ភាគទី១
ហេតុអ្វីបានជាយើងជឿ?

១.តើយើងរស់នៅលើផែនដីនេះដើម្បីអ្វី?

យើងរស់នៅលើផែនដីនេះដើម្បីដឹង និងស្រលាញ់ព្រះជាម្ចាស់ ដើម្បីប្រព្រឹត្តល្អតាមព្រះហឫទ័យរបស់ព្រះជាម្ចាស់ និងដើម្បីចូលទៅក្នុងស្ថានបរមសុខនៅថ្ងៃណាមួយ។ [1-3,358]

២. ហេតុអ្វីបានជាព្រះជាម្ចាស់បង្កើតយើងមក?

ព្រះជាម្ចាស់បង្កើតយើងមកដោយសារព្រះអង្គសព្វព្រះហឫទ័យស្រលាញ់យើងដោយស្ម័គ្រចិត្ត និងមិនគិតពីផលប្រយោជន៍ផ្ទាល់ខ្លួនរបស់ព្រះអង្គឡើយ។ [1-3]

ជំពូកទី១
មនុស្សអាចស្គាល់ព្រះជាម្ចាស់បាន

៣.ហេតុអ្វីបានជាយើងត្រូវស្វែងរកព្រះជាម្ចាស់?

ព្រះជាម្ចាស់បានដាក់ក្នុងជម្រៅចិត្តរបស់មនុស្សនូវបំណងប្រាថ្នាចង់ស្វែងរក និងស្គាល់ព្រះជាម្ចាស់។ សន្ត អហ្គូស្ទីននិយាយថា ៖ "ព្រះជាម្ចាស់បានបង្កើតយើងមកដើម្បីព្រះអង្គ ហើយចិត្តទូលបង្គំនឹងមិនសម្រាក ដរាបណាបានសម្រាកយ៉ាងសុខសាន្តក្នុងអង្គព្រះជាម្ចាស់។ " បំណងប្រាថ្នាចង់ស្វែងរកព្រះជាម្ចាស់នេះ យើងហៅថា សាសនា​។ [27-30]

៤.តើយើងអាចប្រើវិចារណញាណ ដើម្បីដឹងថាព្រះជាម្ចាស់មានព្រះជន្មគង់នៅ (Existence) បានដែរឬទេ?

យើងអាចប្រើវិចារណញាណរបស់យើង ដើម្បីទទួលស្គាល់ថាព្រះជាម្ចាស់ពិតជាមានព្រះជន្មគង់នៅ (Existence) ពិតមែន។ [31-36,44-47]

៥.ហេតុអ្វីបានជាមានមនុស្សមួយចំនួនមិនទទួលស្គាល់វត្តមាន (Existence) របស់ព្រះជាម្ចាស់ ខណៈពេលដែលវិចារណញាណរបស់មនុស្សអាចដឹងថាព្រះជាម្ចាស់ពិតជាមានព្រះជន្មគង់នៅដូច្នេះ ?

ដើម្បីជឿលើព្រះជាម្ចាស់ដែលភ្នែកមនុស្សមិនអាចមើលឃើញបាននោះ គឺជាបញ្ហាប្រឈមរបស់មនុស្សយើង។ មានមនុស្សមិនតិចទេដែលបានបដិសេធ ឫមានមនុស្សខ្លះមិនចង់ទទួលស្គាល់វត្តមានរបស់ព្រះជាម្ចាស់ ដោយសារពួកគេមិនចង់ផ្លាស់ប្តូរជីវិតខ្លួនឯង។ ចំពោះអស់អ្នកដែលនិយាយថា ការជឿទៅលើព្រះជាម្ចាស់គឺជារឿងឥតប្រយោជន៍ នោះគ្រាន់តែជារបៀបនិយាយដោយខ្វះការពិចារណា ដោយសារពួកគេមិនចង់រវីរវល់អំពីបញ្ហានេះ។ [37-38]

៦.តើយើងអាចយល់ដឹង និងនិយាយអំពីព្រះជាម្ចាស់យ៉ាងជាក់ច្បាស់បានដែរឬទេ?​

ប្រាជ្ញាមនុស្សមានព្រំដែន មិនអាចយល់ដឹងអំពីព្រះជាម្ចាស់ដែលគ្មានព្រំដែនបានទេ ហើយឫទានុភាពរបស់ព្រះជាម្ចាស់ ក៏មិនអាចពណ៍នាសង្ខេបមកត្រឹមបញ្ញត្តិតូចមួយរបស់មនុស្សដែលមានព្រំដែននេះបានដែរ។ ប៉ុន្តែយើងអាចនិយាយត្រឹមត្រូវអំពីព្រះជាម្ចាស់បាន។ [39-43,48]

ជំពូកទី២
ព្រះជាម្ចាស់យាងមករកមនុស្ស

៧.ហេតុអ្វីបានជាព្រះជាម្ចាស់ត្រូវបង្ហាញព្រះអង្គ ដើម្បីឱ្យយើងអាចស្គាល់ព្រះអង្គបានដូច្នេះ?

វិចារណញ្ញាណរបស់មនុស្សអាចទទួលស្គាល់ព្រះជាម្ចាស់ពិតជាមានព្រះជន្មគង់នៅ (Existence) បាន ប៉ុន្តែមិនអាចសន្មត់យ៉ាងជាក់លាក់អំពីព្រះជាម្ចាស់បានទេ។ ព្រះជាម្ចាស់ពិតជាចង់ឱ្យមនុស្សដឹងថាព្រះអង្គជានរណា ដូច្នេះហើយបានជាព្រះអង្គបង្ហាញព្រះអង្គមកឱ្យមនុស្សស្គាល់។ [50-53,68-69]

៨.តើព្រះជាម្ចាស់បានបង្ហាញព្រះអង្គក្នុងសម្ពន្ធមេត្រីចាស់យ៉ាងណា?

ក្នុងសម្ពន្ធមេត្រីចាស់ ព្រះជាម្ចាស់បង្ហាញព្រះអង្គគឺជាព្រះដែលបានបង្កើតអ្វីៗសព្វសារពើដោយសេចក្តីស្រលាញ់ ហើយព្រះអង្គនៅតែរក្សាភក្តីភាពចំពោះមនុស្ស ទោះបីមនុស្សបានធ្លាក់ទៅប្រព្រឹត្តអំពើបាបឃ្លាតឆ្ងាយពីព្រះអង្គក៏ដោយ។ [54-64,70-72]

៩.តើព្រះជាម្ចាស់បានបង្ហាញអ្វីខ្លះដល់មនុស្ស នៅពេលព្រះអង្គបានចាត់ព្រះបុត្រារបស់ព្រះអង្គឱ្យមករកយើង?

នៅក្នុងអង្គព្រះគ្រីស្ត ព្រះជាម្ចាស់បានបង្ហាញព្រះអង្គដែលប្រកបដោយធម៌មេត្តាករុណា និងសេចក្តីស្រលាញ់យ៉ាងជ្រាលជ្រៅបំផុត។ [65-66,73]

១០.តើព្រះជាម្ចាស់បានបង្ហាញចប់សព្វហើយគ្រប់ឬនៅ? ឬមួយព្រះអង្គនៅតែបន្តបង្ហាញព្រះអង្គក្រោយពេលព្រះយេស៊ូបានយាងឡើងស្ថានបរមសុខ?

ព្រះជាម្ចាស់បានលះបង់អ្វីៗទាំងអស់ដើម្បីយាងមកក្នុងលោកនេះតាមរយៈព្រះយេស៊ូគ្រីស្ត ព្រះជាម្ចាស់មានព្រះបន្ទូលជាលើកចុងក្រោយតាមរយៈព្រះគ្រីស្ត តាមរយៈព្រះបន្ទូលរបស់ព្រះគ្រីស្តមនុស្សគ្រប់ជំនាន់អាចទទួលស្គាល់ថាព្រះជាម្ចាស់ជានរណា​ ហើយមនុស្សដឹងថាខ្លួនត្រូវធ្វើអ្វីដើម្បីទទួលបានការសង្គ្រោះ។ ​[ 66-67]

១១.ហេតុអ្វីបានជាយើងត្រូវតែប្រកាសជំនឿ?

យើងត្រូវតែប្រកាសជំនឿ ដោយសារព្រះយេស៊ូបានមានព្រះបន្ទូលថា៖ ˝ ចូរចេញទៅនាំមនុស្សគ្រប់ជាតិសាសន៍ឱ្យធ្វើជាសាវ័ក [……]˝ (មថ ២៨,១៩)។ [91]

១២.តើត្រូវធ្វើដូចម្តេចទើបយើងដឹងថាជាជំនឿយ៉ាងពិតប្រាកដ?

យើងអាចរកឃើញជំនឿដ៏ពិតប្រាកដនៅក្នុងព្រះគម្ពីរ និងការបញ្ជូនបន្តយ៉ាងរស់រវើករបស់ព្រះសហគមន៍។ [76,80-82,85-87,97,100]

១៣.តើព្រះសហគមន៍អាចមានការខុសឆ្គងស្តីអំពីជំនឿបានដែរឬទេ?

គ្រីស្តបរិស័ទទាំងអស់មិនអាចយល់ច្រលំអំពីជំនឿបានទេ ព្រោះព្រះយេស៊ូបានសន្យាជាមួយក្រុមសាវ័កថា ព្រះអង្គនឹងប្រទានព្រះអង្គមួយទៀត គឺព្រះវិញ្ញាណដែលសម្តែងសេចក្តីពិត​មកគង់នៅជាមួយយើង (​ យហ ១៤,១៧ )។ [80-82,85-87,92,100]

១៤.តើអ្វីៗដែលបានសរសេរនៅក្នុងព្រះគម្ពីរគឺជាសេចក្តីពិតមែនដែរឬទេ?

ព្រះគម្ពីរបង្រៀននូវសេចក្តីពិត ( សច្ចៈភាព) ច្បាស់លាស់ និងមិនអាចខុសឆ្គងបានទេ ដោយសារព្រះគម្ពីរត្រូវបានសរសេរក្រោមការបំភ្លឺរបស់ព្រះវិញ្ញាណដ៏វិសុទ្ធ ហើយព្រះជាម្ចាស់ផ្ទាល់គឺជាអ្នកនិពន្ធ។ ( មហាសន្និបាតវ៉ាទីកង់ទី២ ព្រះបន្ទូលរបស់ព្រះជាម្ចាស់ លេខ១១ )។ [103-107]

១៥.តើព្រះគម្ពីរអាចជាសេចក្តីពិតដូចម្តេចបាន បើក្នុងគម្ពីរមានសេចក្តីខ្លះមិនច្បាស់លាស់ផងដូច្នេះ ?

ព្រះគម្ពីរមិនមែនជាសៀវភៅប្រវត្តិសាស្រ្តដែលរៀបរាប់ជាក់លាក់ស្តីអំពីព្រឹត្តការណ៍ប្រវត្តិសាស្រ្តណាមួយ ឬរៀបរាប់អំពីពត៌មានណាមួយដែលទាក់ទងនឹងវិទ្យាសាស្រ្តនោះទេ។ អ្វីដែលសំខាន់គឺព្រះជាម្ចាស់ប្រើអ្នកនិពន្ធនាសម័យនោះដើម្បីសរសេរ ពួកគេចែករំលែកគំនិត វប្បធម៌របស់ពួកគេ វាអាចមានបញ្ហាខ្លះក្នុងសម័យកាលនោះ។ ប៉ុន្តែអ្វីដែលមនុស្សស្វែងយល់ចង់ដឹងអំពីព្រះជាម្ចាស់ និងការសង្គ្រោះគឺត្រូវបានរៀបរាប់យ៉ាងច្បាស់លាស់ និងមិនខុសឆ្គងនៅក្នុងព្រះគម្ពីរ។​[106-107,109]

១៦.តើត្រូវអានព្រះគម្ពីរយ៉ាងដូម្តេចឱ្យបានត្រឹមត្រូវ?

ត្រូវអានព្រះគម្ពីរដោយមានស្មារតីអធិដ្ឋាន មានន័យថាយើងសូមព្រះវិញ្ញាណដ៏វិសុទ្ធជួយបំភ្លឺយើង ដោយសារព្រះវិញ្ញាណគឺជាបុគ្គលដែលបានបំភ្លឺអ្នកនិពន្ធគម្ពីរទាំងអស់។ ព្រះគម្ពីរគឺពិតជាព្រះបន្ទូលរបស់ព្រះជាម្ចាស់ និងការបង្ហាញរបស់ព្រះជាម្ចាស់ចំពោះយើង។ [109-119,137]

១៧.តើព្រះគម្ពីរសម្ពន្ធមេត្រីចាស់មានអត្ថន័យចំពោះគ្រីស្តបរិស័ទយ៉ាងដូម្តេច?

ក្នុងព្រះគម្ពីរសម្ពន្ធមេត្រីចាស់ ព្រះជាម្ចាស់បង្ហាញព្រះអង្គឱ្យយើងស្គាល់តាមរយៈព្រះអង្គជាព្រះដែលបានបង្កើត និងថែរក្សាពិភពលោក ព្រះអង្គគឺជាអ្នកដឹកនាំ និងអប់រំមនុស្សលោក។ សៀវភៅផ្សេងៗក្នុងសម្ពន្ធមេត្រីចាស់ ក៏ជាព្រះបន្ទូលរបស់ព្រះជាម្ចាស់ និងជាព្រះគម្ពីរដ៏វិសុទ្ធ។ ប្រសិនបើមិនមានគម្ពីរសម្ពន្ធមេត្រីចាស់ទេ យើងនឹងមិនអាចយល់ពីព្រះគ្រីស្តក្នុងសម្ពន្ធមេត្រីថ្មីបានដែរ។ [121-123.128-130,140]

១៨.តើគម្ពីរសម្ពន្ធមេត្រីថ្មីមានអត្ថន័យចំពោះគ្រីស្តបរិស័ទយ៉ាងដូម្តេច?

ក្នុងសម្ពន្ធមេត្រីថ្មី ការបង្ហាញរបស់ព្រះជាម្ចាស់បានពេញលក្ខណៈ។ គម្ពីរដំណឹងល្អទាំងបួនកណ្ឌរួមមាន ម៉ាថាយ ម៉ាកូស លូកា និងយ៉ូហាន គឺជាចំណុចកណ្តាលនៃព្រះគម្ពីរ និងជាឃ្លាំងកំណប់ដែលមិនអាចកាត់ថ្លៃបានរបស់ព្រះសហគមន៍។ នៅក្នុងនោះព្រះគ្រីស្តបានបង្ហាញព្រះអង្គជានរណា ដែលបានយាងមក  រកមនុស្ស។ ក្នុងកណ្ឌគម្ពីរកិច្ចការគ្រីស្តទូត​ បង្ហាញឱ្យយើងអំពីការចាប់ផ្តើមរបស់ព្រះសហគមន៍ដើមដំបូង និងសកម្មភាពរបស់ព្រះវិញ្ញាណដ៏វិសុទ្ធនៅក្នុងព្រះសហគមន៍។ រីឯនៅក្នុងសារលិខិតរបស់គ្រីស្តទូតទាំងឡាយបានសរសេរទាក់ទងនឹងស្ថានភាពរស់នៅរបស់មនុស្សក្រោមពន្លឺរបស់ព្រះគ្រីស្ត។ ចុងក្រោយគឺកណ្ឌគម្ពីរវិវរណៈ ណែនាំឱ្យយើងមើលឃើញអំពីអវសានកាលនៃពិភពលោក។ [124-127,128-130,140]

១៩.តើព្រះគម្ពីរមានសារសំខាន់យ៉ាងដូម្តេចក្នុងព្រះសហគមន៍​?

ព្រះសហគមន៍ទទួលជីវិត និងកម្លាំងដែលមានប្រភពចេញមកពីព្រះគម្ពីរដ៏វិសុទ្ធ។ [103-104,131-133,141]

ជំពូកទី៣
មនុស្សឆ្លើយតបចំពោះព្រះជាម្ចាស់

២០.តើយើងអាចឆ្លើយតបទៅព្រះជាម្ចាស់បានយ៉ាងដូម្តេច?

យើងអាចឆ្លើយតបចំពោះព្រះជាម្ចាស់នៅពេលដែលយើងជឿទុកចិត្ត និងផ្ញើជីវិតទាំងស្រុងទៅលើព្រះអង្គ​។ [142-149]

២១.តើជំនឿជាអ្វី?

ជំនឿគឺជាការទទួលស្គាល់និងទុកចិត្តផ្ញើជីវិតទាំងស្រុង។ ជំនឿមានប្រាំពីរលក្ខណៈដូចខាងក្រោម៖

1. ជំនឿគឺជាការផ្តល់ឱ្យយ៉ាងពិសេសដែលមកពីព្រះជាម្ចាស់ យើងអាចទទួលបាននៅពេលយើងទូលសុំដោយចិត្តក្លៀវក្លា។
2. ជំនឿគឺជាអត្ថិថាមពល ដែលចាំបាច់សម្រាប់ការសង្គ្រោះ
3. ជំនឿ គ្មានការបង្ខិតបង្ខំ វាទាមទារឱ្យបុគ្គលនោះយល់ដឹងឱ្យបានច្បាស់លាស់នៅពេលដែល ឆ្លើយតបចំពោះការត្រាស់ហៅរបស់ព្រះជាម្ចាស់។
4. ជំនឿគឺដាច់ខាត ព្រោះព្រះយេស៊ូបានធានាអំពីរឿងនេះ
5. ជំនឿអាចពេញលក្ខណៈបាន លុះត្រាតែជំនឿត្រូវបានបង្ហាញតាមរយៈកិច្ចការមេត្តាករុណា
6. ជំនឿរីកចម្រើនតាមរយៈការស្តាប់ព្រះបន្ទូលរបស់ព្រះជាម្ចាស់ និងការសន្ទនាយ៉ាងរស់រវើករួមជាមួយព្រះអង្គក្នុងការអធិដ្ឋាន។
7. ជំនឿជួយឱ្យយើងអាចភ្លក់រស់ជាតិនៃអំណរសប្បាយនាស្ថានបរមសុខនាលោកកិយនេះបាន។

២២.តើជឿមានន័យដូចម្តេច?​

អស់អ្នកដែលជឿគឺបានរួមសហភាពជាមួយព្រះជាម្ចាស់ ហើយត្រៀមខ្លួនជាស្រេចក្នុងការទទួលនូវរាល់វិវរណៈ(ការបង្ហាញ)របស់ព្រះជាម្ចាស់ដែលបានបង្ហាញព្រះអង្គផ្ទាល់។ [150-152]

២៣.តើមានអ្វីដែលប្រឆាំងគ្នារវាងជំនឿ និងវិទ្យាសាស្រ្តដែរឬទេ?

