អត្ថន័យពាក្យ៖ សេចក្តីសង្ឃឹម
សេចក្តីស្រឡាញ់ អំណរ និងសេចក្តីសុខសាន្ត
រដូវអបអរសាទរ
(រដូវរង់ចាំ)
ព្រះគ្រីស្តយាងមក
ឆ្នាំ«គ»
គ្រីស្តបរិស័ទនាំគ្នាប្រារព្ធ “រដូវអបអរសាទរព្រះគ្រីស្តយាងមក” ដើម្បីប្រកាសជំនឿរបស់ខ្លួនចំពោះព្រះជាម្ចាស់យាងមករួមសាមគ្គីជាមួយមនុស្សលោក គឺព្រះអង្គប្រទានឱ្យជីវិតមនុស្សមានតម្លៃ។
ព្រះគ្រីស្តបានយាងមកជាស្ថាពរ គឺនាំឱ្យគេមានទំនាក់ទំនងជាមួយព្រះបិតា។ សម័យឥឡូវនេះជាសម័យព្រះសហគមន៍ គឺសម័យរបស់យើងជាគ្រីស្តបរិស័ទ។ យើងមានភារៈកិច្ចដ៏សំខាន់ គឺនាំការសង្គ្រោះរបស់ព្រះគ្រីស្តដល់មនុស្សគ្រប់ជាតិសាសន៍ ជាពិសេសយកចិត្តទុកដាក់រួមគ្នាបំបាត់មូលហេតុទាំងឡាយ ដែលបណ្តាលឱ្យមនុស្សកើតទុក្ខ មានចិត្តលោភលន់ ស្អប់គ្នា សង្គ្រាម ហិង្សា និងអយុត្តិធម៌ជាដើម។ យើងជាគ្រីស្តបរិស័ទសម្តែងសេចក្តីសង្ឃឹមរបស់ខ្លួន និងទទួលស្គាល់វត្តមានរបស់ព្រះគ្រីស្តដែលយាងមកសព្វថ្ងៃដែរ។ គ្រីស្តបរិស័ទបង្ហាញជំនឿរបស់ខ្លួនចំពោះព្រះគ្រីស្ត ដែលបានសង្គ្រោះមនុស្សលោក រួចហើយលាតសន្ធឹងការសង្គ្រោះរបស់ព្រះអង្គ រហូតដល់ពេលព្រះអង្គយាងមកនៅគ្រាចុងក្រោយបំផុត។
អត្ថន័យទៀនប្រចាំថ្ងៃអាទិត្យនីមួយៗ
រដូវអបអរសាទរព្រះគ្រីស្តយាងមក មានរយៈពេល៤អាទិត្យមុនបុណ្យព្រះយេស៊ូប្រសូត។ ថ្ងៃអាទិត្យនីមួយៗក្នុងរដូវនេះ គ្រីស្តបរិស័ទរៀបចំកម្រងទៀន ដើម្បីអុជបំភ្លឺសម្រាប់ប្រារព្ធពិធីបុណ្យថ្ងៃអាទិត្យនីមួយៗ៖
- ទៀនថ្ងៃអាទិត្យទី១ មានពណ៌ស្វាយគឺជានិមិត្តរូបនៃសេចក្តីសង្ឃឹម អំពីការទន្ទឹងរង់ចាំព្រះគ្រីស្ត ដែលនឹងយាងមកស្របតាមព្រះបន្ទូលសន្យាដែលព្យាការីបានថ្លែង។ ថ្ងៃអាទិត្យទី១ក្នុងរដូវនេះ គឺជាថ្ងៃដើមដំបូងចូលឆ្នាំថ្មីក្នុងប្រតិទិននៃគ្រីស្តសាសនា។
(អត្ថបទព្រះគម្ពីរប្រចាំថ្ងៃអាទិត្យទី០១ ឆ្នាំ”គ” រដូវអបអរសាទរព្រះគ្រីស្តយាងមក។) - ទៀនថ្ងៃអាទិត្យទី២ មានពណ៌ស្វាយ គឺជានិមិត្តរូបនៃ ជំនឿ ដែលរម្លឹកអំពីនាងម៉ារី និងលោកយ៉ូសែបធ្វើដំណើរទៅភូមិបេថ្លេហឹម។
(អត្ថបទព្រះគម្ពីរប្រចាំថ្ងៃអាទិត្យទី០២ ឆ្នាំ”គ” រដូវអបអរសាទរព្រះគ្រីស្តយាងមក។) - ទៀនថ្ងៃអាទិត្យទី៣ មានពណ៌ផ្កាឈូក គឺជានិមិត្តរូបនៃ អំណរ ពោលគឺអំណរដ៏ពេញលក្ខណៈរបស់ពិភពលោក ដោយសារព្រះយេស៊ូបានប្រសូតមកក្នុងពិភពលោកនេះ។
(អត្ថបទព្រះគម្ពីរប្រចាំថ្ងៃអាទិត្យទី០៣ ឆ្នាំ”គ” រដូវអបអរសាទរព្រះគ្រីស្តយាងមក។) - ទៀនថ្ងៃអាទិត្យទី៤ មានពណ៌ស្វាយ គឺជានិមិត្តរូបនៃ សេចក្តីសុខសាន្ត ដែលជាពាក្យរបស់ទេវទូតបានប្រកាសឡើងថា «សូមឱ្យពិភពលោកបានប្រកបដោយសេចក្តីសុខសាន្ត»។
(អត្ថបទព្រះគម្ពីរប្រចាំថ្ងៃអាទិត្យទី០៤ ឆ្នាំ”គ” រដូវអបអរសាទរព្រះគ្រីស្តយាងមក។) - ទៀនពណ៌ស នៅចំកណ្តាល គឺជាទៀនដែលបំភ្លឺក្នុងរាត្រីបុណ្យព្រះយេស៊ូប្រសូត។ ទៀននេះមានឈ្មោះថា “ទៀនព្រះគ្រីស្ត“។
(អត្ថបទព្រះគម្ពីរថ្ងៃបុណ្យព្រះយេស៊ូប្រសូត។)
