃជាខ្នងដៃនោះទេ ១៩ ដ្បិតព្រះ‌គ្រីស្ត‌យេស៊ូជាព្រះ‌បុត្រារបស់ព្រះ‌ជាម្ចាស់ដែលយើងប្រកាស គឺទាំងខ្ញុំ ទាំងលោកស៊ីលវ៉ាន និងលោកធីម៉ូថេ ប្រកាសក្នុងចំណោមបង‌ប្អូននោះ ព្រះ‌អង្គមិនប្រែ‌ប្រួលបាតដៃជាខ្នងដៃសោះឡើយ នៅក្នុងព្រះ‌អង្គមានតែពាក្យសច្ចៈប៉ុណ្ណោះ។ ២០ ព្រះ‌គ្រីស្តបានធ្វើឲ្យព្រះ‌បន្ទូលសន្យាទាំងប៉ុន្មានរបស់ព្រះ‌ជាម្ចាស់បានសម្រេចសព្វគ្រប់ទាំងអស់។ ហេតុនេះហើយបានជាយើងពោលពាក្យ«អាម៉ែន*»ទៅកាន់ព្រះ‌ជាម្ចាស់ តាម‌រយៈព្រះ‌គ្រីស្ត ដើម្បីលើកតម្កើងសិរី‌រុងរឿងរបស់ព្រះ‌អង្គ។ ២១ គឺព្រះ‌ជាម្ចាស់ហើយ ដែលប្រទានឲ្យយើង និងបង‌ប្អូនមានជំនឿខ្ជាប់‌ខ្ជួនលើព្រះ‌គ្រីស្ត ព្រមទាំងបានចាក់ប្រេងលើយើងផង ២២ ហើយព្រះ‌អង្គក៏បានដៅសញ្ញាសម្គាល់របស់ព្រះ‌អង្គលើយើង និងប្រទានព្រះ‌វិញ្ញាណមកបញ្ចាំចិត្តយើងផងដែរ។

២៣ ខ្ញុំសូមជម្រាបបង‌ប្អូន ដោយមានព្រះ‌ជាម្ចាស់ជាសាក្សីថា ហេតុដែលខ្ញុំមិនទាន់បានទៅក្រុងកូរិន‌ថូសនោះ គឺមកពីខ្ញុំយោគ‌យល់ដល់បង‌ប្អូន (បើមិនពិតទេ សូមព្រះ‌អង្គផ្ដាច់ជីវិតខ្ញុំចុះ)។ ២៤ យើងមិនចង់ត្រួត‌ត្រាលើជំនឿរបស់បង‌ប្អូនទេ ដ្បិតជំនឿរបស់បង‌ប្អូនមាំ‌មួនរួចស្រេចទៅហើយ យើងគ្រាន់តែចង់ធ្វើការរួមជាមួយបង‌ប្អូន ដើម្បីឲ្យបង‌ប្អូនមានអំណរតែប៉ុណ្ណោះ។

១ ដូច្នេះ ខ្ញុំសម្រេចថាខ្ញុំមិនវិលមករកបង‌ប្អូនវិញ ទាំងព្រួយចិត្តនោះឡើយ។ ២ បើខ្ញុំធ្វើឲ្យបង‌ប្អូនព្រួយចិត្តទៅហើយ តើនរណានឹងធ្វើឲ្យខ្ញុំសប្បាយ ក្រៅពីអ្នកដែលខ្ញុំបានធ្វើឲ្យព្រួយចិត្តនោះ? ៣ សំបុត្រដែលខ្ញុំបានសរសេរមកជូនបង‌ប្អូន មានគោលបំណងចៀស‌វាងកុំឲ្យខ្ញុំព្រួយចិត្ត នៅពេលខ្ញុំមកដល់ គឺកុំឲ្យខ្ញុំកើតទុក្ខព្រួយពីអស់អ្នក ដែលត្រូវធ្វើឲ្យខ្ញុំមានអំណរនោះឡើយ។ ខ្ញុំជឿជាក់ថា ពេលខ្ញុំមានអំណរ បង‌ប្អូនទាំងអស់គ្នាក៏មានអំណររួមជាមួយខ្ញុំដែរ។ ៤ ខ្ញុំសរសេរមកបង‌ប្អូន ទាំងតឹងទ្រូង ទាំងពិបាកចិត្ត ទាំងស្រក់ទឹកភ្នែក តែមិនមែនចង់ធ្វើឲ្យបង‌ប្អូនព្រួយចិត្តទេ គឺចង់សម្ដែងឲ្យបង‌ប្អូនដឹងអំពីសេចក្ដីស្រឡាញ់ដ៏លើស‌លប់របស់ខ្ញុំចំពោះបង‌ប្អូន។

លោកប៉ូលអត់‌ទោសឲ្យអ្នកដែលប្រព្រឹត្តខុស

៥ ប្រសិនបើនរណាម្នាក់បង្កើតឲ្យមានទុក្ខព្រួយ មិនមែនធ្វើឲ្យខ្ញុំព្រួយចិត្តទេ គឺគាត់ធ្វើឲ្យបង‌ប្អូនទាំងអស់គ្នាព្រួយចិត្ត ឬយ៉ាងហោចណាស់ ក៏ឲ្យបង‌ប្អូនមួយចំនួនព្រួយចិត្ត (ខ្ញុំថាដូច្នេះ មកពីមិនចង់បំផ្លើស)។ ៦ បើបង‌ប្អូនភាគច្រើនបានដាក់ទោសមនុស្សបែបនេះ ល្មមហើយ។ ៧ សូមបង‌ប្អូនអត់‌ទោសឲ្យគាត់ និងលើកទឹកចិត្តគាត់ផងទៅ ក្រែងលោគាត់ពិបាកចិត្តខ្លាំងពេក រហូតដល់ទៅអស់សង្ឃឹម។ ៨ ដូច្នេះ ខ្ញុំសូមទូន្មានបង‌ប្អូនធ្វើយ៉ាងណាបង្ហាញឲ្យឃើញថា បង‌ប្អូនស្រឡាញ់គាត់។ ៩ ខ្ញុំសរសេរមក ដើម្បីលចិត្តបង‌ប្អូនមើល ចង់ដឹងថា តើបង‌ប្អូនពិតជាស្ដាប់តាមសេចក្ដីទាំងអស់ដែលខ្ញុំបានបង្គាប់ ឬយ៉ាងណា។ ១០ បើបង‌ប្អូនលើក‌លែងទោសឲ្យអ្នកណា ខ្ញុំក៏លើក‌លែងទោសឲ្យអ្នកនោះដែរ។ ចំពោះខ្លួនខ្ញុំផ្ទាល់ (ប្រសិនបើមានហេតុដែលខ្ញុំត្រូវអត់‌ទោសឲ្យនរណាម្នាក់) ខ្ញុំលើក‌លែងទោសឲ្យគេ ព្រោះតែបង‌ប្អូន ដោយខ្ញុំយល់ដល់ព្រះ‌គ្រីស្ត ១១ ដើម្បីកុំឲ្យយើងចាញ់បោកមារ*សា‌តាំង ដ្បិតយើងស្គាល់គម្រោង‌ការរបស់វាស្រាប់ហើយ។

លោកប៉ូលខ្វល់‌ខ្វាយក្នុងចិត្ត

១២ ពេលខ្ញុំបានទៅដល់ក្រុងត្រូអាស ដើម្បីផ្សព្វ‌ផ្សាយដំណឹង‌ល្អ*របស់ព្រះ‌គ្រីស្ត ទោះបីព្រះ‌អម្ចាស់បានបើកឱកាសឲ្យខ្ញុំក៏ដោយ ក៏ចិត្តខ្ញុំពុំស្ងប់ដែរ ព្រោះរកលោកទីតុសមិនឃើញ។ ១៣ ហេតុនេះ ខ្ញុំក៏លាពួកបង‌ប្អូននៅក្រុងត្រូអាស ធ្វើដំណើរឆ្ពោះទៅស្រុកម៉ាសេ‌ដូន។ ១៤ សូមអរព្រះ‌គុណព្រះ‌ជាម្ចាស់ ដែលប្រទានឲ្យយើងមានជ័យ‌ជម្នះរួមជាមួយព្រះ‌គ្រីស្តជា‌និច្ច។ ព្រះ‌អង្គប្រោសប្រទានឲ្យមនុស្សនៅគ្រប់ទីកន្លែងបានស្គាល់ព្រះ‌អង្គ តាម‌រយៈយើង ដែលប្រៀបបីដូចជាក្លិនក្រអូបសាយគ្រប់ទិស‌ទី!។ ១៥ ចំពោះព្រះ‌ជាម្ចាស់ គឺយើងនេះហើយជាក្លិនក្រអូបរបស់ព្រះ‌គ្រីស្ត ក្នុងចំណោមអស់អ្នកដែលបានទទួលការសង្គ្រោះ និងក្នុងចំណោមអស់អ្នកដែលកំពុងតែវិនាសអន្តរាយ។ ១៦ ចំពោះអ្នកវិនាស យើងជាក្លិននៃសេចក្ដីស្លាប់ដែលនាំឲ្យគេស្លាប់ ចំពោះអ្នកដែលបានទទួលការសង្គ្រោះយើងជាក្លិននៃជីវិត ដែលនាំឲ្យគេមានជីវិត។ តើនរណាមានសមត្ថ‌ភាពអាចនឹងបំពេញកិច្ច‌ការនេះបាន? ១៧ យើងមិនមែនជាអ្នកក្លែងបន្លំព្រះ‌បន្ទូលរបស់ព្រះ‌ជាម្ចាស់ ដូចមនុស្សមួយចំនួនធំនោះឡើយ គឺយើងនិយាយដោយសុទ្ធចិត្ត ក្នុងនាមព្រះ‌ជាម្ចាស់ នៅចំពោះព្រះ‌ភ័ក្ត្រព្រះ‌ជាម្ចាស់ និងនៅក្នុងអង្គព្រះ‌គ្រីស្ត។

អ្នកបម្រើព្រះ‌ជាម្ចាស់ ក្នុងសម្ពន្ធ‌មេត្រីថ្មី

១ តើយើងចាប់ផ្ដើមតែង‌តាំងខ្លួនឯងសាជាថ្មីទៀតឬ? ឬមួយក៏យើងត្រូវតែធ្វើដូចអ្នកខ្លះ គឺត្រូវការយកលិខិតតែង‌តាំងមកជូនបង‌ប្អូន ឬសុំលិខិតតែង‌តាំងពីបង‌ប្អូនវិញ? ២ បង‌ប្អូនហ្នឹងហើយជាលិខិតរបស់យើង ជាលិខិតសរសេរនៅក្នុងដួងចិត្តរបស់យើង ដែលមនុស្សទាំងអស់អាចស្គាល់ និងអានបាន។ ៣ បង‌ប្អូនពិតជាលិខិតរបស់ព្រះ‌គ្រីស្ត*មែន ជាលិខិតដែលព្រះ‌អង្គសរសេរផ្ញើមកតាមកិច្ច‌ការដែលយើងបំពេញ។ លិខិតនេះមិនមែនសរសេរដោយទឹកខ្មៅទេ គឺសរសេរឡើងដោយព្រះ‌វិញ្ញាណរបស់ព្រះ‌ជាម្ចាស់ដ៏មានព្រះ‌ជន្មរស់ មិនមែនជាលិខិតសរសេរនៅលើផ្ទាំងថ្មទេ គឺសរសេរក្នុងសាច់ ក្នុងដួងចិត្តរបស់បង‌ប្អូន។

៤ យើងមានសេចក្ដីទុកចិត្តដ៏មុត‌មាំនៅចំពោះព្រះ‌ភ័ក្ត្រព្រះ‌ជាម្ចាស់បែបនេះ ក៏ព្រោះតែព្រះ‌គ្រីស្តនេះហើយ។ ៥ យើងមិនអាចចាត់ទុកថា ខ្លួនយើងមានសមត្ថ‌ភាពនឹងធ្វើកិច្ច‌ការអ្វីមួយបានដោយខ្លួនយើងផ្ទាល់ឡើយ គឺព្រះ‌ជាម្ចាស់ឯ‌ណោះដែលប្រទានឲ្យយើងមានសមត្ថ‌ភាពអាចធ្វើបាន។ ៦ ព្រះ‌អង្គក៏ប្រទានឲ្យយើងមានសមត្ថ‌ភាពធ្វើជាអ្នកបម្រើសម្ពន្ធ‌មេត្រី*ថ្មីដែរ ជាសម្ពន្ធ‌មេត្រីដែលមិនមែនចងឡើង ដោយសរសេរជាលាយ‌លក្ខណ៍អក្សរនោះទេ គឺចងឡើងដោយព្រះ‌វិញ្ញាណវិញ ដ្បិតវិន័យ*ដែលសរសេរជាលាយ‌លក្ខណ៍អក្សរបណ្ដាលឲ្យស្លាប់ រីឯព្រះ‌វិញ្ញាណព្រះ‌អង្គប្រទានជីវិត។

៧ វិន័យដែលចារឹកលើផ្ទាំងសិលា មានសិរី‌រុងរឿងយ៉ាងខ្លាំង រហូតដល់ទៅជនជាតិអ៊ីស្រា‌អែលមិនអាចសម្លឹងមើលមុខលោកម៉ូសេបាន ព្រោះតែសិរី‌រុងរឿងភ្លឺចាំងពីផ្ទៃមុខលោក ហើយជាសិរី‌រុងរឿងស្ថិតនៅតែមួយ‌រយៈប៉ុណ្ណោះ។ ប្រសិនបើមុខ‌ងារបម្រើវិន័យដែលបណ្ដាលឲ្យស្លាប់នេះ មានសិរី‌រុងរឿងយ៉ាងហ្នឹងទៅហើយ ៨ ចុះទម្រាំបើមុខ‌ងារបម្រើព្រះ‌វិញ្ញាណវិញ តើនឹងមានសិរី‌រុងរឿងលើសនេះយ៉ាងណាទៅទៀត? ៩ ប្រសិនបើមុខ‌ងារដែលធ្វើឲ្យមនុស្សទទួលទោស មានសិរី‌រុងរឿងយ៉ាងហ្នឹងទៅហើយ ចុះទម្រាំបើមុខ‌ងារដែលធ្វើឲ្យមនុស្សសុចរិត*វិញ តើនឹងរឹង‌រឹតតែមានសិរី‌រុងរឿងប្រសើរលើស‌លប់យ៉ាងណាទៅទៀត? ១០ ប្រសិនបើយើងប្រៀប‌ធៀបសិរី‌រុងរឿងពីសម័យដើម និងសិរី‌រុងរឿងដ៏ខ្ពង់‌ខ្ពស់បំផុតនាបច្ចុប្បន្ន‌កាលនេះ យើងនឹងឃើញថា សិរី‌រុងរឿងពីសម័យដើមដូចជាមិនរុង‌រឿងទាល់តែសោះ។ ១១ ដូច្នេះ ប្រសិនបើអ្វីៗដែលមិនស្ថិត‌ស្ថេរមានសិរី‌រុងរឿងទៅហើយ ចុះទម្រាំបើអ្វីៗដែលនៅស្ថិត‌ស្ថេរវិញ តើនឹងរឹតតែមានសិរី‌រុងរឿងយ៉ាងណាទៅ?