គ្មានការប្រឆាំងគ្នារវាងជំនឿ និងវិទ្យាសាស្រ្តណាមួយដែលមិនអាចដោះស្រាយបាននោះទេ ពីព្រោះមិនអាចមានសេចក្តីពិតពីរក្នុងពេលតែមួយបានទេ។ [159]

២៤.តើជំនឿរបស់ខ្ញុំត្រូវមានទំនាក់ទំនងជាមួយព្រះសហគមន៍យ៉ាងដូចម្តេច ?

គ្មាននរណាម្នាក់អាចជឿតែម្នាក់ឯងប៉ុណ្ណោះបានទេ ក៏ដូចជាគ្មាននរណាម្នាក់ដែលរស់នៅតែឯងបានដែរ។ យើងទទួលជំនឿតាមរយៈព្រះសហគមន៍ ហើយប្រតិបត្តិជំនឿនេះដោយភាតរភាពរួមជាមួយអស់បងប្អូនដែលមានជំនឿទៅលើព្រះជាម្ចាស់ដែរ។ [166-169,181]

ភាគទី២
គ្រីស្តបរិស័ទប្រកាសជំនឿ

២៥.តើហេតុអ្វីបានជាជំនឿត្រូវការនិយមន័យ និងរូបមន្តដូច្នេះ?

ការប្រកាសជំនឿ មិនមែនជាការប្រកាសនូវពាក្យដែលគ្មានន័យ ប៉ុន្តែជាពាក្យដែលបង្ហាញនូវសេចក្តីពិត។ អស់រយៈពេលជាច្រើនសតវត្ស ខ្លឹមសារនៃជំនឿត្រូវបានកំណត់យ៉ាងជាក់លាក់នៅក្នុងធម៌ប្រកាសជំនឿ។ តាមរយៈធម៌ប្រកាសជំនឿ ជួយឱ្យយើងស្មឹងស្មាធិ៍ រិះគិតពិចារណា រៀនសូត្រ ចែករំលែក និងប្រតិបត្តិជំនឿក្នុងជីវិតរស់នៅប្រចាំថ្ងៃរបស់ខ្លួន។ [170-174]

២៦.តើធម៌ប្រកាសជំនឿជាអ្វី?

ធម៌ប្រកាសជំនឿគឺជារូបមន្ត ឬជាសេចក្តីសង្ខេបនៃជំនឿ ដើម្បីឱ្យគ្រីស្តបរិស័ទអាចរួមគ្នាប្រកាសជំនឿតែមួយបាន។ [185-188,192197]

២៧.តើធម៌ប្រកាសជំនឿមានកំណើតតាំងពីពេលណាមក?

ធម៌ប្រកាសជំនឿមានកំណើតតាំងពីសម័យរបស់ព្រះយេស៊ូ ព្រះអង្គបានបង្គាប់ឱ្យក្រុមសាវ័កជ្រមុជទឹកដល់អស់អ្នកដែលជឿ គឺអស់អ្នកនឹងហើយ​ដែលត្រូវប្រកាសជំនឿទៅលើព្រះជាម្ចាស់ដែលជាព្រះបិតា ព្រះបុត្រា និងព្រះវិញ្ញាណដ៏វិសុទ្ធ ( ព្រះត្រៃឯក )។

២៨.តើធម៌ប្រកាសជំនឿរបស់ក្រុមគ្រីស្តទូតនិយាយអំពីអ្វីខ្លះ?

ខ្ញុំជឿលើព្រះជាម្ចាស់ ជាព្រះបិតាដ៏មានឫទ្ធានុភាពសព្វប្រការ ជាព្រះបង្កើតមេឃនិងដី។

ខ្ញុំជឿលើព្រះយេស៊ូគ្រីស្ត ជាព្រះបុត្រាតែមួយនៃព្រះបិតា ហើយជាព្រះអម្ចាស់យើងខ្ញុំ។ ព្រះអង្គមានកំណើតជាមនុស្ស ដោយសារព្រះវិញ្ញាណដ៏វិសុទ្ធ ហើយទ្រង់បានប្រសូតពីព្រះនាងព្រហ្មចារិនីម៉ារី ព្រះអង្គបានសោយទុក្ខលំបាក នៅជំនាន់លោកប៉ុនពីឡាត។ ព្រះអង្គត្រូវគេឆ្កាង សោយទិវង្គត ហើយព្រះសពព្រះអង្គ ត្រូវគេបញ្ចុះក្នុងរូងថ្មមួយ។ ព្រះអង្គបានយាងចុះទៅស្ថានក្រោម លុះដល់ថ្ងៃទីបី ព្រះអង្គមានព្រះជន្មរស់ឡើងវិញ ពីចំណោមមនុស្សស្លាប់ ព្រះអង្គបានយាងឡើងស្ថានបរមសុខ ទៅគង់ខាងស្តាំព្រះជាម្ចាស់ជាព្រះបិតា ដ៏មានឫទ្ធានុភាពសព្វប្រការ។ ព្រះអង្គនឹងយាងមកវិញ ដើម្បីវិនិច្ឆ័យមនុស្សទាំងរស់ទាំងស្លាប់។

ខ្ញុំជឿលើព្រះវិញ្ញាណដ៏វិសុទ្ធ។ ខ្ញុំជឿលើព្រះសហគមន៍កាតូលិកដ៏វិសុទ្ធ និងសហភាពរវាងជនដ៏វិសុទ្ធទាំងឡាយ។ ខ្ញុំជឿថា មានការលើកលែងទោសមនុស្សឱ្យរួចពីបាប ហើយរូបកាយមនុស្សនឹងរស់ឡើងវិញ ព្រមទាំងមានជីវិតរស់នៅអស់កល្បជានិច្ចផង។ អាម៉ែន។

២៩.តើធម៌ប្រកាសជំនឿរបស់មហាសន្និបាតក្រុងនីសេ និងកុងស្តង់ទីណូបនិយាយអំពីអ្វីខ្លះ?

ខ្ញុំជឿលើព្រះជាម្ចាស់តែមួយព្រះអង្គ ជាព្រះបិតាដ៏មានឫទ្ធានុភាពសព្វប្រការ ជាព្រះបង្កើតមេឃនិងដី ទាំងអ្វីៗដែលមើលឃើញ និងមើលមិនឃើញ។

ខ្ញុំជឿលើព្រះអម្ចាស់យេស៊ូគ្រីស្តតែមួយ ជាព្រះបុត្រាតែមួយនៃព្រះជាម្ចាស់ ហើយកើតពីព្រះបិតាមុនសម័យកាលទាំងអស់។ ព្រះអង្គជាព្រះជាម្ចាស់ចេញពីព្រះជាម្ចាស់ ជាព្រះពន្លឺចេញពីព្រះពន្លឺ ជាព្រះជាម្ចាស់ដ៏ពិតប្រាកដ ចេញពីព្រះជាម្ចាស់ដ៏ពិតប្រាកដដែរ។ ព្រះអង្គទទួលព្រះជន្មពីព្រះបិតា ហើយមិនកកើតដូចសត្វលោកឡើយ ព្រះអង្គរួមសភាពជាមួយព្រះបិតា ហើយអ្វីៗសព្វសារពើក៏កើតមក ដោយសារព្រះអង្គដែរ។ ព្រះអង្គយាងមកពីស្ថានបរមសុខដើម្បីមនុស្សយើង និងដើម្បីសង្រ្គោះយើងខ្ញុំ។ ដោយសារព្រះវិញ្ញាណដ៏វិសុទ្ធ ព្រះអង្គបានទទួលរូបកាយពីព្រះនាងព្រហ្មចារិនីម៉ារី ហើយព្រះអង្គទៅជាមនុស្ស។ ព្រះអង្គត្រូវគេឆ្កាងនៅជំនាន់លោកប៉ុនពីឡាត ដើម្បីជាប្រយោជន៍ដល់យើងខ្ញុំ។ ព្រះអង្គសោយទិវង្គត ហើយព្រះសពព្រះអង្គត្រូវគេបញ្ចុះ។ លុះដល់ថ្ងៃទីបីព្រះអង្គមានព្រះជន្មរស់ឡើងវិញស្របតាមគម្ពីរ។ ព្រះអង្គយាងឡើងស្ថានបរមសុខ ទៅគង់ខាងស្តាំព្រះបិតា។ ព្រះអង្គនឹងយាងមកវិញយ៉ាងរុងរឿង ដើម្បីវិនិច្ឆ័យមនុស្សទាំងរស់ទាំងស្លាប់ ហើយព្រះរាជ្យព្រះអង្គ នឹងនៅស្ថិតស្ថេរឥតទីបញ្ចប់ឡើយ។

ខ្ញុំជឿលើព្រះវិញ្ញាណដ៏វិសុទ្ធ ជាព្រះអម្ចាស់ដែលប្រទានជីវិត ព្រះអង្គហូរចេញពីព្រះបិតា និងព្រះបុត្រា។ ព្រះអង្គទទួលការក្រាបថ្វាយបង្គំ និងលើកតម្កើងសិរីរុងរឿងស្មើនឹងព្រះបិតា និងព្រះបុត្រា។ ព្រះអង្គបានថ្លែងព្រះបន្ទូល តាមរយៈអស់លោកព្យាការី។

ខ្ញុំជឿលើព្រះសហគមន៍តែមួយដ៏វិសុទ្ធ និងកាតូលិក ដែលបន្តជំនឿពីក្រុមគ្រីស្តទូត។ ខ្ញុំប្រកាសថា មានអគ្គសញ្ញាជ្រមុជទឹកតែមួយ ដែលលើកលែងទោសឱ្យរួចពីបាប។ ខ្ញុំរង់ចាំពេលដែលមនុស្សស្លាប់នឹងរស់ឡើងវិញ និងជីវិតនៅលោកខាងមុខផង។ អាម៉ែន។

ជំពូកទី១
ខ្ញុំជឿលើព្រះជាម្ចាស់ជាព្រះបិតា

៣០.ហេតុអ្វីបានជាយើងជឿលើព្រះជាម្ចាស់តែមួយ?

យើងជឿលើព្រះជាម្ចាស់តែមួយប៉ុណ្ណោះ តាមរយៈព្រះគម្ពីរបានអះអាងថាមានតែព្រះជាម្ចាស់តែមួយព្រះអង្គប៉ុណ្ណោះ រីឯច្បាប់នៃតក្កវិជ្ជាវិញក៏ដូច្នោះដែរ គឺអាចមានតែព្រះជាម្ចាស់តែមួយព្រះអង្គប៉ុណ្ណោះដែរ ។ [200-202,228]

៣១.ហេតុអ្វីបានជាព្រះជាម្ចាស់ត្រូវដាក់ព្រះនាមឱ្យខ្លួនឯងដូច្នេះ?

ព្រះជាម្ចាស់ដាក់ព្រះនាមឱ្យខ្លួនឯង ដើម្បីឱ្យមនុស្សលោកយើងស្រួលក្នុងការទូលអង្វរទៅរកព្រះអង្គ។ [203-213,230-231]

៣២.តើមានន័យដូចម្តេចពេលដែលយើងហៅព្រះជាម្ចាស់ថាជាសេចក្តីពិតបែបនេះ?

˝ព្រះជាម្ចាស់ជាពន្លឺ គ្មានសេចក្តីងងឹតនៅក្នុងព្រះអង្គទាល់តែសោះ ˝ (១យហ ១,៥)។ ព្រះបន្ទូលរបស់ព្រះអង្គជាសេចក្តីពិត ( សុភ ៨,៧.២សាម ៧,២៨)។ ព្រះយេស៊ូបានអះអាងអំពីសេចក្តីពិតនៅមុខលោកប៉ុនពីឡាត˝​​​​​​​​​ខ្ញុំកើតមក ហើយខ្ញុំមកក្នុងលោកនេះដើម្បីផ្តល់សក្ខីភាពអំពីសេចក្តីពិត ˝(យហ ១៨,៣៧)។ [214-217]

៣៣.តើពេលដែលយើងហៅព្រះជាម្ចាស់ថាជាសេចក្តីស្រលាញ់នោះមានន័យដូចម្តេច?

ប្រសិនបើព្រះជាម្ចាស់ជាសេចក្តីស្រលាញ់ មានន័យថាគ្មានអ្វីដែលព្រះជាម្ចាស់បង្កើតមកដោយព្រះអង្គមិនយកចិត្តទុកដាក់ អោបក្រសោបដោយព្រះហឫទ័យប្រណីមេត្តារបស់ព្រះអង្គឡើយ។ ព្រះជាម្ចាស់មិនត្រឹមតែប្រកាសថាព្រះអង្គជាសេចក្តីស្រលាញ់ឡើយ តែព្រះអង្គបានធ្វើជាសាក្សីអំពីសេចក្តីស្រលាញ់ថែមទៀតផង ˝គ្មាននរណាមានសេចក្តីស្រលាញ់ខ្លាំងជាងអ្នកដែលស៊ូប្តូរជីវិតដើម្បីមិត្តសម្លាញ់របស់ខ្លួននោះឡើយ ˝ ( យហ ១៥,១៣ )។ [214-217]

៣៤.តើបងប្អូនត្រូវធ្វើអ្វីខ្លះនៅពេលដែលបងប្អូនបានស្គាល់ព្រះជាម្ចាស់?

នៅពេលដែលយើងបានស្គាល់ព្រះជាម្ចាស់ យើងត្រូវតែទុកព្រះជាម្ចាស់ជាអាទិភាពនៅក្នុងជីវិតរបស់យើង ធ្វើដូច្នេះទើបជីវិតរបស់យើងផ្លាស់ប្រែជាថ្មីបាន។​ យើងត្រូវតែធ្វើឱ្យអ្នកដទៃទទួលស្គាល់ថា គ្រីស្តបរិស័ទគឺជាអ្នកដែលពោរពេញទៅដោយសេចក្តីស្រលាញ់ ហើយថែមទាំងស្រលាញ់ខ្មាំងសត្រូវរបស់ខ្លួនទៀតផង។ [222-227,229]

៣៥.តើយើងជឿលើព្រះជាម្ចាស់តែមួយ ឬជឿលើព្រះជាម្ចាស់ទាំងបី?

យើងជឿលើព្រះជាម្ចាស់តែមួយ តែក្នុងព្រះជាម្ចាស់តែមួយនោះមានបីអង្គ (ព្រះត្រៃឯក )។˝ ព្រះជាម្ចាស់មិនតែឯងទេ ប៉ុន្តែព្រះអង្គរួមក្នុងសភាពតែមួយ។ ˝ (សម្តេចប៉ាប បេណេឌិចតូ ទី១៦ ថ្ងៃទី២២ ខែឧសភា ឆ្នាំ២០០៥)។ [232-236,249-256,261,265-266]

៣៦.តើយើងអាចធ្វើការសន្និដ្ឋានយ៉ាងជាក់លាក់អំពីព្រះជាម្ចាស់ជាព្រះត្រៃឯកបានដែរឬទេ?

មិនអាចបានទេ ព្រោះព្រះត្រៃឯកគឺជាការអាថ៍កំបាំងដែលហួសពីការគិត និងហួសពីប្រាជ្ញារបស់មនុស្ស យើងអាចដឹងបានដោយសារតែព្រះយេស៊ូគ្រីស្តទ្រង់បានបង្រៀនយើង។ [237]

៣៧.ហេតុអ្វីបានជាយើងត្រូវហៅព្រះជាម្ចាស់ជាព្រះបិតា?

យើងគោរពជាព្រះជាម្ចាស់ជាព្រះបិតា​ ដោយសារព្រះអង្គជាព្រះដែលបានបង្កើតអ្វីៗសព្វសារពើ ហើយព្រះអង្គបានថែរក្សាអ្វីៗដែលព្រះអង្គបានបង្កើតមកដោយក្តី​ស្រលាញ់។ ព្រះយេស៊ូ ជាព្រះបុត្រារបស់ព្រះជាម្ចាស់បានបង្រៀនយើងអំពីសេចក្តីនេះ។ ជាងនេះទៅទៀតព្រះអង្គបានបង្រៀនយើងឱ្យហៅព្រះបិតារបស់ព្រះអង្គជាព្រះព្រះបិតារបស់យើងដែរ ព្រះអង្គបានបង្រៀនយើងឱ្យទូលទៅកាន់ព្រះជាម្ចាស់ថា ៖ ˝ឱព្រះបិតាយើងខ្ញុំ....... ˝។ [238-240]

៣៨.តើព្រះវិញ្ញាណដ៏វិសុទ្ធជានរណា?

