ព្រះនាងម៉ារីឡើងស្ថានបរមសុខ (ល្ងាចទី១)

Posted on 19 ខែមិថុនា 202519 ខែមិថុនា 2025 by Siya Khim

បុណ្យព្រះជាម្ចាស់លើកព្រះនាងម៉ារីឡើងស្ថានបរមសុខ

(បុណ្យឱឡារិក)

_{(ពេលល្ងាចទី១)}

ឱព្រះអម្ចាស់អើយ! សូមយាងមកជួយទូលបង្គំ
សូមព្រះអម្ចាស់យាងមកជួយសង្គ្រោះយើងខ្ញុំផង!
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក
ហើយជាដរាបតរៀងទៅ។ អាម៉ែន! (អាលេលូយ៉ា!)

បទចម្រៀងចូល

ទំនុកតម្កើងលេខ ១១៣

បន្ទរទី១៖ ព្រះគ្រីស្តយាងឡើងស្ថានបរមសុខ ហើយព្រះអង្គបានរៀបចំកន្លែងអស់កល្បជានិច្ច ទុកសម្រាប់ឱ្យព្រះមាតាព្រះអង្គ ដែលមិនជំពាក់បាប អាលេលូយ៉ា!

^១	ចូរសរសើរតម្កើងព្រះអម្ចាស់! អ្នកបម្រើរបស់ព្រះ‌អម្ចាស់អើយ ចូរនាំគ្នាសរសើរតម្កើងព្រះអង្គ! ចូរនាំគ្នាសរសើរតម្កើងព្រះ‌នាមព្រះ‌អម្ចាស់!
^២	ចូរលើកតម្កើងព្រះ‌នាមព្រះ‌អម្ចាស់តាំងពីពេលនេះរហូតតទៅ!
^៣	តាំងពីពេលថ្ងៃរះ រហូតទល់ថ្ងៃលិច ចូរសរសើរតម្កើងព្រះ‌នាមរបស់ព្រះ‌អម្ចាស់!
^៤	ព្រះ‌អម្ចាស់គង់នៅពីលើប្រជា‌ជាតិទាំង‌ឡាយ សិរី‌រុងរឿងរបស់ព្រះ‌អង្គខ្ពស់ជាងផ្ទៃមេឃទៅទៀត។
^៥	តើមាននរណាអាចផ្ទឹមស្មើនឹងព្រះអម្ចាស់ជាព្រះរបស់យើងបាន? ព្រះ‌អង្គគង់នៅលើស្ថានដ៏ខ្ពស់បំផុត
^៦	ព្រះ‌អង្គទតមើលមកផ្ទៃមេឃ និងផែន‌ដី ដែលនៅខាងក្រោមព្រះ‌អង្គ។
^៧	ព្រះ‌អង្គលើកមនុស្សទន់ខ្សោយឡើងពីធូលីដី ព្រះ‌អង្គលើកមនុស្សទុរគតឡើងពីភក់ជ្រាំ
^៨	ដើម្បីឲ្យគេកាន់កាប់អំណាចរួមជាមួយពួកអ្នកធំ គឺរួមជាមួយពួកអ្នកធំនៅក្នុងចំណោមប្រជា‌រាស្ដ្ររបស់ព្រះ‌អង្គ។
^៩	ព្រះ‌អង្គប្រទានឲ្យស្ត្រីអារមានកូន ឲ្យនាងរស់នៅក្នុងផ្ទះយ៉ាងសប្បាយ ជាមួយកូនៗរបស់នាង។ អាលេលូយ៉ា!

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ ៖ ព្រះគ្រីស្តយាងឡើងស្ថានបរមសុខ ហើយព្រះអង្គបានរៀបចំកន្លែងអស់កល្បជានិច្ច ទុកសម្រាប់ឱ្យព្រះមាតាព្រះអង្គ ដែលមិនជំពាក់បាប អាលេលូយ៉ា!

ទំនុកតម្កើងលេខ ១៤៧,១២-២០

បន្ទរទី២៖ ដោយសារនាងអេវ៉ា ទ្វារនៃស្ថានបរមសុខត្រូវបិទ មិនឱ្យមនុស្សលោកចូលបាន ប៉ុន្តែ តាមរយៈព្រះនាងព្រហ្មចារិនីម៉ារី ទ្វារទាំងនោះបានបើកយ៉ាងធំទូលាយម្តងទៀត អាលេលូយ៉ា!

