Siya Khim - Catholic Faith Cambodia

ថ្ងៃព្រហស្បតិ៍ពិសិដ្ឋ

Posted on 17 ខែមេសា 202512 ខែមីនា 2025 by Siya Khim

ត្រៃទិវានៃបុណ្យចម្លង

ថ្ងៃព្រហស្បតិ៍ពិសិដ្ឋ (ព្រះអម្ចាស់ជប់លៀងក្រុមសាវ័ក)
_{(ពេលល្ងាច)}

ឱព្រះអម្ចាស់អើយ! សូមយាងមកជួយទូលបង្គំ
សូមព្រះអម្ចាស់យាងមកជួយសង្គ្រោះយើងខ្ញុំផង!
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក
ហើយជាដរាបតរៀងទៅ។ អាម៉ែន! (អាលេលូយ៉ា!)

ចម្រៀងចូល (សូមជ្រើសរើសបទចម្រៀងមួយ)

ទំនុកតម្កើងលេខ ៧២

រាជ្យអំណាចរបស់ព្រះមេស្ស៊ី

គេក៏នាំគ្នាក្រាបថ្វាយ‌បង្គំព្រះ‌អង្គ រួចបើកហិបយកទ្រព្យរបស់ខ្លួន គឺមាស គ្រឿងក្រអូប និងជ័រល្វីង‌ទេស មកថ្វាយព្រះ‌អង្គ (មថ ២,១១)។

បន្ទរទី១ ៖ ក្នុងចំណោមមនុស្សស្លាប់ទាំងអស់ ព្រះគ្រិស្តមានព្រះជន្មរស់ឡើងវិញមុនគេ ហើយព្រះអង្គជាអធិបតីលើស្ដេចទាំងអស់នៅផែន‌ដី។ ព្រះអង្គបានធ្វើឲ្យយើងទៅជារាជាណាចក្រ បម្រើព្រះជាម្ចាស់ ជាព្រះបិតារបស់ព្រះអង្គ។

(ក)

^១	ឱព្រះជាម្ចាស់អើយ! សូមប្រទានឱ្យព្រះរាជាចេះវិនិច្ឆ័យដូចព្រះអង្គ សូមឱ្យព្រះរាជបុត្រនេះ បានប្រកបដោយសេចក្តីសុចរិតរបស់ព្រះអង្គដែរ!។
^២	សូមឱ្យព្រះរាជាគ្រប់គ្រងប្រជារាស្ត្ររបស់ព្រះអង្គ ដោយយុត្តិធម៌ ហើយគ្រប់គ្រងជនក្រីក្រត្រឹមត្រូវតាមច្បាប់។
^៣	សូមឱ្យភ្នំធំភ្នំតូចទាំងឡាយ ផ្តល់នូវភោគផលដ៏សម្បូណ៌សប្បាយដល់ប្រជារាស្ត្រ ព្រមទាំងនាំសេចក្តីសុចរិតរបស់គេផង។
^៤	សូមព្រះរាជារកយុត្តិធម៌ឱ្យជនក្រីក្រក្នុងចំណោមប្រជារាស្ត្រ សូមទ្រង់ប្រោសមនុស្សកំសត់ទុគ៌ត ហើយកម្ទេចអស់អ្នកដែលជិះជាន់សង្កត់សង្កិនគេ។
^៥	ដរាបណាព្រះអាទិត្យនៅតែរះ ហើយព្រះចន្ទនៅតែបញ្ចោញរស្មី សូមឱ្យព្រះរាជាមានព្រះជន្មាយុយឺនយូរអស់កល្បជាអង្វែងតរៀងទៅ។
^៦	សូមទ្រង់ផ្តល់ព្រះពរដល់ប្រជារាស្ត្រ ដូចទឹកភ្លៀងធ្លាក់មកលើស្រែចម្ការ ដូចភ្លៀងបង្អុរចុះមកស្រោចស្រពផែនដី។
^៧	សូមឱ្យសេចក្តីសុចរិតរីកចម្រើនឡើង ក្នុងរជ្ជកាលរបស់ព្រះករុណា ដរាបណានៅមានព្រះចន្ទ សូមឱ្យមានសេចក្តីសុខសាន្តយ៉ាងបរិបូណ៌។
^៨	សូមឱ្យព្រះរាជាគ្រប់គ្រងពីសមុទ្រមួយ ទៅសមុទ្រមួយ ពីទន្លេអឺប្រាតនេះ រហូតដល់ស្រុកដាច់ស្រយាលនៃផែនដី។
^៩	ប្រជាជនដែលរស់នៅតាមវាលរហោស្ថាន នឹងនាំគ្នាក្រាបថ្វាយបង្គំព្រះករុណា ខ្មាំងសត្រូវរបស់ព្រះអង្គត្រូវបរាជ័យងើបមុខមិនរួច។
^១០	ស្តេចទាំងឡាយនៅស្រុកតារស៊ីស និងនៅកោះនានា នឹងយកតង្វាយមកថ្វាយព្រះករុណា ស្តេចទាំងឡាយនៅស្រុកសាបា និងស្រុកសេបា ក៏យកសួយសារអាករមកថ្វាយព្រះអង្គដែរ។
^១១	ស្តេចទាំងឡាយនឹងនាំគ្នាក្រាបថ្វាយបង្គំព្រះរាជា ប្រជាជាតិទាំងអស់នឹងបម្រើព្រះករុណា។