ព្រះវិញ្ញាណដ៏វិសុទ្ធគឺជាអង្គទីបីក្នុងព្រះត្រៃឯក ព្រះអង្គជាព្រះជាម្ចាស់ ដែលមានឫទ្ធានុភាពស្មើនឹងព្រះបិតា​ និងព្រះបុត្រាដែរ។ [243-248,263-264]

៣៩.តើព្រះយេស៊ូជាព្រះជាម្ចាស់? តើព្រះអង្គស្ថិតនៅក្នុងព្រះត្រៃឯកដែរ?

ព្រះយេស៊ូអ្នកភូមិណាសារ៉េតគឺជាអង្គព្រះបុត្រា គឺជាអង្គទីពីរក្នុងព្រះត្រៃឯកដែលយើងហៅព្រះអង្គរៀងរាល់ពេលយើងធ្វើសញ្ញាឈើឆ្កាង៖ ˝ក្នុងព្រះនាមព្រះបិតា ព្រះបុត្រា និងព្រះវិញ្ញាណដ៏វិសុទ្ធ˝ (មថ ២៨,១៩)។ [243-260]

៤០.តើព្រះជាម្ចាស់មានឫទា្ធនុភាពសព្វប្រការ ដែលអាចធ្វើអ្វីៗបានទាំងអស់ឬយ៉ាងណា?

ចំពោះព្រះជាម្ចាស់ ˝គ្មានការអ្វីដែលព្រះអង្គធ្វើមិនកើតនោះឡើយ ˝ (លក ១,៣៧)។ ព្រះអង្គប្រកបដោយឫទ្ធានុភាពសព្វប្រការ។ [268-278]

៤១.តើវិទ្យាសាស្រ្តអាចបណ្តាលឱ្យព្រះជាម្ចាស់ដែលជាព្រះបង្កើតបាត់បង់ឫទ្ធានុភាពដែលឬទេ?

មិនអាចបានទេ ពាក្យថា ៖ ព្រះជាម្ចាស់ជាព្រះបង្កើតពិភពទាំងមូល មិនមែនជាពាក្យដែលផ្អែកទៅលើវិទ្យាសាស្ត្រហួសសម័យនោះទេ។ នេះជាពាក្យដែលផ្អែកទៅលើទេវវិជ្ជា មានន័យបញ្ជាក់អំពីភាពដ៏សក្ការៈរបស់ព្រះជាម្ចាស់ ហើយអ្វីៗទាំងអស់មានប្រភពចេញមកពីព្រះអង្គ។ [282-289]

៤២.តើយើងអាចទទួលទ្រឹស្តីអំពីការផ្លាស់ប្តូរ (Evolution) ហើយនៅតែជឿលើព្រះជាម្ចាស់ដែលជាព្រះបង្កើតបានដែរឬទេ?

ប្រាកដជាបាន ទោះបីទាំងពីរនេះមានលក្ខណៈខុសពីគ្នាក្តី។ ជំនឿជាអ្នកបើកផ្លូវឱ្យវិទ្យាសាស្រ្តក្នុងការរុករកនូវសម្មតិកម្មផ្សេងៗ។ [282-289]

៤៣.តើពិភពលោកយើងនេះកើតឡើងដោយចៃដន្យមែនទេ?

ពិភពលោកយើងនេះមិនមែនកើតឡើងដោយចៃដន្យទេ គឺព្រះជាម្ចាស់ជាប្រភពនៃកំណើតពិភពលោក។ ពិភពលោកមិនមែនជាលទ្ធផលនៃដំណើរការគ្មានគោលដៅនោះទេ ដោយសារតែយើងមើលឃើញពិភពលោកនេះពោរពេញដោយសណ្តាប់ធ្នាប់ និងមានគោលដៅច្បាស់លាស់។  [295-301,317-318,320]

៤៤.តើនរណាជាអ្នកបង្កើតពិភពលោក?

មានតែព្រះជាម្ចាស់តែមួយព្រះអង្គគត់ដែលបានបង្កើត ព្រះអង្គមិនស្ថិតក្រោមពេលវេលា និងទីកន្លែងទេ ព្រះអង្គបានបង្កើតពិភពលោកចេញពីចំណុចសូន្យ ហើយប្រោសឱ្យអ្វីៗទាំងអស់មានអត្ថិភាព(exists) អ្វីៗទាំងអស់ដែលមានអត្ថិភាព(exists)គឺស្ថិតនៅក្រោមអំណាចរបស់ព្រះអង្គ អ្វីទាំងអស់មានអត្ថិភាពដោយសារតែព្រះជាម្ចាស់សព្វព្រះហឫទ័យបែបនេះ។ [290-292,316]

៤៥.តើច្បាប់ធម្មជាតិ និងប្រពន្ធ័ធម្មជាតិក៏ជាផ្នែកមួយដែលព្រះជាម្ចាស់បានបង្កើតឬ?

ប្រាកដណាស់ ច្បាប់ធម្មជាតិ និងប្រពន្ធ័ធម្មជាតិនៃអ្វីៗទាំងអស់ក៏ជាការបង្កើតរបស់ព្រះជាម្ចាស់ដែរ។ [339-346,354]

៤៦.ហេតុអ្វីបានជាកណ្ឌគម្ពីរកំណើតពិភពលោកបានរៀបរាប់ដំណើរនៃការបង្កើតលោករបស់ព្រះជាម្ចាស់ក្នុងរយៈពេលប្រាំមួយថ្ងៃដូច្នេះ?

នេះជារបៀបនិយាយក្នុងគោលបំណងលើកកម្ពស់នូវថ្ងៃទីប្រាំពីរ បន្ទាប់ពីប្រាំមួយថ្ងៃដែលបានធ្វើការ (កណ១,២-៣)។ ជាពិសេសគឺជាការបង្ហាញអំពីការបង្កើតដែលល្អប្រសើរ ស្រស់ស្អាត និងការរៀបចំតាមលំដាប់លំដោយប្រកបដោយប្រាជ្ញាដ៏ឈ្លាសវៃរបស់របស់ព្រះជាម្ចាស់។ [337-342]

៤៧.ហេតុអ្វីបានជាព្រះជាម្ចាស់ត្រូវការសម្រាកនៅថ្ងៃទីប្រាំពីរ?

ព្រះជាម្ចាស់ឈប់សម្រាកនៅថ្ងៃទីប្រាំពីរចង់បង្ហាញអំពីការបង្ហើយកិច្ចការដែលព្រះអង្គបង្កើត គឺចង់បញ្ជាក់ថា កិច្ចការនេះទៅហួសការខិតខំប្រឹងប្រែងរបស់មនុស្ស។ [349]

៤៨.ហេតុអ្វីបានជាព្រះជាម្ចាស់បានបង្កើតពិភពលោក?

ពិភពលោកត្រូវបានព្រះជាម្ចាស់បង្កើតមកដើម្បីលើកតម្កើងសិរីរុងរឿងរបស់ព្រះអង្គ។ ( មហាសន្និបាត វ៉ាទីកង់១ )។ [293-294,319]

ឧបការគុណរបស់ព្រះជាម្ចាស់

 ៤៩.តើព្រះជាម្ចាស់បានណែនាំ និងគ្រប់គ្រងជីវិតរបស់យើងដែលឬយ៉ាងណា?  

ព្រះជាម្ចាស់ណែនាំមនុស្សក្នុងភាពអាថ៍កំបាំងមួយ ព្រះអង្គណែនាំអ្វីៗទាំងអស់នៅលើមាគ៌ារបស់ព្រះអង្គ ដែលមានតែព្រះអង្គតែមួយគត់ទើបជ្រាបអំពីរឿងនេះ។ មិនអាចមានសត្វលោកណាដែលព្រះអង្គបានបង្កើតមកចេញផុតពីព្រះហស្ថរបស់ព្រះអង្គបានឡើយ។ [302-305]

៥០.តើមនុស្សមានមុខងារអ្វីនៅក្នុងឧបការគុណរបស់ព្រះជាម្ចាស់?

ព្រះជាម្ចាស់បានអញ្ចើញមនុស្សឱ្យចូលរួមនៅក្នុងគម្រោងការណ៍នៃការបង្កើតរបស់ព្រះអង្គ។ មនុស្សអាចបដិសេធនូវការត្រាស់ហៅដ៏វិសេសវិសាលនេះបាន ប៉ុន្តែមានសុភមង្គលពន់ពេកណាស់នៅពេលដែលយើងក្លាយទៅជាឧបករណ៍នៃសេចក្តីស្រលាញ់របស់ព្រះអង្គ។ [307-308]

៥១. បើព្រះជាម្ចាស់ជ្រាបនូវអ្វីៗសព្វសារពើ និងមានឫទ្ធានុភាពសព្វប្រការអាចធ្វើអ្វីៗបានទាំងអស់ដូច្នេះ ហេតុអ្វីបានជាមានសេចក្តីអាក្រក់?

ព្រះជាម្ចាស់អាចទាញយកសេចក្តីល្អចេញពីសេចក្តីអាក្រក់បាន ព្រះអង្គអាចធ្វើឱ្យសេចក្តីអាក្រក់នេះបង្កើតផលផ្លែល្អក៏ថាបាន ( សន្ត ថូម៉ាស អាគីណាស )។ [309-314,324]

ព្រះជាម្ចាស់បង្កើតមេឃ និងដី

៥២.តើអ្វីទៅជាមេឃ?

មេឃគឺជាស្ថានដែលព្រះជាម្ចាស់គង់នៅ ជាកន្លែងស្នាក់នៅរបស់ទេវទូត និងសន្តបុគ្គលទាំងឡាយ និងជាទីដៅនៃការបង្កើត។ អំពីពាក្យ មេឃ និងដី មានន័យសំដៅទៅលើអ្វីដែលព្រះជាម្ចាស់បានបង្កើតយ៉ាងជាក់លាក់។ [325-327]

៥៣.តើអ្វីទៅជាស្ថាននរក?

ស្ថាននរក តាមជំនឿរបស់យើងគឺជាស្ថានភាពមួយដែលមនុស្សបានកាត់ផ្តាច់ទំនាក់ទំនងជាមួយព្រះជាម្ចាស់។ នៅពេលមនុស្សបានបដិសេធចំពោះសេចក្តីស្រលាញ់របស់ព្រះជាម្ចាស់ មិនចង់រស់នៅក្នុងសេចក្តីស្រលាញ់នោះ គឺមានន័យថាពួកគេបានជ្រើសរើសស្ថាននរក។ [1033-1036]

៥៤.តើទេវទូតជានរណា?

ទេវទូតគឺជាវិញ្ញាណបរិសុទ្ធដែលព្រះជាម្ចាស់បានបង្កើតមក មានទាំងឆន្ទៈ និងការយល់ដឹងដូចមនុស្សដែរ ប៉ុន្តែទេវទូតមិនមានរូបកាយទេ មិនស្លាប់ និងពិសេសគឺយើងមិនអាចមើលឃើញបានទេ។ ទេវទូតទាំងអស់មានជីវិតនៅចំពោះព្រះភ័ក្ត្រព្រះជាម្ចាស់  ហើយជាអ្នកបញ្ជូនឆន្ទៈ និងការការពារពីព្រះជាម្ចាស់មកកាន់មនុស្ស។ [328-333,350-351]

៥៥.តើយើងអាចធ្វើការទំនាក់ទំនងជាមួយទេវទូតបានទេ?​

យើងអាចសុំជំនួយពីសំណាក់ទេវទូតទាំងឡាយដើម្បីជួយអង្វរព្រះជាម្ចាស់ឱ្យយើង។ [334-336,352]

ព្រះជាម្ចាស់បង្កើតមនុស្ស

៥៦.តើមនុស្សមានទីតាំងសំខាន់នៅក្នុងការបង្កើតរបស់ព្រះជាម្ចាស់ដែរឬទេ?

មនុស្សគឺជាកំពូលនៃការបង្កើតរបស់ព្រះជាម្ចាស់ ដោយសារព្រះជាម្ចាស់បង្កើតមនុស្សជារូបតំណាងរបស់ព្រះអង្គ (កណ​១,២៧)។ [343-344,353]

៥៧.តើមនុស្សត្រូវប្រព្រឹត្តចំពោះសត្វលោក និងធម្មជាតិផ្សេងៗដែលព្រះជាម្ចាស់បានបង្កើតយ៉ាងដូចម្តេច?

មនុស្សត្រូវការលើកតម្កើងព្រះជាម្ចាស់ក្នុងធម្មជាតិដែលព្រះអង្គបានបង្កើតមក ហើយត្រូវថែរក្សាដោយការទទួលខុសត្រូវ។ មនុស្ស សត្វ រុក្ខជាតិ សុទ្ធតែជាការបង្កើតរបស់ព្រះជាម្ចាស់  ព្រះអង្គបានបង្កើតអ្វីៗទាំងអស់នេះមកដោយសារសេចក្តីស្រលាញ់  ដូច្នេះហើយការស្រលាញ់សត្វលោកគឺជាមនោសញ្ចេតនាដ៏ជ្រាលជ្រៅរបស់មនុស្ស។ [344-354]

៥៨.តើមានន័យដូចម្តេចដែលថាមនុស្សត្រូវបានបង្កើតមកជារូបតំណាងរបស់ព្រះជាម្ចាស់ ?

មនុស្សមិនមែនជាកម្មវត្ថុ ដូចរុក្ខជាតិ សត្វ ដែលមិនមានវិញ្ញាណ មនុស្សមានវិញ្ញាណ ដែលជាទីកន្លែងសក្ការៈក្នុងការបង្កើតទំនាក់ទំនងយ៉ាងជិតស្និទ្ធជាមួយព្រះជាម្ចាស់ ជាងសត្វលោកផ្សេងៗទៀត។ មានតែមនុស្សប៉ុណ្ណោះដែរមានសមត្ថភាពក្នុងការទទួលស្គាល់ព្រះជាម្ចាស់ ជាព្រះដែលបានបង្កើត និងជាព្រះដែលស្រលាញ់មនុស្ស។  [355-357,380]

៥៩.ហេតុអ្វីបានជាព្រះជាម្ចាស់បង្កើតមនុស្ស?

ព្រះជាម្ចាស់បានបង្កើតអ្វីៗសព្វសារពើគឺដើម្បីមនុស្ស។ មនុស្សគឺជាការបង្កើតតែមួយគត់នៅលើផែនដីដែលព្រះជាម្ចាស់បានបង្កើតមកដើម្បីជាប្រយោជន៍ដល់មនុស្ស (អំណរ និងសេចក្តីសង្ឃឹម ២៤,៣) ព្រះជាម្ចាស់បង្កើតមនុស្សដើម្បីឱ្យមនុស្សមានសុភមង្គលលុះត្រាតែមនុស្សទទួលស្គាល់ ស្រលាញ់ បម្រើព្រះជាម្ចាស់ និងរស់នៅដោយដឹងគុណចំពោះព្រះអង្គបានបង្កើតខ្លួនមក។ [358]

៦០.ហេតុអ្វីបានជាព្រះយេស៊ូជាគម្រូដ៏អស្ចារ្យនៅលើលោកនេះ ?

ព្រះយេស៊ូគ្រីស្តតែមួយគត់ដែលបានបង្ហាញឱ្យយើងស្គាល់សភាពរបស់ព្រះជាម្ចាស់ និងស្គាល់អំពីគំនិតយ៉ាងពិតប្រាកដរបស់មនុស្ស។ [358-359,381]

៦១.តើអ្វីទៅដែលនាំឱ្យមនុស្សមានសិទ្ធិស្មើគ្នា ?

មនុស្សទាំងអស់មានសិទ្ធិស្មើគ្នា ដោយសារមនុស្សកើតចេញពីប្រភពតែមួយដូចគ្នា ក្នុងសេចក្តីស្រលាញ់នៃការបង្កើតរបស់ព្រះជាម្ចាស់។ មនុស្សទាំងអស់ត្រូវបានទទួលការសង្គ្រោះក្នុងអង្គព្រះយេស៊ូគ្រីស្តតែមួយដូចគ្នា ហើយមនុស្សទាំងអស់អាចឆ្ពោះទៅរកសុភមង្គលអស់កល្បជានិច្ចរបស់ខ្លួនក្នុងអង្គព្រះជាម្ចាស់បានដូចគ្នា។ [306-361]

៦២.តើអ្វីទៅជាព្រលឹង?

ព្រលឹងណែនាំឱ្យបុគ្គលម្នាក់ៗក្លាយជាមនុស្ស។ នេះគឺជាគោលការណ៍នៃជីវិតខាងផ្លូវវិញ្ញាណ  និងមានលក្ខណៈស៊ីជម្រៅក្នុងខ្លួនមនុស្ស។ ព្រលឹងធ្វើឱ្យរូបកាយមនុស្សរស់រវើក ដោយសារព្រលឹងមនុស្សអាចទទួលស្គាល់​ ˝ អត្ត ˝ របស់ខ្លួន ដើម្បីអាចឈរនៅចំពោះព្រះភ័ក្រ្តព្រះជាម្ចាស់ជាបុគ្គលម្នាក់ដែលគ្មានអ្វីអាច    មកជំនួសបាន។ [362-365,382]

៦៣.តើព្រលឹងមនុស្សមកពីណា?

ព្រលឹងមនុស្សត្រូវបានព្រះជាម្ចាស់ជាអ្នកបង្កើតដោយផ្ទាល់ មិនមែនជាផលិតផលដែលកើតចេញមកពីឪពុកម្តាយរបស់ខ្លួននោះទេ។ [366-f368,382]

៦៤.ហេតុអ្វីបានជាព្រះជាម្ចាស់បង្កើតមនុស្សជាបុរស និងជាស្ត្រី?