១២ ដោយយើងមានសេចក្ដីសង្ឃឹមយ៉ាងនេះ យើងក៏មានចិត្តរឹង‌ប៉ឹង ឥតរង្គើដែរ។ ១៣ យើងមិនធ្វើដូចលោកម៉ូសេទេ គឺលោកបានយកស្បៃមកបាំងមុខ កុំឲ្យជនជាតិអ៊ីស្រា‌អែលសម្លឹងមើលរស្មីដែលមិនស្ថិត‌ស្ថេរនោះ ចេញបាត់ពីផ្ទៃមុខលោក។ ១៤ ប៉ុន្តែ គំនិតរបស់ជនជាតិអ៊ីស្រា‌អែលនៅងងឹតសូន្យ ដ្បិតរហូតមកទល់សព្វថ្ងៃ ពេលគេអានគម្ពីរសម្ពន្ធ‌មេត្រី*ចាស់ ស្បៃដដែលនោះនៅបាំងគំនិតរបស់គេ។ ស្បៃនៅបាំងគេដដែល លុះដល់គេចូលរួមជាមួយព្រះ‌គ្រីស្ត ទើបស្បៃនោះរសាត់បាត់ទៅ។ ១៥ មកទល់សព្វថ្ងៃនេះ ពេលគេអានគម្ពីររបស់លោកម៉ូសេ មានស្បៃមួយនៅបាំងចិត្តគេមិនឲ្យយល់ ១៦ ក៏ប៉ុន្តែ «នៅពេលគេបែរចិត្តគំនិតរកព្រះ‌អម្ចាស់ ស្បៃនោះចេញពីគេបាត់ទៅ» ១៧ ដ្បិតព្រះ‌អម្ចាស់ជាព្រះ‌វិញ្ញាណ នៅទីណាមានព្រះ‌វិញ្ញាណរបស់ព្រះ‌អម្ចាស់ នៅទីនោះ ក៏មានសេរី‌ភាពដែរ។ ១៨ យើងទាំងអស់គ្នាដែលគ្មានស្បៃនៅបាំងមុខ យើងបញ្ចេញសិរី‌រុងរឿងរបស់ព្រះ‌អម្ចាស់ដែលចាំងមកលើយើង ហើយយើងនឹងផ្លាស់ប្រែឲ្យបានដូចព្រះ‌អង្គ គឺមានសិរី‌រុងរឿងកាន់តែភ្លឺឡើងៗ។ នេះហើយជាស្នាព្រះ‌ហស្ដរបស់ព្រះ‌វិញ្ញាណនៃព្រះ‌អម្ចាស់។

ព្រះ‌គ្រីស្តជួយគាំ‌ពារអ្នកផ្សាយដំណឹង‌ល្អ

១ បើព្រះ‌ជាម្ចាស់មានព្រះ‌ហឫទ័យមេត្តា‌ករុណា ប្រគល់មុខ‌ងារនេះមកឲ្យយើងបំពេញ យើងមិនបាក់ទឹកចិត្តឡើយ។ ២ យើងបដិសេធមិនប្រព្រឹត្តការលួចលាក់ណាដែលគួរឲ្យអៀនខ្មាសនោះទេ ហើយយើងក៏មិនបោកបញ្ឆោតគេ ឬក្លែងបន្លំព្រះ‌បន្ទូលរបស់ព្រះ‌ជាម្ចាស់ដែរ។ ផ្ទុយទៅវិញ យើងបង្ហាញឲ្យមនុស្សលោកស្គាល់សេចក្ដីពិត ទាំងនាំគេឲ្យទុកចិត្តលើយើង នៅចំពោះព្រះ‌ភ័ក្ត្រព្រះ‌ជាម្ចាស់។ ៣ ប្រសិនបើអត្ថ‌ន័យនៃដំណឹង‌ល្អ*នៅតែលាក់កំបាំង គឺលាក់កំបាំងតែចំពោះអស់អ្នកដែលត្រូវវិនាសអន្តរាយប៉ុណ្ណោះ ៤ ជាអ្នកមិនជឿដែលត្រូវព្រះនៃលោកីយ៍នេះធ្វើឲ្យចិត្តគំនិតរបស់គេទៅជាងងឹត មិនឲ្យគេឃើញពន្លឺរស្មីដ៏រុង‌រឿងនៃដំណឹង‌ល្អរបស់ព្រះ‌គ្រីស្ត ជាតំណាងរបស់ព្រះ‌ជាម្ចាស់នោះឡើយ។ ៥ យើងមិនប្រកាសអំពីខ្លួនយើងទេ គឺយើងប្រកាសអំពីព្រះ‌យេស៊ូ‌គ្រីស្តជាព្រះ‌អម្ចាស់ ហើយយើងដាក់ខ្លួនជាអ្នកបម្រើបង‌ប្អូន ព្រោះតែព្រះ‌យេស៊ូនេះហើយ។ ៦ ព្រះ‌ជាម្ចាស់ដែលមានព្រះ‌បន្ទូលថា «ចូរឲ្យមានពន្លឺភ្លឺចេញពីងងឹត!» ព្រះ‌អង្គក៏បានបំភ្លឺចិត្តគំនិតរបស់យើងឲ្យស្គាល់យ៉ាងច្បាស់ នូវសិរី‌រុងរឿងរបស់ព្រះ‌ជាម្ចាស់ ដែលភ្លឺចាំងពីព្រះ‌ភ័ក្ត្ររបស់ព្រះ‌គ្រីស្តដែរ។

៧ យើងមានមុខ‌ងារដ៏ប្រសើរនេះប្រៀបបីដូចជាឆ្នាំងដី ដែលមានកំណប់នៅខាងក្នុង ដើម្បីឲ្យមនុស្សលោកឃើញថា ឫទ្ធា‌នុភាពដ៏ប្រសើរខ្ពង់‌ខ្ពស់នេះ ជាឫទ្ធា‌នុភាពរបស់ព្រះ‌ជាម្ចាស់ មិនមែនជារបស់យើងទេ។ ៨ គេសង្កត់‌សង្កិនយើងគ្រប់យ៉ាងមែន តែយើងមិនភ័យបារម្ភអ្វីឡើយ យើងទ័ល‌ច្រកមែន តែយើងនៅតែទៅមុខរួច ៩ គេបៀត‌បៀនយើងមែន តែព្រះ‌ជាម្ចាស់មិនបោះបង់យើងចោលឡើយ គេវាយ‌ដំយើងមែន តែយើងមិនស្លាប់បាត់បង់ជីវិតឡើយ។ ១០ ក្នុងរូបកាយយើង យើងផ្ទុកសេចក្ដីឈឺចាប់របស់ព្រះ‌យេស៊ូជា‌និច្ច ដើម្បីឲ្យគេឃើញព្រះ‌ជន្មរបស់ព្រះ‌អង្គនៅក្នុងរូបកាយយើង។ ១១ ដោយសារតែព្រះ‌យេស៊ូ យើងដែលកំពុងរស់ តែង‌តែប្រឈមមុខទល់នឹងសេចក្ដីស្លាប់ជា‌និច្ច ដើម្បីឲ្យគេឃើញព្រះ‌ជន្មរបស់ព្រះ‌អង្គនៅក្នុងរូបកាយយើងដែលតែង‌តែស្លាប់។ ១២ ដូច្នេះ សេចក្ដីស្លាប់ចេះតែយាយីយើង រីឯបង‌ប្អូនវិញ បង‌ប្អូនចេះតែមានជីវិតចម្រើនឡើង។

១៣ ដោយយើងមានវិញ្ញាណដែលនាំឲ្យជឿ ស្របតាមសេចក្ដីដែលមានចែងទុកមកថា «ខ្ញុំជឿ ហេតុនេះហើយបានជាខ្ញុំនិយាយ» យើងក៏ជឿដែរ ហេតុនេះហើយបានជាយើងនិយាយ។ ១៤ យើងដឹងថា ព្រះ‌អង្គដែលបានប្រោសព្រះ‌អម្ចាស់យេស៊ូឲ្យមានព្រះ‌ជន្មរស់ឡើងវិញ ព្រះ‌អង្គក៏នឹងប្រោសយើងឲ្យរស់ឡើងវិញ រួមជាមួយព្រះ‌យេស៊ូដែរ ព្រមទាំងនាំយើងទៅនៅក្បែរព្រះ‌អង្គ រួមជាមួយបង‌ប្អូនថែមទៀតផង។ ១៥ ហេតុ‌ការណ៍ទាំងនេះកើតឡើងជាប្រយោជន៍ដល់បង‌ប្អូន គឺឲ្យព្រះ‌ជាម្ចាស់ប្រណី‌សន្ដោសបង‌ប្អូនកាន់តែចម្រើនឡើង ដើម្បីឲ្យមានគ្នាមួយចំនួនធំ អរព្រះ‌គុណព្រះ‌ជាម្ចាស់កាន់តែច្រើនឡើង និងលើកតម្កើងសិរី‌រុងរឿងរបស់ព្រះ‌អង្គ។

លំ‌នៅដែលស្ថិត‌ស្ថេរអស់កល្ប‌ជានិច្ច

១៦ ហេតុនេះហើយបានជាយើងមិនបាក់ទឹកចិត្តឡើយ ទោះបីរូបកាយរបស់យើងចេះតែទ្រុឌ‌ទ្រោមទៅៗក៏ដោយ ក៏ជម្រៅចិត្តយើងកាន់តែចម្រើនឡើងជារៀងរាល់ថ្ងៃដែរ ១៧ ដ្បិតទុក្ខលំបាកបន្ដិច‌បន្តួចដែលយើងជួបប្រទះម្ដង‌ម្កាលនោះ ធ្វើឲ្យយើងមានសិរី‌រុងរឿងដ៏ប្រសើរលើស‌លប់ ជាសិរី‌រុងរឿងនៅស្ថិត‌ស្ថេរអស់កល្ប‌ជានិច្ច ដែលរកអ្វីមកប្រៀបផ្ទឹមពុំបាន។ ១៨ ដូច្នេះ យើងមិនចាប់អារម្មណ៍នឹងអ្វីៗ ដែលភ្នែកមើលឃើញឡើយ គឺយើងចាប់អារម្មណ៍នឹងអ្វីៗដែលភ្នែកមើលមិនឃើញនោះវិញ ដ្បិតអ្វីៗដែលភ្នែកមើលឃើញនៅស្ថិត‌ស្ថេរតែមួយ‌រយៈប៉ុណ្ណោះ តែអ្វីៗដែលភ្នែកមើលមិនឃើញនៅស្ថិត‌ស្ថេរអស់កល្ប‌ជានិច្ច។

១ យើងដឹងហើយថា រូបកាយរបស់យើងនៅលើផែន‌ដីនេះប្រៀបដូចជាជម្រកមួយដែលត្រូវរលាយសូន្យទៅ តែយើងមានវិមានមួយនៅស្ថានបរម‌សុខ* ជាលំ‌នៅស្ថិត‌ស្ថេរអស់កល្ប‌ជានិច្ច ដែលពុំមែនជាស្នាដៃរបស់មនុស្សឡើយ គឺជាស្នាព្រះ‌ហស្ដរបស់ព្រះ‌ជាម្ចាស់។ ២ ឥឡូវនេះ យើងតែង‌តែត្អូញ‌ត្អែរសង្វាតចង់បានរូបកាយសួគ៌មកគ្របពីលើរូបកាយនេះថែមទៀត ៣ គឺឲ្យតែយើងបានរូបកាយថ្មី ប្រសើរជាជាងគ្មាន។ ៤ ពេលស្ថិតនៅក្នុងរូបកាយនេះនៅឡើយ យើងតែង‌តែត្អូញ‌ត្អែរ និងពិបាកចិត្ត។ យើងមិនចង់ដោះរូបកាយនេះចោលទេ គឺចង់ពាក់រូបកាយថ្មីពីលើថែមទៀត ដើម្បីឲ្យជីវិតលេបបំបាត់នូវអ្វីៗដែលតែង‌តែស្លាប់នេះ។ ៥ ព្រះ‌ជាម្ចាស់ផ្ទាល់បានតម្រូវឲ្យយើងផ្លាស់ប្រែដូច្នេះ ព្រះ‌អង្គក៏បានប្រទានព្រះ‌វិញ្ញាណ មកបញ្ចាំចិត្តយើងផងដែរ។

៦ ដូច្នេះ យើងមានចិត្តក្លា‌ហានជា‌និច្ច។ យើងដឹងថា ដរាបណាយើងស្ថិតនៅក្នុងរូបកាយនេះ យើងឃ្លាតឆ្ងាយពីព្រះ‌អម្ចាស់ ៧ ដ្បិតយើងដើរដោយមានជំនឿ មិនមែនដោយមើលឃើញនោះទេ។ ៨ យើងមានចិត្តក្លា‌ហាន យើងចូលចិត្តឃ្លាតឆ្ងាយពីរូបកាយនេះ ហើយទៅនៅជិតព្រះ‌អម្ចាស់ប្រសើរជាង។ ៩ ទោះបីយើងស្ថិតនៅក្នុងរូបកាយនេះ ឬក៏ត្រូវឃ្លាតឆ្ងាយពីរូបកាយនេះក្តី យើងមានបំណងធ្វើយ៉ាងណាឲ្យតែបានគាប់ព្រះ‌ហឫទ័យព្រះ‌អង្គ ១០ ដ្បិតយើងទាំងអស់គ្នានឹងត្រូវទៅឈរនៅមុខទីកាត់ក្តីរបស់ព្រះ‌គ្រីស្ត ដើម្បីឲ្យម្នាក់ៗទទួលផល តាមអំពើដែលខ្លួនបានប្រព្រឹត្ត កាលពីនៅរស់ក្នុងរូបកាយនេះនៅឡើយ ទោះបីជាអំពើនោះល្អ ឬអាក្រក់ក្តី។