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ ៖ ក្នុងចំណោមមនុស្សស្លាប់ទាំងអស់ ព្រះគ្រិស្តមានព្រះជន្មរស់ឡើងវិញមុនគេ ហើយព្រះអង្គជាអធិបតីលើស្ដេចទាំងអស់នៅផែន‌ដី។ ព្រះអង្គបានធ្វើឲ្យយើងទៅជារាជាណាចក្រ បម្រើព្រះជាម្ចាស់ ជាព្រះបិតារបស់ព្រះអង្គ។

បន្ទរទី២ ៖ ព្រះករុណារំដោះជនក្រីក្រ នៅពេលគេស្រែកអង្វរព្រះ‌ករុណា ហើយព្រះ‌ករុណារំដោះជន‌ទុរគតដែលគ្មានទីពឹង។

(ខ)

(បទកាកគតិ)

^១២-	ទ្រង់នឹងរំដោះ	អ្នកក្រទាំងអស់	ដោយធម៌មេត្តា
	អ្នកទុគ៌តស្រែក	សុំក្តីករុណា	ព្រះអង្គរក្សា
		អ្នកគ្មានទីពឹង	។
^១៣-	ទ្រង់សែនអាណិត	អាសូរពេកពិត	អ្នកអត់លំនឹង
	នឹងមនុស្សកំសត់	គ្មានអ្វីរំពឹង	ព្រះអម្ចាស់នឹង
		សង្គ្រោះជីវិត	។
^១៤-	ទ្រង់នឹងរំដោះ	ពួកគេទាំងរស់	ពីពួកឧក្រិដ្ឋ
	ជនកាចសាហាវ	ពាលាទុច្ចរិត	ព្រោះតែជីវិត
		ថ្លៃថ្លាក្រៃលែង	។
^១៥-	សូមឱ្យរាជា	មានព្រះជន្មា	យឺនយូរអង្វែង
	គេនឹងយកមាស	មកថ្វាយទ្រង់ផង	អង្វរព្រះអង្គ
		ឥតមានឈប់ឈរ	។
^១៦-	សូមឱ្យក្នុងស្រុក	ស្រូវពេញជង្រុក	ផ្តល់ភោគផលល្អ
	តាមកំពូលភ្នំ	ក៏ឱ្យសំបូរ	ប្រជាកុះករ
		កើនឡើងដូចស្មៅ	។
^១៧-	សូមឱ្យរាជា	មានព្រះនាមា	ល្បីល្បាញតទៅ
	នាមព្រះករុណា	ស្ថិតស្ថេរគង់នៅ	ដរាបរៀងទៅ
		លើដីក្រោមមេឃ	។
^១៨-	សូមលើកតម្កើង	ព្រះអង្គខ្ពស់ឡើង	ឥតមានអល់អែក
	ព្រះអ៊ីស្រាអែល	ល្អល្អះអនេក	ការអស្ចារ្យពេក
		ដែលទ្រង់សម្តែង	។
^១៩-	សូមលើកតម្កើង	ព្រះនាមថ្កុំថ្កើង	ព្រះអង្គគួរស្ញែង
	សូមឱ្យផែនដី	ទាំងមូលកោតក្រែង	សិរីរុងរឿង
		របស់ព្រះអង្គ	។
	សូមកោតសរសើរ	ដល់ព្រះបិតា	ព្រះរាជ្យបុត្រា
	និងព្រះវិញ្ញាណ	ជាព្រះត្រៃអង្គ	ថ្កើងថ្កានឥតហ្មង
		ដែលគង់ជានិច្ច	។