ព្រះជាម្ចាស់គឺជាសេចក្តីស្រលាញ់ និងជាលំនាំនៃជីវិតដែលរួបរួមគ្នា។ ព្រះជាម្ចាស់បានបង្កើតមនុស្សជាបុរស និងជាស្រ្តី ដើម្បីឱ្យគេទាំងពីរនាក់ជារូបតំណាងនៃសភាពរបស់ព្រះអង្គ។ [369-373,383]

៦៥.តើព្រះសហគមន៍គិតយ៉ាងដូចម្តេចចំពោះអស់អ្នកដែលស្រលាញ់ភេទដូចគ្នា?

ព្រះសហគមន៍ជឿថា នៅក្នុងលំដាប់លំដោយនៃការបង្កើតរបស់ព្រះជាម្ចាស់ ព្រះអង្គបង្កើតមនុស្សប្រុស និងស្រីដើម្បីឱ្យពួកគេត្រូវការគ្នា បំពេញគ្នាទៅវិញទៅមក រួបរួមគ្នាដើម្បីបន្តជីវិត បង្កើតកូនចៅ។ នេះជាមូលហេតុដែលព្រះសហគមន៍មិនអាចទទួលយកបាននូវសេចក្តីស្រលាញ់រវាងភេទដូចគ្នា ក៏ប៉ុន្តែគ្រីស្តបរិស័ទទាំងអស់ត្រូវតែគោរព និងស្រលាញ់មនុស្សទាំងអស់ មិនត្រូវវិនិច្ឆ័យទៅលើចំណង់ផ្លូវភេទរបស់ពួកគេនោះទេ ដោយសារមនុស្សទាំងអស់ត្រូវបានព្រះជាម្ចាស់គោរពនិងស្រលាញ់ដូចគ្នា។ [2358-2359]

៦៦.តើក្នុងគម្រោងការណ៍របស់ព្រះជាម្ចាស់ ព្រះអង្គសព្វព្រះហឫទ័យឱ្យមនុស្សរងទុក្ខលំបាក និងស្លាប់ឬយ៉ាងណា?

ព្រះជាម្ចាស់មិនបានសព្វព្រះហឫទ័យឱ្យមនុស្សរងទុក្ខលំបាក និងស្លាប់នោះទេ។ តាំងពីដើមរៀងមក ព្រះអង្គចង់ឱ្យមនុស្សរស់នៅក្នុងស្ថានបរមសុខ ទទួលជីវិតអស់កល្បជានិច្ច និងរស់នៅក្នុងសេចក្តីសុខសាន្តរវាងព្រះជាម្ចាស់ និងមនុស្ស រួមនឹងបរិស្ថានជុំវិញខ្លួន និងរវាងបុរស និងស្រ្តី។ [374-379,384,400]

មនុស្សក្លាយខ្លួនជាអ្នកបាប

៦៧.តើបាបជាអ្វី?

បាបគឺជាការបដិសេធព្រះជាម្ចាស់ និងមិនព្រមទទួលសេចក្តីស្រលាញ់របស់ព្រះអង្គ និងការមិនគោរព វិន័យរបស់ព្រះជាម្ចាស់ផងដែរ។ [385-390]

៦៨.តើអ្វីទៅជាអំពើបាបដើម? តើអំពើបាបដើមរបស់អដាំ និងនាងអេវ៉ាជះឥទ្ធិពលអ្វីខ្លះដល់យើង?

តាមន័យចង្អៀត បាបគឺជាកំហុសដែលជាប់ពាក់ព័ន្ធទៅនឹងការទទួលខុសត្រូវរបស់បុគ្គលម្នាក់ៗ។ នៅពេលដែលយើងនិយាយពីអំពើបាបដើម មិនមានន័យថាគឺជាអំពើបាបរបស់បុគ្គលម្នាក់ៗទេ តែចង់សំដៅទៅលើស្ថានភាពខូចខាតមួយដែលមនុស្សគ្រប់រូបត្រូវបានទទួលនៅពេលកើតមក ទោះបីទារកនោះមិនទាន់បានប្រព្រឹត្តអំពើបាបផ្ទាល់ក៏ដោយ ប៉ុន្តែជាការបញ្ជូនបន្តពីឪពុកម្តាយដើម។ [388-389,402-404]

៦៩.តើមនុស្សត្រូវបានបង្ខំឱ្យប្រព្រឹត្តអំពើបាបដោយសារអំពើបាបដើមមែនឬទេ?

ទេមិនមែនទេ ទោះបីមនុស្សត្រូវបានរងរបួសដោយសារអំពើបាបដើមរបស់ឪពុកម្តាយដើម និងផ្អៀងទៅរកការប្រព្រឹត្តអំពើបាបក៏ដោយ ក៏ប៉ុន្តែដោយសារតែព្រះហឫទ័យប្រណីសន្តោសរបស់ព្រះជាម្ចាស់ មនុស្សអាចមានសមត្ថភាពដើម្បីប្រព្រឹត្តអំពើល្អបាន។ [405]

៧០.តើព្រះជាម្ចាស់នាំមនុស្សយើងចេញពីចរន្តនៃសេចក្តីអាក្រក់ដោយរបៀបណា?

ព្រះជាម្ចាស់មិនអាចនៅស្ងៀមដោយទតឃើញមនុស្សបំផ្លាញខ្លួនឯង និងអ្វីដែលនៅជុំវិញខ្លួនមនុស្សដោយចង្វាក់នៃអំពើបាបពីមួយថ្ងៃទៅមួយថ្ងៃបាននោះទេ។ ព្រះជាម្ចាស់បានចាត់ព្រះយេស៊ូគ្រីស្តដែលជាព្រះបុត្រារបស់ព្រះអង្គឱ្យយាងមកសង្គ្រោះមនុស្ស ដោយសង្គ្រោះមនុស្សចេញពីអំណាចនៃអំពើបាប។ [410-412,420-421]

ជំពូកទី២
ខ្ញុំជឿលើព្រះយេស៊ូគ្រីស្តជាព្រះបុត្រាតែមួយនៃព្រះបិតា

៧១.ហេតុអ្វីបានជាសៀវភៅដែលសរសេរអំពីព្រះយេស៊ូត្រូវបានហៅថាជាគម្ពីរដំណឹងល្អ ?

បើគ្មានគម្ពីរដំណឹងល្អទេ យើងមិនអាចយល់ដឹងអំពីសេចក្តីស្រលាញ់របស់ព្រះជាម្ចាស់ដែលបានស្រលាញ់មនុស្ស រហូតដល់ចាត់ព្រះបុត្រារបស់ព្រះអង្គឱ្យមកយើង ទោះបីមនុស្សយើងបានប្រព្រឹត្តអំពើបាបក៏ដោយ។ ព្រះបុត្រាបានយាងមកក្នុងលោកនេះ ដើម្បីនាំមនុស្សយើងឱ្យត្រឡប់ទៅរួមរស់ជាមួយព្រះអង្គក្នុងភាតរភាពអស់កល្បជានិច្ច។ [422-429]

៧២.តើឈ្មោះយេស៊ូមានន័យដូចម្តេច?

ក្នុងភាសារហេប្រឺ ឈ្មោះយេស៊ូមានន័យថា សង្គ្រោះ។ [430-435,452]

៧៣.ហេតុអ្វីបានជាយើងហៅព្រះយេស៊ូជាព្រះគ្រីស្ត?

តាមទម្រង់យ៉ាងខ្លីដែលហៅ ព្រះយេស៊ូជាព្រះគ្រីស្ត គឺចង់សំដៅទៅលើស្នូលនៃជំនឿរបស់គ្រីស្តបរិស័ទ។ ព្រះយេស៊ូជាកូនរបស់ជាងឈើនៅភូមិណាសារ៉ែត ជាព្រះមេស្ស៊ីនិងជាព្រះសង្គ្រោះដែលមនុស្សលោកទន្ទឹងរង់ចាំតាំងពីយូរណាស់មកហើយ។ [436-440,453]

៧៤.តើមានអត្ថន័យដូចម្តេចនៅពេលយើងហៅព្រះយេស៊ូជាព្រះបុត្រាតែមួយនៃព្រះជាម្ចាស់?

នៅពេលព្រះយេស៊ូបានប្រកាសខ្លួនថាជាព្រះបុត្រាតែមួយនៃព្រះជាម្ចាស់ (យហ ៣,១៦) ដែលលោកសិលា និងសាវ័កឯទៀតៗបានធ្វើជាសាក្សីអំពីសេចក្តីនេះ គឺចង់បង្ហាញថា ក្នុងចំណោមមនុស្សលោកទាំងអស់ មានតែព្រះយេស៊ូទេដែលលើសមនុស្សទាំងអស់ក្នុងទំនាក់ទំនងជាមួយព្រះជាម្ចាស់ជាព្រះបិតា​របស់ព្រះអង្គ។ [441445,454]

៧៥.ហេតុអ្វីបានជាគ្រីស្តបរិស័ទហៅព្រះយេស៊ូថាជាព្រះអម្ចាស់ ?

˝អ្នករាល់គ្នាហៅខ្ញុំថាព្រះគ្រូ និងព្រះអម្ចាស់ នោះត្រូវមែន គឺខ្ញុំហ្នឹងហើយ។˝ (យហ ១៣,១៣)។ [446-451,455]

៧៦.ហេតុអ្វីបានជាព្រះជាម្ចាស់ចាប់កំណើតជាមនុស្សក្នុងអង្គព្រះយេស៊ូ?

˝ព្រះអង្គយាងមកពីស្ថានបរមសុខដើម្បីមនុស្សយើង និងដើម្បីសង្រ្គោះយើងខ្ញុំ។ ˝ (ធម៌ប្រកាសជំនឿក្រុងនីសេ)។  ​[456-460]

៧៧.តើមានន័យដូចម្តេចនៅពេលយើងនិយាយថាព្រះយេស៊ូគ្រីស្តជាព្រះជាម្ចាស់យ៉ាងពិតប្រាកដផង និងជាមនុស្សយ៉ាងពិតប្រាកដផងដូច្នេះ?

ក្នុងអង្គព្រះយេស៊ូ ព្រះជាម្ចាស់ទៅជាមនុស្សដូចជាយើងរាល់គ្នា និងជាបងប្អូនរបស់យើង។ ទោះបីជាយ៉ាងនេះក្តី ខណពេលជាមួយគ្នាព្រះយេស៊ូក៏ពិតជាព្រះជាម្ចាស់យ៉ាងពិតប្រាកដ និងជាព្រះជាម្ចាស់របស់យើងរាល់គ្នា។ មហាសន្និបាត ខាសេដូនឆ្នាំ៤៥១ បានបង្រៀនយើងថា សភាពជាព្រះ និងសភាពជាមនុស្សត្រូវបានរួបរួមក្នុងអង្គព្រះយេស៊ូគ្រីស្ត ˝ដែលមិនអាចបំបែក និងមិនអាចភាន់ច្រឡំបាន ˝។ [464-467,469]

៧៨.ហេតុអ្វីយើងអាចយល់អំពីព្រះយេស៊ូត្រឹមតែអាថ៌កំបាំងប៉ុណ្ណោះ?

ដោយសារព្រះយេស៊ូជាព្រះជាម្ចាស់ដែរ  ដូច្នេះយើងមិនអាចយល់ពីព្រះយេស៊ូពេញលេញបានទេ បើយើងមិនគិតអំពីភាពជាព្រះជាម្ចាស់របស់ព្រះអង្គដែលយើងមិនអាចមើលឃើញ។

៧៩.តើព្រះយេស៊ូមានព្រលឹង ចិត្តគំនិត និងរូបកាយដូចយើងដែរឬទេ?

ព្រះយេស៊ូមានព្រលឹង ចិត្តគំនិត និងរូបកាយដូចមនុស្សយើងដែរ ˝ព្រះបុត្រារបស់ព្រះជាម្ចាស់បានធ្វើការជាមួយដៃរបស់មនុស្ស  បានគិតជាមួយប្រាជ្ញារបស់មនុស្ស បានប្រព្រឹត្តជាមួយបំណងរបស់មនុស្ស បានស្រលាញ់ជាមួយបេះដូងរបស់មនុស្ស......។ ˝ ( អំណរ និងសេចក្តីសង្ឃឹម ២២,២)។ [470-476]

៨០.ហេតុអ្វីបានជាព្រះនាងម៉ារីជាព្រហ្មចារនី?

ព្រះជាម្ចាស់ចង់ឱ្យព្រះយេស៊ូមានមាតាជាមនុស្សយ៉ាងពិតប្រាកដ រីឯបិតាវិញគឺមានតែព្រះជាម្ចាស់ទេដែលជាព្រះបិតាតែមួយគត់របស់ព្រះអង្គ។ ដូច្នេះហើយបានជាព្រះជាម្ចាស់ចង់​ចាប់ផ្តើមបង្កើតថ្មីនៅក្នុងអង្គព្រះយេស៊ូ ដោយឱ្យមនុស្សទាំងអស់ទទួលស្គាល់ថា ការនេះត្រូវបានព្រះជាម្ចាស់ផ្ទាល់ជាអ្នកបង្កើត មិនមែនមកពីការបង្កើតណាមួយក្នុងលោកិយនេះទេ។ [484-504,508-510]

៨១. តើព្រះនាងម៉ារីមានបុត្រណាផ្សេងទៀតក្រៅពីព្រះយេស៊ូទេ?

ព្រះយេស៊ូគឺជាបុត្រតែមួយគត់របស់ព្រះនាងម៉ារី បើពិនិត្យតាមផ្លូវកាយ។ [500-510]

៨២.តើត្រឹមត្រូវឬទេដែលហៅព្រះនាងម៉ារីជាព្រះមាតាព្រះជាម្ចាស់ដូច្នេះ?

អស់អ្នកដែលហៅព្រះនាងម៉ារីជាព្រះមាតាព្រះជាម្ចាស់ គឺពួកគេប្រកាសថាព្រះបុត្រារបស់ព្រះនាងពិតជាព្រះជាម្ចាស់មែន។ [495-509]

៨៣.តើមានន័យដូចម្តេចពេលយើងប្រកាសថាព្រះនាងម៉ារីគ្មានជំពាក់បាបដូច្នេះ?

ព្រះសហគមន៍កាតូលិកជឿថាព្រះនាងព្រហ្មចារិនីម៉ារី តាំងពីពេលចាប់កំណើតក្នុងផ្ទៃម្តាយ ដោយព្រះហឫទ័យប្រណីសន្តោសយ៉ាងពិសេសរបស់ព្រះជាម្ចាស់ដ៏មានឫទ្ធានុភាពសព្វប្រការ និងដោយគុណធម៌នៃកិច្ចការរបស់ព្រះយេស៊ូគ្រីស្តជាព្រះសង្គ្រោះ ទើបព្រះនាងម៉ារីត្រូវបានថែរក្សាឱ្យចាកផុតពីអំពើបាបទាំងពួង និងរួចផុតពីអំពើបាបដើម ដូច្នេះហើយបានជាយើងហៅព្រះនាងម៉ារីថាគ្មានជំពាក់បាប។   (DOGMA OF 1854) [487-492,508]

៨៤.តើព្រះនាងម៉ារីជាឧបករណ៍ក្នុងព្រះហស្តព្រះជាម្ចាស់?

ព្រះនាងម៉ារីលើសពីឧបករណ៍ក្នុងព្រះហស្តរបស់ព្រះជាម្ចាស់ទៅទៀត ព្រោះព្រះនាងបានឆ្លើយតបនឹងការអញ្ចើញរបស់ព្រះជាម្ចាស់ ដើម្បីឱ្យការចាប់កំណើតរបស់ព្រះជាម្ចាស់បានកើតជារូបរាង។ [493-494,508-511]

៨៥.ហេតុអ្វីបានជាព្រះនាងម៉ារីក៏ជាមាតារបស់យើងទាំងអស់គ្នាដូច្នេះ?

ព្រះនាងម៉ារីគឺជាមាតារបស់យើងទាំងអស់គ្នាដែរ ដោយសារនៅលើឈើឆ្កាងព្រះយេស៊ូបានប្រគល់ព្រះនាងឱ្យធ្វើជាមាតារបស់យើងទាំងអស់គ្នា។ [963-966,973]

៨៦.ហេតុអ្វីបានជាព្រះយេស៊ូត្រូវរង់ចាំរហូតដល់ព្រះជន្ម៣០ព្រះវស្សាទើបចេញទៅបំពេញបេសកកម្មជាសាធារណៈ?

ដោយសារព្រះយេស៊ូចង់ចែករំលែកជីវិតសាមញ្ញធម្មតារួមជាមួយមនុស្សយើង ដោយសារហេតុនេះបានជាព្រះអង្គប្រោសឱ្យកិច្ចការងារប្រចាំថ្ងៃរបស់យើងឱ្យបានវិសុទ្ធ។ [531-534,564]

៨៧.ហេតុអ្វីបានជាព្រះយេស៊ូឱ្យលោកយ៉ូហានបាទីស្តធ្វើពីធីជ្រមុជទឹកជូនព្រះអង្គ ខណៈដែលព្រះអង្គមិនជាប់ជំពាក់បាបអ្វីទាល់តែសោះដូច្នេះ?

