រដូវធម្មតា សប្តាហ៍ទី១១ ថ្ងៃអង្គារ

Posted on 26 ខែឧសភា 202526 ខែឧសភា 2025 by Siya Khim

រដូវធម្មតា

ថ្ងៃអង្គារ អាទិត្យទី១១
_{(ពេលថ្ងៃ)}

ឱព្រះអម្ចាស់អើយ! សូមយាងមកជួយទូលបង្គំ
សូមព្រះអម្ចាស់យាងមកជួយសង្គ្រោះយើងខ្ញុំផង!
សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក
ហើយជាដរាបតរៀងទៅ។ អាម៉ែន! (អាលេលូយ៉ា!)

ចម្រៀងចូល (សូមជ្រើសរើសបទចម្រៀងមួយ)

ទំនុកតម្កើងលេខ ១១៩,៩៧-១០៤

ធម្មវិន័យមានឱជារស

បន្ទរទី១ ៖ សេចក្ដីស្រឡាញ់នាំឱ្យប្រតិបត្តិតាមវិន័យបានពេញលក្ខណៈ។

^៩៧-	ទូលបង្គំស្រឡាញ់ធម្មវិន័យរបស់ព្រះអង្គខ្លាំងណាស់ ទូលបង្គំសញ្ជឹងគិតអំពីធម្មវិន័យនេះជារៀងរាល់ថ្ងៃ។
^៩៨-	វិន័យរបស់ព្រះអង្គធ្វើឱ្យទូលបង្គំមានប្រាជ្ញាវាងវៃជាងខ្មាំងសត្រូវ ដ្បិតទូលបង្គំរិះគិតពីវិន័យនេះជានិច្ច។
^៩៩-	ទូលបង្គំចេះដឹងជាងគ្រូៗទាំងប៉ុន្មានរបស់ទូលបង្គំទៅទៀត ដ្បិតទូលបង្គំយកដំបូន្មានទាំងប៉ុន្មាននេះ មកសញ្ជឹងគិត។
^១០០-	ទូលបង្គំចេះរិះគិតពិចារណា ជាងចាស់ៗព្រឹទ្ធាចារ្យទៅទៀត ដ្បិតទូលបង្គំបានប្រព្រឹត្តតាមច្បាប់របស់ព្រះអង្គ។
^១០១-	ទូលបង្គំចៀសចេញឆ្ងាយពីផ្លូវអាក្រក់ទាំងប៉ុន្មាន ដើម្បីប្រតិបត្តិតាមព្រះបន្ទូលរបស់ព្រះអង្គ។
^១០២-	ទូលបង្គំមិនងាកចេញពីសេចក្តីដែលព្រះអង្គបានសម្រេចឡើយ ដ្បិតព្រះអង្គប្រៀនប្រដៅទូលបង្គំដូច្នេះ។
^១០៣-	ព្រះបន្ទូលសន្យារបស់ព្រះអង្គ ប្រៀបបាននឹងអាហារដ៏ឆ្ងាញ់ពិសេសសម្រាប់ទូលបង្គំ មានរសជាតិផ្អែមជាងទឹកឃ្មុំទៅទៀត។
^១០៤-	ច្បាប់របស់ព្រះអង្គធ្វើឱ្យទូលបង្គំចេះរិះគិតពិចារណា ហេតុនេះហើយបានជាទូលបង្គំស្អប់ផ្លូវវៀចវេរ។

សូមកោតសរសើរព្រះបិតា និងព្រះបុត្រា និងព្រះវិញ្ញាណដ៏វិសុទ្ធ
ដែលព្រះអង្គគង់នៅតាំងពីដើមរៀងមក ហើយជាដរាបតរៀងទៅ អាម៉ែន!

