ថ្ងៃសុក្រ ទី២៥ ខែមិថុនា ឆ្នាំ២០២៧

អត្ថបទទី១៖ សូមថ្លែងព្រះគម្ពីរកំណើត កណ ១៧,១.៩-១០.១៥-២២

កាលលោកអប្រាហាំអាយុកៅសិបប្រាំបួនឆ្នាំ ព្រះអម្ចាស់បង្ហាញព្រះអង្គឱ្យលោកឃើញ ហើយមានព្រះបន្ទូលមកលោកថា៖ «យើងជាព្រះដ៏មានតេជានុភាពសព្វ​ប្រការ! ចូរដើរតាមមាគ៌ារបស់យើងឱ្យបានល្អឥតខ្ចោះ!» ។ ព្រះជាម្ចាស់មានព្រះ​បន្ទូលមកលោកអប្រាហាំ​ថា៖ «អ្នកត្រូវគោរពតាមសម្ពន្ធមេត្រីរសបស់យើង គឺទាំងអ្នក ទាំងពូជពង្សអ្នកដែលកើតតាមក្រោយ គ្រប់តំណតរៀងទៅ ត្រូវគោរពតាម។​ នេះជាសញ្ញាសម្គាល់បញ្ជាក់ពីសម្ពន្ធមេត្រីដែលយើងចងជាមួយអ្នករាល់គ្នា គឺ​ប្រុសៗទាំងប៉ុន្មានដែលកើតក្នុងពូជពង្សអ្នក ត្រូវ​តែកាត់ស្បែកគ្រប់ៗគ្នា» ។ ព្រះជា​ម្ចាស់មានព្រះបន្ទូលមកលោកអប្រាហាំទៀតថា៖ « រីឯភរិយារបស់អ្នកវិញ នាងនឹង​មានឈ្មោះថា សារ៉ាវិញ (ឈ្មោះនេះមានន័យថា « រាជបុត្រី» )។ យើងនឹងឱ្យពរនាង ហើយយើងនឹងឱ្យអ្នកមានកូនប្រុសមួយដោយសារនាង។ យើងនឹងឱ្យពរនាង នាងនឹង​បង្កើតប្រជាជាតិជាច្រើន ហើយក៏មានស្តេចនឹងប្រសូតចេញពីនាងដែរ»។ លោក​អប្រាហាំក្រាបចុះឱនមុខដល់​ដី លោកអស់សំណើច ហើយនឹកក្នុងចិត្តថា៖ «តើមនុស្សអាយុមួយរយឆ្នាំដូចខ្ញុំនេះ អាចមានកូនទៅកើតឬ? រីឯនាងសារ៉ាដែលមានអាយុកៅសិបឆ្នាំទៅហើយ តើនាងនៅតែអាចបង្កើតកូនបានដែរឬ?» ។ លោកអប្រាហាំ​ទូលព្រះជាម្ចាស់ថា៖ «បើព្រះអង្គទុកឱ្យអ៊ីស្មាអែលមានជីវិតតទៅនោះក៏គ្រប់គ្រាន់ហើយ!» ។ តែព្រះជាម្ចាស់មានព្រះបន្ទូលថា៖ «ទេ! គឺសារ៉ាជាភរិយារបស់អ្នកទេតើ ដែលនឹងបង្កើតកូនប្រុសមួយឱ្យអ្នក។ អ្នកត្រូវដាក់ឈ្មោះកូននោះថា៖ “អ៊ីសាក”។ យើងនឹងចងសម្ពន្ធមេត្រីជាមួយកូននោះ និងជាមួយពូជពង្សរបស់វាដែលកើតមកតាមក្រោយ គឺជាសម្ពន្ធមេត្រីដែលស្ថិតស្ថេរជាដរាបតរៀងទៅ។ ចំពោះអ៊ីស្មាអែល​វិញ យើងបានឮពាក្យសុំរបស់អ្នកហើយ។ យើងនឹងឱ្យពរវា យើងនឹងធ្វើឱ្យវាមានកូនចៅច្រើនជាអនេក។ មានស្តេចដប់ពីរអង្គប្រសូតចេញពីវា ហើយយើងនឹងធ្វើ​ឱ្យមានប្រជាជាតិមួយដ៏ធំកើតចេញពីវាដែរ។ ប៉ុន្តែ យើងនឹងចងសម្ពន្ធមេត្រីជាមួយអ៊ីសាក គឺកូនដែលនាងសារ៉ានឹងបង្កើតឱ្យអ្នកនៅឆ្នាំក្រោយ ក្នុងខែនេះឯង»។ បន្ទាប់ពីព្រះជាម្ចាស់មានព្រះបន្ទូលសព្វគ្រប់ហើយ ព្រះអង្គក៏យាងឡើងទៅឆ្ងាយពីលោកអប្រាហាំ។

ទំនុកតម្កើងលេខ ១២៨ (១២៧),១-៥ បទកាកគតិ

ពិធីអបអរសាទរព្រះគម្ពីរដំណឹងល្អតាម មថ ៨,១៧

អាលេលូយ៉ា! អាលេលូយ៉ា!
ព្រះយេស៊ូបានទទួលយកភាពពិការរបស់យើង ហើយព្រះអង្គក៏ទទួលយកជំងឺរបស់យើងដែរ។ អាលេលូយ៉ា!

សូមថ្លែងព្រះគម្ពីរដំណឹងល្អតាមសន្តម៉ាថាយ មថ ៨,១-៤

កាលព្រះយេស៊ូយាងចុះពីលើភ្នំមកវិញ មានមហាជនជាច្រើននាំគ្នាដើរតាមព្រះអង្គ។ ពេលនោះ មានមនុស្សឃ្លង់ម្នាក់ចូលមកក្រាបថ្វាយបង្គំព្រះអង្គ ហើយទូលថា៖ «លោកម្ចាស់អើយ! ប្រសិនបើលោកយល់ព្រម សូមប្រោសខ្ញុំប្របាទឱ្យជាស្អាតបរិសុទ្ធផង»។ ព្រះយេស៊ូលូកព្រះហស្តទៅពាល់គាត់ ទាំងមានព្រះបន្ទូលថា៖ «ខ្ញុំយល់ព្រមហើយ ចូរឱ្យបានស្អាតបរិសុទ្ធចុះ»។ រំពេចនោះ គាត់ក៏បានជាស្អាតបរិសុទ្ធពីរោគឃ្លង់ភ្លាម។ ព្រះយេស៊ូមានព្រះបន្ទូលទៅគាត់ថា៖ «ចូរប្រយ័ត្នឱ្យមែនទែន កុំនិយាយប្រាប់ឱ្យនរណាដឹងរឿងនេះឡើយ ផ្ទុយទៅវិញ ត្រូវតែទៅបង្ហាញខ្លួន​ដល់លោកបូជាចារ្យ ហើយថ្វាយតង្វាយ ដូចលោកម៉ូសេបានបង្គាប់មក ដើម្បីជាសក្ខី​ភាពបញ្ជាក់ថា អ្នកបានជាមែន!»។