១សិលា - Catholic Faith Cambodia

សម្ពន្ធមេត្រីចាស់ | Old Testament 46

១. គម្ពីរធម្មវិន័យ | Pentateuch 5

២. គម្ពីរប្រវត្តិសាស្រ្ត | History 16

៣. គម្ពីរប្រាជ្ញាញាណ | Wisdom 7

៤. គម្ពីរព្យាការី | Prophet 18

សម្ពន្ធមេត្រីថ្មី | New Testament 27

១. គម្ពីរដំណឹងល្អ | Gospels 4

២. គម្ពីរប្រវត្តិសាស្រ្ត | History 1

កិច្ចការគ្រីស្តទូត (កក)
Acts of the Apostles (Ac)

៣. លិខិតសន្តប៉ូល | Paul Letter 13

៤. សំណេរសកល | Catholic Letter 5

៥. សំណេរសន្តយ៉ូហាន | John Writing 4

^{លិខិតទីមួយរបស់}
សន្តសិលា

ពាក្យលំនាំ

លិខិតទីមួយរបស់

លោកសិលា

ពាក្យលំនាំ

លោកសិលាបានសរសេរលិខិតទីមួយនេះ ផ្ញើជូនគ្រីស្ត‌បរិស័ទដែលបែក‌ខ្ញែកគ្នា តាមតំបន់ទាំងប្រាំនៅមជ្ឈិម‌បូព៌ា។ ក្រុមគ្រីស្ត‌បរិស័ទទាំងនោះកកើតឡើង ដោយលោកប៉ូលបានប្រកាសផ្សាយដំណឹង‌ល្អ។ លោកសិលាប្រហែលជាតែងលិខិតនេះ កាលលោកនៅក្រុងរ៉ូម ដែលលោកឲ្យឈ្មោះថា «បាប៊ីឡូន» (៥.១៣) នៅគ.ស.៦៤។

គោលបំណងៈ

នៅគ្រានោះ គ្រីស្ត‌បរិស័ទត្រូវគេប្រមាថមាក់‌ងាយ និងត្រូវគេធ្វើទុក្ខបៀត‌បៀនទៀតផង។ ហេតុនេះ គ្រីស្តទូតសិលាមានបំណងដាស់‌តឿនគ្រីស្ត‌បរិស័ទ ដែលខ្ចាត់‌ខ្ចាយក្នុងពិភព‌លោក ឲ្យមានជំនឿកាន់តែមាំ‌មួនលើព្រះ‌យេស៊ូ‌គ្រីស្ត ស្របតាមពិធីជ្រមុជទឹកដែលគេបានទទួល។ ជំនឿនេះនឹងផ្ដល់ឲ្យគេមានចិត្តសង្ឃឹមដ៏មោះ‌មុត គ្រប់កាលៈ‌ទេសៈ និងមានជ័យ‌ជម្នះលើឧបសគ្គនានា។ រីឯទុក្ខលំបាកដែលគ្រីស្ត‌បរិស័ទជួបប្រទះ ធ្វើឲ្យគេរួមជាមួយព្រះ‌គ្រីស្តដែលបានរង‌ទុក្ខលំបាកដែរ។

១

សេចក្ដីផ្ដើម

១ ខ្ញុំ សិលា ជាគ្រីស្តទូត*របស់ព្រះ‌យេស៊ូ‌គ្រីស្ត សូមជម្រាបមកបង‌ប្អូនដែលព្រះ‌ជាម្ចាស់បានជ្រើស‌រើស ហើយដែលបែក‌ខ្ញែកគ្នាទៅរស់ជាអាណិក‌ជន នៅស្រុកប៉ុនតុស ស្រុកកាឡា‌ទី ស្រុកប៉ាដូស ស្រុកអាស៊ី និងស្រុកប៊ីធី‌នី។ ២ ព្រះ‌ជាម្ចាស់ ជាព្រះ‌បិតា បានជ្រើស‌រើសបង‌ប្អូន តាមគម្រោង‌ការដែលព្រះ‌អង្គគ្រោងទុកពីមុនមក ដោយព្រះ‌វិញ្ញាណប្រោសបង‌ប្អូនឲ្យបានវិសុទ្ធ* ដើម្បីឲ្យបង‌ប្អូនស្ដាប់បង្គាប់ព្រះ‌យេស៊ូ‌គ្រីស្ត* និងឲ្យព្រះ‌អង្គប្រោះព្រះ‌លោហិតរបស់ព្រះ‌អង្គលើបង‌ប្អូន។ សូមព្រះ‌ជាម្ចាស់ប្រណី‌សន្ដោស និងប្រទានសេចក្ដីសុខ‌សាន្ដមកបង‌ប្អូនយ៉ាងបរិបូណ៌។

សេចក្ដីសង្ឃឹម

៣ សូមសរសើរតម្កើងព្រះ‌ជាម្ចាស់ ជាព្រះ‌បិតារបស់ព្រះ‌យេស៊ូ‌គ្រីស្ត* ជាព្រះ‌អម្ចាស់នៃយើង។ ព្រះ‌ជាម្ចាស់បានប្រោសយើងឲ្យកើតជាថ្មី ដោយប្រោសព្រះ‌យេស៊ូ‌គ្រីស្ត*ឲ្យមានព្រះ‌ជន្មរស់ឡើងវិញ ស្របតាមព្រះ‌ហឫទ័យមេត្តា‌ករុណាដ៏លើស‌លប់របស់ព្រះ‌អង្គ ដូច្នេះ យើងមានសេចក្ដីសង្ឃឹមដែលមិនចេះសាបសូន្យ ៤ ហើយយើងនឹងទទួលមត៌កដែលមិនចេះរលួយ មិនចេះសៅ‌ហ្មង មិនចេះស្រពោន។ ព្រះ‌ជាម្ចាស់បម្រុងទុកមត៌កនេះឲ្យបង‌ប្អូននៅស្ថានបរម‌សុខ* ៥ ហើយឫទ្ធា‌នុភាពរបស់ព្រះ‌អង្គថែ‌រក្សាបង‌ប្អូន ដោយ‌សារជំនឿ ដើម្បីឲ្យបង‌ប្អូនទទួលការសង្គ្រោះ ដែលព្រះ‌អង្គបានរៀបចំទុកជាស្រេច ហើយដែលព្រះ‌អង្គនឹងសម្ដែងនៅគ្រាចុងក្រោយបំផុត។