(បទព្រហ្មគីតិ)

^១២-	ក្រុងយេរូសាឡឹម	កុំស្ងាត់ស្ងៀមនៅរេរង់
	ព្រមទាំងក្រុងស៊ីយ៉ូន	ចូរត្រៀមខ្លួនថ្កើងព្រះម្ចាស់	។
^១៣-	ដ្បិតព្រះអង្គការពារ	អ្នករាល់គ្នាបានសុខណាស់
	ទ្រង់ឲ្យពរដល់រាស្រ្ត	ដែលរស់ពាសពេញទីក្រុង	។
^១៤-	ទ្រង់ប្រទានទឹកដី	មានសេរីសុខត្រចង់
	សន្តិភាពគ្រប់ជ្រុង	ស្រូវបម្រុងច្រើនមហិមា	។
^១៥-	នៅលើផ្ទៃផែនដី	ស្រស់ប្រិមប្រីយ៍ទ្រង់បញ្ជា
	ផ្សព្វផ្សាយគ្រប់ទិសា	ពីបញ្ជាព្រះអម្ចាស់	។
^១៦-	ព្រះអង្គឲ្យទឹកកក	ធ្លាក់ចុះមកច្រើនដេរដាស
	សន្សើមត្រជាក់ណាស់	ក៏ធ្លាក់ចុះតាមបញ្ជា	។
^១៧-	ព្រះអង្គធ្វើឲ្យព្រឹល	ធ្លាក់មិនខ្ជិលច្រើនមហិមា
	ឲ្យមានធាតុរងា	តើនរណាអាចទ្រាំបាន?	។
^១៨-	ពេលទ្រង់មានបន្ទូល	ធ្វើឲ្យព្រឹលទាំងប៉ុន្មាន
	ទឹកកកគ្រប់ទីស្ថាន	រលាយបានជាទឹកអស់	។
	ធ្វើឲ្យមានទាំងខ្យល់	បោកវិលវល់មិនឈប់សោះ
	បក់យកទឹកទាំងនោះ	ហូរតាមជ្រោះទៅមិនសល់	។
^១៩-	ទ្រង់សម្តែងឲ្យពូជ	លោកយ៉ាកុបស្តាប់បន្ទូល
	ក្រឹត្យវិន័យនិមល	ឲ្យអ៊ីស្រាអែលបានដឹង	។
^២០-	ព្រះអង្គពុំបញ្ជា	សព្វកិច្ចការអស់ទាំងហ្នឹង
	ឲ្យជាតិសាសន៍ផ្សេងដឹង	វិន័យទ្រង់នោះសោះឡើយ	។
	សិរីរុងរឿងដល់	ព្រះបិតាព្រះបុត្រា
	និងព្រះវិញ្ញាណផង	ដែលទ្រង់គង់នៅជានិច្ច	។

បន្ទរ ៖ ដោយសារនាងអេវ៉ា ទ្វារនៃស្ថានបរមសុខត្រូវបិទ មិនឱ្យមនុស្សលោកចូលបាន ប៉ុន្តែ តាមរយៈព្រះនាងព្រហ្មចារិនីម៉ារី ទ្វារទាំងនោះបានបើកយ៉ាងធំទូលាយម្តងទៀត អាលេលូយ៉ា!

បទលើកតម្កើងតាមលិខិតអេភេសូ (អភ ១,៣-១០)

បន្ទរទី៣៖ ព្រះជាម្ចាស់លើកតម្កើងព្រះនាងព្រហ្មចារិនីម៉ារីឡើងទៅលើស្ថានបរមសុខទាំងឡាយ។ ចូរឱ្យមនុស្សទាំងអស់នាំគ្នាមកលើកតម្កើងព្រះគ្រីស្តជាព្រះមហាក្សត្រ ហើយព្រះរាជ្យព្រះអង្គនឹងនៅស្ថិតស្ថេរឥតទីបញ្ចប់ឡើយ អាលេលូយ៉ា!

