អត្ថបទថ្ងៃសៅរ៍-អាទិត្យទី២០ រដូវធម្មតា
ថ្ងៃសៅរ៍ ទី២១ ខែសីហា ឆ្នាំ២០២១ ព័ណស
សន្តៈ ពីយ៉ូ ទី១០ ជាសម្តេចប៉ាប
លោកយ៉ូសែបសារតូ(១៨៣៥-១៩១៤) ជាបូជាចារ្យដែលណែនាំគ្រីស្តបរិស័ទនៅស្រុកស្រែ ក្នុងប្រទេសអ៊ីតាលី រួចលោកទទួលមុខងារជាអភិបាលព្រះសហគមន៍នៅក្រុងមាន់តូវ៉ា និងវ៉េនេស៊ីយ៉ា (ប្រទេស អ៊ីតាលី)។ បន្ទាប់មកទៀត លោកទទួលមុខងារជាអភិបាលក្រុងរ៉ូម នៅឆ្នាំ១៩០៣។ លោកយកចិត្តទុកដាក់បំពេញគ្រប់បេសកកម្មរបស់លោក។ លោកដាស់តឿនគ្រីស្តបរិស័ទឱ្យទទួលព្រះកាយព្រះគ្រីស្តជាញឹកញាប់ ព្រមទាំងឱ្យក្មេងៗទទួលព្រះកាយព្រះអង្គបានដែរ។ លោកពន្យល់ថា៖ “អភិបូជា និងធម៌សាធារណៈនៃព្រះសហគមន៍ ពិតជាធ្វើឱ្យគ្រីស្តបរិស័ទរស់នៅតាមព្រះវិញ្ញាណដ៏វិសុទ្ធ”។
អត្ថបទទី១ ឆ្នាំសេស
សូមថ្លែងព្រះគម្ពីរនាងរ៉ូថ រថ ២,១-៣.៨; ៤,១៣-១៧
នាងណូអេមីមានសាច់ញាតិខាងប្តីម្នាក់ឈ្មោះបូអូស ជាអ្នកមានស្តុកស្តម្ភ។ នាងរូថជាជាតិម៉ូអាប់និយាយនឹងម្តាយក្មេកថា៖«សូមអ្នកម្តាយឲ្យកូនទៅសន្សំស្រូវនៅឯស្រែ! គង់តែមានគេអនុញ្ញាតឲ្យកូនសន្សំស្រូវពុំខាន!»។ នាងណូអេមីឆ្លើយតបថា៖«ទៅចុះកូន!»។ នាងរូថក៏ចេញទៅសន្សំស្រូវក្នុងស្រែតាមក្រោយពួកអ្នកច្រូត។ នាងមានភ័ព្វសំណាង ដោយទៅសន្សំស្រូវក្នុងស្រែរបស់លោកបូអូស។ ពេលនោះ លោកបូអូសនិយាយទៅកាន់នាងរូថថា៖«នាង! ចូរស្តាប់ ចូរនាងកុំទៅសន្សំស្រូវ ក្នុងស្រែណាផ្សេងទៀតឲ្យសោះ! កុំចេញទៅណាឆ្ងាយពីស្រែនេះឡើយ ចូរនៅជាមួយអ្នកបម្រើទាំងនេះចុះ! នាងត្រូវនៅជាប់នឹងអ្នកបម្រើខ្ញុំរហូត។ បើឃើញគេទៅកន្លែងណា ចូរនាងដើតាមគេទៅខ្ញុំ ហាមប្រុសៗមិនឲ្យប៉ះពាល់នាងឡើយ។ បើនាងស្រេកទឹក ចូរពិសាទឹកក្នុងក្អមដែលអ្នកបម្រើខ្ញុំដងចុះ!»។ ពេលនោះ នាងរ៉ូថក៏ក្រាបមុខដល់ដី ហើយនិយាយតបទៅលោកបូអូសថា៖«ហេតុអ្វីក៏លោកមេត្តានាងខ្ញុំដូច្នេះ? ហេតុអ្វីក៏លោកអាណិតអាសូរនាងខ្ញុំ ដែលជាជនជាតិបរទេសដូច្នេះ?»។ លោកបូអូសឆ្លើយតបថា៖«គេប្រាប់ខ្ញុំច្បាស់អំពីការទាំងប៉ុន្មានដែលនាងបានប្រព្រឹត្តចំពោះម្តាយក្មេកក្រោយពេលប្តីស្លាប់ចោល គឺនាងសុខចិត្តលះបង់ចោលឳពុកម្តាយ និងស្រុកកំណើតមករស់នៅជាមួយប្រជាជនដែលនាងមិនធ្លាប់ស្គាល់ពីមុន»។