៦ ហេតុនេះហើយបានជាបង‌ប្អូនមានចិត្តរីក‌រាយយ៉ាងខ្លាំង ទោះបីពេលនេះ បង‌ប្អូនព្រួយ ចិត្តដោយជួបនឹងទុក្ខលំបាកផ្សេងៗ ក្នុងមួយ‌រយៈពេលខ្លីក៏ដោយ។ ៧ ទុក្ខលំបាកទាំងនេះនឹងលត់‌ដំជំនឿរបស់បង‌ប្អូន ឲ្យមានតម្លៃលើសមាស ដែលតែង‌តែរលាយសូន្យនោះទៅទៀត គឺមាសដែលសម្រាំងក្នុងភ្លើង។ នៅថ្ងៃដែលព្រះ‌យេស៊ូ‌គ្រីស្តសម្ដែងខ្លួនឲ្យមនុស្សលោកឃើញ ជំនឿរបស់បង‌ប្អូននឹងទទួលការសរសើរ ទទួលសិរី‌រុងរឿង និងកិត្តិយសជាមិនខាន។ ៨ បង‌ប្អូនមិនដែលបានឃើញព្រះ‌អង្គទេ តែបង‌ប្អូនស្រឡាញ់ព្រះ‌អង្គ ទោះបីបង‌ប្អូននៅតែពុំទាន់ឃើញព្រះ‌អង្គក្តី ក៏បង‌ប្អូនជឿលើព្រះ‌អង្គ ហើយមានអំណរសប្បាយដ៏រុង‌រឿងរកថ្លែងពុំបាន ៩ ព្រោះបង‌ប្អូនបានទទួលការសង្គ្រោះសម្រាប់ព្រលឹងខ្លួន ដែលជាទី‌ដៅនៃជំនឿរបស់បង‌ប្អូន។

១០ ព្យាការី*ដែលថ្លែងព្រះ‌បន្ទូល*អំពីព្រះ‌ហឫទ័យប្រណី‌សន្ដោសរបស់ព្រះ‌ជាម្ចាស់ ចំពោះបង‌ប្អូន បាននាំគ្នាស្រាវ‌ជ្រាវ និងរិះរកចង់ដឹងអំពីការសង្គ្រោះនេះ។ ១១ ព្រះ‌វិញ្ញាណរបស់ព្រះ‌គ្រីស្តដែលគង់នៅក្នុងព្យាការីទាំងនោះ បានបញ្ជាក់ប្រាប់ជាមុនអំពីទុក្ខលំបាករបស់ព្រះ‌គ្រីស្ត និងអំពីសិរី‌រុងរឿងដែលព្រះ‌អង្គនឹងទទួលតាមក្រោយ។ ពួកលោកក៏បានរិះ‌គិតចង់ដឹងថា តើព្រឹត្តិ‌ការណ៍នេះនឹងកើតមាននៅជំនាន់ណា ក្នុងកាលៈ‌ទេសៈណា។ ១២ ព្រះ‌ជាម្ចាស់បានសម្ដែងឲ្យព្យាការីទាំងនោះដឹងថា សេចក្ដីដែលពួកលោកថ្លែងមិនមែនសម្រាប់ពួកលោកទេ គឺសម្រាប់បង‌ប្អូនវិញ។ ឥឡូវនេះ ពួកអ្នកផ្សព្វ‌ផ្សាយដំណឹង‌ល្អ*បាននាំដំណឹងមកប្រាប់បង‌ប្អូនអំពីសេចក្ដីទាំងនោះ ក្រោមការណែ‌នាំរបស់ព្រះ‌វិញ្ញាណដ៏‌វិសុទ្ធ* ដែលព្រះ‌ជាម្ចាស់បានចាត់ពីស្ថានបរម‌សុខមក។ សូម្បីតែពួកទេវទូត*ក៏ប្រាថ្នាចង់យល់ជម្រៅនៃសេចក្ដីទាំងនោះដែរ។

ការទូន្មានឲ្យមានជីវិតដ៏‌វិសុទ្ធ

១៣ ហេតុនេះ សូមបង‌ប្អូនប្រុងប្រៀបចិត្តគំនិតឲ្យមែនទែន កុំភ្លេចខ្លួនឲ្យសោះ ត្រូវមានចិត្តសង្ឃឹមទាំងស្រុងថានឹងទទួលព្រះ‌អំណោយទាន ដែលព្រះ‌ជាម្ចាស់ប្រោសប្រទានឲ្យបង‌ប្អូន នៅថ្ងៃព្រះ‌យេស៊ូ‌គ្រីស្ត*នឹងសម្ដែងព្រះ‌អង្គឲ្យមនុស្សលោកឃើញ។ ១៤ ចូរធ្វើដូចកូនដែលចេះស្ដាប់បង្គាប់ គឺមិនត្រូវធ្វើតាមចិត្តប៉ង‌ប្រាថ្នា ដែលបង‌ប្អូនធ្លាប់មានកាលមិនទាន់ស្គាល់ព្រះ‌អង្គនោះឡើយ ១៥ ផ្ទុយទៅវិញ ព្រះ‌អង្គដែលបានត្រាស់ហៅបង‌ប្អូន ព្រះ‌អង្គវិសុទ្ធ*យ៉ាងណា បង‌ប្អូនក៏ត្រូវតែវិសុទ្ធ*ក្នុងគ្រប់កិច្ច‌ការ ដែលបង‌ប្អូនប្រព្រឹត្តយ៉ាងនោះដែរ ១៦ ដ្បិតក្នុងគម្ពីរមានចែងទុកថា៖ «អ្នករាល់គ្នាត្រូវតែវិសុទ្ធ* ព្រោះយើងវិសុទ្ធ»។

១៧ មួយវិញទៀត ប្រសិនបើបង‌ប្អូនអង្វររកព្រះ‌ជាម្ចាស់ក្នុងឋានៈព្រះ‌អង្គជាព្រះ‌បិតា ចូររស់នៅដោយគោរពកោតខ្លាចព្រះ‌អង្គ ក្នុងពេលដែលបង‌ប្អូនស្នាក់នៅលើផែន‌ដីនេះ ដ្បិតព្រះ‌អង្គនឹងវិនិច្ឆ័យមនុស្ស តាមអំពើដែលម្នាក់ៗបានប្រព្រឹត្ត ឥតរើសមុខនរណាឡើយ។ ១៨ បង‌ប្អូនជ្រាបស្រាប់ហើយថា ព្រះ‌ជាម្ចាស់បានលោះបង‌ប្អូនឲ្យរួចពីរបៀបរស់នៅដ៏ឥតន័យ ដែលជាដំណែលតពីបុព្វបុរស*របស់បង‌ប្អូន មិនមែនដោយ‌សារអ្វីៗដែលតែង‌តែរលាយសាបសូន្យទៅ ដូចជាមាស ឬប្រាក់ទេ ១៩ គឺដោយ‌សារព្រះ‌លោហិតដ៏ថ្លៃវិសេសរបស់ព្រះ‌គ្រីស្ត* ដែលប្រៀបបាននឹងកូនចៀមដ៏ល្អឥតខ្ចោះ ឥតស្លាក‌ស្នាម។ ២០ ព្រះ‌ជាម្ចាស់បានជ្រើសតាំងព្រះ‌គ្រីស្ត មុនកំណើតពិភព‌លោកទៅទៀត ហើយបានបង្ហាញព្រះ‌អង្គឲ្យមនុស្សលោកឃើញនៅគ្រាចុងក្រោយនេះ ព្រោះតែបង‌ប្អូន។ ២១ តាម‌រយៈព្រះ‌គ្រីស្ត បង‌ប្អូនជឿលើព្រះ‌ជាម្ចាស់ដែលបានប្រោសព្រះ‌អង្គឲ្យមានព្រះ‌ជន្មរស់ឡើងវិញ ហើយប្រទានសិរី‌រុងរឿងមកព្រះ‌អង្គ ដើម្បីឲ្យបង‌ប្អូនមានជំនឿ និងមានសង្ឃឹមលើព្រះ‌ជាម្ចាស់។