^៣	សូមលើកតម្កើងព្រះ‌ជាម្ចាស់ ជាព្រះ‌បិតារបស់ព្រះ‌យេស៊ូ‌គ្រីស្ត ជាព្រះ‌អម្ចាស់នៃយើង ដែលបានប្រោសប្រទានព្រះ‌ពរគ្រប់យ៉ាងផ្នែកខាងវិញ្ញាណពីស្ថានបរម‌សុខមកយើង ក្នុងអង្គព្រះ‌គ្រីស្ត។
^៤	ព្រះ‌អង្គបានជ្រើស‌រើសយើងក្នុងអង្គព្រះ‌គ្រីស្ត តាំងពីមុនកំណើតពិភព‌លោកមកម៉្លេះ ដើម្បីឲ្យយើងវិសុទ្ធ និងឥតសៅ‌ហ្មងនៅចំពោះព្រះ‌ភក្ត្រព្រះ‌អង្គ ព្រោះព្រះ‌អង្គមានព្រះ‌ហឫទ័យស្រឡាញ់យើង។
^៥	ព្រះ‌អង្គបានតម្រូវយើងទុកជាមុន ឲ្យធ្វើជាបុត្រធីតារបស់ព្រះ‌អង្គ ដោយ‌សារព្រះ‌យេស៊ូ‌គ្រីស្ត ស្របនឹងបំណងដ៏សប្បុរសរបស់ព្រះ‌អង្គ
^៦	ដើម្បីឲ្យយើងលើកតម្កើងសិរី‌រុងរឿងនៃព្រះ‌ហឫទ័យប្រណី‌សន្ដោស ដែលព្រះ‌អង្គបានប្រោសប្រទានមកយើង ក្នុងអង្គព្រះ‌បុត្រាដ៏ជាទីស្រឡាញ់របស់ព្រះ‌អង្គ។
^៧	ដោយយើងរួមក្នុងអង្គព្រះ‌គ្រីស្តនេះ ព្រះ‌ជាម្ចាស់បានលោះយើង ដោយព្រះ‌លោហិតរបស់ព្រះ‌អង្គ និងលើក‌លែងទោសឲ្យយើងបានរួចពីបាប តាមព្រះ‌ហឫទ័យប្រណី‌សន្ដោសដ៏លើស‌លប់របស់ព្រះ‌អង្គ។
^៨	ព្រះ‌ជាម្ចាស់ប្រណី‌សន្ដោសយើងយ៉ាងខ្លាំងបំផុត គឺព្រះ‌អង្គប្រទានឲ្យយើងមានតម្រិះ និងប្រាជ្ញាដ៏វាង‌វៃគ្រប់យ៉ាង។
^៩	ព្រះអង្គបានប្រោសឲ្យយើងស្គាល់គម្រោងការដ៏លាក់កំបាំងនៃព្រះ‌ហឫទ័យរបស់ព្រះ‌អង្គ តាមបំណងដ៏សប្បុរស ដែលព្រះ‌អង្គបានសម្រេចទុកជាមុនដោយព្រះ‌អង្គផ្ទាល់។
^១០	ព្រះអង្គចាត់ចែងគម្រោងការនេះឲ្យបានសម្រេច នៅគ្រាចុងក្រោយបំផុត គឺប្រមូលអ្វីៗទាំងអស់ដែលនៅស្ថានបរម‌សុខ និងនៅលើផែន‌ដី ឲ្យរួមគ្នានៅក្នុងអង្គព្រះ‌គ្រីស្ត ជាម្ចាស់តែមួយ។

បន្ទរ ៖ ព្រះជាម្ចាស់លើកតម្កើងព្រះនាងព្រហ្មចារិនីម៉ារីឡើងទៅលើស្ថានបរមសុខទាំងឡាយ។ ចូរឱ្យមនុស្សទាំងអស់នាំគ្នាមកលើកតម្កើងព្រះគ្រីស្តជាព្រះមហាក្សត្រ ហើយព្រះរាជ្យព្រះអង្គនឹងនៅស្ថិតស្ថេរឥតទីបញ្ចប់ឡើយ អាលេលូយ៉ា!

ព្រះបន្ទូលរបស់ព្រះជាម្ចាស់ (រ៉ូម ៨,៣០)

អស់អ្នកដែលព្រះ‌អង្គបានតម្រូវទុកជាមុននោះ ព្រះអង្គក៏បានត្រាស់ហៅ ហើយអ្នកដែលព្រះ‌អង្គបានត្រាស់ហៅនោះ ព្រះអង្គក៏ប្រោសឱ្យគេសុចរិត រីឯអស់អ្នកដែលព្រះអង្គប្រោសឱ្យសុចរិត ព្រះអង្គក៏ប្រទានឱ្យគេមានសិរី‌រុងរឿងដែរ។