ការសម្រុះ‌សម្រួលឲ្យមនុស្សលោកជានានឹងព្រះ‌ជាម្ចាស់វិញ

១១ ដោយយើងបានស្គាល់ការគោរពកោតខ្លាចព្រះ‌ជាម្ចាស់ហើយ យើងក៏ខិត‌ខំណែ‌នាំមនុស្សលោកឲ្យជឿដែរ។ ព្រះ‌ជាម្ចាស់ស្គាល់ចិត្តយើង (ខ្ញុំសង្ឃឹមថា នៅក្នុងសតិសម្បជញ្ញៈរបស់បង‌ប្អូន បង‌ប្អូនក៏ស្គាល់ចិត្តយើងដែរ)។ ១២ យើងមិនតែង‌តាំងខ្លួនឯងនៅចំពោះមុខបង‌ប្អូនសាជាថ្មីទៀតទេ តែយើងជូនឱកាសឲ្យបង‌ប្អូនបានខ្ពស់មុខ ព្រោះតែយើងវិញ ដើម្បីឲ្យបង‌ប្អូនអាចឆ្លើយតបនឹងអស់អ្នក ដែលអួតខ្លួនតែពីអ្វីៗនៅខាងក្រៅ ហើយមិនគិតពីអ្វីៗក្នុងចិត្តទេ។ ១៣ ប្រសិនបើគេថា យើងជាមនុស្សវង្វេងស្មារតី នោះយើងវង្វេងស្មារតី ព្រោះតែព្រះ‌ជាម្ចាស់ ហើយប្រសិនបើគេថា យើងជាមនុស្សដឹងខុសត្រូវ នោះយើងដឹងខុសត្រូវ ព្រោះតែបង‌ប្អូន ១៤ ដ្បិតព្រះ‌ហឫទ័យស្រឡាញ់របស់ព្រះ‌គ្រីស្តបានជំរុញយើង ដោយយើងយល់ឃើញថា បើមនុស្សម្នាក់ស្លាប់សម្រាប់មនុស្សទាំងអស់ នោះមនុស្សទាំងអស់ក៏ដូចជាបានស្លាប់ដែរ។ ១៥ ព្រះ‌អង្គបានសោយទិវង្គតសម្រាប់មនុស្សទាំងអស់ ដើម្បីឲ្យអស់អ្នកដែលមានជីវិតលែងរស់សម្រាប់ខ្លួនឯងទៀតហើយ គឺរស់សម្រាប់ព្រះ‌អង្គដែលបានសោយទិវង្គត និងមានព្រះ‌ជន្មរស់ឡើងវិញសម្រាប់គេ។ ១៦ ដូច្នេះ ពីពេលនេះតទៅ យើងឈប់រាប់នរណាម្នាក់តាមរបៀបធម្មតាទៀតហើយ ទោះបីយើងធ្លាប់ស្គាល់ព្រះ‌គ្រីស្តកាលព្រះ‌អង្គនៅជាមនុស្សធម្មតាក៏ដោយ ក៏ឥឡូវនេះ យើងមិនស្គាល់ព្រះ‌អង្គ តាមរបៀបមុនទៀតឡើយ។ ១៧ ប្រសិនបើអ្នកណាម្នាក់នៅរួមជាមួយព្រះ‌គ្រីស្ត អ្នកនោះបានកើតជាថ្មី អ្វីៗពីអតីតកាលបានកន្លងផុតទៅ ហើយអ្វីៗទាំងអស់បានប្រែមកជាថ្មីវិញ។ ១៨ ការទាំងនេះកើតមកពីព្រះ‌ជាម្ចាស់ ដែលសម្រុះ‌សម្រួលយើងឲ្យជានានឹងព្រះ‌អង្គវិញ ដោយ‌សារព្រះ‌គ្រីស្ត ហើយប្រទានឲ្យយើងមានមុខ‌ងារសម្រុះ‌សម្រួលមនុស្ស‌ម្នាឲ្យជានានឹងព្រះ‌អង្គវិញដែរ។ ១៩ នៅក្នុងអង្គព្រះ‌គ្រីស្ត ព្រះ‌ជាម្ចាស់បានសម្រុះ‌សម្រួលមនុស្សលោកឲ្យជានានឹងព្រះ‌អង្គ ដោយមិនប្រកាន់ទោសគេឡើយ។ ព្រះ‌អង្គក៏ដាក់ព្រះ‌បន្ទូលនៃការសម្រុះ‌សម្រួលនេះមកក្នុងយើងដែរ។ ២០ ដូច្នេះ យើងជាទូតរបស់ព្រះ‌គ្រីស្ត គឺដូចជាព្រះ‌ជាម្ចាស់មានព្រះ‌បន្ទូលដាស់‌តឿនបង‌ប្អូនតាម‌រយៈយើងដែរ។ យើងសូមអង្វរបង‌ប្អូនក្នុងព្រះ‌នាមព្រះ‌គ្រីស្តថា ទុកឲ្យព្រះ‌ជាម្ចាស់សម្រុះ‌សម្រួលបង‌ប្អូនឲ្យជានានឹងព្រះ‌អង្គវិញទៅ។ ២១ ព្រះ‌គ្រីស្តគ្មានបាបទាល់តែសោះ តែព្រះ‌ជាម្ចាស់បានធ្វើឲ្យព្រះ‌អង្គទៅជាតួបាបសម្រាប់យើង ដើម្បីប្រោសយើងឲ្យបានសុចរិត*រួមជាមួយព្រះ‌គ្រីស្តដែរ។

១ ដោយយើងធ្វើការរួមជាមួយព្រះ‌ជាម្ចាស់ យើងសូមទូន្មានបង‌ប្អូនថា កុំទទួលការប្រណី‌សន្ដោសរបស់ព្រះ‌អង្គ យកមកទុកចោលជាអសារឥតការឡើយ ២ ដ្បិតព្រះ‌ជាម្ចាស់មានព្រះ‌បន្ទូលថា:

«យើងបានឆ្លើយតបមកអ្នក

នៅគ្រាណាដែលយើងគាប់ចិត្ត

យើងបានជួយអ្នកនៅថ្ងៃណាដែលយើង

សង្គ្រោះមនុស្សលោក»។

គ្រាដែលព្រះ‌ជាម្ចាស់គាប់ព្រះ‌ហឫទ័យ គឺឥឡូវនេះហើយ! គឺឥឡូវនេះហើយ ជាថ្ងៃដែលព្រះ‌ជាម្ចាស់សង្គ្រោះមនុស្សលោក!។

៣ យើងមិនចង់ឲ្យកើតមានរឿងអ្វីមួយ ដែលបណ្ដាលឲ្យនរណាម្នាក់ជំពប់ចិត្ត បាត់ជំនឿឡើយ ដើម្បីកុំឲ្យគេបន្ទោសមុខ‌ងាររបស់យើង។ ៤ ផ្ទុយទៅវិញ យើងតាំងខ្លួនជាអ្នកបម្រើរបស់ព្រះ‌ជាម្ចាស់ ក្នុងគ្រប់កាលៈ‌ទេសៈទាំងអស់ ដោយស៊ូ‌ទ្រាំយ៉ាងខ្លាំង ដោយជួបនឹងទុក្ខលំបាក ខ្វះខាត ភ័យបារម្ភ ៥ គេវាយ‌ដំយើង គេឃុំ‌ឃាំងយើង គេលើកគ្នាមកប្រឆាំងនឹងយើង។ យើងធ្វើការធ្ងន់ អត់ងងុយ អត់អាហារ។ ៦ យើងតាំងខ្លួនជាអ្នកបម្រើរបស់ព្រះ‌ជាម្ចាស់ ដោយមានចិត្តបរិសុទ្ធ* ដោយស្គាល់ព្រះ‌ជាម្ចាស់ ដោយមានចិត្តអត់‌ធ្មត់ ចិត្តសប្បុរស ដោយព្រះ‌វិញ្ញាណដ៏‌វិសុទ្ធ* ដោយមានចិត្តស្រឡាញ់ឥតពុត‌ត្បុត ៧ ដោយប្រកាសសេចក្ដីពិត ដោយឫទ្ធា‌នុភាពរបស់ព្រះ‌ជាម្ចាស់។ យើងយកសេចក្ដីសុចរិត*ធ្វើជាអាវុធវាយប្រយុទ្ធ និងការ‌ពារ ៨ ទាំងទ្រាំ‌ទ្រ នៅពេលគេគោរពយើងក្តី បន្ទាបបន្ថោកយើងក្តី នៅពេលគេនិយាយអាក្រក់ ឬនិយាយល្អពីយើងក្តី។ គេចាត់ទុកយើងថាជាជនបោកប្រាស់ តែយើងជាមនុស្សទៀងត្រង់។ ៩ គេចាត់ទុកយើងដូចជាអ្នកដែលគ្មាននរណាស្គាល់ តែមនុស្សទាំងអស់ស្គាល់យើងយ៉ាងច្បាស់។ គេចាត់ទុកយើងដូចជាមនុស្សហៀបនឹងស្លាប់ តែយើងពិតជានៅមានជីវិត។ គេធ្វើទារុណ‌កម្មយើង តែយើងគ្មានទោសដល់ស្លាប់ទេ។ ១០ គេធ្វើឲ្យយើងមានទុក្ខព្រួយ តែយើងសប្បាយចិត្តជា‌និច្ច។ យើងដូចជាអ្នកក្រ តែយើងបានធ្វើឲ្យមនុស្សជាច្រើនទៅជាអ្នកមាន យើងដូចជាគ្មានអ្វីសោះ តែយើងមានសព្វគ្រប់ទាំងអស់វិញ។

១១ បង‌ប្អូនអ្នកក្រុងកូរិន‌ថូសអើយ យើងនិយាយមកបង‌ប្អូនដោយស្មោះអស់ពីចិត្ត ឥតលាក់‌លៀមអ្វីឡើយ ១២ យើងមិនចង្អៀត‌ចង្អល់ចំពោះបង‌ប្អូនទេ គឺបង‌ប្អូនទេតើ ដែលមានចិត្តចង្អៀត‌ចង្អល់។ ១៣ ខ្ញុំនិយាយមកបង‌ប្អូនដូចនិយាយទៅកាន់កូនចៅរបស់ខ្ញុំ ដូច្នេះ សូមបង‌ប្អូនមានចិត្តទូ‌លាយជាមួយយើង ដូចជាយើងមានចិត្តទូ‌លាយចំពោះបង‌ប្អូនដែរ។

ការញែកខ្លួនចេញពីអំពើអាក្រក់

១៤ សូមកុំសេព‌គប់ជាមួយអ្នកមិនជឿឡើយ។ តើសេចក្ដីសុចរិត និងសេចក្ដីទុច្ចរិតចូលរួមជាមួយគ្នាកើតឬទេ? តើពន្លឺ និងភាពងងឹត ចូលរួមជាមួយគ្នាកើតឬទេ? ១៥ តើព្រះ‌គ្រីស្ត* និងមារ*សាតាំងចុះសំរុងគ្នាកើតឬទេ? តើអ្នកជឿ និងអ្នកមិនជឿមានទំនាក់‌ទំនងអ្វីនឹងគ្នា? ១៦ តើព្រះ‌វិហារ*របស់ព្រះ‌ជាម្ចាស់ និងព្រះ‌ក្លែង‌ក្លាយចូលគ្នាចុះឬទេ? យើងទាំងអស់គ្នាជាព្រះ‌វិហាររបស់ព្រះ‌ជាម្ចាស់ដ៏មានព្រះ‌ជន្មរស់ ដូចព្រះ‌អង្គមានព្រះ‌បន្ទូលថាៈ

«យើងនឹងស្ថិតនៅជាមួយពួកគេ

ព្រមទាំងរស់នៅជាមួយពួកគេដែរ។

យើងនឹងធ្វើជាព្រះរបស់គេ

ហើយគេនឹងធ្វើជាប្រជា‌រាស្ដ្រ

របស់យើង»។

១៧ ហេតុនេះហើយបានជាព្រះ‌អម្ចាស់មានព្រះ‌បន្ទូលថាៈ

«ចូរចេញពីចំណោមអ្នកទាំងនោះ

ហើយញែកខ្លួនចេញឲ្យដាច់ពីពួកគេ

កុំប៉ះ‌ពាល់អ្វីដែលមិនបរិសុទ្ធ*ឡើយ

នោះយើងនឹងទទួលអ្នករាល់គ្នា

១៨ យើងនឹងធ្វើជាឪពុករបស់អ្នករាល់គ្នា

ហើយអ្នករាល់គ្នាក៏ធ្វើជាកូនប្រុសកូនស្រី

របស់យើងដែរ»។

នេះជាព្រះ‌បន្ទូលរបស់ព្រះ‌អម្ចាស់

ដ៏មានឫទ្ធា‌នុភាពខ្ពង់‌ខ្ពស់បំផុត។

១ បង‌ប្អូនជាទីស្រឡាញ់អើយ បើយើងបានទទួលព្រះ‌បន្ទូលសន្យាដ៏អស្ចារ្យយ៉ាងនេះហើយ យើងត្រូវជម្រះខ្លួនឲ្យបរិសុទ្ធ* ចាកផុតពីសៅ‌ហ្មងគ្រប់យ៉ាង ទាំងខាងរូបកាយ ទាំងខាងវិញ្ញាណ ដើម្បីឲ្យវិសុទ្ធ*ទាំងស្រុង ដោយគោរពកោតខ្លាចព្រះ‌ជាម្ចាស់។