បន្ទរ ៖ ព្រះករុណារំដោះជនក្រីក្រ នៅពេលគេស្រែកអង្វរព្រះ‌ករុណា ហើយព្រះ‌ករុណារំដោះជន‌ទុរគតដែលគ្មានទីពឹង។

បទលើកតម្កើងតាមគម្ពីរវិវរណៈ (វវ ១១,១៧-១៨.១២,១០^ខ-១២^ក)

ការវិនិច្ឆ័យទោសរបស់ព្រះជាម្ចាស់

បន្ទរទី៣ ៖ បងប្អូនយើងបានឈ្នះវា ដោយសារព្រះលោហិតរបស់កូនចៀម និងដោយសក្ខី‌ភាពរបស់ពួកគេ។

^១៧	“បពិត្រព្រះជាអម្ចាស់ ជាព្រះដ៏មានព្រះចេស្តាលើអ្វីៗទាំងអស់ ព្រះអង្គមានព្រះជន្មគង់នៅសព្វថ្ងៃនេះ ហើយក៏មានព្រះជន្មគង់នៅ តាំងពីដើមរៀងមកដែរ! យើងខ្ញុំសូមអរព្រះគុណព្រះអង្គ ព្រោះទ្រង់បានយកឫទ្ធានុភាពដ៏ខ្លាំងក្លារបស់ព្រះអង្គ មកតាំងព្រះរាជ្យរបស់ព្រះអង្គឡើង។
^១៨	ជាតិសាសន៍នានាបាននាំគ្នាខឹង ហើយពេលដែលព្រះអង្គសម្តែងព្រះពិរោធក៏មកដល់ដែរ គឺជាពេលកំណត់ដែលព្រះអង្គវិនិច្ឆ័យទោសមនុស្សស្លាប់។ នៅពេលនោះ ព្រះអង្គនឹងប្រទានរង្វាន់ដល់ពួកព្យាការី ជាអ្នកបម្រើរបស់ព្រះអង្គ ដល់ប្រជាជនដ៏វិសុទ្ធ និងដល់អស់អ្នកដែលគោរពកោតខ្លាចព្រះនាមព្រះអង្គ ទាំងអ្នកតូច ទាំងអ្នកធំ ហើយក៏ជាពេលដែលព្រះអង្គត្រូវបំផ្លាញ អស់អ្នកដែលបានបំផ្លាញផែនដីដែរ” ។
^១០	ពេលនោះ ខ្ញុំបានឮសំឡេងមួយបន្លឺយ៉ាងខ្លាំង នៅលើមេឃថា ៖ “ឥឡូវនេះ ដល់ពេលព្រះជាម្ចាស់សង្គ្រោះមនុស្សលោកហើយ ហើយឫទ្ធានុភាព និងព្រះរាជ្យព្រះជាម្ចាស់របស់យើង ព្រមទាំងអំណាចព្រះគ្រីស្តរបស់ព្រះអង្គក៏បានមកដល់ដែរ ដ្បិតអ្នកចោទប្រកាន់ទោសបងប្អូនយើង ត្រូវគេទម្លាក់ចោលហើយ គឺអ្នកនោះឯង ដែលចោទប្រកាន់បងប្អូនយើង ទាំងថ្ងៃទាំងយប់ នៅមុខព្រះភក្ត្រនៃព្រះរបស់យើង។
^១១	បងប្អូនយើងបានឈ្នះវា ដោយសារព្រះលោហិតរបស់កូនចៀម និងដោយសក្ខីភាពរបស់ពួកគេ ហើយបងប្អូនទាំងនោះ បានស៊ូប្តូរជីវិតឥតស្តាយសោះឡើយ។
^១២	ហេតុនេះ ស្ថានបរមសុខ និងអស់អ្នកដែលរស់នៅក្នុងស្ថានបរមសុខអើយ! ចូរមានអំណរសប្បាយឡើង!