២២ បង‌ប្អូនបានជម្រះព្រលឹងឲ្យបរិសុទ្ធ*ដោយស្ដាប់តាមសេចក្ដីពិត ដើម្បីឲ្យបង‌ប្អូនចេះស្រឡាញ់គ្នាយ៉ាងស្មោះ‌ស្ម័គ្រ ដូចបង‌ប្អូនបង្កើត។ ចូរស្រឡាញ់គ្នាទៅវិញទៅមកឲ្យអស់ពីចិត្តទៅ។ ២៣ ព្រះ‌ជាម្ចាស់បានប្រោសបង‌ប្អូនឲ្យកើតជាថ្មី មិនមែនដោយពូជដែលតែង‌តែរលួយទេ គឺដោយពូជមិនចេះរលួយដែលជាព្រះ‌បន្ទូលរបស់ព្រះ‌ជាម្ចាស់។ ព្រះ‌បន្ទូលនេះផ្ដល់ជីវិត ហើយនៅស្ថិត‌ស្ថេរជាដរាប

២៤ ដ្បិតមនុស្សគ្រប់ៗរូបប្រៀបបាននឹងស្មៅ

រីឯសិរី‌រុងរឿងទាំងប៉ុន្មានរបស់គេ

ប្រៀបបាននឹងផ្កា

ស្មៅតែង‌តែក្រៀម ហើយផ្កាក៏រុះ‌រោយដែរ

២៥ ប៉ុន្តែ ព្រះ‌បន្ទូលរបស់ព្រះ‌អម្ចាស់នៅស្ថិត‌ស្ថេរ

អស់កល្ប‌ជានិច្ច។

ព្រះ‌បន្ទូលនេះ គឺជាដំណឹង‌ល្អ* ដែលគេបាននាំយកមកជូនបង‌ប្អូន។

២

ប្រជា‌រាស្ដ្រដ៏‌វិសុទ្ធ

១ ហេតុនេះ ចូរបង‌ប្អូនលះ‌បង់ការអាក្រក់គ្រប់យ៉ាង លះ‌បង់ល្បិចកិច្ច‌កលទាំងប៉ុន្មាន ការលាក់ពុត ចិត្តច្រណែន‌ឈ្នានីស និងការនិយាយដើមគេគ្រប់យ៉ាងនោះចោលទៅ! ២ ចូរប្រាថ្នាចង់បានព្រះ‌បន្ទូល ដូចទារកដែលទើបនឹងកើតប្រាថ្នាចង់បានទឹកដោះសុទ្ធ ដើម្បីឲ្យបង‌ប្អូនបានចម្រើនឡើងតាម‌រយៈព្រះ‌បន្ទូលនេះ និងទទួលការសង្គ្រោះ ៣ បើបង‌ប្អូនពិតជាបានក្រេបជញ្ជក់ដឹងថា ព្រះ‌អម្ចាស់មានព្រះ‌ហឫទ័យសប្បុរសមែននោះ!។

៤ សូមបង‌ប្អូនចូលមកជិតព្រះ‌គ្រីស្ត ជាសិលាដ៏មានជីវិត ជាសិលាដែលមនុស្សលោកបានបោះបង់ចោល តែព្រះ‌ជាម្ចាស់បានរើសយក ព្រោះព្រះ‌អង្គឈ្វេងយល់ថាមានតម្លៃវិសេស។ ៥ រីឯបង‌ប្អូនវិញ បង‌ប្អូនប្រៀបបាននឹងថ្មដ៏មានជីវិតដែរ ដូច្នេះ ចូរផ្គុំគ្នាឡើង កសាងជាព្រះ‌ដំណាក់របស់ព្រះ‌វិញ្ញាណ ធ្វើជាក្រុមបូជា‌ចារ្យដ៏‌វិសុទ្ធ ដើម្បីថ្វាយយញ្ញ‌បូជាខាងវិញ្ញាណ ជាទីគាប់ព្រះ‌ហឫទ័យព្រះ‌ជាម្ចាស់ តាម‌រយៈព្រះ‌យេស៊ូ‌គ្រីស្ត* ៦ ដ្បិតក្នុងគម្ពីរមានចែងថា៖

«យើងបានរើសយកថ្មគ្រឹះមួយដ៏សំខាន់

ហើយមានតម្លៃ

យើងដាក់ថ្មនោះនៅក្រុងស៊ីយ៉ូន។

អ្នកណាជឿលើថ្មនោះ

អ្នកនោះមុខជាមិនត្រូវខកចិត្តឡើយ»។

៧ ថ្មនេះមានតម្លៃវិសេស សម្រាប់បង‌ប្អូនជាអ្នកជឿ។ រីឯអ្នកដែលមិនជឿវិញ

«ថ្មដែលពួកជាងសង់ផ្ទះបោះបង់ចោល

បានត្រឡប់មកជាថ្មគ្រឹះដ៏សំខាន់បំផុត

៨ ជាថ្មដែលនាំឲ្យគេជំពប់ដួល

ជាសិលាដែលនាំឲ្យគេរវាតចិត្ត

បាត់ជំនឿ»។

អ្នកទាំងនោះជំពប់ដួល ដូចព្រះ‌ជាម្ចាស់បានគ្រោងទុកមកស្រាប់ មកពីគេពុំព្រមជឿព្រះ‌បន្ទូល ៩ រីឯបង‌ប្អូនវិញ បង‌ប្អូនជាពូជសាសន៍ដែលព្រះ‌អង្គបានជ្រើស‌រើស ជាក្រុមបូជា‌ចារ្យរបស់ព្រះ‌មហាក្សត្រ ជាជាតិសាសន៍ដ៏‌វិសុទ្ធ ជាប្រជា‌រាស្ដ្រដែលព្រះ‌ជាម្ចាស់បានយកមកធ្វើជាកម្ម‌សិទ្ធិផ្ទាល់របស់ព្រះ‌អង្គ ដើម្បីឲ្យបង‌ប្អូនប្រកាសដំណឹងអំពីស្នាព្រះ‌ហស្ដដ៏អស្ចារ្យរបស់ព្រះ‌អង្គ ដែលបានហៅបង‌ប្អូនឲ្យចេញពីទីងងឹត មកកាន់ពន្លឺដ៏រុង‌រឿងរបស់ព្រះ‌អង្គ។ ១០ ពីដើម បង‌ប្អូនមិនមែនជាប្រជា‌រាស្ដ្ររបស់ព្រះ‌ជាម្ចាស់ទេ តែឥឡូវនេះ បង‌ប្អូនជាប្រជា‌រាស្ដ្ររបស់ព្រះ‌អង្គហើយ ពីដើម បង‌ប្អូនពុំបានទទួលព្រះ‌ហឫទ័យមេត្តា‌ករុណាទេ តែឥឡូវនេះ បង‌ប្អូនបានទទួលព្រះ‌ហឫទ័យមេត្តា‌ករុណាហើយ។