អំណរសប្បាយរបស់លោកប៉ូល

២ សូមបង‌ប្អូនយល់ចិត្តយើងផង! យើងពុំបានបោកប្រាស់នរណា ពុំបានធ្វើឲ្យនរណាហិន‌ហោច ឬក៏កេង‌ប្រវ័ញ្ចនរណាម្នាក់ឡើយ។ ៣ ខ្ញុំនិយាយដូច្នេះ មិនមែនចង់ចោទប្រកាន់បង‌ប្អូនទេ ដ្បិតខ្ញុំបានជម្រាបបង‌ប្អូនរួចស្រេចហើយថា យើងស្រឡាញ់បង‌ប្អូន និងស៊ូស្លាប់រស់ជាមួយបង‌ប្អូនជា‌និច្ច។ ៤ ខ្ញុំទុកចិត្តលើបង‌ប្អូនយ៉ាងខ្លាំង ហើយខ្ញុំបានខ្ពស់មុខ ព្រោះតែបង‌ប្អូនដែរ។ ខ្ញុំក៏បានធូរស្បើយក្នុងចិត្តយ៉ាងច្រើន ព្រមទាំងមានអំណរសប្បាយពន់ប្រមាណ ទោះបីយើងកំពុងតែរងទុក្ខវេទនាខ្លាំងយ៉ាងនេះក៏ដោយ។ ៥ តាំងពីយើងបានទៅដល់ស្រុកម៉ាសេ‌ដូន រូបកាយយើងពុំដែលបានសម្រាកសោះឡើយ។ យើងបានរងទុក្ខវេទនាសព្វបែបយ៉ាង គឺផ្នែកខាងក្រៅ គេធ្វើបាបយើង ហើយនៅខាងក្នុងចិត្ត យើងចេះតែបារម្ភ។ ៦ ក៏ប៉ុន្តែ ព្រះ‌ជាម្ចាស់ដែលតែង‌តែសម្រាលទុក្ខអ្នកទន់‌ទាប ព្រះ‌អង្គបានសម្រាលទុក្ខយើង ដោយលោកទីតុសទៅដល់។ ៧ យើងធូរចិត្ត មិនមែនត្រឹមតែបានលោកទីតុសទៅដល់ប៉ុណ្ណោះទេ គឺមកពីបង‌ប្អូនបានសម្រាលទុក្ខគាត់ផងដែរ។ គាត់បាននាំដំណឹងមកថា បង‌ប្អូនមានចិត្តចង់ជួបខ្ញុំយ៉ាងខ្លាំង បង‌ប្អូនបង្ហូរទឹកភ្នែក ព្រមទាំងឈឺ‌ឆ្អាលនឹងខ្ញុំ ជាហេតុធ្វើឲ្យខ្ញុំមានអំណររឹតតែខ្លាំងឡើងថែមទៀត។

៨ ប្រសិនបើសេចក្ដីដែលខ្ញុំសរសេរក្នុង សំបុត្រនេះ ធ្វើឲ្យបង‌ប្អូនព្រួយចិត្ត ក៏ខ្ញុំមិនស្ដាយក្រោយដែរ។ ប្រសិនបើខ្ញុំស្ដាយក្រោយ (ដ្បិតខ្ញុំយល់ថា សំបុត្រនេះនឹងនាំឲ្យបង‌ប្អូនព្រួយចិត្តមួយគ្រាមែន) ៩ ក៏ខ្ញុំសប្បាយចិត្តនៅពេលនេះ ខ្ញុំសប្បាយ មិនមែនមកពីបង‌ប្អូនព្រួយចិត្តនោះទេ គឺមកពីដឹងថា ទុក្ខព្រួយនឹងនាំឲ្យបង‌ប្អូនកែប្រែចិត្តគំនិត ដ្បិតបង‌ប្អូនព្រួយចិត្តដូច្នេះ ស្របតាមព្រះ‌ជាម្ចាស់។ ហេតុនេះ យើងពុំបានធ្វើឲ្យបង‌ប្អូនខូចខាតអ្វីឡើយ។ ១០ តាមពិតទុក្ខព្រួយស្របតាមព្រះ‌ជាម្ចាស់បែបនេះ តែង‌តែនាំឲ្យកែប្រែចិត្តគំនិត ដើម្បីទទួលការសង្គ្រោះ ហើយយើងមិនស្ដាយក្រោយឡើយ។ រីឯទុក្ខព្រួយតាមបែបលោកីយ៍ តែង‌តែនាំឲ្យស្លាប់វិញ។ ១១ សូមគិតមើល៍ ទុក្ខព្រួយដែលស្របតាមព្រះ‌ជាម្ចាស់ដូច្នេះ មានផលប្រយោជន៍ចំពោះបង‌ប្អូនយ៉ាងណា គឺបង‌ប្អូនមានចិត្តខ្នះ‌ខ្នែង ហើយលើសពីនេះទៅទៀត បង‌ប្អូនចេះសុំទោស ទាស់ចិត្តនឹងអំពើអាក្រក់ មានចិត្តគោរពកោតខ្លាច មានចិត្តប៉ង‌ប្រាថ្នាយ៉ាងខ្លាំង មានចិត្តឈឺ‌ឆ្អាល ហើយបង‌ប្អូនក៏ចេះដាក់ទោសអ្នកប្រព្រឹត្តអំពើអាក្រក់ដែរ។ ការទាំងនេះបង្ហាញឲ្យឃើញថា បង‌ប្អូនគ្មានសៅ‌ហ្មងអ្វីទាំងអស់នៅក្នុងរឿងនេះ។

១២ ដូច្នេះ ហេតុដែលខ្ញុំសរសេរមកបង‌ប្អូន មិនមែនមកពីគិតដល់អ្នកប្រព្រឹត្តអាក្រក់ ឬគិតដល់អ្នកដែលរងនូវអំពើអាក្រក់នោះឡើយ ខ្ញុំសរសេរមក ដើម្បីឲ្យបង‌ប្អូនមានឱកាសបង្ហាញទឹកចិត្តខ្នះ‌ខ្នែងរបស់បង‌ប្អូនចំពោះយើង នៅមុខព្រះ‌ជាម្ចាស់។ ១៣ ការនេះហើយដែលបានសម្រាលទុក្ខយើង។ ប៉ុន្តែ លើសពីនេះ យើងក៏មានអំណររឹតតែខ្លាំងថែមទៀត ដោយឃើញលោកទីតុសមានអំណរសប្បាយ ព្រោះបង‌ប្អូនទាំងអស់គ្នាបានជួយគាត់ឲ្យស្ងប់ចិត្ត លែងព្រួយបារម្ភ។ ១៤ ប្រសិនបើខ្ញុំបានខ្ពស់មុខបន្ដិច ដោយនិយាយសរសើរពីបង‌ប្អូនប្រាប់គាត់ ក៏ខ្ញុំមិនខ្មាសគាត់ដែរ។ សេចក្ដីដែលយើងសរសើរពីបង‌ប្អូនប្រាប់លោកទីតុស គាត់នឹងឃើញថាជាការពិតមែន ដូចយើងធ្លាប់តែនិយាយអ្វីៗគ្រប់យ៉ាងប្រាប់បង‌ប្អូន ស្របតាមសេចក្ដីពិតយ៉ាងនោះដែរ។ ១៥ ពេលគាត់នឹកឃើញថា បង‌ប្អូនទាំងអស់គ្នាតែង‌តែយកចិត្តទុកដាក់ស្ដាប់បង្គាប់ និងទទួលគាត់ដោយគោរពកោតខ្លាចញាប់‌ញ័រផងនោះ គាត់មានចិត្តស្រឡាញ់បង‌ប្អូនរឹតតែខ្លាំងឡើងៗ។ ១៦ ខ្ញុំត្រេកអរណាស់ ព្រោះខ្ញុំអាចទុកចិត្តបង‌ប្អូន ក្នុងគ្រប់កិច្ច‌ការទាំងអស់។

អំពីការរៃប្រាក់

១ បង‌ប្អូនអើយ យើងសូមជម្រាបបង‌ប្អូនឲ្យដឹងថា ព្រះ‌ជាម្ចាស់បានប្រណី‌សន្ដោសព្រះ‌សហគមន៍*នានា នៅស្រុកម៉ាសេ‌ដូន ២ គឺទោះបីបង‌ប្អូនទាំងនោះកំពុងជួបប្រទះទុក្ខវេទនាជាច្រើនយ៉ាងណាក្តី ក៏គេមានអំណរខ្លាំងក្រៃ‌លែង ហើយទោះបីគេក្រតោក‌យ៉ាកយ៉ាងណាក្តី ក៏គេនៅតែមានចិត្តសទ្ធាជ្រះ‌ថ្លាដ៏លើស‌លប់ដែរ។ ៣ បង‌ប្អូនទាំងនោះបានចូលប្រាក់តាមសមត្ថ‌ភាពរបស់ខ្លួន ហើយខ្ញុំសូមបញ្ជាក់ថា គេធ្វើលើសពីសមត្ថ‌ភាព និងដោយស្ម័គ្រអស់ពីចិត្តទៀតផង។ ៤ ពួកគេបានទទូចសុំយើង មេត្តាអនុញ្ញាតឲ្យគេចូលរួមបម្រើការ‌ងារនេះ គឺផ្ញើប្រាក់ទៅជួយប្រជាជនដ៏‌វិសុទ្ធ។ ៥ គេធ្វើដូច្នេះ លើសពីសេចក្ដីសង្ឃឹមរបស់យើងទៅទៀត គឺមុនដំបូង គេថ្វាយខ្លួនទៅព្រះ‌អម្ចាស់ បន្ទាប់មក គេក៏ដាក់ខ្លួនបម្រើយើង ស្របតាមព្រះ‌ហឫទ័យរបស់ព្រះ‌ជាម្ចាស់ដែរ។ ៦ ហេតុនេះហើយបានជាយើងអង្វរលោកទីតុស ឲ្យមកបង្ហើយការប្រមូលតង្វាយនេះពីបង‌ប្អូន ដូចគាត់បានចាប់ផ្ដើមរួចមកហើយ។ ៧ បង‌ប្អូនបានចម្រើនឡើងយ៉ាងបរិបូណ៌គ្រប់វិស័យទាំងអស់ គឺមានជំនឿ មានសំនួន‌វោហារ មានចំណេះ មានចិត្តខ្នះ‌ខ្នែងគ្រប់យ៉ាង ព្រមទាំងមានចិត្តស្រឡាញ់យើងផង។ ហេតុនេះ ចំពោះការប្រមូលតង្វាយ ចូរចម្រើនឡើងយ៉ាងបរិបូណ៌ដូច្នោះដែរ។ ៨ ខ្ញុំនិយាយបែបនេះ មិនមែនបញ្ជាបង‌ប្អូនទេ គឺខ្ញុំគ្រាន់តែចង់ស្ទង់មើលចិត្តស្រឡាញ់ដ៏ស្មោះរបស់បង‌ប្អូន ដោយនិយាយអំពីការខ្នះ‌ខ្នែងរបស់អ្នកឯទៀតៗប៉ុណ្ណោះ ៩ ដ្បិតបង‌ប្អូនស្គាល់ព្រះ‌ហឫទ័យប្រណី‌សន្ដោសរបស់ព្រះ‌អម្ចាស់យេស៊ូ‌គ្រីស្ត*ស្រាប់ហើយ គឺព្រះ‌អង្គមានសម្បត្តិដ៏ច្រើន ព្រះ‌អង្គបានដាក់ខ្លួនមកជាអ្នកក្រ ព្រោះតែបង‌ប្អូន ដើម្បីឲ្យបង‌ប្អូនបានទៅជាអ្នកមានដោយភាពក្រីក្ររបស់ព្រះ‌អង្គ។

១០ ត្រង់នេះ ខ្ញុំគ្រាន់តែជូនយោបល់បង‌ប្អូនប៉ុណ្ណោះ។ គួរគប្បីបង្ហើយកិច្ច‌ការដែលបង‌ប្អូនបានចាប់ផ្ដើមធ្វើតាំងពីឆ្នាំទៅ។ បង‌ប្អូនមិនត្រឹមតែបានចាប់ផ្ដើមធ្វើមុនគេប៉ុណ្ណោះទេ គឺថែមទាំងបានផ្ដើមគំនិតទៀតផង។ ១១ ដូច្នេះ សូមបង‌ប្អូនបង្ហើយការនេះឥឡូវចុះ។ បង‌ប្អូនមានឆន្ទៈផ្ដើមគំនិតនេះយ៉ាងណា ត្រូវធ្វើឲ្យបានសម្រេចជាស្ថាពរតាមសមត្ថ‌ភាព ដែលបង‌ប្អូនមានយ៉ាងនោះដែរ។ ១២ កាលណាយើងមានឆន្ទៈល្អ យើងនឹងបានគាប់ព្រះ‌ហឫទ័យព្រះ‌ជាម្ចាស់ តាមអ្វីៗដែលយើងមាន គឺមិនមែនតាមអ្វីៗដែលយើងគ្មាននោះទេ។ ១៣ ប៉ុន្តែ មិនត្រូវឲ្យបង‌ប្អូនជួយអ្នកដទៃរហូតដល់ខ្លួនឯងខ្វះខាតនោះឡើយ គឺគ្រាន់តែធ្វើឲ្យមានស្មើៗគ្នាប៉ុណ្ណោះ។ ១៤ ក្នុងកាលៈ‌ទេសៈសព្វថ្ងៃ អ្វីៗដែលបង‌ប្អូនមានលើសពីសេចក្ដីត្រូវការ បង‌ប្អូនយកទៅផ្គត់‌ផ្គង់អស់អ្នកដែលខ្វះខាត លុះដល់ថ្ងៃមួយ ពេលបង‌ប្អូនខ្វះខាត គេនឹងយកអ្វីៗដែលគេមានលើសពីសេចក្ដីត្រូវការ មកផ្គត់‌ផ្គង់បង‌ប្អូនវិញ។ ធ្វើដូច្នេះ ទើបមានស្មើៗគ្នា ១៥ ដូចមានសេចក្ដីចែងទុកមកថាៈ «អ្នកប្រមូលបានច្រើន ក៏មិនមានច្រើនជ្រុល រីឯអ្នកដែលប្រមូលបានបន្ដិច‌បន្តួចក៏មិនខ្វះខាតអ្វីដែរ»។