បន្ទរ ៖ បងប្អូនយើងបានឈ្នះវា ដោយសារព្រះលោហិតរបស់កូនចៀម និងដោយសក្ខី‌ភាពរបស់ពួកគេ។

ព្រះបន្ទូលរបស់ព្រះជាម្ចាស់ (ហប ១៣,១២-១៥)

ព្រះ‌យេស៊ូក៏ដូច្នោះដែរ ព្រះ‌អង្គរង‌ទុក្ខទោសនៅខាងក្រៅទីក្រុង ដើម្បីប្រោសប្រជាជនឲ្យវិសុទ្ធ ដោយ‌សារព្រះ‌លោហិតរបស់ព្រះ‌អង្គផ្ទាល់។ ដូច្នេះ យើងត្រូវតែចាកចេញពីជំរំទៅរកព្រះ‌អង្គ ទាំងស៊ូទ្រាំឲ្យគេប្រមាថមើល‌ងាយរួមជាមួយព្រះ‌អង្គដែរ ដ្បិតក្នុងលោកនេះ យើងគ្មានក្រុងដែលនៅស្ថិត‌ស្ថេរគង់‌វង្សរហូតឡើយ យើងខំស្វែងរកក្រុងដែលនឹងមាននៅពេលខាងមុខនោះវិញ។ ចូរយើងថ្វាយយញ្ញ‌បូជាសម្រាប់លើកតម្កើងព្រះ‌ជាម្ចាស់ជា‌និច្ច តាម‌រយៈព្រះ‌យេស៊ូ គឺជាពាក្យហូរចេញពីបបូរមាត់យើងដែលប្រកាសព្រះ‌នាមព្រះ‌អង្គ។

បន្ទរ៖ ព្រះ‌អង្គបានដាក់ខ្លួន ធ្វើតាមព្រះ‌បញ្ជារហូតដល់សោយទិវង្គត។

ទំនុកតម្កើងរបស់ព្រះនាងម៉ារី

បន្ទរ ៖ នៅពេលកំពុងបរិភោគ ព្រះ‌យេស៊ូយកនំបុ័ងមកកាន់ ព្រះ‌អង្គសរ‌សើរតម្កើងព្រះ‌ជាម្ចាស់ ហើយកាច់ប្រទានឲ្យពួកសាវ័ក។

^៤៦	«ព្រលឹងខ្ញុំសូមលើកតម្កើងព្រះ‌អម្ចាស់*
^៤៧	ខ្ញុំមានចិត្តអំណរយ៉ាងខ្លាំង ព្រោះព្រះជាម្ចាស់ជាព្រះសង្គ្រោះរបស់ខ្ញុំ
^៤៨	ព្រះអង្គទតមើលមកខ្ញុំ ដែលជាអ្នកបម្រើដ៏ទន់ទាបរបស់ព្រះអង្គ អំណើះតទៅ មនុស្សគ្រប់ជំនាន់នឹងពោលថា ខ្ញុំជាអ្នកមានសុភមង្គលពិតមែន
^៤៩	ព្រះដ៏មានតេជានុភាព បានសម្ដែងការប្រសើរអស្ចារ្យចំពោះរូបខ្ញុំ។ ព្រះនាមរបស់ព្រះអង្គពិតជាវិសុទ្ធមែន!
^៥០	ទ្រង់មានព្រះហឫទ័យមេត្តាករុណា ដល់អស់អ្នកដែលកោតខ្លាចព្រះអង្គនៅគ្រប់ជំនាន់តរៀងទៅ
^៥១	ទ្រង់បានសម្ដែងឫទ្ធិបារមី កម្ចាត់មនុស្សដែលមានចិត្តឆ្មើងឆ្មៃ
^៥២	ទ្រង់បានទម្លាក់អ្នកកាន់អំណាចចុះពីតំណែង ហើយទ្រង់លើកតម្កើងមនុស្សទន់ទាបឡើង។
^៥៣	ទ្រង់បានប្រទានសម្បត្តិយ៉ាងបរិបូណ៌ ដល់អស់អ្នកដែលស្រេកឃ្លាន ហើយបណ្តេញពួកអ្នកមានឱ្យត្រឡប់ទៅវិញដោយដៃទទេ។
^៥៤	ព្រះអង្គបានជួយប្រជារាស្ត្រអ៊ីស្រាអែល ជាអ្នកបម្រើរបស់ព្រះអង្គ ហើយតែងតែសម្ដែងព្រះហឫទ័យមេត្តាករុណា
^៥៥	ដល់លោកអប្រាហាំ និងពូជពង្សរបស់លោកជានិច្ចតរៀងទៅ ដូចទ្រង់បានសន្យាជាមួយបុព្វបុរសយើង ឥតភ្លេចសោះឡើយ។