បន្ទរ៖ នៅពេលព្រះនាងម៉ារីឡើងស្ថានបរមសុខ *ទេវទូតរបស់ព្រះជាម្ចាស់ មានអំណរសប្បាយយ៉ាងក្រៃលែង។ បន្ទរឡើងវិញ៖…
-ពួកគេក្រាបថ្វាយបង្គំព្រះអម្ចាស់ ហើយច្រៀងសរសើរតម្កើងព្រះអង្គ។ បន្ទរ៖ *…
-សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ។ បន្ទរ៖…

ទំនុកតម្កើងរបស់ព្រះនាងម៉ារី

បន្ទរ៖ អំណើះតទៅ មនុស្សគ្រប់ជំនាន់នឹងពោលថា ខ្ញុំជាអ្នកមានសុភមង្គលពិតមែន ព្រះដ៏មានឫទ្ធានុភាពបានសម្ដែង ការប្រសើរអស្ចារ្យចំពោះរូបខ្ញុំ អាលេលូយ៉ា!

^៤៦	«ព្រលឹងខ្ញុំសូមលើកតម្កើងព្រះ‌អម្ចាស់*
^៤៧	ខ្ញុំមានចិត្តអំណរយ៉ាងខ្លាំង ព្រោះព្រះជាម្ចាស់ជាព្រះសង្គ្រោះរបស់ខ្ញុំ
^៤៨	ព្រះអង្គទតមើលមកខ្ញុំ ដែលជាអ្នកបម្រើដ៏ទន់ទាបរបស់ព្រះអង្គ អំណើះតទៅ មនុស្សគ្រប់ជំនាន់នឹងពោលថា ខ្ញុំជាអ្នកមានសុភមង្គលពិតមែន
^៤៩	ព្រះដ៏មានតេជានុភាព បានសម្ដែងការប្រសើរអស្ចារ្យចំពោះរូបខ្ញុំ។ ព្រះនាមរបស់ព្រះអង្គពិតជាវិសុទ្ធមែន!
^៥០	ទ្រង់មានព្រះហឫទ័យមេត្តាករុណា ដល់អស់អ្នកដែលកោតខ្លាចព្រះអង្គនៅគ្រប់ជំនាន់តរៀងទៅ
^៥១	ទ្រង់បានសម្ដែងឫទ្ធិបារមី កម្ចាត់មនុស្សដែលមានចិត្តឆ្មើងឆ្មៃ
^៥២	ទ្រង់បានទម្លាក់អ្នកកាន់អំណាចចុះពីតំណែង ហើយទ្រង់លើកតម្កើងមនុស្សទន់ទាបឡើង។
^៥៣	ទ្រង់បានប្រទានសម្បត្តិយ៉ាងបរិបូណ៌ ដល់អស់អ្នកដែលស្រេកឃ្លាន ហើយបណ្តេញពួកអ្នកមានឱ្យត្រឡប់ទៅវិញដោយដៃទទេ។
^៥៤	ព្រះអង្គបានជួយប្រជារាស្ត្រអ៊ីស្រាអែល ជាអ្នកបម្រើរបស់ព្រះអង្គ ហើយតែងតែសម្ដែងព្រះហឫទ័យមេត្តាករុណា
^៥៥	ដល់លោកអប្រាហាំ និងពូជពង្សរបស់លោកជានិច្ចតរៀងទៅ ដូចទ្រង់បានសន្យាជាមួយបុព្វបុរសយើង ឥតភ្លេចសោះឡើយ។