លោកទីតុស និងសហ‌ការីរបស់លោក

១៦ សូមអរព្រះ‌គុណព្រះ‌ជាម្ចាស់ ដែលបានប្រោសប្រទានឲ្យលោកទីតុសមានចិត្តខ្នះ‌ខ្នែងចង់ជួយបង‌ប្អូនដូចយើងដែរ ១៧ ដ្បិតគាត់បានយល់ព្រមធ្វើតាមសំណូមពររបស់យើង ហើយលើសពីនេះ គាត់ក៏មានចិត្តខ្នះ‌ខ្នែងសម្រេចចិត្តដោយខ្លួនឯងធ្វើដំណើរមករកបង‌ប្អូន។ ១៨ យើងបានចាត់បង‌ប្អូនម្នាក់ឲ្យមកជាមួយគាត់ គឺបង‌ប្អូនម្នាក់ដែលព្រះ‌សហគមន៍*ទាំងអស់កោតសរសើរ ក្នុងការផ្សព្វ‌ផ្សាយដំណឹង‌ល្អ*។ ១៩ មិនតែប៉ុណ្ណោះសោត ព្រះ‌សហគមន៍បានជ្រើស‌រើសគាត់ឲ្យរួមដំណើរជាមួយយើង ក្នុងមុខ‌ងារប្រមូលតង្វាយនេះ ដើម្បីលើកតម្កើងសិរី‌រុងរឿងរបស់ព្រះ‌អម្ចាស់ និងដើម្បីសម្ដែងឆន្ទៈល្អរបស់យើងដែរ។

២០ យើងចង់ចៀស‌វាងមិនឲ្យគេរិះគន់យើង អំពីរបៀបចាត់ចែងប្រាក់ ដែលរៃបានដ៏ច្រើននេះឡើយ ២១ ដ្បិតយើងចង់ធ្វើការល្អ មិនត្រឹមតែនៅចំពោះព្រះ‌ភ័ក្ត្រព្រះ‌អម្ចាស់ប៉ុណ្ណោះទេ គឺថែមទាំងនៅចំពោះមុខមនុស្សទាំងអស់ទៀតផង។ ២២ យើងបានចាត់បង‌ប្អូនយើងម្នាក់ទៀតឲ្យមកជាមួយអ្នកទាំងពីរ។ យើងធ្លាប់ល្បង‌លមើលចិត្តគាត់ជាច្រើនលើកច្រើនសា ហើយឃើញថាគាត់ ពិតជាមានចិត្តខ្នះ‌ខ្នែងមែន។ លើកនេះ គាត់បានបង្ហាញនូវទឹកចិត្តខ្នះ‌ខ្នែងជាងមុនទៅទៀត ព្រោះគាត់ទុកចិត្តបង‌ប្អូនខ្លាំងណាស់។ ២៣ ចំពោះលោកទីតុស គាត់ជាសហ‌ការីរបស់ខ្ញុំ ហើយគាត់ធ្វើការរួមជាមួយខ្ញុំ ដើម្បីបម្រើបង‌ប្អូន។ រីឯបង‌ប្អូនពីរនាក់ទៀតជាតំណាងរបស់ព្រះ‌សហគមន៍ និងជាសិរី‌រុងរឿងរបស់ព្រះ‌គ្រីស្ត។ ២៤ ដូច្នេះ សូមបង‌ប្អូន សម្ដែងឲ្យព្រះ‌សហគមន៍នានាឃើញថា បង‌ប្អូនស្រឡាញ់គេពិតមែន និងឃើញថា សេចក្ដីដែលយើងនិយាយសរសើរពីបង‌ប្អូនប្រាប់គេនោះ ពិតជាត្រឹមត្រូវមែន។

ជំនួយផ្ញើទៅជូនពួកបង‌ប្អូន

១ ចំពោះរឿងផ្ញើជំនួយទៅជូនប្រជាជនដ៏‌វិសុទ្ធនោះ មិនបាច់ឲ្យខ្ញុំសរសេរជម្រាបបង‌ប្អូនទេ ២ ខ្ញុំស្គាល់ឆន្ទៈល្អរបស់បង‌ប្អូនស្រាប់ហើយ ហើយខ្ញុំក៏បាននិយាយសរសើរពីបង‌ប្អូនប្រាប់អ្នកស្រុកម៉ាសេ‌ដូនថា «បង‌ប្អូននៅស្រុកអាខៃបានរៀបចំខ្លួនជាស្រេច តាំងពីឆ្នាំទៅម៉្លេះ»។ ចិត្តខ្នះ‌ខ្នែងរបស់បង‌ប្អូនបានជំរុញអ្នកឯទៀតជាច្រើន ឲ្យមានចិត្តស្ទុះ‌ស្ទាឡើង។ ៣ ខ្ញុំបានចាត់ពួកបង‌ប្អូនខ្លះមក ដើម្បីឲ្យឃើញថាពាក្យដែលយើងនិយាយសរសើរពីបង‌ប្អូនត្រង់ចំណុចនេះ មិនមែនខុសទេ គឺបង‌ប្អូនពិតជារៀបចំខ្លួនជាស្រេចដូចខ្ញុំនិយាយមែន។ ៤ ប្រសិនបើបង‌ប្អូននៅស្រុកម៉ាសេ‌ដូនមកជាមួយខ្ញុំ ហើយឃើញថាបង‌ប្អូនមិនទាន់រៀបចំខ្លួនទេនោះ មិនត្រឹមតែយើងប៉ុណ្ណោះទេ ដែលត្រូវអាម៉ាស់មុខ បង‌ប្អូនក៏នឹងត្រូវអាម៉ាស់មុខដែរ មកពីយើងទុកចិត្តលើបង‌ប្អូនខ្លាំងពេក។ ៥ ហេតុនេះហើយបានជាខ្ញុំយល់ឃើញថា ត្រូវតែសុំឲ្យបង‌ប្អូននៅទីនោះធ្វើដំណើរមករកបង‌ប្អូនមុនខ្ញុំ ដើម្បីរៀបចំប្រាក់ជំនួយដែលបង‌ប្អូនសន្យានោះ ឲ្យបានរួចរាល់។ ការនេះសឲ្យឃើញថា បង‌ប្អូនបានចូលប្រាក់ដោយចិត្តទូលាយ មិនមែនដោយចង្អៀត‌ចង្អល់ទេ។

៦ សូមចងចាំថា អ្នកណាព្រោះតិច អ្នកនោះក៏ច្រូតបានផលតិចដែរ រីឯអ្នកដែលព្រោះច្រើនបរិបូណ៌ ក៏ច្រូតបានផលច្រើនបរិបូណ៌ដែរ។ ៧ ហេតុនេះ ម្នាក់ៗត្រូវតែចូលប្រាក់តាមតែខ្លួនសម្រេចចិត្ត ដោយមិននឹកស្ដាយ ឬទើសទ័លឡើយ ដ្បិតព្រះ‌ជាម្ចាស់សព្វព្រះ‌ហឫទ័យនឹងអ្នកណាដែលធ្វើអំណោយដោយចិត្តរីក‌រាយ។ ៨ ព្រះ‌អង្គអាចនឹងប្រទានពរដ៏ហូរ‌ហៀរគ្រប់យ៉ាងដល់បង‌ប្អូន ដើម្បីឲ្យបង‌ប្អូនមានអ្វីៗទាំងអស់ដែលបង‌ប្អូនត្រូវការដ៏ចាំ‌បាច់នោះជា‌និច្ច ហើយថែមទាំងនៅសល់បរិបូណ៌សម្រាប់ចែកទានផង ៩ ដូចមានចែងទុកមកថាៈ

«ព្រះ‌អង្គចែក ព្រះ‌អង្គប្រទានឲ្យអ្នកក្រ

សេចក្ដីសុចរិតរបស់ព្រះ‌អង្គនៅស្ថិត‌ស្ថេរ

រហូតតរៀងទៅ»។

១០ ព្រះ‌អង្គដែល«ប្រទានគ្រាប់ពូជដល់អ្នកសាបព្រោះ និងប្រទានចំណីអាហារឲ្យគេផងនោះ» ព្រះ‌អង្គក៏ផ្គត់‌ផ្គង់គ្រាប់ពូជឲ្យបង‌ប្អូន និងឲ្យគ្រាប់ពូជនោះកើនចំនួនឡើងដែរ ហើយព្រះ‌អង្គនឹងធ្វើឲ្យសេចក្ដីសុចរិតរបស់បង‌ប្អូន បង្កើតផលបានច្រើនឡើងថែមទៀត។ ១១ ព្រះ‌អង្គនឹងធ្វើឲ្យបង‌ប្អូនទៅជាអ្នកមានគ្រប់វិស័យទាំងអស់ ដើម្បីឲ្យបង‌ប្អូនមានចិត្តសទ្ធាជ្រះ‌ថ្លាគ្រប់ចំពូក និងឲ្យអ្នកឯទៀតៗអរព្រះ‌គុណព្រះ‌ជាម្ចាស់ ដោយយើងជួយគេ ១២ ដ្បិតមុខ‌ងារប្រមូលប្រាក់នេះ មិនត្រឹមតែជួយផ្គត់‌ផ្គង់សេចក្ដីត្រូវការរបស់អ្នកជឿប៉ុណ្ណោះទេ គឺថែមទាំងជួយគេឲ្យអរព្រះ‌គុណព្រះ‌ជាម្ចាស់កាន់តែច្រើនឡើងទៀតផង។ ១៣ ពេលគេយល់តម្លៃនៃកិច្ច‌ការដែលបង‌ប្អូនធ្វើនេះ គេនាំគ្នាលើកតម្កើងសិរី‌រុងរឿងរបស់ព្រះ‌ជាម្ចាស់ ព្រោះបង‌ប្អូន សម្ដែងឲ្យគេឃើញថា បង‌ប្អូនពិតជាប្រតិបត្តិតាមដំណឹង‌ល្អ*របស់ព្រះ‌គ្រីស្តដែលបង‌ប្អូនប្រកាស ហើយបង‌ប្អូនមានចិត្តទូលាយ ដោយយករបស់របរមកចែកជាមួយពួកគេ និងជាមួយមនុស្សទាំងអស់។ ១៤ គេទូល‌អង្វរព្រះ‌ជាម្ចាស់ឲ្យបង‌ប្អូន ដោយចិត្តស្រឡាញ់ ព្រោះព្រះ‌អង្គបានប្រណី‌សន្ដោសបង‌ប្អូនយ៉ាងបរិបូណ៌លើស‌លប់។ ១៥ សូមអរព្រះ‌គុណព្រះ‌ជាម្ចាស់ចំពោះព្រះ‌អំណោយទានដ៏ប្រសើរបំផុតរបស់ព្រះ‌អង្គ រកថ្លែងពុំបាន។

លោកប៉ូលឆ្លើយការ‌ពារខ្លួន

១ ខ្ញុំ ប៉ូល ដែលគេតែងនិយាយថា ពេលនៅជាមួយបង‌ប្អូន ខ្ញុំមានឫក‌ពាសុភាព តែពេលនៅឆ្ងាយ ហ៊ានតឹង‌រ៉ឹងដាក់បង‌ប្អូន ខ្ញុំសូមដាស់‌តឿនបង‌ប្អូនដោយចិត្តស្លូត‌បូត និងដោយចិត្តល្អសប្បុរសមកពីព្រះ‌គ្រីស្ត* ២ ខ្ញុំសូមអង្វរបង‌ប្អូនថា កុំបង្ខំចិត្តខ្ញុំឲ្យបែរទៅជាតឹង‌តែង នៅពេលខ្ញុំមកដល់នោះឡើយ ដ្បិតខ្ញុំបានតាំងចិត្តរួចស្រេចហើយថា ខ្ញុំមិនខ្លាចនឹងស្ដីបន្ទោសអស់អ្នកដែលចោទថា យើងរស់នៅតាមរបៀបលោកីយ៍នោះទេ។