ព្រះយេស៊ូយល់ព្រមទទួលពិធីជ្រមុជទឹកបែបនេះ គឺព្រះអង្គចង់ចូលរួមក្នុងប្រវិត្តសាស្រ្តនៃអំពើបាបរបស់មនុស្សលោកទាំងអស់។ ដោយហេតុនេះហើយ ព្រះអង្គទ្រង់បានបង្រៀនឱ្យយើងដឹងថា ដើម្បីសង្គ្រោះយើងឱ្យចេញផុតពីអំពើបាប ថ្ងៃណាមួយព្រះអង្គនិងលិចនៅក្នុងសេចក្តីស្លាប់ ដើម្បីអាចរស់ឡើងវិញដោយសារឫទ្ធានុភាពនៃព្រះបិតារបស់ព្រះអង្គ។ [535-537,565]

៨៨.ហេតុអ្វីបានជាព្រះយេស៊ូត្រូវឱ្យមារល្បួងព្រះអង្គ ? តើព្រះអង្គអាចត្រូវបានមារល្បួងឬយ៉ាងណា?

ព្រះយេស៊ូពិតជាមនុស្សយ៉ាងពិតប្រាកដ ដូច្នេះហើយព្រះអង្គត្រូវតែរងការល្បួងដែលមកពីមារ ៖ ˝ដ្បិតយើងមានមហាបូជាចារ្យដែលអាចរួមសុខទុក្ខជាមួយយើង ជាមនុស្សទន់ខ្សោយ គឺព្រះអង្គក៏ត្រូវរងការល្បងលគ្រប់ជំពូកដូចយើងដែរ តែទ្រង់មិនបានប្រព្រឹត្តអំពើបាបសោះឡើយ។ ˝ ( ហប ៤,១៥)។ [538-540,566]

៨៩.តើព្រះយេស៊ូបានសន្យាចំពោះនរណាអំពីព្រះរាជ្យនៃស្ថានបរមសុខ?

˝ព្រះជាម្ចាស់ទ្រង់សព្វព្រះហឫទ័យឱ្យមនុស្សទាំងអស់បានទទួលការសង្គ្រោះ និងបានស្គាល់សេចក្តីពិតយ៉ាងច្បាស់។ ˝( ១ធម ២,៤)។ ព្រះរាជ្យរបស់ព្រះជាម្ចាស់ចាប់ផ្តើមនៅក្នុងអ្នកណាដែលព្រមអនុញ្ញាតឱ្យសេចក្តីស្រលាញ់របស់ព្រះជាម្ចាស់ផ្លាស់ប្តូរពូកគេ គឺដំបូងបំផុតគឺអស់អ្នកដែលក្រីក្រ តូចតាចបំផុត ដូចព្រះយេស៊ូបានមានបន្ទូលនៅក្នុងសុភមង្គលទាំងប្រាំបីរបស់ព្រះអង្គ។ [541-546,567]

៩០.តើព្រះយេស៊ូពិតជាបានធ្វើការអស្ចារ្យមែនឬយ៉ាងណា ឬគ្រាន់តែជារឿងប្រឌិត?

ព្រះយេស៊ូពិតជាបានធ្វើការអស្ចារ្យ ដែលបានរៀបរាប់នៅក្នុងគម្ពីរដំណឹងល្អអំពីព្រឹត្តិការណ៍ទាំងអស់នោះមែន។ [547-550]

៩១.ហេតុអ្វីបានជាព្រះយេស៊ូធ្វើការអស្ចារ្យទាំងអស់នោះ?

ការអស្ចារ្យទាំងអំបាលម៉ានដែលព្រះយេស៊ូបានប្រព្រឹត្ត គឺជាទីសម្គាល់អំពីព្រះរាជ្យរបស់ព្រះជាម្ចាស់បានចាប់ផ្តើមហើយ ក៏ដើម្បីបង្ហាញសេចក្តីស្រលាញ់របស់ព្រះអង្គចំពោះមនុស្សលោក និងចង់បញ្ជាក់អំពីបេសកកម្មរបស់ព្រះអង្គផងដែរ។ [547-550]

៩២.តើព្រះយេស៊ូត្រាស់ហៅក្រុមគ្រីស្តទូតដើម្បីអ្វី ?

ព្រះយេស៊ូមានសាវ័កប្រុសស្រីជាច្រើន ក្នុងចំណោមសាវ័កទាំងអស់នោះព្រះអង្គជ្រើសរើសប្រុសៗ១២រូប (លក ៦,១២-១៦) ដើម្បីបង្រៀនពួកគេយ៉ាងម៉ត់ចត់ និងប្រគល់បេសកកម្មដល់ពួកគេ ៖ ˝ព្រះអង្គចាត់គេឱ្យចេញទៅប្រកាសអំពីព្រះរាជ្យរបស់ព្រះជាម្ចាស់ ព្រមទាំងមើលអ្នកជម្ងឺឱ្យបានជា ˝ ( លក ៩,២)។ នៅពេលប្រារព្វពិធីជប់លាង ព្រះអង្គបានគាប់ព្រះហឫទ័យសោយព្រះស្ងោយរួមជាមួយគ្រីស្តទូតទាំង១២រូប ថែមទាំងប្រាប់ពួកគេថា  ˝ចូរធ្វើដូច្នេះ ដើម្បីនឹករឭកដល់ខ្ញុំ  ˝( លក ២២,១៩)។ [551-553,567]

៩៣.ហេតុអ្វីបានជាព្រះយេស៊ូបង្ហាញសិរីរុងរឿងរបស់ព្រះអង្គ(TRANSFIGURED)នៅលើភ្នំ?

នៅពេលដែលព្រះយេស៊ូនៅលើផែនដីនេះនៅឡើយ ព្រះជាម្ចាស់ចង់បង្ហាញសិរីរុងរឿងរបស់ព្រះអង្គនៅក្នុងអង្គព្រះយេស៊ូ ដែលជាព្រះបុត្រារបស់ព្រះអង្គ ហើយព្រះយេស៊ូផ្ទាល់ ក៏ព្រះអង្គចង់បង្ហាញសិរីរុងរឿងរបស់ព្រះអង្គដើម្បីជួយឱ្យក្រុមសាវ័កអាចយល់នូវអត្ថន័យអំពីការសោយទិវង្គត និងមានព្រះជន្មរស់ឡើងវិញរបស់ព្រះអង្គបាន។ [554-556,567]

៩៤.តើព្រះយេស៊ូជ្រាបទេថាព្រះអង្គនឹងសោយទិវង្គតនៅពេលដែលព្រះអង្គយាងចូលក្រុងយេរូសាឡឹម?

ព្រះយេស៊ូជ្រាបថាព្រះអង្គនឹងសោយទិវង្គត ទើបព្រះអង្គបានប្រកាសទុកជាមុននូវការរងទុក្ខលំបាក និងសោយទិវង្គតរបស់ព្រះអង្គចំនួនបីដង ដោយព្រះអង្គជ្រាបច្បាស់ និងស្ម័គ្រចិត្តដើម្បីទទួលទុក្ខលំបាកនេះ        (លក ៩,៥១)។ [557-560,569-570]

៩៥.ហេតុអ្វីបានជាព្រះយេស៊ូជ្រើសរើសយកថ្ងៃបុណ្យចម្លងរបស់ជនជាតិយូដាដើម្បីរងទុក្ខលំបាក សោយទិវង្គត និងមានព្រះជន្មរស់ឡើងវិញដូច្នេះ?

ព្រះយេស៊ូបានជ្រើសរើសយកថ្ងៃបុណ្យចម្លងរបស់ជនជាតិយូដា គឺជានិមត្តិសញ្ញានៃកិច្ចការដែលព្រះអង្គហៀបនឹងបង្ហើយក្នុងការសោយទិវង្គត និងរស់ឡើងវិញរបស់ព្រះអង្គ។ នៅក្នុងប្រវត្តិសាស្រ្ត ព្រះជាម្ចាស់បានរំដោះជនជាតិអ៊ីស្រាអែលបានរួចផុតពីទាសភាពរបស់ជនជាតិអេស៊ីប បច្ចុប្បន្ននេះព្រះយេស៊ូក៏ចង់រំដោះយើងឱ្យរួចផុតពីទាសភាពនៃអំពើបាបនិងសចក្តីស្លាប់ផងដែរ។ [571-573]

៩៦.ហេតុអ្វីបានជាមនុស្សយើងបានសុខសាន្ត រីឯព្រះយេស៊ូវិញត្រូវទទួលទោសសោយទិវង្គតនៅលើឈើឆ្កាងដូច្នេះ?

ព្រះយេស៊ូបានឱ្យមនុស្សនៅសម័យរបស់ព្រះអង្គធ្វើការសម្រេចយ៉ាងដាច់ខាតអំពីសកម្មភាពរបស់ព្រះអង្គ ( ការលើកលែងទោស ការមិនគោរពថ្ងៃសប្ប័ទ .......) ឬគេអាចទទួលស្គាល់នូវឫទ្ធានុភាពរបស់ព្រះអង្គ ឬមួយពួកគេចាត់ទុកព្រះអង្គជាជនបោកប្រាស់ ជនម៉ាក់ងាយព្រះនាមព្រះជាម្ចាស់ បំពានច្បាប់ ដែលត្រូវតែទទួលទោសនៅលើឈើឆ្កាង។ [574-578]

៩៧.តើជនជាតិយូដាត្រូវទទួលខុសត្រូវចំពោះការសោយទិវង្គតរបស់ព្រះយេស៊ូដែរឬយ៉ាងណា?

គ្មាននរណាអាចចោទប្រកាន់ជនជាតិយូដាអំពីការសោយទិវង្គតរបស់ព្រះយេស៊ូបានទេ ផ្ទុយទៅវិញ ព្រះសហគមន៍កាតូលិកប្រកាសយ៉ាងជាក់ច្បាស់ថា គឺអស់អ្នកដែលប្រព្រឹត្តអំពើបាបដដែលៗទាំងអស់សុទ្ធតែជាអ្នកដែលទទួលខុសត្រូវចំពោះការសោយទិវង្គតរបស់ព្រះអង្គ។ [597-598]

៩៨.តើព្រះជាម្ចាស់សព្វព្រះហឫទ័យឱ្យមនុស្សស្លាប់ឬ?

ការសោយទិវង្គតយ៉ាងអាណោចអធមរបស់ព្រះយេស៊ូមិនមែនជាការរៀបចំជាមុននោះទេ ប៉ុន្តែព្រះយេស៊ូផ្ទាល់ជ្រាបស្រាប់ហើយថា៖ ˝ បងប្អូនបានចាប់បញ្ជូនលោកយេស៊ូនេះទៅឱ្យពួកជនពាលឥតសាសនាឆ្កាងលោក ដូចព្រះជាម្ចាស់បានកំណត់ទុក ដោយព្រះអង្គទ្រង់ញាណជាមុន។˝ (កក ២,២៣) ដើម្បីឱ្យយើងដែលជាកូនចៅជាប់ជំពាក់នឹងអំពើបាប និងសេចក្តីស្លាប់ បានទទួលការសង្គ្រោះ ˝រីឯព្រះគ្រីស្តគ្មានបាបទាល់តែសោះ តែព្រះជាម្ចាស់បានធ្វើឱ្យព្រះអង្គទៅជាតួបាបសម្រាប់យើង ដើម្បីប្រោសយើងឱ្យបានសុចរិតរួមជាមួយព្រះគ្រីស្តដែរ។ ˝(២ករ ៥,២១)។ ការលះបង់យ៉ាងធំធេងដែលព្រះបិតាទន្ទឹងរង់ចាំក្នុងព្រះបុត្រា ត្រូវបានព្រះបុត្រាឆ្លើយតបមកវិញដោយការស្តាប់បង្គាប់រហូតដល់សោយទិវង្គត ៖ ˝ ឥឡូវនេះទូលបង្គំរន្ធត់ចិត្តណាស់ មិនដឹងជានឹងទូលថាដូចម្តេចឡើយ ឱព្រះបិតាអើយ សូមសង្គ្រោះទូលបង្គំឱ្យរួចផុតពីទុក្ខលំបាកនៅពេលកំណត់នេះផង ប៉ុន្តែទូលបង្គំមកដើម្បីរងទុក្ខលំបាកក្នុងពេលកំណត់នេះហើយ។˝ (យហ ១២,២៧)។ ទាំងអស់នេះ បញ្ជាក់ឱ្យយើងឃើញថា ទាំងព្រះបិតា និងព្រះបុត្រាបានបញ្ចេញនូវសេចក្តីស្រលាញ់យ៉ាងជ្រៅបំផុតគឺបូជាព្រះជន្មនៅលើឈើឆ្កាង។ [599-609,620]

៩៩.តើមានអ្វីកើតឡើងនៅពេលព្រះយេស៊ូធ្វើពិធីជប់លាងជាមួយក្រុមគ្រីស្តទូត ?

ព្រះយេស៊ូបានបង្ហាញសេចក្តីស្រលាញ់របស់ព្រះអង្គតាមរយៈកិច្ចការទាំង៣គឺ ៖ លាងជើងឱ្យក្រុមគ្រីស្តទូត តែងតាំងអគ្គសញ្ញាព្រះកាយព្រះគ្រីស្ត  បង្កើតក្រុមបូជាចារ្យនៃសម្ពន្ធមេត្រីថ្មី។ [610-611] 

១០០.តើព្រះយេស៊ូពិតជាស្លុតរន្ធត់ចំពោះការរងទុក្ខលំបាកនៅយប់មុនពេលព្រះអង្គរងទុក្ខលំបាកគឺនៅលើភ្នំដើមអូលីវ មែនដែរឬយ៉ាងណា?

ដោយសារព្រះយេស៊ូជាមនុស្សដូចយើង ព្រះអង្គពិតជាស្លុតរន្ធត់ចំពោះការរងទុក្ខលំបាកដែលព្រះអង្គហៀបនឹងទទួលនេះពិតប្រាកដមែន។ [612]

១០១.ហេតុអ្វីបានជាព្រះយេស៊ូត្រូវសង្គ្រោះមនុស្សដោយសោយទិវង្គតនៅលើឈើឆ្កាង?

ទោះបីព្រះអង្គគ្មានកំហុសក្តី ព្រះអង្គបានយល់ព្រមជ្រើសរើសយកការសោយទិវង្គតយ៉ាងអាណោចអធមនៅលើឈើឆ្កាងដើម្បីលះបង់ និងបូជាព្រះជន្មព្រះអង្គផ្ទាល់នៅលើឈើឆ្កាង។ ព្រះអង្គបានជ្រើសរើសយកឈើឆ្កាងដើម្បីលីអំពើបាបរបស់ពិភពលោក និងរងទុក្ខរបស់ប្រជាជាតិទាំងមូល ដោយសារសេចក្តីស្រលាញ់ដ៏ឥតខ្ចោះរបស់ព្រះអង្គ បាននាំមនុស្សឱ្យទៅកាន់ព្រះជាម្ចាស់វិញ។ ដូច្នេះហើយ គ្មាននរណាអាចនិយាយថាព្រះជាម្ចាស់មិនអាចឈ្វេងយល់ដឹងនូវរាល់ទុក្ខលំបាករបស់មនុស្សបានឡើយ។ [613-617,622-623]

១០២.ហេតុអ្វីបានជាយើងត្រូវទទួលទុក្ខលំបាកនៅក្នុងជីវិតដោយលីឈើឆ្កាងដើរតាមព្រះយេស៊ូ?

គ្រីស្តបរិស័ទមិនមែនស្វែងរកទុក្ខលំបាកទេ តែត្រូវតែប្រឈមមុខនឹងទុក្ខលំបាកដែលមិនអាចគេចផុតបាន គ្រីស្តបរិស័ទត្រូវតែមានអំណរសប្បាយដោយបានរួមទុក្ខលំបាកជាមួយព្រះយេស៊ូ ˝ដូចព្រះអង្គត្រាស់ហៅបងប្អូនមកឱ្យរងទុក្ខលំបាកយ៉ាងនេះ ព្រោះព្រះគ្រីស្តក៏បានរងទុក្ខលំបាកសម្រាប់បងប្អូនទុកជាគម្រូឱ្យបងប្អូនដើរតាមគន្លងរបស់ព្រះអង្គដែរ។˝ (១សល ២,២១)។ [618]

១០៣.តើព្រះយេស៊ូពិតជាបានសោយទិវង្តគ ឬព្រះអង្គគ្រាន់តែសម្តែងប៉ុណ្ណោះដើម្បីអាចមានព្រះជន្មរស់ឡើងវិញ​បាន?

ព្រះយេស៊ូពិតជាបានសោយទិវង្គតនៅលើឈើឆ្កាង រីឯព្រះសពរបស់ព្រះអង្គត្រូវបានគេបញ្ចុះក្នុងផ្នូរ។ រាល់ឯកសារដើមបានកត់ត្រា និងធ្វើជាសាក្សីអំពីសេចក្តីទាំងអស់នេះ។ [627]

១០៤.តើអ្នកអាចក្លាយជាគ្រីស្តបរិស័ទដែលមិនជឿលើការរស់ឡើងវិញរបស់ព្រះយេស៊ូបានឬទេ?

មិនអាចបានទេ សន្តប៉ូលបានថ្លែងថា​៖˝ បើព្រះគ្រីស្តមិនមានព្រះជន្មរស់ឡើងវិញទេ សេចក្តីដែលយើងប្រកាសមុខជាគ្មានន័យអ្វីសោះឡើយ ហើយជំនឿរបស់បងប្អូន ក៏គ្មានន័យអ្វីដែរ។˝ (១ករ ១៥,១៤)។ [631,638,651]

១០៥.តើមូលហេតុអ្វីបានជាក្រុមសាវ័កបែរមកជឿថាព្រះយេស៊ូមានព្រះជន្មរស់ឡើងវិញមែន?