របៀបរស់នៅនៃអ្នកបម្រើរបស់ព្រះ‌ជាម្ចាស់

១១ បង‌ប្អូនជាទីស្រឡាញ់អើយ ខ្ញុំសូមទូន្មានបង‌ប្អូនជាជនបរទេស និងជាអ្នកស្នាក់នៅជាបណ្ដោះ‌អាសន្នក្នុងលោកនេះថា កុំបណ្ដោយខ្លួនទៅតាមតណ្ហា ដែលតែង‌តែប្រឆាំងនឹងព្រលឹងនោះឡើយ។ ១២ ត្រូវកាន់កិរិយាមារយាទឲ្យបានថ្លៃ‌ថ្នូរនៅក្នុងចំណោមសាសន៍ដទៃ។ ដូច្នេះ ត្រង់ចំណុចណាដែលគេចោទថា បង‌ប្អូនប្រព្រឹត្តអាក្រក់ គេបែរជាឃើញអំពើល្អរបស់បង‌ប្អូនទៅវិញ ហើយនៅថ្ងៃដែលព្រះ‌ជាម្ចាស់យាងមក គេនឹងលើកតម្កើងសិរី‌រុងរឿងរបស់ព្រះ‌អង្គថែមទៀតផង។

១៣ សូមគោរពចុះចូលអំណាចនានានៅលើផែន‌ដីនេះ ដោយយល់ដល់ព្រះ‌អម្ចាស់ គឺត្រូវគោរពចុះចូលព្រះ‌រាជា ក្នុងឋានៈលោកជាអ្នកមានអំណាចធំជាងគេ ១៤ ត្រូវគោរពចុះចូលនឹងលោកទេសា‌ភិបាលទាំង‌ឡាយ ក្នុងឋានៈលោកជាតំណាងរបស់ព្រះ‌រាជា ដែលព្រះ‌អង្គចាត់ឲ្យមកធ្វើទោសអស់អ្នកដែលប្រព្រឹត្តអំពើអាក្រក់ និងសរសើរអស់អ្នកដែលប្រព្រឹត្តអំពើល្អ។ ១៥ ព្រះ‌ជាម្ចាស់សព្វព្រះ‌ហឫទ័យឲ្យបង‌ប្អូនបំបិទមាត់ពួកមនុស្សខ្លៅ ដោយបង‌ប្អូនប្រព្រឹត្តអំពើល្អ ១៦ ឲ្យសមនឹងឋានៈជាមនុស្សមានសេរី‌ភាព ក៏ប៉ុន្តែ កុំប្រើសេរី‌ភាពនេះ ដើម្បីគ្របបាំងអំពើអាក្រក់ឡើយ គឺត្រូវប្រព្រឹត្តឲ្យសមនឹងឋានៈបង‌ប្អូន ដែលជាអ្នកបម្រើរបស់ព្រះ‌ជាម្ចាស់។ ១៧ ចូរគោរពមនុស្សគ្រប់ៗរូប ចូរស្រឡាញ់បង‌ប្អូនរួមជំនឿ ចូរគោរពកោតខ្លាចព្រះ‌ជាម្ចាស់ និងគោរពព្រះ‌រាជាផង។

គំរូអំពីទុក្ខលំបាករបស់ព្រះ‌គ្រីស្ត

១៨ បង‌ប្អូនដែលជាអ្នកបម្រើអើយ! ត្រូវគោរពចុះចូលនឹងម្ចាស់របស់ខ្លួន ដោយគោរពកោតខ្លាចទាំងស្រុង មិនត្រឹមតែគោរពចុះចូលនឹងម្ចាស់ណាដែលល្អ និងមានចិត្តសប្បុរសប៉ុណ្ណោះទេ គឺត្រូវចុះចូលនឹងម្ចាស់ដែលកាចផងដែរ។ ១៩ បើមានបង‌ប្អូនណាម្នាក់រង‌ទុក្ខលំបាកដោយអយុត្ដិ‌ធម៌ ហើយស៊ូទ្រាំ ព្រោះយល់ដល់ព្រះ‌ជាម្ចាស់ តោងចាត់ទុកថា ព្រះ‌អង្គប្រណី‌សន្ដោសដល់បង‌ប្អូននោះហើយ។ ២០ ប្រសិនបើបង‌ប្អូនស៊ូទ្រាំរងទារុណ‌កម្មមកពីបានប្រព្រឹត្តអំពើអាក្រក់ណាមួយ បង‌ប្អូនគ្មានកិត្តិយសអ្វីទេ! ផ្ទុយទៅវិញ ប្រសិនបើបង‌ប្អូនបានប្រព្រឹត្តអំពើល្អ តែស៊ូទ្រាំនឹងទុក្ខលំបាក នោះមកពីព្រះ‌ជាម្ចាស់ប្រណី‌សន្ដោសដល់បង‌ប្អូន។

