អត្ថបទថ្ងៃច័ន្ទ អាទិត្យទី២២ រដូវធម្មតា ឆ្នាំ​ ខ

ថ្ងៃច័ន្ទ ទី៣០ ខែសីហា ឆ្នាំ២០២១ ព័ណបៃតង

អត្ថបទទី ១ ឆ្នាំសេស
សូមថ្លែងលិខិតទី១ របស់គ្រីស្ដទូតប៉ូលផ្ញើជូនគ្រីស្ដបរិស័ទក្រុងថេសាឡូនិក ១ ថស ៤,១៣-១៧

បងប្អូនជាទីស្រឡាញ់! យើងចង់ឲ្យបងប្អូនជ្រាបអំពីអស់អ្នកដែលស្លាប់ផុតទៅហើយ ​​ដើម្បីកុំឲ្យបងប្អូនព្រួយចិត្តដូចអ្នកឯទៀតៗដែលគ្មានសេចក្ដីសង្ឃឹមនោះឡើយ ។ ​ប្រសិនបើ​យើងជឿថា ព្រះយេស៊ូពិតជាសោយទិវង្គត ហើយទទួលព្រះជន្មដ៏រុងរឿងមែន យើងក៏ត្រូវជឿ​ថា ព្រោះតែព្រះយេស៊ូ ព្រះជាម្ចាស់នឹងនំាបងប្អូនដែលស្លាប់ទៅហើយ ឲ្យទៅនៅជាមួយព្រះយេស៊ូ​ដែរ ។
យើងសូមបញ្ជាក់ប្រាប់បងប្អូនតាមព្រះបន្ទូលរបស់ព្រះអម្ចាស់ថា នៅពេលព្រះអម្ចាស់​យាងមក យើងដែលមានជីវិតនៅឡើយ មិនទៅមុនអ្នកដែលស្លាប់នោះទេ ដ្បិតនៅពេលមាន​ឮស្នូរជាសញ្ញាលាន់ឡើង ហើយនៅពេលឮសម្លេងអគ្គទេវទូតនិងសម្លេងត្រែរបស់ព្រះជា​ម្ចាស់ ព្រះអម្ចាស់នឹងយាងចុះពីស្ថានបរមសុខមក ។ អស់អ្នកស្លាប់ទៅដែលជឿលើព្រះគ្រីស្ដ​នោះនឹងរស់ឡើងវិញជាមុន បន្ទាប់មក ទើបព្រះអម្ចាស់លើកយើងដែលមានជីវិតនៅឡើយ​ឲ្យឡើងទៅក្នុងពពកជាមួយអ្នកទំាងនោះ ដើម្បីទៅទទួលព្រះអង្គក្នុងអាកាសវេហាស៍ ហើយ​យើងនឹងស្ថិតនៅជាមួយព្រះអម្ចាស់រហូតតទៅ ។ ​

ទំនុកតម្កើងលេខ​ ៩៦ (៩៥),១-២.៤-៥.១១-១៣         បទព្រហ្មគិតិ

ពិធីអបអរសាទរព្រះគម្ពីរដំណឹងល្អ លក ៤,១៨

អាលេលូយ៉ា! អាលេលូយ៉ា! គេនាំដំណឹងល្អទៅប្រាប់ជនក្រីក្រថា ព្រះអម្ចាស់បានរំដោះប្រជាជនរបស់ព្រះអង្គហើយ! អាលេលូយ៉ា!