ក្រុមសាវ័កដែលបានបាត់បង់សេចក្តីសង្ឃឹមទាំងស្រុង ហើយបែរមកជឿលើព្រះយេស៊ូដែលមានព្រះជន្មរស់ឡើងវិញនោះ គឺដោយសារពួកគេបានឃើញព្រះអង្គនៅក្នុងទម្រង់ខុសប្លែក បន្ទាប់ពីព្រះអង្គបានសោយទិវង្គត ពួកគេបាននិយាយជាមួយព្រះអង្គ ហើយមានបទពិសោធន៍ជាមួយព្រះអង្គដូចជាភាវៈដែលមានជីវិត។ [640-644,656]

១០៦.តើមានភស្តុតាងអ្វីដែលបញ្ជាក់អំពីការរស់ឡើងវិញរបស់ព្រះយេស៊ូដែលឬទេ?

គ្មានភស្តុតាងតាមបែបវិទ្យាសាស្រ្តដែលបង្ហាញពីការរស់ឡើងវិញរបស់ព្រះយេស៊ូទេ ប៉ុន្តែមានសាក្សីជាច្រើន ទាំងបុគ្គលផង និងជាក្រុមផង ដែលពួកគេរស់នៅក្នុងសម័យរបស់ព្រះយេស៊ូនៅក្រុងយេរ៉ូសាឡឹមបានអះអាងអំពីហេតុការណ៍នេះ។ [639-644,647,656-657]

១០៧.តើព្រះកាយរបស់ព្រះយេស៊ូក្រោយពីមានព្រះជន្មរស់ឡើងវិញ គឺជាព្រះកាយដដែលដូចនៅពេលដែលព្រះអង្គមានព្រះជន្មនៅលើលោកនេះឬយ៉ាងណា?

ព្រះយេស៊ូបានឱ្យក្រុមសាវ័កពាល់លើព្រះកាយរបស់ព្រះអង្គ ព្រះអង្គបានសោយព្រះស្ងោយជាមួយពួកគេ ថែមទាំងបង្ហាញនូវស្នាមរបួសរបស់ព្រះអង្គផងដែរ។ ព្រះកាយរបស់ព្រះអង្គលែងជាកម្មសិទ្ទិនៅលើផែនដីនេះទៀតហើយ គឺជាកម្មសិទ្ធិនៃព្រះរាជ្យនៃស្ថានបរមសុខរបស់ព្រះបិតាព្រះអង្គវិញ។ [645-646]

១០៨.តើពិភពលោកបានផ្លាស់ប្តូរដែលឬទេក្រោយពីព្រះយេស៊ូមានព្រះជន្មរស់ឡើងវិញ?

ចាប់ពីពេលនេះតទៅ សេចក្តីស្លាប់មិនមែនជាទីបញ្ចប់នៃអ្វីៗទាំងអស់នោះទេ ជំនួសមកវិញគឺអំណរសប្បាយ និងសេចក្តីសង្ឃឹមបានមកដល់ក្នុងពិភពលោកនេះវិញ។ ˝មច្ចុរាជគ្មានអំណាចលើព្រះយេស៊ូទៀតទេ˝ ( រម ៦,៩) ហើយសេចក្តីស្លាប់ក៏មិនមានអំណាចលើយើងដែលជាអ្នកជឿលើព្រះយេស៊ូទៀតដែរ។ [655,658]

១០៩.តើ ព្រះយស៊ូយាងឡើងស្ថានបរមសុខមានន័យដូចម្តេច?

ការយាងឡើងស្ថានបរមសុខរបស់ព្រះយេស៊ូមានន័យថា ព្រះអង្គគឺជាមនុស្សម្នាក់ក្នុងចំណោមពួកយើងត្រូវត្រលប់ទៅវិញឯព្រះជាម្ចាស់ជាព្រះបិតា ហើយគង់នៅទីនោះអស់កល្បជានិច្ច។ ដោយសារព្រះយេស៊ូ ទើបព្រះជាម្ចាស់គង់នៅជិតមនុស្សលោកយើងតាមរបៀបមនុស្សដូចយើង ដូចក្នុងគម្ពីរដំណឹងល្អតាមសន្តយ៉ូហានបានចែងអំពីព្រះយេស៊ូមានព្រះបន្ទូលថា​៖ ˝កាលណាគេលើកខ្ញុំឡើងពីដី ខ្ញុំនឹងទាញមនុស្សទាំងអស់មកឯខ្ញុំ។ ˝ (យហ ១២,៣២)។ [659-667]

១១០.ហេតុអ្វីបានជាព្រះយេស៊ូគឺជាព្រះអម្ចាស់នៃសកលលោកទាំងមូល?

ព្រះយេស៊ូគឺជាព្រះអម្ចាស់នៃសកលលោកទាំងមូល និងជាព្រះអម្ចាស់នៃប្រវត្តិសាស្រ្តផងដែរ ព្រោះអ្វីៗទាំងអស់កើតចេញមកដោយសារព្រះអង្គ​។ មនុស្សទាំងអស់បានទទួលការសង្គ្រោះដោយសារព្រះអង្គ និងត្រូវបានកាត់ក្តីដោយសារព្រះអង្គដែរ។ [668-674,680]

១១១.តើអវសានកាលនៃពិភពលោកនឹងទៅជាយ៉ាងណា?

អវសានកាលនៃពិភពលោកគឺព្រះគ្រីស្តនឹងយាងមកវិញ ហើយមនុស្សទាំងអស់នឹងមើលឃើញព្រះអង្គ។ [675-677]

១១២.តើមានន័យដូចម្តេចពេលនិយាយថាព្រះយេស៊ូនឹងយាងមកវិនិច្ឆ័យ និងកាត់ក្តីពិភពលោកទាំងមូលដូច្នេះ?

មានន័យថា ព្រះយេស៊ូមិនអាចជួយនរណាម្នាក់បានឡើយ ប្រសិនបើអ្នកនោះមិនចង់ស្គាល់នូវអ្វីដែលជាសេចក្តីស្រលាញ់ ដូច្នេះខ្លួនពួកគេផ្ទាល់ដែលជាអ្នកនឹងវិនិច្ឆ័យខ្លួនឯងផ្ទាល់។ [678-679,681-682]

ជំពូកទី៣
ខ្ញុំជឿលើព្រះវិញ្ញាណដ៏វិសុទ្ធ

១១៣.តើមានន័យដូចម្តេចពេលយើងនិយាយថា ខ្ញុំជឿលើព្រះវិញ្ញាណដ៏វិសុទ្ធដូច្នេះ?

ពេលយើងពោលថា ខ្ញុំជឿលើព្រះវិញ្ញាណដ៏វិសុទ្ធ មានន័យថាយើងលើកតម្កើងព្រះអង្គជាព្រះជាម្ចាស់ដូចដែលយើងលើកតម្កើងព្រះបិតា និងព្រះបុត្រាដែរ ដោយសារព្រះអង្គគឺជាអង្គមួយក្នុងព្រះត្រៃឯក ព្រះអង្គរួមសភាពជាមួយព្រះបិតា និងព្រះបុត្រា។ ខណៈពេលជាមួយគ្នានេះដែរ ក៏មានន័យថា ព្រះវិញ្ញាណដ៏វិសុទ្ធគឺជាអង្គដែលយាងមកគង់នៅក្នុងដួងចិត្តរបស់យើង ណែនាំយើងឱ្យក្លាយទៅជាបុត្រធីតារបស់ព្រះជាម្ចាស់ជាព្រះបិតានៅឯស្ថានបរមសុខ។ ដោយសារព្រះវិញ្ញាណដ៏វិសុទ្ធជួយជម្រុញយើង នាំឱ្យយើងអាចមានសមត្ថភាពផ្លាស់ប្តូរមុខមាត់នៃពិភពលោកបាន។ [683-686]

១១៤.តើព្រះវិញ្ញាណដ៏វិសុទ្ធបំពេញតួនាទីអ្វីនៅក្នុងជីវិតរបស់គ្រីស្តបរិស័ទ?

រាល់កិច្ចការរបស់ព្រះយេស៊ូយើងអាចយល់ដឹងបានលុះត្រាតែមានការបំភ្លឺដែលមកពីព្រះវិញ្ញណដ៏វិសុទ្ធ។ វត្តមានរបស់ព្រះវិញ្ញាណដ៏វិសុទ្ធដែលជាព្រះជាម្ចាស់នេះ ត្រូវបានបង្ហាញឱ្យយើងឃើញទាំងស្រុងក្នុងឆាកជីវិតរបស់ព្រះយេស៊ូ។ [689-691,702-731]

១១៥.តើព្រះវិញ្ញាណដ៏វិសុទ្ធត្រូវបានស្គាល់ក្រោមទម្រង់ និងឈ្មោះអ្វីខ្លះ?

ព្រះវិញ្ញាណដ៏វិសុទ្ធយាងចុះមកគង់លើព្រះយេស៊ូក្រោមទម្រង់សត្វព្រាប។ គ្រីស្តបរិស័ទដើមដំបូងមានបទពិសោធន៍អំពីព្រះវិញ្ញាណដ៏វិសុទ្ធតាមរយៈប្រេងអ្នកជម្ងឺ ទឹកដែលផ្តល់ជីវិត ខ្យល់បោះបោក និងអណ្តាតភ្លើង។ ព្រះយេស៊ូផ្ទាល់បាននិយាយអំពីព្រះវិញ្ញាណដ៏វិសុទ្ធគឺជាអ្នកប្រឹក្សាយោបល់ ជាអ្នកលួងលោម ជាគ្រូបង្រៀន និងជាវិញ្ញាណនៃសេចក្តីពិត។ នៅក្នុងអគ្គសញ្ញាទាំងអស់របស់ព្រះសហគមន៍ ព្រះវិញ្ញាណត្រូវបានប្រទានមកតាមរយៈការទ្រាបដៃ និងលាបប្រេង។ [691-693]

១១៦. តើមានន័យដូចម្តេចនៅពេលនិយាយថាព្រះវិញ្ញាណដ៏វិសុទ្ធមានព្រះបន្ទូលតាមរយៈព្យាការី ?

នៅក្នុងសម្ពន្ធមេត្រីចាស់ ព្រះជាម្ចាស់បានប្រទានព្រះវិញ្ញាណដ៏វិសុទ្ធទៅដល់មនុស្សប្រុសស្រីមួយចំនួនដើម្បីឱ្យគេថ្លែងព្រះបន្ទូលក្នុងនាមព្រះអង្គ និងរៀបចំប្រជាជនក្នុងការទទួលព្រះមេស្ស៊ីដែលនឹងយាងមក។ [683-688,702-720]

១១៧.តើព្រះវិញ្ញាណដ៏វិសុទ្ធបានធ្វើការក្នុងព្រះនាងម៉ារី រួមជាមួយព្រះនាងម៉ារី និងតាមរយៈព្រះនាងម៉ារីយ៉ាងដូចម្តេច?

ព្រះនាងម៉ារីបានឆ្លើយតប និងបើកដួងចិត្តទាំងស្រុងសម្រាប់ការត្រាស់ហៅរបស់ព្រះជាម្ចាស់(លក១,៣៨)។ ដោយសារហេតុនេះហើយ តាមរយៈសកម្មភាពរបស់ព្រះវិញ្ញាណ ព្រះនាងបានក្លាយទៅជាមាតារបស់ព្រះជាម្ចាស់ និងដោយសារព្រះនាងជាព្រះមាតារបស់ព្រះគ្រីស្ត ព្រះនាងក៏ជាមាតារបស់គ្រីស្តបរិស័ទ និងជាមាតារបស់មនុស្សលោកទាំងអស់។ [721-726]

១១៨.តើមានអ្វីកើតឡើងនៅថ្ងៃដែលព្រះវិញ្ញាណដ៏វិសុទ្ធយាងមក?

ហាសិបថ្ងៃក្រោយពីព្រះយេស៊ូមានព្រះជន្មរស់ឡើងវិញ  ព្រះយេស៊ូបានផ្ញើព្រះវិញ្ញាណដ៏វិសុទ្ធពីស្ថានបរមសុខមកលើក្រុមគ្រីស្តទូត ចាប់ពីពេលនោះមកព្រះសហគមន៍បានចាប់កំណើត។  [731-733]

១១៩.តើព្រះវិញ្ញាណដ៏វិសុទ្ធបំពេញសកម្មភាពក្នុងព្រះសហគមន៍យ៉ាងដូចម្តេច?

ព្រះវិញ្ញាណដ៏វិសុទ្ធកសាងព្រះសហគមន៍ ព្រះអង្គជម្រុញព្រះសហគមន៍ និងរំឭកព្រះសហគមន៍អំពីបេសកកម្មរបស់ខ្លួន។ ព្រះអង្គត្រាស់ហៅមនុស្សជាច្រើនឱ្យបម្រើព្រះសហគមន៍ និងប្រទានឱ្យគេមានអំណោយទានជាច្រើនដែលត្រូវការជាចាំបាច់។ ព្រះអង្គដឹកនាំឱ្យយើងចូលរួមយ៉ាងជ្រៅក្នុងព្រះជាម្ចាស់ជាព្រះត្រៃឯក។ [733-741,747]

១២០.តើព្រះវិញ្ញាណដ៏វិសុទ្ធបំពេញសកម្មភាពយ៉ាងដូចម្តេចនៅក្នុងជីវិតរបស់ខ្ញុំ?

ព្រះវិញ្ញាណដ៏វិសុទ្ធបើកដួងចិត្តខ្ញុំឱ្យទទួលយកព្រះជាម្ចាស់ ព្រះអង្គបង្រៀនខ្ញុំឱ្យចេះអធិដ្ឋាន ជួយឱ្យខ្ញុំចេះប្រព្រឹត្តកិច្ចការមេត្តាករុណាចំពោះបងប្អូនឯទៀតៗ។ [738-741]

ខ្ញុំជឿលើព្រះសហគមន៍កាតូលិកដ៏វិសុទ្ធ

១២១.តើព្រះសហគមន៍មានន័យដូចម្តេច?

˝ ព្រះសហគមន៍ ˝ តាមភាសាក្រិកគឺ ˝Ekklesia ˝ មានន័យថា អស់អ្នកដែលបានត្រាស់ហៅឱ្យមកជួបជុំគ្នា​។ អស់អ្នកដែលបានទទួលអគ្គសញ្ញាជ្រមុជទឹក និងមានជំនឿលើព្រះជាម្ចាស់ សុទ្ធតែត្រូវបានព្រះជាម្ចាស់ត្រាស់ហៅឱ្យមកជួបជុំគ្នា ដើម្បីរួមគ្នាយើងជាព្រះសហគមន៍។ សន្តប៉ូលបានថ្លែងថា៖ ព្រះគ្រីស្តគឺជាសរិសា រីឯយើងវិញជាសរីរាង្គរបស់ព្រះអង្គ។ [748-757]

១២២.ហេតុអ្វីបានជាព្រះជាម្ចាស់ចង់ឱ្យមានព្រះសហគមន៍?

ព្រះជាម្ចាស់មិនចង់សង្គ្រោះមនុស្សជាបុគ្គលទេ ព្រះអង្គចង់សង្គ្រោះមនុស្សទាំងអស់រួមជាមួយគ្នា។ ព្រះអង្គចង់បង្រួបបង្រួមមនុស្សឱ្យទៅជាប្រជាជាតិតែមួយ នោះគឺព្រះសហគមន៍។ [758-781,802-804]

១២៣.តើអ្វីទៅមុខងាររបស់ព្រះសហគមន៍?  

មុខងាររបស់ព្រះសហគមន៍គឺកសាងព្រះរាជ្យនៃព្រះជាម្ចាស់ ដែលបានចាប់ផ្តើមជាមួយព្រះយេស៊ូ ដូច្នេះព្រះសហគមន៍ត្រូវធ្វើយ៉ាងណាដើម្បីឱ្យគ្រាប់ពូជនេះលូតលាស់ធំឡើងក្នុងប្រជាជាតិទាំងអស់។ [763-769,774-776,780]

១២៤.ហេតុអ្វីបានជាព្រះសហគមន៍ត្រូវទៅហួសលក្ខណៈជាស្ថាប័ន?

ព្រះសហគមន៍ត្រូវទៅហូសលក្ខណជាស្ថាប័ន ដោយសារព្រះសហគមន៍គឺជាគម្រោងការណ៍ដ៏អស្ចារ្យ ដែលក្នុងពេលជាមួយគ្នានោះ ព្រះសហគមន៍ក៏ជាមនុស្សរូបិផង និងជាអរូបិផង។ [770-773,779]

១២៥.តើប្រជារាស្រ្តរបស់ព្រះជាម្ចាស់ត្រូវមានឯកលក្ខណភាពដូចម្តេច?

ប្រជារាស្រ្តរបស់ព្រះជាម្ចាស់មានព្រះបិតាដែលជាអ្នកបង្កើត មានព្រះយេស៊ូគ្រីស្តជាអ្នកដឹកនាំ និងមានព្រះវិញ្ញាណដ៏វិសុទ្ធជាប្រភពនៃកម្លាំង។ អគ្គសញ្ញាជ្រមុជទឹកគឺជាទ្វារនាំយើងឱ្យក្លាយទៅជាប្រជារាស្ត្ររបស់ព្រះជាម្ចាស់ ហើយតម្លៃថ្លៃថ្នូររបស់ប្រជារាស្រ្តនេះគឺសេរីភាពនៃបុត្រធីតារបស់ព្រះជាម្ចាស់ រីឯច្បាប់របស់ព្រះជាម្ចាស់គឺសេចក្តីស្រលាញ់។ នៅពេលដែលប្រជារាស្រ្តនេះមានភក្តីភាពចំពោះព្រះអង្គ និងផ្តល់អាទិភាពក្នុងការស្វែងរកព្រះរាជ្យនៃព្រះជាម្ចាស់ ពួកគេអាចផ្លាស់ប្តូរពិភពលោកបាន។ [781-786]

១២៦.តើមានន័យដូចម្តេចនៅពេលយើងនិយាយថា ព្រះសហគមន៍គឺជាព្រះកាយរបស់ព្រះគ្រីស្ត ?