បន្ទរ ៖ សេចក្ដីស្រឡាញ់នាំឱ្យប្រតិបត្តិតាមវិន័យបានពេញលក្ខណៈ។

ទំនុកតម្កើងលេខ ៧៤

សំណោកអំពីការបំផ្លិចបំផ្លាញព្រះវិហារ

កុំខ្លាចអស់អ្នកដែលសម្លាប់បានត្រឹមតែរូបកាយ (មថ ១០,២៨)។

បន្ទរទី២ ៖ ឱព្រះអម្ចាស់អើយ ! សូមកុំបំភ្លេចប្រជា‌រាស្ដ្រដែលព្រះ‌អង្គបានយក មកធ្វើជាកម្ម‌សិទ្ធិរបស់ព្រះអង្គ តាំងពីដើមរៀងមកនោះឡើយ។

(ក)

(បទព្រហ្មគីតិ)

^១-	បពិត្រព្រះម្ចាស់អើយ	ដូចម្តេចឡើយក៏ព្រះអង្គ
	ឈប់នឹកទ្រង់បោះបង់	ឱ្យរញ៉ង់នៅកំព្រា	។
	ម្តេចក៏ទ្រង់ពិរោធ	យើងរហូតឱ្យវេទនា
	ភ្លេចអស់រាស្ត្រប្រជា	ធ្លាប់គាំពារត្រាប្រណី	។
^២-	កុំភ្លេចព្រះសហគមន៍	ដែលទ្រង់សុំមកថ្នមបី
	ជាកម្មសិទ្ធិប្រពៃ	សូមអាល័យភ្នកនឹកនា	។
	គឺពួកកុលសម្ពន្ធ	ដែលទ្រង់បានលោះមកជា
	មរតកថ្លៃមហិមា	រកពណ៌នាក៏ពុំបាន	។
	សូមនឹកដល់បងប្អូន	ភ្នំស៊ីយ៉ូនល្អថ្កើងថ្កាន
	ទ្រង់យកជាទីស្ថាន	គង់នៅបានក្តីសុខដុម	។
^៣-	សូមយាងមកវិហារ	ដែលគ្រាំគ្រាយូរខែឆ្នាំ
	សក្ការៈត្រូវខ្ទេចខ្ទាំ	លែងរឹងមាំខ្មាំងបំផ្លាញ	។
^៤-	បច្ចាមិត្រព្រះអង្គ	ស្រែករំពងគ្រប់ទីស្ថាន
	ដែលព្រះអង្គធ្លាប់បាន	ជួបនឹងយើងរៀងរាល់ថ្ងៃ	។
^៥-	ពួកគេប្រៀបបានទៅ	ផ្លែពូថៅអ្នកកាប់ព្រៃ
	គេប្រឹងអត់សំចៃ	រៀងរាល់ថ្ងៃឥតឈប់ឈរ	។
^៦-	គេយកផ្លែពូថៅ	វាយសំដៅក្បាច់ដ៏ល្អ
	រចនាស្រស់បវរ	មិនឈប់ឈរមិនស្រណោះ	។
^៧-	គេដុតទីសក្ការ	ដ៏ថ្លៃថ្លាចោលទាំងអស់
	បន្ថោកដំណាក់ព្រះ	ជាអម្ចាស់ឥតមានក្រែង	។
^៨-	គេនាំគ្នាគិតថា	នឹងផ្តន្ទាឱ្យជាក់ស្តែង
	ដុតបំផ្លាញកន្លែង	គ្មានរអែងនៅក្នុងស្រុក	។
^៩-	យើងខ្ញុំលែងឃើញអ្វី	ដែលប្រពៃតទៅមុខ
	ជាទីសម្គាល់ទុក	ថាជាតិយើងគឺជាអ្វី	។
	យើងលែងមានទាំងអស់	បាត់ទាំងឈ្មោះព្យាការី
	គ្មាននរណាដឹងអី	ថាយើងនៅច្នេះដល់ណា	។
	សិរីរុងរឿងដល់	ព្រះបិតាព្រះបុត្រា
	និងព្រះវិញ្ញាណផង	ដែលទ្រង់គង់នៅជានិច្ច	។