ឬ ទំនុកតម្កើងរបស់ព្រះនាងម៉ារី (តាមបែបស្មូត) បទព្រហ្មគីតិ

^៤៧	ខ្ញុំមានចិត្តអំណរ	សប្បាយអរពន់ពេកណាស់
	ព្រោះខ្ញុំបានដឹងច្បាស់	ថាព្រះម្ចាស់ទ្រង់សង្គ្រោះ	។
^៤៨	ព្រះអង្គទតមកខ្ញុំ	ជាអ្នកបម្រើស្ម័គ្រស្មោះ
	តទៅមនុស្សទាំងអស់	ថាខ្ញុំនេះសែនសុខក្រៃ	។
^៤៩	ព្រះដ៏មានឫទ្ធា	ខ្លាំងអស្ចារ្យលើលោកីយ៍
	សម្ដែងឫទ្ធិបារមី	ព្រះនាមថ្លៃថ្លាវិសុទ្ធ	។
^៥០	ទ្រង់មានព្រះហឫទ័យ	ត្រាប្រណីខ្ពស់បំផុត
	ដល់អ្នកគោរពកោត	ខ្លាចព្រះអង្គរៀងរហូត	។
^៥១	ព្រះអង្គសម្ដែងឫទ្ធិ	អស្ចារ្យពិតមិនរលត់
	កម្ចាត់មនុស្សមានពុត	ឆ្មើងបំផុតឫកខែងរែង	។
^៥២	ទ្រង់បានច្រានទម្លាក់	អ្នកធំធ្លាក់ពីតំណែង
	ឥតមានខ្លាចរអែង	ហើយទ្រង់តែងលើកអ្នកទាប	។
^៥៣	ព្រះអង្គប្រោសប្រទាន	ឱ្យអ្នកឃ្លានឆ្អែតដរាប
	អ្នកមានធនធានស្រាប់	ដេញត្រឡប់ដៃទទេ	។
^៥៤	ព្រះអង្គបានជួយរាស្ត្រ	ទ្រង់ទាំងអស់ឥតប្រួលប្រែ
	អ៊ីស្រាអែលនៅក្បែរ	ជាបម្រើដ៏ស្មោះស្ម័គ្រ	។
^៥៥	ទ្រង់តែងមានព្រះទ័យ	ករុណាក្រៃមិនថ្នាំងថ្នាក់
	លោកអប្រាហាំជាក់	និងពូជពង្សលោកជានិច្ច	។
	ដូចទ្រង់បានសន្យា	នឹងដូនតាឥតមានភ្លេច
	ព្រះអង្គចាំជានិច្ច	គ្មានកលកិច្ចប្រែប្រួលឡើយ	។
	សិរីរុងរឿងដល់	ព្រះបិតាព្រះបុត្រា
	និងព្រះវិញ្ញាណផង	ដែលទ្រង់គង់នៅជានិច្ច	។

បន្ទរ ៖ នៅពេលកំពុងបរិភោគ ព្រះ‌យេស៊ូយកនំបុ័ងមកកាន់ ព្រះ‌អង្គសរ‌សើរតម្កើងព្រះ‌ជាម្ចាស់ ហើយកាច់ប្រទានឲ្យពួកសាវ័ក។

ពាក្យអង្វរសកល

ព្រះសង្រ្គោះនៃមនុស្សលោកបានសោយទិវង្គត ដើម្បីបំផ្លាញសេចក្តីស្លាប់ ហើយដោយព្រះអង្គមានព្រះជន្មរស់ឡើងវិញ ព្រះអង្គបានស្តារជីវិតឡើងវិញ។ ចូរយើងទូលសូមព្រះអង្គ ដោយចិត្តរាបសារថា ៖

បន្ទរ ៖ សូមប្រោសឱ្យប្រជារាស្រ្តដែលព្រះអង្គបានលោះ ដោយព្រះលោហិតរបស់ព្រះអង្គបានវិសុទ្ធផង !