៣ ទោះបីយើងជាមនុស្សលោកធម្មតាក៏ដោយ ក៏យើងមិនតយុទ្ធតាមរបៀបលោកីយ៍ដែរ ៤ ដ្បិតគ្រឿងសាស្ត្រា‌វុធដែលយើងប្រើ មិនមែនជាអាវុធខាងលោកីយ៍ទេ គឺជាអាវុធដ៏មានឫទ្ធា‌នុភាពមកពីព្រះ‌ជាម្ចាស់ ដែលអាចរំលំកំពែងបន្ទាយនានា។ យើងរំលំការរិះ‌គិត ៥ និងគំនិតឆ្មើង‌កន្ទ្រើងទាំងប៉ុន្មាន ដែលរារាំងមិនឲ្យស្គាល់ព្រះ‌ជាម្ចាស់។ យើងកៀរប្រមូលចិត្តគំនិតឲ្យមកស្ដាប់បង្គាប់ព្រះ‌គ្រីស្តវិញ។ ៦ នៅពេលណាបង‌ប្អូនស្ដាប់បង្គាប់ទាំងស្រុងហើយនោះ យើងក៏ប្រុងប្រៀបខ្លួនដាក់ទោសអស់អ្នកដែលមិនស្ដាប់បង្គាប់ដែរ។ ៧ សុំបង‌ប្អូនពិចារណាឲ្យបានច្បាស់លាស់! ប្រសិនបើនរណាម្នាក់ជឿជាក់ថា ខ្លួនជាកូនចៅរបស់ព្រះ‌គ្រីស្ត អ្នកនោះតោងគិតឲ្យច្បាស់ថា បើខ្លួនជាកូនចៅរបស់ព្រះ‌គ្រីស្ត យើងក៏ជាកូនចៅរបស់ព្រះ‌អង្គដូចគាត់ដែរ។ ៨ ព្រះ‌អម្ចាស់ប្រទានអំណាចឲ្យយើង ដើម្បីកសាងបង‌ប្អូន មិនមែនដើម្បីបំផ្លាញបង‌ប្អូនទេ។ ទោះបីខ្ញុំបាននិយាយអួតខ្លួនជ្រុលបន្ដិចអំពីអំណាចនោះ ក៏ខ្ញុំមិនអៀនខ្មាសដែរ។ ៩ ខ្ញុំមិនចង់ឲ្យបង‌ប្អូនស្មានថា ខ្ញុំមានបំណងបំភ័យបង‌ប្អូន តាមសំបុត្រទាំងនេះឡើយ ១០ ដ្បិតមានគេថា «ពាក្យក្នុងសំបុត្ររបស់ប៉ូលធ្ងន់ៗណាស់ ហើយក៏តឹង‌រ៉ឹងផង តែពេលគាត់នៅទីនេះ គាត់មិនហ៊ានធ្វើអ្វីនរណាទេ ហើយក៏គ្មានវោហារអ្វីដែរ»។ ១១ អ្នកដែលនិយាយដូច្នេះ ត្រូវគិតថា ពេលយើងមិននៅ យើងនិយាយបែបណា ពេលយើងនៅជាមួយ យើងក៏នឹងប្រព្រឹត្តបែបនោះដែរ។ ១២ យើងមិនហ៊ានលើកខ្លួនឲ្យស្មើនឹងអ្នកខ្លះដែលតែងតាំងខ្លួនឯង ឬក៏ប្រៀបផ្ទឹមខ្លួនយើងទៅនឹងគេនោះឡើយ។ អ្នកទាំងនោះបានលើកខ្លួនតាំងជារង្វាស់ សម្រាប់វាស់ខ្លួនឯង ហើយប្រៀបផ្ទឹមខ្លួនឯងទៅនឹងខ្លួនឯង! គេគ្មានប្រាជ្ញាទាល់តែសោះ! ១៣ រីឯយើងវិញ យើងមិនអួតខ្លួនហួសកម្រិតទេ គឺយើងធ្វើតាមកម្រិតនៃព្រំ‌ដែនដែលព្រះ‌ជាម្ចាស់បានកំណត់ទុក ដោយប្រទានឲ្យយើងបានមកដល់ស្រុកបង‌ប្អូននេះ។ ១៤ បង‌ប្អូនស្ថិតនៅក្នុងព្រំ‌ដែន ដែលព្រះ‌ជាម្ចាស់បានកំណត់ទុកឲ្យយើង ដូច្នេះ នៅពេលយើងបានមកដល់ទីនេះមុនគេ ដើម្បីនាំដំណឹង‌ល្អរបស់ព្រះ‌គ្រីស្ត យើងមិនធ្វើអ្វីហួសកំណត់ព្រំ‌ដែននេះទេ។ ១៥ យើងមិនអួតខ្លួនហួសកម្រិត គឺមិនអួតអំពីកិច្ច‌ការដែលអ្នកដទៃបានធ្វើនោះឡើយ។ យើងសង្ឃឹមថា ជំនឿរបស់បង‌ប្អូននឹងចម្រើនឡើង ហើយយើងអាចនឹងបំពេញកិច្ច‌ការកាន់តែប្រសើរឡើងថែមទៀតក្នុងចំណោមបង‌ប្អូន តាមព្រំ‌ដែនដែលព្រះ‌ជាម្ចាស់បានកំណត់ទុកឲ្យយើង។ ១៦ បន្ទាប់មក យើងនឹងផ្សព្វ‌ផ្សាយដំណឹង‌ល្អនៅតាមតំបន់នានា នៅខាងនាយស្រុកបង‌ប្អូន ដោយមិនអួតខ្លួនអំពីកិច្ច‌ការ ដែលអ្នកដទៃបានធ្វើរួចស្រេចមកហើយក្នុងតំបន់របស់គេឡើយ។ ១៧ អ្នកណាចង់អួត‌អាងត្រូវអួត‌អាងអំពីកិច្ច‌ការ ដែលព្រះ‌អម្ចាស់បានធ្វើ។ ១៨ អ្នកដែលគួរឲ្យគេទុកចិត្ត មិនមែនអ្នកដែលតែង‌តាំងខ្លួនឯងទេ គឺអ្នកដែលព្រះ‌អម្ចាស់តែង‌តាំងនោះវិញ។

លោកប៉ូល និងគ្រីស្តទូតក្លែង‌ក្លាយ

១ សូមបង‌ប្អូនអត់‌ឱនឲ្យខ្ញុំផង ពេលនេះ ខ្ញុំនិយាយដូចជាមនុស្សលេលា សូមអត់‌ឱនឲ្យខ្ញុំផង! ២ ព្រោះខ្ញុំប្រច័ណ្ឌបង‌ប្អូន ដោយចិត្តប្រច័ណ្ឌមកពីព្រះ‌ជាម្ចាស់ ដ្បិតខ្ញុំបានដណ្ដឹងបង‌ប្អូន ឲ្យធ្វើជាគូដណ្ដឹង នឹងស្វាមីតែមួយគត់ គឺខ្ញុំនាំបង‌ប្អូនមក ដូចជានាំក្រមុំព្រហ្មចារីយកទៅថ្វាយព្រះ‌គ្រីស្ត*។ ៣ ប៉ុន្តែ ខ្ញុំក៏បារម្ភថា ពស់បានល្បួងនាងអេវ៉ា ដោយកល‌ល្បិចរបស់វាយ៉ាងណា ចិត្តគំនិតរបស់បង‌ប្អូនបែរទៅជាសៅ‌ហ្មង លះ‌បង់ចិត្តស្មោះ‌សរ និងចិត្តបរិសុទ្ធ* ចំពោះព្រះ‌គ្រីស្តយ៉ាងនោះដែរ ៤ ព្រោះថាពេលមាននរណាម្នាក់មកប្រកាសអំពីព្រះ‌យេស៊ូណាមួយផ្សេងទៀត ក្រៅពីព្រះ‌យេស៊ូដែលយើងប្រកាសនោះ ឬមួយបើបង‌ប្អូនទទួលវិញ្ញាណណាផ្សេង ក្រៅពីព្រះ‌វិញ្ញាណដែលបង‌ប្អូនបានទទួលហើយ ឬក៏ដំណឹង‌ល្អ*ណាមួយទៀត ក្រៅពីដំណឹង‌ល្អដែលបង‌ប្អូនបានទទួលនោះ បង‌ប្អូនចេះតែអត់‌ឱនឲ្យគេយ៉ាងស្រួលៗ។

៥ ខ្ញុំយល់ឃើញថា ខ្ញុំមិនមែនអន់ជាងអស់អ្នកដែលតាំងខ្លួនជាមហាគ្រីស្តទូតទាំងនោះ ត្រង់កន្លែងណាមួយឡើយ ៦ ថ្វី‌ដ្បិតតែខ្ញុំមិនសូវមានវោហារក៏ដោយ ផ្នែកខាងចំណេះ ខ្ញុំក៏មិនអន់ដែរ ដូចយើងធ្លាប់បានបង្ហាញឲ្យបង‌ប្អូនឃើញក្នុងគ្រប់វិស័យ និងគ្រប់ពេលវេលាស្រាប់ហើយ។

៧ ពេលខ្ញុំប្រកាសដំណឹង‌ល្អ*របស់ព្រះ‌ជាម្ចាស់ ប្រាប់បង‌ប្អូនដោយឥតគិតថ្លៃនោះ ខ្ញុំបានបន្ទាបខ្លួន ដើម្បីឲ្យបង‌ប្អូនបានថ្កើងឡើង។ តើខ្ញុំធ្វើដូច្នេះ បានសេចក្ដីថា ខ្ញុំធ្វើខុសឬ?។ ៨ ខ្ញុំបានទទួលប្រាក់ពីព្រះ‌សហគមន៍*ឯទៀតៗ ធ្វើឲ្យគេខ្វះ‌ខាតខ្លះៗ ដើម្បីបម្រើបង‌ប្អូន។ ៩ ពេលខ្ញុំនៅជាមួយបង‌ប្អូន បើខ្ញុំខ្វះខាតអ្វីៗ ខ្ញុំពុំបានធ្វើជាបន្ទុកដល់នរណាម្នាក់ឡើយ ដ្បិតបង‌ប្អូនមកពីស្រុកម៉ាសេ‌ដូនបានជួយផ្គត់‌ផ្គង់នូវអ្វីៗ ដែលខ្ញុំត្រូវការ។ ក្នុងគ្រប់កិច្ច‌ការ ខ្ញុំបានចៀស‌វាងកុំឲ្យខ្លួនខ្ញុំទៅជាបន្ទុកដល់បង‌ប្អូន ហើយខ្ញុំនឹងចៀស‌វាងតទៅមុខទៀត។ ១០ ខ្ញុំសូមបញ្ជាក់ដោយមានសេចក្ដីពិតរបស់ព្រះ‌គ្រីស្តនៅក្នុងខ្លួនថា ក្នុងស្រុកអាខៃទាំងមូល គ្មាននរណាអាចបង្អាប់កិត្តិយសខ្ញុំត្រង់ចំណុចនេះឡើយ។ ១១ ហេតុអ្វីបានជាខ្ញុំធ្វើដូច្នេះ? តើមកពីខ្ញុំមិនស្រឡាញ់បង‌ប្អូនឬ? ទេ! ព្រះ‌ជាម្ចាស់ជ្រាបស្រាប់ហើយថា ខ្ញុំស្រឡាញ់បង‌ប្អូន។

១២ ការដែលខ្ញុំធ្វើនេះ ខ្ញុំនឹងធ្វើតទៅមុខទៀត ដើម្បីកុំឲ្យអស់អ្នកដែលចង់រកលេសនឹងអួតខ្លួន ដោយពោលថា គេធ្វើការដូចយើងដែរនោះ អាចរកលេសបានសោះឡើយ។ ១៣ ជនប្រភេទនោះសុទ្ធតែជាគ្រីស្តទូតក្លែង‌ក្លាយ អ្នកបន្លំធ្វើការ អ្នកក្លែងខ្លួនធ្វើជាគ្រីស្តទូតរបស់ព្រះ‌គ្រីស្ត*។ ១៤ ត្រង់នេះ សូមកុំឆ្ងល់អ្វីឡើយ សូម្បីតែមារ*សាតាំងផ្ទាល់ក៏បានក្លែងខ្លួនធ្វើជាទេវទូតនៃពន្លឺដែរ។ ១៥ ដូច្នេះ បើពួកអ្នកបម្រើរបស់វាក្លែងខ្លួនធ្វើជាអ្នកបម្រើសេចក្ដីសុចរិតនោះ គ្មានអ្វីចម្លែកសោះឡើយ។ អ្នកទាំងនោះនឹងវិនាស ស្របតាមអំពើដែលខ្លួនបានប្រព្រឹត្តជាមិនខាន។

ទុក្ខលំបាករបស់លោកប៉ូលក្នុងការបំពេញមុខ‌ងារជាគ្រីស្តទូត

១៦ ខ្ញុំសូមបញ្ជាក់ម្ដងទៀតថា កុំឲ្យនរណាម្នាក់យល់ថាខ្ញុំជាមនុស្សលេលាឡើយ ឬមួយទុកឲ្យខ្ញុំលេលាទៅចុះ ដើម្បីឲ្យខ្ញុំអាចអួតខ្លួនបន្ដិចដែរ។ ១៧ សេចក្ដីដែលខ្ញុំនិយាយនេះ ខ្ញុំមិននិយាយស្របតាមព្រះ‌អម្ចាស់ទេ គឺខ្ញុំនិយាយដូចជាមនុស្សលេលាវិញដោយយល់ឃើញថា ខ្ញុំមានហេតុនឹងអួតខ្លួនប្រាកដមែន។ ១៨ ដោយមានមនុស្សជាច្រើនលើកខ្លួនតាមរបៀបលោកីយ៍ នោះខ្ញុំក៏អាចនឹងលើកខ្លួនឯងតាមរបៀបលោកីយ៍ដែរ! ១៩ បង‌ប្អូនជាមនុស្សដឹងខុសត្រូវ តែបង‌ប្អូនចេះទ្រាំ‌ទ្រនឹងមនុស្សលេលាបាន ២០ គឺទ្រាំ‌ទ្រឲ្យគេជិះ‌ជាន់ កេង‌ប្រវ័ញ្ច រឹបអូសយករបស់ទ្រព្យ ប្រមាថមាក់‌ងាយ និងឲ្យគេទះកំផ្លៀងផង។ ២១ ខ្ញុំសូមជម្រាបថា គួរឲ្យខ្មាសណាស់! យើងហាក់បីដូចជាទន់ខ្សោយពេក។

ប៉ុន្តែ បើគេហ៊ានអះ‌អាងត្រង់ចំណុចណាមួយ (ខ្ញុំនិយាយដូចជាមនុស្សលេលាមែន) ខ្ញុំក៏ហ៊ានត្រង់ចំណុចនោះដូចគេដែរ។ ២២ អ្នកទាំងនោះជាសាសន៍ហេប្រឺឬ? ខ្ញុំក៏ជាសាសន៍ហេប្រឺដែរ! អ្នកទាំងនោះជាសាសន៍អ៊ីស្រា‌អែលឬ? ខ្ញុំក៏ជាសាសន៍អ៊ីស្រា‌អែលដែរ! អ្នកទាំងនោះជាពូជ‌ពង្សរបស់លោកអប្រាហាំឬ? ខ្ញុំក៏ជាពូជ‌ពង្សរបស់លោកដែរ! ២៣ អ្នកទាំងនោះជាអ្នកបម្រើរបស់ព្រះ‌គ្រីស្ត*ឬ? ខ្ញុំសូមនិយាយដូចជាមនុស្សវង្វេងស្មារតីទាំងស្រុងទៅចុះថា ខ្ញុំជាអ្នកបម្រើរបស់ព្រះ‌អង្គលើសអ្នកទាំងនោះទៅទៀត។ ខ្ញុំធ្វើការនឿយ‌ហត់ច្រើនជាងអ្នកទាំងនោះ ខ្ញុំបានជាប់ឃុំ‌ឃាំងច្រើនជាង ខ្ញុំត្រូវគេវាយ‌ដំច្រើនជាងហួសប្រមាណ ហើយខ្ញុំក៏មានគ្រោះថ្នាក់ជិតស្លាប់ជាញឹក‌ញាប់ដែរ។ ២៤ ខ្ញុំត្រូវជនជាតិយូដាវាយសាម‌សិបប្រាំបួនរំពាត់ចំនួនប្រាំដង។ ២៥ គេវាយខ្ញុំនឹងដំបងចំនួនបីលើក គេយកដុំថ្មគប់សម្លាប់ខ្ញុំម្ដង ខ្ញុំត្រូវលិចសំពៅបីដង ហើយមានម្ដងខ្ញុំអណ្ដែតនៅក្នុងសមុទ្រមួយថ្ងៃមួយយប់។ ២៦ ពេលខ្ញុំធ្វើដំណើរ ខ្ញុំតែង‌តែជួបប្រទះគ្រោះថ្នាក់ជាញឹក‌ញាប់នៅតាមទន្លេ គ្រោះថ្នាក់ដោយចោរប្លន់ គ្រោះថ្នាក់មកពីជនរួមជាតិរបស់ខ្ញុំ គ្រោះថ្នាក់មកពីសាសន៍ដទៃ គ្រោះថ្នាក់ក្នុងទីក្រុង គ្រោះថ្នាក់នៅវាលរហោ‌ស្ថាន គ្រោះថ្នាក់នៅក្នុងសមុទ្រ គ្រោះថ្នាក់ ព្រោះតែពួកបង‌ប្អូនក្លែង‌ក្លាយ។ ២៧ ខ្ញុំបានធ្វើការទាំងនឿយលំបាក និងត្រូវអត់ងងុយ អត់បាយអត់ទឹកជាញឹកញាប់។ ខ្ញុំត្រូវតមអាហារ ត្រូវរងា និងខ្វះខាតសម្លៀក‌បំពាក់ជាញឹកញាប់។ ២៨ លើសពីនេះទៅទៀត ខ្ញុំខ្វល់‌ខ្វាយរៀងរាល់ថ្ងៃ ដោយគិតដល់ព្រះ‌សហគមន៍ទាំងអស់ផងដែរ! ២៩ ប្រសិនបើមានអ្នកណាម្នាក់ទន់ខ្សោយ ខ្ញុំក៏ទន់ខ្សោយដែរ ប្រសិនបើមានអ្នកណាម្នាក់ឃ្លាតចេញពីជំនឿ ខ្ញុំឈឺចុកចាប់ណាស់! ៣០ ប្រសិនបើខ្ញុំត្រូវអួតខ្លួន នោះខ្ញុំនឹងអួតតែអំពីភាពទន់ខ្សោយរបស់ខ្ញុំប៉ុណ្ណោះ។ ៣១ ព្រះ‌ជាម្ចាស់ដែលជាព្រះ‌បិតារបស់ព្រះ‌អម្ចាស់‌យេស៊ូ ព្រះ‌អង្គជ្រាបស្រាប់ហើយថា ខ្ញុំមិននិយាយកុហកទេ (សូមលើកតម្កើងព្រះ‌អង្គអស់កល្ប‌ជានិច្ច!)។ ៣២ កាលខ្ញុំនៅក្រុងដាម៉ាស លោកអភិបាលរបស់ស្ដេចអរេតាស បានដាក់ទាហានឲ្យយាមទ្វារក្រុង ដើម្បីចាំចាប់ខ្ញុំ ៣៣ ប៉ុន្តែ គេបានដាក់ខ្ញុំក្នុងជាលមួយសម្រូតចុះតាមបង្អួចកំពែង ហើយខ្ញុំបានគេចផុតពីកណ្ដាប់ដៃលោក។

