សូមថ្លែងលិខិតគ្រីស្តទូតយ៉ាកុប យក ៤,១៣-១៧

បងប្អូនជាទីស្រឡាញ់!
សូមស្តាប់ខ្ញុំសិន! បងប្អូនតែងពោលថា “ថ្ងៃនេះ ឬស្អែក​យើងនឹងធ្វើដំណើរទៅក្រុងមួយ ហើយស្នាក់នៅក្រុងនោះមួយឆ្នាំ ដើម្បីរកស៊ីនឹងបាន​ចំណេញ!។ ខ្ញុំសូមជម្រាបថា បងប្អូនពុំដឹងថា ថ្ងៃស្អែក ជីវិតបងប្អូននឹងទៅជាយ៉ាងណា​ឡើយ! បងប្អូនប្រៀបបីដូចជាចំហាយទឹកដែលមានតែមួយភ្លែត រួចក៏រសាត់បាត់ទៅ។ បងប្អូនគួរតែពោលថា បើព្រះអម្ចាស់សព្វព្រះហប្ញទ័យ យើងនឹងមានជីវិត ហើយ​យើងធ្វើការនេះ ឬធ្វើការនោះ។ តែឥឡូវនេះ បងប្អូនបែរជាក្អេងក្អាង អួតបំប៉ោង​ទៅវិញ។ ការអួតក្អេងក្អាងបែបនេះអាក្រក់ណាស់។ ប្រសិនបើអ្នកណាចេះធ្វើអំពើល្អ តែមិនព្រមធ្វើ អ្នកនោះប្រព្រឹត្តអំពើបាបហើយ”។

ទំនុកតម្កើងលេខ ៤៩ (៤៨),២-៣.៦-១១ បទកាកគតិ

ពិធីអបអរសាទរព្រះគម្ពីរដំណឹងល្អតាម យហ ១៤,៦-៩

អាលេលូយ៉ា! អាលេលូយ៉ា!
ខ្ញុំហ្នឹងហើយជាសេចក្តីពិត និងជាជីវិត។ គ្មាននរណាម្នាក់អាចទៅគាល់ព្រះបិតាបានឡើយ លើកលែងតែ​ទៅតាមរយៈខ្ញុំ។ អាលេលូយ៉ា!

សូមថ្លែងព្រះគម្ពីរដំណឹងល្អតាមសន្ត ម៉ាកុស មក ៩,៣៨-៤០

លោកយ៉ូហានទូលព្រះយេស៊ូថា៖ «ព្រះគ្រូ! យើងខ្ញុំបានឃើញបុរសម្នាក់ដេញខ្មោចក្នុងនាមព្រះគ្រូ។ យើងខ្ញុំបានឃាត់គេ តែគេមិនមកតាមយើងខ្ញុំទេ»។ ព្រះយេស៊ូមាន​ព្រះបន្ទូលថា៖ «កុំឃាត់គេអី ពុំដែលមាននរណាអាចធ្វើការអស្ចារ្យក្នុងនាមខ្ញុំ រួចបែរ​ជានិយាយអាក្រក់អំពីខ្ញុំភ្លាមនោះឡើយ ដ្បិតអ្នកណាមិនជំទាស់នឹងយើង អ្នកនោះ​ជាគ្នាយើងហើយ»។