អត្ថបទព្រះគម្ពីរ
ថ្ងៃអង្គារ ទី១៤ ខែកញ្ញា ឆ្នាំ២០២១
អាទិត្យទី២៤ រដូវធម្មតា
ក្រហម
បុណ្យគោរព
លើកតម្កើងព្រះឈើឆ្កាង
ឈើឆ្កាងជាសញ្ញាសម្គាល់បង្ហាញពីជ័យជម្នះរបស់ព្រះគ្រីស្តលើសេចក្តីស្លាប់ និងលើចិត្តឃោរឃៅរបស់មនុស្សលោក។ ព្រះគ្រីស្តជាអ្នកឈ្នះមារ ដែលជា “អម្ចាស់នៃពិភពលោកនេះ”។ ពីលើឈើឆ្កាងព្រះយេស៊ូទាក់ទាញមនុស្សទាំងអស់មកព្រះអង្គ។ ព្រះអង្គក៏ថ្វាយសក្ការបូជាដែលរំដោះមនុស្សលោកដែរ។
ថ្ងៃ ១៤ កញ្ញា ឆ្នាំ៣៣៥ គ្រីស្តបរិស័ទនាំគ្នាធ្វើពិធីបុណ្យឆ្លងព្រះវិហារសង់នៅលើផ្នូរព្រះយេស៊ូ គឺនៅក្បែរកន្លែង ដែលគេឆ្កាងព្រះអង្គ។ ព្រះវិហារនេះមានឈ្មោះថា “ព្រះគ្រីស្តរស់ឡើងវិញ”។ តាំងពីសតវត្សទី៤ រៀងមក គ្រីស្តបរិស័ទនាំគ្នាធ្វើពិធីគោរពឈើឆ្កាងព្រះគ្រីស្តនៅថ្ងៃ ១៤ កញ្ញា។
អត្ថបទទី១
សូមថ្លែងព្រះគម្ពីរជំនឿប្រជាជន ២១,៤-៩
ជនអ៊ីស្រាអែលចេញដំណើរពីភ្នំហ៊រតាមផ្លូវសមុទ្រកក់ដើម្បីវាងស្រុកអេដុម។ តាមផ្លូវប្រជាជនបាក់ទឹកចិត្ត ហើយនាំគ្នាពោលពាក្យប្រឆាំងនឹងព្រះជាម្ចាស់ ព្រមទាំងលោកម៉ូសេថា៖ «ហេតុអ្វីបានជាព្រះអង្គ និងលោកនាំពួកយើងចេញពីស្រុកអេស៊ីប ដើម្បីឱ្យពួកយើងស្លាប់ក្នុងវាលរហោស្ថានដូច្នេះ? ដ្បិតនៅទីនេះ គ្មានអាហារ គ្មានទឹកទាល់តែសោះ ហើយពួកយើងក៏ធុញទ្រាន់នឹងនំម៉ាណាដ៏គំរក់នេះដែរ!»។ ពេលនោះព្រះជាម្ចាស់ក៏ធ្វើឱ្យមានពស់ភ្លើងមកចឹកពួកគេបណ្តាលឱ្យបាត់បង់ជីវិតមនុស្សជាច្រើន ក្នុងចំណោមជនជាតិអ៊ីស្រាអែល។ ប្រជាជននាំគ្នាទៅជួបលោកម៉ូសេជម្រាបថា៖ “យើងខ្ញុំបានប្រព្រឹត្តអំពើបាប ដោយពោលពាក្យប្រឆាំងនឹងព្រះអម្ចាស់ ព្រមទាំងរូបលោកផ្ទាល់។ សូមលោកមេត្តាទូលអង្វរព្រះអម្ចាស់ សូមព្រះអង្គបណ្តេញពស់ទាំងនេះចេញឱ្យឆ្ងាយពីយើងខ្ញុំផង”។ លោកម៉ូសេក៏ទូលអង្វរព្រះអង្គឱ្យប្រជាជន។
ព្រះជាម្ចាស់មានបន្ទូលមកកាន់លោកម៉ូសេថា៖ «ចូរធ្វើរូបពស់ភ្លើងព្យួរលើបង្គោលមួយ។ អ្នកណាត្រូវពស់ចឹក ហើយសម្លឹងមើលទៅរូបពស់ អ្នកនោះនឹងរួចជិវិត»។ លោកម៉ូសេយកលង្ហិនធ្វើរូបពស់មួយហើយព្យួរលើបង្គោល។ ពេលនណាម្នាក់ត្រូវពស់ចឹក ហើយសម្លឹងមើលទៅពស់លង្ហិននោះ គេបានរួចជិវិត។
ឬសូមថ្លែងលិខិតរបស់គ្រីស្តទូតប៉ូលផ្ញើជូនគ្រីស្តបរិស័ទក្រុងភីលីព ២,៦-១១
បងប្អូនជាទីស្រឡាញ់!