មានន័យថាយើងរួបរួមជាធ្លុងតែមួយរួមជាមួយព្រះគ្រីស្ត ដោយសារអគ្គសញ្ញាជ្រមុជទឹក និងអគ្គសញ្ញាព្រះកាយព្រះលោកហិតព្រះគ្រីស្ត យើងមានទំនាក់ទំនងជាមួយព្រះអង្គដែលមិនអាចកាត់ផ្តាច់បាន។ ហើយទំនាក់ទំនងនេះភា្ជប់យ៉ាងល្អដូចក្បាលភ្ជាប់នឹងអវយវៈដទៃទៀតដូច្នេះដែរ។ [787-795]

១២៧.តើមានន័យដូចម្តេចនៅពេលយើងនិយាយថា ព្រះសហគមន៍គឺជាភរិយារបស់ព្រះគ្រីស្ត?

ព្រះគ្រីស្តស្រលាញ់ព្រះសហគមន៍ដូចស្វាមីស្រលាញ់ភរិយារបស់ខ្លួន។ ព្រះអង្គចងភ្ជាប់ជាមួយព្រះសហគមន៍ដោយសម្ពន្ធមេត្រីអស់កល្បជានិច្ច បូជាព្រះជន្មសម្រាប់ព្រះសហគមន៍ និងថែរក្សាព្រះសហគមន៍ជានិច្ចដូចជាព្រះកាយរបស់ព្រះអង្គផ្ទាល់ដែរ។ (អភ ៥,២៩)។ [796]

១២៨.តើមានន័យដូចម្តេចនៅពេលយើងនិយាយថា ព្រះសហគមន៍គឺជាព្រះដំណាក់របស់ព្រះវិញ្ញាណដ៏វិសុទ្ធ?

នៅក្នុងពិភពលោក​ ព្រះសហគមន៍គឺជាទីកន្លែងដែលព្រះវិញ្ញាណដ៏វិសុទ្ធបង្ហាញខ្លួន។ [797-801,809]

ខ្ញុំជឿលើព្រះសហគមន៍មានតែមួយដ៏វិសុទ្ធ កាតូលិក និងបន្តជំនឿពីក្រុមគ្រីស្តទូត

១២៩.ហេតុអ្វីបានជាមានព្រះសហគមន៍មានតែមួយដូច្នេះ?

ព្រះគ្រីស្តមានតែមួយ ព្រះកាយរបស់ព្រះគ្រីស្តត្រូវមានតែមួយ រីឯភរិយារបស់ព្រះគ្រីស្តក៏មានតែមួយ ដូច្នេះហើយបានជាមានព្រះសហគមន៍របស់ព្រះគ្រីស្តមានតែមួយដូចគ្នាដែរ។ ព្រះគ្រីស្តជាសិរសា ព្រះសហគមន៍គឺជាព្រះកាយរបស់ព្រះអង្គ រួមបញ្ចូលគ្នាជាទម្រង់ទាំងមូលរបស់ព្រះគ្រីស្ត ( សន្ត អាហ្គូស្ទីន )។ ដូចជារូបកាយមានអវយវជាច្រើន ប៉ុន្តែវាជារូបកាយតែមួយ ក៏ដូចគ្នាដែរ ព្រះសហគមន៍មានតែមួយគត់ ដែលក្នុងនោះមានព្រះសហគមន៍តាមតំបន់ជាច្រើន (ភូមិភាគ) រួមគ្នាជារូបកាយរបស់ព្រះគ្រីស្ត។ [811-816,866,870]

១៣០.តើបងប្អូនគ្រីស្តបរិស័ទ ក្រៅព្រះសហគមន៍កាតូលិក ជាបងប្អូនយើងដែរ ឬទេ?

អស់អ្នកណាដែលបានទទួលពិធីជ្រមុជទឹកសុទ្ធតែនៅក្នុងព្រះសហគមន៍របស់ព្រះយេស៊ូគ្រីស្ត។ ដូច្នេះហើយអស់អ្នកដែលបានជ្រមុជទឺក ទោះបីពួកគេមិនបានឯកភាពពេញលេញរួមជាមួយព្រះសហគមន៍កាតូលិកក្តី ក៏ពួកគេត្រូវបានហៅថាជាគ្រីស្តបរិស័ទដែរ បើជាគ្រីស្តបរិស័ទហើយ ពួកគេប្រាកដជាបងប្អូនរបស់យើងដែរ។ [817-819]

១៣១.តើយើងត្រូវធ្វើដូចម្តេចដើម្បីឱ្យមានឯកភាពរវាងគ្រីស្តបរិស័ទនិកាយផ្សេងពីគ្នា?

ក្នុងពាក្យសម្តី និងកិច្ចការដែលយើងធ្វើ យើងត្រូវតែធ្វើតាមព្រះបញ្ជាររបស់ព្រះគ្រីស្តដែលព្រះអង្គបានបង្ហាញឱ្យយើងដឹងតាមរយៈពាក្យអង្វររបស់ព្រះអង្គថា៖ ˝សូមឱ្យគេរួមគ្នាជាអង្គតែមួយ  ˝ (យហ ១៧,២១)។ [820-822]

១៣២.ហេតុអ្វីបានជាព្រះសហគមន៍ត្រូវតែវិសុទ្ធ ?

ព្រះសហគមន៍គឺវិសុទ្ធ មិនមែនដោយសារសមាជិកទាំងអស់ក្នុងព្រះសហគមន៍សុទ្ធតែវិសុទ្ធនោះទេ ប៉ុន្តែដោយសារតែព្រះជាម្ចាស់ជាព្រះដ៏វិសុទ្ធ ព្រះអង្គជាប្រភពនៃព្រះសហគមន៍ និងជាអ្នកដែលបំពេញសកម្មភាពក្នុងព្រះសហគមន៍។ សមាជិកទាំងអស់នៃព្រះសហគមន៍ត្រូវបានប្រោសឱ្យបានវិសុទ្ធដោយសារអគ្គសញ្ញាជ្រមុជទឹក។ [823-829]

១៣៣.ហេតុអ្វីបានជាយើងហៅព្រះសហគមន៍ជាកាតូលិក ?

កាតូលិក (ភាសាក្រិក Kat’holon ) មានន័យថា ˝សាកល˝ ពោលគឺ ˝ទាំងស្រុង˝។ ព្រះសហគមន៍ជាកាតូលិក ដោយសារព្រះគ្រីស្តអញ្ចើញព្រះសហគមន៍ឱ្យប្រកាសអំពីជំនឿរបស់ខ្លួនទាំងស្រុង  រក្សាទុកនូវអគ្គសញ្ញាទាំងអស់ និងប្រកាសដំណឹងល្អដល់មនុស្សលោកទាំងអស់។ ព្រះគ្រីស្តបានចាត់ព្រះសហគមន៍ឱ្យទៅដល់មនុស្សគ្រប់ជាតិសាសន៍ ក្នុងគ្រប់កាលៈទេសៈទាំងអស់។ [830-831,849-856]

១៣៤.តើនរណាជាសមាជិកនៃព្រះសហគមន៍កាតូលិក?

គឺអស់អ្នកដែលរួបរួមក្នុងឯកភាពជាមួយសម្តេចប៉ាប និងអស់លោកអភិបាលរបស់ព្រះសហគមន៍កាតូលិក និងឯកភាពរួមជាមួយព្រះគ្រីស្តតាមរយៈការប្រកាសជំនឿរបស់ព្រះសហគមន៍កាតូលិក ព្រមទាំងទទួលអគ្គសញ្ញាទាំងឡាយ។ [836-838]

១៣៥.តើព្រះសហគមន៍កាតូលិកមានទំនាក់ទំនងយ៉ាងដូចម្តេចជាមួយជនជាតិយូដា?

ជនជាតិយូដាគឺជារាមច្បងនៃគ្រីស្តបរិស័ទ ដោយសារព្រះជាម្ចាស់បានស្រលាញ់ និងមានព្រះបន្ទូលទៅកាន់ជនជាតិយូដាមុន។ ព្រះយេស៊ូគ្រីស្តបានយកកំណើតជាជនជាតិយូដា  ចំណុចនេះណែនាំឱ្យយើងយល់ស្របគ្នា។ ព្រះសហគមន៍ក៏បានទទួលស្គាល់ថា ព្រះយេស៊ូគ្រីស្តជាព្រះបុត្រារបស់ព្រះជាម្ចាស់ដែលមានព្រះជន្មគង់នៅ ដែលចំណុចនេះណែនាំឱ្យយើងនិងជនជាតិយូដាយល់ខុសគ្នា​ ប៉ុន្តែប្រសិនបើនិយាយអំពីការរង់ចាំព្រះមេហ្សីយាងមកវិញនោះគឺយើងកំពុងតែរង់ចាំដូចគ្នា។ [839-840]

១៣៦.តើព្រះសហគមន៍មានចក្ខុវិស័យដូចម្តេចចំពោះសាសនាដទៃ?

ព្រះសហគមន៍គោរពនូវអ្វីៗដែលមានក្នុងសាសនាដទៃគឺល្អ និងពិត  ទោះបីជាព្រះសហគមន៍ទទួលស្គាល់យ៉ាងច្បាស់ថាព្រះយេស៊ូគ្រីស្តជាព្រះសង្គ្រោះតែមួយគត់របស់មនុស្សលោកក្តី ក៏ព្រះសហគមន៍បានឱ្យតម្លៃ និងការពារសិទ្ធិសេរីភាពខាងសាសនាដែលត្រូវបានចាត់ទុកជាសិទ្ធិមូលដ្ឋានរបស់មនុស្ស។ ព្រោះ                  ˝ ព្រះគ្រីស្តជាផ្លូវ ជាសេចក្តីពិត និងជាជីវិត ˝ (យហ ១៤,៦)។ [841-845,846-848]

១៣៧.ហេតុអ្វីបានជាព្រះសហគមន៍មានក្រុមគ្រីស្តទូតជាគ្រឹះ?

ដោយសារព្រះសហគមន៍ត្រូវបានកសាងនៅលើគ្រឹះរបស់ក្រុមគ្រីស្តទូត។ ព្រះសហគមន៍បានប្រកាន់ភ្ជាប់នូវការបញ្ជូនបន្តដែលមកពីក្រុមគ្រីស្តទូត ហើយព្រះសហគមន៍ត្រូវបានដឹកនាំដោយអស់លោកដែលបន្តមុខងារពីក្រុមគ្រីស្តទូត(សម្តេចប៉ាប)។ [857-860,869,877]

១៣៨.តើព្រះសហគមន៍តែមួយគត់ ដ៏វិសុទ្ធ កាតូលិក និងជាព្រះសហគមន៍នៃក្រុមគ្រីស្តទូតដំណើរការទៅយ៉ាងដូចម្តេច?

នៅក្នុងព្រះសហគមន៍មានទាំងគ្រហស្ថ(Laity) និងអ្នកគង្វាល (Clerics ) ប៉ុន្តែទាំងអស់គ្នាសុទ្ធតែជាបុត្រធីតារបស់ព្រះជាម្ចាស់ និងមានតម្លៃថ្លៃថ្នូរស្មើគ្នា។ ទោះបីក្រុមទាំងពីរនេះមានមុខងារផ្សេងពីគ្នាក្តី ក៏មុខងារនីមួយៗមានតម្លៃស្មើគ្នា។ តួនាទីរបស់គ្រហស្ថគឺណែនាំពិភពលោកទាំងមូលឆ្ពោះទៅកាន់ព្រះរាជ្យនៃព្រះជាម្ចាស់។ រួមដំណើរក្នុងមុខងាររបស់គ្រហស្ថគឺមានការសហការពីសំណាកអស់អ្នកដែលបានទទួលការតែងតាំង (Clerics ) អស់លោកមានតួនាទីដឹកនាំព្រះសហគមន៍ បង្រៀន និងធ្វើឱ្យព្រះសហគមន៍ឆ្ពោះទៅរកភាពដ៏វិសុទ្ធ។ នៅក្នុងជីវិតទាំងពីរបែបដែលបានរៀបរាប់ពីខាងលើ មានគ្រីស្តបរិស័ទមួយចំនួនថ្វាយខ្លួនទៅព្រះជាម្ចាស់តាមរបៀបពិសេសដោយសច្ចារក្សាព្រហ្មចារីភាព ភាពក្រីក្រ និងស្តាប់បង្គាប់ (ក្រុមបព្វជិត)។ [871-876,934,935]

១៣៩.តើការត្រាស់ហៅរបស់គ្រីស្តបរិស័ទដែលជាគ្រហស្ថគឺអ្វី?

ចាប់ផ្តើមចេញពីអគ្គសញ្ញាជ្រមុជទឹក គ្រីស្តបរិស័ទដែលជាគ្រហស្ថត្រូវបានត្រាស់ហៅឱ្យថ្វាយខ្លួនរស់នៅក្នុងសង្គមដើម្បីឱ្យព្រះរាជ្យរបស់ព្រះជាម្ចាស់លូតលាស់យ៉ាងរឹងមាំនៅក្នុងលោកនេះ។ [877-913,940-943]

១៤០.ហេតុអ្វីបានជាព្រះសហគមន៍របស់ព្រះគ្រីស្តមិនមែនជាសា្ថប័ននៃលទ្ធិប្រជាធិបតេយ្យ?

លទ្ធិប្រជាធិបតេយ្យត្រូវបានដឹកនាំដោយគោលការណ៍ និងអំណាចដែលមកពីមនុស្សលោក។ នៅក្នុងព្រះសហគមន៍ អំណាចទាំងអស់គឺមកពីព្រះគ្រីស្ត ដូច្នេះហើយបានជាព្រះសហគមន៍មានរចនាសម្ពន្ធតាមលំដាប់ថ្នាក់ដែលមកពីព្រះគ្រីស្ត។ [874-879]

១៤១.តើមុខងាររបស់សម្តេចប៉ាបគឺអ្វី?

សម្តេចប៉ាបគឺជាអ្នកបន្តមុខងារពីសន្តសិលា និងជាប្រមុខនៃក្រុមលោកអភិបាល ដូច្នេះមុខងាររបស់សម្តេចប៉ាបគឺធ្វើយ៉ាងណាដើម្បីរក្សាឯកភាពក្នុងព្រះសហគមន៍។ សម្តេចប៉ាបមានអំណាចពេញលេញក្នុងការដឹកនាំថែទាំព្រះសហគមន៍ (PASTORAL AUTHORITY ) ក៏ដូចជាមានសិទ្ធិក្នុងការសម្រេចនូវអ្វីៗដែលទាក់ទងទៅនឹងគោលលទ្ធិ ក៏ដូចជា ច្បាប់ក្នុងព្រះសហគមន៍ផងដែរ។ [880-882,936,937]

១៤២.តើលោកអភិបាលអាចធ្វើការបង្រៀនសេចក្តីដែលប្រឆាំងទៅនឹងសម្តេចប៉ាប ឬសម្តេចប៉ាបអាចប្រព្រឹត្តដូច្នេះចំពោះលោកអភិបាលវិញបានដែរឬទេ?

អស់លោកអភិបាលអាចមានសិទ្ធិបង្រៀនសេចក្តីណា ដែលបង្ហាញពីភាពជាធ្លុងតែមួយរួមជាមួយសម្តេចប៉ាប។ រីឯសម្តេចប៉ាបវិញ ក្នុងករណីមួយចំនួនជាក់ស្តែង សម្តេចប៉ាបអាចធ្វើការសម្រេចចិត្តដោយមិនចាំបាច់ទទួលការឯកភាពពីលោកអភិបាលដទៃទៀតបាន។ [880-890]

១៤៣.តើសម្តេចប៉ាបពិតជាមានអំណាចដែលមិនអាចភ័ន្តច្រឡំ(INFALLIBLE)បានមែនឬយ៉ាងណា?

សម្តចប៉ាបមានអំណាចដែលមិនអាចភ័ន្តច្រឡំបាន (INFALLIBLE) នៅពេលសម្តេចប៉ាបធ្វើសេចក្តីប្រកាសអំពីការបង្រៀនរបស់ព្រះសហគមន៍ ឬសីលធម៌ ឬគោលលទ្ធិអំពីជំនឿយ៉ាងឱឡារឹកលើវិមានរបស់សម្តេចប៉ាប (ex cathedra) អំណោយទានដែលមិនអាចភ័ន្តច្រឡំរបស់សម្តេចប៉ាបនេះត្រូវបានប្រព្រឹត្តទៅក្រោយពីការសម្រេចចិត្ត និងឯកភាពរួមគ្នាជាមួយក្រុមលោកអភិបាលនិងសម្តេចប៉ាប ជាពិសេសនៅពេលដែលមានមហាសន្និបាតរវាងសម្តេចប៉ាបនិងក្រុមលោកអភិបាល។ [888-892]

១៤៤.តើមុខងាររបស់លោកអភិបាលគឺអ្វី?