បន្ទរ ៖ ឱព្រះអម្ចាស់អើយ ! សូមកុំបំភ្លេចប្រជា‌រាស្ដ្រដែលព្រះ‌អង្គបានយក មកធ្វើជាកម្ម‌សិទ្ធិរបស់ព្រះអង្គ តាំងពីដើមរៀងមកនោះឡើយ។

បន្ទរទី៣ ៖ ឱព្រះជាម្ចាស់អើយ ! សូមក្រោកឡើងការពារព្រះកិត្តិនាមរបស់ព្រះអង្គ។

(ខ)

^១០-	បពិត្រព្រះជាម្ចាស់! តើឱ្យបច្ចាមិត្តត្មះតិះដៀលព្រះអង្គដល់ពេលណា? តើឱ្យខ្មាំងសត្រូវប្រមាថព្រះនាមព្រះអង្គដល់ណាទៀត?
^១១-	ហេតុអ្វីបានជាព្រះអង្គមិនព្រមយាងមកជួយយើងខ្ញុំ ហេតុអ្វីបានជាព្រះអង្គលាក់ព្រះបារមីទុកដូច្នេះ?
^១២-	បពិត្រព្រះជាម្ចាស់! ព្រះអង្គជាព្រះមហាក្សត្ររបស់ទូលបង្គំ តាំងពីដើមរៀងមក ព្រះអង្គតែងតែសង្គ្រោះយើងខ្ញុំជាច្រើនលើកច្រើនសា នៅក្នុងស្រុកនេះ។
^១៣-	ព្រះអង្គបានបង្ក្រាបសមុទ្រ ដោយសារឫទ្ធានុភាពរបស់ព្រះអង្គ ព្រះអង្គបានវាយកម្ទេចក្បាលនាគនៅក្នុងសមុទ្រ
^១៤-	ព្រះអង្គបានវាយកម្ទេចក្បាលស្តេចក្រពើ បោះវាទៅឱ្យស្តេចនានានៅវាលរហោស្ថានស៊ី។
^១៥-	ព្រះអង្គបានធ្វើឱ្យមានទឹកផុសចេញពីប្រភពទឹកនានា ហូរដូចទឹកជ្រោះ ព្រះអង្គបានធ្វើឱ្យទន្លេដែលមិនចេះរីង ប្រែជារីងស្ងួតទៅវិញ។
^១៦-	ព្រះអង្គជាម្ចាស់លើថ្ងៃ ជាម្ចាស់លើយប់ ព្រះអង្គបានដាក់ព្រះចន្ទ និងព្រះអាទិត្យ ភ្ជាប់នឹងកន្លែងរបស់គេ។
^១៧-	ព្រះអង្គបានកំណត់ព្រំដែននៃផែនដី ព្រះអង្គក៏បានបង្កើតរដូវប្រាំង និងរដូវវស្សាដែរ។
^១៨-	ឱព្រះអម្ចាស់អើយ! សូមកុំភ្លេចថា បច្ចាមិត្តបានត្មះតិះដៀលព្រះអង្គ សាសន៍ល្ងីល្ងើនោះ ជេរប្រមាថព្រះនាមព្រះអង្គ!។
^១៩-	សូមកុំប្រគល់ជីវិតប្រជារាស្ត្ររបស់ព្រះអង្គ ទៅក្នុងកណ្តាប់ដៃរបស់ខ្មាំងដ៏សាហាវ សូមកុំបំភ្លេចប្រជារាស្ត្រដ៏កំសត់ទុគ៌តរបស់ព្រះអង្គ ជារៀងរហូតឡើយ។
^២០-	សូមនឹកដល់សម្ពន្ធមេត្រីដែលព្រះអង្គបានចងជាមួយយើងខ្ញុំ! ប្រជាជននាំគ្នាលាក់ខ្លួន ព្រោះមានមនុស្សឃោរឃៅពាសពេញស្រុក។
^២១-	សូមកុំឱ្យអស់អ្នកដែលត្រូវគេជិះជាន់ អាម៉ាស់មុខទៀតឡើយ សូមឱ្យជនក្រីក្រ និងជនកំសត់ទុគ៌ត សរសើរតម្កើងព្រះនាមព្រះអង្គ។
^២២-	ឱព្រះជាម្ចាស់អើយ! សូមក្រោកឡើងការពារព្រះកិត្តិនាមរបស់ព្រះអង្គ សូមកុំបំភ្លេចពាក្យដែលជនល្ងីល្ងើទាំងនេះ ប្រមាថព្រះអង្គជារៀងរាល់ថ្ងៃ។
^២៣-	សូមកុំបំភ្លេចសម្រែកនៃខ្មាំងសត្រូវរបស់ព្រះអង្គ គេស្រែកយ៉ាងអឺងកងទាស់នឹងព្រះអង្គ ឥតឈប់ឈរឡើយ។