លោកប៉ូលនិមិត្តឃើញការអស្ចារ្យ

១ តើខ្ញុំត្រូវតែអួតខ្លួនឬ? ទោះបីអួតខ្លួនគ្មានប្រយោជន៍អ្វីក៏ដោយ ក៏ខ្ញុំសូមនិយាយអំពីការអស្ចារ្យដែលព្រះ‌អម្ចាស់បានប្រោសឲ្យខ្ញុំនិមិត្តឃើញ និងសម្ដែងឲ្យខ្ញុំដឹង។ ២ ខ្ញុំស្គាល់បុរសម្នាក់ដែលជឿព្រះ‌គ្រីស្ត* កាលពីដប់‌បួនឆ្នាំមុន ព្រះ‌អម្ចាស់បានលើកគាត់ឡើងទៅដល់ស្ថាន‌សួគ៌ជាន់ទីបី (ប៉ុន្តែ ខ្ញុំមិនដឹងថា រូបកាយគាត់ឡើងទៅ ឬមួយគាត់គ្រាន់តែនិមិត្តឃើញ មានតែព្រះ‌ជាម្ចាស់ប៉ុណ្ណោះព្រះ‌អង្គជ្រាប)។ ៣ ខ្ញុំក៏ដឹងថា ព្រះ‌អម្ចាស់លើកបុរសនោះទៅដល់ស្ថានបរម‌សុខ* (ប៉ុន្តែ ខ្ញុំមិនដឹងថារូបកាយរបស់គាត់ឡើងទៅ ឬមួយគាត់គ្រាន់តែនិមិត្តឃើញ មានតែព្រះ‌ជាម្ចាស់ប៉ុណ្ណោះព្រះ‌អង្គជ្រាប)។ ៤ គាត់បានឮព្រះ‌បន្ទូលដ៏អស្ចារ្យរកថ្លែងពុំបាន ដែលគ្មានមនុស្សណាមានសិទ្ធិនឹងនិយាយឡើងវិញទេ។ ៥ ខ្ញុំអួតតែពីបុរសនោះ រីឯខ្ញុំវិញ ខ្ញុំមិនអួតខ្លួនខ្ញុំផ្ទាល់ឡើយ ខ្ញុំអួតតែពីភាពទន់ខ្សោយរបស់ខ្ញុំប៉ុណ្ណោះ។ ៦ ប្រសិនបើខ្ញុំចង់អួតខ្លួន ខ្ញុំក៏មិនមែនល្ងី‌ល្ងើដែរ ព្រោះខ្ញុំគ្រាន់តែនិយាយសេចក្ដីពិត។ ប៉ុន្តែ ខ្ញុំសុខចិត្តនៅស្ងៀមវិញ ក្រែងលោមាននរណាម្នាក់ស្មានថា ខ្ញុំមានឋានៈខ្ពស់លើសពីភាពដែលគេឃើញ និងលើសពីពាក្យដែលខ្ញុំនិយាយ។ ៧ ព្រះ‌ជាម្ចាស់បានដាក់បន្លាមួយក្នុងរូបកាយខ្ញុំ ដើម្បីកុំឲ្យខ្ញុំអួតខ្លួន ព្រោះតែការអស្ចារ្យដ៏ប្រសើរបំផុតដែលព្រះ‌អង្គបានសម្ដែងឲ្យខ្ញុំឃើញ គឺដូចជាមានតំណាងរបស់មារ*សាតាំងមកធ្វើទារុណ‌កម្មខ្ញុំ កុំឲ្យខ្ញុំអួតខ្លួនបានឡើយ។ ៨ ខ្ញុំបានអង្វរព្រះ‌អម្ចាស់ចំនួនបីដង សូមព្រះ‌អង្គមេត្តាដកយកបន្លានេះចេញពីរូបកាយខ្ញុំ។ ៩ ប៉ុន្តែ ព្រះ‌អង្គមានព្រះ‌បន្ទូលមកខ្ញុំថា «ការប្រណី‌សន្ដោសរបស់យើងល្មមគ្រប់គ្រាន់សម្រាប់អ្នកហើយ ដ្បិតឫទ្ធា‌នុភាពរបស់យើងនឹងលេចចេញមកយ៉ាងខ្លាំងបំផុត ក្នុងមនុស្សទន់ខ្សោយ»។ ដូច្នេះ ខ្ញុំចូលចិត្តអួតខ្លួនអំពីភាពទន់ខ្សោយរបស់ខ្ញុំជាង ដើម្បីឲ្យឫទ្ធា‌នុភាពរបស់ព្រះ‌គ្រីស្តមកសណ្ឋិតលើខ្ញុំ។ ១០ ហេតុនេះ ព្រោះតែព្រះ‌គ្រីស្ត ខ្ញុំអរសប្បាយនៅពេលទន់ខ្សោយ នៅពេលគេជេរប្រមាថ នៅពេលខ្វះខាត នៅពេលគេបៀត‌បៀន នៅពេលតប់‌ប្រមល់ ដ្បិតពេលណាខ្ញុំទន់ខ្សោយ គឺពេលនោះហើយដែលខ្ញុំមានកម្លាំង។

លោកប៉ូលខ្វល់‌ខ្វាយអំពីក្រុមគ្រីស្ត‌បរិស័ទនៅក្រុងកូរិន‌ថូស

១១ ខ្ញុំនិយាយដូច្នេះ ដូចជាមនុស្សលេលាហើយ គឺមកពីបង‌ប្អូនបង្ខំខ្ញុំ ដ្បិតបង‌ប្អូនហ្នឹងហើយដែលត្រូវគាំទ្រខ្ញុំ ទោះបីខ្ញុំជាមនុស្សឥតបានការក្តី ក៏ខ្ញុំមិនអន់ជាងមហាគ្រីស្តទូតទាំងនោះដែរ។ ១២ មានសញ្ញាសម្គាល់ផ្សេងៗដែលបញ្ជាក់ថា ខ្ញុំជាគ្រីស្តទូតបានកើតឡើងក្នុងចំណោមបង‌ប្អូន គឺមានការអត់‌ធ្មត់គ្រប់យ៉ាង មានទីសម្គាល់ ឫទ្ធិ‌បាដិ‌ហារិយ៍ និងការអស្ចារ្យផ្សេងៗ។ ១៣ បង‌ប្អូនមិនបានទទួលអ្វីតិចជាងព្រះ‌សហគមន៍ឯទៀតៗនោះឡើយ វៀរ‌លែងតែខ្ញុំមិនដែលបានធ្វើជាបន្ទុកដល់បង‌ប្អូនប៉ុណ្ណោះ សូមបង‌ប្អូនអភ័យទោសឲ្យខ្ញុំចំពោះភាពអយុត្ដិ‌ធម៌នេះផង។

១៤ ឥឡូវនេះ ខ្ញុំរៀបចំខ្លួនជាស្រេច ដើម្បីមករកបង‌ប្អូនជាលើកទីបី ប៉ុន្តែ ខ្ញុំមិនធ្វើជាបន្ទុកដល់បង‌ប្អូនទេ ព្រោះខ្ញុំមក មិនមែនប្រាថ្នាចង់បានសម្បត្តិរបស់បង‌ប្អូនឡើយ គឺចង់បានបង‌ប្អូនផ្ទាល់តែម្ដង។ ធម្មតា កូនចៅមិនដែលប្រមូលសម្បត្តិជូនឪពុក‌ម្ដាយទេ គឺឪពុក‌ម្ដាយវិញទេតើ ដែលប្រមូលសម្បត្តិទុកឲ្យកូន! ១៥ ចំពោះខ្ញុំ ខ្ញុំពេញចិត្តនឹងចំណាយអ្វីៗដែលខ្ញុំមាន ហើយខ្ញុំក៏ចំណាយខ្លួនខ្ញុំថែមទៀត ដើម្បីជាប្រយោជន៍ដល់ជីវិតបង‌ប្អូនដែរ។ បើខ្ញុំស្រឡាញ់បង‌ប្អូនខ្លាំងយ៉ាងហ្នឹងទៅហើយ តើបង‌ប្អូនស្រឡាញ់ខ្ញុំតិចជាងឬ?

១៦ យើងសន្មតទៅចុះថា ខ្ញុំពុំបានធ្វើជាបន្ទុកដល់បង‌ប្អូនមែន តែមានអ្នកខ្លះប្រហែលជាថាខ្ញុំជាមនុស្សមានពុត‌ត្បុត ប្រើកល‌ល្បិចបោកប្រាស់បង‌ប្អូន។ ១៧ តើខ្ញុំមានដែលបោកប្រាស់បង‌ប្អូន តាម‌រយៈអ្នកដែលខ្ញុំចាត់មករកបង‌ប្អូននោះទេ? ១៨ ខ្ញុំបានអង្វរលោកទីតុសឲ្យមករកបង‌ប្អូន ហើយខ្ញុំក៏ចាត់បង‌ប្អូនម្នាក់ទៀតឲ្យមកជាមួយគាត់ដែរ តើលោកទីតុសបានបោកប្រាស់បង‌ប្អូនឬ? តើយើងទាំងពីរនាក់មិនបានប្រកាន់យកចិត្តគំនិត និងដើរតាមគន្លងតែមួយទេឬ?។

១៩ តាំងពីយូរមកហើយ បង‌ប្អូនប្រហែលជាចេះតែស្មានថា យើងនិយាយដោះ‌សានៅចំពោះមុខបង‌ប្អូន! ទេ! យើងនិយាយដោយរួមជាមួយព្រះ‌គ្រីស្ត នៅចំពោះព្រះ‌ភ័ក្ត្រព្រះ‌ជាម្ចាស់។ បង‌ប្អូនជាទីស្រឡាញ់អើយ! យើងនិយាយសេចក្ដីទាំងនេះ ដើម្បីកសាងជំនឿបង‌ប្អូនតែប៉ុណ្ណោះ ២០ ដ្បិតខ្ញុំបារម្ភខ្លាចក្រែងលោពេលខ្ញុំមកដល់ ខ្ញុំមិនឃើញបង‌ប្អូនមានលក្ខណៈ ដូចដែលខ្ញុំចង់ឃើញ ហើយក៏ខ្លាចក្រែងបង‌ប្អូនឃើញខ្ញុំខុសពីលក្ខណៈដែលបង‌ប្អូនចង់ឃើញនោះដែរ។ ខ្ញុំបារម្ភក្រែងលោមានការទាស់‌ទែងគ្នា ច្រណែនគ្នា ខឹង‌សម្បារ ប្រណាំងប្រជែង និយាយដើមគ្នា បរិហារកេរ្តិ៍គ្នា អួត‌បំប៉ាង ខ្វះសណ្ដាប់‌ធ្នាប់។ ២១ ខ្ញុំបារម្ភក្រែងលោពេលខ្ញុំមកដល់លើកក្រោយ ព្រះរបស់ខ្ញុំនឹងបំបាក់មុខខ្ញុំនៅចំពោះមុខបង‌ប្អូន ហើយខ្ញុំត្រូវយំសោក ព្រោះតែបង‌ប្អូនជាច្រើននាក់ដែលបានប្រព្រឹត្តអំពើបាបកាលពីមុន តែមិនទាន់បានកែប្រែចិត្តគំនិត លះ‌បង់អំពើសៅ‌ហ្មង ប្រាសចាកសីល‌ធម៌ និងកាម‌គុណថោកទាបដែលខ្លួនបានប្រព្រឹត្តនៅឡើយ។