២១ ព្រះ‌អង្គត្រាស់ហៅបង‌ប្អូនមក

ឲ្យរង‌ទុក្ខលំបាកយ៉ាងនេះ

ព្រោះព្រះ‌គ្រីស្ត*ក៏បានរង‌ទុក្ខលំបាក

សម្រាប់បង‌ប្អូន ទុកជាគំរូឲ្យ

បង‌ប្អូនដើរតាមគន្លងរបស់ព្រះ‌អង្គដែរ។

២២ ព្រះ‌អង្គពុំដែលបានប្រព្រឹត្តអំពើបាបសោះ

ហើយក៏ពុំដែលមានព្រះ‌បន្ទូលវៀចវេរណា

ចេញពីព្រះ‌ឱស្ឋរបស់ព្រះ‌អង្គឡើយ។

២៣ ទោះបីគេជេរប្រមាថព្រះ‌អង្គ

ក៏ព្រះ‌អង្គមិនតបតទៅគេវិញដែរ

ព្រះ‌អង្គបានរង‌ទុក្ខលំបាក

តែព្រះ‌អង្គពុំបានគំរាមកំហែងគេវិញទេ

ព្រះ‌អង្គផ្ញើជីវិតទៅលើព្រះ‌ជាម្ចាស់

ដែលព្រះ‌អង្គវិនិច្ឆ័យដោយយុត្តិធម៌។

២៤ ព្រះ‌គ្រីស្ត*បានផ្ទុកបាប*របស់យើង

ក្នុងព្រះ‌កាយរបស់ព្រះ‌អង្គ

ដែលជាប់លើឈើឆ្កាង

ដើម្បីឲ្យយើងលែងជំពាក់‌ជំពិន

នឹងបាបតទៅមុខទៀត

ហើយឲ្យយើងមានជីវិត

ដោយប្រព្រឹត្តតែអំពើសុចរិត*។

បង‌ប្អូនបានជាសះ‌ស្បើយដោយ‌សារ

ស្នាមរបួសរបស់ព្រះ‌អង្គ

២៥ ដ្បិតបង‌ប្អូនប្រៀបដូចជាចៀមដែលវង្វេង

តែឥឡូវនេះ បង‌ប្អូនបានវិលត្រឡប់មករក

គង្វាល និងអ្នកថែ‌រក្សាព្រលឹង

របស់បង‌ប្អូនវិញហើយ។

៣

ទំនាក់‌ទំនងរវាងស្វាមី និងភរិយា

១ រីឯបង‌ប្អូនស្ត្រីៗដែលមានស្វាមីក៏ដូច្នោះដែរ ត្រូវគោរពចុះចូលនឹងស្វាមីរៀងៗខ្លួន ដើម្បីឲ្យកិរិយាមារយាទរបស់បង‌ប្អូនទាក់‌ទាញចិត្តស្វាមីខ្លះដែលមិនជឿព្រះ‌បន្ទូល ឲ្យបានស្គាល់ព្រះ‌អង្គ ដោយមិនបាច់បញ្ចេញពាក្យសម្ដីទេ ២ គឺគេគ្រាន់តែឃើញបង‌ប្អូនមានកិរិយាបរិសុទ្ធ* និងចេះគោរពកោតខ្លាច។ ៣ កុំតុប‌តែងខ្លួនតែសំបកក្រៅ ដូចជាក្រងសក់ ពាក់មាស ឬក៏ពាក់អាវល្អប្រណីតនោះឡើយ ៤ តែត្រូវតុប‌តែងខាងក្នុងជម្រៅចិត្តរបស់បង‌ប្អូនដោយគ្រឿងលំអដែលមិនចេះរលាយ ហើយមានតម្លៃដ៏លើស‌លប់នៅចំពោះព្រះ‌ភ័ក្ត្រព្រះ‌ជាម្ចាស់នោះវិញ គឺមានចិត្តស្លូត‌បូត ស្រគត់‌ស្រគំ។ ៥ នៅជំនាន់ដើម ស្ត្រីៗដ៏‌វិសុទ្ធ*ដែលសង្ឃឹមលើព្រះ‌ជាម្ចាស់ តែងកាន់ចិត្តគំនិតយ៉ាងនេះឯង គឺបានតុប‌តែងខ្លួន ដោយការគោរពចុះចូលនឹងស្វាមីរៀងៗខ្លួន ៦ ដូចជាលោកស្រីសារ៉ា ដែលបានស្ដាប់បង្គាប់លោកអប្រាហាំ ទាំងហៅលោកថា «លោកម្ចាស់»ផង។ ប្រសិនបើបង‌ប្អូនប្រព្រឹត្តអំពើល្អ ហើយមិនភ័យខ្លាចអ្វីទេនោះ បង‌ប្អូននេះហើយជាពូជ‌ពង្សរបស់គាត់។

៧ រីឯបង‌ប្អូនដែលជាស្វាមីក៏ដូច្នោះដែរ ម្នាក់ៗត្រូវរួមរស់ជាមួយភរិយារបស់ខ្លួន ដោយយល់ថា ស្ត្រីៗជាមនុស្សទន់ខ្សោយជាងខ្លួន។ ត្រូវគោរពនាងទុកដូចជាអ្នកត្រូវរួមទទួលជីវិត ដែលព្រះ‌ជាម្ចាស់ប្រោស‌ប្រណីប្រទានមកបង‌ប្អូនជាមត៌ក ដើម្បីកុំឲ្យមានអ្វីមករារាំងការអធិស្ឋានរបស់បង‌ប្អូនឡើយ។

ទំនាក់‌ទំនងរវាងបង‌ប្អូន

៨ នៅទីបញ្ចប់ ត្រូវមានចិត្តគំនិតតែមួយ និងរួមសុខទុក្ខជាមួយគ្នា។ ត្រូវមានចិត្តស្រឡាញ់គ្នាទៅវិញទៅមកដូចបង‌ប្អូនបង្កើត មានចិត្តអាណិតមេត្តា និងសុភាព។ ៩ កុំប្រព្រឹត្តអំពើអាក្រក់តបនឹងអំពើអាក្រក់ កុំជេរប្រមាថតបនឹងអ្នកដែលជេរប្រមាថបង‌ប្អូន គឺត្រូវជូនពរគេវិញ ដ្បិតព្រះ‌ជាម្ចាស់បានត្រាស់ហៅបង‌ប្អូនឲ្យប្រព្រឹត្តដូច្នេះឯង ដើម្បីឲ្យបង‌ប្អូនបានទទួលព្រះ‌ពររបស់ព្រះ‌អង្គតាមព្រះ‌បន្ទូលសន្យា។

១០ «អ្នកណាស្រឡាញ់ជីវិត និងចង់បានសុភមង្គល

អ្នកនោះត្រូវទប់មាត់កុំពោលពាក្យអាក្រក់

ព្រមទាំងទប់បបូរមាត់

កុំឲ្យនិយាយបោកបញ្ឆោត។

១១ អ្នកនោះត្រូវចៀសវាងកុំប្រព្រឹត្តអំពើអាក្រក់

ហើយត្រូវប្រព្រឹត្តអំពើល្អ

និងខិត‌ខំស្វែងរកសេចក្ដីសុខ‌សាន្ត

១២ ដ្បិតព្រះ‌អម្ចាស់ទតមើលមកមនុស្សសុចរិត*

ហើយព្រះ‌អង្គព្រះ‌សណ្ដាប់ពាក្យទូល‌អង្វររបស់គេ

ប៉ុន្តែ ព្រះ‌អង្គជំទាស់នឹងអស់អ្នកដែលប្រព្រឹត្ត

អំពើអាក្រក់»។

១៣ ប្រសិនបើបង‌ប្អូនខ្នះ‌ខ្នែងប្រព្រឹត្តអំពើល្អ តើនរណានឹងធ្វើបាបបង‌ប្អូន ១៤ យ៉ាងណា‌មិញ បើបង‌ប្អូនរង‌ទុក្ខវេទនា ព្រោះតែសេចក្ដីសុចរិត* នោះបង‌ប្អូនមានសុភមង្គលហើយ។ សូមកុំភ័យខ្លាចមនុស្សលោកឡើយ ហើយក៏មិនត្រូវតប់‌ប្រមល់ដែរ ១៥ តែត្រូវទុកឲ្យព្រះ‌គ្រីស្ត*ជាព្រះ‌អម្ចាស់សម្ដែងព្រះ‌បារមី ក្នុងចិត្តគំនិតរបស់បង‌ប្អូនវិញ។ ត្រូវប្រុងប្រៀបខ្លួនឆ្លើយតទល់នឹងអស់អ្នកដែលសាកសួរអំពីសេចក្ដីសង្ឃឹមរបស់បង‌ប្អូននោះជា‌និច្ច ១៦ ប៉ុន្តែ ត្រូវឆ្លើយទៅគេ ដោយទន់‌ភ្លន់ ដោយគោរព និងដោយមានមន‌សិការល្អ ដើម្បីឲ្យអស់អ្នកដែលចង់មួលបង្កាច់កិរិយាល្អរបស់បង‌ប្អូន ជាអ្នកជឿព្រះ‌គ្រីស្ត* ត្រង់ចំណុចណាមួយ បែរជាត្រូវខ្មាសទៅវិញ។ ១៧ សូវរង‌ទុក្ខដោយប្រព្រឹត្តអំពើល្អ ជាជាងប្រព្រឹត្តអំពើអាក្រក់ ប្រសិនបើព្រះ‌ជាម្ចាស់សព្វព្រះ‌ហឫទ័យយ៉ាងនេះ។