ឬ ទំនុកតម្កើងរបស់ព្រះនាងម៉ារី (តាមបែបស្មូត) បទព្រហ្មគីតិ

^៤៧	ខ្ញុំមានចិត្តអំណរ	សប្បាយអរពន់ពេកណាស់
	ព្រោះខ្ញុំបានដឹងច្បាស់	ថាព្រះម្ចាស់ទ្រង់សង្គ្រោះ	។
^៤៨	ព្រះអង្គទតមកខ្ញុំ	ជាអ្នកបម្រើស្ម័គ្រស្មោះ
	តទៅមនុស្សទាំងអស់	ថាខ្ញុំនេះសែនសុខក្រៃ	។
^៤៩	ព្រះដ៏មានឫទ្ធា	ខ្លាំងអស្ចារ្យលើលោកីយ៍
	សម្ដែងឫទ្ធិបារមី	ព្រះនាមថ្លៃថ្លាវិសុទ្ធ	។
^៥០	ទ្រង់មានព្រះហឫទ័យ	ត្រាប្រណីខ្ពស់បំផុត
	ដល់អ្នកគោរពកោត	ខ្លាចព្រះអង្គរៀងរហូត	។
^៥១	ព្រះអង្គសម្ដែងឫទ្ធិ	អស្ចារ្យពិតមិនរលត់
	កម្ចាត់មនុស្សមានពុត	ឆ្មើងបំផុតឫកខែងរែង	។
^៥២	ទ្រង់បានច្រានទម្លាក់	អ្នកធំធ្លាក់ពីតំណែង
	ឥតមានខ្លាចរអែង	ហើយទ្រង់តែងលើកអ្នកទាប	។
^៥៣	ព្រះអង្គប្រោសប្រទាន	ឱ្យអ្នកឃ្លានឆ្អែតដរាប
	អ្នកមានធនធានស្រាប់	ដេញត្រឡប់ដៃទទេ	។
^៥៤	ព្រះអង្គបានជួយរាស្ត្រ	ទ្រង់ទាំងអស់ឥតប្រួលប្រែ
	អ៊ីស្រាអែលនៅក្បែរ	ជាបម្រើដ៏ស្មោះស្ម័គ្រ	។
^៥៥	ទ្រង់តែងមានព្រះទ័យ	ករុណាក្រៃមិនថ្នាំងថ្នាក់
	លោកអប្រាហាំជាក់	និងពូជពង្សលោកជានិច្ច	។
	ដូចទ្រង់បានសន្យា	នឹងដូនតាឥតមានភ្លេច
	ព្រះអង្គចាំជានិច្ច	គ្មានកលកិច្ចប្រែប្រួលឡើយ	។
	សិរីរុងរឿងដល់	ព្រះបិតាព្រះបុត្រា
	និងព្រះវិញ្ញាណផង	ដែលទ្រង់គង់នៅជានិច្ច	។

បន្ទរ ៖ អំណើះតទៅ មនុស្សគ្រប់ជំនាន់នឹងពោលថា ខ្ញុំជាអ្នកមានសុភមង្គលពិតមែន ព្រះដ៏មានឫទ្ធានុភាពបានសម្ដែង ការប្រសើរអស្ចារ្យចំពោះរូបខ្ញុំ អាលេលូយ៉ា!

ពាក្យអង្វរសកល

ចូរយើងកោតសរសើរព្រះជាម្ចាស់ជាព្រះបិតា ដ៏មានឫទ្ធានុភាពសព្វប្រការ ! ព្រះអង្គសព្វព្រះហឫទ័យឱ្យមនុស្សគ្រប់ជំនាន់ប្រារព្ធពិធីបុណ្យព្រះនាងម៉ារី ដែលជាព្រះមាតារបស់ព្រះបុត្រាព្រះអង្គ។ នៅពេលនេះ យើងខ្ញុំសូមទូលព្រះអង្គថា ៖

បន្ទរ៖ បពិត្រព្រះនាងម៉ារី ជាទីគាប់ព្រះហឫទ័យព្រះជាម្ចាស់ ! សូមជួយអង្វរព្រះអង្គឱ្យយើងខ្ញុំផង !

ឱព្រះជាម្ចាស់ដែលប្រព្រឹត្តការអស្ចារ្យ ! ព្រះអង្គបានធ្វើឱ្យព្រះនាងព្រហ្មចារិនីមិនជំពាក់បាប ចូលរួមចំណែកទាំងរូបកាយ និងព្រលឹងក្នុងសិរីរុងរឿងរបស់ព្រះបុត្រាព្រះអង្គនៅស្ថានបរមសុខ
—សូមដឹកនាំចិត្តបុត្រធីតារបស់ព្រះអង្គ ឱ្យទៅដល់សិរីរុងរឿងដូចគ្នានោះដែរ។ (បន្ទរ)

បពិត្រព្រះអម្ចាស់ ! សូមព្រះអង្គប្រោសឱ្យព្រះសហគមន៍មានចិត្តគំនិតតែមួយ ចេះរួបរួមគ្នាក្នុងសេចក្តីស្រឡាញ់របស់ព្រះអង្គ
—ហើយសូមព្រះអង្គថែរក្សាគ្រីស្តបរិស័ទ ឱ្យចេះរួបរួមគ្នាក្នុងការអធិដ្ឋានជាមួយព្រះនាងម៉ារី ជាមាតារបស់ព្រះយេស៊ូ។ (បន្ទរ)