ការរំឭកដាស់‌តឿន និងការសួរសុខទុក្ខរបស់លោកប៉ូល

១ នេះជាលើកទីបីហើយ ដែលខ្ញុំមករកបង‌ប្អូន។ ត្រូវសម្រួលរឿងទាំងអស់ ដោយមានសាក្សីពីរ ឬបីនាក់។ ២ កាលខ្ញុំនៅជាមួយបង‌ប្អូនជាលើកទីពីរ ខ្ញុំបាននិយាយសេចក្ដីនេះរួចស្រេចហើយ ហើយឥឡូវនេះ ពេលដែលខ្ញុំនៅឆ្ងាយ ខ្ញុំសូមជម្រាបអស់អ្នកដែលបានប្រព្រឹត្តអំពើបាបកាលពីមុន និងសូមជម្រាបអ្នកឯទៀតៗទាំងអស់ ឲ្យបានដឹងជាមុនថា បើខ្ញុំវិលមករកបង‌ប្អូនវិញនោះ ខ្ញុំនឹងមិនប្រណីអ្នកណាម្នាក់ឡើយ ៣ ដ្បិតបង‌ប្អូនចង់បានភស្តុតាងថា ព្រះ‌គ្រីស្តមានព្រះ‌បន្ទូលតាម‌រយៈខ្ញុំ។ ព្រះ‌អង្គមិនទន់ខ្សោយចំពោះបង‌ប្អូនទេ គឺព្រះ‌អង្គបង្ហាញឫទ្ធា‌នុភាពនៅកណ្ដាលចំណោមបង‌ប្អូនវិញ។ ៤ ព្រះ‌អង្គត្រូវគេឆ្កាង ដោយព្រះ‌អង្គមានភាពទន់ខ្សោយ ប៉ុន្តែ ព្រះ‌អង្គមានព្រះ‌ជន្មរស់ ដោយឫទ្ធា‌នុភាពរបស់ព្រះ‌ជាម្ចាស់។ រីឯយើងវិញក៏ដូច្នោះដែរ យើងទន់ខ្សោយរួមជាមួយព្រះ‌អង្គមែន ប៉ុន្តែ ដោយយល់ដល់បង‌ប្អូន យើងមានជីវិតរស់រួមជាមួយព្រះ‌អង្គ ដោយឫទ្ធា‌នុភាពរបស់ព្រះ‌ជាម្ចាស់។

៥ សូមបង‌ប្អូនល្បងមើលខ្លួនឯងទៅ តើបង‌ប្អូននៅតែមានជំនឿមែនឬយ៉ាងណា សូមបង‌ប្អូនពិនិត្យ‌ពិច័យខ្លួនឯងមើលទៅចុះ! បង‌ប្អូនមិនទទួលស្គាល់ទេឬ ថាព្រះ‌យេស៊ូ‌គ្រីស្តគង់នៅក្នុងបង‌ប្អូន! ឬមួយមានតែបង‌ប្អូនឃើញថា ព្រះ‌អង្គមិនគង់នៅជាមួយ! ៦ ខ្ញុំសង្ឃឹមថា បង‌ប្អូនពិតជាដឹងថា ព្រះ‌អង្គគង់នៅជាមួយយើងមែន។ ៧ យើងទូល‌អង្វរព្រះ‌ជាម្ចាស់ សូមកុំឲ្យបង‌ប្អូនប្រព្រឹត្តអំពើអាក្រក់អ្វីឡើយ។ យើងគ្មានបំណងចង់បង្ហាញភស្តុតាងថា យើងមានព្រះ‌អង្គគង់ជាមួយហើយនោះទេ យើងគ្រាន់តែចង់ឃើញបង‌ប្អូនប្រព្រឹត្តអំពើល្អប៉ុណ្ណោះ ទោះបីការពិនិត្យ‌ពិច័យនេះបែរជាបង្ហាញថា យើងគ្មានភស្តុតាងអំពីព្រះ‌អង្គគង់ជាមួយក៏ដោយ ៨ ដ្បិតយើងមិនអាចប្រឆាំងនឹងសេចក្ដីពិតឡើយ គឺយើងគ្រាន់តែអាចបម្រើសេចក្ដីពិតប៉ុណ្ណោះ។ ៩ យើងសប្បាយចិត្ត នៅពេលណាយើងទន់ខ្សោយ ហើយបង‌ប្អូនមានកម្លាំង។ យើងអធិស្ឋានសុំសេចក្ដីតែមួយនេះ គឺសូមឲ្យបង‌ប្អូនបានគ្រប់លក្ខណៈ។ ១០ ហេតុនេះហើយបានជាពេលខ្ញុំនៅឆ្ងាយ ខ្ញុំសរសេរសេចក្ដីនេះមកជូនបង‌ប្អូន។ ដូច្នេះ កាលណាខ្ញុំមកដល់ ខ្ញុំមិនបាច់និយាយតឹង‌រ៉ឹងមកកាន់បង‌ប្អូន តាមអំណាចដែលព្រះ‌អម្ចាស់បានប្រទានមកខ្ញុំនោះឡើយ។ ព្រះ‌អង្គប្រទានអំណាចនេះមកខ្ញុំ មិនមែនដើម្បីបំផ្លាញទេ គឺដើម្បីកសាងវិញ។

១១ នៅទីបញ្ចប់ បង‌ប្អូនអើយ ចូរមានអំណរឡើង ចូរខំប្រឹងឲ្យបានគ្រប់លក្ខណៈ ចូរលើកទឹកចិត្តគ្នា ចូរមានចិត្តគំនិតតែមួយ ចូររស់នៅដោយសុខ‌សាន្តជាមួយគ្នា នោះព្រះ‌ជាម្ចាស់ដែលជាប្រភពនៃសេចក្ដីស្រឡាញ់ និងសេចក្ដីសុខ‌សាន្ត មុខជាគង់ជាមួយបង‌ប្អូនមិនខាន។

១២ ចូរជម្រាបសួរគ្នាទៅវិញទៅមក ដោយស្និទ្ធ‌ស្នាលផង។ បង‌ប្អូនដ៏‌វិសុទ្ធ*ទាំងអស់ក៏សូមជម្រាបសួរមកបង‌ប្អូនដែរ។

១៣ សូមឲ្យបង‌ប្អូនបានប្រកបដោយព្រះ‌ហឫទ័យប្រណី‌សន្ដោសរបស់ព្រះ‌យេស៊ូ‌គ្រីស្តជា‌អម្ចាស់ សូមឲ្យបង‌ប្អូនបានប្រកបដោយសេចក្ដីស្រឡាញ់របស់ព្រះ‌ជាម្ចាស់ និងសូមឲ្យបង‌ប្អូនបានរួមរស់ជាមួយគ្នា ដោយព្រះ‌វិញ្ញាណដ៏‌វិសុទ្ធ*ផង។

១. គម្ពីរធម្មវិន័យ | Pentateuch 5

២. គម្ពីរប្រវត្តិសាស្រ្ត | History 16

៣. គម្ពីរប្រាជ្ញាញាណ | Wisdom 7

៤. គម្ពីរព្យាការី | Prophet 18

១. គម្ពីរដំណឹងល្អ | Gospels 4

២. គម្ពីរប្រវត្តិសាស្រ្ត | History 1

៣. លិខិតសន្តប៉ូល | Paul Letter 13

៤. សំណេរសកល | Catholic Letter 5

៥. សំណេរសន្តយ៉ូហាន | John Writing 4

^{លិខិតទីពីររបស់គ្រីស្តទូតប៉ូលផ្ញើជូន}
គ្រីស្ត‌បរិស័ទនៅក្រុងកូរិន‌ថូស

សេចក្ដីផ្ដើម

លោកប៉ូល និងអ្នកជឿនៅក្រុងកូរិន‌ថូស រួមសុខទុក្ខជាមួយគ្នា

គម្រោង‌ការរបស់លោកប៉ូល

លោកប៉ូលអត់‌ទោសឲ្យអ្នកដែលប្រព្រឹត្តខុស

លោកប៉ូលខ្វល់‌ខ្វាយក្នុងចិត្ត

អ្នកបម្រើព្រះ‌ជាម្ចាស់ ក្នុងសម្ពន្ធ‌មេត្រីថ្មី

ព្រះ‌គ្រីស្តជួយគាំ‌ពារអ្នកផ្សាយដំណឹង‌ល្អ

លំ‌នៅដែលស្ថិត‌ស្ថេរអស់កល្ប‌ជានិច្ច

ការសម្រុះ‌សម្រួលឲ្យមនុស្សលោកជានានឹងព្រះ‌ជាម្ចាស់វិញ

ការញែកខ្លួនចេញពីអំពើអាក្រក់

អំណរសប្បាយរបស់លោកប៉ូល

អំពីការរៃប្រាក់

លោកទីតុស និងសហ‌ការីរបស់លោក

ជំនួយផ្ញើទៅជូនពួកបង‌ប្អូន

លោកប៉ូលឆ្លើយការ‌ពារខ្លួន

លោកប៉ូល និងគ្រីស្តទូតក្លែង‌ក្លាយ

ទុក្ខលំបាករបស់លោកប៉ូលក្នុងការបំពេញមុខ‌ងារជាគ្រីស្តទូត

លោកប៉ូលនិមិត្តឃើញការអស្ចារ្យ

លោកប៉ូលខ្វល់‌ខ្វាយអំពីក្រុមគ្រីស្ត‌បរិស័ទនៅក្រុងកូរិន‌ថូស

ការរំឭកដាស់‌តឿន និងការសួរសុខទុក្ខរបស់លោកប៉ូល

១. គម្ពីរធម្មវិន័យ | Pentateuch 5

២. គម្ពីរប្រវត្តិសាស្រ្ត | History 16

៣. គម្ពីរប្រាជ្ញាញាណ | Wisdom 7

៤. គម្ពីរព្យាការី | Prophet 18

១. គម្ពីរដំណឹងល្អ | Gospels 4

២. គម្ពីរប្រវត្តិសាស្រ្ត | History 1

៣. លិខិតសន្តប៉ូល | Paul Letter 13

៤. សំណេរសកល | Catholic Letter 5

៥. សំណេរសន្តយ៉ូហាន | John Writing 4

លិខិត​ទី​ពីរ​របស់​គ្រីស្តទូតប៉ូល​ផ្ញើ​ជូនគ្រីស្ត‌បរិស័ទ​នៅ​ក្រុង​កូរិន‌ថូស

សេចក្ដី​ផ្ដើម

លោក​ប៉ូល និង​អ្នក​ជឿ​នៅ​ក្រុង​កូរិន‌ថូស រួម​សុខ​ទុក្ខ​ជា​មួយ​គ្នា

គម្រោង‌ការ​របស់​លោក​ប៉ូល

លោក​ប៉ូល​អត់‌ទោស​ឲ្យ​អ្នក​ដែល​ប្រព្រឹត្ត​ខុស

លោក​ប៉ូល​ខ្វល់‌ខ្វាយ​ក្នុង​ចិត្ត

អ្នក​បម្រើ​ព្រះ‌ជាម្ចាស់ ក្នុង​សម្ពន្ធ‌មេត្រី​ថ្មី

ព្រះ‌គ្រីស្ត​ជួយ​គាំ‌ពារ​អ្នក​ផ្សាយ​ដំណឹង‌ល្អ

លំ‌នៅ​ដែល​ស្ថិត‌ស្ថេរ​អស់​កល្ប‌ជានិច្ច

ការ​សម្រុះ‌សម្រួល​ឲ្យ​មនុស្ស​លោក​ជា​នា​នឹង​ព្រះ‌ជាម្ចាស់​វិញ

ការ​ញែក​ខ្លួន​ចេញ​ពី​អំពើ​អាក្រក់

អំណរ​សប្បាយ​របស់​លោក​ប៉ូល

អំពី​ការ​រៃ​ប្រាក់

លោក​ទីតុស និង​សហ‌ការី​របស់​លោក

ជំនួយ​ផ្ញើ​ទៅ​ជូន​ពួក​បង‌ប្អូន

លោក​ប៉ូល​ឆ្លើយ​ការ‌ពារ​ខ្លួន

លោក​ប៉ូល និង​គ្រីស្តទូត​ក្លែង‌ក្លាយ

ទុក្ខ​លំបាក​របស់​លោក​ប៉ូល​ក្នុង​ការ​បំពេញ​មុខ‌ងារ​ជា​គ្រីស្តទូត

លោក​ប៉ូល​និមិត្ត​ឃើញ​ការ​អស្ចារ្យ

លោក​ប៉ូល​ខ្វល់‌ខ្វាយ​អំពី​ក្រុម​គ្រីស្ត‌បរិស័ទ​នៅ​ក្រុង​កូរិន‌ថូស

ការ​រំឭក​ដាស់‌តឿន និង​ការ​សួរ​សុខ​ទុក្ខ​របស់​លោក​ប៉ូល

^{លិខិតទីពីររបស់គ្រីស្តទូតប៉ូលផ្ញើជូន}
គ្រីស្ត‌បរិស័ទនៅក្រុងកូរិន‌ថូស

សេចក្ដីផ្ដើម

លោកប៉ូល និងអ្នកជឿនៅក្រុងកូរិន‌ថូស រួមសុខទុក្ខជាមួយគ្នា

គម្រោង‌ការរបស់លោកប៉ូល

លោកប៉ូលអត់‌ទោសឲ្យអ្នកដែលប្រព្រឹត្តខុស

លោកប៉ូលខ្វល់‌ខ្វាយក្នុងចិត្ត

អ្នកបម្រើព្រះ‌ជាម្ចាស់ ក្នុងសម្ពន្ធ‌មេត្រីថ្មី

ព្រះ‌គ្រីស្តជួយគាំ‌ពារអ្នកផ្សាយដំណឹង‌ល្អ

លំ‌នៅដែលស្ថិត‌ស្ថេរអស់កល្ប‌ជានិច្ច

ការសម្រុះ‌សម្រួលឲ្យមនុស្សលោកជានានឹងព្រះ‌ជាម្ចាស់វិញ

ការញែកខ្លួនចេញពីអំពើអាក្រក់

អំណរសប្បាយរបស់លោកប៉ូល

អំពីការរៃប្រាក់

លោកទីតុស និងសហ‌ការីរបស់លោក

ជំនួយផ្ញើទៅជូនពួកបង‌ប្អូន

លោកប៉ូលឆ្លើយការ‌ពារខ្លួន

លោកប៉ូល និងគ្រីស្តទូតក្លែង‌ក្លាយ

ទុក្ខលំបាករបស់លោកប៉ូលក្នុងការបំពេញមុខ‌ងារជាគ្រីស្តទូត

លោកប៉ូលនិមិត្តឃើញការអស្ចារ្យ

លោកប៉ូលខ្វល់‌ខ្វាយអំពីក្រុមគ្រីស្ត‌បរិស័ទនៅក្រុងកូរិន‌ថូស

ការរំឭកដាស់‌តឿន និងការសួរសុខទុក្ខរបស់លោកប៉ូល