១៨ សូម្បីតែព្រះ‌គ្រីស្ត*ក៏ព្រះ‌អង្គបានសោយទិវង្គតម្ដងជាសូរេច ព្រោះតែបាបដែរ គឺព្រះដ៏សុចរិត*បានសោយទិវង្គត ជាប្រយោជន៍ដល់មនុស្សទុច្ចរិត ដើម្បីនាំបង‌ប្អូនទៅថ្វាយព្រះ‌ជាម្ចាស់។ កាលព្រះ‌អង្គមានឋានៈជាមនុស្ស ព្រះ‌អង្គត្រូវគេធ្វើគុត តែព្រះ‌ជាម្ចាស់បានប្រោសព្រះ‌អង្គឲ្យមានព្រះ‌ជន្មរស់ ដោយ‌សារព្រះ‌វិញ្ញាណវិញ។ ១៩ នៅពេលនោះ ព្រះ‌អង្គបានយាងទៅប្រកាសព្រះ‌បន្ទូលដល់វិញ្ញាណ‌ក្ខ័ន្ធ ដែលជាប់ឃុំ‌ឃាំង ២០ ជាវិញ្ញាណ‌ក្ខ័ន្ធរបស់អ្នកបះ‌បោរប្រឆាំងនឹងព្រះ‌ជាម្ចាស់កាលពីសម័យដើម ក្នុងពេលដែលព្រះ‌អង្គអត់‌ធ្មត់នៅសម័យលោកណូអេសង់ទូកធំ។ មានមនុស្សមួយចំនួនតូច ដែលបានចូលទៅក្នុងទូក និងបានរួចជីវិតដោយ‌សារទឹក គឺមានតែប្រាំបីនាក់ប៉ុណ្ណោះ។ ២១ នេះជានិមិត្ត‌រូបនៃពិធីជ្រមុជទឹក*ដែលសង្គ្រោះបង‌ប្អូននាបច្ចុប្បន្នកាល តែពិធីជ្រមុជទឹកមិនមែនជាពិធីលាងជម្រះរូបកាយនោះទេ គឺជាការថ្វាយជីវិតទាំងស្រុងទៅព្រះ‌ជាម្ចាស់ ដោយមន‌សិការល្អវិញ។ ពិធីជ្រមុជទឹកនេះសង្គ្រោះបង‌ប្អូន ដោយ‌សារព្រះ‌យេស៊ូ‌គ្រីស្តមានព្រះ‌ជន្មរស់ឡើងវិញ ២២ ព្រះ‌អង្គបានយាងឡើងទៅស្ថានបរម‌សុខ* គង់នៅខាងស្ដាំព្រះ‌ជាម្ចាស់ ហើយពួកទេវទូត* ព្រមទាំងវត្ថុស័ក្តិ‌សិទ្ធិនានាដែលមានអំណាច និងឫទ្ធា‌នុភាពនានា ចុះចូលនឹងព្រះ‌អង្គទាំងអស់។

៤

ការរស់នៅដោយមិនប្រព្រឹត្តអំពើបាប

១ ហេតុនេះ បើព្រះ‌គ្រីស្តបានរង‌ទុក្ខលំបាក កាលព្រះ‌អង្គមានឋានៈជាមនុស្ស បង‌ប្អូនត្រូវប្រកាន់ចិត្តគំនិតដូចព្រះ‌អង្គដែរ ដ្បិតអ្នកណាស៊ូទ្រាំរង‌ទុក្ខលំបាកខាងរូបកាយ អ្នកនោះលែងទាក់‌ទាមអ្វីនឹងបាប*ទៀតហើយ ២ ដើម្បីឲ្យបានរស់ ស្របតាមព្រះ‌ហឫទ័យរបស់ព្រះ‌ជាម្ចាស់ ក្នុងកំឡុងពេលនៃអាយុជីវិតដែលនៅសល់ក្នុងលោកនេះ គឺមិនរស់នៅតាមចំណង់តណ្ហារបស់មនុស្សទៀតទេ។ ៣ ពីដើម បង‌ប្អូនរស់នៅតាមរបៀបដែលអស់អ្នកមិនស្គាល់ព្រះ‌ជាម្ចាស់ចូលចិត្តនោះ យូរពេកហើយ គឺបានប្រព្រឹត្តអំពើអបាយ‌មុខ លោភ‌លន់ ប្រមឹក ស៊ីផឹកជ្រុល និងថ្វាយ‌បង្គំព្រះក្លែង‌ក្លាយនានា គួរឲ្យខ្ពើម។ ៤ ពួកគេងឿង‌ឆ្ងល់ ដោយឃើញបង‌ប្អូនពុំចូលរួមជាមួយគេ ក្នុងការប្រព្រឹត្តអំពើថោកទាបហួសហេតុទាំងនោះទៀត ហើយគេក៏និយាយប្រមាថបង‌ប្អូន។ ៥ អ្នកទាំងនោះនឹងត្រូវឆ្លើយរៀបរាប់ពីអំពើ ដែលខ្លួនប្រព្រឹត្តនៅចំពោះព្រះ‌ភ័ក្ត្រព្រះ‌អង្គ ដែលប្រុងប្រៀបនឹងវិនិច្ឆ័យទោស ទាំងមនុស្សរស់ ទាំងមនុស្សស្លាប់។ ៦ ហេតុនេះ សូម្បីតែមនុស្សស្លាប់ក៏ព្រះ‌អង្គបាននាំដំណឹង‌ល្អទៅឲ្យគេឮដែរ។ ដូច្នេះ ទោះបីពួកគេត្រូវទទួលការវិនិច្ឆ័យទោសតាមរបៀបមនុស្សលោក ក្នុងពេលគេរស់នៅក្នុងលោកីយ៍នេះក៏ដោយ ក៏គេអាចមានជីវិតរស់ស្របតាមព្រះ‌ជាម្ចាស់ដោយ‌សារព្រះ‌វិញ្ញាណដែរ។

របៀបរស់នៅក្នុងក្រុមគ្រីស្ត‌បរិស័ទ

៧ អ្វីៗទាំងអស់ជិតរលាយសូន្យហើយ ហេតុនេះ ត្រូវគិតឲ្យវែងឆ្ងាយ និងភ្ញាក់ស្មារតីឡើង ដើម្បីឲ្យអធិស្ឋាន*កើត។ ៨ ជាបឋម ត្រូវមានចិត្តស្រឡាញ់គ្នាទៅវិញទៅមកជា‌និច្ច ដ្បិតសេចក្ដីស្រឡាញ់រមែងគ្របបាំងអំពើបាបដ៏ច្រើនលើស‌លប់។ ៩ ត្រូវចេះទទួលគ្នាទៅវិញទៅមក ដោយរាក់‌ទាក់ឥតរអ៊ូ‌រទាំឡើយ។

១០ បង‌ប្អូនម្នាក់ៗបានទទួលព្រះ‌អំណោយទានផ្សេងៗពីគ្នាហើយ ដូច្នេះ ចូរយកព្រះ‌អំណោយទានទាំងនេះទៅបម្រើអ្នកឯទៀតៗ ឲ្យសមនឹងនាទីរបស់បង‌ប្អូន ជាអ្នកចាត់ចែងដ៏ល្អ ដែលចែកព្រះ‌អំណោយទានគ្រប់បែបយ៉ាងរបស់ព្រះ‌ជាម្ចាស់។ ១១ បើអ្នកណានិយាយ ត្រូវនិយាយឲ្យស្របតាមព្រះ‌បន្ទូលរបស់ព្រះ‌ជាម្ចាស់។ បើអ្នកណាបម្រើ ត្រូវបម្រើតាមកម្លាំងដែលព្រះ‌ជាម្ចាស់ប្រទានឲ្យ ដើម្បីលើកតម្កើងសិរី‌រុងរឿងរបស់ព្រះ‌ជាម្ចាស់ ក្នុងគ្រប់កិច្ច‌ការទាំងអស់ តាម‌រយៈព្រះ‌យេស៊ូ‌គ្រីស្ត។ សូមលើកតម្កើងសិរី‌រុងរឿង និងព្រះ‌ចេស្ដារបស់ព្រះ‌អង្គអស់‌កល្បជាអង្វែងតរៀងទៅ! អាម៉ែន!។