ព្រះអង្គបានប្រោសឱ្យព្រះនាងម៉ារី ជាមាតានៃធម៌មេត្តាករុណា
—សូមឱ្យមនុស្សទាំងអស់ដែលប្រឈមនឹងទុក្ខលំបាក ទទួលអារម្មណ៍នៃសេចក្តីស្រឡាញ់ក្នុងភាពជាម្តាយរបស់ព្រះនាង។ (បន្ទរ)

បពិត្រព្រះបិតា ! ព្រះអង្គសព្វព្រះហឫទ័យឱ្យព្រះនាងម៉ារីធ្វើជាមាតា ក្នុងក្រុមគ្រួសាររបស់ព្រះយេស៊ូ និងលោកយ៉ូសែប
—សូមឱ្យអ្នកម្តាយទាំងអស់ចិញ្ចឹមសេចក្តីស្រឡាញ់ និងភាពដ៏វិសុទ្ធ តាមរយៈពាក្យអង្វររបស់ព្រះនាង។ (បន្ទរ)

ព្រះអង្គបានបំពាក់មកុដម្ចាស់ក្សត្រីយ៍នៃស្ថានបរមសុខឱ្យព្រះនាងម៉ារី
—សូមឱ្យមរណបុគ្គលទាំងឡាយរីករាយសប្បាយ រួមជាមួយសន្តបុគ្គលទាំងអស់ ក្នុងព្រះរាជ្យរបស់ព្រះអង្គអស់កល្បជានិច្ច។ (បន្ទរ)

ធម៌ “ឱព្រះបិតា”

ពាក្យអធិដ្ឋាន

ឱព្រះជាម្ចាស់អើយ ! ព្រះអង្គសព្វព្រះហឫទ័យទតមើលភាពទន់ទាបរបស់ព្រះនាងព្រហ្មចារិនីម៉ារី និងប្រណីសន្តោសលើកព្រះនាងឡើង។ ព្រះអង្គប្រោសព្រះនាងឱ្យប្រសូតព្រះបុត្រាតែមួយរបស់ព្រះអង្គទៅជាមនុស្ស បានជានៅថ្ងៃនេះ ព្រះនាងទទួលភួងជ័យពោរពេញដោយសិរីរុងរឿងដ៏លើសលប់។ តាមរយៈពាក្យទូលអង្វររបស់ព្រះនាង សូមព្រះអង្គមេត្តាសង្រ្គោះយើងខ្ញុំ និងលើកយើងខ្ញុំឡើងទៅឯស្ថានដ៏ខ្ពង់ខ្ពស់បំផុត។ យើងខ្ញុំសូមអង្វរព្រះអង្គដោយរួមជាមួយព្រះយេស៊ូគ្រីស្ត ជាព្រះបុត្រាព្រះអង្គ ដែលមានព្រះជន្មគង់នៅ និងសោយរាជ្យរួមជាមួយព្រះបិតា និងព្រះវិញ្ញាណដ៏វិសុទ្ធអស់កល្បជាអង្វែងតរៀងទៅ។ អាម៉ែន!

ពិធីបញ្ចប់៖ ប្រសិនបើលោកបូជាចារ្យ ឬលោកឧបដ្ឋាកធ្វើជាអធិបតី លោកចាត់បងប្អូនឱ្យទៅដោយពោលថា ៖
សូមព្រះអម្ចាស់គង់ជាមួយបងប្អូន
ហើយគង់នៅជាមួយវិញ្ញាណរបស់លោកផង
សូមព្រះជាម្ចាស់ដ៏មានឫទ្ធានុភាពសព្វប្រការ ប្រទានព្រះពរដល់អស់បងប្អូន
គឺព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
អាម៉ែន។
សូមអញ្ជើញឱ្យបានសុខសាន្ត
សូមអរព្រះគុណព្រះជាម្ចាស់។
ពេលមានវត្តមានលោកបូជាចារ្យ ឬលោកឧបដ្ឋាក និងបុគ្គលម្នាក់សូត្រ ពាក្យអធិដ្ឋានពេលល្ងាច ៖
សូមព្រះអម្ចាស់ប្រទានព្រះពរ និងការពារយើងខ្ញុំឱ្យរួចផុតពីមារកំណាច ព្រមទាំងប្រទានជីវិតអស់កល្បជានិច្ចឱ្យយើងខ្ញុំ។
អាម៉ែន។

100 Views

Post Views: 102