បន្ទរ ៖ ឱព្រះជាម្ចាស់អើយ ! សូមក្រោកឡើងការពារព្រះកិត្តិនាមរបស់ព្រះអង្គ។

ព្រះបន្ទូលរបស់ព្រះជាម្ចាស់

ម៉ោង៩ ព្រឹក

ព្រះបន្ទូលរបស់ព្រះជាម្ចាស់ (៩ ព្រឹក) យរ ២២,៣

ព្រះ‌អម្ចាស់មានព្រះ‌បន្ទូលថា: ចូរនាំគ្នាប្រព្រឹត្តតាមសេចក្ដីសុចរិត និងយុត្តិធម៌ ចូរដោះលែងអស់អ្នកដែលត្រូវគេជិះ‌ជាន់សង្កត់‌សង្កិន។ មិនត្រូវធ្វើបាបជនអន្តោ‌ប្រវេសន៍ ក្មេងកំព្រា និងស្ត្រី‌មេម៉ាយឡើយ ហើយក៏មិនត្រូវប្រើអំពើហិង្សា និងបង្ហូរឈាមជនស្លូតត្រង់នៅទីនេះដែរ។

បន្ទរ៖ ព្រះអង្គវិនិច្ឆ័យទោសប្រជាជនទាំង‌ឡាយដោយយុត្តិធម៌។
—ព្រះជាម្ចាស់នឹងប្រទានផលឱ្យម្នាក់ៗ តាមអំពើដែលខ្លួនបានប្រព្រឹត្ត។

ពាក្យអធិដ្ឋាន

បពិត្រព្រះជាម្ចាស់ដ៏មានឫទ្ធានុភាពសព្វប្រការ និងមានព្រះជន្មគង់នៅអស់កល្បជានិច្ច! ព្រះអង្គបានចាត់ព្រះវិញ្ញាណដ៏វិសុទ្ធ ឱ្យយាងមកសណ្ឋិតលើក្រុមគ្រីស្តទូត ហេតុនេះ សូមព្រះអង្គចាត់ព្រះវិញ្ញាណនៃសេចក្តីស្រឡាញ់នេះ ឱ្យយាងមកសណ្ឋិតលើយើងខ្ញុំ ដើម្បីឱ្យយើងខ្ញុំធ្វើជាសាក្សីអំពីព្រះអង្គនៅចំពោះមុខអ្នកដទៃផង។ យើងខ្ញុំសូមអង្វរព្រះអង្គ ដោយរួមជាមួយព្រះគ្រីស្ត ជាអម្ចាស់យើងខ្ញុំ។ អាម៉ែន!