ទុក្ខលំបាករបស់គ្រីស្ត‌បរិស័ទ

១២ បង‌ប្អូនជាទីស្រឡាញ់អើយ! ចំពោះទុក្ខលំបាកដ៏ខ្លាំងដែលកើតមាន ដើម្បីលត់‌ដំបង‌ប្អូននោះ សូមកុំងឿង‌ឆ្ងល់ ដោយគិតថាជាព្រឹត្តិ‌ការណ៍អ្វីមួយដ៏ចម្លែកឡើយ។ ១៣ ផ្ទុយទៅវិញ ចូរមានចិត្តរីក‌រាយឡើង ព្រោះបង‌ប្អូនរង‌ទុក្ខលំបាកផ្សេងៗរួមជាមួយព្រះ‌គ្រីស្ត*។ បង‌ប្អូនមុខជាមានអំណរសប្បាយយ៉ាងខ្លាំង នៅពេលព្រះ‌អង្គបង្ហាញសិរី‌រុងរឿងរបស់ព្រះ‌អង្គ។

១៤ ប្រសិនបើមានគេត្មះ‌តិះ‌ដៀលបង‌ប្អូន ព្រោះតែព្រះ‌នាមរបស់ព្រះ‌គ្រីស្ត* នោះបង‌ប្អូនមានសុភមង្គល*ហើយ ដ្បិតព្រះ‌វិញ្ញាណប្រកបដោយសិរី‌រុងរឿង គឺព្រះ‌វិញ្ញាណរបស់ព្រះ‌ជាម្ចាស់ស្ថិតនៅលើបង‌ប្អូន។ ១៥ ក្នុងចំណោមបង‌ប្អូន សូមកុំឲ្យមាននរណាម្នាក់រង‌ទុក្ខលំបាក ព្រោះបានសម្លាប់គេ លួចគេ ប្រព្រឹត្តអំពើអាក្រក់ ឬឡូក‌ឡំក្នុងរឿង‌រ៉ាវរបស់អ្នកដទៃឡើយ។ ១៦ ប៉ុន្តែ បើបង‌ប្អូនណារង‌ទុក្ខលំបាក ក្នុងនាមជាគ្រីស្ត‌បរិស័ទ កុំអៀន‌ខ្មាសឲ្យសោះ ផ្ទុយទៅវិញ បង‌ប្អូននោះត្រូវតែលើកតម្កើងសិរី‌រុងរឿងព្រះ‌ជាម្ចាស់ ព្រោះតែនាមនេះ។

១៧ ពេលកំណត់ដែលព្រះ‌ជាម្ចាស់ចាប់ផ្តើមវិនិច្ឆ័យទោសមនុស្សលោកមកដល់ហើយ គឺព្រះ‌អង្គវិនិច្ឆ័យទោសប្រជា‌រាស្ដ្ររបស់ព្រះ‌អង្គមុនគេ។ ប្រសិនបើព្រះ‌អង្គចាប់ផ្ដើមវិនិច្ឆ័យទោសពីយើងទៅហើយ ចុះទម្រាំបើអស់អ្នកដែលពុំព្រមជឿដំណឹង‌ល្អរបស់ព្រះ‌ជាម្ចាស់វិញ តើនឹងធ្លាក់ទៅដល់កម្រិតណា!។ ១៨ បើមនុស្សសុចរិត*រួចជីវិតទាំងពិបាកយ៉ាងហ្នឹងទៅហើយ ចុះទម្រាំបើមនុស្សទុច្ចរិត និងមនុស្សបាបវិញ តើនឹងទៅជាយ៉ាងណា!។ ១៩ ហេតុនេះ អស់អ្នកដែលរង‌ទុក្ខលំបាក ស្របតាមព្រះ‌ហឫទ័យព្រះ‌ជាម្ចាស់ ត្រូវប្រព្រឹត្តអំពើល្អ ហើយផ្ញើជីវិតលើព្រះ‌អាទិករ*ដែលមានព្រះ‌ហឫទ័យស្មោះ‌ត្រង់។

៥

ភារ‌កិច្ចរបស់អ្នកទទួលខុសត្រូវព្រះ‌សហគមន៍

១ ចំពោះព្រឹទ្ធា‌ចារ្យ*ដែលនៅក្នុងចំណោមបង‌ប្អូន ក្នុងនាមខ្ញុំជាព្រឹទ្ធា‌ចារ្យដូចគ្នា ហើយជាបន្ទាល់អំពីទុក្ខលំបាករបស់ព្រះ‌គ្រីស្ត* និងជាអ្នករួមទទួលសិរី‌រុងរឿង ដែលនឹងត្រូវលេចមក ខ្ញុំសូមដាស់‌តឿនថាៈ ២ សូមមើលថែ‌រក្សាហ្វូងចៀមដែលព្រះ‌ជាម្ចាស់ផ្ញើទុកនឹងបង‌ប្អូន ដោយចិត្តស្មោះ‌ស្ម័គ្រ ស្របតាមព្រះ‌ហឫទ័យព្រះ‌ជាម្ចាស់ គឺមិនមែនដោយទើស‌ទ័ល ឬដោយចង់បានកម្រៃអ្វីដែរ តែត្រូវមើលថែ‌រក្សាដោយសុទ្ធចិត្ត។ ៣ កុំប្រើអំណាចជិះ‌ជាន់អស់អ្នកដែលព្រះ‌ជាម្ចាស់ប្រទានមកឲ្យបង‌ប្អូនថែ‌រក្សានោះឡើយ គឺត្រូវធ្វើជាគំរូដល់ហ្វូងចៀមវិញ។ ៤ ពេលគង្វាលដ៏ឧត្ដមយាងមកដល់ បង‌ប្អូននឹងទទួលមកុដដ៏រុង‌រឿងដែលមិនចេះអាប់រស្មី។

ភារ‌កិច្ចរបស់អ្នកជឿ

៥ រីឯពួកយុវជនវិញក៏ដូច្នោះដែរ ត្រូវគោរពចុះចូលនឹងព្រឹទ្ធា‌ចារ្យ*។ ចូរទាក់‌ទងគ្នាទៅវិញទៅមក ដោយសុភាពរាប‌សា ដ្បិត«ព្រះ‌ជាម្ចាស់ប្រឆាំងនឹងអស់អ្នកដែលអួតខ្លួន តែព្រះ‌អង្គប្រណី‌សន្ដោសអស់អ្នកដែលដាក់ខ្លួនវិញ»។