ក្រោយមកលោកបូអូសយកនាងរូថធ្វើជាភរិយា។ ព្រះអម្ចាស់ប្រោសប្រទានឲ្យនាងមានផ្ទៃពោះ ហើយនាងសម្រាលបានកូនប្រុសមួយ។ ពេលនោះស្រីៗនៅភូមិបេថ្លេហឹម នាំគ្នាប្រាប់នាងណូអេមីថា ៖«សូមអរព្រះគុណព្រះជាអម្ចាស់! ដ្បិតព្រះអង្គបានប្រោសប្រទានឲ្យមានម្នាក់ថែរក្សាអ្នកតទៅទៀត! សូមឲ្យចៅរបស់អ្នកមានឈ្មោះល្បីក្នុងស្រុកអ៊ីស្រាអែល! ចៅនេះនឹងទៅជាពន្លឺជីវិតរបស់អ្នក ហើយនឹងចិញ្ចឹមអ្នកក្នុងពេលអ្នកមានវ័យចាស់ផង ដ្បិតក្មេងនេះបានកើតពីកូនប្រសារអ្នកដែលស្រឡាញ់អ្នកដោយចិត្តស្មោះ នាងនេះប្រសើរជាងកូនប្រុសប្រាំពីរនាក់ទៅទៀត!»។ នាងណូអេមីក៏យកចៅមកបី ហើយចិញ្ចឹមបីបាច់តរៀងទៅ។ ស្រ្តីៗដែលនៅជិតខាងនាំគ្នានិយាយថា៖«នាងណូអេមីមានកូនប្រុសមួយ!»។ ពួកគេហៅកូននោះថា “អុបេដ” (ឈ្មោះនេះមានន័យថា “អ្នកបម្រើព្រះអម្ចាស់”)។ ក្រោយមក លោកអូបែដបង្កើតលោកយេសាយ ដែលជាព្រះបិតារបស់ព្រះបាទដាវីឌ។
ទំនុកតម្កើងលេខ ១២៨ (១២៧),១-៥ បទកាកគតិ
១. | អ្នកណាកោតខ្លាច | គោរពអំណាច | ព្រះជាអម្ចាស់ | ដើរតាមគន្លង |
មាគ៌ានៃព្រះ | អ្នកនោះឥតទាស់ | ពោរពេញមង្គល ។ | ||
២. | អ្នកនឹងទទួល | បានឥតប្រែប្រួល | យកនូវភោគផល | ចេញពីកិច្ចការ |
គ្រប់ពេលរៀងរាល់ | នឹងមានមង្គល | ចម្រើនពេកក្រៃ ។ | ||
៣. | ឯភរិយាអ្នក | ដែលនៅក្នុងផ្ទះ | ដូចដើមស្រស់ខ្ចី | មានស្លឹកមានផ្លែ |
ស្រគាលទុំខ្ចី | កូនប្រុសរញ៉ី | ដូចដើមឈើតូច ។ | ||
៤. | នេះជាអំណោយ | ទ្រង់ប្រទានឲ្យ | គេបានសម្រេច | ដល់អ្នកកោតខ្លាច |
ឫទ្ធីអំណាច | ផលច្រើនពន់ពេក | មិនពិបាករក ។ | ||