អស់លោកអភិបាលមានមុខងារទទួលខុសត្រូវព្រះសហគមន៍ក្នុងតំបន់របស់ខ្លួន (ភូមិភាគ) និងចែករំលែកការទទួលខុសត្រូវរបស់ព្រះសហគមន៍កាតូលិកសាកល។ លោកអភិបាលប្រតិបត្តិមុខងាររបស់ខ្លួនក្នុងស្មារតីឯកភាពជាធ្លុងតែមួយរួមជាមួយអស់លោកអភិបាលដទៃទៀត ដើម្បីជាប្រយោជន៍ដល់ព្រះសហគមន៍ទាំងមូល ក្រោមការដឹកនាំរបស់សម្តេចប៉ាប។ [886-887,893-896,938-939]

១៤៥.ហេតុអ្វីបានជាព្រះយេស៊ូចង់ឱ្យមានគ្រីស្តបរិស័ទមួយចំនួនថ្វាយខ្លួនទាំងស្រុងដើម្បីរស់នៅជីវិតជាអ្នកបួសដោយសច្ចារក្សាព្រហ្មចារីភាព ភាពក្រីក្រ និងស្តាប់បង្គាប់ដូច្នេះ?

ព្រះជាម្ចាស់ជាសេចក្តីស្រលាញ់ ដូច្នេះហើយព្រះអង្គក៏ចង់ឱ្យយើងស្រលាញ់ព្រះអង្គវិញដែរ ដោយការថ្វាយខ្លួនទាំងស្រុង ដើម្បីស្រលាញ់ព្រះជាម្ចាស់ដូចព្រះយេស៊ូ មានន័យថាត្រូវរស់នៅលីវអស់មួយជីវិត ប្រកាន់ភា្ជប់ភាពក្រីក្រ និងស្តាប់បង្គាប់។ អស់អ្នកដែលជ្រើសរើសយកផ្លូវនេះត្រូវមានខួរក្បាល បេះដូង និងដៃទាំងគូរដើម្បីបម្រើព្រះជាម្ចាស់ និងបងប្អូនឯទៀតដោយសេរីភាព។ [914-933,944-945]

ខ្ញុំជឿលើសហភាពរវាងជនដ៏វិសុទ្ធទាំងឡាយ

១៤៦.តើសហភាពរវាងជនដ៏វិសុទ្ធទាំងឡាយមានន័យដូចម្តេច?

មនុស្សទាំងអស់ មិនថាប្រុសឬស្រីទេ ដែលបានទុកចិត្តផ្ញើជីវិតទាំងស្រុងទៅលើព្រះគ្រីស្ត តាមរយៈអគ្គសញ្ញាជ្រមុជទឹក ទោះបីពួកគេរស់ ឬស្លាប់ក្តី សុទ្ធតែបានចូលរួមក្នុងសហភាពនៃជនដ៏វិសុទ្ធទាំងឡាយ។ ពីព្រោះក្នុងអង្គព្រះគ្រីស្តយើងគឺជារូបកាយតែមួយ ហើយយើងក៏រស់នៅដោយរួបរួមគ្នារវាងនៃផ្ទៃមេឃ និងផែនដឺដែរ។ [946-962]

១៤៧.ហេតុអ្វីបានជាព្រះនាងម៉ារីមានកន្លែងមួយដ៏ល្អប្រសើរនៅក្នុងសហភាពនៃជនដ៏វិសុទ្ធដូច្នេះ?

ព្រះនាងម៉ារីគឺជាមាតានៃព្រះជាម្ចាស់ ព្រះនាងបានរួបរួមយ៉ាងជិតស្និទ្ធរួមជាមួយព្រះយេស៊ូនៅលើផែនដីនេះក៏ដូចជានៅស្ថានបរមសុខដែរ។ ព្រះនាងម៉ារីគឺជាព្រះមហាក្សត្រីនៃស្ថានបរមសុខ ក្នុងភាពជាមាតា ព្រះនាងជិតស្និទ្ធនឹងយើងរាល់គ្នា ព្រះនាងត្រូវបានព្រះជាម្ចាស់ស្វាគមន៍ក្នុងព្រះរាជ្យនៃស្ថានបរមសុខទាំងរូបកាយ និងព្រលឹងវិញ្ញាណ។ [972]

១៤៨.តើព្រះនាងម៉ារីអាចជួយយើងបានដែរឬទេ?

ប្រាកដណាស់ តាំងពីដើមដំបូងនៃព្រះសហគមន៍ ធ្លាប់មានបទពិសោធន៍អំពីការជួយគាំពារដែលមកពីព្រះនាងម៉ារី។ នៅក្នុងប្រវត្តិសាស្រ្តរបស់ព្រះសហគមន៍​ មានគ្រីស្តបរិស័ទរាប់លាននាក់បានធ្វើសាក្សីអំពីការជួយគាំពារដែលមកពីព្រះនាងម៉ារី។ [967-970]

១៤៩.តើយើងអាចថ្វាយបង្គំព្រះនាងម៉ារីបានដែរឬទេ?

មិនបានទេ យើងថ្វាយបង្គំតែព្រះជាម្ចាស់តែមួយព្រះអង្គគត់ ប៉ុន្តែយើងអាចសម្តែងការគោរពចំពោះព្រះនាងម៉ារីតាមរបៀបពិសេសបាន ពីព្រោះព្រះនាងជាព្រះមាតានៃព្រះសង្គ្រោះ។ [971]

ខ្ញុំជឿលើការលើកលែងទោសឱ្យរួចពីបាប

១៥០.តើព្រះសហគមន៍អាចលើកលែងទោសយ៉ាងពិតប្រាកដមែនដែរឬទេ?

ព្រះសហគមន៍អាចលើកលែងទោសបាន។ ព្រះយេស៊ូបានប្រគល់មុខងារនៃការលើកលែងទោសនេះឱ្យព្រះសហគមន៍ ដើម្បីរំដោះមនុស្សចេញពីអំពើបាបរបស់ខ្លួន។ [981-983,986-987]

១៥១.តើព្រះសហគមន៍លើកលែងទោសតាមរបៀបណា?

ការលើកលែងទោសចំបងបង្គស់គឺអគ្គសញ្ញាណជ្រមុជទឹក។ បន្ទាប់មកមានអគ្គសញ្ញានៃការសម្រុះសម្រួល ( ការដឹងខ្លួនខុស ទទួលសារភាព ) ដែលចាំបាច់ក្នុងការលើកលែងទោសអំពើបាបធ្ងន់។​ រីឯអំពើបាបស្រាលវិញអាចធ្វើការសារភាពបាប ប្រព្រឹត្តកិច្ចការដែលបង្ហាញពីការសោកស្តាយកំហុសសមនិងកំហុសដែលខ្លួនបានប្រព្រឹត្ត ដូចជាអានព្រះគម្ពីរ អធិដ្ឋាន តមអាហារ និងកិច្ចការមេត្តាករុណាផ្សេងៗ។ [976-980,984-987]

ខ្ញុំជឿថារូបកាយមនុស្សនឹងមានជីវិតថ្មី

១៥២.ហេតុអ្វីបានជាយើងជឿថាមនុស្សស្លាប់នឹងរស់ឡើងវិញ?

យើងជឿថាមនុស្សស្លាប់នឹងរស់ឡើងវិញ ដោយសារព្រះយេស៊ូបានមានព្រះជន្មរស់ឡើងវិញពីក្នុងចំណោមមនុស្សស្លាប់ ព្រះអង្គមានព្រះជន្មអស់កល្បជានិច្ច ហើយព្រះអង្គប្រោសឱ្យយើងចូលរួមក្នុងព្រះជន្មអស់កល្បជានិច្ចនេះរួមជាមួយព្រះអង្គដែរ។ [988-991]

១៥៣.ហេតុអ្វីបានជាយើងជឿថារូបកាយមនុស្សនឹងរស់ឡើងវិញ?

ព្រះគម្ពីរបាននិយាយអំពីរូបកាយ គឺចង់សំដៅទៅលើភាពទន់ខ្សោយរបស់រូបកាយដែលរមែងតែងតែស្លាប់។ ទោះជាយ៉ាងនេះក្តី ព្រះជាម្ចាស់មិនបានមើលងាយរូបកាយមនុស្សទេ។ ក្នុងអង្គព្រះគ្រីស្ត ព្រះអង្គបានទទួលយករូបកាយមនុស្ស ដើម្បីសង្គ្រោះមនុស្ស។ ព្រះជាម្ចាស់មិនសង្គ្រោះត្រឹមតែវិញ្ញាណរបស់មនុស្សទេ តែព្រះអង្គសង្គ្រោះមនុស្សទាំងព្រលឹងវិញ្ញាណនិងរូបកាយផងដែរ។ [988-991,997-1001,1005]

១៥៤.តើនៅពេលយើងស្លាប់មានអ្វីកើតឡើង?

នៅពេលយើងស្លាប់ ព្រលឹងវិញ្ញាណចាកចេញពីរូបកាយ រូបកាយប្រែជាស្អុយរលួយ រីឯព្រលឹងវិញ្ញាណវិញទៅជួបព្រះជាម្ចាស់ ហើយរង់ចាំថ្ងៃដែលអាចរួបរួមគ្នាជាមួយរូបកាយនៅថ្ងៃចុងក្រោយនៃពិភពលោក។ [992-1004,1016-1018]

១៥៥.ប្រសិនបើយើងទុកចិត្តលើព្រះជាម្ចាស់ តើព្រះអង្គនឹងជួយយើងដូចម្តេចនៅពេលយើងស្លាប់ ?

ព្រះយេស៊ូនឹងយាងមកជួបយើង ហើយនាំឱ្យចូលទៅកាន់ជីវិតអស់កល្បជានិច្ច។ សន្តីថេរេសានៃព្រះកុមារយេស៊ូបាននិយាយថា ៖ ˝មិនមែនសេចក្តីស្លាប់ទេដែលមកទទួលខ្ញុំ គឺព្រះជាម្ចាស់ទេតើដែលមកទទួលខ្ញុំ ˝ [1005-1014,1016,1019]

ខ្ញុំជឿថាមានជីវិតអស់កល្បជានិច្ច

១៥៦.តើជីវិតអស់កល្បជានិច្ចមានន័យដូចម្តេច?

ជីវិតអស់កល្បជានិច្ចចាប់ផ្តើមនៅពេលដែលយើងទទួលអគ្គសញ្ញាជ្រមុជទឹក ហើយជីវិតនេះនៅតែបន្តក្រោយពីស្លាប់និងគ្មានទីបញ្ចប់ឡើយ។ [1020]

១៥៧.តើយើងត្រូវតែទទួលការវិនិច្ឆ័យទោសក្រោយពីស្លាប់ឬ?

ក្រោយពីស្លាប់មនុស្សត្រូវតែទទួលការវិនិច្ឆ័យទោស ការវិនិច្ឆ័យទោសនេះគឺត្រូវបានធ្វើឡើងដោយលក្ខណៈជាបុគ្គល។ រីឯថ្ងៃចុងក្រោយបំផុត និងមានការវិនិច្ឆ័យរួមនៅពេលដែលព្រះគ្រីស្តនឹងយាងមកក្នុងសិរីរុងរឿងរបស់ព្រះអង្គ។

១៥៨.តើស្ថានបរមសុខជាអ្វី?

ស្ថានបរមសុខគឺជាពេលវេលាគ្មានដែនកំណត់នៃសេចក្តីស្រលាញ់ដែលគ្មានអ្វីអាចបំបែកយើងចេញពីព្រះជាម្ចាស់ ដែលយើងបានស្រលាញ់និងស្វែងរកពេញមួយជីវិតរបស់យើង។ ជាពេលដែលយើងបានរួបរួមជាមួយអស់ទេវទូត និងសន្តបុគ្គលទាំងឡាយ  ព្រលឹងវិញ្ញាណបានទទួលសុភមង្គលជានិច្ចដោយបាននៅក្បែរព្រះជាម្ចាស់។ [1023-1026,1053]

១៥៩.តើស្ថាជម្រះបាបជាអ្វី?

ស្ថានជម្រះបាបត្រូវបានចាត់ទុកថាជាស្ថានមួយ តាមពិតទៅវាជាស្ថានភាពដែលអស់អ្នកស្លាប់នៅក្នុងព្រះហឫទ័យប្រណៃសន្តោសរបស់ព្រះជាម្ចាស់ ត្រូវបានទទួលការសង្គ្រោះពីព្រះអង្គ ប៉ុន្តែត្រូវឆ្លងកាត់ការលាងជម្រះមុននឹងពួកគេបានទៅជួបព្រះភក្រ្តព្រះជាម្ចាស់ ឬហៅថាស្ថានជម្រះបាប។ [1030-1031]

១៦០.តើយើងអាចជួយអ្វីខ្លះដល់អស់អ្នកដែលកំពុងស្ថិតនៅក្នុងស្ថានជម្រះបាប?

យើងអាចជួយពួកគេបាន ព្រោះអស់អ្នកណាដែលបានទទួលអគ្គសញ្ញាជ្រមុជទឹកសុទ្ធតែត្រូវបានព្រះគ្រីស្តអញ្ចើញឱ្យចូលរួមក្នុងសហភាពនៃជនដ៏វិសុទ្ធទាំងឡាយ ដែលមានទំនាក់ទំនងគ្នាទៅវិញទៅមក។ អស់អ្នកដែលមាននៅរស់អាចជួយវិញ្ញាណក្ខ័ននៃអស់អ្នកជឿដែលបានចែកឋានហើយកំពុងស្ថិតនៅក្នុងស្ថានជម្រះបាប។ [1032]

១៦១.តើស្ថាននរកជាអ្វី?

ស្ថាននរកគឺជាស្ថានភាពមួយដែលឃ្លាតឆ្ងាយពីព្រះជាម្ចាស់អស់កល្បជានិច្ច គឺបាត់បង់សេចក្តីស្រលាញ់ទាំងស្រុង។ [1033-1037]

១៦២.តើមានស្ថាននរកដូចម្តេចបាន បើព្រះជាម្ចាស់ជាសេចក្តីស្រលាញ់ដូច្នេះ?

មិនមែនព្រះជាម្ចាស់ជាអ្នកចោទប្រកាន់ទោសមនុស្សលោក និងឱ្យមនុស្សធ្លាក់ទៅក្នុងស្ថាននរកទេ គឺមកពីមនុស្សខ្លួនឯងទេតើដែលបានចោទប្រកាន់ខ្លួនឯងដោយការបដិសេធសេចក្តីស្រលាញ់ និងធម៌មេត្តាករុណារបស់ព្រះជាម្ចាស់។ ពួកគេបានធ្វើឱ្យបាត់បង់ជីវិតអស់កល្បជានិច្ច ដោយសម្រេចចិត្តផ្តាច់ចេញពីព្រះជាម្ចាស់ដោយខ្លួនឯងផ្ទាល់ ។ [1036-1037]

១៦៣.តើការវិនិច្ឆ័យចុងក្រោយបំផុត (ការវិនិច្ឆ័យរួម) ជាអ្វី?

ការវិនិច្ឆ័យចុងក្រោយបំផុតនិងប្រព្រឹត្តទៅនៅពេលអវសានកាលនៃពិភពលោក នៅពេលដែលព្រះគ្រីស្តយាងមកជាលើកទីពីរ។ ˝មនុស្សស្លាប់ទាំងប៉ុន្មាននិងឭព្រះសូរសៀងរបស់ព្រះបុត្រ ហើយចេញពីផ្នូរមក អ្នកដែលបានប្រព្រឹត្តអំពើល្អនឹងរស់ឡើងវិញ ដើម្បីទទួលជីវិត រីឯអ្នកដែលបានប្រព្រឹត្តអំពើអាក្រក់នឹងរស់ឡើងវិញដើម្បីទទួលទោស។˝ (យហ ៥,២៩)។ [1038-1041,1058-1059]

១៦៤.តើថ្ងៃចុងក្រោយនៃពិភពលោកនឹងទៅជាយ៉ាងណា?

នៅពេលចុងក្រោយ ព្រះជាម្ចាស់នឹងបង្កើតផ្ទៃមេឃថ្មី និងផែនដីថ្មី។ សេចក្តីអាក្រក់និងមិនមានអំណាចដើម្បីទាក់ទាញទៀតដែរ។ អស់អ្នកដែលបានទទួលការសង្គ្រោះនិងឈរនៅចំពោះព្រះភក្រ្តព្រះជាម្ចាស់ដូចជាមិត្តសម្លាញ់របស់ព្រះអង្គ។ សេចក្តីប្រាថ្នាចង់បានសន្តិភាព យុត្តិធម៌របស់ពួកគេត្រូវបានបំពេញ សុភមង្គលរបស់ពួកគេគឹបានទតឃើញព្រះភក្រ្តរបស់ព្រះជាម្ចាស់។ ព្រះជាម្ចាស់ដែលជាព្រះត្រៃឯកគង់នៅកណ្តាលពួកគេ ព្រះអង្គនឹងជូតទឹកភ្នែកឱ្យពួកគេ រីឯសេចក្តីស្លាប់ ទុក្ខព្រួយ សំណោក និងបញ្ហានឹងមិនមានទៀតទេ។ [1042-1050,1060]

១៦៥.ហេតុអ្វីបានជាយើងឆ្លើយ អាម៉ែននៅចុងបញ្ចប់នៃធម៌អង្វរនានា?

យើងបញ្ចប់ធម៌ប្រកាសជំនឿដោយឆ្លើយថា​ អាម៉ែន។ ពាក្យអាម៉ែន មានន័យថា យល់ព្រម ដោយសារព្រះជាម្ចាស់អញ្ចើញយើងឱ្យធ្វើជាសាក្សីនៃជំនឿនេះ។ អស់អ្នកណាដែលឆ្លើយអាម៉ែនដោយអំណរសប្បាយ និងសេរីភាព គឺបានចូលរួមសម្រេចនូវគម្រោងការណ៍នៃការបង្កើត និងសង្គ្រោះរបស់ព្រះជាម្ចាស់ដែរ។ អាម៉ែនក៏ជាកាជឿជាក់យ៉ាងម៉ត់មាំ ទុកចិត្ត និងភក្តីភាព។ [1061-1065]