៦ ដូច្នេះ ត្រូវដាក់ខ្លួននៅក្រោមព្រះ‌ហស្ដដ៏មានឫទ្ធា‌នុភាពរបស់ព្រះ‌ជាម្ចាស់ ដើម្បីឲ្យព្រះ‌អង្គលើកតម្កើងបង‌ប្អូន នៅពេលដែលព្រះ‌អង្គបានកំណត់ទុក។ ៧ ចូរផ្ទេរទុក្ខកង្វល់ទាំងប៉ុន្មានរបស់បង‌ប្អូនទៅព្រះ‌អង្គទៅ ដ្បិតព្រះ‌អង្គយកព្រះ‌ហឫទ័យទុកដាក់នឹងបង‌ប្អូន។

៨ ត្រូវភ្ញាក់ខ្លួន ហើយប្រុងស្មារតីជា‌និច្ច! ដ្បិតមារ*ជាសត្រូវនឹងបង‌ប្អូន កំពុងតែក្រវែលជុំ‌វិញបង‌ប្អូន ដូចសឹង្ហក្រវែល ទាំងគ្រហឹម រកត្របាក់ស៊ីអ្នកណាម្នាក់។ ៩ ចូរប្រឆាំងនឹងវា ហើយមានជំនឿមាំ‌មួនឡើង ដោយដឹងថា បង‌ប្អូនរួមជំនឿឯទៀតៗនៅក្នុងសកលលោកទាំងមូល ក៏ត្រូវរង‌ទុក្ខលំបាកដូចបង‌ប្អូនដែរ។

១០ បន្ទាប់ពីបង‌ប្អូនបានរង‌ទុក្ខលំបាកមួយ‌រយៈពេលខ្លីនេះរួចហើយ ព្រះ‌ជាម្ចាស់ប្រកបដោយព្រះ‌ហឫទ័យប្រណី‌សន្ដោសគ្រប់យ៉ាង ដែលបានត្រាស់ហៅបង‌ប្អូន ឲ្យទទួលសិរី‌រុងរឿងដ៏ស្ថិត‌ស្ថេរអស់កល្ប‌ជានិច្ចរួមជាមួយព្រះ‌គ្រីស្ត* ព្រះ‌អង្គនឹងលើកបង‌ប្អូនឲ្យមានជំហរឡើងវិញ ប្រទានឲ្យបង‌ប្អូនបានរឹង‌ប៉ឹង មានកម្លាំង និងឲ្យបង‌ប្អូនបានមាំ‌មួនឥតរង្គើឡើយ។ ១១ សូមឲ្យព្រះ‌អង្គបានប្រកបដោយព្រះ‌ចេស្ដា សូមលើកតម្កើងព្រះ‌ចេស្ដារបស់ព្រះ‌អង្គ អស់‌កល្បជាអង្វែងតរៀងទៅ! អាម៉ែន!។

អវសាន‌កថា

១២ ខ្ញុំសរសេរលិខិតដ៏ខ្លីផ្ញើមកជូនបង‌ប្អូននេះ ដោយមានលោកស៊ីលវ៉ានជាអ្នកស្មោះ‌ត្រង់បានជួយ ដើម្បីលើកទឹកចិត្តបង‌ប្អូន និងបញ្ជាក់ប្រាប់បង‌ប្អូនថា បង‌ប្អូនពិតជាស្ថិតនៅជាប់នឹងព្រះ‌ហឫទ័យប្រណី‌សន្ដោសរបស់ព្រះ‌ជាម្ចាស់មែន។

១៣ ព្រះ‌សហគមន៍*នៅក្រុងបាប៊ីឡូន សូមជម្រាបសួរមកបង‌ប្អូន ហើយលោកម៉ាកុស ជាកូនរបស់ខ្ញុំ សូមជម្រាបសួរមកបង‌ប្អូនដែរ។ ១៤ ចូរជម្រាបសួរគ្នាទៅវិញទៅមកដោយស្និទ្ធ‌ស្នាល។

សូមឲ្យបង‌ប្អូនទាំងអស់ ដែលរួមរស់នឹងព្រះ‌គ្រីស្ត* បានប្រកបដោយសេចក្ដីសុខ‌សាន្ត។

538 Views

Post Views: 541

១. គម្ពីរធម្មវិន័យ | Pentateuch 5

២. គម្ពីរប្រវត្តិសាស្រ្ត | History 16

៣. គម្ពីរប្រាជ្ញាញាណ | Wisdom 7

៤. គម្ពីរព្យាការី | Prophet 18

១. គម្ពីរដំណឹងល្អ | Gospels 4

២. គម្ពីរប្រវត្តិសាស្រ្ត | History 1

៣. លិខិតសន្តប៉ូល | Paul Letter 13

៤. សំណេរសកល | Catholic Letter 5

៥. សំណេរសន្តយ៉ូហាន | John Writing 4

លិខិត​ទី​មួយ​របស់សន្ត​សិលា

លិខិត​ទី​មួយ​របស់

លោក​សិលា

ពាក្យ​លំនាំ

គោល​បំណងៈ

សេចក្ដី​ផ្ដើម

សេចក្ដី​សង្ឃឹម

ការ​ទូន្មាន​ឲ្យ​មាន​ជីវិត​ដ៏‌វិសុទ្ធ

ប្រជា‌រាស្ដ្រ​ដ៏‌វិសុទ្ធ

របៀប​រស់​នៅ​នៃ​អ្នក​បម្រើ​របស់​ព្រះ‌ជាម្ចាស់

គំរូ​អំពី​ទុក្ខ​លំបាក​របស់​ព្រះ‌គ្រីស្ត

ទំនាក់‌ទំនង​រវាង​ស្វាមី និង​ភរិយា

ទំនាក់‌ទំនង​រវាង​បង‌ប្អូន

ការ​រស់​នៅ​ដោយ​មិន​ប្រព្រឹត្ត​អំពើ​បាប

របៀប​រស់​នៅ​ក្នុង​ក្រុម​គ្រីស្ត‌បរិស័ទ

ទុក្ខ​លំបាក​របស់​គ្រីស្ត‌បរិស័ទ

ភារ‌កិច្ច​របស់​អ្នក​ទទួល​ខុស​ត្រូវ​ព្រះ‌សហគមន៍

ភារ‌កិច្ច​របស់​អ្នក​ជឿ

អវសាន‌កថា

^{លិខិតទីមួយរបស់}
សន្តសិលា

លិខិតទីមួយរបស់

លោកសិលា

ពាក្យលំនាំ

គោលបំណងៈ

សេចក្ដីផ្ដើម

សេចក្ដីសង្ឃឹម

ការទូន្មានឲ្យមានជីវិតដ៏‌វិសុទ្ធ

ប្រជា‌រាស្ដ្រដ៏‌វិសុទ្ធ

របៀបរស់នៅនៃអ្នកបម្រើរបស់ព្រះ‌ជាម្ចាស់

គំរូអំពីទុក្ខលំបាករបស់ព្រះ‌គ្រីស្ត

ទំនាក់‌ទំនងរវាងស្វាមី និងភរិយា

ទំនាក់‌ទំនងរវាងបង‌ប្អូន

ការរស់នៅដោយមិនប្រព្រឹត្តអំពើបាប

របៀបរស់នៅក្នុងក្រុមគ្រីស្ត‌បរិស័ទ

ទុក្ខលំបាករបស់គ្រីស្ត‌បរិស័ទ

ភារ‌កិច្ចរបស់អ្នកទទួលខុសត្រូវព្រះ‌សហគមន៍

ភារ‌កិច្ចរបស់អ្នកជឿ