៥. | សូមទ្រង់ប្រសិទ្ធិ | ពរជ័យវិចិត្រ | ពីស៊ីយ៉ូនមក | ជារៀងរាល់ថ្ងៃ |
កុំបាច់លៃលក | ដើរតត្រុករក | ក្នុងជីវិតអ្នក ។ |
ពិធីអបអរសាទរព្រះគម្ពីរដំណឹងល្អ មថ ២៣,៩.១០
អាលេលូយ៉ា! អាលេលូយ៉ា! អ្នករាល់គ្នាមានព្រះបិតាតែមួយព្រះអង្គគត់ គឺព្រះបិតាដែលគង់នៅស្ថានបរមសុខ។ អ្នករាល់គ្នាក៏មានព្រះបរមគ្រូតែមួយគត់ គឺព្រះគ្រីស្ត។ អាលេលូយ៉ា! |
សូមថ្លែងព្រះគម្ពីរដំណឹងល្អតាមសន្តម៉ាថាយ មថ ២៣,១-១២
ពេលនេះ ព្រះយេស៊ូមានព្រះបន្ទូលទៅកាន់មហាជននិងក្រុមសាវ័កថា៖«ពួកធម្មចារ្យ និងពួកខាងគណៈផារីស៊ី មានភារកិច្ចបង្រៀនធម្មវិន័យរបស់លោកម៉ូសេ។ អ្វីៗដែលគេបង្រៀនអ្នករាល់គ្នា ចូរស្តាប់ហើយយកទៅប្រតិបត្តិតាមទៅ តែកុំយកតម្រាប់តាមអំពើដែលគេប្រព្រឹត្តឡើយ ដ្បិតគេមិនប្រតិ បត្តិតាមសេចក្តីដែលគេបង្រៀននោះទេ។ អ្នកទាំងនោះបានបង្កើតវិន័យយ៉ាងតឹងរ៉ឹងយកមកផ្ទុកលើមនុស្ស ហើយមិនជួយសម្រាលបន្ទុកនោះទេ សូម្បីតែបន្តិចក៏មិនជួយផង។ គេធ្វើកិច្ចការផ្សេងៗ ដើម្បីឲ្យមនុស្សម្នាកោតសរសើរ គឺគេធ្វើក្លាក់កាន់តែធំឡើងៗ និងធ្វើខ្សែរំយោលនៅជាយអាវកាន់តែវែងឡើងៗដែរ។ ពួកគេចូលចិត្តកន្លែងកិត្តិយសក្នុងពិធីជប់លៀង ហើយរើសកន្លែងអង្គុយនៅមុខគេក្នុងធម្មសាលា។ ពួកនេះចូលចិត្តឲ្យគេឱនកាយគោរពនៅតាមផ្សារ និងឲ្យគេហៅខ្លួនថា “លោកគ្រូ”។ រីឯអ្នករាល់គ្នាវិញ កុំបង្គាប់គេឲ្យហៅខ្លួនថា “លោកគ្រូ” សោះឡើយ ដ្បិតអ្នករាល់គ្នាមាន “ព្រះបរមគ្រូ” តែមួយគត់ ហើយអ្នករាល់គ្នាសុទ្ធតែជាបងប្អូននឹងគ្នា។ កុំហៅនរណាម្នាក់នៅលើផែនដីនេះថា “លោកឪពុក” ឲ្យសោះ ដ្បិតអ្នករាល់គ្នាមាន “ឪពុក” តែមួយគត់ គឺព្រះបិតាដែលគង់នៅស្ថានបរមសុខ។ កុំឲ្យគេហៅអ្នករាល់គ្នាថា “អ្នកណែនាំ” ឡើយ ដ្បិតមានព្រះគ្រីស្តតែមួយព្រះអង្គប៉ុណ្ណោះ ដែលណែនាំអ្នករាល់គ្នា។ អ្នកណាលើកតម្កើងខ្លួន អ្នកនោះនឹងត្រូវគេបន្ទាបចុះ។ រីឯអ្នកដែលបន្ទាបខ្លួន នឹងត្រូវគេលើកតម្កើងវិញ»។