សូមថ្លែងព្រះគម្ពីរដំណឹងល្អតាមសន្តលូកា  លក ៤,១៦-៣០

ព្រះយេស៊ូយាងទៅភូមិណាសារ៉ែត ជាភូមិដែលព្រះអង្គគង់នៅកាលពីកុមារ ។ នៅថ្ងៃ​សប្ប័ទ ព្រះអង្គយាយទៅធម្មសាលាតាមទម្លាប់របស់ព្រះអង្គ ។ ព្រះអង្គក្រោកឈរឡើងដើម្បីអានព្រះគម្ពើរ ។ គេយកគម្ពីររបស់ព្យាការីអេសាយមកថ្វាយព្រះអង្គ ព្រះអង្គបើគម្ពីរ​ត្រង់អត្ថបទដែលមានចែងថា៖ « ព្រះវិញ្ញណរបស់អម្ចាស់សណ្ឋិាតលើខ្ញុំ ។ ព្រះអង្គបានចាក់​ប្រេងអភិសេកឲ្យខ្ញុំនាំដំណឹងល្អទៅប្រាប់ជនក្រីក្រ  ។ ព្រះអង្គបានចាត់ខ្ញុំឲ្យមកប្រកាសប្រាប់​ជនជាប់ជាឈ្លើយថា គេនឹងមានសេរីភាព ហើយប្រាប់មនុស្សខ្វាក់ថា  គេនឹងមើល៍ឃើញ​វិញ​ ។ ព្រះអង្គបានចាត់ខ្ញុំឲ្យមករំដោះអស់អ្នកដែលត្រូវគេសង្កត់សង្កិន ព្រមទាំងប្រកាសអំពី​ឆ្នំាដែលព្រះអម្ចាស់សម្ដែងព្រះហប្ញទ័យមេត្តាករុណា » ។
លុះអានចប់ហើយ ព្រះយេស៊ូបិទគម្ពីរប្រគល់ទៅអ្នកថែរក្សា រូចទ្រង់គង់ចុះវិញ ។​ មនុស្សគ្រប់រូបនៅក្នុងធម្មសាលាសម្លឹងមើលព្រះអង្គ ។ ព្រះយេស៊ូមានព្រះបន្ទូលថា៖ « នៅថ្ងៃនេះ ហេតុ​ការណ៍ដែលមានចែងទុកក្នុងគម្ពីរ ដូចអ្នករាល់គ្នាទើបស្ដាប់អំបាញ់មិញ បានកើតជា​រូបរាងហើយ » ។ ឮដូច្នេះ គេស្ងើចសរសើរព្រះយេស៊ូគ្រប់ៗគ្នា ទំាងនឹកឆ្ងល់អំពី​ព្រះបន្ទូលប្រកបដោយព្រះហប្ញទ័យប្រណីសន្ដោស ដែលហូរចេញពីព្រះឧិស្ឋរបស់ព្រះ​អង្គ។ គេពោលថា៖ « អ្នកនេះមិនមែនជាកូនរបស់ជាងយ៉ូសែបទេឬអី? » ។ ព្រះយេស៊ូមាន​ព្រះបន្ទូលទៅគេថា៖ « ប្រហែលជាអ្នករាល់គ្នាចង់យកសុភាសិតដែលចែងថា“ គ្រូពេទ្យអើយ!​​ ចូរមើល៍ជំងឺខ្លួនឲ្យជាសិនទៅ” មកផ្ចាញ់ផ្ចាលខ្ញុំទេដឹង! ឬមួយអ្នករាល់គ្នាចង់និយាយមកខ្ញុំ​ទៀតថា “យើងបានឮគេនិយាយអំពីកិច្ចការទំាងអស់ ដែលអ្នករាល់គ្នានៅក្រុងកាផានុម ចូរ​ធើ្វការដដែលនៅទីនេះ ជាស្រុករបស់អ្នកឲ្យយើងឃើញផង! ” ។ ព្រះអង្គមានព្រះបន្ទូលទៀត​ថា៖ «ខ្ញុំសូមប្រាប់ឲ្យអ្នករាល់គ្នាដឹងច្បាស់ថា មិនដែលមានព្យាការីណាម្នាក់ ត្រូវគេគោរពក្នុង​ស្រុកកំណើតរបស់ខ្លួនឡើយ ។ ខ្ញុំសុំបញ្ជាក់ថា នៅជំនាន់លោកអេលី មេឃរាំងអស់រយៈពេលបី​ឆ្នំាកន្លះ បណ្ដាលឲ្យមានទុរ្ភិក្សយ៉ាងខ្លាំងពេញទាំងស្រុក ។ នៅស្រុកអ៊ីស្រាអែល មានស្ដ្រីមេ​ម៉ាយជាច្រើន ក៏ប៉ុន្ដែ ព្រះជាម្ចាស់ពុំបានចាត់ព្យាការីណាម្នាក់នៅស្រុកអ៊ីស្រាអែលឡើយ គឺព្រះអង្គចាត់លោកឲ្យទៅជួបស្ដ្រីមេម៉ាយម្នាក់ ដែលរស់នៅក្នុងភូមិសារិបតា ក្នុងស្រុកស៊ីដូនវិញ ។ នៅជំនាន់អេលីសេ មានមនុស្សឃ្លង់ជា​ច្រើនក្នុងស្រុកអ៊ីស្រាអែល ប៉ុន្ដែ គ្មាននរណាម្នាក់បានជាសោះឡើយ គឺមានតែលោកណាម៉ាន់ ​ជាជនជាតិស៊ីរីម្នាក់ប៉ុណ្ណោះ » ។
កាលបានឮព្រះបន្ទូលទាំងនេះ អ្នកនៅក្នុងធម្មសាលាទាំងប៉ុន្មានខឹងព្រះយេស៊ូគ្រប់ៗ​គ្នា ។ គេក្រោកឡើង ចាប់ប្រអូសប្រទាញព្រះយេស៊ូចេញពីភូមិដែលសង់លើកំពូលភ្នំ នាំឆ្ពោះទៅមាត់​ជ្រោះ បម្រុងនឹងច្រានព្រះអង្គទម្លាក់ទៅក្រោម ។ ប៉ុន្ដែ ព្រះអង្គយាងចេញពីកណ្ដាលចំណោម​គេបាត់ទៅ ។