ឱព្រះសង្រ្គោះនៃពិភពលោក ! សូមប្រោសឱ្យយើងខ្ញុំអាចចែករំលែកនូវទុក្ខលំបាករបស់ព្រះអង្គ តាមរយៈការប្រែចិត្តគំនិតនៅទីជម្រៅខាងវិញ្ញាណ
—ដើម្បីឱ្យយើងខ្ញុំអាចទទួលសិរីរុងរឿងនៃការមានព្រះជន្មរស់ឡើងវិញរបស់ព្រះអង្គ។ (បន្ទរ)

សូមព្រះមាតាលួងលោមអ្នកដែលរងទុក្ខ និងការពារយើងខ្ញុំ
—សូមឱ្យយើងខ្ញុំចេះលួងលោមអ្នកដទៃ ដូចព្រះអង្គបានលួងលោមយើងខ្ញុំដែរ។ (បន្ទរ)

នៅក្នុងទុក្ខលំបាករបស់ពួកគេ សូមព្រះអង្គធ្វើឱ្យគ្រីស្តបរិស័ទអាចចែករំលែកនូវទុក្ខលំបាករបស់ព្រះអង្គ
—ហើយសូមព្រះអង្គសម្តែងឫទ្ធានុភាពក្នុងជីវិតរស់នៅរបស់ពួកគេផង។ (បន្ទរ)

ព្រះអង្គបានបន្ទាបខ្លួនដោយការស្តាប់បង្គាប់ រហូតដល់សោយទិវង្គតនៅលើឈើឆ្កាងថែមទៀតផង
—សូមព្រះអង្គប្រទានព្រះអំណោយទាននៃការស្តាប់បង្គាប់ និងចិត្តស៊ូទ្រាំ ឱ្យអ្នកបម្រើព្រះអង្គ។ (បន្ទរ)

សូមព្រះអង្គបំផ្លាស់បំប្រែរូបកាយរបស់មនុស្សស្លាប់ ឱ្យទៅជារូបកាយដែលប្រកបដោយសិរីរុងរឿងដូចព្រះអង្គ
—ហើយសូមព្រះអង្គនាំយើងខ្ញុំឱ្យចូលរួមជាមួយពួកគេនៅថ្ងៃចុងក្រោយផង។ (បន្ទរ)

ធម៌ “ឱព្រះបិតា”

ពាក្យអធិដ្ឋាន

បពិត្រព្រះបិតាជាអម្ចាស់ ! នៅយប់នេះ ព្រះបុត្រាសព្វព្រះហឫទ័យបូជាព្រះជន្មព្រះអង្គ ដើម្បីឲ្យព្រះសហគមន៍ចេះរួមគ្នាថ្វាយសក្ការបូជានៃសម្ពន្ធមេត្រី ដែលនៅស្ថិតស្ថេរអស់កល្បជានិច្ច និងប្រទានជីវិតថ្មីឲ្យយើងខ្ញុំ។ សូមព្រះអង្គមេត្តាប្រោសឲ្យយើងខ្ញុំមានចិត្តស្រឡាញ់ព្រះអង្គ និងចេះស្រឡាញ់អ្នកដទៃ ដូចព្រះយេស៊ូបានស្រឡាញ់យើងខ្ញុំដែរ។ យើងខ្ញុំសូមអង្វរព្រះអង្គ ដោយរួមជាមួយព្រះយេស៊ូគ្រីស្ត ជាព្រះបុត្រាព្រះអង្គ និងជាព្រះអម្ចាស់ ដែលសោយរាជ្យរួមជាមួយព្រះអង្គ និងព្រះវិញ្ញាណដ៏វិសុទ្ធ អស់កល្បជាអង្វែងតរៀងទៅ។ អាម៉ែន!

ពិធីបញ្ចប់៖ ប្រសិនបើលោកបូជាចារ្យ ឬលោកឧបដ្ឋាកធ្វើជាអធិបតី លោកចាត់បងប្អូនឱ្យទៅដោយពោលថា ៖
សូមព្រះអម្ចាស់គង់ជាមួយបងប្អូន
ហើយគង់នៅជាមួយវិញ្ញាណរបស់លោកផង
សូមព្រះជាម្ចាស់ដ៏មានឫទ្ធានុភាពសព្វប្រការ ប្រទានព្រះពរដល់អស់បងប្អូន
គឺព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
អាម៉ែន។
សូមអញ្ជើញឱ្យបានសុខសាន្ត
សូមអរព្រះគុណព្រះជាម្ចាស់។
ពេលមានវត្តមានលោកបូជាចារ្យ ឬលោកឧបដ្ឋាក និងបុគ្គលម្នាក់សូត្រ ពាក្យអធិដ្ឋានពេលល្ងាច ៖
សូមព្រះអម្ចាស់ប្រទានព្រះពរ និងការពារយើងខ្ញុំឱ្យរួចផុតពីមារកំណាច ព្រមទាំងប្រទានជីវិតអស់កល្បជានិច្ចឱ្យយើងខ្ញុំ។
អាម៉ែន។

10 Views