ទោះបីព្រះគ្រីស្តមានឋានៈជាព្រះជាម្ចាស់ក៏ដោយ ក៏ព្រះអង្គពុំបានក្តោបក្តាប់ឋានៈ ដែលស្មើនឹងព្រះជាម្ចាស់នេះ ទុកជាកម្មសិទ្ធដាច់មុខរបស់ព្រះអង្គឡើយ។ ផ្ទុយទៅវិញព្រះអង្គបានលះបង់អ្វីៗទាំងអស់ មកយកឋានៈជាទាសករ ព្រះអង្គបានទៅជាមនុស្សដូចមនុស្សឯទៀតៗ ហើយក៏រស់នៅក្នុងភាពជាមនុស្សសាមញ្ញដែរ។ ព្រះអង្គបានដាក់ខ្លួនធ្វើតាមព្រះបញ្ជារហូតដល់សោយទិវង្គតលើឈើឆ្កាងថែមទៀតផង។ ហេតុនេះហើយ បានជាព្រះម្ចាស់លើកតម្កើងព្រះអង្គឡើងយ៉ាងខ្ពង់ខ្ពស់បំផុត ព្រមទាំងប្រោសប្រទានឱ្យព្រះអង្គមានព្រះនាមប្រសើរលើសអ្វីៗទាំងអស់ ដើម្បីឱ្យអ្វីៗទាំងអស់ ទាំងស្ថានបរមសុខ ទាំងនៅលើផែនដី ទាំងនៅក្រោមដីនាំគ្នាក្រាបថ្វាយបង្គំ នៅពេលណាឮព្រះនាមព្រះយេស៊ូ និងឱ្យមនុស្សគ្រប់ភាសាប្រកាសឡើងថា ព្រះយេស៊ូគ្រីស្តជាព្រះអម្ចាស់ ដើម្បីលើកតម្កើងសិរីរុងរឿងព្រះជាម្ចាស់ជាព្រះបិតា។
ទំនុកតម្កើងលេខ ៧៨ (៧៧), ៣-៤.៣៤-៣៩ បទព្រហ្មគីតិ
| ៣. | យើងបានឮគេប្រាប់ | ឱ្យយើងស្តាប់ជាដំណឹង |
| ដូនតាលោកខំប្រឹង | តំណាលរឿងគ្រប់ទាំងអស់។ | |
| ៤. | តំណាលពីឫទ្ធា | នុភាពជាស្នាព្រះហស្ត |
| អស្ចារ្យគ្មានចន្លោះ | ល្អឥតខ្ចោះទ្រង់ប្រព្រឹត្ត។ | |
| យើងនឹងនិយាយប្រាប់ | កូនចៅស្តាប់តទៅពិត | |
| កូនចៅត្រូវរិះគិត | មានគំនិតយល់មិនខាន។ | |
| ៣៤. | ពេលគេឃើញដូច្នេះ | គេរេរិះឈប់រួញរា |
| ប្រែចិត្តគំនិតជា | នាំគ្នីគ្នារកព្រះអង្គ។ | |
| ៣៥. | ពួកគេនឹកឃើញថា | អង្គក្សត្រាមិនបោះបង់ |
| ជាថ្មដាបិទបាំង | ការពារពាំងមាំមួនណាស់។ | |
| ៣៦. | ប៉ុន្តែតាមការពិត | គេមានចិត្តចង់បោកប្រោស |
| និយាយពាក្យផ្តេសផ្តាស់ | ឃើញជាក់ច្បាស់ពាក្យកុហក។ | |
| ៣៧. | គេមានចិត្តវៀចវេរ | មិនទៀងទេសែនអាក្រក់ |
| គេភូតភរកុហក | ក្បត់នឹងសម្ពន្ធមេត្រី។ | |
| ៣៨. | រីឯព្រះអង្គវិញ | ទ្រង់បញ្ចេញព្រះហឫទ័យ |
| មេត្តាករុណាក្រៃ | លើកទោសពៃរ៍ដោយយល់យោគ។ | |
| ៣៩. | ព្រះអង្គនៅចាំថា | គ្រប់អាត្មាជាមនុស្សលោក |
| ជីវិតសែនសោយសោក | ដូចខ្យល់បោកមិនត្រឡប់។ |
ពិធីអបអរសាទរព្រះគម្ពីរដំណឹងល្អ
អលេលូយ៉ា! អាលេលូយ៉ា!
បពិត្រព្រះគ្រីស្ត! យើងខ្ញុំសូមក្រាបថ្វាយបង្គំព្រះអង្គ សូមលើកតម្កើងព្រះអង្គ
ដ្បិតព្រះអង្គសង្គ្រោះមនុស្សលោក ដោយបានបូជាព្រះជន្មនៅលើឈើឆ្កាង! អាលេលូយ៉ា!
សូមថ្លែងព្រះគម្ពីរដំណឹងល្អតាមសន្តយ៉ូហាន ៣,១៣-១៧
ព្រះយេស៊ូមានព្រះបន្ទូលថា៖ «ពុំដែលមាននរណាបានឡើងទៅស្ថានបរមសុខឡើយ គឺមានតែបុត្រមនុស្សប៉ុណ្ណោះ ដែលបានយាងចុះពីស្ថានបរមសុខមក។ កាលនៅវាលរហោស្ថាន លោកម៉ូសេបានលើកពស់ឡើងយ៉ាងណា បុត្រមនុស្សនឹងត្រូវគេលើកឡើងយ៉ាងនោះដែរ ដើម្បីឱ្យអស់អ្នកដែលជឿលើព្រះអង្គ មានជីវិតអស់កល្បជានិច្ច។ ព្រះជាម្ចាស់ស្រឡាញ់មនុស្សលោកខ្លាំងណាស់ ហេតុនេះហើយបានជាព្រះអង្គប្រទានព្រះបុត្រាតែមួយរបស់ព្រះអង្គមក ដើម្បីឱ្យអស់អ្នកដែលជឿលើព្រះបុត្រា មានជីវិតអស់កល្បជានិច្ច គឺមិនឱ្យគេវិនាសឡើយ។ ព្រះជាម្ចាស់បានចាត់ព្រះបុត្រារបស់ព្រះអង្គឱ្យយាងមកក្នុងលោកនេះ ពុំមែនដើម្បីដាក់ទោសមនុស្សលោកទេ គឺដើម្បីសង្គ្រោះមនុស្សលោក ដោយសារព្រះបុត្រាវិញ»។