ម៉ោង១២ ថ្ងៃត្រង់

ព្រះបន្ទូលរបស់ព្រះជាម្ចាស់ (១២ ថ្ងៃត្រង់) ទក ១៥,៧-៨

ក្នុងបណ្តាក្រុងនៃស្រុកដែលព្រះ‌អម្ចាស់ ជាព្រះរបស់អ្នកប្រទានឱ្យ ប្រសិនបើមានបង‌ប្អូនខ្លះរបស់អ្នកធ្លាក់ខ្លួនក្រ មិនត្រូវមានចិត្តកំណាញ់ ឥតរវី‌រវល់ជួយបង‌ប្អូនដែលក្រនោះឡើយ។ ផ្ទុយទៅវិញ ត្រូវជួយគាត់ដោយឱ្យខ្ចីប្រាក់ តាមចំនួនដែលគាត់ត្រូវការ។

បន្ទរ៖ បពិត្រព្រះអម្ចាស់ ព្រះអង្គឈ្វេងយល់បំណងចិត្តរបស់មនុស្សទន់‌ទាប។
—ព្រះអង្គលើកទឹកចិត្តគេ។

ពាក្យអធិដ្ឋាន

បពិត្រព្រះអម្ចាស់ជាព្រះបិតា ! ព្រះអង្គបានបង្ហាញឱ្យលោកសិលាស្គាល់ពីព្រះហឫទ័យរបស់ព្រះអង្គ ដើម្បីនាំមនុស្សគ្រប់ជាតិសាសន៍ឱ្យទទួលការសង្គ្រោះ។ សូមឱ្យរាល់កិច្ចការដែលយើងខ្ញុំធ្វើ បានលើកតម្កើងព្រះអង្គ និងនាំយកគម្រោងការនៃព្រះហឫទ័យប្រណីសន្តោសរបស់ព្រះអង្គ ដល់មនុស្សទាំងអស់ផង។ យើងខ្ញុំសូមអង្វរព្រះអង្គ ដោយរួមជាមួយព្រះគ្រីស្ត ជាអម្ចាស់យើងខ្ញុំ។ អាម៉ែន!

ម៉ោង៣ រសៀល

ព្រះបន្ទូលរបស់ព្រះជាម្ចាស់ (៣ រសៀល) សុភ ២២,២២-២៣

កុំរឹបអូសយកទ្រព្យសម្បត្តិពីជនទុច្ចរិត ព្រោះតែឃើញគ្នាទន់ខ្សោយ ហើយកុំសង្កត់សង្កិនជនក្រីក្រដែលគ្មានអ្នកការពារ ដ្បិតព្រះអម្ចាស់នឹងរកយុត្តិធម៌ឱ្យពួកគេ ហើយដកហូតយកជីវិតពីអស់អ្នក ដែលដកហូតយកទ្រព្យសម្បត្តិរបស់ពួកគេ។

បន្ទរ៖ ព្រះអម្ចាស់រំដោះជន‌ទុរគតដែលគ្មានទីពឹង។
—ព្រះអង្គសង្គ្រោះជីវិតមនុស្សក្រីក្រ។

ពាក្យអធិដ្ឋាន

បពិត្រព្រះបិតា! ព្រះអង្គបានចាត់ទេវទូតឱ្យទៅជួបលោកគ័រនេល្យូស ដើម្បីបង្ហាញផ្លូវទៅកាន់ការសង្រ្គោះ។ សូមព្រះអង្គជួយយើងខ្ញុំឱ្យប្រព្រឹត្តកិច្ចការមនុស្សធម៌ ដើម្បីសង្គ្រោះដល់ពិភពលោក ដូច្នេះ ព្រះសហគមន៍អាចនាំយើងខ្ញុំ និងមនុស្សទាំងអស់ចូលទៅចំពោះព្រះភក្រ្តព្រះអង្គ។ យើងខ្ញុំសូមអង្វរព្រះអង្គ ដោយរួមជាមួយព្រះគ្រីស្ត ជាអម្ចាស់យើងខ្ញុំ។ អាម៉ែន!

សូមកោតសរសើរព្រះអម្ចាស់!
-សូមអរព្រះគុណព្រះជាម្ចាស់!

19 Views

Post Views: 19